BTV NEWS

ភ្ជុំបិណ្ឌ៣ថ្ងៃ គ្រោះថ្នាក់ចរាចរណ៍សម្លាប់អ្នកដំណើរជាង ២០នាក់ របួសធ្ងន់ស្រាលជាង ១០០នាក់

គិតត្រឹមខែកញ្ញាឆ្នាំ២០២៦នេះ មន្ត្រីនគរបាល ៧៧នាក់ត្រូវវិន័យធ្ងន់ធ្ងរដោយសារ Online Scams ខណៈជនជាតិខ្មែរ និងបរទេសជិត ៥ពាន់ទៀតត្រូវជាប់ឃុំ

សមត្ថកិច្ចឃាត់ខ្លួនជនបរទេស៣នាក់ ក្រោយរកឃើញសារធាតុញៀនប្រភេទកញ្ឆាជាង ១០០ដុំ ពេលត្រៀមចាកចេញពីកម្ពុជាតាមយន្តហោះ

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

សន្តិសុខ និង សង្គម

ព្យុះ Mawar នាំមកនូវភ្លៀងធ្លាក់ខ្លាំង និងបង្កហានិភ័យនៃបំណាក់ដីនៅតាមបណ្តាកោះភាគខាងត្បូងប្រទេសជប៉ុន

ជប៉ុន៖ ព្យុះកំបុតត្បូងចុះខ្សោយកម្លាំង Mawarបាននាំមកនូវភ្លៀងធ្លាក់ខ្លាំងនៅតាមបណ្តាកោះសំខាន់ៗនៅភាគខាងត្បូងប្រទេសជប៉ុននាថ្ងៃសុក្រនេះ ក្រោយបោកបក់ឆ្លងកាត់ប្រជុំកោះ Okinawan និងបណ្តាលឲ្យមនុស្សជាច្រើននាក់ រងរបួស ។ ប្រជាពលរដ្ឋនៅតាមតំបន់ងាយរងគ្រោះ ត្រូវបានគេព្រមានពីលទ្ធភាពនៃទឹកជំនន់ធ្ងន់ធ្ងរ និងបំណាក់ដី ហើយជើងហោះហើរក្នុងស្រុករាប់សិបវ៉ុល ត្រូវបានលុបចោលរយៈពេល១ថ្ងៃ ។ នៅប្រជុំកោះ Okinawa ខ្យល់បក់ខ្លាំងនៅតែបន្តកើតមាន ហើយមនុស្ស ៨នាក់ បានរងរបួស ។ ស្រ្តីវ័យចំណាស់ម្នាក់ដែលដួល បានរងរបួសក្បាលធ្ងន់ធ្ងរនៅទីក្រុង Nishihara ប៉ុន្តែអ្នករងរបួសផ្សេងទៀត មានស្ថាភាពស្រាលប៉ុណ្ណោះ ។ ទីភ្នាក់ងារឧតុនិយមជប៉ុន រាយការណ៍ថា ព្យុះ Mawar ដែលមុននេះគឺជាប្រភេទព្យុះកំណាចទីហ្វុង បានបោកបក់ក្នុងល្បឿន ៩០គ.មក្នុង១ម៉ោង ពេលដែលវាធ្វើដំណើរឆ្លងកាត់តំបន់ភាគខាងកើតកោះ Okinoerabujima ស្ថិតក្នុងមហាសមុទ្រប៉ាស៊ីហ្វិក ។ ទីភ្នាក់ងារឧតុនិយមជប៉ុន រាយការណ៍ទៀតថា ស្របពេលដែលការខូចខាតដោយសារកម្លាំងខ្យល់នៅមានដែនកំណត់នៅប្រជុំកោះ Okinawaនោះ ខ្យល់ក្តៅ និងសំណើមពីព្យុះត្រូពិក បានធ្វើឲ្យភ្លៀងធ្លាក់កាន់តែខ្លាំង គំរាមកំហែងឲ្យកើតមានទឹកជំនន់ និងបំណាក់ដី ។ សូមបញ្ជាក់ថា ព្យុះ Mawar បានបោកបក់ឆ្លងកាត់កោះតៃវ៉ាន់ និងប្រទេសហ្វីលីពីនផងដែរ ក្រោយពេលវាបោកបក់ទៅលើកោះ Guam របស់សហរដ្ឋអាមេរិក កាលពីសប្តាហ៍មុន ៕

ក្រសួងសុខាភិបាលរម្លឹកពីការចាក់វ៉ាក់សាំងកូវីដ-១៩ដូសជំរុញដល់ពលរដ្ឋអាយុចាប់ពី៣ឆ្នាំឡើងទៅ

