នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ជនជាតិចិន ១៦៤នាក់ពាក់ទៀត ព័ន្ធករណី Online Scams ត្រូវបានបណ្ដេញចេញពីកម្ពុជា
អាជ្ញាធរស្រុកឈូកព្រមានអាជីវករឱ្យបញ្ឈប់ការទិញលក់ទំនិញនាំចូលពីថៃ
អាជ្ញាធររាជធានីភ្នំពេញ បន្តបោសសម្អាតបទល្មើសឆបោកតាមប្រព័ន្ធបច្ចេកវិទ្យា ដោយបាន​រកឃើញ​មួយទីតាំងទៀត នៅខណ្ឌ៧មករា
អភិបាលខេត្តកណ្ដាលបានអំពាវនាវឱ្យបញ្ឈប់ការប្រេីប្រាស់​ ឬ​បញ្ឈប់​លក់បន្ត​ប្រហិតហតដករបស់ក្រុមហ៊ុន​ TSP

សន្តិសុខ និង សង្គម

តុលាការចេញដីការសម្រេចឃុំខ្លួនជនបើករថយន្ត Jeep បង្កគ្រោះថ្នាក់ស្លាប់មនុស្ស នៅខណ្ឌទួលគោក ដាក់ពន្ធនាគារ

2023/12/25 01:38:41 pm        1232
Facebook Telegram Linkin
ចៅក្រមស៊ើបសួរសាលាដំបូងរាជធានីភ្នំពេញ លោកហុង ម៉ារីណិច បានចេញ​ដីការ​សម្រេច​ឃុំ​ខ្លួន​ជន​បើក​រថយន្ត Jeep បង្កគ្រោះថ្នាក់ចរាចរណ៍ដែលបណ្តាលឱ្យស្លាប់មនុស្សនៅខណ្ឌទួលគោក ដាក់​ពន្ធនាគារ PJ ជាបណ្តោះអាសន្ន ដើម្បីបន្តបើកការស៉ើបអង្គេតតាមនីតិវិធីច្បាប់ ។ ជនជាប់ចោទមានឈ្មោះ ព្រហ្ម វិចិត្រសុសក្តា ភេទប្រុស អាយុ២៣ឆ្នាំ ស្នាក់នៅផ្ទះលេខ៥២ ផ្លូវ​៦៣ សង្កាត់ទន្លេបាសាក់ ខណ្ឌចំការមន បច្ចុប្បន្នគឺជាសិស្សកំពុងបន្តការសិក្សាថ្នាក់អនុបណ្ឌិត ។ ជនរូបនេះត្រូវបានតុលាការចោទប្រកាន់ពីបទ « បើកបរដោយធ្វេសប្រហែស ខ្ជីខ្ជា មិន​ប្រុង​ប្រយ័ត្ន ឬមិនគោរពកាតព្វកិច្ច ដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្តាល​ឱ្យ​ស្លាប់​អ្នក​ដទៃ​ និងបទរត់គេចខ្លួន » តាមមាត្រា ៨៥ នៃច្បាប់ស្ដីពីចរាចរណ៍ផ្លូវគោក និងមាត្រា ៥៤៣ នៃ​ក្រម​ព្រហ្ម​ទណ្ឌ ។ គួររំលឹកថា ករណីគ្រោះថ្នាក់ចរាចរណ៍ខាងលើ គឺបានកើតឡើងកាលពីវេលាយប់ថ្ងៃទី១៥ ខែ ធ្នូ ឆ្នាំ​២០២៣ ស្ថិតនៅចំណុចផ្លូវលេខ៣១៧ ប្រសព្វផ្លូវលេខ៥៦៦ ក្នុងសង្កាត់បឹងកក់ទី២ ខណ្ឌ​ទួលគោក ។ប្រភពព័ត៌មានបានឱ្យដឹងថា មុនពេលកើតហេតុ គេបានឃើញជនរងគ្រោះ ជិះម៉ូតូឃ្លីក ពណ៌ស ពាក​ផ្លាក​លេខ ភ្នំពេញ1DF-5396 ធ្វើដំណើរតាមបណ្តោយផ្លូវលេខ៥៦៦ ក្នុង​ទិស​ដៅ​ពី​លិច​ទៅ​កើ​ត ចំណែករថយន្តម៉ាក Jeep Gladiator ពណ៌ខ្មៅ ពាក់ផ្លាកលេខ ភ្នំពេញ 2CB-9963 បាន​បើក​បរ​តាមបណ្តោយផ្លូវលេខ៣១៧ ទិសដៅពីជើងទៅត្បូង។ លុះមកដល់ចំណុចកើតហេតុ ភាគីខាងម៉ូតូបានបើកឆ្លងផ្លូវបំបែក ស្រប​ពេល​នោះ​រថយន្ត​បើក​ដល់​ចំណុច​ផ្លូវប្រសព្វ ក៏ជ្រុលទៅបុកម៉ូតូពេញទំហឹង បណ្តាលឱ្យអ្នកបើកម៉ូតូ ខ្ទាត​ចេញ​ពី​ម៉ូតូ​បែក​ក្បាល​ស្លាប់ ចំណែករថយន្ត​នៅ​មាន​ល្បឿន​បាន​អូស​ម៉ូតូ​របស់​ជន​រង​គ្រោះជា​ប់ខា​ងក្រោ​ម​រថយន្ត​ ទើបអ្នកបើកទុករថយន្តចោល ហើយគេចខ្លួនបាត់។ ក្រោយ​ការ​រត់​គេច​ខ្លួន​អស់​មួយ​រយៈពេល​តាំ​ងពីថ្ងៃកើតហេតុរួចមក ជនបង្កខាងលើ ក៏ត្រូវបានអាណាព្យាបាល​នាំ​ខ្លួន​ចូល​ទៅ​កាន់​ស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី២៣ ធ្នូ ឆ្នាំ២០២៣ ដើម្បី​ប្រគល់​ខ្លួន​ជូន​នគរបាលអនុវត្តតាមផ្លូវច្បាប់៕ អត្ថបទ ៖ លីហេង 

