BTV NEWS

សមត្ថកិច្ចខេត្តព្រះសីហនុរកឃើញអ្នកបើកបររថយន្តធុនធ្ងន់មួយចំនួនមានសារធាតុគ្រឿងញៀននៅក្នុងខ្លួន

ឆេះខុនដូ Wealth Mansion តែសមត្ថកិច្ចជួយពន្លត់ទាន់ពេលដោយមិនរាលដាលទ្រង់ទ្រាយធំ

ជនជាតិវៀតណាម និងជនជាតិចិនជាងពីររយនាក់ទៀតត្រូវបានអាជ្ញាធរបណ្តេញចេញពីកម្ពុជាក្រោយរក ឃើញជាប់ពាក់ព័ន្ធករណី Online Scams

អាជ្ញាធរនិងមន្ត្រីជំនាញខេត្តកំពង់ឆ្នាំងចុះរៀបចំសណ្ដាប់ធ្នាប់តាមដងផ្លូវជាតិលេខ៥ ក្នុងស្រុកកំពង់ត្រឡាច

សន្តិសុខ និង សង្គម

អាកាសយានិកបានរត់គេចខ្លួន ដោយមានរបួសស្រាល នៅពេលយន្តហោះធុនតូចធ្លាក់បុកចូល ដំបូលឃ្លាំង នៅអាកាសយានដ្ឋានកាលីហ្វ័រញ៉ា

អាជ្ញាធរ បាននិយាយថា អ្នកបើកយន្តហោះម្នាក់ បានរត់គេចខ្លួនដោយមានរបួសស្រាល បន្ទាប់ពីយន្តហោះម៉ាស៊ីនតែមួយ បានធ្លាក់បុកដំបូលឃ្លាំងមួយ កាលពីថ្ងៃចន្ទ នៅឯអាកាសយានដ្ឋានភាគខាងត្បូងរដ្ឋកាលីហ្វ័រនីញ៉ា។រដ្ឋបាលអាកាសចរណ៍សហព័ន្ធ បាននិយាយនៅក្នុងសេចក្តីថ្លែងការណ៍មួយថា គ្រោះថ្នាក់នេះ បានកើតឡើងកាលពីវេលាម៉ោង២:៣០នាទីរសៀល ខណៈពេលដែលអ្នកបើកយន្តហោះ Cessna 172 កំពុងធ្វើការចុះចត និងហោះឡើង នៅអាកាសយានដ្ឋាន Long Beach ភាគខាងត្បូងនៃទីក្រុងឡូសអែនជឺឡស (Los Angeles )។វីដេអូដែលចាក់ផ្សាយដោយទូរទស្សន៍ ABC 7 បានបង្ហាញច្រមុះរបស់យន្តហោះ ដែលបានបុកទម្លុះចូលក្នុងដំបូលឃ្លាំង ហើយកន្ទុយវាឡើងលើ៕

ភ្លៀងធ្លាក់ខ្លាំង នៅប្រទេសជប៉ុនភាគខាងត្បូង បណ្តាលឲ្យមនុស្ស៦នាក់ស្លាប់ និង៣នាក់បាត់ខ្លួន

ក្រុមមន្ត្រី បាននិយាយនៅថ្ងៃអង្គារនេះថា ភ្លៀងធ្លាក់ខ្លាំង នៅកោះ Kyushu ភាគនិរតីប្រទេសជប៉ុន បង្កឲ្យមានទឹកជំនន់និងបំណាក់ដី បណ្តាលឲ្យមនុស្សរហូតដល់៦នាក់ស្លាប់ ហើយក្រុមជួយសង្គ្រោះ កំពុងស្វែងរកមនុស្ស៣នាក់ដែលកំពុងបាត់ខ្លួន។ ទីភ្នាក់ងារឧតុនិយមជប៉ុន បានបន្ទាបការព្រមានពិសេស សម្រាប់ភ្លៀងធ្លាក់ខ្លាំង ដែលបានចេញកាលពីថ្ងៃចន្ទសម្រាប់ផ្នែកភាគខាងជើងនៃកោះដល់ការព្រមានកម្រិតទាបជាងមុន និងផ្តល់ការណែនាំ ប៉ុន្តែបានជំរុញឲ្យពលរដ្ឋនៅប្រុងប្រយ័ត្នសម្រាប់បំណាក់ដីបន្ថែមទៀត។ ប្រទេសជប៉ុន គឺជាប្រទេសចុងក្រោយ ដែលទទួលរងដោយភ្លៀងធ្លាក់ខ្លាំងខុសពីធម្មតា នៅក្នុងតំបន់ខុសៗគ្នានៃពិភពលោកក្នុងប៉ុន្មានថ្ងៃថ្មីៗនេះ ដែលបានបង្កើនការព្រួយបារម្ភថ្មីនៃល្បឿនបម្រែបម្រួលអាកាសធាតុ។ ប្រធានគណៈរដ្ឋមន្ត្រី លោក Hirokazu Matsuno បាននិយាយនៅក្នុងសន្និសីទសារព័ត៌មានថា ទីក្រុងនានានៅតែធ្វើការពិនិត្យមើលលើការស្លាប់និងរងរបួស ប៉ុន្តែយើងត្រូវបានគេជូនដំណឹង ពីអ្នកស្លាប់៣នាក់ និងអ្នកស្លាប់៣នាក់ផ្សេងទៀតក៏ទាក់ទងនឹងគ្រោះមហន្តរាយ ខណៈ៣នាក់ទៀតនៅបាត់ខ្លួននៅឡើយ និង២នាក់រងរបួសស្រាល។ អ្នកនាំពាក្យក្រុមហ៊ុន និយាយថា ភ្លៀងបានបង្ខំឲ្យរោងចក្រផលិតសំបកកង់រថយន្ត Bridgestone បានផ្អាកប្រតិបត្តិការនៅរោងចក្រចំនួន៤ នៅកោះ Kyushu កាលពីថ្ងៃចន្ទ ប៉ុន្តែរោងចក្រ បានបន្តឡើងវិញនៅព្រឹកថ្ងៃអង្គារនេះ។

