BTV NEWS

អាជ្ញាធរកម្ពុជាកំពុងសកម្មឈានទៅបំផ្លាញអង្គការចាត់តាំងឧក្រិដ្ឋកម្មគ្រឿងញៀន

សមត្ថកិច្ចចម្រុះរាជធានីភ្នំពេញឃាត់ខ្លួនជនជាតិកូរ៉េខាងត្បូង១០នាក់ ពាក់ព័ន្ធបទល្មើស Online Scam

អ្នកតាមដានព្រឹត្តិការណ៍សង្គម និងប្រជាពលរដ្ឋ កោតសរសើររាជរដ្ឋាភិបាលក្នុងការបោសសំអាតការឆបោកតាមអនឡាញ

កម្ពុជាសហការជាមួយបណ្តាប្រទេសជាដៃគូរបង្ក្រាបករណីដឹកជញ្ជូនគ្រឿងញៀនឆ្លងដែនក្នុងឆ្នាំ២០២៥ ទទួលបានលទ្ធផលល្អ

សន្តិសុខ និង សង្គម

មេដឹកនាំក្រុមជនអន្ធពាលនៅហៃទី គំរាមថា សណ្ឋាគារជាច្រើនកំពុងលាក់អ្នកនយោបាយ

មេដឹកនាំក្រុមជនអន្ធពាលនៅប្រទេសហៃទី លោក Jimmy Cherizier បានរារាំងម្ចាស់សណ្ឋាគារ កាលពីថ្ងៃចន្ទ មិនឲ្យលួចលាក់អ្នកនយោបាយ ខណៈលោកនិយាយថា ក្រុមជនអន្ធពាលកំពុងធ្វើ បដិវត្តន៍បង្ហូរឈាម ដែលព្យាយាមផ្តួលរំលំនាយករដ្ឋមន្ត្រី លោក Ariel Henry និងជ្រើសរើសរដ្ឋាភិបាលថ្មី។ មេដឹកនាំនៃសម្ព័ន្ធភាពក្រុមប្រដាប់អាវុធ បាននិយាយ ខណៈមន្ត្រីសហរដ្ឋអាមេរិក រដ្ឋសហគមន៍តំបន់សមុទ្រការ៉ាអ៊ីប និងសមាជិកគណបក្សនយោបាយ វិស័យឯកជន សង្គមស៊ីវិល និងក្រុមសាសនា នៅប្រទេសហៃទី ចូលរួមនៅក្នុងកិច្ចពិភាក្សានៅក្នុងប្រទេសចាម៉ៃការ ក្នុងគោលបំណងបង្កើតក្រុមប្រឹក្សាអន្តរកាល ដែលនឹងត្រួសត្រាយផ្លូវទៅរកការបោះឆ្នោតលើកដំបូងចាប់តាំងពីឆ្នាំ ២០១៦មក។រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយថា សហរដ្ឋអាមេរិកនឹងផ្តល់ជំនួយចំនួន ១០០លានដុល្លារបន្ថែមទៀត ដល់កងកម្លាំងសន្តិសុខពហុសាសន៍ដែលគាំទ្រដោយអង្គការសហប្រជាជាតិ ក្នុងគោលបំណងជួយនគរបាលប្រទេសហៃទីប្រយុទ្ធប្រឆាំងក្រុមជនអន្ធពាល និងផ្តល់ជំនួយមនុស្សធម៌ចំនួន ៣៣ លានដុល្លារ។ប្រទេសហៃទី បានធ្លាក់ចូលទៅក្នុងរដ្ឋគ្រាអាសន្នកាលពីថ្ងៃទី ៣ ខែមីនា ខណៈការប៉ះទង្គិចគ្នាជាច្រើនលើក បានធ្វើឱ្យខូចទំនាក់ទំនង និងនាំឱ្យមានការហែកពន្ធនាគារចំនួនពីរកន្លែង បន្ទាប់ពីលោក Cherizier បាននិយាយថា ពួកគេនឹងរួបរួមគ្នា និងផ្ដួលរំលំនាយករដ្ឋមន្ត្រី លោក Ariel Henry ដែលមិនបានជាប់ឆ្នោត របស់ប្រទេសហៃទី។លោក Henry ជាអ្នកដែលបានឡើងកាន់តំណែង បន្ទាប់ពីការធ្វើឃាតប្រធានាធិបតី ចុងក្រោយរបស់ប្រទេសហៃទី ឆ្នាំ ២០២១ ប៉ុន្តែបច្ចុប្បន្នបានជាប់គាំងនៅក្រៅប្រទេស កំពុងពិភាក្សាតាមបណ្តាញអ៊ីនធឺណិត ជាមួយរដ្ឋសហគមន៍តំបន់សមុទ្រការ៉ាអ៊ីប(CARICOM)។

ឥណ្ឌូនេស៊ីមើលឃើញគ្រោះទឹកជំនន់និងបំណាក់ដីដ៏ធ្ងន់ធ្ងរ ក្រោយភ្លៀងធ្លាក់ឥតឈប់៦ម៉ោង ឆក់យកជីវិតមនុស្ស២៦នាក់

