នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា
TOP STORY | សម្ដេចធិបតី៖ កងទ័ពថៃបានបើកការ​វាយប្រហារ​មក​លើ​ទីតាំង​ឈរ​ជើង​របស់​កង​ទ័ព​កម្ពុជា​ នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

នយោបាយ​ និង ការអភិវឌ្ឍន៍

បណ្ដុំអង្គការសង្គមស៊ីវិល ប្រាប់ក្រុមប្រឆាំង និងអន្តរជាតិ ឱ្យគោរពសិទ្ធិពលរដ្ឋខ្មែរ ដែលបានចេញទៅបោះឆ្នោត

2023/07/25 12:49:07 pm        558
Facebook Telegram Linkin
ភ្នំពេញ៖ បណ្ដុំយុវជន អង្គការ សមាគម និងសង្គមស៊ីវិល បានសម្ដែងការមិនពេញចិត្ត និង​ច្រានចោល​ទាំងស្រុងចំពោះការចោទប្រកាន់ពីក្រុមប្រឆាំង ​និងអន្តរជាតិមួយចំនួនដែលចោទថា ការបោះឆ្នោតនៅកម្ពុជាមិនមានភាពត្រឹមត្រូវ។ ពួកគេថា នេះជាការចោទប្រកាន់ខុសឆ្គង។ ជាការឆ្លើយតប ពួកគេប្រាប់ទៅក្រុមប្រឆាំង ក៏ដូចជាបរទេសគាំទ្រក្រុមប្រឆាំង សូមគោរពដល់សិទ្ធិពលរដ្ឋកម្ពុជា ជាង៨លាននាក់ដែលបានទៅចូលរួមបោះឆ្នោត។ក្រុមការងារនៃ បណ្ដុំយុវជន អង្គការ សមាគម និងសង្គមស៊ីវិល ​បានមើលឃើញពីភាពប្រសើរ នៃការរៀបចំការងារបោះឆ្នោត ​ក៏ដូចជាភាពប្រសើរនៃការចូលរួមរបស់គ្រប់​គណបក្សប្រកួតប្រជែង និង​ការចូលរួមទៅបោះឆ្នោតយ៉ាងច្រើន​លើសលុបពីប្រជាពលរដ្ឋទូទាំងប្រទេស។ពួកគេមើលឃើញថា​ ប្រជាពលរដ្ឋមានការពេញចិត្ត និងស្វែងយល់ពីសិទ្ធិរបស់ខ្លួនបានច្បាស់​ក្នុងការ​សម្រេចជោគវាសនាប្រទេសជាតិ ​ទើបនាំឱ្យមានកំណើនពលរដ្ឋទៅបោះឆ្នោត ។ដោយមើលឃើញពីភាពប្រសើរទាំងនេះ​ បណ្ដុំអង្គការសង្គមស៊ីវិល​ ក៏ផ្ដាំផ្ញើទៅកាន់ក្រុមប្រឆាំង ក៏ដូចជា​អន្តរជាតិគាំទ្រក្រុមប្រឆាំង ​សូមបញ្ឈប់សកម្មភាពរំខាន ​និងចង់បំផ្លាញកម្ពុជា។ ពួកគេសូមឱ្យក្រុមទាំងនោះ​ មើលជារួមនិងគោរពដល់សិទ្ធិប្រជាពលរដ្ឋជាង ៨លាននាក់​ដែលបានទៅចូលរួមបោះឆ្នោត។លើសពីនេះទៅទៀត ពួកគេសូមថ្កោលទោសចំពោះទង្វើខុសច្បាប់របស់ក្រុមប្រឆាំង​ទាំងអ្នករស់​នៅក្រៅ ​និងក្នុងប្រទេស។ ពួកគេក៏ផ្ដាំផ្ញើទៅកាន់ក្រុមខុសច្បាប់ទាំងនោះ​ ឱ្យបញ្ឈប់រាល់សកម្មភាព​ដែល​ចង់បំផ្លាញកម្ពុជា​ និងបញ្ជាក់ថា ​ការ​ញុះញង់​របស់ពួកគេមិនមាន​ប្រសិទ្ធភាព​លើពលរដ្ឋ​កម្ពុជាទៀតនោះទេ។តាមរយៈ គ.ជ.ប បង្ហាញថា ការបោះឆ្នោតជ្រើសតាំងតំណាងរាស្រ្តនីតិកាលទី ​៧ ឆ្នាំ ២០២៣នេះ គឺមានប្រជាពលរដ្ឋជាង ​៨លាននាក់​ បានទៅបោះឆ្នោត។​ ចំនួននេះ ​គឺស្មើនឹង ​៨៤, ៥៨% នៃ​ចំនួនពលរដ្ឋ ដែលមានឈ្មោះក្នុងបញ្ជីបោះឆ្នោត៕ អត្ថបទ៖ គឹមហុក 