ភ្នំពេញ៖ យោងចំណារឯកភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ កម្ពុជាលើលិខិតរបស់គណៈប្រចាំការនៃគណៈកម្មការជាតិប្រយុទ្ធនឹងជំងឺកូវីដ-១៩ និងដោយសង្កេតឃើញថាក្នុងពេលថ្មីៗនេះ វីរុសកូវីដ-១៩ បំប្លែងថ្មី ពពួក Omicron XBB.1.5 និងពពួកថ្មីៗទៀតកំពុងមានការឆ្លងរីករាលដាលនៅតាមបណ្ដាប្រទេសមួយចំនួននៅលើសាកលលោក និងនៅក្នុងតំបន់ ក្រសួងសុខាភិបាលនៅថ្ងៃទី២ ខែមិថុនា ឆ្នាំ២០២៣នេះ បានក្រើនរម្លឹកដល់ប្រជាពលរដ្ឋមានអាយុចាប់ពី ៣ ឆ្នាំ ទៅចាក់វ៉ាក់សាំងកូវីដ-១៩ដូសជំរុញ។យោងតាមសេចក្តីជូនព័ត៌មានរបស់ក្រសួងសុខាភិបាលបានឱ្យដឹងថា គណៈកម្មការចំពោះ កិច្ចចាក់វ៉ាក់សាំងកូវីដ-១៩ (គ.វ.ក-១៩) បានក្រើនរម្លឹកដល់សាធារណជន អំពីការចាក់វ៉ាក់សាំងកូវីដ-១៩ ដូសជំរុញ តាមគោលការណ៍ស្ម័គ្រចិត្ត និងដោយមានការកែសម្រួលគម្លាតនៃការចាក់វ៉ាក់សាំងដូសជំរុញណែនាំពីអង្គការសុខភាពពិភពលោកដោយគម្លាតនៃការចាក់វ៉ាក់សាំងកូវីដ-១៩ ដូសជំរុញត្រូវធ្វើចាប់ពី ៦ ខែឡើងទៅ បន្ទាប់ពីចាក់ដូសចុងក្រោយ។ ក្រសួងសុខាភិបាលបញ្ជាក់ថា ប្រទេសកម្ពុជាកំពុងបន្តផ្តល់ការចាក់វ៉ាក់សាំងកូវីដ-១៩ ចំពោះកុមារដែលមានអាយុចាប់ពី ៣ ឆ្នាំ ដល់អាយុក្រោម ៥ ឆ្នាំទាំងអស់ដែលបានចាក់វ៉ាក់សាំងកូរីដ-១៩ ដូសទី១ និង ដូសទី២ (ដូសមូលដ្ឋាន) រួចរាល់ហើយ មានគម្លាតចាប់ពី ៦ ខែឡើង បន្ទាប់ពីការចាក់វ៉ាក់សាំងកូរីដ-១៩ ដូស ចុងក្រោយ អាណាព្យាបាលរួសរាន់នាំកូន ក្មួយ ឬចៅទៅទទួលយកការចាក់វ៉ាក់សាំងកូវីដ-១៩ ដូសទី ៣ ឬដុសទី៤ ឱ្យបានគ្រប់ៗគ្នា។ ចំពោះកុមារដែលមានអាយុចាប់ពី ៥ ឆ្នាំដល់អាយុក្រោម ១២ ឆ្នាំទាំងអស់ដែលបានចាក់វ៉ាក់សាំងកូវីដ-១៩ ដូសទី១ និងដូសទី២ (ដូសមូលដ្ឋាន) រួចរាល់ ហើយមានគម្លាតចាប់ពី ៦ ខែឡើង បន្ទាប់ពីការចាក់វាក់សាំងកូវីដ-១៩ ដូសចុងក្រោយ ត្រូវរួសរាន់នាំកូន ក្មួយ ឬចៅ ទៅទទួលយកការចាក់វ៉ាក់សាំងកូវីដ-១៩ ដូសទី៣ ដូសទី៤ ឬដូសទី៥ ឱ្យបានគ្រប់ៗគ្នា។ ចំពោះប្រជាជនដែលមានអាយុចាប់ពី១២ឆ្នាំឡើងទាំងអស់ដែលបានចាក់វ៉ាក់សាំងកូវីដ-១៩ ដូសទី១ និងដូសទី២ ឬបានចាក់វាក់សាំងចនសុន និងចនសុនមួយដូស (ដូសមូលដ្ឋាន) រួចរាល់ហើយមានគម្លាតចាប់ពី៦ខែឡើងបន្ទាប់ពីការចាក់ វ៉ាក់សាំងកូវីដ-១៩ ដូសចុងក្រោយ សូមរួសរាន់អញ្ជើញទៅទទួលការចាក់វ៉ាក់សាំងកូវីដ-១៩ ដូសទី៣ ដូសទី៤ ដូសទី៥ ឬដូសទី៦ ឱ្យបានគ្រប់ៗគ្នា។ ចំពោះទីតាំងនៃការចាក់វ៉ាក់សាំងកូវីដ-១៩ គឺនៅតាមមូលដ្ឋានសុខាភិបាលសាធារណៈរួមមានមន្ទីរពេទ្យជាតិ មន្ទីរពេទ្យបង្អែក និងមណ្ឌលសុខភាព ទូទាំងរាជធានី-ខេត្តទាំង ២៥ ដែលស្ថិតនៅជិតទីសំណាក់ របស់បងប្អូន៕អត្ថបទ៖ វ៉ន ដារ៉ា

បេសកកម្ម Boeing ក្នុងការបញ្ជូនអវកាសយានិក NASA ទៅកាន់ស្ថានីយអវកាស ប្រឈមនឹងការពន្យារពេលយូរ

