BTV NEWS

គណៈកម្មការអន្តរក្រសួងចុះពិនិត្យវាយតម្លៃការងារថែទាំផ្លូវចំនួន៨ខ្សែ ក្នុងខេត្តពោធិ៍សាត់

ឯកឧត្តម កែវ រតនៈ បញ្ជាក់ជាថ្មីថាបច្ចុប្បន្នកម្ពុជាពុំបាននាំចូលអគ្គិសនី ប្រេងសាំង និងឧស្ម័នពីប្រទេសថៃនោះទេ

ទំនប់អូរតេធិបតី ត្រៀមផ្គត់ផ្គង់ទឹកស្អាតជូនពលរដ្ឋរាប់ពាន់គ្រួសារបន្ថែមទៀតក្នុងខេត្តមណ្ឌលគិរី

រដ្ឋមន្ត្រីអាកាសចរណ៍ស៊ីវិល ចុះពិនិត្យអាកាសយានដ្ឋានអន្តរជាតិតេជោ ដើម្បីត្រៀមផ្តល់វិញ្ញាបនប័ត្រដល់ប្រតិបត្តិករ

នយោបាយ និង ការអភិវឌ្ឍន៍

អ្នកឃ្លាំមើលសហភាពអឺរ៉ុប៖ ផ្សែងពីចំហេះព្រៃ នៅកាណាដា បំបែកកំណត់ត្រាការបំភាយឧស្ម័ន

អឺរ៉ុប៖ អ្នកឃ្លាំមើលអាកាសធាតុរបស់សហភាពអឺរ៉ុប កាលពីថ្ងៃព្រហស្បតិ៍ (ទី៣ ខែកក្កដា) បាននិយាយថា ចំហេះព្រៃដ៏ធំ នៅប្រទេសកាណាដា បានបញ្ចេញផ្សែង ២ដងច្រើនជាងកំណត់ត្រាពេញមួយឆ្នាំមុន ដោយរំពឹងថា ការឆេះនឹងបន្តដុតពេញទាំងព្រៃ ក្នុងរយៈជាច្រើនសប្តាហ៍ ឬជាច្រើនខែ។ចំហេះព្រៃដ៏មហន្តរាយ បានឆាបឆេះលើផ្ទៃដីប្រមាណ ១២លានហិកតា មកទល់ពេលនេះ នៅឆ្នាំនេះ ពោលគឺបានដុតបំផ្លាញផ្ទៃដី ដែលធំជាងទំហំផ្ទៃប្រទេសគុយបា ឬកូរ៉េខាងត្បូងទៅទៀត។សំណុំផ្សែងហុយដ៏ក្រាស់ឃ្មឹក បានធ្វើឲ្យមានសភាពថប់ខ្យល់ ក្នុងប្រទេសកាណាដា និងសហរដ្ឋអាមេរិកដែលនៅជិតខាង ដោយប៉ះពាល់ដល់មនុស្សជាង ១០០លាននាក់ ហើយជួនកាលរំខានដល់ជើងហោះហើរ និងបង្ខំឲ្យលុបចោលព្រឹត្តិការណ៍ ដែលរៀបចំ នៅទីវាលទៀតផង។សេវាកម្មត្រួតពិនិត្យបរិយាកាស CAMS របស់អឺរ៉ុប បាននិយាយថា អង្គភាពបានតាមដានការឆេះនេះ ចាប់តាំងពីរដូវ បានចាប់ផ្តើមនៅដើមខែឧសភា ខណៈភ្លើងបានឆាបឆេះពាសពេញតំបន់ធំៗនៃប្រទេស។គិតត្រឹមដំណាច់ខែកក្កដា អង្គភាព បាននិយាយថា ការបំភាយកាបូនសរុប តាំងពីដើមឆ្នាំរហូតមកដល់ពេលនេះ បានកើនឡើងដល់ទ្វេដងពីការបង្កកង្វក់នៃការសាយភាយផ្សែងពេញឆ្នាំ២០១៤ ដែលជាកំណត់ត្រាឆ្នាំមុនៗ។អ្នកវិទ្យាសាស្ត្រជាន់ខ្ពស់របស់ CAMS លោក Mark Parrington បាននិយាយថា៖ «ការបំភាយពីចំហេះ បាន«បន្តកើនឡើងជាលំដាប់ស្ទើរតែដល់កម្រិតមួយ ដែលខ្ពស់ជាងរួចហើយពីការបំភាយនៃការឆេះសរុបប្រចាំឆ្នាំមុនៗ សម្រាប់ប្រទេសកាណាដា នៅក្នុងសំណុំទិន្នន័យរបស់យើង»៕

នាយករដ្ឋមន្រ្តីអង់គ្លេសលោក Rishi Sunak និងគ្រួសារ បំពេញវិស្សមកាលរដូវក្តៅនៅសហរដ្ឋអាមេរិក

