BTV NEWS

រដ្ឋបាលរាជធានីភ្នំពេញ បង្ក្រាបទីតាំងហ្គេមអនឡាញខុសច្បាប់ក្នុងខណ្ឌចំការមនឃាត់ខ្លួនជនជាតិឥណ្ឌូណេស៊ី ២៤នាក់

សមត្ថកិច្ចចម្រុះបង្ក្រាបករណីបង្ខាំងមនុស្ស និងឆែកឆេរទីតាំងសង្ស័យ Online Scam សង្គ្រោះជនរងគ្រោះម្នាក់ និងឃាត់ខ្លួនជនសង្ស័យជាជនជាតិបង់ក្លាដេសដូចគ្នាចំនួន២នាក់នៅខណ្ឌសែនសុខ

ជនជាតិចិន ៣២៣នាក់ទៀត ត្រូវបានបណ្ដេញចេញពីកម្ពុជា ពាក់ព័ន្ធករណីឆបោកតាមប្រព័ន្ធអនឡាញ (Online Scams)

តុលាការចេញដីការឃុំខ្លួនជនជាតិចិន២នាក់ ជាមេខ្លោងពាក់ព័ន្ធករណីឆបោកជាក្រុមដោយមានការចាត់តាំង (Online Scam) ដាក់ពន្ធនាគារ

សន្តិសុខ និង សង្គម

អំពើហិង្សាផ្ទុះឡើងក្នុងការតវ៉ាគាំទ្រប៉ាឡេស្ទីន នៅតាមសាកលវិទ្យានានាទូទាំងសហរដ្ឋអាមេរិក

ក្រុមបាតុករបានប៉ះទង្គិចគ្នាជាមួយកងកម្លាំងនគរបាលកាលពីថ្ងៃពុធទី១ឧសភា សប្ដាហ៍នេះ នៅឯសាកលវិទ្យាល័យកាលីហ្វ័រនីញ៉ា ក្នុងទីក្រុង Los Angeles (UCLA) ដោយមានការវាយតប់ រុញច្រានគ្នា ទាត់ធាក់ និងប្រើដំបងវាយគ្នាទៅវិញទៅមក។ ប៉ុន្មានម៉ោងកន្លងទៅនេះ កងកម្លាំងនគរបាលបានឆ្មក់ចូលក្នុងអគារមួយនៅសាកលវិទ្យាល័យ Columbia ក្រោយក្រុមបាតុករគាំទ្រប៉ាឡេស្ទីនបានចូលកាន់កាប់ ដើម្បីបំបែកបាតុកម្មដែលបានធ្វើឱ្យមានភាពចលាចលនៅតាមសាកលវិទ្យាល័យនានាទូទាំងសហរដ្ឋអាមេរិក ខណៈមានការបំផុសគំនិតឲ្យបន្តការតវ៉ាលុះត្រាការទាមទារបានសម្រេច។ យោងតាមសារព័ត៌មាន Arizona Daily Star ជាមួយគ្នានោះ នគរបាល និងក្រុមបាតុករបានប៉ះទង្គិចគ្នានៅបរិវេណសាកលវិទ្យាល័យ អារីហ្សូណាស៍ ធូសុន (Arizona's Tucson)។ បន្ទាប់ពីមានការប៉ះទង្គិចគ្នាពីរ-បី ម៉ោង រវាងបាតុករគាំទ្រប៉ាឡេស្ទីន និងក្រុមគាំទ្រអ៊ីស្រាអែលនៅ សាកលវិទ្យាល័យ UCLA កងកម្លាំងនគរបាលពាក់មួកសុវត្ថិភាព និងប្រដាប់ដោយខែលការពារ បានបង្កើតជាជួរ ហើយបំបែកក្រុមអ្នកមតវ៉ាបន្តិចម្តងៗ និងឈានដល់ការបញ្ឈប់អំពើហិង្សា។ការបោះជំរំតង់តវ៉ា អំពាវនាវឱ្យសាកលវិទ្យាល័យនានាឈប់ធ្វើអាជីវកម្មជាមួយអ៊ីស្រាអែល ឬក្រុមហ៊ុនដែលគាំទ្រសង្រ្គាមនៅដែនដីហ្កាហ្សា បានរីករាលដាលពាសពេញសហរដ្ឋអាមេរិក នៅក្នុងចលនានិស្សិតដ៏ចលាចល មិនធ្លាប់បានឃើញនៅក្នុងសតវត្សទី ២១ ដែលចាប់ពីរដ្ឋញូវយ៉ក ដល់រដ្ឋតិចសាស់និងកាលីហ្វ័រនីញ៉ា។ ការបង្រ្កាបជាបន្តបន្ទាប់ពីសំណាក់កងកម្លាំងនគរបាលនៅតាមបរិវេណសាកលវិទ្យាល័យមួយចំនួន បានធ្វើឱ្យមានការរំជើបរំជួលកើតចេញពីចលនាតវ៉ារបស់និស្សិតដែលមានទំហំធំជាងអំឡុងសម័យសង្គ្រាមវៀតណាមទៅទៀត។ មានការប្រឈមដាក់នឹងការអនុវត្តច្បាប់ពោពេញដោយហឹង្សា និងមានការចាប់ខ្លួនមនុស្សជាង១ ពាន់នាក់ អំឡុងការបង្ក្រាបនោះ។ ក្នុងករណីដ៏កម្រ មន្ត្រីសាកលវិទ្យាល័យ និងអ្នកដឹកនាំការតវ៉ាបានចុះកិច្ចព្រមព្រៀងដើម្បីរឹតបន្តឹងការរំខានដល់ជីវិតក្នុងសាកលវិទ្យាល័យ និងការប្រារព្ធពិធីនានា ដែលនឹងចាប់ផ្តើមនាពេលខាងមុខ៕

