BTV NEWS

មន្ត្រីក្រសួងកសិកម្មពិនិត្យការប្រមូលទិញ និងការវេចខ្ចប់ផ្លែមៀនប៉ៃលិន សម្រាប់នាំចេញទៅប្រទេសចិន

កិច្ចប្រជុំកំពូលសេដ្ឋកិច្ច GCET រំពឹងទាក់ទាញវិនិយោគិនកាន់តែកើនឡើងថែមទៀត មកបណ្តាក់ទុននៅកម្ពុជា

ADB អនុម័តប្រាក់កម្ចីចំនួន ៥០លានដុល្លារ ដើម្បីជំរុញពាណិជ្ជកម្ម និងសមត្ថភាពប្រកួតប្រជែងនៅកម្ពុជា

រដ្ឋមន្ត្រីក្រសួងកសិកម្ម ណែនាំប្រធានមន្ទីរកសិកម្មរាជធានីភ្នំពេញត្រូវមានសាមគ្គីភាពផ្ទៃក្នុង និងអនុវត្តភារៈកិច្ចប្រកបដោយប្រសិទ្ធិភាព

សេដ្ឋកិច្ច និង កសិកម្ម

សម្តេចធិបតី៖ រយៈពេល៦ខែនេះ មានរោងចក្រសហគ្រាសបើកថ្មី ៣៣១៣ ក្នុងនោះវិស័យកាត់ដេរ ១៦៤ រោងចក្រ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍បញ្ជាក់ថា ក្នុងរយៈពេល ៦ខែមកនេះ រោងចក្រសហគ្រាសសរុបដែលបានបើកថ្មីមានមានចំនួន ៣៣១៣ ក្នុងនោះមានវិស័យកាត់ដេរ ១៦៤ រោងចក្រ។សម្ដេចធិបតី នាយករដ្ឋមន្រ្ដី មានប្រសាន៍បញ្ជាក់បែបនេះ ក្នុងឱកាសអញ្ជើញជាអធិបតីដឹកនាំកិច្ចប្រជុំពេញអង្គគណៈរដ្ឋមន្រ្តី នៅព្រឹកថ្ងៃទី១៥ ខែមីនា ឆ្នាំ២០២៤ នៅវិមានសន្តិភាព។ សម្តេចធិបតី ហ៊ុន ម៉ាណែត បានថ្លែងថា សម្ដេចទទទួលស្គាល់ថា សេដ្ឋកិច្ចកម្ពុជាបច្ចុប្បន្នមិនទាន់ល្អឥតខ្ចោះនោះទេ ប៉ុន្ដែក៏សូមឱ្យអ្នកដែលរិះគន់ត្រូវពិចារណាអំពីទំហំសមិទ្ធផលជាក់ស្ដែងចំពោះការរីកច្រើនរបស់កម្ពុជាផងដែរ ដូចជាករណីរោងចក្រមួយចំនួនបានបិទទ្វា ប៉ុន្ដែក៏មានរោចក្រជាច្រើនបានបើកថ្មីដែរ។ សម្ដេចនាយករដ្ឋមន្រ្ដីបានបញ្ជាក់ថា ប្រទេសកម្ពុជាគឺជាប្រទេសដែលប្រកាន់ភ្ជាប់នូវទីផ្សារសេរី ដូច្នេះការប្រកួតប្រជែងនៅក្នុងទីផ្សារគឺត្រូវតែមានអាជីវកម្មខ្លះជោគជ័យ និងខ្លះទៀតបរាជ័យត្រូវបិទទ្វាបែបនេះឯង។សម្តេចធិបតី នាយករដ្ឋមន្រ្ដី បានបញ្ជាក់បន្ថែមថា កង្វល់របស់ប្រជាពលរដ្ឋ ក៏ជាកង្វល់របស់រាជរដ្ឋាភិបាលដែរ។ សម្តេចបញ្ជាក់ថា បើចង់ដឹងពីការងារ កុំទៅមើលកន្លែងដែលអាជីវកម្មបិទទ្វា ប៉ុន្ដែត្រូវទៅមើលកន្លែងដែលបើកឬប្រកាសជ្រើសរើសបុគ្គលិកវិញ ដូចជានៅទីភ្នាក់ងារ ការងារ និងមុខរបរ នៃក្រសួងការងារជាដើម (NEA)៕អត្ថបទ៖ វ៉ន ដារ៉ា

