BTV NEWS

ជនជាតិចិន ៥០៦នាក់ទៀត ពាក់ព័ន្ធករណីឆបោកតាមប្រព័ន្ធបច្ចេកវិទ្យា ត្រូវបានបណ្ដេញចេញពីកម្ពុជា

សាលាដំបូងរាជធានីភ្នំពេញ សម្រេចឃុំខ្លួនជនបរទេស ១២នាក់ ពាក់ព័ន្ធករណីឆបោកវិនិយោគតាមប្រព័ន្ធអនឡាញ

ឃាត់ជនបរទេស១៦នាក់ ពាក់ព័ន្ធ Online Scams និងការរស់នៅដោយខុសច្បាប់ និងបានសង្គ្រោះជនជាតិជប៉ុនម្នាក់ពីការចាប់បង្ខាំងទុក

ប្រតិបត្តិការបង្ក្រាប Online Scams នៅខេត្តបន្ទាយមានជ័យ ឃាត់ខ្លួនជនបរទេសជាង ៤ពាន់នាក់

សន្តិសុខ និង សង្គម

កសិករឥណ្ឌា បន្តការតវ៉ា បន្ទាប់ពីពិភាក្សាជាមួយមន្ត្រីពុំទទួលបានលទ្ធផល

កសិករប្រទេសឥណ្ឌានៅថ្ងៃសុក្រ ទី ១៦ ខែកុម្ភៈនេះ បាននិយាយថា ពួកគេនឹងបន្តការហែក្បួនបាតុកម្មឆ្ពោះទៅកាន់ក្រុងដេលី បន្ទាប់ពីកិច្ចចរចាជុំទីបីជាមួយរដ្ឋាភិបាលនៅទីក្រុង ចានឌីហ្កា(Chandigarh) មិនទទួលបានលទ្ធផល។ ដោយធ្វើដំណើរតាមរថយន្តដឹកទំនិញ និងរម៉កសណ្តោងដែលមានផ្ទុកដោយអាហារ សម្ភារៈសម្រាប់ដេក និងគ្រឿងផ្គត់ផ្គង់ផ្សេងៗទៀត កសិករបានចាប់ផ្តើមដើរក្បួនបាតុកម្មរបស់ពួកគេឆ្ពោះទៅទីក្រុងដេលី បន្ទាប់ពីកិច្ចពិភាក្សាជាមួយរដ្ឋាភិបាលបានបរាជ័យ ក្នុងការមិនទទួលបានការប្តេជ្ញាចិត្តលើតម្លៃអប្បបរមាសម្រាប់ផលដំណាំជាបន្តបន្ទាប់។ កិច្ចពិភាក្សាដែលបានធ្វើឡើងកាលពីព្រឹកថ្ងៃព្រហស្បតិ៍ ទី១៥ ខែកុម្ភៈ មានការចូលរួមពីមេដឹកនាំសហជីពកសិករដែលកំបុងតវ៉ា និងតំណាងរដ្ឋាភិបាលដែលត្រូវបានជ្រើសរើស រួមទាំងរដ្ឋមន្ត្រីក្រសួងពាណិជ្ជកម្ម លោក ពីយូស ហ្គោយ៉ាល់ (Piyush Goyal) និងរដ្ឋមន្ត្រីក្រសួងកសិកម្ម និងសុខុមាលភាពកសិករលោក លោក អាជុន មុនដា(Arjun Munda) ។ លោក Munda បានប្រាប់អ្នកសារព័ត៌មានថា កិច្ចពិភាក្សា នឹងបន្តនៅថ្ងៃអាទិត្យ ទី១៨ ខែកុម្ភៈ។កសិករប្រទេសឥណ្ឌាដែលពុំត្រូវបានបង្អាក់ដោយការរងរបួស បន្ទាប់ពីការប៉ះទង្គិចជាមួយកងកម្លាំងសន្តិសុខ បានប្តេជ្ញាកាលពីថ្ងៃព្រហស្បតិ៍ ថានឹងបន្តការតវ៉ា។ នគរបាល បានប្រើប្រាស់ឧស្ម័នបង្ហៀរទឹកភ្នែក និងរបាំងការពារ ដើម្បីបញ្ឈប់កសិកររាប់ពាន់នាក់ពីការដើរដង្ហែបាតុកម្មទៅកាន់រដ្ឋធានី ញូវ ដែលី ដើម្បីជំរុញការទាមទាររបស់ពួកគេឱ្យរដ្ឋាភិបាលកំណត់តម្លៃអប្បបរមាសម្រាប់ផលិតផលរបស់ពួកគេទាំងអស់ ដើម្បីធានាបានថា ពួកគេអាចទ្រទ្រង់ជីវភាពរស់នៅរបស់ពួកគេបាន។ក្រុមគ្រូពេទ្យដែលកំពុងព្យាបាលអ្នករងរបួសនៅកន្លែងតវ៉ា បាននិយាយថា ជំនួយសង្គ្រោះបឋម កំពុងត្រូវបានផ្តល់នៅកន្លែងនោះ ខណៈអ្នករបួសធ្ងន់ ត្រូវបានបញ្ជូនទៅកាន់មន្ទីរពេទ្យធំ នៅក្នុងទីក្រុងក្បែរនោះ។

