នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់
ឯកឧត្តម ចាន់ ដារ៉ុង ដឹកនាំគណៈកម្មការ​អន្តរ​ក្រសួង​ចុះ​ពិនិត្យ​វាយ​តម្លៃ​បញ្ចប់​សុពល​ភាព​ការងារ​ថែ​ទាំ​ផ្លូវ​ខួបចំនួន ៣កំណាត់ ក្នុងខេត្តពោធិ៍សាត់
BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យ​នូវ​កិច្ច​ប្រជុំ​​វិសាមញ្ញ នៃ​គណៈកម្មាធិកា​រ​ព្រំដែន​ទូទៅកម្ពុជា-ថៃ

នយោបាយ​ និង ការអភិវឌ្ឍន៍

ប្រជាជនធ្វើការតវ៉ាប្រឆាំងនឹងលោកប្រធានាធិបតី Assad នៅក្នុងខេត្ត Sweida ប្រទេសស៊ីរី

2023/09/05 12:44:35 pm        65
Facebook Telegram Linkin
ស៊ីរី៖ ប្រជាជនបានដើរតវ៉ាតាមដងផ្លូវក្នុងខេត្ត Sweida ប្រទេសស៊ីរីកាលពីថ្ងៃចន្ទ (៤ កញ្ញា) ដែលជាការតវ៉ាចុងក្រោយបង្អស់ប្រឆាំងនឹងប្រធានាធិបតីស៊ីរី លោក Bashar al-Assad។ ការតវ៉ានេះ បានចាប់ផ្តើមជិតពីរសប្តាហ៍មុនជុំវិញស្ថានភាពជីវភាពក្រីក្រ និងបានឈានទៅរកការអំពាវនាវជាថ្មីសម្រាប់ការផ្លាស់ប្តូរនយោបាយ។ប្រទេសស៊ីរី ស្ថិតក្នុងវិបត្តិសេដ្ឋកិច្ចដ៏ជ្រាលជ្រៅ ដែលបានឃើញរូបិយប័ណ្ណរបស់ខ្លួនធ្លាក់ចុះដល់កំណត់ត្រា១៥.៥០០ផោនស៊ីរីទល់នឹងប្រាក់ដុល្លារអាមេរិក កាលពីខែមុន ក្នុងការបង្កើនល្បឿនធ្លាក់ចុះដោយសេរី។ ប្រទេសនេះបានជួញដូរក្នុងតម្លៃ៤៧ផោនក្នុង១ដុល្លារ នៅដើមជម្លោះកាលពី១២ឆ្នាំមុន។បាតុកម្មបានផ្ទុះឡើងនៅទីក្រុង Sweida ក្នុងខែសីហា ជុំវិញការដកថវិកាឧបត្ថម្ភថ្លៃប្រេងឥន្ធនៈ។ ខេត្តដើមកំណើតនៃសហគមន៍ Druze ភាគច្រើននៃប្រទេសស៊ីរី គឺខេត្ត Sweida នៅតែស្ថិតក្នុងការគ្រប់គ្រងរបស់រដ្ឋាភិបាលពេញរយៈពេលសង្គ្រាម ហើយតំបន់ភាគច្រើនត្រូវបានរួចផុតពីអំពើហឹង្សា ដែលគេឃើញកើតមាននៅកន្លែងផ្សេងទៀតក្នុងប្រទេសនេះ៕

ក្រសួងពីរសហការបើកយុទ្ធនាការកាត់បន្ថយប្រើប្រាស់ប្លាស្ទិក តាមសាលារៀនកម្រិតទូទាំងប្រទេស

