BTV NEWS

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

សន្តិសុខ និង សង្គម

ក្រុមហាម៉ាស នឹងដោះលែងចំណាប់ថ្នូរបរទេសមួយចំនួននៅប៉ុន្មានថ្ងៃខាងមុខនេះ

លោក Abu Ubaida អ្នកនាំពាក្យក្រុមប្រដាប់អាវុធកងពលតូច អាល់កាសាម (al-Qassam) របស់ក្រុមហាម៉ាស បាននិយាយនៅក្នុងវីដេអូមួយនៅលើគណនីតេឡេក្រាម របស់ខ្លួនកាលពីថ្ងៃអង្គារ (៣១ តុលា) ថា ក្រុមហាម៉ាស បានប្រាប់អ្នកសម្របសម្រួលថា ខ្លួននឹងដោះលែងចំណាប់ថ្នូរបរទេសមួយចំនួននៅក្នុងប៉ុន្មានថ្ងៃខាងមុខនេះ ដោយមិនបានផ្តល់ព័ត៌មានលម្អិតបន្ថែមអំពីចំនួនចំណាប់ថ្នូរ ឬសញ្ជាតិរបស់ពួកគេនោះទេ។អ្នកនាំពាក្យក្រុមប្រដាប់អាវុធរូបនោះក៏បាននិយាយផងដែរថា ក្រុមរបស់ខ្លួនបានប៉ះទង្គិចជាមួយកងទ័ពអ៊ីស្រាអែល នៅជួរមុខចំនួនបីទីតាំង ហើយអាច «សម្លាប់ និងធ្វើឱ្យទាហានអ៊ីស្រាអែល ជាច្រើននាក់រងរបួស» ព្រមទាំងបំផ្លាញរថយន្តយោធាចំនួន ២២គ្រឿងផងដែរ។ លោក Abu Ubaida បាននិយាយថា កងទ័ពជើងទឹករបស់អង្គភាពនេះ ក៏បានប្រើប្រាស់មីស៊ីលក្រោមទឹកដែលមានឈ្មោះថា អាស៊ីហ្វ (Aasif) ជាលើកដំបូងនៅក្នុងជម្លោះនេះដែរ។លោក Abu Ubaida បានបដិសេធថា ចំណាប់ថ្នូរម្នាក់ ដែលត្រូវបានរំដោះដោយអ៊ីស្រាអែល មិនបានស្ថិតនៅក្នុងការគ្រប់គ្រងរបស់ក្រុមហាម៉ាស នោះទេ ដោយនិយាយថា ចំណាប់ថ្នូរមួយចំនួនត្រូវបានចាប់ខ្លួនដោយក្រុមផ្សេង និងបុគ្គលផ្សេងទៀតនៅក្នុងតំបន់ហ្កាហ្សា ស្ទ្រីប។ សេចក្តីថ្លែងការណ៍នេះ គឺសំដៅលើទាហានអ៊ីស្រាអែលម្នាក់ឈ្មោះ Ori Megidish ដែលយោធាអ៊ីស្រាអែលបាននិយាយកាលពីថ្ងៃចន្ទថា ត្រូវបានរំដោះនៅក្នុងតំបន់ ហ្កាហ្សា ស្រ្ទីប ក្នុងអំឡុងពេលប្រតិបត្តិការជើងគោកមួយ៕

UN៖ ជនស៊ីវិលជាង ៩.៩០០នាក់ ត្រូវបានសម្លាប់ចាប់តាំងពីការឈ្លានពានរបស់រុស្ស៊ី លើអ៊ុយក្រែន