ក្មេងស្រីទទួលបានបេះដូងពីក្មេងប្រុសអាយុ៤ឆ្នាំ ក្នុងការវះកាត់បន្សាំបេះដូងលើកដំបូង នៅអ៊ុយក្រែន

អាជ្ញាធររួមជាមួយនឹងវិទ្យាស្ថានបេះដូងនៃក្រសួងសុខាភិបាលរបស់ប្រទេសអ៊ុយក្រែន បានប្រកាស កាលពីថ្ងៃចន្ទ (ទី១០ ខែកក្កដា) ថា ទោះកំពុងស្ថិតក្នុងសង្រ្គាមដ៏ក្ដៅគគុក និងការគំរាមកំហែងឥតឈប់ឈរពីការបាល់មីស៊ីលរបស់ប្រទេសរុស្ស៊ីក៏ដោយ ក៏ការវះកាត់ប្តូរបេះដូងសម្រាប់ក្មេងស្រីអាយុ ៦ឆ្នាំ នៅទីក្រុងគីវ (Kyiv) ត្រូវបានធ្វើឡើងដោយជោគជ័យដែរ។ការវះកាត់រយៈពេល ៣ម៉ោងដែលបានចាប់ផ្ដើមកាលពីល្ងាចថ្ងៃអាទិត្យ (ទី៩ ខែកក្កដា) បានផ្ដល់ឲ្យក្មេងស្រីម្នាក់នូវបេះដូង ដែលយកមកពីក្មេងប្រុសអាយុ ៤ឆ្នាំម្នាក់ ដែលគ្រូពេទ្យបានប្រកាសថា ខួរក្បាលរបស់ក្មេងប្រុសនោះលែងដំណើរការហើយ បន្ទាប់ពីកើតមានជំងឺហើមសរសៃឈាមក្រហម។វិទ្យាស្ថានបានឲ្យដឹងថា នេះជាលើកទី១ហើយ ដែលការវះកាត់ប្តូរបេះដូង ត្រូវបានធ្វើឡើងនៅក្នុងប្រទេសអ៊ុយក្រែនលើកុមារដែលនៅក្មេងយ៉ាងនេះ ហើយវិទ្យាស្ថានក៏បាននិយាយទៀតថា៖ «ការវះកាត់នេះ ក៏មានលក្ខណៈពិសេសផងដែរ ដោយទាំងអ្នកបរិច្ចាគ ទាំងអ្នកទទួល គឺជាកុមារតូចៗដូចគ្នា ហើយការវះកាត់ប្តូរនេះ តម្រូវឲ្យមានការប្រឹងប្រែងបន្ថែមទៀតពីក្រុមវេជ្ជបណ្ឌិត»។វិទ្យាស្ថានបេះដូង បានបញ្ចេញនូវរូបភាពនៃការវះកាត់ ដោយបង្ហាញពីម្តាយរបស់ក្មេងប្រុសដែលបេះដូងរបស់គេត្រូវបានបរិច្ចាគ ឈរក្បែរគ្រែរបស់ក្មេងស្រីអ្នកជំងឺនោះ។ជាមួយគ្នានេះ វិទ្យាស្ថានបានឲ្យដឹងបន្ថែមទៀតដែរថា ក្នុងអំឡុងពេលសង្រ្គាមនេះ វិទ្យាស្ថានឃើញមានអ្នកជំងឺកាន់តែច្រើនឡើងៗ ដែលកើតមានជំងឺសរសៃឈាមបេះដូង និងជំងឺរ៉ាំរ៉ៃកាន់តែអាក្រក់ទៅៗ ដោយសារតែភាពតានតឹង៕