ចំនួនអ្នកស្លាប់ជនជាតិប៉ាឡេស្ទីន នៅតំបន់ហ្កាហ្សា កើនឡើងជាង ៣៤.៥០០ នាក់

ក្រសួងសុខាភិបាលប៉ាឡេស្ទីន បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារ (៣០ មេសា) ថាចំនួនអ្នកស្លាប់របស់ប៉ាឡេស្ទីន ពីការវាយប្រហាររបស់អ៊ីស្រាអែល ដែលកំពុងបន្តលើតំបន់ហ្កាហ្សាស្ទ្រីប បានកើនឡើងជាង ៣៤.៥០០ នាក់។ក្នុងរយៈពេល ២៤ ម៉ោងកន្លងមកនេះ កងទ័ពអ៊ីស្រាអែលបានសម្លាប់ជនជាតិប៉ាឡេស្ទីនចំនួន ៤៧ នាក់ និងបង្ករបួសចំនួន ៦១ នាក់ទៀត ដែលនាំឱ្យចំនួនអ្នកស្លាប់សរុបចាប់តាំងពីការផ្ទុះឡើងនៃជម្លោះអ៊ីស្រាអែល និងក្រុមហាម៉ាស ឡើងដល់ទៅ ៣៤.៥៣៥ នាក់ និងអ្នករបួសដល់ ៧៧.៧០៤ នាក់។ សេចក្តីថ្លែងការណ៍បាននិយាយថា ជនរងគ្រោះមួយចំនួននៅតែស្ថិតនៅក្រោមគំនរបាក់បែក ស្របពេលមានការទម្លាក់គ្រាប់បែកយ៉ាងធ្ងន់ធ្ងរ និងកង្វះកម្លាំងពីក្រុមជួយសង្គ្រោះ។ទន្ទឹមនឹងនេះ កងទ័ពអ៊ីស្រាអែលបានរាយការណ៍ថាបានវាយប្រហារគោលដៅចំនួន ២៤ នៅតំបន់ហ្កាហ្សា រួមទាំងច្រកចូលផ្លូវរូងក្រោមដី និងទីតាំងបាញ់មីស៊ីល នេះបើយោងតាមវិទ្យុរដ្ឋអ៊ីស្រាអែល។ អគ្គនាយកដ្ឋានការពារជនស៊ីវិលនៅហ្កាហ្សា បានប៉ាន់ប្រមាណថាមានមនុស្សសរុបជាង ១០.០០០ នាក់ នៅតែបាត់ខ្លួននៅក្រោមគំនរបាក់បែកនៃអគារដែលត្រូវបានបំផ្លាញនៅក្នុងតំបន់ហ៊ុមព័ទ្ធនេះ។អ៊ីស្រាអែល បើកការវាយលុកទ្រង់ទ្រាយធំប្រឆាំងនឹងក្រុមហាម៉ាស នៅតំបន់ហ្កាហ្សា ដើម្បីសងសឹកនឹងការវាយលុករបស់ក្រុមហាម៉ាស ឆ្លងព្រំដែនភាគខាងត្បូងអ៊ីស្រាអែល កាលពីថ្ងៃទី០៧ ខែតុលា ឆ្នាំ២០២៣ ក្នុងអំឡុងពេលដែលមនុស្សប្រហែល ១.២០០ នាក់ស្លាប់ និងជាង ២០០ នាក់ត្រូវបានចាប់ធ្វើជាចំណាប់ថ្នូរ៕