ក្រុមហ៊ូទី ប្តេជ្ញាបន្តការវាយប្រហារនៅសមុទ្រក្រហម ក្នុងសាមគ្គីភាពជាមួយប៉ាឡេស្ទីន

ក្រុមហ៊ូទី (Houthis) ដែលគាំទ្រដោយអ៊ីរ៉ង់របស់យេម៉ែន នឹងបន្តវាយប្រហារលើការដឹកជញ្ជូនសមុទ្រក្រហមក្នុងសាមគ្គីភាពជាមួយប៉ាឡេស្ទីន ដរាបណាអ៊ីស្រាអែលនៅតែបន្តប្រព្រឹត្ត «ឧក្រិដ្ឋកម្ម» ប្រឆាំងនឹងពួកគេ នេះបើយោងតាមមេដឹកនាំរបស់ក្រុមនេះបាននិយាយកាលពីថ្ងៃព្រហស្បតិ៍ (១៥ កុម្ភៈ)។លោក អាបឌុលម៉ាលីក អាល់ហ៊ូទី (Abdulmalik al-Houthi) បាននិយាយនៅក្នុងសុន្ទរកថាតាមទូរទស្សន៍ថា «ប្រតិបត្តិការរបស់យើងមានឥទ្ធិពលយ៉ាងធំទៅលើសត្រូវ ដែលបង្កើតបានជាជោគជ័យដ៏អស្ចារ្យ និងជាជ័យជំនះពិតប្រាកដ»។លោកបាននិយាយថា ក្រុមនឹងប្ដេជ្ញាបន្តគាំទ្រប៉ាឡេស្ទីន ទោះបីជាសហរដ្ឋអាមេរិក និងអង់គ្លេស វាយប្រហារលើគោលដៅហ៊ូទី ក្នុងប្រទេសយេម៉ែន ក្នុងការសងសឹកចំពោះការវាយប្រហាររបស់ក្រុមនេះលើការដឹកជញ្ជូនអន្តរជាតិនៅសមុទ្រក្រហមក៏ដោយ។ការវាយប្រហារនៅសមុទ្រក្រហមបានរំខានដល់ការដឹកជញ្ជូនទូទាំងពិភពលោក ហើយបានបង្ខំក្រុមហ៊ុននានាឱ្យផ្លាស់ប្ដូរផ្លូវទៅកាន់ការធ្វើដំណើរដែលវែងឆ្ងាយជាងមុន និងតម្លៃថ្លៃជាងមុននៅជុំវិញទ្វីបអាហ្វ្រិកខាងត្បូង ហើយបានបង្កការភ័យខ្លាចថាសង្រ្គាមអ៊ីស្រាអែល និងក្រុមហាម៉ាស អាចរីករាលដាល និងបង្កអស្ថិរភាពដល់មជ្ឈិមបូព៌ាកាន់តែទូលំទូលាយ៕

ប្រធានជំនួយ UN ព្រមានពីលទ្ធភាពនៃការរីករាលដាលរបស់ពលរដ្ឋហ្កាហ្សា ចូលទៅក្នុងប្រទេសអេហ្ស៊ីប

ប្រធានជំនួយរបស់អង្គការសហប្រជាជាតិ បានព្រមានកាលពីថ្ងៃព្រហស្បតិ៍ (១៥ កុម្ភៈ) អំពីលទ្ធភាពនៃការរីករាលដាលរបស់ជនជាតិប៉ាឡេស្ទីន ដែលបានប្រមូលផ្តុំនៅទីក្រុងរ៉ាហ្វា (Rafah) ចូលទៅក្នុងប្រទេសអេហ្ស៊ីប ប្រសិនបើអ៊ីស្រាអែល បើកប្រតិបត្តិការយោធាប្រឆាំងនឹងទីក្រុងព្រំដែនមួយនេះ។ប្រជាជនប៉ាឡេស្ទីនជាងមួយលាននាក់ បានប្រមូលផ្តុំគ្នារស់នៅក្នុងក្រុងរ៉ាហ្វា នៅចុងភាគខាងត្បូងនៃតំបន់ហ្កាហ្សាស្រ្ទីប ជាប់ព្រំដែនជាមួយអេហ្ស៊ីប។ មនុស្សជាច្រើនកំពុងរស់នៅក្នុងជំរំតង់ និងជម្រកបណ្តោះអាសន្ន បន្ទាប់ពីបានភៀសខ្លួនពីការទម្លាក់គ្រាប់បែករបស់អ៊ីស្រាអែល នៅកន្លែងផ្សេងទៀតក្នុងតំបន់ហ្កាហ្សា។ប្រធានជំនួយ UN លោក ម៉ាទីន ហ្គ្រីហ្វីបស៍ (Martin Griffiths) បានប្រាប់អ្នកការទូតនៅអង្គការសហប្រជាជាតិក្នុងទីក្រុងហ្សឺណែវ ថា «លទ្ធភាពនៃប្រតិបត្តិការយោធានៅក្រុងរ៉ាហ្វា ហើយនិងលទ្ធភាពនៃការរាលដាលរបស់ពលរដ្ឋហ្កាហ្សា គឺជាសុបិន្តអាក្រក់សម្រាប់អេហ្ស៊ីប។ ការយល់ឃើញដែលថាប្រជាជននៅហ្កាហ្សា អាចជម្លៀសទៅកាន់កន្លែងមានសុវត្ថិភាព គឺជារឿងបំភាន់តែប៉ុណ្ណោះ»។យោធាអ៊ីស្រាអែលនិយាយថា ខ្លួនចង់បណ្តេញពួកសកម្មប្រយុទ្ធអ៊ីស្លាមចេញពីកន្លែងលាក់ខ្លួនក្នុងទីក្រុងរ៉ាហ្វា និងដោះលែងចំណាប់ថ្នូរដែលត្រូវបានឃុំខ្លួននៅទីនោះ បន្ទាប់ពីការវាយលុករបស់ពួកហាម៉ាសក្នុងប្រទេសអ៊ីស្រាអែលកាលពីថ្ងៃទី០៧ ខែតុលា ប៉ុន្តែមិនបានផ្តល់ព័ត៌មានលម្អិតអំពីផែនការដែលបានស្នើឡើងដើម្បីជម្លៀសជនស៊ីវិលនោះទេ៕

