BTV NEWS

ជប៉ុនស្វែងយល់ពីទិដ្ឋភាពទូទៅនៃគោលនយោបាយរបស់កម្ពុជា លើការអភិវឌ្ឍសង្គម-សេដ្ឋកិច្ច

ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប

កម្ពុជាផ្សព្វផ្សាយជាផ្លូវការ របាយការណ៍វឌ្ឍនភាពនៃការអនុវត្តវិធានការកែទម្រង់មុតស្រួចជាកញ្ចប់

មកដល់ពេលនេះ កសិករចំនួនជាង ១៤០០គ្រួសារ ងាកមកចងក្រងគ្នា ដើម្បីក្លាយជាសហគមន៍កសិកម្មទំនើប

សេដ្ឋកិច្ច និង កសិកម្ម

កម្ពុជារកចំណូលបាន ៣០០លានដុល្លារពីការនាំចេញកៅស៊ូ ក្នុងរយៈពេល៨ខែដំបូង

ភ្នំពេញ៖ កម្ពុជារកចំណូលសរុបបាន ៣០០លានដុល្លារពីការនាំចេញកៅស៊ូស្ងួត អំឡុងពេល ៨ខែដើមឆ្នាំ២០២២ នេះបើតាមរបាយការណ៍ផ្លូវការកាលពីថ្ងៃទី២០ ខែកញ្ញានេះ ។របាយការណ៍ពីអគ្គនាយកដ្ឋានកៅស៊ូ បានបង្ហាញថា កម្ពុជាបាននាំចេញកៅស៊ូស្ងួតចំនួន ១៩៤,០១៤ តោនក្នុង អំឡុងខែមករាដល់ខែសីហាឆ្នាំនេះ ពោលគឺកើនឡើង ១ភាគរយធៀបនឹងរយៈពេលដូចគ្នាកាលពីឆ្នាំមុន។របាយការណ៍ បានបន្តថា ប្រទេសកម្ពុជា រកចំណូលបាន ៣០០ លានដុល្លារពីការនាំចេញទំនិញក្នុងរយៈពេល ៨ខែឆ្នាំនេះ ធ្លាក់ចុះ ៦.៤ ភាគរយបើធៀបនឹងឆ្នាំមុន។ឯកឧត្តម ហ៊ឹម អូន អគ្គនាយកនៃអគ្គនាយកដ្ឋានកៅស៊ូ បាននិយាយនៅក្នុងរបាយការណ៍ថា កៅស៊ូស្ងួតមួយតោនមានតម្លៃជាមធ្យម $១,៥៥៣ ក្នុងអំឡុងពេល៨ខែដំបូងនៃឆ្នាំ២០២២ ប្រហែល ១១៩ដុល្លារ ទាបជាងរយៈពេលដូចគ្នាកាលពីឆ្នាំមុន ។យោងតាមអគ្គនាយកដ្ឋានកៅស៊ូ នៅកម្ពុជាបច្ចុប្បន្នមានដីដាំកៅស៊ូសរុប ៤០៤ ០៤៤ ហិកតា ក្នុងនោះផ្ទៃដីកំពុងចៀរជ័រ ចំនួន ៣១០ ១៩៣ ហិកតា និងផ្ទៃដីថែទាំចំនួន ៩៣ ៨៥១ ហិកតា។ ជ័រកៅស៊ូពីខែមករា-ខែសីហា ឆ្នាំ ២០២២ មានតម្លៃជាមធ្យម ១ ៥៥៣ ដុល្លារក្នុង ១ តោន ថយចុះ ១១៩ ដុល្លារ ឬស្មើនឹង -៧ ភាគរយធៀបរយៈពេលដូចគ្នាឆ្នាំ ២០២១។កាលពីឆ្នាំ ២០២១ កម្ពុជាប្រមូលផលជ័រកៅស៊ូបានចំនួន ៣៦៨ ០០០ តោន ក្នុងនោះនាំចេញទៅទីផ្សារអន្តរជាតិ ៣៦៦ ០០០ តោន រកចំណូលបាន ៦១០ ២៥៥ ៨០០ ដុល្លារ។នេះបើតាមទិន្នន័យអគ្គនាយកដ្ឋានកៅស៊ូ៕អត្ថបទ៖ វណ្ណៈ

និយ័តករបរធនបាលកិច្ច លើកកម្ពស់ការយល់ដឹងដល់ SME សម្រាប់ការធ្វើធុរកិច្ច និងការវិនិយោគ

