នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធាន​ក្រុមការងារ​ចុះមូលដ្ឋាន ប្រកាស​បញ្ចូលសមាជិកថ្មី​​គណបក្សប្រជាជនកម្ពុជាចំនួន ៦៩០០នាក់ ក្នុងស្រុកប្រាសាទបល្ល័ង្ក ខេត្តកំពង់ធំ
សម្ដេច​តេជោ៖ការពង្រឹងខឿនការពារជាតិមិនសំដៅតែនៅសមរភូមិមុខទេ ត្រូវយកចិត្តទុកដាក់ទំនុកបម្រុងអ្នកសមរភូមិក្រោយជាគ្រួសារយុទ្ធជនជួរមុខ និងអតីតយុទ្ធជន
ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី
ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ​ និង ការអភិវឌ្ឍន៍

កងកម្លាំងរបស់អង្គការសហប្រជាជាតិនៅ ម៉ាលី ពន្លឿនការដកចេញខណៈបញ្ហាសន្តិសុខកាន់តែយ៉ាប់យ៉ឺនខ្លាំង

2023/08/14 11:02:44 am        265
Facebook Telegram Linkin
ម៉ាលី៖ បេសកកម្មរក្សាសន្តិភាពរបស់អង្គការសហប្រជាជាតិនៅក្នុងប្រទេសម៉ាលី បានពន្លឿនការដកកម្លាំងចេញពីទីក្រុង ប៊ែរ (Ber) នៅក្នុងភាគខាងជើងបន្ទាប់ពីមានការវាយប្រយុទ្ធគ្នាខ្លាំង ។ បេសកកម្មអង្គការសហប្រជាជាតិ ដែលត្រូវគេស្គាល់ថាជា MINUSMA បាននិយាយនៅក្នុងសេចក្ដីថ្លែងការណ៍កាលពីថ្ងៃអាទិត្យថា សន្តិសុខដែលកំពុងយ៉ាប់យ៉ឺនខ្លាំង បានពន្លឿនការចាកចេញឲ្យបានឆាប់រហ័ស។ កងកម្លាំងនេះបាននិយាយនៅលើបណ្ដាញសង្គម X ថា MINUSMA  បានផ្ដោតលើការដកកម្លាំងចេញពីទីក្រុងប៊ែរ ដោយសារស្ថានភាពសន្តិសុខនៅក្នុងតំបន់នេះ និងហានីភ័យខ្ពស់ ដែលនឹងសំដៅមកកាន់កងទ័ពមួកខៀវរបស់យើង ។  បេសកកម្មនេះ បានជំរុញដល់គ្រប់ភាគីទាំងអស់ឲ្យបដិសេធរាល់សកម្មភាពទាំងអស់ដែលអាចបង្កភាពស្មុគស្មាញដល់សហប្រតិបត្តិការនេះ។ មន្ត្រីសន្តិសុខជាន់ខ្ពស់ប្រចាំតំបន់ម្នាក់ បាននិយាយថាបេសកកម្មអង្គការសហប្រជាជាតុ បានចាកចេញដោយគ្មានឧបទ្ទវហេតុណាមួយកើតឡើងឡើយ។ ក្នុងពេលប៉ុន្មានថ្ងៃថ្មីៗនេះ សម្ព័ន្ធឧទ្ទាមភាគខាងជើងដឹកនាំដោយក្រុមតូរ៉េក (Tuareg) ដែលហៅថា ការសម្របសម្រួលនៃចលនា Azawad (CMA) បានចោទប្រកាន់កងកម្លាំងម៉ាលី និងកងកម្លាំងស៊ីឈ្នួល វ៉េកណាគ្រុប (Wagner Group)របស់ រុស្ស៊ី ថាបានរំលោភលើបទឈប់បាញ់ដោយវាយប្រហារកងកម្លាំងរបស់ខ្លួននៅជិតទីក្រុង ប៊ែរ (Ber )៕

ចក្រភពអង់គ្លេសព្រមានពីលទ្ធភាពវាយប្រហារភេរវកម្មនៅប្រទេសស៊ុយអែត

2023/08/14 10:59:34 am        268
Facebook Telegram Linkin
អង់គ្លេស៖ ចក្រភពអង់គ្លេសកាលពីថ្ងៃអាទិត្យ បានព្រមានពលរដ្ឋដែលធ្វើដំណើរទៅប្រទេសស៊ុយអែតពីលទ្ធភាពវាយប្រហារភេរវកម្ម បន្ទាប់ពីមានការដុតគម្ពីរកូរ៉ាន ដោយសកម្មជនប្រឆាំងឥស្លាម ដែលបានធ្វើឲ្យអ្នកកាន់សាសនាឥស្លាមខឹងសម្បាយ៉ាងខ្លាំង។នៅក្នុងការណែនាំអំពីការធ្វើដំណើរដែលត្រូវបានធ្វើបច្ចុប្បន្នភាព ក្រសួងការបរទេសរបស់ចក្រភពអង់គ្លេស បាននិយាយថា អាជ្ញាធរស៊ុយ  អែតបានបង្អាក់ការវាយប្រហារដែលបានគ្រោងទុកមួយចំនួនដោយជោគជ័យ និងធ្វើការចាប់ខ្លួនមនុស្សជាច្រើន។ក្រសួងនេះបានឲ្យដឹងថា អ្នកគួរតែមានការប្រុងប្រយ័ត្ននៅពេលនេះ ដោយបន្ថែមថា ពួកភេរវករទំនងជាព្យាយាម និងធ្វើការវាយប្រហារនៅក្នុងប្រទេសស៊ុយអែត ជាមួយនឹងកន្លែងជាច្រើនដែលបានទៅទស្សនាដោយជនបរទេសដែលជាគោលដៅសំខាន់ៗ។នៅក្នុងសេចក្តីថ្លែងការណ៍មួយដែលទទួលស្គាល់នូវការណែនាំអំពីការធ្វើដំណើរដែលបានផ្លាស់ប្តូររបស់ចក្រភពអង់គ្លេស ទីប្រឹក្សាសន្តិសុខជាតិរបស់ប្រទេសស៊ុយអែត លោក ហែនរិក ឡានឌឺហូម (Henrik Landerholm) បានរំលឹកឡើងវិញនូវការកើនឡើងការគំរាមកំហែងដល់ប្រទេសស៊ុយអែត ចាប់តាំងពីការដុតបំផ្លាញគម្ពីរកូរ៉ាន។

