BTV NEWS

មន្ទីរសង្គមកិច្ចរាជធានីភ្នំពេញ សហការជាមួយអាជ្ញាធរមូលដ្ឋាន ទទួលយកទារកបោះបង់មករក្សាការពារ និងថែទាំបណ្តោះអាសន្ន ក្រោយឪពុកម្តាយដែលបានបោះត្រូវបានសមត្ថកិច្ចកសាងសំណុំរឿងបញ្ជូនទៅតុលាការ ទាក់ទងនឹងបទល្មើសបោះបង់កូនរបស់ខ្លួន

សមត្ថកិច្ចជំនាញផ្ទុះអាវុធក្នុងប្រតិបត្តិការ បង្រ្កាបមេខ្លោង និងបក្ខពួកជួញដូរគ្រឿងញៀន ក្នុងខេត្តព្រះសីហនុ ឃាត់ខ្លួនជនសង្ស័យ ៨នាក់

គិតពីឆ្នាំ២០២៣មក សមត្ថកិច្ចបង្ក្រាបបទល្មើសគ្រឿងញៀនជាង៣ម៉ឺនករណី និងឃាត់ខ្លួនមនុស្សជិត៩ម៉ឺននាក់ និងរឹបអូសសារធាតុញៀនគ្រប់ប្រភេទជាង ២៦តោន

ស្នងការខេត្តកំពតបន្តតាមដានមន្ត្រីនគរបាល២រូបចំពោះរបាយការណ៍មិនប្រក្រតីអំពីគ្រោះថ្នាក់ចរាចរ

សន្តិសុខ និង សង្គម

មនុស្ស១៥នាក់ស្លាប់ ក្នុងការវាយប្រហាររបស់កងកម្លាំងយោធាប៉ារ៉ា ក្នុងពេលការប៉ះទង្គិចប្រដាប់អាវុធកើនឡើងនៅស៊ូដង់

យ៉ាងហោចណាស់មនុស្ស១៥នាក់បានស្លាប់ និង៣២នាក់ផ្សេងទៀត បានរងរបួស កាលពីថ្ងៃពុធ ក្នុងការវាយប្រហារដោយកាំភ្លើងធំ ធ្វើឡើងដោយកងកម្លាំងគាំទ្ររហ័សយោធាប៉ារ៉ា(RSF) ទៅលើទីផ្សារមួយកន្លែងក្នុងទីក្រុង El Fasher រដ្ឋធានីនៃរដ្ឋ North Darfur នៅភាគខាងលិចប្រទេសស៊ូដង់។ លោក Ibrahim Khatir អគ្គនាយកនៃក្រសួងសុខាភិបាលរដ្ឋ North Darfur បានប្រាប់សារព័ត៌មានស៊ីនហួរ ថា អ្នកស្លាប់ និងរងរបួសទាំងអស់ គឺជាជនស៊ីវិល។ចាប់តាំងពីថ្ងៃទី១០ ខែឧសភា ការប៉ះទង្គិចគ្នាខ្លាំង បានកើតមានឡើងនៅក្នុងក្រុង El Fasher រដ្ឋធានីនៃរដ្ឋ Darfur ខាងជើង។ វាគឺជាការកើនឡើងចុងក្រោយបំផុតនៃជម្លោះកាន់តែខ្លាំងឡើងរវាងកងកម្លាំងប្រដាប់អាវុធស៊ូដង់ និងកងកម្លាំងគាំទ្ររហ័ស(RSF) នៅទូទាំងប្រទេសចាប់តាំងពីថ្ងៃទី១៥ ខែមេសា ឆ្នាំ២០២៣។រហូតមកដល់ពេលនេះ ជម្លោះដ៏បង្ហូរឈាមនេះ បានឆក់យកជីវិតមនុស្សយ៉ាងហោចណាស់១៦.៦៥០នាក់ នេះបើយោងតាមការធ្វើបច្ចុប្បន្នភាពចុងក្រោយដោយការិយាល័យអង្គការសហប្រជាជាតិទទួលបន្ទុកការសម្របសម្រួលនៃកិច្ចការមនុស្សធម៌។ការប៉ះទង្គិចគ្នារវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF) នាពេលថ្មីៗនេះ បានកើនឡើងនៅជួរមុខជាច្រើនកន្លែងទូទាំងប្រទេសស៊ូដង់ ជាពិសេសនៅក្នុងរដ្ឋ Sinnar, West Kordofan និងរដ្ឋ North Darfur ។ យោងតាមការិយាល័យអង្គការសហប្រជាជាតិទទួលបន្ទុកការសម្របសម្រួលកិច្ចការមនុស្សធម៌ (OCHA) បានឲ្យដឹងថា មនុស្សជាង ៥៥.៤០០នាក់ បានភៀសខ្លួនចេញពីទីក្រុង Singa ជារដ្ឋធានីរបស់រដ្ឋ Sinnar ដោយសារតែមានការប្រយុទ្ធគ្នា។