ភ្នំពេញ៖ និយ័តករបរធនបាលកិច្ចផ្សព្វផ្សាយ និងលើកកម្ពស់ការយល់ដឹងជាសាធារណៈ ដល់សហគ្រាសធុនតូច និងមធ្យម និងជម្រុញការចូលរួមក្នុងវិស័យបរធនបាលកិច្ច សម្រាប់ការធ្វើធុរកិច្ច និងការចាប់គូរជាវិនិយោគិនមានសក្តានុពលនានា តាមយន្តការនៃបរធនបាលកិច្ច។ឯកឧត្តម សុខ ដារ៉ា អគ្គនាយកនិយ័តករបរធនបាលកិច្ច នៃអាជា្ញធរសេវាហិរញ្ញវត្ថុមិនមែនធនាគារ លើកឡើងនៅក្នុងកម្មវិធីចុះអនុស្សរណៈយោគយល់គ្នា រវាងនិយ័តករបរធនបាលកិច្ច និងសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) ស្តីពីកិច្ចសហប្រតិបត្តិការលើកកម្ពស់ការយល់ដឹងជាសាធារណៈ និងជំរុញការចូលរួមក្នុងវិស័យបរធនបាលកិច្ច នៅព្រះរាជាណាចក្រកម្ពុជា នៅថ្ងៃ១៩ ខែកញ្ញា ឆ្នាំ ២០២២ ។អនុស្សារណៈយោគយល់គ្នានៅពេលនេះ មានសារៈសំខាន់ណាស់ សម្រាប់ការពង្រឹងកិច្ចសហប្រតិបត្តិការ ដើម្បីត្រឹមខ្លួនទាញយកផលប្រយោជន៍នៅក្នុងបរធនបាលកិច្ច ក្នុងនោះសម្រាប់ជំហានដំបូង គឺការជម្រុញបណ្តុះបណ្តាល និងផ្សព្វផ្សាយ ក៏ដូចជាការឆ្លើយតបរាល់សំណូមពរពាក់ព័ន្ធ នៃដំណើរចុះបញ្ជីបរធនបាលកិច្ច ក្នុងគោលដៅសម្រេចឱ្យបាននូវការយល់ដឹងកាន់តែទូលំទូលាយ នៅក្នុងវិស័យបរធនបាលកិច្ច ក៏ដូចជាវិស័យមូលបត្រទាំងមូល។ លោកឧកញ៉ា តែ តាំងប៉ ប្រធានក្រុមប្រឹក្សាភិបាល នៃសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) លើកឡើងថា មានម្ចាស់សហគ្រាសធុនតូច និងមធ្យមកម្ពុជាជាច្រើន មិនទាន់យល់អំពីវិស័យបរធនបាលកិច្ច ដូច្នេះតាមរយៈសម្ពន្ធ័សហគ្រាសធុនតូច និងមធ្យមកម្ពុជា គឺចង់ឲ្យSMEទាំងអស់គ្នាបានយល់ និងចូលរួម ព្រោះវិស័យបរធនបាលកិច្ច និងតាមរយៈសេវាហិរញ្ញវត្ថុមិនមែនធនាគារ មានតួនាទីគ្រប់គ្រង មើលថែរក្សា ឬចាត់ចែកទ្រព្យសម្បត្តិរបស់បុគ្គល ឬក្រុមហ៊ុនណាមួយ សម្រាប់ជាប្រយោជន៍ដល់យើងទាំងអស់គ្នា ។ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច ថ្លែងឲ្យដឹងថា គិតត្រឹមចុងឆ្នាំនេះ ឬដើមឆ្នាំក្រោយ បរធនបាលកិច្ច នឹងមានទំហំបរធន កើនឡើងក្នុងរង្វង់ប្រមាណជា ៦០០ លានដុល្លារអាមេរិក ខណៈបច្ចុប្បន្ននិយ័តករបរធនបាលកិច្ច កំពុងពិនិត្យ និងវាយតម្លៃ នៃការចុះបញ្ជីបរធនបាលកិច្ច មានចំនួនប្រមាណជាង ៥០០ សំណើរបន្ថែមទៀត៕ អត្ថបទ៖ សុន រ៉ាឌី

ទំនាក់ទំនងការទូត និងប្រព័ន្ធអនុគ្រោះពន្ធ ធ្វើឲ្យការនាំចេញទៅអាមេរិកមានកំណើនល្អ

ភ្នំពេញ៖ អ្នកជំនាញសេដ្ឋកិច្ច ថា គោលនយោបាយការបរទេសរបស់កម្ពុជា ដែលមានទំនាក់ទំនងការទូតល្អជាមួយ សហរដ្ឋអាមេរិក បានកំពុងធ្វើឲ្យសហរដ្ឋអាមេរិកបានដើរតួនាទីយ៉ាងសំខាន់ សម្រាប់ទីផ្សារនាំចេញរបស់កម្ពុជា និងស្របពេលដែលប្រទេសមួយនេះ បានបន្តផ្តល់ GSP លើមុខទំនិញមួយចំនួន នៃការនាំចេញរបស់កម្ពុជា។ ឯកឧត្តមបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ថ្លែងលើកឡើង នៅថ្ងៃទី ១៦ ខែកញ្ញា ឆ្នាំ២០២២ នេះថា ការធ្វើពាណិជ្ជកម្មរវាងប្រទេសទាំងពីរ មានលក្ខណៈខុសគ្នា ខណៈទីផ្សារអាមេរិក បានផ្តោតសំខាន់លើផលិតកម្មនៃឧស្សាហកម្មធុនធ្ងន់ និងការផលិតទំនិញដែលមានបច្ចេកវិទ្យាខ្ពស់ជាដើម ខណៈកម្ពុជាផលិតនូវសម្លៀកបំពាក់ ស្បែកជើង និងកាបូបសម្រាប់ធ្វើដំណើរ និងផលិតផលកសិកម្មជាដើម ដែលបច្ចុប្បន្នធ្វើឲ្យផលិតផលទាំងនេះ កំពុងហូរចូលទៅកាន់ទីផ្សារអាមេរិកមានកំណើនល្អប្រសើរ។ឯកឧត្តម បន្តថា ចំពោះកត្តាដែលធ្វើឲ្យទំនិញកម្ពុជា នាំចេញទៅកាន់សហរដ្ឋអាមេរិកមានកំណើន គួរជាទីកត់សម្គាល់នេះ គឺបានកើតចេញពីទំនាក់ទំនងរវាងប្រទេសទាំងពីរ ជាពិសេសគោលនយោបាយ ការបរទេស របស់កម្ពុជា ដែលមានទំនាក់ទំនងការទូតល្អជាមួយសហរដ្ឋអាមេរិក ក្នុងនោះចំពោះការធ្វើពាណិជ្ជកម្ម, សហរដ្ឋអាមេរិកបានដើរតួនាទីយ៉ាងសំខាន់ និងបានកំពុងបន្តផ្តល់ GSP ដល់ ទំនិញមួយចំនួន សម្រាប់ទីផ្សារ នាំចេញរបស់កម្ពុជា។លោក លឹម តុង ប្រធានសមាគមផលិតផលធ្វើដំណើរ និងស្បែកនៅកម្ពុជា ថ្លែងឲ្យដឹងថា នៅក្នុងឆមាសទី១ ឆ្នាំ ២០២២ ខ្សែច្រវ៉ាក់ផលិតកម្មនៅក្នុងស្រុក បានមមាញឹកយ៉ាងខ្លាំង និងបានស្រូបយកកំលាំងពលកម្មបន្ថែមយ៉ាង ច្រើននៅតាមរោងចក្រនីមួយៗ ខណៈដែលមានការបញ្ជាមានចំនួនច្រើន ជាពិសេសពីផ្សារសហរដ្ឋអាមេរិក និងសហគមន៍អឺរ៉ុបជាដើម ប៉ុន្តែនៅក្នុងឆមាសទី២ នេះ ចំណែកការផលិតហាក់ដូចជានៅទ្រឹង នឹងមិនមានការថែមម៉ោងច្រើនដូចមុនឡើយ ស្របពេលការបញ្ជាទិញមានចំនួនថមថយចុះ។សូមបញ្ជាក់ថា គិតត្រឹមរយៈពេល ៨ ខែ ឆ្នាំ ២០២២ ការធ្វើពាណិជ្ជកម្មនាំចេញទំទិញរបស់កម្ពុជា មានទំហំទឹកប្រាក់ប្រមាណជាង ១៥,៦ ពាន់លានដុល្លារ កើនឡើងជាង ២៦% បើធៀបរយៈពេលដូចគ្នាទៅឆ្នាំ ២០២១ ក្នុងនោះសម្រាប់ការនាំចេញទៅកាន់ទីផ្សារអាមេរិក មានទំហំជាង ៦,៤ ពាន់លានដុល្លារ កើនឡើងជាង ៣៧% ខណៈការនាំចូលពីសហរដ្ឋអាមេរិក មានត្រឹម ២២៤ លានដុល្លារ ថយចុះជាង ៣% បើធៀបរយៈពេលដូចគ្នាទៅឆ្នាំ ២០២១៕អត្ថបទ៖ សុន រ៉ាឌី

