នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុនអាកាសចរណ៍ អ៊ែរអេស៊ា​​ ខេមបូឌា អបអរសាទរគម្រប់ខួប ៣ឆ្នាំ “Cheers to 3 Years” ជាមួយនឹងរង្វាន់មហាសាលសរុបជាង ១៦០,០០០ ដុល្លារ និង ការផ្តល់ជូន សំបុត្រយន្តហោះឥតគិតថ្លៃ ចំនួន ៣,៣៣៣ សំបុត្រ
ក្រុមហ៊ុន Unilever កម្ពុជា ទទួលស្វាគមន៍ ប្រេសិតពាណិជ្ជកម្មចក្រភពអង់គ្លេស​ធ្វើទស្សនកិច្ចនៅកម្ពុជា
រយៈពេល៥ឆ្នាំមកនេះ ចិនបានផ្តល់ហិរញ្ញប្បទាន រួមចំណែកដល់ការអភិវឌ្ឍលើ​វិស័យអាទិភាព​ជាច្រើន
ការនិយមពិសារ​កាហ្វេរបស់ពលរដ្ឋកម្ពុជា ជំរុញកំណើនហាងកាហ្វេ និងផលិតកម្មក្នុងស្រុក ខណៈ​តម្រូវ​ការ​គ្រាប់កាហ្វេប្រមាណ ២ម៉ឺនតោនក្នុង១ឆ្នាំ

សេដ្ឋកិច្ច និង កសិកម្ម

ធនាគារជាតិ​​នៃកម្ពុជា និងធនាគាររដ្ឋវៀតណាម បន្តកិច្ចសហប្រតិបត្តិការលើវិស័យធនាគារ និងហិរញ្ញវត្ថុ

2021/11/25 01:06:55 pm        465
Facebook Telegram Linkin
ភ្នំពេញ ៖ ធនាគារជាតិនៃកម្ពុជា បានបើកកិច្ចប្រជុំទ្វេភាគី តាមរយប្រព័ន្ធអនឡាញ ជាមួយធនាគាររដ្ឋវៀតណាម ដើម្បីពង្រឹង និងពង្រីកកិច្ចសហប្រតិបត្តិការ និងទំនាក់ទំនងមិត្តភាព រវាងធនាគារកណ្តាលទាំងពីរ។កិច្ចប្រជុំទ្វេភាគីរវាងធនាគារកណ្តាលទាំងពីរ បានប្រារព្ធឡើងនៅរសៀលថ្ងៃទី២៤ ខែវិច្ឆិកា ឆ្នាំ២០២១ ក្នុងនោះធនាគារជាតិ នៃកម្ពុជា ដឹកនាំដោយឯកឧត្តម ជា ចាន់តូ ទេសាភិបាលធនាគារ ជាតិនៃកម្ពុជា ភាគីធនាគាររដ្ឋវៀតណាម ដឹកនាំដោយលោកជំទាវ Nguyen Thi Hong ទេសា​ភិបាល ធនាគាររដ្ឋវៀតណាម។តាមការបញ្ជាក់ពីមន្ត្រីជាន់ខ្ពស់ធនាគារជាតិនៃកម្ពុជា បានឲ្យដឹង​ថា ៖ កិច្ចប្រជុំទ្វេភាគីនេះ គឺ​តែងតែរៀបចំ​ធ្វើជារៀងរាល់ឆ្នាំ ដើម្បីពង្រឹង និងពង្រីកកិច្ចសហប្រតិបត្តិការ ​និងទំនាក់ទំនងមិត្តភាព រវាងធនាគារកណ្តាលទាំងពីរ។ដោយឡែកសម្រាប់កិច្ចប្រជុំលើកនេះ បញ្ហាសំខាន់ដែលបានយកមកពិភាក្សា នឹងផ្លាស់ប្តូរ​យោបល់​គ្នានោះ​ គឺវឌ្ឍនភាពនៃស្ថានភាពម៉ាក្រូសេដ្ឋកិច្ចកម្ពុជា, ​ការអភិវឌ្ឍវិស័យធនាគារ, វិធានការឆ្លើយតប​របស់​ធនាគារកណ្តាលចំពោះឥទ្ធិពលអវិជ្ជមាន​នៃជំងឺកូវីដ-១៩, ការជំរុញការទូទាត់ដោយមិន​ប្រើប្រាស់​ក្រដាសប្រាក់​ និងការពិនិត្យមើលពីវឌ្ឍនភាព ជាមួយនឹងការកំណត់ទិសដៅ​នៃ​កិច្ច​សហប្រតិបត្តិការទ្វេភាគី។មន្រ្តីរូបនេះ បានឲ្យដឹងទៀតថា ក្រៅពីបញ្ហាសំខាន់ខាងលើកិច្ចប្រជុំបានវាយតម្លៃខ្ពស់​ចំពោះ​វឌ្ឍនភាព​នៃកិច្ចសហប្រតិបត្តិការទ្វេភាគី ​រវាង​ធនាគារកណ្តាលទាំងពីរ នាពេលកន្លងមកនេះថា​បានរួមចំណែកយ៉ាងសំខាន់ដល់ការអភិវឌ្ឍវិស័យធនាគារ។ ជាមួយនេះដែរ​ តាមរយះកិច្ចសហប្រតិបត្តិការដ៏ល្អរវាង​វិស័យ​ធនាគារនេះ​ក៏បានរួមចំណែកគាំទ្រ​កំណើន​ពាណិជ្ជកម្ម ការវិនិយោគ ​និងទេសចរណ៍ ​ក្នុងប្រទេសទាំងពីរថែមទៀតផង។ក្នុងឱកាសនោះលោកជំទាវទេសាភិបាល ធនាគាររដ្ឋវៀតណាម បានសរសើរពីជោគជ័យរបស់​កម្ពុជា​ក្នុងការ​សម្រេចបានការចាក់វ៉ាក់សាំងដ៏ឆាប់រហ័ស នេះវាមិនត្រឹមតែ​បាន​ជួយការពារសុខភាព​ប្រជាជនប៉ុណ្ណោះទេ ប៉ុន្តែនូវបានជួយជំរុញសកម្មភាពសេដ្ឋកិច្ចទៀតផង។ ជាមួយគ្នានេះ លោកជំទាវ ក៏បានវាយតម្លៃខ្ពស់ចំពោះវិធានការដែលធនាគារជាតិនៃកម្ពុជា​បានដាក់​ចេញ​ក្នុងអំឡុងពេលកូវីដ-១៩កន្លងមកនេះថាមានប្រសិទ្ធភាពខ្ពស់និងសម្រេចបានសមិទ្ធផលល្អ ក្នុង​ការរក្សាបានវឌ្ឍនភាពនិងស្ថិរភាពប្រព័ន្ធធនាគារ ព្រមទាំងរក្សាបានស្ថិរភាពអត្រាប្តូរប្រាក់ និងកម្រិតទាបនៃអតិផរណា។ទន្ទឹមនឹងនេះដែរ ធនាគាររដ្ឋវៀតណាម ក៏បានអបអរសាទរ ចំពោះការដាក់ឱ្យប្រើប្រាស់​ប្រព័ន្ធ​ទូទាត់​ទំនើប ជាពិសេសប្រព័ន្ធបាគង ​ដែលជាប្រព័ន្ធទូទាត់កន្លោងជួយ​ដោះស្រាយ​បញ្ហា​ទូទាត់ឆ្លងគ្រឹះស្ថាន ​និង​ការតភ្ជាប់ជាមួយប្រព័ន្ធទូទាត់ទាំង​ក្នុងស្រុក និងតំបន់។ថ្លែងក្នុងឱកាសនោះឯកឧត្តម ជា ចាន់តូ បានថ្លែងអំណរគុណចំពោះធនាគាររដ្ឋវៀតណាម ជា​ពិសេស លោកជំទាវ ទេសាភិបាល Nguyen Thi Hong ដែលកន្លងមកបានផ្តល់​កិច្ច​សហប្រតិបត្តិការ​ល្អ​ប្រសើរ​ក្រោមអនុស្សរណៈយោគយល់រវាង​ធនាគារកណ្តាល​ទាំងពីរលើកិច្ច​សហប្រតិបត្តិការ​ទូទៅ, ការត្រួតពិនិត្យធនាគារ ​និងលើការសម្អាតប្រាក់ ​និងហិរញ្ញប្បទានភេរវកម្ម។ជាមួយនេះដែរ ឯកឧត្តម ទេសាភិបាល ក៏បានថ្លែងអំណរគុណផងដែរដល់ធនាគាររដ្ឋ និង​រដ្ឋាភិបាវៀតណាម​ដែលបានគាំទ្រដល់ការអភិវឌ្ឍ​ធនធាន​មនុស្ស ដោយបានបន្តផ្តល់​អាហា​រូបករណ៍ ​ដល់​មន្ត្រីធនាគារជាតិ​នៃកម្ពុជា​សម្រាប់ការសិក្សាថ្នាក់បរិញ្ញាប័ត្រ ​អនុបណ្ឌិត និង​បណ្ឌិតនៅប្រទេសវៀតណាម៕អត្ថបទ៖ ជា វណ្ណៈ

