BTV NEWS

ពលរដ្ឋបន្តសាទរកិច្ចប្រឹងប្រែងរបស់រដ្ឋាភិបាលបោសសម្អាត Online Scams ដើម្បីស្ដារមុខមាត់កម្ពុជា

សាធារណជនគាំទ្រគំនិតផ្ដួចផ្ដើមរបស់សម្តេចធិបតីឱ្យបញ្ជូនក្រុមក្មេងទំនើងទៅជួយការងារសមរភូមិមុខ

បង្រ្កាបអគារប្រព្រឹត្តបទល្មើស Online Scams នៅទីតាំង ១កន្លែង ក្នុងក្រុងប៉ោយប៉ែត ឃាត់ខ្លួនមនុស្សប្រមាណ ៣០០នាក់

កម្លាំងគណៈបញ្ជាការឯកភាពរាជធានី បន្តប្រតិបត្តិការឆ្មក់ចុះបង្ក្រាប Online Scams នៅខណ្ឌ៧មករា ឃាត់ជនបរទេស៤០នាក់

សន្តិសុខ និង សង្គម

ក្រុមហេសបូឡានៅលីបង់ បើកការវាយប្រហារចូលទៅក្នុងអ៊ីស្រាអែល យ៉ាងជ្រៅបំផុត ចាប់តាំងពីសង្រ្គាមហ្កាហ្សាចាប់ផ្តើម

ក្រុមហេសបូឡាដែលគាំទ្រដោយអ៊ីរ៉ង់នៅប្រទេសលីបង់ បាននិយាយកាលពីថ្ងៃអង្គារថា ខ្លួនបានបើកការវាយប្រហារដោយយានដ្រូនប្រឆាំងនឹងមូលដ្ឋានយោធាអ៊ីស្រាអែលភាគខាងជើងនៃទីក្រុង Acre ជាការវាយប្រហាររបស់ខ្លួន ចូលទៅក្នុងទឹកដីអ៊ីស្រាអែលយ៉ាងជ្រៅបំផុត ចាប់តាំងពីសង្គ្រាមហ្កាហ្សា បានចាប់ ផ្តើម។យោធាអ៊ីស្រាអែល បានអះអាងថា ខ្លួនមិនបានដឹងពីកន្លែងណាមួយរបស់ខ្លួនដែលត្រូវបានវាយប្រហារដោយក្រុមហេសបូឡានោះទេ ប៉ុន្តែបាននិយាយកាលពីថ្ងៃអង្គារថា ខ្លួនបានស្ទាក់ចាប់ «គោលដៅពីលើអាកាស»ចំនួនពីរ នៅឆ្នេរសមុទ្រភាគខាងជើងនៃប្រទេសអ៊ីស្រាអែល។ភាគីទាំងពីរ បានចូលរួមនៅក្នុងការបាញ់ប្រហារគ្នា និងការវាយប្រហារតាមអាកាសជាប្រចាំ ចាប់តាំងពីការចាប់ផ្តើមនៃសង្គ្រាមនៅតំបន់ហ្កាហ្សា កាលពីខែតុលា ឆ្នាំមុន ប៉ុន្តែបានជៀសវាងពីការរុញច្រានជម្លោះនេះឲ្យទៅជាសង្រ្គាមពេញទំហឹង។ទោះបីជាយ៉ាងណាក៏ដោយ នៅពេលដែលការវាយប្រហារ បានបន្ត ការភ័យខ្លាច បានកើនឡើងថា ឧបទ្ទវហេតុ ឬការប៉ានស្មានខុសទៅលើភាគីណាមួយ អាចមើលឃើញថា ជម្លោះអាចកើនឡើងយ៉ាងឆាប់រហ័ស ដែលអាចអូសទាញដល់មហាអំណាចក្នុងតំបន់ និងពិភពលោកផ្សេងទៀតរួមទាំងសហរដ្ឋអាមេ រិកផងដែរ។ក្រុមហេសបូឡា បានបញ្ជាក់ថា ខ្លួនបានធ្វើសកម្មភាពសងសឹកចំពោះការវាយប្រហាររបស់អ៊ីស្រាអែលមុននេះ ដែលបានសម្លាប់អ្នកប្រយុទ្ធរបស់ខ្លួនម្នាក់។ ក្រុមនេះ បានបោះពុម្ពផ្សាយនូវអ្វីដែលមើលទៅដូចជារូបភាពផ្កាយរណប ជាមួយនឹងទីតាំងនៃការវាយប្រហារដែលកំណត់ដោយពន្លឺដែលមានរង្វង់ពណ៌ក្រហម ព័ទ្ធជុំវិញវា ដែលស្ថិតនៅពាក់កណ្តាលផ្លូវរវាងទីក្រុង Acre និងទីក្រុង Nahariyaya ទៅភាគខាងជើង។ជាការឆ្លើយតប យោធាអ៊ីស្រាអែល បាននិយាយថា យន្តហោះចម្បាំង បានវាយប្រហារគោលដៅយោធានៅភូមិ Ayta ash Shab និង Blida និងនៅតំបន់ Markaba នៅក្នុងប្រទេសលីបង់ភាគខាងត្បូង។