អាមេរិក៖ នាយករដ្ឋមន្រ្តីអង់គ្លេសលោក Rishi Sunak និងគ្រួសាររបស់លោក ត្រូវបានគេថតកាលពីថ្ងៃព្រហស្បតិ៍ម្សិលមិញ ពេលដែលពួកគេបំពេញវិស្សមកាលនៅសហរដ្ឋអាមេរិក ។ លោក Sunak ភរិយា Akshata Murty របស់លោក ហើយនិងកូនស្រី Anoushka និង Krishna បានឈរថតរូបនៅផែ Santa Monicaស្ថិតក្នុងរដ្ឋ California ។ នាយករដ្ឋមន្រ្តីរូបនេះ បាននិយាយប្រាប់អ្នកអត្ថាធិប្បាយរបស់វិទ្យុអង់គ្លេស LBCលោក Nick Ferrariថា រដ្ឋ Californiaពិតជាពិសេសខ្លាំងណាស់សម្រាប់ពួកយើង ពីព្រោះថាវាគឺជាកន្លែងដែលលោកបានជួបភរិយារបស់លោក ។ លោក Sunak បន្តថា ក្មេងៗពិតជារំភើបខ្លាំងណាស់ ដោយសារតែលោកបាននាំពួកគេទៅលេងសួនកម្សាន្ត Disneyland ។ ដោយឡែកនៅប្រទេសអង់គ្លេសវិញ ក្រុមបាតុករបរិស្ថាន ៥នាក់ ត្រូវបានចាប់ខ្លួន ក្រោយពួកគេយកកំណាត់ខ្មៅគ្របពីលើគេហដ្ឋានឯកជនរបស់គ្រួសារលោក Sunakនៅទីក្រុង Yorkshire ដោយព្យួរកំណាត់ដ៏ធំមួយពីលើដំបូលផ្ទះ ពេលដែលពួកគេចុះយុទ្ធនាការប្រឆាំងនឹងគោលនយោបាយរដ្ឋាភិបាលរបស់លោកលើការបូមប្រេង ៕

ក្រុមលើកលែងទោសអន្តរជាតិរាយការណ៍ពីការវាយប្រហារដោយចេតនាលើជនស៊ីវិលនៅក្នុងសង្រ្គាមស៊ូដង់

ស៊ូដង់៖ ក្រុមសិទ្ធិមនុស្សរបស់ក្រុមលើកលែងទោសអន្តរជាតិ បានរាយការណ៍កាលពីថ្ងៃព្រហស្បតិ៍ថា ឧក្រិដ្ឋកម្មទ្រង់ទ្រាយធំ ត្រូវបានប្រព្រឹត្តនៅក្នុងប្រទេសស៊ូដង់ ក្នុងនោះជនស៊ីវិលត្រូវបានសម្លាប់ ទាំងក្នុងការវាយប្រហារដោយចេតនា និងការវាយប្រហារដោយរើសអើងជាតិសាសន៍ ។ ពួកគេបានរកឃើញថា ផ្ទះសម្បែង មន្ទីរពេទ្យ ហើយសូម្បីតែផ្ទះសុវត្ថិភាព ក៏បានរងការវាយប្រហារសម្លាប់ដោយឥតញញើតដៃដែរ នៅក្នុងសង្រ្គាមកំពុងបន្តនេះ ។ ក្រុមអ្នកស្រាវជ្រាវនៅស៊ូដង់របស់ពួកគេ និយាយថា ស្រ្តី និងក្មេងស្រីជាច្រើន បានក្លាយជាកម្មវត្ថុនៃអំពើហិង្សាផ្លូវភេទដោយសមាជិកភាគីបង្កសង្រ្គាមទាំង ២ ។ ពួកគេបានចងក្រងឯកសារករណីដែលក្មេងស្រីមានវ័យត្រឹម ១២ឆ្នាំ ត្រូវបានគេចាប់រំលោភនៅទីក្រុង Darfur និងទីក្រុង Khartoum ហើយពួកគេបានអំពាវនាវឲ្យអង្គការសហប្រជាជាតិ និងភ្នាក់ងារក្នុងតំបន់ជាច្រើនទៀត មេត្តានាំខ្លួនជនល្មើសប្រព្រឹត្តបទឧក្រិដ្ឋយកមកកាត់ទោស ។ វាមានរយៈពេលជាង ៣ខែមកហើយ ចាប់តាំងពីជម្លោះរវាងកងទ័ពស៊ូដង់ និងកងកម្លាំងគាំទ្ររហ័ស( RSF) បានផ្ទុះឡើង ស្របពេលដែលមានជម្លោះជុំវិញផែនការគាំទ្រដោយអន្តរជាតិ សម្រាប់ការផ្លាស់ប្តូរទៅគ្រប់គ្រងស៊ីបែបវិលវិញ ជាហេតុនាំឲ្យមានការជម្លៀសខ្លួនមនុស្សជាង ៣លាននាក់ នៅក្នុងប្រទេសស៊ូដង់ និងមនុស្សជាង ៩០ម៉ឺននាក់ផ្សេងទៀត ត្រូវបានជម្លៀសចេញទៅកាន់ប្រទេសជិតខាង ។ លោក Sarah Jackson គឺជាអនុប្រធានយុទ្ធនាការក្រុមលើកលែងទោសអន្តរជាតិនៅតំបន់ភាគខាងកើតនិងភាគខាងត្បូងអាហ្វ្រិក បាននិយាយថា ជម្លោះនៅស៊ូដង់ មិនត្រូវបានគេចាប់អារម្មណ៍ដូចជាសង្រ្គាមនៅអ៊ុយក្រែននោះទេ ពីព្រោះថាការឆ្លើយតបមនុស្សធម៌មិនមែនជាជាកម្រិតតែមួយ ឬឆន្ទៈរបស់ប្រទេស ចង់ទទួលយកពលរដ្ឋស៊ូដង់ដែលរត់ភៀសខ្លួន ៕