ប្រមុខ UN អំពាវនាវឱ្យមានការស៊ើបអង្កេតអន្តរជាតិលើការរកឃើញផ្នូរដ៏ធំនៅហ្កាហ្សា

អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរ៉េស (Antonio Guterres) កាលពីថ្ងៃអង្គារ (៣០ មេសា) បានអំពាវនាវឱ្យមានការស៊ើបអង្កេតជាអន្តរជាតិលើផ្នូរដ៏ធំមានសាកសពមនុស្សរាប់រយនាក់ ដែលទើបរកឃើញនៅក្រោមដីមន្ទីរពេទ្យនៅតំបន់ហ្កាហ្សា។លោក ហ្គុយតឺរ៉េស បាននិយាយថា «យើងមានការតក់ស្លុតយ៉ាងខ្លាំងចំពោះរបាយការណ៍ដែលថា ផ្នូរដ៏ធំត្រូវបានគេរកឃើញនៅទីតាំងជាច្រើនក្នុងហ្កាហ្សា រួមទាំងនៅក្រោមមន្ទីរពេទ្យ អាល់ស៊ីហ្វា (Al Shifa) និងមន្ទីរពេទ្យ ណាសសើ (Nasser) ដែលនៅក្នុងមន្ទីរពេទ្យ ណាសសើ តែមួយ មានសាកសពជាង ៣៩០ នាក់ត្រូវបានគេរកឃើញ»។លោកបន្ថែមថា «ក្រុមគ្រួសារអ្នកស្លាប់ និងបាត់ខ្លួន មានសិទ្ធិដឹងពីអ្វីដែលបានកើតឡើង ហើយពិភពលោកមានសិទ្ធិក្នុងការទទួលខុសត្រូវចំពោះការរំលោភលើច្បាប់អន្តរជាតិដែលអាចកើតមាន។ មន្ទីរពេទ្យ បុគ្គលិកសុខាភិបាល អ្នកជំងឺ និងជនស៊ីវិលទាំងអស់ត្រូវតែការពារ ហើយសិទ្ធិមនុស្សទាំងអស់ត្រូវតែគោរព»។ប្រព័ន្ធសុខាភិបាលនៅហ្កាហ្សា ត្រូវបានបំផ្លាញដោយសង្រ្គាម ខណៈចំនួនពីរភាគបីនៃមន្ទីរពេទ្យ និងមណ្ឌលសុខភាព លែងដំណើរការ។ ចំណែកមន្ទីរពេទ្យដំណើរការដែលនៅសេសសល់ត្រូវបានខូចខាតយ៉ាងធ្ងន់ធ្ងរ ហើយបច្ចុប្បន្នមន្ទីរពេទ្យហ្កាហ្សា មួយចំនួនមានលក្ខណៈស្រដៀងនឹងទីបញ្ចុះសព៕

ប្រធានាធិបតីកូឡុំប៊ី៖ គ្រាប់កាំភ្លើង និងមីស៊ីលរបស់កងកម្លាំងប្រដាប់អាវុធ ត្រូវបានគេលួច ដោយសារអំពើពុករលួយ

ប្រធានាធិបតីកូឡុំប៊ី លោក Gustavo Petro បាននិយាយកាលពីថ្ងៃអង្គារថា ឃ្លាំងស្តុកអាវុធរបស់យោធាបានបង្ហាញថា គ្រាប់កំាភ្លើងជាងមួយលានគ្រាប់ គ្រឿងផ្ទុះរាប់ពាន់គ្រាប់ រួមទាំងគ្រាប់បែកដៃ និងមីស៊ីលមួយចំនួន បានបាត់ពីមូលដ្ឋានយោធា ដោយស្តីបន្ទោសអំពើពុករលួយចំពោះអាវុធដែលបានបាត់បង់ទាំងនេះ។លោក Petro បានបន្ថែមនៅក្នុងសេចក្តីថ្លែងការណ៍រួមមួយជាមួយរដ្ឋមន្ត្រីការពារជាតិ និងជាប្រធានកងកម្លាំងប្រដាប់អាវុធ ដោយលោកបានបញ្ជាឲ្យរុះរើបណ្តាញពុករលួយណាមួយ នៅក្នុងកងកម្លាំងសន្តិសុខ ដោយនិយាយថា អាជ្ញាធរតុលាការ កំពុងស៊ើបអង្កេតលើបញ្ហានេះ។លោកបានបញ្ជាក់ថា៖«មធ្យោបាយតែមួយគត់ ដើម្បីពន្យល់ពីការបាត់បង់អាវុធដែលបានកើតឡើងនោះ គឺជាយូរមកហើយ ដោយសារមានបណ្តាញមនុស្ស នៅក្នុងកងកម្លាំងប្រដាប់អាវុធ និងជនស៊ីវិលដែល បានធ្វើពាណិជ្ជកម្មអាវុធដ៏ធំ ដោយប្រើប្រាស់អាវុធស្របច្បាប់ពីរដ្ឋកូឡុំប៊ី»។ កប្រធានាធិបតី បាននិយាយថា សព្វាវុធនឹងទៅដល់ដៃក្រុមប្រដាប់អាវុធកូឡុំប៊ី ហើយប្រហែលជាត្រូវបានរត់ពន្ធទៅកាន់ប្រទេសហៃទី ឬដាក់លក់ពួកវាទាំងនោះ នៅលើទីផ្សារងងឹតអន្តរជាតិ។«យើងច្បាស់ជាត្រូវតែបំបែកកងកម្លាំងប្រដាប់អាវុធទាំងស្រុង ដូចជាអំណាចសាធារណៈណាមួយចេញពីឧប្បត្តិហេតុនៃអំពើពុករលួយនេះ។ នោះគឺជាមធ្យោបាយតែមួយគត់ ដើម្បីធានាសុវត្ថិភាពរបស់ប្រជាពលរដ្ឋយើង និងកងកម្លាំងប្រដាប់អាវុធ»។លោក Petro បានអះអាងថា គ្រាប់កាំភ្លើងធុន ៥,៥៦ មិល្លីម៉ែត្រ ជាង១,៣លានគ្រាប់ បានបាត់ពីឃ្លាំងស្តុក នៅមូលដ្ឋានយោធាពីរ នៅក្នុងទីក្រុងTolemaida នៅប្រទេសកូឡុំប៊ីភាគកណ្តាល និងខេត្ត La Guajira រួមជាមួយនឹងគ្រាប់កាំភ្លើងរាប់សែនគ្រាប់ផ្សេងទៀត។