ទឹកជំនន់នៅរដ្ឋ វើម៉ិន និង រដ្ឋញ៉ូវយ៉ក មនុស្សម្នាក់ស្លាប់ និងខូចខាតជាង៣ពាន់លានដុល្លារ

អាមេរិក៖ មន្ត្រីបាននិយាយថា ភ្លៀងធ្លាក់យ៉ាងគំហុកបានបង្កជាទឹកជំនន់ភ្លាមៗនៅភាគឦសានសហរដ្ឋអាមេរិកកាលពីថ្ងៃចន្ទ ដែលបានហូរកាត់ផ្លូវថ្នល់ ទន្លេពេញហៀរ បង្ខំឱ្យទូកជាច្រើនគ្រឿងចេញជួយសង្គ្រោះ ហើយស្ត្រីម្នាក់បានស្លាប់ដែលត្រូវបានទឹកហូរនាំនៅពីមុខមិត្តប្រុសរបស់នាង។ អង្គភាពសេវាកម្មអាកាសធាតុជាតិ បាននិយាយនៅក្នុងការព្យាករណ៍របស់ខ្លួនកាលពីថ្ងៃចន្ទថា ប្រជាជនអាមេរិកជាង១៣លាននាក់ស្ថិតនៅក្រោមការតាមដានទឹកជំនន់ និងការព្រមានពីរដ្ឋញូវយ៉កភាគខាងកើតរហូតដល់ទីក្រុងបូស្តុន និងរដ្ឋ Maine (ម៉េន)ភាគខាងលិច ទៅកាន់ភាគឦសាន បន្ទាប់ពីព្យុះដែលបានចាប់ផ្តើមកាលពីចុងសប្តាហ៍បានជន់លិចទន្លេ និងមានខ្សែទឹកហូរ។អង្គភាពព្យាករណ៍ឯកជន AccuWeather ជាបឋមបានប៉ាន់ប្រមាណការខូចខាត និងការខាតបង់សេដ្ឋកិច្ចពី ៣ ពាន់លានដុល្លារទៅ ៥ ពាន់លានដុល្លារ ដោយផ្អែកលើវិធីសាស្ត្រនៃការវាយតម្លៃផ្ទាល់របស់ខ្លួន។ ជើងហោះហើរជាង១.០០០ជើង ទៅនិងមកពីអាកាសយានដ្ឋាននៅទូទាំងតំបន់ រួមទាំងតំបន់ LaGuardia របស់រដ្ឋញូវយ៉ក និងតំបន់Loganទីក្រុង Boston ត្រូវបានពន្យារពេល ឬលុបចោលកាលពីថ្ងៃចន្ទ ដោយសារភ្លៀងធ្លាក់។ក្រុមហ៊ុន Amtrak បានផ្អាកសេវាកម្មរថភ្លើងដឹកអ្នកដំណើររវាងទីក្រុង Albany របស់រដ្ឋនិងទីក្រុងញូវយ៉ក បន្ទាប់ពីទឹកជំនន់បានធ្វើឲ្យខូចខាតផ្លូវរថភ្លើង។ ក្រុមហ៊ុន Amtrak បែងចែកផ្លូវរដ្ឋមួយចំនួន ជាមួយផ្លូវរថភ្លើង Metro-North ធ្វើដំណើរទៅកាន់ទីក្រុង New York ដែលបានផ្អាកសេវាកម្មមួយចំនួននៅលើខ្សែរត់នោះ និងខ្សែរត់ផ្សេងទៀត។ រដ្ឋញូវយ៉ក និងរដ្ឋវើម៉ិន គឺជារដ្ឋដែលរងគ្រោះខ្លាំងបំផុត។ អង្គភាពសេវាកម្ម បាននិយាយថា ភ្លៀងធ្លាក់កាន់តែច្រើនត្រូវបានគេរំពឹងថានឹងកើតឡើងពេញមួយយប់ និងឈានដល់ថ្ងៃអង្គារនេះ ដែលបង្កើតឱ្យមានគ្រោះទឹកជំនន់បន្ថែមទៀត។

