BTV NEWS

ជនជាតិចិន ១៦៤នាក់ពាក់ទៀត ព័ន្ធករណី Online Scams ត្រូវបានបណ្ដេញចេញពីកម្ពុជា

អាជ្ញាធរស្រុកឈូកព្រមានអាជីវករឱ្យបញ្ឈប់ការទិញលក់ទំនិញនាំចូលពីថៃ

អាជ្ញាធររាជធានីភ្នំពេញ បន្តបោសសម្អាតបទល្មើសឆបោកតាមប្រព័ន្ធបច្ចេកវិទ្យា ដោយបានរកឃើញមួយទីតាំងទៀត នៅខណ្ឌ៧មករា

អភិបាលខេត្តកណ្ដាលបានអំពាវនាវឱ្យបញ្ឈប់ការប្រេីប្រាស់ ឬបញ្ឈប់លក់បន្តប្រហិតហតដករបស់ក្រុមហ៊ុន TSP

សន្តិសុខ និង សង្គម

មនុស្សជិត ៣០០នាក់ស្លាប់ក្នុងពេល ២៤ម៉ោងនៅហ្កាហ្សា ខណៈក្រុមហាម៉ាស និងនាយករដ្ឋមន្ត្រីអ៊ីស្រាអែល គំរាមដាក់គ្នា

ការប្រយុទ្ធគ្នាយ៉ាងខ្លាំងក្លាបានសម្លាប់ជនជាតិប៉ាឡេស្ទីនជិត ៣០០ នាក់ក្នុងរយៈពេល ២៤ ម៉ោងចុងក្រោយនៅក្នុងតំបន់ហ្កាហ្សា ស្របពេលក្រុមប្រដាប់អាវុធប៉ាឡេស្ទីនហាម៉ាស និងលោកនាយករដ្ឋមន្ត្រីអ៊ីស្រាអែល បេន ចាមីនណេតានយ៉ាហ៊ូ(Benjamin Netanyahu) បានគំរាមដាក់គ្នាទៅវិញទៅមក។ អ៊ីស្រាអែល បានបន្តវាយឆ្មក់ ទូទាំងដែនដីដែលត្រូវបានឡោមព័ទ្ធមួយនេះ កាលពីថ្ងៃអាទិត្យ រួមទាំងនៅភាគខាងជើងតំបន់ហ្កាហ្សា ជាទីដែលអគារនៅក្នុងភូមិឋានទាំងមូលត្រូវបានបាក់រាបដល់ដីដោយសារតែការវាយប្រហារតាមអាកាស និងជាទីដែលកងកម្លាំងថ្មើរជើង ដែលបានប្រតិបត្តិការអស់រយៈពេលជាង ៦ សប្តាហ៍បន្តប្រឈមនឹងការតស៊ូយ៉ាងខ្លាំងក្លាពីក្រុមយុទ្ធជនហាម៉ាស។ អ្នកនាំពាក្យក្រសួងសុខាភិបាលហ្កាហ្សា លោក អាស្រាហ្វ អាល់ គូដ្រា (Ashraf al-Qudra)បានប្រាប់ ទូរទស្សន៍ Al Jazeera ក្នុងបទសម្ភាសន៍តាមទូរស័ព្ទថា មនុស្ស ២៩៧ នាក់បានស្លាប់ និងជាង ៥៥០ នាក់បានរងរបួសក្នុងរយៈពេល ២៤ ម៉ោងចុងក្រោយនេះ នៅតំបន់ហ្កាហ្សា ដែលនាំឱ្យចំនួនអ្នកស្លាប់ចាប់តាំងពីសង្គ្រាមចាប់ផ្តើម ថ្ងៃទី ៧ ខែតុលា កើនឡើងដល់ជាង ១៨.០០០ នាក់ ភាគច្រើនជាស្ត្រី និងកុមារ។ការវាយប្រហាររបស់អ៊ីស្រាអែលលើតំបន់ហ្កាហ្សាបានបន្តដល់ថ្ងៃទី៦៥ កាលពីថ្ងៃអាទិត្យ ដោយក្រុមហាម៉ាស បានព្រមានថាគ្មានអ្នកដែលខ្លួនបានចាប់កាលពីថ្ងៃទី ៧ ខែតុលាណាម្នាក់ នឹងចាកចេញពីតំបន់ហ្កាហ្សាទាំងនៅមានជីវិតឡើយ លុះត្រាតែការទាមទាររបស់ពួកគេត្រូវបានបំពេញជាមុនសិន៕