ប្រព័ន្ធផ្សព្វផ្សាយរដ្ឋ៖ ប្រទេសចិននឹងពិនិត្យមើលការតែងតាំង និងបញ្ចប់តំណែងមន្ត្រី ក្នុងកិច្ចប្រជុំសភា

2023/07/25 12:34:11 pm        87
Facebook Telegram Linkin
ចិន៖ ប្រព័ន្ធផ្សព្វផ្សាយរដ្ឋ បានរាយការណ៍ថា គណៈកម្មាធិការអចិន្ត្រៃយ៍សភាប្រជាជនជាតិចិន (NPC) ដែលជាស្ថាប័នដ៏មានឥទ្ធិពល ក្នុងការអនុម័ត និងធ្វើវិសោធនកម្មច្បាប់ នៅពេលដែលសភាមិនទាន់ដល់ពេលប្រជុំ នឹងពិនិត្យមើលឡើងវិញនូវការតែងតាំង និងការបញ្ចប់តំណែងមន្ត្រីមួយចំនួន ក្នុងកិច្ចប្រជុំ នៅថ្ងៃអង្គារ (ទី២៥ ខែកក្កដា) នេះ។ការប្រកាសនេះ កើតមានឡើងមួយខែ គិតចាប់តាំងពេលដែលរដ្ឋមន្ត្រីការបរទេសចិនលោក Qin Gang ត្រូវបានគេឃើញលើកចុងក្រោយ ដោយរដ្ឋាភិបាលរបស់ប្រទេសចិន បានគ្រាន់តែឲ្យដឹងថា លោករដ្ឋមន្ត្រី ឈប់សម្រាកដោយសារបញ្ហាសុខភាព តែមិនបានបញ្ជាក់ថាមានជំងឺអ្វីនោះឡើយ។ គណៈកម្មាធិការ NPC ដែលប្រជុំប្រហែលរៀងរាល់ ២ខែម្តង ដើម្បីធ្វើសេចក្តីព្រាងច្បាប់ និងអនុម័តច្បាប់ ត្រូវបានគេរំពឹងថា នឹងជួបប្រជុំគ្នា នៅខែសីហា បន្ទាប់ពីបញ្ចប់កិច្ចប្រជុំ ដែលបានគ្រោងទុកក្នុងខែមិថុនា។មុខតំណែងគណៈរដ្ឋមន្ត្រីរបស់ប្រទេសចិន ដូចជារដ្ឋមន្ត្រីជាដើម ត្រូវបានតែងតាំងដោយនាយករដ្ឋមន្ត្រី ហើយបន្ទាប់មកត្រូវបានអនុម័តដោយ NPC ឬសភា។ ប៉ុន្តែ NPC តែងប្រជុំ ១ឆ្នាំម្តង តែក្នុងខែមីនា ហេតុដូច្នេះ ទើបគណៈកម្មាធិការអចិន្ត្រៃយ៍ NPC មានភារកិច្ចធ្វើការសម្រេចបណ្តោះអាសន្ន។ NPC ដែលមានសមាជិក ៣.០០០នាក់ គឺជាស្ថាប័នអង្គនីតិប្បញ្ញត្តិជាតិរបស់ប្រទេសចិន ហើយជាគោលការណ៍ ជាស្ថាប័នរដ្ឋដ៏មានឥទ្ធិពលបំផុតក្រោមច្បាប់រដ្ឋធម្មនុញ្ញរបស់ចិន ទោះបីជានៅក្នុងការអនុវត្តជាក់ស្តែង បក្សកុម្មុយនីស្តដែលកំពុងគ្រប់គ្រងប្រទេស មានអំណាចខ្លាំងក៏ដោយ។ក្រៅពីការប្រជុំប្រចាំឆ្នាំ ក្នុងគោលបំណងបង្កើតច្បាប់ និងតែងតាំងបុគ្គលិករដ្ឋាភិបាលហើយនោះ ស្ថាប័ននេះ មើលការខុសត្រូវលើក្រុមប្រឹក្សារដ្ឋ ដែលជាគណៈរដ្ឋមន្ត្រីរបស់ប្រទេសចិន៕