អ៊ីស្រាអែលវាយឆ្មក់មន្ទីរពេទ្យធំក្នុងតំបន់ហ្កាហ្សា ខណៈមានការព្រួយបារម្ភកាន់តែខ្លាំងជុំវិញផែនការវាយលុកចូលក្រុងរ៉ាហ្វា

ទីភ្នាក់ងារព័ត៌មាន Reuters បានរាយការណ៍ថា កងកម្លាំងអ៊ីស្រាអែលបាននិយាយកាលពីថ្ងៃព្រហស្បតិ៍ថា កងទ័ពបានវាយឆ្មក់ចូលមន្ទីរពេទ្យដែលមានមុខងារធំបំផុតនៅតំបន់ហ្កាហ្សា ខណៈវីដេអូបង្ហោះតាមអ៊ីនធឺណិតបង្ហាញពីភាពចលាចល ការស្រែកត្រហ៊ោយំ និងសំឡេងការបាញ់ប្រហារនៅក្នុងច្រករបៀងដ៏ងងឹតគ្របដណ្ដប់ដោយធូលី និងផ្សែង។ អ្នកនាំពាក្យយោធាអ៊ីស្រាអែល លោកឧត្តមនាវីឯក ដានីញែលហាហ្ការី (Daniel Hagari)បានពណ៌នាការវាយឆ្មក់លើមន្ទីរពេទ្យ ណាស័រ (Nasser)ថា ជាក់លាក់និងមានកម្រិត ហើយបាននិយាយថា ផ្អែកលើព័ត៌មានគួរឱ្យទុកចិត្តដែលថាក្រុមហាម៉ាសកំពុងលាក់ខ្លួននៅកន្លែងនោះ បានឃុំខ្លួនចំណាប់ខ្មាំងនៅទីនោះ ហើយសាកសពចំណាប់ខ្មាំងអាចនៅតែមាននៅទីនោះ។ ចំណែកអ្នកនាំពាក្យក្រុមហាម៉ាស បានហៅការអះអាងរបស់អ៊ីស្រាអែលថាជា រឿងកុហក។ ក្រុមអាជ្ញាធរសុខាភិបាលក្នុងតំបន់ប៉ាឡេស្ទីនបាននិយាយថា អ៊ីស្រាអែល បានបណ្តេញមនុស្សដែលបានភៀសខ្លួន និងក្រុមគ្រួសារបុគ្គលិកពេទ្យកំពុងស្នាក់នៅក្នុងមន្ទីរពេទ្យ Nasser ដោយមានប្រហែល ២ពាន់នាក់ ដែលបានមកដល់ទីក្រុងព្រំដែន Rafah ភាគខាងត្បូងហ្កាហ្សាទាំងយប់ ហើយមួយចំនួនទៀតបានរុញពីភាគខាងជើងទៅកាន់ ទីក្រុង ឌៀរ អាល់ បាឡា (Deir Al-Balah)នៅកណ្តាលក្រុងហ្កាហ្សា។ កងកម្លាំងអ៊ីស្រាអែល កំពុងរងសម្ពាធខ្លាំងពីអន្តរជាតិឲ្យរក្សាភាពអត់ធ្មត់ បន្ទាប់ពីការប្ដេជ្ញាចិត្តក្នុងការវាយប្រហារលើទីក្រុងរ៉ាហ្វា។ អង្គការសប្បុរសធម៌ក្រុមគ្រូពេទ្យគ្មានព្រំដែន បាននិយាយថា អ៊ីស្រាអែល បានបាញ់ផ្លោងលើមន្ទីរពេទ្យនេះ នៅពេលព្រឹក ទោះបីជាបានប្រាប់បុគ្គលិក និងអ្នកជំងឺថា ពួកគេអាចស្នាក់នៅក្នុងមន្ទីរពេទ្យនេះបានយ៉ាងណាក៏ដោយ៕