លោកណេតាន់យ៉ាហ៊ូ អះអាងថា អ៊ីស្រាអែលទទួលរង«ផលវិបាកដ៏ធ្ងន់ធរ»ពីសង្រ្គាម ខណៈដែលការស្លាប់កើនឡើង

2023/12/25 12:16:59 pm        190
Facebook Telegram Linkin
លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយកាលពីថ្ងៃអាទិត្យថា អ៊ីស្រាអែល កំពុងទទួលរងផលវិបាកដ៏ធ្ងន់ធ្ងរពីសង្គ្រាមរបស់ខ្លួន លើតំបន់ហ្កាហ្សា ខណៈដែលចំនួនទាហានដែលបានស្លាប់ ក្នុងការប្រយុទ្ធជាមួយក្រុមហាម៉ាស កើនឡើង។លោកបានថ្លែង បន្ទាប់ពីកងទ័ពបានប្រកាសថា ទាហាន ១៤នាក់ ត្រូវបានសម្លាប់ នៅក្នុងទឹកដីប៉ាឡេ ស្ទីន ចាប់តាំងពីថ្ងៃសុក្រថា៖«នេះគឺជាពេលព្រឹកដ៏លំបាកមួយ បន្ទាប់ពីថ្ងៃដ៏លំបាកនៃការប្រយុទ្ធគ្នា នៅក្នុងតំបន់ហ្កាហ្សា»។ នាយករដ្ឋមន្ត្រីអ៊ីស្រាអែល បានប្តេជ្ញាបន្តសង្រ្គាម ដែលឥឡូវនេះ បានសម្លាប់ទាហានអ៊ីស្រាអែលជាង «១៥០នាក់ និងជនជាតិប៉ាឡេស្ទីនជាង ២០.000នាក់ នេះបើយោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស។លោកណេតាន់យ៉ាហ៊ូ បាននិយាយ នៅពេលលោកបើកកិច្ចប្រជុំគណៈរដ្ឋមន្ត្រីថា៖«សង្រ្គាមនេះ កំពុង ធ្វើឲ្យយើងទទួលរងផលវិបាកដ៏ធ្ងន់ធ្ងរ ប៉ុន្តែយើងពុំមានជម្រើសផ្សេង ក្រៅពីបន្តការប្រយុទ្ធនោះទេ»។លោកបានថ្លែងទៀតថា៖«រដ្ឋាភិបាល និងប្រជាជនអ៊ីស្រាអែលទាំងអស់ សូមផ្ញើក្តីអាណិតអាសូររបស់យើង ដល់ក្រុមគ្រួសារវីរជន ដែលបានស្លាប់ក្នុងសង្គ្រាម ដើម្បីប្រទេសរបស់យើង»។

កុមារនៅទីក្រុង Bethlehem តំបន់ West Bank អំពាវនាវសាមគ្គីភាពជាមួយប៉ាឡេស្ទីន នៅថ្ងៃបុណ្យណូអែល

2023/12/25 12:03:36 pm        143
Facebook Telegram Linkin
នៅថ្ងៃណូអែល កុមារនៅក្នុងទីក្រុង បេថ្លេហិម(Bethlehem) តំបន់វ៉េសប៊ែង បានអំពាវនាវឲ្យមានសាមគ្គីភាពជាមួយពលរដ្ឋប៉ាឡេស្ទីន។ កាលពីថ្ងៃអាទិត្យ កុមារប៉ាឡេស្ទីនប្រាំនាក់ បានឆ្លាស់គ្នាអានសាររបស់ពួកគេ សម្រាប់កុមារពិភពលោក ជា៥ភាសាផ្សេងៗគ្នា នៅទីលានទល់មុខព្រះវិហារមួយកន្លែង។ ព្រះវិហារនោះឈរនៅលើអ្វីដែលត្រូវបានគេជឿថា ជាទីកំណើតរបស់ព្រះយេស៊ូវគ្រីស្ទ។ក្មេងស្រីអាយុ ១៤ ឆ្នាំម្នាក់ រស់នៅក្នុងទីក្រុងបេថ្លេហិម(Bethlehem) បានឡើងអានសាររបស់នាងជាភាសាអង់គ្លេស។ នាងនិយាយថា គ្រួសាររបស់នាង និងអ្នកជិតខាងត្រូវរងការវាយប្រហារ ហើយពួកគេកំពុងស្វែងរកសន្តិភាព។នាងបានអំពាវនាវដល់កុមារទាំងអស់នៅទូទាំងពិភពលោក ឱ្យឡើងនិយាយដើម្បីនាំមកនូវការផ្លាស់ប្តូរសម្រាប់មនុស្សជាតិ។ នាងបានបញ្ចប់ការថ្លែងរបស់នាងដោយនិយាយថាកុមារនៅតំបន់ហ្កាហ្សា សមនឹងទទួលបានសេរីភាព។ ប្រជាជនជាច្រើន ដែលបានមកប្រមូលផ្តុំគ្នាសម្រាប់ព្រឹត្តិការណ៍នេះ បានលាតទង់ជាតិប៉ាឡេស្ទីនដ៏ធំអស្ចារ្យ មានប្រវែង ២០ ម៉ែត្រ នៅកណ្តាលទីលានមួយ ដើម្បីតវ៉ាចំពោះការឈ្លានពានរបស់អ៊ីស្រាអែល។នៅក្នុងឆ្នាំធម្មតា អ្នកទេសចរមកពីជុំវិញពិភពលោក បានសម្រុកទៅកាន់ទីក្រុង បេថ្លេហិម (Bethlehem) ដើម្បីអបអរពិធីបុណ្យណូអែល។ ប៉ុន្តែនៅឆ្នាំនេះ ដើមឈើណូអែលដ៏ធំសំបើម របស់ទីក្រុង កំពុងបាត់បង់ ហើយព្រឹត្តិការណ៍ថ្ងៃឈប់សម្រាកទាំងអស់ត្រូវបានលុបចោល លើកលែងតែពិធីបុណ្យសាសនាប៉ុណ្ណោះ។