ចិន និងរុស្ស៊ី បញ្ចប់សមយុទ្ធយោធារួមគ្នា នៅសមុទ្រជប៉ុន

2023/07/25 12:31:36 pm        110
Facebook Telegram Linkin
ចិន៖ ប្រព័ន្ធផ្សព្វផ្សាយរដ្ឋចិន បានរាយការណ៍នៅថ្ងៃអង្គារនេះថា ប្រទេសចិន និងប្រទេសរុស្ស៊ី បានបញ្ចប់សមយុទ្ធកងទ័ពជើងទឹក និងអាកាស នៅសមុទ្រជប៉ុន ក្នុងគោលបំណងការពារសន្តិសុខផ្លូវទឹក។ប្រព័ន្ធផ្សព្វផ្សាយរដ្ឋចិន CCTV បានថតឃ្លីបវីដេអូ នាវាចម្បាំងចិន និងរុស្ស៊ី ដែលកំពុងចូលរួមក្នុងសមយុទ្ធបាញ់គ្រាប់ពិតនៅសមុទ្រ។ នាវាជាង១០គ្រឿង និងយន្តហោះចម្បាំង៣០គ្រឿងមកពីភាគីទាំងពីរ បានចូលរួមនៅក្នុងសមយុទ្ធ ឆ្នាំ២០២៣ រយៈពេល៤ថ្ងៃ ខណៈកងកម្លាំងទ័ពអាកាស និងកងទ័ពជើងទឹកចិន និងរុស្ស៊ី រួមគ្នាធ្វើសមយុទ្ធវាយរុញច្រាន រារាំង ការពារដែនអាកាសនិងដែនទឹក ដែលបានបញ្ជានិងតាមផែនការ។ ការបង្ហាញពីសាមគ្គីភាព រវាងយោធា ធ្វើឡើងនៅពេលដែលសហរដ្ឋអាមេរិក បង្កើនទំនាក់ទំនង ជាមួយប្រទេសជប៉ុន និងប្រទេសកូរ៉េខាងត្បូង និងអង្គការសន្ធិសញ្ញាអាត្លង់ទិកខាងជើង (NATO) ដែលកំពុងសំឡឹងមើលដើម្បីធ្វើឲ្យកាន់តែស៊ីជម្រៅវត្តមានរបស់ខ្លួននៅក្នុងតំបន់ ដែលធ្វើឲ្យប្រទេសចិន និងរុស្ស៊ីមានកំហឹង៕

ពលរដ្ឋជឿជាក់ថា ជ័យជម្នះបោះឆ្នោតនឹងបានទៅបក្សប្រជាជន ដើម្បីបន្តដឹកនាំប្រទេសបន្តការអភិវឌ្ឍ