តំបន់អាស៊ីអាគ្នេយ៍ កំពុងស៊ូទ្រាំនឹងរលកកម្ដៅដ៏គ្រោះថ្នាក់ និងបំបែកកំណត់ត្រា

រលកកម្ដៅដ៏គ្រោះថ្នាក់ និងបំបែកកំណត់ត្រា កំពុងកើតឡើងនៅតំបន់អាស៊ីអាគ្នេយ៍ ដោយជំរុញឲ្យមានការបិទសាលារៀន ការធ្វើតេស្តបណ្តាញថាមពល និងបណ្តាលឱ្យមានមនុស្សស្លាប់ និងឈឺ ទាក់ទងនឹងកម្ដៅកាន់តែច្រើនគួរឲ្យកត់សម្គាល់។ អស់រយៈពេលជាច្រើនថ្ងៃមកនេះ សីតុណ្ហភាពបានកើនឡើងដល់ពី ១០០ ទៅ ១២០ អង្សាហ្វារិនហៃ ចាប់ពីប្រទេសឥណ្ឌាទៅដល់ប្រទេសហ្វីលីពីន ខណៈកម្រិត៩០អង្សាហ្វារិនហៃ បានហក់ឡើង និងគ្របដណ្ដប់ដល់ភាគខាងជើងរបស់ប្រទេសជប៉ុន។ ប្រវត្តិវិទូអាកាសធាតុ លោក ម៉ាស៊ីមីលីអាណូ ហេរ៉េរ៉ា (Maximiliano Herrera)បានសរសេរនៅលើ Xថា កំណត់ត្រារាប់ពាន់កំពុងត្រូវបានប្រព្រឹត្តិយ៉ាងគ្រោះថ្នាក់ពាសពេញទ្វីបអាស៊ី ដែលជាព្រឹត្ដិការណ៍ដ៏ធ្ងន់ធ្ងរបំផុតក្នុងប្រវត្តិសាស្ត្រអាកាសធាតុពិភពលោក។ កម្ដៅដ៏ក្ដៅ បានរាលដាលពាសពេញតំបន់មួយនេះ កាលពីសប្តាហ៍មុន ហើយគេរំពឹងថានឹងបន្តរហូតដល់ដើមខែឧសភានេះ។នៅតំបន់ខ្លះ សីតុណ្ហភាពបានឡើងខ្ពស់ជាងធម្មតាចាប់តាំងពីខែមីនាមក។ទីក្រុងរណបម៉ានីល ដែលមានប្រជាជនជាង ១៤ លាននាក់នៅក្នុងប្រទេសហ្វីលីពីន បានកត់ត្រាសីតុណ្ហភាពខ្ពស់គ្រប់ពេលវេលាគឺ១០១,៨ អង្សាហ្វារិនហៃ ស្មើ ៣៨,៨ អង្សាសេ កាលពីចុងសប្ដាហ៍នេះ។គេក៏បានមើលឃើញផងដែរពីសីតុណ្ហភាពក្ដៅបំផុតនៅពេលយប់ក្នុងកំណត់ត្រាកាលពីថ្ងៃពុធសប្តាហ៍មុនក្នុងកម្រិត២៩,៨អង្សាសេ ខណៈប្រទេសនេះ បិទសាលារៀនក្រោយមនុស្ស៦នាក់ស្លាប់។ ប្រទេសថៃ កំពុងបន្តរងនូវរលកកម្តៅដ៏ធ្ងន់ធ្ងរ ដោយសីតុណ្ហភាពកើនឡើងដល់កម្រិតខ្ពស់បំផុត ក្នុងតំបន់មួយចំនួន ហើយអាជ្ញាធរ បានព្រមានពីអាកាសធាតុកាន់តែធ្ងន់ធ្ងរ នៅប៉ុន្មានថ្ងៃខាងមុខនេះ។ស្រុកជាង៣០នៅទូទាំងខេត្តចំនួន ៧៧របស់ប្រទេសថៃ បានមើលឃើញសីតុណ្ហភាពក្ដៅខ្លាំងក្នុងខែមេសា ជា ខែក្តៅបំផុតនៃឆ្នាំនេះ។នៅបង់ក្លាដែស វិញ មនុស្ស ៤០នាក់ បានស្លាប់ដោយសារជំងឺដាច់សរសៃឈាមខួរក្បាលបណ្តាលមករលកកម្តៅដែលអូសបន្លាយរយៈពេលជាងមួយខែ ខណៈមនុស្ស២នាក់ស្លាប់នៅឥណ្ឌា៕