ជនភៀសខ្លួនស៊ូដង់ បង្កើតមុខជំនួញផ្ទាល់ខ្លួននៅក្នុងជំរំស្នាក់នៅក្នុងប្រទេសឆាដ

ឆាដ៖ ជនភៀសខ្លួនស៊ូដង់ដែលកំពុងរស់នៅក្នុងជំរំនៅទីក្រុង Adre ប្រទេសឆាដ បានបើកមុខរបរខ្នាតតូចនៅក្នុងសំពត់តង់បណ្តោះអាសន្នរបស់ពួកគេ ដើម្បផ្តល់សេវាកម្មដល់មនុស្សរាប់ពាន់នាក់ ដែលបានរត់ភៀសខ្លួនពីអំពើហិង្សានៅក្នុងប្រទេសកំណើតរបស់ពួកគេ ។ សេវាកម្មទាំងនេះ រួមមានទាំងរោងម៉ាស៊ីនកិនពោត ជាងកាត់ដេរ ជាងកាត់សក់ និងបន្ទះស្រូបពន្លឺព្រះអាទិត្យ ដែលប្រើប្រាស់ដើម្បីផ្គត់ផ្គង់ចរន្តងអគ្គិសនីដែលត្រូវការច្រើន ល្មមគ្រប់គ្រាន់សម្រាប់ឲ្យជនភៀសខ្លួនសាកថ្មទូរស័ព្ទដៃរបស់ពួកគេ ។ អ្នកខ្លះ មានប្រាក់បង់ថ្លៃសេវាកម្មទាំងនេះ ស្របពេលដែលអ្នកខ្លះទៀត គ្មានលុយតែយករបស់មកដោះដូរគ្នាវិញ ។ មនុស្សមួយចំនួន បានប្រកបមុខរបរជាក់ស្តែងរបស់ពួកគេ ខណៈដែលមនុស្សខ្លះទៀតរៀនជំនាញនៅក្នុងជំរំដើម្បីផ្តល់ជំនាញសម្រាប់គ្រួសាររបស់ពួកគេ ។ លោក Adam គឺជាជនភៀសខ្លួនស៊ូដង់ និងជាម្ចាស់រោងម៉ាស៊ីនកិនពោត និយាយថា មនុស្សនៅទីនេះ ពួកគេគ្មានប្រាក់នោះទេ ហើយពួកយើងធ្វើការតាមរយៈការដោះដូរគ្នា ។ ពេលដែលពួកគេយកពោតមកឲ្យពួកយើងកិន ពួកយើងក៏យកទុកខ្លះ ។ លោកបន្តថា អ្នកដែលមានប្រាក់ ពួកយើងយកប្រាក់ពីពួកគេ ហើយអ្នកដែលគ្មានប្រាក់ ពួកយើងដោះដូររបស់ សម្រាប់ពួកគេ ។ ដោយឡែក លោក Abdullahដែលជាជនភៀសខ្លួនមួយរូបទៀត និងជាជាងកាត់ដេរនៅក្នុងជំរំ និយាយថា បើសិនជាទីភ្នាក់ងារជំនួយគាំទ្រដល់ពួកយើង ពួកយើងនឹងអាចបង្កើតមជ្ឈមណ្ឌលបណ្តុះបណ្តាលសម្រាប់កុមារ នាំចូលកំណាត់ ហើយនិងពង្រីកជាងកាត់ដេរឲ្យកាន់តែធំជាងនេះ ។ សូមបញ្ជាក់ថា ពលរដ្ឋស៊ូដង់រាប់ម៉ឺននាក់ បានរត់ភៀសខ្លួនមកកាន់ប្រទេសឆាដ ចាប់តាំងពីជម្លោះបានផ្ទុះឡើងកាលពីរយៈពេលជាង ៣ខែមុន ៕