2023/09/05 12:43:24 pm        68
Facebook Telegram Linkin
ភ្នំពេញ៖ ក្រោយពី ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន បានប្រកាសចាប់ផ្តើម​អនុវត្តយុទ្ធនាការ​កាត់បន្ថយការប្រើប្រាស់ថង់ប្លាស្ទិក ផ្តើមចេញពីសាលារៀនចំនួន ៤៤ កន្លែងដំបូងនៅស្រុកអូររាំងឳ ខេត្តត្បូងឃ្មុំ នៅពេលនេះ ក្រសួងបរិស្ថាន បានសម្រេចបង្កើន​កិច្ចសហការជាមួយក្រសួងអប់រំយុវជន និងកីឡា ពង្រីកការអនុវត្តយុទ្ធនាការនេះនៅតាម​សាលារៀន​កម្រិតទូទាំង​ប្រទេសក្រោមពាក្យស្លោក «ថ្ងៃនេះ ខ្ញុំមិនប្រើថង់ប្លាស្ទិកទេ»។ឯកឧត្តម ផៃ ប៊ុនឈឿន រដ្ឋលេខាធិការ និងជាអ្នកនាំពាក្យក្រសួងបរិស្ថាន ថ្លែងប្រាប់ BTV នៅថ្ងៃទី៥ ​ខែកញ្ញានេះថា ​នៅក្នុងដំណើរការអនុវត្តយុទ្ធនាការកាត់បន្ថយថង់បា្លស្ទិច ក្រោមពាក្យ​ស្លោក «ថ្ងៃនេះ ខ្ញុំមិនប្រើថង់ប្លាស្ទិចទេ» និង «ដើម្បីភាពល្អបរិសុទ្ធបរិស្ថានយើង» ដែលផ្តើមចេញ​ពី​សិស្សានុសិស្សនៅតាមសាលារៀននេះ គឺក្រសួងបរិស្ថាន ​និងក្រសួងអប់រំយុវជន និងកីឡា នឹង​ស្នើសុំឲ្យសាលារៀននានា អាចជ្រើសពេលមួយសប្តាហ៍ យកពេលមួយថ្ងៃ មិនមានការ​ប្រើប្រាស់ថង់​បា្លស្ទិចនៅក្នុងសាលារៀននោះទេ។បើតាមនាយកសាលាបឋមសិក្សាប៊ុនរ៉ានី ហ៊ុន សែន ព្រែកសំរោង និងសិស្សានុសិស្ស នៅក្រុងតាខ្មៅ នៅខេត្តកណ្តាល ក៏ដូចសាលារៀន ផ្សេងៗទៀតដែរគឺបានត្រៀមខ្លួនរួចហើយ និងមានពេញចិត្តចូលរួមអនុវត្តយុទ្ធនាការនេះ ដើម្បីធ្វើឲ្យសោភ័ណ្ឌសលារៀនមានបរិស្ថានស្អាត និងលើកកម្ពស់សុខភាពសិស្សានុសិស្សនៅតាមសាលារៀនជាដើម។សូមបញ្ជាក់ថានៅរាជធានីភ្នំពេញ ​សំណល់សំរាមជាង ៣ ៥០០ តោន ត្រូវបានបង្កើតឡើង​ជារៀងរាល់ថ្ងៃ ក្នុងនោះ ២០% ជាសំរាមប្លាស្ទិក។ ដើម្បីដោះស្រាយការបំពុលចេញ​ប្លាស្ទិក​នេះក្រសួងបរិស្ថាន និងក្រសួងពាក់ព័ន្ធបានអនុវត្តការលើកកម្ពស់វិធាន ​4Rs (ការបដិសេធ ការកាត់បន្ថយ ​ការប្រើប្រាស់ឡើងវិញ ​និងការកែច្នៃឡើងវិញ) ដោយមានការចូលរួមយ៉ាងសកម្ម​ពីប្រជាពលរដ្ឋ ពីវិស័យឯកជន និងអង្គការក្រៅរដ្ឋាភិបាល ៕ អត្ថបទ ស៊ុម សុខជា

ទ្វីបអាហ្រ្វិក ស៊ូទ្រាំនឹងការឡើងកម្ដៅខ្លាំងជាងកន្លែងផ្សេងទៀតក្នុងពិភពលោក

2023/09/05 12:37:56 pm        57
Facebook Telegram Linkin
ទ្វីបអាហ្រ្វិក៖ របាយការណ៍រួមរបស់សហភាពអង្គការសហប្រជាជាតិ-អាហ្វ្រិក បាននិយាយកាលពីថ្ងៃចន្ទ (៤ កញ្ញា) ថា ទ្វីបអាហ្រ្វិកកំពុងឡើងកម្ដៅក្នុងអត្រាលឿនជាងកន្លែងផ្សេងទៀតក្នុងពិភពលោក ហើយស៊ូទ្រាំនឹងគ្រោះមហន្តរាយអាកាសធាតុ និងអាកាសធាតុធ្ងន់ធ្ងរ ដូចជាគ្រោះរាំងស្ងួតផងដែរ។ទ្វីបនេះត្រូវបានវាយប្រហារដោយអាកាសធាតុធ្ងន់ធ្ងរ និងគ្រោះថ្នាក់ដល់ទៅ៨០ករណីកាលពីឆ្នាំមុននេះ នេះបើយោងតាម របាយការណ៍ដែលផ្ញើដោយអង្គការឧតុនិយមពិភពលោក (WMO) ស្របពេលជាមួយនឹងកិច្ចប្រជុំកំពូលអាកាសធាតុដំបូងរបស់ទ្វីបអាហ្រ្វិកនៅប្រទេសកេនយ៉ា ដែលការផ្តល់ហិរញ្ញប្បទានអាកាសធាតុត្រូវបានកំណត់ផ្តោតជាសំខាន់។គ្រោះមហន្តរាយដូចជា គ្រោះរាំងស្ងួតដ៏អាក្រក់បំផុតរបស់ទ្វីបអាហ្រ្វិក ក្នុងរយៈពេល៤០ឆ្នាំ និងចំហេះព្រៃព្រៃនៅអាល់ហ្សេរី បណ្តាលឱ្យមនុស្សស្លាប់ចំនួន៥.០០០នាក់ និងការខូចខាតសេដ្ឋកិច្ចជាង៨,៥ពាន់លានដុល្លារអាមេរិក នេះបើយោងតាមការបង្ហាញរបស់របាយការណ៍ ដោយសំអាងដល់មូលដ្ឋានទិន្នន័យសង្គ្រោះបន្ទាន់។ តួរលេខពិតប្រាកដទំនងជាខ្ពស់ជាងនេះ ដោយសារគម្លាតនៃការរាយការណ៍។កម្ដៅបានកើនឡើងលឿនបំផុតនៅអាហ្រ្វិកខាងជើង ដែលត្រូវបានទទួលរងនូវរលកកម្ដៅជាច្រើនចាប់តាំងពីឆ្នាំមុន។ របាយការណ៍បាននិយាយថា នោះបានរួមចំណែកដល់ការធ្លាក់ចុះនៃផលិតកម្មធញ្ញជាតិមកត្រឹម៣៣លានតោន ឬប្រហែល១០% ទាបជាងមធ្យមភាគប្រាំឆ្នាំមុន បើទោះបីជាផលិតកម្មនៅក្នុងតំបន់មួយចំនួននៃទ្វីបនេះដូចជាអាហ្វ្រិកខាងលិច បានកើនឡើងស្របពេលមានភ្លៀងធ្លាក់ខ្លាំងក៏ដោយ៕

