BTV NEWS

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

នគរបាលរាជធានីឃាត់ខ្លួនបុរសម្នាក់ បែកធ្លាយសម្លេងតាមបណ្តាញសង្គម ម៉ាក់ងាយធ្ងន់ធ្ងរលើវីរជនកងទ័ពកម្ពុជា

កម្លាំងសមត្ថកិច្ចឃាត់ខ្លួនជនជាតិចិនចំនួន០៧នាក់ និងដកហូតសារធាតុញៀនជិត១តោន រួមទាំងអាវុធវែងខ្លីជាច្រើនដើម

សន្តិសុខ និង សង្គម

ប្រមុខការទូតសហរដ្ឋអាមេរិក ថ្លែងថា ជនជាតិប៉ាឡេស្ទីន ត្រូវតែអាចរស់នៅក្នុងតំបន់ហ្កាហ្សា

រដ្ឋមន្ត្រីការបរទេសSសហរដ្ឋអាមេរិក លោក Antony Blinken និយាយថា ប្រជាជនប៉ាឡេស្ទីនមិនត្រូវរងសម្ពាធឱ្យចាកចេញពីតំបន់ហ្កាហ្សានោះទេ ហើយត្រូវតែត្រូវបានអនុញ្ញាតឱ្យត្រឡប់ទៅផ្ទះសម្បែងរបស់ពួកគេវិញ នៅពេលដែលលក្ខខណ្ឌនានាអនុញ្ញាត។ លោក Blinken បានថ្កោលទោសសេចក្តីថ្លែងការណ៍របស់រដ្ឋមន្ត្រីអ៊ីស្រាអែលមួយចំនួន ដែលបានអំពាវនាវឱ្យមានការតាំងទីលំនៅថ្មីរបស់ពលរដ្ឋប៉ាឡេស្ទីននៅកន្លែងផ្សេង។ មន្ត្រីសហរដ្ឋអាមេរិករូបនេះ កំពុងមានវត្តមាននៅប្រទេសកាតា ក្នុងដំណើរទស្សនកិច្ចនៅមជ្ឈិមបូព៌ាចុងក្រោយរបស់លោក។ ការអត្ថាធិប្បាយរបស់លោក កើតឡើងបន្ទាប់ពីមានសេចក្តីរាយការណ៍ថា មនុស្សរាប់សិបនាក់ត្រូវបានសម្លាប់នៅជំរំជនភៀសខ្លួនមួយកន្លែងនៅភាគខាងជើងតំបន់ហ្កាហ្សា។វីដេអូពីជំរំជនភៀសខ្លួនចាបាលីយ៉ា(Jabalia)បង្ហាញសាកសពដេករណូករណែលនៅក្នុងគំនរថ្មបាក់បែកនៃអគារដែលត្រូវបានបំផ្លាញ ដែលភាគច្រើនជាស្ត្រី និងកុមារ។យោធាអ៊ីស្រាអែល ពុំទាន់ឆ្លើយតបនឹងរបាយការណ៍នេះនៅឡើយទេ។ប្រជាជនប៉ាឡេស្ទីនជាង ៦០ នាក់ត្រូវបានគេរាយការណ៍ថាបានស្លាប់ផងដែរនៅក្នុងថ្ងៃកន្លងមកនៅក្នុងទីក្រុង Khan Younis ភាគខាងត្បូង។ ជំរំ ចាបាលីយ៉ា ត្រូវបានវាយប្រហារជាច្រើនដង ចាប់តាំងពីអ៊ីស្រាអែលបានចាប់ផ្តើមសង្រ្គាមប្រឆាំងនឹងក្រុមហាម៉ាស បន្ទាប់ពីការវាយប្រហារមិនធ្លាប់មានដោយខ្មាន់កាំភ្លើងក្រុមហាម៉ាស នៅលើភាគខាងត្បូងអ៊ីស្រាអែលកាលពីថ្ងៃទី ៧ ខែតុលា២០២៣កន្លងមកនេះ។យោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស មនុស្សជាង២២.០០០នាក់ ដែលភាគច្រើនជាស្ត្រី និងកុមារ បានស្លាប់នៅតំបន់ហ្កាហ្សា។ប្រភពខាងលើបានរាយការណ៍ថាមានមនុស្សស្លាប់យ៉ាងហោចណាស់ ១១៣ នាក់ក្នុងរយៈពេល ២៤ ម៉ោងនៃការទម្លាក់គ្រាប់បែករបស់អ៊ីស្រាអែល៕