សម្តេចក្រឡាហោម៖ ធនធានថ្មីរបស់នគរបាលប្រកបដោយសក្តានុពល ដើម្បីបន្តវេនក្នុងការងារសន្តិសុខជាតិ

2023/08/14 10:57:56 am        578
Facebook Telegram Linkin
ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តីរដ្ឋមន្រ្តីក្រសួងមហាផ្ទៃ បានថ្លែងថា ធនធានថ្មីនៃកងកម្លាំងនគរបាលជាតិ ប្រកបដោយសក្តានុពលដើម្បីបន្តវេនក្នុងការងារសន្តិសុខជាតិ និងដើម្បីចូលរួមចំណែកក្នុងការរក្សាសន្តិភាព​ ស្ថិរភាពនយោបាយ អធិបតេយ្យជាតិ​ទាំងមូល​ផងដែរ។ថ្លែងក្នុងឱកាសអញ្ជើញជាអធិបតីក្នុងពិធីប្រគល់​សញ្ញាបត្រថ្នាក់បរិញ្ញាបត្រ ​និង​បរិញ្ញាបត្រជាន់​ខ្ពស់វិទ្យា​សាស្រ្តនគរបាល​ ជូនដល់និស្សិតជ័យលាភី​ ចំនួន៥៦៩នាក់ ​នៅបណ្ឌិត្យភានគរបាល​កម្ពុជា នាព្រឹកថ្ងៃទី១៤ ខែសីហា ឆ្នាំ២០២៣នេះ​ សម្តេចក្រឡាហោម ស ខេង បានគូសបញ្ជាក់ថា «និស្សិតជ័យលាភីទាំងនេះគឺជា ​ធនធានមនុស្សថ្មីផ្នែកកងកម្លាំងនគរបាលជាតិមានលក្ខណ​សម្បត្តិ​សមស្រប និង​ប្រកប​ដោយ​សក្ដានុពល​ ដើម្បី​បន្តវេន​ក្នុងការងារសន្តិសុខជាតិ ​សណ្ដាប់ធ្នាប់​សាធារណៈ ​និងសុវត្ថិភាពសង្គម ​ស្របតាម​ការវិវឌ្ឍ​របស់សង្គមជាតិ ​សភាពការណ៍​សន្តិសុខ​ជាតិ និងអន្តរជាតិ ​ការវិវឌ្ឍផ្នែកបច្ចេកវិទ្យាឌីជីថល ព្រមទាំងចូលរួមចំណែក​ក្នុងការរក្សាសន្តិភាព ស្ថិរភាព​នយោបាយ​ អធិបតេយ្យភាពជាតិ ​និងបូរណភាពទឹកដី​ ទាំងបច្ចុប្បន្ននិងអនាគត»។ សម្តេចក្រឡាហោម បានបន្ថែមថា ​នេះជាសក្ខីភាពបង្ហាញអំពី​សមិទ្ធផល​នៃការងារកំណែ​ទម្រង់​នគរបាលជាតិ និង​ការ​អនុវត្តផែនការ​អភិវឌ្ឍធនធាន​មនុស្ស​របស់​ក្រសួង​មហាផ្ទៃ ស្របតាម​គោលនយោបាយកំណែទម្រង់កងកម្លាំងប្រដាប់អាវុធគ្រប់ប្រភេទរបស់រាជរដ្ឋាភិបាល ក្រោមការដឹកនាំដ៏ឈ្លាសវៃបំផុតរបស់សម្តេចហ៊ុន ​សែន ​នាយករដ្ឋមន្រ្តីនៃកម្ពុជា។ជាមួយគ្នានោះដែរសម្តេចក្រឡាហោម បាន​ផ្តល់​អនុសាសន៍​ដល់បណ្ឌិត្យ​សភានគរបាលកម្ពុជា​ឱ្យ​បន្តការងារបណ្ដុះបណ្ដាល​កង​កម្លាំង​នគរបាលជាតិ ​និង​បន្តការងារអភិវឌ្ឍ ស្របតាម​ស្តង់ដា​គុណភាព​និងផែនការយុទ្ធសាស្រ្តរបស់ខ្លួន ​ឱ្យសម្រេចបានជោគជ័យថ្មីៗ​បន្ថែមទៀត ព្រមទាំងផ្ដាំផ្ញើ​ដល់និស្សិត​ជ័យលាភីទាំងអស់ ​ឱ្យយកចំណេះដឹង​និងជំនាញវិជ្ជា ​ជីវៈដែលទទួលបានពីការ​បណ្ដុះ​បណ្ដាល ​ទៅអនុវត្តឱ្យមានប្រសិទ្ធភាពខ្ពស់​ក្នុងការបម្រើអង្គភាព​ សង្គមជាតិ ​និងប្រជាពលរដ្ឋ ដោយប្រកាន់ខ្ជាប់នូវវិន័យ ​និងក្រមសីលធម៌វិជ្ជាជីវៈច្បាស់លាស់។នៅក្នុងពិធីនោះដែរនាយឧត្ដមសេនីយ៍ សាស្ត្រាចារ្យ សេង ផល្លី ប្រធានបណ្ឌិត្យសភា នគរបាល​កម្ពុជា ក៏បានលើកឡើងអំពីអត្ថប្រយោជន៍ និងតម្លៃនៃការងារបណ្ដុះបណ្ដាល គុណភាពអប់រំ ប្រសិទ្ធភាព​នៃការ​ដឹកនាំគ្រប់គ្រង និងភាពជោគជ័យនៃការអភិវឌ្ឍហេដ្ឋារចនា​សម្ព័ន្ធរឹង និងទន់​របស់បណ្ឌិត្យសភា នគរបាលកម្ពុជានិងសាលានគរបាលជាតិភូមិភាគទាំង៦ ដើម្បីបំពេញបាន​តាម​តម្រូវការនៃការងារបណ្ដុះបណ្ដាល ​ស្របតាមផែនការយុទ្ធសាស្ត្រ និងកម្មវិធីកំណែទម្រង់​របស់ខ្លួន។ ក្នុងន័យនេះ ឯកឧត្ដមបានគោរពថ្លែងអំណរគុណ ​និងដឹងគុណយ៉ាងជ្រាលជ្រៅបំផុត​បំពោះ​រាជរដ្ឋាភិបាល​កម្ពុជានិងក្រសួងមហាផ្ទៃ ​ដែលបានគាំទ្រឧបត្ថម្ភ និងផ្ដល់អាទិភាពខ្ពស់ដល់​ការអភិវឌ្ឍ​បណ្ឌិត្យសភា​លើគ្រប់ផ្នែក​ ដើម្បី​មានលទ្ធភាពគ្រប់គ្រាន់ក្នុងការ​បណ្ដុះបណ្ដាល​ពង្រឹង​សមត្ថភាពវិជ្ជាជីវៈ ​ដល់កងកម្លាំងនគរបាលជាតិ​ ឱ្យបានល្អប្រសើរផងដែរ៕ អត្ថបទ៖ បាន ចក់