ប្រព័ន្ធផ្សព្វផ្សាយ៖ ប្រទេសបែលហ្ស៊ិកទិញមីស៊ីល Sea Sparrow ពីអាល្លឺម៉ង់ ដើម្បីបញ្ជូនទៅឲ្យអ៊ុយក្រែន

2023/09/05 12:34:54 pm        50
Facebook Telegram Linkin
អ៊ុយក្រែន៖ សារព័ត៌មានបែលហ្ស៊ិក L'Echo ( ឡេសូ) បានរាយការណ៍កាលពីថ្ងៃទី៤ ខែកញ្ញាថា ក្រសួងការពារជាតិបែលហ្ស៊ិកបានទិញមីស៊ីល Sea Sparrow រយៈចម្ងាយខ្លីពីប្រទេសអាល្លឺម៉ង់ ហើយគ្រោងនឹងបញ្ជូនជាងពាក់កណ្តាលទៅឲ្យអ៊ុយក្រែន។ប្រទេសបែលហ្ស៊ិក បានទិញមីស៊ីលដែលបាញ់ចេញពីសមុទ្រទៅអាកាសដែលបំពាក់ដោយរ៉ាដាចំនួន១៤គ្រឿង ដែលត្រូវបានប្រើនៅលើនាវាចម្បាំងអាល្លឺម៉ង់ ហើយនៅពេលនេះត្រូវបានដកចេញ ក្នុងតម្លៃ ៧.000 អឺរ៉ូ (៧.៦00 ដុល្លារ) ក្នុងមួយគ្រឿង។រដ្ឋាភិបាលបែលហ្ស៊ិក គ្រោងផ្តល់អាវុធចំនួន៨គ្រឿងដែលផលិតដោយសហរដ្ឋអាមេរិកដល់ទីក្រុងគីវ។ខណៈពេលដែលការផ្តល់ឲ្យនេះ គឺជាទម្រង់ស្រាលនៃជំនួយយោធា វាបង្ហាញពីលក្ខណៈនៃការបំពេញបន្ថែមនៃការគាំទ្ររបស់ប្រទេសបែលហ្ស៊ិក នេះបើយោងតាមប្រភពរបស់សារព័ត៌មានL'Echo នៅក្នុងក្រសួងការពារជាតិ។សារព័ត៌មាន L'Echo បានបន្ថែមថា មីស៊ីលទាំងនោះ អាចកែច្នៃទៅជាមីស៊ីលបាញ់ពីផ្ទៃដីរាបទៅលើអាកាស ឬ ប្រើសម្រាប់បំពាក់លើយានដ្រូន។នៅក្នុងខែមករា សារព័ត៌មាន Politico បានរាយការណ៍ថា មីស៊ីល Sea Sparrows នឹងត្រូវបញ្ចូលទៅក្នុងកញ្ចប់ជំនួយយោធារបស់សហរដ្ឋអាមេរិក ហើយថា យោធាអ៊ុយក្រែន បានរកឃើញវិធីដើម្បីកែសម្រួលជើងទម្របាញ់មីស៊ីល BUK សម័យសូវៀត ដើម្បីបាញ់មីស៊ីលទាំងនោះ៕

ក្រសួងស្ថាប័នភាគច្រើនបានប្រគល់ភារកិច្ច និងកំណត់របៀបរបបការងារតាមសាមីក្រសួងរួចរាល់

2023/09/05 12:28:54 pm        205
Facebook Telegram Linkin
ភ្នំពេញ៖ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានថ្លែងឱ្យដឹងនៅថ្ងៃទី៥ ខែកញ្ញា ឆ្នាំ ២០២៣នេះថា ក្រសួង-ស្ថាប័នភាគច្រើនបានប្រគល់ភារកិច្ច និងកំណត់របៀបរបបការងារ​តាមសាមីក្រសួង​នីមួយៗរួចរាល់​ ខណៈគ្រោងនឹងបញ្ចប់ការរៀបចំបែងចែកក្នុងសប្តាហ៍នេះ។បន្ទាប់ពីកាលពីថ្មីៗនេះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញ​សារសំឡេង​ណែនាំរឲ្យក្រសួងស្ថាប័នត្រូវរៀបចំរដ្ឋលេខាធិការ និងអនុរដ្ឋលេខាធិការ​ចំណុះក្រសួង​ឱ្យបានរួចរាល់ត្រឹមសប្ដាហ៍នេះ ​នៅថ្ងៃទី៥ ខែកញ្ញា ឆ្នាំ២០២៣​ ឯកឧត្តម ប៉ែន បូណា អ្នក​នាំពាក្យ​រាជរដ្ឋាភិបាល ​បានឲ្យដឹងថា ភ្លាមៗក្រោយពីទទួលបានការណែនាំពីសម្តេចធិបតី ហ៊ុន ម៉ាណែត ក្រសួង ស្ថាប័នដែលមិនទាន់បានរៀបចំ បែងចែកការងារនោះ បានរៀបចំបែងចែកភារកិច្ច និងតួនាទី​របស់ថ្នាក់​ដឹកនាំចំណុះក្រសួងជារដ្ឋលេខាធិការ ​និងអនុរដ្ឋលេខាធិការជាបន្តបន្ទាប់។ ឯកឧត្តម ប៉ែន បូណា បញ្ជាក់ថា​ ក្រោយពីបែងចែកភារកិច្ចថ្នាក់ដឹកនាំ​ចំណុះក្រសួងស្ថាប័ននានា មន្រ្តីទាំង​អស់មានភារកិច្ចច្បាស់លាស់​ក្នុងការបំពេញការងារជូនក្រសួង រួមទាំងពន្លឿនដល់​គោលដៅ​កំណែទម្រង់យុទ្ធសាស្រ្តបញ្ចកោណរបស់រាជរដ្ឋាភិបាលផងដែរ។ សូមជម្រាបថា រយៈពេល២ថ្ងៃកន្លងមកនេះ ក្រសួងជាច្រើនបានចេញសេចក្តីសម្រេចស្តីពីការរៀបចំ​បែងចែង​ភារកិច្ច ​និងតួនាទី ​ដើម្បីសំដៅធានាឲ្យបាននូវប្រសិទ្ធភាព ​និងប្រសិទ្ធផល ដើម្បីឈាន​ទៅសម្រេច​បាននូវចក្ខុវិស័យរបស់ក្រសួងនីមួយៗ ​និងប្រកបដោយគុណភាព និងប្រសិទ្ធភាពខ្ពស់៕អត្ថបទ សេក ឧត្តម