អង្គការ FAO បង្កើនការជូនដំណឹងអំពីវិបត្តិស្បៀងអាហារនៅស៊ូដង់កាន់តែខ្លាំងឡើង

អង្គការស្បៀង និងកសិកម្មរបស់អង្គការសហប្រជាជាតិ (FAO) បានចេញការព្រមានដ៏ធ្ងន់ធ្ងរមួយ ទាក់ទងនឹងវិបត្តិស្បៀងអាហារកាន់តែស៊ីជម្រៅនៅក្នុងប្រទេសស៊ូដង់ ខណៈដែលប្រទេសនេះជួបនឹងជម្លោះ ព្រមទាំងការធ្លាក់ចុះនៃសេដ្ឋកិច្ច។ អង្គការ FAO បាននិយាយថា មនុស្សចំនួន២០,៣លាននាក់នៅក្នុងប្រទេសស៊ូដង់ ប្រឈមនឹងការស្រេកឃ្លានយ៉ាងធ្ងន់ធ្ងរ ដែលតួលេខនេះបានកើនឡើងជិតទ្វេដងចាប់តាំងពីឆ្នាំមុនមក។ការព្យាករណ៍បង្ហាញថា ៤២% នៃចំនួនប្រជាជនស៊ូដង់ទាំងអស់ ស៊ូទ្រាំនឹងកម្រិតខ្ពស់នៃអសន្តិសុខស្បៀងធ្ងន់ធ្ងរ ដោយសារការរំខាននៅក្នុងទីផ្សារ និងកំណើនតម្លៃម្ហូបអាហារ ដែលរារាំងដល់ការប្រើប្រាស់ទំនិញ និងសេវាកម្មសំខាន់ៗ។យោងតាមការវិភាគដំណាក់កាលសន្តិសុខស្បៀងចុងក្រោយបំផុតបានឲ្យដឹងថា ស្តង់ដារទូទៅសម្រាប់ចាត់ថ្នាក់ភាពធ្ងន់ធ្ងរនៃអាហារ គឺមានស្ថានភាពធ្ងន់ធ្ងរដោយមនុស្ស១៤លាននាក់កំពុងប្រឈមនឹងវិបត្តិហើយមនុស្សជាង៦លាននាក់ ដែលប្រហែល១៣%នៃចំនួនប្រជាជនស៊ូដង់បច្ចុប្បន្ននេះគឺកាន់តែខិតទៅជិតគ្រោះទុរ្ភិក្សហើយ។ តំបន់ដែលរងផលប៉ះពាល់ខ្លាំងបំផុតរួមមានរដ្ឋធានី Khartoum ភាគខាងត្បូងនិងខាងលិចខេត្ត Kordofan ក៏ដូចជាភាគកណ្តាល ខាងកើត ខាងត្បូង និងខាងលិចតំបន់ Darfur ផងដែរ៕

ទឹកទន្លេជន់ និងប្រជាពលរដ្ឋជាប់ខ្លួនក្នុងទឹកជំនន់ ធ្វើតេស្តការឆ្លើយតបគ្រោះមហន្តរាយរបស់ចិន