អាមេរិក៖ អាចនឹងមានការពន្យាពេលដ៏យូរជាងនេះ សម្រាប់យានអវកាស Starliner របស់ក្រុមហ៊ុន Boeing ដែលត្រូវបានផលិតឡើង ដើម្បីបញ្ជូនអវកាសយានិកទៅ និងមកពីស្ថានីយអវកាសអន្តរជាតិ (ISS) ខណៈបេសកកម្មនេះ ធ្វើឡើងក៏ដើម្បីប្រកួតប្រជែងជាមួយយានអវកាស Crew Dragon របស់ក្រុមហ៊ុនអវកាស SpaceX ផងដែរ។ក្រុមហ៊ុន Boeing បានសម្រុកការងាររបស់ខ្លួនយ៉ាងខ្លាំង ដើម្បីឆ្ពោះទៅរកការបាញ់បង្ហោះចុងខែកក្កដានៃការហោះហើរសាកល្បងយានអវកាស Starliner ដែលមានអវកាសយានិកដំបូងបង្អស់។ ប៉ុន្តែលោក Mark Nappi អនុប្រធាន និងជាអ្នកគ្រប់គ្រងកម្មវិធីរបស់ Boeing សម្រាប់យានអវកាស CST-100 Starliner បាននិយាយក្នុងសន្និសីទសារព័ត៌មានខ្លី កាលពីថ្ងៃព្រហស្បតិ៍ថា៖ «យើងមានបញ្ហាថ្មីចំនួនពីរ ដែលបានរកឃើញ ក្នុងដំណើរការត្រួតពិនិត្យឡើងវិញរបស់យើង។ ដូច្នេះ យើងបានចំណាយពេលមួយសប្តាហ៍ចុងក្រោយនេះ ដើម្បីស្វែងរកមើលបញ្ហានោះឲ្យបានល្អិតល្អន់បន្ថែមទៀត»។នៅទីបំផុត បន្ទាប់ពីបានពិគ្រោះយោបល់ជាមួយនាយកប្រតិបត្តិក្រុមហ៊ុន Boeing លោក Dave Calhoun និង NASA រួចមក ក្រុមហ៊ុនបានសម្រេចចិត្តបញ្ឈប់ការប៉ុនប៉ងបាញ់បង្ហោះ នៅខែកក្កដា ដើម្បីដោះស្រាយបញ្ហានានា។បញ្ហាមួយទាក់ទងនឹងការរលាស់ឆ័ត្រយោង និងផ្នែកនៃគ្រឿងយន្តមួយហៅថា «តំណភ្ជាប់ផ្នែកទន់» ដែលមានកម្រិតទាបជាងការរំពឹងទុកដំបូង ហើយលោក Nappi បានប្រាប់ថា បញ្ហាផ្សេងទៀតទាក់ទងនឹងប្រទាប់រុំ ដែលត្រូវបានប្រើសម្រាប់ការពារខ្សែកុំឲ្យរហែក។ ស្រទាប់រុំនោះ ត្រូវបានរកឃើញថា អាចនឹងឆេះបានដោយងាយ។បើទោះបីជជាការបាញ់បង្ហោះនៅឆ្នាំនេះ នៅតែមានលទ្ធភាពអាចធ្វើទៅបានក៏ដោយ ក៏មន្ត្រីរបស់ក្រុមហ៊ុន បាននិយាយថា ពួកគេនឹងមិនកំណត់កាលបរិច្ឆេទច្បាស់លាស់ សម្រាប់ការបាញ់បង្ហោះថ្មីទេ រហូតដល់ពួកគេដឹងប្រាកដប្រជាអំពីបញ្ហាថ្មីៗជាមុនសិន។កាលពីឆ្នាំ២០២២ យានអវកាស Starliner ដែលគ្មានអវកាសយានិក ត្រូវបានបាញ់បង្ហោះសាកល្បងលើកទីពីរ ទៅកាន់គន្លងតារាវិថី ប៉ុន្តែបញ្ហាដែលមានជាមួយយានអវកាស Starliner មានអវកាសយានិកនេះ បានកើតមានឡើងសឹងគ្រប់ដំណាក់កាលនៃកម្មវិធីអភិវឌ្ឍន៍របស់យាន៕

រុស្ស៊ីនិយាយថា ខ្លួនបានវាយកម្ទេចការវាយប្រហាររបស់អ៊ុយក្រែនតាមព្រំដែន ខណៈបង្កើនការវាយប្រហារលើទីក្រុង Kyiv សម្លាប់មនុស្ស៣នាក់