ស្នងការរាជធានី បញ្ជាឱ្យតាមចាប់អ្នកបើករថយន្តបុកអ្នកជិះម៉ូតូ ១គ្រឿងបណ្តាលស្លាប់ និងរបួសនៅសង្កាត់ស្រះចក ហើយរត់គេច

2023/12/25 12:03:18 pm        1743
Facebook Telegram Linkin
ភ្នំពេញ៖ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និង​ជា​ស្នងការ​នគរបាល​រាជ​ធានី​ភ្នំពេញ នៅថ្ងៃទី២៥ ខែធ្នូ ឆ្នាំ២០២៣ បានបញ្ជាសមត្ថកិច្ចចម្រុះរាជធានីភ្នំពេញ ត្រូវ​ស្រាវជ្រាវ​ស្វែង​រក​ចាប់អ្នកបើករថយន្តបង្កគេចខ្លួនក្រោយបង្កគ្រោះថ្នាក់ចរាចរណ៍បុក អ្នក​ជិះ​ម៉ូតូ​១គ្រឿង​ បណ្តាលឱ្យមានអ្នកស្លាប់ និងរបួស នៅសង្កាត់ស្រះចក ខណ្ឌដូនពេញ។ឯកឧត្តម ឧត្តមសេនីយ៍ឯក ជួន ណារិន្ទ បានដាក់បទបញ្ជាលោក-លោកស្រីស្នងការរង ដែល​ចុះ​ពង្រី​ក​ការងារតាមបណ្ដាអធិការដ្ឋាននគរបាលខណ្ឌទាំង១៤ ត្រូវយកចិត្ដទុកដាក់​ក្នុង​ដឹកនាំ​ពង្រឹង​ការងារ​រឹត​បន្តឹងការអនុវត្តច្បាប់ចរាចរណ៍ផ្លូវគោក និងបង្ការទប់ស្កាត់​ឱ្យ​មាន​ប្រសិទ្ធ​ភាព​ដោយ​ម៉ឺងម៉ាត់បំផុត ដើម្បីស្វែងយល់ និងរកវីធីសាស្ត្រក្នុងការកាត់បន្ថយគ្រោះថ្នាក់ចរាចរណ៍ និង​ឱ្យ​មានការគោរពវិន័យ សីលធម៌ស្មោះត្រង់ វិជ្ជាជីវៈរបស់មន្ត្រីជំនាញ ពេលចុះអនុវត្តច្បាប់។ឯកឧត្តម ឧត្តមសេនីយ៍ឯក ជួន ណារិន្ទ ក៏បានកត់សម្គាល់ឃើញថាប៉ុន្មានថ្ងៃនេះ កើត​ឡើង​ករណី​គ្រោះ​ថ្នាក់ចរាចរណ៍ បណ្ដាលឱ្យរបួស និងស្លាប់ បានកើតឡើងជាបន្តបន្ទាប់។ ជា​ពិសេស​ក្នុងករណី បើមានគ្រោះថ្នាក់ខាងលើនេះកើតឡើង បើមានអ្នកបង្ក ព្យាយាមរត់គេច មន្ត្រីជំនាញ​ត្រូវ​ស្រាវជ្រាវ​តាមឃាត់ចាប់យកមកអនុវត្តន៍ច្បាប់ឱ្យបានតឹងរឹងបំផុត ហើយក្នុងរយៈ​ពេល​ចុង​ក្រោយ​នេះ សមត្ថកិច្ច​ជំនាញ​ក៏​បាន​អនុវត្ត​វិធានការណ៍​តាម​ផ្លូវ​ច្បាប់​ចំពោះ​អ្នក​បើកបរ​រថយន្ត​បង្ក​ឱ្យមាន​មនុស្សស្លាប់ ហើយរត់គេចខ្លួន ត្រូវបានសមត្ថកិច្ចជំនាញ​ស្រាវជ្រាវ​ចាប់​ឃាត់​ខ្លួន​យក​មក​អនុវត្ត​ច្បាប់​ជាបន្តបន្ទាប់រួចមកហើយ។ជាពិ​សេសករណីគ្រោះថ្នាក់ចរាចរណ៍នៅយប់អធ្រាត្រថ្ងៃទី២៥ ខែធ្នូ ឆ្នាំ២០២៣ នៅសង្កាត់​ស្រះចក ខណ្ឌដូនពេញ បង្កដោយរថយន្ត០១គ្រឿងបុក អ្នកជិះម៉ូតូ​០៣​នាក់​ប្តី​ប្រពន្ធ​កូន​បណ្តាល​ឲ្យស្លាប់ និងរងរបួស រថយន្តបើករត់គេច។ ឯកឧត្តមស្នងការ​ក៏បាន​បញ្ជា​សមត្ថកិច្ច​ចម្រុះ​ត្រូវ​ស្រាវ​ជ្រាវ​ឱ្យបានម៉ឺងម៉ាត់ស្វែងរកចាប់ឃាត់ខ្លួនអ្នកបើកបររថយន្តបង្កគេចខ្លួនយកមកអនុវត្តច្បាប់។ឯកឧត្តមស្នងការ បានអំពាវនាវ ក៏ដូចជាសំណូមពរដល់ប្រជាពលរដ្ឋ ចូលរួម​គោរព​ច្បាប់​ចរាចរណ៍​ផ្លូវ​គោក ឱ្យបានគ្រប់ៗគ្នា ដើម្បីកាត់បន្ថយគ្រោះថ្នាក់ចរាចរណ៍ និងខូចខាត មធ្យោបាយ សម្ភារៈ របួស និងបាត់បង់អាយុជីវិតមនុស្ស៕