គ្រួសារចំណាប់ថ្នូរអ៊ីស្រាអែលនិយាយថា រយៈពេល២០០ថ្ងៃហើយ គ្មានអ្វីផ្លាស់ប្តូរសោះ

ដោយសង្រ្គាមឈានចូលដល់ថ្ងៃទី២០០ ក្រុមគ្រួសារនិងអ្នកគាំទ្ររបស់ចំណាប់ថ្នូរអ៊ីស្រាអែល ដែលត្រូវបានឃុំខ្លួននៅតំបន់ហ្កាហ្សា បានចេញមកតវ៉ានៅទីក្រុង តែលអាវីវ(Tel Aviv) កាលពីយប់ថ្ងៃអង្គារ ទី២៣ ខែមេសា ដោយអង្គុយនៅលើដី ដៃជាប់ចំណង និងបិទមាត់របស់ពួកគេ ព្រមទាំងបង្ហាញសារមួយថា ២០០ថ្ងៃហើយ គ្មានអ្វីផ្លាស់ប្តូរសោះ។មនុស្សដែលត្រូវបានចាប់ពង្រត់ មានទារក ស្ត្រី មនុស្សចាស់ ទាហាន ត្រូវបានគេចាប់ពង្រត់រយៈពេល២០០ថ្ងៃកន្លងទៅហើយ។ អ៊ីស្រាអែលនិយាយថា ខ្លួនកំពុងព្យាយាមកម្ទេចក្រុមហាម៉ាស ដែលគ្រប់គ្រងតំបន់ហ៊ុមព័ទ្ធហ្កាហ្សា បន្ទាប់ពីការវាយប្រហារដោយក្រុមសកម្មប្រយុទ្ធកាលពីថ្ងៃទី ៧ ខែតុលា បានសម្លាប់មនុស្ស ១.២០០ នាក់ និងចាប់ចំណាប់ថ្នូរ២៥៣នាក់ ។ខណៈចំណាប់ថ្នូរជាង១០០នាក់ ត្រូវបានដោះលែងនៅក្នុងបទឈប់បាញ់កាលពីខែវិច្ឆិកា កិច្ចខិតខំប្រឹងប្រែងដើម្បីទទួលបានការដោះលែងចំណាប់ថ្នូរផ្សេងទៀតបានបរាជ័យ ហើយអ៊ីស្រាអែលបានរារាំងបទឈប់បាញ់ជាអចិន្ត្រៃយ៍ ដោយនិយាយថា វានឹងធ្វើឱ្យក្រុមហាម៉ាសប្រមូលផ្តុំគ្នាឡើងវិញ។

នគរបាលហៃទី ប្រើឧស្ម័នបង្ហៀរទឹកភ្នែកដើម្បីការពារវិមានប្រធានាធិបតី មុនការតែងតាំងក្រុមប្រឹក្សា

នគរបាលប្រទេសហៃទី បានប្រើឧស្ម័នបង្ហៀរទឹកភ្នែកដើម្បីបំបែកក្រុមមនុស្សនៅជុំវិញវិមានជាតិ កាលពីថ្ងៃអង្គារ ទី២៣ ខែមេសា មុនការតែងតាំងក្រុមប្រឹក្សាប្រធានាធិបតីអន្តរកាល។កងកម្លាំងសន្តិសុខរបស់ប្រទេសហៃទី បានបង្កើតបរិវេណសន្តិសុខនៅជុំវិញអគាររដ្ឋាភិបាល និងច្រកចូលផ្នែកការទូតនៅអាកាសយានដ្ឋានអន្តរជាតិ ខណៈសហរដ្ឋអាមេរិក បានជូនដំណឹងថា កងទ័ពត្រូវបានដឹកជញ្ជូនតាមអាកាសនៅក្នុងការបង្កើនបុគ្គលិកសន្តិសុខ ដើម្បីពង្រឹងការការពារនៅស្ថានទូតរបស់ខ្លួននៅទីនោះ។ប្រជាជនក្នុងតំបន់បានត្អូញត្អែរថា ពួកគេពុំអាចឆ្លងកាត់ផ្លូវនៅជុំវិញវិមានជាតិបានទេ ដោយសារសង្គ្រាមដណ្តើមអំណាចគ្នារវាងកងកម្លាំងហៃទី និងក្រុមជនអន្ធពាលប្រដាប់អាវុធ ដែលបានបង្កឲ្យមាន អំពើហឹង្សាជាបន្តបន្ទាប់ និងបានធ្វើឱ្យទីក្រុងព័រអូប្រាំង ជាប់គាំង។នាយករដ្ឋមន្រ្តី លោក Ariel Henry បានសន្យាលាចេញពីតំណែងនៅថ្ងៃទី ១១ ខែមីនា ក្រោមសម្ពាធរបស់សហរដ្ឋអាមេរិក និងបានជាប់ខ្លួននៅខាងក្រៅប្រទេស។ ចាប់តាំងពីពេលនោះមក ការវាយប្រហារជាច្រើន នៅក្នុងរដ្ឋធានី បានរីកកាន់តែធំ ហើយដំណើរការអន្តរកាលបានអូសបន្លាយពេល។