ចំនួនអ្នកស្លាប់ក្នុងគ្រោះរញ្ជួយដីជប៉ុនឡើងដល់ ១៦១នាក់ និងមនុស្សជាង ១០០នាក់បន្តបាត់ខ្លួន

ក្រុមមន្ត្រីនៅក្នុងខេត្ត អ៊ីស៊ីកាវ៉ា (Ishikawa) ភាគកណ្តាលប្រទេសជប៉ុន បាននិយាយថា មនុស្សចំនួន ១៦១នាក់ ត្រូវបញ្ជាក់ថាបានស្លាប់ និងមនុស្ស ១០៣នាក់ នៅតែបាត់ខ្លួន និងមិនទាន់សង្រ្គោះបានបន្ទាប់ពីការរញ្ជួយដីដ៏ខ្លាំងក្លានៅថ្ងៃចូលឆ្នាំថ្មី។ មន្ត្រីឧតុនិយមកំពុងព្រមានអំពីការរំខានចរាចរណ៍ ខណៈដែលព្រិលធ្លាក់ខ្លាំងត្រូវបានគេរំពឹងថានឹងគ្របដណ្តប់តំបន់ដែលរងគ្រោះដោយគ្រោះរញ្ជួយដីនេះ។ ក្រុមមន្រ្តីទាំងនោះនិយាយថាខេត្តនេះទំនងជាមានព្រិលធ្លាក់រហូតដល់កម្រាស់ ៦០សង់ទីម៉ែត្រក្នុងរយៈពេល ២៤ម៉ោងរហូតដល់ព្រឹកថ្ងៃច័ន្ទ (០៨ មករា) នេះ។ ប្រតិបត្តិការជួយសង្គ្រោះបាននិងកំពុងបន្ត បើទោះជាអាកាសធាតុត្រជាក់ខ្លាំង និងភ្លៀងធ្លាក់ក៏ដោយ ហើយមនុស្សជិត ៣០.០០០នាក់ នៅក្នុងខេត្តនេះកំពុងជ្រកកោនក្នុងជម្រកបណ្ដោះអាសន្ន។ក្រុមមន្ត្រី ណែនាំប្រជាជននៅកន្លែងជម្លៀសឱ្យចាត់វិធានការបង្ការប្រឆាំងនឹងជំងឺឆ្លង ដោយពួកគេនិយាយថា ករណីនៃមេរោគឆ្លងកូវីដ ត្រូវបានរាយការណ៍។ ប្រជាជនប្រហែល ២០.០០០គ្រួសារ កំពុងដោះស្រាយជាមួយនឹងបញ្ហាដាច់ចរន្តអគ្គិសនី ហើយមនុស្ស ៦៦.០០០នាក់មិនមានទឹកប្រើប្រាស់នោះទេរហូតមកដល់ពេលនេះ៕

កោះតៃវ៉ាន់ ថ្កោលទោសបាឡុងរបស់ចិនថា ជាការគំរាមកំហែងសុវត្ថិភាព និងសង្គ្រាមផ្លូវចិត្ត

អាជ្ញាធរការពារជាតិរបស់កោះតៃវ៉ាន់បានចោទប្រកាន់ប្រទេសចិន កាលពីថ្ងៃសៅរ៍ (០៦ មករា) ថាបានគំរាមកំហែងសុវត្ថិភាពអាកាសចរណ៍ និងធ្វើសង្គ្រាមចិត្តសាស្ត្រលើប្រជាជនកោះតៃវ៉ាន់ ជាមួយនឹងបាឡុងថ្មីៗដែលប្រទះឃើញនៅជិត ឬពីលើកោះនេះ ប៉ុន្មានថ្ងៃមុនការបោះឆ្នោតតៃវ៉ាន់សំខាន់ៗ។លទ្ធភាពដែលប្រទេសចិន ប្រើប្រាស់បាឡុងសម្រាប់ចារកម្មបានក្លាយជាបញ្ហាសកលកាលពីខែកុម្ភៈ នៅពេលដែលសហរដ្ឋអាមេរិក បានបាញ់ទម្លាក់នូវអ្វីដែលខ្លួនបាននិយាយថាជាបាឡុងឃ្លាំមើលរបស់ចិន ប៉ុន្តែចិនបាននិយាយថា បាឡុងនោះជាយានស៊ីវិលដែលបានរសាត់ដោយចៃដន្យប៉ុណ្ណោះ។នៅក្នុងសេចក្តីថ្លែងការណ៍មួយកាលពីថ្ងៃសៅរ៍ អាជ្ញាធរការពាជាតិតៃវ៉ាន់បាននិយាយថា បាឡុងចិនគឺជា «ការគំរាមកំហែងយ៉ាងធ្ងន់ធ្ងរ» ចំពោះសុវត្ថិភាពអាកាសចរណ៍អន្តរជាតិ ដែលជាផ្លូវហោះហើររបស់ខ្លួន។ អាជ្ញាធរនេះបានបន្តថាការវិភាគរបស់ខ្លួនគឺថាបាឡុងរបស់ចិននោះគឺជាផ្នែកមួយនៃយុទ្ធសាស្ត្រ «តំបន់ប្រផេះ» របស់ចិនប្រឆាំងនឹងកោះតៃវ៉ាន់ «ក្នុងការប៉ុនប៉ងប្រើសង្រ្គាមផ្លូវចិត្តដើម្បីជះឥទ្ធិពលដល់ទំនុកចិត្តរបស់ប្រជាជនរបស់យើង»។កោះតៃវ៉ាន់កំពុងមានការប្រុងប្រយ័ត្នខ្ពស់ចំពោះសកម្មភាពយោធានិងនយោបាយរបស់ចិននៅមុនការបោះឆ្នោតមេដឹកនាំ និងសភា នៅថ្ងៃទី១៣ ខែមករា ខាងមុខនេះ។ កោះគ្រប់គ្រងបែបប្រជាធិបតេយ្យនេះនិយាយថាប្រទេសចិនកំពុងដាក់សម្ពាធផ្នែកយោធា និងសេដ្ឋកិច្ចក្នុងការប៉ុនប៉ងជ្រៀតជ្រែកក្នុងការបោះឆ្នោត៕

