នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប
កម្ពុជាផ្សព្វផ្សាយជាផ្លូវការ របាយការណ៍​វឌ្ឍនភាព​នៃ​ការ​អនុវត្ត​វិធានការ​កែ​ទម្រង់​មុត​ស្រួច​ជា​កញ្ចប់
មកដល់ពេលនេះ កសិករចំនួនជាង ១៤០០គ្រួសារ ងាកមកចង​ក្រងគ្នា ដើម្បី​ក្លាយ​ជា​សហគមន៍​កសិកម្ម​ទំនើប
កម្ពុជាកំពុងពិភាក្សាលើការចាប់យកឌីជីថលូបនីយកម្ម ដើម្បីជំរុញវិស័យនេះឱ្យកាន់តែរីកចម្រើន

សេដ្ឋកិច្ច និង កសិកម្ម

គម្រោងឧស្សាកម្មបៃតង ចូលរួមផ្លាស់ប្តូរច្រវ៉ាក់ផលិតកម្មក្នុងវិស័យឧស្សាហកម្ម ឆ្ពោះទៅរកការរីកចម្រើន

2022/09/02 12:08:07 pm        285
Facebook Telegram Linkin
ភ្នំពេញ៖ គម្រោងឧស្សាកម្មបៃតង (Green Industry) កំពុងជម្រុញការអភិវឌ្ឍខ្សែច្រវ៉ាក់ផលិតកម្ម​ក្នុងវិស័យឧស្សាហកម្ម រោងចក្រ សហគ្រាស ក្នុងកិច្ចដំណើរផ្លាស់ប្តូរឥរិយាបទដំណើរធុរកិច្ច ការ​គិតគូរ​ដល់ផ្នែកសេដ្ឋកិច្ច ​បរិស្ថាន​ និងសង្គម ព្រមទាំងជួយលើក​ស្ទួយ​ដល់វិស័យ​ឧស្សាហកម្ម​នៅកម្ពុជា​ឱ្យអភិវឌ្ឍន៍​ឈានមុខ និងប្រកបដោយនិរន្តភាព។ឯកឧត្តមបណ្ឌិត ទឹង ស៊ីនី រដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ លើកឡើង នៅថ្ងៃទី២ ខែកញ្ញា ឆ្នាំ២០២២នេះថា គម្រោងឧស្សាហកម្មបៃតងបង្កើតឡើង​សម្រាប់​ជួយគាំទ្រ និងលើកទឹកចិត្តដល់ឧស្សាហកម្ម រោងចក្រ សហគ្រាស ឲ្យអនុវត្តគោលការណ៍​ សកម្មភាព​បៃតងដូចជា ​ការកាត់បន្ថយការប្រើប្រាស់វត្ថុធាតុដើម ទឹក ថាមពល ​និងកាកសំណល់។ ​​គម្រោងនេះ​ បានជួយលើកកម្ពស់ដល់កិច្ចដំណើរការផលិតកម្ម ​និងការប្រកួតប្រជែង​នៅក្នុងខ្សែ​ច្រវ៉ាក់ផលិត​កម្មរបស់ខ្លួន។ឯកឧត្តម បន្តថា ការអនុវត្តគម្រោងឧស្សាហកម្មបៃតង ពិតជាមានសារៈសំខាន់ណាស់ ជាពិសេសការកាត់បន្ថយការបំពុល ការប៉ះពាល់ដល់សេដ្ឋកិច្ច បរិស្ថាន និងជាដាស់តឿន ដល់រោងចក្រ សហគ្រាស ចូលរួមជាមួយសកម្មភាពសង្គម​។នៅក្នុងរយៈពេលកន្លងមក ចំពោះរោងចក្រ សហគ្រាស ដែលបានចូលរួម គឺទទួលបានជោគជ័យ​ក្នុងកិច្ចដំណើរការខ្សែច្រវ៉ាកផលិតកម្មយ៉ាងខ្លាំងក្លា ក្នុងនោះសម្រាប់​ជំហានបន្ទាប់ ក្រសួង​នឹងរៀបចំឲ្យមានការប្រកួតប្រជែងឧស្សាកម្មបៃតង​ នៅចុងឆ្នាំ ២០២២ នេះបន្តទៀត ដើម្បីលើកកម្ពស់ដល់កិច្ចដំណើរការនៅក្នុងវិស័យឧស្សាហកម្ម រោងចក្រ សហគ្រាសក្នុងព្រះរាជាណាចក្រកម្ពុជា។នៅចុងឆ្នាំ២០២២ នេះ ក្រសួង​ គ្រោងលើកយកគម្រោងថ្មីៗបន្តទៀត ដើម្បីការប្រកួតប្រជែង​ឧស្សាហកម្មបៃតង សម្រាប់ឧស្សាហកម្ម រោងចក្រ សហគ្រាស៕ អត្ថបទ៖ សុន រ៉ាឌី

ក្រុមប្រឹក្សាជាតិប្រាក់ឈ្នួលអប្បបរមា គណនាប្រាក់ឈ្មួលសម្រាប់ឆ្នាំ២០២៣​ ចំនួនជាង ១៩៧ដុល្លារ

