នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%
សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាល​ដែលកំពុង​ធ្វើកិច្ច​ការងារ​យ៉ាង​សកម្ម​ស្វែង​រក​ដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥
សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ​ និង ការអភិវឌ្ឍន៍

ទស្សនកិច្ចផ្លូវការរបស់សម្ដេចធិបតីនៅបារាំង៦ ថ្ងៃមានកម្មវិធីប្រជុំសំខាន់ៗប្រមាណ៤០

2024/01/15 11:45:47 am        162
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា វត្តមានរបស់សម្ដេចនៅអឺរ៉ុប៦ ថ្ងៃនេះ សម្តេចមានកម្មវិធីប្រជុំប្រមាណ ៤០ ហើយពេលខ្លះសូម្បីតែម៉ោងបាយក៏ត្រូវទទួលទាននៅលើយន្តហោះដែរ។សម្ដេចធិបតី នាយករដ្ឋមន្រ្ដីថ្លែងបញ្ជាក់បែបនេះ ក្នុងឱកាសសម្ដេចអញ្ជើញសំណេះសំណាល ជា​មួយបងប្អូនសហគមន៍ខ្មែររស់នៅក្នុងទ្វីបអឺរ៉ុប​ នៅវេលាម៉ោង ៥ ល្ងាចបៅប្រទេសបារាំង ត្រូវនឹងម៉ោង ១១ យប់ថ្ងៃទី១៤ ខែមករា ឆ្នាំ២០២៤ ម៉ោងនៅកម្ពុជា។សម្តេចធិបតី បានលើកឡើងថា គោលបំណងរបស់សម្តេចមកអឺរ៉ុបនេះ មិនមែនដើម្បីថតបង្ហោះ​នោះទេ។ សម្តេច បានបញ្ជាក់ថា បើជំនួបរបស់សម្តេចជាមួយ​ដៃគូអន្តរជាតិត្រឹម ១៥ នាទី​អាច​ទាក់ទាញ​ការវិនិយោគរបស់ពួកគេមកកម្ពុជា​ នោះសម្តេចត្រូវតែចំណាយពេលជួប ពី​ព្រោះកិច្ចការ​ទាំងនេះ​គឺជាប្រយោជន៍​ ដើម្បីប្រជារាស្រ្តកម្ពុជា។សូមជម្រាបថា ​សម្តេចធិបតី ហ៊ុន ម៉ាណែត នឹងអញ្ជើញទៅបំពេញទស្សនកិច្ចផ្លូវការ នៅ​ប្រទេស​បារាំង ចាប់ពីថ្ងៃ ១៨-១៩ ខែមករា ឆ្នាំ២០២៤ តបតាមការអញ្ជើញផ្លូវការរបស់​លោកប្រធានាធិបតីបារាំង អេម៉ានុយអែល ម៉ាក្រុង។ក្នុងអំឡុងពេលស្នាក់នៅប្រទេសបារាំងសម្ដេចធិបតី នឹងចូលជួបសម្តែងការគួរសម ជាមួយ ប្រធានព្រឹទ្ធសភា និងប្រធានរដ្ឋសភា នៃសាធារណរដ្ឋបារាំង។ ទន្ទឹមនឹងនេះ សម្តេចធិបតី ក៏នឹងអនុញ្ញាតជូន អគ្គលេខាធិការនៃអង្គការអន្តរជាតិហ្វង់កូហ្វូនី និងប្រធានសម្ព័ន្ធនិយោជកហ្វ្រង់កូហ្វូន ចូលជួបសម្តែងការគួរសម និងពិភាក្សាការងារផងដែរ។ដើម្បីជំរុញកិច្ចសហប្រតិបត្តិការសេដ្ឋកិច្ច ​និងវិនិយោគរវាងកម្ពុជា ​និងបារាំងឱ្យកាន់ត រឹងមាំ សម្តេចធិបតីនាយករដ្ឋមន្ត្រី ក៏នឹងចូលរួមវេទិកាធុរកិច្ច មានជំនួបដាច់ដោយឡែកជាមួយ ក្រុមហ៊ុន​បារាំងមួយចំនួន និងអញ្ជើញជាអធិបតីដ៏ខ្ពង់ខ្ពស់ក្នុងពិធីចុះហត្ថលេខាលើឯកសារមួយ ចំនួន រួមទាំងឯកសារស្តីពី ​ការចូលរួមរបស់សភាពាណិជ្ជកម្មកម្ពុជាក្នុងសម្ព័ន្ធភាពដៃគូហ្វ្រង់កូហ្វូនី(APE) ផងដែរ៕ អត្ថបទ៖ វ៉ន ដារ៉ា

ទស្សនកិច្ចសម្ដេចធិបតីនៅបារាំងបញ្ជាក់ពីទំនាក់ទំនងការទូត នយោបាយ និង​សេដ្ឋកិច្ចប្រទេសទាំងពីរ

