BTV NEWS

ពលរដ្ឋបន្តសាទរកិច្ចប្រឹងប្រែងរបស់រដ្ឋាភិបាលបោសសម្អាត Online Scams ដើម្បីស្ដារមុខមាត់កម្ពុជា

សាធារណជនគាំទ្រគំនិតផ្ដួចផ្ដើមរបស់សម្តេចធិបតីឱ្យបញ្ជូនក្រុមក្មេងទំនើងទៅជួយការងារសមរភូមិមុខ

បង្រ្កាបអគារប្រព្រឹត្តបទល្មើស Online Scams នៅទីតាំង ១កន្លែង ក្នុងក្រុងប៉ោយប៉ែត ឃាត់ខ្លួនមនុស្សប្រមាណ ៣០០នាក់

កម្លាំងគណៈបញ្ជាការឯកភាពរាជធានី បន្តប្រតិបត្តិការឆ្មក់ចុះបង្ក្រាប Online Scams នៅខណ្ឌ៧មករា ឃាត់ជនបរទេស៤០នាក់

សន្តិសុខ និង សង្គម

នាយករដ្ឋមន្ត្រីអូស្ត្រាលី ពណ៌នាអំពើហិង្សាក្នុងគ្រួសារថា ជាវិបត្តិជាតិ បន្ទាប់ពីមានការតវ៉ា

នាយករដ្ឋមន្ត្រីអូស្ត្រាលី លោកAnthony Albanese នៅថ្ងៃចន្ទនេះ បានពណ៌នាអំពីអំពើហិង្សាក្នុងគ្រួសារថា ជា «វិបត្តិជាតិ» បន្ទាប់ពីមនុស្សរាប់ពាន់នាក់ បានប្រមូលផ្តុំគ្នានៅជុំវិញប្រទេសប្រឆាំងនឹងអំពើហិង្សាលើស្ត្រី។មនុស្សរាប់ពាន់នាក់ បានតវ៉ានៅក្នុងទីក្រុងនានាជុំវិញប្រទេសអូស្ត្រាលីកាលពីថ្ងៃអាទិត្យ ដើម្បីទាក់ទាញការយកចិត្តទុកដាក់ចំពោះការស្លាប់របស់ស្ត្រី ២៧នាក់ រហូតមកដល់ពេលនេះ ដែលត្រូវបានចោទប្រកាន់ថា បណ្តាលមកពីអំពើហិង្សាផ្អែកលើយេនឌ័រ នៅក្នុងប្រទេសដែលមានប្រជាជនចំនួន ២៧លាននាក់។លោក Albanese បាននិយាយនៅថ្ងៃចន្ទនេះថា ការប្រមូលផ្តុំគ្នានេះ គឺជាការអំពាវនាវឲ្យមានសកម្មភាពសម្រាប់រដ្ឋាភិបាលអូស្ត្រាលីគ្រប់លំដាប់ថ្នាក់ឲ្យធ្វើបន្ថែមទៀត ដើម្បីទប់ស្កាត់អំពើហិង្សាផ្អែកលើយេនឌ័រ។លោក Albanese បានថ្លែងប្រាប់ទូរទស្សន៍ Nine Networkថា៖«ជាការច្បាស់ណាស់ យើងត្រូវធ្វើបន្ថែមទៀត។ វាមិនគ្រប់គ្រាន់ទេ ដើម្បីគ្រាន់តែទទួលបានការយោគយល់នោះ»។លោកបានបន្ថែមថា៖«ការពិត…ដែលជាមធ្យម រៀងរាល់៤ថ្ងៃ ស្ត្រីម្នាក់ បានស្លាប់នៅក្នុងដៃរបស់ដៃគូម្នាក់ គឺជាវិបត្តិជាតិ»។មានការប្រមូលផ្តុំចំនួន ១៧កន្លែង ត្រូវបានធ្វើឡើងនៅទូទាំងប្រទេសអូស្ត្រាលីកាលពីចុងសប្តាហ៍ ដោយមានមនុស្សប្រមាណ ១៥.០០០នាក់ បានធ្វើបាតុកម្ម នៅក្នុងទីក្រុងម៉ែលប៊ន។លោក Albanese បាននិយាយថា លោកនឹងធ្វើជាម្ចាស់ផ្ទះកិច្ចប្រជុំមួយ ឬក្រុមមេដឹកនាំរដ្ឋ និងដែនដី អូស្ត្រាលី នៅថ្ងៃពុធ ដើម្បីពិភាក្សាអំពីការសម្របសម្រួលឆ្លើយតបចំពោះបញ្ហានះ។

