BTV NEWS

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

សន្តិសុខ និង សង្គម

ប្រទេសឥណ្ឌារារាំងក្រុមហ៊ុនផលិតយានដ្រូនយោធា កុំឲ្យប្រើប្រាស់គ្រឿងបន្លាស់របស់ចិន

ឥណ្ឌា៖ក្នុងរយៈពេលប៉ុន្មានខែថ្មីៗនេះ ប្រទេសឥណ្ឌា បានរារាំងក្រុមហ៊ុនផលិតយានដ្រូនយោធាក្នុងស្រុកពីការប្រើប្រាស់បំណែកផ្សំ ដែលត្រូវបានផលិតនៅក្នុងប្រទេសចិន ជុំវិញការព្រួយបារម្ភអំពីភាពងាយរងគ្រោះផ្នែកសន្តិសុខ នេះបើយោងតាមមន្ត្រីការពារជាតិ និងឧស្សាហកម្ម៤រូប និងឯកសារជាច្រើនដែលត្រូវបានពិនិត្យមើលដោយសារព័ត៌មានReuters ។ចំណាត់ការនេះ កើតឡើង ចំពេលមានភាពតានតឹងរវាងប្រទេសជិតខាងមានអាវុធនុយក្លេអ៊ែរ និងខណៈដែលទីក្រុងញូវដែលី បន្តធ្វើទំនើបកម្មផ្នែកយោធា ដែលគិតគូរពីការប្រើប្រាស់កាន់តែច្រើននៃឧទ្ធម្ភាចក្រគ្មានមនុស្សបើក ប្រព័ន្ធធន់បានយូរ និងកម្មវិធីស្វយ័ប្រវត្តិផ្សេងៗ ទៀត។ប៉ុន្តែខណៈដែលឧស្សាហកម្មឥណ្ឌាដែលកំពុងចាប់កំណើតនេះ មានផែនការដើម្បីបំពេញតម្រូវការរបស់យោធា តួរលេខការពារជាតិ និងឧស្សាហកម្ម បានឲ្យដឹងថា ក្រុមមេដឹកនាំសន្តិសុខរបស់ឥណ្ឌា មានការព្រួយបារម្ភថា ការប្រមូលផ្តុំព័ត៌មានស៊ើបការណ៍ អាចត្រូវបានសម្របសម្រួលដោយគ្រឿងបន្លាស់ ដែលផលិតដោយប្រទេសចិននៅក្នុងមុខងារទំនាក់ទំនងរបស់យានដ្រូន កាមេរ៉ា គ្រឿងបញ្ជូនសារតាមវិទ្យុ និងកម្មវិធីប្រតិបត្តិការ(operating software)។មនុស្សបីនាក់ក្នុងចំនោមមនុស្សទាំងនេះ និងឥស្សរជនរដ្ឋាភិបាល និងឧស្សាហកម្មចំនួន៦រូបផ្សេងទៀតដែលត្រូវបានសម្ភាសន៍ដោយសារព័ត៌មាន Reuters បាននិយាយក្នុងលក្ខខណ្ឌអនាមិក ខណៈដែលពួកគេមិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយ ឬដោយសារតែភាពរសើបនៃប្រធានបទនេះ។ ក្រសួងការពារជាតិឥណ្ឌា មិនបានឆ្លើយតបនឹងសំណួរជាច្រើនរបស់Reuters។