2022/09/01 01:18:34 pm        347
Facebook Telegram Linkin
ភ្នំពេញ៖ ក្រុមប្រឹក្សាជាតិប្រាក់ឈ្នួលអប្បបរមា ​បានគណនា រកឃើញតួលេខប្រាក់ឈ្នួល​អប្បបរមា​សម្រាប់ឆ្នាំ២០២៣គឺចំនួន ១៩៧,៨៦ ដុល្លារអាម៉េរិក​ ខណៈភាគីសហជីពបានស្នើ ២១៣ដុល្លារ និង​ភាគីនិយោជកដាក់ស្នើ ១៩៦ដុល្លារ ។ឯកឧត្តម ហេង សួរ សមាជិកក្រុមប្រឹក្សាជាតិប្រាក់ឈ្នួលអប្បបរមា និងជារដ្ឋលេខាធិការ​ក្រសួង​ការ​ងារ ​និងបណ្តុះបណ្តាលវិជ្ជាជីវៈ នៅក្រោយបញ្ចប់​កិច្ចប្រជុំ​ក្រុមប្រឹក្សាជាតិប្រាក់ឈ្នួល​អប្បបរមា​លើកទី៣នេះ ​បានមានប្រសាសន៍​ប្រាប់ក្រុមអ្នកសារព័ត៌មានថា​ ងភាគីនិយោជក ​និងនិយោជិត បាន​បន្តពន្យល់ ​និងការពារគោលជំហររបស់ខ្លួន​ទៅវិញទៅមកប្រកបដោយវិជ្ជាជីវៈ និង​ភាពចាស់ទុំ។នៅក្នុងកិច្ចប្រជុំត្រីភាគីនេះ ​ភាគីរាជរដ្ឋាភិបាល ​បានបន្ត ​សម្របសម្រួល និងផ្តល់នូវការពន្យល់​បន្ថែម​លើចំណុចនានា ​តាមសំណូមពររបស់ភាគីតំណាងកម្មករនិយោជិត និងភាគីតំណាង​និយោជកផងដែរ។តាមលក្ខណបច្ចេកទេស​ និងបម្រែបម្រួលទិន្នន័យ​នៃលក្ខណវិនិច្ឆ័យទាំង ៧ ដែលជាមូលដ្ឋាន​កំណត់​ប្រាក់ឈ្នួលអប្បបរមា​ អគ្គលេខាធិការដ្ឋានក្រុមប្រឹក្សាជាតិប្រាក់ឈ្នួលអប្បបរមា បាន​គណនា​ឃើញថា​តួលេខប្រាក់ឈ្នួលអប្បបរមាសម្រាប់ឆ្នាំ២០២៣គឺ ​១៩៧,៨៦ដុល្លារអាម៉េរិក។លោក អាត់ ធន់ ភាគីសហជីព ​និងតំណាងឲ្យកម្មករនិយោជិត​ បានរំពឹងទុកថា ​ភាគីនិយោជក នឹង​អាចដំឡើង​ក្នុងកម្រិតមួយដែលអាចទទួលយកបាន ​បន្ថែមពីលើតួលេខលើកនេះចំនួន ​១៩៦ដុល្លារ ក្នុង​កិច្ចប្រជុំនាលើកក្រោយទៀត ​ព្រោះការទាមទារដំឡើងប្រាក់ឈ្នួល​ទាំងនេះ គឺ​ដើម្បី​ជួយ​ដល់កម្មករនិយោជិតតែប៉ុណ្ណោះ។អង្គប្រជុំកាល​ពី​រសៀល​ថ្ងៃពុធ ​បាន​ឯកភាពគ្នាកំណត់​កិច្ចពិភាក្សាជាលក្ខណត្រីភាគីបន្តទៀត ថ្ងៃទី១៣​ ខែកញ្ញា ឆ្នាំ២០២២ និងប្រជុំបញ្ចប់នៅថ្ងៃទី២១​ ខែកញ្ញា ឆ្នាំ២០២២។សូមបញ្ជាក់ថា​ សម្រាប់ប្រាក់ឈ្នួលអប្បបរមាណកម្មករនិយោជិកក្នុងវិស័យវាយនភណ្ឌកាត់ដេរ ផលិតស្បែកជើង​និងផលិតផលិតផលធ្វើដំណើរ​ និងកាបូប ​សម្រាប់ឆ្នាំ២០២២​ ទទួល​បាន ១៩៤​ដុល្លារអាម៉េរិក ក្នុង១ខែ ​ដោយមិនគិតពីប្រាក់អត្ថប្រយោជន៍ផ្សេងៗទៀតទេ៕ អត្ថបទ៖ បូរ៉ាវី

ក្រសួងសេដ្ឋកិច្ច ធ្វើវិសោធន៍កម្មច្បាប់ស្តីពីលទ្ធកម្មសាធារណៈ

2022/09/01 01:06:16 pm        401
Facebook Telegram Linkin
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ ធ្វើវិសោធន៍កម្មច្បាប់ ស្តីពីលទ្ធកម្មសាធារណៈ ដើម្បីធានា​ឱ្យដំណើរការលទ្ធកម្មសាធារណៈ ​សម្រាប់ការទិញ ​ការសាងសង់ ​ការជួសជុល ​ការជួលសេវាកម្ម និងសេវាទីប្រឹក្សា​ឱ្យកាន់តែមានសុក្រឹតភាព ​និងមានលក្ខណៈគ្រប់ជ្រុងជ្រោយ ធានាដល់​ដំណើរការលទ្ធកម្មសាធារណៈ​ ស្របតាមឧត្តមានុវត្តអន្តរជាតិ។ឯកឧត្តមបណ្ឌិត ហ៊ីវ សុវណ្ណ រដ្ឋលេខាធិការក្រសួងសេដ្ឋកិច្ច ​និងហិរញ្ញវត្ថុ លើកឡើងក្នុង​ពិធីបិទ​សិក្ខាសាលាពិគ្រោះយោបល់ដើម្បីផ្តល់ធាតុចូលលើសេចក្តីព្រាងច្បាប់ស្តីពីលទ្ធកម្មសាធារណៈ នៅថ្ងៃទី ៣១ ខែសីហា ឆ្នាំ ២០២២ នេះថា ចំពោះការពិគ្រោះយោបល់​ លើការធ្វើវិសោធនកម្មច្បាប់ ស្តីពីលទ្ធកម្មសាធារណៈ ​ ពិតជាមានភាពចាំបាច់ សម្រាប់ឱ្យក្រសួងសេដ្ឋកិច្ច ​និងហិរញ្ញវត្ថុ បន្ត​រៀបចំ​កែលម្អបន្ថែម លើសេចក្តីព្រាងច្បាប់ស្តីពីលទ្ធកម្មសាធារណៈ ​ឱ្យកាន់តែមានសុក្រឹតភាព និង​លក្ខណៈគ្រប់ជ្រុងជ្រោយ ដើម្បីធានាឱ្យដំណើរការលទ្ធកម្មសាធារណៈ ​សម្រាប់ការទិញ ការ​សាងសង់ ការជួសជុល ​ការជួលសេវាកម្ម ​និងសេវាទីប្រឹក្សា​ ឱ្យប្រព្រឹត្តទៅដោយតម្លាភាព គណនេយ្យ​ភាព ភាពយុត្តិធម៌ ប្រសិទ្ធភាព ចីរភាព ​គុណភាព សមភាព ការសន្សំសំចៃ និង​ទាន់ពេលវេលា ស្របតាមឧត្តមានុវត្តអន្តរជាតិ។ឯកឧត្តមបណ្ឌិត ឈឹម សារ៉េត ប្រតិភូរាជរដ្ឋាភិបាលទទួលបន្ទុកជាអគ្គនាយក នៃ​អគ្គនាយកដ្ឋាន​លទ្ធកម្មសាធារណៈ ​លើកឡើងថា ​រាជរដ្ឋាភិបាល​ ជាពិសេសក្រសួងសេដ្ឋកិច្ច និងហិរញ្ញវត្ថុ បាន​កំពុងរៀបចំ​សេចក្តីព្រាងវិសោធនកម្មច្បាប់​ ស្តីពីលទ្ធកម្មសាធារណៈនេះឱ្យបានជោគជ័យ ដោយ​សេចក្តីព្រាងវិសោធនកម្មច្បាប់នេះ ​នឹងជម្រុញរៀបចំឲ្យចប់ក្នុងកម្រិតថ្នាក់ដឹកនាំ ត្រឹម​ដំណាច់​ឆ្នាំ២០២២នេះ ​និងបញ្ជូន​ទៅទីស្តីការគណៈរដ្ឋមន្ត្រី​ នៅក្នុងខែ ​មករា​ ឆ្នាំ ២០២៣ ​ដើម្បីពិនិត្យ និង​អនុម័ត មុននឹងបញ្ជូនបន្តទៅរដ្ឋសភា និងព្រឹទ្ធសភា។សូមបញ្ជាក់ថា អគ្គនាយកដ្ឋានលទ្ធកម្មសាធារណៈ ​ជាអង្គភាពនៃការគ្រប់គ្រង ធានាដល់​ដំណើរ​លទ្ធកម្ម​សាធារណៈរបស់រដ្ឋ ​ដូចជាការទិញទំនិញ, ​ការសាងសង់, ជួសជុល, ​ការទទួលម៉ៅការ, ការ​ផ្គត់ផ្គង, សេវាទីប្រឹក្សា, ​ផ្នែកសេវាកម្ម, ​ការដាក់ដេញថ្លៃ និងការការគ្រប់គ្រង កិច្ច​សន្យាការងារលទ្ធកម្មសាធារណៈជាដើម៕ អត្ថបទ៖ សុន រ៉ាឌី