សម្ដេចធិបតី៖ ៦ខែនេះ គម្រោងវិនិយោគថ្មីចំនួន១៧៣ បានចុះបញ្ជីនៅកម្ពុជា មានទុនវិនិយោគ ៤១៥០លានដុល្លារ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍ថា ក្នុងរយៈពេលជាង ៦ខែ មកនេះមានគម្រោងវិនិយោគថ្មីចំនួន ១៧៣បានចុះបញ្ជីនៅកម្ពុជា ក្នុងនោះមានទុនវិនិយោគ ៤១៥០ លានដុល្លារ។សម្ដេចធិបតីនាយករដ្ឋមន្រ្ដី មានប្រសាន៍បញ្ជាក់បែបនេះ ក្នុងឱកាសអញ្ជើញជាអធិបតីដឹកនាំកិច្ចប្រជុំពេញអង្គគណៈរដ្ឋមន្រ្តី នៅព្រឹកថ្ងៃទី១៥ ខែមីនា ឆ្នាំ២០២៤ នៅវិមានសន្តិភាព។ សម្ដេចថ្លែងថា ក្នុងរយៈពេល៦ខែ រាជរដ្ឋាភិបាលអាណត្តិទី៧ បានខិតខំទាក់ម៉ូយ (អ្នកវិនិយោគ) មកបណ្ដាក់ទុក វិនិយោគនៅក្នុងប្រទេសកម្ពុជា ហើយជាលទ្ធផលមានក្រុមហ៊ុន អ្នកវិនិយោគិនថ្មីចំនួន ១៧៣ គម្រោង បានជ្រើសរើសយកការបណ្ដាក់ទុនចុះបញ្ជីវិនិយោគនៅកម្ពុជា ដែលសរុបជាទឹកប្រាក់មានទំហំទឹកប្រាក់ជាង ៤ ពាន់លានដុល្លារអាមេរិក។សម្តេចធិបតី នាយករដ្ឋមន្រ្ដីបានគូសបញ្ជាក់ថា គម្រោងទាំង ១៧៣ នេះត្រូវបានចុះបញ្ជីនៅ CDC រួចរាល់ហើយ ខណៈតាមរយៈគម្រោងវិនិយោគទាំងនេះនឹងផ្តល់ឱកាសការងារជាង ១៧ ម៉ឺនកន្លែងដល់ប្រជាពលរដ្ឋនៅទូទាំងសប្រទេស។ សម្តេចធិបតី គូសបញ្ជាក់ថា រាជរដ្ឋាភិបាល កំពុងបន្តខិតខំប្រឹងប្រែងលើកកម្ពស់បរិយាកាសធុរកិច្ច និងជំរុញការវិនិយោគនៅកម្ពុជាដើម្បីបង្កើតការងារបន្ថែមទៀតជូនប្រជាពលរដ្ឋ៕អត្ថបទ៖ វ៉ន ដារ៉ា

ខយ តេ កម្ពុជា៖ ១០ឆ្នាំនៃភាពច្នៃប្រឌិត នវានុវត្តន៍ និងភាពជោគជ័យ

រយៈពេល ១០ឆ្នាំមកនេះ ជាមួយនឹងភាពច្នៃប្រឌិត និងនវានុវត្តន៍ ខយ តេ កម្ពុជា សម្រេចបាននូវសមិទ្ធផលជាបន្តបន្ទាប់ រហូតរក្សាបាននូវភាពលេចធ្លោ និងបាននាំមកនូវភាពរីកចំរើនយ៉ាងច្រើននៅក្នុងសង្គម។ បើតាមការអះអាងពីតំណាងក្រុមហ៊ុន សមិទ្ធផលឆ្នើម និងកំណត់ត្រាដែលមិនធ្លាប់មានពីមុនមកនេះ ខយ តេ កម្ពុជា បាននាំមកនូវភាពជោគជ័យដ៏ត្រចះត្រចង់គួរជាទីមោទនៈ។ ភាពភាពជោគជ័យដែលក្រុមហ៊ុនបានសង្កត់ធ្ងន់នោះគឺ ការបង្កើតឯកត្តកម្មជាម៉ាកយីហោដែលលក់បានរហូតដល់ចំនួន ៤១៩៨កែវក្នុងមួយថ្ងៃដែលជាកំណត់ត្រាលក់ខ្ពស់ជាងគេបំផុត សម្រាប់សាខាមួយ ជាមួយនឹងកំណត់ត្រានៃការបើកដំណើរការសាខា ខយ តេ ធំជាងគេបំផុតនៅក្នុងពិភពលោក ដែលធ្វើឱ្យមានការទទួលស្គាល់យ៉ាងទូលំទូលាយជាលក្ខណៈសកល។បន្ថែមលើនេះ ខយ តេ កម្ពុជា ក៏បានធ្វើជាម្ចាស់ផ្ទះរៀបចំព្រឹត្តិការណ៍ប្រឡងក្រឡុកតែ (Shaker Master) ដែលជាកម្មវិធីប្រកួតក្រឡុកតែដ៏ធំជាងគេបំផុតមួយនៅក្នុងពិភពលោកដែលមានការចូលរួមពីបណ្តាប្រទេសជាង១០ ដើម្បីពង្រឹងវប្បធម៌ និងសិប្បកម្មតែជាលក្ខណៈសកល។ទន្ទឹមនេះ ខយ តេ កម្ពុជា តែងតែចូលរួមយ៉ាងសកម្មក្នុងសកម្មភាពសង្គមប្រកបដោយការប្តេជ្ញាចិត្តខ្ពស់។ ជាក់ស្តែងក្នុងអំឡុងពេលគ្រោះធម្មជាតិ ខយ តេ កម្ពុជា បានផ្តល់ការឧបត្ថម្ភគាំទ្រដល់គ្រួសាររងគ្រោះជាង ៤០០០គ្រួសារ និងការចែកភេសជ្ជៈ ខយ តេ ចំនួន១ម៉ឺនកែវដោយឥតគិតថ្លៃជូនដល់ពលរដ្ឋកម្ពុជា។តាមរយៈសមិទ្ធផល និងការរួមចំណែកទាំងនេះ ធ្វើឱ្យមានការទទួលស្គាល់ និងបានទទួលនូវពានរង្វាន់កិត្តិយសកម្រិតជាតិ និងអន្តរជាតិជាច្រើន រួមមាន៖- ពានរង្វាន់ប្រតិបត្តិការឆ្នើម ពី foodpanda- ពានរង្វាន់ម៉ាកតែដែលអតិថិជនពេញនិយមបំផុត ពី NHAM24- ពានរង្វាន់ម៉ាកដែលមានឥទ្ធិពលបំផុត ពី E-Gets- ពានរង្វាន់សហគ្រិនវ័យក្មេងឆ្នើមកម្ពុជា ឆ្នាំ២០១៥ (ASEAN-CHINA)- ពានរង្វាន់កន្លែងការងារល្អបំផុត ពីក្រសួងទេសចរណ៍- វិញ្ញាបនបត្រអនុលោមភាពសារពើពន្ធប្រភេទ មាស ពីអគ្គនាយកដ្ឋានពន្ធដារការសម្លឹងឆ្ពោះទៅអនាគត និងការអបអរសាទរខួបអនុស្សាវរីយ៍ ១០ ឆ្នាំ ក្រោមប្រធានបទ «វិថីដើរម៉ូដ»។ដើម្បីអបអរសាទរចំពោះសមិទ្ធផលដែលសម្រេចបានរយៈពេល ១០ឆ្នាំមកនេះ ខយ តេ កម្ពុជា បានរៀបចំកម្មវិធីខួបអនុស្សាវរីយ៍គម្រប់ ១០ឆ្នាំរបស់ខ្លួន ក្រោមប្រធានបទ «វិថីដើរម៉ូដ» ដោយមានការដើរបង្ហាញម៉ូដសម្លៀកបំពាក់ដ៏ធំ ដែលមានគោលបំណងបង្ហាញពីចក្ខុវិស័យអនាគតរបស់ ខយ តេ កម្ពុជា ក្នុងការប្តេជ្ញារក្សានូវភាពលេចធ្លោ ភាពច្នៃប្រឌិត និងនវានុវត្តន៍របស់ខ្លួននៅលើវិថីតែគុជក្នុងប្រទេសកម្ពុជាឱ្យកាន់តែរឹងមាំ។ កម្មវិធីនេះ ក៏មានការចូលរួមពីសំណាក់ថ្នាក់ដឹកនាំជាន់ខ្ពស់របស់រាជរដ្ឋាភិបាល ឯកឧត្តម លោកជំទាវ អ្នកឧកញ៉ា ឧកញ៉ា អគ្គនាយកនៃក្រុមហ៊ុន ខយតេ អ្នកបងើ្កតមាតិការ ថ្នាក់ដឹកនាំ និងបុគ្គលិក ខយ តេ កម្ពុជា ព្រមទាំងអ្នកគាំទ្ររបស់ខ្លួនជាច្រើននាក់ផងដែរ៕