2023/07/25 12:31:09 pm        239
Facebook Telegram Linkin
ភ្នំពេញ៖ ពលរដ្ឋបានសម្ដែងនូវការអបអរសាទរចំពោះលទ្ធផលក្រៅផ្លូវការ នៃការបោះឆ្នោតជ្រើសតាំងតំណាងរាស្ត្រ នីតិកាលទី៧ ដោយពួកគេជឿជាក់ថា គណបក្សប្រជាជនកម្ពុជា​ នឹងទទួលបានជ័យជម្នះ ដើម្បីបន្ត ដឹកនាំប្រទេសឱ្យកាន់តែ​មានការអភិវឌ្ឍរីកចម្រើនបន្ថែមទៀត ។ប្រជាពលរដ្ឋ រស់នៅក្នុងមូលដ្ឋានខេត្តកណ្ដាល បានលើកឡើងថា ការបោះឆ្នោតពីមួយអាណត្តិ ទៅមួយអាណត្តិ មានកំណើនប្រជាពលរដ្ឋទៅចូលរួម ​ជាពិសេសនៅអាណត្តិនេះ មានចំនួន​រហូត​ដល់ ជាង៨៤ភាគរយ ដែលចំនួននេះ​ បានបង្ហាញថា ​ពលរដ្ឋមានការយល់ដឹងច្រើនជាងមុន ក្នុងការ​សម្រេចនូវ ជោគវាសនារបស់ខ្លួន ពោលគឺមិនធ្វើអ្វីតាមការ​ញុះញង់​របស់ជន​អគតិឡើយ ។ពលរដ្ឋ បានបន្តថា សម្រាប់អាណត្តិថ្មីនេះ ឃើញថាគណបក្សប្រជាជនកម្ពុជា ​បានទទួលការគាំទ្រ ដ៏ច្រើន​លើសលុប ​ពីសំណាក់ប្រជាពលរដ្ឋ ព្រោះតែស្រឡាញ់ ​ពេញចិត្ត ​និងជឿជាក់ ចំពោះការ​ដឹកនាំរបស់ គណបក្សប្រជាជនកម្ពុជា ​ដែលមាន​សម្ដេចតេជោ ហ៊ុន សែន ​ជាប្រធាន និងជាបេក្ខភាព​នាយករដ្ឋមន្ត្រី ។ប្រជាពលរដ្ឋ ក៏បានបង្ហាញនូវការបន្តគាំទ្រចំពោះគណបក្សប្រជាជនកម្ពុជា ​ហើយសង្ឃឹមថា ​នៅ អាណត្តិ​ក្រោយទៀត គណបក្សប្រជាជនកម្ពុជា ​បានជាប់ឆ្នោតដឹកនាំ​ប្រទេសបន្តទៀត ហើយពួកគេ​គាំទ្រ ចំពោះឯកឧត្តមបណ្ឌិត ហ៊ុន ម៉ាណែត​ ជាបេក្ខភាពនាយករដ្ឋមន្ត្រី ​នាពេលអនាគត ។គួរបញ្ជាក់ថា ​ការបោះឆ្នោតជ្រើសតាំងតំណាងរាស្ត្រ ​នីតិកាលទី៧​ ដែលធ្វើឡើងនៅថ្ងៃទី២៣ ខែកក្កដានេះ ​បើតាមលទ្ធគណៈកម្មាធិការជាតិរៀបចំការ​បោះឆ្នោត (គ.ជ.ប) គឺមានអ្នកទៅ​បោះឆ្នោត ​មានជាង៨លាន ២សែននាក់ ​ដែលស្មើនឹង៨៤,៥៨ភាគរយ និងមានគណបក្ស​នយោបាយ​ចំនួន១៨ បានចូលរួមប្រកួតប្រជែង ៕អត្ថបទ៖ បាន សុខរិទ្ធិ

ស្លាករបស់ Twitter ចាប់ផ្ដើមទម្លាក់ចុះ នៅទីស្នាក់ការកណ្តាល ដោយប្តូរឡូហ្គោ X ជំនួសវិញ