សម្តេចតេជោ ស្នើដល់រដ្ឋមន្ត្រីថាមពលអាស៊ាន ពិចារណាតភ្ជាប់ខ្សែបញ្ជូន និងបំពង់ឧស្ម័នក្នុងតំបន់អាស៊ាន

ភ្នំពេញ៖ សម្តេចតេជោ នាយករដ្ឋមន្ត្រី ស្នើរដល់រដ្ឋមន្ត្រីថាមពលអាស៊ាន ពិចារណាជំរុញការអនុវត្តការតភ្ជាប់ខ្សែបញ្ជូន និងបំពង់ឧស្ម័នកាត់តាមបណ្តប្រទេសអាស៊ាន ដើម្បីបង្កើនពាណិជ្ជកម្មថាមពលអគ្គិសនី និងចូលរួមឱ្យបានយ៉ាងសកម្ម ដើម្បីសម្រេចថាមពលអាស៊ាន។សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី ថ្លែងលើកឡើងក្នុងពិធីបើកកិច្ចប្រជុំរដ្ឋមន្ត្រីថាមពលអាស៊ានលើកទី៤០ កិច្ចប្រជុំពាក់ព័ន្ធ និងវេទិកាធុរកិច្ចថាមពលអាស៊ានឆ្នាំ ២០២២ ក្រោមមូលបទ «បង្កើនល្បឿនអន្តរកាលថាមពល ៖ការស្ដារសេដ្ឋកិច្ចឡើងវិញ និងកំណើនប្រកបដោយចីរភាព» តាមវីដេអូ Conference នៅថ្ងៃទី ១៥ ខែ កញ្ញា ឆ្នាំ ២០២២នេះថា នៅក្នុងក្របខណ្ឌអាស៊ាន ក្នុងនាមជាប្រធាននៅក្នុងឆ្នាំ ២០២២ នេះ កម្ពុជានឹងបន្តចូលរួមចំណែកបង្កើតគំនិតផ្តួចផ្តើមថ្មីៗ និងជំរុញការចូលរួមបន្ថែមលើរាល់សកម្មភាព និងគម្រោងអន្តរ-កាលថាមពលក្នុងតំបន់ ប្រកបដោយប្រសិទ្ធភាពខ្ពស់បំផុត។សូមបញ្ជាក់ថា ក្នុងរយៈពេល០២ ថ្ងៃនេះ រដ្ឋមន្ត្រីថាមពលទាំងអស់ នឹងមានកិច្ចប្រជុំសំខាន់ៗជាច្រើន ដែលមានឱកាសពិភាក្សាលើបញ្ហាសំខាន់ៗ ទាក់ទងនឹងវឌ្ឍនភាព ក្នុងកិច្ចខិតខំប្រឹងប្រែងអភិវឌ្ឍន៍វិស័យថាមពល ដែលជាផ្លូវឆ្ពោះទៅរកការបង្កើនល្បឿនអន្តរកាលថាមពល ជំរុញការងើបឡើងវិញកាន់តែខ្លាំង៕អត្ថបទ៖ សុន រ៉ាឌី

រដ្ឋមន្រ្តីក្រសួងសេដ្ឋកិច្ច ស្នើសុំឱ្យធនាគារវិនិយោគអឺរ៉ុប គាំទ្រផ្នែកហិរញ្ញប្បទាន ដល់ការអភិវឌ្ឍនៅកម្ពុជា