អាមេរិក អំពាវនាវឲ្យចិន បញ្ឈប់សកម្មភាពដ៏គ្រោះថ្នាក់ នៅក្នុងសមុទ្រចិនខាងត្បូង

សហរដ្ឋអាមេរិក បានអំពាវនាវកាលពីថ្ងៃអាទិត្យ ១០ ធ្នូ ឱ្យទីក្រុងប៉េកាំងបញ្ឈប់សកម្មភាព ដ៏គ្រោះថ្នាក់ និងអស្ថិរភាព របស់ខ្លួននៅក្នុងសមុទ្រចិនខាងត្បូងដែលមានជម្លោះ បន្ទាប់ពីនាវារបស់ហ្វីលីពីន និងអង្គភាពឆ្មាំសមុទ្រចិន បានបុកគ្នានៅជិតតំបន់ថ្មប៉ប្រះទឹកមានជម្លោះ។ប្រទេសទាំងពីរបានស្តីបន្ទោសគ្នាទៅវិញទៅមកបន្ទាប់ពីឧបទ្ទវហេតុកាលពីព្រឹកថ្ងៃអាទិត្យដែលជាការប្រឈមដាក់គ្នាចុងក្រោយបំផុត នៅក្នុងសមុទ្រដែលមានជម្លោះនេះ។ ការប៉ះទង្គិចគ្នានេះបានកើតឡើង អំឡុងបេសកកម្មផ្គត់ផ្គង់របស់ហ្វីលីពីនទៅកាន់មូលដ្ឋានយោធតូចមួយនៅលើតំបន់ថ្មប៉ប្រះទឹក Second Thomas Shoal ក្នុងប្រជុំកោះ ស្ប្រាតលី (Spratly) ដែលជាចំណុចរសើបបំផុត សម្រាប់ទីក្រុងម៉ានីល និងប៉េកាំង ហើយហេតុការណ៍នេះដែរបានកើតឡើងមួយថ្ងៃបន្ទាប់ពីឧបទ្ទវហេតុមួយផ្សេងទៀតនៅជិត តំបន់ថ្មប៉ប្រះទឹកមានជម្លោះScarborough Shoalដែលហ្វីលីពីនអះអាងសិទ្ធិគ្រប់គ្រង។ អ្នកនាំពាក្យក្រសួងការបរទេសអាមេរិក លោក ម៉ាត់ស៊ូ មីល័រ(Matthew Miller) បាននិយាយនៅក្នុងសេចក្តីថ្លែងការណ៍មួយថា នៅថ្ងៃទាំងពីរនេះ នាវារបស់ប្រទេសចិន បានពង្រាយកាណុងបាញ់ទឹក និងធ្វើសមយុទ្ធដោយខ្វះការប្រុងប្រយ័ត្ន រួមទាំងការប៉ះទង្គិចគ្នានៃនាវារបស់ប្រទេសទាំង២ បណ្តាលឱ្យខូចខាតដល់នាវាហ្វីលីពីន ដែលកំពុងបំពេញបេសកកម្មផ្គត់ផ្គង់ជាផ្លូវការទៅកាន់ទីតាំងទាំងនោះ និងធ្វើឱ្យប៉ះពាល់ដល់សុវត្ថិភាពនាវិកហ្វីលីពីន៕