UNRWA៖ ពលរដ្ឋហ្កាហ្សា ជាង១លាននាក់បាត់បង់ផ្ទះសម្បែង ខណៈជម្លោះមានអាយុកាល ២០០ ថ្ងៃ

ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) បាននិយាយកាលពីថ្ងៃអង្គារ (២៣ មេសា) ថាអ្នកស្រុកជាងមួយលាននាក់នៅតំបន់ហ្កាហ្សាស្ទ្រីប បានបាត់បង់ផ្ទះសម្បែងរបស់ពួកគេ ហើយ ៧៥ ភាគរយនៃចំនួនប្រជាជននៅក្នុងតំបន់ឆ្នេរហ៊ុមព័ទ្ធប៉ាឡេស្ទីនមួយនេះត្រូវបានផ្លាស់ទីលំនៅ ខណៈជម្លោះដ៏បង្ហូរឈាមរវាងអ៊ីស្រាអែល និងក្រុមហាម៉ាសនេះមានអាយុកាលពី ២០០ ថ្ងៃ។ទីភ្នាក់ងារ UNRWA បានសរសេរនៅក្នុងការបង្ហោះនៅលើប្រព័ន្ធផ្សព្វផ្សាយសង្គម X ថា «ការបំផ្លិចបំផ្លាញមានគ្រប់ទីកន្លែងនៅក្នុងតំបន់ហ្កាហ្សា ហើយការខូចខាតដល់ហេដ្ឋារចនាសម្ព័ន្ធសំខាន់ៗគឺធំធេងមិនអាចពណ៌នាបាន»។ ជាមួយគ្នានេះ កងកម្លាំងប្រដាប់អាវុធរបស់ក្រុមហាម៉ាស បានចោទប្រកាន់អ៊ីស្រាអែល ថាបានរារាំងកិច្ចខិតខំប្រឹងប្រែងសម្របសម្រួលសម្រាប់បទឈប់បាញ់ដើម្បីបន្តការសម្លាប់ឥតឈប់ឈររបស់ខ្លួន។ប្រព័ន្ធផ្សព្វផ្សាយអ៊ីស្រាអែល បានរាយការណ៍កាលពីថ្ងៃចន្ទ ថាការត្រៀមរៀបចំកំពុងដំណើរការដើម្បីពង្រីកតំបន់មនុស្សធម៌នៅតំបន់ហ្កាហ្សាស្ទ្រីប មុនពេលការវាយប្រហាររបស់អ៊ីស្រាអែល ដែលអាចកើតមានលើទីក្រុងភាគខាងត្បូង រ៉ាហ្វា (Rafah)។ក្រុង រ៉ាហ្វា គឺជាជម្រកចុងក្រោយសម្រាប់ជនជាតិប៉ាឡេស្ទីនដែលភៀសខ្លួនជាង ១,៤ លាននាក់ពីភាគខាងជើង និងកណ្តាលនៃតំបន់ហ្កាហ្សាស្ទ្រីប ស្របពេលមានសង្រ្គាមដែលកំពុងបន្ត ហើយវិបត្តិមនុស្សធម៌ និងភាពអត់ឃ្លានកំពុងគ្របដណ្ដប់ហ្កាហ្សា៕

អ៊ីស្រាអែល បង្កើនការវាយប្រហារទូទាំងហ្កាហ្សា និងបញ្ជាឱ្យមានការជម្លៀសថ្មីនៅភាគខាងជើង