លោក Blinken ព្រមានថា ជម្លោះនៅតំបន់ហ្កាហ្សា ប្រឈមនឹងហានិភ័យនៃការរីករាលដាល

អ្នកការទូតជាន់ខ្ពស់របស់សហរដ្ឋអាមេរិក បានធ្វើដំណើរឆ្លងកាត់មជ្ឈិមបូព៌ាកាលពីថ្ងៃអាទិត្យ (០៧ មករា) ដោយព្រមានថាជម្លោះនៅតំបន់ហ្កាហ្សា អាចរីករាលដាលពាសពេញតំបន់បើមិនមានការខិតខំប្រឹងប្រែងសន្តិភាពរួមគ្នា ទោះបីជាមេដឹកនាំអ៊ីស្រាអែល បានប្តេជ្ញាបន្តសង្រ្គាមរហូតដល់ក្រុមហាម៉ាសត្រូវបានលុបបំបាត់ក៏ដោយ។រដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) នៅពេលចាប់ផ្តើមនៃដំណើរទស្សនកិច្ចរយៈពេលប្រាំថ្ងៃរបស់ខ្លួននៅក្នុងតំបន់ ក៏បានស្វះស្វែងរកការធានាដល់បណ្ដាមេដឹកនាំអារ៉ាប់ថាទីក្រុងវ៉ាស៊ីនតោន ប្រឆាំងនឹងការផ្លាស់ទីលំនៅដោយបង្ខំរបស់ជនជាតិប៉ាឡេស្ទីនពីតំបន់ហ្កាហ្សា ឬតំបន់ វេស បែង (West Bank) ដែលកាន់កាប់។លោក Blinken បាននិយាយនៅក្នុងសន្និសីទសារព័ត៌មាននៅទីក្រុងដូហា ថា «នេះគឺជាពេលវេលានៃភាពតានតឹងដ៏ជ្រាលជ្រៅសម្រាប់តំបន់។ នេះគឺជាជម្លោះដែលអាចរីករាលដាលយ៉ាងងាយស្រួល ដែលបណ្តាលឱ្យមានភាពអសន្តិសុខ និងការឈឺចាប់កាន់តែខ្លាំង»។ទោះបីជាមានការព្រួយបារម្ភជាសកលលើចំនួនអ្នកស្លាប់ និងការបំផ្លិចបំផ្លាញនៅតំបន់ហ្កាហ្សា និងការអំពាវនាវយ៉ាងទូលំទូលាយឱ្យមានបទឈប់បាញ់ក៏ដោយ ក៏មតិសាធារណៈរបស់អ៊ីស្រាអែល នៅតែនៅគាំទ្រប្រតិបត្តិការដែលមានបំណងកម្ចាត់ក្រុមហាម៉ាស ដែលគ្រប់គ្រងតំបន់ហ្កាហ្សា បើទោះបីជាការគាំទ្រសម្រាប់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានធ្លាក់ចុះយ៉ាងខ្លាំងក៏ដោយ៕