យោងតាមសារព័ត៌មាន BNPB និងទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូនេស៊ី ភ្លៀងធ្លាក់ខ្លាំងបណ្ដាលឲ្យមានទឹកជំនន់ និង បំណាក់ដី ក្នុងតំបន់មួយចំនួននៅខេត្តស៊ូម៉ាត្រាខាងលិច ចាប់តាំងពីថ្ងៃទី៧ខែមីនាឆ្នាំ២០២៤មក ។ រហូតមកដល់ពេលនេះ អ្នកស្លាប់បានកើនឡើងដល់២៦នាក់ និង១១នាក់កំពុងបាត់ខ្លួន លំនៅឋានជាច្រើនរងការបំផ្លិចបំផ្លាញ ដោយបង្ខំឲ្យប្រជាពលរដ្ឋជាង៨ម៉ឺននាក់ជម្លៀសចេញពីលំនៅឋាន។ ទឹកជំនន់បានជន់លិចផ្លូវនានានៅទីក្រុងផាដាង (Padang City)របស់ខេត្តស៊ូម៉ាត្រាខាងលិច ប៉ះពាល់ដល់ផ្ទះសម្បែងប្រមាណ១ម៉ឺនខ្នង និងពលរដ្ឋចំនួន៣.៧៣៤នាក់ ត្រូវបានជម្លៀសចេញពីលំនៅឋាន។ ក្រុមអាជ្ញាធរបានរាយការណ៍ពីទឹកជំនន់នៅក្នុងតំបន់ចំនួន៣១ទីតាំង ក្នុងស្រុកចំនួន៨ ក្នុងទីក្រុងនេះ ចន្លោះថ្ងៃទី៧និង៩មីនា។ មានសេចក្ដីរាយការណ៍ថាមានបំណាក់ដីចំនួន៦ទីតាំង ។ ទិន្នន័យបង្ហាញថា មានកម្រិតភ្លៀងធ្លាក់ជិត៣០០មីលីម៉ែត្រ ក្នុងពេល៦ម៉ោងកាលពីថ្ងៃទី៧មីនាឆ្នាំ២០២៤។ សហគមន៍នានានៅក្នុងតំបន់ ផេស៊ីស៊ សេឡាតាន រីជិនស៊ី (Pesisir Selatan Regency) ក៏ត្រូវបានរងការប៉ះពាល់ធ្ងន់ធ្ងរដែរ។ កាលពីថ្ងៃទី១០មីនា សារព័ត៌មាន BNPB បានរាយការណ៍ថា ទឹកជំនន់បានប៉ះពាល់ដល់ពលរដ្ឋចំនួន២៥.៧៩៤គ្រួសារ និងមនុស្ស៧៦.១៧៨នាក់ ត្រូវបានជម្លៀសចេញពីផ្ទះសម្បែង។មនុស្ស១៦នាក់ បានស្លាប់ក្នុងតំបន់នេះ។ ក្រុមអ្នកស្វែងរក និងជួយសង្រ្គោះតាមស្វែងរកអ្នកបាត់ខ្លួន ។ក្នុងការធ្វើបច្ចុប្បន្នភាពចុងក្រោយនៅថ្ងៃទី១១មីនា សារព័ត៌មាន BNPB បានបញ្ជាក់ថាមនុស្ស២៦នាក់បានស្លាប់ និង១១នាក់បាត់ខ្លួន ។ លំនៅឋានជាង៣ម៉ឺនខ្នង ស្ពាន២៦ខ្សែ អគារព្រះវិហារចំនួន៤៥កន្លែង សាលារៀន ២៥ខ្នង ផ្លូវ១៣ ខ្សែ និងអគាររដ្ឋចំនួន៥កន្លែង ត្រូវបានបំផ្លាញ៕

