BTV NEWS

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

សន្តិសុខ និង សង្គម

ក្រុមបាតុករជនជាតិអេស្ប៉ាញនៅទីក្រុងបាសេឡូណា ប្រមូលផ្តុំគ្នាគាំទ្រកីឡាការនីដែលត្រូវគ្រូបង្វឹកបៀតបៀន

អេស្ប៉ាញ៖ ក្រុមបាតុករប្រហែល២០០នាក់ បានប្រមូលផ្តុំគ្នានៅទីក្រុងបាសេឡូណា ដើម្បីគាំទ្រកីឡាការនីបាល់ទាត់ម្នាក់ឈ្មោះ Jenni Hermoso ដែលត្រូវបានថើបនៅលើបបូរមាត់ ដោយគ្រូបង្វឹកបាល់ទាត់របស់ប្រទេសនេះ លោក Luis Rubiales បន្ទាប់ពីជ័យជម្នះរបស់អេស្ប៉ាញក្នុងការប្រកួតបាល់ទាត់ពិភពលោកនារី កាលពី១៥ថ្ងៃមុន។កាលពីព្រឹកថ្ងៃចន្ទ (៤ កញ្ញា) ក្រុមកីឡាករបុរសរបស់អេស្ប៉ាញបានរិះគន់ លោក Rubiales ចំពោះ «អាកប្បកិរិយាមិនអាចទទួលយកបាន» របស់លោក ហើយបានបង្ហាញពីសាមគ្គីភាពចំពោះ «កីឡាករដែលបានឃើញភាពជោគជ័យរបស់ពួកគេត្រូវបានធ្វើឱ្យប៉ះពាល់»។ សាលាក្តីរដ្ឋបាលកីឡារបស់ប្រទេសអេស្ប៉ាញ (TAD) កាលពីថ្ងៃសុក្រ បានបើកសំណុំរឿងប្រឆាំងនឹងលោក Rubiales សម្រាប់ «ការប្រព្រឹត្តខុសធ្ងន់ធ្ងរ»។អាកប្បកិរិយារបស់លោក Rubiales បានបង្កឱ្យមានកំហឹងយ៉ាងខ្លាំងនៅក្នុងប្រទេសអេស្ប៉ាញ និងនៅក្រៅប្រទេស។ ស្ថាប័នគ្រប់គ្រងបាល់ទាត់ពិភពលោក FIFA បានផ្អាកលោក Rubiales ពីរាល់សកម្មភាពដែលទាក់ទងនឹងកីឡាបាល់ទាត់អស់រយៈពេល៣ខែ ខណៈពេលដែលខ្លួនធ្វើការស៊ើបអង្កេតទៅលើបញ្ហានោះ៕

ក្ដីសង្ឃឹមសន្តិភាពកូឡុំប៊ី ខិតជិតមកដល់ ខណៈរដ្ឋាភិបាល និងក្រុមឧទ្ទាមបញ្ចប់កិច្ចចរចាសន្តិភាពជុំទី៤

កូឡុំប៊ី៖ រដ្ឋាភិបាលរបស់ប្រទេសកូឡុំប៊ី និងក្រុមឧទ្ទាមកងទ័ពរំដោះជាតិ (ELN) បានបញ្ចប់កិច្ចចរចាសន្តិភាពជុំទី៤ កាលពីថ្ងៃចន្ទ (៤ កញ្ញា) ក្នុងប្រទេសវេណេហ្ស៊ុយអេឡា ស្របពេលមានបទឈប់បាញ់ ដែលក្រុមមន្ត្រីសង្ឃឹមថា នឹងនាំទៅដល់ការបញ្ចប់ជម្លោះប្រដាប់អាវុធនៅក្នុងប្រទេសអាមេរិកខាងត្បូងមួយនេះ។ប្រមុខប្រេសិតរបស់ក្រុម ELN លោក Pablo Beltran បាននិយាយថា ក្រុមប្រេសិតបានយល់ព្រមជួយប្រជាជន និងតំបន់ដែលរងផលប៉ះពាល់ខ្លាំងបំផុតដោយជម្លោះ។ ក្រុមទាំងនោះបានឈានដល់កិច្ចព្រមព្រៀងបទឈប់បាញ់ទ្វេភាគីរយៈពេលប្រាំមួយខែក្នុងខែមិថុនា ដែលចូលជាធរមានកាលពីថ្ងៃទី៣ ខែសីហា។ជុំបន្ទាប់នៃកិច្ចពិភាក្សា នឹងធ្វើឡើងនៅប្រទេសម៉ិកស៊ិក នេះបើយោងតាមគណៈប្រតិភូ។ កិច្ចព្រមព្រៀងនេះ គឺជារបកគំហើញដ៏សំខាន់បំផុតនៅក្នុងកិច្ចចរចា ដែលជាផ្នែកមួយនៃកិច្ចខិតខំប្រឹងប្រែងរបស់លោកប្រធានាធិបតី Gustavo Petro ដើម្បីសម្រេចបាន «សន្តិភាពពេញលេញ» ដើម្បីបញ្ចប់ជម្លោះប្រដាប់អាវុធជិតប្រាំមួយទសវត្សរ៍ ដែលបានធ្វើឱ្យមនុស្ស៤៥០.០០០នាក់បានស្លាប់ក្នុងប្រទេសកូឡុំប៊ី នេះផងដែរ៕