ចំនួនអ្នកស្លាប់ ក្នុងគ្រោះទឹកជំនន់នៅភាគខាងត្បូងប្រទេសប្រេស៊ីល កើនឡើងដល់យ៉ាងហោចណាស់១៨០នាក់

ទីភ្នាក់ងារការពារជនស៊ីវិល បាននិយាយកាលពីថ្ងៃពុធថា មនុស្សយ៉ាងហោចណាស់១៨០នាក់ បានស្លាប់ដោយសារទឹកជំនន់ហក់ឡើងខ្ពស់ច្រើនសប្តាហ៍នៅក្នុងរដ្ឋ Rio Grande do Sul ភាគខាងត្បូងប្រទេសប្រេស៊ីល ហើយមនុស្ស៣២នាក់ នៅបាត់ខ្លួននៅឡើយ។ភ្លៀងធ្លាក់ខ្លាំង បានចាប់ផ្តើមនៅថ្ងៃទី២៩ខែមេសា និងបានបន្តច្រើនថ្ងៃ ដោយបានជន់លិចទីក្រុងនានានៅទូទាំងរដ្ឋ។ ការងារជួយសង្គ្រោះ និងស្តារឡើងវិញ បានចាប់ផ្តើម បន្ទាប់ពីទឹកជំនន់ចាប់ផ្តើមស្រកនៅពាក់កណ្តាលខែមិថុនា។ទីភ្នាក់ងារ បាននិយាយនៅក្នុងរបាយការណ៍ថា អាកាសធាតុមិនអំណោយផលខ្លាំង បានធ្វើឲ្យប៉ះពាល់ដល់ប្រជាជនជាង២លាននាក់ នៅក្នុងក្រុងចំនួន៤៧៨ រួមទាំងរដ្ឋធានីរដ្ឋ ប៉តូ អាលីក្រេ(Porto Alegre) ហើយក្នុងអំឡុងពេលមានព្យុះខ្លាំង មនុស្សជាង ៤៥០.០០០នាក់ ត្រូវបានជម្លៀសចេញ។រដ្ឋាភិបាលប្រេស៊ីល បានលៃលកថវិកាចំនួនប្រហែល ១៥,៤ ពាន់លានដុល្លារអាមេរិក ដើម្បីផ្តល់ជំនួយ និងកសាងទីក្រុង Rio Grande do Sul ឡើងវិញ នេះបើយោងតាមរដ្ឋមន្ត្រីទំនាក់ទំនងសង្គម លោក ប៉ៅឡូ ពីមីនតា(Paulo Pimenta) ដែលត្រូវបានតែងតាំងដោយប្រធានាធិបតី លោក លូអ៊ីស អ៊ីណាស៊ីញ៉ូ លូឡា ដាស៊ីលវ៉ា(Luiz Inacio Lula da Silva) ដើម្បីត្រួតពិនិត្យកិច្ចខិតខំប្រឹងប្រែងកសាងឡើងវិញ។ទីក្រុង Rio Grande do Sul ជារដ្ឋកសិកម្ម មានទីតាំងនៅជាប់ព្រំដែនជាមួយប្រទេសអ៊ុយរ៉ាហ្គាយ និងអាហ្សង់ទីន បានមើលឃើញការខាតបង់ផ្នែកសេដ្ឋកិច្ចយ៉ាងច្រើន ពីគ្រោះមហន្តរាយនេះ។

ទឹកជំនន់បង្កការបំផ្លិចបំផ្លាញដ៏មហន្តរាយក្នុងប្រទេសចិន ខណៈម្ចាស់អាជីវកម្មនានាយំស្រែកស្ដាយទ្រពសម្បត្តិ