រុស្ស៊ី៖ ទីក្រុង Moscow បាននិយាយកាលពីថ្ងៃព្រហស្បតិ៍ថា ខ្លួនបានវាយកម្ទេចការប៉ុនប៉ងរបស់អ៊ុយក្រែន ក្នុងការលួចចូលក្នុងព្រំដែនភាគនិរតីរបស់ខ្លួន ខណៈកងកម្លាំងរុស្ស៊ី បានវាយសន្ធាប់ដោយមីស៊ីលទៅលើទីក្រុង Kyiv បណ្ដាលមនុស្ស៣នាក់ស្លាប់ រួមទាំងកុមារម្នាក់ ។ រដ្ឋធានីរបស់អ៊ុយក្រែន បានប្រឈមការវាយឆ្មក់តាមអាកាសទាំងកណ្ដាលអធ្រាត្រ កាលពីខែឧសភា និងការវាយប្រហារពេលថ្ងៃខុសពីទម្លាប់ធម្មតាកាលពីថ្ងៃចន្ទ ដែលបង្ខំឲ្យប្រជាពលរដ្ឋរត់ទៅរកជម្រកមានសុវត្ថិភាព។ ខណៈទីក្រុង Kyiv បានដាក់ពង្រាយប្រព័ន្ធការពារដែនអាកាសរបស់ខ្លួនប្រឆាំងនឹងការវាតប្រហារដោយមីស៊ីលថ្មីរបស់រុស្ស៊ី ទីក្រុង Moscow និយាយថា ខ្លួនបានវាយបកការប៉ុនប៉ងមួយពីសំណាក់កងទ័ពអ៊ុយក្រែនក្នុងបំណងឈ្លានពានតំបន់ Belgorod ភាគនិរតីរបស់ខ្លួន នៅម៉ោងប្រហែល៣ព្រឹម៉ោងក្នុងប្រទេសរុស្ស៊ី។ ក្រសួងការពារជាតិរុស្ស៊ី បាននិយាយនៅពេលល្ងាចថា ការវាយប្រហារចូលរួមដោយក្រុមសកម្មប្រយុទ្ធសរុបមានដល់៧០នាក់ក្នុងនោះ មានរថក្រោះ៥គ្រឿង រថពាសដែក៤គ្រឿង និងរថយន្ត pickup ចំនួន៧គ្រឿង និងរថយន្តធុនធំKamazមួយគ្រឿង ដោយមានសេចក្ដីរាយការណ៍ពីការព្យាយាមឆ្លងព្រំដែនយ៉ាងហោចណាស់៣លើក។ ក្រសួងខាងលើនិយាយថា រុស្ស៊ី បានប្រើកងកម្លាំងទ័ពអាកាសនិង កាំភ្លើងធំដើម្បីវាយទប់នឹងការវាយប្រហារនេះ ដែលបានសម្លាប់ក្រុមអ្នកប្រយុទ្ធអ៊ុយក្រែនជាង៥០នាក់។តំបន់ Belgorod ដែលបានមើលឃើញការវាយប្រហារមិនធ្លាប់មានក្នុងការលបវាយឆ្មក់ប្រដាប់អាវុធ២ថ្ងៃ កាលពីសប្ដាហ៍មុន បានកើតឡើង ក្រោមការបាញ់ប្រហារកាន់តែខ្លាំងក្នុងពេលប៉ុន្មានថ្ងៃមុននោះ៕

អ្នកមគ្គុទេសក៍ជនជាតិនេប៉ាល់ សង្រ្គោះជីវិតអ្នកឡើងភ្នំម៉ាឡេស៊ីពីលើកំពូលភ្នំ Everest

នេប៉ាល់៖ មន្រ្តីរដ្ឋាភិបាល និយាយកាលពីថ្ងៃពុធថា អ្នកឡើងភ្នំម៉ាឡេស៊ីម្នាក់ ត្រូវបានជួយសង្រ្គោះអាយុជីវិត ក្រោយអ្នកមគ្គុទេសក៍ជនជាតិនេប៉ាល់ បានអូសគាត់ចុះពីតំបន់ក្បែរកំពូលភ្នំ Everest ដែលជាប្រតិបត្តិការជួយសង្រ្គោះលើរយៈកម្ពស់ខ្ពស់ដ៏កម្រមួយ ។ លោក Gelje Sherpa វ័យ ៣០ឆ្នាំ បាននាំភ្ញៀវជនជាតិចិនម្នាក់ទៅកាន់កំពូលភ្នំ Everest ដែលមានកម្ពស់ ៨.៨៤៩ម៉ែត្រ កាលពីថ្ងៃទី ១៨ ខែឧសភា ពេលដែលលោកបានឃើញអ្នកឡើងភ្នំជនជាតិម៉ាឡេស៊ី តោងឡើងតាមខ្សែពួរ និងញ័រខ្លួនប្រាណដោយសារអាកាសធាតុត្រជាក់ខ្លាំង នៅតំបន់មរណៈ ជាកន្លែងដែលសីតុណ្ហភាពអាចធ្លាក់ចុះរហូតដល់ ដក ៣០អង្សាសេ ។ លោក Gelje បានអូសអ្នកឡើងភ្នំម្នាក់នេះចុះ ចម្ងាយ ៦០០ម៉ែត្រ ពីតំបន់ Balconyទៅកាន់តំបន់ South Colដោយប្រើរយៈពេលប្រហែល ៦ម៉ោង ជាកន្លែងដែលលោក Nima Tahi Sherpaគឺជាអ្នកមគ្គុទេសក៍ម្នាក់ទៀត ចូលរួមប្រតិបត្តិការជួយសង្រ្គោះ ។ ក្រោយមក ឧទ្ធម្ភាគចក្រ បានប្រើខ្សែលើកគាត់ពីជំរំ Camp III ស្ថិតលើរយៈកម្ពស់ ៧.១៦២ម៉ែត្រ រួចដឹកបញ្ជូនទៅកាន់ជំរំមូលដ្ឋាន ។ លោក Bigyan Koirala គឺជាមន្រ្តីក្រសួងទេសចរណ៍នេប៉ាល់ និយាយប្រាប់ទីភ្នាក់ងារព័ត៌មានរ៉យទ័រថា វាគឺជារឿងដែលស្ទើតែពុំអាចទៅរួចក្នុងការជួយសង្រ្គោះអ្នកឡើងភ្នំនៅលើរយៈកម្ពស់ខ្ពស់បែបនេះ ។ វាគឹជាប្រតិបត្តិការដ៏កម្រមួយ ៕