CSX បង្ហាញមហិច្ឆតាជំរុញការជួញដូរភាគហ៊ុនឲ្យកើនដល់ ១០០លានដុល្លារ នៅឆ្នាំ២០៣០ ខាងមុខ

អគ្គនាយកផ្សារមូលបត្រកម្ពុជា (CSX) ជាថ្មីម្តងទៀត បានលើកឡើងនូវមហិច្ឆតារបស់ខ្លួន ដែលមានបំណងចង់សម្រេចឲ្យបានទំហំការជួញដូរឲ្យកើនដល់ ១០០លានដុល្លារអាម៉េរិក ក្នុង១ថ្ងៃ ខណៈសព្វថ្ងៃនេះ ជាមធ្យមទំហំជួញដូរមានប្រមាណ ២០ម៉ឺនដុល្លារ ក្នុង១ថ្ងៃ។ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃផ្សារមូលបត្រកម្ពុជា ក្នុងពិធីបើកវគ្គបណ្តុះបណ្តាលស្តីពី Earnings Forum 2024 នៅព្រឹកថ្ងៃទី១២ ខែមីនានេះ បានមានប្រសាសន៍ថា គិតមកដល់បច្ចុប្បន្ន គណនីដែលកំពុងជួញដូរដែលមានបញ្ជីឈ្មោះ ចំនួនសរុបប្រមាណជាង ៥ម៉ឺនគណនី។ ឯកឧត្តម បានបន្តថា តាមរយៈកម្មវិធីបណ្តុះបណ្តាលនេះ ផ្សារមូលបត្រកម្ពុជា នឹងបន្តរៀបចំឲ្យកាន់តែច្រើនបន្ថែមទៀត ដើម្បីឲ្យសាធារណជនកម្ពុជាស្គាល់អំពីការវិនិយោគដែលត្រឹមត្រូវស្របតាមច្បាប់ ដែលមានការធានាការពារច្បាប់ និងបទប្បញ្ញត្តិជាធរមាន ដើម្បីឈានសម្រេចឲ្យបាននូវគោលដៅនៃមហិច្ឆតាខាងលើនេះ។ ជាមួយនេះ ឯកឧត្តម បានស្នើវិនិយោគិនសាធារណៈ និងសិក្ខាកាមដែលចូលរួមក្នុងវគ្គបណ្តុះបណ្តាលថ្ងៃនេះទាំងអស់ ឲ្យព្យាយាមក្រេបជញ្ជក់នូវចំណេះដឹង ឬក៏លើកជាសំណួរសួរទៅកាន់តំណាងក្រុមហ៊ុនចុះបញ្ជីទាំងអស់ ដើម្បីទទួលបានព័ត៌មានគ្រប់ជ្រុងជ្រោយ ងាយស្រួលក្នុងការសម្រេចចិត្តវិនិយោគ ឬបង្កើតចំណូលអកម្មចាប់ពីពេលនេះតទៅ ដើម្បីជាមូលដ្ឋានក្នុងការវិភាគ ក៏ដូចជាជំនួយបន្ថែមសម្រាប់វិនិយោគក្នុងការវិភាគជាបច្ចេកទេស ដើម្បីសម្រេចចិត្តក្នុងការវិនិយោគលើភាគហ៊ុនឲ្យបានត្រឹមត្រូវ។សូមបញ្ជាក់ថា វគ្គបណ្តុះបណ្តាលស្តីពី Earnings Forum 2024 នេះ ត្រូវបានបង្កើតឡើងក្នុងឆ្នាំ២០២៣ ក្នុងគោលបំណងបង្កើតជាវេទិកាជូនក្រុមហ៊ុនចុះបញ្ជីក្នុងការផ្សព្វផ្សាយព័ត៌មានរបស់ក្រុមហ៊ុនដល់វិនិយោគិន និងជាវេទិកាមួយអនុញ្ញាតឲ្យសាធារណជនស្វែងយល់បន្ថែមពីអាជីវកម្មរបស់ក្រុមហ៊ុនចុះបញ្ជីនៅផ្សារមូលបត្រកម្ពុជា រួមមានប្រតិបត្តិការអាជីវកម្ម លទ្ធផលហិរញ្ញវត្ថុ និងផែនការអាជីវកម្មនាពេលអនាគត៕ អត្ថបទ៖ ឈិត បូរ៉ាវី

