នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណៈកម្មការអន្តរក្រសួងចុះពិនិត្យវាយតម្លៃការងារថែទាំផ្លូវចំនួន៨ខ្សែ ក្នុងខេត្តពោធិ៍សាត់
ឯកឧត្តម កែវ រតនៈ បញ្ជាក់ជាថ្មីថាបច្ចុប្បន្នកម្ពុជាពុំបាននាំចូលអគ្គិសនី ប្រេងសាំង និង​ឧស្ម័ន​ពី​ប្រទេស​ថៃ​នោះទេ
ទំនប់អូរតេធិបតី ត្រៀមផ្គត់ផ្គង់ទឹកស្អាតជូនពលរដ្ឋរាប់ពាន់គ្រួសារបន្ថែមទៀតក្នុងខេត្តមណ្ឌលគិរី
រដ្ឋមន្ត្រីអាកាសចរណ៍ស៊ីវិល ចុះពិនិត្យអាកាសយានដ្ឋានអន្តរជាតិតេជោ ដើម្បីត្រៀម​ផ្តល់​វិញ្ញា​បន​ប័ត្រ​ដល់ប្រតិបត្តិករ

នយោបាយ​ និង ការអភិវឌ្ឍន៍

ប្រធានាធិបតីហុងគ្រី លាលែងពីតំណែងជុំវិញការលើកលែងទោសករណីរំលោភផ្លូវភេទលើកុមារ ក្រោយផ្ទុះការតវ៉ាទូទាំងប្រទេស

2024/02/11 11:39:14 am        165
Facebook Telegram Linkin
ប្រធានាធិបតីអភិរក្សនិយមរបស់ប្រទេសហុងគ្រីបានលាលែងពីតំណែងកាលពីថ្ងៃសៅរ៍ស្របពេលមានការតវ៉ាជាសាធារណៈចំពោះការលើកលែងទោសដែលលោកស្រីបានផ្តល់ដល់បុរសម្នាក់ដែលត្រូវបានកាត់ទោសថាជាអ្នកសមគំនិតក្នុងសំណុំរឿងរំលោភបំពានផ្លូវភេទលើកុមារ ជាការសម្រេចចិត្តមួយបានលាតត្រដាងរឿងអាស្រូវនយោបាយមិនធ្លាប់មានសម្រាប់រដ្ឋាភិបាលជាតិនិយម ដែលគ្រប់គ្រងរដ្ឋាភិបាលអ្នកជាតិនិយមជាយូរមកហើយ។លោកស្រី កាតាលីន ណូវ៉ាក់ (Katalin Novák)អាយុ៤៦ ឆ្នាំ បានប្រកាសនៅក្នុងសារទូរទស្សន៍ថាលោកស្រីនឹងចុះចេញពីតំណែងជាប្រធានាធិបតីដែលលោកស្រីបានកាន់អំណាចតាំងពីឆ្នាំ២០២២មក។ការសម្រេចចិត្តរបស់លោកស្រីបានកើតឡើងបន្ទាប់ពីការផ្ទុះកំហឹងជាសាធារណៈជាងមួយសប្តាហ៍បន្ទាប់ពីត្រូវបានគេបង្ហាញថាប្រធានាធិបតីរូបនេះ បានចេញការលើកលែងទោសកាលពីខែមេសា ឆ្នាំ ២០២៣ដល់បុរសម្នាក់ដែលត្រូវបានកាត់ទោសពីបទលាក់បាំងការរំលោភផ្លូវភេទកុមារនៅក្នុងផ្ទះកុមារដែលគ្រប់គ្រងដោយរដ្ឋ។មនុស្សជាង១ពាន់នាក់នៅក្នុងរដ្ឋធានីនៃប្រទេសហុងគ្រី បានតវ៉ានៅថ្ងៃសុក្រ ថ្ងៃទី ៩ ខែកុម្ភៈ ដោយទាមទារឱ្យប្រធានាធិបតី Katalin Novak លាលែងពីតំណែងសម្រាប់ការលើកលែងទោសបុរសម្នាក់ដែលពាក់ព័ន្ធនឹងការបិទបាំងករណីរំលោភបំពានផ្លូវភេទនៅក្នុងផ្ទះរបស់កុមារ។ ក្រុមអ្នកតវ៉ានៅទីក្រុងប៊ូដាប៉េស(Budapest) បានអំពាវនាវឱ្យលោកស្រី Novak លាលែងពីតំណែង ដោយលើកឡើងពីការសម្រេចចិត្តលើកលែងទោសរបស់លោកស្រីថាមិនអាចទទួលយកបាន។ ទោះយ៉ាងណាក៏ដោយ ក្រុមអ្នកតវ៉ាអះអាងថា ការលាលែងពីតំណែងរបស់លោកស្រី គឺជាដំណោះស្រាយដែលអាចទទួលយកបានតែមួយគត់ ដោយសង្កត់ធ្ងន់ទៅលើភាពធ្ងន់ធ្ងរនៃកំហុសរបស់លោកស្រី៕

ឯកឧត្តម ម៉ៅ សុផាន់ អញ្ជើញបើកយុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភានៅខេត្តព្រះវិហារ