2023/07/25 12:23:59 pm        113
Facebook Telegram Linkin
អាមេរិក៖ ស្លាក ដែលគេស្គាល់ជាទូទៅរបស់បណ្ដាញសង្គម Twitter ចាប់ផ្តើមទម្លាក់ចុះហើយ នៅឯទីស្នាក់ការកណ្តាលរបស់ក្រុមហ៊ុន ក្នុងទីក្រុងសាន់ហ្វ្រាន់ស៊ីស្កូ (San Francisco) សហរដ្ឋអាមេរិក កាលពីថ្ងៃចន្ទ (ទី២៤ ខែកក្កដា) ដែលការទម្លាក់ចុះនេះ គឺជាផ្នែកនៃការប្តូរស្លាកសញ្ញាពាណិជ្ជកម្មថ្មី។បន្ទាប់ពីប្រើប្រាស់រយៈពេល ១៧ឆ្នាំជាមួយនឹងនិមិត្តសញ្ញាបក្សីពណ៌ខៀវ ដែលតំណាងឲ្យការផ្សព្វផ្សាយគំនិតទៅកាន់ពិភពលោក មហាសេដ្ឋីលោក Elon Musk បានសម្រេចប្តូរឈ្មោះពីអក្សរ Twitter ជាអក្សរ X វិញ ហើយបានបង្ហាញឡូហ្គោថ្មី ដែលផ្ដោតការយកចិត្តទុកដាក់លើការបង្កើត «កម្មវិធីគ្រប់ប្រភេទ»។ចាប់តាំងពីចូលមកគ្រប់គ្រងក្រុមហ៊ុនបណ្ដាញសង្គម Twitter ក្នុងខែតុលា លោក Musk បាននិយាយថា លោកស្រមៃដល់ការបង្កើតកម្មវិធីមួយ ដែលអាចផ្តល់សេវាកម្មជាច្រើនដល់អ្នកប្រើប្រាស់លើសពីបណ្ដាញទំនាក់ទំនងសង្គម ដូចជាការបង់ប្រាក់តាមប្រព័ន្ធកុំព្យូទ័រជាដើម ពោលគឺជាគំនិតមួយ ដែលឆ្លុះបញ្ចាំងពីបណ្ដាញសង្គម WeChat ដ៏ពេញនិយម នៅប្រទេសចិន។តែយ៉ាងណាក្ដី ចាប់តាំងពីមានការកាន់កាប់របស់លោក Musk ក្រុមហ៊ុនបណ្ដាញសង្គមមួយនេះ បានប្រឈមនឹងពេលវេលាច្របូកច្របល់មិនចេះចប់ ដោយមានការបញ្ឈប់បុគ្គលិក ការធ្លាក់ចុះយ៉ាងខ្លាំងនៃអ្នកផ្សាយពាណិជ្ជកម្ម និងការកើនឡើងយ៉ាងឆាប់រហ័សនៃប្រើប្រាស់កម្មវិធីថ្មី Threads ដែលជាការឆ្លើយតបយ៉ាងមានប្រសិទ្ធភាពរបស់ក្រុមហ៊ុន Meta ចំពោះក្រុមហ៊ុន Twitter៕