ការរកឃើញថ្មី៖ ដើមឈើខ្ពស់បំផុតនៅអាស៊ីមានអាយុកាលប្រហែល១.៥០០ឆ្នាំ

2023/08/14 10:53:50 am        540
Facebook Telegram Linkin
ដើមឈើខ្ពស់ជាងគេនៅអាស៊ី គឺដើមស្ងាវយក្ស ដែលបច្ចុប្បន្នមានកំពស់១០១,២ម៉ែត្រ និងត្រូវបានរកឃើញនៅតំបន់ស្វយ័ត ស៊ីចាង (Xizang) ភាគនិរតីនៃប្រទេសចិន ត្រូវបានគេប៉ាន់ស្មានថាមានអាយុកាលប្រហែល១.៥០០ឆ្នាំ នេះបើយោងតាមលទ្ធផលស្រាវជ្រាវចុងក្រោយកាលពីថ្ងៃអាទិត្យ។ដើមឈើខ្ពស់បំផុតកម្រិតបំបែកកំណត់ត្រាដែលមានឈ្មោះថាដើមស្ងាវយក្ស ឬឈ្មោះវិទ្យាសាស្ត្រ Cupressus torulosa ត្រូវបានគេរកឃើញនៅឯតំបន់អភិរក្សធម្មជាតិជាតិនៃតំបន់ជ្រលងភ្នំដ៏ចំណាស់ឈ្មោះ Yarlung Zangbo ក្នុងតំបន់ Bome ទីក្រុង Nyingchi របស់តំបន់ស្វយ័ត ស៊ីចាង ក្នុងអំឡុងពេលស៊ើបអង្កេតវិទ្យាសាស្ត្រដែលដឹកនាំដោយសាកលវិទ្យាល័យប៉េកាំង ក្នុងខែឧសភា។ ដើមឈើខ្ពស់បំផុតពីមុនរបស់ប្រទេសចិន គឺដើមឈើបៃតងដែលមានកម្ពស់៨៣,៤ម៉ែត្រ រកឃើញដោយក្រុមអ្នកវិទ្យាសាស្ត្រនៅក្រុង ស៊ីចាង កាលពីឆ្នាំមុន។ជុំវិញដើមឈើខ្ពស់ជាងគេនោះ ក្រុមការងារបានរកឃើញដើមឈើយក្សងាប់ និងដួលរលំតាមធម្មជាតិមួយចំនួនតូច ដែលដើរតួយ៉ាងសំខាន់សម្រាប់ការកំណត់អាយុរបស់ដើមឈើទាំងនេះ។ សមាជិកក្រុមបានទាញយកខ្លឹមពីដើមឈើដែលដួលរលំនោះ ដើម្បីកំណត់អាយុកាលដែលត្រូវគ្នាដោយផ្អែកលើសមាមាត្រនៃរង្វង់របស់ដើមឈើទាំងនោះ ទៅនឹងចំនួនក្រយៅខ្លឹមនៃដើមឈើដែលខ្ពស់ជាងគេនេះ។ ដើមឈើខ្ពស់បំផុតមានទំហំ២៩៦សង់ទីម៉ែត្រ និងមានអាយុកាលប៉ាន់ស្មានប្រហែល១.៥០០ឆ្នាំ៕

ការវាយប្រយុទ្ធគ្នារាលដាលកាន់តែខ្លាំងនៅរដ្ឋដាហ្វួរខាងត្បូងរបស់ស៊ូដង់ ខណៈមានក្ដីបារម្ភពីការផ្ទុះសង្រ្គាមស៊ីវិលថ្មី