2024/02/11 11:16:01 am        170
Facebook Telegram Linkin
ព្រះវិហារ៖ នៅព្រឹកថ្ងៃទី១០ ខែកុម្ភៈ ឆ្នាំ២០២៤ ដែលជាថ្ងៃនៃការបើកយុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥នេះ គណបក្សប្រជាជនកម្ពុជា ខេត្តព្រះវិហារ បានប្រារព្ធពិធីបើកយុទ្ធនាការឃោសនាបោះឆ្នោត ជ្រើសតាំងព្រឹទ្ធសភា នីតិកាលទី៥ ឆ្នាំ២០២៤ នៅមណ្ឌលបោះឆ្នោតភូមិភាគទី៨ ខេត្តព្រះវិហារ ក្រោមអធិបតីភាព ឯកឧត្តម ម៉ៅ សុផាន់ សមាជិកគណៈអចិន្ត្រៃយ៍ នៃគណៈកម្មាធិការកណ្តាល ប្រធានក្រុមការងារគណបក្សចុះមូលដ្ឋានខេត្តព្រះវិហារ និងឯកឧត្តម ប្រាក់ សុវណ្ណ ប្រធានគណៈកម្មាធិការគណបក្សប្រជាជនកម្ពុជា ខេត្តព្រះវិហារ ដោយមានការចូលរួមពី សមាជិកក្រុមប្រឹក្សាឃុំ សង្កាត់ ដែលជាអង្គបោះឆ្នោត សមាជិក សមាជិកា គណបក្សប្រជាជនកម្ពុជា សរុបចំនួនជាង៥០០នាក់។ឯកឧត្តម ប្រាក់ សុវណ្ណ ប្រធានគណៈកម្មាធិការគណបក្សប្រជាជនកម្ពុជា ខេត្តព្រះវិហារ បានរាយការណ៍សង្ខេបអំពីផែនការរួមឆ្ពោះទៅកាន់ការបោះឆ្នោតជ្រើសតាំងសមាជិក ព្រឹទ្ធសភា នីតិកាលទី៥ ឆ្នាំ២០២៤ របស់គណៈអចិន្រ្តៃយ៍គណៈកម្មាធិការកណ្តាល គណបក្សប្រជាជនកម្ពុជា និងផែនការសកម្មភាពឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក អាណត្តទី៥ ឆ្នាំ២០២៤ របស់គណបក្សប្រជាជនកម្ពុជា ខេត្តព្រះវិហារ។ជាមួយគ្នានេះ ឯកឧត្តម ឡុង សុវណ្ណ អនុប្រធានគណៈកម្មាធិការគណបក្សប្រជាជនកម្ពុជា ខេត្តព្រះវិហារ បានអានសេចក្តីសម្រេចចិត្ត ស្តីពីការប្រកាសទទួលស្គាល់ជាផ្លូវការការចុះបញ្ជី​គណបក្ស​នយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ របស់គណបក្សប្រជាជន​កម្ពុជា ប្រចាំភូមិភាគទី៨ ខេត្តព្រះវិហារ ដែលមាន ឯកឧត្តម យស ផានីត្តា ជាបេក្ខជនពេញសិទ្ធ និងលោកជំទាវ ចឹក ហេង ជាបេក្ខជនបម្រុង។ថ្លែងក្នុងឱកាសនេះ ឯកឧត្តម ម៉ៅ សុផាន់ បាននាំនូវប្រសាសន៍ផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន ប្រធានគណបក្ស​ប្រជាជន​កម្ពុជា និងជាប្រធានឧត្តមទីប្រឹក្សាផ្ទាល់ព្រះមហាក្សត្រ និងបានវាយតម្លៃខ្ពស់ចំពោះ​សមាជិក​នៃក្រុមប្រឹក្សាឃុំ-សង្កាត់ក្នុងតំណែងនៅទូទាំងខេត្តព្រះវិហារ ដែលបានយកអស់កម្លាំង​កាយកម្លាំងចិត្ត​ក្នុងការបំពេញភារកិច្ចបម្រើប្រជាជន។ឯកឧត្តម បានបន្ថែមថា ទោះបីជាការបោះឆ្នោតជ្រើសរើសសមាជិកព្រឹទ្ធសភា ​នីតិកាលទី៥ ឆ្នាំ​២០២៤ ជាការបោះឆ្នោតអសកលក៏ពិតមែន​ ក៏ប៉ុន្តែគឺជាព្រឹត្តិការណ៍នយោបាយប្រវត្តិសាស្រ្ត ដ៏មានសារៈសំខាន់នៃព្រះរាជាណាចក្រកម្ពុជា ​ពីព្រោះអ្នកតំណាងរាស្ត្រ និងសមាជិកក្រុមប្រឹក្សាឃុំ-សង្កាត់ ដែលជាអង្គបោះឆ្នោតផ្ទាល់ គឺជាអ្នកតំណាងរបស់ប្រជាជន៕

នគរបាលអេស្ប៉ាញ ប៉ះទង្គិចជាមួយក្រុមកសិករ និងអ្នកបើកបររថយន្ត ក្នុងទីក្រុងម៉ាឌ្រីដ(Madrid)