គ្រួសារចំណាប់ខ្មាំងអ៊ីស្រាអែល អំពាវនាវឱ្យក្រុមអ្នកសម្របសម្រួល បង្កើនកិច្ចខិតខំប្រឹងប្រែងទ្វេដង ដើម្បីធានាការដោះលែង

ក្រុមសមាជិកគ្រួសាររបស់ចំណាប់ខ្មាំងក្នុងដៃក្រុមហាម៉ាស ដែលនៅសេសសល់នៅក្នុងតំបន់ហ្កាហ្សាបានអំពាវនាវដល់ប្រទេសកាតា និងភាគីចរចាផ្សេងទៀតកាលពីថ្ងៃអាទិត្យ ៧ មករា ឱ្យ បង្កើនកិច្ចខិតខំប្រឹងប្រែងទ្វេដង ដើម្បីធានាបានការដោះលែងមនុស្សជាទីស្រឡាញ់របស់ពួកគេ។ ក្រុមគ្រួសារទាំងនោះបាននិយាយថា ពួកគេបានជួបក្រុមមន្ត្រីជាន់ខ្ពស់កាតាដែលពាក់ព័ន្ធនឹងការចរចាកាលពីចុងសប្តាហ៍នេះ។ ខណៈការប្រុងប្រយ័ត្នរបស់អ៊ីស្រាអែលចំពោះចំណាប់ខ្មាំងរបស់ខ្លួននៅក្នុងតំបន់ហ្កាហ្សាបានឈានចូលដល់ខែទី ៤ អារម្មណ៍ថាពេលវេលាកំពុងកន្លងផុតទៅ ខណៈការយកចិត្តទុកដាក់របស់ពិភពលោកបង្វែរទៅកន្លែងផ្សេងទៀត បានធ្វើឱ្យគ្រួសាររបស់ពួកគេមានអារម្មណ៍សោកសៅកាន់តែខ្លាំង ខណៈក្តីសង្ឃឹមបានរសាត់ទៅសម្រាប់កិច្ចព្រមព្រៀងមួយដើម្បីធានាការដោះលែងចំណាប់ថ្នូរទាំងនោះ។រដ្ឋមន្ត្រីការបរទេសអាមេរិក លោក Antony Blinken កំពុងស្ថិតនៅទីក្រុង ដូហា (Doha)ប្រទេសកាតា ជាទីដែលលោកបានពិភាក្សាជាមួយមេដឹកនាំកាតាលើកិច្ចខិតខំប្រឹងប្រែងដើម្បីដោះលែងចំណាប់ថ្នូរដែលនៅតែត្រូវបានគេជឿថាត្រូវបានឃុំឃាំងដោយក្រុមហាម៉ាស បន្ទាប់ពីកិច្ចព្រមព្រៀងកាលពីកន្លងទៅសម្របសម្រួលដោយកាតាបានផុតសុពលភាព។ក្នុងចំណោមមនុស្សប្រហែល២៤០ នាក់ដែលត្រូវបានចាប់ជាចំណាប់ថ្នូរកាលពីថ្ងៃទី ៧ ខែតុលា ស្ទើរតែពាក់កណ្តាល ត្រូវបានដោះលែងដោយក្រុមហាម៉ាស អំឡុងបទឈប់បាញ់មួយកាលពីខែវិច្ឆិកាឆ្នាំ២០២៣កន្លងទៅនេះ ៕

សាកសពជនអន្តោប្រវេសន៍ត្រូវបាននាំមដល់ឆ្នេរកោះ Tenerife របស់អេស្ប៉ាញ ក្រោយទូកលិចនៅក្នុងសមុទ្រអាត្លង់ទិក