2024/01/15 11:05:55 am        184
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ទស្សន​កិច្ច​ផ្លូវ​ការ​របស់​សម្តេចនៅប្រទេសបារាំងមានលក្ខណៈពិសេស ដោយសារ​ប្រធានាធិបតី​បារាំង​ជា​អ្នក​ចេញ​លិខិត​អញ្ជើញសម្ដេចដោយផ្ទាល់ ដែលរំលេចនូវ​គុណ​តម្លៃ​ខ្ពង់​ខ្ពស់​ចំពោះ​ទំនាក់​ទំនង​ការ​ទូត នយោបាយ សេដ្ឋកិច្ចរវាងប្រទេសទាំងពីរ។ការបញ្ជាក់បែបនេះធ្វើឡើងក្នុងឱកាសសម្តេចធិបតី ហ៊ុន ម៉ាណែត និងលោកជំទាវបណ្ឌិត ជួប​សំណេះសំណាលជាមួយសហគមន៍ខ្មែររស់នៅក្នុងទ្វីបអឺរ៉ុប កាលពីវេលាម៉ោង៥ល្ងាចនៅបារាំង ត្រូវ​នឹង​ម៉ោង១១យប់ថ្ងៃទី១៤ ខែមករា ឆ្នាំ២០២៤ ម៉ោងនៅកម្ពុជា។សម្ដេចធិបតីបានបញ្ជាក់ថា ទស្សនកិច្ចផ្លូវការរបស់សម្តេចនៅទ្វីបអឺរ៉ុបមានរយៈពេល៦ថ្ងៃ គឺ​ដើម្បី​ចូល​រួម​កិច្ចប្រជុំនៅដាវ៉ូស និងទស្សនកិច្ចនៅប្រទេសបារាំង ក្នុង​នោះ​សម្តេច​មាន​កម្មវិធី​ប្រជុំ​ប្រមាណ៤០។ នេះជាទស្សនកិច្ចលើកទី១ របស់សម្ដេចក្នុង​នាម​ជា​នាយករដ្ឋ​មន្ត្រី​មក​កាន់​ប្រទេស​បារាំង និងតំបន់អឺរ៉ុប ដែលជាការបញ្ជាក់ពីទំនាក់ទំនងល្អរវាងកម្ពុជា និងបារាំង។សម្ដេច​ធិបតីបានបន្តថា រាល់ទស្សនកិច្ចផ្លូវការ ឬផ្លូវរដ្ឋ តែងមាន​ការ​អញ្ជើញ​ដោយ​សមភាគី​ព្រោះជា​ធម្មតានាយករដ្ឋមន្ត្រីនៃប្រទេសកម្ពុជា ត្រូវមាននាយករដ្ឋ​មន្ត្រី​របស់​ប្រទេស​ជា​មិត្ត​ជា​អ្នក​អញ្ជើញ​។ ប៉ុន្តែទស្សនកិច្ចផ្លូវការរវាងបារាំង និងកម្ពុជា គឺមានលក្ខណៈពិសេសជាងគេ ក៏​ដូច​ជា​ពេល​សម្ដេច​តេជោនៅ​ធ្វើជានាយករដ្ឋមន្ត្រីកម្ពុជា គឺប្រធានាធិបតីបារាំង​តែម្ដង​ជា​អ្នក​ចេញ​លិខិត​អញ្ជើញ​បានន័យថា កម្រិតខ្ពស់បំផុតនៅក្នុងប្រទេសបារាំង។សម្ដេចធិបតីនាយករដ្ឋមន្ត្រីមានប្រសាសន៍ថា ប៉ុន្មាន​ថ្ងៃ​មក​នេះ​មាន​អ្នក​ចេញ​មក​ពន្យល់​ប្រធានាធិបតី​បារាំងថាកុំឱ្យចាញ់បោកមេដឹកនាំកម្ពុជា។ ត្រង់ចំណុចនេះ សម្ដេច​ធិបតី​បាន​ឆ្លើយ​តបថា មុន​នឹង​មេដឹក​នាំ​ប្រទេស​មហា​អំណាច​ដូច​ជា​បារាំង​នេះ​មាន​ការ​អញ្ជើញ​ប្រមុខ​រាជ​រដ្ឋាភិបាល​ណាមួ​យដូចជា កម្ពុជានេះ គឺប្រាកដជាមានការវាយ​តម្លៃ​គ្រប់​ជ្រុង​ជ្រោយ​ជាមុន​ហើយ​ទីប្រឹក្សា​នៃ​ក្រសួងជំនាញ មានក្រសួងការបរទេស ក្រសួងការពារជាតិ ហើយថែមទាំង​ប្រធានាធិបតី​ខ្លួន​គេផ្ទាល់ ប្រាកដជាប្រមូលផ្ដុំយោបល់ និងសម្រេចចិត្តរួចទៅហើយ មើល​ឃើញ​ច្បាស់​ពី​អត្ថប្រយោជន៍នៃទំនាក់ទំនងរួចទៅហើយ ទើបបានចេញ​លិខិត​អញ្ជើញ​ជា​ផ្លូវ​ការ​បែប​នេះ​នោះ​។សម្ដេចធិបតីបញ្ជាក់ទៀតថា ប្រមុខរាជរដ្ឋាភិបាលកម្ពុជា និងប្រមុខ​រដ្ឋាភិបាល​សាធារណរដ្ឋ​បារាំង​ គឺមានភារកិច្ចសម្រាប់ជាតិរៀងខ្លួន អ្វីទាំងអស់គ្មានឡើយផលប្រយោជន៍បុគ្គល ទាំង​អស់​គឺ​និយាយ​អំពី​ការទូត កិច្ចសហប្រតិបត្តិការ ការវិនិយោគ ការអប់រំ វប្បធម៌ និងទំនាក់​ទំនង​សម្រាប់​ប្រយោជន៍​ជាតិ​រៀង​ៗខ្លួន ក្នុងនោះក៏មានការស្នើ​សុំ​អាហារូបករណ៍​ពី​រដ្ឋាភិបាល​បារាំង​មក​ឱ្យ​និស្សិត​កម្ពុជាដែរ៕ អត្ថបទ៖វ៉ន ដារ៉ា