2024/02/11 09:27:49 am        138
Facebook Telegram Linkin
នគរបាលអេស្ប៉ាញកាលពីថ្ងៃសៅរ៍ ថ្ងៃទី ១០ ខែកុម្ភៈ បានប៉ះទង្គិចជាមួយក្រុមកសិករ និងអ្នកបើកបររថយន្តដឹកទំនិញនៅទីក្រុងម៉ាឌ្រីដ(Madrid) ខណៈពួកគេព្យាយាមចូលបិទផ្លូវធំមួយ ជាការតវ៉ាមួយក្នុងចំណោមការតវ៉ាជាច្រើនដែលកំពុងវាយលុកសហភាពអឺរ៉ុបប្រឆាំងនឹងច្បាប់បរិស្ថានរបស់ប្លុកនេះ និងអ្វីដែលក្រុមកម្មករឃើញថាជាការយកពន្ធច្រើនពេក និងជាច្បាប់មិនចាំបាច់។ ក្រុមតំណាងឱ្យអ្នកបើកបរ Plataforma Nacional និងក្រុមកសិករដែលទើបបង្កើតថ្មី Plataforma 6-F បានសម្រេចចិត្តកាលពីថ្ងៃសៅរ៍រួមគ្នាអំពាវនាវឱ្យមានកូដកម្មទូទាំងប្រទេសទាមទារឱ្យមានចំណាត់ការពីបណ្ដាមេដឹកនាំអេស្ប៉ាញ និងអឺរ៉ុប។  ពួកគេអះអាងថាច្បាប់ការពារបរិស្ថានធ្វើឱ្យពួកគេមានការប្រកួតប្រជែងតិចបើធៀបនឹងតំបន់ផ្សេងទៀតដែលពួកគេចង់សំដៅដល់ប្រទេស មិនមែនជាសមាជិកសហភាពអឺរ៉ុប។  សមាជិកនៃក្រុមទាំងពីរ គ្រវីទង់ជាតិអេស្ប៉ាញ និងស្រែកថា វីវ៉ាអេស្ប៉ាណា(Viva Espana) បានប្រមូលផ្តុំគ្នានៅចំណតរថយន្តក្បែរកីឡដ្ឋាន អាតឡេទីកូ ឌឺម៉ាឌ្រីដ (Atletico de Madrid) ហើយបានបោះឆ្នោតគាំទ្រការចូលរូម។ ពួកគេនឹងតវ៉ាជាមួយគ្នាចាប់ពីពេលនេះតទៅ។  ចាប់តាំងពីថ្ងៃអង្គារមក កសិករអេស្ប៉ាញបានចូលរួមជាមួយក្រុមអ្នកតវ៉ាមកពីប្រទេសអាល្លឺម៉ង់ បារាំង អ៊ីតាលី ព័រទុយហ្គាល់ និងបែលហ្ស៊ិក ក្នុងការតវ៉ាប្រចាំថ្ងៃ ដែលរួមមានការបិទផ្លូវហាយវ៉េ និងកំពង់ផែជាច្រើន។  ភ្លាមៗបន្ទាប់ពីការបោះឆ្នោត ក្រុមអ្នកតវ៉ារាប់រយនាក់បានដើរជុំវិញកីឡដ្ឋាន Madrid មុនពេលព្យាយាមចូលទៅកាន់ផ្លូវធំមួយតាមរយៈផ្លូវកខ្វក់មួយ។រដ្ឋាភិបាលបានកម្លាំងនគរបាលរាប់សិបនាក់បដើម្បីគ្រប់គ្រងពួកគេមិនឱ្យធ្វើសកម្មភាពតវ៉ា។ក្រុមទាំងពីរបានប្តេជ្ញាបន្តការតវ៉ានៅទីក្រុងម៉ាឌ្រីដ និងទូទាំងប្រទេសរហូតដល់ការទាមទាររបស់ពួកគេត្រូវបានបំពេញ៕

យោធាមីយ៉ាន់ម៉ា អនុវត្តច្បាប់សេវាយោធា ក្រោយការបាត់បង់ដ៏ធ្ងន់ធ្ងរនៅសមរភូមិ

2024/02/11 08:51:10 am        99
Facebook Telegram Linkin
សហភាពមីយ៉ាន់ម៉ា បាននិយាយកាលពីថ្ងៃសៅរ៍ថា របបសឹកកំពុងអនុវត្តច្បាប់ដែលអនុញ្ញាតឱ្យយោធាកោះហៅបុរសទាំងអស់ដែលមានអាយុពី១៨ ដល់៣៥ ឆ្នាំ និងស្ត្រីដែលមានអាយុពី១៨ ដល់២៧ ឆ្នាំ ឱ្យបម្រើកងទ័ពយ៉ាងហោចណាស់ពីរឆ្នាំ ខណៈខ្លួនព្យាយាមកម្ចាត់ក្រុមប្រឆាំងរដ្ឋប្រហារឆ្នាំ២០២១។ សហភាពមីយ៉ាន់ម៉ាបានធ្លាក់ក្នុងភាពចលាចលចាប់តាំងពីការកាន់កាប់ដោយយោធានៅក្នុងខែកុម្ភៈឆ្នាំនោះ ដែលបានបញ្ចប់ការពិសោធន៍រយៈពេល១០ ឆ្នាំនៃលទ្ធិប្រជាធិបតេយ្យដ៏ក្មេងខ្ចី និងបានបង្កឱ្យមានការតវ៉ាទ្រង់ទ្រាយធំ និងការបង្ក្រាបលើក្រុមប្រឆាំង។ រយៈពេលបីឆ្នាំមកនេះ របបយោធា កំពុងប្រឹងប្រែងកម្ទេចក្រុមប្រឆាំងប្រដាប់អាវុធទូទាំងប្រទេសចំពោះការគ្រប់គ្រងរបស់ខ្លួន ហើយថ្មីៗនេះបានទទួលរងការបាត់បង់ដ៏គួរឱ្យភ្ញាក់ផ្អើលជាបន្តបន្ទាប់ចំពោះសម្ព័ន្ធមិត្តនៃក្រុមប្រដាប់អាវុធជនជាតិភាគតិច។ ក្រុមព័ត៌មានរបស់របបយោធាបាននិយាយនៅក្នុងសេចក្តីថ្លែងការណ៍មួយថា ខ្លួនបានចេញសេចក្តីជូនដំណឹងអំពីប្រសិទ្ធភាពនៃច្បាប់ស្តីពីសេវាកម្មយោធារបស់ប្រជាជន ដែលចាប់ផ្តើមពីថ្ងៃទី ១០ ខែកុម្ភៈ ឆ្នាំ ២០២៤នេះតទៅ។ ច្បាប់នេះត្រូវបានបង្កើតឡើងដោយរបបយោធាមុនក្នុងឆ្នាំ ២០១០ ប៉ុន្តែមិនដែលត្រូវបានគេដាក់ឲ្យចូលជាធរមានទេ ។សេចក្តីថ្លែងការណ៍កាលពីថ្ងៃសៅរ៍ពុំបានផ្តល់ព័ត៌មានលម្អិតបន្ថែមទេ ប៉ុន្តែបាននិយាយថា ក្រសួងការពារជាតិរបស់របបយោធានឹង បញ្ចេញច្បាប់ នីតិវិធី សេចក្តីប្រកាសបទបញ្ជា និងសេចក្តីណែនាំ។របបយោធាមួយនេះ ពុំបានផ្តល់ព័ត៌មានលម្អិតទេ ថាតើអ្នកទាំងនោះនឹងត្រូវបានកោះហៅឲ្យចូលបម្រើទ័ពបែបណា៕