ពីថ្ងៃទី១-១០ ខែកញ្ញា ប្រេងម៉ាស៊ូតឡើង៤០០រៀល , ប្រេងសាំងធម្មតា រក្សាតម្លៃដដែល

2022/09/01 10:41:32 am        324
Facebook Telegram Linkin
ភ្នំពេញ៖ ក្រសួងពាណិជ្ជកម្មប្រកាសពីតម្លៃលក់រាយប្រេងឥន្ធនៈតាមស្ថានីយនានាទូទាំងប្រទេស ចាប់ពីថ្ងៃទី០១-១០ ខែកញ្ញា ឆ្នាំ២០២២ ដោយប្រេងសាំងធម្មតាមត្រូវលក់តម្លៃ ៤.៧០០រៀល/លីត្រ(តម្លៃដដែល) និងប្រេងម៉ាស៊ូតត្រូវលក់តម្លៃ ៥.៥០០រៀល/លីត្រ(ឡើង៤០០រៀល)។

ក្រុមហ៊ុនអាកាសចរណ៍ធំៗ៤៥ បានឯកភាពពង្រីកជើងហោះហើរមកកម្ពុជាជាធម្មតាឡើងវិញ

2022/08/31 04:54:23 pm        677
Facebook Telegram Linkin
ភ្នំពេញ៖ ចំនួនក្រុមហ៊ុនអាកាសចរណ៍អន្តរជាតិបណ្តាប្រទេសចំនួន៤៥ បើកជើងហោះហើរ និងពង្រីកជើងហោះហើរចេញចូលប្រទេសកម្ពុជាជាធម្មតាឡើងវិញ ​បន្ទាប់ពីវិបត្តិកូវីដ១៩ មានការថមថយ។ឯកឧត្តម ជា អូន រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ បានថ្លែង​ប្រាប់BTV នៅថ្ងៃទី៣១ ខែសីហានេះថា ​រហូតមកដល់ខែសីហា ឆ្នាំ២០២២ រដ្ឋលេខា​ធិការដ្ឋាន​អាកាសចរស៊ីវិល បានចុះហត្ថលេខាលើអនុសារណៈព្រមព្រៀង ​ជាមួយរដ្ឋាភិបាល និងក្រុមហ៊ុន​អាកាសចរណ៍​អន្តរជាតិចំនួន៤៥ប្រទេស​ ក្នុងនោះក៏មានបណ្តាប្រទេសនៅប៉ែកខាង​មជ្ឈិមបូព៌ា ជាពិសេស​ ការតភា្ជប់ជើងហោះហើរពីទីក្រុងឌុយបៃ​ សហភាពអារ៉ាប់រួម និងប្រទេសកាតាម​កកម្ពុជាជាដើម ​ខណៈការហោះហើរនេះគឺបានអាកខានជាង ២ឆ្នាំដោយសារវិបត្តិកូវីដ១៩។ឯកឧត្តម ជា អូន បន្តថា ក្នុងអំឡុងពេលនេះ ​បណ្តាក្រុមហ៊ុនអាកាសចរណ៍ដែល​បានដាក់ពាក្យ​ស្នើរសុំ​បើកជើងហោះហើរនោះ ​គឺបានបើក​ដំណើរ​ការ​សឹង​តែល្អដូច​ដើម​ឡើង​វិញអស់ហើយ ខណៈក្នុងខែ​សីហានេះ​ នៅរាជធានីភ្នំពេញ​ គឺបានទទួលជើងយន្តហោះជាមធ្យម២៥ជើងក្នុង​មួយថ្ងៃៗ ​នៅខែសៀមរាប​ បានទទួលជើងយន្តហោះជាមធ្យមប្រមាណ១០ជើងក្នុងមួយថ្ងៃ។ប្រធានសមាគទេសចរណ៍អាស៊ីប៉ាស៊ីភិច PATA ប្រចាំនៅកម្ពុជា ​លោក ធួន ស៊ីណាន វាយតំលៃថា កម្ពុជា​គឺធ្វើហាក់មានភាពល្អប្រសើរជាងគេច្រើន ខណៈការទាក់ទាញអ្នកដំណើរអន្តរជាតិ​មកកម្ពុជា​កើនលើស៣០%នេះ ​គឺមាន​ប្រទេស​ជាច្រើនក្នុងតំបន់អាស៊ីប៉ាភិចនេះ ទាក់ទាញអ្នកដំណើរ​អន្តរជាតិ​ហោះចូលប្រទេសគេមានមិនទាន់ដល់៣០% នៃអ្នកដំណើរសរុបនៅក្នុងឆ្នាំ២០១៩នោះទេ៕ អត្ថបទ ស៊ុម សុខជា