លោក Ramesh Rajasingham ប្រធានការិយាល័យសម្របសម្រួលនៃអង្គការសហប្រជាជាតិទទួលបន្ទុកកិច្ចការមនុស្សធម៌ (OCHA) បាននិយាយនៅឯកិច្ចប្រជុំសមាជិកក្រុមប្រឹក្សាសន្តិសុខអង្គការសហប្រជាជាតិ ក្នុងសន្និសីទសង្ខេបស្តីពីស្ថានភាពនៅក្នុងប្រទេសអ៊ុយក្រែន កាលពីថ្ងៃអង្គារ (៣១ តុលា) ថា «តាមតួលេខចុងក្រោយបង្អស់បានឲ្យដឹងថា ជនស៊ីវិលជាង ៩.៩០០នាក់ ត្រូវបានសម្លាប់ចាប់តាំងពីការចាប់ផ្តើមនៃការលុកលុយរបស់រុស្ស៊ី លើអ៊ុយក្រែន មក ពោលគឺស្មើនឹងជនស៊ីវិលជិត ១៦នាក់ ត្រូវបានគេសម្លាប់ជារៀងរាល់ថ្ងៃ»។កាលពីថ្ងៃអង្គារដដែលនោះ ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយថា ខ្លួនបានរកឃើញ «ហេតុផល» ជុំវិញការវាយប្រហារដោយមីស៊ីល ដែលបានសម្លាប់មនុស្ស ៥៩នាក់ នៅក្នុងហាងកាហ្វេមួយនៅក្នុងភូមិ Hroza របស់ប្រទេសអ៊ុយក្រែន ដោយហេតុការណ៍នោះត្រូវបានធ្វើឡើងដោយប្រទេសរុស្ស៊ី។ការរកឃើញនេះ ត្រូវបានបោះពុម្ពផ្សាយនៅក្នុងរបាយការណ៍មួយ ផ្អែកលើបេសកកម្មស្វែងរកការពិតចំនួនពីរករណី ចំពោះភូមិ Hroza ដោយការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ជាទីដែលទីភ្នាក់ងារនេះបានសម្ភាសន៍មនុស្ស ៣៥នាក់ រួមទាំងអ្នកស្រុក សាក្សី អ្នករស់រានមានជីវិតពីរនាក់ បុគ្គលិកពេទ្យ និង បុគ្គលិកកន្លែងបញ្ចុះសពផងដែរ៕

អង្គការលើកលែងទោសអន្តរជាតិ៖កងកម្លាំងអ៊ីស្រាអែលបានធ្វើឲ្យជនស៊ីវិលលីបង់រងរបួសដោយសារធាតុផូស្វ័រពណ៌ស

អង្គការលើកលែងទោសអន្តរជាតិ បាននិយាយកាលពីថ្ងៃអង្គារថា ជនស៊ីវិលនៅ ប្រទេសលីបង់ភាគខាងត្បូង បានរងរបួសក្នុងខែនេះ នៅពេលដែលកងកម្លាំងអ៊ីស្រាអែល បានវាយប្រហារទៅលើភូមិមួយនៅព្រំដែនជាមួយនឹងគ្រាប់ផ្លោងដែលមានផ្ទុកសារធាតុផូស្វ័រពណ៌ស ដែលជាគ្រាប់រំសេវដែលអាចបង្កឆេះដ៏ខ្លាំងក្លា។អង្គការនេះ បាននិយាយថា ខ្លួនបានផ្ទៀងផ្ទាត់ករណីបីផ្សេងទៀតនៃយោធាអ៊ីស្រាអែលដែលទម្លាក់ផូស្វ័រពណ៌ស នៅតាមតំបន់ព្រំដែនលីបង់ កាលពីខែមុន ប៉ុន្តែ បាននិយាយថា ខ្លួនមិនមានឯកសារណាមួយដែលបង្កគ្រោះថ្នាក់ដល់ជនស៊ីវិល នៅក្នុងករណីទាំងនោះឡើយ។ក្រុមអ្នកតស៊ូមតិសិទ្ធិមនុស្ស និយាយថា ការប្រើប្រាស់ផូស្វ័រពណ៌ស គឺខុសច្បាប់ នៅក្រោមច្បាប់អន្តរជាតិ នៅពេលដែលសារធាតុគីមីក្តៅពណ៌ស ត្រូវបានបាញ់ចូលទៅក្នុងតំបន់ដែលមានប្រជាជន។ វាអាចធ្វើឲ្យឆេះអគារ និងធ្វើឲ្យរលាកសាច់មនុស្សរហូតដល់ឆ្អឹង។ អ្នករស់រានមានជីវិតមានហានិភ័យនៃការឆ្លងមេរោគ និងសរីរាង្គ ឬផ្លូវដង្ហើម បើទោះបីជាមានការរលាក តិចតួចក៏ដោយ។អង្គការលើកលែងទោស បាននិយាយថា បន្ទាប់ពីការវាយប្រហាររបស់អ៊ីស្រាអែលកាលពីថ្ងៃទី១៦ ខែតុលា នៅទីក្រុង Duhaira ផ្ទះ និងរថយន្ត បានឆេះ ហើយជនស៊ីវិល ៩នាក់ ត្រូវបានបញ្ជូនទៅមន្ទីរពេទ្យភ្លាមៗ ដោយមានបញ្ហាដកដង្ហើមបណ្តាលពីផ្សែង។ អង្គការនេះ បាននិយាយថា ខ្លួនបានផ្ទៀងផ្ទាត់រូបថតដែលបង្ហាញពីសំបកផូស្វ័រពណ៌ស ដែលបានគេដាក់ដំរៀបជាជួរនៅជាប់នឹងកាំភ្លើងធំរបស់អ៊ីស្រាអែល នៅជិតព្រំដែនលីបង់-អ៊ីស្រាអែល ដែលមានភាពតានតឹង។