ការស្ទង់មតិរបស់ឥណ្ឌូនេស៊ី ព្យាករថា បេក្ខជនប្រធានាធិបតី Prabowo អាចទទួលបានសំឡេងភាគច្រើន

2024/02/09 02:08:54 pm        112
Facebook Telegram Linkin
បេក្ខភាពប្រធានាធិបតីឥណ្ឌូនេស៊ី លោក ប្រាបូវ៉ូ ស៊ូបៀនតូ (Prabowo Subianto) ត្រូវបានព្យាករថានឹងទទួលបានការគាំទ្រ ៥០ភាគរយ ដែលត្រូវការដើម្បីឈ្នះការបោះឆ្នោតថ្ងៃទី១៤ ខែកុម្ភៈ ក្នុងមួយជុំប៉ុណ្ណោះ ដែលការស្ទង់មតិចុងក្រោយបំផុតបានបង្ហាញនៅថ្ងៃសុក្រ (០៩ កុម្ភៈ) នេះ។ក្នុងចំណោមមនុស្ស ១.២០០ នាក់ដែលត្រូវបានស្ទង់មតិដោយទីភ្នាក់ងារស្ទង់មតិនយោបាយឥណ្ឌូនេស៊ី អ៊ីនឌីខាទ័រ ផូលីធីក (Indikator Politik) នៅចន្លោះថ្ងៃទី២៨ ខែមករា ដល់ថ្ងៃទី០៤ ខែកុម្ភៈ មានមនុស្សចំនួន ៥១,៨ភាគរយ បាននិយាយថាពួកគេនឹងបោះឆ្នោតគាំទ្រលោក ប្រាបូវ៉ូ ខណៈដែលចំនួន ២៤,១ភាគរយ នឹងបោះឆ្នោតឱ្យគូប្រជែងគឺលោក អានីស បាស្វេដាន (Anies Baswedan) និងចំនួន ១៩,៦ភាគរយ នឹងបោះឆ្នោតឱ្យលោក ហ្កានចា ប្រាណូវ៉ូ (Ganjar Pranowo)។ការបោះឆ្នោតនេះ គឺជាការប្រកួតប្រជែងប្រធានាធិបតីជាលើកទីបីសម្រាប់លោក ប្រាបូវ៉ូ ដែលជាអតីតទាហានដ៏ចម្រូងចម្រាសដែលត្រូវបានចាញ់ដោយប្រធានាធិបតីបច្ចុប្បន្ន លោក ចូកូ វីដូដូ (Joko Widodo)។ខណៈពេលដែលការស្ទង់មតិភាគច្រើនបំផុតរបស់ប្រទេសឥណ្ឌូនេស៊ី បានបង្ហាញជាប់លាប់ថាលោក ប្រាបូវ៉ូ នាំមុខយ៉ាងរឹងមាំលើគូប្រជែង ការស្ទង់មតិនៅថ្ងៃសុក្រនេះគឺជាការស្ទង់មតិលើកដំបូងដែលលោកត្រូវបានគេព្យាករថានឹងទទួលបានសម្លេងឆ្នោតច្រើនជាង ៥០ ភាគរយ ។ ការប្រកួតជម្រុះជុំចុងក្រោយនឹងធ្វើឡើងនៅខែមិថុនា ប្រសិនបើមិនមានបេក្ខជនប្រធានាធិបតីណាម្នាក់ទទួលបានសំឡេងគាំទ្រលើស ៥០ភាគរយនោះ៕

មេដឹកនាំកូរ៉េខាងជើងហៅកូរ៉េខាងត្បូងថា ជា«សត្រូវធំ» ដោយប្តេជ្ញាការពារប្រទេសដោយអំណាច