នាវារុស្ស៊ី និងចិន ចំនួន១១គ្រឿង កំពុងធ្វើដំណើរចេញពីរដ្ឋអាឡាស្កា សហរដ្ឋអាមេរិកហើយ

រុស្ស៊ី៖ យោងតាមមន្ត្រីអាមេរិកពីររូបបានឲ្យដឹងថា នាវារុស្ស៊ី និងចិនចំនួន១១គ្រឿង បានធ្វើដំណើរក្បែរកោះ Aleutian ( អាលូស្ហិន) នៃរដ្ឋអាឡាស្កា សហរដ្ឋអាមេរិក កាលពីសប្តាហ៍មុនជាផ្នែកនៃសមយុទ្ធរួមគ្នា ដែលនាំឲ្យសហរដ្ឋអាមេរិកដាក់ពង្រាយនាវាចម្បាំង និងយន្តហោះ ដើម្បីតាមដានសកម្មភាពនោះ ឥឡូវនេះកំពុងផ្លាស់ទីឆ្ងាយពីតំបន់នោះហើយ។មន្ត្រីអាមេរិកម្នាក់បាននិយាយថា ជាការឆ្លើយតបទៅនឹងសកម្មភាពរបស់នាវានៅជិតខ្សែសង្វាក់កោះនោះ នាវាពិឃាតរបស់កងទ័ពជើងទឹកអាមេរិកចំនួន៤គ្រឿង ដែលកំពុងប្រតិបត្តិការនៅមហាសមុទ្រប៉ាស៊ីហ្វិកបានត្រួតពិនិត្យសកម្មភាពរបស់នាវាទាំងនោះពីចម្ងាយផ្សេងៗគ្នា។មន្ត្រីទាំងពីររូបបានសង្កត់ធ្ងន់ថា នាវារុស្ស៊ី និងចិនទាំង១១គ្រឿងនោះ នៅតែស្ថិតក្នុងដែនទឹកអន្តរជាតិ ហើយមិនបានបើកចូលទៅក្នុងដែនទឹករបស់សហរដ្ឋអាមេរិក ដែលលាតសន្ធឹងចម្ងាយ១២ម៉ាយល៍ពីឆ្នេរសមុទ្រអាឡាស្កា នោះទេ។ក្រុមមន្ត្រីអាមេរិកបានបដិសេធមិនផ្តល់ព័ត៌មានលម្អិតអំពី ថាតើនាវារុស្ស៊ី និងចិន បានខិតទៅជិតទឹកដីអាមេរិកខ្លាំងប៉ុណ្ណានោះទេ។ សមយុទ្ធល្បាតនោះបានបង្ហាញពីភាពជាក់ស្តែងនៃឯកភាព និងកម្លាំងយោធារវាងប្រទេសចិន និងរុស្ស៊ី៕

យោធានីហ្សេ ដាក់ពង្រាយកម្លាំងបន្ថែមទៅកាន់រដ្ឋធានី បន្ទាប់ពីមិនអើពើនឹងពេលវេលាកំណត់ក្នុងការប្រគល់អំណាច

នីហ្សេ៖ ប្រភពយោធាមួយបានប្រាប់សារព័ត៌មាន CNN ថា កងកម្លាំងប្រដាប់អាវុធរបស់នីហ្សេ បាននឹងកំពុងបញ្ចូនយកកងកម្លាំងទៅកាន់រដ្ឋធានី ដើម្បីទប់ទល់នឹងអន្តរាគមន៍យោធាដ៏មានសក្តានុពលមួយ ត្រឹមតែប៉ុន្មានម៉ោងបន្ទាប់ពីរបបសឹកដែលកំពុងគ្រប់គ្រងប្រទេសនេះ បានបដិសេធមិនគោរពតាមកាលកំណត់របស់ប្លុកតំបន់ដ៏មានឥទ្ធិពលមួយក្នុងការប្រគល់អំណាច។ក្បួនរថយន្តភីកអាប់ប្រហែល៤០គ្រឿងបានទៅដល់នៅពេលយប់កាលពីល្ងាចថ្ងៃអាទិត្យ ដោយនាំកងទ័ពមកពីផ្នែកផ្សេងទៀតនៃប្រទេស ដើម្បីធានាដល់សុវត្ថិភាពសាធារណជនដែលកំពុងភ័យខ្លាច និងត្រៀមខ្លួនសម្រាប់ការប្រយុទ្ធដ៏ធំ។ ប្រទេសនីហ្សេ បានជាប់គាំងនៅក្នុងភាពចលាចលនយោបាយចាប់តាំងពីចុងខែមុន នៅពេលដែលលោកប្រធានាធិបតី Mohamed Bazoum ត្រូវបានបណ្តេញចេញពីអំណាចនៅក្នុងរដ្ឋប្រហារដោយកងអង្គរក្សប្រធានាធិបតីរបស់ខ្លួន។ ប្លុកសហគមន៍សេដ្ឋកិច្ចនៃរដ្ឋអាហ្រ្វិកខាងលិច (ECOWAS) បានឆ្លើយតបប៉ុន្មានថ្ងៃក្រោយមក ដោយការដាក់ទណ្ឌកម្ម និងចេញឱសានវាទដល់របបសឹកដែលកំពុងកាន់អំណាច ដោយឲ្យពួកគេប្រគល់អំណាចក្នុងរយៈពេលមួយសប្តាហ៍ បើមិនដូចច្នោះទេពួកគេអាចប្រឈមមុខនឹងអន្តរាគមន៍យោធាដ៏ខ្លាំងក្លា។បណ្ដាមេដឹកនាំប្លុក ECOWAS និយាយថា អ្វីដែលពួកគេគាំទ្រនោះគឺការស្វែងរកដំណោះស្រាយការទូតចំពោះវិបត្តិនេះ ប៉ុន្តែបានរក្សាគោលជំហរថាពួកគេមានឆន្ទៈក្នុងការងាកទៅរកការប្រើប្រាស់កម្លាំងជាមធ្យោបាយចុងក្រោយ ដើម្បីឲ្យរដ្ឋាភិបាលដែលជាប់ឆ្នោតតាមបែបប្រជាធិបតេយ្យរបស់ប្រទេសនីហ្សេឡើងកាន់អំណាចវិញ៕