ភ្នំភ្លើងផ្ទុះនៅជិតរដ្ឋធានីប្រទេសអ៊ីស្លង់

អ៊ីស្លង់៖ ការិយាល័យឧតុនិយមរបស់ប្រទេស បាននិយាយកាលពីថ្ងៃចន្ទថា ភ្នំភ្លើងមួយបានផ្ទុះនៅលើឧបទ្វីប រ៉ីយ៉ាន(Reykjanes) ភាគនិរតីប្រទេសអ៊ីស្លង់ ក្បែររដ្ឋធានី រ៉ីយ៉ាវីក(Reykjavik) បន្ទាប់ពីមានសកម្មភាពរញ្ជួយដីខ្លាំងនៅក្នុងតំបន់នោះ។រូបភាព និងវីដេអូ បង្ហាញពីកម្អែភ្នំភ្លើង និងផ្សែងហុយចេញពីស្នាមប្រេះ ពីក្នុងដីនៅផ្នែកម្ខាងភ្នំនោះ។ ឧបទ្វីប Reykjanes គឺជាចំណុចក្តៅនៃភ្នំភ្លើង និងរញ្ជួយដី នៅភាគនិរតីរដ្ឋធានី Reykjavik ។ កាលពីខែមីនា ឆ្នាំ ២០២១ ប្រភពកម្អែភ្នំភ្លើងបានផ្ទុះចេញយ៉ាងខ្លាំងពីស្នាមប្រេះមានចម្ងាយ ៥០០ទៅ ៧,៥០0 ម៉ែត្រ ពីក្នុងដីនៅក្នុងប្រព័ន្ធភ្នំភ្លើង ហ្វាហ្គ្រាដាលចាល(Fagradalsfjall) ។សំណុំផ្សែងព័ណ៌ផេះបានបក់មកលើទីតាំងឆ្ងាយ ខណៈភ្នំភ្លើងនៅឧបទ្វីប Reykjanes បានផ្ទុះ។លោក Matthew Roberts មកពីផ្នែកសេវាកម្ម និងស្រាវជ្រាវនៃការិយាល័យឧតុនិយម បាននិយាយកាលពីព្រឹកថ្ងៃចន្ទថា នៅពេលនេះ វាជាការផ្ទុះតូចមួយបណ្ណោះ។ លោកនិយាយាថា ពុំមានគ្រោះថ្នាក់ដោយផ្ទាល់ចំពោះប្រជាជនដែលរស់នៅក្នុងតំបន់នេះនោះទេ៕

លោក Nassar វេជ្ជបណ្ឌិតដ៏អាម៉ាស់ដែលបំពានលើកីឡាការិនីកាយសម្ព័ន្ធអាមេរិក ត្រូវបានចាក់ក្នុងពន្ធនាគារ

អាមេរិក៖ បណ្ដាញសារព័ត៌មាន នៅសហរដ្ឋអាមេរិក បានរាយការណ៍ថា វេជ្ជបណ្ឌិតខូចកេរ្តិ៍ឈ្មោះម្នាក់ លោក Larry Nassar ដែលជាគ្រូពេទ្យប្រចាំកីឡាកាយសម្ព័ន្ធរបស់សហរដ្ឋអាមេរិក និងដែលត្រូវបានកាត់ទោសពីបទរំលោភបំពានផ្លូវភេទលើកីឡាការិនីកាយសម្ព័ន្ធវ័យក្មេង ត្រូវបានចាក់ជាច្រើនកាំបិត ដោយអ្នកទោសម្នាក់ទៀត ក្នុងពន្ធនាគារ តែស្ថិតក្នុងស្ថានភាពរឹងមាំធម្មតា កាលពីថ្ងៃចន្ទ (ទី១០ ខែកក្កដា)។ការិយាល័យពន្ធនាគារសហព័ន្ធ បានបញ្ជាក់ថា អ្នកទោសនៅពន្ធនាគារទោសឧក្រិដ្ឋរបស់សហរដ្ឋអាមេរិក Coleman ក្នុងរដ្ឋផ្លរីដា ត្រូវបានគេវាយដំ កាលពីរសៀលថ្ងៃអាទិត្យ (ទី៩ ខែកក្កដា) ប៉ុន្តែបានបដិសេធមិនបង្ហាញអត្តសញ្ញាណអ្នកទោសនេះទេ ដោយសារបារម្ភឯកជនភាព និងសន្តិសុខ។អ្នកនាំពាក្យការិយាល័យលោក Benjamin O'Cone បានឲ្យដឹងនៅក្នុងសេចក្តីថ្លែងការណ៍ថា៖ «បុគ្គលិកឆ្លើយតប បានចាប់ផ្តើមភ្លាមៗនូវវិធីការសង្គ្រោះជីវិត។ អ្នកទោសត្រូវបានដឹកដោយបុគ្គលិកសង្គ្រោះបន្ទាន់ ទៅកាន់មន្ទីរពេទ្យមូលដ្ឋាន ដើម្បីព្យាបាល និងវាយតម្លៃបន្ថែមលើស្ថានភាពរបួស»។លោក Joe Rojas ប្រធានសហជីពរបស់មន្ត្រីកែប្រែក្នុងតំបន់ បានប្រាប់សារព័ត៌មាន CNN ថា លោក Nassar ដែលកំពុងជាប់ទោសរាប់ទសវត្សរ៍ បន្ទាប់ពីការកាត់ទោស ក្នុងឆ្នាំ២០១៨ ត្រូវបានចាក់ ១០ដង ដោយចាក់ត្រូវក ២ដង ខ្នង ២ដង និងចំដើមទ្រូង ៦ដង។ សូមបញ្ជាក់ថា លោក Nassar ត្រូវបានកាត់ទោសឲ្យជាប់ពន្ធនាគាររហូតដល់ ១៧៥ឆ្នាំពីបទរំលោភបំពានផ្លូវភេទលើកីឡាការិនីកាយសម្ព័ន្ធវ័យក្មេងជាច្រើនរូប ដែលត្រូវបានផ្ដល់ទំនុកចិត្តឲ្យស្ដិតក្រោមការថែទាំរបស់លោក ដោយក្នុងចំណោមកីឡាការិនីទាំងនោះ ក៏រួមមានទាំងម្ចាស់មេដាយមាសអូឡាំពិក Simone Biles, Aly Raisman និង McKayla Maroney ផងដែរ។ការកាត់ទោសចំពោះរូបលោក បានធ្វើឡើងបន្ទាប់ពីសវនាការវិសាមញ្ញរយៈពេលមួយសប្តាហ៍ ដោយក្នុងចំណោមជនរងគ្រោះចំនួន ១៦០នាក់របស់លោក ដែលភាគច្រើនជាអនីតិជន នៅពេលដែលពួកគេត្រូវបានរំលោភបំពាននោះ បានប្រាប់រឿងរ៉ាវរបស់ពួកគេដោយមិនមានការរារែក ឬតក់ស្លុតនោះឡើយ៕