ម្ចាស់អាជីវកម្មខ្នាតតូចនៅតាមដងផ្លូវនៃស្រុកភីងជាំង(Pingjiang) ក្នុងខេត្ត ហ៊ូណាន(Hunan) ប្រទេសចិន បានស្រែកយំរៀបរាប់ការខាតបង់យ៉ាងធ្ងន់ធ្ងរ បន្ទាប់ពីតំបន់នេះ ត្រូវបានវាយប្រហារដោយភ្លៀងធ្លាក់ខ្លាំង និងទឹកជំនន់កាលពីថ្ងៃពុធ ទី ៣ ខែកក្កដាសប្ដាហ៍នេះ ។អ្នកស្រី តាន់ (Tan)អាជីវកររស់នៅក្នុងស្រុកនេះ និងជាថៅកែហាងលក់សម្ភារៈការិយាល័យ បាននិយាយថា គ្រួសាររបស់អ្នកស្រីកំពុងព្យាយាមប្រមូលទំនិញទាំងអស់ទៅកាន់បន្ទប់ជាន់លើ នៅពេល ទឹកជំនន់បានហក់ឡើងខ្ពស់តាំងពីព្រឹកព្រលឹម ប៉ុន្តែភ្លាមៗនោះ ទឹកជំនន់បានលិចពេញជាន់ទីមួយ។ អ្នកស្រី បាននិយាយថា រូបគាត់មិនបានទទួលការជូនដំណឹងជាមុនទេ មុនពេលទឹកជំនន់មកដល់។ភ្លៀងធ្លាក់ខ្លាំងបានវាយលុកផ្នែកខ្លះនៃខេត្ត ហ៊ូណាន ភាគកណ្តាលប្រទេសចិនកាលពីដើមសប្តាហ៍នេះ ដែលបណ្តាលឱ្យទឹកទន្លេ មីឡូ (Miluo) ក្នុងស្រុកភីងជាំង ហក់ឡើងដល់កម្រិតខ្ពស់បំផុតក្នុងរយៈពេល៧០ ឆ្នាំ។ ក្រុមអាជ្ញាធរក្នុងតំបន់ក្នុងខេត្តហ៊ូណាន បានធ្វើសកម្មកម្រិតឆ្លើយតបគ្រាអាសន្នអតិបរមា។ មនុស្សប្រហែល ៣៤០.០០០នាក់ នៅក្នុងប្រទេសចិនបានរងផលប៉ះពាល់ ហើយអាជីវកម្មត្រូវបានរងផលប៉ះពាល់៕

បាតុកម្មធំ ប្រឆាំងក្រុមស្តាំនិយម ធ្វើឡើងក្នុងទីក្រុងប៉ារីស មុនការបោះឆ្នោតជុំទី២ នៅថ្ងៃអាទិត្យ

ក្រុមបាតុកររាប់ពាន់នាក់ បានមកប្រមូលផ្តុំគ្នានៅទីក្រុងប៉ារីស ប្រទេសបារាំង ដើម្បីជំរុញអ្នកបោះឆ្នោតឱ្យរារាំងកម្លាំងស្តាំនិយម មិនឱ្យទទួលជ័យជម្នះក្នុងការបោះឆ្នោតសភាមុនអាណត្តិនៅជុំទីពីរ។ គណបក្ស National Rally party ស្តាំនិយម និងសម្ព័ន្ធមិត្តរបស់ខ្លួន បានឈរលើចំណុចកំពូលក្នុងជុំទីមួយនៃការបោះឆ្នោតសភា កាលពីថ្ងៃអាទិត្យមុន ដោយទទួលបានសំឡេងច្រើនជាង៣០ភាគរយ។ការបោះឆ្នោតជុំទី២ គ្រោងនឹងប្រព្រឹត្តទៅនៅថ្ងៃអាទិត្យ ក្នុងមណ្ឌលបោះឆ្នោតដែលពុំមានអ្នកឈ្នះក្នុងជុំទី១។ សហជីពពាណិជ្ជកម្ម ក្រុមអង្គការសិទ្ធិមនុស្ស និងអ្នករៀបចំផ្សេងទៀត បានរៀបចំព្រឹត្តិការណ៍នេះនៅទីលានមួយកន្លែងក្នុងរដ្ឋធានី ប្រទេសបារាំង កាលពីថ្ងៃពុធ។ អ្នកចូលរួម រួមមានទាំងតារាសម្ដែង បញ្ញាវន្ត និងតន្ត្រីករ។ម្ចាស់ជ័យលាភីផ្នែកអក្សរសាស្ត្រម្នាក់ បាននិយាយនៅក្នុងសារជាវីដេអូថា មានពេលវេលានៅក្នុងប្រវត្តិសាស្ត្ររបស់ប្រទេសមួយ នៅពេលដែលពលរដ្ឋរបស់ខ្លួន ធ្វើការជ្រើសរើសដែលពិបាកនឹងត្រលប់ថយក្រោយវិញ ហើយវានឹងកើតឡើងនៅថ្ងៃអាទិត្យក្រោយនេះ។ ក្រុមចម្រុះឆ្វេងនិយម រណសិរ្សប្រជាប្រិយភាពថ្មី បានទទួលចំណាត់ថ្នាក់ទីពីរក្នុងការបោះឆ្នោតជុំទី១ ហើយក្រុមចម្រុះដែលកំពុងកាន់អំណាច ដឹកនាំដោយប្រធានាធិបតី លោក Emmanuel Macron ស្ថិតនៅលំដាប់ទី៣ ។បេក្ខជនមួយចំនួន បានដកខ្លួននៅមុនការបោះឆ្នោតជុំទី២នៅថ្ងៃអាទិត្យ ដើម្បីបង្រួបបង្រួមដោយប្រសិទ្ធភាពប្រឆាំងកម្លាំងស្តាំនិយម។ ប៉ុន្តែសមាជិកមួយចំនួនរបស់ក្រុមចម្រុះដែលកំពុងកាន់អំណាចមានភាពអវិជ្ជមានចំពោះកិច្ចសហប្រតិបត្តិការបែបនេះ។