រូបិយប័ណ្ណរូប្លិ៍របស់រុស្សី ធ្លាក់ចុះដល់កម្រិតទាបបំផុតក្នុងរយៈពេល១៦ខែ គឺរហូតដល់៩៦រូប្លិ៍ទល់នឹង១ដុល្លារ

រុស្សី៖ រូបិយប័ណ្ណ រូប្លិ៍ របស់រុស្ស៊ី បានធ្លាក់ចុះដល់កម្រិតទាបបំផុតក្នុងរយៈពេល១៦ខែកន្លងមក ដោយមានតម្លៃ ៩៦រូប្លិ៍ក្នុង១ដុល្លារ នៅព្រឹកថ្ងៃចន្ទ (៧ សីហា)នេះ ដែលតួលេខនេះរងផលប៉ះពាល់ពីតម្រូវការក្នុងស្រុកយ៉ាងខ្លាំងសម្រាប់រូបិយប័ណ្ណបរទេស ហើយជាទូទៅមានការគាំទ្រទាបពីអ្នកនាំចេញនៅដើមខែ។រូបិយប័ណ្ណ រូប្លិ៍ កំពុងបន្តការខាតបង់បន្ទាប់ពីធ្លាក់ចុះជាង៤% ធៀបនឹងប្រាក់ដុល្លារ និងប្រាក់អឺរ៉ូ ក្នុងកំណត់ត្រាមួយសប្តាហ៍ដ៏អាក្រក់បំផុតរបស់ខ្លួនពេញមួយឆ្នាំ។ ក្រុមអាជ្ញាធររុស្ស៊ីនិយាយថា ប្រាក់ចំណូលនាំចេញទាប និងការនាំចូលឡើងវិញ គឺជាមូលហេតុចម្បងនៃការធ្លាក់ចុះតម្លៃប្រាក់រូប្លិ៍។ នៅម៉ោង ០៧:២៩នាទី (ម៉ោងក្នុងស្រុក) ប្រាក់ រូប្លិ៍ បានធ្លាក់ចុះចំនួន ០,៣% ធៀបនឹងប្រាក់ដុល្លារ នៅកម្រិត ៩៦,០១រូប្លិ៍ មុននឹងឈានដល់៩៦,៣៦៧៥រូប្លិ៍ ដែលជាចំណុចខ្សោយបំផុតចាប់តាំងពីថ្ងៃទី២៨ ខែមីនា ឆ្នាំ២០២២មក។ រូបិយប័ណ្ណ រូប្លិ៍ មានទំនោរធ្លាក់ចុះនៅដើមខែជារៀងរាល់ខែ បន្ទាប់ពីបាត់បង់ការគាំទ្ររយៈពេលបង់ពន្ធចុងខែ ដែលជាធម្មតាគេមើលឃើញក្រុមហ៊ុននាំចេញបង្វែរប្រាក់ចំណូលជារូបិយប័ណ្ណបរទេស (FX) ព្យាយាមរកចំណូលដើម្បីបំពេញតម្រូវការបំណុលក្នុងស្រុក។ ក្រុមអ្នកលេងទីផ្សារភាគហ៊ុនក៏រួមចំណែករុញឲ្យរង្គោះរង្គើដល់ប្រាក់ រូប្លិ៍ គឺដោយសារការចាកចេញរបស់ក្រុមហ៊ុនលោកខាងលិចពីប្រទេសរុស្ស៊ី ដែលអាចជំរុញការបញ្ជាទិញបង្វែរជារូបិយប័ណ្ណបរទេសឬ FX ដ៏ធំ និងរុញឲ្យមានការប្រែប្រួលទីផ្សាររូបិយប័ណ្ណផងដែរ៕