អ្នកស្រុកបាននិយាយថា ការវាយប្រហាររបស់អ៊ីស្រាអែល កាន់តែខ្លាំងឡើងនៅទូទាំងតំបន់ហ្កាហ្សា កាលពីថ្ងៃអង្គារ (២៣ មេសា) នៅក្នុងការបាញ់ផ្លោងខ្លាំងក្លាបំផុតក្នុងរយៈពេលជាច្រើនសប្តាហ៍ ហើយកងទ័ពបានបញ្ជាឱ្យមានការជម្លៀសថ្មីនៅភាគខាងជើងនៃតំបន់នេះ ដោយព្រមានជនស៊ីវិលថាពួកគេកំពុងស្ថិតនៅក្នុង «តំបន់ប្រយុទ្ធដ៏គ្រោះថ្នាក់»។ការវាយប្រហារតាមអាកាស និងការបាញ់ផ្លោងពីរថក្រោះនៅលើដីក៏ត្រូវបានគេរាយការណ៍ផងដែរនៅក្នុងតំបន់ភាគកណ្តាល និងភាគខាងត្បូងនៃដែនដីហ្កាហ្សា នៅក្នុងអ្វីដែលអ្នកស្រុកបាននិយាយកាលពីល្ងាចថ្ងៃអង្គារ ថាស្ទើរតែ ២៤ ម៉ោងនៃការទម្លាក់គ្រាប់បែកមិនឈប់ឈរ។នៅក្នុងការបង្ហោះនៅលើវេទិកាប្រព័ន្ធផ្សព្វផ្សាយសង្គម X អ្នកនាំពាក្យកងទ័ពអ៊ីស្រាអែល លោក អាវីឆាយ អាដ្រេ (Avichay Adraee) បានជំរុញឱ្យអ្នកស្រុកនៃតំបន់ចំនួន ៤ នៅក្រុង បេតឡាហ៊ីយ៉ា (Beit Lahiya) នៅចុងខាងជើងហ្កាហ្សា ផ្លាស់ទីទៅតំបន់ដែលបានកំណត់ចំនួនពីរ ខណៈយោធានឹងប្រើកម្លាំងដ៏ខ្លាំងក្លាប្រឆាំងនឹងហេដ្ឋារចនាសម្ព័ន្ធភេរវករ និងក្រុមសកម្មប្រយុទ្ធក្នុងតំបន់។ការបាញ់ផ្លោងជាថ្មី និងការទម្លាក់គ្រាប់បែកនៅតំបន់ហ្កាហ្សាភាគខាងជើងនេះ បានកើតឡើងជិតបួនខែបន្ទាប់ពីកងទ័ពអ៊ីស្រាអែលបានប្រកាសថាខ្លួនកំពុងដកទ័ពចេញពីទីនោះ ដោយនិយាយថាក្រុមហាម៉ាសលែងគ្រប់គ្រងតំបន់ទាំងនោះទៀតហើយ។ប៉ុន្តែកិច្ចខិតខំប្រឹងប្រែងដើម្បីឈានដល់បទឈប់បាញ់បានបរាជ័យ ហើយការទម្លាក់គ្រាប់បែក និងការវាយឆ្មក់របស់អ៊ីស្រាអែល ទៅលើទឹកដីដែលកងទ័ពបានដកខ្លួនចេញនេះ កំពុងធ្វើឱ្យមានការលំបាកសម្រាប់ជនភៀសខ្លួនហ្កាហ្សា ក្នុងការត្រឡប់ទៅលំនៅឋានដែលគេបោះបង់ចោលវិញ៕