អាជ្ញាធរខណ្ឌដូនពេញចុះត្រួតពិនិត្យ ទីតាំងសង្ស័យមានបង្កប់ល្បែងស៉ីសង ក្នុងមូលដ្ឋាន

ភ្នំពេញ ៖ លោក ជា ខេមា អភិបាលខណ្ឌដូនពេញបានដឹកនាំកម្លាំងគណៈបញ្ជាការឯកភាពខណ្ឌចុះត្រួតពិនិត្យទីតាំងដែលសង្ស័យមានបង្កប់ល្បែងស៊ីសងនៅក្នុងមូលដ្ឋាន ក្នុងករណីរកឃើញមានបើកល្បែងស៊ីសង និងចាត់វិធានការតាមផ្លូវច្បាប់ ដោយមានការលើកលែងនោះឡើយ។ប្រតិបត្តិការចុះត្រួតពិនិត្យ ធ្វើឡើងនៅរសៀលថ្ងៃទី ១៥ ខែកុម្ភៈ ឆ្នាំ ២០២៤ ដឹកនាំផ្ទាល់ដោយលោក អភិបាលខណ្ឌ បន្ទាប់ពីបើកកិច្ចប្រជុំបន្ទាន់ស្តីពីការត្រួតពិនិត្យទីតាំងល្បែងផ្សងសំណាងខុសច្បាប់គ្រប់ប្រភេទនៅព្រឹកមិញនេះផងដែរ។លោក ជា ខេមា ប្រធានគណបញ្ជាការឯកភាពខណ្ឌដូនពេញ និងជាអភិបាលខណ្ឌ បានប្រាប់BTVឲ្យដឹងថា កម្លាំងអាជ្ញាធរខណ្ឌនិងចុះត្រួតពិនិត្យជាប់ជាប្រចាំដូចភ្លៀងរលឹម ក្នុងករណីកម្លាំងអាជ្ញាធរខណ្ឌរកឃើញមានទីតាំងបង្កប់ល្បែងស៊ីសងផ្សងសំណាងគ្រប់ប្រភេទ ឆ្នោតឡូតូ នោះលោកនឹងចាត់វិធានការយ៉ាងតឹងរឹងបំផុត បញ្ជូនទៅតុលាការចាត់ការតាមនិតិវិធី។ បន្ថែមទៀតនោះលោកបានប្ដេជ្ញានិងគាំទ្រនៅប្រសាសន៍របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីយ៉ាងពេញទំហឹងក្នុងការបង្ក្រាបនិងបញ្ឈប់នៅល្បែងស៉ីសងផ្សងសំណាងគ្រប់ភេទ ដើម្បីរក្សាសន្តិសុខសុវត្ថិភាពជូនប្រជាពលរដ្ឋដែលល្បែងស៊ីសងនេះជាប្រភពនៃអំពើលួចឆក់ប្លន់ ជាដើម។ចុងក្រោយលោកអភិបាលខណ្ឌបានសំណូមពរដល់ប្រជាពលរដ្ឋទាំងអស់ចូលរួមសហការជាមួយអាជ្ញាធរ បើដឹងថាមានទីតាំងណាមួយមានបើកបង្កប់ល្បែងស៊ីសងសូមរាយការណ៍បន្ទាន់មកអាជ្ញាធរនិងចុះបង្ក្រាបបានទាន់ពេលវេលា៕ អត្ថបទ៖ កុម្ភៈ

ឯកឧត្ដម គួច ចំរើន៖ជនជាតិចិនតៃវ៉ាន់២នាក់ផលិតវីដេអូញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គមនឹងត្រូវទទួលទោសចំពោះមុខច្បាប់ជាធរមាន