ភ្នំពេញ៖ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ស្នើសុំឲ្យធនាគារវិនិយោគអឺរ៉ុប (EIB) បន្តគាំទ្ររាជរដ្ឋាភិបាលកម្ពុជា ក្នុងការវិនិយោគលើវិស័យអាទិភាព តាមរយៈការចូលរួមជាឥណទានសម្បទាន, ហិរញ្ញប្បទានឥតសំណង, និងការគាំទ្រជំនួយបច្ចេកទេសនានា ដើម្បីចូលរួមជំរុញកំណើនសេដ្ឋកិច្ច និងការអភិវឌ្ឍប្រកបដោយចីរភាព។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងជំនួបពិភាក្សាការងារជាមួយ ឯកឧត្ដម គ្រីស ភីតធឹរ (Kriss Peeters) អនុប្រធានធនាគារវិនិយោគអឺរ៉ុប (EIB) នៅថ្ងៃទី ១៣ ខែ កញ្ញា ឆ្នាំ២០២២នេះថា រាជរដ្ឋាភិបាលកម្ពុជាបានដាក់ឱ្យប្រើប្រាស់នូវ “ក្របខណ្ឌយុទ្ធសាស្រ្ត និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣” ជាមួយនិងទស្សនវិស័យនៃការចាកចេញពីវិបត្តិនៃជំងឺកូវីដ-១៩ ក្នុងភាពរឹងមាំ និងការវិលត្រលប់ទៅរកមាគ៌ានៃកំណើន និងការអភិវឌ្ឍប្រកបដោយចីរភាព ។ “យុទ្ធសាស្រ្ត” នេះ បានកំពុងដើរតួនាទីជាផែនទីបង្ហាញផ្លូវ និងជាកម្លាំងចលករដ៏មានប្រសិទ្ធភាព សម្រាប់ការពង្រឹងសក្តានុពលនៃចន្ទល់កំណើនសេដ្ឋកិច្ចរបស់កម្ពុជាឱ្យរស់រវើកឡើង ក៏ដូចជាចាប់យកឱ្យបាននូវកាលានុវត្តភាពថ្មី ដែលកំពុងលេចឡើងស្របនឹងនិន្នាការតំបន់ និងសកល ដើម្បីលើកកម្ពស់កំណើនប្រកបដោយចីរភាព និងដែលកាន់តែមានពិពិធកម្ម ក៏ដូចជាដើម្បីកសាងភាពធន់ដ៏រឹងមាំនៃសង្គម-សេដ្ឋកិច្ចកម្ពុជា ។ ឯកឧត្តមអគ្គបណ្ឌិតសភាចា្យ ឧបនាយករដ្ឋមន្រ្តី ក៏បានថ្លែងអំណរគុណចំពោះការគាំទ្ររបស់ EIB ក្នុងការចូលរួមជំរុញកំណើនសេដ្ឋកិច្ចរបស់កម្ពុជា តាមរយៈកិច្ចសហប្រតិបត្ដិការបច្ចុប្បន្ន នឹងស្នើសុំឲ្យ EIB បន្តគាំទ្ររាជរដ្ឋាភិបាលក្នុងការវិនិយោគលើវិស័យអាទិភាព តាមរយៈការចូលរួមជាឥណទានសម្បទាន, ហិរញ្ញប្បទានឥតសំណង, និងការគាំទ្រជំនួយបច្ចេកទេសនានា ជាពិសេសនៅពេលដែលកម្ពុជាកំពុងស្តារ និងជំរុញកំណើនសេដ្ឋកិច្ច ដើម្បីឆ្ពោះទៅរកកំណើនល្អប្រសើរឡើងវិញ។ក្នុងជំនួបនេះ, ឯកឧត្ដម Kriss Peeters ក៏បានសម្តែងនូវសេចក្តីសោមនស្សរីករាយ ដែលបានអញ្ជើញមកធ្វើទស្សនកិច្ចនៅប្រទេសកម្ពុជា និងការស្វាគមន៍ដ៏កក់ក្ដៅរបស់រាជរដ្ឋាភិបាលកម្ពុជា និងបានជម្រាបជូនថា EIB បានដាក់សម្ពោធជាផ្លូវការនូវការិយាល័យប្រចាំតំបន់របស់ខ្លួន នៅទីក្រុងចាកាតា ប្រទេសឥណ្ឌូនេស៊ី កាលពីថ្មីនេះ ហើយ EIB បានត្រៀមរួចជាស្រេចក្នុងការពង្រឹងសហប្រតិបត្ដិការកម្រិតតំបន់ ជាពិសេសជាមួយកម្ពុជាឱ្យកាន់តែមានភាពរឹងមាំថែមទៀត ៕អត្ថបទ៖ សុន រ៉ាឌី

ទេសចរចាប់ផ្ដើមទៅលេងខេត្តមណ្ឌលគិរីបណ្ដើរៗហើយ មន្ត្រីទេសចរណ៍ណែនាំអ្នកផ្ដល់សេវាទេសចរណ៍កុំដំឡើងថ្លៃ