អំពើហិង្សាកើនឡើងរវាងអ៊ីស្រាអែល និងក្រុមហេសបូឡា នៅប្រទេសលីបង់

អំពើហិង្សា បានកើនឡើងនៅព្រំដែននៃប្រទេសលីបង់ជាមួយអ៊ីស្រាអែល កាលពីថ្ងៃអាទិត្យ ខណៈដែលក្រុមហេសបូឡា បានវាយប្រហារដោយយានដ្រូន និងមីស៊ីលដ៏មានអានុភាព នៅទីតាំងអ៊ីស្រាអែល ហើយការវាយប្រហារតាមអាកាសរបស់អ៊ីស្រាអែល បានធ្វើឲ្យកក្រើកទីក្រុង និងភូមិជាច្រើន នៅប្រទេសលីបង់ភាគខាងត្បូង។អ៊ីស្រាអ៊ែល និងក្រុមហេសបូឡាដែលគាំទ្រដោយអ៊ីរ៉ង់ បានបាញ់គ្នា ចាប់តាំងពីសង្រ្គាម នៅតំបន់ហ្កា ហ្សា បានផ្ទុះឡើង កាលពីពីរខែមុន ដែលជាអរិភាពដ៏អាក្រក់បំផុតរបស់ពួកគេ ចាប់តាំងពីជម្លោះឆ្នាំ ២០០៦។ អំពើហិង្សានេះ ត្រូវបានទប់ឲ្យនៅត្រឹមតែតំបន់ព្រំដែនប៉ុណ្ណោះ។លោក Ali Hijazi មន្ត្រីម្នាក់ក្នុងតំបន់ បាននិយាយថា ការវាយប្រហារតាមអាកាសរបស់អ៊ីស្រាអែលទៅលើទីក្រុង Aitaroun បានបំផ្លាញផ្ទះចំនួន៥ខ្នង និងផ្ទះច្រើនទៀតខូចខាត។ លោកបានប្រាប់សារព័ត៌មានរ៉យទ័រថា៖«អន្តរាគមន៍ទ្រង់ទ្រាយធំ បានរារាំងនរណាម្នាក់មិនឲ្យត្រូវបានគេធ្វើបាប។ ស្ត្រីបីនាក់ និងបុរសពីរនាក់ បានរងរបួស»។កងទ័ពអ៊ីស្រាអែល មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។នៅក្នុងសេចក្តីថ្លែងការណ៍មួយទៅកាន់សារព័ត៌មានរ៉យទ័រ អ្នកនយោបាយជាន់ខ្ពស់របស់ក្រុមហេសបូឡា លោក Hassan Fadlallah បាននិយាយថា ការវាយប្រហារតាមអាកាសរបស់អ៊ីស្រាអែល គឺជា «ការកើនឡើងថ្មី» ដែលក្រុមនេះកំពុងឆ្លើយតបជាមួយនឹងការវាយប្រហារប្រភេទថ្មី ថាតើវាស្ថិតនៅក្នុងលក្ខណៈនៃអាវុធ (ដែលត្រូវបានប្រើប្រាស់) ឬទីតាំងដែលត្រូវគេកំណត់គោលដៅ»។

មនុស្សរាប់ពាន់នាក់ដើរក្បួនតវ៉ាប្រឆាំងជនជាតិជ្វីហ្វ នៅក្នុងទីក្រុងព្រុចសែល ប្រទេសបែលហ្ស៊ិក

មនុស្សរាប់ពាន់នាក់បានធ្វើបាតុកម្មនៅទីក្រុងព្រុចសែលកាលពីថ្ងៃអាទិត្យ ១០ ធ្នូ ប្រឆាំងជនជាតិជ្វីហ្វ ស្របពេលមានការព្រួយបារម្ភនៅក្នុងសហគមន៍ជ្វីហ្វរបស់ប្រទេសបែលហ្ស៊ិក ជុំវិញការកើនឡើងនៃឧបទ្ទវហេតុប្រឆាំងជនជាតិជ្វីហ្វនៅអឺរ៉ុបចាប់តាំងពីការវាយប្រហាររបស់ហាម៉ាស កាលពីថ្ងៃទី ៧ ខែតុលាលើអ៊ីស្រាអែល និងការបើកការវាយប្រហារសម្លាប់រង្គាលរបស់អ៊ីស្រាអែលនៅតំបន់ហ្កាហ្សា។នគរបាលបានប៉ាន់ប្រមាណថា បាតុករមានចំនួនប្រហែល៤.០០០នាក់។ នៅក្នុងការប្រមូលផ្តុំគ្នាដោយស្ងៀមស្ងាត់ ពួកគេបានគ្រវីទង់ជាតិបែលហ្ស៊ិក និងកាន់បដាដែលសរសេរថា អ្នកមិនត្រូវធ្វើជា ជនជាតិជ្វីហ្វដើម្បីដើរក្បួនប្រឆាំងនឹងសាសនានោះទេ និង កុំប៉ះជនជាតិជ្វីសរបស់ខ្ញុំឲ្យសោះ។បន្ទាប់ពីការវាយប្រហារកាពីថ្ងៃទី៧ ខែតុលាលើអ៊ីស្រាអែល ដែលបានសម្លាប់មនុស្ស ១.២០០នាក់ នាយករដ្ឋមន្រ្តីបែលហ្ស៊ិក លោក អាឡេសាន់ឌ័រ ឌីក្រូ( Alexander De Croo) បាននិយាយថារដ្ឋាភិបាលកំពុងពង្រឹងសន្តិសុខនៅតាមសហគមន៍ជ្វីហ្វរបស់ខ្លួនហើយថាមាន ការបង្កើនការប្រុងប្រយ័ត្នចំពោះការវាយប្រហារពីក្រុមអ្នកប្រឆាំងជនជាតិជ្វីហ្វ៕