ព្រះសីហនុ៖ឯកឧត្តម គួច ចំរើន អភិបាលខេត្តព្រះសីហនុ បានថ្លែងថា ករណី ជនជាតិចិនតៃវ៉ាន់២នាក់ ដែលរួមគំនិតគ្នាផលិតមាតិកាវីដេអូប្រឌិតដែលធ្វើឲ្យប៉ះពាល់ដល់កិត្តិយស និងសណ្ដាប់ធ្នាប់សន្ដិសុខសង្គម ក្នុងខេត្តព្រះសីហនុ នឹងត្រូវទទួលទោសចំពោះមុខច្បាប់នៃព្រះរាជាណាចក្រកម្ពុជា មិនអាចលើកលែងបានឡើយ។ ឯកឧត្តមអភិបាលខេត្តព្រះសីហនុ បានថ្លែងបញ្ជាក់បែបនេះតាមរយៈសន្និសីទសារព័ត៌មានទាក់ទងនឹងការឃាត់ខ្លួនជនជាតិចិនតៃវ៉ាន់ទាំង២នាក់ ដែលត្រូវបានកម្លាំងជំនាញស្នងការដ្ឋាននគរបាលខេត្តព្រះសីហនុ ធ្វើការស្រាវជ្រាវ និងឈានដល់ការចាប់ខ្លួន នៅថ្ងៃទី១៣ ខែកុម្ភៈ ឆ្នាំ២០២៤ ម្សិលមិញ បន្ទាប់ពីពួកគេរួមគំនិតគ្នាផលិតមាតិកាវីដេអូប្រឌិត ដែលធ្វើឲ្យប៉ះពាល់ដល់កិត្តិយស និងសណ្ដាប់ធ្នាប់ នៅខេត្តព្រះសីហនុ។ សន្និសីទនេះធ្វើឡើងនៅរសៀលថ្ងៃទី១៥ ខែកុម្ភៈ ឆ្នាំ២០២៤ នៅសាលប្រជុំស្នងការដ្ឋាននគរបាលខេត្តព្រះសីហនុ។យោងតាមហ្វេសប៊ុករបស់ ឯកឧត្តម ឧត្តមសេនីយ៍ឯក ស រដ្ឋា អគ្គស្នងការរងនគរបាលជាតិ និងជាស្នងការនគរបាលខេត្តព្រះសីហនុ បានឱ្យដឹងថា នៅនារសៀលថ្ងៃទី១៥ ខែកុម្ភៈ ឆ្នាំ២០២៤នេះ ក្នុងនាមអគ្គស្នងការរង និងជាស្នងការនគរបាលខេត្តព្រះសីហនុ រួមជាមួយឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានធ្វើសន្និសីទសារព័ត៌មានលម្អិត ដើម្បីបង្ហាញអំពីជនសង្ស័យចំនួន ២នាក់ ជនជាតិចិនតៃវ៉ាន់ ដែលផលិតមាតិកាវីដេអូប្រឌិត ធ្វើឲ្យប៉ះពាល់ដល់កិត្តិយស សណ្ដាប់ធ្នាប់ និងសន្តិសុខ នៅខេត្តព្រះសីហនុ ។ ករណីនេះ កាលពីថ្ងៃទី១៣ ខែកុម្ភៈ ឆ្នាំ២០២៤ កម្លាំងជំនាញស្នងការដ្ឋាននគរបាលខេត្តព្រះសីហនុ បានធ្វើការឃាត់ខ្លួនជនជាតិចិនតៃវ៉ាន់ចំនួន២នាក់ នៅបន្ទប់ខុនដូមួយកន្លែង ដែលមានទីតាំងស្ថិតក្នុងក្រុងព្រះសីហនុ ខេត្តព្រះសីហនុ ក្រោយពួកគេរួមគ្នាផលិតវីដេអូក្លែងក្លាយ ដើម្បីទាក់ទាញការចាប់អារម្មណ៍ នៅលើបណ្ដាញសង្គមនានា ពិសេសបណ្ដាញសង្គម TikTok ដែលមានអ្នកគាំទ្រ និងចុចឡាយ រហូតដល់ជាង៥លាននាក់។ វីដេអូដែលពួកគេផលិតនោះ មានដូចជា ការប្រឌិតជាខ្មោចលងនៅតាមសណ្ឋាគារទុកចោល និងទីតាំងផ្សេងៗទៀត នៅក្នុងមូលដ្ឋានខេត្តព្រះសីហនុ។ តាមរយៈវីដេអូប្រឌិតទាំងអស់នេះ បានធ្វើឲ្យមហាជនមានការភ័យខ្លាច និងយល់ច្រឡំ ពិសេសអ្នកដែលរស់នៅក្រៅប្រទេស ដែលមានបំណងមកលេងកម្សាន្ដ ក៏ដូចជាមកទេសចរណ៍ក្នុងខេត្តព្រះសីហនុ។ ដែលធាតុពិតមិនមានហេតុការណ៍នេះកើតឡើងទេ ដោយជនសង្ស័យធ្វើដើម្បីទាក់ទាញការចូលមើល ឬដើម្បីបាន View ច្រើនតែប៉ុណ្ណោះ ។ ក្រោយការឃាត់ខ្លួនជនសង្ស័យទាំង ២នាក់ ខាងលើកម្លាំងសមត្ថកិច្ចជំនាញ បានដកហូតស្រោមមុខខ្មោច, កាំភ្លើងជ័រ, សំលៀកបំពាក់ទាហានប៉ារ៉ា,ទូរស័ព្ទដៃ, សម្ភារឧបករណ៍ផលិត Video Live និងសម្ភារបម្រើឲ្យការថតវីដេអូមួយចំនួន។ បច្ចុប្បន្នជនសង្ស័យទាំង ២នាក់ ខាងលើកំពុងឃាត់ខ្លួនជាបណ្ដោះអាសន្ន ដើម្បីកសាងសំណុំរឿងបញ្ជូនទៅសាលាដំបូងខេត្តព្រះសីហនុ ចាត់ការតាមនីតិវិធីច្បាប់៕