ប្រទេសចិន ដែលជាសម្ព័ន្ធមិត្តរបស់រុស្ស៊ី ចាំបាច់ត្រូវជួយបញ្ចប់សង្រ្គាមអ៊ុយក្រែន

2024/01/15 11:00:54 am        231
Facebook Telegram Linkin
តំណាងជាន់ខ្ពស់របស់អ៊ុយក្រែនបាននិយាយបន្ទាប់ពីកិច្ចប្រជុំការទូតកម្រិតខ្ពស់នៅមុនវេទិកាសេដ្ឋកិច្ចពិភពលោកក្នុងប្រទេសស្វីសថា ចិនត្រូវចូលរួមក្នុងការចរចាដើម្បីបញ្ចប់សង្រ្គាមជាមួយរុស្ស៊ី។ ប្រធានបុគ្គលិកប្រធានាធិបតីអ៊ុយក្រែនលោក អាន់ឌ្រី យើម៉ាក (Andriy Yermak) បាននិយាយកាលពីថ្ងៃអាទិត្យ (១៤ មករា) ថាវាជារឿងសំខាន់ដែលសម្ព័ន្ធមិត្តរុស្ស៊ី គឺប្រទេសចិន ស្ថិតនៅលើតុចរចានៅពេលទីក្រុងគីវ កោះប្រជុំបន្ថែមទៀតលើរូបមន្តសន្តិភាពរបស់ខ្លួន។នាយករដ្ឋមន្ត្រីចិន លោក លី ឈាំង (Li Qiang) នឹងដឹកនាំគណៈប្រតិភូនៅទីក្រុង ដេវ៉ូស (Davos) ក្នុងសប្តាហ៍នេះ។ នៅពេលត្រូវសាកសួរថាតើលោកប្រធានាធិបតី វ្ល៉ូឌីមី ហ៊្សេឡិនស្គី (Volodymyr Zelenskiy) នឹងជួបលោក លី ដែរឬទេ លោក យើម៉ាក បានប្រាប់សន្និសីទសារព័ត៌មានថា «លោកមិនច្បាស់នោះទេ» ព្រោះលោកមិនបានឃើញពីរបៀបវារៈចុងក្រោយរបស់ប្រធានាធិបតីអ៊ុយក្រែន។សមាជិកក្រុមប្រឹក្សាសហព័ន្ធស្វីស លោក អ៊ីកណាហ្ស៊ីអូ ខាសស៊ីស (Ignazio Cassis) ដែលបានចូលរួមការពិភាក្សាកាលពីថ្ងៃអាទិត្យ បានប្រាប់សន្និសីទសារព័ត៌មានមុននេះថា «យើងត្រូវតែធ្វើអ្វីគ្រប់យ៉ាងដើម្បីបញ្ចប់សង្រ្គាមនេះ។ ប្រទេសចិនដើរតួនាទីយ៉ាងសំខាន់ ហើយយើងត្រូវតែស្វែងរកមធ្យោបាយដើម្បីធ្វើការជាមួយប្រទេសចិនលើបញ្ហានេះ ព្រោះទាំងរុស្ស៊ី និងអ៊ុយក្រែន មិនមានឆន្ទៈក្នុងការធ្វើសម្បទាននោះទេ»៕

សម្តេចធិបតី ហ៊ុន ម៉ាណែត ចំអកឱ្យអ្នកនយោបាយចាស់វស្សានៅបារាំងថា​លែងហ៊ានរិះគន់​សម្តេច​ជាក្មេងទៀតហើយ

2024/01/15 10:57:47 am        177
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បាន​ចំអក​ឱ្យ​អ្នក​នយោបាយ​ចាស់​វស្សា​ម្នាក់​នៅប្រទេសបារាំងថា លែងហ៊ានរិះគន់សម្តេច ជាក្មេងទៀតហើយ ព្រោះ​ខ្លាច​ចប់​ដោយ​សារតែ​ដៃគូសន្ទនារបស់សម្តេច គឺប្រធានាធិបតីបារាំង ឯកឧត្តម អេម៉ានុយអែល ម៉ាក្រុង មាន​អាយុ​ប្អូន​សម្តេចធិបតី ២ខែឯណោះ។សម្ដេចធិតបី ថ្លែងក្នុងឱកាស ជួបសំណេះ សំណាលជាមួយសហគមន៍ខ្មែររស់នៅក្នុងទ្វីបអឺរ៉ុប កាល​ពី​វេលា​ម៉ោង ៥ ល្ងាចនៅបារាំង ត្រូវនឹងម៉ោង ១១ យប់ថ្ងៃទី១៤ ខែមករា ឆ្នាំ២០២៤ ម៉ោង​នៅ​កម្ពុជាថា លើកនេះអត់ហ៊ានជេរសម្ដេចថាជាក្មេងទៀតទេ រាល់ដងរិះគន់សម្ដេចថា ក្មេង ...។ ជាមួយគ្នានេះ សម្តេចធិបតី​បាន​ចាត់​ទុក​ការ​ចេញ​សារ​របស់​អ្នក​នយោយ​ចាស់​វស្សាដែល​ឱ្យ​ប្រធានាធិបតីបារាំង ប្រយ័ត្នចាញ់បោកសម្តេច គឺនយោបាយបម្រើមហិច្ឆិតារបស់ខ្លួន មិន​គិត​ពី​ប្រយោជន៍​ជាតិ​នោះឡើយ។សូមជម្រាបថាតបតាមការអញ្ជើញរបស់លោកប្រធានាធិបតីបារាំង អេម៉ានុយអែល ម៉ាក្រុង សម្តេច​ធិបតី ហ៊ុន ម៉ាណែត អញ្ជើញទៅបំពេញទស្សនកិច្ចផ្លូវការនៅប្រទេសបារាំងចាប់ពីថ្ងៃ ១៨-១៩ ខែមករា ឆ្នាំ២០២៤។ ជំនួបរវាងសម្តេចធិបតី ហ៊ុន ម៉ាណែត និងឯកឧត្តម អេម៉ានុយអែល ម៉ាក្រុង នឹងប្តេជ្ញារួមគ្នាធ្វើឱ្យទំនាក់ទំនងដ៏ល្អប្រសើររវាងកម្ពុជា និងបារាំង ឈាន​ដល់​កម្រិតថ្មី៕ អត្ថបទ៖ វ៉ន ដារ៉ា