ប្រព័ន្ធផ្សព្វផ្សាយរដ្ឋចិន៖ សកម្មភាពរបស់ហ្វីលីពីន នៅសមុទ្រចិនខាងត្បូង «គ្រោះថ្នាក់ខ្លាំង»

2023/12/25 11:56:44 am        158
Facebook Telegram Linkin
ប្រព័ន្ធផ្សព្វផ្សាយរដ្ឋចិន បានចោទប្រកាន់ប្រទេសហ្វីលីពីន នៅថ្ងៃចន្ទ ទី២៥ ខែធ្នូនេះថា បានបំពាន លើដែនដីរបស់ប្រទេសចិននៅសមុទ្រចិនខាងត្បូងម្តងហើយម្តងទៀត ដោយបានផ្សព្វផ្សាយព័ត៌មានមិនពិត និងឃុបឃិតជាមួយកងកម្លាំងពីខាងក្រៅដែនដី ដើម្បីបង្កបញ្ហា។ សារព័ត៌មាន People's Daily បានសរសេរនៅក្នុងសេចក្តីអធិប្បាយមួយនៅថ្ងៃចន្ទនេះថា ប្រទេសហ្វីលីពីន បានពឹងផ្អែកលើការគាំទ្ររបស់សហរដ្ឋអាមេរិក ដើម្បីបន្តការបង្ករឿងដល់ប្រទេសចិន ដោយមានអាកប្បកិរិយា «គ្រោះថ្នាក់ខ្លាំង» ដែលធ្វើឱ្យប៉ះពាល់ធ្ងន់ធ្ងរដល់សន្តិភាព និងស្ថិរភាព ក្នុងតំបន់។ ក្រសួងការបរទេសហ្វីលីពីន និងក្រុមការងារថ្នាក់ជាតិ ដែលគ្រប់គ្រងនៅសមុទ្រចិនខាងត្បូង ពុំបានឆ្លើយតបភ្លាមៗនោះទេ នៅថ្ងៃបុណ្យណូអែលនេះ ចំពោះសំណើសុំការអត្ថាធិប្បាយលើរបាយការណ៍នេះ។ ភាពតានតឹង រវាងទីក្រុងប៉េកាំង និងទីក្រុងម៉ានីល បានកើនឡើងខ្លាំងក្នុងប៉ុន្មានខែថ្មីៗនេះ ខណៈភាគីទាំងពីរបានចោទប្រកាន់គ្នាទៅវិញទៅមក ជុំវិញជម្លោះនៅសមុទ្រចិនខាងត្បូង រួមទាំងការចោទប្រកាន់ថា ប្រទេសចិនបានបុកនាវាមួយគ្រឿង កាលពីដើមខែនេះដោយមានដឹកមេបញ្ជាការកងកម្លាំងប្រដាប់អាវុធហ្វីលីពីន។ ប្រទេសចិន បានអះអាងសិទ្ធិភាគច្រើននៅសមុទ្រចិនខាងត្បូង ដែលផ្នែកមួយចំនួនក៏ត្រូវបានអះអាងសិទ្ធិដោយប្រទេសហ្វីលីពីន ប្រ៊ុយណេ ម៉ាឡេស៊ី កោះតៃវ៉ាន់ វៀតណាម និងប្រទេសឥណ្ឌូនេស៊ីផងដែរ។ តុលាការអន្តរជាតិ កាលពីឆ្នាំ ២០១៦ បានបដិសេធការអះអាងសិទ្ធិរបស់ប្រទេសចិន នៅក្នុងការចេញសេចក្តីសម្រេច លើសំណុំរឿងប្តឹងដោយប្រទេសហ្វីលីពីន ដែលទីក្រុងប៉េកាំងបានច្រានចោល។ នៅក្នុងការព្រមានដោយផ្ទាល់ខុសពីធម្មតា រដ្ឋមន្ត្រីការបរទេសចិន លោក Wang Yi បាននិយាយកាលពីសប្តាហ៍មុនថា ការគិតខុសនៅក្នុងជម្លោះជាមួយហ្វីលីពីន នឹងនាំមកនូវការឆ្លើយតបយ៉ាងម៉ឺងម៉ាត់ពីសំណាក់ប្រទេសចិន និងបានអំពាវនាវឱ្យមានការសន្ទនាដើម្បីដោះស្រាយការលំបាកធ្ងន់ធ្ងរ។ ប្រទេសចិន បានបង្ហាញកំហឹងចំពោះសហរដ្ឋអាមេរិកក្នុងខែនេះ សម្រាប់ការបញ្ជូននាវាកងទ័ពជើងទឹកចូលទៅក្នុងដែនទឹក នៅជិតតំបន់ជម្លោះ ដែលប្រទេសចិន និងហ្វីលីពីន មានការប្រឈមមុខដាក់គ្នាលើបញ្ហាដែនសមុទ្រជាច្រើន។