ប្រជាជនប៉ាឡេស្ទីនប្រហែល ១៨.០០០នាក់ បានស្លាប់ក្នុងជម្លោះកំពុងបន្តនៅហ្កាហ្សា

អ្នកនាំពាក្យក្រសួងសុខាភិបាលហ្កាហ្សា បាននិយាយកាលពីថ្ងៃអាទិត្យ (១០ ធ្នូ) ថា ជនជាតិប៉ាឡេស្ទីនប្រហែល ១៨.០០០នាក់ ត្រូវបានសម្លាប់ និងមនុស្សជាង ៤៩.៥០០នាក់ បានរងរបួសនៅក្នុងការវាយប្រហាររបស់អ៊ីស្រាអែល លើតំបន់ហ្កាហ្សា ចាប់តាំងពីថ្ងៃទី០៧ ខែតុលា មក។ អ្នកនាំពាក្យលោក អាស្រាហ្វ អាល់គីដ្រា (Ashraf Al-Qidra) ក៏បានប្រាប់ទូរទស្សន៍ Al Jazeera ក្នុងបទសម្ភាសតាមទូរស័ព្ទថា ចំនួនអ្នកស្លាប់នោះរួមមានមនុស្ស ២៩៧នាក់បានស្លាប់ និងជាង ៥៥០នាក់បានរងរបួសក្នុងរយៈពេល ២៤ម៉ោងចុងក្រោយនេះ។ផ្សែងយ៉ាងខ្មួលខ្មាញ់បានហុយឡើងពីលើអគារដែលត្រូវបានបំផ្លាញនៅជិតព្រំដែនអ៊ីស្រាអែល និងតំបន់ហ្កាហ្សា កាលពីថ្ងៃអាទិត្យ (១០ ធ្នូ) ដោយធ្វើឱ្យមេឃមានសភាពខ្មៅងងឹត។ អ៊ីស្រាអែល បានប្តេជ្ញាថានឹងកម្ទេចក្រុមហាម៉ាស ដែលបានគ្រប់គ្រងតំបន់ហ្កាហ្សា តាំងពីឆ្នាំ២០០៧ បន្ទាប់ពីក្រុមសកម្មប្រយុទ្ធនេះបានវាយសម្រុកចូលរបងព្រំដែនកាលពីថ្ងៃទី៧ តុលា ហើយបានបន្តវាយលុកតាមទីប្រជុំជនអ៊ីស្រាអែល ដោយបាញ់សម្លាប់ពលរដ្ឋអ៊ីស្រាអែលប្រហែល ១.២០០នាក់ និងចាប់ចំណាប់ថ្នូរ ២៤០នាក់។ចាប់តាំងពីពេលនោះមក អាជ្ញាធរសុខាភិបាលហ្កាហ្សាបាននិយាយថា មនុស្សជាច្រើនត្រូវបញ្ជាក់ថាបានស្លាប់នៅតំបន់ហ្កាហ្សា និងរាប់ពាន់នាក់ទៀតកំពុងបាត់ខ្លួន ហើយសន្មតថាបានស្លាប់នៅក្រោមគំនរបាក់បែក។ ចំនួនអ្នកស្លាប់លែងរាប់បញ្ចូលតួលេខពីផ្នែកភាគខាងជើងនៃតំបន់ជុំវិញនោះ ដោយសារហួសពីលទ្ធភាពនៃរថយន្តគិលានសង្គ្រោះអាចទៅដល់ និងជាទីដែលមន្ទីរពេទ្យជាច្រើនបានឈប់ដំណើរការ៕

