BTV NEWS

ប្រតិបត្តិការការទូទាត់តាម QR Code នៅកម្ពុជា កំពុងពេញនិយមសម្រាប់អ្នកប្រើប្រាស់

ឯកឧត្តម ឌិត ទីណា លើកទឹកចិត្តសហគមន៍ និងក្រុមហ៊ុនបន្តស្មារតីសាមគ្គីភាព ដើម្បីទទួលផលចំណេញទាំងអស់គ្នាថែមទៀត

កម្ពុជា និងកូរ៉េ រួមគ្នាជំរុញការកាត់បន្ថយឧស្ម័នផ្ទះកញ្ចក់តាមរយៈការវិនិយោគមធ្យោបាយដឹកជញ្ជូន-អគ្គិសនី ឆ្ពោះទៅគោលដៅអព្យាក្រឹតកាបូនឆ្នាំ២០៥០

កសិករខេត្តកំពង់ធំជិតពីររយគ្រួសារទទួលផលចំណេញច្រើនក្រោយចងក្រងជាសហគមន៍កសិកម្មទំនើប

សេដ្ឋកិច្ច និង កសិកម្ម

កម្ពុជាទាក់ទាញវិនិយោគផ្ទាល់ពីបរទេសមានតម្លៃសរុប ៣៩ប៊ីលានដុល្លារ ក្នុងឆមាសទី១

ភ្នំពេញ ៖ កម្ពុជាទទួលបានការវិនិយោគផ្ទាល់ពីបរទេស(FDI) សរុប ៣៩ប៊ីលានដុល្លារ គិតត្រឹមចុងឆមាសទីមួយ ឆ្នាំ២០២១ ។ ទំហំវិនិយោគទាំងនេះ ផ្ដោតលើវិស័យហិរញ្ញវត្ថុ អចលនទ្រព្យ កសិកម្ម កម្មន្តសាល និងសណ្ឋាគារ និងជាដើម។យោងតាមរបាយការណ៍របស់ធនាគារជាតិនៃកម្ពុជាចេញផ្សាយលើទំព័រហ្វេសប៊ុករបស់ខ្លួន នាថ្ងៃទី២៧វិច្ឆិកាថា ការវិនិយោគផ្ទាល់ពីបរទេសនៅកម្ពុជា មានក្នុងទំហំទឹកប្រាក់ ៣៩ប៊ីលានដុល្លារ ត្រឹមចុងឆមាសទីមួយ ឆ្នាំ២០២១ កើនឡើង ប្រមាណ៩,៦ភាគរយធៀបនឹងរយៈពេលដូចគ្នាកាលពីឆ្នាំមុន។បើតាមធនាគារជាតិ ទំហំទឹកប្រាក់ទាំងនេះ បានពីការវិនិយោគរបស់ប្រទេសចិន កូរ៉េខាងត្បូង វៀតណាម សិង្ហបុរី ជប៉ុន ម៉ាឡេស៊ី ថៃ អង់គ្លេស និងកាណាដា។លំហូរវិនិយោគនេះ គ្របដណ្ដប់លើវិស័យកសិកម្ម កម្មន្តសាល ហិរញ្ញវត្ថុ សណ្ឋាគារនិងរមណីយដ្ឋាន សំណង់ វារីអគ្គិសនី និងអចលនទ្រព្យ ជាដើម។ សម្រាប់ផ្នែកហិរញ្ញវត្ថុមានការវិនិយោគប្រមាណ២១ភាគរយ កម្មន្តសាល២០ភាគរយ អចលនទ្រព្យ១២ភាគរយ សណ្ឋាគារ១១ភាគរយ និងកសិកម្ម១០ភាគរយ។ ឧកញ៉ា លឹម ហេង អនុប្រធានសភាពពាណិជ្ជកម្មកម្ពុជា យល់ឃើញថា កម្ពុជា នឹងបន្តទាក់ទាញបានវិនិយោគបរទេសបន្ថែមទៀត ដោយសារកម្ពុជា មានសក្តានុពលខ្ពស់នៃការនាំចេញផលិតផល នៅក្រោមកិច្ចព្រមព្រៀងពាណិជ្ជកម្មសេរី ទ្វេភាគី តំបន់ និងប្រព័ន្ធអនុគ្រោះពន្ធដទៃទៀត។ឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា ទោះបីជាកម្ពុជាកំពុងប្រឈមនឹងជំងឺកូវីដ-១៩ និងបន្តសម្របខ្លួនទៅនឹងប្រក្រតីភាពថ្មីក្តី ក៏ប៉ុន្តែវិស័យអចលនទ្រព្យនេះ គឺនៅមានសក្ដានុពលក្នុងការវិនិយោគ។ឯកឧត្តម អូន ព័ន្ធមុនីរ័ត្នថា អត្រានេះ គឺបានដោយសារការកើនឡើងសន្សឹមៗ នៃលំហូរទុនវិនិយោគពីបរទេស ខណៈការវិនិយោគនិងតម្រូវការស្រុកលើវិស័យអចលនវត្ថុដែលមានតម្លៃទាបនិងមធ្យម នឹងបន្តរក្សាកំណើនល្អប្រសើរ៕អត្ថបទ ៖ វណ្ណៈ

កម្ពុជាបង្ហាញលើឆាកអន្តរជាតិ ពីដំណើរឆ្ពោះទៅរបត់ថ្មី នៃការប្រើប្រាស់ប្រព័ន្ធបច្ចេកវិទ្យា