កាលពីថ្ងៃព្រសហ្បតិ៍ម្សិលមិញ សាកសពរបស់ជនអន្តោប្រវេសន៍ ៥នាក់ ត្រូវបាននាំមកដល់កំពង់ផែ Los Cristianos កោះ Tenerife ស្ថិតក្នុងប្រជុំកោះ Canary របស់អេស្ប៉ាញ ក្រោយឆ្មាំល្បាតឆ្នេរ បានប្រទះឃើញពួកគេនៅក្នុងទូកឈើដ៏ធំមួយនៅក្នុងសមុទ្រអាត្លង់ទិក កាលពីថ្ងៃអាទិត្យ ។ សារព័ត៌មានក្នុងស្រុក បានរាយការណ៍ថា ក្រុមឆ្មាំល្បាតឆ្នេរ និយាយថា បុរស ១៥នាក់ មកពីប្រទេសម៉ាលី ត្រូវបានប្រទះឃើញនៅរស់នៅលើទូកក្នុងសមុទ្រអាត្លង់ទិក ហើយយោងតាមការបញ្ជាក់ពីអ្នករស់រាន បានឲ្យដឹងថា មនុស្សចន្លោះពី ៣០ និង ៤០នាក់ផ្សេងទៀត បានស្លាប់ ពេលដែលទូករបស់ពួកគេក្រឡាប់ ក្រោយចាកចេញពីប្រទេសម៉ូរីតានី ។ គួរឲ្យដឹងថា អន្តោប្រវេសន៍សរុបចំនួន ៥៦.៨៥២នាក់ បានធ្វើដំណើរមកដល់ប្រទេសអេស្ប៉ាញដោយខុសច្បាប់ តាមជើងគោក ឬជើងទឹកក្នុងឆ្នាំ ២០២៣ ពោលគឺកើនឡើង ៨២ភាគរយបើធៀបនឹងឆ្នាំមុន ហើយនិងជាចំនួនជនអន្តោប្រវេសន៍ខ្ពស់បំផុត ចាប់តាំងពីឆ្នាំ ២០១៨ ពេលដែលការមកដល់របស់ជនអន្តោប្រវេសន៍ចំនួន ៦៤.២៩៨នាក់ ត្រូវបានចុះបញ្ជី ។ កាលពីឆ្នាំមុន រដ្ឋាភិបាលអេស្ប៉ាញ បានបង្កើនការទាក់ទងរបស់ពួកគេជាមួយក្រុមអាជ្ញាធរនៅតាមប្រទេសជាច្រើន ដូចជាប្រទេសសេណេហ្គាល់ និងប្រទេសម៉ូរីតានី ដើម្បីបង្វែរទិសដៅធ្វើដំណើររបស់ជនអន្តោប្រវេសន៍ ។ ប្រទេសអេស្ប៉ាញ បានបង្កើតកន្លែងស្នាក់នៅបន្ទាន់បន្ថែមទៀតសម្រាប់ជនអន្តោប្រវេសន៍ផងដែរ នៅតាមបន្ទាយទាហានរបស់ខ្លួន តាមសណ្ឋាគារ និងផ្ទះសំណាក់ទូទាំងប្រទេស ៕

ប្រជាជនជាច្រើនគ្រួសារ នៅហ្កាហ្សាដែលស្វែងរកអាហារ និងទឹកដោយអស់សង្ឃឹម កំពុងរង់ចាំជំនួយ

ដោយជាប់ខ្លួននៅជ្រុងមួយនៃតំបន់ហ្កាហ្សាភាគខាងត្បូង សមាជិកនៃគ្រួសាររបស់លោក Abu Jarad កំពុងប្រកាន់ខ្ជាប់នូវទម្លាប់ដ៏តឹងតែង ដើម្បីរស់រានមានជីវិត។ពួកគេ បានភៀសខ្លួនចេញពីផ្ទះដែលមានបន្ទប់គេងបី ដែលមានផាសុកភាពរបស់ពួកគេ នៅតំបន់ហ្កា ហ្សាភាគខាងជើង បន្ទាប់ពីសង្រ្គាមអ៊ីស្រាអែល និងក្រុមហាម៉ាស បានផ្ទុះឡើងជិតបីខែមុន។ គ្រួសារដែលមានមនុស្ស១០នាក់ ឥឡូវនេះបានជ្រៀតចូលទៅក្នុងតង់ទំហំ ១៦ម៉ែត្រការ៉េ នៅលើដីខ្សាច់ពោរពេញដោយសំរាម ដែលជាផ្នែកនៃជំរំដ៏ធំទូលាយនៃប្រជាជនប៉ាឡេស្ទីនដែលផ្លាស់ទីលំនៅ។សមាជិកគ្រួសារនីមួយៗ ត្រូវបានចាត់ចែងឲ្យធ្វើកិច្ចការប្រចាំថ្ងៃ ចាប់ពីការប្រមូលគល់ឈើ ដុតភ្លើងសម្រាប់ចម្អិនអាហារ រហូតដល់ដើររើសបន្លែនៅតាមផ្សារ ក្នុងទីក្រុងនេះ ។ ប៉ុន្តែការប្រឹងប្រែងអស់ពីសមត្ថភាពរបស់ពួកគេ មិនអាចបិទបាំងការអស់សង្ឃឹមរបស់ពួកគេបានទេ។លោក Awatif Abu Jarad សមាជិកវ័យចំណាស់នៃគ្រួសារនេះ បាននិយាយថា នៅពេលយប់ «សត្វសុខន រត់លើតង់ ដែលយើងកំពុងជ្រក»។«យើងរស់នៅដូចសុខន!»។ប្រជាជនប៉ាឡេស្ទីនដែលកំពុងស្វែងរកការជ្រកកោន នៅតំបន់ហ្កាហ្សាភាគខាងត្បូង បាននិយាយថា ជារៀងរាល់ថ្ងៃ បានក្លាយទៅជាការតស៊ូ ដើម្បីស្វែងរកអាហារ ទឹក ថ្នាំពេទ្យ និងធ្វើបន្ទប់ទឹកជាដើម។ គ្រប់ពេលទាំងអស់ ពួកគេរស់នៅក្នុងភាពភ័យខ្លាចនៃការវាយប្រហារតាមអាកាសរបស់អ៊ីស្រាអែល និងការគំរាមកំហែងកាន់តែខ្លាំងឡើងនៃជំងឺផ្សេងៗ។