2024/02/09 02:05:35 pm        105
Facebook Telegram Linkin
ប្រព័ន្ធផ្សព្វផ្សាយរដ្ឋ បាននិយាយនៅថ្ងៃសុក្រនេះថា មេដឹកនាំកូរ៉េខាងជើងលោក គីម ជុងអ៊ុន បានហៅ កូរ៉េខាងត្បូងម្តងទៀតថាជា «សត្រូវចម្បង»របស់កូរ៉េខាងជើង ហើយបានប្តេជ្ញាការពារប្រទេសតាមរយៈអំណាចជាជាងការចរចា។ការអត្ថាធិប្បាយរបស់លោក គីម ជុងអ៊ុន បានកើតឡើង ខណៈដែលថ្មីៗនេះ កូរ៉េខាងជើង បានបោះបង់ចោលនូវគោលនយោបាយដ៏យូរអង្វែងរបស់ខ្លួន ក្នុងការស្វែងរកការបង្រួបបង្រួមជាមួយកូរ៉េខាងត្បូង ហើយបានអំពាវនាវឲ្យ ធ្វើការប្តេជ្ញាចិត្ត ដើម្បី«កាន់កាប់ទាំងស្រុង»នូវទឹកដីកូរ៉េខាងត្បូង ប្រសិនបើមាន សង្គ្រាមកើតឡើងនោះ។លោក គីម ត្រូវបានដកស្រង់សម្តីដោយទីភ្នាក់ងារសារព័ត៌មានមជ្ឈិមកូរ៉េ(KCNA)ថា៖«ការចាត់ទុក អាយ៉ងកូរ៉េខាងត្បូងជាសត្រូវធំដែលបង្កគ្រោះថ្នាក់បំផុត និងជាសត្រូវចម្បង ដែលមិនអាចផ្លាស់ប្តូរបាន ហើយសម្រេចវា ជាគោលនយោបាយជាតិ ដើម្បីកាន់កាប់ទឹកដីរបស់ពួកគេក្នុងករណីមានភាពអាសន្ន គឺជាវិធានការសមហេតុផលសម្រាប់សុវត្ថិភាពជារៀងរហូតរបស់ប្រទេសយើង និងសន្តិភាព និងស្ថិរភាពនាពេលអនាគត។ លោក គីម ជុងអ៊ុន ក៏បានអំពាវនាវឲ្យមានការត្រៀមខ្លួនប្រយុទ្ធពេញលេញ ដោយផ្អែកលើអំណាចយោធាដ៏មានឥទ្ធិពលជាងនេះ ខណៈដែលលោក បាននិយាយក្នុងអំឡុងពេលទស្សនកិច្ចទៅកាន់ក្រសួងការពារជាតិ ដើម្បីប្រារព្ធខួបលើកទី៧៦នៃការបង្កើតកងទ័ពប្រជាជនកូរ៉េខាងជើង កាលពីថ្ងៃព្រហស្បតិ៍ នេះបើយោងតាមសារព័ត៌មានKCNA។

ប្រភព៖ មន្ត្រីកាណាដា នៅតែមិនបានឃើញភ័ស្តុតាងទាក់ទងភ្នាក់ងារជំនួយហ្កាហ្សា របស់UNជាមួយក្រុមហាម៉ាស

2024/02/09 02:01:02 pm        111
Facebook Telegram Linkin
សារព័ត៌មាន CBC News បានរាយការណ៍ថា រដ្ឋាភិបាលកាណាដា មិនបានឃើញភ័ស្តុតាងណាមួយដែលគាំទ្រការអះអាងរបស់អ៊ីស្រាអែលដែលថា បុគ្គលិកដែលជួលដោយទីភ្នាក់ងារជំនួយ និងការងាររបស់អង្គការសហប្រជាជាតិ (UNRWA) បានឃុបឃិតជាមួយក្រុមហាម៉ាស មុនពេលផ្អាកការផ្តល់មូលនិធិដល់ទីភ្នាក់ងារនេះនោះទេ។ប្រភពរដ្ឋាភិបាលប្រាប់សារព័ត៌មាន CBCថា អ៊ីស្រាអែល នៅតែមិនទាន់ចែករំលែកភ័ស្តុតាងជាមួយកាណាដា ដើម្បីបញ្ជាក់ការអះអាងរបស់ខ្លួនដែលថា បុគ្គលិក ១២នាក់របស់UNRWA បានជាប់ពាក់ព័ន្ធក្នុងសមត្ថភាពមួយចំនួន ក្នុងការវាយប្រហារថ្ងៃទី៧ ខែតុលា លើអ៊ីស្រាអែលដោយក្រុមហាម៉ាស និងក្រុមជីហាដ អ៊ីស្លាម។មនុស្សប្រហែល ១.២០០នាក់ ត្រូវបានសម្លាប់នៅក្នុងប្រទេសអ៊ីស្រាអែល កាលពីថ្ងៃទី៧ ខែតុលា ក្នុងអំឡុងពេលនៃការវាយប្រហារដែលដឹកនាំដោយក្រុមហាម៉ាស រួមទាំងជនជាតិកាណាដាមួយចំនួនផង ដែរ។ មន្ត្រីអ៊ីស្រាអែល បាននិយាយថា មនុស្ស ២៥៣ នាក់ផ្សេងទៀត ត្រូវបានចាប់ជាចំណាប់ថ្នូរ ខណៈប្រហែល ១៣០ នាក់ មិនទាន់ត្រឡប់មកផ្ទះវិញនោះ។ មន្ត្រីប៉ាឡេស្ទីន បាននិយាយថា មនុស្សជាង ២៧.០០ នាក់ ត្រូវបានសម្លាប់នៅក្នុងការឆ្លើយតបរបស់យោធាអ៊ីស្រាអែលចំពោះការវាយប្រហារដែលដឹកនាំដោយក្រុមហាម៉ាស។សារព័ត៌មាន Channel Four News របស់ចក្រភពអង់គ្លេស នៅដើមសប្តាហ៍នេះ បានទទួលច្បាប់ចម្លងនៃឯកសារដែលរដ្ឋាភិបាលអ៊ីស្រាអែល បានចែករំលែកជាមួយរដ្ឋាភិបាលចក្រភពអង់គ្លេស ដែលបានកាត់បន្ថយការផ្តល់មូលនិធិដល់UNRWAផងដែរ។