វិបត្តិនៅមីយ៉ាន់ម៉ា និងភាពតានតឹងនៅសមុទ្រចិនខាងត្បូងក្លាយជាប្រធានបទសំខាន់សម្រាប់ជំនួបអាស៊ាន

ឥណ្ឌូនេស៊ី៖ ក្រុមប្រមុខការទូតរបស់សមាគមនអាស៊ីអាគ្នេយ៍ នឹងជួបជុំគ្នានៅក្នុងប្រទេសឥណ្ឌូនេស៊ី នៅថ្ងៃទី១១ខែកក្កដានេះ ស្របពេលមានសម្ពាធឲ្យដោះស្រាយវិបត្តិនយោបាយដ៏បង្ហូរឈាមនៅក្នុងសហភាពមីយ៉ាន់ម៉ា និងដោះស្រាយភាពតានតឹងក្នុងសមុទ្រចិនខាងត្បូង ជាទីដែលសមាជិកអាស៊ានមួយចំនួនបានអះអាងដែនទឹកត្រួតស៊ីគ្នា ជាមួយប្រទេសចិន ។ ជំនួបថ្នាក់រដ្ឋមន្ត្រីការបរទេសរបស់សមាគមអាស៊ាន(Asean) កើតមានឡើង ខណៈភាពមន្ទិលកើនឡើងជុំវិញទំនុកចិត្ត និងការរួបរួមគ្នារបស់ប្លុកនេះ ក្នុងការដោះស្រាយបញ្ហាប្រឈមដ៏តានតឹងរបស់តំបន់នេះ។ ប្រធានកិច្ចប្រជុំក្នុងចំណោមសមាជិក គឺកង្វះដំណើរការដ៏មានអត្ថន័យលើផែនការសន្តិភាពអាស៊ានសម្រាប់សហភាពមីយ៉ាន់ម៉ា ដែលត្រូវបានយល់ព្រមជាមួយមេដឹកនាំយោធារបស់ប្រទេសនេះ បន្ទាប់ពីពួកគេបានដណ្តើមអំណាចនៅក្នុងរដ្ឋប្រហារឆ្នាំ២០២១ និងអំពាវនាវឲ្យបញ្ឈប់អំពើហិង្សាជាបន្ទាន់។ យោងតាមរបាយការណ៍របស់អង្គការសហប្រជាជាតិដែលបានចេញផ្សាយកាលពីខែមិថុនា មនុស្សជាង ៣.៤០០ នាក់ត្រូវបានសម្លាប់ និងជិត ២២.០០០ នាក់ត្រូវបានចាប់ខ្លួននៅក្នុងការបង្រ្កាបរបស់យោធាលើក្រុមប្រឆាំង។ ថ្មីៗនេះ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សលោក វ៉ូលគើរ ទើក(Volker Turk )បានជំរុញឲ្យក្រុមប្រឹក្សាសន្តិសុខអង្គការសហប្រជាជាតិ បញ្ជូនសំណុំរឿងករណីអំពើហិង្សាដែលកើនឡើងទៅតុលាការឧក្រិដ្ឋកម្មអន្តរជាតិ និងឲ្យប្រទេសនានាបញ្ឈប់ការផ្គត់ផ្គង់អាវុធដល់របបសឹកនេះ៕