ការធ្លាក់យន្តហោះរបស់ជប៉ុន គឺការសាកល្បងពីរបៀបដែលយន្តហោះកាបូនថ្មីទប់ទល់នឹងគ្រោះមហន្តរាយ

ការធ្លាក់នៅលើផ្លូវរត់កាលពីថ្ងៃអង្គារ ក្នុងប្រទេសជប៉ុន គឺជាលើកទី១ហើយ ដែលយន្តហោះធុនស្រាលទំនើបបានឆេះ ហើយត្រូវបានគេមើលឃើញថា ជាករណីសាកល្បងសម្រាប់ថាតើយន្តហោះដែលផលិតពីកាបូនជំនាន់ថ្មី អាចទប់ទល់នឹងគ្រោះមហន្តរាយភ្លើងឆេះបានយ៉ាងដូចម្ដេច?យន្តហោះ Airbus A350 របស់ក្រុមហ៊ុន Japan Airlines (JAL) បានធ្លាក់បុកយន្តហោះ De Havilland Dash-8 របស់ឆ្មាំល្បាតឆ្នេរសមុទ្រ បន្ទាប់ពីចុះចតភ្លាមៗ នៅអាកាសយានដ្ឋាន Haneda ក្នុងទីក្រុងតូក្យូ ដោយបានបង្កឲ្យឆាបឆេះយ៉ាងសន្ធោសន្ធៅ។ មនុស្ស ៣៧៩នាក់នៅលើយន្តហោះ A350 ត្រូវបានជម្លៀសចេញពីយន្តហោះ ដែលកំពុងឆេះ ប៉ុន្តែនាវិកឆ្មាំឆ្នេរសមុទ្រ ៥នាក់ក្នុងចំណោម ៦នាក់ បានសម្លាប់។រូបថតនៃការខូចខាត បានបង្ហាញតួយន្តហោះ A350 នៅក្នុងផេះ។ ខណៈពេលដែលអ្នកស៊ើបអង្កេតស្វែងរកមូលហេតុនៃការធ្លាក់នេះ ឧស្សាហកម្មអាកាសចរណ៍ ចង់បញ្ជាក់ពីការរស់រានមានជីវិតរបស់ក្រុមហ៊ុនអាកាសចរណ៍មានបច្ចេកវិទ្យាខ្ពស់ ដែលបានផ្លាស់ប្តូរសេដ្ឋកិច្ចនៃការហោះហើរផ្លូវឆ្ងាយ និងក្រុមហ៊ុនអាកាសចរណ៍ ក្នុងទសវត្សរ៍កន្លងទៅ។លោក Anthony Brickhouse អ្នកជំនាញផ្នែកសុវត្ថិភាពអាកាស នៅសាកលវិទ្យាល័យ Embry-Riddle Aeronautical University បាននិយាយថា ឧបទ្ទវហេតុធ្លាក់យន្តហោះនេះ គឺជាករណីសិក្សាដំបូងដែលយើងមាន មិនត្រឹមតែពីទស្សនៈនៃអគ្គិភ័យប៉ុណ្ណោះទេ ប៉ុន្តែថែមទាំងជាទស្សនៈនៃការរស់រានមានជីវិតពីការធ្លាក់យន្តហោះផងដែរ»។ទាំងក្រុម Boeing ដែលមានយន្តហោះ 787 Dreamliner និងក្រុមហ៊ុន Airbus ដែលមានយន្តហោះ A350 បានបញ្ជាក់យ៉ាងច្បាស់ នៅដើមទសវត្សរ៍ឆ្នាំ ២០០០ថា សមាសធាតុកាបូនទម្ងន់ស្រាលនឹងបង្កើតការសន្សំសំចៃប្រេងសំខាន់ៗ និងមិនសូវងាយខូចទេ ដោយកាត់បន្ថយការថែទាំ។ ភ្លាមៗបន្ទាប់ពីការដាក់ឲ្យដំណើរការ យន្តហោះ Dreamliner បានជួបបញ្ហាអាគុយដែលនាំឲ្យឆេះ បណ្តាលឲ្យមានការផ្អាកដំណើរការ នៅដើមឆ្នាំ២០១៣។ ក្រោយមកទៀត ភ្លើងឆេះយន្តហោះ Ethiopian Airlines 787 ក្នុងខែកក្កដា ឆ្នាំ ២០១៣ គឺបណ្តាលមកពីសៀគ្វីខ្លី នៅក្នុងឧបករណ៍បញ្ជូន ទីតាំងសង្គ្រោះបន្ទាន់របស់យន្តហោះ និងនាំឲ្យខូចដល់តួយន្តហោះ។