អ្នកស្រុកនៅភាគខាងជើងអ៊ីស្រាអែល ត្រៀមខ្លួនសម្រាប់លទ្ធភាពសង្គ្រាមពេញទំហឹងជាមួយក្រុម ហេសបូឡា

លោក អេលី ហារ៉ែល (Eli Harel) គឺជាទាហានអ៊ីស្រាអែលមានអាយុជាង ៣០ឆ្នាំតិចតួច នៅពេលដែលលោកត្រូវបានបញ្ជូនទៅកាន់ប្រទេសលីបង់ ក្នុងឆ្នាំ ២០០៦ ដើម្បីប្រយុទ្ធនឹងអ្នកប្រយុទ្ធមកពីក្រុមហេសបូឡា (Hezbollah) ដែលគាំទ្រដោយអ៊ីរ៉ង់ នៅក្នុងសង្គ្រាមបង្ហូរឈាម ដែលភាគច្រើនអាចសន្និដ្ឋានបានរយៈពេលមួយខែ។ឥឡូវនេះ លោក ហារ៉ែល មានអាយុ ៥០ឆ្នាំ បានត្រៀមខ្លួនជាស្រេចក្នុងការចូលរួមបម្រើក្នុងកងទ័ពឡើងវិញ ដើម្បីប្រយុទ្ធប្រឆាំងនឹងក្រុមដូចគ្នា ប្រសិនបើការបាញ់ផ្លោងនៅតាមព្រំដែនភាគខាងជើងរបស់អ៊ីស្រាអែលក្លាយទៅជាសង្រ្គាមពេញទំហឹងជាមួយក្រុមតំណាងក្នុងតំបន់ដ៏មានឥទ្ធិពលបំផុតរបស់អ៊ីរ៉ង់។ លោកបាននិយាយថា លើកនេះ កងកម្លាំងអ៊ីស្រាអែល នឹងប្រឈមមុខនឹងលក្ខខណ្ឌប្រយុទ្ធដ៏លំបាកបំផុតមួយចំនួនដែលនឹកស្មានមិនដល់។លោកបានប្រាប់សារព័ត៌មានរ៉យទ័រថា៖«មានអន្ទាក់ដាក់បង្កប់នៅគ្រប់ទីកន្លែង» ។ «មនុស្ស កំពុងព្យាយាមចេញពីផ្លូវរូងក្រោមដី។ អ្នកត្រូវតែប្រុងប្រយ័ត្នជានិច្ច បើមិនដូច្នេះទេ អ្នកនឹងស្លាប់ជាមិនខាន»។លោក ហារ៉ែល រស់នៅក្នុងទីក្រុងហៃហ្វា (Haifa) ដែលជាទីក្រុងធំបំផុតទី៣ របស់អ៊ីស្រាអែល ដែលស្ថិតនៅចំពោះមុខអាវុធរបស់ក្រុមហេសបូឡា។ កាលពីពេលថ្មីៗនេះ អភិបាលក្រុងហៃហ្វា បានជំរុញឲ្យអ្នកស្រុក ស្តុកទុកស្បៀងអាហារ និងថ្នាំពេទ្យ ដោយសារតែហានិភ័យនៃសង្គ្រាមកាន់តែកើនឡើង។អ៊ីស្រាអែល និងក្រុមហេសបូឡា បានចូលរួមនៅក្នុងការកើនឡើងនៃការវាយប្រហារឆ្លងព្រំដែនប្រចាំថ្ងៃក្នុងរយៈពេល ៦ខែកន្លងមកនេះ ស្របជាមួយនឹងសង្រ្គាមនៅតំបន់ហ្កាហ្សា ហើយការកើនឡើងភាពតានតឹង និងការយកលេសផ្សេងៗរបស់ពួកគេ បានជំរុញឲ្យមានការភ័យខ្លាចនៃជម្លោះក្នុងតំបន់កាន់តែកាន់តែរាលដាលធំឡើង។ក្រុមហេសបូឡា បានប្រមូលអាវុធដ៏ច្រើនគួរឲ្យកត់សម្គាល់ ចាប់តាំងពីឆ្នាំ ២០០៦មកម្ល៉េះ។