ភ្នំពេញ ៖ កម្ពុជាបានបង្ហាញលើឆាកអន្តរជាតិ នៃការអភិវឌ្ឍន៍វិស័យវិទ្យាសាស្រ្ត បច្ចេកវិទ្យា នាវានុវត្តន៍ និងការអភិវឌ្ឍ៍វិស័យឧស្សាហកម្ម ដែលកំពុងដើរស្របតាមបរិបថថ្មី ដើម្បីឈានទៅសម្រេចតាមចក្ខុវិស័យ ប្រែក្លាយជាប្រទេសមានចំណូលមធ្យមកម្រិតខ្ពស់ នៅឆ្នាំ ២០៣០ ។ឯកឧត្តម ហេង សុខគង់ អ្នកនាំពាក្យ និងជារដ្ឋលេខាធិការក្រសួងឧស្សហកម្មវិទ្យាសាស្រ្ត បច្ចេកវិទ្យា និងនវានុវត្តន៍ បានថ្លែងប្រាប់ភ្នាក់ងារអ្នកយកព័ត៌មាន BTV ស្តីពីការចូលរួមប្រជុំកំពូលកម្មន្តសាលកម្ម និងឧស្សាហូបនីយកម្មសកល នៅទីក្រុងឌូបៃ នាពេលថ្មីៗនេះថា ឯកឧត្តមកត្តិសេដ្ឋាបណ្ឌិត ចម ប្រសិទ្ធ រដ្ឋមន្រ្តី ក្រសួងឧស្សហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ តំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្រ្តី បានដឹកនាំប្រតិភូកម្ពុជា ដោយកម្ពុជាបានធ្វើបទបង្ហាញចំណុច សំខាន់ៗរួមមាន៖ ការអភិវឌ្ឍន៍វិស័យឧស្សាហកម្ម វិស័យវិទ្យាសាស្រ្ត បច្ចេកវិទ្យា និងនវានុវត្តន៍ បានកំពុងដើរតាមបរិបថថ្មី និងបានលើកឡើងអំពីគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នំា ២០១៥-២០២៥ ក៏ដូចគោលនយបាយវិទ្យាសាស្រ្ត បច្ចេកវិទ្យា និងនវានុវត្តន៍ ២០២០-២០៣០ និងការផ្តោតទៅលើសរសរស្តម្ភសំខាន់ៗចំនួន ៥ ដើម្បីឈានទៅសម្រេចតាមចក្ខុវិស័យ ប្រែក្លាយជា ប្រទេសមានចំណូលមធ្យមកម្រិតខ្ពស់ នៅឆ្នាំ ២០៣០របស់រាជរដ្ឋាភិបាល។ឯកឧត្តម បន្តថា ពាក់ព័ន្ធកិច្ចប្រជុំកំពូលកម្មន្តសាលកម្ម និងឧស្សាហូបនីយកម្មសកល នៅទីក្រុងឌូបៃ គឺជាឱកាសដ៍ល្អមួយ នៅកម្ពុជា ក្រោយពេលដែលកម្ពុជាបានកំពុងជម្រុញអភិវឌ្ឍន៍យ៉ាងខ្លាំងក្លា ទៅលើផ្នែកឧស្សាហកម្ម កម្មន្តសាល ក៏ដូចជាវិទ្យាសាស្រ្ត បច្ចេកវិទ្យា និងនវានុវត្តន៍ និងវិស័យឌីជីថល ដែលវិស័យនេះ រាជរដ្ឋាភិបាលបានដាក់ចេញនូវក្របខណ្ឌរយៈ ពេលវែងសំដៅជំរុញ និងតម្រង់ទិសបរិវត្តកម្មឌីជីថលនៅកម្ពុជា ឱ្យទទួលបានជោគជ័យ តាមរយៈការកំណត់ និងការអនុវត្តវិធានការគោលនយោបាយ ដែលឆ្លុះបញ្ចាំង និងឆ្លើយតបទៅនឹងស្ថានភាពបច្ចុប្បន្នរបស់កម្ពុជា ព្រមទាំងស្របតាមនិន្នា ការតំបន់ និងសកល និងពង្រីកបន្ថែម ដើម្បីគាំទ្រដល់ធុរកិច្ច និងប្រជាពលរដ្ឋ។សូមបញ្ជាក់ថា៖ វិទ្យាសាស្រ្ត បច្ចេកវិទ្យា និងនវានុវត្តន៍ មានសារៈសំខាន់ដើម្បីសម្រេចបាននូវគោលបំណង ដែលរាជរដ្ឋាភិបាលកម្ពុជា បានកំណត់សម្រាប់គោលដៅអភិវឌ្ឍន៍ជាតិរបស់ខ្លួននៅឆ្នាំ២០៣០ និង២០៥០ ហើយវិស័យនេះ ជាមូលដ្ឋានគ្រឹះដែលមិនអាចខ្វះ បាន សម្រាប់ប្រទេសកម្ពុជាក្នុងការដោះស្រាយបញ្ហាប្រឈមនានានៅកម្រិតជាតិ តំបន់ និងអន្តរជាតិ៕ អត្ថបទ៖ សុន រ៉ាឌី

មន្ត្រីជំនាញ៖ តម្លៃស្រូវធ្លាក់ថ្លៃ ព្រោះទីផ្សារនាំចេញអង្ករទៅក្រៅប្រទេសមានការថយចុះ

ភ្នំពេញ ៖ មន្រ្តីជំនាញនៃសហព័ន្ធស្រូវអង្ករកម្ពុជា បានឲ្យដឹងថា បច្ចុប្បន្នតម្លៃស្រូវមានការធ្លាក់ថ្លៃជាងមុនបន្តិច ព្រោះទីផ្សារនាំចេញអង្ករទៅក្រៅមានការថយចុះ។លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា នៅថ្ងៃទី២៧ខែវិច្ឆិកានេះ បានប្រាប់BTVឲ្យដឹងថា បច្ចុប្បន្នទីផ្សារអង្ករអន្តរជាតិមានការធ្លាក់ថ្លៃ ដែលជាហេតុធ្វើឲ្យតម្លៃស្រូវនៅប្រទេសកម្ពុជា និងបណ្តាប្រទេសមួយចំនួនទៀតមានការធ្លាក់ថ្លៃផងដែរ។ទីផ្សារកម្ពុជានាំចេញទៅបរទេសច្រើនជាងគេគឺប្រទេសចិន ដែលជួយទិញអង្ករកម្ពុជា ក្នុងតម្លៃខ្ពស់ជាងបណ្តាប្រទេសមួយចំនួនទៀត។លើសពីនេះ លោកបន្តថា អ្វីដែលកសិករកម្ពុជាមានការព្រួយបារម្ភនោះ គឺតម្លៃផលិតរបស់ពួកគាត់មានការកើនឡើង ពោលដូចជាជី ថ្នាំកសិកម្ម និងការចំណាយផ្សេងៗមួយចំនួនទៀត។យោងតាមរបាយការណ៍របស់សហព័ន្ធស្រូវអង្ករ បានបញ្ជាក់ថា ក្នុងរយៈពេល១០ខែ ឆ្នាំ២០២១នេះ កម្ពុជាបាននាំចេញអង្ករគ្រប់ប្រភេទចំនួនជាង៤៦ម៉ឺនតោន ដែលគិតជាទឹកប្រាក់មានចំនួន ៣២៣.៤៧លានដុល្លារសហរដ្ឋអាមេរិក ទៅគោលដៅទីផ្សារចំនួន៥៥ប្រទេស និងតំបន់ស្វយ័ត ដែលក្នុងនោះរួមមាន៖ ប្រទេសចិន តំបន់ស្វយ័តហុងកុង ម៉ាកាវ ជាទីផ្សារនាំចេញទៅច្រើនជាងគេ បន្ទាប់មានប្រទេសបារាំង ប្រទេសហ្កាលប៊ុង និងប្រទេសម៉ាឡេស៊ីជាដើម។ចំពោះការនាំចេញស្រូវវិញមានចំនួនជាង ២លានតោន ដែលគិតជាទឹកប្រាក់ប៉ាន់ស្មានប្រមាណជា ៦៣៣.៨២ លានដុល្លារសហរដ្ឋអាមេរិក។ទឹកប្រាក់សរុបទាំងការនាំចេញស្រូវ និងអង្ករមានចំនួនក្នុងរយៈពេល ១០ខែនៃឆ្នាំ២០២១នេះ មានចំនួនប្រមាណជា ៩៥៧.៣០លានដុល្លាសហរដ្ឋអាមេរិក។បច្ចុប្បន្ននេះ វិស័យកសិកម្មកំពុងក្លាយជាវិស័យមួយក្នុងចំណោមវិស័យបីផ្សេងទៀតក្នុងការនាំកំណើនដល់សេដ្ឋកិច្ចជាតិ ក្រោយពីរាជរដ្ឋាភិបាល ដែលដឹកនាំដោយសម្តេចតេជោ ហ៊ុន សែននាយករដ្ឋមន្រ្តីកម្ពុជា បានដាក់ចេញនូវគោលនយោបាយស្រូវអង្ករកាលពីខែសីហា ឆ្នាំ ២០១០។ បន្ទាប់ប្រកាសជាផ្លូវការនោះទាំងវិស័យរដ្ឋ ឯកជន និងប្រជាពលរដ្ឋរួមទាំងអន្តរជាតិផងដែលនោះ មានការសាទរយ៉ាងខ្លាំង ហើយខិតខំបំពេញការងាររៀងខ្លួន និងសហការគ្នា ដើម្បីលើកកម្ពស់វិស័យកសិកម្ម៕អត្ថបទ៖ទូច សោភ័ណ