កងទ័ពអង់គ្លេស អាចនឹងមានភារកិច្ចក្នុងការផ្តល់ជំនួយ ទៅកាន់តំបន់ហ្កាហ្សា

សារព័ត៌មាន BBC បានរាយការណ៍កាលពីថ្ងៃសៅរ៍ថា កងទ័ពអង់គ្លេស អាចនឹងមានភារកិច្ចក្នុងការផ្តល់ជំនួយទៅកាន់តំបន់ហ្កាហ្សាពីកំពង់ផែឈូងសមុទ្រដែលឥឡូវនេះកំពុងត្រូវបានសាងសង់ដោយយោធាសហរដ្ឋអាមេរិក។ មន្ត្រីរដ្ឋាភិបាលចក្រភពអង់គ្លេស បានបដិសេធមិនធ្វើអត្ថាធិប្បាយលើរបាយការណ៍នេះ។សារព័ត៌មាន BBC បានរាយការណ៍ ដោយដកស្រង់ប្រភពរដ្ឋាភិបាលដែលមិនស្គាល់អត្តសញ្ញាណថា រដ្ឋាភិបាលអង់គ្លេស កំពុងពិចារណាអំពីការដាក់ពង្រាយទាហាន ដើម្បីបើករថយន្តដឹកទំនិញ ដែលនឹងដឹកជំនួយពីកំពង់ផែតាមបណ្តោយផ្លូវបណ្តែតទឹក ទៅលើគោក។ គ្មានការសម្រេចចិត្តណាមួយ ត្រូវបានធ្វើឡើងទេ ហើយសំណើនេះ មិនទាន់ទៅដល់លោកនាយករដ្ឋមន្ត្រី រីស៊ី ស៊ុណាក់ (Rishi Sunak) នៅឡើយទេ។ របាយការណ៍នេះ កើតឡើង បន្ទាប់ពីមន្ត្រីយោធាជាន់ខ្ពស់អាមេរិកម្នាក់ បាននិយាយកាលពីថ្ងៃព្រហស្បតិ៍ថា នឹងមានវត្តមានទាហានអាមេរិកនៅទីនោះទេ ហើយប្រទេសមួយផ្សេងទៀត នឹងផ្តល់បុគ្គលិក ដើម្បីបើករថយន្តដឹកជញ្ជូនជំនួយ ទៅកាន់ច្រាំង។ មន្ត្រីដែលបាននិយាយជាមួយអ្នកសារព័ត៌មានក្នុងលក្ខខណ្ឌមិនបញ្ចេញឈ្មោះ ដើម្បីពិភាក្សាលម្អិតដែលមិនទាន់បានប្រកាសជាសាធារណៈនោះ បានបដិសេធមិនបង្ហាញអត្តសញ្ញាណភាគីទីបី។ចក្រភពអង់គ្លេស កំពុងផ្តល់ការគាំទ្រផ្នែកភ័ស្តុភាររួចហើយសម្រាប់ការសាងសង់ផែនេះ រួមទាំងនាវា Royal Navy ដែលនឹងផ្ទុកទាហាន និងនាវិកអាមេរិករាប់រយនាក់ ដែលកំពុងធ្វើការលើគម្រោងនេះ។ក្រសួងការពារជាតិអង់គ្លេស បាននិយាយកាលពីថ្ងៃសុក្រថា លើសពីនេះទៅទៀត អ្នករៀបចំផែនការយោធារបស់អង់គ្លេស ត្រូវបានដាក់បញ្ចូលនៅក្នុងទីបញ្ជាការកណ្តាលរបស់សហរដ្ឋអាមេរិក ក្នុងរដ្ឋហ្វ្លរីដា និងនៅប្រទេសកោះស៊ីប ជាកន្លែងដែលជំនួយនឹងត្រូវបានត្រួតពិនិត្យ មុនពេលដឹកជញ្ជូនទៅកាន់តំបន់ហ្កាហ្សាអស់រយៈពេលជាច្រើនសប្តាហ៍។

ក្រុមអ្នកតវ៉ា ដុតរូបថតមេដឹកនាំ G7 មុនជំនួបរដ្ឋមន្ត្រីក្រសួងថាមពល នៅក្នុងប្រទេសអ៊ីសតាលី

ក្រុមអ្នកតវ៉ា បានដុតរូបថតមេដឹកនាំប្រទេស G7 និងបានស្រែកថា ពួកគេទាំង៧ យើង៩៩% "Them 7, us 99%" អំឡុងការតវ៉ាជិតទីក្រុងទូរីន(Turin) របស់ប្រទេសអ៊ីតាលី កាលពីថ្ងៃអាទិត្យ២៨មេសា។ ក្រុមអ្នកតវ៉ា នៅក្នុងទីក្រុង ឡា វ៉េណារីយ៉ា រៀល (La Venaria Reale) បានប្រមូលផ្ដុំគ្នា មុនជំនួប ថ្នាក់រដ្ឋមន្ត្រីក្រសួងថាមពល របស់ក្រុមប្រទេសសមាជិកចំនួន ៧ប្រទេសឬ G7 ។ជាមួយគ្នានោះ មានសេចក្ដីរាយការណ៍ពីការបិទផ្លូវភាគខាងជើងទីក្រុង ទូរីន។ ជំនួបរដ្ឋមន្ត្រីប្រទេស G7 ស្ដីពីអាកាសធាតុ ថាមពល និង បរិស្ថាន នឹងកើតឡើងនៅថ្ងៃចន្ទទី២៩មេសា ដល់ថ្ងៃអង្គារទី៣០មេសាសប្ដាហ៍នេះ នៅក្នុងទីក្រុងទូរីន ។ ប្រភពពីការទូតមួយចំនួន និង ប្រធានកិច្ចប្រជុំរដ្ឋមន្ត្រីថាមពលទាំង៧ នៅក្នុងទីក្រុង ទូរីន បានឲ្យដឹងថា ប្រទេសអ៊ីតាលី ធ្វើជាម្ចាស់ផ្ទះជំនួបប្ដូរវេនប្រទេស G7 នៅឆ្នាំនេះ ។ ប្រទេសនេះ កំពុងរុញសម្រាប់កិច្ចព្រមព្រៀងមួយក្នុងចំណោមប្រទេសមានទ្រព្យសម្បត្តិស្ដុកស្ដម្ភទាំង៧ ដើម្បីកំណត់កាលបរិច្ឆេទសម្រាប់ការបញ្ឈប់ការដុតធ្យូងថ្មក្នុងជំនាន់ឧស្សាហកម្មទំនើប ។ ថាមពលនុយក្លេអ៊ែរ គឺជាបញ្ហាដ៏ចម្រូងចម្រាសបំផុត នៅក្នុងប្រទេសអ៊ីតាលី ជាទីដែលរោងចក្រថាមពលនុយក្លេអ៊ែរ នានា ត្រូវបាមហាមប្រាម បន្ទាប់ពីប្រទេសអ៊ីតាលី បានបោះឆ្នោតប្រជាមតិឆ្នាំ២០១១ ប្រឆាំងនឹងច្បាប់ មួយសម្រាប់កម្មវិធីនុយក្លេអ៊ែររបស់ប្រទេសនេះ ៕