មណ្ឌលគិរី៖ រដូវកាលបុណ្យភ្ជុំបិណ្ឌកាន់បិណ្ឌបានចូលមកដល់ សម្រាប់ខេត្តមណ្ឌលគិរី ចាប់ផ្ដើមមានអ្នកទេសចរមួយចំនួនចូល ទៅលេងកម្សាន្តហើយ ខណៈដែលខេត្តភាគឦសានមួយនេះ ក៏បានរៀបរយត្រៀមទទួលភ្ញៀវជានិច្ចផងដែរ ជាមួយការ ណែនាំរបស់មន្ត្រីទេសចរណ៍ កុំឱ្យមានការដំឡើងថ្លៃសេវាកម្ម។កត់សម្គាល់ឃើញថា នៅថ្ងៃទី១៣ ខែកញ្ញា នេះ គោលដៅទេសចរមួយចំនួន ក្នុងក្រុងសែនមនោរម្យ មានអ្នកទេសចរតិចតួចទៅលេងកម្សាន្ត ដូចជា រមណីយដ្ឋានភ្នំដោះក្រមុំ និងសមុទ្រឈើ ជាដើម។ ហើយទោះបីជាភ្ញៀវមានចំនួនតិចតួចក៏ពិតមែន ប៉ុន្តែល្អប្រសើរជាងអំឡុងពេលភ្ជុំបិណ្ឌឆ្នាំមុន ដែលកូវីដ-១៩ កំពុងរាតត្បាតខ្លាំង ពុំមានអ្នកទេសចរ ទៅលេងមកម្សាន្តតែម្ដង ។ភ្ញៀវទេសចរ ដែលទៅលេងខេត្តមណ្ឌលគិរី៥ដងហើយនោះ បាននិយាយថា ខេត្តមណ្ឌលគិរី មានបរិយាកាសល្អ គួរជាទីកម្សាន្តមិនធុញទ្រាន់នោះទេ ហើយអ្វីដែលប្លែកនោះគឺខេត្តមណ្ឌលគិរីបច្ចុប្បន្ន សង្កេតឃើញ មានResortស្អាតៗ ដែលសង់លើកំពូលភ្នំ មើលទៅពិតជាមានភាពទាក់ទាញ ។លោកស្រី ម៉ី សារឹម ប្រធានស្ដីទី មន្ទីរទេសចរណ៍ខេត្តមណ្ឌលគិរី បានឲ្យដឹងដែរថា អំឡុងពេលភ្ជុំបិណ្ឌ កាន់បិណ្ឌ នេះ ភ្ញៀវទេសចរ មិនទាន់ច្រើនទេ ប្រហែលក្រោម១ពាន់នាក់ បើគិតត្រឹមសប្ដាហ៍ទី១ នៃខែកញ្ញានេះ ប៉ុន្តែបើធៀបនឹង ឆ្នាំ២០២១ មានការកើនឡើងខ្លះ ព្រោះពេលនោះស្ថិតក្នុងវិបត្តិកូវីដ-១៩។ លោកស្រី បានឱ្យដឹងថា សម្រាប់គោលដៅទេសចរណ៍ថ្មីៗ មិនទាន់មាននោះទេ ដោយភាគច្រើន តែ Resortថ្មីៗ មួយចំនួន កំពុងសាងសង់។លោកស្រី បានបញ្ជាក់ថា មន្ត្រីជំនាញ បានជូនដំណឹងទៅគ្រប់បណ្ដាផ្ទះសំណាក់ សណ្ឋាគារ អំពីសារាចររបស់ ក្រសួងទេសចរណ៍ ស្ដីពីសណ្ដាប់ សុវត្ថិភាពសុខាភិបាល និងជូនដំណឹងមិនឲ្យម្ចាស់អជីវកម្មស្នាក់នៅទាំងនោះ លួចដំឡើងថ្លៃបន្ទប់នោះទេ ។ខេត្តមណ្ឌលគិរី នារដូវកាលនេះ គឺមានភាពស្រស់បំព្រង ដោយសារសម្រស់វាលស្មៅពណ៌បៃតង លាតសន្ធឹងតាម កំពូលភ្នំ ជាទិដ្ឋភាពដែលអ្នកទេសចរគ្រប់គ្នាចង់ទស្សនា ៕ អត្ថបទ៖ អ៊ិត ភីរុណ

រដ្ឋមន្រ្តីពាណិជ្ជកម្ម ចូលរួមផ្តល់សន្ទរកថា ក្នុងកិច្ចប្រជុំក្រុមសកម្មភាពថ្នាក់តំបន់សម្រាប់អាស៊ាន

ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម កាលពីរសៀលថ្ងៃទី១៣ កញ្ញា ឆ្នាំ២០២២ នៅខេត្តសៀមរាប បានចូលរួមថ្លែងសន្ទរកថាបើក ក្នុងកិច្ចប្រជុំក្រុមសកម្មភាពថ្នាក់តំបន់សម្រាប់អាស៊ានរបស់វេទិកាសេដ្ឋកិច្ចពិភពលោក (World Economic Forum’s Regional Action Group for ASEAN) ក្រោមប្រធានបទ "ផ្លូវរបស់អាស៊ានឆ្ពោះទៅសេដ្ឋកិច្ចឌីជីថលប្រកបដោយថាមវន្ដ បរិយាបន្ន និងនិរន្តរភាព" ដែលរៀបចំឡើងដោយវេទិកាសេដ្ឋកិច្ចពិភពលោក (WEF)។ប្រភពពីក្រសួងពាណិជ្ជកម្ម នៅព្រឹកថ្ងៃទី១៤ ខែកញ្ញានេះ បានឲ្យដឹងថា គោលបំណងនៃកិច្ចប្រជុំនេះ គឺនាំយកអ្នកវិនិយោគ និងប្រធានក្រុមហ៊ុនមួយចំនួនមកប្រទេសកម្ពុជា ដើម្បីពិភាក្សាគ្នាលើកិច្ចសហប្រតិបត្តិការ រវាងរដ្ឋនិងឯកជន ក្នុងការជំរុញសេដ្ឋកិច្ច និងពាណិជ្ជកម្មប្រកបដោយថាមវន្ដ បរិយាបន្ន និងនិរន្ដរភាព ក្នុងតំបន់អាស៊ាន។ឯកឧត្តមរដ្ឋមន្រ្តី បានគូសបញ្ជាក់អំពីការខិតខំប្រឹងប្រែង និងការយកចិត្តទុកដាក់របស់រដ្ឋាភិបាលកម្ពុជា ក្នុងការទាញយកកាលានុវត្តភាព និងផលប្រយោជន៍នៃការរីកចម្រើននៃប្រព័ន្ធបច្ចេកវិទ្យា និងសេដ្ឋកិច្ចឌីជីថល ដែលសកម្មភាពរបស់រដ្ឋាភិបាល រួមមានដូចជា ការបង្កើតគណៈកម្មាធិការរដ្ឋាភិបាលឌីជីថល, គណៈកម្មាធិការសេដ្ឋកិច្ចនិងធុរកិច្ចឌីជីថល, ការអនុវត្តគោលនយោបាយរដ្ឋាភិបាលឌីជីថលកម្ពុជា ២០២២-២០៣៥, ការបង្កើតបញ្ជរតែមួយជាតិ និងចូលរួម ASEAN Single Windows, និងការអនុវត្តក្របខណ្ឌគោលនយោបាយក្របខណ្ឌគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥។ ជាមួយគ្នានេះ ឯកឧត្ដម ក៏បានលើកឡើងថា ក្នុងឋានៈជាប្រធានអាស៊ានឆ្នាំ២០២២ កម្ពុជាបានបង្កើតនូវគំនិតផ្ដួចផ្ដើមមួយចំនួន ដើម្បីលើកកម្ពស់ការធ្វើសមាហរណកម្មឌីជីថលអាស៊ាន ដូចជា ការសិក្សាលទ្ធភាពម៉ូដែលបញ្ជូនបច្ចេកវិទ្យាសម្រាប់គម្រោងពាក់ព័ន្ធនឹង SDGs ក្នុងការដោះស្រាយបញ្ហាប្រឈមពាក់ព័ន្ធនឹងនិរន្តរភាព និងក្របខណ្ឌសម្រាប់ជំរុញកំណើននៃ Ecosystems សម្រាប់អាជីវកម្មឌីជីថលថ្មីក្នុងតំបន់អាស៊ាន។ ឯកឧត្តមរដ្ឋមន្រ្តី បានចាត់ទុកកិច្ចប្រជុំថ្ងៃនេះ ដែលផ្តោតលើផ្លូវរបស់អាស៊ានឆ្ពោះទៅកាន់សេដ្ឋកិច្ចឌីជីថលប្រកបដោយថាមវន្ដ បរិយាបន្ន និងនិរន្ដរភាព គឺជាវេទិកាយ៉ាងសំខាន់ក្នុងការចូលរួមចំណែកផ្ដល់នូវទស្សនទានល្អៗពាក់ព័ន្ធនឹងកិច្ចសហប្រតិបត្តិការវិស័យរដ្ឋ-ឯកជន ក្នុងតំបន់អាស៊ាន៕ អត្ថបទ៖ ឈិត បូរ៉ាវី