ប្រទេសចិនកំណត់គោលដៅសេដ្ឋកិច្ចពេញដោយមហិច្ឆតាសម្រាប់ឆ្នាំ២០២៤ ក្នុងឱកាសបើកសភាប្រជាជន

លោកនាយករដ្ឋមន្ត្រីចិន លី ឈាង (Li Qiang) បានទទួលស្គាល់ថាការអនុវត្តសេដ្ឋកិច្ចរបស់ប្រទេសចិនបានប្រឈមនឹងភាពលំបាក ដោយបន្ថែមថាបញ្ហាជាច្រើនទាំងនេះមិនទាន់ត្រូវបានដោះស្រាយនៅឡើយទេ។បញ្ហានេះបានកើតឡើងនៅពេលប្រទេសចិនកំពុងព្យាយាមស្តារសេដ្ឋកិច្ចឲ្យរីកចម្រើនឡើងវិញ។ លោកបានបន្តថា ហានិភ័យ និងគ្រោះថ្នាក់ដែលអាចកើតមានក្នុងវិស័យអចលនទ្រព្យ បំណុលរបស់រដ្ឋាភិបាលក្នុងតំបន់ និងស្ថាប័នហិរញ្ញវត្ថុខ្នាតតូច និងមធ្យម មានសភាពធ្ងន់ធ្ងរក្នុងផ្នែកមួយចំនួន។ នៅក្រោមកាលៈទេសៈទាំងនេះ យើងបានប្រឈមបញ្ហាជាច្រើនក្នុងការសម្រេចចិត្តបង្កើតគោលនយោបាយ និងធ្វើការងាររបស់យើង។ វិធានការផ្សេងទៀតដើម្បីជួយដោះស្រាយកំណើនសេដ្ឋកិច្ចកំពុងងើបឡើងវិញយឺតរបស់ប្រទេសនេះពីជំងឺរាតត្បាតក៏ត្រូវបានគូសបញ្ជាក់ផងដែរ រួមទាំងការបង្កើតគំនិតផ្តួចផ្តើមថ្មីដើម្បីដោះស្រាយបញ្ហានៅក្នុងវិស័យអចលនទ្រព្យដែលរងគ្រោះដោយវិបត្តិរបស់ប្រទេសនេះ។ ទីក្រុងប៉េកាំងក៏មានគោលបំណងបន្ថែមការងារចំនួន១២ លាន កន្លែង នៅក្នុងតំបន់ទីក្រុងផងដែរ។លោកនាយករដ្ឋមន្ត្រី Li បាននិយាយថា បទប្បញ្ញត្តិនៃទីផ្សារហិរញ្ញវត្ថុក៏នឹងកើនឡើងផងដែរ ខណៈពេលការស្រាវជ្រាវនឹងកើនឡើងនៅក្នុងបច្ចេកវិទ្យាថ្មីៗ រួមទាំងបញ្ញាសិប្បនិម្មិត (AI) និងវិទ្យាសាស្ត្រជីវិត។ អស់រយៈពេលជាច្រើនទសវត្សរ៍មកហើយ ដែលសេដ្ឋកិច្ចចិនបានពង្រីកក្នុងអត្រាខ្ពស់បំផុត ដោយតួលេខផ្លូវការដាក់ផលិតផលក្នុងស្រុកសរុប (GDP) របស់ខ្លួនកើនឡើងជាមធ្យមជិត ១០% ក្នុងមួយឆ្នាំ។នៅលើមាគ៌ា ដែលខ្លួនបានវ៉ាដាច់ប្រទេសជប៉ុនដើម្បីក្លាយជាមហាអំណាចសេដ្ឋកិច្ចទីពីររបស់ពិភពលោក ទីក្រុងប៉េកាំងបានអះអាងថាខ្លួនបានដកប្រជាជនរាប់រយលាននាក់ចេញពីភាពក្រីក្រ។ ក្រុងប៉េកាំងនិយាយថាកាលពីឆ្នាំមុនថា សេដ្ឋកិច្ចបានកើនឡើង ៥,២% ទោះថាកម្រិតនោះទាបសម្រាប់ប្រទេសចិនក្ដី។ ទោះជាយ៉ាងណា ក្រុមអ្នករិះគន់ខ្លះអះអាងថា តួលេខពិតអាចមានតិចជាងមួយភាគបីនៃចំនួននោះ៕