ចក្រភពអង់គ្លេស ចាប់ផ្តើមផ្លាស់ទីក្រុមអ្នកស្វែងរកសិទ្ធិជ្រកកោន ទៅកាន់ឆ្នេរសមុទ្រភាគខាងត្បូង

អង់គ្លេស៖ ចក្រភពអង់គ្លេសបានចាប់ផ្តើមផ្លាស់ទីជនអន្តោប្រវេសន៍មួយចំនួន ទៅកាន់លំនៅដ្ឋានទូកដ៏ធំមួយនៅឆ្នេរសមុទ្រភាគខាងត្បូងរបស់ខ្លួនកាលពីថ្ងៃចន្ទ (៧ សីហា) ដែលជាផ្នែកមួយនៃផែនការសន្សំប្រាក់ និងបង្ការនូវបរិមាណមនុស្សច្រើនលើសកំណត់ក្នុងសណ្ឋាគារសម្រាប់ជនអន្តោប្រវេសន៍ដែលទៅដល់តាមទូកតូចៗ។ អ្នកស្វែងរកសិទ្ធិជ្រកកោនជាង ៥០.០០០នាក់កំពុងរស់នៅក្នុងសណ្ឋាគារនានា បន្ទាប់ពីពួកគេបានធ្វើដំណើរតាមទូកតូចៗឆ្លងកាត់ផ្លូវទឹកពីប្រទេសបារាំង។ចក្រភពអង់គ្លេសកំពុងផ្លាស់ប្តូរជនអន្តោប្រវេសន៍ទៅកាន់ទីតាំងយោធាដែលបោះបង់ចោល និងកប៉ាល់ឈ្មោះ Bibby Stockholm មានកម្ពស់បីជាន់ពណ៌ប្រផេះនៅកំពង់ផែ Portland ដែលអាចដាក់មនុស្សបានប្រហែល៥០០នាក់នៅក្នុងបន្ទប់គេងជាង២០០បន្ទប់ ក្នុងយុទ្ធនាការរារាំងមនុស្សពីការចូលទៅកាន់ចក្រភពអង់គ្លេស ។ចក្រភពអង់គ្លេសក៏កំពុងព្យាយាមបញ្ជូនអ្នកស្វែងរកសិទ្ធិជ្រកកោនទៅកាន់ប្រទេស រ៉្វាន់ដា ផងដែរ បើទោះបីជាផែនការនោះត្រូវបានជាប់គាំងនៅក្នុងតុលាការ ហើយនៅតែពឹងផ្អែកលើសេចក្តីសម្រេចរបស់តុលាការកំពូលលើភាពស្របច្បាប់របស់ខ្លួនក៏ដោយ។ តួលេខរបស់រដ្ឋាភិបាលបង្ហាញថាអ្នកស្វែងរកសិទ្ធិជ្រកកោនជិត៤៦.០០០នាក់ បានធ្វើដំណើរឆ្លងកាត់ផ្លូវទឹកដ៏គ្រោះថ្នាក់ពីប្រទេសបារាំងទៅកាន់ឆ្នេរសមុទ្រភាគខាងត្បូងនៃប្រទេសអង់គ្លេសដោយទូកតូចៗកាលពីឆ្នាំមុន៕