ការចរចាប្រាក់ឈ្នួលកម្មករកាត់ដេរ នៅមិនទាន់រកចំណុចរួមនៃប្រាក់ខែនៅឡើយ

ភ្នំពេញ៖ ក្រុមប្រឹក្សាជាតិប្រាក់ឈ្នួលអប្បបរមា បានបញ្ចប់កិច្ចប្រជុំចរចាប្រាក់ឈ្នួលកម្មករ ផ្នែកវាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ២០២៣ នៅល្ងាចថ្ងៃទី១៣ ខែកញ្ញា ដោយមិនទាន់ឯកភាពគ្នា លើការកំណត់ប្រាក់ខែអប្បបរមានៅឡើយ ដោយតម្រូវប្រជុំនៅសប្តាហ៍ក្រោយទៀត។កិច្ចប្រជុំត្រីភាគីនេះ ទទួលបានគោលជំហរប្រាក់ឈ្នួលអប្បបរមា សម្រាប់ឆ្នាំ២០២៣ ដោយតំណាងភាគីកម្មករនិយោជិត បានលើកនូវតួលេខចំនួន ៣ផ្សេងគ្នា គឺតួលេខ ២០៦ដុល្លារអាម៉េរិក មាន សំឡេងគាំទ្រចំនួន ៨សំឡេង តួលេខ ២១០ដុល្លារអាម៉េរិក មានសំឡេងគាំទ្រចំនួន ៣សំឡេង និង តួលេខ ២១៣ដុល្លារអាម៉េរិក មានសំឡេងគាំទ្រចំនួន ៦សំឡេង។ដោយឡែក តំណាងភាគីនិយោជក បានឯកភាពយកតួលេខ ១៩៧ដុល្លារអាម៉េរិក គឺជាសំឡេងឯកច្ឆន្ទភាពផ្ទៃក្នុងរបស់ខ្លួន តំណាងភាគីរាជរដ្ឋាភិបាលដោយឈរលើលក្ខណៈបច្ចេកទេស និងវិទ្យាសាស្ត្រ បានកំណត់តួលេខចំនួន ១៩៨ដុល្លារអាម៉េរិក។ឯកឧត្តម ហេង សួរ សមាជិកក្រុមប្រឹក្សាជាតិប្រាក់ឈ្នួលអប្បបរមា និងជារដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ការចចារលើកទី៤ រវាងភាគីសហជីព និងនិយោជក មិនទាន់ឯកភាពគ្នានៅឡើយទៅលើការកំណត់តួលេខ។លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជា បានបញ្ជាក់ពីការខ្វែងគំនិតគ្នារវាងក្រុមសហជីព ប៉ុន្តែគោលបំណងចម្បងសំខាន់របស់ភាគីសហជីព គឺមានតែមួយដូចគ្នាប៉ុណ្ណោះ គឺដើម្បីប្រយោជន៍កម្មករនិយោជិត។ក្រុមប្រឹក្សាជាតិប្រាក់ឈ្នួលអប្បបរមា នឹងបន្តកិច្ចប្រជុំសម្រេចចុងក្រោយ ដើម្បីកំណត់ប្រាក់ឈ្នួលអប្បបរមា ផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប សម្រាប់ឆ្នាំ២០២៣ នៅថ្ងៃទី២១ ខែកញ្ញា ឆ្នាំ២០២២ សប្តាហ៍ក្រោយនេះ នៅមុនពិធីបុណ្យភ្ជុំបិណ្ឌ។គិតត្រឹមឆ្នាំ២០២២នេះ ប្រាក់ឈ្នួលអប្បបរមារបស់កម្មករនិយោជិត មានចំនួន ១៩៤ដុល្លារ ក្នុង១ខែ ដោយមិនគិតពីប្រាក់អត្ថប្រយោជន៍ផ្សេងៗ៕អត្ថបទ ឈិត បូរ៉ាវី