៨ខែរមណីយដ្ឋានអង្គរទទួលបានទេសចរបរទេសចូលទស្សនាជិត ៥០ម៉ឺននាក់

2023/09/05 12:21:01 pm        1042
Facebook Telegram Linkin
សៀមរាប៖ រយៈពេល៨ខែ ឆ្នាំ២០២៣ មានភ្ញៀវទេសចរបរទេស ទៅទស្សនាកម្សាន្តនៅ​រមណីដ្ឋាន​អង្គរ ​ចំនួនជិត ៥០ម៉ឺននាក់ និងទទួលបានចំណូលពីការលក់​សំបុត្រ​ជូនភ្ញៀវទេសចរទាំងនោះ ប្រមាណជាង២៣លានដុល្លារ ។ នេះបើយោងតាមសេចក្តីប្រកាសព័ត៌មាន របស់គ្រឹះស្ថានអង្គរ កាលពីថ្ងៃទី០៤ ខែកញ្ញាម្សិលមិញ ។គ្រឹះស្ថានអង្គរ បានឱ្យដឹងថា សម្រាប់ខែសីហា ឆ្នាំ២០២៣ គ្រឹះស្ថានអង្គរ ​រកចំណូលបានចំនួន ជាង២លាន ៧៧ម៉ឺនដុល្លារ ពីការលក់បណ្ណជូនភ្ញៀវទេសចរបរទេស ​ចូលទស្សនារមណីយដ្ឋានអង្គរ ចំនួនជិត៥ម៉ឺននាក់ ហើយក្នុងរយៈពេល៨ខែនេះ រាជរដ្ឋាភិបាល បាន​ឧបត្ថម្ភមូលនិធិ នៃមន្ទីរពេទ្យ​គន្ធបុប្ផាកម្ពុជា ​បានចំនួនសរុបជិត ១លានដុល្លារ ពីចំណែកនៃការលក់​បណ្ណជូនភ្ញៀវទេសចរ​បរទេស ចូលទស្សនា រមណីយអង្គរ សម្រាប់សង្គ្រោះជីវិតកុមារកម្ពុជា ។ឯកឧត្ដម លី សែ អគ្គនាយកគ្រឹះស្ថានអង្គរ ធ្លាប់បានប្រាប់BTVកាលពីពេលថ្មីៗនេះថា ចាប់ពីខែ សីហា ដល់ខែធ្នូ ឆ្នាំ២០២៣ ជារដូវសម្បូរភ្ញៀវ ហើយរំហូរនៃភ្ញៀវទេសចរទៅកាន់ខេត្ដសៀមរាប ភាគ ​ច្រើនមកពីអឺរ៉ុប ​ខណៈក្រសួងទេសចរណ៍ ​ក្រុមហ៊ុនទេសចរណ៍ បានធ្វើការផ្សព្វផ្សាយពី​សក្ដានុពលទេសចរណ៍នៅប្រទេសកម្ពុជា ​ព្រមទាំងវត្តមាន​ព្រលានយន្ដហោះអន្ដរជាតិថ្មីមួយ​ផងដែរ ។ឯកឧត្តម បានរំពឹងថា ឆ្នាំ២០២៣ អាចនឹងមានអ្នកទេសចរទិញសំបុត្រ​ចូលទស្សនាអង្គរ ចំនួន ជាង​៨០ម៉ឺននាក់ លើសពីផែនការ ​ដែលបានគ្រោងទុក​ របស់ក្រសួងទេសចរណ៍ ហើយនឹងទទួល​ចំណូល ប្រមាណ៣៧លានដុល្លារ​ ពីការលក់សំបុត្រចូលទស្សនាប្រាសាទអង្គរ ។សូមបញ្ជាក់ថា បើយោងតាមការព្យាករ កម្ពុជា រំពឹងថា នឹងទទួលបានទេសចរអន្តរជាតិកម្រិតខ្ពស់ ដូចឆ្នាំ២០១៨ មុនវិបត្តិកូវីដ-១៩ យ៉ាងយូរត្រឹមឆ្នាំ២០២៦​ ខណៈដែលវិស័យឯកជន និង​អង្គការដៃគូអភិវឌ្ឍន៍នានា ​បាចូលរួមធ្វើឱ្យសៀមរាបអង្គរ កា្លយជាគោលដៅទេសចរណ៍​ដ៏​ទាក់ទាញផងដែរ ៕អត្ថបទ៖ បាន សុខរិទ្ធ