ចិន៖ ចាប់ពីការដោះស្រាយទឹកទន្លេឡើងដ៏គ្រោះថ្នាក់ រហូតដល់ជួយអ្នកស្រុកជាប់ខ្លួននៅតាមទីក្រុងរងការជន់លិច ប្រព័ន្ធឆ្លើយតបគ្រោះមហន្តរាយចិន ត្រូវបានដាក់ឲ្យធ្វើតេស្ត ក្រោយព្យុះមួយក្នុងចំណោមព្យុះដ៏ខ្លាំងក្លាបំផុតក្នុងរយៈពេលជាច្រើនឆ្នាំកន្លងមកនេះ នាំមកនូវភ្លៀងធ្លាក់ច្រើនបំផុតដែលអាចចំណាយពេលច្រើនសប្តាហ៍ ទើបអាចស្រកទៅវិញបាន ។ មន្រ្តីមួយរូបមកពីនាយកដ្ឋានធនធានទឹក និយាយប្រាប់សារព័ត៌មានរដ្ឋកាលពីថ្ងៃព្រហស្បតិ៍ថា ទឹកជំនន់អាចចំណាយពេល១ខែ ទើបស្រកទៅវិញនៅខេត្តហ៊ើប៉ី ជាកន្លែងដែលទីក្រុងជូចូវ រងផលប៉ះពាល់ខ្លាំងជាងគេបំផុត ។ រូបភាពវីដេអូឃ្លីបដែលបានបញ្ចេញកាលពីថ្ងៃពុធ និងថ្ងៃព្រហស្បតិ៍ ឃើញក្រុមការងារសង្រ្គោះបន្ទាន់នៅលើទូកតូចៗ កំពុងជួយសង្រ្គោះប្រជាពលរដ្ឋនៅតាមតំបន់រងការជន់លិច ។ ទីភ្នាក់ងារព័ត៌មានរ៉យទ័រ អាចបញ្ជាក់បានពីទីតាំងនៃរូបភាពវីដេអូឃ្លីបនេះ ថាជាទីក្រុងជូចូវ ដោយសារតែអគារនៅក្បែរនោះ ដោយផ្គូផ្គងជាមួយរូបភាពផ្កាយរណប រូបភាពវីដេអូឃ្លីបឯកសារ ហើយនិងផែនទីផ្លូវនៅតំបន់នោះ ។ ក្រុមអាជ្ញាធរក្នុងស្រុក បានបង្ហោះសេចក្តីថ្លែងការណ៍នៅលើបណ្តាញព័ត៌មានសង្គម Wechatថា ចាប់ពីវេលាម៉ោង ៨ព្រឹកម៉ោងក្នុងស្រុក ថ្ងៃទី ២៩ ខែកក្កដា រហូតដល់ដល់ម៉ោង ១១ព្រឹក ថ្ងៃទី ១ ខែសីហា ទីក្រុងជូចូវ មានភ្លៀងធ្លាក់ខ្លាំង ។ ទឹកភ្លៀងជាមធ្យមមានកម្ពស់ ៣៥៥មីលីម៉ែត្រ ។ សារព័ត៌មានរដ្ឋ បានរាយការណ៍ផងដែរថា ក្រុមជួយសង្រ្គោះមកពីទូទាំងប្រទេសចិន បានជួយដល់ទីក្រុងជូចូវ ប៉ុន្តែក្រុមជួយសង្រ្គោះមួយចំនួនទៀត ពុំទាន់ទទួលបានការយល់ព្រមដែលពួកគេត្រូវការពីក្រុមមន្រ្តីនោះទេ ដើម្បីប្រតិប្តិការលើគោក ៕

ប្រតិបត្តិការបោសសម្អាតចាប់ផ្តើម ជើងហោះចាប់ផ្តើមហោះហើរឡើងវិញក្រោយព្យុះទីហ្វុង Khanun វាយប្រហារប្រទេសជប៉ុន

ជប៉ុន៖ ការបោសសម្អាតការខូចខាតបន្សល់ទុកពីព្យុះទីហ្វុង Khanun បានចាប់ផ្តើមហើយនៅខេត្តគោលដៅទេសចរណ៍ដ៏មានប្រជាប្រិយភាព Okinawa របស់ប្រទេសជប៉ុន ស្របពេលដែលប្រតិបត្តិការជើងហោះហើរ បានចាប់ផ្តើមឡើងវិញ នៅអាកាសយានដ្ឋានក្នុងរដ្ឋធានី Nahaរបស់ខេត្តមួយនេះ ។ ព្យុះទីហ្វុង Khanunបានសម្លាប់មនុស្ស ២នាក់ និងបណ្តាលឲ្យមនុស្សយ៉ាងហោច ៦២នាក់ផ្សេងទៀត រងរបួសហើយនិងបានកាត់ផ្តាច់ចរន្តអគ្គិសនីដល់ផ្ទះសម្បែងប្រជាពលរដ្ឋជាង ២០ម៉ឺនគ្រួសារក្នុងរយៈពេល ២ថ្ងៃកន្លងមកនេះ នៅខេត្ត Okinawa ។ ក្រសួងដឹកជញ្ជូនជប៉ុន និយាយថា អាកាសយានដ្ឋាន Naha បានចាប់ផ្តើមប្រតិបត្តិការឡើងវិញហើយកាលពីថ្ងៃព្រហស្បតិ៍ ក្រោយបិទសេវាកម្មរយៈពេល ២ថ្ងៃ ប៉ុន្តែជើងហោះហើរ ៣០៤វ៉ុល ត្រូវបានលុបចោល ។ ទីភ្នាក់ងារឧតុនិយមជប៉ុន បានរាយការណ៍ថា ព្យុះទីហ្វុង Khanunដែលមានន័យថាផ្លែខ្នុរនៅក្នុងភាសាថៃ កំពុងបោកបក់យឺតៗទៅទិសពាយព្យនៅក្នុងសមុទ្រចិនខាងកើត ជាមួយនឹងកម្លាំងខ្យល់បក់ ១៦២គ.មក្នុង១ម៉ោង ហើយនិងសន្ទុះខ្យល់បក់ ២៣៤គ.មក្នុង១ម៉ោង ហើយពួកគេបានព្យាករណ៍ថា វាលែងវាយប្រហារចំលើប្រទេសចិនទៀតហើយ ៕