ក្រុមសាច់ញាតិដែលក្រុមហាម៉ាស ចាប់ជាចំណាប់ថ្នូរប្រមូលផ្ដុំគ្នាក្នុងទីក្រុង តេលអាវីវ ស្នើឲ្យជួយជីវិត និងបង្កើតបទឈប់បាញ់

ក្រុមគ្រួសារអ៊ីស្រាអែល ដែលត្រូវបាន ក្រុមហាម៉ាស ចាប់ជាចំណាប់ថ្នូរ បានប្រមូលផ្ដុំគ្នា នៅក្នុងទីក្រុង តេលអាវីវ (Tel Aviv) កាលពីថ្ងៃអង្គារ ទី៣១តុលា ដោយកាន់រូបថតមនុស្សជាទីស្រឡាញ់របស់ពួកគេ។ក្រុមសាច់សញាតិ ព្រួយបារម្ភយ៉ាងខ្លាំង ចាប់តាំងពីយោធាអ៊ីស្រាអែល បានបង្កើនការវាយប្រហារដោយថ្មើរជើង នៅក្នុងដែនដីប៉ាឡេស្ទីន ។អំឡុងការប្រមូលផ្ដុំកាលពីថ្ងៃអង្គារ មនុស្សមួយចំនួនបានកាន់ផ្ទាំងអក្សរមួយអំពាវនាវឲ្យបទឈប់បាញ់។លោកនាយករដ្ឋមន្ត្រី Benjamin Netanyahu បានជួបក្រុមគ្រួសារមួយចំនួន កាលពីថ្ងៃសៅរ៍ ទី២៨តុលា និងនៅក្នុងវីដេអូមួយដែលការរិយាល័យរបស់លោកបានបញ្ចេញ លោកបាននិយាយថា ការរំដោះចំណាប់ថ្នូរគឺជាផ្នែកដ៏ចាំបាច់នៃគោលដៅរបស់យោធា ។ សម្ពាធគឺជារឿងសំខាន់។ សម្ពាធកាន់តែខ្លាំង ផ្ដល់ឱកាសកាន់តែច្រើន។ក្រុមហាម៉ាស បានចាប់មនុស្សជាចំណាប់ថ្នូរ ជាង២៣០នាក់ រួមទាំងកុមារ ចូលទៅក្នុងតំបន់ហ្កាហ្សាអំឡុងការវាយឆ្មក់របស់ពួកគេ៕