សម្តេចបវរធិបតី ហ៊ុន ម៉ាណែត៖ កម្ពុជាចង់បានសន្តិភាព និងការអភិវឌ្ឍ

2023/09/05 11:52:30 am        83
Facebook Telegram Linkin
នៅទីក្រុងហ្សាការតា តាំងពីម្សិលមិញមកសម្តេចបវរធិបតី ហ៊ុន ម៉ាណែត បាននិងកំពុងបន្តជួប​មេដឹកនាំ​បរទេសដែលអញ្ជើញមកទីនេះ ដើម្បីចូលរួមក្នុងជំនួបកំពូលអាស៊ាន អាស៊ានបូក និងអាស៊ីបូព៌ា។ អស់ពីសារកោតសរសើរ និងការសាទរ ទទួលបានជាបន្តបន្ទាប់តាំងពីថ្ងៃទី២២ សីហា មក ឥឡូវនេះជាពេលដែលសម្តេច នាយករដ្ឋមន្ត្រីកម្ពុជា ទទួលបានពីថ្នាក់ដឹកនាំអាស៊ាន ការស្វាគមន៍យ៉ាងកក់ក្តៅ មកកាន់ឆាកជាក់ស្តែងនៃតំបន់ និងពិភពលោក។តាមរយៈការសំណេះសំណាលកាលពីម្សិលមិញ និងព្រឹកមិញ (ជាមួយអគ្គលេខាធិការអាស៊ាន ជាមួយប្រធានាធិបតីឥណ្ឌូណេស៊ី ជាមួយសមភាគីឡាវ និងវៀតណាម…) និងតាមរយៈសុន្ទរកថា ជាអាទិ៍នៅក្នុងកិច្ចប្រជុំកំពូលធុរកិច្ចនិងវិនិយោគអាស៊ាន កាលពីម្សិលមិញសម្តេច ហ៊ុន ម៉ាណែត ផ្តើមបញ្ជូនសារសំខាន់ៗ ក្នុងន័យបញ្ជាក់ឡើងវិញ និងក្នុងន័យពង្រឹងជំហររបស់កម្ពុជា​នៅលើឆាកអន្តរជាតិ។នៅក្នុងកាលៈទេសៈអន្តរជាតិមួយតានតឹង (សង្គ្រាមនៅអ៊ុយក្រែន) និង នៅក្នុងបរិបទតំបន់មួយ​ប្រកបដោយគ្រោះថ្នាក់(ការប្រកួតប្រជែងគ្នារវាងបណ្តាមហាអំណាចនៅអាស៊ី-ប៉ាស៊ីហ្វិក) សម្តេច ហ៊ុន ម៉ាណែត ​អះអាងយ៉ាងទទូចថា កម្ពុជាស្នេហាសន្តិភាព។ ក្នុងន័យនេះ សម្តេចគូសបញ្ជាក់ថា«សង្រ្គាមមិនអាចបញ្ចប់ដោយសង្រ្គាមបានឡើយ» និងថា «សន្តិភាពអាចកើតឡើងបាន​ លុះត្រាតែមានការស្រុះស្រួលគ្នាដោយសន្តិវិធី ​និងកិច្ចសន្ទនា ក្រោមស្មារតីនៃនយោបាយឈ្នះ-ឈ្នះ»។ សារទាំងនេះដែលដកស្រង់ចេញពីបទពិសោធន៍​នៃវិនាសកម្មយូរអង្វែងរបស់កម្ពុជា ​សំដៅជាពិសេសទៅលើវិបត្តិនៅអ៊ុយក្រែន និងនៅភូមា។ដោយឡែក ចំពោះសម្តេច ហ៊ុន ម៉ាណែត សន្តិភាព និងការអភិវឌ្ឍចិញ្ចឹមគ្នាទៅវិញទៅមក។ គ្មានសោះឡើយការអភិវឌ្ឍសេដ្ឋកិច្ច ​បើគ្មានសន្តិភាព។ គ្មានដូចគ្នា សន្តិភាពយូរលង់ បើគ្មានការ​អភិវឌ្ឍជានិរន្តរ។ ម្ល៉ោះហើយ តាំងពីម្សិលមិញមក នៅហ្សាការតាប្រទេសឥណ្ឌូណេស៊ី ប្រមុខរាជ​រដ្ឋាភិបាល​កម្ពុជា​ប្រាថ្នាចង់បាន ទីមួយ. ពិភពលោកមួយពហុភាគីនិយម ​ព្រមទាំងសណ្តាប់ធ្នាប់​ពិភពលោកមួយឈរលើមូលដ្ឋានច្បាប់អន្តរជាតិ និងលើគោលការណ៍ ​មិនជ្រៀតជ្រែក។ ទីពីរ. សម្តេច ហ៊ុន ម៉ាណែត ប្រាថ្នាចង់បានការអភិវឌ្ឍរបស់អាស៊ាន (អាស៊ាន​ជាមហាអំណាច​សេដ្ឋកិច្ច​ពិភពលោកទី៥) ​ដែល​ត្រូវតែពង្រឹង ​តាមរយៈការបន្តសមាហរណកម្មតំបន់ ​និង​តាមរយៈការ​ពង្រីក​សមាហរណកម្មទៅក្រៅតំបន់ ​នៅ​លើវិស័យ​សេដ្ឋកិច្ច-ពាណិជ្ជកម្ម៕ ដោយ៖ ហ្សង់ ហ្វ្រង់ស័រ តាន់