លោកហ្សេឡិនស្គី៖ យើងមានសក្តានុពលក្នុងការឈ្នះសង្គ្រាម

2024/01/15 10:56:10 am        129
Facebook Telegram Linkin
លោកប្រធានាធិបតី វ៉ូឡូមៀ ហ្សេឡិនស្គី (Volodymyr Zelenskyy) បានប្រកាសថា អ៊ុយក្រែននឹងមានយានដ្រូន និងប្រព័ន្ធសង្គ្រាមអេឡិចត្រូនិកបន្ថែមទៀត។ជាទូទៅ ពីរសប្តាហ៍ដំបូងនៃឆ្នាំនេះ បានបន្ថែមកម្លាំង និងសមត្ថភាពរបស់អ៊ុយក្រែនរួចហើយ។ មានកញ្ចប់ជំនួយថ្មីសម្រាប់អ្នកចម្បាំងរបស់យើង។ មានកិច្ចព្រមព្រៀងដែលត្រូវការច្រើនលើការផលិតអាវុធ និងគ្រាប់ផ្លោងរួមគ្នា [និង] ជាពិសេស បញ្ហាធំបំផុតនោះ គឺយានដ្រូន ហើយនឹងមានយានដ្រូនជាច្រើនគ្រឿងទៀត។យើងកំពុងរៀបចំដំណឹងល្អបន្ថែមទៀតលើវិស័យការពារដែនអាកាស។ យើងផ្តោតទៅលើមីស៊ីល និង សង្គ្រាមអេឡិចត្រូនិក ហើយនឹងមានពួកវាជាច្រើនថែមទៀត និងមានការប្រែប្រួល ពីមួយខែទៅមួយខែ យើងកំពុងបង្កើនការផលិតកាំភ្លើងធំអ៊ុយក្រែនរបស់យើង។អ៊ុយក្រែនមានសក្ដានុពលគ្រប់គ្រាន់ក្នុងការឆ្លងកាត់ផ្លូវដ៏លំបាកនៃសង្រ្គាមនេះ។ យើងមានសក្តានុពលក្នុងការប្រមូលផ្តុំពិភពលោក។ យើងមានសក្តានុពលក្នុងការឈ្នះសង្គ្រាម។ ចំណុចសំខាន់ គឺត្រូវជឿជាក់លើខ្លួនយើង និងជឿលើអ៊ុយក្រែន»។

មេដឹកនាំជាប់ឆ្នោតថ្មីរបស់កោះតៃវ៉ាន់ នឹងប្រឈមមុខនឹងការខឹងសម្បាររបស់ចិន

2024/01/15 10:53:45 am        113
Facebook Telegram Linkin
មេដឹកនាំជាប់ឆ្នោតថ្មីរបស់កោះតៃវ៉ាន់ លោក ឡៃ ឈីងតឺ (Lai Ching-te) ទំនងជាប្រឈមមុខនឹងការងារដ៏លំបាកបំផុតរបស់ខ្លួន នៅពេលដែលលោកចូលកាន់តំណែងក្នុងខែឧសភា ហើយត្រូវដោះស្រាយជាមួយនឹងកំហឹងរបស់ចិន ដែលបានប្រកាសម្តងហើយម្តងទៀតថាលោកឡៃ ជាអ្នកផ្ដាច់ខ្លួនដ៏គ្រោះថ្នាក់។លោក ឡៃ ដែលបានឈ្នះការបោះឆ្នោតកាលពីថ្ងៃសៅរ៍ បាននិយាយម្តងហើយម្តងទៀតក្នុងអំឡុងពេលយុទ្ធនាការនេះថាលោកចង់រក្សាស្ថានភាពដដែលជាមួយប្រទេសចិន ដែលអះអាងថាកោះតៃវ៉ាន់ជាកម្មសិទ្ធិរបស់ខ្លួន ហើយបានស្នើឱ្យមានការពិភាក្សាជាមួយទីក្រុងប៉េកាំង។ លោក ឡៃ ដែលគេស្គាល់យ៉ាងទូលំទូលាយដោយឈ្មោះជាភាសាអង់គ្លេសរបស់ខ្លួនថា វីលៀម (William) បានប្រាប់ស្ថានីយទូរទស្សន៍តៃវ៉ាន់កាលពីខែកក្កដាថា «យើងមិនចង់ក្លាយជាសត្រូវជាមួយចិនទេ ហើយយើងអាចក្លាយជាមិត្តនឹងគ្នាបាន»។ប៉ុន្តែតាមទស្សនៈរបស់ទីក្រុងប៉េកាំង លោក ឡៃ វ័យ ៦៤ឆ្នាំរូបនេះ គឺជាអ្នកផ្ដាច់ខ្លួន និងជា «អ្នកបង្កបញ្ហាមិនឈប់ឈរ» ដោយសារការអត្ថាធិប្បាយដែលលោកបានធ្វើឡើងជាលើកដំបូងក្នុងឆ្នាំ២០១៧ ក្នុងនាមជាមេដឹកនាំរងអំពីការធ្វើជា «អ្នកតស៊ូសម្រាប់ឯករាជ្យភាពផ្លូវការរបស់តៃវ៉ាន់» ដែលនោះជាបន្ទាត់ក្រហមសម្រាប់ទីក្រុងប៉េកាំង។អ្វីដែលរដ្ឋាភិបាលក្រុងប៉េកាំង បារម្ភនោះគឺគំនិតដែលលោក ឡៃ អាចព្យាយាមផ្លាស់ប្តូរស្ថានភាពបច្ចុប្បន្នដោយប្រកាសបង្កើតសាធារណរដ្ឋតៃវ៉ាន់ ប៉ុន្តែលោក ឡៃ បាននិយាយថាលោកនឹងមិនធ្វើបែបនោះឡើយ៕