កម្ពុជាបិទបញ្ចប់វេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១ ដោយជោគជ័យ

2021/11/25 12:08:59 pm        353
Facebook Telegram Linkin
ភ្នំពេញ ៖ ក្រសួងពាណិជ្ជកម្មកម្ពុជា បានទទួលលទ្ធផលយ៉ាងល្អប្រសើរ ក្នុងការរៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១ (AEEBF1) ដែលរៀបចំឡើងតាមបែបរូបវ័ន្ត និងប្រព័ន្ធវីដេអូ ដែលជាព្រឹត្តិការណ៍អមសំខាន់មួយនៃកិច្ចប្រជុំកំពូល ASEM13 ដែលកម្ពុជាធ្វើជាម្ចាស់ផ្ទះនៅឆ្នាំ២០២១។ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម នៅក្នុងសន្និសីទកាសែត ស្តីពីលទ្ធផល​នៃ​វេទិកា​សេដ្ឋកិច្ច ​និងធុរកិច្ចអាស៊ី-អឺរ៉ុប លើកទី១ នៅល្ងាចថ្ងៃទី២៤ ​ខែវិច្ឆិកានេះ ​បានមានប្រសាសន៍ថា វេទិកានេះ បានធ្វើឡើងក្រោមមូលបទ “ការផ្លាស់ប្តូរទៅរកគន្លងប្រក្រតីភាពថ្មី៖ ការធ្វើអានុភាវូបនីយកម្មខ្សែច្រវាក់តម្លៃសកល ពហុភាគីនិយម ​និងបដិវត្តឧស្សាហកម្ម ៤.០” ហើយបានប្រព្រឹត្ត​ទៅ​ក្នុងបរិបទការរីករាលដាលនៃជំងឺកូវីដ-១៩ ក្នុងគោលបំណងពង្រឹង​ពហុភាគី​និយម ដើម្បីកំណើនរួមគ្នា ​ដោយប្រមូលផ្តុំតួអង្គពាក់ព័ន្ធទាំងអស់​ ធ្វើការពិភាក្សាស្វែងរកវិធីសាស្ត្រ និងមធ្យោបាយដោះស្រាយ​បញ្ហាប្រឈមនានាលើវិស័យសេដ្ឋកិច្ច និងសង្គម​នៅក្នុងតំបន់​អាស៊ី​ និងអឺរ៉ុប ក៏ដូចជាពិភពលោកទាំងមូល រួមគ្នាដើម្បីសម្រេចឱ្យបាននូវ​កំណើន​ប្រកប​ដោយ​បរិយាប័ន្ន។វេទិកានេះ មានការអញ្ជើញចូលរួមពីមន្ត្រីជាន់ខ្ពស់នៃស្ថាប័នរដ្ឋ បណ្តាអង្គទូតនៃប្រទេស​សមាជិក​អេសិម(ASEM) អ្នកធ្វើគោលនយោបាយ ក្រុមធុរជននិងវិនិយោគិន បញ្ញវ័ន្ត អ្នកជំនាញ​ការ​មក​ពីវិស័យសំខាន់ៗ​ និងអ្នកពាក់ព័ន្ធមកពីបណ្តាប្រទេសនៅអាស៊ី ​និងអឺរ៉ុប​ សរុបចំនួនប្រមាណ ៦០០នាក់។ឯកឧត្តម បានបញ្ជាក់ថា វេទិកាសេដ្ឋកិច្ចនិងធុរកិច្ចអាស៊ី-អឺរ៉ុបលើកទី១ បានរៀបចំបទបង្ហាញ និងកិច្ចពិភាក្សាមួយចំនួន ដែលក្នុងនោះ វាគ្មិន និងអ្នកចូលរួមទាំងអស់បានចែករំលែកទស្សនៈ បទពិសោធន៍ ចំណេះដឹង និងការអនុវត្តល្អៗ ពីគ្រប់ភាគីពាក់ព័ន្ធទាំងអស់ ទាំងវិស័យសាធារណៈ និងវិស័យឯកជន និង​បានលើកជាអនុសាសន៍ ជូនដល់ថ្នាក់ដឹកនាំស្ថាប័នរដ្ឋ ​និងវិស័យឯកជន នៃប្រទេសសមាជិកប្រទេសសមាជិកអេសិមផងដែរ។វេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១ គឺជាព្រឹត្តិការណ៍អមក្នុងចំណោមព្រឹត្តិការណ៍អម ចំនួន៧ នៃកិច្ចប្រជុំកំពូលអាស៊ី-អឺរ៉ុប លើកទី១៣ (ASEM13) ដែល​នឹងប្រព្រឹត្តទៅនៅថ្ងៃទី២៥-២៦ ខែវិច្ឆិកា ឆ្នាំ២០២១។ តាមរយៈការរៀបចំវេទិកាលំដាប់អន្តរជាតិនេះ ​នឹងផ្តល់នូវលើកកម្ពស់កិត្យានុភាព និងលើកមុខមាត់​ប្រទេសកម្ពុជា​លើឆាកអន្តរជាតិ និងបង្ហាញជូនបណ្តាអ្នកចូលរួមមកពីអាស៊ី ​និងអឺរ៉ុប បានយល់ និង​ស្គាល់កម្ពុជាកាន់តែច្បាស់​ ជាពិសេសបានស្វែងយល់ពីសក្តានុពលវិស័យពាណិជ្ជកម្ម និង​កាលានុវត្តភាពវិនិយោគនៅកម្ពុជាជាដើម៕អត្ថបទ ៖ ឈិត បូរ៉ាវី