រដ្ឋសភាអនុម័តសេចក្តីព្រាងច្បាប់ ស្តីពីពិធីសារអាស៊ានស្តីពីការពង្រឹងយន្តការដោះស្រាយវិវាទ

ភ្នំពេញ ៖ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម កាលព្រឹកថ្ងៃទី២៥ វិច្ឆិកា ឆ្នាំ២០២១នេះ បានដឹកនាំគណៈប្រតិភូក្រសួង ចូលរួមកិច្ចប្រជុំការពារសេចក្តីព្រាងច្បាប់ ស្តីពីការអនុម័តយល់ព្រមលើពិធីសារអាស៊ានស្តីពីការពង្រឹងយន្តការដោះស្រាយវិវាទ ក្នុងសម័យប្រជុំពេញអង្គរដ្ឋសភា លើកទី៦ នីតិកាលទី៦ ក្រោមអធិបតីភាពសម្តេចអគ្គមហាពញាចក្រី ហេង សំរិន ប្រធានរដ្ឋសភា។ក្រសួងពាណិជ្ជកម្ម ក្រោយចប់កិច្ចប្រជុំបានឲ្យទូរទស្សន៍ព័តមាន ប៊ីធីវី ដឹងថា ក្រោយស្តាប់សេចក្តីរាយការណ៍នានារបស់លោកជំទាវ និន សាផុន ប្រធានគណៈកម្មការទី៩ នៃរដ្ឋសភា និងឯកឧត្តមរដ្ឋមន្រ្តីពាណិជ្ជកម្ម អំពីសារៈសំខាន់ និងអត្ថប្រយោជន៍ដែលកម្ពុជានឹងទទួលបានពីសេចក្តីព្រាងច្បាប់ ស្តីពីការអនុម័តយល់ ព្រមលើពិធីសារអាស៊ានស្តីពីការពង្រឹងយន្តការដោះស្រាយវិវាទ ដែលក្នុងនោះរួមមាន ការទទួលបាននីតិវិធី ពិសេសសម្រាប់រដ្ឋសមាជិកអភិវឌ្ឍតិចតួច និងការបង្ហាញពីការប្តេជ្ញាចិត្តក្នុងនាមជាប្រធានអាស៊ានឆ្នាំ២០២២ ដើម្បីរួមចំណែកដ៏សំខាន់ដល់ការពង្រឹងយន្តការដោះស្រាយវិវាទក្នុងក្របខ័ណ្ឌអាស៊ាន។ សម័យប្រជុំពេញអង្គ រដ្ឋសភា បានអនុម័តយល់ព្រមទាំងស្រុងដោយមិនមានការកែប្រែលើសេចក្តីព្រាងច្បាប់មួយនេះ ដោយមានសំឡេង គាំទ្រ១០៤សម្លេង។ ជាមួយគ្នានេះ ឯកឧត្តមរដ្ឋមន្ត្រីបានបញ្ជាក់ជូនអង្គប្រជុំថា រដ្ឋាភិបាលដែលមានក្រសួងពាណិជ្ជម្មជាសេនាធិការ តែងតែខិតខំប្រឹងប្រែងអនុវត្តនូវគោលនយោបាយ និងអាណត្តិប្រគល់ជូនដោយរាជរដ្ឋាភិបាល ជាពិសេសប្តេជ្ញា ខិតខំប្រឹងប្រឹងកសាងច្បាប់ និងបទដ្ឋានគតិយុត្តវិស័យពាណិជ្ជកម្ម និងសហការជាមួយអន្តរក្រសួង-ស្ថាប័ន ពាក់ព័ន្ធជាតិ និងអន្តរជាតិ ក៏ដូចជាវិស័យឯកជន សំដៅធ្វើឲ្យប្រសើរឡើងនូវបរិយាកាសធុរកិច្ច បង្កើតការងារ និងលើកកម្ពស់ជីវភាពប្រជាពលរដ្ឋ។ ឯកឧត្តមសង្ឃឹមថា ច្បាប់នេះ នឹងផ្តល់នូវប្រយោជន៍ជាសារវ័ន្តដល់សង្គម ជាតិទាំងមូល និងជាពិសេសបង្ហាញពីការប្តេជ្ញាចិត្ត និងតួនាទីរបស់កម្ពុជា ក្នុងការចូលរួមចំណែកយ៉ាងសំខាន់ ក្នុងសហគមន៍អាស៊ានផងដែរ។ក្រសួងពាណិជ្ជកម្ម បានឲ្យដឹងទៀតថា ពាក់ព័ន្ធសេចក្តីព្រាងច្បាប់នេះ អង្គប្រជុំបានសម្តែងការកោតសរសើរ ចំពោះកិច្ចខិតខំប្រឹងប្រែងរបស់ក្រុមការងារក្រសួងពាណិជ្ជកម្ម ដែលបានកសាងច្បាប់ និងបទដ្ឋានគតិយុត្តវិស័យ ពាណិជ្ជកម្ម និងវាយតម្លៃខ្ពស់ចំពោះការប្តេជ្ញាចិត្តបន្ថែមទៀតរបស់រដ្ឋមន្ត្រីពាណិជ្ជកម្ម ក្នុងការខិតខំធ្វើឲ្យប្រសើរឡើងនូវបរិយាកាសធុរកិច្ច បង្កើតការងារ និងលើកកម្ពស់ជីវភាពប្រជាពលរដ្ឋ ក៏ដូចជាការអនុវត្តកាតព្វកិច្ចនានា ក្រោមក្របខ័ណ្ឌតំបន់ និងសកល ស្របតាមអាណត្តិផ្តល់ជូនដោយប្រមុខរាជរដ្ឋាភិបាល៕អត្ថបទ ៖ ឈិត បូរ៉ាវី