សមាជិកសភារដ្ឋធិនណេសស៊ីអនុម័តពង្រាងច្បាប់អនុញ្ញាតឲ្យគ្រូបង្រៀនកាន់អាវុធនៅសាលារៀន

សមាជិកសភាក្នុងរដ្ឋ ធិនណេសស៊ី (Tennessee) បានអនុម័តវិធានការមួយកាលពីថ្ងៃអង្គារសប្ដាហ៍នេះ ដែលនឹងអនុញ្ញាតឱ្យបុគ្គលិកសាលារៀនកាន់កាំភ្លើងនៅក្នុងបរិវេណសាលា ដោយបញ្ជូនសេចក្ដីព្រាងច្បាប់ទៅកាន់អភិបាលរដ្ឋ មួយឆ្នាំបន្ទាប់ពីអ្នកបាញ់ប្រហារបានបាញ់សម្លាប់មនុស្ស ៦ នាក់នៅសាលាណាស្វីល (Nashville)។ សភារដ្ឋ ធិនណេសស៊ី បានអនុម័តច្បាប់នេះក្នុងការបោះឆ្នោត មានសំឡេងគាំទ្រ៦៨ទល់នឹងប្រឆាំង២៨សំឡេង។សមាជិកសភាមកពីគណបក្សសាធារណរដ្ឋបួនរូបបានចូលរួមជាមួយគណបក្សប្រជាធិបតេយ្យក្នុងការប្រឆាំងនឹងវិធានការនេះ។ ព្រឹទ្ធសភារដ្ឋដែលគ្រប់គ្រងដោយគណបក្សសាធារណរដ្ឋ (GOP) ផងដែរ បានអនុម័តវិធានការនេះកាលពីដើមខែនេះ។លោក រ៉ៃអិន វីលៀមស៍(Ryan Williams) តំណាងរាស្រ្តពីមកគណបក្សសាធារណរដ្ឋរបស់រដ្ឋនេះ បាននិយាយកាលពីថ្ងៃអង្គារទី២៣មេសាសប្ដាហ៍នេះ ថា ច្បាប់នេះនឹងបង្កើនសុវត្ថិភាពនៅតាមសាលារៀន។ លោកបានលើកឡើងនៅក្នុងសភាថា លោកជឿថានេះជាវិធីសាស្ត្រមួយដែលយើងអាចធ្វើបាន ព្រោះអ្វីដែលអ្នកកំពុងធ្វើ គឺអ្នកកំពុងបង្កើតការរារាំង។នៅក្រោមច្បាប់នេះ សាស្ត្រាចារ្យ និងបុគ្គលិកដែលមានបំណងចង់កាន់កាំភ្លើងនៅក្នុងបរិវេណសាលានឹងត្រូវបញ្ចប់ការបណ្តុះបណ្តាលយ៉ាងហោចណាស់ ៤០ ម៉ោងដែលត្រូវបានអនុម័តជាក់លាក់ដោយនគរបាលប្រចាំសាលាជារៀងរាល់ឆ្នាំ។ គេបានលឺសំឡេងរបស់ក្រុមអ្នកតវ៉ានៅក្នុងវិចិត្រសាលកាលពីថ្ងៃអង្គារដោយស្រែកថា ឈាមនៅលើដៃរបស់អ្នក អំឡុងសភាបោះឆ្នោតអនុម័តនោះ ។ គួរបញ្ជាក់ថា រដ្ឋធិនណេសស៊ី មិនមែនជារដ្ឋតែមួយគត់ដែលអនុម័តច្បាប់អនុញ្ញាតឱ្យគ្រូបង្រៀនកាន់កាំភ្លើងនោះទេ។ យោងតាមមជ្ឈមណ្ឌលច្បាប់ Giffords ដែលជាក្រុមការពារអំពើហិង្សាដោយកាំភ្លើង រដ្ឋយ៉ាងហោចណាស់ ចំនួន ២៦ មានច្បាប់ដែលអនុញ្ញាតឱ្យគ្រូបង្រៀន ឬបុគ្គលិកសាលាផ្សេងទៀតកាន់កាំភ្លើងនៅសាលារៀន ដោយមានករណីលើកលែងមួយចំនួនប៉ុណ្ណោះ ៕

សាកសពជិត៣០០ ត្រូវបានរកឃើញ ក្នុងផ្នូរធំមួយ នៅមន្ទីរពេទ្យហ្កាហ្សា

បុគ្គលិកការពារជនស៊ីវិលនៅតំបន់ហ្កាហ្សា បាននិយាយកាលពីថ្ងៃចន្ទថា ផ្នូរធំមួយដែលមានសាកសពជិត ៣០០នាក់ ត្រូវបានគេរកឃើញនៅមន្ទីរពេទ្យក្នុងទីក្រុង Khan Younis ភាគខាងត្បូងតំបន់ហ្កាហ្សា បន្ទាប់ពីការដកកងកម្លាំងអ៊ីស្រាអែល ចេញពីតំបន់កាលពីដើមខែនេះ។នាយកផ្នែកការពារជនស៊ីវិលនៅទីក្រុង Khan Younis បានប្រាប់សារព័ត៌មាន CNN កាលពីថ្ងៃច័ន្ទថា សាកសពចំនួន ៧៣នាក់ បន្ថែមទៀតត្រូវបានគេរកឃើញ នៅក្នុងទីធ្លាមួយកន្លែងនៅបរិវេណមន្ទីពេទ្យ Nasser ដែលនាំឲ្យចំនួនសរុបឡើងដល់ ២៨៣នាក់។នាយកការពារជនស៊ីវិល បានចោទប្រកាន់ថា សាកសពមួយចំនួនត្រូវបានរកឃើញដោយដៃនិងជើងមានជាប់ចំណង ហើយមានសញ្ញានៃការប្រហារជីវិត។ យើងមិនដឹងនោះទេ ថាតើគេកប់មនុស្សទាំងរស់ ឬត្រូវបានគេសម្លាប់។ សាកសពភាគច្រើនបានស្អុយរលួយ។ សារព័ត៌មាន CNN ពុំអាចផ្ទៀងផ្ទាត់ការអះអាងរបស់នាយកការពារជនស៊ីល និងមិនអាចបញ្ជាក់ពីមូលហេតុនៃការស្លាប់ក្នុងចំណោមសាកសពដែលត្រូវបានរកឃើញនេះទេ។សារព័ត៌មាន CNN បានទាក់ទងទៅកងកម្លាំងការពារអ៊ីស្រាអែល (IDF) សម្រាប់ការធ្វើអត្ថាធិប្បាយបន្ទាប់ពីការរកឃើញផ្នូរធំរួម ថាតើសាកសពដែលត្រូវបានកប់នៅមន្ទីរពេទ្យ ត្រូវបានគាស់សម្រាប់ការធ្វើតេស្ត DNA និងថាតើពួកគេត្រូវបានកប់ឡើងវិញដែរឬទេ។ អ្នកនាំពាក្យការពារជនស៊ីវិល ទីក្រុង Khan Younis និងជាប្រធានបេសកកម្មស្វែងរកលោក Raed Saqr បាននិយាយថា ពួកគេកំពុងស្វែងរកសាកសពមនុស្ស ៤០០នាក់ផ្សេងទៀតដែលបាត់ខ្លួន បន្ទាប់ពីយោធាអ៊ីស្រាអែលបានចាកចេញកាលពីថ្ងៃទី ៧ ខែមេសា។