វិស័យអចលនវត្ថុ នឹងស្ទុះងើបឡើងវិញនៅឆ្នាំក្រោយដោយសារលំហូរវិនិយោគទុនបរទេស

2021/11/25 11:45:08 am        500
Facebook Telegram Linkin
ភ្នំពេញ ៖ អនុវិស័យអចលនវត្ថុនៅកម្ពុជា ត្រូវបានព្យាករថា នឹងស្ទុះងើបឡើងវិញ គាំទ្រដោយសារការកើនឡើងសន្សឹមៗ នៃលំហូរទុនវិនិយោគពីបរទេស ខណៈការវិនិយោគ និងតម្រូវការក្នុងស្រុក នៅលើវិស័យអចលនវត្ថុ មានតម្លែទាប និងមធ្យម។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង​ហិរញ្ញវត្ថុ លើកឡើងនៅក្នុងកម្មវិធីសមាជលើកទី ២៣ របស់សមាគមអ្នកវាយតម្លៃ​អចលនវត្ថុ​អាស៊ាន ក្រោមប្រធានបទ "ការវាយតម្លៃអចលនវត្ថុ ក្នុងអំឡុងពេលនៃការរីករាលដាលជំងឺកូវីដ-១៩" នៅថ្ងៃទី ២៥ខែវិច្ឆកា ឆ្នាំ ២០២១ នេះថា ស្របតាមនិន្នាការសកល​សេដ្ឋកិច្ចកម្ពុជាក្នុងឆ្នាំ ២០២១ ត្រូវបានព្យាករ នឹងងើបឡើងវិញក្នុងកំណើនទាបប្រមាណ ២,៤% ដោយសារការអូស​បន្លាយ​នៃជម្ងឺកូវីដ ១៩ នឹងការរំពឹងទុកនៃការងើបឡើងវិញក្នុងកម្រិតយឺត នៃតម្រូវការសកល ជាមួយនៃការបន្ទូបន្ថយនូវវិធានការរដ្ឋបាលជាដំណាក់ៗ និងការសម្របខ្លួនទៅនឹងប្រក្រតីភាពថ្មី នៃកិច្ចដំណើរការសង្កមសេដ្ឋកិច្ច ។ជាមួយគ្នានេះ អនុវិស័យអចលនវត្ថុនៅកម្ពុជា ត្រូវបានព្យាករថា នឹងជួយពូនជ្រុំដល់កំណើន​សេដ្ឋកិច្ច ​ដែលនឹងអាចងើបឡើងក្នុងកំណើនទាប ​២,៤% ក្នុងឆ្នាំ ២០២១​ និង ៤,៨% ក្នុងឆ្នាំ ២០២២ គឺដោយសារការកើន ឡើងសន្សឹមៗ ​នៃលំហូរទុនវិនិយោគពីបរទេស ​ខណៈការវិនិយោគ និង​តម្រូវការក្នុងស្រុក ​នៅលើវិស័យអចលនវត្ថុ ​មានតម្លែទាប និងមធ្យម​នឹង​បន្ត​រក្សា​កំណើន​ល្អប្រសើរ។សូមបញ្ជាក់ថា៖ តាមសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ ២០២២ បានវាយតម្លៃសេដ្ឋកិច្ចកម្ពុជានៅឆ្នាំ ២០២២ដោយបានព្យាករថា នឹងសម្រេចបានកំណើនក្នុងរង្វង់ ៤,៨% ដែលធ្វើឱ្យ ផសស ថ្លៃបច្ចុប្បន្ន ស្ថិតក្នុងរង្វង់ ១២៤ ១៦២ ប៊ីលានរៀល, សមមូលនឹងប្រមាណ ៣០ ៥៤៤ លានដុល្លារអាម៉េរិក៕អត្ថបទ៖ សុន រ៉ាឌី