អាមេរិក៖ គ្មានការគាំទ្រប្រតិបត្តិការរបស់អ៊ីស្រាអែលនៅទីក្រុង Rafah នោះទេ បើគ្មានការការពារជនស៊ីវិល

2024/02/09 01:57:35 pm        118
Facebook Telegram Linkin
សហរដ្ឋអាមេរិក បាននិយាយថា ខ្លួននឹងមិនគាំទ្រផែនការរបស់អ៊ីស្រាអែលក្នុងការពង្រីកប្រតិបត្តិការនៅក្នុងទីក្រុង Rafah ភាគខាងត្បូងតំបន់ហ្កាហ្សានោះទេ ប្រសិនបើការការពារជីវិតជនស៊ីវិលមិនត្រូវបានពិចារណា។ កងកម្លាំងអ៊ីស្រាអែល បានត្រៀមធ្វើប្រតិបត្តិការជើងគោកទ្រង់ទ្រាយធំក្នុងទីក្រុងរ៉ាហ្វា ជាកន្លែងដែលពួកគេនិយាយថា ជាទីតាំងលាក់ខ្លួនចុងក្រោយរបស់ក្រុមហាម៉ាសដែលនៅសល់។ ពលរដ្ឋតំបន់ហ្កាហ្សា ជាងមួយលាននាក់កំពុងជ្រកកោននៅទីនោះ។អ្នកនាំពាក្យក្រុមប្រឹក្សាសន្តិសុខជាតិសេតវិមាន លោក John Kirby បាននិយាយអំពីបញ្ហានេះនៅក្នុងសន្និសីទសារព័ត៌មានមួយកាលពីថ្ងៃព្រហស្បតិ៍។ លោក បាននិយាយថា សហរដ្ឋអាមេរិក ពុំបានឃើញផែនការគួរឱ្យជឿជាក់ណាមួយ ដែលបង្ហាញថាកងកម្លាំងអ៊ីស្រាអែល នឹងធ្វើប្រតិបត្តិការធំនៅក្នុងទីក្រុង Rafah នោះទេ។ លោក Kirby បាននិយាយថា យោធាអ៊ីស្រាអែល មានកាតព្វកិច្ចពិសេស ខណៈពួកគេធ្វើប្រតិបត្តិការនៅទីនោះឬទីកន្លែងផ្សេងទៀត ដើម្បីធ្វើឱ្យប្រាកដថា ពួកគេកំពុងពិចារណាការការពារជីវិតជនស៊ីវិលស្លូតត្រង់។លោកបាននិយាយបន្ថែមថា ដោយសារប្រជាជនប៉ាឡេស្ទីន ជាងមួយលាននាក់កំពុងស្វែងរកទីជ្រកកោន ក្នុងទីក្រុងរ៉ាហ្វា (Rafah) ប្រតិបត្តិការណាមួយនៅពេលនេះ នឹងក្លាយជាមហន្តរាយសម្រាប់ប្រជាជននៅទីនោះ។ លោក បាននិយាយថា សហរដ្ឋអាមេរិក នឹងមិនគាំទ្រដល់ប្រតិបត្តិការណាមួយ ដែលមិនគិតពីសុវត្ថិភាព និងការការពារជនស៊ីវិលនោះឡើយ។