កម្ពុជានៅតែទទួលបានឱកាសប្រាក់ចំណូលខ្ពស់ លើការវិនិយោគនៃវិស័យអចលនទ្រព្យ

ភ្នំពេញ ៖ អ្នកជំនាញអចលនទ្រព្យថា សក្តានុពលក្នុងការវិនិយោគលើវិស័យអចលទ្រព្យនៅកម្ពុជា ធៀបនឹងប្រទេសក្នុងតំបន់អាស៊ាន ប្រទេសកម្ពុជានៅតែទទួលបានឱកាសនៃប្រាក់ចំណូលខ្ពស់ ព្រោះតម្លៃអចលនទ្រព្យនៅកម្ពុជា ធៀបទៅនឹងបណ្តាលប្រទេសផ្សេងៗ ក្នុងអាស៊ាន នៅមានកម្រិតតម្លៃទាបនៅឡើយ។លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាប្រធានសមាគមអចលនទ្រព្យអាស៊ាន ថ្លែងលើកឡើង នៅក្នុងសន្និសីទសាព័ត៌មាន ស្តីពីការវាយតម្លៃអចលនវត្ថុ ក្នុងអំឡុងពេលនៃការរីករាលដាលជំងឺកូវីដ-១៩" នៅថ្ងៃទី ២៥ វិច្ឆិកា ឆ្នាំ២០២១ ថា នៅក្នុងស្ថានភាពនៃវិបត្តិ ជម្ងឺកូវីដ១៩ នេះ ប្រទេសក្នុងអាស៊ានដូចជា ប្រទេសថៃ សឹង្គហ្គាពួរ និង ប្រទេសវៀតណាមជាដើម បានប្រឈមនឹងវិបត្តិនេះយ៉ាងខ្លាំង ក្នុងនោះចំពោះទីផ្សារអចលទ្រព្យ ក៏បានធ្លាក់ចុះយ៉ាងខ្លាំងផងដែរ។ចំណែកប្រទេសដែលស្តារ និងអភិវឌ្ឍន៍មកវិញលឿន, ក្នុងនោះប្រទេសសឹង្ហហ្គាពួរ គឺជាប្រទេសទី១ នៅក្នុងអាស៊ាន ដែលបានគ្រប់គ្រងស្ថានភាពនៃវិបត្តិជម្ងឺកូវីដបានល្អប្រសើរ។ ចំណែកកម្ពុជា ក្រោមការដឹកនាំរបស់ប្រមុខរាជរដ្ឋាភិបាល ក៏បានគ្រប់គ្រង និងទប់ស្កាត់ នៃការរីករាលជម្ងឺនេះបានល្អប្រសើរផងដែរ តាមរយៈនៃវិធានការទាំងនេះ ចំពោះការអភិវឌ្ឍវិស័យអចលទ្រព្យ យើងរំពឹងថា នៅក្នុងឆ្នាំ២០២២ វិស័យនេះនឹងមានភាពប្រសើរឡើង ជាពិសេសវិស័យដីធ្លី និងសំណង់ គឺគាំទ្រដោយវិនិយោគិនបរទេស និងអ្នកវិនិយោគក្នុងស្រុក ស្របពេលកម្ពុជាបានបើកប្រទេសឡើងវិញ ដោយយើងរំពឹងថា សក្តានុពលក្នុងការវិនិយោគលើវិស័យ អចលទ្រព្យនៅកម្ពុជា ធៀបនឹងប្រទេសក្នុងតំបន់អាស៊ាន ប្រទេសកម្ពុជានៅតែទទួលបានឱកាសប្រាក់ចំណូលខ្ពស់ ព្រោះតម្លៃអចលនទ្រព្យនៅកម្ពុជានៅមានកម្រិតទាប។ជុំវិញការអភិវឌ្ឍន៍, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ថ្លែងថា ទោះបីយើងនៅប្រឈមនឹងភាពមិនប្រាកដប្រជាខ្ពស់និងជម្ងឺកូវីដក៏ដោយ តំបន់អាស៊ាននៅតែមានសក្តានុពល និងដើរតួនាទី យ៉ាងសំខាន់ ក្នុងការស្តារ និងជំរុញកំណើនសេដ្ឋកិច្ច ឱ្យងើបឡើងវិញ ក្រោយវិបត្តិជំងឺកូវីដ-១៩ ជាមួយនឹងការអភិវឌ្ឍសង្គម-សេដ្ឋកិច្ចប្រកបដោយចីរភាពនិងបរិយាប័ន្ន ។ ក្នុងបរិកាណ៍នេះ, រាជរដ្ឋាភិបាលកម្ពុជា ប្រកាន់យកនូវទស្សនវិជ្ជា នៃការខិតខំប្រែក្លាយ វិបត្តិចំពោះមុខ ឱ្យទៅជាកាលានុវត្តភាព សម្រាប់ជំរុញកិច្ចការកែទម្រង់ឱ្យកាន់តែស៊ីជម្រៅ សំដៅកសាងប្រព័ន្ធសេដ្ឋកិច្ច និងសង្គមឱ្យកាន់តែរឹងមាំ និងមានភាពធន់ទៅនឹងវិបត្តិនាអនាគត ។ ឯកឧត្តមឧបនាយករដ្ឋមន្ត្រី ថ្លែងបន្តថា អ្នកវាយតម្លៃអចលនវត្ថុ ដើរតួនាទីយ៉ាងសំខាន់ ក្នុងការអភិវឌ្ឍវិស័យអចលនវត្ថុ នៅក្នុងប្រទេសនិងក្នុងតំបន់ តាមរយៈយន្តការនៃសមាជ អ្នកវាយតម្លៃអចលនវត្ថុអាស៊ាននេះ, កិច្ចសហប្រតិបត្តិការ, ការសិក្សាស្វែងយល់ និងការផ្លាស់ប្តូរបទពិសោធន៍ ក្នុងចំណោមអ្នកចូលរួម នឹងអាចក្លាយជាធាតុចូលដ៏សំខាន់សម្រាប់ការរៀបចំច្បាប់, បទប្បញ្ញត្តិ, និងគោលនយោបាយ ពាក់ព័ន្ធវិស័យអចលនវត្ថុ នៅក្នុងប្រទេសសមាជិកទាំងអស់, ពិសេសនៅកម្ពុជាផ្ទាល់តែម្តង សំដៅកែលម្អបរិយាកាសផ្តល់សេវាកម្ម ក្នុងទីផ្សារអចលនវត្ថុ ក្នុងប្រទេសរបស់ខ្លួន និងក្នុងតំបន់ ឱ្យកាន់តែប្រសើរថែមទៀត ដែលនេះគឺជាបុព្វលក្ខខណ្ឌ រួមមិនអាចខ្វះបានសម្រាប់ជំរុញការអភិវឌ្ឍសេដ្ឋកិច្ច និងសង្គម ៕អត្ថបទ៖ សុន រ៉ាឌី,

រដ្ឋមន្ត្រីក្រសួងសេដ្ឋកិច្ច ស្នើសមាគមអចលនវត្ថុបង្កើតស្តង់ដារវាយតម្លៃអចលនទ្រព្យរួមក្នុងតំបន់