អង្គការលើកលែងទោសអន្តរជាតិ៖កងទ័ពអេរីទ្រី ប្រព្រឹត្តឧក្រិដ្ឋកម្មសង្គ្រាមនៅក្នុងប្រទេសអេត្យូពីបន្ទាប់ពីកិច្ចព្រមព្រៀងសន្តិភាព

អេត្យូពី៖អង្គការលើកលែងទោសអន្តរជាតិ (Amnesty International) បាននិយាយកាលពីថ្ងៃអង្គារថា កងទ័ពអេរីទ្រី ដែលជាសម្ព័ន្ធមិត្តជាមួយរដ្ឋាភិបាលរបស់ប្រទេសអេត្យូពី «បានប្រព្រឹត្តឧក្រិដ្ឋកម្មសង្រ្គាម និងលទ្ធភាពឧក្រិដ្ឋកម្មប្រឆាំងនឹងមនុស្សជាតិ នៅក្នុងតំបន់ទីហ្គ្រេ (Tigray) ការរំលោភ ការយកធ្វើជាទាសករ និងការសម្លាប់ជនស៊ីវិលអស់រយៈពេលជាច្រើនខែ បន្ទាប់ពីការចុះហត្ថលេខាលើកិច្ចព្រមព្រៀងសន្តិភាព។ដោយត្រូវបានគេដាក់ឈ្មោះថា «កូរ៉េខាងជើង» នៃទ្វីបអាហ្រ្វិក ប្រទេសអេរីទ្រី ត្រូវបានដាក់ទណ្ឌកម្មដោយសហរដ្ឋអាមេរិកក្នុងឆ្នាំ ២០២១ បន្ទាប់ពីបានបញ្ជូនកងទ័ពទៅកាន់តំបន់ទីហ្គ្រេ ដើម្បីគាំទ្រដល់កងកម្លាំងសហព័ន្ធរបស់ប្រទេសអេត្យូពី ជាមួយនឹងទាហានរបស់ខ្លួនដែលត្រូវបានចោទប្រកាន់ពីបទមនុស្សឃាត ការរំលោភ និងការលួច ក្នុងអំឡុងពេលសង្រ្គាមពីរឆ្នាំ។កិច្ចព្រមព្រៀងដែលបានចុះហត្ថលេខានៅក្នុងខែវិច្ឆិកា ឆ្នាំ២០២២ រវាងរដ្ឋាភិបាលរបស់ប្រទេសអេត្យូពី និងពួកឧទ្ទាមទីហ្គ្រេ (Tigrayan) បានអំពាវនាវឲ្យមានការដកកងកម្លាំងបរទេសចេញពីតំបន់នេះ។ប៉ុន្តែប្រទេសអេរីទ្រី មិនមែនជាភាគីនៃកិច្ចព្រមព្រៀងនេះទេ ហើយកងទ័ពរបស់ខ្លួន នៅតែបន្តមានវត្តមាននៅតំបន់ព្រំដែន នេះបើយោងតាមក្រុមអ្នកស្រុក។អង្គការ Amnesty បានសម្ភាសមនុស្សចំនួន ៤៩នាក់ ក្នុងខែឧសភា និងមិថុនា នៅក្នុងស្រុកព្រំដែនម៉ារៀម សេវីតូ ( Mariam Shewito) និង កូកូប ទីបា (Kokob Tsibah) ដោយបញ្ជាក់សក្ខីកម្មរបស់ពួកគេជាមួយនឹងរូបភាពផ្កាយរណប ក៏ដូចជាគណនីរបស់អ្នកធ្វើការផ្នែកសង្គម អ្នកជំនាញវេជ្ជសាស្រ្ត និងមន្ត្រីរដ្ឋាភិបាល។