អ៊ុយក្រែន ត្រៀមដាក់ពង្រាយយន្តហោះចម្បាំង F-16 ឲ្យបានឆាប់ត្រឹមខែកក្កដា

សារព័ត៌មាន New York Times បានរាយការណ៍ថា អ្នកបើកយន្តហោះអ៊ុយក្រែនចំនួន ១២នាក់ត្រូវបានគេរំពឹងថា នឹងត្រៀមខ្លួនរួចរាល់ ដើម្បីបើកយន្តហោះ F-16 ក្នុងការប្រយុទ្ធ នៅរដូវក្តៅនេះ។ទោះយ៉ាងណាក៏ដោយ យន្តហោះចម្បាំងចំនួន ៦គ្រឿង ត្រូវបានគេរំពឹងថា នឹងត្រូវដឹកជញ្ជូនទាន់ពេល វេលា។សរុបមក សម្ព័ន្ធមិត្តអ៊ឺរ៉ុប បានសន្យាថា នឹងផ្គត់ផ្គង់យន្តហោះចំនួន ៤៥គ្រឿងដល់អ៊ុយក្រែន ដោយប្រទេសដាណឺម៉ាក បានកំណត់ថា នឹងផ្តល់យន្តហោះចំនួន៦គ្រឿងដំបូង នៅចុងនិទាឃរដូវ។ការបណ្តុះបណ្តាលសម្រាប់អ្នកបើកយន្តហោះអ៊ុយក្រែន បានចាប់ផ្តើមកាលពីខែសីហាឆ្នាំមុន នៅឯមូលដ្ឋានអាកាស Skrydstrup នៅប្រទេសដាណឺម៉ាកភាគខាងត្បូង ប៉ុន្តែកង្វះជំនាញភាសា និងចំណេះដឹងអំពីបច្ចេកទេសហោះហើរលោកខាងលិច ត្រូវបានគេរាយការណ៍ថា បានធ្វើឲ្យអ្វីៗគ្រប់យ៉ាង ធ្លាក់ចុះ។សារព័ត៌មាន NY Times បានឲ្យដឹងថា អ្នកបើកយន្តហោះអ៊ុយក្រែនបច្ចុប្បន្ន កំពុងរង់ចាំយន្តហោះចម្បាំង និងគ្រូបង្រៀនបើក នៅមជ្ឈមណ្ឌលហ្វឹកហ្វឺនថ្មីមួយ នៅឯមូលដ្ឋានអាកាស F&abreve;testi នៅ ប្រទេសរ៉ូម៉ានីភាគខាងត្បូង ប៉ុន្តែវាមិនច្បាស់ទេថា នៅពេលណាពួកគេ នឹងចាប់ផ្តើមមេរៀនរបស់ពួកគេទេ។កាលពីខែសីហា ទីក្រុងវ៉ាស៊ីនតោន បានធានាចំពោះសម្ព័ន្ធមិត្តអឺរ៉ុបថា សហរដ្ឋអាមេរិក នឹងពន្លឿនការបញ្ជូនយន្តហោះ F-16 ទៅកាន់អ៊ុយក្រែន នៅពេលដែលអាកាសយានិក ត្រូវបានបណ្តុះបណ្តាល។

គេហទំព័រដែលមានទំនាក់ទំនងជាមួយក្រុមហាម៉ាស ព្រមានប៉ាឡេស្ទីនកុំឲ្យធ្វើការជាមួយអ៊ីស្រាអែល

គេហទំព័រដែលមានទំនាក់ទំនងជាមួយក្រុមហាម៉ាសកាលពីថ្ងៃចន្ទ បានព្រមានបុគ្គល ឬក្រុមប៉ាឡេស្ទីនប្រឆាំងនឹងការសហការជាមួយអ៊ីស្រាអែល ក្នុងការផ្តល់សន្តិសុខសម្រាប់ក្បួនរថយន្តជំនួយ ចំពេលមានសង្រ្គាមរយៈពេល៥ខែ នៅក្នុងតំបន់ហ្កាហ្សាស្ទ្រីប។គេហទំព័រសន្តិសុខ Al-Majdរបស់ក្រុមហាម៉ាស បាននិយាយ ដោយដកស្រង់សម្តីមន្ត្រីសន្តិសុខម្នាក់នៅក្នុងកងកម្លាំងសកម្មប្រយុទ្ធប៉ាឡេស្ទីនថា អ្នកដែលបានធ្វើ នឹងត្រូវចាត់ទុកជាអ្នកសហការ និងត្រូវបានគ្រប់គ្រងដោយកណ្តាប់ដៃដែក។ការព្រមាននេះ បានធ្វើឡើងជាការឆ្លើយតបទៅនឹងរបាយការណ៍ប្រព័ន្ធផ្សព្វផ្សាយរបស់អ៊ីស្រាអែលដែលថា អ៊ីស្រាអែល កំពុងពិចារណាផ្តល់អាវុធដល់បុគ្គល ឬក្រុមកុលសម្ព័ន្ធប៉ាឡេស្ទីនមួយចំនួន នៅក្នុងតំបន់ហ្កាហ្សា ដើម្បីផ្តល់ការការពារសន្តិសុខសម្រាប់ក្បួនរថយន្តជំនួយចូលទៅក្នុងដែនដីដែលឡោមព័ទ្ធ ជាផ្នែកនៃផែនការដ៏ទូលំទូលាយសម្រាប់ការផ្គត់ផ្គង់ជំនួយមនុស្សធម៌ បន្ទាប់ពីការប្រយុទ្ធគ្នា បានបញ្ចប់។ការិយាល័យនាយករដ្ឋមន្ត្រីអ៊ីស្រាអែល បានបដិសេធមិនធ្វើអត្ថាធិប្បាយលើរបាយការណ៍នេះ ដែលបានកើតឡើងមួយសប្តាហ៍ បន្ទាប់ពីជនជាតិប៉ាឡេស្ទីនរាប់សិបនាក់ ត្រូវបានសម្លាប់នៅក្នុងឧប្បត្តិហេតុមួយដោយហ្វូងមនុស្ស បានឡោមព័ទ្ធក្បួនរថយន្តជំនួយដែលចូលទៅតំបន់ហ្កាហ្សាភាគខាងជើង ហើយកងទ័ព បានបើកការបាញ់ប្រហារ។គេហទំព័រនេះ បាននិយាយថា៖«ការប៉ុនប៉ងរបស់អ៊ីស្រាអែលក្នុងការទំនាក់ទំនងជាមួយមេដឹកនាំ និង គ្រួសារមួយចំនួន ដើម្បីធ្វើប្រតិបត្តិការនៅក្នុងតំបន់ហ្កាហ្សាស្ទ្រីប ត្រូវបានចាត់ទុកថា ជាកិច្ចសហការដោយផ្ទាល់ជាមួយការកាន់កាប់នេះ និងជាអំពើក្បត់ជាតិ ដែលយើងនឹងមិនអត់ឱនឲ្យបាន»។