ក្រុមឧទ្ទាមម៉ាលីអះអាងថា ខ្លួនបានយកមូលដ្ឋានដែលកងរក្សាសន្តិភាពរបស់UN បានដកចេញ

ក្រុមឧទ្ទាម Tuareg ភាគខាងជើងនៃប្រទេសម៉ាលី បាននិយាយថា ខ្លួនបានដណ្តើមយកមូលដ្ឋាននៅ Kidalដែលត្រូវបានទុកចោលដោយអង្គការសហប្រជាជាតិ កាលពីថ្ងៃអង្គារ ដែលអាចនាំទៅដល់ការបង្រ្កាប នៅក្នុងទីក្រុងយុទ្ធសាស្ត្រ ដែលកងទ័ពរបស់ប្រទេសម៉ាលីសង្ឃឹមថា នឹងដណ្តើមយកមក គ្រប់គ្រងវិញ។បេសកកម្មរបស់UN ដែលគេស្គាល់ថា បេសកកម្មស្ថិរភាពរួមបញ្ចូលគ្នាពហុភាគីរបស់អង្គការសហប្រជាជាតិនៅប្រទេសម៉ាលី (MINUSMA) មានរយៈពេលរហូតដល់ថ្ងៃទី ៣១ ខែធ្នូ ដើម្បីរៀបចំ បន្ទាប់ពីរបបយោធារបស់ប្រទេសម៉ាលី បានបញ្ជាឲ្យចាកចេញ កាលពីខែមិថុនា។ ការដកខ្លួនចេញពីមូលដ្ឋានផ្សេងទៀត បានជំរុញឲ្យមានការប្រយុទ្ធគ្នារវាងកងទ័ពរបស់ប្រទេសម៉ាលី និងក្រុមឧទ្ទាម ដែលកំពុងប្រជែងគ្នាដណ្តើមគ្រប់គ្រងតំបន់ដែលកងរក្សាសន្តិភាព បានដកចេញ។Kidal គឺជាមូលដ្ឋានទី៨របស់បេសកកម្ម MINUSMA ដែលត្រូវបិទនៅកណ្តាល និងភាគខាងជើងប្រទេសម៉ាលី ហើយជាមូលដ្ឋានដ៏សំខាន់បំផុតមួយ។ វាស្ថិតនៅក្នុងតំបន់ដែលគ្រប់គ្រងជាប្រវត្តិសាស្ត្រដោយក្រុមឧទ្ទាម ដែលរបបយោធារបស់ប្រទេសម៉ាលី ចង់ដណ្តើមយកមកគ្រប់គ្រងវិញ។បេសកកម្ម MINUSMA បានបញ្ជាក់ពីការចាកចេញរបស់ខ្លួននៅក្នុងសេចក្តីថ្លែងការណ៍មួយដែលបាននិយាយថា ខ្លួនបានបំផ្លាញឧបករណ៍ចោល មុនពេលចាកចេញ។

អង្គការសុខភាពពិភពលោក ព្រមានពីការជិតមកដល់នៃមហន្តរាយសុខភាពសាធារណៈនៅតំបន់ហ្កាហ្សា

អង្គការសុខភាពពិភពលោក (WHO) បាននិយាយកាលពីថ្ងៃអង្គារ (៣១ តុលា) ថា មហន្តរាយសុខភាពសាធារណៈ ខិតចូលមកជិតដល់ហើយ នៅតំបន់ហ្កាហ្សា ស្របពេលមានមនុស្សច្រើនកុះករ ការផ្លាស់ទីលំនៅដ៏ច្រើនលើសលុប ព្រមទាំងការខូចខាតហេដ្ឋារចនាសម្ព័ន្ធទឹក និងកង្វះអនាម័យផងដែរ។ អ្នកនាំពាក្យអង្គការ WHO លោក Christian Lindmeier បានព្រមានអំពីហានិភ័យនៃការស្លាប់របស់ជនស៊ីវិល ដែលមិនមានទំនាក់ទំនងដោយផ្ទាល់ទៅនឹងការទម្លាក់គ្រាប់បែករបស់អ៊ីស្រាអែល នោះទេ។ក្រុមអាជ្ញាធរសុខាភិបាលតំបន់ហ្កាហ្សា បាននិយាយថា ប្រជាជនប៉ាឡេស្ទីនជាង ៨.៣០០នាក់ ត្រូវបានសម្លាប់ចាប់តាំងពីអ៊ីស្រាអែល បានចាប់ផ្តើមការវាយប្រហារតាមអាកាសទៅលើតំបន់ដែលគ្រប់គ្រងដោយក្រុមហាម៉ាស នេះមក ក្នុងការឆ្លើយតបទៅនឹងការវាយប្រហារកាលពីថ្ងៃទី៧ ខែតុលា នៅពេលដែលក្រុមហាម៉ាស បានសម្លាប់មនុស្ស ១.៤០០នាក់នៅក្នុងប្រទេសអ៊ីស្រាអែល និងចាប់ចំណាប់ថ្នូរជាង ២០០នាក់។អ្នកនាំពាក្យរបស់ទីភ្នាក់ងារកុមាររបស់អង្គការសហប្រជាជាតិ លោក James Elder បានព្រមានអំពីហានិភ័យនៃការស្លាប់របស់ទារក ដោយសារតែកង្វះជាតិទឹកជាមួយនឹងទិន្នផលទឹកទាបក្នុងកម្រិត ៥% នៃកម្រិតធម្មតា។ លោកបានបន្ថែមថា កុមារប្រហែល ៩៤០នាក់ ត្រូវគេរាយការណ៍ថាបានបាត់ខ្លួននៅក្នុងតំបន់ហ្កាហ្សា ដោយអ្នកខ្លះត្រូវបានជាប់គាំងនៅក្រោមគំនរបាក់បែកជាដើម។ការិយាល័យមនុស្សធម៌របស់អង្គការសហប្រជាជាតិ បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា ការផ្គត់ផ្គង់ទឹកទៅកាន់តំបន់ហ្កាហ្សា ភាគខាងត្បូង ត្រូវបានបញ្ឈប់កាលពីថ្ងៃទី៣០ ខែតុលា ដោយមិនដឹងមូលហេតុនោះទេ៕