ជប៉ុនប្រាប់ទៅ WTOថា បម្រាមនាំចេញ របស់ចិនលើគ្រឿងសមុទ្រពាក់ព័ន្ធរោងចក្រហ្វូគូស៊ីម៉ា មិនអាចទទួលយកបានទាល់តែសោះ

ជប៉ុន៖ ក្រសួងការបរទេសជប៉ុន បាននិយាយថា ជប៉ុន បា្រប់ទៅអង្គការពាណិជ្ជកម្មពិភពលោកឬ (WTO) ថាបម្រាមរបស់ប្រទេសចិន លើអាហារសមុទ្ររបស់ជប៉ុន បន្ទាប់ពីមានការបង្ហូរសំណល់ទឹកមានសារធាតុនុយក្លេអ៊ែរចេញពីរោងចក្រហ្វូគីស៊ីម៉ាមិនអាចទទួលយកបានទាល់តែសោះ។ នៅក្នុងការប្រឆាំងតបទៅនឹងការជូនដំណឹងកាលពីថ្ងៃទី ៣១ ខែសីហារបស់ប្រទេសចិនទៅកាន់ WTO ស្តីពីវិធានការរបស់ខ្លួនក្នុងការផ្អាកការនាំចូលជលផលរបស់ប្រទេសជប៉ុនដែលបានចាប់ផ្តើមកាលពីខែមុន ប្រទេសជប៉ុនបាននិយាយថា ជប៉ុននឹងពន្យល់ពីជំហររបស់ខ្លួននៅក្នុងគណៈកម្មាធិការពាក់ព័ន្ធរបស់ WTO និងបានជំរុញឲ្យប្រទេសចិនលុបចោលសកម្មភាពនេះជាបន្ទាន់។ក្រុមមន្ត្រីជប៉ុនមួយចំនួន បានបង្ហើបពីលទ្ធភាពនៃការដាក់ពាក្យបណ្ដឹងទៅអង្គការពាណិជ្ជកម្មពិភពលោកពាក់ព័ន្ធនឹងបម្រាមនាំចេញគ្រឿងសមុទ្រដ៏សំខាន់របស់ប្រទេសចិន ដែលឯកអគ្គរដ្ឋទូតសហរដ្ឋអាមេរិកប្រចាំនៅប្រទេសជប៉ុន បាននិយាយកាលពីសប្ដាហ៍មុនថា ជារឿងដែលសហរដ្ឋអាមេរិកនឹងគាំទ្រ។ នៅក្នុងសេចក្ដីថ្លែងការណ៍ដាច់ដោយឡែកមួយកាលពីថ្ងៃចន្ទ ក្រសួងការពារបរទេសជប៉ុន បាននិយាយថា ជប៉ុនក៏បានស្នើទៅប្រទេសចិនផងដែរឲ្យរៀបចំកិច្ចពិភាក្សាជុំវិញបម្រាមនាំចេញអាហារពាក់ព័ន្ធនឹងរោងចក្រនុយក្លេអ៊ែរ ហ្វូគូស៊ីម៉ា ផ្អែកលើការផ្ដល់នៃសន្ធិសញ្ញាពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់៕

នាយករដ្ឋមន្ត្រីប៉ាគីស្ថានអះអាងថា គ្រឿងយុទ្ធោបករណ៍អាមេរិកដែលបន្សល់ទុកនៅអាហ្វហ្គានីស្ថានបច្ចុប្បន្ន ធ្លាក់ទៅក្នុងដៃក្រុមសកម្មប្រយុទ្ធ