ប្រជាពលរដ្ឋក្រុងម៉ុមបៃរស់នៅក្នុងប្លុកអគារចាស់ទ្រុធទ្រោម ប្រឈមនឹងអសុវត្ថិភាពដ៏គ្រោះថ្នាក់ដល់អាយុជីវិតរបស់ពួកគេ

ឥណ្ឌា៖ ស្ថិតនៅកណ្តាលប៉មអគារប្រណីតនៃតំបន់ប្រៃសណីយ៍ផ្តាច់មុខបំផុតរបស់ទីក្រុងម៉ុមបៃ ប្រទេសឥណ្ឌា គឺជាប្លុកអគារដ៏ចាស់ទ្រុធទ្រោមមួយកន្លែង ដែលជាហានិភ័យអសុវត្ថិភាពដ៏គ្រោះថ្នាក់បំផុតសម្រាប់មនុស្សមួយចំនួនដែលរស់នៅទីនោះ ។ មនុស្សប្រហែល ៦០០នាក់ ដែលភាគច្រើនគឺជាមន្រ្តីរដ្ឋការថ្នាក់កណ្តាល និងក្រុមគ្រួសាររបស់ពួកគេ រស់នៅក្នុងប្លុកអគារចាស់ខូចរបស់រដ្ឋមួយនេះ ដែលស្ថិតនៅសង្កាត់ Worli ជាកន្លែងដែលកូនស្រីអ្នកមានជាងគេបំផតរបស់ឥណ្ឌាលោក Mukesh Ambani រស់នៅទីនោះផងដែរ ។ ក្មេងៗនាំគ្នាលេងនៅក្រៅបន្ទប់របស់ពួកគេតាមច្រករបៀង ដែលមានស្នាមប្រេះ បែកបាក់ ហើយចម្រឹងដែកទ្រគ្រោងអគារ អាចមើលឃើញលានចេញពីស៊ីម៉ង់ត៍នៅតាមកម្រាលឥដ្ឋ និងពិដាន ។ លោក Pandu Ramគឺជាពលរដ្ឋមួយរូបរស់នៅក្នុងអគារចាស់ទ្រុធទ្រោមនេះ និយាយថា ពួកយើងបានរស់នៅក្នុងអគារដែលការងារជួសជុលពុំទាន់បញ្ចប់ទាំងស្រុង ។ ដូច្នេះហើយ ពួកយើងខ្លាច ហើយនិងគិតថា អគារនេះ អាចនឹងបាក់នៅពេលណាមួយជាក់ជាពុំខាននោះឡើយ ។ លោកបន្តថា លោកមានកូនស្រីអាយុ ៤ឆ្នាំម្នាក់ និងភរិយារបស់ខ្ញុំ ហើយពេលខ្លះពួកគេខ្លាចខ្លាំងណាស់ ។ ប្រជាពលរដ្ឋទាំងនេះ បានសម្រេចចិត្តរស់នៅក្នុងប្លុកអគារចាស់ទ្រុធទ្រោមនេះ ដោយសារតែទីតាំងរបស់វាស្ថិតនៅកណ្តាល ជិតការិយាល័យពួកគេធ្វើការ ។ មន្រ្តីរដ្ឋាភិបាលមួយរូបដែលសុំមិនបញ្ចេញឈ្មោះដោយសារតែពួកគេមិនត្រូវបានគេអនុញ្ញាតឲ្យនិយាយទៅកាន់សារព័ត៌មាន និយាយថា ប្រជាពលរដ្ឋរស់នៅក្នុងប្លុកអគារនេះ ពុំទទួលយកការជូនដំណឹងបណ្តេញចេញ ប៉ុន្តែរដ្ឋបានផ្តល់ជម្រើសស្នាក់នៅផ្សេងដល់ពួកគេនៅតំបន់ជាយក្រុង ។ ទោះបីជាយ៉ាងណាក៏ដោយ ប្រជាពលរដ្ឋជាច្រើន និយាយថា ការធ្វើទៅកាន់ និងមកពីការិយាល័យរបស់ពួកគេធ្វើការនៅសង្កាត់ Worliត្រូវការចំណាយច្រើន ហើយប្រើពេលយូរថែមទៀតផង ៕

សេដ្ឋវិទូព្រមានអំពីនៃការពិបាកខ្លាំងក្នុងគ្រប់គ្រងលើវដ្តៈឡើងចុះនៃសេដ្ឋកិច្ចអាមេរិក