គណៈកម្មាការUN មិនបានរកឃើញភ័ស្តុតាងគ្រប់គ្រាន់នៃអំពើប្រល័យពូជសាសន៍ នៅអ៊ុយក្រែនទេ

2023/09/05 11:47:37 am        58
Facebook Telegram Linkin
អ៊ុយក្រែន៖ លោកអេរីក ម៉ូស( Erik Møse) ដែលជាប្រធានគណៈកម្មាការ បានថ្លែងនៅក្នុងសន្និសីទសារព័ត៌មាននៅទីក្រុងគីវ កាលពីថ្ងៃទី៤ ខែកញ្ញាថា គណៈកម្មាការស៊ើបអង្កេតអន្តរជាតិឯករាជ្យរបស់អង្គការសហប្រជាជាតិនៅអ៊ុយក្រែន មិនទាន់អាចសន្និដ្ឋានបានថា ប្រទេសរុស្ស៊ីកំពុងប្រព្រឹត្តអំពើប្រល័យពូជសាសន៍នៅអ៊ុយក្រែនទេ។ លោកម៉ូស បាននិយាយថា៖ «នៅដំណាក់កាលបច្ចុប្បន្ន យើងនៅមិនទាន់សន្និដ្ឋានបានថា មានអំពើប្រល័យពូជសាសន៍ដែលកើតឡើងនៅអ៊ុយក្រែនទេ»។ “ខ្ញុំសូមនិយាយថា យើងដឹងច្បាស់អំពីកង្វល់និងការចោទប្រកាន់ជុំវិញឧក្រិដ្ឋកម្ម… យើងកំពុងស៊ើបអង្កេតរឿងនេះជាជំហានៗ។ រហូតមកដល់ពេលនេះ យើងមិនមានភ័ស្តុតាងគ្រប់គ្រាន់ ដើម្បីបំពេញតាមលក្ខណៈសម្បត្តិផ្លូវច្បាប់នៃអនុសញ្ញាស្តីពីប្រល័យពូជសាសន៍នោះទេ»។ស្របពេលជាមួយគ្នានេះ លោកម៉ូស បានចង្អុលបង្ហាញថា គណៈកម្មការនេះ បានកត់ត្រានូវការរំលោភបំពានមួយចំនួនធំ ដោយកងកម្លាំងរុស្ស៊ី រួមទាំងការសម្លាប់ដោយចេតនា ការឃុំខ្លួនដោយខុសច្បាប់ ការធ្វើទារុណកម្ម ការចាប់រំលោភ និងទម្រង់ផ្សេងទៀតនៃអំពើហិង្សាផ្លូវភេទ និងការនិរទេសកុមារជាដើម៕

ភាពភ័យខ្លាចអាកាសធាតុ ធ្វើឲ្យកុមារ១,៨៥លាននាក់ផ្លាស់លំនៅ នៅអាហ្វ្រិកនៅអនុតំបន់សាហារ៉ាឆ្នាំ២០២២

2023/09/05 11:45:10 am        62
Facebook Telegram Linkin
អាហ្វ្រិក៖ អង្គការសប្បុរសធម៌ពិភពលោក បាននិយាយកាលពីថ្ងៃចន្ទថា កុមារយ៉ាងហោចណាស់១,៨៥លាននាក់ នៅអនុតំបន់សាហារ៉ាអាហ្វ្រិក បានភៀសខ្លួននៅក្នុងប្រទេសរបស់ពួកគេ ដោយសារតែគ្រោះមហន្តរាយបង្កឡើងដោយអាកាសធាតុនៅចុងឆ្នាំ២០២២ ជាតួលេខដែលស្ទើរតែជិតទ្វេដងកាលពីឆ្នាំមុន។ អង្គការសង្គ្រោះកុមារ (Save the Children) ជាអង្គការសប្បុរសធម៌បង្កើតឡើងនៅក្នុងទីក្រុងឡុងដ្រ៍លើកឡើងពីទិន្ន័យពីមជ្ឈមណ្ឌលតាមដានការភៀសខ្លួនខាងក្នុងប្រទេសបាននិយាយថា ក្នុងចំណោមកុមារទាំងនេះ មួយចំនួន បានភៀសខ្លួនចេញច្រើនដង ខណៈអ្នកផ្សេងទៀតទើបតែម្តង ប៉ុន្តែទាំងអស់នេះ នៅតែភៀសខ្លួនចេញពីលំនៅឋាននៅចុងឆ្នាំ ដោយរស់នៅក្នុងជំរំ ឃ្លាតឆ្ងាយពីគ្រួសារ ឬការរៀបចំបណ្តោះអាសន្នផ្សេងទៀត។លោកស្រី Kijala Shako ប្រធានគាំទ្រ ទំនាក់ទំនង យុទ្ធនាការ និងប្រព័ន្ធផ្សព្វផ្សាយប្រចាំនៅការិយាល័យតំបន់អាហ្វ្រិកខាងត្បូង និងខាងកើត របស់អង្គការ Save the Children បាននិយាយនៅក្នុងសេចក្តីថ្លែងការណ៍មួយចេញនៅក្នុងទីក្រុង Nairobi រដ្ឋធានីប្រទេសកេនយ៉ាថា នៅពេលកុមារបាត់បង់ផ្ទះសម្បែង ពួកគេបានបាត់បង់ស្ទើរតែគ្រប់អ្វីៗ ដូចជាដំណើរការចំពោះការថែទាំសុខភាព ការសិក្សាអប់រំ អាហានិងសុវត្ថិភាព។ លោកស្រី Shako និយាយថា លោកស្រីសង្ឃឹមថា មេដឹកនាំដែលកំពុងចូលរួមក្នុងកិច្ចប្រជុំកំពូលអាកាសធាតុអាហ្វ្រិកដែលកំពុងបន្តក្នុងទីក្រុង Nairobi នឹងទទួលស្គាល់ថាវិបត្តិអាកាសធាតុ នឹងមានផលប៉ះពាល់ដ៏មហន្តរាយលើជីវិតរស់នៅរបស់កុមារ និងមានការឆ្លើយតបចំពោះតម្រូវការនិងសិទ្ធរបស់កុមារ៕