ប៉ាគីស្ថាន៖ នាយករដ្ឋមន្ត្រីចាំផ្ទះរបស់ប្រទេសប៉ាគីស្ថាន បានអះអាងកាលពីថ្ងៃចន្ទថា គ្រឿងយុទ្ធោបករណ៍របស់សហរដ្ឋអាមេរិកដែលបានបន្សល់ទុកក្នុងអំឡុងពេលការដកទ័ពអាមេរិកចេញពីអាហ្វហ្គានីស្ថាន បានធ្លាក់ទៅក្នុងដៃក្រុមសកម្មប្រយុទ្ធ ហើយទីបំផុត បានធ្វើដំណើរទៅកាន់ក្រុមតាលីបង់ប៉ាគីស្ថាន។លោកនាយករដ្ឋមន្ត្រី អាន់វ៉ា អ៊ុល ហាក កាកា (Anwaar-ul-Haq Kakar) បាននិយាយថា បរិក្ខារដែលរួមមានរបស់របរជាច្រើនប្រភេទ ចាប់ពីវ៉ែនតាការពារពេលយប់ រហូតដល់អាវុធ ឥឡូវនេះ កំពុងក្លាយជាបញ្ហាប្រឈមថ្មីសម្រាប់ទីក្រុងអ៊ីស្លាម៉ាបាដ (Islamabad) ខណៈដែលវាបានពង្រឹងសមត្ថភាពប្រយុទ្ធរបស់ពួកតាលីបង់ប៉ាគីស្ថាន។ ពួកតាលីបង់ប៉ាគីស្ថាន ដែលគេស្គាល់ថា Tehrik-e-Taliban Pakistan ឬ TTP ក្នុងរយៈពេលប៉ុន្មានខែកន្លងមកនេះ បានធ្វើការវាយប្រហារកាន់តែខ្លាំងទៅលើកងកម្លាំងសន្តិសុខប៉ាគីស្ថាន។ ពួកគេជាក្រុមសកម្មប្រយុទ្ធដាច់ដោយឡែក ប៉ុន្តែជាសម្ព័ន្ធមិត្តរបស់ពួកតាលីបង់អាហ្វហ្គានីស្ថាន។ពួកតាលីបង់ បានចូលលុកលុយអាហ្វហ្គានីស្ថាន នៅពាក់កណ្តាលខែសីហាឆ្នាំ២០២១ ខណៈដែលកងទ័ពសហរដ្ឋអាមេរិក និងអង្គការណាតូ ស្ថិតនៅក្នុងសប្តាហ៍ចុងក្រោយនៃការដកខ្លួនចេញពីប្រទេសដែលមានភាពវឹកវរ បន្ទាប់ពីសង្គ្រាម២០ឆ្នាំ។ ដោយប្រឈមនឹងការវាយលុករបស់ពួកតាលីបង់ យោធាអាហ្វហ្គានីស្ថានដែលគាំទ្រ និងបណ្តុះបណ្តាលដោយសហរដ្ឋអាមេរិកបានចុះចាញ់៕

ក្រុមមេដឹកនាំអាស៊ានព្យាយាមស្វែងរកសន្តិភាពឲ្យមីយ៉ាន់ម៉ា និងបញ្ហាតានតឹងនៅសមុទ្រចិនខាងត្បូង