អាមេរិក៖ អ្នកយុទ្ធសាស្រ្តទីផ្សាររបស់សហរដ្ឋអាមេរិកបានសម្តែងការព្រួយបារម្ភអំពីកំណើនហានិភ័យនៃវដ្តៈដ៏លំបាកនៅក្នុងសេដ្ឋកិច្ចសហរដ្ឋអាមេរិក ដោយសារតែការដំឡើងអត្រាការប្រាក់របស់ធនាគារកណ្តាលអាមេរិក(Fed)។ ការអត្ថាធិប្បាយនេះបានធ្វើឡើងបន្ទាប់ពីការសម្រេច ដោយទីភ្នាក់ងារវាយតម្លៃឥណទាន Fitch កាលពីថ្ងៃអង្គារ ក្នុងការកាត់បន្ទាបចំណាត់ថ្នាក់ឥណទានរបស់រដ្ឋាភិបាលសហរដ្ឋអាមេរិក។ជាការឆ្លើយតប រដ្ឋមន្ត្រីក្រសួងរតនាគារលោកស្រី Janet Yellen បាននិយាយថា លោកស្រីមិនយល់ស្របយ៉ាងទាល់តែសោះចំពោះការទម្លាក់ចំណាត់ថ្នាក់ ដោយហៅរឿងនេះថាជាការបំពាន និងផ្អែកលើទិន្នន័យហួសសម័យ។ លោក Matt Maley ប្រធានអ្នកយុទ្ធសាស្រ្តទីផ្សារនៃក្រុមហ៊ុនវិនិយោគ Miller Tabak and Company បានពិភាក្សាអំពីកត្តាដែលអាចចូលទៅក្នុងការសម្រេចរបស់ទីភ្នាក់ងារ Fitch រួមទាំងអ្វីដែលលោកបានហៅថា លទ្ធភាពនៃវដ្តៈឡើងចុះដ៏លំបាកនាពេលខាងមុខ។សេចក្តីថ្លែងការណ៍របស់ទីភ្នាក់ងារ Fitch បានអះអាងថា សហរដ្ឋអាមេរិកបានជួបប្រទះនឹងការធ្លាក់ចុះជាលំដាប់នៃស្តង់ដារអភិបាលកិច្ចក្នុងរយៈពេល២០ឆ្នាំចុងក្រោយនេះ រួមទាំងលើបញ្ហាសារពើពន្ធ និងបំណុល បើទោះបីជាកិច្ចព្រមព្រៀងទ្វេភាគីខែមិថុនា ដើម្បីផ្អាកដែនកំណត់បំណុលរហូតដល់ខែមករា ឆ្នាំ២០២៥ក៏ដោយ។ទោះជាយ៉ាងនេះក្តី បញ្ហាប្រឈមភ្លាមៗនេះអាចមកពីការដំឡើងអត្រាការប្រាក់ជាបន្តបន្ទាប់របស់ធនាគារ Fed នេះបើយោងតាមលោក Maley។ បន្ទាប់ពីការផ្អាកនៅក្នុងខែមិថុនា ធនាគារ Fed កាលពីថ្ងៃពុធ (២ សីហា) បានបង្កើនអត្រាការប្រាក់ចំនួន០,២៥% ដោយធ្វើឲ្យការចំណាយលើខ្ចីប្រាក់គោលឡើងដល់កម្រិតខ្ពស់បំផុតក្នុងរយៈពេលជាងពីរទសវត្សរ៍មកនេះ៕