រសៀលថ្ងៃនេះសមត្ថកិច្ចនឹងធ្វើការបង្ហាញមុខក្រុមជនសង្ស័យករណីកាប់ប្លន់ម៉ូតូជាង១០ករណី

ភ្នំពេញ ៖ នៅការិយាល័យនគរបាលព្រហ្មទណ្ឌកំរិតស្រាល នៃ ស្នងការដ្ឋាននគរបាលរាជធានីភ្នំពេញ នារសៀលថ្ងៃទី៩ ខែធ្នូ ឆ្នាំ២០២៣ នេះ នឹងធ្វើការបង្ហាញមុខជាសាធារណៈនូវក្រុមជនសង្ស័យករណីកាប់ប្លន់ម៉ូតូយ៉ាងសកម្មនៅក្នុងរាជធានីភ្នំពេញ ០៦នាក ។ សមត្ថកិច្ចការិយាល័យនគរបាលព្រហ្មទណ្ឌកំរិតស្រាល នៃ ស្នងការដ្ឋាននគរបាលរាជធានីភ្នំពេញ ប្រាប់ឲ្យដឹងថា ក្រុមជនសង្ស័យករណីកាប់ប្លន់ម៉ូតូយ៉ាងសកម្មនៅក្នុងរាជធានីភ្នំពេញ ០៦នាកនេះ គឺ ០៤នាក់ធ្វើសកម្មភាពនៅមូលដ្ឋានខណ្ឌសែនសុខ និង ០២នាក់ផ្សេងទៀត ធ្វើសកម្មភាពកាប់ប្លន់ម៉ូតូនៅខណ្ឌដង្កោ រាជធានីភ្នំពេញ សរុបជាង ១០ករណី ៕ដោយ ÷តារាវុទ្ធី

មេប៉ុស្តិ៍ស្រែចែង និងអធិការរងម្នាក់ត្រូវបានថ្នាក់លើផ្អាកការងារបណ្ដោះអាសន្នក្រោយរងការចោទប្រកាន់ថា ចាប់យុវជនម្នាក់យកប្រាក់៧០ម៉ឺនរៀល ដោយសង្ស័យពាក់ព័ន្ធគ្រឿងញៀន

កំពត ៖ ក្រោយមានការផ្សព្វផ្សាយថា មេប៉ុស្តិ៍ស្រែចែង ស្រុកជុំគិរី ខេត្តកំពត រងការចោទប្រកាន់ថា បានចាប់ខ្លួនយុវជនម្នាក់ដោយសង្ស័យពាកព័ន្ធគ្រឿងញៀន តែពិនិត្យទៅមិនមានពាក់ព័ន្ធ ក៏ដោះលែងវិញ និងបានយកប្រាក់៧០ម៉ឺនរៀលពីគ្រួសារយុវជននោះ នៅថ្ងៃទី០៨ ខែធ្នូ ឆ្នាំ២០២៣នេះ ឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានសម្រេចផ្អាកការងារជាបណ្តោះអាសន្នលោកមេប៉ុស្តិ៍ស្រែចែង និងអធិការរងទទួលគ្រឿងញៀន នៃអធិការដ្ឋាននគរបាលស្រុកជុំគីរី ដោយមូលហេតុមន្រ្ដីនគរបាលទាំង២រូបនេះបានអនុវត្តតួនាទី ភារកិច្ច ផ្ទុយពីវិន័យលេខ ០០៦បបជ របស់កងកម្លាំងនគរបាលជាតិ។យោងលិខិតបង្គាប់ការរបស់ស្នងការដ្ឋាននគរបាលខេត្តកំពត ដែល BTV ទទួលបាន គឺបានផ្អាកតួនាទី ភារកិច្ចបណ្តោះអាសន្ន នាយនគរបាលជាតិ ចំនួន ០២រូប មាន១- លោកវរសេនីយ៍ត្រី សម សីហា អត្តលេខ ៧៩៣០៩ ឋានៈ អធិការរង ទទួលផែនការងារប្រឆាំងគ្រឿងញៀន នៃអធិការដ្ឋាននគរបាលស្រុកជុំគិរី។ ២- លោកវរសេនីយ៍ត្រី គង់ កប អត្តលេខ ៤១៨៣២ ឋានៈ នាយប៉ុស្តិ៍នគរបាលរដ្ឋបាលស្រែចែង នៃអធិការដ្ឋាននគរបាលស្រុកជុំគិរី៕ អត្ថបទ ៖ ប្រាក់ វ៉ាន់ដា