ឥណ្ឌូនេស៊ី៖ ក្រុមមេដឹកនាំអាស៊ីអាគ្នេយ៍នៅថ្ងៃអង្គារនេះនឹងជួបប្រជុំគ្នានៅរដ្ឋធានីរបស់ឥណ្ឌូនេស៊ីសម្រាប់កិច្ចប្រជុំកំពូលប្រចាំឆ្នាំស្របពេលមានការបែកបាក់គ្នាក្នុងប្លុកតំបន់ដែលមានសមាជិកទាំង ១០ ប្រទេស ជុំវិញកិច្ចខិតខំប្រឹងប្រែងបង្កើតសន្តិភាពដែលកំពុងជាប់គាំងនៅក្នុងសហភាពមីយ៉ាន់ម៉ា និងការប្រជែងគ្នាកាន់តែខ្លាំងរវាងសហរដ្ឋអាមេរិក និងចិននៅក្នុងតំបន់។សមាគមប្រជាជាតិអាស៊ីអាគ្នេយ៍ ឬ អាស៊ាន កំពុងស្វែងរកការបញ្ជាក់ពីភាពពាក់ព័ន្ធរបស់ខ្លួន ខណៈការខ្វែងគំនិតគ្នាលេចឡើងក្នុងការឆ្លើយតបរបស់ខ្លួនចំពោះជម្លោះនៅមីយ៉ាន់ម៉ា ដែលយោធាបានដណ្តើមអំណាចនៅក្នុងរដ្ឋប្រហារបង្ហូរឈាមកាលពីឆ្នាំ២០២១។ លោកស្រី រិនតូ ម៉ាស៊ូឌី (Retno Marsudi) រដ្ឋមន្ត្រីការបរទេសរបស់ប្រទេសឥណ្ឌូនេស៊ីដែលជាប្រធានអាស៊ាន បាននិយាយកាលពីថ្ងៃចន្ទថា ខ្សែភ្នែករបស់ប្រជាជនរបស់យើងគឺសំឡឹងមករកពួកយើងដែលបង្ហាញថាអាស៊ាននៅតែជាបញ្ហា ហើយអាចរួមចំណែកឆ្ពោះទៅរកសន្តិភាព ស្ថិរភាព និងវិបុលភាពក្នុងតំបន់។ក្រុមមេដឹកនាំប្រទេសជាសមាជិកទាំងនោះ នឹងពិនិត្យឡើងវិញនូវផែនការសន្តិភាពអាស៊ាន ដែលអំពាវនាវឲ្យបញ្ឈប់អំពើអរិភាព និងការសន្ទនារួមគ្នា ដើម្បីដោះស្រាយវិបត្តិនៅមីយ៉ាន់ម៉ា ដែលរយៈពេលពីរឆ្នាំមកនេះ ពុំមានសញ្ញាធូរស្រាលភាពតានតឹងនៅឡើយនោះទេ។វឌ្ឍនភាពតិចតួច បានធ្វើឲ្យមានការខកចិត្តកាន់តែខ្លាំង និងបង្ហាញការបែកបាក់ផ្ទៃក្នុងនៅក្នុងប្លុកដែលផ្តល់អាទិភាពដល់ការរួបរួមនិងការមិនជ្រៀតជ្រែកកិច្ចការអធិបតេយ្យភាពរបស់សមាជិក។ កិច្ចប្រជុំកំពូលអាស៊ានចុងក្រោយនៅឆ្នាំនេះក៏កើតឡើងប៉ុន្មានថ្ងៃបន្ទាប់ពីប្រទេសចិនបានចេញផ្សាយផែនទី បន្ទាត់ ១០ចំណុច ដែលអះអាងចំណែកដ៏ធំនៃសមុទ្រចិនខាងត្បូង ហើយទំនងជានឹងបន្ថែមសម្ពាធដល់ការចរចាជាមួយប្រទេសចិនលើក្រមប្រតិបត្តិដែលបានពន្យារពេលជាយូរមកហើយនៅក្នុងផ្លូវទឹកយុទ្ធសាស្ត្រ។ប្រទេសសមាជិកអាស៊ាន មានម៉ាឡេស៊ី វៀតណាម និងហ្វីលីពីន ដែលបានអះអាងសិទ្ធិគ្រប់គ្រងតំបន់ត្រួតស៊ីគ្នានៅសមុទ្រចិនខាងត្បូង បានច្រានចោលផែនទីនេះ៕

មេដឹកនាំកូរ៉េខាងជើង នឹងជួបជាមួយលោក ពូទីន នៅប្រទេសរុស្ស៊ីក្នុងខែនេះ

កូរ៉េខាងជើង៖ សារព័ត៌មាន New York Times បានរាយការណ៍កាលពីថ្ងៃចន្ទ (៤ កញ្ញា) ដោយសំអាងដល់ប្រភពសហរដ្ឋអាមេរិក និងសម្ព័ន្ធមិត្តថា មេដឹកនាំកូរ៉េខាងជើង លោក គីម ជុងអ៊ុន គ្រោងនឹងធ្វើដំណើរទៅកាន់ប្រទេសរុស្ស៊ីក្នុងខែកញ្ញានេះ ដើម្បីជួបជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន ដើម្បីពិភាក្សាអំពីលទ្ធភាពនៃការផ្គត់ផ្គង់អាវុធសម្រាប់សង្គ្រាមនៅក្នុងប្រទេសអ៊ុយក្រែន។សារព័ត៌មាននោះបាននិយាយថា លោក គីម នឹងធ្វើដំណើរពីទីក្រុងព្យុងយ៉ាង ដោយប្រហែលជាធ្វើដំណើរដោយរថភ្លើងពាសដែក ទៅកាន់ទីក្រុង Vladivostok ( វ្ល៉ាឌីវ៉ូស្តុក) នៅឆ្នេរសមុទ្រប៉ាស៊ីហ្វិកនៃប្រទេសរុស្ស៊ី ជាទីដែលលោកនឹងជួបជាមួយលោកពូទីន។ មេដឹកនាំកូរ៉េរូបនោះបានជួបរដ្ឋមន្ត្រីការពារជាតិរុស្ស៊ី លោក Sergei Shoigu នៅទីក្រុងព្យុងយ៉ាងក្នុងខែកក្កដា ជាទីដែលអ្នកទាំងពីរបានចូលរួមពិធីដង្ហែរក្បួនយោធាដ៏ធំមួយដើម្បីរំលឹកខួបលើកទី៧០ នៃការបញ្ចប់សង្គ្រាមកូរ៉េ៕