អ្នកការទូតកំពូលចិន និងប្រធានសន្តិសុខរុស្ស៊ី សន្យាសាមគ្គីភាព

2023/07/25 12:20:24 pm        118
Facebook Telegram Linkin
ចិន៖ អ្នកការទូតជាន់ខ្ពស់របស់ប្រទេសចិន លោក Wang Yi និងលេខាធិការក្រុមប្រឹក្សាសន្តិសុខជាតិរុស្ស៊ី លោក Nikolai Patrushev បានជួបគ្នានៅក្រៅកិច្ចប្រជុំក្រុមប្រទេសមានសេដ្ឋកិច្ចទើបលូតលាស់ឬក្រុមប្រទេស BRICS នៅប្រទេសអាហ្វ្រិកខាងត្បូង។ អំឡុងកិច្ចប្រជុំកាលពីថ្ងៃចន្ទ ក្នុងទីក្រុង Johannesburg លោក Wang បានប្រាប់លោក Patrushev ដែលជាមនុស្សជំនិតជិតបំផុតរបស់ប្រធានាធិបតីលោក Vladimir Putin ថា ប្រទេសចិន មានបំណងពង្រឹងទំនាក់ទំនងជាយុទ្ធសាស្ត្រជាមួយប្រទេសរុស្ស៊ី។ លោក Wang បង្ហើបថា ប្រទេសចិនព្យាយាមបង្កើតសណ្តាប់ធ្នាប់អន្តរជាតិពហុប៉ូល ដើម្បីប្រយុទ្ធប្រឆាំងជាមួយបណ្តាប្រទេសលោកខាងលិច។ លោកនិយាយថា ប្រទេសចិន មានឆន្ទះធ្វើការយ៉ាងជិតស្និទ្ធជាមួយប្រទេសរុស្ស៊ី និងក្រុមប្រទេសBRICS ដ៏ទៃទៀត ដើម្បីការពារផលប្រយោជន៍រួមរបស់ប្រទេសកំពុងអភិវឌ្ឍន៍។ ជាក់ស្តែង ក្នុងស្ថានភាពនៅក្នុងប្រទេសអ៊ុយក្រែន និងការប្រឈមមុខដាក់គ្នាចិន-អាមេរិក លោក Patrushev និយាយថារុស្ស៊ីនិងចិន ប្រឆាំងនឹងផ្នត់គំនិតសង្គ្រាមត្រជាក់ ដែលធ្វើឲ្យមានភាពតានតឹងស្ថានភាពក្នុងតំបន់និងអន្តរជាតិ។ក្រុមអ្នកសង្កេតការណ៍បាននិយាយថា ជំនួបនេះបង្កើតបានជាឱកាសមួយសម្រាប់ប្រទេសចិន និងរុស្ស៊ី ដើម្បីបញ្ជាក់ឡើងវិញថា ពួកគេប្តេជ្ជាចិត្តធ្វើការរួមគ្នា និងបង្ហាញពីសារៈសំខាន់នៃក្របខណ្ឌប្រទេស BRICS ខណៈពួកគេប្រឈមមុខជាមួយសហរដ្ឋអាមេរិក៕

នាយករដ្ឋមន្ត្រីអ៊ីស្រាអែល មានបំណងឲ្យមានកិច្ចព្រមព្រៀងប្រព័ន្ធតុលាការ នៅចុងខែវិច្ឆិកា

2023/07/25 12:13:34 pm        68
Facebook Telegram Linkin
ចិន៖ នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃចន្ទថា លោកសង្ឃឹមថាគណបក្សចម្រុះជាតិនិយមសាសនារបស់លោក នឹងឈានដល់កិច្ចព្រមព្រៀងមួយជាមួយគណបក្សប្រឆាំងលើផែនការផ្លាស់ប្តូរប្រព័ន្ធតុលាការដែលមានការជំទាស់តវ៉ានេះ នៅចុងខែវិច្ឆិកា។សុន្ទរកថាផ្សាយតាមតាមទូស្សន៍ ប៉ុន្មានម៉ោងបន្ទាប់ពីសភាបានអនុម័តច្បាប់ដែលទប់ស្កាត់អំណាចតុលាការកំពូលមួយចំនួន ដែលលោក Netanyahu និយាយថា តុលាការនឹងនៅតែឯករាជ្យ។សភារបស់ប្រទេសអ៊ីស្រាអែល កាលពីព្រឹកថ្ងៃចន្ទ បានអនុម័តច្បាប់ដំបូង នៃការផ្លាស់ប្តូរប្រព័ន្ធតុលាការ ដែលបានស្នើឡើងដោយនាយករដ្ឋមន្ត្រីលោក Benjamin Netanyahu បន្ទាប់ពីកិច្ចប្រឹងប្រែងសម្របសម្រួលកាលពីពេលមុន បានដួលរលំ និងពុំបានធ្វើឲ្យធូរស្រាលវិបត្តិរដ្ឋធម្មនុញ្ញ ដែលធ្វើឲ្យរង្គោះរង្គើរប្រទេសរយៈពេលជាច្រើនខែ។ វិបត្តិបានបណ្តាលឲ្យមានការបែកបាក់ដ៏ជ្រៅនៅក្នុងសង្គមអ៊ីស្រាអែល ដែលបានរំកិលចូលដល់យោធា ដោយមេដឹកនាំការតវ៉ានិយាយថាទាហានបម្រុងស្ម័គ្រចិត្តរាប់ពាន់នាក់ នឹងមិនរាយការណ៍សម្រាប់កាតព្វកិច្ចនោះទេ ប្រសិនបើរដ្ឋាភិបាលបន្តផែនការទាំងនេះ៕