គណបក្សនយោបាយចូលរួមហែក្បួនឃោសនាបោះឆ្នោតនឹងគោរពតាមគោលការណ៍កំណត់របស់ គ.ជ.ប

2024/02/09 01:06:09 pm        196
Facebook Telegram Linkin
គណបក្សនយោបាយដែលនឹងចាប់ផ្តើមធ្វើយុទ្ធនាការឃោសនាបោះឆ្នោតជ្រើសតាំងសមាជិក​ព្រឹទ្ធសភា នឹងរៀបចំការហែក្បួនឃោសនារកសំឡេងឆ្នោតរបស់ខ្លួន ដោយគោរព​តាម​គោលការណ៍​កំណត់​របស់ គ.ជ.ប។ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងប្រាប់ BTV នៅថ្ងៃទី៩ ខែកុម្ភៈ ឆ្នាំ២០២៤ ថា ស្របពេលដំណើរ​ការ​យុទ្ធនាការ​ឃោសនា​បោះឆ្នោត​ជ្រើស​តាំង​សមាជិក​ព្រឹទ្ធ​សភា​នឹងចាប់ផ្តើមនៅថ្ងៃទី១០ ខែកុម្ភៈ ឆ្នាំ២០២៤ ស្អែកនេះគណបក្សប្រជាជនកម្ពុជា តាម​ប​ណ្តារាជធានី-ខេត្តបានរៀបចំរួចរាល់ និង​ត្រឹម​ត្រូវ​ទៅ​តា​មការ​កំណត់​ច្បាប់ស្តីពី​ការ​បោះឆ្នោត​ជ្រើសតាំង​សមាជិកព្រឹទ្ធសភា រួមទាំងគោលការណ៍នីតិវិធី និងបទបញ្ជារបស់ គ.ជ.ប។ ឯកឧត្តមបន្តថា ថ្ងៃស្អែកនេះ គណបក្សប្រជាជនកម្ពុជានៅតាមរាជធានី-ខេត្តទាំងអស់​នឹង​ធ្វើ​ពិធី​បើក​យុទ្ធនាការឃោសនាបោះឆ្នោតទៅតាមទីតាំងនីមួយៗរបស់ខ្លួន។លោក ញឿន រ៉ាដែន អ្នកនាំពាក្យគណបក្សហ្វ៊ុនស៊ិនប៉ិច បានឱ្យដែរថា គណបក្សហ្វ៊ុនស៊ិនប៉ិច បាន​ធ្វើការជូនដំណឹង និងកំណត់​កាល​បរិច្ឆេទ​នៃការ​ហែក្បួន​ធ្វើយុទ្ធនាការ​ឃោសនា​បោះឆ្នោត​ដោយ​អនុវត្ត​ទៅតាមការណែនាំរបស់ គ.ជ.ប ជាពិសេសកំឡុងហែក្បួនធ្វើ​យុទ្ធនា​ការ​ឃោសនា​បោះឆ្នោត​។ក្នុងយុទ្ធនាការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ គ.ជ.ប បានកំណត់​ការ​ហែ​ក្បួន​ធំ​មានតែ២ដងប៉ុណ្ណោះ ដោយយុទ្ធនាការ​ឃោសនា​បោះឆ្នោ​ត​ជ្រើស​តាំង​សមាជិ​កព្រឹទ្ធ​សភា​ក្នុង​នីតិកាលទី៥នេះ ត្រូវបាន គ.ជ.ប កែសម្រួលហើយកំណត់ថា ទោះបីការឃោសនា​របស់​គណបក្ស​នយោបាយដោយមធ្យោបាយថ្មើរជើង និងមានមនុស្សចាប់ពី​២០​នាក់​ឡើង​រាប់​ក៏​បញ្ជូល​ថា​ជា​ការ​ហែក្បួនធំម្តងដូចគ្នា។សូមជម្រាបថា ការបោះឆ្នោតជ្រើសតាំងសមាជិកព្រឹទ្ធសភាខាងមុខ នឹងប្រព្រឹត្តទៅនាថ្ងៃទី២៥ ខែ​កុម្ភៈ ឆ្នាំ២០២៤ ដោយមានអង្គបោះឆ្នោតសរុបចំនួន ១១,៧៤៧ នាក់ ក្នុង​នោះ​អ្នក​តំណាង​រាស្ត្រ​ក្នុង​តំណែងមានចំនួន ១២៥ នាក់ និងក្រុមប្រឹក្សាឃុំ-សង្កាត់នៅទូទាំងប្រទេសចំនួន ១១,៦២២នាក់ ខណៈគណបក្សនយោបាយចំនួន៤ដែលចូលរួមប្រកួតប្រជែង រួមមាន គណបក្សប្រជាជនកម្ពុជា គណបក្សហ្វ៊ុនស៊ិនប៉ិច គណបក្សកម្លាំងជាតិ និងគណបក្សឆន្ទៈខ្មែរ៕ អត្ថបទ៖ សេក ឧត្តម 

បណ្ដាមេដឹកនាំពិភពលោក និងប្រមុខអង្គការអន្តរជាតិ ផ្ញើសារជូនពរបុណ្យចូលឆ្នាំចិនដល់ប្រជាជនចិន

2024/02/09 12:43:28 pm        112
Facebook Telegram Linkin
ខណៈពិធីបុណ្យចូលឆ្នាំថ្មី-ឆ្នាំនាគ ចូលមកដល់ ក្រុមមេដឹកនាំប្រទេសនិងអង្គការអន្តរជាតិ បានផ្ញើសារជូនពរសំណាងល្អដល់ប្រជាជនចិន ដោយសង្ឃឹមថា នៅឆ្នាំថ្មីនេះ នឹងនាំមកនូវភាពចម្រុងចម្រើន និងសន្តិភាពដល់ពិភពលោក។ កាលពីសប្ដាហ៍មុន ការិយាល័យអង្គការសហប្រជាជាតិក្នុងរដ្ឋធានីណៃរ៉ូប៊ីប្រទេសកេនយ៉ា និងស្ថានទូតចិន នៅក្នុប្រទេសកេយ៉ា បានប្រារពពិធីអបអរបុណ្យចូលឆ្នាំថ្មី ដោយបង្ហាញពីការសម្ដែងសិល្បៈប្រពៃណីចិនដើម្បីផ្ដល់ភាពសប្បាយរីករាយដល់ភ្ញៀវជាង២០០នាក់។ នាឱកាសទទួលឆ្នាំថ្មី ដោយត្រូវបានរៀបចំរួមគ្នាដោយបេសកកម្មអចិន្ត្រៃយ៍របស់ចិនប្រចាំនៅអង្គការសហប្រជាជាតិ ក្នុងទីក្រុងវីយ៉ែន និងក្លឹបវប្បធម៌ចិន និងទីក្រុងវីយែនរបស់អង្គការសហប្រជាជាតិ ត្រូវបានរៀបចំនៅមជ្ឈមណ្ឌអន្តរជាតិក្រុងវីយ៉ែនក្នុងទីក្រុងវីយ៉ែន របស់ប្រទេសអូទ្រីសនៅថ្ងៃចុងក្រោយនៃខែមករា។ នេះគឺជាព្រឹត្តិការណ៍ដំបូងដែលបានប្រារព្ធឡើងនៅការិយាល័យអង្គការសហប្រជាជាតិនៅទីក្រុងវីយ៉ែន ដោយបេសកកម្មអចិន្ត្រៃយ៍។ ក្នុងឱកាសនោះពួកគេបានជូនពររីករាយឆ្នាំថ្មី ចូរមានភាពជោគជ័យ និងភាពចម្រុងចម្រើននាឱកាសច្នាំថ្មី កើតមានដល់ប្រទេសចិន។ លោក Haitham al-Ghais អគ្គលេខាធិការអង្គការនៃប្រទេសនាំចេញប្រេង (OPEC) បាននិយាយថា ក្នុងនាមអង្គការ OPEC និងបណ្តាប្រទេសជាសមាជិករបស់យើង សូមជូនពរប្រជាជនចិនទាំងអស់ជួបតែសំណាងល្អ និងជោគជ័យ និងវិបុលភាពបន្ថែមទៀតសម្រាប់ឆ្នាំថ្មីនេះ។ នាយករដ្ឋមន្ត្រីថៃ លោកស្រី សេដ្ឋា ថាវីស៊ីន(Srettha Thavisin)បានស្វាគមន៍ឆ្នាំថ្មី ហើយបាននិយាយថា កិច្ចព្រមព្រៀងលើកលែងទិដ្ឋាការទៅវិញទៅមកនាពេលថ្មីៗនេះ រវាងប្រទេសទាំងពីរនឹងជំរុញឱ្យភ្ញៀវទេសចរចិនកាន់តែច្រើនមកទស្សនាប្រទេសរបស់លោក រីករាយឆ្នាំថ្មី សូមឲ្យជួបតែសំណាងល្អ ពោពេញដោយភាពជោគជ័យ និងមានទ្រព្យសម្បត្តិស្ដុកស្ដម្ភ។ ចំណែកប្រធានាធិបតីប៉េរូ លោកស្រី ឌីណា បូលូអាតេ (Dina Boluarte) បានជូនពរដល់ប្រជាជនចិនតាមសារវីដេអូកាលពីថ្ងៃពុធ។ ឧបនាយករដ្ឋមន្ត្រីម៉ាឡេស៊ី លោកហ្វាឌីឡាយូសូហ្វ( Fadillah Yusof) បាននិយាយអំពីទំនាក់ទំនងទ្វេភាគីរវាងចិន និងម៉ាឡេស៊ី ហើយបានផ្ញើការសួរសុខទុក្ខដល់ប្រជាជនចិនទាំងអស់នៅក្នុងពិធីទទួលស្វាគមន៍ដែលរៀបចំដោយស្ថានទូតចិនប្រចាំប្រទេសម៉ាឡេស៊ីក្នុងទីក្រុង Kuala Lumpur នៅថ្ងៃសុក្រនេះ៕