រដ្ឋមន្ត្រីហិរញ្ញវត្ថុ៖ ប្រទេសចិន ផ្តល់កម្ចីជាង២ពាន់លានដុល្លារដល់ប៉ាគីស្ថាន

រដ្ឋមន្ត្រីក្រសួងហិរញ្ញវត្ថុចាំផ្ទះលោក សាមសេដ អាក់តា (Shamshad Akhtar) បានបញ្ជាក់នៅក្នុងការឆ្លើយតបទៅកាន់សារព័ត៌មានរ៉យទ័រនៅថ្ងៃព្រហស្បតិ៍នេះថា ប្រទេសចិន បានផ្តល់ប្រាក់កម្ចីជាង ២ពាន់លានដុល្លារ ដល់ប្រទេសប៉ាគីស្ថាន។សារព័ត៌មាន Geo News ដែលបានរាយការណ៍ដល់ព័ត៌មានរ៉យទ័រជាលើកដំបូង បាននិយាយដោយដកស្រង់ប្រភពពីក្រសួងហិរញ្ញវត្ថុប៉ាគីស្ថានថា ប្រាក់កម្ចីចំនួន ២ពាន់លានដុល្លារ ត្រូវផ្តល់ នៅក្នុងខែមីនា ហើយត្រូវបានពន្យាររយៈពេលមួយឆ្នាំ។ ទីក្រុងប៉េកាំង បានធ្វើការទំនាក់់ទំនងការសម្រេចចិត្តនេះ ទៅកាន់ទីក្រុងអ៊ីស្លាម៉ាបាដ។សេដ្ឋកិច្ចដែលជាប់គាំងដោយបញ្ហាលុយប្រាក់របស់ប្រទេសប៉ាគីស្ថាន កំពុងតស៊ូ ដើម្បីស្ថិរភាពពីវិបត្តិហិរញ្ញវត្ថុ និងទទួលបានការរៀបចំរង់ចាំប្រាក់ចំនួន ៣ពាន់លានដុល្លារពីមូលនិធិរូបិយវត្ថុអន្តរជាតិ (IMF)កាលពីរដូវក្តៅមុន។ទីភ្នាក់ងារវាយតម្លៃ Fitch បាននិយាយកាលពីសប្តាហ៍មុនថា ជំហរខាងក្រៅដែលងាយរងគ្រោះរបស់ប្រទេសប៉ាគីស្ថាន មានន័យថា ការធានាហិរញ្ញវត្ថុពីដៃគូពហុភាគី និងទ្វេភាគី នឹងក្លាយជាបញ្ហាបន្ទាន់បំផុតមួយ ដែលរដ្ឋាភិបាលបន្ទាប់ កំពុងប្រឈម។

ប្រជាជនឥណ្ឌូណេស៊ីកំពុងសម្រុកទិញអង្ករឧបត្ថម្ភធនរបស់រដ្ឋ ខណៈតម្លៃពិភពលោកកើនឡើងខ្ពស់ជិតរយៈពេល១៦ឆ្នាំ

នៅតំបន់ជាយក្រុងហ្សាកាតា អតិថិជនរាប់សិបនាក់ ដែលភាគច្រើនជាស្ត្រី បានឈរតម្រង់ជួរយ៉ាងវែងដើម្បីទិញអង្ករឧបត្ថម្ភរបស់រដ្ឋាភិបាល បន្ទាប់ពីគ្រោះរាំងស្ងួតធ្ងន់ធ្ងរកាលពីឆ្នាំមុនបានរារាំងដល់ការផលិត និងបានធ្វើឱ្យតម្លៃអង្ករកើនឡើងខ្ពស់នៅទូទាំងប្រទេសឥណ្ឌូនេស៊ី។ អ្នកស្រីម៉ាស៊ី (Masih) អាជីវករលក់ដូងម្នាក់វ័យ៥៥ឆ្នាំគឺជាពលរដ្ឋម្នាក់ក្នុងចំណោមអ្នកដែលកំពុងរង់ចាំបាវអង្ករនៅផ្សារដែលគ្រប់គ្រងដោយភ្នាក់ងារលទ្ធកម្មស្បៀងអាហាររដ្ឋបូឡុក(Bulog) ក្នុងទីក្រុង បេកាស៊ី (Bekasi)ចម្ងាយ ២៥គីឡូម៉ែត្រ ភាគខាងកើតរដ្ឋធានី។ អ្នកស្រីបានប្រាប់សារព័ត៌មាន Reutersថា អ្នកស្រីត្រូវតែចូលទៅឈរតម្រង់ជួរដើម្បីទិញអង្ករដែលមានតម្លៃធូរ ព្រោះអង្ករនៅតាមទីផ្សារមានតម្លៃថ្លៃ ដូច្នេះបើចង់បានអង្ករមានតម្លៃទាបត្រូវមកទីនេះ។ តម្លៃការជួញដូរអង្ករពិភពលោកកំពុងហក់ឡើងជិតដល់កម្រិតខ្ពស់ក្នុងរយៈពេល១៦ឆ្នាំបន្ទាប់ពីប្រទេសឥណ្ឌា ដែលជាអ្នកផ្គត់ផ្គង់ធំបំផុតរបស់ពិភពលោកបានរឹតត្បិតការនាំចេញកាលពីឆ្នាំមុន។អង្ករគឺជាអាហារចម្បងសម្រាប់ប្រជាជនភាគច្រើនរបស់ប្រទេសឥណ្ឌូនេស៊ីប្រមាណ២៧០លាននាក់ ហើយតម្លៃបានហក់ឡើងជាង១៦%ចាប់តាំងពីឆ្នាំមុន ដោយសារបាតុភូតអាកាសធាតុអេលនីញ៉ូ(El Nino )បានកាត់បន្ថយទឹកភ្លៀងនៅទូទាំងផ្នែកដ៏ធំនៃអាស៊ីក្នុងឆ្នាំ ២០២៣ ដែលប៉ះពាល់ដល់ទិន្នផលធញ្ញជាតិ និងជំរុញឱ្យមានសម្ពាធអតិផរណាអាហារសម្រាប់ប្រទេសមួយចំនួន។រដ្ឋាភិបាលឥណ្ឌូណេស៊ីជាធម្មតាបានបង្កើនកម្រិតនៃការលក់ផលិតផលម្ហូបអាហារក្នុងតម្លៃឧបត្ថម្ភធន នៅពេលតម្លៃនៅលើទីផ្សារលោតឡើងខ្ពស់ និងប៉ះពាល់ដល់អ្នកប្រើប្រាស់។ នៅឯទីផ្សារឧបត្ថម្ភធនរបស់រដ្ឋ Bekasi អង្ករត្រូវបានលក់ក្នុងតម្លៃ ១០.៦០០រូពីក្នុងមួយគីឡូក្រាម ស្មើ(០,៦៨ ដុល្លារ) និងវេចខ្ចប់ក្នុងបាវទម្ងន់៥គីឡូក្រាម ធៀបនឹងតម្លៃ១៤.៣០០រូពី ស្មើ(០,៩១ ដុល្លារ នៅក្នុងទីផ្សារ។ ភ្នាក់ងារលទ្ធកម្មស្បៀងអាហាររដ្ឋបូឡុក បានកំណត់ការលក់ត្រឹមពីរបាវក្នុងអតិថិជនម្នាក់ដើម្បីបញ្ចៀសការប៉ះពាល់ដល់ការស្តុកទុក៕