នគរបាលបង្ហាញខ្លួនសង្ស័យ៨នាក់ ពាក់ព័ន្ធករណីប្លន់ប្រដាប់អាវុធនៅក្បែរផ្សារស្ទឹងមានជ័យ

ភ្នំពេញ៖ ជនសង្ស័យ៨នាក់ពាក់ព័ន្ធនឹងករណីប្លន់នៅផ្សារស្ទឹងមានជ័យ កាលពីថ្ងៃទី១៨ ខែឧសភា ឆ្នាំ២០២៣ វេលាម៉ោង០៧ និង១០ នាទី ត្រូវបានសមត្ថកិច្ចការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ធ្វើការស្រាវជ្រាវឃាត់ខ្លួន ដកហូតវត្ថុតាងពាក់ព័ន្ធមួយចំនួនធំ ។សមត្ថកិច្ចការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ប្រាប់ឲ្យដឹងនារសៀលថ្ងៃទី៣១ខែឧសភាថា កាលពីថ្ងៃទី១៨ ខែឧសភា ឆ្នាំ២០២៣ មានករណី ប្លន់យកកាបូបស្ពាយ រួមមាន៖ មាស ចំនួន ១២តម្លឹង,ផ្លាកទីន ចំនួន ១០០តម្លឹងជាង និងប្រាក់ចំនួន១ លានរៀលជាង) នៅចំណុចក្រោយផ្សារស្ទឹងមានជ័យចាស់ ផ្លូវលំភូមិថ្មី សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ បង្កឡើងដោយជនសង្ស័យចំនួន ០៥ នាក់ ជិះម៉ូតូ ចំនួន ០២គ្រឿង និងរ៉ឺម៉កម៉ូតូចំនួន ០១ គ្រឿង ប្រដាប់ដោយអាវុធខ្លីចំនួន០៤ដើម ។ ក្រុមជនសង្ស័យធ្វើសកម្មភាពប្លន់នេះ ខណៈជនរងគ្រោះកំពុងដើរស្ពាយកាបូបស្ពាយ ។បន្ទាប់ពីធ្វើសកម្មភាព សមត្ថកិច្ចការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានបើកការស្រាវជ្រាវចាប់ពីថ្ងៃទី២៧ ដល់ថ្ងៃទី៣០ ខែឧសភា ឆ្នាំ២០២៣ ដោយសហការជាមួយនគរបាលខេត្តកណ្តាល,ខេត្តកំពង់ស្ពឺ និងខេត្តកំពង់ចាម ឃាត់ខ្លួនជន សង្ស័យចំនួន ០៨ នាក់ជាបន្តបន្ទាប់ ។ជនសង្ស័យសមត្ថកិច្ចការិយាល័យកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕ អត្ថបទ៖ តារាវុទ្ធី

សហភាពអឺរ៉ុបបង្កើនទ្វេដងកងយន្តហោះពន្លត់ភ្លើងឆេះព្រៃ ជាការត្រៀមទប់ទល់ផលប៉ះពាល់ដោយសារបម្រែបម្រួលអាកាសធាតុ