ស៊ុយអែត និងន័រវែស ចេញការជូនដំណឹងពណ៌ក្រហម ខណៈមានភ្លៀងធ្លាក់ខ្លាំង និងទឹកជំនន់

ស៊ុយអែត៖ ភ្លៀងធ្លាក់ដ៏ខ្លាំង បានវាយប្រហារភាគខាងត្បូងអនុតំបន់អឺរ៉ុបខាងជើង ឬតំបន់ស្កានឌី កាលពីថ្ងៃច័ន្ទ (៧ សីហា) បណ្តាលឲ្យរថភ្លើងមួយខ្សែរក្រឡាប់ធ្លាក់ផ្លូវ ហើយផ្លូវថ្នល់ជាច្រើនខ្សែត្រូវជន់លិច ដោយក្រុមមន្ត្រីនៅប្រទេសស៊ុយអែត និងន័រវេសបានព្រមានថា អាចក្លាយជាប្រព័ន្ធអាកាសធាតុសើមខ្លាំងបំផុត ដែលនឹងវាយប្រហារតំបន់នេះក្នុងរយៈពេលជាច្រើនទសវត្សរ៍។ក្រុមអ្នកឧតុនិយមស៊ុយអែត និងន័រវេសបានចេញការប្រកាសអាសន្នពណ៌ក្រហម ដែលជាកម្រិតព្រមានធ្ងន់ធ្ងរបំផុត គ្របដណ្តប់ជាច្រើនថ្ងៃក្នុងសប្តាហ៍នេះ ហើយបាននិយាយថា កន្លែងដែលរងគ្រោះខ្លាំងបំផុតអាចទទួលបានទឹកភ្លៀងធម្មតាក្នុងមួយខែ ឬច្រើនជាងនេះក្នុងរយៈពេល២៤ម៉ោង និងទឹកជំនន់ដ៏អាក្រក់បំផុតក្នុងរយៈពេល២៥ឆ្នាំនៅប្រទេសន័រវែស ឬរយៈពេល៥០ឆ្នាំសម្រាប់ស៊ុយអែត។ប្រទេសជិតខាង ដាណឺម៉ាក ក៏បានមើលឃើញភ្លៀងធ្លាក់ខ្លាំង ហើយបានចេញការប្រកាសអាសន្នពណ៌លឿង ដែលជាការព្រមានកម្រិតទាប ខណៈដែលក្រុមអ្នកឧតុនិយមនៅប្រទេសហ្វាំងឡង់បាននិយាយថា ប្រទេសនេះអាចនឹងមានព្យុះផ្គររន្ទះខ្លាំងនៅចុងសប្តាហ៍នេះ។ប្រព័ន្ធសម្ពាធទាប ដែលបានវាយលុកប្រទេសស៊ុយអែតកាលពីយប់ថ្ងៃអាទិត្យ និងទៅដល់ប្រទេសន័រវេសកាលពីថ្ងៃច័ន្ទ ត្រូវបានដាក់ឈ្មោះថា "ហាន់ស៍" ដោយវិទ្យាស្ថានឧតុនិយមន័រវេស ដោយនិយាយថា ការដាក់ឈ្មោះប្រព័ន្ធអាកាសធាតុនេះ ធ្វើឱ្យមានភាពងាយស្រួលក្នុងការទទួលបានការចាប់អារម្មណ៍ពីសាធារណជន៕

រដ្ឋមន្រ្តីបរិស្ថានប្រេស៊ីល៖ ការការពារព្រៃជប់ទឹកភ្លៀងអាម៉ាហ្សូន ត្រូវតែផ្អែកលើវិទ្យាសាស្រ្ត

ប្រេស៊ីល៖ នៅពេលបើកកិច្ចប្រជុំកំពូលព្រៃជប់ទឹកភ្លៀងអាម៉ាហ្សូនកាលពីថ្ងៃចន្ទម្សិលមិញ រដ្ឋមន្រ្តីបរិស្ថាន និងបម្រែបម្រួលអាកាសធាតុប្រេស៊ីលលោកស្រី Marina Silvaបានជំរុញឲ្យអនុវត្តន៍តាមគោលនយោបាយសាធារណៈ ដើម្បីការពារព្រៃជប់ទឹកភ្លៀងអាម៉ាហ្សូន ដោយផ្អែកលើភស្តុតាងវិទ្យាសាស្រ្ត ។ លោកស្រី Silvaនិយាយថា ពួកយើងនិយាយរួចហើយថា វាចាំបាច់ដើម្បីបង្កើតគោលនយោបាយសម្រាប់ព្រៃជប់ទឹកភ្លៀងអាម៉ាហ្សូនដោយផ្អែកលើភស្តុតាងវិទ្យាសាស្រ្ត ។ នេះមិនមែនជាពេលដែលត្រូវមានអាកប្បកិរិយាខុសឆ្គងនោះទេ ហើយអាកប្បកិរិយាណាមួយ ដែលមិនគិតគូដល់វិទ្យាសាស្រ្ត អាចបណ្តាលឲ្យកើតមានកំហុសដ៏គ្រោះថ្នាក់ដែលមិនអាចវិលត្រឡប់មកវិញ និងបង្កផលប៉ះពាល់ខ្លាំងបំផុត ។ លោកស្រីបន្តថា ជាឧទាហរណ៍ ពួកយើងកំពុងធ្វើការឲ្យគណៈកម្មាធិការអន្តររដ្ឋាភិបាលក្រុមប្រទេសតំបន់ព្រៃជប់ទឹកភ្លៀងអាម៉ាហ្សូន ដើម្បីផ្តល់ការគាំទ្រផ្នែកបច្ចេកទេស និងវិទ្យាសាស្រ្តសម្រាប់វិធានការទាំងនេះ ។ ជំនួបរបស់អង្គការសន្ធិសញ្ញាកិច្ចសហប្រតិបត្តិការព្រៃជប់ទឹកភ្លៀង(ACTO) នឹងមានការជួបជុំគ្នារបស់ថ្នាក់ដឹកនាំរដ្ឋមកពីប្រទេសបូលីវី ប្រេស៊ីល កូឡុំប៊ី អេក្វាឌ័រ ហ្គីយ៉ាណា ប៉េរូ ស៊ូរីណាម និងប្រទេសវេណេហ៊្សុយអេឡា រយៈពេល ២ថ្ងៃនៅទីក្រុងភាគខាងជើង Belem របស់ប្រទេសប្រេស៊ីល ។ កិច្ចប្រជុំនេះដែរ មានគោលដៅបង្កើតគោលនយោបាយ គោលដៅ និងគោលជំហរបង្រួបបង្រួម នៅក្នុងកិច្ចចរចាអន្តរជាតិលើបញ្ហាប្រហែលចំនួន ១៣០ ចាប់ពីបញ្ហាហិរញ្ញប្បទានសម្រាប់ការអភិវឌ្ឍប្រកបដោយចីរភាព រហូតដល់ការដាក់បញ្ចូលជនជាតិដើមភាគតិច ។ ដោយឡែក ប្រធានាធិបតីប្រេស៊ីល លោក Luiz Inacio Lula da Silva បានសន្យាថានឹងបញ្ចប់ការកាប់បំផ្លាញព្រៃឈើនៅតំបន់ជប់ទឹកភ្លៀងអាម៉ាហ្សូន នៅឆ្នាំ ២០៣០ខាងមុខ ៕