ក្រុមបាតុករទាមទារឲ្យរដ្ឋាភិបាលអាហ្សង់ទីន និយាយប្រឆាំងក្រុមហាម៉ាស

ក្រុមបាតុករអាហ្សង់ទីន បានប្រមូលផ្តុំគ្នានៅទីក្រុងប៊ុយណូ ស៊ែរ (Buenos Aires) កាលពីថ្ងៃព្រហស្បតិ៍ (០៧ ធ្នូ) ដើម្បីទាមទារឱ្យដោះលែងចំណាប់ថ្នូរទាំងអស់ពីក្រុមហាម៉ាស និងជំរុញឱ្យរដ្ឋាភិបាលរបស់ពួកគេថ្កោលទោសក្រុមនេះ។លោក ដានីញ៉ែល ខូរីន (Daniel Korin) បងប្រុសរបស់បុរសម្នាក់ដែលត្រូវបានសម្លាប់ដោយក្រុមហាម៉ាស បាននិយាយថា «រដ្ឋាភិបាលដែលជិតចាកចេញរបស់លោកប្រធានាធិបតី អាល់ប៊ឺតតូ ហ្វឺណានដេស (Alberto Fernandez) គួរតែប្រកាសថាក្រុមហាម៉ាសជា «អង្គការភេរវករ» ហើយប្រសិនបើពួកគេបរាជ័យក្នុងការធ្វើដូច្នេះ រដ្ឋាភិបាលចូលថ្មីរបស់ប្រធានាធិបតីទើបជាប់ឆ្នោតរបស់អាហ្សង់ទីន លោក ហាវីយេ មីឡៃ (Javier Milei) គួរតែធ្វើរឿងនេះ»។ក្រុមបាតុករបានកាន់រូបភាពចំណាប់ថ្នូរ និងដាក់រូបថតកុមារដែលក្រុមហាម៉ាស ចាប់ខ្លួនក្រោមតុក្កតាខ្លាឃ្មុំពណ៌ស។ លោក មីឡៃ នឹងត្រូវចាប់ផ្ដើមចូលកាន់តំណែងនៅថ្ងៃអាទិត្យ (១០ ធ្នូ) ខាងមុខនេះ។ ក្នុងអំឡុងពេលយុទ្ធនាការបោះឆ្នោតរបស់ខ្លួន លោកបាននិយាយថា លោកនឹងមានគោលនយោបាយការបរទេសដែលគាំទ្រអ៊ីស្រាអែល និងបង្ហាញពីបំណងក្នុងការផ្លាស់ទីស្ថានទូតអាហ្សង់ទីន នៅអ៊ីស្រាអែលទៅកាន់ទីក្រុងហ្សេរុយសាឡឹម៕

ទីប្រឹក្សាសេតវិមាន៖ អាមេរិក មិនបានផ្តល់ពេលកំណត់ជាក់លាក់ ដល់អ៊ីស្រាអែល ដើម្បីបញ្ចប់ប្រតិបត្តិការ នៅតំបន់ហ្កាហ្សាទេ

ទីប្រឹក្សាសន្តិសុខជាតិរបស់សេតវិមានលោក Jon Finer បាននិយាយកាលពីថ្ងៃព្រហស្បតិ៍ថា សហរដ្ឋអាមេរិកមិនបានផ្តល់ឲ្យអ៊ីស្រាអែលនូវពេលវេលាកំណត់ជាក់លាក់ ក្នុងការបញ្ចប់ប្រតិបត្តិការប្រយុទ្ធសំខាន់ៗប្រឆាំងនឹងក្រុមហាម៉ាស នៅតំបន់ហ្កាហ្សាទេ ហើយប្រសិនបើសង្រ្គាម បានបញ្ចប់នៅពេលនេះ ក្រុមអ៊ីស្លាម នឹងបន្តការគំរាមកំហែង។លោក Finer បានថ្លែងប្រាប់វេទិកាសន្តិសុខ Aspen នៅទីក្រុងវ៉ាស៊ីនតោនថា៖«យើងមិនបានផ្តល់ពេលវេលាកំណត់ច្បាស់លាស់ ដល់អ៊ីស្រាអែលទេ មិនមែនជាតួនាទីរបស់យើងទេ។ នេះ គឺជាជម្លោះរបស់ពួកគេ។ យើងមានឥទ្ធិពល ទោះបីជាយើង មិនបានគ្រប់គ្រងចុងក្រោយលើអ្វីដែលកើតឡើងជាក់ស្តែង នៅក្នុងតំបន់ហ្កាហ្សាក៏ដោយ»។លោក Finer បាននិយាយថា អ៊ីស្រាអែល មានគោលបំណងពីរ នៅតំបន់ហ្កាហ្សា ដោយធានាថា ក្រុមហាម៉ាស មិនអាចគ្រប់គ្រងតំបន់ដែលមានប្រជាជនច្រើនបានទៀតទេ ហើយវាមិនអាចបង្កការគំរាមកំហែងដល់អ៊ីស្រាអែលទៀតដែរ បន្ទាប់ពីការវាយប្រហារ កាលពីថ្ងៃទី៧ ខែតុលា ក្នុងអំឡុងពេលដែលក្រុមសកម្មប្រយុទ្ធ បានសម្លាប់មនុស្ស ១.២០០នាក់ និងបានចាប់ពង្រត់មនុស្ស ២៤០ នាក់ផ្សេងទៀត។លោក Finer បានបន្ថែមទៀតថា៖ និយាយតាមត្រង់ទៅ ប្រសិនបើសង្រ្គាម ត្រូវបញ្ឈប់នៅថ្ងៃនេះ (ក្រុមហាម៉ាស) វានឹងបន្តបង្កការគំរាមកំហែង) ជាមូលហេតុ ដែលយើង មិនទាន់ដល់ពេលស្នើសុំឲ្យ អ៊ីស្រាអែល បញ្ឈប់ ឬបង្ខំឲ្យមានបទឈប់បាញ់ នៅឡើយ»។