សហភាពអឺរ៉ុប៖ សហភាពអឺរ៉ុប បាននិយាយកាលពីថ្ងៃអង្គារថា ពួកគេនឹងបង្កើនទ្វេដងកងយន្តហោះពន្លត់ភ្លើងឆេះព្រៃសម្រាប់រដូវក្តៅឆ្នាំ ២០២៣ ស្របពេលដែលករណីភ្លើងឆេះព្រៃកើនឡើងដោយសារវិបត្តិអាកាសធាតុ ។ លោក Janez Lenarcic គឺជាស្នងការគ្រប់គ្រងវិបត្តិ និយាយថា ក្នុងរយៈពេលប៉ុន្មានឆ្នាំចុងក្រោយនេះ ពួកយើងបានមើលឃើញភ្លើងឆេះព្រៃ បានឆាបឆេះនៅតាមបណ្តាប្រទេសជាច្រើននៅអឺរ៉ុបកណ្តាល ហើយនិងសូម្បីតែនៅអឺរ៉ុបខាងជើង ។ នេះគឺជាហេតុផលដែលពួកយើងត្រូវតែបង្កើនសមត្ថភាពឆ្លើយតបរបស់ពួកយើងនៅគ្រប់យន្តការ ទាំងអស់ ដែលរួមទាំងសមត្ថភាពរបស់ពួកយើងក្នុងការដោះស្រាយបញ្ហាភ្លើងឆេះព្រៃផងដែរ ។ សហភាពអឺរ៉ុប និយាយថាសម្រាប់រដូវភ្លើងឆេះព្រៃខាងមុខនេះ កងយន្តហោះបម្រុងពន្លត់ភ្លើងឆេះព្រៃ RescEU នឹងរួមបញ្ចូលយន្តហោះ ២៤គ្រឿង និងឧទ្ធម្ភាគចក្រ ៤គ្រឿង មកពីរដ្ឋសមាជិក ១០ប្រទេស ។ លោក Lenarcic បាននិយាយនៅព្រឹត្តការណ៍ប្រារព្ធខួបលើកទី ១០នៃការបង្កើតមជ្ឈមណ្ឌលសម្របសម្រួលការឆ្លើយតបបន្ទាន់របស់សហភាពអឺរ៉ុបនៅក្នុងទីក្រុងព្រុចសែល ប្រទេសបែលហ្ស៊ិកថា ក្រុមនៅដីនឹងមានភ្នាក់ងារពន្លត់អគ្គិភ័យជិត ៤៥០នាក់ មកពីរដ្ឋជាសមាជិក ១១ប្រទេស ដែលនឹងត្រូវឈរជើងនៅក្នុងប្រទេសបារាំង ក្រិក និងព័រទុយក្រែន ។ ដោយឡែក តំបន់អឺរ៉ុបខាងត្បូង កំពុងប្រឈមនឹងគ្រោះរាំងស្ងួតដ៏ធ្ងន់ធ្ងរអំឡុងរដូវក្តៅ ក្នុងនោះតំបន់មួយចំនួន បានជួបកង្វះខាតទឹករួចទៅហើយៗក្រុមប្រជាកសិកររំពឹងថា ពួកគេនឹងទទួលបានទិន្នផលដ៏អាក្រក់បំផុតក្នុងរយៈពេលជាច្រើនទសវត្សរ៍កន្លងមកនេះ ៕

អវកាសយានិកចិន ៦រូបមកពីបេសកកម្មចំនួន២ ជួបគ្នានៅស្ថានីយ៍អវកាសចិន Tiangongដើម្បីឆ្លាស់វេនគ្នា

ចិន៖ អវកាសយានិកចិន ៣រូបនៅលើយានចម្លង Shenzhou-16 បានចូលក្នុងស្ថានីយ៍អវកាសចិន Tiangongកាលពីថ្ងៃអង្គារ និងបានជួបសមាជិកយានអវកាស Shenzhou-15 ដែលកំពុងរស់នៅ និងធ្វើការនៅទីនោះ ។ ការចូលក្នុងស្ថានីយអវកាសនេះ បានធ្វើឡើងកាលពីវេលាម៉ោង ៦ និង ២២នាទីល្ងាច ម៉ោងនៅទីក្រុងប៉េកាំង (ត្រូវនឹងម៉ោង ១០ និង ២២នាទី ម៉ោងសកល) ពេលដែលសមាជិកយានអវកាស Shenzhou-15 បើកទ្វារយានរបស់ពួកគេ និងស្វាគមន៍សមាជិកថ្មីដែលទើបមកដល់ ។ ការជួបគ្នានៅទីអវកាសនេះ គឺជាការចាប់ផ្តើមការឆ្លាស់វេនអវកាសយានិកនៅគន្លងទី ២ក្នុងស្ថានីយអវកាសចិន ។ អវកាសយានិក ៦រូប នឹងរស់នៅជាមួយគ្នារយៈពេលប្រហែល ៥ថ្ងៃ ដើម្បីបញ្ចប់ការប្រគល់ការងាររបស់ពួកគេ ។ ក្រុមអវកាសយានិកយានអវកាស Shenzhou-15 នឹងប្រគល់ឧបករណ៍ថែទាំ របស់របរប្រើប្រាស់ចាំបាច់ប្រចាំថ្ងៃ និងគំរូពិសោធន៍ដល់សមាជិកថ្មី ដែលនឹងបន្តការងាររបស់ពួកគេសម្រាប់រយៈពេល ៥ខែបន្ទាប់ ៕

ពលរដ្ឋកូរ៉េខាងត្បូងជាង ១០ម៉ឺននាក់ ចុះហត្ថលេខាប្រឆាំងការបញ្ចេញទឹកកាកសំណល់នុយក្លេអ៊ែរជប៉ុន