សាជីវកម្មធានាឥណទានកម្ពុជា ធានាឥណទានដល់អាជីកម្មក្នុងស្រុកមានទឹកប្រាក់ ១៧០លានដុល្លារ

សាជីវកម្មធានាឥណទានកម្ពុជា គិតត្រឹមចុងខែមករា ឆ្នាំ ២០២៤ បានផ្តល់ការធានាឥណទាន ក្នុងទំហំទឹកប្រាក់កម្ចីប្រមាណជាង ១៧០ លានដុល្លារអាមេរិក ដើម្បីគាំទ្រសម្រាប់ឥណទានអាជីវកម្ម ការវិនិយោគ និងជាទុនបង្វិលនៃការពង្រីកអាជីវកម្មក្នុងស្រុក។សាជីវកម្មធានាឥណទានកម្ពុជា (CGCC) បានបង្ហាញតាមរយៈព្រឹត្តិបត្រនៃវឌ្ឍនភាពនៃការធានាឥណទាននៅព្រះរាជាណាចក្រកម្ពុជា ឱ្យដឹងថា គិតត្រឹមចុងខែ មករា ឆ្នាំ ២០២៣នេះ សាជីវកម្មធានាឥណទានកម្ពុជា បានផ្តល់ការធានាឥណទានមានទំហំទឹកប្រាក់កម្ចីប្រមាណជាង ១៧០លានដុល្លារ ក្នុងនោះសម្រាប់កម្ចីជាប្រាក់រៀល មានទំហំឥណទានដែលមានការធានាសរុបជាង ៨៤ ប៊ីលានរៀល, ឥណទានដែលមិនមានការធានាជិត ២៣ ប៊ីលានរៀល និងទំហំការធានាឥណទានមានជិត ៦២ ប៊ីលានរៀល។ របាយការណ៍ដដែលបញ្ជាក់ថា ចំពោះកម្ចីឥណទានជាប្រាក់ដុល្លារវិញ ទំហំឥណទានដែលមានការធានាសរុបជិត ១៥០ លានដុល្លារ ក្នុងនោះសម្រាប់ឥណទាន ដែលមិនមានការធានាមានជាង ៤១លានដុល្លារ និងមានទំហំការធានាឥណទានជាង ១០៧ លានដុល្លារ។ ចំពោះប្រភេទអាជីវកម្មដែលបានផ្តល់ជូន គិតត្រឹមរយៈពេលនេះដែរ សរុបមានចំនួនជិត ២ ពាន់ក្រុមហ៊ុន/សហគ្រាស ក្នុងនោះអាជីវកម្មដែលគ្រប់គ្រងដោយស្រ្តីមាន ៨៣៣ សហគ្រាស និងមិនគ្រប់គ្រងដោយស្រ្តីមានជាង ១ ១៤៤ ក្រុមហ៊ុន/ សហគ្រាស ។ ចំណែកប្រភេទនៃការកម្ចីវិញ អាជីវកម្មដែលមានការទ្រព្យធានាមានចំនួន ៧៤១ ក្រុមហ៊ុន/សហគ្រាស និងគ្មាន ទ្រព្យធានា មានចំនួន ១ ២៣៦ ក្រុមហ៊ុន/សហគ្រាស។ ដោយឡែកការធានាលើប្រភេទអាជីវកម្មវិញ គិតត្រឹមចុងខែ មករា ឆ្នាំ ២០២៣ នេះ សាជីវកម្មធានាឥណទានកម្ពុជា បានផ្តល់ទៅដល់ក្រុមហ៊ុនខ្នាតធំ មានចំនួន ១៥២ ក្រុមហ៊ុន/សហគ្រាស និងសហគ្រាសមីក្រូ និងមធ្យម មានចំនួន ១ ៨២៥ សហគ្រាសផងដែរ៕ អត្ថបទ៖ សុន រ៉ាឌី

ឧបនាយករដ្ឋមន្រ្តី ស៊ុន ចាន់ថុល ចុះពិនិត្យតំបន់សេដ្ឋកិច្ចពិសេសនៅប៉ោយប៉ែត ដើម្បីទាក់ទាញអ្នកវិនិយោគ