វិនិយោគិនជប៉ុន​ ស្វែងយល់ពីសក្តានុពលវិនិយោគនៅកម្ពុជា

2022/08/31 01:39:09 pm        416
Facebook Telegram Linkin
ភ្នំពេញ៖ គណៈប្រតិភូវិនិយោគិនជប៉ុន កំពុងស្វែងយល់ពីសក្តានុពលលើវិស័យវិនិយោគ និងធុរកិច្ចនៅកម្ពុជា​ ខណៈទំហំពាណិជ្ជកម្មកម្ពុជា ជប៉ុនកំពុងកើនឡើង។ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម នៅក្នុងជំនួបពិភាក្សាការងារជាមួយ​គណៈប្រតិភូធុរកិច្ច ​និងវិនិយោគជប៉ុនចំនួន ១៤ក្រុមហ៊ុន ​ដឹកនាំដោយ​ លោកស្រី ម៉ារីសា ហារ៉ូតា (Marisa Haruta) ​តំណាងអង្គការ ជេត្រូ(JETRO) ជប៉ុនប្រចាំរាជធានីភ្នំពេញ ​កាលពីរសៀលថ្ងៃទី៣០ សីហា​ ឆ្នាំ២០២២នេះ មានប្រសាសន៍ថា ​ជេត្រូ ​គឺជាដៃគូដ៏ល្អមួយរបស់ក្រសួង ក្នុងការជំរុញ​សកម្មភាព​ពាណិជ្ជកម្មនិងវិនិយោគ ​ដោយតែងតែធ្វើកិច្ចសហប្រតិបត្តិការជាមួយគ្នា ក្នុងគោលដៅ​ជំរុញពាណិជ្ជកម្មរវាងកម្ពុជា-ជប៉ុន។ឯកឧត្តម ​ក៏បានថ្លែងអំណរគុណដល់អង្គការ ជេត្រូ ​ជប៉ុនប្រចាំរាជធានីភ្នំពេញ ចំពោះការដឹកនាំ​គណៈប្រតិភូធុរកិច្ច ​និងវិនិយោគជប៉ុនមកកាន់​ប្រទេសកម្ពុជា ក្នុងការធ្វើការសិក្សា​ស្វែងយល់​អំពី​បរិយាសធុរកិច្ច ​និងវិនិយោគនៅក្នុងប្រទេសកម្ពុជា​ដោយផ្ទាល់។ជាការឆ្លើយតប ​លោកស្រីតំណាងអង្គការ ជេត្រូ បានលើកឡើងអំពីគោលបំណងនាពេលនេះថា គឺ​ដើម្បីផ្តល់ឱកាសដល់ ​គណៈប្រតិភូធុរកិច្ចជប៉ុនបានស្តាប់​ដោយផ្ទាល់​ពី​ឯកឧត្តមរដ្ឋមន្រ្តី អំពី​ស្ថានភាពទូទៅនៃបរិយាកាសធុរកិច្ចនៅកម្ពុជា ​និងស្ថានភាពពាណិជ្ជកម្មនៃប្រទេសទាំងពីរ ជា​ពិសេសការ​សម្របសម្រួលពីរដ្ឋាភិបាលកម្ពុជា ​លើវិស័យពាណិជ្ជកម្ម​ប្រកប​ដោយការយកចិត្ត​ទុកដាក់​ខ្ពស់ ព្រមទាំងការស្វាគមន៍យ៉ាងកក់ក្តៅចំពោះធុរជន ​និងវិនិយោគិនជប៉ុន​ឱ្យពិចារណា​ក្នុងការ​ប្រកប​អាជីវកម្ម និងវិនិយោគនៅក្នុងប្រទេសកម្ពុជា។ក្រសួងពាណិជ្ជកម្មកម្ពុជា ​បានបញ្ជាក់ថា ​គិតត្រឹមបំណាច់ឆ្នាំ២០២១ ​ទំហំពាណិជ្ជកម្មទ្វេភាគី រវាង​កម្ពុជា-ជប៉ុន មានទឹកប្រាក់ចំនួនប្រមាណជាង ​១,៧០០លានដុល្លាអាមេរិក ក្នុងនោះកម្ពុជា​នាំចេញ​ទៅជប៉ុនមានទឹកប្រាក់ប្រមាណជាង ១ពាន់លានដុល្លារ​។ ចំណែកឯជប៉ុននាំចូលមកកម្ពុជាវិញ មានទឹក​ប្រាក់ប្រមាណជាង ​៦០៧លានដុល្លារ។ ឯកឧត្តម បានឲ្យដឹងទៀតថា ​ការនាំចេញរបស់កម្ពុជាទៅ​កាន់ប្រទេសជប៉ុន​ មាន​ផលិតផលដូចជា៖ សំលៀកបំពាក់ ស្បែកជើង កាបូប ​និងផលិតផលផ្សេងទៀត។​ ក្នុងក្របខ័ណ្ឌវិនិយោគ គិតត្រឹម​ឆ្នាំ២០២១កន្លងទៅ ក្រុមប្រឹក្សាអភិវឌ្ឍន៍​កម្ពុជា​បានអនុម័តគម្រោងវិនិយោគ​ដែលមាន​លក្ខណៈ​សម្បត្តិគ្រប់គ្រាន់ចំនួន ​១៤៦គម្រោង ​ជាមួយនឹងទុនវិនិយោគសរុប​ចំនួនជាង​ ២.៨ពាន់លានដុល្លារ ដោយក្នុងនោះ ​គម្រោងវិនិយោគរបស់ជប៉ុនមានចំនួន ​២គម្រោង ដែលមានទុនវិនិយោគ​សរុប​ប្រមាណ ​៦២លានដុល្លារ៕អត្ថបទ៖ ឈិត បូរ៉ាវី