អគ្គស្នងការនគរបាលជាតិ ជំរុញឲ្យមានការឯកភាពផ្ទៃក្នុងរឹងមាំ បំពេញតួនាទីស្របតាមជំនាញ និងគោរពតាមឋានានុក្រម

2023/09/05 11:42:34 am        142
Facebook Telegram Linkin
ភ្នំពេញ៖ ក្នុងឱកាសជួបសំណេះសំណាលជាមួយថ្នាក់ដឹកនាំអគ្គស្នងការដ្ឋាននគរបាលជាតិ នាព្រឹកថ្ងៃទី៥ ខែកញ្ញា ឆ្នាំ២០២៣នេះ នាយឧត្តមសេនីយ៍ ស ថេត អគ្គស្នងការនគរបាលជាតិ បានដាក់ចេញការណែនាំជាអាទិភាពមួយចំនួន ដល់ថ្នាក់ដឹកនាំអគ្គស្នងការដ្ឋាននគរបាលជាតិ ក៏ដូចជាស្នងការគ្រប់រាជធានី-ខេត្តទាំងអស់ ​ដើម្បីយកចិត្តទុកដាក់បន្ដអនុវត្ត សំដៅពង្រឹងប្រសិទ្ធភាព​ការងារ, ការទទួលខុសត្រូវតាមមុខងារតួនាទី ភារកិច្ច និងតាមឋានុក្រមរបស់ខ្លួន។នាយឧត្តមសេនីយ៍ បានលើកឡើងថា ក្នុងនាមនគរបាលត្រូវបន្តរួមគ្នាជាធ្លុងមួយ ​មានសាមគ្គីភាព ឯកភាពផ្ទៃក្នុងរឹងមាំ ដើម្បីបំពេញតួនាទី ភារកិច្ចតាមការកំណត់ ស្របតាមជំនាញ គោរពឋានានុក្រម និងច្បាប់ លិខិតបទដ្ឋានពាក់ព័ន្ធ។ក្នុងនោះលោកក៏សំណូមពរដល់មន្រ្តីនគរបាលទាំងអស់ ផ្ដល់ការគាំទ្រ និងសហការ​ជិតស្និទ្ធ​រវាង​ថ្នាក់ដឹកនាំ និងកងកម្លាំងនគរបាលក្រោមឱវាទ ​និងរវាងអង្គភាព​ និងអង្គភាព ដើម្បីប្រសិទ្ធភាពការងារ។ ជាមួយនេះបន្តជំរុញការកែទម្រង់កងកម្លាំងនគរបាលជាតិ ដោយ​ធ្វើការអភិវឌ្ឍស្ថាប័ន និងកសាងធនធានមនុស្ស យកចិត្តទុកដាក់ខ្ពស់ចំពោះជីវភាព សុខុមាលភាព​របស់កងកម្លាំងនគរបាល ជំរុញការអនុវត្តគោលនយោបាយចំពោះមន្ត្រីនគរបាលចូលនិវត្តន៍ និងបាត់បង់សមត្ថភាព ពលី ពិការដោយសារបុព្វហេតុសន្តិសុខជាតិ។ បន្តត្រួតពិនិត្យ និងគ្រប់គ្រងកងកម្លាំងឱ្យបានជាក់លាក់ និងជាប់ជាប្រចាំ ទាំងបរិមាណ វត្តមាន និងសតិអារម្មណ៍ ដើម្បីលើកកម្ពស់ប្រសិទ្ធភាព និងគុណភាពការងារ។ នាយឧត្តមសេនីយ៍ ស ថេត ក៏បានណែនាំឲ្យបន្តពង្រឹងវិន័យឲ្យបានម៉ឺងម៉ាត់ ដើម្បីធានាបាននូវ​សេចក្តីថ្លៃថ្នូរ កិត្តិយស និងសីលធម៌របស់កងកម្លាំងនគរបាលជាតិ ​ដើរទន្ទឹមនឹងការខិតខំពង្រឹង​សមត្ថភាព ការហ្វឹកហ្វាត់បំប៉នជំនាញឲ្យបានជាប់ជាប្រចាំ ​ជាមួយនឹងការពង្រឹងប្រសិទ្ធភាព និង​របៀបរបបការងារតាមសមត្ថកិច្ច ជំនាញ និងឋានានុក្រម ដើរទន្ទឹមនឹងការគិតគូរលើក​ទឹកចិត្ត​កងកម្លាំង​នគរបាលដែលមានស្នាដៃល្អ និងធ្វើការដាក់ពិន័យកងកម្លាំងនគរបាលដែល​ប្រព្រឹត្តខុសឆ្គង ប្រកបដោយភាពត្រឹមត្រូវ មានតម្លាភាព។នៅក្នុងឱកាសនោះដែរនាយឧត្តមសេនីយ៍ អគ្គស្នងការនគរបាលជាតិ ក៏បានណែនាំឲ្យមន្ដ្រី​ទាំងអស់ ​ត្រូវរួមគ្នាការពារថែរក្សានូវសមិទ្ធផលដែលអគ្គស្នងការដ្ឋាននគរបាលជាតិ សម្រេច​បានយ៉ាង​លំបាកលំបិន ក្រោមការដឹកនាំរបស់ នាយឧត្តមសេនីយ៍ សន្តិបណ្ឌិត នេត សាវឿន ឧបនាយករដ្ឋមន្ត្រី ហើយនឹងបន្តរួមគ្នាពង្រឹងសមត្ថភាពស្ថាប័ន និងធនធានមនុស្ស​នៃ​អគ្គស្នងការដ្ឋាននគរបាលជាតិ ​ពង្រឹងសាមគ្គីភាព​ ឯកភាពផ្ទៃក្នុង ពង្រឹងប្រសិទ្ធភាពការងារ និងខិតខំអនុវត្តការងារនានាក្រោមសមត្ថកិច្ចទទួលខុសត្រូវរបស់អគ្គស្នងការដ្ឋាន និងការដឹកនាំ​របស់ក្រសួងមហាផ្ទៃ ឲ្យសម្រេចបានសមិទ្ធផលថ្មីៗថែមទៀត។ ទន្ទឹមនេះ ត្រូវរួមគ្នាការពាររាជរដ្ឋាភិបាលសម្រាប់នីតិកាលទី៧ នៃរដ្ឋសភា ដែលជារាជរដ្ឋាភិបាល​កើតឡើងស្របតាមឆន្ទៈរបស់ប្រជាពលរដ្ឋផងដែរ៕អត្ថបទ៖ បាន ចក់