ទួរគី យល់ព្រមផ្ដល់ការគាំទ្រសមាជិកភាពរបស់ប្រទេសស៊ុយអែតក្នុងសម្ព័ន្ធយោធាណាតូ

ទួរគី៖ ប្រមុខសម្ព័ន្ធយោធាណាតូ លោក ជេនស្តូលធិនប៊ើក (Jens Stoltenberg) បានប្រាប់ក្រុមអ្នកសារព័ត៌មានថា ប្រធានាធិបតីទួរគីលោក រីស៊ីប តាយីបអឺដូហ្គែន (Recep Tayyip Erdoğan)កាលពីថ្ងៃចន្ទ បានយល់ព្រមទម្លាក់ចោលការជំទាស់របស់លោកចំពោះការចូលរួមរបស់ស៊ុយអែតជាមួយសម្ព័ន្ធយោធាណាតូ ហើយនឹងដាក់ការផ្ដល់សច្ចាប័នដល់សភារបស់ទួរគីឲ្យបានឆាប់បំផុតតាមដែលអាចធ្វើទៅបាន ។ លោកស្តូលធិនប៊ើក បាននិយាយមុនកិច្ចប្រជុំកំពូលមេដឹកនាំណាតូដែលត្រូវចាប់ផ្ដើមនៅថ្ងៃអង្គារនេះ ថា ប្រទេសស៊ុយអែត នឹងក្លាយជាសមជិកពេញសិទ្ធិរបស់សម្ព័ន្ធនេះ ។ លោកបាននិយាយថា លោកអឺដូហ្គែន បានផ្ដល់ការប្ដេជ្ញាចិត្តយ៉ាងដ៏ច្បាស់លាស់ក្នុងការចូលជាសមាជិករបស់ស៊ុយអែត។ ការផ្ដាល់ប្ដូរជំហរបស់ក្រុមមេដឹកនាំទួរគី បានកើតមានឡើង បន្ទាប់ពីមានជំនួបជាមួយលោកនាយករដ្ឋមន្ត្រីស៊ុយអែត អាល់ហ្វ គ្រីស្ទើសុន(Ulf Kristersson) និងលោកស្តូលធិនបើក។នៅក្នុងសេចក្ដីថ្លែងការណ៍រួមមួយក្រោយការពិភាក្សា ប្រទេសទួរគី ស៊ុយអែត និងណាតូ បានគូសបញ្ជាក់ថា ទីក្រុងស្តុកខុម (Stockholm) បានកែប្រែច្បាប់ ដែលបានពង្រីកសហប្រតិបត្តិការប្រឆាំងភេរវកម្មប្រឆាំងក្រុមគណបក្សពលករឃើដ ឬហៅកាត់ថាPKK និងបានចាប់ផ្ដើមការនាំចេញអាវុធជាថ្មីទៅកាន់ប្រទេសទួរគី។ សេចក្តីថ្លែងការណ៍បាននិយាយថា ទីក្រុងអង់ការ៉ា និងទីក្រុងស្តុកខុម ក៏បានយល់ព្រមបង្កើត ការបង្រួមសន្តិសុខទ្វេភាគីថ្មីផងដែរ ហើយថា ប្រទេសស៊ុយអែតនឹងបង្ហាញផែនទីវិថីជាមូលដ្ឋាននៃការបន្តការប្រយុទ្ធប្រឆាំងនឹងអំពើភេរវកម្មគ្រប់ទម្រង់ទាំងអស់៕

កិច្ចប្រជុំកំពូលណាតូ ព្យាយាមស្វែងរកកិច្ចព្រមព្រៀងលើសមាជិកភាពរបស់អ៊ុយក្រែន ក្រោយទួរគីបើកភ្លើងខៀវឲ្យស៊ុយអែត