អ្នករិះគន់ជំនួបសម្ដេចធិបតីជាមួយពលរដ្ឋខ្មែរនៅក្រៅប្រទេសថា ទិញទឹកចិត្តប្រៀបដូចមើលស្រាលពលរដ្ឋខ្លួនឯង

2024/01/15 10:52:02 am        224
Facebook Telegram Linkin
មិនខុសពីសម្ដេចតេជោ ហ៊ុន សែន អតីតនាយករដ្ឋមន្ដ្រីនៃកម្ពុជា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ក្នុងឱកាសអញ្ជើញទៅបំពេញបេសកកម្មនៅក្រៅប្រទេសម្ដងៗ គឺ​បានឆ្លៀតពេល និងផ្ដល់កិត្តិយសក្នុងពិធីជួបសំណេះសំណាលជាមួយប្រជាពលរដ្ឋខ្មែរ និង​និស្សិត​ខ្មែរ​ដែលកំពុងរស់នៅបំពេញការងារ និងសិក្សារៀនសូត្រនៅទីនោះ។នៅយប់ថ្ងៃទី១៤ ខែមករា ឆ្នាំ២០២៤នេះ (ម៉ោងនៅកម្ពុជា) សម្ដេចធិបតី ហ៊ុន ម៉ាណែត និង​លោក​ជំទាវបណ្ឌិត បានអញ្ជើញជួបសំណេះសំណាលជាមួយប្រជាពលរដ្ឋ និង​និស្សិត​ខ្មែរ​រស់​នៅ​ទ្វីប​អឺរ៉ុប ក្នុងពេលបំពេញទស្សនកិច្ចនៅទីក្រុងប៉ារីស ប្រទេសបារាំង។ សម្ដេចធិបតី បានមាន​ប្រសាសន៍​ថា ជំនួបជាមួយប្រជាពលរដ្ឋរស់នៅពេលនេះ ជាការស្វែងយល់អំពីសុខទុក្ខ និង​ជម្រាប​អំពី​ការវិវឌ្ឍនានានៅប្រទេសកម្ពុជា។សម្ដេចធិបតីនាយករដ្ឋមន្រ្ដីបញ្ជាក់ថា ជំនួបសំណេះសំណាលនេះ មិនមែន​ជា​ការ​ទិញ​ទឹក​ចិត្ត​ប្រជាពលរដ្ឋ​ខ្មែររស់នៅក្រៅប្រទេសនោះឡើយ ហើយសម្ដេច​ក៏​បាន​ផ្ដាំ​ទៅ​អ្នក​ដែល​រិះ​គន់​រាល់​ជំនួប​នានា​នៅក្រៅប្រទេសរបស់សម្ដេចជាមួយបងប្អូនប្រជាពលរដ្ឋខ្មែរថា ជាការទិញទឹកចិត្តនោះ ប្រៀប​ដូច​ជាការមើលស្រាលប្រជាពលរដ្ឋខ្មែរខ្លួនឯង។ ផ្ទុយទៅវិញសម្ដេចថា ជំនួប​នេះ​បង្ហាញ​អំពី​ស្មារតី​សាមគ្គីដ៏ល្អរបស់ប្រជាពលរដ្ឋខ្មែរ។សម្ដេចធិបតីនាយករដ្ឋមន្រ្ដីបានបញ្ជាក់ថា ប្រជាពលរដ្ឋខ្មែររស់នៅទីណាក៏ដោយ មិន​ថា​ចេញ​មក​ក្រៅ​ប្រ​ទេសដោយស្ថានភាពណានោះទេ ពោលនៅតែមានចិត្តគិតអំពីប្រទេសជាតិទាំងអស់ ហើយ​ជាក់​ស្ដែងសម្ដេចខ្លួនឯងផ្ទាល់ធ្លាប់សិក្សារៀនសូត្រនៅក្រៅប្រទេស ដូច្នេះ​ដឹង​ច្បាស់​ណាស់​អំពី​ស្ថានភាព​ទាំងអស់នេះ នៅពេលខ្លួនចាកចេញពីប្រទេសកំណើត។សម្ដេចធិបតីនាយករដ្ឋមន្ដ្រីនៃកម្ពុជា បានបន្ថែមទៀតថា សម្រាប់ប្រជាពលរ​ដ្ឋ​ខ្មែរ​ដែល​អញ្ជើញ​មក​ចូល​រួម​ក្នុង​ពិធីជួបសំណេះសំណាលនៅពេលនេះ អ្នកខ្លះបានធ្វើដំណើររហូតដល់ជាង ១០ ម៉ោង​ឯណោះទើបមកដល់ទីក្រុងប៉ារីស ប្រទេសបារាំង ពោលមកពីប្រទេសឆ្ងាយ ដូចជា ប៊ែលហ្សិក ស៊ូរិកជាដើម។ ក្នុងឱកាសជំនួបនោះសម្តេចធិបតីក៏បានថ្លែងអំណរគុណដល់ក្រុមការងារយុវជននៅក្រៅប្រទេស និង​អ្នកពាក់ព័ន្ធ ដែលសហការគ្នាបានល្អ ក្នុងការរៀបចំជំនួបសំណេះសំណាលនាពេលនេះ ដែល​មាន​អ្នក​ចូលរួមប្រមាណជាង ២ពាន់នាក់៕ អត្ថបទ៖ វ៉ន ដារ៉ា