តុលាការនីហ្ស៊េរីយ៉ា សម្រេចឃុំខ្លួនមនុស្សរាប់សិបនាក់ក្នុងពន្ធនាគារពីបទចោទចូលរួមក្នុងពិធីអាពាហ៍ពិពាហ៍ភេទដូចគ្នា

នីហ្ស៊េរីយ៉ា៖ មនុស្សជាង៦០នាក់ ដែលត្រូវបានចាប់ខ្លួនកាលពីសប្តាហ៍មុននៅក្នុងប្រទេសនីហ្ស៊េរីយ៉ា ពាក់ព័ន្ធនឹងការចោទប្រកាន់ថាចូលរួមក្នុងអាពាហ៍ពិពាហ៍អ្នកស្រលាញ់ភេទដូចគ្នា ដែលជាអំពើខុសច្បាប់នៅក្នុងប្រទេសនោះ ត្រូវបានឃុំខ្លួននៅក្នុងពន្ធនាគារ នេះបើយោងតាមនគរបាល និងមេធាវីរបស់ពួកគេបាននិយាយកាលពីថ្ងៃច័ន្ទ(៤កញ្ញា)។ តុលាការបានផ្តល់សំណើសុំដីកាពីនគរបាល បន្ទាប់ពីសវនាការមួយកាលពីថ្ងៃច័ន្ទ នៅទីក្រុង Warri ភាគខាងត្បូងនៃរដ្ឋ Delta ជាទីដែលជនសង្ស័យត្រូវបានចាប់ខ្លួនបន្ទាប់ពីមានការផ្តល់ព័ត៌មាន។នៅក្នុងប្រទេសនីហ្ស៊េរីយ៉ា ដូចទៅនឹងផ្នែកភាគច្រើននៃទ្វីបអាហ្រ្វិកដែរ ការស្រឡាញ់ភេទដូចគ្នាជាទូទៅត្រូវបានចាត់ទុកថាមិនអាចទទួលយកបាន ហើយច្បាប់ប្រឆាំងការស្រឡាញ់ភេទដូចគ្នាឆ្នាំ២០១៤ បានចូលជាធរមាន ទោះបីជាមានការថ្កោលទោសពីអន្តរជាតិក៏ដោយ។ ច្បាប់ប្រឆាំងមនុស្សស្រលាញ់ភេទដូចគ្នាក្នុងប្រទេស ដែលមានប្រជាជនច្រើនជាងគេនៅទ្វីបអាហ្រ្វិកមួយនេះ រួមមានការជាប់ពន្ធនាគាររហូតដល់១៤ឆ្នាំសម្រាប់អ្នកដែលត្រូវបានកាត់ទោស និងហាមប្រាមការរៀបអាពាហ៍ពិពាហ៍ភេទដូចគ្នា ទំនាក់ទំនងភេទដូចគ្នា ព្រមទាំងសមាជិកភាពនៃក្រុមសិទ្ធិស្រឡាញ់ភេទដូចគ្នាផងដែរ៕

អ៊ុយក្រែន និយាយថា យានដ្រូន រុស្ស៊ី វាយប្រហារប្រទេសរ៉ូម៉ានី ជាសមាជិកណាតូ ខណៈក្រុងប៊ុយចារ៉េស ច្រានចោល