សមត្ថកិច្ចឡោមព័ទ្ធទីតាំងហ្គេមមួយកន្លែង ឃាត់ខ្លួនមនុស្សជាង៨០នាក់

ភ្នំពេញ៖ មនុស្សប្រុសស្រីជាង ៨០នាក់ ត្រូវបានកម្លាំងសមត្ថកិច្ច នៃនាយកដ្ឋានប្រឆាំងបទល្មើសល្បែងពាណិជ្ជកម្មនៃក្រសួងមហាផ្ទៃ ធ្វើការឃាត់ខ្លួន និងបញ្ជូនទៅធ្វើការសាកសួរ ដោយសង្ស័យជាប់ពាក់ព័ន្ធការលេងល្បែងស៊ីសង និងល្បែងហ្គេមបាញ់ត្រី។ប្រតិបត្តិការនេះបានធ្វើឡើងនៅវេលាម៉ោង៩យប់ ថ្ងៃទី៣១ ខែតុលា ឆ្នាំ២០២៣ ទីតាំងស្ថិតនៅអគារ១កន្លែង ដែលមានស្លាកយីហោរ ការកម្សាន្តក្រោន (CROWN ENTERTAINMENT) ស្ថិតនៅមូលដ្ឋានសង្កាត់ទន្លេបាសាក់ ខណ្ឌចំការមន រាជធានីភ្នំពេញ។តាមប្រភពព័ត៌មានពីកន្លែងកើតហេតុ ឲ្យដឹងថា គេឃើញមានវត្តមានរបស់សមត្ថកិច្ច នៃនាយកដ្ឋានប្រឆាំងបទល្មើសល្បែងពាណិជ្ជកម្ម ជាច្រើននាក់ បានចុះមកទីតាំងអគារខាងលើ និងបានឡោមព័ទ្ធទីតាំងដែលមានបង្កប់ល្បែងបាញ់ត្រី និងល្បែងផ្សេងទៀតនៅខាងក្នុង ព្រមទាំងបានធ្វើការឃាត់ខ្លួនមនុស្សប្រុសស្រីជាច្រើននាក់ ក្នុងនោះមានជនបរទេសផងដែរ។តាមរបាយការណ៍បឋមបានអោយដឹងថា មនុស្សដែលត្រូវបានសមត្ថកិច្ចឃាត់ខ្លួន មានរហូតដល់ទៅ៨៣នាក់ ក្នុងនោះខ្មែរ៦៣នាក់ វៀតណាម៨នាក់ ចិន១៣នាក់ ទាំងប្រុសទាំងស្រី។ ដោយសមត្ថកិច្ចបានដកហូតគ្រឿងសម្ភារៈដូចជា៖ គ្រឿងអេឡិចត្រូនិច បៀរការ៉ាត់ បុកប៊ីយ៉ែ ហ្គេមបាញ់ត្រី ម៉ាស៊ីនស្លុត និងសម្ភារៈលេងល្បែងផ្សេងៗទៀត។ក្រោយឃាត់ខ្លួន សមត្ថកិច្ចបានបញ្ជូនមនុស្សទាំង៨៣នាក់ ឡើងទៅលើរថយន្តចំនួន២គ្រឿង ព្រមទាំងបញ្ជូនទៅកាន់នាយកដ្ឋានប្រឆាំងបទល្មើសល្បែងពាណិជ្ជកម្ម ដើម្បីធ្វើការសាកសួរ និងចាត់វិធានការតាមនីតិវិធីច្បាប់ផងដែរ៕ អត្ថបទ៖ កុម្ភៈ

ក្រុមអ្នកតវ៉ា ទាមទារឲ្យមានបទឈប់បាញ់នៅហ្កាហ្សា និងបញ្ចប់ការផ្ដល់ជំនួយពីលោកខាងលិចឲ្យទៅអ៊ីស្រាអែល