មនុស្សយ៉ាងហោចណាស់៥០នាក់ បានរងរបួស ខណៈយន្តហោះក្រុមហ៊ុនអាកាសចរណ៍ LATAM ជួបឧបទ្ទវហេតុ

យោងតាមក្រុមហ៊ុនអាកាសចរណ៍ និងអង្គភាពសេវាសុខភាពប្រទេសនូវែលហ្សេឡង់ដែលបានព្យាបាលអ្នករងរបួស បាននិយាយថា មនុស្សយ៉ាងហោចណាស់ ៥០ នាក់ បានរងរបួសនៅពេលដែលយន្តហោះ Boeing ៧៨៧ ធ្វើប្រតិបត្តិការដោយក្រុមហ៊ុនអាកាសចរណ៍ LATAM Airlines LTM.SN បានជួបឧបទ្ទវហេតុភ្លាមៗនៅពាក់កណ្តាលជើងហោះហើរពីទីក្រុងស៊ីដនី(Sydney) ទៅកាន់ទីក្រុងអក់លែន(Auckland) កាលពីថ្ងៃចន្ទ។ ក្រុមហ៊ុនអាកាសចរណ៍អាមេរិកខាងត្បូងមួយនេះ បាននិយាយថា យន្តហោះបានជួបប្រទះដំណើរញ័រខ្លាំង។ជើងហោះហើរមានអ្នកដំណើរ ២៦៣នាក់ និងសមាជិកយានិក ៩នាក់ បានចុះចតនៅអាកាសយានដ្ឋាន ទីក្រុង Auckland តាមការគ្រោងទុកកាលពីរសៀលថ្ងៃច័ន្ទ។ មនុស្សម្នាក់ស្ថិតក្នុងស្ថានភាពធ្ងន់ធ្ងរ ខណៈអ្នកផ្សេងទៀតបានរងរបួសស្រាល ទៅមធ្យម។អ្នកជំនាញផ្នែកសុវត្ថិភាពនិយាយថា ឧបទ្ទវហេតុយន្តហោះភាគច្រើន គឺបណ្តាលមកពីកត្តារួមផ្សំដែលចាំបាច់ត្រូវស៊ើបអង្កេតឱ្យបានហ្មត់ចត់។ក្រុមហ៊ុន Boeing បាននិយាយថា ក្រុមហ៊ុនកំពុងធ្វើការដើម្បីប្រមូលព័ត៌មានបន្ថែម ហើយនឹងផ្តល់ការគាំទ្រណាមួយដល់ក្រុមហ៊ុនអាកាសចរណ៍។ ភាគហ៊ុនរបស់ក្រុមហ៊ុន Boeing បានធ្លាក់ចុះជិតប្រហែល ៣ភាគរយ បន្ទាប់ពីឧបទ្ទវហេតុចុងក្រោយដែលពាក់ព័ន្ធនឹងយន្តហោះមួយគ្រឿងរបស់ខ្លួន។ រដ្ឋបាលអាកាសចរណ៍សហព័ន្ធអាមេរិក កាលពីខែមករា បានរារាំងក្រុមហ៊ុនផលិតយន្តហោះដែលមានបញ្ហាពីការពង្រីកការផលិតយន្តហោះខ្នាតតូច 737 MAX ដែលលក់ដាច់បំផុតរបស់ខ្លួន បន្ទាប់ពីបញ្ហាគុណភាព ដែលពុំអាចទទួលយកបាន។

ក្រុមហេសបូឡាអះអាងថា ខ្លួនបានវាយប្រហារដោយយានដ្រូនទៅលើប៉ុស្តិ៍អ៊ីស្រាអែល នៅហ្គោឡែនហៃស៍