ស៊ុយអែត៖ ក្រុមមេដឹកនាំសម្ព័ន្ធយោធាណាតូបានជួបជុំគ្នាសម្រាប់កិច្ចប្រជុំកំពូលមួយក្នុងទីក្រុងវីលញូស(Vilnius)នៅថ្ងៃអង្គារនេះ ព្យាយាមជម្នះលើការខ្វែងគំនិតគ្នាសម្រាប់សមាជិភាពរបស់អ៊ុយក្រែន បន្ទាប់ពីកិច្ចព្រមព្រៀងមួយដើម្បីដករបាំងពីទួរគីឲ្យស៊ុយអែតចូលជាសមាជិករបស់សម្ព័ន្ធយោធាមួយនេះ។ កិច្ចប្រជុំកំពូលនៅក្នុងរដ្ឋធានីរបស់ប្រទេសលីទុយអានី នឹងត្រូវបានគ្របដណ្ដប់ដោយឥទ្ធិពលនៃការឈ្លានពានរបស់រុស្ស៊ីលើអ៊ុយក្រែន ខណៈដែលក្រុមមេដឹកនាំទាំងនោះ នឹងអនុម័តផែនការពេញលេញលើកដំបូងរបស់អង្គការណាតូ ចាប់តាំងពីការបញ្ចប់សង្រ្គាមត្រជាក់ដើម្បីទប់ទល់ការវាយប្រហារណាមួយពីសំណាក់ក្រុងមូស្គូ។ ក្រុមអ្នកការទូត និយាយថាការខ្វែងគំនិតគ្នាកំពុងរួមតូចជុំវិញការជំរុញរបស់អ៊ុយក្រែនសម្រាប់សមាជិកភាពរបស់សម្ព័ន្ធណាតូ ។ស្របពេលក្រុមសមាជិកណាតូ យល់ព្រមថា ទីក្រុងគីវ មិនអាចចូលជាសមាជិកបានអំឡុងសង្រ្គាម មេដឹកនាំទាំងនោះ បានច្រានចោលភ្លាមៗជុំវិញបញ្ហាថាតើនឹងអាចមានរឿងអ្វីកើតឡើង ទៅមុខទៀត និងស្ថិតក្រោមលក្ខខ័ណ្ឌអ្វី។ចំណែកលោកប្រធានាធិបតីអ៊ុយក្រែន វ៉ូឡូឌីមៀ ហ្សេឡិនស្គី (Volodymyr Zelenskiy) ដែលត្រូវបានអញ្ជើញឲ្យចូលរួមព្រឹត្តិការណ៍ជួបជុំនៅទីក្រុងវីលញូស បានដាក់សម្ពាធលើសម្ព័ន្ធណាតូ ដើម្បីចង្អុលបង្ហាញផ្លូវឲ្យកាន់តែច្បាស់សម្រាប់សមាជិកភាពប្រទេសរបស់លោកក្នុងសេចក្ដីថ្លែងការកិច្ចប្រជុំនេះ ដូច្នេះទើបប្រទេសនេះអាចចូលជាសមាជិកបានឆាប់ក្រោយសង្រ្គាមបញ្ចប់។ សម្ព័ន្ធយោធាណាតូ ត្រូវបានបង្កើតឡើងកាលពីឆ្នាំ១៩៤៩ ក្នុងគោលបំណងចម្បងលើការទប់ស្កាត់ហានីភ័យនៃការវាយប្រហាររបស់សហភាពសូវៀតលើដែនដីរបស់ក្រុមសម្ព័ន្ធមិត្តរបស់ខ្លួន៕