កសិករខេត្តឧត្ដរមានជ័យ ចាប់ផ្តើមសំរុកដាំដុះដំណាំដំឡូងមី ខណៈតម្លៃល្អប្រសើរ​

2021/11/24 03:04:18 pm        1669
Facebook Telegram Linkin
ឧត្តរមានជ័យ៖ កសិកររស់នៅស្រុកត្រពាំងប្រាសាទ ខេត្តឧត្តរមានជ័យ ចាប់ផ្តើមធ្វើការដាំដុះដំណាំដំឡូងមី ខណៈរដូវនេះ ដំណាំដំឡូងកំពុងមានតម្លៃហក់ឡើងល្អប្រសើរនៅលើទីផ្សារ។កសិករម្នាក់មានវ័យជាង៥០ឆ្នាំ បានឲ្យដឹងថា គ្រួសារ​របស់គាត់​កន្លងមក​ប្រកបមុខ​របរ​ធ្វើ​កសិកម្ម​អស់​រយះពេលជិត២០ឆ្នាំមកហើយ អាស្រ័យដោយការធ្វើស្រែ និងដាំដំឡូងមី ហើយការ​ដាំដំឡូងមី​នេះ ភាគច្រើនតែងតែហុចផ្តល់​ផលបានល្អប្រសើរ​គួរជាទីគាប់ចិត្ត​ ជាងការធ្វើស្រែ​ដោយ​តម្លៃ​លក់​ចេញ​ទៅ​ឲ្យក្រុមឈ្មួញ បច្ចុប្បន្នក្នុងអំឡុងពេលវិបត្តិកូវីដនេះ គឺពេលប្រមូលផលម្តងៗ​នោះ​មាន​តម្លៃហក់ឡើងខ្ពស់ ក្នុងរយៈពេលប៉ុន្មានឆ្នាំនេះ។លោក បានបន្តថា ពេលខ្លះ​ក៏​មាន​ក្រុម​ឈ្មួញ​មក​ចាំទទួលទិញដល់កន្លែង​ក៏មាន ដើម្បី​ដឹកចេញ​យក​ទៅ​​លក់បន្តនៅឯប្រទេសជិតខាងដូចជា ប្រទេសថៃ នឹងវៀតណាមជាដើម។លោក បញ្ជាក់ថា ទោះបីស្ថិតក្នុងវិបត្ដិកូវីដ-១៩ មិនទាន់​មានការថមថយ​បញ្ចប់​ទាំងស្រុង​យ៉ាងណាក្តី​ ក៏រូបលោកមិនសូវ​មានការបារម្មណ៍​អ្វីនោះឡើយ​ ចំពោះការធ្វើ​កសិកម្ម​របស់​លោក​ ព្រោះថា តម្លៃដំឡូង​លើទីផ្សារបច្ចុប្បន្នហាក់បីដូចជា​មិន​មាន​ការប្រែប្រួល ឬក៏ធ្លាក់ចុះនោះឡើយ ​ផ្ទុយ​ទៅវិញ​ក្នុង​ស្ថានភាពបែបនេះ បែរជាតម្លៃហក់ឡើងខ្ពស់ទៅវិញ ​សំរាប់ការលក់ចេញឲ្យទៅក្រុមឈ្មួញ​នោះ៕អត្ថបទ ៖ ឃិនសារិទ្ធ

រាជរដ្ឋាភិបាល បន្តលើកលែងពន្ធ ចំពោះវិស័យប៉ះពាល់ដោយកូវីដ១៩ ដល់ពាក់កណ្តាលឆ្នាំ២០២២

2021/11/24 11:39:42 am        416
Facebook Telegram Linkin
ភ្នំពេញ ៖ វិស័យឯកជន ថ្លែងនូវការសាទរចំពោះរាជរដ្ឋាភិបាល ដែលបានបន្តលើកទឹកចិត្ត អនុគ្រោះការលើកលែងពន្ធ ចំពោះ វិស័យដែលកំពុងរងនូវការប៉ះពាល់ដោយសារជំងឺកូវីដ ១៩ ដើម្បី​ជួយទ្រទ្រង់ដល់វិស័យប៉ះពាល់ទាំងនោះ ​អាចស្តារ និងអភិវឌ្ឍន៍អាជីវកម្ម របស់ខ្លួនឡើងវិញ ។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានពន្ធដារ បាន​បញ្ជាក់ថា ដោយមើលឃើញពីការលំបាក​របស់ម្ចាស់​អាជីវកម្ម ក្នុងវិស័យដែលរងផល​ប៉ះ​ពាល់​ខ្លាំង ដោយសារជំងឺកូវីដ១៩ រួមមាន ៖ វិស័យទេសចរណ៍​ វិស័យអាកាសចរណ៍​ រួមទាំងវិស័យ ដែលរ​ងផល​ប៉ះពាល់ផ្សេងៗទៀតនោះ​ រាជរដ្ឋាភិបាលបានបន្តផ្តល់ការអនុគ្រោះពន្ធ ​រយៈពេល ៦ខែ ថែមទៀត ក្នុងឆ្នាំ ២០២២ ខាងមុខ។លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា លើកឡើងនៅ​ក្នុង​កិច្ច​សម្ភាសន៍​ជាមួយ ភ្នាក់ងារអ្នកយកព័ត៌មាន ស្តីអំពីការអនុវត្តន៍វិធានការអន្តរាគមន៍របស់រាជ​រដ្ឋាភិបាល ​ដើម្បីជួយ​គាំទ្រ​ដល់វិស័យ​ ដែលផល​ប៉ះពាល់ខ្លាំងដោយវិបត្តិកូវីដ១៩ ​នៅថ្ងៃទី ២៤ ខែ វិច្ឆិកា ឆ្នាំ២០២១ នេះថា ​នៅក្នុងកំឡុងពេលជិត ២ ឆ្នាំមកនេះ វិស័យ ដែលបម្រើសេវាកម្ម​ទេសចរណ៍​ ត្រូវ​បាន​បិទទ្វារទាំងស្រុង ក្នុងនោះបន្ទាប់ពីរាជរដ្ឋាភិបាលប្រកាស​បើក​ប្រទេស​ឡើងវិញ ​យើងឃើញថា​ អាជីវកម្មមួយចំនួនបានកំពុងរៀបចំគម្រោងរបស់ខ្លួនឡើងវិញ និងមួយ​ចំនួន​អាច​រៀបចំគម្រោងផែនការ ​ជាបន្តបន្ទាប់ផងដែរ ។ចំពោះវិធានការអន្តរាគមន៍ ​លើកលែងពន្ធលើវិស័យទេសចរណ៍ វិស័យអាកាសចរណ៍ រួមទាំង​វិស័យ​ដែល​រងផល ប៉ះពាល់ផ្សេងៗទៀត មានរយៈពេល ៦ខែ ក្នុងឆ្នាំ ២០២២ ខាងមុខនេះ, លោកស្រី ឆាយ ​ស៊ីវលីន បានសម្តែងនូវអំណរគុណ​ និងថ្លែងនូវការគាំទ្រពេញទំហឹងចំពោះរាជរដ្ឋាភិបាល ដែលបានបន្តអនុគ្រោះដល់វិស័យដែលកំពុងរងគ្រោះ ទោះបី រាជរដ្ឋាភិបាលបានបើកប្រទេស​ឡើងវិញ​ យ៉ាងក៏ដោយគឺវិស័យនេះ ត្រូវការពេលវេលាក្នុងការរៀបចំ ​និងស្តារជីវភាពរបស់ ពួគគាត់ឡើងវិញផងដែរ។ចំណែកលោក ឌិន សុមេធារិទ្ធ ប្រធានសមាគមសណ្ឋាគារកម្ពុជា ​ក៏បានបានថ្លែងនូវការសាទេ ចំពោះការអនុគ្រោះពន្ធរបស់រាជរដ្ឋាភិបាល ​ដែលជាផ្នែកមួយយ៉ាងសំខាន់ ​ដើម្បីជួយស្រោចស្រង់ ដល់​វិស័យដែលរងនូវការប៉ះពាល់ ​អាចស្តារអាជីវកម្មឡើងវិញ ​ដែលកន្លងមកនេះវិស័យសណ្ឋាគារ ត្រូវបានដេក​ដួលទាំង​ស្រុងផងដែរ​ ជាក់ស្តែងមកដល់ពេលនេះ ចំពោះសណ្ឋាគារធំៗ គឺបានរៀប​ចំបើក​ដំណើរឡើងវិញមានចំនួនតិចតូចតែប៉ុណ្ណោះ ។ឯកឧត្តម គង់ វិបុល ស្របពេលនេះដែរ រាជរដ្ឋាភិបាលកម្ពុជា មិនមានគោលនយោបាយបង្កើតពន្ធថ្មី​នោះទេ ផ្ទុយទៅវិញមានតែសម្រួលលើកលែង ​និងអនុគ្រោះពន្ធដល់វិស័យអាទិភាពផ្សេងៗ ពិសេស​វិស័យកសិកម្មជាដើម៕អត្ថបទ៖ សុន រ៉ាឌី