ក្រុមហេសបូឡានៅប្រទេសលីបង់ បាននិយាយថា ខ្លួនបានធ្វើការវាយប្រហារដោយយានដ្រូនកាលពីថ្ងៃចន្ទ ទៅលើទីស្នាក់ការការពារដែនអាកាសរបស់អ៊ីស្រាអែលឆ្លងកាត់ព្រំដែន នៅតំបន់ហ្គោឡែនហៃស៍ (Golan Heights)ដែលគ្រប់គ្រងដោយអ៊ីស្រាអែល។ក្រុមនេះ បានអះអាងថា ការវាយប្រហារដ៏កម្រ ដែលក្នុងនោះ ខ្លួនបានដាក់ពង្រាយយានដ្រូនចំនួន ៤ គ្រឿង បានវាយប្រហារគោលដៅរបស់ពួកគេជាមួយនឹង«ភាពត្រឹមត្រូវ» នៅក្នុងអ្វីដែលខ្លួនបាននិយាយថា ជាប្រតិបត្តិការមួយផ្សេងទៀត ក្នុងការគាំទ្រក្រុមសកម្មប្រយុទ្ធប៉ាឡេស្ទីន នៅក្នុងតំបន់ហ្កាហ្សា។អ៊ីស្រាអែល បានដណ្តើមយកតំបន់ហ្គោឡែនហៃស៍ពីប្រទេសស៊ីរី ក្នុងឆ្នាំ១៩៦៧។ក្រុមហេសបូឡា ដែលមានសម្ព័ន្ធមិត្តជាមួយអ៊ីរ៉ង់ និងយោធាអ៊ីស្រាអែល បាននិងកំពុងបាញ់គ្នានៅតាមព្រំដែនភាគខាងត្បូងនៃប្រទេសលីបង់ ចាប់តាំងពីខែតុលា នៅពេលដែលក្រុមនេះ បានបាញ់រ៉ុក្កែតទៅលើអ៊ីស្រាអែល ដើម្បីគាំទ្រដល់សម្ព័ន្ធមិត្តប៉ាឡេស្ទីនហាម៉ាស ដែលកំពុងធ្វើសង្រ្គាមជាមួយអ៊ីស្រាអែលនៅតំបន់ហ្កាហ្សាស្ទ្រីប។ការវាយប្រហាររបស់អ៊ីស្រាអែលភាគច្រើន ត្រូវបានកំណត់ត្រឹមតំបន់ព្រំដែនភាគខាងត្បូងនៃប្រទេសលីបង់ ទោះបីជាពួកគេ បានឆ្ពោះទៅភាគខាងជើងបន្ថែមទៀតក៏ដោយក្នុងប៉ុន្មានសប្តាហ៍ថ្មីៗនេះ។ក្រុមហេសបូឡាកាលពីខែមុន បាននិយាយថា ខ្លួនបានបាញ់រ៉ុក្កែតទៅលើគោលដៅដូចគ្នា នៅតំបន់ហ្គោឡែនហៃស៍។

ប្រមុខអង្គការសហប្រជាជាតិ អំពាវនាវឱ្យមានបទឈប់បាញ់នៅហ្កាហ្សា និងបញ្ឈប់អរិភាពក្នុងប្រទេសស៊ូដង់ ខណៈបុណ្យរ៉ាម៉ាដានចាប់ផ្តើម

អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យ "បញ្ឈប់ស្នូរអាវុធ" នៅតំបន់ហ្កាហ្សា ដើម្បីរំឭកដល់ខែដ៏វិសុទ្ធរបស់មូស្លីមនៃបុណ្យរ៉ាម៉ាដាន ដែលបានចាប់ផ្តើមកាលពីថ្ងៃចន្ទសប្ដាហ៍នេះ ។លោក Guterres បានប្រាប់អ្នកសារព័ត៌មានថា បុណ្យរ៉ាម៉ាដានប្រារព្ធឡើង បញ្ជាក់ពីការចង់បាន សន្តិភាព ការផ្សះផ្សា និងសាមគ្គីភាព។ ទោះបីជាពិធីបុណ្យរ៉ាម៉ាដានបានចាប់ផ្តើមក៏ដោយ ការសម្លាប់ ការទម្លាក់គ្រាប់បែក និងការបង្ហូរឈាមនៅតែបន្តនៅក្នុងហ្កាហ្សា។ លោកនិយាយថាការអំពាវនាវដ៏ម៉ឺងម៉ាត់បំផុតរបស់ខ្ញុំនៅថ្ងៃនេះគឺដើម្បីរំដល់បុណ្យរ៉ាម៉ាដានដោយការបញ្ឈប់ស្នូរអាវុធ និងសម្អាតរាល់ឧបសគ្គទាំងអស់ដើម្បីធានាបាននូវការផ្តល់ជំនួយសង្គ្រោះជីវិតឲ្យបានឆាប់បំផុត និងចំនួនដ៏ធំដែលត្រូវការ។ នៅពេលនោះ លោកក៏បានអំពាវនាវឲ្យដោះលែងចំណាប់ខ្មាំងទាំងអស់ជាបន្ទាន់ផងដែរ។ ជាមួយគ្នានោះ លោក Guterres ក៏បានអំពាវនាវជាថ្មីឲ្យបញ្ឈប់អរិភាពក្នុងខែរ៉ាម៉ាដានក្នុងប្រទេសស៊ូដង់ ផងដែរ ដោយនិយាយថា ការប្រយុទ្ធនៅទីនោះត្រូវតែបញ្ចប់សម្រាប់ជាប្រយោជន៍ដល់ប្រជាជនស៊ូដង់ដែលប្រឈមនឹងភាពអត់ឃ្លាន ការភ័យខ្លាច និងការលំបាកដែលមិនអាចរៀបរាប់បាន។លោកបានបន្ថែមថា ខ្ញុំសូមអំពាវនាវដល់ថ្នាក់ដឹកនាំនយោបាយ សាសនា និងសហគមន៍នៅគ្រប់ទីកន្លែងឲ្យធ្វើអ្វីៗគ្រប់យ៉ាងតាមអំណាចដែលខ្លួនមាន ដើម្បីធ្វើឲ្យឱកាសដ៏បរិសុទ្ធនេះ ក្លាយជាពេលវេលាសម្រាប់ការយល់ចិត្ត សកម្មភាព និងសន្តិភាព៕