ជើងហោះហើរនៅតែលុបចោលសម្រាប់ថ្ងៃសុក្រ និងថ្ងៃសៅរ៍ នៅអាកាសយានដ្ឋាន Haneda ទីក្រុងតូក្យូ

ជើងហោះហើរក្នុងស្រុកជាង ២០០ជើង ទៅនិងមក ពីអាកាសយានដ្ឋាន Haneda ទីក្រុងតូក្យូ ប្រទេសជប៉ុន ដែលកំណត់កាលបរិច្ឆេទនៅថ្ងៃសុក្រនេះត្រូវបានលុបចោល ដោយសារឧបទ្ទវហេតុបុកគ្នា រវាងយន្តហោះពីរគ្រឿងកាលពីល្ងាចថ្ងៃអង្គារ។ ជើងហោះហើរប្រហែល២០០ជើង ដែលកំណត់កាលបរិច្ឆេទសម្រាប់ថ្ងៃសៅរ៍ ក៏ត្រូវបានលុបចោលផងដែរ។ក្រុមហ៊ុនអាកាសចរណ៍ Japan Airlines បានលុបចោលជើងហោះហើរក្នុងស្រុកចំនួន ១០២ជើង នៅថ្ងៃសុក្រនេះ ហើយក្រុមហ៊ុនអាកាសចរណ៍ All Nippon Airways ក៏បានលុបចោលជើងហោះហើរចំនួន ៩៨ជើង ក្រុមហ៊ុនStarflyer បានលុបចោល១៤ជើង និងក្រុមហ៊ុនអាកាសចរណ៍ Skymark Airlines បានលុបចោលជើងហោះហើរចំនួនមួយ។ក្រុមហ៊ុនអាកាសចរណ៍និយាយថា អាចមានការផ្លាស់ប្តូរបន្ថែមទៀតនៅក្នុងកាលវិភាគរបស់ពួកគេ។ ក្រុមហ៊ុន កំពុងណែនាំអ្នកដំណើរឱ្យតាមដានព័ត៌មានជើងហោះហើរចុងក្រោយបំផុត។សេវាកម្មនានា ត្រូវបានគេរំពឹងថានឹងនៅតែមានការអាក់ខាន រហូតដល់កម្ទេចកម្ទីទាំងអស់ត្រូវបានយកចេញពីផ្លូវយន្តហោះរត់ ហើយការពិនិត្យពីសុវត្ថិភាពត្រូវបានបញ្ចប់។

ជនអន្តោប្រវេសន៍ដែលមានអារម្មណ៍ច្របូកច្របល់ បានចោទប្រកាន់រដ្ឋាភិបាលម៉ិកស៊ិកថាបានបំបែកក្បួនដំណើរទៅកាន់សហរដ្ឋអាមេរិក