អំពើហិង្សាដោយក្រុមជនអន្ធពាល បង្កភាពអួអាប់ដល់ថ្ងៃបុណ្យណូអែលសម្រាប់ក្រុមគ្រួសារនៅហៃទី

2023/12/25 11:49:33 am        146
Facebook Telegram Linkin
អារម្មណ៍សម្រាប់បុណ្យណូអែល កំពុងកាត់បន្ថយក្នុងចំណោមគ្រួសារដែលបានភៀសខ្លួនចេញពីអំពើហិង្សារបស់ក្រុមជនអន្ធពាល និងកំពុងរស់នៅក្នុងទីជម្រកមួយក្នុងទីក្រុងព័រអូប្រាំង(Port-Au-Prince) ។សង្គ្រាម រវាងក្រុមក្មេងជនអន្ធពាលដ៏មានឥទ្ធិពលនិងប្រដាប់អាវុធ កើនឡើងកាន់តែខ្លាំង ដែលកំពុងគ្រប់គ្រងភាគច្រើននៅរដ្ឋធានីប្រទេសហៃទី បានបង្ខំឲ្យមនុស្សជិត ២០០.០០០នាក់ ភៀសខ្លួនចេញពីលំនៅឋានរបស់ពួកគេ ដោយលំនៅឋានជាច្រើនខ្នង តាមការរាយការណ៍ថា ត្រូវបានដុតបំផ្លាញ មានឃាតកម្មតាមអំពើចិត្ត ការចាប់ជំរិត និងការរំលោភដោយក្រុមជនអន្ធពាល។ក្តីបារម្ភរបស់ឪពុកម្តាយ កើនលើសពី ការមិនអាចផ្តល់អំណោយដល់កូនៗរបស់ពួកគេ ខណៈក្រុមគ្រួសារជាច្រើន ងាយរងគ្រោះទៅនឹងស្ថានភាពអាកាសធាតុមិនអំណោយផលខ្លាំង និងភាពក្រីក្រ ហើយមនុស្សជាច្រើន បានបន្ទោសរដ្ឋាភិបាលចំពោះស្ថានភាពរបស់ពួកគេ។អង្គការសហប្រជាជាតិ កាលពីខែតុលា បានផ្តល់សច្ចាប័នលើការបញ្ជូនកងកម្លាំងអន្តរជាតិ នៃកងទ័ពស្ម័គ្រចិត្ត ធ្វើឡើងដោយប្រទេសជាសមាជិកនានា ដើម្បីគាំទ្រដល់នគរបាលជាតិ។ ទន្ទឹមនឹងនេះ អង្គការសហប្រជាជាតិ និងទីភ្នាក់ងារផ្តល់ជំនួយជាច្រើន បានព្រមានអំពីមហន្តរាយមនុស្សធម៌ដែលកាន់តែអាក្រក់ទៅៗ។

អភិបាលរាជធានី ពង្រឹងសន្តិសុខ និងហាមនគរបាលចរាចរណ៍ស្លៀកពាក់ស៊ីវិល​ប្រើវិទ្យុទាក់ទងហៅស្ទាក់ចាប់យានយន្ត