បាតុករកាណាដារាប់រយនាក់ បានចុះទៅតាមដងផ្លូវនានាក្នុងទីក្រុង Toronto កាលពីថ្ងៃអាទិត្យ (ទី២៩ តុលា) ដើម្បីទាមទារឲ្យមានបទឈប់បាញ់ នៅតំបន់ហ្គាហ្សា ខណៈដែលជម្លោះរវាងអ៊ីស្រាអែល និងក្រុមហាម៉ាស នៅតែបន្តកើនឡើង។ក្រុមអ្នកតវ៉ា បានប្រមូលផ្តុំគ្នានៅខាងក្រៅស្ថានអគ្គកុងស៊ុលសហរដ្ឋអាមេរិកសម្រាប់ការជួបជុំនេះ ដែលរៀបចំដោយចលនាយុវជនប៉ាឡេស្ទីនក្រុង Toronto។ Yara Shoufani សមាជិកនៃក្រុមនេះ បាននិយាយថា ពួកគេ ក៏កំពុងអំពាវនាវឲ្យ«បញ្ចប់ទាំងការផ្តល់មូលនិធិ និងការគាំទ្រពីសហរដ្ឋអាមេរិក និងកាណាដា និងការជួយដល់អំពើប្រល័យពូជសាសន៍របស់អ៊ីស្រាអែល»។ក្រុមសមាជិកនៃសំឡេងជ្វីហ្វឯករាជ្យ បានចូលរួមការតវ៉ា ហើយបានរិះគន់អ្វីដែលពួកគេនិយាយថា ជាអំពើប្រល័យពូជសាសន៍ ដែលកំពុងធ្វើឡើង ក្នុងនាមពួកគេ។ការតវ៉ាជាអន្តរជាតិ បាននិងកំពុងកើនឡើងក្នុងរយៈពេលប៉ុន្មានថ្ងៃកន្លងមកនេះ ជាមួយនឹងបាតុកម្មទ្រង់ទ្រាយធំ នៅក្នុងទីក្រុងនានា ដូចជាទីក្រុងឡុងដ៍ និងញូវយ៉ក អំពាវនាវឲ្យ«បញ្ឈប់ការវាយប្រហារជាលក្ខណៈមនុស្សធម៌» ដើម្បីអនុញ្ញាតឲ្យមានជំនួយនៅក្នុងតំបន់ហ្គាហ្សា។អ៊ីស្រាអែល បានបង្ហាញចេតនាឡោមព័ទ្ធទីក្រុងសំខាន់របស់តំបន់ហ្គាហ្សា កាលពីថ្ងៃអាទិត្យ ដោយបានផ្សព្វផ្សាយរូបភាពនៃរថក្រោះប្រយុទ្ធ នៅលើឆ្នេរខាងលិចរបស់ប៉ាឡេស្ទីនរយៈពេល ៤៨ម៉ោង បន្ទាប់ពីបានបញ្ជាឲ្យពង្រីកការលុកលុយតាមព្រំដែនភាគខាងកើតរបស់ខ្លួននោះ។

មនុស្ស១៨នាក់ស្លាប់៧០បាត់ខ្លួន ខណៈទូកដឹកអ្នកដំណើរលិច នៅទន្លេប្រទេសនីហ្សេរីយ៉ា

មន្ត្រីសង្គ្រោះបន្ទាន់ បាននិយាយកាលពីថ្ងៃចន្ទថា ក្រុមសង្គ្រោះ នៅក្នុងប្រទេសនីហ្សេរីយ៉ា កំពុងស្វែងរក មនុស្សជាង៧០នាក់ ដែលបានបាត់ខ្លួនកាលពីចុងសប្តាហ៍កន្លងទៅនេះ បន្ទាប់ពីទូកមួយគ្រឿង ដឹកអាជីវករក្នុងតំបន់ បានលិចនៅទន្លេភាគឦសានប្រទេស។ ការដឹកជញ្ចូនតាមដងទន្លេគឺជាមធ្យោបាយធម្មតានៅក្នុងប្រទេសនីហ្សេរីយ៉ា ប៉ុន្តែឧបទ្ទវហេតុលិចទូក បានកើតឡើងជាញឹកញាប់ នៅតាមផ្លូវទឹកដែលគ្រប់គ្រងខ្សោយ ដោយសារតែ ដាក់មនុស្សច្រើនលើសចំណុះ និងខ្វះការថែទំា ជាពិសេសនៅក្នុងរដូវវស្សា នៅពេលទឹកទន្លេនឹងបឹង ពេញហៀរដោយមានទឹកជំនន់។ កាណូត ដែលដឹកមនុស្សជាង១០០នាក់ រួមមានអាជីវករ និងកុមារ បានក្រឡាប់នៅរដ្ឋ Taraba កាលពីថ្ងៃសៅរ៍ ក្នុងផ្លូវធ្វើដំណើរទៅកាន់ផ្សារមួយកន្លែង ក្នុងភូមិ Mayo Ranewa នៅត្រើយម្ខាងនៃទន្លេ ពីស្រុក Karim Lamido ។ ប្រធានទីភ្នាក់ងារ គ្រប់គ្រងសង្គ្រោះបន្ទាន់ប្រទេសនីហ្សេរីយ៉ា បាននិយាយថា មនុស្ស៧៣នាក់ នៅបាត់ខ្លួននៅឡើយក្នុងឧបទ្ទវហេតុលិចទូក ដោយសាកសព១៧នាក់ ត្រូវបានរកឃើញរហូតមកដល់ពេលនេះនៅទន្លេ។ នៅក្នុងឧបទ្ទវហេតុនេះ អ្នកដំណើរ១៤នាក់ត្រូវបានជួយសង្គ្រោះ ខណៈមានមនុស្ស១០៤នាក់ ជិះនៅលើទូកនេះ។