អាហ្រ្វិកខាងត្បូង ដាក់វិធានការសន្តិសុខសម្រាប់ការបោះឆ្នោតនៅខែក្រោយ

រដ្ឋាភិបាលប្រទេសអាហ្រ្វិកខាងត្បូង កាលពីថ្ងៃអាទិត្យ បានធានាដល់ពលរដ្ឋរបស់ខ្លួនថា ការបោះឆ្នោតថ្នាក់ជាតិ និងថ្នាក់ខេត្ត នៅខែក្រោយ នឹងត្រូវធ្វើឡើងក្នុងបរិយាកាសសុវត្ថិភាព និងការធានាសន្តិខុស ដោយមានរយៈពេលតែមួយខែប៉ុណ្ណោះ ដែលអ្នកបោះឆ្នោតអាហ្រ្វិកខាងត្បូងទៅបោះឆ្នោត។ រដ្ឋមន្ត្រីក្រសួងការពារជាតិ និងអតីតយុទ្ធជនយោធា លោក ថានឌី ម៉ូឌីស (Thandi Modise) បាននិយាយនៅក្នុងទីក្រុង ប្រេតូរីយ៉ា (Pretoria) ភាគខាងត្បូងថា ក្នុងនាមរដ្ឋាភិបាល យើងចេញការព្រមានយ៉ាងម៉ឺងម៉ាត់ចំពោះនរណាម្នាក់ដែលមានបំណងរំខានដល់ការបោះឆ្នោត ដែលមន្ត្រីអនុវត្តច្បាប់នឹងដោះស្រាយជាមួយពួកគេ ហើយនឹងឃុំខ្លួនពួកគេ។ លោក Modise បាននិយាយថា ពួកគេនឹងពឹងផ្អែកលើការធ្វើផែនការ និងប្រតិបត្តិការ ដែលដឹកនាំដោយមានការសម្របសម្រួល និងស៊ើបការណ៍មុន អំឡុងពេលនិងក្រោយការបោះឆ្នោត។ យើងបានដាក់វិធានការណ៍នៅនឹងកន្លែងដើម្បីការពារសម្ភារៈសាធារណៈទាំងអស់ ដែលនឹងប្រើប្រាស់សម្រាប់ការបោះឆ្នោត រួមទាំងចំណុចសំខាន់ៗរបស់ប្រទេស និងហេដ្ឋារចនាសម្ព័ន្ធសំខាន់ៗផ្សេងទៀត ដែលអាចជាគោលដៅរបស់ឧក្រិដ្ឋជន។ ជនណាក៏ដោយដែលរំខាន ឬបំផ្លាញ ហេដ្ឋារចនាសម្ព័ន្ធសំខាន់ៗមានពិរុទ្ធភាពពីបទល្មើសព្រហ្មទណ្ឌ ហើយអាចជាប់ពន្ធនាការអតិបរមា ៣០ឆ្នាំ ប្រសិនបើរកឃើញថាមានទោស។លោក Modise ជាអ្នកដែលបានព្រមានសាធារណជនប្រឆាំងការផ្សព្វផ្សាយព័ត៌មានមិនពិត ពាក្យចចាមអារ៉ាម និងការគម្រាមកំហែងនានា បាននិយាយថា រដ្ឋអាជ្ញាក៍បានត្រៀមខ្លួន ក្នុងការកាត់ទោសបទល្មើសនានា ដូចជាការក្លែងបន្លំសន្លឹកឆ្នោត និងអំពើពុករលួយ ការជ្រៀតជ្រែកកិច្ចការរបស់មន្ត្រីបោះឆ្នោត និងការបង្ខំនរណាម្នាក់ឱ្យបោះឆ្នោត។លោករដ្ឋមន្ត្រី និយាយថា ផែនការសន្តិសុខនឹងត្រូវបានត្រួតពិនិត្យជាប់ជានិច្ច ខណៈស្ថានភាពប្រែប្រួល ហើយនឹងសម្រួលទៅតាមភាពចាំបាច់។យោងតាមស្ថាប័នគ្រប់គ្រងការបោះឆ្នោតរបស់ប្រទេសអាហ្រ្វិកខាងត្បូង បានឲ្យដឹងថា ការបោះឆ្នោតឆ្នាំ២០២៤ ត្រូវបានគេរំពឹងថានឹងមានការប្រកួតប្រជែងបំផុតក្នុងប្រវត្តិសាស្ត្ររបស់ប្រទេស ដោយមានបេក្ខជនជាង ១៤.០០០នាក់ ចូលរួមប្រកួតប្រជែងដណ្តើមយកអាសនៈចំនួន ៨៨៧ នៅក្នុងសភាជាតិ និងថ្នាក់ខេត្ត។ ប្រទេសអាហ្រ្វិកខាងត្បូង នឹងរៀបចំការបោះឆ្នោតជាតិ និងរដ្ឋាភិបាលតំបន់ នៅថ្ងៃទី ២៩ ខែឧសភា។