ក្រុមឧទ្ទាម៖រុស្ស៊ីផ្លាស់ប្តូរកងទ័ព និងឧបករណ៍ពីទីក្រុងMelitopol ទៅកាន់តំបន់គ្រីម៉េ

2023/07/25 12:10:38 pm        202
Facebook Telegram Linkin
អ៊ុយក្រែន៖ ចលនាគាំទ្រក្រុមប្រដាប់អាវុធ Atesh បានរាយការណ៍នៅលើ Telegram កាលពីថ្ងៃទី២៤ ខែកក្កដាថា យោធារុស្ស៊ី ត្រូវបានគេសង្កេតឃើញថា បានផ្លាស់ប្តូរទីតាំងគ្រឿងយុទ្ធោករណ៍ទៅកាន់តំបន់គ្រីម៉េដែលកាន់កាប់ជាបណ្តោះអាសន្ន ដើម្បីឆ្លើយតបទៅនឹងប្រតិបត្តិការដ៏ជោគជ័យនាពេលថ្មីៗនេះរបស់កងកម្លាំងការពារអ៊ុយក្រែនប្រឆាំងនឹងអ្នកកាន់កាប់នៅទីក្រុងមេលីតូប៉ូល(Melitopol)។ក្រុមភ្នាក់ងារ Atesh បានរាយការណ៍ពីចលនានៃរថយន្តយោធា ត្រាក់ទ័រ និងឧបករណ៍ផ្សេងទៀត ពីទីក្រុងមេលីតូប៉ូល ទៅកាន់តំបន់គ្រីម៉េ។ ជនជាតិរុស្ស៊ី កំពុងបន្តផ្គត់ផ្គង់កងទ័ពរបស់ពួកគេនៅខ្សែត្រៀមជួរ   មុខ។ ទោះជាយ៉ាងណាក៏ដោយ ក្រុមប្រដាប់អាវុធ បានកត់សម្គាល់ថា កម្រិតនៃការគាំទ្រនេះ ប្រហែលជាមិនមាននិរន្តរភាពយូរទេ។កាលពីថ្ងៃទី៩ ខែកក្កដា អភិបាលក្រុងមេលីតូប៉ូល លោក Ivan Fedorov បានរាយការណ៍ពីការផ្ទុះដ៏ខ្លាំងក្លាមួយនៅភាគខាងជើងនៃទីក្រុងគ្រប់គ្រងនេះ ដោយបង្ហាញថា មូលដ្ឋានយោធារុស្ស៊ីទំនងជាត្រូវបានកំណត់ជាគោលដៅ។ក្រោយមក លោកFedorov បាននិយាយថា ប្រទេសឈ្លានពានគឺរុស្ស៊ី កំពុងបង្កើនវត្តមានយោធារបស់ខ្លួននៅក្នុងទឹកដីកាន់កាប់បណ្តោះអាសន្ននៃតំបន់ Zaporizhzhya ដើម្បីរក្សាច្រករបៀងដីគោកមួយទៅតំបន់គ្រីម៉េរបស់អ៊ុយក្រែន៕