លោក Taro Aso៖ ជប៉ុន និងសហរដ្ឋអាមេរិក ត្រូវតែបង្ហាញការតាំងចិត្តធ្វើសង្រ្គាមដើម្បីកោះតៃវ៉ាន់

ជប៉ុន៖ អតីតនាយករដ្ឋមន្រ្តីជប៉ុនលោក Taro Asoបាននិយាយនៅថ្ងៃអង្គារនេះថា បរិស្ថានសន្តិសុខរឹងមាំជាងមុននៅច្រកសមុទ្រតៃវ៉ាន់ មានន័យថា ជប៉ុន សហរដ្ឋអាមេរិក និងប្រទេសផ្សេងទៀត ត្រូវការបង្ហាញការតាំងចិត្តខ្លាំងក្នុងការការពារកោះតៃវ៉ាន់ បើសិនជាពួកគេរងការវាយប្រហារ ។ លោក Asoដែលជាមន្រ្តីនយោបាយជាន់ខ្ពស់ជាងគេបំផុតរបស់ជប៉ុន បំពេញទស្សនកិច្ចទៅកាន់កោះតៃវ៉ាន់ ចាប់តាំងពីឆ្នាំ ១៩៧២នោះ បានធ្វើសេចក្តីអធិប្បាយបែបនេះ នៅវេទិកាប្រចាំឆ្នំា Ketagalanដែលជាព្រឹត្តការណ៍មួយផ្តោតសំខាន់លើបញ្ហាសន្តិសុខក្នុងតំបន់ ។ លោក Asoពុំបានបញ្ជាក់ថា ចិនដែលចាត់ទុកកោះតៃវ៉ាន់ជាដែនដីរបស់ខ្លួន គឺជាប្រទេសឈ្លានពាននោះទេ ប៉ុន្តែលោកនិយាយថា វាសំខាន់សម្រាប់ជប៉ុន ដែលជាប្រទេសជិតខាងកោះតៃវ៉ាន់ សហរដ្ឋអាមេរិក និងប្រទេសផ្សេងទៀត ត្រូវតែដាក់វិធានការទប់ស្កាត់យ៉ាងខ្លាំងក្លា ។ ថ្លែងនៅក្នុងវេទិកាតែមួយ ប្រធានាធិបតីកោះតៃវ៉ាន់លោកស្រី Tsai Ing-wenនិយាយថា រដ្ឋាភិបាលរបស់លោកស្រី បានប្តេជ្ញាចិត្តធ្វើឲ្យល្អប្រសើរឡើងវិស័យការពារជាតិរបស់ខ្លួន ។ លោកស្រី និយាយថា នេះបញ្ជាក់ផងដែរថា កោះតៃវ៉ាន់មិនច្រានចោលការផ្តល់ជូនរបស់ដៃគូសន្តិសុខរបស់ពួកយើងនោះឡើយ ។ ស្របពេលដែលពួកយើងពុំស្វែងរកការតតាំងយោធា ហើយនិងសង្ឃឹមថាមានសន្តិសហវិជ្ជមានប្រកបដោយស្ថិរភាព និងអត្ថប្រយោជន៍ជាមួយប្រទេសជិតខាងរបស់ពួកយើង កោះតៃវ៉ាន់ តែងតែត្រៀមខ្លួនរួចរាល់ក្នុងការការពារលទ្ធិប្រជាធិបតេយ្យរបស់ពួកយើង និងជីវិតរស់នៅរបស់ប្រជាពលរដ្ឋពួកយើង ៕