មនុស្សម្នាក់ស្លាប់ និង ១១នាក់រងរបួស ក្នុងការផ្ទុះកាំជ្រួច ក្នុងរដ្ឋធានីប្រទេសអ៊ីរ៉ង់

ទីភ្នាក់ងារព័ត៌មាននិស្សិតអ៊ីរ៉ង់ (ISNA) បានរាយការណ៍ថា យ៉ាងហោចណាស់មនុស្សម្នាក់បានស្លាប់ និង១១នាក់ផ្សេងទៀត រួមទាំងអ្នកពន្លត់អគ្គិភ័យពីរនាក់ បានរងរបួសនៅក្នុងការផ្ទុះកាំជ្រួចនៅក្នុងរដ្ឋធានី តេអេរ៉ង់ ប្រទេសអ៊ីរ៉ង់ កាលពីថ្ងៃអាទិត្យ។លោក Jalal Maleki អ្នកនាំពាក្យនាយកដ្ឋានពន្លត់អគ្គិភ័យទីក្រុងតេអេរ៉ង់ បាននិយាយថា ឧបទ្ទវហេតុនេះ បានកើតឡើងនៅជិតតំបន់ Grand Bazaar ទីក្រុងតេអេរ៉ង់ បន្ទាប់មកក្រុមអ្នកពន្លត់អគ្គិភ័យ ត្រូវបានបញ្ជូនភ្លាមៗទៅកាន់កន្លែងកើតហេតុ។ លោកនិយាយថា ការផ្ទុះនិងអគ្គិភ័យជាបន្តបន្ទាប់ បានបណ្តាលឱ្យបាក់រលំដោយផ្នែកនៃអគារលំនៅឋានចាស់មួយកន្លែងមានកម្ពស់ពីរជាន់ ហើយបានលើកឡើងពីមូលហេតុនៃឧបទ្ទវហេតុនេះថាជាការផ្ទុះកាំជ្រួចផលិតក្នុងស្រុកក្នុងចំនួនយ៉ាងច្រើន។យោងតាមលោក ម៉ូហាម៉ាដ អ៊ីស្មេល តាវ៉ាកូលី (Mohammad Esmaeil Tavakoli) ប្រធានអង្គភាពសង្គ្រោះបន្ទាន់ទីក្រុងតេអេរ៉ង់ បាននិយាយថា អ្នករងរបួសពីរនាក់ស្ថិតក្នុងស្ថានភាពធ្ងន់ធ្ងរ។ ឧបទ្ទវហេតុជាច្រើន ដែលបង្កឡើងដោយកាំជ្រួច គឺកើតមានជាញឹកញាប់នៅក្នុងប្រទេសអ៊ីរ៉ង់ ក្នុងប៉ុន្មានថ្ងៃមុនពិធីបុណ្យភ្លើងជាប្រពៃណី។