បន្ទាយមានជ័យ៖ នៅថ្ងៃទី២៤ ខែកុម្ភៈ ឆ្នាំ២០២៤ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា CDC បានដឹកនាំប្រតិភូអញ្ជើញពិនិត្យប៉ុស្ត៍ច្រកព្រំដែនអន្តរជាតិស្ទឹងបត់-បាណងអៀន ក្នុងក្រុងប៉ោយប៉ែត។ ក្នុងពេលចុះពិនិត្យ ឯកឧត្តម ឧបនាយករដ្ឋមន្ត្រី បានឱ្យដឹងថា បច្ចុប្បន្នតំបន់សេដ្ឋកិច្ចពិសេសនៅក្នុងខេត្តបន្ទាយមានជ័យ មានចំនួន៤តំបន់ បានទាក់ទាញគម្រោងវិនិយោគមកបណ្តាក់ទុនចំនួន ១៩គម្រោង ក្នុងនោះកំពុងដំណើរការមានចំនួន១៣គម្រោង ក្នុងទុនវិនិយោគសរុបចំនួន ១២៦លានដុល្លារអាមេរិក និងបានបង្កើតការងារចំនួនជិត៦ពាន់កន្លែង។សូមជម្រាបថា រោងចក្រនៃបណ្តាក្រុមហ៊ុនវិនិយោគក្នុងតំបន់សេដ្ឋកិច្ចពិសេសចំនួន២ត្រូវបាន ឯកឧត្តមឧបនាយករដ្ឋមន្ត្រី និងប្រតិភូអញ្ជើញពិនិត្យសកម្មភាពផលិតកម្មរួមមាន៖១. ក្រុមហ៊ុន Nidec Die-Casting (Cambodia) Co., Ltd. ជាគម្រោងវិនិយោគផលិតសម្ភារៈអេឡិចត្រូនិក ស្ថិតក្នុងតំបន់សេដ្ឋកិច្ចពិសេស សានកូ ប៉ោយប៉ែត ក្នុងទុនវិនិយោគចំនួន ២០,៦៣ លានដុល្លារអាម៉េរិក មានទីផ្សារនាំចេញទៅកាន់ប្រទេសថៃ, ជប៉ុន, សិង្ហបុរី និងសហរដ្ឋអាម៉េរិក បានបង្កើតការងារចំនួន ៨០៣ កន្លែង។ ២.ក្រុមហ៊ុន NHK Spring (Cambodia) Co., Ltd. ជាគម្រោងវិនិយោគកម្មន្ដសាលស្រោមពូកស្បែករថយន្ត ស្ថិតក្នុងតំបន់សេដ្ឋកិច្ចពិសេស សានកូ ប៉ោយប៉ែត ក្នុងទុនវិនិយោគចំនួន ៨,១៥ លានដុល្លារអាម៉េរិក មានទីផ្សារនាំចេញទៅកាន់ ប្រទេសថៃ បានបង្កើតការងារចំនួន ២៣៩ កន្លែង។ ៣.ក្រុមហ៊ុន HGB Motors Assembly Co., Ltd. ជាគម្រោងវិនិយោគកម្មន្ដសាលផ្គុំ និងដំឡើងរថយន្ត ស្ថិតក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ប៉ោយប៉ែត ក្នុងទុនវិនិយោគ ៧ លានដុល្លារអាម៉េរិក មានទីផ្សារលក់នៅក្នុងស្រុក បានបង្កើតការងារចំនួន ៧៦ កន្លែង៕

ក្នុងមួយខែកសិករខេត្តតាកែវ អាចរកប្រាក់ចំណូលដល់ខ្ទង់ពាន់ដុល្លារ ពីមុខរបរចិញ្ចឹមមាន់ពូជស្គួយ