2023/12/25 11:41:07 am        488
Facebook Telegram Linkin
អភិបាលរាជធានីភ្នំពេញពង្រឹងការរក្សាសន្តិសុខ សណ្ដាប់ធ្នាប់ និង​ហាម​នគរបាល​ចរាចរណ៍​មិន​ត្រូវ​ស្លៀក​ពាក់ស៊ីវិលប្រើវិទ្យុទាក់ទងហៅស្ទាក់ចាប់យានយន្តឡើយ។ថ្លែងក្នុងកិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ នៅព្រឹកថ្ងៃទី២៥ ខែធ្នូ ឆ្នាំ​២០២៣ នាសាលារាជធានីភ្នំពេញ ឯកឧត្តម ឃួង ស្រេង អភិបាលរាជធានី បានណែនាំ​ឱ្យ​សមត្ថកិច្ច​ទាំង​អស់ត្រូវ​ពង្រឹង​ការ​អនុវត្ត​ច្បាប់​ចរារចរណ៍​ផ្លូវ​គោក​ទៅ​តាម​អនុសាសន៍​ណែនាំ​របស់​សម្ដេច​មហាបវរធិបតី ហ៊ុន ម៉ាណែត នាយករដ្ឋមន្ដ្រី ដោយសម្តេចបានមានប្រសាសន៍ហើយថា សម្តេច​ជាខ្នងបង្អែករបស់កងកម្លាំងក្នុងការអនុវត្តច្បាប់ ដូច្នេះត្រូវធ្វើការឱ្យបានត្រឹមត្រូវតាមច្បាប់ ប្រកប​ដោយឧត្ដមភាព។ ចំពោះ​មន្ត្រី​នគរបាល​ចរាចរណ៍​មិន​ត្រូវ​ស្លៀក​ពាក់​ស៊ីវិល​ហើយ​ប្រើ​វិទ្យុ​ទាក់ទង ដើម្បីស្ទាក់ចាប់យានយន្តដែលល្មើសច្បាប់ទេ ត្រូវ​តែ​ប្រើប្រា​ស់​ឯក​សណ្ឋាន​ឱ្យ​បា​ន​ត្រឹម​ត្រូវ ជៀសវាងឱ្យបានពីការរិះគន់នៃការអនុវត្តច្បាប់ចរាចរណ៍នេះ។ឯកឧត្តម ឃួង ស្រេង បន្ថែមថា នគរបាលចរាចរណ៍ មិន​មែន​អនុវត្ត​ការងារ​លើ​តែ​បញ្ហា​ចរាចរណ៍​នោះ​ទេ តែត្រូវសហការគ្នាក្នុងរក្សាសន្តិសុខសណ្តាប់ធ្នាប់ ពោលគឺធ្វើយ៉ាងណាឱ្យភូមិ សង្កាត់ មា​ន​សុវត្ថិភាព។ ត្រូវពង្រឹងការទុកដាក់សំរាម ធ្វើឱ្យបរិស្ថានមានភាពល្អប្រសើរ រៀបចំ​សណ្តាប់​ធ្លាប់​ឱ្យ​បា​ន​ល្អបន្ថែមទៀត មិនឱ្យមានការផ្ញើរម៉ូតូ រថយន្ត និងការលក់ដូរតាមដងផ្លូវដាច់ខាត ជា​មួយ​គ្នា​នេះ​ត្រូវ​លុបបំបាត់ល្បែងស៊ីសងគ្រប់ប្រភេទនៅក្នុងមូលដ្ឋាន។ អាជ្ញាធរ​ខណ្ឌ​ជាប់​ព្រំប្រទល់​ត្រូវ​សហការ​ជាមួយ​បណ្ដាស្រុក និងខេត្តជាប់គ្នា ដើម្បីរក្សាឱ្យបាននូវសន្តិសុខល្អជូនប្រជាពលរដ្ឋ ព្រោះ​ការងារសន្តិសុខ ជាការងារដែលត្រូវធ្វើជាប្រចាំ ពិសេស​នៅ​ចុង​ឆ្នាំ​នេះ​មាន​ការងារ​ច្រើន​ណាស់​ដែល​ត្រូវអនុវត្ត ដើម្បីការ​ពារ​សន្តិសុខ​សណ្តាប់​ធ្នាប់​ជូន​ប្រជាពលរដ្ឋ​ដោយ​សារ​តែ​មាន​កម្ម​វិធី​សប្បាយ​ភាពច្រើនដែលកងកម្លាំងត្រូវការពារ និងពង្រឹង​លើ​វិធានការ​ទប់​ស្កាត់​ក្មេង​ទំនើង​នៅ​តាម​សាលា​រៀន៕ អត្ថបទ ៖ ប្រាក់ វ៉ាន់ដា

ក្រុមបាតុករប្រឆាំងប្រទេសស៊ែប៊ី វាយបំបែកបង្អួច ខណៈនគរបាលបាញ់ម្សៅម្រេច

2023/12/25 11:33:58 am        207
Facebook Telegram Linkin
មនុស្សរាប់ពាន់នាក់ បានមកប្រមូលផ្តុំគ្នានៅកណ្តាលទីក្រុង ប៊ែលក្រាដ(Belgrade) ក្នុងការតវ៉ាប្រឆាំងរដ្ឋាភិបាល កាលពីថ្ងៃអាទិត្យ ដើម្បីទាមទារឱ្យលុបចោលការបោះឆ្នោតសភា និងការបោះឆ្នោតតំបន់ រយៈពេលមួយសប្តាហ៍កន្លងទៅនេះ ដែលអ្នកសង្កេតការណ៍អន្តរជាតិ បាននិយាយថា អយុត្តិធម៌។សាក្សីសារព័ត៌មាន Reuters បាននិយាយថា នគរបាល បានបាញ់ម្សៅម្រេច បន្ទាប់ពីហ្វូងមនុស្សព្យាយាមសម្រុកចូលទៅក្នុងសាលាក្រុង Belgrade ជាកន្លែងដែលគណៈកម្មាធិការរៀបចំការបោះឆ្នោតក្នុងតំបន់មានមូលដ្ឋាននៅទីនោះ។ ក្រុមបាតុករមួយចំនួន បានឡើងលើអគារ និងវាយបំបែកបង្អួច ខណៈ អ្នកតវ៉ាបានស្រែកថា «ជនក្បត់ជាតិ»។ក្រុមបាតុករ បានព្យាយាមបើកទ្វារសាលាក្រុង ប៉ុន្តែមិនអាចចូលទៅបានទេ ខណៈហ្វូងមនុស្សស្រែកថា «សម្រុកចូល សម្រុកចូល» និងពាក្យថា «មិនចុះចាញ់» ។ សមាជិកម្នាក់ទៀតនៃប្រទេសស៊ែប៊ី ដែលប្រឆាំងអំពើហិង្សា លោក Marinika Tepic បានធ្វើកូដកម្មអត់អាហារ ចាប់តាំងពីការបោះឆ្នោតមក ដើម្បីទាមទារឱ្យមានការលុបចោល។យោងតាមលទ្ធផលបឋមរបស់គណៈកម្មាធិការរៀបចំការបោះឆ្នោតរដ្ឋបានឱ្យដឹងថា គណបក្សជឿនលឿនស៊ែប៊ី (SNS) ដែលកំពុងកាន់អំណាចដ៏មានប្រជាប្រីយ៍ភាព បានឈ្នះ ៤៦,៧២ភាគរយ នៃសន្លឹកឆ្នោតនៅក្នុងការបោះឆ្នោតសភាមុនអាណត្តិកាលពីចុងសប្តាហ៍មុន។បេសកកម្មឃ្លាំមើលអន្តរជាតិមួយ និយាយនៅថ្ងៃចន្ទនេះថា គណបក្សជឿនលឿនស៊ែប៊ី (SNS) ទទួលបានអត្ថប្រយោជន៍អយុត្តិធម៌ តាមរយៈការលំអៀងផ្នែកប្រព័ន្ធផ្សព្វផ្សាយ ឥទ្ធិពលមិនត្រឹមត្រូវរបស់ប្រធានាធិបតី លោក Aleksandar Vucic និងភាពមិនប្រក្រតីនៃការបោះឆ្នោត ដូចជាការទិញសន្លឹកឆ្នោតជាដើម។ ប៉ុន្តែ លោក Vucic និយាយថា ការបោះឆ្នោតមានភាពយុត្តិធម៌។