នគរបាលអូស្ត្រាលី ចាប់ខ្លួនបុរស ១៩នាក់ ក្នុងការបង្ក្រាបការរំលោភបំពានលើកុមារតាមអ៊ិនធឺណិត

អូស្ត្រាលី៖ អាជ្ញាធរអូស្ត្រាលី បានឲ្យដឹង នៅថ្ងៃអង្គារ (ទី៨ ខែសីហា)នេះ ថា នគរបាលបានចាប់ខ្លួនបុរសចំនួន ១៩នាក់ពីបទចែកចាយខ្លឹមសាររំលោភបំពានលើកុមារតាមអ៊ិនធឺណិត ហើយបានជួយសង្គ្រោះកុមារ ១៣នាក់ កុំឲ្យរងគ្រោះថ្នាក់បន្ថែមទៀត បន្ទាប់ពីទទួលបានព័ត៌មានសម្ងាត់ពីការិយាល័យស៊ើបអង្កេតសហព័ន្ធ (FBI)។ប្រតិបត្តិការស៊ើបអង្កេតដែលមានឈ្មោះថា Operation Bakis បានចាប់ផ្តើម នៅក្នុងប្រទេសអូស្ត្រាលី កាលពីឆ្នាំមុន បន្ទាប់ពីមានការសម្លាប់ភ្នាក់ងារ FBI ចំនួន ២នាក់ នៅរដ្ឋផ្លរីដា (Florida) ក្នុងឆ្នាំ២០២១ នៅពេលដែលកំពុងស៊ើបអង្កេតការរំលោភបំពានលើកុមារ នៅសហរដ្ឋអាមេរិក។មេបញ្ជាការនគរបាលសហព័ន្ធអូស្ត្រាលី (AFP) លោកស្រី Helen Schneider ( ហេឡេន ស្នេដឺ) បាននិយាយក្នុងសន្និសីទសារព័ត៌មានថា FBI បន្ទាប់មក បានផ្តល់ព័ត៌មានដល់នគរបាលអូស្ត្រាលីអំពីសមាជិកនៃបណ្តាញក្រុមទំនាក់ទំនងស្គាល់គ្នាតាមអ៊ិនធឺណេត ក្នុងប្រទេសដែលត្រូវបានចោទប្រកាន់ថា បានចែករំលែកខ្លឹមសាររំលោភបំពានលើកុមារ តាមគេហរទំព័រទីផ្សារងងឹត (ខុសច្បាប់)។បុរសទាំងនោះ ដែលមានអាយុចន្លោះពី ៣២ ទៅ ៨១ឆ្នាំ បានចែកចាយរូបភាព និងវីដេអូ ដែលមានខ្លឹមសាររំលោភបំពានលើកុមារ បានជជែកគ្នានៅលើកម្មវិធីផ្ញើសារ និងត្រូវបានចោទប្រកាន់ថា បានប្រើលេខកូដសម្ងាត់ ដើម្បីគេចពីការរកឃើញ។ លោកស្រី Schneider បានបន្ថែមថា ជនល្មើសជាជនជាតិអូស្ត្រាលីភាគច្រើន ត្រូវបានជួលឲ្យធ្វើការងារ ដែលទាមទារសមត្ថភាពកម្រិតខ្ពស់ ក្នុងការប្រើប្រាស់បច្ចេកទេស៕