វេទិការដ្ឋ-ឯកជនដោះស្រាយក្តីកង្វល់ ដើម្បីលើកកម្ពស់ការវិនិយោគ និងប្រកួតប្រជែង

ភ្នំពេញ៖ វេទិការាជរដ្ឋាភិបាល និងឯកជន បានពិភាក្សាក្តីកង្វល់ និងសំណូមពរនានា នូវរាល់បញ្ហាប្រឈម នៅក្នុងវិស័យឯកជន ដើម្បីស្វែងរកដំណោះស្រាយសមស្រប និងយុត្តិធម៌ ក្នុងគោលដៅលើកកម្ពស់បរិយាកាសវិនិយោគ និងធុរកិច្ចប្រកបដោយប្រកួតប្រជែងស្មើភាពគ្នា និងមានតម្លាភាព ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាសហប្រធានក្រុមការងារផ្នែកនីតិកម្មពន្ធដារ និងអភិបាលកិច្ច “ក្រុម ឃ” នៃវេទិការាជរដ្ឋាភិបាល-ផ្នែកឯកជន រួមជាមួយនឹងលោក អានូដ ដាក (Arnaud Darc) សហប្រធាន “ក្រុម ឃ” (ខាងផ្នែកឯកជន) នៅថ្ងៃទី ១៣ ខែកញ្ញា ឆ្នាំ២០២២ នេះ បានបើកកិច្ចប្រជុំ “ក្រុម ឃ” ក្នុងគោលបំណងពិនិត្យ និងបន្តដោះស្រាយរាល់បញ្ហាក្តីកង្វល់ និងសំណូមពរនៅក្នុងវិស័យឯកជន ក្នុងគោលដៅជំរុញសកម្មភាពវិនិយោគ និងធុរកិច្ច ក្នុងបរិការណ៍ប្រទេសកម្ពុជាបើកសង្គម-សេដ្ឋកិច្ចឡើងវិញ ក្រោយពីមានភាពរអាក់រអួលអស់រយៈពេល ២ ឆ្នាំ ដោយសារការរីករាលដាលនៃជំងឺកូវីដ-១៩ ជាពិសេសបន្ទាប់ពីកម្ពុជាបានបង្កើតភាពសុំាសហគមន៍ពេញលេញ ក្នុងការរស់នៅតាមគន្លងប្រក្រតីភាពថ្មី ។ ក្នុងកិច្ចប្រជុំនេះ ឯកឧត្តម ឧបនាយករដ្ឋមន្ត្រី បានប្រកាសជាចំហរ ពិភាក្សាដើម្បីជម្រុញរកដំណោះស្រាយយ៉ាងផុលផុស នូវរាល់បញ្ហាប្រឈម និងសំណូមពររបស់វិស័យឯកជន ដើម្បីស្វែងរកដំណោះស្រាយសមស្រប និងយុត្តិធម៌ ព្រមទាំងលើកកម្ពស់បរិយាកាសវិនិយោគ និងធុរកិច្ចប្រកបដោយប្រកួតប្រជែងស្មើភាពគ្នា និងមានតម្លាភាព ការរក្សាបាននូវការអនុវត្តច្បាប់ និងបទប្បញ្ញាត្តិដែលមានជាធរមាន ។ កិច្ចប្រជុំនេះ បានពិភាក្សាលើរបៀបវារៈមួយចំនួនរួមមាន៖ ពន្ធលើស្លាកសញ្ញា និងពន្ធលើផ្ទាំងពាណិជ្ជកម្ម, ពាណិជ្ជកម្មខុសច្បាប់ (ដែលសំដៅលើបារីខុសច្បាប់ និងក្លែងក្លាយ), ពន្ធលើការផ្ទេរភាគហ៊ុន, សិទ្ធិផ្តាច់មុខ និងការនាំចូលយានជំនិះម៉ូដែលចុងក្រោយបំផុត ខណៈអ្នកផ្សេងទៀតកំពុងកាន់សិទ្ធិផ្តាច់មុខ និងអាករលើតម្លៃបន្ថែមចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក និងសេវាជាមូលដ្ឋានខាងហិរញ្ញវត្ថុ នៅក្នុងវិស័យហិរញ្ញវត្ថុ៕អត្ថបទ៖ សុន រ៉ាឌី