ក្រុមវិនិយោគថៃចាត់ទុកកម្ពុជា ជាប្រទេសគោលដៅសម្រាប់ធ្វើពាណិជ្ជកម្ម និងវិនិយោគ

2022/08/31 01:31:13 pm        373
Facebook Telegram Linkin
ភ្នំពេញ៖ ក្រុមវិនិយោគថៃ ចាត់ទុកប្រទេសកម្ពុជា គឺជាប្រទេសគោលដៅសម្រាប់ធ្វើពាណិជ្ជកម្ម និងការវិនិយោគយ៉ាងសំខាន់ ​និងផ្តល់ភាពអំណោយផលគ្រប់បែបយ៉ាងដល់ការអភិវឌ្ឍ ដោយសារមានស្ថេរភាពនយោបាយល្អប្រសើរ និងរឹងមាំ។លោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃនៅកម្ពុជា លើកឡើងនៅថ្ងៃ ៣០ ខែ សីហា ឆ្នាំ២០២២នេះថា កម្ពុជា-ថៃ គឺជាប្រទេសដែលមានកិច្ចសហប្រតិបត្តិការល្អនៅ​ក្នុង​វិស័យ​សេដ្ឋកិច្ច ​និងសង្គម ​ជាក់ស្តែងគិតមកដល់ពេលនេះ ​មានក្រុមហ៊ុនថៃជាច្រើន បាន​បើក​អាជីវកម្ម​នៅព្រះរាជាណាចក្រកម្ពុជា​ ប្រព្រឹត្តទៅដោយរលូន និងផ្តល់ភាពអំណោយផល​គ្រប់បែប​យ៉ាង នៅ​ក្នុងខ្សែច្រវ៉ាក់ផលិតកម្មរបស់ខ្លួន ​សម្រាប់ការ​ផ្គត់ផ្គង់​ និងការនាំចេញ។លោកស្រី បន្តថា ​ជុំវិញការវិនិយោគ,​បន្ទាប់ពីកម្ពុជាបើកប្រទេសឡើងវិញជិត​១ ឆ្នាំ ​កន្លងមកនេះ ក្រុមធុរកិច្ចថៃ​ជាច្រើនបានចូលមកកម្ពុជា ​ដើម្បីស្វែងរកការធ្វើពាណិជ្ជកម្ម ដោយក្រុមធុរកិច្ចទាំង​នោះ​បានចាត់ទុកប្រទេសកម្ពុជា ​គឺជាប្រទេសគោលដៅយ៉ាងសំខាន់។កម្ពុជាគឺជាប្រទេសមានស្ថេរភាពនយោបាយល្អប្រសើរ និងរឹងមាំ ​និងបើកទូលាយ ដោយបាន​បង្ករលក្ខណៈងាយស្រួលគ្រប់បែបយ៉ាងដល់ការធ្វើពាណិជ្ជកម្ម ​និងឱកាសវិនិយោគ ជាពិសេស​ការវិនិយោគ​លើសហគ្រាសធុនតូច​ និងមធ្យម បច្ចុប្បន្នក្រុមធុរិកិច្ចថៃទាំង​នោះកំពុង​សម្លឹង​មើល​សក្តានុពល​លើវិស័យនេះ ​ដើម្បីឈានទៅបង្កើតគម្រោងវិនិយោគរបស់ខ្លួន ដែលជាផ្នែកមួយ​នៃការចូលរួមអភិវឌ្ឍន៍សេដ្ឋកិច្ច ​ជាមួយរាជរដ្ឋាភិបាលកម្ពុជា ។លោកស្រី ជីរ៉ាណាន់ វង្សមង្គល បញ្ជាក់បន្ថែមថា ​ជាក់ស្តែងធុរកិច្ចថៃដែលអញ្ជើញមកពេលនេះ បាន​កោតសរសើរចំពោះការរីកចម្រើនរបស់កម្ពុជា​ ក្នុងនោះក្រុមធុរកិច្ច ក៏បានផ្សព្វផ្សាយ​ពី​សេវាព្យាបាលទៅកាន់មន្ទីរពេទ្យ សិរិជេត ច័ន្ទបុរី នៃប្រទេសថៃ និងបានស្វែងយល់អំពី​សក្តានុពល​វិនិយោគផ្សេងៗនៅព្រះរាជាណាចក្រកម្ពុជា ។ ចំពោះឱកាសវិនិយោគនេះ បច្ចុប្បន្នមានក្រុមហ៊ុនថៃជាច្រើនផ្សេងទៀត បានកំពុងចាប់អារម្មណ៍​អំពីការវិនិយោគលើវិស័យកសិកម្មដូចជា៖ ការវិនិយោគលើដំណំាឧស្សាហកម្ម ទំពាំង​បាយជូរ ការដាំដុះផ្កា​ រោងចក្រផលិតជីកសិកម្មជាដើម​។ ចំណែកវិស័យឧស្សាហកម្ម ​វិនិយោគិនបានចាប់អារម្មណ៍ ​លើការវិនិយោគវិស័យម្ហូបអាហារ និង​ភេសជ្ជៈ និងវិស័យសហគ្រាសធុនតូច ​និងមធ្យមជាដើម ​ជាក់ស្តែងនៅពេលនេះ ធុកិច្ចថៃ​បានចាប់អារម្មណ៍អំពីការវិនិយោគលើវិស័យសុខាភិបាល និង​ការ​ផ្សព្វផ្សាយ​ពីសេវាព្យាបាល​ទៅ​កាន់ប្រទេសថៃ ​ខណៈដែលថៃបានចាត់ទុកកម្ពុជា​ គឺជាជំរើសទី១ ក្នុង​ចំណោម​ប្រទេសជាច្រើនទៀតក្នុងអាស៊ីអាគ្នេយ៍៕អត្ថបទ៖ សុន រ៉ាឌី