ប៉ាឡេស្ទីន៖ មានតែអាមេរិក ទេអាចបញ្ឈប់ការវាយលុកជើងគោកដែលជិតមកដល់លើក្រុង រ៉ាហ្វា បាន

ប្រធានអាជ្ញាធរប៉ាឡេស្ទីន លោក ម៉ាសឃ្មូត អាបាស (Mahmoud Abbas) បាននិយាយកាលពីថ្ងៃអាទិត្យ (២៨ មេសា) ថាមានតែសហរដ្ឋអាមេរិក ប៉ុណ្ណោះដែលអាចបញ្ឈប់អ៊ីស្រាអែល មិនឱ្យបើកប្រតិបត្តិការជើងគោកលើទីក្រុងព្រំដែន រ៉ាហ្វា (Rafah) ក្នុងតំបន់ហ្កហ្សាបាន ដោយបន្ថែមថា ការវាយប្រហារដែលលោករំពឹងថានឹងកើតឡើងក្នុងរយៈពេលប៉ុន្មានថ្ងៃខាងមុខនេះ អាចបង្ខំប្រជាជនប៉ាឡេស្ទីន ភាគច្រើនឱ្យរត់ភៀសខ្លួនចេញពីតំបន់ហ៊ុមព័ទ្ធនេះ។លោក អាបាស បានប្រាប់កិច្ចប្រជុំពិសេសនៃវេទិកាសេដ្ឋកិច្ចពិភពលោក ក្នុងរដ្ឋធានីរ៉ាយ៉ាដ របស់អារ៉ាប៊ីសាអ៊ូឌីត ថា «យើងអំពាវនាវឱ្យសហរដ្ឋអាមេរិក ស្នើឱ្យអ៊ីស្រាអែល កុំបន្តការវាយប្រហារក្រុងរ៉ាហ្វា»។អ៊ីស្រាអែល ដែលបានគំរាមកំហែងអស់ជាច្រើនសប្តាហ៍ក្នុងការបើកការវាយលុកថ្មើជើងទ្រង់ទ្រាយធំចុងក្រោយលើក្រុងរ៉ាហ្វា ដោយនិយាយថាគោលដៅរបស់ខ្លួនគឺដើម្បីបំផ្លាញកងវរសេនាតូចដែលនៅសេសសល់របស់ក្រុមហាម៉ាសនៅទីនោះ បានបង្កើនការវាយប្រហារតាមអាកាសយ៉ាងខ្លាំងក្លាលើក្រុងព្រំដែននេះកាលពីសប្តាហ៍មុន។បណ្តាប្រទេសលោកខាងលិច រួមទាំងសម្ព័ន្ធមិត្តជិតស្និទ្ធបំផុតរបស់អ៊ីស្រាអែល គឺសហរដ្ឋអាមេរិក បានទទូចកុំឱ្យវាយប្រហារជើងគោកលើទីក្រុងភាគខាងត្បូង រ៉ាហ្វា ដែលជាប់ព្រំដែនអេហ្ស៊ីប និងកំពុងផ្តល់ជម្រកដល់ជនជាតិប៉ាឡេស្ទីនជាងមួយលាននាក់ ដែលបានភៀសខ្លួនចេញពីការវាយប្រហាររយៈពេលប្រាំពីរខែរបស់អ៊ីស្រាអែល លើផ្នែកភាគច្រើនទៀតរបស់តំបន់ហ្កាហ្សា៕