ខណៈទឹកជំនន់ស្រកចុះ ប្រតិបត្តិការបោសសម្អាតទ្រង់ទ្រាយធំកំពុងធ្វើឡើងនៅប្រទេសចិន

ចិន៖ ប្រព័ន្ធផ្សព្វផ្សាយរដ្ឋ CCTV បានរាយការណ៍នៅថ្ងៃអង្គារនេះថា ខណៈទឹកជំនន់បានស្រកចុះ ការងារជួសជុលនិងបោសសម្អាតទ្រង់ទ្រាយធំកំពុងធ្វើឡើងនៅទូទាំងខេត្តជាច្រើនក្នុងប្រទេសចិន។រូបភាពពីបណ្តាញទូរទស្សន៍ CCTV បានបង្ហាញពីបុគ្គលិកសង្គ្រោះបន្ទាន់ កំពុងបូមទឹកទឹកជំនន់ចេញពីយានដ្ឋានចតយានយន្តហើយក្រុមការងារសំណង់កំពុងបោសសម្អាតផ្លូវដែលរាយប៉ាយដោយកម្ទេចកម្ទីរពីបំណាក់ដី។ ខេត្ត Baoding( ប៉ាវទីង) ដែលគ្រប់គ្រងតំបន់ Zhuozhou ( ជូចូវ)បានិយាយថា ស្ពានរាប់រយកន្លែង និងផ្លូវជនបទរាប់រយគីឡូម៉ែត្រត្រូវបានបំផ្លាញដោយទឹក ដែលមានការខាតបង់សេដ្ឋកិច្ចផ្ទាល់ បានឈានដល់ជិត ១៧ពាន់លានយ័ន គិតត្រឹមថ្ងៃសៅរ៍ ទី៥ ខែសីហា។ខណៈអាជ្ញាធរប្រញាប់ប្រញាល់ស្តារឡើងវិញស្ថានភាពរស់នៅជាធម្មតាបន្ទាប់ពីព្យុះDoksuri ឆ្លងកាត់ អ្នកព្យាករណ៍អាកាសធាតុជាតិ បានព្រមានតំបន់ភាគឦសានត្រៀមទប់ទល់ខ្លួនឯងសម្រាប់ព្យុះបន្ថែមទៀតពីព្យុះទីហ្វុង Khanun៕

បណ្ដាញសង្គម

ព័ត៌មានថ្មីៗ

ប្រមុខការទូតកម្ពុជា បានចេញដំណើរទៅប្រទេសហូឡង់ហើយ ដើម្បីតវ៉ាគ្នាជាលើកទីពីរជាមួយថៃទាក់ទងនឹងបញ្ហាព្រំដែនសមុទ្រ

ពិធីបុណ្យភ្ជុំបិណ្ឌនៅតាមវត្តអារាមក្នុងខេត្តស្វាយរៀង បានបញ្ចប់ដោយទិដ្ឋភាពសប្បាយរីករាយ

អ៊ីរ៉ង់៖ ការឆ្លើយតបរបស់អាមេរិក ចំពោះសំណើបើកច្រកសមុទ្រ Hormuz ឡើងវិញ គឺមិនគ្រប់គ្រាន់ទេ

កិច្ចប្រជុំលើកទី២ គណៈកម្មការផ្សះផ្សានៃអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) រវាងកម្ពុជា និងថៃ នឹងប្រព្រឹត្តទៅនៅទីស្នាក់ការកណ្តាល ICJ

លោក Zelenskyy៖ លោកនឹងរៀបចំការបោះឆ្នោត បើរុស្ស៊ីយល់ព្រមលើបទឈប់បាញ់រយៈពេល ៦០ថ្ងៃ

«បទឈប់បាញ់ថាមពល» របស់លោក Trump បង្កភាពច្របូកច្របល់ ខណៈរុស្ស៊ីវាយប្រហារអ៊ុយក្រែន

មនុស្សម្នាក់ស្លាប់ និង ១១នាក់រងរបួស ខណៈអាកាយានដ្ឋានអារ៉ាប៊ីសាអ៊ូឌីតរងការវាយប្រហារម្តងទៀត

ឯកឧត្តម ហ៊ុន ម៉ានី អញ្ជើញជាតំណាងដ៏ខ្ពង់ខ្ពស់សម្តេចតេជោ និងសម្តេចកិត្តិព្រឹទ្ធបណ្ឌិត ចូលរួមពិធីបុណ្យភ្ជុំបិណ្ឌនៅវត្តចំពុះក្អែក

ថ្ងៃភ្ជុំបិណ្ឌពុទ្ធបរិស័ទកាន់តែច្រើនកុះករទៅធ្វើបុណ្យឧទ្ទិសកុសលជូនដល់បុព្វការីជន និងវីរៈកងកម្លាំង

ពលរដ្ឋថ្លែងអំណរគុណចំពោះរដ្ឋាភិបាល ដែលបានផ្ដល់សេវារថយន្តក្រុងមិនគិតកម្រៃនៅអំឡុងភ្ជុំបិណ្ឌ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877