ភ្នំពេញ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ស្នើដល់ (CVEA) និង (AVA) ពិនិត្យការរៀបចំស្តង់ដារអ្នកវាយតម្លៃអចលនវត្ថុរួម ក្នុងក្របខណ្ឌតំបន់អាស៊ាន, ការរៀបចំស្តង់ដារសម្រាប់ប្រទេសមិនទាន់មាន, ការជំរុញលើកកម្ពស់សមត្ថភាពវិជ្ជាជីវៈ អ្នកវាយតម្លៃអចលនវត្ថុឲ្យប្រសើរ និងពង្រឹងកិច្ចសហប្រតិបត្តិការផ្លាស់ប្តូរជំនាញជាដើម ដើម្បីជាមូលដ្ឋានអភិវឌ្ឍក្នុងវិស័យអចលនវត្ថុប្រកបដោយចិរភាព។ឯកឧត្ដម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើក ឡើងនៅក្នុងកម្មវិធីសមាជលើកទី២៣ របស់សមាគមអ្នកវាយតម្លៃអចលនវត្ថុអាស៊ាន ក្រោមប្រធានបទ "ការវាយតម្លៃអចលនវត្ថុ ក្នុងអំឡុងពេលនៃការរីករាលដាលជំងឺកូវីដ-១៩" នៅថ្ងៃទី២៥ ខែវិច្ឆិកា ឆ្នាំ២០២១ ថា ពាក់ព័ន្ធវិស័យអចលនវត្ថុ អ្នកវាយតម្លៃអចលនវត្ថុ ដើរតួនាទីយ៉ាងសំខាន់ ក្នុងការអភិវឌ្ឍវិស័យអចលនវត្ថុ នៅក្នុងប្រទេស និងតំបន់។ឯកឧត្តម ឧបនាយករដ្ឋមន្ត្រី សង្ឃឹមថា កិច្ចសហប្រតិបត្តិការ ការសិក្សាស្វែងយល់ និងការផ្លាស់ប្ដូរបទពិសោធន៍ក្នុង ចំណោមអ្នកចូលរួម នឹង អាចក្លាយជាធាតុចូលដ៏សំខាន់ សម្រាប់ការរៀបចំច្បាប់ បទប្បញ្ញាត និងគោល នយោបាយ ជុំវិញវិស័យអចលនវត្ថុនៅក្នុងប្រទេស សមាជិកទាំងអស់ពិសេសនៅកម្ពុជា។ដើម្បីជំរុញវិស័យអចលនវត្ថុប្រដោយចិរភាព និងប្រសិទ្ធភាព, ឯកឧត្តម ឧបនាយករដ្ឋមន្ត្រី ស្នើដល់សមាគមអ្នក វាយតម្លៃអចលនវត្ថុអាស៊ាន (AVA) និងសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) ពិនិត្យលទ្ធភាព និងគិតគូរដល់ការរៀបចំស្តង់ដារអ្នកវាយតម្លៃអចលនវត្ថុរួម ក្នុងក្របខណ្ឌតំបន់អាស៊ាន, ត្រូវរៀបចំស្តង់ដារសម្រាប់ប្រទេសមិនទាន់មាន, ការលើកកម្ពស់សមត្ថភាពវិជ្ជាជីវៈ អ្នកវាយតម្លៃអចលនវត្ថុ ឲ្យប្រសើរ និងពង្រឹងកិច្ចសហប្រតិបត្តិការផ្លាស់ប្តូរជំនាញ និងបទពិសោធន៍ បច្ចេកវិទ្យា ការវិនិយោគ និងអាជីវកម្មរួមគ្នាជាដើម។ឯកឧត្តម ឧបនាយករដ្ឋមន្ត្រី អូន ព័ន្ធមុនីរ័ត្ន បានបញ្ជាក់ថា ទោះបីកម្ពុជាកំពុងប្រឈមនឹងជំងឺកូវីដ ១៩ នឹងកំពុង បន្តសម្របខ្លួន ទៅនឹងប្រក្រតីភាពថ្មីក្តី ប៉ុន្តែវិស័យអចលនវត្ថុក្នុងប្រទេសនៅតែមានសក្តានុពលខ្ពស់ និងមានតម្លៃ ទាបសមរម្យសម្រាប់ការវិនិយោគ បើប្រៀបធៀបប្រទេសជិតខាង ក្នុងនោះរួមមានតំបន់សំខាន់មួយចំនួនដូចជា៖ រាជធានីភ្នំពេញ និងខេត្តកណ្តាល មានគម្រោង អកាសយាន្តដ្ឋានថ្មីកំពុងអនុវត្ត, ខេត្តព្រះសីហនុ បានកំពុងប្រែក្លាយជាតំបន់សេដ្ឋកិច្ចពិសេសពហុបំណង, ខេត្តសៀមរាប ដែលជា តំបន់ទេសចរណ៍ប្រវត្តិសាស្ត្រ និងក្រុងបាវិតដែលជាមាត់ច្រកកម្ពុជា-វៀតណាម និងក្រុងប៉ោយប៉ែត ដែលជាមាត់ច្រកកម្ពុជា-ថៃ៕ អត្ថបទ៖ សុន រ៉ាឌី

ធនាគារជាតិនៃកម្ពុជា និងធនាគាររដ្ឋវៀតណាម បន្តកិច្ចសហប្រតិបត្តិការលើវិស័យធនាគារ និងហិរញ្ញវត្ថុ