2023/08/14 10:50:51 am        82
Facebook Telegram Linkin
ស៊ូដង់៖ សាក្សីបាននិយាយថា អំពើហិង្សាបានផ្ទុះឡើងនៅក្នុងទីក្រុងនីយ៉ាឡា( Nyala) ភាគខាងលិចប្រទេសស៊ូដង់ និងកន្លែងផ្សេងទៀតក្នុងរដ្ឋដាហ្វួរខាងត្បូង(South Darfur) កាលពីថ្ងៃអាទិត្យ ដោយគំរាមកំហែងវាយលុកតំបន់នេះនៅក្នុងសង្រ្គាមដ៏រ៉ាំរ៉ៃរបស់ប្រទេសស៊ូដង់។ ជម្លោះនេះបានបង្កឲ្យមានការប្រយុទ្ធគ្នារាល់ថ្ងៃ នៅតាមផ្លូវនានាក្នុងរដ្ឋធានៅខាទុំ (Khartoum) ជាការកម្រើកឡើងវិញនៃការវាយប្រហារដែលមានគោលដៅជនជាតិភាគតិចនៅក្នុងរដ្ឋដាហ្វួរខាងលិច និងការផ្លាស់ទីលំនៅរបស់មនុស្សជាង៤លាននាក់នៅក្នុងប្រទេសស៊ូដង់ និងឆ្លងកាត់ព្រំដែនរបស់ខ្លួនចូលទៅកាន់ប្រទេសឆាដ អេហ្ស៊ីប ស៊ូដង់ខាងត្បូង និងប្រទេសជិតខាងផ្សេងទៀត ។ ការប៉ះទង្គិចគ្នារវាងកងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា បានផ្ទុះឡើងជាបន្តបន្ទាប់នៅក្នុងទីក្រុង នីយ៉ាឡា ដែលជាទីក្រុងធំជាងគេទីពីររបស់ប្រទេសនេះ និងជាមជ្ឈមណ្ឌលយុទ្ធសាស្ត្រសម្រាប់តំបន់ Darfur ដ៏ផុយស្រួយ។សាក្សីបានប្រាប់សារព័ត៌មានរ៉យទ័រថា ការផ្ទុះអាវុធចុងក្រោយបំផុតមានរយៈពេលបីថ្ងៃ ដោយទាំងកងទ័ព និង កងកម្លាំងគាំទ្ររហ័សប៉ារ៉ា (RSF) បានបាញ់កាំភ្លើងធំចូលទៅក្នុងសង្កាត់លំនៅដ្ឋាន។ ការប្រយុទ្ធគ្នាបានបំផ្លិចបណ្តាញអគ្គិសនី ទឹក និងទូរគមនាគមន៍។យោងតាមសមាគមន៍មេធាវីដាហ្វួរ (Darfur Bar Association) ដែលជាក្រុមអ្នកឃ្លាំមើលសិទ្ធិមនុស្សជាតិ មនុស្សយ៉ាងហោចណាស់៨នាក់បានស្លាប់កាលពីថ្ងៃសៅរ៍តែមួយថ្ងៃប៉ុណ្ណោះ៕

ចំនួនអ្នកស្លាប់ក្នុងបំណាក់ដីនៅភាគពាយព្យប្រទេសចិន កើនឡើងដល់ ២១នាក់ និងមនុស្ស៦នាក់ផ្សេងទៀតបន្តបាត់ខ្លួន

2023/08/14 10:43:35 am        114
Facebook Telegram Linkin
ចិន៖ កាលពីថ្ងៃអាទិត្យ ក្រុមជួយសង្គ្រោះបាននិយាយថា ចំនួនអ្នកស្លាប់ដោយសារទឹកជំនន់ដ៏គំហុក និងបំណាក់ដីនៅតំបន់ជាយក្រុងភាគខាងត្បូងទីក្រុងស៊ីអាន នៃខេត្តសានស៊ី ភាគពាយ័ព្យប្រទេសចិន កាលពីល្ងាចថ្ងៃសុក្រ បានកើនឡើងដល់២១នាក់ហើយ ខណៈមនុស្ស៦នាក់ផ្សេងទៀតកំពុងបាត់ខ្លួន។ទឹកជំនន់ដ៏គំហុកដែលបង្កឡើងដោយភ្លៀងធ្លាក់តាមរដូវកាល បានវាយប្រហារភូមិវ៉ីជឺភីង (Weiziping) ក្នុងស្រុកឆាងអាន នៃទីក្រុងស៊ីអាន នៅវេលាម៉ោងប្រហែល១៨:០០ថ្ងៃសុក្រ (ម៉ោងក្នុងស្រុក) ដោយបានបំផ្លាញលំនៅឋានចំនួន២ខ្នង និងហេដ្ឋារចនាសម្ព័ន្ធនៅក្នុងតំបន់ជុំវិញនោះដូចជាផ្លូវថ្នល់ ស្ពាន និងកន្លែងផ្គត់ផ្គង់ថាមពល ដោយមានពលរដ្ឋចំនួន៩០០គ្រួសារ រងផលប៉ះពាល់ និងស្ថានីយទូរគមនាគមន៍ចំនួន៥៥ទីតាំង ត្រូវបានបំផ្លាញ ឬខូចខាតយ៉ាងធ្ងន់ធ្ងរ។បន្ទាប់ពីគ្រោះមហន្តរាយដែលកើតឡើងភ្លាមៗនោះ ទីក្រុងស៊ីអាន បានបង្កើតទីស្នាក់ការកណ្តាលភ្លាមៗនៅនឹងទីតាំងរងគ្រោះ ហើយបានចល័តកម្លាំងសង្គ្រោះចំនួន១៤ក្រុម ដែលរួមមានក្រុមពន្លត់អគ្គិភ័យ និងក្រុមសន្តិសុខសាធារណៈ ដែលសរុបមានបុគ្គលិកជាង៩៨០នាក់។ ឧបករណ៍សំខាន់ៗជាង១.១០០គ្រឿង រួមទាំងឧបករណ៍រាវរកអ្នកនៅមានជីវិត ទូរស័ព្ទផ្កាយរណប និងយាន្តអេស្កាវ៉ាទ័រ ព្រមទាំងសត្វសុខនជួយសង្គ្រោះ ក៏ត្រូវបានបញ្ជូនដើម្បីជួយក្នុងប្រតិបត្តិការសង្គ្រោះផងដែរ។មកទល់ពេលនេះ មនុស្សចំនួន១៨៦នាក់ ត្រូវបានជម្លៀសចេញដោយជោគជ័យ ខណៈកំណាត់ផ្លូវដែលរងការខូចខាតកំពុងដំណើរការជួសជុល និងពង្រឹងបន្ថែម។ ការស្ដារឡើងវិញនូវស្ថានីយ៍មូលដ្ឋានទូរគមនាគមន៍ភាគច្រើនត្រូវបានសម្រេច ហើយការផ្គត់ផ្គង់ថាមពលត្រូវបានបន្តឡើងវិញសម្រាប់ពលរដ្ឋ៨៥៥គ្រួសារ ក្នុងចំណោមប្រជាជនដែលរងផលប៉ះពាល់ចំនួន៩០០គ្រួសារនោះ៕