ប្រទេសថៃ និងមីយ៉ាន់ម៉ា នឹងបង្កើតក្រុមការងារផ្តល់ជំនួយ ខណៈភាពចលាចលនៅព្រំដែនកើនឡើង

ក្រសួងការបរទេសថៃ បាននិយាយនៅថ្ងៃសុក្រនេះថា ប្រទេសថៃ និងមីយ៉ាន់ម៉ាដែលហែកហួរដោយជម្លោះ នឹងបង្កើតក្រុមការងារមួយដើម្បីជំរុញជំនួយមនុស្សធម៌ដល់ប្រជាជនភៀសខ្លួនដោយការប្រយុទ្ធគ្នា ហើយអាចពង្រីកបន្ថែមទៀត ដែលនឹងរួមបញ្ចូលទាំងទីភ្នាក់ងារផ្តល់ជំនួយដទៃទៀត។ ក្រសួងបាននិយាយនៅក្នុងសេចក្តីថ្លែងការណ៍ថា ប្រទេសថៃសង្ឃឹមថា ផែនការនេះ នឹងនាំទៅរកការចូលរួមក្នុងន័យស្ថាបនា រវាងសហភាពមីយ៉ាន់ម៉ា ដែលគ្រប់គ្រងដោយយោធា ជាប្លុកតំបន់សមាគមប្រជាជាតិអាស៊ីអាគ្នេយ៍ (អាស៊ាន) និងសហគមន៍អន្តរជាតិ។ អំពើហឹង្សា បានកើនឡើងកាន់តែខ្លាំងនៅក្នុងតំបន់ព្រំដែនរបស់សហភាពមីយ៉ាន់ម៉ា ខណៈសម្ព័ន្ធមិត្តកងទ័ពជនជាតិភាគតិច ធ្វើការវាយប្រហារមកលើយោធា ដោយគាំទ្រក្រុមអ្នកប្រយុទ្ធតស៊ូគាំទ្រលទ្ធិប្រជាធិបតេយ្យ ដើម្បីកំណត់គោលដៅលើកងកម្លាំងសន្តិសុខនៅទីកន្លែងផ្សេងទៀត។ អង្គការសហប្រជាជាតិ បានប៉ាន់ប្រមាណថាមនុស្សជាង ៣០០.០០០នាក់ បានជម្លៀសខ្លួនចេញដោយការប្រយុទ្ធគ្នា ចាប់តាំងពីការវាយលុករបស់ក្រុមឧទ្ទាម ចាប់ផ្តើមកាលពីចុងខែតុលា ក្នុងចំណោមមនុស្សជាង២ លាននាក់ដែលត្រូវបង្ខំចិត្តភៀសខ្លួន ចាប់តាំងពីរដ្ឋប្រហារឆ្នាំ២០២១ និងការបង្ក្រាបដែលបង្កឱ្យមានប្រតិកម្មប្រឆាំងរបបយោធា។ ភាពចលាចល គឺជាបញ្ហាប្រឈមក្នុងសមរភូមិដ៏ធំបំផុតរបស់រដ្ឋាភិបាលយោធា ចាប់តាំងពីរដ្ឋប្រហារ ហើយបានធ្វើឱ្យប្រទេសចិន និងថៃ ប្រកាសអាសន្នដោយការព្រួយបារម្ភអំពីលំហូរជនភៀសខ្លួន។ ក្រសួងការបរទេសថៃ បាននិយាយអំពីក្រុមការងារផ្តល់ជំនួយថា ភាគីមីយ៉ាន់ម៉ា នឹងបញ្ជូនក្រុមការងារទៅប្រទេសថៃក្នុងពេលឆាប់ៗនេះដើម្បីពិភាក្សាអំពីបញ្ហានេះ។ ប្រសិនបើដំណាក់កាលដំបូង នៃការអនុវត្តបានជោគជ័យ នោះទីភ្នាក់ងារផ្តល់ជំនួយផ្សេងទៀត អាចត្រូវបានអញ្ជើញឱ្យមានតួនាទីនៅពេលអនាគត។ របបយោធាមីយ៉ាន់ម៉ា ត្រូវបានហាមឃាត់មិនឱ្យចូលរួមក្នុងព្រឹត្តិការណ៍កិច្ចប្រជុំកំពូលអាស៊ានកម្រិតកំពូល ជុំវិញការខកខានរបស់ខ្លួន ក្នុងការអនុវត្តផែនការសន្តិភាព ដែលសហភាពនេះបានព្រមព្រៀងបន្ទាប់ពីរដ្ឋប្រហារ។