ទួរគី បិទព្រំដែនស៊ីរី ក្រោយអំពើហិង្សាផ្ទុះឡើង ក្នុងប្រទេសទាំងពីរ

ប្រភពពីក្រុមប្រឆាំងស៊ីរី និងអ្នកស្រុក បាននិយាយថា ទួរគី បានបិទច្រកព្រំដែនសំខាន់របស់ខ្លួនចូលទៅក្នុងភាគពាយ័ព្យប្រទេសស៊ីរី កាលពីថ្ងៃអង្គារ បន្ទាប់ពីទាហានទួរគី បានរងការបាញ់ប្រហារពីប្រជាជនស៊ីរី ដែលខឹងសម្បាដោយអំពើហិង្សាលើជនរួមជាតិរបស់ពួកគេនៅក្នុងប្រទេសទួរគី។រដ្ឋមន្ត្រីមហាផ្ទៃលោក Ali Yerlikaya បាននិយាយថា នៅក្នុងប្រទេសទួរគីថា នគរបាល បានឃាត់ខ្លួនមនុស្សចំនួន ៤៧៤នាក់ ដែលជាប់ពាក់ព័ន្ធក្នុងការវាយប្រហារកំណត់គោលទៅលើសហគមន៍ស៊ីរី នៅ ទូទាំងប្រទេសពេញមួយយប់ នៅក្នុងការធ្វើឲ្យភាពចលាចលរាលដាល ដែលបានចាប់ផ្តើម កាលពីយប់ថ្ងៃអាទិត្យ។ទ្រព្យសម្បត្តិ និងយានជំនិះរបស់ជនជាតិស៊ីរី ត្រូវបានបំផ្លិចបំផ្លាញ និងដុតបំផ្លាញ នៅកណ្តាលទីក្រុង Kayseri បង្កការភ្ញាក់ផ្អើលដោយរបាយការណ៍ប្រព័ន្ធផ្សព្វផ្សាយសង្គមថា បុរសជនជាតិស៊ីរីម្នាក់ បានបំពានផ្លូវភេទលើក្មេងស្រីម្នាក់ដែលជាសាច់ញាតិរបស់ខ្លួន។ លោក Yerlikaya បាននិយាយថា ឧប្បត្តិហេតុនេះ កំពុងត្រូវបានស៊ើបអង្កេត។ទីភ្នាក់ងារស៊ើបការណ៍ចារកម្ម MIT របស់ប្រទេសទួរគី បាននិយាយនៅក្នុងសេចក្តីថ្លែងការណ៍មួយថា អំពើហិង្សាបានរីករាលដាលដល់ខេត្ត Hatay, Gaziantep, Konya, Bursa និងស្រុកអ៊ីស្តង់ ប៊ុល (Istanbul)។ មានសេចក្តីរាយការណ៍តាមប្រព័ន្ធផ្សព្វផ្សាយសង្គមអំពីមានអ្នករបួសខ្លះ ក្នុងចំណោមប្រជាជនស៊ីរី។ក្រោយមក ប្រជាជនស៊ីរីរាប់រយនាក់ដែលខឹងសម្បា បានដើរតាមដងផ្លូវក្នុងទីប្រជុំជនជាច្រើន នៅភាគពាយព្យស៊ីរីដែលគ្រប់គ្រងដោយក្រុមឧទ្ទាម ជាតំបន់ដែលទួរគីរក្សាកងទ័ពរាប់ពាន់នាក់ និងបានប្រើប្រាស់ ឥទ្ធិពលដ៏លើសលប់របស់ពួកគេ ដែលបានរារាំងប្រធានាធិបតីស៊ីរី លោក បាសា អាល់អាសាដ Bashar al-Assad ពីការគ្រប់គ្រងតំបន់នេះឡើងវិញ។

ការតវ៉ានៅកេនយ៉ា សកម្មជនត្រូវបានបង្ខំឱ្យពិចារណាឡើងវិញនូវយុទ្ធសាស្ត្រ ក្នុងពេលមានអំពើហិង្សា