កម្ពុជាកំពុងប្រែក្លាយជាទីតាំងផលិតកម្មធុរកិច្ច និងវិនិយោគមានសក្តានុពលក្នុងតំបន់

2021/11/24 11:14:46 am        368
Facebook Telegram Linkin
ភ្នំពេញ ៖ រាជរដ្ឋាភិបាលកម្ពុជា បាននិងកំពុងខិតខំរៀបចំ និងដាក់ចេញឱ្យអនុវត្តវិធានការគោលនយោបាយច្បាស់លាស់ ដើម្បីទាក់ទាញការវិនិយោគបរទេសបន្ថែមទៀត។ ការវិវត្តន៍ជាវិជ្ជាមានទាំងនេះ បាននិងកំពុងប្រែក្លាយកម្ពុជា ឱ្យទៅជាទីតាំងផលិតកម្មធុរកិច្ច និងវិនិយោគមួយកាន់តែសំខាន់ និងមានសក្តានុពលក្នុងតំបន់។នេះជាការលើកឡើងរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ក្នុងសន្ទរកថាបើក​វេទិកា​សេដ្ឋកិច្ច និងធុរកិច្ចអាស៊ី-អ៊ឺរ៉ុប លើកទី១ ក្រោមប្រធានបទ “ការផ្លាស់ប្តូរទៅគន្លង​ប្រក្រតីភាព​ថ្មី៖ ការលើកកម្ពស់ការចូលរួមក្នុងខ្សែច្រវ៉ាក់តម្លៃសកល ពហុភាគីនិយម និងបដិវត្តន៍ឧស្សាហកម្មទី៤” តាមប្រព័ន្ធអនឡាញ នៅថ្ងៃទី២៤ ខែវិច្ឆិកានេះ។​សម្តេចតេជោ លើកឡើងថា​ បាននិងកំពុងខិតខំរៀបចំ និងដាក់ចេញឱ្យអនុវត្តវិធានការគោល​នយោបាយ​ច្បាស់លាស់ ​ដើម្បីទាក់ទាញការវិនិយោគបរទេសបន្ថែមទៀត តាមរយៈការកសាង​ហេដ្ឋា​រចនា​សម្ព័ន្ធ ​និងការលម្អប្រព័ន្ធដឹកជញ្ជូន ​ទាំងផ្នែកទន់ និងរឹងការលើកកម្ពស់កិច្ច​សម្រួល​ពាណិជ្ជកម្ម ​ការអភិវឌ្ឍធនធានមនុស្ស ​ការរៀបចំប្រព័ន្ធបច្ចេកវិទ្យាព័ត៌មាន ​និងឌីជីថល និង​ការអភិវឌ្ឍវិស័យហិរញ្ញវត្ថុ។បន្ថែមពីលើនេះ ​សម្តេច បានលើកឡើងជូនអង្គប្រជុំ អំពីស្ថានភាពនៃជំងឺកូវីដ១៩ នៅកម្ពុជា។ ជាមួយនឹងការគ្រប់គ្រងបានល្អនូស្ថានភាពជំងឺកូវីដ១៩​ គិតត្រឹមថ្ងៃទី១៨​ ខែវិច្ឆិកា​ ឆ្នាំ២០២១ រាជ​រដ្ឋាភិបាលសម្រេចការចាក់វ៉ាក់សាំង​បានក្នុងអត្រាជាង ៨៨ភាគរយនៃចំនួនប្រជាជន​សរុប​ក្នុង​ប្រទេស ១៦លាននាក់។សូមបញ្ជាក់ថា កម្ពុជា ទទួលរៀបចំវេទិកាសេដ្ឋកិច្ច ​និងធុរកិច្ចអាស៊ី-អ៊ឺរ៉ុប ជាលើកដំបូង​ដោយ​ប្រព្រឹត្តទៅ​អមជាមួយ​នឹងកិច្ចប្រជុំកំពូលអាស៊ី​អឺរ៉ុប លើកទី១៣ ​ដែលកម្ពុជា​ធ្វើជាម្ចាស់ផ្ទះ ​ពីថ្ងៃទី២៥ ដល់ ២៦ ខែវិច្ឆិកា៕អត្ថបទ៖ វណ្ណៈ

ប្រមុខ​រាជ​រដ្ឋាភិបាល​កម្ពុជា ​ជំរុញ​​តំបន់​អាស៊ី និង​អឺរ៉ុប​ប្រកាន់​ខ្ជាប់​យន្តការ​ពហុ​ភាគី​និយម​ដើម្បី​ស្ដារ​សេដ្ឋកិច្ច-ពាណិជ្ជកម្ម​ឡើង​វិញ