តាមរយៈកម្មវិធីអភិវឌ្ឍន៍ពូជមាន់ស្គួយកម្ពុជារបស់មជ្ឈមណ្ឌលអូស្ត្រាលី សម្រាប់ការស្រាវជ្រាវកសិកម្មអន្តរជាតិ (ACIAR) ធ្វើឲ្យក្រុមកសិករនៅខេត្តតាកែវមានជីវភាពល្អប្រសើរជាងមុន ជាមធ្យម សម្រាប់កសិដ្ឋានចិញ្ចឹមមាន់ពូជស្គួយ ដែលគេស្គាល់ថា មាន់ស្រែ ចំនួនជាង ៩០ ក្បាល អាចរកប្រាក់ចំណូលរហូតខ្ទង់ពាន់ដុល្លារ ក្នុង១ខែៗ។លោកស្រី កន ភារម្យ ម្ចាស់កសិដ្ឋាន និងជាប្រធានសហគមន៍កសិកម្មមាន់ស្រែ អូរផុត ស្ថិតនៅភូមិអូរផុត ឃុំអង្គតាសោម ស្រុកត្រាំកក់ ខេត្តតាកែវ បានឲ្យដឹងកាលពីរសៀលថ្ងៃទី២០ ខែកុម្ភៈនេះថា តាមរយៈការចិញ្ចឹមមាន់បែបប្រពៃណី ការរកប្រាក់ចំណូលបានមួយគ្រប់ៗ និងពេលខ្លះចូលដើមក៏មាន ដោយសារខ្វះចំណេះ ជំនាញមើលថែមាន់ឲ្យធំធាត់ល្អ និងពេលខ្លះមាន់ងាប់ដោយសារជំងឺជាដើម។លោកស្រីបានរៀបរាប់ថា បច្ចុប្បន្នក្រៅពីមានការជួយជ្រោមជ្រែងរបស់ក្រសួងកសិកម្ម រុក្ខាប្រមាញ់ និងនេសាទ សហគមន៍លោកស្រី ទទួលបានការងារបច្ចេកទេស ការផ្តល់បរិក្ខារ សម្រាប់ចិញ្ចឹមរួមជាមួយដើមទុនជាដើម ដែលគិតមកដល់ពេលនេះមានរយៈពេលប្រមាណ ៧ខែមកហើយ តាមរយៈគម្រោងកែលម្អ តំណពូជនៅតំបន់អាស៊ីរបស់អូស្ត្រាលី ក្នុងការបង្កើនផលិតភាព និងភាពធន់នឹងអាកាសធាតុក្នុងតំបន់លើពូជមាន់ក្នុងស្រុក គឺពូជស្គួយនេះ។កសិករ យ៉ែម សូនី និង កង ហេត ដែលទទួលបានការអនុវត្តគម្រោងដូចគ្នានេះដែរលើកឡើងថា ពួកគាត់ពិតសប្បាយរីករាយណាស់ ក្រោយពីអូស្ត្រាលីបង្កើតគម្រោងនេះឡើងសម្រាប់ជួយដល់សហគមន៍អ្នកចិញ្ចឹមមាន់ ដោយបានផ្តល់នូវចំណេះដឹង និងជំនាញដែលចាំបាច់ ដើម្បីអនុវត្តវិធីសាស្ត្រជ្រើសរើសពូជ ការថែទាំមេបាពូជ ការផ្តល់ចំណីសមស្រប ការចាក់វ៉ាក់សាំង ជីវសុវត្ថិភាពដល់សហគមន៍ គឺពិតជារឿងដ៏ប្រសើរបំផុតសម្រាប់កសិករ។សូមជម្រាបជូនថា គម្រោងរបស់រដ្ឋាភិបាលអូស្រ្តាលីនេះ មានរយៈពេល៤ឆ្នាំ ឆ្នាំ២០២០-២០២៤ ដឹកនាំដោយក្រុមអ្នកបច្ចេកទេសកម្ពុជា និងអន្តរជាតិ ១ក្រុម ក្នុងគោលបំណងបង្កើតពូជមាន់ស្គួយ ដែលមានផលិតភាពខ្ពស់ ហើយកូនមាន់ស្គួយអាចលក់បានក្នុងតម្លៃខ្ពស់។ គិតក្នុងរយៈពេល១ឆ្នាំ គម្រោងនេះបានអភិវឌ្ឍពូជមាន់ស្គួយ ជំនាន់ដំបូងដោយជោគជ័យ។ ពូជនេះត្រូវបានកែលម្អ ដើម្បីបង្កើនផលិតភាព ភាពធន់ ដើម្បីបង្កើនផលិតកម្មមាន់សម្រាប់កសិករ។ តម្លៃមាន់ស្គួយបច្ចុប្បន្នត្រូវបានលក់ក្នុងតម្លៃ ២ម៉ឺនរៀល ក្នុង ១គីឡូក្រាម ខណៈពងរបស់មាន់មានតម្លៃពី១ពាន់ ទៅ៤ពាន់រៀល ក្នុង១គ្រាប់ ហើយមេបាពូជរបស់ពូជស្គួយ ត្រូវបានលក់ក្នុងតម្លៃប្រហែល ៦ម៉ឺនរៀល ឬ ១៥ដុល្លារក្នុ ង១ក្បាល៕ អត្ថបទ៖ ឈិត បូរ៉ាវី

បណ្ដាញសង្គម

ព័ត៌មានថ្មីៗ

ក្រសួងការងារ និងវិទ្យាស្ថាន BKI អូស្ត្រាលី ចុះអនុស្សរណៈយោគយល់គ្នាលើការបណ្តុះបណ្តាលបច្ចេកទេសយានយន្ត

ពលរដ្ឋហ្កាហ្សាជម្លៀសខ្លួនមានអារម្មណ៍ថាខ្លួនត្រូវបានគេបោះបង់ចោល ខណៈមានបទឈប់បាញ់រវាងអ៊ីស្រាអែល និងក្រុមហេសបូឡា

តុលាការ៖ មេដឹកនាំប្រឆាំងអាល់បានី លោក Berisha ត្រូវបានដោះលែងពីការឃុំខ្លួនក្នុងផ្ទះ

លោក Erdogan៖ ទួរគីត្រៀមខ្លួនជាស្រេច ដើម្បីជួយឲ្យមានបទឈប់បាញ់ នៅហ្កាហ្សា

អ្នកនាំពាក្យ៖ បារាំងនឹងរួមចំណែកអនុញ្ញាតឲ្យបទឈប់បាញ់លីបង់មានជារៀងរហូត

ជនភៀសខ្លួនរ៉ូហ៊ីងយ៉ានៅបង់ក្លាដែស អំពាវនាវឲ្យឆាប់ចាប់ខ្លួនមេដឹកនាំរបបសឹកមីយ៉ាន់ម៉ា

នាយករដ្ឋមន្ត្រីស្លូវ៉ាគី នឹងចូលរួមពិធីរំលឹកទិវាជ័យម្នះ នៅទីក្រុងមូស្គូ ក្នុងខែឧសភា

ការខូចខាតធ្ងន់ធ្ងរនៅច្រកព្រំដែនលីបង់-ស៊ីរី ក្រោយការវាយប្រហាររបស់អ៊ីស្រាអែល

នាយករដ្ឋមន្ត្រីប៉ូឡូញ នឹងជំរុញឲ្យមាន «ការល្បាតជើងទឹក» ក្នុងសមុទ្របាល់ទិក អំឡុងទស្សនកិច្ច នៅស៊ុយអែត

មនុស្សម្នាក់ស្លាប់ និង ៨នាក់បាត់ខ្លួន ពេលព្យុះស៊ីក្លូនវាយប្រហារតំបន់ឆ្នេរប្រទេសស្រីលង្កា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877