ពលរដ្ឋអាហ្វហ្គានីស្ថាន វិលត្រឡប់ដោយស្ទាក់ស្ទើរមកកាន់របបតាលីបង់ ខណៈប៉ាគីស្ថាននឹងបណ្តេញចេញជនអន្តោប្រវេសន៍គ្មានឯកសារ ១,៧ លាននាក់

ខណៈនាឡិកាបានបន្លឺសូរដល់ថ្ងៃផុតកំណត់នៅថ្ងៃទី ១ ខែវិច្ឆិកា ប្រទេសប៉ាគីស្ថាន បានកំណត់សម្រាប់ជនអន្តោប្រវេសន៍ដែលគ្មានឯកសារប្រមាណ១,៧លាននាក់ឲ្យចាកចេញ លោកMuhammad Rahim បានឡើងជិះលើរថយន្តក្រុងធ្វើដំណើរពីទីក្រុង Karachi ទៅកាន់ព្រំដែនប្រទេសអាហ្វហ្គានីស្ថាន។ លោក Rahim គឺជាជនជាតិអាហ្វហ្គានីស្ថានម្នាក់ក្នុងចំណោមជនជាតិអាហ្វហ្គានីស្ថានជាច្រើន ដែលត្រូវបានបង្ខំឱ្យចាកចេញ ដោយសារលោកពុំមានឯកសារបញ្ជាក់អត្តសញ្ញាណប៉ាគីស្ថាន។ រដ្ឋាភិបាលក្រុមតាលីបង់ នៅក្នុងប្រទេសអាហ្វហ្គានីស្ថាន ដែលនៅជិតខាងបាននិយាយថា ពលរដ្ឋអាហ្វហ្គានីស្ថានចំនួន ៦០.000នាក់បានវិលត្រឡប់មកវិញនៅចន្លោះថ្ងៃទី 23 ខែកញ្ញា ដល់ថ្ងៃទី 22 ខែតុលា ពីប្រទេសប៉ាគីស្ថាន បន្ទាប់ពីខ្លួនបានប្រកាសកាលពីថ្ងៃទី ៤ ខែតុលាថានឹងបណ្តេញជនអន្តោប្រវេសន៍ដែលគ្មានឯកសារ ដែលមិនព្រមចាកចេញ។ យោងតាមទីក្រុងអ៊ីស្លាម៉ាបាដ បានឲ្យដឹងថា ប្រទេសប៉ាគីស្ថាន ជាជម្រករបស់ជនភៀសខ្លួនអាហ្វហ្គានីស្ថានជាងបួនលាននាក់ ។ ពលរដ្ឋអាហ្វហ្គានីស្ថាន បង្កើតជាចំណែកធំបំផុតនៃជនអន្តោប្រវេសន៍ ដែលភាគច្រើន បានកើតឡើងបន្ទាប់ពីក្រុមតាលីបង់បានដណ្តើមយកមកវិញប្រទេសអាហ្វហ្គានីស្ថាន នៅឆ្នាំ ២០២១ ប៉ុន្តែចំនួនដ៏ច្រើនបានកើតមានឡើងចាប់តាំងពីការឈ្លានពានរបស់សូវៀតឆ្នាំ ១៩៧៩។ ការគំរាមបណ្តេញចេញ បានកើតឡើង បន្ទាប់ពីការបំផ្ទុះគ្រាប់បែកអត្តឃាតនៅឆ្នាំនេះ ដែលរដ្ឋាភិបាលមិនបានផ្តល់ភស្តុតាង និយាយថាមានជាប់ពាក់ព័ន្ធជាមួយជនជាតិអាហ្វហ្គានីស្ថាន។ ទីក្រុងអ៊ីស្លាម៉ាបាដ បានដាក់កំហុសលើពួកគេចំពោះការវាយប្រហាររបស់ក្រុមសកម្មប្រយុទ្ធផ្សេងទៀត ព្រមទាំងការជាប់ពាក់ព័ន្ធក្នុងសកម្មភាពរត់ពន្ធ។ ប្រទេសប៉ាគីស្ថានដែលជាប់គាំងសាច់ប្រាក់ កំពុងឆ្លងកាត់អតិផរណាខ្ពស់ និងកម្មវិធីសង្គ្រោះរបស់មូលនិធិរូបិយវត្ថុអន្តរជាតិ (IMF) ដ៏តានតឹង បាននិយាយថា ជនអន្តោប្រវេសន៍ដែលគ្មានឯកសារ បានចំណាយធនធានរបស់ខ្លួនអស់រយៈពេលជាច្រើនទសវត្សរ៍មកហើយ។