ផ្ទុះភ្នំភ្លើងនៅឥណ្ឌូណេស៊ី បានបិទព្រលានយន្តហោះជាច្រើន ខណៈផេះបានទៅដល់ម៉ាឡេស៊ី

ក្រុមមន្ត្រី បាននិយាយនៅថ្ងៃពុធនេះថា ការផ្ទុះភ្នំភ្លើងនៅតំបន់ដាច់ស្រយាលរបស់ប្រទេសឥណ្ឌូនេស៊ីបានបង្ខំឱ្យអាកាសយានដ្ឋានជិត១០កន្លែងបានបិទ ដោយមានផេះហុយចូលទៅដល់ប្រទេសម៉ាឡេស៊ី ខណៈអាជ្ញាធរបានប្រញាប់ប្រញាល់ជម្លៀសមនុស្សរាប់ពាន់នាក់ចេញ ដោយសារតែការភ័យខ្លាច រលកយក្សស៊ូណាមិ។ភ្នំភ្លើង រូអាង(Ruang) បានផ្ទុះឡើងបីដងកាលពីថ្ងៃអង្គារ ដោយបានបញ្ចេញកម្អែភ្នំភ្លើង និងផេះហុយឡើងកម្ពស់ជាង៥គីឡូម៉ែត្រទៅលើអាកាស ហើយកំពុងបង្ខំឱ្យអាជ្ញាធរចេញបទបញ្ជាជម្លៀសប្រជាជនចំនួន ១២.០០០នាក់។ នាវាសង្គ្រោះ និងនានាចម្បាំងមួយគ្រឿង ត្រូវបានបញ្ជូនទៅ ដើម្បីជួយជម្លៀសប្រជាជនរាប់ពាន់នាក់ពីកោះ តាងហ្គូឡានដាង(Tagulandang) ដោយសារតែ ការព្រមាននៅផ្នែកមួយចំនួននៃភ្នំភ្លើងអាចធ្លាក់ចូលទៅក្នុងសមុទ្រ ដែលអាចបង្កឱ្យមានរលកយក្សស៊ូណាមិ។លោកស្រី Rosalin Salindeho អាយុ ៩៥ឆ្នាំជាពលរដ្ឋកោះ Tagulandang នៃខេត្ត Sulawesi ខាងជើងរបស់ប្រទេសឥណ្ឌូនេស៊ី បាននិយាយអំពីការភ័យខ្លាចរបស់លោកស្រី នៅពេលដែលភ្នំភ្លើង រូអាង(Ruang) ផ្ទុះបន្ទាប់ពីលោកស្រីមកដល់កោះ ស៊ីអាវ(Siau)។ លោកស្រីនិយាយថា ភ្នំភ្លើងបានផ្ទុះឡើង វាគួឲ្យខ្លាច មានដុំថ្មធ្លាក់មកដូចទឹកភ្លៀង។ ទីភ្នាក់ងារឧតុនិយមរបស់ប្រទេស បានចែករំលែកផែនទី នៅព្រឹកថ្ងៃពុធនេះ ដែលបង្ហាញថា ផេះភ្នំភ្លើងបានហុយចូលទៅដល់ភាគខាងកើតប្រទេសម៉ាឡេស៊ី នៅលើកោះ Borneo ដែលប្រទេសនេះនៅជាប់ជាមួយប្រទេសឥណ្ឌូនេស៊ី និងប្រទេសប្រ៊ុយណេ។ យោងតាមការជូនដំណឹងពីក្រុមហ៊ុនអាកាសចរណ៍ AirNav Indonesia ដែលគ្រប់គ្រងដោយរដ្ឋ បានរាយការណ៍ថា ការរាលដាលនៃផេះភ្នំភ្លើង បានបង្ខំឱ្យព្រលានយន្តហោះចំនួន៧កន្លែងត្រូវបិទ ជាអាកាសយានដ្ឋានធំបំផុត នៅទីក្រុង Manado និងទីក្រុង Gorontal។

ក្នុងពេលមានសង្រ្គាមនៅស៊ូដង់ មនុស្សជាច្រើនទទួលទានស្លឹកឈើ និងសត្វឆ្មាដើម្បីរស់

ខណៈភាពអត់ឃ្លាន បានកើតមានក្នុងពេលមានសង្រ្គាមរ៉ាំរ៉ៃនៅប្រទេសស៊ូដង់ គ្រួសាររបស់នាង Lina Mohammed Hassan បានស្វែងរកវិធីដើម្បីរស់រានមានជីវិត។ កូនៗរបស់នាងកំពុងដើបេះស្លឹកឈើ និងទទួលទាន។ នាង Hassan និយាយថា បងប្អូនជីដូនមួយរបស់នាង បានដើរបេះស្លឹកឈើមកចម្អិនជាអាហារ ហើយទទួលទាន ព្រោះយើងមិនដឹងថា តើយើងនឹងមានអាហារសម្រាប់ពេលព្រឹកឬទេ។បណ្តាញប្រព័ន្ធព្រមានពីគ្រោះទុរភិក្ស ជាបណ្តាញរបស់អាជ្ញាធរសាកលទទួលបន្ទុកអសន្តិសុខស្បៀង បានរាយការណ៍កាលពីខែមីនាថា តំបន់ទីក្រុង Khartoum ស្ថិតក្នុងហានិភ័យនៃគ្រោះទុរភិក្ស ហើយវាមិនត្រឹមតែរដ្ឋធានីមួយនេះប៉ុណ្ណោះទេ។ដោយមានជម្លោះរវាងកងទ័ពស៊ូដង់ និងកងកម្លាំងគាំទ្ររហ័ស(RSF) វាបានបង្ហាញថា គ្មានសញ្ញានៃភាពធូរស្រាលឡើយ ខណៈភាពអត់ឃ្លាន និងគ្រោះទុរ្ភិក្សកំពុងរាលដាលពាសពេញប្រទេស។នៅជំរំជនភៀសខ្លួនមួយចំនួននៅទីក្រុង North Darfur ប្រជាជន គ្រូពេទ្យ និងបុគ្គលិកជំនួយ បាននិយាយថា មនុស្សជាច្រើនបានងាកទៅរកការទទួលទានស្លឹកឈើហើយនៅពេលនេះ។ មន្ត្រីជំនួយមួយចំនួន បានចោទប្រកាន់កងកម្លាំងគាំទ្ររហ័ស(RSF) ថាបានលួចជំនួយមនុស្សធម៌ ហើយកងទ័ពស៊ូដង់ បានរារាំងជំនួយមិនឱ្យទៅដល់អ្នកទាំងឡាយដែលត្រូវការច្រើនបំផុត។ ប៉ុន្តែភាគីទាំងពីរពុំបានឆ្លើយតបទៅនឹងសំណួរលម្អិតសម្រាប់របាយការណ៍នេះទេ។ រដ្ឋាភិបាលដែលដឹកនាំដោយយោធា បាននិយាយថា ខ្លួនប្តេជ្ញាចិត្តដើម្បីដឹកជញ្ជូនជំនួយ។