អ៊ីរ៉ង់៖ កាលពីថ្ងៃចន្ទទីក្រុងគីវ (Kyiv) បាននិយាយថា យានដ្រូនរុស្ស៊ីផលិតដោយអ៊ីរ៉ង់ បានធ្លាក់ និងផ្ទុះនៅលើដែនដីរបស់ប្រទេសរ៉ូម៉ានី អំឡុងការវាយប្រហារពេលយប់ លើកំពង់ផែអ៊ីស្មេល(Izmail) របស់អ៊ុយក្រែន ជាការអះអាងមួយ ដែលប្រទេសរ៉ូម៉ានី សមាជិកសម្ព័ន្ធយោធាណាតូ បានច្រានចោល។អ្នកនាំពាក្យក្រសួងការបរទេសអ៊ុយក្រែន លោក អូឡេក នីកូឡេនកូ (Oleg Nikolenko) បាននិយាយនៅលើបណ្ដាញសង្គមថា យោងតាមសេវាឆ្មាំល្បាតព្រំដែនរដ្ឋ របស់អ៊ុយក្រែន ថា យានដ្រូន ហ្សាហីដ (Shaheds)បានធ្លាក់ និងផ្ទុះនៅលើដែនដីប្រទេសរ៉ូម៉ានីទាំងយប់ជ្រៅ។ លោកបាននិយាយថា ឧបទ្ទវេហតុនេះ បានកើតឡើង អំឡុង ការវាយប្រហារដ៏ធំ របស់រុស្ស៊ី ជិត កំពង់ផែអ៊ីស្មេល ដែលស្ថិតនៅលើទន្ល ដានូបេ (Danube) ឆ្លងកាត់ពីប្រទេសរ៉ូម៉ានី ។ ក្រសួងការពារជាតិរ៉ូម៉ានី បានច្រានចោលយ៉ាងច្បាស់លាស់អំពីការអះអាងរបស់ក្រសួងការបរទេសអ៊ុយក្រែន ដែលថាយ៉ាងហោចណាស់យានដ្រូនរបស់រុស្ស៊ី មួយគ្រឿងបានបាញ់អំឡុងការវាយប្រហារទាំងយប់ជ្រៅ លើកំពង់ផែរបស់អ៊ុយក្រែន បានធ្លាក់និងផ្ទុះឆេះនៅក្នុងទឹកដីរបស់រ៉ូម៉ានី។ ទីក្រុងគីវ និយាយកាលពីថ្ងៃទី៤ កញ្ញា ថា រុស្ស៊ី បានបើកការវាយប្រហារតាមអាកាសលើហេដ្ឋារចនាសម្ព័ន្ធនៅកំពង់ផែរបស់អ៊ុយក្រែន ។ ទោះយ៉ាងណាក៏ដោយ ក្រសួងការបរទេសរ៉ូម៉ានី បាននិយាយថាព័ត៌មានដែលបានបញ្ចេញដោយអ៊ុយក្រែន ជាព័ត៌មានក្លែងក្លាយ ៕