ជនអន្តោប្រវេសន៍ដែលបានជាប់គាំងដំណើរនៅប្រទេសម៉ិកស៊ិកភាគខាងត្បូង បាននិយាយកាលពីថ្ងៃព្រហស្បតិ៍ថា ក្រុមមន្រ្តីបានបំបែកក្បួនធ្វើដំណើរឆ្ពោះទៅកាន់ព្រំដែនសហរដ្ឋអាមេរិក ដែលពួកគេកំពុងធ្វើដំណើរ មួយថ្ងៃបន្ទាប់ពីការដោះលែងជនអន្តោប្រវេសន៍៣២នាក់ ដែលត្រូវបានចាប់ពង្រត់ បានបង្ហាញឲ្យឃើញពីគ្រោះថ្នាក់ដែលអ្នកស្វែងរកសិទ្ធិជ្រកកោន និងជនអន្តោប្រវេសន៍ ត្រូវប្រឈមមុខក្នុងអំឡុងពេលធ្វើដំណើររបស់ពួកគេ។ក្បួនដំណើរដែលមានមនុស្ស ៤.០០០នាក់ ធ្វើដំណើរឆ្លងកាត់ភាគខាងត្បូងប្រទេសម៉ិកស៊ិក បានដល់ទីបញ្ចប់ បន្ទាប់ពីមេដឹកនាំជាច្រើន បាននិយាយថា អាជ្ញាធរអន្តោប្រវេសន៍ បានសន្យាថានឹងផ្តល់ការអនុញ្ញាតធ្វើដំណើរ ប្រសិនបើក្បួនដំណើរត្រូវបានបំបែកដើម្បីឲ្យដំណើរការនៅមជ្ឈមណ្ឌលអន្តោប្រវេសន៍ជាច្រើនកន្លែង។ទោះបីជាយ៉ាងណា អ្នកដឹកនាំក្រុមក្នុងក្បួនដំណើរ លោក Luis Garcia បាននិយាយថា ជនអន្តោប្រវេសន៍មួយចំនួនត្រូវបានបោះបង់ចោលនៅតាមផ្លូវ ដោយអាជ្ញាធរ និងមិនត្រូវបានអនុញ្ញាតឱ្យចូលទៅក្នុងជម្រក។យោងតាមមន្ត្រីម៉ិកស៊ិក បានឲ្យដឹងថា កាលពីថ្ងៃសៅរ៍ ទី៣០ ខែធ្នូ ជនអន្តោប្រវេសន៍ចំនួន ៣២នាក់ ត្រូវបានចាប់ពង្រត់ពីរថយន្តក្រុងដឹកអ្នកដំណើរមួយគ្រឿង ដែលបានចាកចេញពីទីក្រុងឧស្សាហកម្មភាគខាងជើងនៃទីក្រុង Monterrey ឆ្ពោះទៅ ទីក្រុង Matamoros ឆ្លងកាត់ទីក្រុង Brownsville រដ្ឋ Texas ។

បណ្ដាញសង្គម

ព័ត៌មានថ្មីៗ

ទូតកម្ពុជាប្រចាំនៅជប៉ុន៖ យុវជនមានតួនាទីសំខាន់ក្នុងការរួមចំណែកពង្រឹងទំនាក់ទំនងរវាងកម្ពុជា-ជប៉ុន ឱ្យកាន់តែរឹងមាំថែមទៀត

សិស្សានុសិស្ស លោកគ្រូអ្នកគ្រូ រួមទាំងអាណាព្យាបាល នៅក្រុងស្ទឹងត្រែង ចំនួន ៣ ៥៩៩នាក់ ទទួលបានសេវាព្យាបាលពីក្រុមគ្រូពេទ្យ TYDA

ក្រសួងការងារបន្តផ្សព្វផ្សាយឱកាសការងារជាច្រើនម៉ឺនកន្លែងក្នុងស្រុក ដល់យុវជន និងអតីតពលករ នៅខេត្តប៉ៃលិន-បាត់ដំបង

ក្រុមការងារចលនាស្ត្រី នៃក្រុមការងារគណបក្សចុះមូលដ្ឋានខេត្តកណ្ដាល ប្តេជ្ញាបន្តសកម្មភាពបម្រើពលរដ្ឋដោយបេះដូងនិងស្មោះត្រង់

ប្រធានក្រុមការងារជួសជុល និងសាងសង់ឡើងវិញអគារសិក្សាអំណោយសម្ដេចតេជោ ចុះពិនិត្យ និងវាយតម្លៃស្ថានភាពអគារសិក្សាចំនួន ៤ ទីតាំងបន្ថែមទៀត ក្នុងស្រុកអង្គរជ័យ ខេត្តកំពត

ប្រមុខ UN ទទួលបន្ទុកជនភៀសខ្លួន ព្រមានពីស្ថានភាព «កាន់តែធ្ងន់ធ្ងរឡើង» នៅតំបន់ Sahara ខាងលិច

មនុស្សរាប់លាននាក់នៅភាគឦសានរបស់សហរដ្ឋអាមេរិក ត្រៀមប្រឈមនឹងព្យុះដ៏ខ្លាំងក្លា

កុមារនៅភាគខាងត្បូងលីបង់ ត្រឡប់ទៅសាលារៀនដែលត្រូវបានបំផ្លាញដោយការវាយប្រហាររបស់អ៊ីស្រាអែល

UN បន្ថែមក្រុមហ៊ុន ៦១ទៀតក្នុងបញ្ជីពាក់ព័ន្ធនឹងការតាំងទីលំនៅអ៊ីស្រាអែលធ្វើឲ្យចំនួនសរុបកើនដល់ ២១៤

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877