2021/11/24 10:31:56 am        349
Facebook Telegram Linkin
ភ្នំពេញ៖ ប្រមុខ​រាជ​រដ្ឋាភិបាល​កម្ពុជា សម្ដេច​តេជោ ហ៊ុន សែន បាន​ជំរុញ​តំបន់​អឺរ៉ុប និង​អាស៊ីឱ្យ​ប្រកាន់​ខ្ជាប់​នូវ​យន្តការ​ពហុ​ភាគី​និយម ដោយ​ថា ដើម្បី​ជំរុញ​របៀប​វារៈ​នៃ​ការអភិវឌ្ឍ​ប្រកប​ដោយ​ចីរភាព និង​បរិយាបន្ន។សម្ដេច​តេជោ ហ៊ុន សែន បាន​ថ្លែង​បែប​នេះ ​នៅ​ក្នុង​ពិធី​បើក​វេទិកា​សេដ្ឋកិច្ច និង​ធុរកិច្ច​អាស៊ី-អឺរ៉ុប​លើក​ទី​១ ដែល​ចាប់​ផ្ដើម​នៅ​ព្រឹក​ថ្ងៃ​នេះ។សម្ដេច​តេជោ ហ៊ុន សែន ថ្លែង​ថា​៖ «ជាមួយ​នឹង​និន្នាការ​នៃ​ការ​ផ្លាស់​ប្ដូរ​នៅ​ក្នុង​ពាណិជ្ជកម្ម និង​ខ្សែ​ច្រវាក់​ផ្គត់ផ្គង់​សកល ខ្ញុំ​យល់​ឃើញ​ថា តំបន់​យើង​ទាំង​ពីរ​ត្រូវ​តែ​បង្កើន​ការ​យក​ចិត្ត​ទុក​ដាក់​លើ​ការ​គាំ​ទ្រ​ប្រព័ន្ធ​ពាណិជ្ជកម្ម​ពហុភាគី ជាពិសេស​ការ​ជំរុញ​ការ​ធ្វើ​សេរីភាវូបនីយកម្ម និង​កិច្ច​សម្រួល​ពាណិជ្ជកម្ម​ឱ្យ​កាន់​តែ​ស៊ី​ជម្រៅ​បន្ថែម​ទៀត​តាម​រយៈ​ការលុប​បំបាត់​របាំង​សម្រាប់​ពាណិជ្ជកម្ម និង​ការ​វិនិយោគ​ដើម្បី​ទាញ​យក​សក្ដានុពល​ជា​អតិបរមា​ពី​កិច្ច​សហ​ប្រតិបត្តិការ​ពាណិជ្ជកម្ម​អាស៊ី-អឺរ៉ុប»។សម្ដេច​តេជោ ហ៊ុន សែន បាន​ឱ្យ​ដឹង​ផង​ដែរ​ថា ទំហំ​សេដ្ឋកិច្ច​អាស៊ី-អឺរ៉ុប មាន​ចំណែក​រហូត​ដល់ ៦៥​ភាគរយ​នៃ​សេដ្ឋកិច្ច​សកល ខណៈ​ដែល​ទំហំ​ពាណិជ្ជកម្ម​រវាង​ទ្វីប​ទាំង​ពីរ​នេះ មាន​ចំណែក​រហូត​ដល់​ ៥៥​ភាគរយ​នៃ​ទំហំ​ពាណិជ្ជកម្ម​សកល។សម្ដេច​តេជោ ហ៊ុន សែន ថ្លែង​ថា​៖ «យើង​មាន​ភាព​ចាំ​បាច់​ត្រូវ​ពង្រឹង​សាមគ្គីភាព និង​តម្កល់​ផល​ប្រយោជន៍​ប្រជា​ពលរដ្ឋ​ជា​ធំ ដោយ​ប្រកាន់​ខ្ពស់​នូវ​យន្តការ​ពហុ​ភាគី​និយម ក្នុង​ការ​ដោះ​ស្រាយ​បញ្ហា​ក្នុង​គ្រប់​វិស័យ និង​ពន្លឿន​ការ​ត​ភ្ជាប់​រវាង​សង្គម-សេដ្ឋកិច្ច ដើម្បី​ជំរុញ​របៀប​វារៈ​នៃ​ការ​អភិវឌ្ឍ​របស់​យើង​ប្រកប​ដោយ​ចីរភាព និង​បរិយាបន្ន»។ប្រមុខ​រាជ​រដ្ឋាភិបាល​កម្ពុជា លើក​ឡើង​ទៀត​ថា ការ​ជំរុញ​ប្រក្រតីភាព​នៃ​រំហូរ​ពាណិជ្ជកម្ម​ ធុរកិច្ច និង​វិនិយោគ គឺ​ជា​កិច្ចការ​សំខាន់ និង​បន្ទាន់ ដើម្បី​ស្ដារ និង​ជំរុញ​ការ​អភិវឌ្ឍ​វិស័យ​សង្គម និង​សេដ្ឋកិច្ច​របស់​តំបន់​ទាំង​ពីរ​ឡើងវិញ បន្ទាប់​ពី​វិបត្តិ​កូវីដ-១៩ កំពុង​ស្ថិត​លើ​ទិសដៅ​ទៅ​រក​ភាព​ធូរ​ស្រាល៕