បណ្ដាញសង្គម

ព័ត៌មានថ្មីៗ

លោកជំទាវបណ្ឌិត ពេជ ចន្ទមុន្នី ក្រាបបង្គំអបអរសាទរ សម្តេចព្រះមហាក្សត្រី ព្រះវររាជមាតាជាតិខ្មែរ ដែលត្រូវបានថ្វាយ «ពានសមាជិកភាពជើងឯក» ពី OB-PS

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ត្រូវបានតែងតាំងជា ប្រធានថ្នាក់ជាតិនៃសហគមន៍ OB-PS ប្រចាំកម្ពុជា និងទទួលបាន “ពានសមាជិកភាពកិត្តិយសព្រះអង្គម្ចាស់ក្សត្រី បេណេឌិកតេ” ពីសហគមន៍ The Olave Baden-Powell Society

អ្នកស្លាប់ដោយសារការបាញ់ប្រហាររបស់អ៊ីស្រាអែល នៅហ្កាហ្សា លើស ១.០០០នាក់ហើយ តាំងពីមានបទឈប់បាញ់

សម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ ត្រូវបានថ្វាយ “ពានសមាជិកភាពជើងឯក” ពីសហគមន៍ The Olave Baden-Powell Society (OB-PS)

ព្រះអង្គម្ចាស់ក្សត្រី Benedikte នៃព្រះរាជាណាចក្រដាណឺម៉ាក ផ្ញើព្រះរាជសារថ្វាយព្រះពរ សម្តេចព្រះមហាក្សត្រី ព្រះវររាជមាតាជាតិខ្មែរ ក្នុងឱកាសព្រះរាជពិធីចម្រើនព្រះជន្ម

អ្នកស្លាប់ដោយសាររញ្ជួយដី កើនឡើងដល់ ៧៨នាក់ ខណៈមនុស្ស ១,៥លាននាក់ រងប៉ះពាល់ នៅភាគខាងត្បូងហ្វីលីពីន

លោក Zelensky៖ «ទីក្រុងមូស្គូនឹងឆេះសន្ធោសន្ធៅ» ប្រសិនបើរុស្ស៊ីនៅតែបន្តការវាយប្រហារ

លោក Hegseth៖ អាមេរិកនឹងធ្វើការវាយប្រហារ និងបិទផ្លូវទឹកឡើងវិញ បើអ៊ីរ៉ង់មិនបំពេញការប្តេជ្ញាចិត្ត

ប្រធានាធិបតីអ៊ីរ៉ង់បង្ហាញមោទនភាព ក្នុងការមានកិច្ចព្រមព្រៀងជាប្រវត្តិសាស្ត្រ ជាមួយអាមេរិក

ស្វីសសាទរផែនការសន្តិភាពអាមេរិក-អ៊ីរ៉ង់ ខណៈត្រៀមខ្លួនធ្វើម្ចាស់ផ្ទះការចរចាដំបូង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877