UN៖ ការប្រយុទ្ធគ្នារវាងកងទ័ពកុងហ្គោនិង ក្រុមឧទ្ទាម M23 នៅតែបន្តនៅភាគខាងកើត

អ្នកនាំពាក្យអង្គការសហប្រជាជាតិ បាននិយាយកាលពីថ្ងៃពុធថា ការប៉ះទង្គិចគ្នានៅតែបន្ត រវាងកងកម្លាំងសាធារណរដ្ឋប្រជាធិបតេយ្យកុងហ្គោ (DRC) ដែលគាំទ្រដោយកងរក្សាសន្តិភាពរបស់អង្គការសហប្រជាជាតិ និងកងកម្លាំងក្រុមឧទ្ទាម M23 នៅក្នុងខេត្ត ណស្ស គីវូ (North Kivu) ភាគខាងកើត។លោក ស្តេបហ្វេន ឌូចារីក(Stephane Dujarric) ប្រធានអ្នកនាំពាក្យរបស់អគ្គលេខាធិការអង្គការសហប្រជាជាតិលោក Antonio Guterres បាននិយាយដោយដកស្រង់របាយការណ៍ពីបេសកកម្មរបស់អង្គការសហប្រជាជាតិនៅសាធារណៈរដ្ឋប្រជាធិបតេយ្យកុងហ្គោ ថា ស្ថានភាពនៅខេត្ត North Kivu ជាពិសេសនៅក្នុងទីក្រុង Sake នៅតែតានតឹង ខណៈការប៉ះទង្គិចគ្នានៅតែកើតមាន។ កាលពីថ្ងៃអង្គារ ការប្រយុទ្ធគ្នា បានកើតឡើងនៅជាយក្រុង Sake មានចម្ងាយប្រមាណ២០ គីឡូម៉ែត្រភាគពាយព្យទីក្រុង Goma ។ លោក Dujarric បាននិយាយថា បេសកកម្មរក្សាសន្តិភាព កំពុងបន្តគាំទ្រកងកម្លាំងប្រដាប់អាវុធកុងហ្គោ ហើយកំពុងប្រឹងប្រែងអស់ពីសមត្ថភាពរបស់ខ្លួនដើម្បីការពារជនស៊ីវិល រួមទាំងការរក្សាវត្តមាននៅតាមបណ្តោយអ័ក្សទីក្រុង Goma និងទីក្រុង Sake ។ លោក និយាយថា កងរក្សាសន្តិភាពក៏បានបន្ថែមវត្តមានកម្លាំងរបស់ពួកគេនៅក្នុងទីក្រុង Sake ដោយការដាក់ពង្រាយកម្លាំងបន្ថែមដើម្បីគាំទ្រដល់កងកម្លាំងប្រដាប់អាវុធកុងហ្គោ។ បេសកកម្មរបស់កងរក្សាសន្តិភាព ក៏កំពុងការពារច្រករបៀងមនុស្សធម៌នៅក្នុងតំបន់ អឹមវ៉េសូ(Mweso) ដើម្បីជួយសម្រួលដល់ការធ្វើដំណើររបស់ជនស៊ីវិលទៅកាន់ដែនដីមានសុវត្ថិភាព។ លោក Dujarric បាននិយាយថា យើងកំពុងធ្វើការក្នុងនាមប្រជាជនកុងហ្គោ ការពារពួកគេ ព្យាយាមស្ដារសន្តិភាពឡើងវិញ នៅភាគខាងកើតប្រទេស និងគាំទ្រកងកម្លាំងប្រដាប់អាវុធកុងហ្គោ។ យើងនឹងជំរុញក្រុមឧទ្ទាមទាំងអស់ឱ្យធ្វើការឆ្ពោះទៅរកដំណោះស្រាយនយោបាយ និងបញ្ឈប់ការធ្វើឲ្យប្រជាជននៅក្នុងតំបន់នោះរងទុក្ខលំបាក ។ នៅពេលត្រូវបានសួរ នៅក្នុងសន្និសីទសារព័ត៌មានទៀងទាត់ ថាតើនណាកំពុងគាំទ្រ ក្រុមឧទ្ទាម M23 អ្នកនាំពាក្យបានឆ្លើយតបថា វាមិនមែនត្រឹមតែក្រុមឧទ្ទាម M23 ប៉ុណ្ណោះទេ វាមានក្រុមឧទ្ទាម ឬក្រុមមនុស្សមានកាំភ្លើងជាច្រើនក្រុមទៀត ដែលកំពុងធ្វើឱ្យជីវិតជនស៊ីវិលរស់នៅក្នុងតំបន់នោះ ក្លាយជាសុបិន្តអាក្រក់ ។

ប្រធានាធិបតីម៉ិកស៊ិក៖ ពាក់កណ្តាលនៃអាវុធរត់ពន្ធពីអាមេរិក ចូលទៅម៉ិកស៊ិក គឺមកពីរដ្ឋតិចសាស់

ប្រធានាធិបតីប្រទេសម៉ិកស៊ិក លោក Andres Manuel Lopez Obrador បាននិយាយ កាលពីថ្ងៃពុធ ថា ពាក់កណ្តាលនៃអាវុធទាំងអស់ ដែលចូលមកប្រទេសម៉ិកស៊ិកពីសហរដ្ឋអាមេរិក គឺមកពីរដ្ឋតិចសាស់។ថ្លែងក្នុងសន្និសីទសារព័ត៌មានប្រចាំថ្ងៃ លោក Lopez Obrador បានចោទសួរថា ហេតុអ្វីបានជាអភិបាលរដ្ឋតិចសាស់ លោក ហ្គ្រេក អាបុត(Greg Abbott) អនុញ្ញាតឱ្យស្ថានភាពនេះនៅបន្ត ដោយបានចាត់ទុកលោកថា ជាអ្នកគាំទ្រដ៏សំខាន់ម្នាក់នៃការគ្រប់គ្រងព្រំដែនកាន់តែតឹងរ៉ឹង។យោងតាមលោកប្រធានាធិបតីបានឲ្យដឹងថា ចាប់តាំងពីការចាប់ផ្តើមនៃរដ្ឋបាលរបស់លោក ក្នុងខែធ្នូ ឆ្នាំ ២០១៨ អាវុធជិត ៥០.០០០ ដើម ត្រូវបានរឹបអូស ដែល៧០ភាគរយក្នុងចំណោមនេះ មានប្រភពមកពីសហរដ្ឋអាមេរិក ហើយពាក់កណ្តាលនៃភាគរយនេះ មកពីរដ្ឋតិចសាស់។លោក Lopez Obrador បានសួរអ្នកសារព័ត៌មាន នៅវិមានជាតិក្នុងទីក្រុងម៉ិកស៊ិកស៊ីធី ថាតើអភិបាលរដ្ឋតិចសាស់ ឆ្លើយតបយ៉ាងណាចំពោះរឿងនេះ?។ប្រទេសម៉ិកស៊ិក បានអំពាវនាវម្តងហើយម្តងទៀត ឱ្យសហរដ្ឋអាមេរិក ធ្វើការងារបន្ថែមទៀត ដើម្បីគ្រប់គ្រងលំហូរអាវុធចូលទៅក្នុងប្រទេសម៉ិកស៊ិក ដែលបង្កឱ្យមានអំពើហិង្សា ជាពិសេសរវាងអង្គការឧក្រិដ្ឋកម្ម ដែលជាគូប្រជែង។កាលពីសប្តាហ៍មុន រដ្ឋាភិបាលប្រទេសម៉ិកស៊ិក បានស្នើដល់សហរដ្ឋអាមេរិក និងប្រទេសកាណាដា ឲ្យជួយប្រយុទ្ធប្រឆាំងការជួញដូរអាវុធ ដែលមានឥទ្ធិពលខ្លាំង។