យ៉ាងហោចណាស់៥៥នាក់ស្លាប់ ដោយទឹកជំនន់នៅបង់ក្លាដេស នៅក្នុងខែសីហា

2023/08/14 10:41:00 am        65
Facebook Telegram Linkin
បង់ក្លាដេស៖ ក្រុមមន្ត្រីបាននិយាយកាលពីថ្ងៃអាទិត្យថា យ៉ាងហោចណាស់មនុស្ស៥៥នាក់បានស្លាប់ និងមនុស្សជាង១លាននាក់ បានរងផលប៉ះពាល់ដោយភ្លៀងធ្លាក់ខ្លាំងរយៈពេល២សប្តាហ៍ បណ្តាលឲ្យមានទឹកជំនន់ និងបំណាក់ដី នៅប្រទេសបង់ក្លាដេសភាគអាគ្នេយ៍។ រដ្ឋបាលស្រុកដែលរងគ្រោះខ្លាំងបំផុតចំនួន៤ស្រុក បាននិយាយថា ទឹកជំនន់ និងបំណាក់ដី ចាប់តាំងពីថ្ងៃទី១ ខែសីហា បានបណ្តាលឲ្យមនុស្ស២១នាក់ស្លាប់នៅតំបន់Cox's Bazar ១៩នាក់នៅក្រុងChittagong ១០នាក់នៅក្រុងBandarban និង៥នាក់នៅក្រុង Rangamati ។ប្រធាននាយកដ្ឋានឧតុនិយមប្រទេសបង់ក្លាដេស លោក Azizur Rahman បានប្រាប់សារព័ត៌មាន AFP ថា តំបន់ទាំងនេះមានភ្លៀងធ្លាក់ខ្លាំងបំផុតក្នុងប៉ុន្មានឆ្នាំថ្មីៗនេះ។ មន្ត្រីនិយាយថា ភ្លៀងធ្លាក់ខ្លាំង បានធ្លាក់នៅក្នុងតំបន់រហូតដល់ថ្ងៃទី១១ ខែសីហា បង្កឲ្យមានទឹកជំនន់ភ្លាមៗ ដែលបានបង្កឲ្យទឹកទន្លេពេញហៀរច្រាំង និងបានជនលិចភូមិរាប់រយ។ វាអាចបញ្ជាក់បានថាតើមនុស្សប៉ុន្មាននាក់បានស្លាប់បន្ទាប់ពីទឹកជំនន់បានចាប់ផ្តើមស្រកទៅវិញ។ រដូវកាលភ្លៀងមូសុងនៅរដូវក្តៅ បាននាំមកដល់នៅអាស៊ីខាងត្បូងប្រមាណ៨០ភាគរយនៃភ្លៀងធ្លាក់ប្រចាំឆ្នាំ ព្រមទាំងបណ្តាលឲ្យមានអ្នកស្លាប់និងការបំផ្លាញដោយសារតែការជន់លិចនិងបំណាក់ដី។ ភ្លៀងធ្លាក់ខ្លាំងពិបាកក្នុងការព្យាករណ៍ និងមានការប្រែប្រួលច្រើន ប៉ុន្តែអ្នកវិទ្យាសាស្ត្រនិយាយថា បម្រែបម្រួលអាកាសធាតុ កំពុងធ្វើឲ្យរដូវភ្លៀងមូសុងកាន់តែខ្លាំងឡើងនិងមិនទៀងទាត់ច្រើន ខណៈការកាប់បំផ្លាញព្រៃឈើ និងការសាងសង់នៅតាមជើងភ្នំ បានធ្វើឲ្យមានទឹកជំនន់ភ្លាមៗ កាន់តែធ្ងន់ធ្ងរឡើង។