ខេត្តត្បូងឃ្មុំនឹងរៀបចំពិធីចាប់ត្រីនៅថ្ងៃទី១៧ ខែកុម្ភៈខាងមុខ ដើម្បីរក្សាវប្បធម៌ប្រពៃណីបែបបុរាណ

2024/01/14 04:50:07 pm        282
Facebook Telegram Linkin
ខេត្តត្បូងឃ្មុំ នឹងរៀបចំពិធីចាប់ត្រីបែបបុរាណនៅថ្ងៃទី១៧ ខែកុម្ភៈ ឆ្នាំ២០២៤ ដើម្បីរក្សាវប្បធម៌ ប្រពៃណីបែប បុរាណរបស់អ្នកស្រុក និងជាកម្មវិធីជួបជុំបង្កើនចំណងមិត្តភាព និងសាមគ្គីភាពរបស់អ្នកស្រុកភូមិផងដែរ។យោងតាមសេចក្ដីជូនដំណឹងរបស់រដ្ឋបាលស្រុកមេមត់ ខេត្តត្បូងឃ្មុំ បានឱ្យដឹងថា ការចាប់ត្រីនឹងចាប់ផ្តើមនៅម៉ោង ៩ ព្រឹកតទៅ នៅបឹងត្រពាំងក្រម ភូមិសាទុំ ឃុំជាំក្រវៀន ស្រុកមេមត់ ខេត្តត្បូងឃ្មុំ។ ចំពោះឧបករណ៍ សម្រាប់ចាប់ត្រីរួមមាន អង្រុត, ឈ្នាង ,ត្រក,ក្លុះ រួមទាំងឧបករណ៍ចាប់ត្រីបែបបុរាណផ្សេងទៀត។សូមជម្រាបថា ជារៀងរាល់ឆ្នាំនៅក្នុងខែកុម្ភៈ បន្ទាប់ពីបងប្អូនប្រជាកសិករ បានប្រមូលផលកសិកម្មរួចរាល់អស់ហើយនោះ គឺតែងតែធ្វើប្រារព្ធពិធីចាប់ត្រី នៅរមណីយដ្ឋាន បឹងត្រពាំងក្រម ស្ថិតក្នុងភូមិសាទុំ ឃុំជាំក្រវៀន ស្រុកមេមត់ ខេត្តត្បូងឃ្មុំ ។ ដើម្បីរំលឹករក្សាអភិរក្សកេរ្តិ៍តំណែលពីបុរាណតរៀងមក ក្នុងតំបន់នេះ។ ប្រជាពលរដ្ឋប្រមាណជាង ៦ ម៉ឺននាក់ មកពី ឃុំជាំក្រវៀន ឃុំជាំ ស្រុកមេមត់ ខេត្តត្បូងឃ្មុំ។ ហើយក៏មានបងប្អូនប្រជាពលរដ្ឋមានមកពីខេត្តក្រចេះ កំពង់ចាម ខេត្តព្រៃវែង ​និងខេត្តស្វាយរៀង ផងដែរ​ ដែលបានចូលរួមចាប់ត្រីកម្សាន្តនៅខេត្តត្បូងឃ្មុំនេះ ប្រកបដោយស្មារតីភាតរភាពសាមគ្គីភាព ស្រឡាញ់រាក់ទាក់គ្នា ប្រកបដោយ សីលធម៌ សុជីវធម៌ យ៉ាងល្អផូរផង់ និងមានលក្ខណៈជាតិនិយមគួរជាទីមោទនៈ៕