កម្ពុជានាំចេញទំទិញមានទំហំទឹកប្រាក់ជាង ១៥ ពាន់លានដុល្លារអាមេរិក

ភ្នំពេញ៖ គិតត្រឹមរយៈពេល ៨ខែ ឆ្នាំ២០២២ ការធ្វើពាណិជ្ជកម្មនាំចេញទំទិញរបស់កម្ពុជា មានទំហំទឹកប្រាក់ប្រមាណជាង ១៥ ៦៥១ លានដុល្លារ កើនឡើងជាង ២៦% ខណៈការនាំចូលមានទំហំជាង ២១ ៧៦៤ លានដុល្លារ កើនឡើងជាង ១៨% បើធៀបរយៈពេលដូចគ្នានឹងឆ្នាំ ២០២១។អគ្គនាយកដ្ឋានគយ និងរដ្ឋាករកម្ពុជា បានបង្ហាញទូរលេខការធ្វើពាណិជ្ជកម្មអន្តរជាតិ ក្នុងនោះបើគិតត្រឹមរយៈពេល ៨ខែ ឆ្នាំ២០២២ ការចេញទំនិញរបស់កម្ពុជា មានទំហំទឹកប្រាក់ប្រមាណ ១៥ ៦៥១ លានដុល្លារអាមេរិក កើនឡើងជាង ២៦% បើធៀបរយៈពេលដូចគ្នាក្នុងឆ្នាំ ២០២១ ។ ចំណែកទីផ្សារកម្ពុជានាំចេញ ក្នុងនោះការនាំចេញទៅសហរដ្ឋអាមេរិក មានទំហំទឹកប្រាក់ប្រមាណជាង ៦ ៤២១ លានដុល្លារ កើនឡើង ៣៧%, វៀតណាម ជាង ១ ៤៦៩ លានដុល្លារ កើនឡើង ជិត ៤%, ជប៉ុន ជាង ៧៨៩ លានដុល្លារ កើនជាង ១០%, អាល្លឺម៉ង់ ជាង ៧៤៧ លានដុល្លារ កើនឡើងជាង ២៩%, អង់គ្លេស ជាង ៦២៧ កើនឡើងជាង ៤២% បើធៀបទៅនឹងឆ្នាំ ២០២១ ក្រៅពីនេះកម្ពុជាក៏បាននាំចេញទៅកាន់ប្រទេសជាច្រើនទៀត ដោយបន្តកំណើនល្អប្រសើរផងដែរ។ដោយឡែកចំពោះការនាំចូលវិញ, នៅក្នុងរយៈពេល ៨ ខែនេះដែរ កម្ពុជាបាននាំចូលគិតជាទឹកប្រាក់មានទំហំប្រមាណជាង ២១ ៧៦៤ លានដុល្លារអាមេរិក កើនឡើងជាង ១៨% បើធៀបរយៈពេលដូចគ្នានឹងឆ្នាំ ២០២១។ ចំណែកទីផ្សារដែលនាំចូលសំខាន់ៗ៖ ការនាំចូលពីប្រទេសចិន មានទំហំទឹកប្រាក់ជាង ៧ ១៩៣ លានដុល្លារ កើនឡើងជាង ២០%, ថៃ ជាង ២ ៦១៣ លានដុល្លារ, កើនឡើងជាង ២៨%, វៀតណាម ជាង ២ ៧៧៤ លានដុល្លារ កើនជិត ៣៦%, ស្វីស ជាង ១ ៣៣៩ កើនឡើងជិត ២០០% បើធៀបរយៈពេលដូចគ្នាទៅឆ្នាំ ២០២១, ក្រៅពីនេះក៏មានប្រទេសជាច្រើនទៀត បាននាំចូលផលិតផលរបស់ខ្លួនចូលទីផ្សារកម្ពុជាផងដែរ។សូមបញ្ជាក់ថា ជុំវិញការធ្វើពាណិជ្ជកម្មអន្តរជាតិ, នៅក្នុងប៉ុន្មានឆ្នាំចុងក្រោយនេះ ទំនាក់ទំនងពាណិជ្ជកម្មទ្វេភាគីរវាងកម្ពុជា-អាមេរិក មានកំណើនគួរឲ្យកត់សម្គាល់ ក្នុងនោះកម្ពុជាភាគច្រើនបាននាំចេញមុខទំនិញទៅកាន់សហរដ្ឋអាមេរិកដូចជា៖ ផលិតផលវាយនភណ្ឌកាត់ដេរសំលៀកបំពាក់, ស្បែកជើង កាបូបសម្រាប់ធ្វើដំណើរ, គ្រឿងបង្គុំបន្ទះសឡា និងផលិតផលកសិកម្មជាដើម ខណៈការនាំចូលពីសហរដ្ឋអាមេរិកមានដូចជា៖ គ្រឿងចក្រ, រថយន្ត, គ្រឿងអេឡិចត្រូនិក ឱសថ និងបរិក្ខារពេទ្យជាដើម៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

រដ្ឋមន្ត្រីសុខាភិបាល៖ “បើចង់ពូកែ ត្រូវតែពូកែទាំងបច្ចេកទេស និងក្រមសីលធម៌វិជ្ជាជីវៈ ព្រោះនេះគឺជាចលនានៃបេះដូងកន្ត្រាក់របស់អ្នកវិជ្ជាជីវៈវេជ្ជសាស្ត្រ”

ប្រទេសស៊ីរី ថ្កោលទោសចំពោះការរារាំងក្បួនរថយន្តមនុស្សធម៌ មិនឲ្យចូលទៅខេត្ត Sweida

ក្រុមហាម៉ាស៖ ប្រជាជនហ្កាហ្សាជាង ២លាននាក់ ប្រឈមនឹងការស្លាប់ ដោយសារការអត់ឃ្លាន

លោក Trump សរសើរការគាំទ្រ «ខ្ពស់បំផុត» ក្នុងការស្ទង់មតិ ក្រោយមានភាពចម្រូងចម្រាសករណីលោក Epstein

Microsoft ជូនដំណឹងដល់ក្រុមហ៊ុន និងរដ្ឋាភិបាលនានា អំពីការវាយប្រហារសូហ្វវែរម៉ាស៊ីនមេ

រដ្ឋមន្រ្តីក្រសួងព័ត៌មានរម្លឹកដល់យុវជនកុំវាយប្រហារអ្នកដទៃតាម Cyber bulling ដែលធ្វើឱ្យជនរងគ្រោះបាក់ទឹកចិត្ត

ឯកឧត្តម ហេង រតនា៖ កម្ពុជាមិនមែនកំពុងតែដាក់គ្រាប់មីន PMN-2 ថ្មីនៅលើទឹកដីខេត្តសៀមរាបនោះទេ ប៉ុន្តែកំពុងសាងសង់អគាររាងគ្រាប់មីនធំជាងគេក្នុងពិភពលោកដោយហិរញ្ញប្បទានឥតសំណងពីជប៉ុន

ស្នងការនគរបាលរាជធានីភ្នំពេញ ដាក់ផែនការពង្រឹងសន្តិសុខសុវត្ថិភាព បង្ការ បង្ក្រាបបទល្មើសគ្រប់ប្រភេទ ជូនដល់ពលរដ្ឋ

សម្តេច ប៉ាប ជំរុញឲ្យបញ្ចប់ជាបន្ទាន់នូវ «ភាពឃោរឃៅ» នៃសង្រ្គាមហ្កាហ្សា ក្រោយវិហារបានរងការខូចខាត

អ៊ីស្រាអែលអះអាងថា បានវាយប្រហារកំពង់ផែ Hodeida ដែលកាន់កាប់ដោយក្រុមឧទ្ទាមយេម៉ែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877