រុស្ស៊ីបាញ់ព្រមាននាវាដឹកទំនិញនៅក្នុងសមុទ្រខ្មៅ

2023/08/14 10:37:12 am        84
Facebook Telegram Linkin
រុស្ស៊ី៖ នាវាចម្បាំងរុស្ស៊ីមួយគ្រឿងបានបាញ់ព្រមានទៅលើនាវាដឹកទំនិញនៅភាគនិរតីនៃសមុទ្រខ្មៅ កាលពីថ្ងៃអាទិត្យ (១៣ សីហា) ខណៈដែលនាវានោះបានធ្វើដំណើរឆ្ពោះទៅភាគខាងជើង។ នេះជាលើកទីមួយហើយ ដែលរុស្ស៊ីបានធ្វើការបាញ់ព្រមានលើការដឹកជញ្ជូនទំនិញហួសពីដែនទឹកប្រទេសអ៊ុយក្រែន ចាប់តាំងពីប្រទេសនេះបានចាកចេញពីកិច្ចព្រមព្រៀងគ្រាប់ធញ្ញជាតិ ដែលសម្របសម្រួលដោយអង្គការសហប្រជាជាតិកាលពីខែមុន។ កិច្ចព្រមព្រៀងនេះបានអនុញ្ញាតឱ្យអ៊ុយក្រែននាំចេញកសិផលតាមសមុទ្រខ្មៅ។បន្ទាប់ពីចាកចេញពីកិច្ចព្រមព្រៀងសមុទ្រខ្មៅ ទីក្រុងមូស្គូបាននិយាយថា ខ្លួននឹងចាត់ទុកនាវាទាំងអស់ដែលធ្វើដំណើរទៅកាន់ដែនទឹកអ៊ុយក្រែន ថាជានាវាផ្ទុកអាវុធ។ រុស្ស៊ីបាននិយាយនៅក្នុងសេចក្តីថ្លែងការណ៍មួយថា នាវាល្បាតរបស់ខ្លួនមួយបានបាញ់អាវុធស្វ័យប្រវត្តិទៅលើនាវាឈ្មោះ Sukru Okan ដែលមានទង់ជាតិប្រទេសផាឡាវ បន្ទាប់ពីកាពីទែនរបស់នាវានោះបានបរាជ័យក្នុងការឆ្លើយតបទៅនឹងសំណើសុំឱ្យផ្អាកសម្រាប់ការត្រួតពិនិត្យ។ រុស្ស៊ីបាននិយាយថា នាវានោះកំពុងធ្វើដំណើរឆ្ពោះទៅកាន់កំពង់ផែ Izmail របស់អ៊ុយក្រែន។ការបាញ់ព្រមានលើនាវាពាណិជ្ជកម្ម នឹងធ្វើឱ្យមានការព្រួយបារម្ភយ៉ាងខ្លាំងក្នុងចំណោមម្ចាស់នាវា ក្រុមហ៊ុនធានារ៉ាប់រង និងពាណិជ្ជករទំនិញ អំពីគ្រោះថ្នាក់ដែលអាចកើតមាននៃការជាប់ឃុំនៅក្នុងសមុទ្រខ្មៅ។ ចាប់តាំងពីរុស្ស៊ីបានចាកចេញពីកិច្ចព្រមព្រៀងគ្រាប់ធញ្ញជាតិនៅសមុទ្រខ្មៅមក ទាំងទីក្រុងម៉ូស្គូ និងទីក្រុងគីវ បានចេញការព្រមាន និងធ្វើការវាយប្រហារ ដែលបានធ្វើឱ្យមានការរង្គោះរង្គើតាមរយៈទីផ្សារទំនិញ ប្រេង និងការដឹកជញ្ជូនទូទាំងពិភពលោក៕

ការវាយប្រហារលើទីសក្ការបូជារបស់អ៊ីរ៉ង់ បណ្តាលឲ្យមនុស្សយ៉ាងហោចណាស់ម្នាក់ស្លាប់ និងរបួសជាច្រើននាក់

2023/08/14 10:30:59 am        95
Facebook Telegram Linkin
អ៊ីរ៉ង់៖ មន្ត្រីក្នុងតំបន់ម្នាក់ បានប្រាប់ទូរទស្សន៍រដ្ឋថា ការវាយប្រហារលើទីសក្ការបូជាមូស្លីមនិកាយស៊ីអ៊ីតនៅទីក្រុងហ្ស៊ីរ៉ាស( Shiraz) ភាគខាងត្បូងប្រទេសអ៊ីរ៉ង់ បានបណ្តាលឲ្យមនុស្សយ៉ាងហោចណាស់ម្នាក់ ស្លាប់កាលពីថ្ងៃអាទិត្យ (១៣ សីហា) ដោយបន្ថែមថា មនុស្សម្នាក់ត្រូវបានចាប់ខ្លួន។យ៉ាងហោចណាស់មនុស្ស ៧នាក់ បានរងរបួស ក្នុងនោះមានកម្មករពីរនាក់នៅទីសក្ការបូជា និងអ្នកធ្វើធម្មយាត្រាពីរនាក់ ហើយហាងនានានៅក្នុងតំបន់ ត្រូវបានបិទ។ ទូរទស្សន៍រដ្ឋ បានឲ្យដឹងថា តំបន់ទីសក្ការបូជានេះ ត្រូវបានបិទមិនឲ្យចូលដោយកងកម្លាំងសន្តិសុខ។វីដេអូបង្ហាញពីសម្លៀកបំពាក់ប្រឡាក់ឈាមនៅលើដី ហើយអ្នកគោរពបូជា ភ័យស្លន់ស្លោរត់ទៅស្វែងរកសាច់ញាតិរបស់ពួកគេ បន្ទាប់ពីការវាយប្រហារនោះ។គ្មានក្រុមណាមួយចេញមុខអះអាងទទួលខុសត្រូវភ្លាមៗចំពោះការវាយប្រហារលើទីសក្ការបូជាហ្សាចេរាហ្គ ( Shah Cheragh) ដែលទីភ្នាក់ងារព័ត៌មានរដ្ឋ IRNA បាននិយាយថា ត្រូវបានធ្វើឡើងដោយពួកភេរវករ៕

នាយករដ្ឋមន្រ្តីថ្មីរបស់កម្ពុជា ប្តេជ្ញាបន្តរក្សាគោលជំហរដោយឥតងាករេចំពោះ «គោលនយោបាយចិនមួយ»