យោងតាមក្រុមអ្នកវិភាគបាននិយាយថា សកម្មជន ដែលនៅពីក្រោយការតវ៉ាប្រឆាំងរដ្ឋាភិបាលប្រទេសកេនយ៉ា កំពុងត្រូវបានបង្ខំឱ្យពិចារណាឡើងវិញនូវវិធីសាស្រ្តរបស់ពួកគេ បន្ទាប់ពីបាតុកម្មនៅសប្តាហ៍នេះ ដែលបានបំផ្លាញដោយអំពើហឹង្សារាលដាល និងការចូលលួចនៅទីតាំងអាជីវកម្មជាច្រើនកន្លែង។ អ្នកវិភាគនយោបាយម្នាក់ដែលមានមូលដ្ឋាននៅទីក្រុងណៃរ៉ូប៊ី បាននិយាយកាលពីថ្ងៃពុធថា ចលនានេះ បានផ្លាស់ប្តូរទៅជាអ្វីផ្សេងទៀតលើសពីគោលដៅដំបូងរបស់វា។ តារាភាពយន្តស្រីម្នាក់ នាង Foi Wambui ដែលបានមកចូលរួមក្នុងការតវ៉ានៅក្រុងណៃរ៉ូប៊ី កាលពីថ្ងៃអង្គារ បាននិយាយថា ភាពវឹកវរ បានរារាំងបាតុករដោយសន្តិវិធីមិនឲ្យចូលរួម។ តារាភាពយន្តស្រីរូបនេះ បានបញ្ជាក់ថា ក្រុមអ្នកតវ៉ាដោយសន្តិវិធី ត្រូវបានរារាំងមិនឲ្យចេញក្រៅ ធ្វើឲ្យរំខានដល់អ្វីដែលយើងកំពុងព្យាយាមធ្វើ។ អ្នកវិភាគ បានរិះគន់កងកម្លាំងនគរបាល របស់ប្រទេសកេនយ៉ា ថា ជាអង្គភាពដែលមិនទទួលខុសត្រូវ ការពាររបបសេរីនិយម ដែលផ្តាច់ចេញពីក្តីបារម្ភរបស់ប្រជាជន។ ទោះជាយ៉ាងណា តារាភាពយន្ត នាង Wambui នៅតែរក្សាការតវ៉ាក្នុងគោលបំណងដោះស្រាយបញ្ហាជាតិ យូរអង្វែង។ដោយសារការចូលលួច បានបំផ្លាញដល់ការគាំទ្រសាធារណៈ សកម្មជនកំពុងត្រូវបានជំរុញឱ្យស្វែងរកយុទ្ធសាស្ត្រអហឹង្សាដែលមានប្រសិទ្ធភាពបន្ថែមទៀត ដូចជាការធ្វើពហិការ និងការរំខានដល់ផ្នែកសេដ្ឋកិច្ច ជំនួសឱ្យការបំផ្លាញទ្រព្យសម្បត្តិ។ អ្នកវិភាគនិយាយថា មានយុទ្ធសាស្រ្តនៃការតស៊ូដោយអហឹង្សា និងការតវ៉ាដែលអាចមានប្រសិទ្ធភាព ជាពិសេសនៅពេលដែលពួកគេកំណត់គោលដៅសេដ្ឋកិច្ច។ ប៉ុន្តែមនុស្សគួរតែឈប់បំផ្លាញ ឬលួចទ្រព្យសម្បត្តិ។អាជ្ញាធរប្រទេសកេនយ៉ា និយាយថាពួកគេបានព្យាយាមបែងចែករវាងបាតុករដោយសន្តិវិធី និង ឧក្រិដ្ឋជន ដែលធ្វើបាតុកម្ម។

មនុស្ស ៥៣ នាក់ស្លាប់ និងជិត ២០០ នាក់របួសក្នុងគ្រោះថ្នាក់ផ្លូវហាយវ៉េនៅមីយ៉ាន់ម៉ា ក្នុងពេល ៦ខែ