កូរ៉េខាងត្បូង៖ ប្រជាពលរដ្ឋកូរ៉េខាងត្បូង ១០ម៉ឺននាក់ បានចុះហត្ថលេខាលើយុទ្ធនាការប្រឆាំងនឹងផែនការរបស់ជប៉ុន ក្នុងការបញ្ចេញទឹកកាកសំណល់វិទ្យុសកម្មបន្សាបចេញពីរោងចក្រនុយក្លេអ៊ែរ Fukushima របស់ពួកគេ ចូលទៅក្នុងមហាសមុទ្រ ។ យុទ្ធនាការចុះហត្ថលេខានេះ ត្រូវបានបង្កើតឡើងដោយគណបក្សប្រឆាំងប្រជាធិបតេយ្យ(DP) ឈានមុខគេរបស់កូរ៉េខាងត្បូង ដែលបានចាប់ផ្តើមនៅក្នុងរដ្ឋធានីសេអ៊ូល កាលពីថ្ងៃសុក្រ ។ លោក Lee Jae-Myung គឺជាប្រធានគណបក្ស DP បានបង្ហាញក្តីកង្វល់របស់លោក ដោយលោកនិយាយថា DP នឹងតវ៉ារួមគ្នាជាមួយប្រជាពលរដ្ឋកូរ៉េខាងត្បូង ដើម្បីធ្វើឲ្យទឹកមហាសមុទ្រស្អាត និងដើម្បីធានាបានថា កម្មករក្នុងឧស្សាហកម្មចំណីអាហារ នឹងមិនរងផលប៉ះពាល់នោះទេ ។ គួរឲ្យដឹងថា ជប៉ុនមានគម្រោង បញ្ចេញទឹកកាកសំណល់វិទ្យុសកម្មដែលបានធ្វើប្រព្រឹត្តិកម្មរួចទៅក្នុងសមុទ្រនៅនិទារដូវ ឬរដូវក្តៅខាងមុខនេះ ជាហេតុធ្វើឲ្យកើតមានការប្រឆាំង និងក្តីកង្វល់ពីសហគមន៍នេសាទក្នុងស្រុក និងប្រទេសជិត ។ ការស្ទង់មតិថ្មី រកឃើញថា ពលរដ្ឋកូរ៉េខាងត្បូង ៨នាក់នៅក្នុងចំណោម ១០នាក់ បានប្រឆាំងនឹងផែនការរដ្ឋាភិបាលជប៉ុន ក្នុងការបញ្ចេញទឹកកខ្វក់នុយក្លេអ៊ែរចូលទៅក្នុងមហាសមុទ្រ ៕

ធ្លាប់ជាប់ពន្ធនាគារ៣លើកមិនកែខ្លួន ឆក់កាបូបបណ្តាលឱ្យស្ត្រីម្នាក់ធ្លាក់ពីកង់បី ត្រូវអាវុធហត្ថស្រាវជ្រាវ ចាប់ខ្លួន២នាក់

ភ្នំពេញ៖ ជំនាញអាវុធហត្ថរាជធានីភ្នំពេញស្រាវជ្រាវ ចាប់ខ្លួនជនសង្ស័យ ២នាក់ ករណីឆក់កាបូបនៅលើមហាវិថីសហព័ន្ធរុស្ស៊ីបណ្តាលឱ្យស្ត្រីម្នាក់ធ្លាក់ពីលើកង់បី ។មន្ត្រីអាវុធហត្ថរាជធានីភ្នំពេញ ប្រាប់ឲ្យដឹងនារសៀលថ្ងៃទី៣០ ឧសភាថា កាលពីវេលាម៉ោងប្រមាណ១០ និង៥៧នាទី ព្រឹកថ្ងៃទី១៦ ខែឧសភា ឆ្នាំ២០២៣ មានករណីចោរឆក់កាបូបមួយកើតឡើង តាមបណ្តោយមហាវិថី សហព័ន្ធរុស្ស៊ី ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ បណ្តាលឲ្យស្ត្រីចំណាស់ម្នាក់ធ្លាក់ពីលើ ម៉ុតូកង់បី (Pass App) ដែលកំពុងធ្វើដំណើរ បោកទៅនឹងថ្នល់គួរឲ្យរន្ធត់ និងតក់ស្លុត រហូតភ្ញាក់ផ្អើលពេញបណ្តាញសង្គម Facebook ។តាមរយៈវីដេអូកាមេរ៉ាសុវត្ថិភាពរបស់រថយន្ត ដែលថតជាប់សកម្មភាពឆក់នេះ គេអាចសន្និដ្ឋានបានថា ជនសង្ស័យប្រហែលមានគ្នា ០៦នាក់ ជិះម៉ូតូ ០៤គ្រឿងអមគ្នាធ្វើសកម្មភាព។បើទោះបីជាក្រុមជនសង្ស័យ ធ្វើសកម្មភាពឆក់កាបូបបានសម្រេច និងគេចខ្លួនរហូតដល់ទៅ១០ថ្ងៃហើយក៏ដោយ ហើយបើទោះបីជាជនរងគ្រោះមិនបានដាក់ពាក្យបណ្តឹង ឬ ផ្តល់ព័ត៌មានដល់សមត្ថកិច្ចអាវុធហត្ថក៏ដោយ តែអាវុធហត្ថរាជធានីភ្នំពេញ បានឃើញការផ្សព្វផ្សាយក្នុងបណ្តាញហ្វេសប៊ុក ក៏ចាត់វិធានការណ៍ស្រាវជ្រាវតាមរកមុខសញ្ញាក្រុមចោរឆក់ទាំងនោះ រហូតដល់ថ្ងៃទី២៦ ខែឧសភា ឆ្នាំ២០២៣ កម្លាំងមូលដ្ឋាន អាវុធហត្ថខណ្ឌសែនសុខ បានកំណត់មុខសញ្ញា រហូតឈានដល់ធ្វើការឃាត់ខ្លួនជនសង្ស័យ ចំនួន ០២នាក់ ។ជនសង្ស័យទី១ ឈ្មោះ ហូយ សុភ័ក្រ អាយុ១៩ឆ្នាំ មុខរបរសិស្ស និងទី២ ឈ្មោះ ធឿន ចាន់រដ្ឋា ហៅ វុត្ថា អាយុ២០ឆ្នាំ មុខរបរមិនពិតប្រាកដ ។នៅចំពោះមុខអាវុធហត្ថ ជនសង្ស័យឈ្មោះ ហូយ សុភ័ក្រ បានសារភាពថា ខ្លួនធ្លាប់ធ្វើសកម្មភាពឆក់កាបូប និងទ្រព្យសម្បត្តិមានតម្លៃ ពីប្រជាពលរដ្ឋធ្វើដំណើរតាមដងផ្លូវជាច្រើនលើកមកហើយតាំងពីឆ្នាំ២០១៩មកម៉េ្លះ ហើយក៏ធ្លាប់ជាប់ពន្ធនាគារ ចំនួន ៣លើកផងដែរ ដោយលើកទី១ ក្នុងឆ្នាំ២០១៩ ជាប់ពាក់ព័ន្ធករណីហិង្សា (កាប់ទៅលើជនរងគ្រោះជាសិស្សសាលាដូចគ្នា), លើកទី២ ក្នុងឆ្នាំ២០២០ ជាប់ពាក់ព័ន្ធករណីប្លន់, លើកទី៣ ក្នុងឆ្នាំ២០២១ ជាប់ពាក់ព័ន្ធករណីឆក់ទូរស័ព្ទ និងលើកទី៤នេះ ខ្លួនចេញធ្វើសកម្មភាព ឆក់កាបូបសារជាថ្មី បណ្តាលឲ្យស្ត្រីចំណាស់ម្នាក់ ធ្លាក់ពីលើកង់បី តែក៏ត្រូវបានសមត្ថកិច្ចអាវុធហត្ថ ស្រាវជ្រាវចាប់ខ្លួនបានទៀត។ ចំពោះជនសង្ស័យទាំង ០២នាក់ កម្លាំងជំនាញការិយាល័យប្រឆាំងបទល្មើសព្រហ្មទណ្ឌ នៃ កងរាជអាវុធហត្ថរាជធានីភ្នំពេញ កំពុងកសាងសុំណុំរឿងបញ្ជូនទៅតុលាការ ដើម្បីចាត់ការតាមនីតិវិធី ៕