នគរបាលញូវយ៉ក សម្រុកចូលសាកលវិទ្យាល័យ Columbia ខណៈបាតុកម្មគាំទ្រប៉ាឡេស្ទីនកាន់តែតានតឹង

មន្ត្រីនគរបាលនៅទីក្រុងញូវយ៉ក (New York) បានសម្រុកចូលបរិវេណសាកលវិទ្យាល័យ កូឡំប៊ី (Columbia) នៅក្នុងសហរដ្ឋអាមេរិក កាលពីយប់ថ្ងៃអង្គារ (៣០ មេសា) ក្នុងកិច្ចខិតខំប្រឹងប្រែងជាក់ស្តែងមួយដើម្បីបំបែកក្រុមបាតុករគាំទ្រប៉ាឡេស្ទីន ដែលបានកាន់កាប់អគារបរិវេណសាលា បន្ទាប់ពីការប្រឈមមុខដាក់គ្នាជិតពីរសប្តាហ៍ជាគណៈគ្រប់គ្រងគ្រប់គ្រងរបស់សាកលវិទ្យាល័យដ៏ល្បីមួយនេះ។វីដេអូពីការផ្សាយផ្ទាល់បានបង្ហាញនគរបាលសម្រុកចូលទៅក្នុងបរិវេណសាលាដែលស្ថិតនៅតំបន់ ម៉ែនហាតថាន (Manhattan) និងជាចំណុចស្នូលនៃការតវ៉ារបស់និស្សិត ដែលបានរីករាលដាលដល់សាលារៀនរាប់សិបកន្លែងផ្សេងទៀតនៅទូទាំងសហរដ្ឋអាមេរិក ដោយបង្ហាញពីការប្រឆាំងទៅនឹងសង្គ្រាមរបស់អ៊ីស្រាអែល នៅតំបន់ហ្កាហ្សា។នគរបាលជាច្រើនត្រូវបានគេមើលឃើញឡើងចូលទៅក្នុងអគារតាមបង្អួចជាន់ទី២ ដោយប្រើយានជំនិះដែលភ្ជាប់ជណ្ដើរដើម្បីចូលទៅខាងក្នុងទីតាំងសាកលវិទ្យាល័យ។ការកាន់កាប់អគារដោយក្រុមបាតុករនេះបានចាប់ផ្តើមនៅពេលយប់ ខណៈក្រុមអ្នកតវ៉ាបានវាយបំបែកបង្អួច សម្រុកចូលខាងក្នុងអគារ ហើយបានបង្ហាញបដាដែលសរសេរថា «សាលហីន» (Hind's Hall) ដែលជានិមិត្តរូបនៃការប្តូរឈ្មោះអគារនេះដាក់តាមឈ្មោះកុមារជនជាតិប៉ាឡេស្ទីនអាយុ ៦ឆ្នាំម្នាក់ ឈ្មោះថា ហីន រ៉ាចាប (Hind Rajab) ដែលត្រូវបានសម្លាប់នៅហ្កាហ្សា ដោយយោធាអ៊ីស្រាអែល៕

និស្សិតប៉ាឡេស្ទីន គប់ដុំថ្មលើរថយន្តអ្នកការទូត EU នៅតំបន់ West Bank ជាការតវ៉ាជុំវិញសង្គ្រាម