2023/08/14 10:10:16 am        187
Facebook Telegram Linkin
ឯកឧត្តមកិតិ្តទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីទើបតែងតាំងថ្មីរបស់កម្ពុជា បានអះអាង ចំពោះមុខប្រមុខការទូតចិនថា រដ្ឋាភិបាលថ្មី​របស់​ឯកឧត្តម​នៅ​បន្ត​រក្សា​គោល​ជំហរ​ដដែល​ចំពោះ«គោលនយោបាយចិនតែមួយ» ។នៅក្នុងកិច្ចជំនួបទ្វេភាគីជាមួយរដ្ឋមន្រ្តីក្រសួងការបរទេសចិន ឯកឧត្តម វ៉ាង យី នាថ្ងៃទី១៣ ខែ​សីហា ឆ្នាំ២០២៣ម្សិលមិញនេះ នៅវិមានសន្តិភាព ឯកឧត្តមកិតិ្តទេសាភិបាលបណ្ឌិត ហ៊ុន ម៉ាណែត បានថ្លែងអំណរគុណ និងធ្វើការគូសបញ្ជាក់ទៅកាន់ឯកឧត្តម វ៉ាង យី នូវ​ការ​រក្សា​គោល​ជំហរ​ឥត​ប្រួលប្រែរបស់រាជរដ្ឋាភិបាលថ្មី នៃព្រះរាជា​ណា​ចក្រ​កម្ពុជា​ចំពោះ «គោល​នយោបាយ​ចិន​មួយ» និងការមិនជ្រៀតជ្រែកលើកិច្ចការផ្ទៃក្នុងរបស់ចិន ។ ជាមួយគ្នានោះដែរឯកឧត្តមកិតិ្តទេសាភិបាលបណ្ឌិត បានឆ្លើយតប​ទៅ​នឹង​ការ​អញ្ជើញ​របស់​ភាគី​មិត្ត​ចិន​ទៅ​ចូលរួមពិធីខួបលើកទី១០នៃការបង្កើតគំនិតផ្តួចផ្តើមខ្សែក្រវាត់ និងផ្លូវ​នៅ​រដ្ឋធានី​ប៉េកាំង សាធារណរដ្ឋប្រជាមានិតចិន នាពាក់កណ្តាលខែតុលា ឆ្នាំ​២០២៣​ខាង​មុខ​ខាង​នេះ​ផង​ដែរ​។ នៅក្នុងកិច្ចជំនួបនោះដែរ រដ្ឋមន្រ្តីការបរទេសចិនឯកឧត្តម វ៉ាង យី បាន​ថ្លែង​ថា​ ចិន​នៅ​បន្ត​ជំរុញ​ការ​អនុវត្ត​ការងារប្រកបដោយប្រសិទ្ធភាព និងភាពជិតស្និទ្ធជាមួយកម្ពុជាដដែល ហើយភាគី​មិត្ត​ចិន​នឹង​ត្រៀម​ទទួលស្វាគមន៍ដំណើរទស្សនកិច្ចផ្លូវការ និងការចូលរួមរបស់ ឯកឧត្តម កិតិ្តទេសា​ភិបាល​បណ្ឌិត នៅក្នុងពិព័រណ៍ចិន-អាស៊ាន លើកទី២០ ឆ្នាំ២០២៣ ដែលនឹង​ប្រព្រឹត្ត​ទៅ​នៅ​ទីក្រុង​ណាននីង ខេត្តក្វាងស៊ី ប្រទេសចិន នាពាក់កណ្តាលខែកញ្ញា ឆ្នាំ២០២៣ ខាងមុខផង។ នៅក្នុងកិច្ចជំនួបនោះដែរ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត និងប្រមុខ​ការ​ទូត​ចិន ក៏បានប្តេជ្ញាបន្តលើកកម្ពស់កិច្ចសហប្រតិបត្តិការរវាងប្រទេសទាំងពីរកម្ពុជា-ចិន ឱ្យកាន់​ជិត​ស្និទ្ធ តាមរយៈការថែរក្សាសមិទ្ធផលដែលមានកន្លងមក ក៏ដូច​ជា​ការ​ពង្រីក​ទិស​ដៅ​កិច្ច​សហប្រតិបត្តិការ​ទៅ​លើវិស័យថ្មីៗបន្ថែមទៀត ដូចជា វិស័យអគ្គិសនី ជាពិសេស វារីអគ្គិសនី, វិស័យហេដ្ឋារចនាសម្ព័ន្ធ, វិស័យកសិកម្ម និងវិស័យពាណិជ្ជកម្ម ជាដើម ។ល។ លើសពីនេះ ភាគីទាំងពីរ ក៏ឯកភាពនឹងបន្តកិច្ចសហប្រតិបត្តិការ និងផ្តល់ការគាំទ្រ​ដល់​គ្នា​ទៅ​វិញ​ទៅ​មក​ផង​ដែរ នៅក្នុងក្របខ័ណ្ឌតំបន់ និងលើឆាកអន្តរជាតិ។ សូមបញ្ជាក់ថារដ្ឋមន្រ្តីក្រសួងការបរទេសចិន ឯកឧត្តម វ៉ាង យី បានមក​បំពេញ​ទស្សនកិច្ច​ជា​ផ្លូវ​ការ​នៅ​កម្ពុជារយៈពេលពីរថ្ងៃគឺចាប់ពីថ្ងៃទី១២ ដល់ថ្ងៃទី១៣ ខែសីហា ឆ្នាំ២០២៣នេះ។ ដំណើរ​ទស្សន​កិច្ច​របស់ប្រមុខការទូតចិនរូបនេះមកកម្ពុជា គឺដើម្បីលើក​កម្ពស់​ក្រប​ខ័ណ្ឌ​កិច្ច​សហប្រតិបត្តិការ​ត្បូង​ពេជ្រ ព្រមទាំងជំរុញកិច្ចសហប្រតិបត្តិការនៅក្នុង វេទិកាតំបន់ និង​អន្តរជាតិ​ផង​ដែរ​។ដំណើរ​ទស្សនកិច្ចរបស់ឯកឧត្តមវ៉ាង យី បានចូលក្រាបបង្គំគាល់ ព្រះករុណា ព្រះបាទសម្តេច​ព្រះបរម​នាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រះបរមរាជវាំង។ បាន​ចូល​ជួបសម្តែងការគួរសមជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជួប​ឯកឧត្តម កិត្តិទេសាភិបាល បណ្ឌិត ហ៊ុន ម៉ាណែត នាយករដ្ឋមន្ដ្រីចាត់តាំង នៃកម្ពុជា ជួប​ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និង​ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និង​ជា​អគ្គលេខាធិការ នៃ​ក្រុម​ប្រឹក្សា​អភិវឌ្ឍន៍​កម្ពុជា និងជួបជាមួយឯកឧត្តម ហោ ណាំហុងអតីត ប្រមុខការទូតកម្ពុជាជាដើម។នៅ​ក្នុង​អំឡុងពេលទស្សនកិច្ចផ្លូវការនៅកម្ពុជារយៈពេលពីរថ្ងៃនេះ ឯកឧត្តម វ៉ាង យី បាន​បញ្ជាក់​ជា​ថ្មី​ថា រដ្ឋាភិបាលចិននូវបន្តប្តេជ្ញាចិត្តដោយឥតងាករេក្នុងការគោរពអធិបតេយ្យរបស់កម្ពុជា និង​ពាំនាំ​នូវ ការគាំទ្រយ៉ាងពេញលេញរបស់ប្រទេសចិនចំពោះថ្នាក់ដឹកនាំថ្មី និងមាគ៌ា​អភិវឌ្ឍ​របស់​កម្ពុជា​ផង​ដែរ។ ឯក ឧត្តម វ៉ាង យី ក៏បានលើកឡើងផងដែរថា អាណត្តិដែល​ទទួល​បាន​ពី​សំឡេង​ឆ្នោត​គាំទ្រ​ចំនួន​៨២ភាគរយ បានគូសបញ្ជាក់អំពី​អភិក្រម​នៃកា​រ​ដឹកនាំ​ប្រក​បដោយ​ការ​ឆ្លើយ​តប​របស់​​គណបក្សប្រជាជនកម្ពុជា ដែល តែងតែយកចិត្តទុកដាក់ចំពោះតម្រូវការចាំបាច់ និង​បំណង​ប្រាថ្នា​របស់​ប្រជាពលរដ្ឋជាដើម៕ អត្ថបទ៖ បាន ចក់