កម្ពុជាដំឡើងការព្យាករណ៍កំណើនសេដ្ឋកិច្ចឆ្នាំ២០២១ ក្នុងរង្វង់៣ភាគរយ

2021/11/23 03:45:45 am        316
Facebook Telegram Linkin
កំពង់ចាម ៖ ប្រមុខរាជរដ្ឋាភិបាល បានដាក់ការព្យាករសេដ្ឋកិច្ចកម្ពុជា អាចនឹងមានកំណើនលើសការព្យាករណ៍ ២.៤ ភាគរយសម្រាប់ឆ្នាំ២០២១ គាំទ្រដោយកំណើនកសិកម្ម និងឧស្សាហកម្ម ខណៈវិស័យសេវាកម្ម ជាពិសេសវិស័យទេសចរណ៍ រំពឹងថានឹងងើបឡើងវិញ ក្រោយប្រទេសបើកទទួលភ្ញៀវទេសចរចាក់វ៉ាក់សាំង​។ថ្លែងក្នុងពិធីសម្ពោធស្ពានមិត្តភាពកម្ពុជា-ចិន (ស្ទឹងត្រង់-ក្រូចឆ្មារ) និងបើកការដ្ឋានសាងសង់ផ្លូវជាតិលេខ៧១C នៅថ្ងៃទី២៣ ខែវិច្ឆិកា សម្តេចតេជោ ហ៊ុន សែន មានប្រសាសន៍ថា កំណើនសេដ្ឋកិច្ចកម្ពុជា អាចនឹងសម្រេចក្នុងរង្វង់ ៣ភាគរយ លើស​ពី​ការ​ព្យាករណ៍​ ២,៤ ភាគរយ ក្នុងសេចក្តីព្រាងច្បាប់ហិរញ្ញវត្ថុ ឆ្នាំ២០២១។សម្តេចតេជោ បញ្ជាក់ថា​ បើកំណើនសេដ្ឋកិច្ចល្អក្នុងរយៈពេលពីរខែនៅសល់មុនដំណាច់ឆ្នាំ កំណើនសេដ្ឋកិច្ចកម្ពុជា នឹងសម្រេចបានក្នុងរង្វង់៣ភាគរយ។សម្តេចតេជោ លើកឡើងថា មានអង្គការមួយបានព្យាករណ៍កំណើនសេដ្ឋកិចុ្ចកម្ពុជា​ឆ្នាំ២០២១ ២,៨ភាគរយ​ ដែលនេះ បង្ហាញពីការងើបឡើងវិញនៃសេដ្ឋកិច្ចកម្ពុជា បន្ទាប់ពីវិបត្តិកូវីដ១៩។ជំរុញកំណើនសេដ្ឋកិច្ចនេះ សម្តេចតេជោ បញ្ជាក់ថា ដោយសារទីមួយគឺវិស័យកសិកម្ម នៅ​មានកំណើនសេដ្ឋកិច្ចទាំងអស់ ​ថែមទាំងលើសផែនការ ​ទោះបីស្ថិតក្នុងវិបត្តិកូវីដ១៩។ ​ទីពីរ គឺវិស័យ​ឧស្សាហកម្ម ​ដែលការ​នាំចេញមានកំណើនកើនឡើង។បន្ថែមពីលើសនេះ ​សម្តេចតេជោ លើកឡើងថា​ វិស័យសេវាកម្ម ដែលបានធ្លាក់ចុះខ្លាំង​ក្នុង​វិបតិ្តកូវីដ១៩​ រំពឹងថា នឹងងើបឡើងវិញ ​នៅគ្រាដែលរាជរដ្ឋាភិបាល បានប្រកាសបើកទទួល​ទេសចរ​បរទេស​ចាក់វ៉ាក់សាំងកូវីដគ្រប់។បន្ថែមពីលើនេះ សម្រាប់កំណើនសេដ្ឋកិច្ចឆ្នាំ២០២២ ​ប្រមុខរាជរដ្ឋាភិបាល​បានដំឡើង​ការព្យាករណ៍​ដល់ ជាង៥ភាគរយ កើនពី៤,២ភាគរយ ដែល​​ជា​កំណើនត្រូវ​បានព្យាករកាលពីពេលមុន៕អត្ថបទ៖ វណ្ណៈ 

ទិន្នផលស្រូវរបស់កសិករក្នុងស្រុកស្វាយជ្រំ បានបាត់បង់ដោយសារកត្តាធម្មជាតិ

2021/11/22 12:45:08 pm        478
Facebook Telegram Linkin
ស្វាយរៀង ៖ លោក ចាប ថុល ពលរដ្ឋរស់នៅភូមិតាស្អាង ឃុំកំពង់ចំឡង ស្រុកស្វាយជ្រំ ខេត្តស្វាយរៀង នៅថ្ងៃទី ២១ខែវិច្ឆិកាម្សិលមិញនេះ បានប្រាទូរទស្សន៍ប៊ីធីវីឲ្យដឹងថា ផលស្រូវឆ្នាំនេះ ទាំងគ្រួសារលោក និងគ្រួសារពលរដ្ឋឯទៀត នៅក្នុងស្រុកទាំងមូល មានការបាតបង់ផលស្រូវជាង ៥០ភាគរយ បន្ទាប់ពីធ្វើការ ប្រមូលផលរួច។លោកបានបញ្ជាក់ថា ឆ្នាំនេះ ស្រូវដែលក្រុមកសិករធ្វើពីដើមរដូវ មានការលូតលាស់ចេញ ផ្លែ ផ្កា ល្អ ណាស់ តែដល់ពេលធ្វើការប្រមូលផល ត្រូវបានភ្លៀងបង្អុរធ្វើឱ្យដើមស្រូវដួល ទឹកជន់លិច ពិបាក​ក្នុងការ ច្រូតកាត់ប្រមូលផល ហើយត្រូវបានបាត់បង់ច្រើនបើប្រៀបធៀបឆ្នាំមុន ឯតម្លៃស្រូវ ក៏មានការចុះថោកគួរ ឱ្យព្រួយបារម្ភក្នុងការទូទាត់ប្រាក់ថ្លៃឈ្នួលពលកម្ម។លោក សុខ សុទ្ធាវុធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តស្វាយរៀង បានបញ្ជាក់ថា ស្រូវនៅក្នុងស្រុកស្វាយជ្រុំ ក៏ដូចនៅស្រុកក្រុងទាំង៧ទៀត ​ពិតជាមានការខូចខាតច្រើនមែន ពីព្រោះ​ភ្លៀង បានបង្អុរច្រើននៅចុងរដូវឆ្នាំនេះ ហើយពិបាកក្នុងការប្រមូលផល ឯទិន្នផល មិនអាចឆ្លើយតបទៅនឹងការ ​ចំណាយដើមទុនក្នុងការផលិតស្រូវទេសម្រាប់ឆ្នាំនេះ៕អត្ថបទ៖ ភា សារិត

រដ្ឋាករទឹកស្វយ័តក្រុងភ្នំពេញ ប្រមូលចំណូលលើអាជីវកម្មលក់ទឹកស្អាតបានជាង ២៦៧ពាន់លានរៀល