មន្ត្រីយោធាជាន់ខ្ពស់របស់អ៊ីស្រាអែល អនុម័តផែនការបន្តសង្គ្រាមនៅតំបន់ហ្កាហ្សា

យោធាប្រទេសអ៊ីស្រាអែល និយាយថា មន្ត្រីជាន់ខ្ពស់របស់ខ្លួន បានអនុម័តផែនការសម្រាប់ការបន្តសង្រ្គាមនៅតំបន់ហ្កាហ្សាស្ទ្រីប។ ចំណាត់ការនេះ ត្រូវបានគេជឿថា ជាផ្នែកមួយនៃការត្រៀមខ្លួនរៀបចំសម្រាប់ការវាយលុកតាមជើងគោកចូលទៅក្នុងទីក្រុង Rafah ភាគខាងត្បូង។ យោធា បាននិយាយកាលពីថ្ងៃអាទិត្យថា មេបញ្ជាការកងកម្លាំងការពារជាតិអ៊ីស្រាអែល លោកឧត្តមសេនីយ៍ ហឺហ្សី ហាឡេវី(Herzi Halevi) បានព្រមព្រៀងលើផែនការនេះ។ បច្ចុប្បន្នទីក្រុង Rafah គឺជាកន្លែងស្នាក់នៅរបស់មនុស្សប្រហែល ១,២ លាននាក់ រួមទាំងអ្នកជម្លៀសខ្លួន ចេញពីតំបន់ផ្សេងៗនៅតំបន់ហ្កាហ្សា។ ប៉ុន្តែរដ្ឋមន្ត្រីការបរទេសអ៊ីស្រាអែល លោក Israel Katz បានប្រាប់ស្ថានីយទូរទស្សន៍ក្នុងស្រុកថា រដ្ឋាភិបាលនឹងផ្អាកប្រតិបត្តិការ ប្រសិនបើខ្លួនឈានដល់កិច្ចព្រមព្រៀង ជាមួយក្រុមហាម៉ាស។អ៊ីស្រាអែល និងក្រុមហាម៉ាស បានចូលរួមក្នុងការចរចាដោយប្រយោលស្តីពីការផ្អាកការប្រយុទ្ធគ្នា និងការដោះលែងចំណាប់ខ្មាំង ដែលត្រូវបានឃុំខ្លួននៅតំបន់ហ្កាហ្សា។ ប្រព័ន្ធផ្សព្វផ្សាយនៅមជ្ឈិមបូព៌ា រាយការណ៍ថា គណៈប្រតិភូរបស់ក្រុមហាម៉ាស នឹងធ្វើទស្សនកិច្ចនៅកាន់ប្រទេសអេហ្ស៊ីបនៅព្រឹកថ្ងៃចន្ទនេះ ដើម្បីពិភាក្សាអំពីសំណើថ្មីពីអ៊ីស្រាអែល។ គេហទំព័រព័ត៌មានសហរដ្ឋអាមេរិក អាស៊ីអូស(Axios) រាយការណ៍ថា សំណើនេះ ជាលើកទីមួយហើយ ដែលអ៊ីស្រាអែលបានស្នើឱ្យមេដឹកនាំរបស់ខ្លួនបើកចំហដើម្បីពិភាក្សាអំពីការបញ្ចប់ជម្លោះនៅតំបន់ហ្កាហ្សា ជាផ្នែកនៃកិច្ចព្រមព្រៀងចំណាប់ខ្មាំង។ ក្រុមហាម៉ាស បាននឹងកំពុងទាមទារឱ្យមានបទឈប់បាញ់ជាបន្តបន្ទាប់។ ទន្ទឹមនឹងនេះ យោធាអ៊ីស្រាអែល កាលពីថ្ងៃសៅរ៍ បានចេញផ្សាយវីដេអូដែលខ្លួននិយាយថា បង្ហាញពីការងារសាងសង់លើគម្រោងនាំយកស្បៀងអាហារ និងការផ្គត់ផ្គង់ជំនួយផ្សេងទៀតទៅកាន់តំបន់ហ្កាហ្សា តាមរយៈកំពង់ផែសមុទ្រ។ទីក្រុងវ៉ាស៊ីនតោន សហរដ្ឋអាមេរិក បានប្រកាសថា នាវាយោធាអាមេរិក បានចាប់ផ្តើមសាងសង់ដំណាក់កាលដំបូងនៃកំពង់ផែបណ្តោះអាសន្ន និងផ្លូវចេញចូលសមុទ្រ។ កម្មវិធីស្បៀងអាហារពិភពលោក បានប៉ាន់ប្រមាណថា ៧០ភាគរយនៃប្រជាជននៅភាគខាងជើងតំបន់ហ្កាហ្សា កំពុងជួបប្រទះភាពអត់ឃ្លានដ៏មហន្តរាយ។