បណ្ដាញសង្គម

ព័ត៌មានថ្មីៗ

ការវាយប្រហាររបស់រុស្ស៊ី បានសម្លាប់មនុស្សច្រើននាក់ ខណៈប្រធានាធិបតីអ៊ុយក្រែនថា ការវាយប្រហារថ្មីអាចកើតឡើង
06/03/2026 10:06 AM
Facebook Telegram Linkin
រដ្ឋមន្ត្រីការបរទេសអាមេរិក សង្ឃឹមចំពោះកិច្ចព្រមព្រៀងជាមួយអ៊ីរ៉ង់ ដោយទទូចលើការទប់ស្កាត់នុយក្លេអ៊ែរ
06/03/2026 10:06 AM
Facebook Telegram Linkin
អ៊ីស្រាអែល និងហេសបូឡា វាយប្រហារដាក់គ្នា ខណៈក្រុមអ្នកការទូតជួបគ្នានៅទីក្រុងវ៉ាស៊ីនតោន
06/03/2026 10:06 AM
Facebook Telegram Linkin
អាមេរិក បាញ់មីស៊ីល Hellfire ទៅលើនាវាដឹកប្រេងកំពុងធ្វើដំណើរទៅកាន់ប្រទេសអ៊ីរ៉ង់
06/03/2026 10:06 AM
Facebook Telegram Linkin
អាមេរិកវាយប្រហារកោះ Qeshm របស់អ៊ីរ៉ង់ ខណៈទីក្រុងតេអេរ៉ង់បាញ់មីស៊ីលទៅលើកូវ៉ែត និងបារ៉ែន​
06/03/2026 09:06 AM
Facebook Telegram Linkin
អ៊ីរ៉ង់ កំពុងសិក្សាកិច្ចព្រមព្រៀងផ្អាកសង្គ្រាម ខណៈភាពជាប់គាំងនៅតែបន្ត
06/03/2026 08:06 AM
Facebook Telegram Linkin
សម្តេចតេជោ ហ៊ុន សែន ជួបសំណេះសំណាលជាមួយក្រុមប្រឹក្សា មន្ត្រីនៃមន្ទីរអង្គភាពនានាជុំវិញខេត្តកំពង់ធំ
06/03/2026 07:06 AM
Facebook Telegram Linkin
UNICEF ៖ សង្រ្គាមអ៊ីរ៉ង់គំរាមកំហែងដល់ការចែកចាយគ្រឿងផ្គត់ផ្គង់សង្រ្គោះជីវិតកុមារ
06/02/2026 08:06 PM
Facebook Telegram Linkin
ក្រុមហ៊ុន Moderna និងក្រុមហ៊ុនផ្សេងទៀត ទទួលបានប្រាក់ ៦០លានដុល្លារ ដើម្បីផលិតវ៉ាក់សាំងបង្ការជំងឺអេបូឡា
06/02/2026 08:06 PM
Facebook Telegram Linkin
កូដកម្មរថភ្លើងក្រោមដីធ្វើឲ្យប៉ះពាល់ដល់អ្នកដំណើរនៅទីក្រុងឡុងដ្រ៍ ចក្រភពអង់គ្លេស
06/02/2026 08:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.