ចំនួនអ្នកស្លាប់ខាងប៉ាឡេស្ទីននៅតំបន់ហ្កាហ្សា កើនលើស ២០.៤០០នាក់ ខណៈអ៊ីស្រាអែលប្តេជ្ញាបន្តការវាយប្រហារ

2023/12/25 11:28:03 am        72
Facebook Telegram Linkin
ចំនួនអ្នកស្លាប់ខាងប៉ាឡេស្ទីននៅក្នុងតំបន់ហ្កាហ្សាស្ទ្រីប ដែលហែកហួរដោយសង្រ្គាម បានកើនឡើងដល់ ២០.៤២៤នាក់ និងមនុស្សជាង ៥៤.០០០នាក់ ផ្សេងទៀតបានរងរបួសចាប់តាំងពីការផ្ទុះឡើងនៃជម្លោះចុងក្រោយបំផុតរវាងប៉ាឡេស្ទីន និងអ៊ីស្រាអែល កាលពីថ្ងៃទី០៧ ខែតុលា មក។យ៉ាងហោចណាស់ ជនជាតិប៉ាឡេស្ទីនចំនួន ១៦៦នាក់ ត្រូវបានសម្លាប់ នៅក្នុងការវាយប្រហាររបស់អ៊ីស្រាអែល លើតំបន់ហ្កាហ្សា ក្នុងរយៈពេល ២៤ម៉ោងចុងក្រោយ ដែលភាគច្រើនជាស្ត្រី និងកុមារ។កងទ័ពអ៊ីស្រាអែលបាននិយាយថា ទាហានអ៊ីស្រាអែលសរុបចំនួន ១៥នាក់ ត្រូវបញ្ជាក់បានស្លាប់នៅក្នុងតំបន់ហ្កាហ្សា កាលពីចុងសប្តាហ៍មុន ដែលនាំឱ្យទាហានអ៊ីស្រាអែលសរុបចំនួន ១៥៤នាក់ ត្រូវបានសម្លាប់ក្នុងអំឡុងពេលការវាយលុកជើងគោករបស់ខ្លួននៅក្នុងតំបន់ហ៊ុមព័ទ្ធនេះ។ទោះបីជាបានទទួលស្គាល់ការបង់ខាត «តម្លៃដ៏ធ្ងន់ធ្ងរ» លើជីវិតរបស់ទាហានរបស់ខ្លួនក្នុងអំឡុងពេលការវាយលុករយៈពេល ៧៨ថ្ងៃដែលកំពុងបន្តក៏ដោយ នៅក្នុងសេចក្តីថ្លែងការណ៍ជាវីដេអូមួយ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានប្រកាសថា «យើងកំពុងបង្កើនប្រតិបត្តិការបន្ថែមទៀតក្នុងសង្រ្គាមនៅតំបន់ហ្កាហ្សាស្រ្ទីប»។ជនភៀសខ្លួននៅតំបន់ហ្កាហ្សា កំពុងប្រឈមនឹងវិបត្តិទុរ្ភិក្សធ្ងន់ធ្ងរ ដោយសារជំនួយមនុស្សធម៌តិចតួចប៉ុណ្ណោះដែលអាចទៅដល់តំបន់នោះ។ អង្គការស្បៀងអាហារ និងកសិកម្មនៃអង្គការសហប្រជាជាតិបាននិយាយថា បច្ចុប្បន្ននេះ តម្រូវការក្នុងស្រុកត្រឹមតែ ១០ភាគរយប៉ុណ្ណោះសម្រាប់ម្ហូបអាហារដែលអាចបំពេញបាននៅក្នុងតំបន់សង្រ្គាមមួយនេះ៕

អង្គការ WHO សម្ដែងកង្វល់ពីការបំផ្លិចបំផ្លាញប្រព័ន្ធសុខាភិបាលនៅតំបន់ហ្កាហ្សាស្ទ្រីប