និស្សិតប៉ាឡេស្ទីន មួយក្រុមបានបង្អាក់កិច្ចប្រជុំអ្នកការទូតសហភាពអឺរ៉ុប (EU) នៅតំបន់ វេសបែង (West Bank) កាលពីថ្ងៃអង្គារ (៣០ មេសា) ហើយបានគប់ដុំថ្មលើរថយន្តរបស់ពួកគេ ដោយបានវាយកម្ទេចកញ្ចក់ខាងក្រោយនៃរថយន្តមួយគ្រឿងក្នុងចំណោមនោះ ដើម្បីតវ៉ាប្រឆាំងនឹងសង្រ្គាមនៅហ្កាហ្សា នេះបើយោងតាមសាក្សីដែលឃើញហេតុការណ៍។ក្រុមអ្នកការទូតសហភាពអឺរ៉ុប ប្រចាំតំបន់ប៉ាឡេស្ទីនដែលកាន់កាប់ដោយអ៊ីស្រាអែលមួយនេះបានកំពុងបើកកិច្ចប្រជុំនៅសារមន្ទីរប៉ាឡេស្ទីន ដែលប្រារព្ធពិធីប្រវត្តិសាស្ត្រ និងវប្បធម៌ប៉ាឡេស្ទីននៅទីក្រុង ប៊ឺហ៊្សេត (Birzeit) ជិតក្រុង រ៉ាម៉ាឡា (Ramallah) នៅពេលដែលឧបទ្ទវហេតុបានកើតឡើង។អ្នកការទូតម្នាក់បានប្រាប់សារព័ត៌មានរ៉យទ័រ ថាពួកគេកំពុងនៅក្នុងកិច្ចប្រជុំមួយ នៅពេលដែលហ្វូងមនុស្សបានបង្ហាញខ្លួននៅខាងក្រៅស្រែកឱ្យពួកគេចាកចេញ ហើយបន្ទាប់ពីការព្យាយាមចរចាមិនបានសម្រេច អ្នកការទូតក៏បានចាកចេញ។ លោកបានបន្តថា បទពិសោធន៍នេះតានតឹងខ្លាំងណាស់ ប៉ុន្តែមិនមានការគំរាមកំហែងធ្ងន់ធ្ងរដល់មន្ត្រីការទូតណាម្នាក់ឡើយ។និស្សិតម្នាក់មកពីសាកលវិទ្យាល័យក្រុង ប៊ឺហ៊្សេត ដែលចូលរួមក្នុងការតវ៉ានោះបាននិយាយថា ពួកគេបានបង្ខំអ្នកការទូតសហភាពអឺរ៉ុបឱ្យចាកចេញដើម្បីផ្ញើសារប្រាប់ពិភពលោកថា «នរណាម្នាក់ដែលជាប់ពាក់ព័ន្ធក្នុងអំពើប្រល័យពូជសាសន៍ និងការវាយលុកលើតំបន់ហ្កាហ្សា» មិនត្រូវបានស្វាគមន៍ឡើយ៕

បណ្ដាញសង្គម

ព័ត៌មានថ្មីៗ

ISI ឈ្នះឡាយហ្វលើកដំបូង ខណៈកងយោធពលខេមរភូមិន្ទ បន្ដចាញ់គិរីវង់

លោក Trump៖ មេដឹកនាំ ៤៨ នាក់ត្រូវបានសម្លាប់ក្នុងការវាយប្រហារលើអ៊ីរ៉ង់ ហើយមេដឹកនាំថ្មីមានបំណងចរចា

ព្រះខ័នរាជស្វាយរៀងនាំមុខ៧ពិន្ទុ ក្រោយឈ្នះអឹមអូអាយ និងភ្នំពេញក្រោនស្មើអង្គរថាយហ្គឺរ

ការស្លាប់របស់មេដឹកនាំកំពូល Khamenei នាំមកនូវអារម្មណ៍ត្រេកអរផង និងសោកសៅផងនៅអ៊ីរ៉ង់

ប្រភព៖ មន្ត្រីអាមេរិក សង្ស័យចំពោះការផ្លាស់ប្តូររបបនៅអ៊ីរ៉ង់ បន្ទាប់ពីការសម្លាប់លោក Khamenei

ការផ្ទុះនៅរោងចក្រផលិតគ្រឿងផ្ទុះនៅប្រទេសឥណ្ឌា បណ្តាលឲ្យមនុស្សច្រើននាក់ស្លាប់

តម្លៃប្រេងហក់ឡើង ខណៈជម្លោះរវាងអាមេរិក និងអ៊ីរ៉ង់ កាន់តែរីកធំ រំខានដល់ការដឹកជញ្ជូន

អាមេរិក ប្រកាសពីការស្លាប់ដំបូងក្នុងសង្គ្រាមអ៊ីរ៉ង់ ខណៈការស្ទង់មតិជាបញ្ហាប្រឈមចំពោះលោក Trump

[UPDATE] អ្នកស្លាប់ក្នុងការប៉ះទង្គិចគ្នាពេលក្រុមបាតុករព្យាយាមសម្រុកចូលស្ថានកុងស៊ុលអាមេរិកនៅប៉ាគីស្ថានជុំវិញបញ្ហាអ៊ីរ៉ង់ឡើងដល់ជាង២០នាក់

អង់គ្លេស៖ អាមេរិកអាចប្រើប្រាស់មូលដ្ឋានទ័ពរបស់ខ្លួនដើម្បីវាយប្រហារការពារប្រឆាំងមីស៊ីលអ៊ីរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877