កម្ពុជា-អាមេរិក បន្តពង្រឹងកិច្ចសហប្រតិបត្តិការលើវិស័យសេដ្ឋកិច្ច និងសង្គម

2022/08/31 01:22:13 pm        252
Facebook Telegram Linkin
ភ្នំពេញ៖ មន្រ្តីជាន់ខ្ពស់ក្រសួងសេដ្ឋកិច្ចថា អាម៉េរិកពិតជាមានសារៈសំខាន់ចំពោះកម្ពុជា ហើយ​កម្ពុជា​ពិតជាចង់ឃើញទំនាក់ទំនងរវាងកម្ពុជា-អាម៉េរិកកាន់តែប្រសើរឡើង និងចង់ឃើញ​ទំហំពាណិជ្ជកម្មទ្វេភាគីកម្ពុជា-អាម៉េរិក មានការកើនឡើងទាំងសងខាង។ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី ​និងជារដ្ឋលេខាធិការប្រចាំការក្រសួង​សេដ្ឋកិច្ច និងហិរញ្ញវត្ថុ ​ជួបពិភាក្សាការងារជាមួយ គណៈប្រតិភូសមាជិកសភាអាមេរិក ​នៅថ្ងៃទី ២៩ ខែសីហា ឆ្នាំ២០២២នេះថា ​កម្ពុជាបានខិតខំសម្រេចបានកំណើនសេដ្ឋកិច្ចខ្ពស់​ប្រមាណ ៧% ជា​មធ្យម​ក្នុងមួយឆ្នាំ សម្រាប់ជាង២០ឆ្នាំចុងក្រោយនេះ ​ហើយអាចកាត់បន្ថយអត្រាភាពក្រីក្រពី ៥៤% មកនៅ​ត្រឹម១៤% ដោយកម្ពុជារំពឹងថា ​សមិទ្ធផលទាំងនេះ ​នឹងក្លាយជាមូលដ្ឋានគ្រឹះដ៏រឹងមាំ សម្រាប់​នាំនាវាកម្ពុជាឆ្ពោះទៅរកដំណាក់កាលថ្មី ​នៃការអភិវឌ្ឍរីកចម្រើនបន្តតទៅមុខទៀត។ ចំណែកទំនាក់ទំនងកម្ពុជា-អាម៉េរិក, ឯកឧត្តម វង្សី វិស្សុត លើកឡើងថា ទោះបីទំនាក់ទំនង​រវាង​កម្ពុជា​និងអាម៉េរិក ដែលជាប្រទេសមហាអំណាច ពេលខ្លះក៏ធ្លាប់មានភាពប្រសើរឡើង ហើយពេល​ខ្លះទៀតក៏ធ្លាក់ចុះ តែអាម៉េរិកពិតជាមានសារៈសំខាន់ចំពោះកម្ពុជា ហើយកម្ពុជាពិតជាចង់​ឃើញ​ទំនាក់ទំនង​រវាងកម្ពុជា-អាម៉េរិក កាន់តែប្រសើរឡើង ​ដើម្បីផលប្រយោជននៃប្រទេសទំាងពីរ។ ឯកឧត្តម ប​ញ្ជាក់បន្ថែមថា ​កម្ពុជានិងអាម៉េរិក មានចំណុចជាច្រើន ដែលយើងអាចធ្វើការរួមគ្នា ដើម្បី​ផល​ប្រយោជនទាំងសងខាង, ពិតណាស់កម្ពុជាត្រូវការអាម៉េរិក ព្រោះអាម៉េរិក​មិន​ត្រឹម​ជា​ទីផ្សារនាំចេញដ៏ធំប៉ុណ្ណោះទេ ប្រមាណ ៤២% ​នៃការនាំចេញសរុបរបស់កម្ពុជា តែក៏ជា​ប្រភព​វិនិយោគ​ប្រកប​ដោយសក្តានុពល​ និងនៅតែជាប្រទេសឈានមុខគេ ​ផ្នែកបច្ចេកវិទ្យា ​នវានុវត្តន៍ និងប្រព័ន្ធអភិបាលកិច្ចផងដែរ។ក្រៅពីនេះ កម្ពុជាក៏ចង់ឃើញទំហំពាណិជ្ជកម្មទ្វេភាគីកម្ពុជា-អាម៉េរិក មានការកើនឡើង​ទាំង​សងខាង ​និងចង់ឃើញក្រុមហ៊ុនអាម៉េរិក​បង្កើន​ការវិនិយោគនៅកម្ពុជា និងប្រើប្រាស់​នូវ​ក្របខណ្ឌ​នៃកិច្ចព្រមព្រៀងពាណិជ្ជកម្មសេរីនានា​ ដែលកម្ពុជាកំពុងមានស្រាប់៕ អត្ថបទ៖ សុន រ៉ាឌី

ក្រុមហ៊ុនហោះហើរក្រៅប្រទេសថ្មី២ ត្រៀមហោះមកកម្ពុជា ខណៈព្រលានថ្មីសៀមរាប នឹងរួចរាល់ឆ្នាំក្រោយ