ស៊ូដង់រកមធ្យោបាយដោះស្រាយជម្លោះឥតស្រាកស្រាន ខណៈបុណ្យរ៉ាម៉ាដាន ចាប់ផ្ដើម

ការប្រយុទ្ធគ្នាខ្លាំង បានបន្តរវាងភាគីជម្លោះនៅក្នុងប្រទេសស៊ូដង់កាលពីថ្ងៃអាទិត្យ ទោះបីជាមានការអនុម័តសេចក្តីសម្រេចរបស់អង្គការសហប្រជាជាតិដែលអំពាវនាវឱ្យមានបទឈប់បាញ់ក្នុងអំឡុងខែដ៏ពិសិដ្ឋនៃបុណ្យរ៉ាម៉ាដានក្នុងប្រទេសដែលញាំញីដោយជម្លោះក៏ដោយ។ ក្រុមប្រឹក្សាសន្តិសុខអង្គការសហប្រជាជាតិ បានអនុម័តសេចក្តីសម្រេច កាលពីថ្ងៃសុក្រ ដោយអំពាវនាវឱ្យបញ្ឈប់ជាបន្ទាន់នូវអរិភាពនៅក្នុងប្រទេសស៊ូដង់ ក្នុងអំឡុងខែបុណ្យរ៉ាម៉ាដាន។ ទាំងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF) នៅស៊ូដង់ បានស្វាគមន៍ចំពោះសេចក្តីសម្រេចនេះ។ ទោះយ៉ាងណា ភាគីទាំងសងខាងបាន បញ្ជាក់ពីលក្ខខណ្ឌផ្ទាល់ខ្លួនរបស់ពួកគេ សម្រាប់បទឈប់បាញ់។ កងកម្លាំងប្រដាប់អាវុធស៊ូដង់ ទាមទារឱ្យកងកម្លាំងគាំទ្ររហ័សយោធាប៉ារ៉ា បំពេញសេចក្តីប្រកាសទីក្រុង Jeddah ដែលត្រូវបានព្រមព្រៀងគ្នាកាលពីពេលមុន រវាងភាគីជម្លោះទាំងពីរ ឲ្យដកថយចេញពីទីក្រុង និងតំបន់ទាំងអស់ ដែលពួកគេបានចូលគ្រប់គ្រងតាំងពីខែឧសភា ឆ្នាំ ២០២៣ ហើយប្រគល់មកវិញសម្បត្តិសាធារណៈ និងឯកជនទាំងអស់ដែលពួកគេបានរឹបអូសយក។ ជាការឆ្លើយតបកងកម្លាំងគាំទ្ររហ័ស(RSF) បានអំពាវនាវឱ្យមានការសន្ទនាដើម្បីបង្កើតយន្តការត្រួតពិនិត្យសម្រាប់ការអនុវត្តន៍សេចក្តីសម្រេច។ ការប្រយុទ្ធគ្នាបានបន្តនៅក្នុងតំបន់ជាច្រើននៅទូទាំងប្រទេសកាលពីថ្ងៃអាទិត្យ។ ក្នុងពេលមានការប្រយុទ្ធគ្នានៅតែបន្ត នៅក្នុងតំបន់ផ្សេងៗរបស់ប្រទេស ប្រទេសស៊ូដង់បច្ចុប្បន្នប្រឈមមុខនឹងវិបត្តិជនភៀសខ្លួននៅខាងក្នុងប្រទេសដ៏ច្រើនបំផុតរបស់ពិភពលោក ដោយមានមនុស្សចំនួន ៦,៣ លាននាក់កំពុងស្វែងរកទីសុវត្ថិភាពនៅក្នុងប្រទេស ចាប់តាំងពីការចាប់ផ្តើមជម្លោះ។ យោងតាមអង្គការសហប្រជាជាតិបានឲ្យដឹងថា ប្រជាជន១,៧លាននាក់ផ្សេងទៀត បានភៀសខ្លួនទៅកាន់ប្រទេសជិតខាង។