2021/11/19 06:09:41 am        576
Facebook Telegram Linkin
ភ្នំពេញ ៖ ក្នុងរយៈពេល៩ខែ ឆ្នាំ២០២១ រដ្ឋាករទឹកស្វយ័តក្រុងភ្នំពេញ ប្រមូលចំណូលលើអាជីវកម្ម លក់ទឹកស្អាតសរុបបានចំនួនជាង ២៧៦ ពាន់លានរៀល កើនឡើងជិត ៣៩ ពាន់លានរៀល ស្មើនឹង ១៦,៨២% បើធៀបទៅនឹងរយៈពេលដូចគ្នាឆ្នាំ ២០២០ ។រដ្ឋាករទឹកស្វយ័តក្រុងភ្នំពេញ បង្ហាញរបាយការណ៍ ត្រីមាសទី៣ ឆ្នាំ២០២១ ក្នុងនោះរដ្ឋាករទឹក​ស្វយ័ត​ក្រុងភ្នំពេញ ​ប្រមូលចំណូល លើអាជីវកម្មលក់ទឹកស្អាត ​សរុបមានចំនួនជាង ១១៥ ពាន់លាន​រៀល កើនឡើងជាងត្រីមាសទី ​៣ ឆ្នំ២០២០ ក្នុងចំនួន២៨ ពាន់លាន រៀល ត្រូវប្រមាណ​ជាង ៣៣ %។ ចំណែកការប្រមូលចំណូលរយៈពេល ៩ ខែ ក្នុងឆ្នាំ ២០២១ នេះវិញ រដ្ឋាករទឹកស្វយ័តក្រុងភ្នំពេញ ប្រមូល​ចំណូលសរុបមានចំនួន ជាង ២៧៦ ពាន់លានរៀល កើនឡើងជិត ៣៩ ពាន់លានរៀល ស្មើនឹង ១៦,៤២% ​និងចំណេញសុទ្ធ សរុបជាង ១០៧ ពាន់លានរៀល កើនឡើងជាង ៣៧ ពាន់លានរៀល ​ស្មើនឹង ៥៤,២៧% បើធៀប​នឹងរយៈពេល ​៩ខែ​ គិត​ត្រឹមថ្ងៃទី​ ៣០ ខែកញ្ញា ឆ្នំា២០២០។ដោយ​ឡែកទ្រព្យ​សកម្ម​សម្រាប់វិនិយោគ, ​គិតត្រឹមរយៈពេល ៩ ដែរនេះ ​ទ្រព្យសកម្មសរុប របស់​រដ្ឋាករ​ទឹក​ស្វយ័តក្រុងភ្នំពេញ​មាន ចំនួនជាង ​២ ២៣៧ ​ពាន់លានរៀល ​កើនឡើងជាង ៣៧២ ពាន់លានរៀល​ ឬស្មើ​ប្រមាណជិត ២០% និងមូលធនសរុបមានចំនួនជាង ​១ ១៤៤ ពាន់លានរៀល កើនឡើងជាង ១៦២ ពាន់លានរៀល ​ស្មើប្រមាណ ១៦,៥៦% ។សូមបញ្ជាក់ថា ពាក់ព័ន្ធប្រព្រឹត្តកម្មទឹកស្អាត ​នៅក្នុងត្រីមាសទី ៣ ឆ្នាំ ២០២១ ដែលគ្រប់គ្រង់​ដោយ​រដ្ឋាករ​ទឹកស្វយ័តក្រុងភ្នំពេញ​ ក្នុងនោះ ​រោងចក្រភូមិព្រែក ​និងរោងចក្រជ្រោយចង្វារ ​អនុវត្ត​ជាក់​ស្តែងបាន ​ជាង ១៥ លានម៉ែត្រគូប, ​រោងចក្រចម្ការមនជិត ​៥ លានម៉ែត្រគូប, រោងចក្រនិរោធ ជាង ២៤ លានម៉ែត្រគូប, ​រោងចក្រម្លេច ជិត ៩ ​ម៉ឺនម៉ែត្រគូប និងរោងចក្រនៅខេត្តត្បូងឃ្មុំ មានចំនួនជាង ៦ ម៉ឺន​ម៉ែត្រគូប៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

សង្រ្គាមបានលួចពហុកីឡដ្ឋានតំបន់ហ្កាហ្សា ប៉ុន្តែមិនអាចលួចក្តីស្រលាញ់ការប្រកួតបាល់ទាត់បានទេ
06/17/2026 09:06 PM
Facebook Telegram Linkin
ក្រុមមេដឹកនាំ G7ជួបជុំគ្នានៅថ្ងៃចុងក្រោយកិច្ចប្រជុំកំពូលក្នុងប្រទេសបារាំង
06/17/2026 09:06 PM
Facebook Telegram Linkin
មេដឹកនាំ G7ពិភាក្សាលើការគ្រប់គ្រងប្រព័ន្ធ AI ជាមួយប្រធានបច្ចេកវិទ្យា ក្នុងកិច្ចប្រជុំកំពូលនៅបារាំង
06/17/2026 08:06 PM
Facebook Telegram Linkin
លោក​ប្រធានាធិបតី Aoun និយាយថា លីបង់មាន «ផ្លូវឯករាជ្យ» ក្នុងការចរចាជាមួយ​អ៊ីស្រាអែល
06/17/2026 08:06 PM
Facebook Telegram Linkin
មេដឹកនាំអាស៊ានធ្វើដំណើរទៅដល់ទីក្រុង Kazan ដើម្បីចូលរួមកិច្ចប្រជុំកំពូលរុស្ស៊ី-អាស៊ាន
06/17/2026 08:06 PM
Facebook Telegram Linkin
បារាំងប្រកាសហាមឃាត់ការប្រើប្រាស់ទូរស័ព្ទដៃ នៅក្នុងសាលាវិទ្យាល័យ ចាប់ពីខែកញ្ញា
06/17/2026 08:06 PM
Facebook Telegram Linkin
លោក Trump ៖ គ្មាននរណាម្នាក់ រួមទាំងលោក Obama មិនអាចបង្កើតកិច្ចព្រមព្រៀងជាមួយអ៊ីរ៉ង់បានទេ
06/17/2026 08:06 PM
Facebook Telegram Linkin
ក្រុមឧទ្ទាមកូឡុំប៊ីស្វាគមន៍កិច្ចប្រជុំជាមួយប្រធានាធិបតីថ្មី តែពួកគេក៏អាចរស់រានពីការវាយប្រហារយោធាដែរ
06/17/2026 08:06 PM
Facebook Telegram Linkin
កោះតៃវ៉ាន់អះអាងថា កេនយ៉ាងរារាំងខ្លួនមិនឲ្យចូលរួមសន្និសីទដោយសារសម្ពាធពីចិន
06/17/2026 08:06 PM
Facebook Telegram Linkin
សំណុំផ្សែងនៅតែបន្តឃើញមាននៅតំបន់ភាគខាងត្បូងលីបង់ បើទោះបីជាមានកិច្ចព្រមព្រៀងអាមេរិក-អ៊ីរ៉ង់
06/17/2026 08:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.