2022/08/31 12:31:27 pm        546
Facebook Telegram Linkin
ភ្នំពេញ៖ កាលពីថ្ងៃទី៣០សីហាម្សិលមិញ មានគណៈប្រតិភូចំនួន៣ក្រុម បានមកជួបពិភាក្សា និង​សម្រេចការងារជាមួយឯកឧត្តម ម៉ៅ ហាវណ្ណាល់ រដ្ឋមន្ត្រីទទួលបន្ទុកអាកាសចរស៊ីវិល ក្នុងនោះ​មានប្រតិភូហោះហើរក្រៅប្រទេសចំនួន២ក្រុមហ៊ុន ​បានត្រៀមហោះហើរទៅ មកកម្ពុជា ក្នុង​ពេលឆាប់ៗ ចំណែកប្រតិភូមួយទៀត គឺក្រុមហ៊ុនសាងសងអាកាសយានដ្ឋាន​អន្តរជាតិសៀមរាប​អង្គរថ្មី បង្ហាញពីវឌ្ឍនភាពនៃការសាងអាកាសយានដ្ឋាន។លោក វ៉ាន់ ចន្ទី ប្រធាននាយកដ្ឋានដឹកជញ្ជូនផ្លូវអាកាស​ នៃរដ្ឋលេខាធិការដ្ឋាន អាកាសចរស៊ីវិល​បាន​ប្រាប់ថា ក្រុមហ៊ុនដែលមានបំណងហោះហើរមកកម្ពុជា ទំាងពីរក្រុមហ៊ុននេះ រួមមានក្រុមហ៊ុន ហ្វីតដេក ( Fedex ) ដែលជាក្រុមហ៊ុន​បញ្ញើ​របស់​សហរដ្ឋអាមេរិក ​និងជាក្រុមហ៊ុនដ៏ធំ ហើយ​ក្រុម​ហ៊ុននេះ ​មានយន្តហោះដឹកអ្នកដំណើរ ​និងដឹកបញ្ញើដោយខ្លួនឯង ​ចំណែកក្រុមហ៊ុនទី២ គឺ​ក្រុមហ៊ុន​អ៊ែដវីន( Edwin) របស់ Air Asia ដែលមានស្នាក់ការនៅប្រទេសឥណ្ឌូនេស៊ី និងម៉ាឡេស៊ី ហើយ​ក្រុមហ៊ុន​ទំាងពី២នេះ ​នឹងបើកការហោះហើរមកកម្ពុជាឆាប់ៗ ព្រោះក្រុមហ៊ុនទំាងនេះបាន​មើល​ឃើញ​កម្ពុជាបានដឹកនាំ​ទប់ស្កាត់​កូវីដបានល្អជាង ​និងជាប្រទេសមានតំបន់ទសេចរណ៍​ប្រវត្តិ​សាស្ត្រច្រើន ​ជាប្រទេសដែលមានប្រជាជនរួសរាយ​ និងជាប្រទេសប្រកបដោយសុខសន្តិភាព។ចំណែកឯកឧត្តម ជា អូន រដ្ឋលេខាធិការ ​និងជាអ្នកនាំពាក្យអាកាសចរស៊ីវិល ​បានលើកឡើងថា ទន្ទឹម​នឹងមានក្រុមហ៊ុនហោះហើរ​ ដែលមានបំណងហោះហើរមកកម្ពុជាជាបន្តបន្ទាប់ ក្នុងនោះ​សម្រាប់​ក្រុមហ៊ុន​សាងសង់​អាកាសយានដ្ឋានអន្តរជាតិសៀមរាម អង្គរថ្មី ក៏បានបញ្ជាក់ពីវឌ្ឍនភាព​នៃការសាងសង់ផងដែរ ​ដែលមកដល់ពេលនេះ សម្រេចបានចន្លោះពី៤០ទៅ៧០% ហើយអាកាស​យានដ្ឋាន​អន្តរជាតិថ្មីមួយនេះ ​នឹងរួចរាល់ទំាងស្រុងនៅពាក់កណ្តាលឆ្នាំ​ ២០២៣ខាងមុខនេះ។ គួរបញ្ជាក់ថា អាកាសយានដ្ឋានអន្តរជាតិសៀមរាមអង្គរ បានដំណើរការសាងសង់​នៅថ្ងៃទី១៥ ខែមីនា ឆ្នាំ២០២០ ដែលសាងសង់ដោយក្រុមហ៊ុនវិនិយោគដែលមានឈ្មោះថា Angkor International Airport Investment ហើយអាកាសយានដ្ឋាននេះ​មានផ្ទៃដីជាង ៧០០ហិកតា និង​មាន​ផ្ទៃដី​បម្រុងជាង​១ពាន់ហិកតាទៀត ​ដោយ​បច្ចុប្បន្ន​ប្រើប្រាស់​កម្មករជាង ១០០០នាក់ ក្នុងនោះកម្មករប្រមាណ៧០% ជា​ពលករខ្មែរ​ និងបានប្រើប្រាស់គ្រឿងចក្រពី ២០០ទៅ ២៥០គ្រឿង និងគ្រោង​ចំណាយ​ថវិកា​ប្រមាណ ៨០០លានដុល្លារ ​ហើយអ្វីដែលពិសេសនៅពេលអាកាសយានដ្ឋាននេះ កសាងរួចរាល់​ដាក់ឱ្យដំណើរការ ​គឺអាច​ទទួល​បានគ្រប់ប្រភេទ​យន្តហោះធំៗ​ជុំវិញពិភពលោកបានទំាងអស់៕អត្ថបទ៖ គង់ រ៉េន

អ្នកដំណើរអន្តរជាតិបន្តមានកំណើនមកទស្សនាកម្ពុជា តែក្នុងកម្រិតទាបបើធៀបនឹងប្រទេសជិតខាង