យោធាចិន បញ្ចេញរូបភាពសមយុទ្ធ ក្រោយការបោះឆ្នោតកោះតៃវ៉ាន់

2024/01/14 04:35:43 pm        161
Facebook Telegram Linkin
យោធាចិនបានចេញផ្សាយរូបភាពថ្មីៗនៃទូកមីស៊ីល ដែលធ្វើសមយុទ្ធបាញ់គ្រាប់ពិតនៅថ្ងៃអាទិត្យ (១៤ មករា) នេះ រយៈពេលមួយថ្ងៃបន្ទាប់ពីបេក្ខភាពគណបក្សប្រជាធិបតេយ្យជឿនលឿន (DPP) របស់កោះតៃវ៉ាន់ លោក ឡៃ ឈីងតឺ បានឈ្នះការបោះឆ្នោតមេដឹកនាំថ្មី។បញ្ជាការភាគខាងកើតរបស់កងទ័ពរំដោះប្រជាជន (PLA) ដែលទទួលខុសត្រូវលើតំបន់ជុំវិញកោះតៃវ៉ាន់ បានបង្ហោះរូបភាពនៅលើគណនី វីឆាត (WeChat) របស់ខ្លួនដែលបង្ហាញពីទូកមីស៊ីលធ្វើសមយុទ្ធបាញ់គ្រាប់ពិត។ ទោះយ៉ាងណាក៏ដោយ ការបង្ហោះនេះមិនបានបញ្ជាក់ពីទីតាំង ឬនិយាយចំៗអំពីការបោះឆ្នោតរបស់តៃវ៉ាន់ទេ។សារបង្ហោះបានរៀបរាប់ថា បុគ្គលិកម្នាក់របស់ទូកមីស៊ីលនេះបានចូលរួមក្នុងសមរភូមិទ័ពជើងទឹកនៅខែសីហា ឆ្នាំ១៩៦៥ រវាងកងទ័ពជើងទឹកចិន និងកោះតៃវ៉ាន់ ដែលចិនទទួលបានជ័យជម្នះ។ យុទ្ធនាការបោះឆ្នោតគណបក្ស DPP របស់លោក ឡៃ គឺកំណត់អត្តសញ្ញាណដាច់ដោយឡែករបស់កោះតៃវ៉ាន់ និងបដិសេធការទាមទារទឹកដីរបស់ចិន។ ទន្ទឹមនឹងនោះ ប្រទេសចិន ដែលចាត់ទុកកោះស្វ័យគ្រប់គ្រងតៃវ៉ាន់ជាទឹកដីរបស់ខ្លួន បាននិយាយថា ខ្លួននឹងមិនបោះបង់គោលដៅរបស់ខ្លួននៃ «ការបង្រួបបង្រួម» តៃវ៉ាន់ឡើយ៕

ឆ្នាំ២០២៣ ខេត្តពោធិ៍សាត់សម្រេចបានជិត ៩០% លើការងារវិស័យទឹកស្អាត និងអនាម័យជនបទ

2024/01/14 03:52:29 pm        178
Facebook Telegram Linkin
ពោធិ៍សាត់៖ ក្រុមការងារបច្ចេកទេសវិស័យផ្គត់ផ្គង់ទឹកស្អាត និងការលើកកម្ពស់អនាម័យជនបទខេត្តពោធិ៍សាត់ ហៅកាត់ថា (PWG) បានបើកកិច្ចបរជុំបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ ស្តីពីការផ្គត់ផ្គង់ទឹកស្អាត និងការលើកកម្ពស់អនាម័យជនបទខេត្តពោធិ៍សាត់។កិច្ចប្រជុំនេះដឹកនាំដោយលោក ឡាយ វិសិដ្ឋ អភិបាលរងខេត្ត និងជាប្រធានក្រុមការងារ និងដោយមានការចូលរួមពីលោក ខែម សុខុន ប្រធានសម្របសម្រួលអង្គការដៃគូរ លោក ធីម សុធារ៉ា ប្រធានមន្ទីរអភិវឌ្ឍន៍ជនបទ តំណាងរដ្ឋបាលក្រុង-ស្រុកតាំង៧ តំណាងអង្គការនានាជាសមាជិក (PWG) និងអង្គភាពមន្ទីរជំនាញពាក់ព័ន្ធ ។គោលបំណងនៃកិច្ចប្រជុំនេះ ​គឺដើម្បីពិនិត្យមើលពីការអនុវត្តន៍ ការទទួលខុសត្រូវការងារផ្គត់ផ្គង់ទឹក និងអនាម័យជនបទក្នុងខេត្តពោធិ៍សាត់ រួមនិងនិងការចែករំលែកបទពិសោធន៍ ពិភាក្សាពិគ្រោះ​យោបល់​លើផលប៉ះពាល់អវិជ្ជមាន នៃកង្វះការផ្គត់ផ្គង់ទឹកស្អាតនិងអនាម័យជនបទ​ក្នុង​ខេត្តពោធិ៍សាត់ ពីគ្រប់ភាគីពាក់ព័ន្ធទាំងអស់ ដើម្បីសម្រេចអោយបាននូវទស្សនៈវិស័យរបស់​រាជរដ្ឋាភិបាល “នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទត្រូវទទួលបានកាត​ផ្គត់ផ្គង់ទឹកស្អាតនិងអនាម័យប្រើប្រាស(១០០%)ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តរភាព” ។បើតាមរបាយការណ៍របស់លោក លោក ធីម សុធារ៉ា ប្រធានមន្ទីរអភិវឌ្ឍន៍ជនបទ និង​ជាប្រធានលេខាធិការដ្ឋាន(PWG) បានអោយដឹងថា សម្រាប់ក្នុងឆ្នាំ២០២៣ ក្រុមការងារ​បច្ចេកទេសវិស័យផ្គត់ផ្គង់ទឹកស្អាត និងការលើកកម្ពស់អនាម័យជនបទខេត្តពោធិ៍សាត់ និង​ក្រុមលេខាធិការដ្ឋាន (PWG) ដែលមានមន្ទីរអភិវឌ្ឍន៍​ជនបទជាសេនាធិការ សម្រេច​បានលទ្ធផលសរុបរួមក្នុងខេត្តពោធិ៍សាត់ លើវិស័យផ្គត់ផ្គង់ទឹកស្អាតបាន៨៧,១៤ភាគរយ និងវិស័យអនាម័យជនបទបាន៨៤ភាគរយ ។ លោក ឡាយ វិសិដ្ឋ ក្នុងនាមប្រធានក្រុមការងារ(PWG)ខេត្តពោធិ៍សាត់ បានលើកឡើងថា មូលដ្ឋានភូមិ-ឃុំមួយចំនួនក្នុងខេត្តស្ថិតក្នុងតំបន់ភ្នំ និងនៅលើផ្ទៃទឹកដែលមានឧបសគ្គ​ជា​ច្រើនក្នុងការអនុវត្តការងារផ្គត់ផ្គង់ទឹក ​និងអនាម័យជនបទ ដូចនេះក្រុមការងារ(PWG) មន្ទីរពាក់ព័ន្ធ អង្គការដៃគូរ ​ក៏ដូចជាអាជ្ញាធរមូលដ្ឋានត្រូវបន្តធ្វើការសហការគ្នាយកចិត្តទុកដាក់ដោះស្រាយ ដើម្បី​សម្រេចអោយបានតាមផែនការយុទ្ធសាស្ត្រជាតិ ។ ក្នុងនោះដែរក្នុងឆ្នាំ២០២៤ យើងនឹងសម្រេច​អោយបាន ស្រុកតាលោសែនជ័យ ជាស្រុកបញ្ឈប់ការបន្ទោបង់ពាសវាលពាលកាល ហើយក្នុង​ឆ្នាំ២០២៥ នឹងសម្រេចអោយបាន ស្រុកភ្នំក្រវាញ ជាស្រុកបញ្ឈប់​ការបន្ទោបង់ពាសវាលពាលកាល ៕