ប្រទេសថៃ ព្រមានពីកង្វក់ខ្យល់ខ្លាំងក្នុងទីក្រុងបាងកក ខណៈស្នើឱ្យបុគ្គលិករដ្ឋាភិបាលធ្វើការពីចំងាយ

អាជ្ញាធរប្រទេសថៃបានព្រមានថា កម្រិតកង្វក់ខ្យល់នៅទីក្រុងបាងកក និងខេត្តជុំវិញនោះបានឈានដល់កម្រិតមិនល្អសម្រាប់សុខភាពនៅថ្ងៃព្រហស្បតិ៍ (១៥ កុម្ភៈ) នេះដោយបានបញ្ជាឱ្យបុគ្គលិករដ្ឋាភិបាលក្នុងរដ្ឋធានីធ្វើការពីចំងាយរយៈពេលពីរថ្ងៃបន្ទាប់ និងជំរុញឱ្យអ្នកផ្សេងទៀតធ្វើដូចគ្នានេះ។កង្វក់ខ្យល់គឺបណ្តាលមកពីការរួមផ្សំគ្នានៃចំហេះដែលទាក់ទងនឹងដំណាំ ការបំពុលឧស្សាហកម្ម និងចរាចរណ៍ដ៏មមាញឹក ហើយអ័ព្ទផ្សែងបានគ្របដណ្តប់លើមេឃនៃទីក្រុងបាងកក។គេហទំព័រតាមដានគុណភាពខ្យល់របស់ប្រទេសស្វីស IQAir បាននិយាយថា កម្រិតនៃភាគល្អិតនៃខ្យល់អាចដកដង្ហើមបាននៅក្នុងទីក្រុងនេះ គឺខ្ពស់ជាងកម្រិត ដែលបានណែនាំដោយអង្គការសុខភាពពិភពលោក ១៥ ដង ដែលធ្វើឱ្យបាងកក ក្លាយជាទីក្រុងដែលបំពុលបំផុតទី៨ របស់ពិភពលោកនៅថ្ងៃព្រហស្បតិ៍នេះ។នៅក្នុងកិច្ចខិតខំប្រឹងប្រែងដើម្បីទប់ស្កាត់កង្វក់ខ្យល់ដែលបណ្ដាលមកពីចរាចរណ៍ អភិបាលក្រុងបាងកក លោក ឆាត់ឆាត ស៊ីតធីភុន (Chadchart Sittipunt) បានប្រាប់បុគ្គលិកនៅទីភ្នាក់ងាររបស់រដ្ឋបាលឱ្យធ្វើការពីផ្ទះ ហើយបាននិយាយថាបុគ្គលិកផ្សេងទៀតក៏គួរតែធ្វើដូចគ្នានេះដែរ៕

រដ្ឋមន្ត្រីការបរទេសប៉ាឡេស្ទីន៖ លោកណេតាន់យ៉ាហ៊ូ កំពុងបន្តសង្រ្គាម «សម្រាប់អាជីពផ្ទាល់របស់ខ្លួន»