2022/08/29 01:26:04 pm        479
Facebook Telegram Linkin
ភ្នំពេញ៖ របាយការណ៍រដ្ឋលេខាធិការដ្ឋានអាកាសចរណ៍ស៊ីវិល បានឱដឹងថា ក្នុងរយៈពេល​៨ខែឆ្នាំ២០២២នេះ ​មានអ្នកដំណើរអន្តរជាតិចូលមកកម្ពុជាជាមធ្យម ៦០០០នាក់​ក្នុងមួយថ្ងៃកើន​ឡើង​ជាង ១០ដងបើធៀបនឹងឆ្នាំ២០២១ ។ បើតាមអ្នកជំនាញទេសចរណ៍ ថ្លែងថា នៅពេលបច្ចុប្បន្នយើងទទួលស្គាល់ថា កម្ពុជាមាន​ទេសចរអន្តរជាតិមកទស្សនាកើនល្អប្រសើរឡើងវិញ ​តែកើនក្នុងកម្រិតទាប បើប្រៀបធៀប​ជាមួយប្រទេសជិតខាងយើង ដូចជាប្រទេសវៀតណាម ថៃជាដើម។លោក ធួន ស៊ីណាន ប្រធានសមាគមន៍ទេសចរណ៍អាស៊ីប៉ាស៊ីភិច PATA ប្រចាំនៅកម្ពុជា ថ្លែងប្រាប់BTV នៅថ្ងៃទី២៩ ខែសីហានេះ ជំរុញបើកប្រទេស បើកទេសចរអន្តរជាតិចូលមកទស្សនា​កម្ពុជារហូតមកដល់ពេលនេះ គឺបានធ្វើឲ្យបណ្តាអាជីវកម្មទេសចរណ៍ជាច្រើនបានបើកដំណើរវិញ ជាមួយនឹងមានកំណើនឡើងវិញនៃមានភ្ញៀវទេសចរជាតិអន្តរជាតិចេញដើរកម្សាន្តនៅក្នុងប្រទេស តែកំណើននេះមិនទាន់មានភាពល្អប្រសើរដូចឆ្នាំ២០១៩ ដែលជាឆ្នាំពិភពលោកមិនទាន់មានមេ​រោគកូវីដ១៩រាតត្បាត។ លោក បន្តថា កំណើនទេសចរអន្តរជាតិមកទស្សនាកម្ពុជា គឺស្ថិតនៅក្នុងកម្រិតទាបដោយសារ ទី១ កម្ពុជា មិនទាន់មានក្រុមហ៊ុនអាកាសចរណ៍ក្នុងស្រុកច្រើនដូចនៅវៀតណាម​ និងថៃ ហើយការ​តភា្ជបជើងអាកាសរយៈចំងាយឆ្ងាយក៏នៅមិនទាន់មាន។បើតាមបណ្តាភ្ញៀវទេសចរអន្តរជាតិ និងអណិកជនខ្មែររស់នៅសហរដ្ឋអាមេរិក ក៏បានថ្លែងថា ជារួម​យើងចង់មកទស្សនាកម្ពុជាខ្លាំងណាស់ ​និងចង់មកទស្សនាមុនគេ ប៉ុន្តែដោយសារ​ជើង​ហោះហើរ​ពីសហរដ្ឋអាមេរិក​ និងមកពីអេស្ប៉ាញជាដើម មកដល់កាន់កម្ពុជា​ផ្ទាល់​តែម្តងគឺមិនទាន់មាននោះទេ ហើយការរៀបចំឯកសារមកទស្សនាកម្ពុជា​ គឺមានភាព​ស្មុគស្មាញ​ច្រើន បើទោះការ​មកទស្សនា​កម្ពុជា​ក្នុងអំឡុងពេលនេះមិនមានការធ្វើចត្តាឡីស័កលើអ្នកមិនទាន់ចាក់វ៉ាក់សាំងក៏ដោយ។យ៉ាងណាក៏ដោយ​បើតាមឯកឧត្តម ជា អូន អ្នកនាំពាក្យរដ្ឋលេខាធិការដ្ឋានអាកាស​ចរណ៍​ស៊ីវិល ថ្លែងថា ក្នុងរយៈពេល៨ខែ ឆ្នាំ២០២២ ចំនួន​ជើងហោះ​ហើរ​ត្រង់​ពីតាមបណ្តាប្រទេសនានា​មក​កាន់កម្ពុជា គឺមានកំណើន ៣០% បើប្រៀបធៀបចំនួនជើងហោះហើរសរុបឆ្នាំ២០១៩ ដែលមាន​ប្រមាណ ១០ម៉ឺន៤ ៧៧០ជើង។ឯកឧត្តម ជា អូន បញ្ជាក់ថា នៅក្នុងចំនួនជើងហោះហើរសរុបនេះគឺក្នុងមួយថ្ងៃៗ មានអ្នកដំណើរ​អន្តរជាតិ ​និងភ្ញៀវទេសចរអន្តរជាតិចូលមកកម្ពុជា​ មានប្រមាណពី៥០០០ទៅ៦០០០នាក់ ហើយ​មានកម្រិតទាបបើធៀបនឹងឆ្នាំ២០១៩កន្លងទៅ៕អត្ថបទ៖ ស៊ុមសុខជា

បណ្ដាញសង្គម

ព័ត៌មានថ្មីៗ

ក្នុងគោលបំណងមនុស្សធម៌! អាជ្ញាធរកម្ពុជាសម្រេចបើកច្រកទ្វារព្រំដែនអនុញ្ញាតដល់អនុព័ន្ធយោធាថៃប្រចាំនៅភ្នំពេញ និងមនុស្សពីរនាក់ធ្វើដំណើរតាមច្រកទ្វារអន្តរជាតិប៉ោយប៉ែត-ខ្លងលីកទៅព្យាបាលជំងឺនៅខេត្តស្រះកែវ
07/20/2025 07:07 PM
Facebook Telegram Linkin
ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ
07/20/2025 07:07 PM
Facebook Telegram Linkin
ត្រឹមថ្ងៃទី១៩កក្កដា សមត្ថកិច្ចរាជធានី-ខេត្ត បង្រ្កាបករណីឆបោកតាមប្រព័ន្ធបច្ចេកវិទ្យា ៥២ទីតាំង ឃាត់ខ្លួនជនសង្ស័យ ២.៧៦៧ នាក់ មានជនជាតិចិនចំនួន ៨៤៣នាក់
07/20/2025 06:07 PM
Facebook Telegram Linkin
សមាគមកាយឫទ្ធិនារីកម្ពុជាសាខាខេត្តមណ្ឌលគិរី បានចូលរួមសកម្មភាពជាច្រើននៅក្នុងសង្គម​ស្រប​តាមគម្រោងសកម្មភាពទាំង៥ របស់សមាគម
07/20/2025 05:07 PM
Facebook Telegram Linkin
ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប
07/20/2025 04:07 PM
Facebook Telegram Linkin
លោក Trump ទទូចថាទីតាំងនុយក្លេអ៊ែរអ៊ីរ៉ង់ត្រូវបានបំផ្លាញស្របពេលមានរបាយការណ៍មួយចំនួនថាបានរួចផុតពីការបំផ្លាញ
07/20/2025 03:07 PM
Facebook Telegram Linkin
ពលរដ្ឋជប៉ុនបោះឆ្នោតក្នុងការសាកល្បងដ៏សំខាន់សម្រាប់នាយករដ្ឋមន្ត្រី Shigeru Ishiba
07/20/2025 03:07 PM
Facebook Telegram Linkin
អ្នកស្លាប់ក្នុងជំនន់ទឹកភ្លៀងនៅកូរ៉េខាងត្បូងសប្តាហ៍នេះ កើនឡើងដល់១៤ នាក់
07/20/2025 03:07 PM
Facebook Telegram Linkin
ការប៉ះទង្គិចបានផ្ទុះឡើងក្នុងការតវ៉ាប្រឆាំងនឹងជនអន្តោប្រវេសន៍ក្នុងប្រទេសប៉ូឡូញ
07/20/2025 03:07 PM
Facebook Telegram Linkin
ក្រសួងសុខាភិបាល បើកយុទ្ធនាការផ្តល់ថ្នាំលេបសមូហភាព ដើម្បីបង្ការជំងឺគ្រុនចាញ់ នៅ​ខេត្ត​ស្ទឹងត្រែង
07/20/2025 03:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.