ភ្នំពេញ ៖ ធនាគារជាតិនៃកម្ពុជា បានបើកកិច្ចប្រជុំទ្វេភាគី តាមរយប្រព័ន្ធអនឡាញ ជាមួយធនាគាររដ្ឋវៀតណាម ដើម្បីពង្រឹង និងពង្រីកកិច្ចសហប្រតិបត្តិការ និងទំនាក់ទំនងមិត្តភាព រវាងធនាគារកណ្តាលទាំងពីរ។កិច្ចប្រជុំទ្វេភាគីរវាងធនាគារកណ្តាលទាំងពីរ បានប្រារព្ធឡើងនៅរសៀលថ្ងៃទី២៤ ខែវិច្ឆិកា ឆ្នាំ២០២១ ក្នុងនោះធនាគារជាតិ នៃកម្ពុជា ដឹកនាំដោយឯកឧត្តម ជា ចាន់តូ ទេសាភិបាលធនាគារ ជាតិនៃកម្ពុជា ភាគីធនាគាររដ្ឋវៀតណាម ដឹកនាំដោយលោកជំទាវ Nguyen Thi Hong ទេសាភិបាល ធនាគាររដ្ឋវៀតណាម។តាមការបញ្ជាក់ពីមន្ត្រីជាន់ខ្ពស់ធនាគារជាតិនៃកម្ពុជា បានឲ្យដឹងថា ៖ កិច្ចប្រជុំទ្វេភាគីនេះ គឺតែងតែរៀបចំធ្វើជារៀងរាល់ឆ្នាំ ដើម្បីពង្រឹង និងពង្រីកកិច្ចសហប្រតិបត្តិការ និងទំនាក់ទំនងមិត្តភាព រវាងធនាគារកណ្តាលទាំងពីរ។ដោយឡែកសម្រាប់កិច្ចប្រជុំលើកនេះ បញ្ហាសំខាន់ដែលបានយកមកពិភាក្សា នឹងផ្លាស់ប្តូរយោបល់គ្នានោះ គឺវឌ្ឍនភាពនៃស្ថានភាពម៉ាក្រូសេដ្ឋកិច្ចកម្ពុជា, ការអភិវឌ្ឍវិស័យធនាគារ, វិធានការឆ្លើយតបរបស់ធនាគារកណ្តាលចំពោះឥទ្ធិពលអវិជ្ជមាននៃជំងឺកូវីដ-១៩, ការជំរុញការទូទាត់ដោយមិនប្រើប្រាស់ក្រដាសប្រាក់ និងការពិនិត្យមើលពីវឌ្ឍនភាព ជាមួយនឹងការកំណត់ទិសដៅនៃកិច្ចសហប្រតិបត្តិការទ្វេភាគី។មន្រ្តីរូបនេះ បានឲ្យដឹងទៀតថា ក្រៅពីបញ្ហាសំខាន់ខាងលើកិច្ចប្រជុំបានវាយតម្លៃខ្ពស់ចំពោះវឌ្ឍនភាពនៃកិច្ចសហប្រតិបត្តិការទ្វេភាគី រវាងធនាគារកណ្តាលទាំងពីរ នាពេលកន្លងមកនេះថាបានរួមចំណែកយ៉ាងសំខាន់ដល់ការអភិវឌ្ឍវិស័យធនាគារ។ ជាមួយនេះដែរ តាមរយះកិច្ចសហប្រតិបត្តិការដ៏ល្អរវាងវិស័យធនាគារនេះក៏បានរួមចំណែកគាំទ្រកំណើនពាណិជ្ជកម្ម ការវិនិយោគ និងទេសចរណ៍ ក្នុងប្រទេសទាំងពីរថែមទៀតផង។ក្នុងឱកាសនោះលោកជំទាវទេសាភិបាល ធនាគាររដ្ឋវៀតណាម បានសរសើរពីជោគជ័យរបស់កម្ពុជាក្នុងការសម្រេចបានការចាក់វ៉ាក់សាំងដ៏ឆាប់រហ័ស នេះវាមិនត្រឹមតែបានជួយការពារសុខភាពប្រជាជនប៉ុណ្ណោះទេ ប៉ុន្តែនូវបានជួយជំរុញសកម្មភាពសេដ្ឋកិច្ចទៀតផង។ ជាមួយគ្នានេះ លោកជំទាវ ក៏បានវាយតម្លៃខ្ពស់ចំពោះវិធានការដែលធនាគារជាតិនៃកម្ពុជាបានដាក់ចេញក្នុងអំឡុងពេលកូវីដ-១៩កន្លងមកនេះថាមានប្រសិទ្ធភាពខ្ពស់និងសម្រេចបានសមិទ្ធផលល្អ ក្នុងការរក្សាបានវឌ្ឍនភាពនិងស្ថិរភាពប្រព័ន្ធធនាគារ ព្រមទាំងរក្សាបានស្ថិរភាពអត្រាប្តូរប្រាក់ និងកម្រិតទាបនៃអតិផរណា។ទន្ទឹមនឹងនេះដែរ ធនាគាររដ្ឋវៀតណាម ក៏បានអបអរសាទរ ចំពោះការដាក់ឱ្យប្រើប្រាស់ប្រព័ន្ធទូទាត់ទំនើប ជាពិសេសប្រព័ន្ធបាគង ដែលជាប្រព័ន្ធទូទាត់កន្លោងជួយដោះស្រាយបញ្ហាទូទាត់ឆ្លងគ្រឹះស្ថាន និងការតភ្ជាប់ជាមួយប្រព័ន្ធទូទាត់ទាំងក្នុងស្រុក និងតំបន់។ថ្លែងក្នុងឱកាសនោះឯកឧត្តម ជា ចាន់តូ បានថ្លែងអំណរគុណចំពោះធនាគាររដ្ឋវៀតណាម ជាពិសេស លោកជំទាវ ទេសាភិបាល Nguyen Thi Hong ដែលកន្លងមកបានផ្តល់កិច្ចសហប្រតិបត្តិការល្អប្រសើរក្រោមអនុស្សរណៈយោគយល់រវាងធនាគារកណ្តាលទាំងពីរលើកិច្ចសហប្រតិបត្តិការទូទៅ, ការត្រួតពិនិត្យធនាគារ និងលើការសម្អាតប្រាក់ និងហិរញ្ញប្បទានភេរវកម្ម។ជាមួយនេះដែរ ឯកឧត្តម ទេសាភិបាល ក៏បានថ្លែងអំណរគុណផងដែរដល់ធនាគាររដ្ឋ និងរដ្ឋាភិបាវៀតណាមដែលបានគាំទ្រដល់ការអភិវឌ្ឍធនធានមនុស្ស ដោយបានបន្តផ្តល់អាហារូបករណ៍ ដល់មន្ត្រីធនាគារជាតិនៃកម្ពុជាសម្រាប់ការសិក្សាថ្នាក់បរិញ្ញាប័ត្រ អនុបណ្ឌិត និងបណ្ឌិតនៅប្រទេសវៀតណាម៕អត្ថបទ៖ ជា វណ្ណៈ

កម្ពុជាបិទបញ្ចប់វេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១ ដោយជោគជ័យ

ភ្នំពេញ ៖ ក្រសួងពាណិជ្ជកម្មកម្ពុជា បានទទួលលទ្ធផលយ៉ាងល្អប្រសើរ ក្នុងការរៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១ (AEEBF1) ដែលរៀបចំឡើងតាមបែបរូបវ័ន្ត និងប្រព័ន្ធវីដេអូ ដែលជាព្រឹត្តិការណ៍អមសំខាន់មួយនៃកិច្ចប្រជុំកំពូល ASEM13 ដែលកម្ពុជាធ្វើជាម្ចាស់ផ្ទះនៅឆ្នាំ២០២១។ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម នៅក្នុងសន្និសីទកាសែត ស្តីពីលទ្ធផលនៃវេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១ នៅល្ងាចថ្ងៃទី២៤ ខែវិច្ឆិកានេះ បានមានប្រសាសន៍ថា វេទិកានេះ បានធ្វើឡើងក្រោមមូលបទ “ការផ្លាស់ប្តូរទៅរកគន្លងប្រក្រតីភាពថ្មី៖ ការធ្វើអានុភាវូបនីយកម្មខ្សែច្រវាក់តម្លៃសកល ពហុភាគីនិយម និងបដិវត្តឧស្សាហកម្ម ៤.០” ហើយបានប្រព្រឹត្តទៅក្នុងបរិបទការរីករាលដាលនៃជំងឺកូវីដ-១៩ ក្នុងគោលបំណងពង្រឹងពហុភាគីនិយម ដើម្បីកំណើនរួមគ្នា ដោយប្រមូលផ្តុំតួអង្គពាក់ព័ន្ធទាំងអស់ ធ្វើការពិភាក្សាស្វែងរកវិធីសាស្ត្រ និងមធ្យោបាយដោះស្រាយបញ្ហាប្រឈមនានាលើវិស័យសេដ្ឋកិច្ច និងសង្គមនៅក្នុងតំបន់អាស៊ី និងអឺរ៉ុប ក៏ដូចជាពិភពលោកទាំងមូល រួមគ្នាដើម្បីសម្រេចឱ្យបាននូវកំណើនប្រកបដោយបរិយាប័ន្ន។វេទិកានេះ មានការអញ្ជើញចូលរួមពីមន្ត្រីជាន់ខ្ពស់នៃស្ថាប័នរដ្ឋ បណ្តាអង្គទូតនៃប្រទេសសមាជិកអេសិម(ASEM) អ្នកធ្វើគោលនយោបាយ ក្រុមធុរជននិងវិនិយោគិន បញ្ញវ័ន្ត អ្នកជំនាញការមកពីវិស័យសំខាន់ៗ និងអ្នកពាក់ព័ន្ធមកពីបណ្តាប្រទេសនៅអាស៊ី និងអឺរ៉ុប សរុបចំនួនប្រមាណ ៦០០នាក់។ឯកឧត្តម បានបញ្ជាក់ថា វេទិកាសេដ្ឋកិច្ចនិងធុរកិច្ចអាស៊ី-អឺរ៉ុបលើកទី១ បានរៀបចំបទបង្ហាញ និងកិច្ចពិភាក្សាមួយចំនួន ដែលក្នុងនោះ វាគ្មិន និងអ្នកចូលរួមទាំងអស់បានចែករំលែកទស្សនៈ បទពិសោធន៍ ចំណេះដឹង និងការអនុវត្តល្អៗ ពីគ្រប់ភាគីពាក់ព័ន្ធទាំងអស់ ទាំងវិស័យសាធារណៈ និងវិស័យឯកជន និងបានលើកជាអនុសាសន៍ ជូនដល់ថ្នាក់ដឹកនាំស្ថាប័នរដ្ឋ និងវិស័យឯកជន នៃប្រទេសសមាជិកប្រទេសសមាជិកអេសិមផងដែរ។វេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១ គឺជាព្រឹត្តិការណ៍អមក្នុងចំណោមព្រឹត្តិការណ៍អម ចំនួន៧ នៃកិច្ចប្រជុំកំពូលអាស៊ី-អឺរ៉ុប លើកទី១៣ (ASEM13) ដែលនឹងប្រព្រឹត្តទៅនៅថ្ងៃទី២៥-២៦ ខែវិច្ឆិកា ឆ្នាំ២០២១។ តាមរយៈការរៀបចំវេទិកាលំដាប់អន្តរជាតិនេះ នឹងផ្តល់នូវលើកកម្ពស់កិត្យានុភាព និងលើកមុខមាត់ប្រទេសកម្ពុជាលើឆាកអន្តរជាតិ និងបង្ហាញជូនបណ្តាអ្នកចូលរួមមកពីអាស៊ី និងអឺរ៉ុប បានយល់ និងស្គាល់កម្ពុជាកាន់តែច្បាស់ ជាពិសេសបានស្វែងយល់ពីសក្តានុពលវិស័យពាណិជ្ជកម្ម និងកាលានុវត្តភាពវិនិយោគនៅកម្ពុជាជាដើម៕អត្ថបទ ៖ ឈិត បូរ៉ាវី