មន្ត្រីនគរបាលផ្លូវហាយវ៉េ បាននិយាយកាលពីថ្ងៃពុធ (០៣ កក្កដា) ថា មនុស្សសរុបចំនួន ៥៣ នាក់បានស្លាប់ និង ១៨៦ នាក់ផ្សេងទៀតបានរងរបួសនៅក្នុងគ្រោះថ្នាក់ចរាចរណ៍ចំនួន ៩៩ ករណីនៅលើផ្លូវហាយវ៉េ យ៉ានហ្កន-ម៉ានដាឡាយ (Yangon-Mandalay) របស់សហភាពមីយ៉ាន់ម៉ា នៅក្នុងឆមាសទីមួយនៃឆ្នាំនេះ។ មន្រ្តីនគរបាលនោះបានប្រាប់សារព័ត៌មានស៊ីនហួរថា តួលេខនេះមានការកើនឡើង បើប្រៀបធៀបទៅនឹងការស្លាប់ចំនួន ៥៣ នាក់ និងរបួស ១៦២ នាក់ដែលបានរាយការណ៍ពីគ្រោះថ្នាក់ចរាចរណ៍ចំនួន ៨៣ ករណីក្នុងរយៈពេលដូចគ្នាកាលពីឆ្នាំមុន។មូលហេតុចម្បងនៃគ្រោះថ្នាក់រថយន្តនៅក្នុងប្រទេសមីយ៉ាន់ម៉ា រួមមានយានយន្តខុសបច្ចេកទេស ការធ្វេសប្រហែសរបស់មនុស្ស រួមទាំងស្ថានភាពផ្លូវ និងអាកាសធាតុមិនល្អ។ មន្រ្តីរូបនោះបានបន្ថែមថា គ្រោះថ្នាក់ចរាចរណ៍ភាគច្រើនក្នុងប្រទេសអាស៊ីអាគ្នេយ៍មួយនេះគឺមកពីការបើកបរមិនប្រុងប្រយ័ត្ន។ផ្លូវល្បឿនលឿន យ៉ានហ្កន-ម៉ានដាឡាយ ប្រវែង ៥៨៧ គីឡូម៉ែត្រ ដែលជាផ្លូវហាយវ៉េដ៏មមាញឹកបំផុតនៅក្នុងប្រទេសមីយ៉ាន់ម៉ា តភ្ជាប់ទីក្រុងពាណិជ្ជកម្មរបស់ទីក្រុង យ៉ានហ្កន ជាមួយទីក្រុងធំទីពីររបស់ខ្លួនគឺក្រុង ម៉ានដាឡាយ៕

ភាគខាងកើតប្រទេសចិន កំពុងប្រឈមគ្រោះទឹកជំនន់ ខណៈភ្លៀងធ្វើឱ្យកម្រិតទឹកទន្លេឡើងខ្ពស់

កំណើនដ៏គ្រោះថ្នាក់នៃកម្រិតទឹកនៅក្នុងទន្លេ ឆាងជាំង (Yangtze River) បន្ទាប់ពីមានភ្លៀងធ្លាក់ខ្លាំងនៅភាគខាងត្បូងប្រទេសចិន បានជំរុញឱ្យភាគខាងកើតនៃតំបន់ក្រោមខ្សែរទឹកត្រៀមខ្លួនសម្រាប់លទ្ធភាពទឹកជំនន់។ កម្រិតទឹកនៅផ្នែកដៃទន្លេក្នុងខេត្ត ជាំងស៊ូ (Jiangsu) នៃទន្លេវែងបំផុតរបស់ប្រទេសចិននេះ បានបន្តកើនឡើងកាលពីថ្ងៃពុធ (០៣ កក្កដា) ដែលជាលទ្ធផលនៃកំណើនលំហូរពីផ្នែកខាងលើរបស់វា ក៏ដូចជាដោយសារភ្លៀងធ្លាក់ជាបន្តបន្ទាប់។ប្រព័ន្ធផ្សព្វផ្សាយរដ្ឋបានរាយការណ៍ថា ទីក្រុង ណានជីង (Nanjing) នៃខេត្ត ជាំងស៊ូ ភាគខាងកើតរបស់ប្រទេសចិន បានចេញការព្រមានអំពីទឹកជំនន់កម្រិតខ្ពស់បំផុតទីពីររបស់ខ្លួន ហើយអាជ្ញាធរបានហាមឃាត់នាវាផ្សេងៗ រួមទាំងសាឡាងដឹកអ្នកដំណើរ មិនឱ្យចូល ឬដំណើរការនៅក្នុងតំបន់ដៃទន្លេនោះ។ក្រសួងធនធានទឹកចិន បាននិយាយកាលពីថ្ងៃអង្គារថា កម្រិតទឹកនៅផ្នែកកណ្តាល និងផ្នែកខាងក្រោមនៃទន្លេ ឆាងជាំង លើសពីសញ្ញាព្រមាន។ កម្រិតទឹកនៅបឹង ផូយ៉ាង (Poyang) ក្នុងខេត្ត ជាំងស៊ី (Jiangxi) ជាទីដែលអាជ្ញាធរបានបើកការឆ្លើយតបកម្រិតទីពីរសម្រាប់ការគ្រប់គ្រងទឹកជំនន់ចាប់តាំងពីយប់ថ្ងៃអង្គារមកនោះ ក៏ត្រូវបានឃ្លាំមើលយ៉ាងដិតដល់ផងដែរ។ភ្លៀងធ្លាក់ខ្លាំងបានវាយលុកផ្នែកខ្លះនៃខេត្ត ហ៊ូណាន (Hunan) ភាគកណ្តាលប្រទេសចិន កាលពីដើមសប្តាហ៍នេះ ដែលបណ្តាលឱ្យទន្លេ មីលួ (Miluo) ក្នុងតំបន់ ភីងជាំង (Pingjiang) ហក់ឡើងដល់កម្រិតខ្ពស់បំផុតក្នុងរយៈពេល ៧០ ឆ្នាំ។ អាជ្ញាធរក្នុងតំបន់ក្នុងខេត្តហ៊ូណាន បានបើកការឆ្លើយតបគ្រាអាសន្នកម្រិតខ្ពស់បំផុត ហើយមនុស្សប្រហែល ៣៤០.០០០ នាក់នៅក្នុងប្រទេសចិន និងអាជីវកម្មនានាត្រូវបានរងផលប៉ះពាល់៕