ព្យុះគួច បានវាយបោកបក់នៅអាមេរិកកណ្តាល បណ្តាលឲ្យមនុស្សយ៉ាងតិច៥នាក់ស្លាប់

អាជ្ញាធរ និងប្រព័ន្ធផ្សព្វផ្សាយក្នុងស្រុក បាននិយាយកាលពីថ្ងៃអាទិត្យថា ព្យុះគួច បានបំផ្លិចបំផ្លាញផ្នែកមួយចំនួននៅរដ្ឋអូក្លាហូម៉ា សហរដ្ឋអាមេរិក និងរដ្ឋ Great Plains នៅក្បែរគ្នានោះ បណ្តាលឲ្យមនុស្សយ៉ាងហោចណាស់៥នាក់ស្លាប់។ ការិយាល័យសេវាកម្មអាកាសធាតុជាតិ (NWS) បាននិយាយថា បន្ទាប់ពីព្យុះកួចចំនួន៧៨លើក ត្រូវបានរាយការណ៍កាលពីថ្ងៃសុក្រ ដែលភាគច្រើននៅក្នុងរដ្ឋណេប្រាសកា(Nebraska) និងរដ្ឋអាយអូវ៉ា(Iowa) ប្រព័ន្ធអាកាសធាតុដាច់ដោយឡែកពីគ្នា កាលពីថ្ងៃសៅរ៍ បាននាំយករបាយការណ៍ព្យុះកួចចំនួន៣៥លើកទៀត ពីភាគខាងជើងរដ្ឋតិចសាស់ និងរដ្ឋអូក្លាហូម៉ា ទៅកាន់រដ្ឋមីសសួរី។ការព្រមានអំពីព្យុះ សម្រាប់ខ្យល់បក់ ភ្លៀងធ្លាក់ខ្លាំង និងព្រឹលធ្លាក់ ក៏ត្រូវបានចេញដោយការិយាល័យ សេវាអាកាសធាតុជាតិ កាលពីថ្ងៃអាទិត្យសម្រាប់មនុស្សជាង ៤៧ លាននាក់ ពីរដ្ឋតិចសាស់ខាងកើត ទៅរដ្ឋ Illinois និងរដ្ឋ Wisconsin ។ អភិបាលរដ្ឋអូក្លាហូម៉ា លោក Kevin Stitt បានប្រកាសដាក់រដ្ឋក្នុងគ្រាអាសន្នគ្រោះមហន្តរាយ សម្រាប់រដ្ឋនេះ កាលពីថ្ងៃអាទិត្យ ដោយបានបង្កើនប្រាក់បន្ថែមទៀតសម្រាប់អ្នកឆ្លើយតបដំបូង និងកិច្ចខិតខំប្រឹងប្រែងសង្គ្រោះ។ នៅក្នុងសារតាមវីដេអូ ដែលបានបង្ហោះនៅលើប្រព័ន្ធផ្សព្វផ្សាយសង្គម លោក Stitt បាននិយាយថា លោក មានផែនការទៅពិនិត្យមើលការខូចខាតដោយសារព្យុះ និងបានសុំបួងសួងសម្រាប់អ្នកដែលរងផលប៉ះពាល់ដោយសារព្យុះ។ការិយាល័យសេវាកម្មអាកាសធាតុជាតិ (NWS) បានរាយការណ៍ថា មានព្យុះកួចដែលអាចកើតមានចំនួន៣៨លើកនៅក្នុងតំបន់នេះ ដោយព្យុះអាក្រក់បំផុត បានធ្វើដំណើរឆ្លងកាត់រដ្ឋ Oklahoma ភាគកណ្តាលកាលពីថ្ងៃសៅរ៍ រហូតដល់ព្រឹកថ្ងៃអាទិត្យ ហើយបានរាលដាលចូលទៅភាគពាយ័ព្យរដ្ឋតិចសាស់ រដ្ឋMissouriភាគខាងលិច និងរដ្ឋ Kansas ។

រុស្សី បានធ្វើការវាយប្រហារទ្រង់ទ្រាយធំ ទៅលើទីតាំងថាមពលរបស់អ៊ុយក្រែន

ក្រុមមន្ត្រីនៅទីក្រុងគីវ បាននិយាយកាលពីថ្ងៃសៅរ៍ថា ប្រទេសរុស្ស៊ី បានចាប់ផ្តើមការវាយប្រហារដោយ មីស៊ីលទ្រង់ទ្រាយធំមួយនៅពេលយប់ នៅអ៊ុយក្រែន ដោយបានធ្វើឲ្យខូចខាតដល់រោងចក្រថាមពលចំនួន ៤ នៅក្នុងការវាយប្រហារចុងក្រោយបំផុត ដែលកំណត់គោលដៅទៅលើការផ្គត់ផ្គង់ថាមពលរបស់ប្រទេសនេះ។ប្រធានាធិបតីអ៊ុយក្រែនលោក វ៉ូឡូមៀ ហ្សេឡិនស្គី (Volodymyr Zelensky) បានអំពាវនាវឲ្យដៃគូលោកខាងលិចរបស់ទីក្រុងគីវ ជួយផ្គត់ផ្គង់ប្រព័ន្ធការពារដែនអាកាសបន្ថែមទៀត ដើម្បីការពារដែនអាកាស របស់ប្រទេសនេះ ខណៈដែលកងកម្លាំងអាកាស បាននិយាយថា ខ្លួនបានបាញ់ទម្លាក់មីស៊ីលចំនួន ២១ គ្រាប់ ក្នុងចំណោម ៣៤គ្រាប់។ទីក្រុងមូស្គូ បានចាប់ផ្តើមការវាយប្រហារដ៏ធំបំផុតដែលមិនធ្លាប់មានពីមុន ទៅលើរោងចក្រថាមពលរបស់អ៊ុយក្រែន ក្នុងរយៈពេលប៉ុន្មានខែថ្មីៗនេះ។ ពួកគេ បានបំផ្លាញផ្នែកផលិតកម្មដ៏សំខាន់ ដែលបង្កឲ្យមានការដាច់ភ្លើង និងការបែងចែកថាមពល នៅទូទាំងប្រទេស។អ៊ុយក្រែន ក៏បាននិយាយដែរថា ខ្លួនបានវាយប្រហាររោងចក្រចម្រាញ់ប្រេងចំនួនពីរ និងមូលដ្ឋានទ័ពអាកាសយោធាមួយ នៅប្រទេសរុស្ស៊ីភាគខាងត្បូង ក្នុងការវាយប្រហារដោយយានដ្រូននៅពេលយប់។លោកហ្សេឡិនស្គី បាននិយាយនៅក្នុងការបង្ហោះនៅលើបណ្តាញសង្គម Telegramថា៖«រុស្ស៊ី បានបាញ់ មីស៊ីលចំនួន ៣៤គ្រាប់ នៅពេលយប់»។«យើងបានបាញ់ទម្លាក់ពួកវាមួយចំនួន។ ប៉ុន្តែពិភពលោកមានគ្រប់ឱកាស ដើម្បីជួយ(ពួកយើង)បាញ់ទម្លាក់រាល់មីស៊ីល និងគ្រប់យានដ្រូនទាំងអស់»។ក្នុងសុន្ទរកថាល្ងាចថ្ងៃសៅរ៍ លោកបានលើកឡើងវិញនូវការអំពាវនាវរបស់លោកសម្រាប់ប្រព័ន្ធការពារដែនអាកាស Patriot «ឲ្យបានឆាប់តាមដែលអាចធ្វើទៅបាន»។