បណ្ដាញសង្គម

ព័ត៌មានថ្មីៗ

ប្រសាសន៍សំខាន់ៗរបស់សម្ដេចធិបតី ក្នុងពិធីសម្ពោធបើកឲ្យប្រើប្រាស់ជាផ្លូវការផ្លូវជាតិលេខ១០ ប្រវែងសរុប ១៩៨,៥១៨ គីឡូម៉ែត្រ នៅខេត្តពោធិ៍សាត់

ទិវាមនុស្សចាស់| សម្ដេចធិបតី៖«ការវិនិយោគលើយុវជនវ័យក្មេងនៅថ្ងៃនេះសម្រាប់មនុស្សវ័យចាស់ប្រកបដោយផលិតភាពនៅថ្ងៃអនាគត»

ទិវាមនុស្សចាស់| ព្រះមហាក្សត្រ អំពាវនាវដល់អាជ្ញាធរគ្រប់លំដាប់ថ្នាក់ និងជនរួមជាតិយកចិត្តទុកដាក់ និងជួយបីបាច់ថែរក្សាមនុស្សវ័យចាស់ ជរា ពិការ ក្រីក្រ និងអ្នកគ្មានទីពឹងទាំងឡាយ

ក្រសួងបរិស្ថាន និងក្រសួងមហាផ្ទៃ ជំរុញភាពស្អាតនៅតាមពន្ធនាគារនៅទូទាំងប្រទេស

នាយករដ្ឋមន្រ្តីកាតាថ្កោលទោសអំពើឃោឃៅរបស់អ៊ីស្រាអែលនៅតំបន់ហ្កាហ្សា

គ្រូពេទ្យ៖ ការវាយប្រហាររបស់អ៊ីស្រាអែល នៅតំបន់ហ្កាហ្សា សម្លាប់មនុស្សយ៉ាងតិច ៥នាក់

តំណាងអចិន្ត្រៃយ៍កម្ពុជា ប្រចាំ UN ស្នើអ្នករាយការណ៍ពិសេសស្តីពីស្ថានភាពសិទ្ធិមនុស្សបន្តយកចិត្តទុកដាក់ចំពោះប្រជាជនភៀសសឹកកម្ពុជា និងការវិលត្រឡប់ទៅកាន់លំនៅឋានវិញដោយសុវត្ថិភាព និងសេចក្តីថ្លៃថ្នូរ

ជើងហោះហើរទៅកាន់អ៊ីស្រាអែល បង្វែរទិសដៅហោះហើរទៅកាន់អារ៉ាប៊ីសាអ៊ូឌីត ក្រោយការប្រកាសអាសន្ន

នាយករដ្ឋមន្ត្រីអ៊ីរ៉ាក់សាទរយុគសម័យ «អធិបតេយ្យភាព» ថ្មី ក្រោយកម្លាំងចម្រុះដឹកនាំដោយអាមេរិកចាកចេញ

KCNA៖ កូរ៉េខាងជើង និងវៀតណាមកំពុងស្វែងរកការពង្រីកកិច្ចសហប្រតិបត្តិការយោធា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877