វិស័យអចលនវត្ថុ នឹងស្ទុះងើបឡើងវិញនៅឆ្នាំក្រោយដោយសារលំហូរវិនិយោគទុនបរទេស

ភ្នំពេញ ៖ អនុវិស័យអចលនវត្ថុនៅកម្ពុជា ត្រូវបានព្យាករថា នឹងស្ទុះងើបឡើងវិញ គាំទ្រដោយសារការកើនឡើងសន្សឹមៗ នៃលំហូរទុនវិនិយោគពីបរទេស ខណៈការវិនិយោគ និងតម្រូវការក្នុងស្រុក នៅលើវិស័យអចលនវត្ថុ មានតម្លែទាប និងមធ្យម។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងកម្មវិធីសមាជលើកទី ២៣ របស់សមាគមអ្នកវាយតម្លៃអចលនវត្ថុអាស៊ាន ក្រោមប្រធានបទ "ការវាយតម្លៃអចលនវត្ថុ ក្នុងអំឡុងពេលនៃការរីករាលដាលជំងឺកូវីដ-១៩" នៅថ្ងៃទី ២៥ខែវិច្ឆកា ឆ្នាំ ២០២១ នេះថា ស្របតាមនិន្នាការសកលសេដ្ឋកិច្ចកម្ពុជាក្នុងឆ្នាំ ២០២១ ត្រូវបានព្យាករ នឹងងើបឡើងវិញក្នុងកំណើនទាបប្រមាណ ២,៤% ដោយសារការអូសបន្លាយនៃជម្ងឺកូវីដ ១៩ នឹងការរំពឹងទុកនៃការងើបឡើងវិញក្នុងកម្រិតយឺត នៃតម្រូវការសកល ជាមួយនៃការបន្ទូបន្ថយនូវវិធានការរដ្ឋបាលជាដំណាក់ៗ និងការសម្របខ្លួនទៅនឹងប្រក្រតីភាពថ្មី នៃកិច្ចដំណើរការសង្កមសេដ្ឋកិច្ច ។ជាមួយគ្នានេះ អនុវិស័យអចលនវត្ថុនៅកម្ពុជា ត្រូវបានព្យាករថា នឹងជួយពូនជ្រុំដល់កំណើនសេដ្ឋកិច្ច ដែលនឹងអាចងើបឡើងក្នុងកំណើនទាប ២,៤% ក្នុងឆ្នាំ ២០២១ និង ៤,៨% ក្នុងឆ្នាំ ២០២២ គឺដោយសារការកើន ឡើងសន្សឹមៗ នៃលំហូរទុនវិនិយោគពីបរទេស ខណៈការវិនិយោគ និងតម្រូវការក្នុងស្រុក នៅលើវិស័យអចលនវត្ថុ មានតម្លែទាប និងមធ្យមនឹងបន្តរក្សាកំណើនល្អប្រសើរ។សូមបញ្ជាក់ថា៖ តាមសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ ២០២២ បានវាយតម្លៃសេដ្ឋកិច្ចកម្ពុជានៅឆ្នាំ ២០២២ដោយបានព្យាករថា នឹងសម្រេចបានកំណើនក្នុងរង្វង់ ៤,៨% ដែលធ្វើឱ្យ ផសស ថ្លៃបច្ចុប្បន្ន ស្ថិតក្នុងរង្វង់ ១២៤ ១៦២ ប៊ីលានរៀល, សមមូលនឹងប្រមាណ ៣០ ៥៤៤ លានដុល្លារអាម៉េរិក៕អត្ថបទ៖ សុន រ៉ាឌី

កសិករខេត្តឧត្ដរមានជ័យ ចាប់ផ្តើមសំរុកដាំដុះដំណាំដំឡូងមី ខណៈតម្លៃល្អប្រសើរ

ឧត្តរមានជ័យ៖ កសិកររស់នៅស្រុកត្រពាំងប្រាសាទ ខេត្តឧត្តរមានជ័យ ចាប់ផ្តើមធ្វើការដាំដុះដំណាំដំឡូងមី ខណៈរដូវនេះ ដំណាំដំឡូងកំពុងមានតម្លៃហក់ឡើងល្អប្រសើរនៅលើទីផ្សារ។កសិករម្នាក់មានវ័យជាង៥០ឆ្នាំ បានឲ្យដឹងថា គ្រួសាររបស់គាត់កន្លងមកប្រកបមុខរបរធ្វើកសិកម្មអស់រយះពេលជិត២០ឆ្នាំមកហើយ អាស្រ័យដោយការធ្វើស្រែ និងដាំដំឡូងមី ហើយការដាំដំឡូងមីនេះ ភាគច្រើនតែងតែហុចផ្តល់ផលបានល្អប្រសើរគួរជាទីគាប់ចិត្ត ជាងការធ្វើស្រែដោយតម្លៃលក់ចេញទៅឲ្យក្រុមឈ្មួញ បច្ចុប្បន្នក្នុងអំឡុងពេលវិបត្តិកូវីដនេះ គឺពេលប្រមូលផលម្តងៗនោះមានតម្លៃហក់ឡើងខ្ពស់ ក្នុងរយៈពេលប៉ុន្មានឆ្នាំនេះ។លោក បានបន្តថា ពេលខ្លះក៏មានក្រុមឈ្មួញមកចាំទទួលទិញដល់កន្លែងក៏មាន ដើម្បីដឹកចេញយកទៅលក់បន្តនៅឯប្រទេសជិតខាងដូចជា ប្រទេសថៃ នឹងវៀតណាមជាដើម។លោក បញ្ជាក់ថា ទោះបីស្ថិតក្នុងវិបត្ដិកូវីដ-១៩ មិនទាន់មានការថមថយបញ្ចប់ទាំងស្រុងយ៉ាងណាក្តី ក៏រូបលោកមិនសូវមានការបារម្មណ៍អ្វីនោះឡើយ ចំពោះការធ្វើកសិកម្មរបស់លោក ព្រោះថា តម្លៃដំឡូងលើទីផ្សារបច្ចុប្បន្នហាក់បីដូចជាមិនមានការប្រែប្រួល ឬក៏ធ្លាក់ចុះនោះឡើយ ផ្ទុយទៅវិញក្នុងស្ថានភាពបែបនេះ បែរជាតម្លៃហក់ឡើងខ្ពស់ទៅវិញ សំរាប់ការលក់ចេញឲ្យទៅក្រុមឈ្មួញនោះ៕អត្ថបទ ៖ ឃិនសារិទ្ធ