បណ្ដាញសង្គម

ព័ត៌មានថ្មីៗ

ឯកឧត្ដមរដ្ឋមន្ត្រី ជា វ៉ាន់ដេត អញ្ជើញជាចូលរួមកម្មវិធីជាមួយវិស័យឯកជននិងទីភ្នាក់ងារជំនាញនៃប្រទេសម៉ាឡេស៊ី
08/15/2025 10:08 PM
Facebook Telegram Linkin
បុរសប៉ាឡេស្ទីនជម្លៀសខ្លួនពិបាកស្វែងរកស្បៀងអាហារសម្រាប់ក្រុមគ្រួសាររបស់លោកនៅតំបន់ហ្កាហ្សា
08/15/2025 08:08 PM
Facebook Telegram Linkin
លោក Trump៖ អ៊ុយក្រែន គឺជាអ្នកសម្រេចដោយផ្ទាល់ ជុំវិញការដោះដូរដែនដី
08/15/2025 08:08 PM
Facebook Telegram Linkin
អេស្ប៉ាញទទួលបានយន្តហោះទម្លាក់ទឹក Canadair ចំនួន ២គ្រឿងពីបារាំង ដើម្បីជួយពន្លត់ភ្លើងឆេះព្រៃ
08/15/2025 08:08 PM
Facebook Telegram Linkin
នគរបាល៖ មនុស្ស ២នាក់ រងរបួសនៅក្នុងហេតុការណ៍បាញ់ប្រហារ ក្បែរវិហារឥស្លាម នៅស៊ុយអែត
08/15/2025 08:08 PM
Facebook Telegram Linkin
ជនប៉ាឡេស្ទីននាំគ្នាប្រញាញចំណីអាហារនៅផ្ទះបាយស៊ុបនៅទីក្រុងហ្កាហ្សា ខណៈវិបត្តិអត់ឃ្លាននៅតែបន្ត
08/15/2025 08:08 PM
Facebook Telegram Linkin
ក្នុងជំនួបរវាងឯកឧត្តម Wang Yi រដ្ឋមន្រ្ដីការបរទេសកម្ពុជា និងថៃ, ភាគីទាំងបីសម្រេចបានកុងសុងស៊ីសចំនួន៥ចំណុច
08/15/2025 08:08 PM
Facebook Telegram Linkin
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់មន្ត្រីចុះសួរសុខទុក្ខ និងផ្តល់អំណោយមនុស្សធម៌ជូនក្រុមគ្រួសាររបស់វីរៈយុទ្ធជន ៦រូប រស់នៅខេត្តសៀមរាប ដែលត្រូវបានចាប់ខ្លួនក្រោយមានបទឈប់បាញ់​
08/15/2025 08:08 PM
Facebook Telegram Linkin
រដ្ឋមន្ត្រីអ៊ីស្រាអែលស្តាំនិយមជ្រុលបង្កឲ្យមានការភ្ញាក់ផ្អើល ដោយទៅសួរសុខទុក្ខមេដឹកនាំប៉ាឡេស្ទីន នៅពន្ធនាគារ
08/15/2025 08:08 PM
Facebook Telegram Linkin
លោក Prabowo៖ ថវិកាឆ្នាំ២០២៦ របស់ឥណ្ឌូនេស៊ី ត្រូវបានរៀបចំឡើង ដើម្បីធ្វើឲ្យប្រទេសរឹងមាំ
08/15/2025 08:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.