បារាំង ជំរុញកិច្ចប្រឹងប្រែងឲ្យប្រទេសលីបង់ ទប់ស្កាត់សង្គ្រាមរវាងក្រុមហេសបូឡា និងអ៊ីស្រាអែល

រដ្ឋមន្ត្រីការបរទេសបារាំង លោកស្ទេហ្វេន សេហ្សួណេ(Stephane Sejourne) បាននិយាយ កាលពីថ្ងៃអាទិត្យថា ប្រជាជនស៊ីវិលនៅក្នុងប្រទេសលីបង់នឹងទទួលរងផលវិបាក សម្រាប់ការកើនឡើងជម្លោះរវាងប្រទេសអ៊ីស្រាអែល និងក្រុមហេសបូឡា។លោក Sejourne បានជួបជាមួយនាយករដ្ឋមន្ត្រីលីបង់ លោក Najib Mikati រដ្ឋមន្ត្រីការបរទេស លោក Abdallah Bou Habib និងឧត្តមសេនីយ៍ ចូសេហ្វ អាអួន(Joseph Aoun)។ លោកនិយាយថា លោកក៏នឹងជួបជាមួយមន្ត្រីរបស់ប្រទេសអ៊ីស្រាអែល ដើម្បីប្រាប់ពួកគេ អំពីសារដូចគ្នានេះ។ ដំណើរទស្សនកិច្ចរបស់លោក Sejourne ទៅកាន់ប្រទេសលីបង់ គឺមានគោលបំណងបន្ធូរបន្ថយភាពតានតឹងរវាងក្រុមហេសបូឡា និងអ៊ីស្រាអែល និងដើម្បីទប់ស្កាត់សង្រ្គាមដែលផ្ទុះឡើង។អ៊ីស្រាអែល និងក្រុមហេសបូឡា បានវាយប្រហារសងសឹកគ្នាទៅវិញទៅមក ក្នុងរយៈពេលប៉ុន្មានខែថ្មីៗនេះ ប៉ុន្តែការបាញ់តគ្នាបានកើនឡើង ចាប់តាំងពីអ៊ីរ៉ង់បានបាញ់មីស៊ីលលើអ៊ីស្រាអែល ដើម្បីឆ្លើយតបទៅនឹងការវាយប្រហារតាមអាកាសរបស់អ៊ីស្រាអែល កាលពីថ្ងៃទី ១ ខែមេសា ដែលបានបំផ្លាញផ្នែកមួយចំនួននៅបរិវេណស្ថានទូតអ៊ីរ៉ង់ ក្នុងទីក្រុង ដាម៉ាស់(Damascus) ប្រទេសស៊ីរី ដែលបានសម្លាប់មន្រ្តីអ៊ីរ៉ង់ជាច្រើននាក់។មន្ត្រីយោធាបាននិយាយថា ការវាយប្រហាររបស់អ៊ីស្រាអែលបន្ថែមទៀត បានធ្លាក់ទៅលើភាគខាងត្បូងប្រទេសលីបង់ កាលពីពេលយប់នៅជិតកងកម្លាំងរក្សាសន្តិភាពរបស់អង្គការសហប្រជាជាតិ ប៉ុន្មានម៉ោងមុនពេល លោក Sejourne បានទៅធ្វើទស្សនកិច្ចនៅទីស្នាក់ការក្នុងទីក្រុង ណាហ្គួរ៉ា(Naqoura) ប្រទេសលីបង់ ភាគខាងត្បូង។លោក Sejourne នឹងពិភាក្សាបញ្ហាប្រទេសលីបង់ ជាមួយរដ្ឋអារ៉ាប់ និងរដ្ឋលោកខាងលិច នៅទីក្រុង រីយ៉ា(Riyadh) ប្រទេសអារ៉ាប៊ីសាអូឌីត នៅថ្ងៃចន្ទនេះ មុនពេលបញ្ជូនជំហរចុងក្រោយរបស់ប្រទេសលីបង់ ទៅអ៊ីស្រាអែល ក្នុងសប្តាហ៍នេះ។