[UPDATE] ព្យុះសង្ឃរា ប៊ើរៀល វាយប្រហារប្រទេសកោះហ្សម៉ាអ៊ីក ខណៈអ្នកស្លាប់នៅតំបន់សមុទ្រការ៉ាអ៊ីបឡើងដល់៩នាក់

ព្យុះសង្ឃរា ប៊ើរៀល (Beryl) បានបោកបក់យ៉ាងខ្លាំងក្លាលើប្រទេសកោះហ្សាម៉ាអ៊ីក(Jamaica) កាលពីរសៀលថ្ងៃពុធ ទី ៣ខែកក្កដា បន្ទាប់ពីខ្យល់បោកបក់ខ្លាំងផ្ដួលរំលើងដើមឈើ បំប៉ើងដំបូលផ្ទះ និងបំផ្លាញកសិដ្ឋាន ខណៈបានបង្កការបំផ្លិចបំផ្លាញទូទាំងប្រជុំកោះតំបន់សមុទ្រការ៉ាអ៊ីប រយៈពេលពីរ-បី ថ្ងៃកន្លងមកនេះ។ ចំនួនអ្នកស្លាប់ដោយសារព្យុះសង្ឃរាប្រភេទទី ៤ ដ៏មានឥទ្ធិពលបានកើនឡើងដល់យ៉ាងហោចណាស់ ៩ នាក់ ប៉ុន្តែគេរំពឹងថាចំនួនអ្នកស្លាប់អាចកើនឡើងថែមទៀត ខណៈការទំនាក់ទំនងតាមOnline បានត្រលប់មកវិញទូទាំងប្រជុំកោះ ដែលត្រូវបានទឹកជន់លិច និងរងការខូចខាតដោយទឹកជំនន់និងខ្យល់បក់បោកយ៉ាងខ្លាំង។យោងតាមមន្ត្រីក្រុមហ៊ុនថាមពល បានឲ្យដឹងថា ប្រជាជនហ្សាម៉ាអ៊ីក បានត្រៀមសម្រាប់ការកាត់ផ្តាច់ចរន្តអគ្គិសនីកាលពីយប់ថ្ងៃពុធ ដោយផ្លូវនានានៅជិតឆ្នេរសមុទ្របានជន់លិចរួចទៅហើយខណៈ ភ្លៀងបន្តធ្លាក់ជាបន្តបន្ទាប់ ហើយខ្យល់បក់បោកខ្លាំងក្នុងរដ្ឋធានីឃីងស្តូន (Kingston )របស់ប្រទេសកោះនេះ។ យោងតាមមជ្ឈមណ្ឌលព្យុះសង្ឃរាជាតិអាមេរិក (NHC) បានឱ្យដឹងថា គិតត្រឹមពាក់កណ្តាលថ្ងៃ ពុធ គេបានមើលឃើញព្យុះបក់បោកកម្លាំង៧២គីឡូម៉ែត្រក្នុងមួយម៉ោង នៅភាគអាគ្នេយ៍នៃរដ្ឋធានី ឃីងស្តូន ទោះបីជារង្វង់ខាងក្រៅរបស់ព្យុះនេះ បានបោកបក់រួចទៅហើយក្នុងតំបន់ជាច្រើនលើកោះដែលមានចំនួនប្រជាជនជិត ៣ លាននាក់ មួយនេះ ៕

ជនសង្ស័យជាង៣០នាក់ ស្ថិតក្រោមការស៊ើបអង្កេត ចំពោះការចូលរួមប៉ុនប៉ងធ្វើរដ្ឋប្រហារនៅបូលីវី