មេដឹកនាំរដ្ឋប្រហារហ្គាបុង បានស្បថចូលកាន់តំណែងជាប្រធានាធិបតីបណ្តោះអាសន្ន

ហ្គាបុង៖ មេដឹកនាំនៃរដ្ឋប្រហារហ្គាបុង ដែលបានទម្លាក់តំណែងប្រធានាធិបតី លោក Ali Bongo បានស្បថចូលកាន់តំណែងជាប្រធានាធិបតីបណ្តោះអាសន្ន និងត្រូវបានអបអរសាទរដោយអ្នកគាំទ្រដ៏រីករាយកាលពីថ្ងៃចន្ទ(៤ កញ្ញា) នៅក្នុងពិធីតាមទូរទស្សន៍មួយ ដែលរៀបចំឡើងដើម្បីធ្វើឲ្យយោធាជាអ្នករំដោះសង្គមដែលត្រូវបានជិះជាន់មួយនេះ។នៅក្នុងរដ្ឋប្រហារលើកទី៨របស់អាហ្វ្រិកខាងលិច និងកណ្តាលក្នុងរយៈពេលបីឆ្នាំមួយនេះ ក្រុមមន្ត្រីកងទ័ពដែលដឹកនាំដោយលោកឧត្តមសេនីយ Brice Oligui Nguema ( ប៊្រីស អូលីហ្គី ង្វែម៉ា) បានដណ្តើមអំណាចនៅថ្ងៃទី៣០ ខែសីហា ប៉ុន្មាននាទីបន្ទាប់ពីការប្រកាសថាលោកប្រធានាធិបតី Bongo បានឈ្នះការបោះឆ្នោត ដែលពួកគេលុបចោល ហើយនិយាយថាមិនគួរឱ្យទុកចិត្ត។រដ្ឋប្រហារនោះ បានទាក់ទាញការអបអរសាទររបស់ហ្វូងមនុស្សនៅតាមដងផ្លូវនៃរដ្ឋធានី Libreville ប៉ុន្តែបានទទួលការថ្កោលទោសពីបរទេស រួមទាំងមកពីប្លុកតំបន់អាហ្វ្រិកកណ្តាល ECCAS ដែលបាននិយាយកាលពីថ្ងៃចន្ទថា ខ្លួនកំពុងផ្អាកសមាជិកភាពហ្គាបុង រហូតដល់ការវិលត្រឡប់ទៅកាន់សណ្ដាប់ធ្នាប់រដ្ឋធម្មនុញ្ញវិញ។នៅក្នុងសុន្ទរកថា លោកឧត្តមសេនីយ ង្វែម៉ា បានស្នើកំណែទម្រង់រួមទាំងរដ្ឋធម្មនុញ្ញថ្មី ដែលត្រូវអនុម័តដោយប្រជាមតិ ច្បាប់បោះឆ្នោតថ្មី និងក្រមព្រហ្មទណ្ឌ ព្រមទាំងវិធានការផ្តល់អាទិភាពដល់ធនាគារ និងក្រុមហ៊ុនក្នុងស្រុកសម្រាប់ការអភិវឌ្ឍន៍សេដ្ឋកិច្ចផងដែរ៕

បណ្ដាញសង្គម

ព័ត៌មានថ្មីៗ

តំណាងរាស្រ្តខេត្តបន្ទាយមានជ័យ៖ ទោះបីមានការឈ្លានពានពីប្រទេសជិតខាង តែពលរដ្ឋកម្ពុជា នៅតែមានឱកាសធ្វើបុណ្យទានប្រកបដោយសទ្ធាជ្រះថ្លា

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញកាន់បិណ្ឌទី៨ និងនាំយកទេយ្យវត្ថុប្រគេនវត្តចំនួន១៣វត្ត និងចែកអំណោយដល់យាយជីតាជី នៅខេត្តពោធិ៍សាត់

មន្រ្តីជាន់ខ្ពស់ធនាគារជាតិ៖ វិស័យធនាគារបានបន្តរក្សាលំនឹង និងមានសុខភាពល្អជាធម្មតា

លោកជំទាវ ចម និម្មល អញ្ជើញសំណេះសំណាល សួរសុខទុក្ខ និងនាំយកអំណោយជូននាយទាហាន នាយទាហានរង និងពលទាហាន នៃបញ្ជាការដ្ឋានកាំភ្លើងធំ កងទ័ពជើងគោក ក្នុងឱកាសពិធីបុណ្យភ្ជុំបិណ្ឌ

ប្រតិបត្តិការបង្ក្រាប Online Scam នៅប៉ោយប៉ែត ឃាត់ខ្លួនមនុស្សជិត៦០០នាក់

ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង និងកោះធំ អញ្ជើញជួបសំណេះសំណាល និងសួរសុខទុក្ខគ្រួសារវីរៈកងទ័ព និងគ្រួសារក្រីក្រក្នុងស្រុកស្អាង និងកោះធំ សរុប ១៨០០គ្រួសារ

ការនាំចេញអង្ករកម្ពុជាទៅកាន់ប្រទេសហ្វីលីពីន មានសន្ទុះខ្លាំង ខណៈការដឹកជញ្ជូនអង្ករចំនួន ២០.០០០តោនបានចាប់ផ្តើមចេញដំណើរហើយ

រដ្ឋមន្ត្រីសុខាភិបាល៖ ការតម្កល់សុខុមាលភាពរបស់ប្រជាពលរដ្ឋ គឺជាអាទិភាពចម្បងជានិច្ចរបស់រាជរដ្ឋាភិបាល

អតីតសមាជិកគណបក្សប្រឆាំង ចំនួន៣៩នាក់ សម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា

នេប៉ាល់ប្រារព្ធពិធីរំឭកវិញ្ញាណក្ខន្ធជនរងគ្រោះ និងទាមទារភាពយុត្តិធម៌អាកាសធាតុ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877