ទីភ្នាក់ងារ UNRWA និយាយថា អ៊ីស្រាអែលមិនទាន់ផ្តល់ភស្តុតាងនៃអំពើភេរវកម្មនៅឡើយទេ

ក្រុមមួយដែលដឹកនាំការពិនិត្យឡើងវិញរបស់ទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន(UNRWA) និយាយថា អ៊ីស្រាអែល មិនទាន់បានផ្តល់ភស្តុតាងណាមួយដើម្បីគាំទ្រដល់ការចោទប្រកាន់របស់ខ្លួនដែលថាបុគ្គលិកមួយចំនួនរបស់ទីភ្នាក់ងារ UNRWA បានជាប់ពាក់ព័ន្ធក្នុងការវាយប្រហារកាលពីខែតុលាលើអ៊ីស្រាអែល ជាមួយក្រុមហាម៉ាស។ ក្រុមត្រួតពិនិត្យឯករាជ្យ បានចាប់ផ្តើមការស៊ើបអង្កេតកាលពីខែកុម្ភៈ បន្ទាប់ពីការចោទប្រកាន់របស់អ៊ីស្រាអែល ដែលបានជំរុញឱ្យប្រទេសម្ចាស់ជំនួយមួយចំនួន ផ្អាកការផ្តល់មូលនិធិរបស់ពួកគេដល់ទីភ្នាក់ងារ។អតីតរដ្ឋមន្ត្រីការបរទេសបារាំង លោកស្រី Catherine Colonna ដែលដឹកនាំក្រុមនេះបានប្រកាសពីការចេញផ្សាយរបាយការណ៍ចុងក្រោយរបស់ខ្លួននៅក្នុងសន្និសីទសារព័ត៌មានកាលពីថ្ងៃចន្ទ។ របាយការណ៍និយាយថា អ៊ីស្រាអែល បានធ្វើការអះអាងជាសាធារណៈថាបុគ្គលិកទីភ្នាក់ងារ UNRWA មួយចំនួន ជាសមាជិកនៃអង្គការភេរវកម្ម។ ទោះជាយ៉ាងណា អ៊ីស្រាអែល ពុំទាន់បានផ្តល់ភស្តុតាងគាំទ្រអំពីរឿងនេះនៅឡើយ។ របាយការណ៍និយាយថា ទីភ្នាក់ងារ UNRWA បានបង្កើតយន្តការ និងនីតិវិធីសំខាន់ៗជាច្រើន ដើម្បីធានាបាននូវការអនុវត្តន៍តាមគោលការណ៍មនុស្សធម៌ ដោយបញ្ជាក់លើគោលការណ៍អព្យាក្រឹតភាព។ របាយការណ៍បានស្នើឲ្យមានវិធានការដើម្បីដោះស្រាយបញ្ហាទាំងនេះ រួមទាំងការពិនិត្យផ្ទៃក្នុងដែលត្រូវបានពង្រឹង និងការបណ្តុះបណ្តាល។ លោកស្រី Colonna បានប្រាប់ក្រុមអ្នកសារព័ត៌មានថា ក្នុងគ្រាដ៏លំបាកនេះ ទីភ្នាក់ងារ UNRWA មានតួនាទីយ៉ាងសំខាន់ក្នុងការផ្តល់ជំនួយមនុស្សធម៌នៅតំបន់ហ្កាហ្សា។ លោកស្រី បានអំពាវនាវដល់សហគមន៍អន្តរជាតិ ឱ្យចូលរួមជាមួយទីភ្នាក់ងារនេះ ដើម្បីឱ្យទីភ្នាក់ងារអាចបំពេញបេសកកម្មរបស់ខ្លួនបាន។