ការិយាល័យរដ្ឋអាជ្ញា បាននិយាយកាលពីថ្ងៃអង្គារថា ជនសង្ស័យជាជនស៊ីវិល និងយោធាជាង៣០ នាក់ កំពុងស្ថិតនៅក្រោមការស៊ើបអង្កេតសម្រាប់ការចូលរួមដែលត្រូវបានចោទប្រកាន់ក្នុងការប៉ុនប៉ងធ្វើរដ្ឋប្រហារដែលបរាជ័យ ប្រឆាំងប្រធានាធិបតីប្រទេសបូលីវី លោក លូអ៊ីស អាស(Luis Arce) កាលពីថ្ងៃទី២៦ ខែមិថុនា។រដ្ឋអាជ្ញា លោក Franklin Alborta បាននិយាយទៅកាន់អ្នកសារព័ត៌មានថា យើងត្រូវតែបញ្ជាក់ច្បាស់ថា ជាទូទៅ វាគឺជាករណីដ៏ស្មុគស្មាញមួយ ហើយជាបឋម យើងកំពុងរាយការណ៍ថា មនុស្សជាង៣០នាក់ កំពុងស្ថិតក្រោមការស៊ើបអង្កេតជាផ្លូវការរួចហើយ។ជនសង្ស័យម្នាក់ក្នុងចំណោមជនសង្ស័យដែលត្រូវបានចាប់ខ្លួននាពេលថ្មីៗនេះ គឺលោក វ្លាឌីមៀ លូប៉ា សាឡាម៉ានកា(Vladimir Lupa Salamanca) មេបញ្ជាការ F10 ដែលជាក្រុមដឹកនាំកងកម្លាំងប្រដាប់អាវុធ។ លោកត្រូវបានកំណត់ពេលឲ្យផ្តល់សក្ខីកម្មដល់រដ្ឋអាជ្ញានៅក្នុងទីក្រុង La Paz។ក្នុងចំណោមជនជាប់ចោទសំខាន់ៗ ក៏មានអតីតមេបញ្ជាការកងទ័ព និងមេដឹកនាំរដ្ឋប្រហារ ឧត្តមសេនីយ៍ ជូអាន ចូសេ ហ្ស៊ូនីហ្កា(uan Jose Zuniga) អតីតមេបញ្ជាការកងទ័ពជើងទឹក លោក ជូអាន អានណេស(Juan Arnez) និងអតីតមេបញ្ជាការកងទ័ពអាកាស លោក ម៉ាសេឡូ ហ្សេហ្ការ៉ា(Marcelo Zegarra)។

បណ្ដាញសង្គម

ព័ត៌មានថ្មីៗ

មេដឹកនាំកូរ៉េខាងជើង ប្ដេជ្ញាពង្រីកទំនាក់ទំនងជាមួយរុស្ស៊ី និងគាំទ្រជ័យជម្នះ ក្នុងសង្គ្រាមដ៏គួរស្ញប់ស្ញែង

ចិនព្រមានថា ការពង្រាយអាវុធវាយលុកយុទ្ធសាស្ត្ររបស់ជប៉ុន បង្កជាហានិភ័យឱ្យមានការប្រឈមមុខដាក់គ្នា

ឯកឧត្តមទេសរដ្ឋមន្រ្តី លី ធុជ៖ ការប្រើប្រាស់គ្រាប់បែកចង្កោមរបស់ថៃមកលើទឹកដីកម្ពុជា គឺជាការវាយប្រហារ និងជាការដើរថយក្រោយនូវស្មារតីនិងព្រលឹងនៃការអនុវត្តអនុសញ្ញាស្តីពីគ្រាប់បែកចង្កោម

ក្រសួងផែនការ និង UNFPA ពិភាក្សាពង្រឹងទិន្នន័យប្រជាជន ដើម្បីគាំទ្រគោលនយោបាយឆ្លើយតបនឹងការប្រែប្រួលប្រជាសាស្ត្រ

កម្ពុជា ចូលរួមអបអរសាទរ ទិវាអូហ្សូនពិភពលោក ១៦ កញ្ញា ឆ្នាំ២០២៦ ក្រោមប្រធានបទ «ពិធីសារម៉ុងរ៉េអាល់៖ សកម្មភាពសកលដើម្បីភពផែនដីត្រជាក់ជាងមុន»

អ៊ុយក្រែន និងរុស្ស៊ី ត្រៀមសម្រាប់ការចរចាជុំថ្មីសម្របសម្រួលដោយសហរដ្ឋអាមេរិក

អាមេរិកដាក់ពន្ធថ្មី ៥០% លើផលិតផលកាណាដាជាង ១០០មុខ ខណៈជម្លោះពាណិជ្ជកម្មកាន់តែក្ដៅ

មនុស្សរាប់រយនាក់ហែក្បួននៅទីក្រុង Toronto ប្រឆាំងនឹងកិច្ចប្រជុំ ស្តីពីការវិនិយោគរបស់លោក Carney

ប្រធានាធិបតី៖ NATOបាញ់ទម្លាក់ដ្រូននៅលើដែនអាកាសលីទុយអានី

យោធាអាមេរិក បញ្ជាក់ថា សង្គ្រាមជាមួយអ៊ីរ៉ង់បណ្ដាលឱ្យខ្វះខាតគ្រាប់រំសេវ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877