2023/12/25 11:11:41 am        127
Facebook Telegram Linkin
អង្គការសុខភាពពិភពលោក (WHO) កាលពីថ្ងៃអាទិត្យ (២៤ ធ្នូ) បានសម្តែងការព្រួយបារម្ភយ៉ាងខ្លាំងចំពោះការបំផ្លាញប្រព័ន្ធសុខាភិបាលនៅក្នុងតំបន់ហ្កាហ្សាស្ទ្រីប ដែលហែកហួរដោយសង្រ្គាម។ អង្គការ WHO បានព្រមានថា ប្រសិនបើប្រព័ន្ធសុខាភិបាលនៅតំបន់ហ្កាហ្សាដួលរលំ វានឹងនាំឱ្យមាន «សោកនាដកម្ម» ហើយអង្គការនេះក៏បានអំពាវនាវឲ្យមានបទឈប់បាញ់ជាបន្ទាន់ពីគ្រប់ភាគីដែលពាក់ព័ន្ធក្នុងជម្លោះ។យោងតាមទិន្នន័យចុងក្រោយបំផុតដែលចេញផ្សាយដោយអង្គការសហប្រជាជាតិ កាលពីថ្ងៃព្រហស្បតិ៍សប្តាហ៍មុន មានតែមន្ទីរពេទ្យចំនួន ៩កន្លែងប៉ុណ្ណោះក្នុងចំណោមមន្ទីរពេទ្យចំនួន ៣៦កន្លែង នៅក្នុងតំបន់ដែលកំពុងដំណើរការដោយផ្នែក ហើយកំពុងជួបការលំបាកដើម្បីទប់ទល់នឹងចំនួនអ្នករបួសដ៏ច្រើនលើសលប់។ក្រសួងសុខាភិបាលដែលមានមូលដ្ឋាននៅហ្កាហ្សា បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា ចំនួនអ្នកស្លាប់របស់ជនជាតិប៉ាឡេស្ទីន ពីការវាយប្រហាររបស់អ៊ីស្រាអែល នៅតំបន់ហ្កាហ្សាស្ទ្រីប បានកើនដល់ជាង ២០.៤០០នាក់ ចាប់តាំងពីថ្ងៃទី០៧ ខែតុលា មកជាមួយនឹងមនុស្សជាង ៥៤.០០០នាក់ ផ្សេងទៀតបានរងរបួស។អ៊ីស្រាអែលបាននិងកំពុងបើកការវាយលុកទ្រង់ទ្រាយធំប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីប ដើម្បីសងសឹកប្រឆាំងនឹងការវាយលុករបស់ក្រុមហាម៉ាស ឆ្លងកាត់ព្រំដែនភាគខាងត្បូងអ៊ីស្រាអែល កាលពីថ្ងៃទី០៧ ខែតុលា ក្នុងអំឡុងពេលដែលមនុស្សប្រហែល ១.២០០នាក់បានស្លាប់ និងមនុស្សជាង ២០០នាក់ ត្រូវបានចាប់ធ្វើជាចំណាប់ថ្នូរ៕

បណ្ដាញសង្គម

ព័ត៌មានថ្មីៗ

ប្រធានាធិបតីអាមេរិក និងអ៊ីរ៉ង់ ចុះហត្ថលេខាលើកិច្ចព្រមព្រៀងឈប់បាញ់ ប៉ុន្តែលោក Trump ថា នៅតែអាចបន្តការវាយប្រហារបាន
06/18/2026 08:06 AM
Facebook Telegram Linkin
មន្រ្តីជាន់ខ្ពស់ក្រសួងការងារ និងក្រសួងមុខងារសាធារណៈ បើកកិច្ចប្រជុំត្រៀមរៀបចំការធ្វើបច្ចុប្បន្នភាពរចនាសម្ព័ន្ធ និងជំរឿន
06/18/2026 07:06 AM
Facebook Telegram Linkin
អ្នកនាំពាក្យក្រសួងព័ត៌មានណែនាំយុវជនឱ្យប្រើបច្ចេកវិទ្យាឱ្យចំគោលដៅ និងប្រុងប្រយ័ត្នចំពោះព័ត៌មានក្លែងក្លាយ
06/18/2026 07:06 AM
Facebook Telegram Linkin
តំណាងអចិន្ត្រៃយ៍កម្ពុជា ប្រចាំ UN បញ្ជាក់ជាថ្មីពីការប្តេជ្ញាចិត្តរបស់កម្ពុជា ក្នុងការដោះស្រាយវិវាទជាមួយថៃ ដោយសន្តិវិធីតាមរយៈ UNCLOS
06/18/2026 07:06 AM
Facebook Telegram Linkin
កម្ពុជា ជាប់ឆ្នោតក្នុងគណ:កម្មការអន្តររដ្ឋាភិបាល ដើម្បីកិច្ចការពារបេតិកភណ្ឌវប្បធម៌អរូបីសម្រាប់អណត្តិ ២០២៦-២០៣០
06/18/2026 07:06 AM
Facebook Telegram Linkin
សង្រ្គាមបានលួចពហុកីឡដ្ឋានតំបន់ហ្កាហ្សា ប៉ុន្តែមិនអាចលួចក្តីស្រលាញ់ការប្រកួតបាល់ទាត់បានទេ
06/17/2026 09:06 PM
Facebook Telegram Linkin
ក្រុមមេដឹកនាំ G7ជួបជុំគ្នានៅថ្ងៃចុងក្រោយកិច្ចប្រជុំកំពូលក្នុងប្រទេសបារាំង
06/17/2026 09:06 PM
Facebook Telegram Linkin
មេដឹកនាំ G7ពិភាក្សាលើការគ្រប់គ្រងប្រព័ន្ធ AI ជាមួយប្រធានបច្ចេកវិទ្យា ក្នុងកិច្ចប្រជុំកំពូលនៅបារាំង
06/17/2026 08:06 PM
Facebook Telegram Linkin
លោក​ប្រធានាធិបតី Aoun និយាយថា លីបង់មាន «ផ្លូវឯករាជ្យ» ក្នុងការចរចាជាមួយ​អ៊ីស្រាអែល
06/17/2026 08:06 PM
Facebook Telegram Linkin
មេដឹកនាំអាស៊ានធ្វើដំណើរទៅដល់ទីក្រុង Kazan ដើម្បីចូលរួមកិច្ចប្រជុំកំពូលរុស្ស៊ី-អាស៊ាន
06/17/2026 08:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.