ភាពតានតឹង ផ្ទុះឡើងនៅសាកលវិទ្យាល័យសហរដ្ឋអាមេរិក ជុំវិញការតវ៉ាតំបន់ហ្កាហ្សា

ថ្នាក់រៀននៅសកលវិទ្យាល័យ Columbia ត្រូវបានផ្លាស់ប្តូររៀនតាមប្រព័ន្ធអ៊ិនធឺរណិត កាលពីថ្ងៃច័ន្ទ ខណៈការតវ៉ាជុំវិញសង្រ្គាមអ៊ីស្រាអែល និងក្រុមហាម៉ាស បានបង្កើនភាពតានតឹងនៅបរិវេណសាលារបស់សហរដ្ឋអាមេរិក និងនាំឱ្យមានការចាប់ខ្លួនមនុស្សរាប់សិបនាក់នៅសាកលវិទ្យាល័យ Yale។ បាតុករមួយក្រុមធំ បានបង្កើតជំរុំសាមគ្គីតំបន់ហ្កាហ្សា នៅលើវាលស្មៅនៅសាកលវិទ្យាល័យ Columbia ដោយមាននិស្សិតជនជាតិជ្វីហ្វមួយចំនួននៅវិទ្យាស្ថានញូវយ៉ក រាយការណ៍ពីការបំភិតបំភ័យ និងការប្រឆាំងជនជាតិជ្វីហ្វ ក្នុងពេលមានការតវ៉ាជាច្រើនថ្ងៃ។នៅក្នុងលិខិតបើកចំហមួយ ទៅកាន់សហគមន៍សកលវិទ្យាល័យ ប្រធានសាកលវិទ្យាល័យ Columbia លោក Nemat Shafik បាននិយាយថា ចាំបាច់ត្រូវមាន ការកំណត់ឡើងវិញ។ ក្នុងរយៈពេលប៉ុន្មានថ្ងៃកន្លងទៅនេះ មានគំរូជាច្រើននៃការបំភិតបំភ័យ និងការរំខាននៅក្នុងបរិវេណសាលារៀនរបស់យើង។ ភាសាប្រឆាំងជនជាតិជ្វីហ្វ ដូចជាភាសាផ្សេងទៀត ដែលត្រូវបានប្រើដើម្បីធ្វើឱ្យមនុស្សឈឺចាប់ និង ភ័យខ្លាច គឺមិនអាចទទួលយកបានទេ ហើយវិធានការសមស្របនឹងត្រូវបានធ្វើឡើង។បាតុករគាំទ្រប៉ាឡេស្ទីន បានចាប់ផ្តើមការតវ៉ារបស់ពួកគេកាលពីសប្តាហ៍មុន ដោយអំពាវនាវឱ្យសាកលវិទ្យាល័យដកខ្លួនចេញពីក្រុមហ៊ុននានាដែលមានទំនាក់ទំនងជាមួយអ៊ីស្រាអែល។មនុស្សជាង ១០០នាក់ត្រូវបានចាប់ខ្លួន បន្ទាប់ពីអាជ្ញាធរសាកលវិទ្យាល័យបានហៅនគរបាលទៅកាន់បរិវេណសាលាឯកជនមួយនេះ ជាទង្វើមួយដែលហាក់ដូចជាបង្កើនភាពតានតឹង និងបានបង្កឱ្យមានអ្នកប្រមូលផ្តុំគ្នាកាន់តែច្រើន។