បណ្ដាញសង្គម

ព័ត៌មានថ្មីៗ

រុស្ស៊ីដកការព្រមានរលកយក្សស៊ូណាមិ សម្រាប់តំបន់ចុងភាគខាងកើតដែលរងគ្រោះដោយរញ្ជួយដីដ៏ខ្លាំង

របបយោធាមីយ៉ាន់ម៉ា អនុម័តច្បាប់កាត់ទោសដាក់ពន្ធនាគារអ្នករិះគន់ការបោះឆ្នោត

អ្នកនាំពាក្យក្រសួងព័ត៌មានអំពាវនាវ ឱ្យអ្នកសារព័ត៌មានអនុវត្តឱ្យបានក្រមសីលធម៌វិជ្ជាជីវៈ ចៀសវាងការផ្សាយព័ត៌មានប៉ះពាល់សន្តិសុខជាតិ

ចក្រភពអង់គ្លេស៖ ការទទួលស្គាល់រដ្ឋប៉ាឡេស្ទីន មិនមែនជាការផ្ដល់រង្វាន់ដល់ក្រុមហាម៉ាសឡើយ

វិមានក្រឹមឡាំងនិយាយពីសេចក្តីថ្លែងការណ៍របស់លោក Trumpថា រុស្ស៊ីមានប្រព័ន្ធភាពស៊ាំប្រឆាំងនឹងទណ្ឌកម្ម

អ៊ីស្រាអែលបង្អត់អាហារជនប៉ាឡេស្ទីន ៧នាក់បន្ថែមទៀតដល់ស្លាប់នៅតំបន់ហ្កាហ្សា

ជនភៀសសឹក៧៨៣គ្រួសារក្នុងស្រុកវាលវែង ទទួលបានអំណោយមនុស្សធម៌ពីកាកបាទក្រហមកម្ពុជា

ជប៉ុនជួបប្រទះនឹងសីតុណ្ហភាពខ្ពស់បំផុត ៤១,២អង្សាសេ

ក្រុមអ្នកឡើងភ្នំព្យាយាមសង្រ្គោះកីឡាការិនីជើងឯកកីឡាអូឡាំពិករងរបួសនៅលើភ្នំប្រទេសប៉ាគីស្ថាន

ពលករខ្មែរចំនួន៤០នាក់ស្ថិតនៅក្នុងភូមិខេត្តស្វាយរៀងបានធ្វើដំណើរវិលមកដល់ផ្ទះសម្បែងរួចរាល់ហើយ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

កម្ពុជាទាក់ទាញវិនិយោគផ្ទាល់ពីបរទេសមានតម្លៃសរុប ៣៩ប៊ីលានដុល្លារ ក្នុងឆមាសទី១

កម្ពុជាបង្ហាញលើឆាកអន្តរជាតិ ពីដំណើរឆ្ពោះទៅរបត់ថ្មី នៃការប្រើប្រាស់ប្រព័ន្ធបច្ចេកវិទ្យា

មន្ត្រីជំនាញ៖ តម្លៃស្រូវធ្លាក់ថ្លៃ ព្រោះទីផ្សារនាំចេញអង្ករទៅក្រៅប្រទេសមានការថយចុះ

រដ្ឋសភាអនុម័តសេចក្តីព្រាងច្បាប់ ស្តីពីពិធីសារអាស៊ានស្តីពីការពង្រឹងយន្តការដោះស្រាយវិវាទ

កម្ពុជានៅតែទទួលបានឱកាសប្រាក់ចំណូលខ្ពស់ លើការវិនិយោគនៃវិស័យអចលនទ្រព្យ

រដ្ឋមន្ត្រីក្រសួងសេដ្ឋកិច្ច ស្នើសមាគមអចលនវត្ថុបង្កើតស្តង់ដារវាយតម្លៃអចលនទ្រព្យរួមក្នុងតំបន់

ធនាគារជាតិនៃកម្ពុជា និងធនាគាររដ្ឋវៀតណាម បន្តកិច្ចសហប្រតិបត្តិការលើវិស័យធនាគារ និងហិរញ្ញវត្ថុ

កម្ពុជាបិទបញ្ចប់វេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១ ដោយជោគជ័យ

វិស័យអចលនវត្ថុ នឹងស្ទុះងើបឡើងវិញនៅឆ្នាំក្រោយដោយសារលំហូរវិនិយោគទុនបរទេស

កសិករខេត្តឧត្ដរមានជ័យ ចាប់ផ្តើមសំរុកដាំដុះដំណាំដំឡូងមី ខណៈតម្លៃល្អប្រសើរ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សេដ្ឋកិច្ច និង កសិកម្ម

កម្ពុជាទាក់ទាញវិនិយោគផ្ទាល់ពីបរទេសមានតម្លៃសរុប ៣៩ប៊ីលានដុល្លារ ក្នុងឆមាសទី១

កម្ពុជាបង្ហាញលើឆាកអន្តរជាតិ ពីដំណើរឆ្ពោះទៅរបត់ថ្មី នៃការប្រើប្រាស់ប្រព័ន្ធបច្ចេកវិទ្យា

មន្ត្រីជំនាញ៖ តម្លៃស្រូវធ្លាក់ថ្លៃ ព្រោះទីផ្សារនាំចេញអង្ករទៅក្រៅប្រទេសមានការថយចុះ

រដ្ឋសភាអនុម័តសេចក្តីព្រាងច្បាប់ ស្តីពីពិធីសារអាស៊ានស្តីពីការពង្រឹងយន្តការដោះស្រាយវិវាទ

កម្ពុជានៅតែទទួលបានឱកាសប្រាក់ចំណូលខ្ពស់ លើការវិនិយោគនៃវិស័យអចលនទ្រព្យ

ធនាគារជាតិ​​នៃកម្ពុជា និងធនាគាររដ្ឋវៀតណាម បន្តកិច្ចសហប្រតិបត្តិការលើវិស័យធនាគារ និងហិរញ្ញវត្ថុ

កម្ពុជាបិទបញ្ចប់វេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១ ដោយជោគជ័យ

វិស័យអចលនវត្ថុ នឹងស្ទុះងើបឡើងវិញនៅឆ្នាំក្រោយដោយសារលំហូរវិនិយោគទុនបរទេស

កសិករខេត្តឧត្ដរមានជ័យ ចាប់ផ្តើមសំរុកដាំដុះដំណាំដំឡូងមី ខណៈតម្លៃល្អប្រសើរ​

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ធនាគារជាតិនៃកម្ពុជា និងធនាគាររដ្ឋវៀតណាម បន្តកិច្ចសហប្រតិបត្តិការលើវិស័យធនាគារ និងហិរញ្ញវត្ថុ

កសិករខេត្តឧត្ដរមានជ័យ ចាប់ផ្តើមសំរុកដាំដុះដំណាំដំឡូងមី ខណៈតម្លៃល្អប្រសើរ