ឃាត់ខ្លួនចិនតៃវ៉ាន់ម្នាក់ នៅអាកាសយានដ្ឋានអន្តរជាតិភ្នំពេញ ដកហូតសារធាតុញៀន ៣៥ដុំ

ភ្នំពេញ៖ អគ្គនាយកដ្ឋានអន្តោប្រវេសន៍ បានឱ្យដឹងថា មន្ត្រីគយ និងរដ្ឋាករនៃការិយាល័យត្រួតពិនិត្យគយអាកាសយានដ្ឋានអន្តរជាតិភ្នំពេញ សហការជាមួយនគរបាលនៃមន្ទីរប្រឆាំងបទល្មើសគ្រឿងញៀន និងនគរបាលអន្តោប្រវេសន៍ បានត្រួតពិនិត្យ និងឃាត់ខ្លួនជនសង្ស័យជាជនជាតិចិនតៃវ៉ាន់ម្នាក់ និងដកហូតម្សៅសង្ស័យជាសារធាតុញៀន ចំនួន៣៥ដុំ ខណៈដែលជនសង្ស័យត្រៀមឡើងយន្តហោះ ចេញពីរាជធានីភ្នំពេញ។នគរបាលអន្តោប្រវេសន៍ បានឱ្យដឹងថា ប្រតិបត្តិការត្រួតពិនិត្យនេះ បានធ្វើឡើងកាលពីថ្ងៃអាទិត្យ ទី១០ ខែមីនា ឆ្នាំ២០២៤ នៅស្ថានីយអ្នកដំណើរចេញនៃការិយាល័យត្រួតពិនិត្យគយអាកាសយានដ្ឋានអន្តរជាតិភ្នំពេញ ដោយមានការសម្របសម្រួលពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នាយកដ្ឋានច្រកទ្វារទី១ នៃអគ្គនាយកដ្ឋានអន្តោប្រវេសន៍ សហការជាមួយមន្ត្រីគយ និងរដ្ឋាករនៃការិយាល័យត្រួតពិនិត្យគយអាកាសយានដ្ឋានអន្តរជាតិភ្នំពេញ និងនគរបាលនៃមន្ទីរប្រឆាំងបទល្មើសគ្រឿងញៀន ព្រមទាំងសមត្ថកិច្ចពាក់ព័ន្ធដែលប្រចាំការនៅអាកាសយានដ្ឋានអន្តរជាតិភ្នំពេញ បានធ្វើការត្រួតពិនិត្យលើអ្នកដំណើរម្នាក់ ឈ្មោះ HUANG TENG YAO ភេទប្រុស អាយុ២៦ឆ្នាំ សញ្ជាតិចិនតៃវ៉ាន់ ធ្វើដំណើរតាមជើងយន្តហោះ ភ្នំពេញ-ហូជីមីញ រួចបន្តដំណើរពី ហូជីមីញ-តូក្យូ ។ ករណីនេះ មន្ត្រីគយ និងរដ្ឋាករនៃការិយាល័យត្រួតពិនិត្យគយអាកាសយានដ្ឋានអន្តរជាតិភ្នំពេញ បានអញ្ជើញសមត្ថកិច្ចចម្រុះចូលរួម ដើម្បីត្រួតពិនិត្យជាក់ស្តែង និងបានផ្អាកដំណើរជនសង្ស័យដើម្បីបន្តកសាងកំណត់ហេតុបន្តនីតិវិធីច្បាប់។ក្រោយការត្រួតពិនិត្យជាក់ស្តែងលើដងខ្លួនរបស់ជនសង្ស័យរូបនេះឃើញមានម្សៅក្រាមពណ៌ ស ច្រកក្នុងថង់រុំបង់ពណ៌ ស ដែលសង្ស័យជាសារធាតុញៀនចំនួន ៣៥ដុំ និងបានធ្វើតេស្តម្សៅក្រាមពណ៌ស ដោយប្រើម៉ាស៊ីនស្កែន TruNarc ជាលទ្ធផលមានតម្រុយជាសារធាតុញៀនប្រភេទមេតំហ្វេតាមីន (METHAMPHETAMINE) ដែលស្ថិតនៅក្នុងតារាង II នៃច្បាប់ស្តីពីការត្រួតពិនិត្យគ្រឿងញៀន។បច្ចុប្បន្នជនជាតិចិនតៃវ៉ាន់ឈ្មោះ HUANG TENG YAO ត្រូវបានសមត្ថកិច្ចកម្ពុជាសម្រេចឃាត់ខ្លួន ដើម្បីអនុវត្តតាមនីតិវិធី៕ អត្ថបទ៖ កុម្ភៈ

បណ្ដាញសង្គម

ព័ត៌មានថ្មីៗ

ប្រតិភូអនុព័ន្ធយោធាបរទេសបន្តចុះត្រួតពិនិត្យ តំបន់ប្រាសាទព្រះវិហារ និងតំបន់ជុំវិញដែលជាសម្បត្តិបេតិកភណ្ឌពិភពលោកដ៏មានតម្លៃបំផុតរបស់មនុស្សជាតិ ដែលរងការខូចខាតយ៉ាងដំណំ

ពលរដ្ឋអ៊ីរ៉ង់រៀបរាប់ពីជីវិតក្រោមការវាយប្រហាររបស់អាមេរិក-អ៊ីស្រាអែលថា រាល់ថ្ងៃមានអារម្មណ៍ដូច ១ខែ

ប្រភព៖ ទូកផ្ទុកគ្រឿងផ្ទុះរបស់អ៊ីរ៉ង់ ត្រូវបានប្រើកំណត់គោលដៅលើនាវាដឹកប្រេង ក្នុងដែនទឹកអ៊ីរ៉ាក់

IRGC បញ្ជាក់ថា បានកំណត់គោលដៅអាកាសយានដ្ឋាន Ben Gurion របស់អ៊ីស្រាអែល ដោយមីស៊ីល

យានដ្រូនវាយប្រហារមូលដ្ឋានទ័ពអាមេរិកនៅអ៊ីរ៉ាក់ ខណៈអ៊ីរ៉ង់វាយប្រហារទ្រព្យសកម្មទីក្រុងវ៉ាស៊ីនតោននៅអារ៉ាប់

អាស៊ែបៃហ្សង់ ប្ដេជ្ញាឆ្លើយតប ក្រោយមនុស្ស ៤នាក់រងរបួស ដោយសារយានដ្រូនរបស់អ៊ីរ៉ង់

ប្រធានក្រុមហេសបូឡា៖ ពួកយើងមិនចុះចាញ់ជាដាច់ខាត មិនសំខាន់ថាត្រូវពលីជីវិតបែបណានោះទេ

EU ព្រមានថា ឧបករណ៍ប្រឆាំងយានដ្រូនមានកម្រិត ខណៈរដ្ឋឈូងសមុទ្រតទល់នឹងការវាយប្រហាររបស់អ៊ីរ៉ង់

អេស្ប៉ាញនឹងបញ្ជូននាវាចម្បាំងទៅស៊ីប បន្ទាប់ពីមានការវាយប្រហារដោយយានដ្រូនរបស់អ៊ីរ៉ង់

ប្រធានគោលនយោបាយការបរទេស EU៖ បណ្តាប្រទេសឈូងសមុទ្រព្រួយបារម្ភពីហានិភ័យនៃសង្រ្គាមស៊ីវិលអ៊ីរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877