កវីមីយ៉ាន់ម៉ា ក្លាយជាមេបញ្ជាការក្រុមជីវពលក្នុងសង្រ្គាមទាមទារលទ្ធិប្រជាធិបតេយ្យ

មីយ៉ាន់ម៉ា៖ ពេលដែលយោធាដណ្តើមគ្រប់គ្រងអំណាចនៅសហភាពមីយ៉ាន់ម៉ាកាលពីខែកុម្ភៈ ឆ្នាំ ២០២១ លោក Maung Saungkha(ម៉ោង សោងខា) ដែលជាកវី និងជាសកម្មជនប្រឆាំងសង្រ្គាម ដូចគ្នានឹងមនុស្សរាប់លាននាក់ផ្សេងទៀត ដែលបានដង្ហែក្បួនតាមដងផ្លូវដើម្បីតវ៉ា ។ ប៉ុន្តែក្រោយពីមិត្តភក្តិរបស់លោក ត្រូវបានគេវាយធ្វើបាប និងចាប់ខ្លួនរួចមកនោះ លោកបានបាត់បង់ជំនឿចិត្តថា បាតុកម្មដោយសន្តិវិធីលែងអាចជួយទម្លាក់អំណាចរបបសឹកបានទៀតហើយ ក្រោយពីពួកគេ បានផ្តួលរំលំរដ្ឋាភិបាលឈ្នះឆ្នោតរបស់លោកស្រី អ៊ុងសាន ស៊ូជី ។ ក្រោយពីមានការចេញដីការចាប់ខ្លួនលោក ហើយនិងការជឿជាក់ថា លោកនឹងត្រូវជាប់ពន្ធនាគារក្នុងពេលដ៏ខ្លីខាងមុខនេះនោះ លោក Maung Saungka និងមិត្តភក្តិមួយចំនួនទៀតរបស់លោក បានរត់ភៀសខ្លួនទៅកាន់តំបន់ព្រំដែនមីយ៉ាន់ម៉ា ។ នៅទីនោះ ពួកគេបានបង្កើតកងទ័ពរំដោះប្រជាជនភាគតិចបាម៉ា (BPLA)ហើយនិងបានជ្រើសរើសលោក Maung Saungkha ធ្វើជាមេដឹកនាំរបស់ពួកគេ ។ រយៈពេល ២ឆ្នាំក្រោយមក បុរសវ័យ ៣០ឆ្នាំម្នាក់នេះ បានស្ថិតនៅក្នុងចំណោមឥស្សរជនលេចធ្លោលបំផុតកំពុងធ្វើសង្រ្គាមទាមទារលទ្ធិប្រជាធិបតេយ្យនៅប្រទេសអាស៊ីអាគ្នេយ៍មួយនេះ ។ នៅក្នុងបទសម្ភាសន៍ជាមួយទីភ្នាក់ងារព័ត៌មានរ៉យទ័រចេញពីជំរំក្នុងព្រៃរបស់លោក លោក Maung Saungkha និយាយថា ពួកយើងជ្រើសរើសការកាន់អាវុធ ដោយសារតែពួកយើងគ្មានជម្រើសទៀតនោះទេ ។ គ្មានរណាម្នាក់ចង់ធ្វើបែបនេះនោះទេ ពួកយើងត្រូវបានគេបង្ខំឲ្យដើរផ្លូវបែបនេះ ។ សូមបញ្ជាក់ថា លោក Maung Saungkhaបានក្លាយជាឥស្សរជនសាធារណៈនៅមីយ៉ាន់ម៉ា កាលពីឆ្នាំ ២០១៥ ពេលដែលលោកចុះផ្សាយកំណាព្យបែបកំប្លែងនៅលើបណ្តាញព័ត៌មានសង្គម Facebook ៕

បណ្ដាញសង្គម

ព័ត៌មានថ្មីៗ

ការពិនិត្យឡើងវិញ៖ ភាពយន្តឯកសារពីតំបន់ហ្កហ្សារបស់ BBC បំពានគោលការណ៍ណែនាំអំពីភាពត្រឹមត្រូវ

មនុស្សជាច្រើននាក់ស្លាប់ក្នុងអគ្គិភ័យនៅមជ្ឈមណ្ឌលសង្គ្រោះ ក្នុងរដ្ឋ Massachusetts

ជំនួយការរបស់លោក Netanyahu ប្រឈមនឹងការចោទប្រកាន់ផ្លូវការ ជុំវិញការបែកធ្លាយព័ត៌មានយោធា

រដ្ឋមន្ត្រីការបរទេសអ៊ីស្រាអែល និងប៉ាឡេស្ទីន នឹងចូលរួមកិច្ចប្រជុំរបស់ EU

អ៊ីរ៉ង់៖ ការដាក់ទណ្ឌកម្មជាថ្មីរបស់ UN នឹងជួបជាមួយការឆ្លើយតបយ៉ាងសមស្រប

វិមានក្រឹមឡាំង៖ ការបញ្ជូនអាវុធ និងគ្រាប់រំសេវទៅអ៊ុយក្រែនពីអាមេរិក កំពុងបន្តមានធម្មតា

នគរបាលឃាត់ខ្លួនមនុស្ស ៨នាក់ ក្រោយមានការប៉ះទង្គិចរបស់ក្រុមប្រឆាំងជនអន្តោប្រវេសន៍ ក្នុងទីក្រុងនៅអេស្ប៉ាញ

ព្រះអង្គម្ចាស់ នរោត្តម ចក្រាវុធ ជួបពិភាក្សាការងារជាមួយ ឯកឧត្តម Chen Zhou អនុរដ្ឋមន្រ្តី ក្រសួងទំនាក់ទំនងអន្តរជាតិចិន

EU នឹងត្រៀមបញ្ជីពន្ធ ២៤,៥២ពាន់លានដុល្លារ សម្រាប់ទំនិញរបស់អាមេរិក

សេដ្ឋកិច្ចកម្ពុជានៅបន្តរឹងមាំ៖ ២២ខែនៃរាជរដ្ឋាភិបាលអាណតិ្តទី៧របស់សម្តេចធិបតី រោងចក្រសហគ្រាសកើនជាង៥,៣ពាន់ដែលបង្ហាញពីភាពរឹងមាំ និងជំនឿទុកចិត្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