បណ្ដាញសង្គម

ព័ត៌មានថ្មីៗ

កិច្ចប្រជុំលើកទី២ ថ្ងៃទី១ របស់គណៈកម្មការផ្សះផ្សាក្រោមអនុសញ្ញា UNCLOS ជាមួយកម្ពុជា និងថៃ បានបិទបញ្ចប់

ឯកឧត្តមទេសរដ្ឋមន្ត្រី ឆៃ ស៊ីណារិទ្ធ៖ ជាមួយលទ្ធផលសម្រេចបានជាបន្តបន្ទាប់ក្នុងកិច្ចខិតខំបោសសម្អាតOnline Scams កម្ពុជាបន្តប្តេជ្ញាទប់ស្កាត់មិនឱ្យវិលត្រឡប់ជាដាច់ខាត

កម្ពុជា-អាល្លឺម៉ង់ ពិភាក្សាពង្រឹងកិច្ចសហប្រតិបត្តិការលើវិស័យការងារ សន្តិសុខសង្គម និង TVET

កម្ពស់ទឹកស្ទឹងពោធិ៍សាត់ហក់ឡើងយ៉ាងកំហុក ឈានដល់កម្រិតប្រកាសអាសន្ន ប្រឈមនឹងការជនលិច

កម្ពុជា-អាស៊ែបៃហ្សង់ បង្ហាញសុទិដ្ឋិនិយមចំពោះការជំរុញទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ

ភ្នាក់ងារតំណាងកម្ពុជា អញ្ជើញចូលរួមកិច្ចប្រជុំលើកទី២ របស់គណៈកម្មការផ្សះផ្សាក្រោមអនុសញ្ញា UNCLOS ជាមួយកម្ពុជា និងថៃ ដោយរក្សាគោលជំហរ និងគោលបំណង គឺដំណោះស្រាយមួយដែលផ្តល់ផលប្រយោជន៍ដល់ប្រជា ជននៃប្រទេសទាំងពីរ និងស្វែករកសន្តិភាពយូរអង្វែង

មន្ត្រី៖ បណ្តាប្រទេសអឺរ៉ុប និងវៀតណាម នឹងចុះហត្ថលេខាលើកិច្ចព្រមព្រៀងពាណិជ្ជកម្មសេរី នៅថ្ងៃអាទិត្យ

ការលាលែងពីតំណែងរបស់លោក លោក Yana គឺជាការប៉ះពាល់ដល់នាយករដ្ឋមន្ត្រីជប៉ុន លោកស្រី Takaichi

លោក Rutte៖ សមាជិកណាតូត្រូវប្រឹងប្រែងបន្ថែម ដើម្បីពង្រឹងប្រព័ន្ធការពារដែនអាកាសរបស់អ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877