រដ្ឋមន្ត្រីការបរទេសប៉ាឡេស្ទីន លោករីយ៉ាដ អាល់ ម៉ាលីគី (Riyad al-Maliki) បានចោទប្រកាន់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) កាលពីថ្ងៃពុធ ពីការយកចិត្តទុកដាក់តែលើការរស់រានមានជីវិតផ្នែកនយោបាយរបស់ខ្លួន ខណៈដែលកិច្ចប្រឹងប្រែង ដើម្បីបញ្ចប់ជម្លោះ នៅតំបន់ហ្កាហា ហាក់ដូចជាមិនអាចសន្និដ្ឋានបាន។មនុស្សជាង ២៨.០០០នាក់ ត្រូវបានសម្លាប់ និង ៦៨.000នាក់ទៀត បានរងរបួសនៅក្នុងតំបន់ហ្កាហ្សា ក្នុងអំឡុងពេលយុទ្ធនាការយោធាសងសឹករបស់អ៊ីស្រាអែលប្រឆាំងនឹងក្រុមសកម្មប្រយុទ្ធហាម៉ាស ដែលគ្រប់គ្រងតំបន់នេះ បន្ទាប់ពីការវាយប្រហារឆ្លងព្រំដែនដ៏សាហាវរបស់ពួកគេចូលទៅក្នុងអ៊ីស្រាអែលភាគខាងត្បូង កាលពីថ្ងៃទី៧ ខែតុលា នៅពេលដែលពួកគេបានសម្លាប់មនុស្ស ១.២០០ នាក់ និងចាប់ចំណាប់ថ្នូរ២៥៣នាក់។ឥឡូវនេះ ក្តីបារម្ភកំពុងកើនឡើងនៃការវាយលុកថ្មើរជើងរបស់អ៊ីស្រាអែលប្រឆាំងនឹងទីប្រជុំជនរ៉ាហ្វា ដែលជាជម្រកចុងក្រោយសម្រាប់ជនជាតិប៉ាឡេស្ទីនជាងមួយលាននាក់ដែលជាប់ខ្លួនស្ទើរតែទាំងអស់ បន្ទាប់ពីពួកគេ បានភៀសខ្លួនទៅកាន់ភាគខាងត្បូងនៃដែនដីនេះ ដើម្បីជៀសវាងការវាយប្រហាររបស់អ៊ីស្រាអែល។លោកម៉ាលីគី ជាសមាជិកនៃអាជ្ញាធរប៉ាឡេស្ទីនដែលគ្រប់គ្រងតំបន់វេសបែង បាននិយាយថា វាជាការចាំបាច់ក្នុងការស្វែងរកមធ្យោបាយ ដើម្បីទប់ស្កាត់ការវាយប្រហារលើទីក្រុងរ៉ាហ្វា។លោក ម៉ាលីគី បាននិយាយបន្ទាប់ពីជួបលោក កុនស្តែនទីណូស កូមបូស (Constantinos Kombos) រដ្ឋមន្ត្រីការបរទេសកោះស៊ីបថា លោកណេតាន់យ៉ាហ៊ូ បានប្តេជ្ញាថា លោកចង់បន្តសង្រ្គាមសម្រាប់អាជីពផ្ទាល់របស់ខ្លួន ដើម្បីអនាគតផ្ទាល់ខ្លួន ហើយវាច្បាស់ណាស់ថា លោកមិនខ្វល់ពីជោគវាសនាជីវិតរបស់ប្រជាជនស្លូតត្រង់ទាំងនៅក្នុងប្រទេសអ៊ីស្រាអែល និងនៅប៉ាឡេស្ទីន រួមទាំងចំណាប់ថ្នូរអ៊ីស្រាអែល និងប្រជាជនប៉ាឡេស្ទីនស្លូតត្រង់ នៅតំបន់ហ្កាហ្សា»។

បណ្ដាញសង្គម

ព័ត៌មានថ្មីៗ

កម្ពុជា-សិង្ហបុរី ប្ដេជ្ញាបន្តជំរុញសន្ទុះនៃទំនាក់ទំនង និងកិច្ចសហប្រតិបត្តិការដ៏ជិតស្និទ្ធនេះ ឱ្យកាន់តែរឹងមាំ

កម្ពុជា-វៀតណាម ប្ដេជ្ញាជំរុញទំនាក់ទំនង និងកិច្ចសហប្រតិបត្តិការទ្វេភាគី

ការកាត់បន្ថយជំនួយ គ្រោះរាំងស្ងួត និងជម្លោះ ធ្វើឲ្យពលរដ្ឋសូម៉ាលី រងទុក្ខយ៉ាងធ្ងន់ធ្ងរ

ឆាដប្រកាសកាន់ទុក្ខថ្នាក់ជាតិរយៈពេល ៣ថ្ងៃ ក្រោយការពួនស្ទាក់វាយប្រហារស្លាប់មនុស្សរបស់ក្រុមឧទ្ទាម Boko Haram

សម្ដេចធិបតីនាយករដ្ឋមន្ត្រី និងនាយរដ្ឋមន្រ្តីថៃ បញ្ជាក់ពីការប្តេជ្ញាចិត្តរួមគ្នាសម្រាប់សន្តិភាពយូរអង្វែង

ចោរសមុទ្រសូម៉ាលី បោះបង់ចោលទូកក្តោងរបស់អារ៉ាប់រួម ក្រោយពួកគេជិតអស់គ្រឿងផ្គត់ផ្គង់

សម្ដេចធិបតី៖ កម្ពុជាមិនទទួលស្គាល់ជាដាច់ខាត «ខ្សែបន្ទាត់ព្រំដែន» បង្កើតឡើងដោយការប្រើប្រាស់កម្លាំង

ប្រភព៖ អាមេរិក និងអ៊ីរ៉ង់ជិតឆ្ពោះទៅរកកិច្ចព្រមព្រៀងរយៈពេលខ្លី ដើម្បីបញ្ចប់សង្រ្គាម

ប្រធានាធិបតីប៉ារ៉ាហ្គាយសរសើរមិត្តភាពជាមួយកោះតៃវ៉ាន់ ខណៈចិនប្រាប់ឲ្យកាត់ផ្តាច់ចំណងទាក់ទង

លោក Netanyahu៖ «គ្មានភេរវករណាម្នាក់រួចខ្លួនទេ» ក្រោយអ៊ីស្រាអែលសម្លាប់មេបញ្ជាការក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877