អ៊ីស្រាអែល ជ្រើសរើសពលរដ្ឋហ្កាហ្សា ដើម្បីជួយស្វែងរកចំណាប់ថ្នូរ ដែលនៅសេសសល់

សេវាចារកម្មរបស់អ៊ីស្រាអែល បានជ្រើសរើសសមាជិកថ្មីជាច្រើននាក់ ពីក្នុងតំបន់ហ្កាហ្សា ដើម្បីជួយពួកគេ ក្នុងការស្វែងរកចំណាប់ថ្នូរ ដែលនៅសេសសល់។ប្រភពចារកម្ម បានប្រាប់សារព័ត៌មាន The Telegraph ជាមួយនឹងការផ្តល់ជូនសាច់ប្រាក់ ការរួចខ្លួនពីការកាត់ទោស ឬសុវត្ថិភាពរាងកាយ វាកាន់តែមានភាពងាយស្រួល ក្នុងការទាក់ទាញប្រជាជនហ្កាហ្សា ឲ្យធ្វើការឲ្យអ៊ីស្រាអែល បន្ទាប់ពីការផ្ទុះសង្គ្រាមនៅថ្ងៃទី៧ ខែតុលា។ក្នុងពេលជាមួយគ្នានេះ វាកាន់តែងាយស្រួលសម្រាប់អង្គភាពសម្រាំងនៃកងកម្លាំងការពារអ៊ីស្រាអែល (IDF) ដើម្បីចូលទៅក្នុងតំបន់ហ្កាហ្សាស្ទ្រីប ដោយមិនមាននរណាកត់សម្គាល់ឡើយ ហើយប្រភពមួយ បានប្រាប់សារព័ត៌មាន The Telegraph ថា ក្រុមអ្នកឯកទេសដ៏ធំមួយដែលត្រូវបានបណ្តុះបណ្តាល ដើម្បីបញ្ចូលគ្នា ទៅក្នុងសហគមន៍ប៉ាឡេស្ទីនបច្ចុប្បន្ន កំពុងធ្វើការនៅតាមទីតាំងសំខាន់ៗ នៅក្នុងតំបន់នេះ។ចំណាប់ថ្នូរប្រហែល ១៣០នាក់ នៅតែត្រូវបានគេគិតថា ត្រូវបានឃុំខ្លួននៅក្នុងតំបន់ហ្កាហ្សា ទោះបីជាចំនួនសរុប អាចទាបជាងនេះក្តី ចំពេលមានការអះអាងថា មនុស្សរាប់សិបនាក់ បានស្លាប់ ឬត្រូវបានសម្លាប់ក្នុងអំឡុងពេលជម្លោះនោះ។ ចំណាប់ថ្នូរពីរនាក់ទៀត គឺជាពលរដ្ឋអង់គ្លេស លោក Nadav Popplewell មានវ័យ ៥១ឆ្នាំ និង អ្នកស្រី Emily Damari មានវ័យ ២៧ឆ្នាំ។កាលពីថ្ងៃអាទិត្យ ក្តីសង្ឃឹម បានកើនឡើងសម្រាប់កិច្ចព្រមព្រៀងសម្របសម្រួលដោយអេហ្ស៊ីប ដើម្បីដោះលែងចំណាប់ថ្នូរដែលនៅសេសសល់។ លោក អង់តូនី ប្ល៊ីនខិន ( Antony Blinken) នឹងចូលរួមវេទិកាសេដ្ឋកិច្ចពិភពលោក នៅទីក្រុងរីយ៉ាដ (Riyadh) នៅថ្ងៃចន្ទនេះ ក្នុងកិច្ចប្រឹងប្រែង ដើម្បីជំរុញកិច្ចព្រមព្រៀងនេះ។

បណ្ដាញសង្គម

ព័ត៌មានថ្មីៗ

ក្រសួងការងារ បានដោះស្រាយបញ្ចប់ និងផ្តល់អត្ថប្រយោជន៍តាមគោលការច្បាប់ជូនបងប្អូនកម្មករនៃរោងចក្រអិមអិលយ៉ាងលឿនរហ័ស

កម្មករនិយោជិត រីករាយចំពោះការយកចិត្តទុកដាក់ផ្ដល់នូវបរិយាកាសការងារល្អសម្រាប់ពួកគេ

ប្រធានគណៈកម្មការទី៨ រដ្ឋសភាកម្ពុជា អញ្ជើញចូលរួមពិធីបើកសន្និសីទពិភពលោក Women Deliver 2026 នៅប្រទេសអូស្ត្រាលី

អ.ន.ក. ស្រុកគាស់ក្រឡ ចុះពិនិត្យការសាងសង់សាលារៀនសម្រាប់គ្រួសារអតីតយុទ្ធជន

ក្រុមអនុព័ន្ធយោធាបរទេសប្រចាំកម្ពុជា ចុះសង្កេតការណ៍នៅតំបន់អូរភ្លុកដំរី ខេត្តពោធិ៍សាត់ជាលើកទីពីរ ក្នុងឆ្នាំ២០២៦នេះ

ប្រធានស្តីទីព្រឹទ្ធសភា អរគុណម៉ាឡេស៊ីកាលជាប្រធានអាស៊ាន បានដើរតួនាទីយ៉ាងសកម្មជួយសម្របសម្រួលកាត់បន្ថយភាពតានតឹង និងជំរុញដំណើរការសន្តិភាពក្នុងតំបន់

ក្រុមហ៊ុនទេសចរណ៍រំពឹងថា Visa Free នឹងទាក់ទាញទេសចរចិនច្រើនមកទស្សនាកម្ពុជា

សមាជិកសភាវ័យក្មេងអាយប៉ាចូលរួមកិច្ចប្រជុំពិគ្រោះយោបល់លើកទី៣ «យុវជនអាស៊ាន៖ ការពង្រឹងសាមគ្គីភាព និងការផ្ដល់អំណាចជាអ្នកដឹកនាំដែលត្រៀមខ្លួនរួចជាស្រេចសម្រាប់អនាគត»

ព្រះសង្ឃ និងពលរដ្ឋត្រេកអរ បន្ទាប់ពីទទួលដំណឹងអំពីព្រះរាជសុខភាពព្រះមហាក្សត្រកាន់តែល្អប្រសើរ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877