បណ្ដាញសង្គម

ព័ត៌មានថ្មីៗ

សម្តេចរដ្ឋសភាធិបតីឃួន សុដារី៖ «យើងត្រូវស្តារឡើងវិញ និងបង្កើនពហុភាគីនិយម ដែលបើកចំហហើយអាស៊ានដើរតួនាទីកាន់តែសំខាន់ក្នុងរឿងនេះ»
07/15/2025 10:07 AM
Facebook Telegram Linkin
អ៊ីរ៉ង់ព្រមាន សងសឹក ប្រសិនបើទណ្ឌកម្មរបស់អង្គការសហប្រជាជាតិត្រូវបានដាក់ឡើងវិញ
07/15/2025 09:07 AM
Facebook Telegram Linkin
អ៊ីស្រាអែល ទម្លាក់គ្រាប់បែកលើតំបន់ហ្កាហ្សាសម្លាប់មនុស្សរាប់សិបនាក់ ខណៈកិច្ចចរចាបទឈប់បាញ់ជាប់គាំង
07/15/2025 09:07 AM
Facebook Telegram Linkin
អ៊ីរ៉ង់៖ គ្មានការចរចានុយក្លេអ៊ែរទេ ប្រសិនបើអាមេរិកទទូចឲ្យខ្លួនបញ្ឈប់ការចម្រាញ់អ៊ុយរ៉ានីញ៉ូម
07/15/2025 09:07 AM
Facebook Telegram Linkin
អ្នកឃ្លាំមើលសង្គ្រាម៖ មនុស្ស៨៩នាក់ស្លាប់ក្នុងការប៉ះទង្គិចគ្នារវាងក្រុមកុលសម្ព័ន្ធនិងជីវពលនៅស៊ីរី
07/15/2025 09:07 AM
Facebook Telegram Linkin
ប្រធានអ្នកចរចាអឺរ៉ុប៖ការដំឡើងពន្ធ៣០%របស់លោកTrump នឹងលុបបំបាត់ពាណិជ្ជកម្ម សហភាពអឺរ៉ុប-អាមេរិក
07/15/2025 09:07 AM
Facebook Telegram Linkin
អ៊ុយក្រែន សាទរសព្វាវុធថ្មីរបស់អាមេរិក ខណៈរុស្ស៊ី ច្រានចោលការគំរាមដាក់ទណ្ឌកម្មរបស់លោក Trump
07/15/2025 09:07 AM
Facebook Telegram Linkin
ទីផ្សារភាគហ៊ុនរុស្ស៊ី ហក់ឡើង បន្ទាប់ពីលោក Trump គំរាមដាក់ពន្ធធ្ងន់ធ្ងរ ជុំវិញសង្រ្គាមអ៊ុយក្រែន
07/15/2025 09:07 AM
Facebook Telegram Linkin
លោក Trump ទុកពេលឱ្យរុស្ស៊ី ៥០ ថ្ងៃដើម្បីធ្វើកិច្ចព្រមព្រៀងអ៊ុយក្រែន ពុំនោះប្រឈមការដំឡើងពន្ធ១០០%
07/15/2025 09:07 AM
Facebook Telegram Linkin
រដ្ឋមន្រ្តីសុខាភិបាល «មន្រ្តីសុខាភិបាលត្រូវមានស្មារតីបុរេសកម្មជាប់ជាប្រចាំ និងប្រកបដោយគុណភាពការងារ ក្នុងនាមអ្នកបម្រើសេវាសុខាភិបាល»
07/15/2025 08:07 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.