អតិផរណាអ្នកប្រើប្រាស់របស់ចិន នៅតែមានលំនឹង ក្នុងខែមិថុនា

ទិន្នន័យផ្លូវការ បានបង្ហាញ នៅថ្ងៃចន្ទ (ទី១០ ខែកក្កដា) នេះ ថា អតិផរណាអ្នកប្រើប្រាស់របស់ប្រទេសចិន បានបន្តមានលំនឹងដដែល ក្នុងខែមិថុនា ខណៈដែលតម្លៃទំនិញចេញពីរោងចក្រ ធ្លាក់ចុះយ៉ាងលឿន។យោងតាមទិន្នន័យពីការិយាល័យស្ថិតិជាតិ បានឲ្យដឹងថា សន្ទស្សន៍តម្លៃទំនិញប្រើប្រាស់របស់ប្រទេសចិន ដែលជារង្វាស់អតិផរណាដ៏សំខាន់ នៅតែមិនមានការប្រែប្រួលនោះទេ បើធៀបនឹងដើមឆ្នាំមុន ណៅក្នុងខែមិថុនានេះ បន្ទាប់ពីឃើញមានការកើនឡើង ០,២ភាគរយ កាលបីខែឧសភា។តម្លៃអាហារ បានហក់ឡើង ២,៣ភាគរយ ក្នុងខែមិថុនា ធៀបនឹងឆ្នាំកន្លងទៅ ដោយកើនឡើងពីកំណើន ១ភាគរយ កាលពីខែឧសភា។ សាច់ជ្រូកដែលជាទំនិញដ៏សំខាន់សម្រាប់ការធ្វើម្ហូបរបស់ចិន ឃើញថា ធ្លាក់ថ្លៃ ៧,២ភាគរយ នៅខែមិថុនា បន្ទាប់ពីធ្លាក់ចុះ៣,២ភាគរយ ក្នុងខែឧសភា។ ទន្ទឹមនឹងនេះដែរ តម្លៃបន្លែស្រស់ ដំឡូង ផ្លែឈើស្រស់ និងបសុបក្សី បានហក់ឡើង ចន្លោះពី ៤,៣ភាគរយ ទៅ ១០,៨ភាគរយ ក្នុងខែមិថុនា។គួរកត់សម្គាល់ថា តម្លៃសម្រាប់ផលិតផលប្រើប្រាស់ក្នុងឧស្សាហកម្ម បានធ្លាក់ចុះ ២,៧ភាគរយ ក្នុងខែមិថុនា បន្ទាប់ពីធ្លាក់ចុះ ១,៧ភាគរយ នៅខែឧសភា។ ផ្អែកតាមមូលដ្ឋានតម្លៃលក់ប្រចាំខែ បានបង្ហាញឲ្យឃើញថា សន្ទស្សន៍តម្លៃអ្នកប្រើប្រាស់របស់ខែមិថុនា បានធ្លាក់ចុះ ០,២ភាគរយ ដែលដូចគ្នាជាមួយនឹងការធ្លាក់ចុះ កាលពីខែមុន។ការិយាល័យស្ថិតិជាតិ បានបន្ថែមថា សន្ទស្សន៍តម្លៃអ្នកផលិត ដែលជារង្វាស់នៃតម្លៃទំនិញចេញពីរោងចក្រ បានធ្លាក់ចុះ ៥,៤ភាគរយ ធៀបនឹងដើមឆ្នាំមុន ក្នុងខែមិថុនា បន្ទាប់ពីមានការធ្លាក់ចុះប្រចាំឆ្នាំ ៤,៦ភាគរយ ក្នុងខែឧសភា ហើយបើផ្អែកតាមមូលដ្ឋានតម្លៃលក់ប្រចាំខែ សន្ទស្សន៍តម្លៃអ្នកផលិត ធ្លាក់ចុះ ០,៨ភាគរយ ក្នុងខែមិថុនា បន្ទាប់ពីការធ្លាក់ចុះ ០,៩ភាគរយ កាលពីខែឧសភា៕

បណ្ដាញសង្គម

ព័ត៌មានថ្មីៗ

CDC ផ្សព្វផ្សាយរបាយការណ៍ វេទិការាជរដ្ឋាភិបាល-ផ្នែកឯកជនលើកទី១៩ ប្រចាំឆមាសទី២ ឆ្នាំ២០២៥

ការសិក្សា៖ ស្វាឪ និងមនុស្សលោក បានចែករំលែកការសើចអស់រយៈពេល ១៥លានឆ្នាំមកហើយ

កុមារកំព្រាកុងហ្គោតស៊ូកសាងជីវិតឡើងវិញក្រោយឪពុកម្តាយស្លាប់ដោយសារជំងឺអេបូឡា

លោកអធិការបតី Merz៖ សហរដ្ឋអាមេរិកអនុម័តលក់មីស៊ីល Tomahawk ឱ្យអាល្លឺម៉ង់

កងឆ្មាំបដិវត្តន៍អ៊ីរ៉ង់ ប្រកាសអះអាងពីការវាយប្រហារមូលដ្ឋានយោធាអាមេរិកនៅគូវ៉ែត

អ្នកនេសាទ ៣នាក់ស្លាប់ និង ១៥នាក់រងរបួស ដោយសារការវាយប្រហាររបស់អាមេរិក លើផែននេសាទនៅអ៊ីរ៉ង់

លីបង់៖ គណៈប្រតិភូអាមេរិកនឹងត្រួតពិនិត្យការដកទ័ពរបស់អ៊ីស្រាអែលចេញពី «តំបន់សាកល្បង»

អ្នកវិភាគ៖ អាជ្ញាប័ណ្ណអាមេរិកឲ្យអ៊ុយក្រែនផលិតមីស៊ីល Patriot គ្រាន់តែជាជំហានដំបូងប៉ុណ្ណោះ

ប្រព័ន្ធផ្សព្វផ្សាយ៖ សមាជិក IRGC ៣នាក់ ត្រូវបានសម្លាប់ អំឡុងការវាយប្រហាររបស់អាមេរិក នៅខេត្ត Khuzestan

EU ស្នើវិធានការបង្កកទ្រព្យសម្បត្តិ និងបម្រាមធ្វើដំណើរ ដើម្បីប្រយុទ្ធប្រឆាំងការរត់ពន្ធជនអន្តោប្រវេសន៍

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877