អ្នកជំនាញអង្គការសហប្រជាជាតិ ព្រមានពីហានិភ័យសុខភាពផ្លូវចិត្តសម្រាប់ពលរដ្ឋហ្កាហ្សា

អ្នកជំនាញរបស់អង្គការសហប្រជាជាតិកាលពីថ្ងៃចន្ទ បានព្រមានពីហានិភ័យដែលជំងឺផ្លូវចិត្តអាចបង្ហាញច្បាស់លាស់ ក្នុងចំណោមប្រជាជនតំបន់ហ្កាហ្សាដោយសារតែជម្លោះនាពេលបច្ចុប្បន្ន។អ្នកជំនាញនិយាយថា ជាការពិតណាស់ យើងឃើញការរងរបួសរាងកាយ ប៉ុន្តែទុក្ខព្រួយផ្នែកផ្លូវចិត្តធ្ងន់ធ្ងរ នឹងប្រែទៅជាជំងឺថប់បារម្ភនិងជំងឺផ្លូវចិត្តផ្សេងទៀតនៅពេលក្រោយ។ អង្គការ UNICEF បាននិយាយកាលពីខែកុម្ភៈថា អង្គការនេះបានប៉ាន់ប្រមាណថាកុមារ១៧.០០០នាក់ នៅក្នុងតំបន់ហ្កាហ្សា គ្មានអ្នកនៅរួមរស់ជាមួយ ឬបានបែកចេញពីគ្រួសាររបស់ពួកគេក្នុងអំឡុងពេលមានជម្លោះ ហើយកុមារស្ទើរតែទាំងអស់នៅក្នុងតំបន់ហ៊ុមព័ទ្ធ ត្រូវបានគេគិតថាត្រូវការជំនួយសុខភាពផ្លូវចិត្ត។អាជ្ញាធរសុខាភិបាលប៉ាឡេស្ទីន បាននិយាយថា មនុស្សជាង ៣៤.០០០នាក់ ត្រូវបានសម្លាប់នៅក្នុងការវាយប្រហារបស់អ៊ីស្រាអែល ដែលបានចាប់ផ្តើមបន្ទាប់ពីក្រុមអ្នកប្រយុទ្ធហាម៉ាស បានវាយប្រហារអ៊ីស្រាអែលកាលពីថ្ងៃទី ៧ ខែតុលា។ការវាយប្រហាររបស់អ៊ីស្រាអែល បានបំផ្លាញមន្ទីរពេទ្យនៅទូទាំងតំបន់ហ៊ុមព័ទ្ធមួយនេះ រួមមានមន្ទីរពេទ្យ Al Shifa ជាមន្ទីពេទ្យធំបំផុតនៅតំបន់ហ្កាហ្សា មុនពេលសង្រ្គាម ហើយបានសម្លាប់ និងធ្វើឲ្យរងរបួសបុគ្គលិកសុខាភិបាលជាច្រើននាក់។អ៊ីស្រាអែល បានចោទប្រកាន់ក្រុមហាម៉ាសថា បានប្រើប្រាស់មន្ទីរពេទ្យ រថយន្តគិលានសង្គ្រោះ និងអគារមន្ទីរពេទ្យផ្សេងទៀតសម្រាប់គោលបំណងយោធា។ ប្រព័ន្ធសុខាភិបាលនៅតំបន់ហ្កាហ្សា ត្រូវបានបំផ្លាញទាំងស្រុង ហើយសិទ្ធិទទួលបានសុខភាព ត្រូវបានកាត់ផ្តាច់នៅគ្រប់កម្រិត។ អ្នកជំនាញរបស់អង្គការសហប្រជាជាតិ បាននិយាយថា យើងមានការព្រួយបារម្ភអំពីហានិភ័យនៃជំងឺខ្វះជាតិទឹក និងកង្វះការផ្គត់ផ្គង់វេជ្ជសាស្ត្រ សេវាសុខភាពបន្តពូជ និងផ្លូវចិត្តនៅក្នុងតំបន់ហ្កាហ្សាស្ទ្រីប។

បណ្ដាញសង្គម

ព័ត៌មានថ្មីៗ

មេដឹកនាំឈូសមុទ្រធ្វើដំណើរទៅដល់អារ៉ាប៊ីសាអ៊ូឌីត ដើម្បីពិភាក្សាពីការឆ្លើយតបចំពោះការវាយប្រហាររបស់អ៊ីរ៉ង់

ប្រធានាធិបតីអេស្តូនី៖ «អឺរ៉ុបត្រូវតែត្រៀមខ្លួន» សម្រាប់គ្រាប់សេណារីយ៉ូ នៅក្នុងសង្គ្រាមអ៊ុយក្រែន

យោធាអ៊ីស្រាអែលចេញការព្រមានជម្លៀស សម្រាប់តំបន់ភាគខាងត្បូងលីបង់

ស៊ុយអែតព្រមានអំពីលទ្ធភាពដែលអាចខ្វះខាតប្រេងឥន្ធនៈយន្តហោះ ដោយសារសង្គ្រាមមជ្ឈិមបូព៌ា

រសៀលនេះក្រុមអនុព័ន្ធយោធាបរទេសប្រចាំកម្ពុជា បន្តចុះសង្កេតការណ៍ និងផ្ទៀងផ្ទាត់អំពីស្ថានភាពនៅស្ពានស្ទឹងមេទឹក ខេត្តពោធិ៍សាត់

អារ៉ាប់រួម ចាកចេញពី OPEC និង OPEC+ ជាផលប៉ះពាល់យ៉ាងខ្លាំងដល់ក្រុមផលិតប្រេងសកល

ក្រុមហ៊ុននីហ្សេរីយ៉ាផលិតយានបើកដោយខ្លួនឯង ដើម្បីការពារហេដ្ឋារចនាសម្ព័ន្ធអាហ្វ្រិក

មន្ត្រីការពារជាតិជាន់ខ្ពស់៖ ហ្វីលីពីនមិនបារម្ភថា សង្គ្រាមអ៊ីរ៉ង់នឹងធ្វើឲ្យអាមេរិកងាកចេញពីតំបន់នោះទេ

មនុស្សជាច្រើននាក់ស្លាប់ ក្នុងហេតុការណ៍អគ្គិភ័យឆាប់ឆេះការដ្ឋានសំណង់អគារកំពុងសាងសង់នៅទីក្រុងមូស្គូ

អ៊ីរ៉ង់៖ អាមេរិកលែងមានឥទ្ធិពល «កំណត់» គោលនយោបាយដល់ប្រទេសដទៃទៀតហើយ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877