បណ្ដាញសង្គម

ព័ត៌មានថ្មីៗ

ក្រុមហ៊ុន VISA Worldwide Pte. Limited គាំទ្រគម្រោងរបស់ក្រសួងទេសចរណ៍លើការអភិវឌ្ឍន៍ប្រព័ន្ធទេសចរណ៍វៃឆ្លាត
09/11/2025 08:09 PM
Facebook Telegram Linkin
ភាគហ៊ុនអាស៊ីជួបប្រទះលំហូរចេញនៃទុនបរទេសប្រចាំខែជាលើកទី១ រយៈពេល ៤ខែ ក្នុងខែសីហា
09/11/2025 07:09 PM
Facebook Telegram Linkin
នគរបាលជាតិកម្ពុជា និងនគរបាលភូមិន្ទថៃ ជួបពិភាក្សាលើការពង្រឹងកិច្ចសហការទប់ស្កាត់ និងបង្ក្រាបបទល្មើសឆ្លងដែន ជាពិសេសបទល្មើសឆបោកតាមប្រព័ន្ធបច្ចេកវិទ្យា
09/11/2025 07:09 PM
Facebook Telegram Linkin
ហូឡង់គ្រោងនឹងហាមឃាត់ការនាំចូលពីតំបន់តាំងទីលំនៅរបស់ជនជាតិជ្វីហ្វអ៊ីស្រាអែល
09/11/2025 07:09 PM
Facebook Telegram Linkin
ក្រុមហ៊ុនអចលនទ្រព្យហុងកុង សន្យាពិនិត្យលទ្ធភាពរៀបចំឱ្យមានមន្ទីរពេទ្យចល័ត នៅកម្ពុជា
09/11/2025 07:09 PM
Facebook Telegram Linkin
​​ វិមានក្រឹមឡាំង៖ សមយុទ្ធយោធារុស្ស៊ី-បេឡារុស គ្មានបំណងប្រឆាំងប្រទេសដទៃណាមួយនោះទេ
09/11/2025 07:09 PM
Facebook Telegram Linkin
ជនប៉ាឡេស្ទីនមួយចំនួន រត់ភៀសខ្លនចេញពីទីក្រុងហ្កាហ្សា ខណៈពលរដ្ឋខ្លះទៀតកាន់ទុក្ខមនុស្សជាទីស្រលាញ់
09/11/2025 07:09 PM
Facebook Telegram Linkin
កម្ពុជា ទាក់ទាញក្រុមហ៊ុនធំនៅទីក្រុងហុងកុង មកវិនិយោគការផ្គត់ផ្គង់អគ្គិសនី និងថាមពល
09/11/2025 06:09 PM
Facebook Telegram Linkin
ព័រទុយហ្គាល់ចាប់ផ្តើមកំណែទម្រង់ច្បាប់ការងារ ដោយរងការរិះគន់ពីសហជីព
09/11/2025 06:09 PM
Facebook Telegram Linkin
ក្រុងសេអ៊ូល៖ កម្មករកូរ៉េខាងត្បូងដែលចាប់ខ្លួននៅក្នុងការវាយឆ្មក់អាមេរិក ត្រូវដោះលែងឲ្យវិលត្រឡប់មកកាន់មាតុប្រទេសវិញ
09/11/2025 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.