គ.ជ.ប៖ ការប្រកាសលទ្ធផលបោះឆ្នោតបណ្ដោះអាសន្ន នឹងធ្វើនៅថ្ងៃទី០៥ ខែសីហា

2023/07/25 11:52:54 am        450
Facebook Telegram Linkin
ភ្នំពេញ៖ តាមប្រតិទិននៃការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ គណៈកម្មាធិការជាតិរៀបចំការបោះឆ្នោត (គ.ជ.ប)​ នឹងប្រកាសលទ្ធផលបណ្ដោះអាសន្ន ក្នុងករណីគ្មានការបោះឆ្នោតសាជាថ្មី នៅថ្ងៃទី៥ខែសីហា ខាងមុខនេះ។នេះបើតាមប្រសាសន៍ឯកឧត្តម ហង្ស ពុទ្ធា អ្នកពាក្យគ.ជ.ប បានផ្តល់បទសម្ភាស​ជាមួយBTVនៅថ្ងៃទី២៥ខែកក្កដានេះ។នៅក្នុងកិច្ចសម្ភាសនោះ ឯកឧត្តម ហង្ស ពុទ្ធា បានបន្តថា ​បន្ទាប់ពីប្រកាសលទ្ធផល​បណ្តោះអាសន្ន​រួច គ.ជ.ប នឹងទុករយៈពេលមួយចំនួនសម្រាប់គ្រប់ភាគីពាក់ព័ន្ធអាចដាក់​ពាក្យ​ប្តឹង​ទៅគ.ជ.ប ឫក្រុមប្រឹក្សា​រដ្ឋធម្មនុញ្ញ ប្រសិនបើមាន គ.ជ.ប ឫក្រុមប្រឹក្សា​រដ្ឋធម្មនុញ្ញនឹងដោះស្រាយតាម​នីតិវិធីច្បាប់។ សម្រាប់លទ្ធផលផ្លូវការ ការបែងចែកអាសនៈ​ និងកំណត់ចំនួនបេក្ខជនជាប់ឆ្នោត (តាមករណីគ្មាន ឫមានបណ្តឹង និងករណីគ្មានការបោះឆ្នោតសាជាថ្មី) នឹងធ្វើឡើងនៅថ្ងៃទី៩ ខែសីហា រហូតដល់ថ្ងៃទី៤​ ខែកញ្ញា ឆ្នាំ២០២៣។ លើសពីនេះ ​ឯកឧត្តមបន្តថា បច្ចុប្បន្ន គ.ជ.ប ​កំពុងមមាញឹក ទទួល និងបូក​តួលេខលទ្ធផល​បោះឆ្នោត ​នៅតាមរាល់ការិយាយល័យទូទាំង​ប្រទេសកម្ពុជា​ ដែលបានផ្ញើរមកកាន់គ.ជ.ប។បើតាមគ.ជ.ប ចំនួនអ្នកបានទៅបោះឆ្នោតជ្រើសតាំងតំណាងរាស្រ្ត​ នីតិកាលទី៧ ឆ្នាំ២០២៣ មាន​ចំនួនសរុប ជាង៨លាននាក់ ​ស្មើនឹង៨៤.៥៨ភាគរយ នៃប្រជាពលរដ្ឋមានឈ្មោះក្នុង​បញ្ជី​បោះឆ្នោត​ជាង ៩លាននាក់។ ផ្អែកតាមលទ្ធផលក្រៅផ្លូវ ​ការបោះឆ្នោតក្នុងអាណត្តិនេះ គណបក្សប្រជាជន​កម្ពុជា ទទួលបាន១២០អាសនៈ និងគណបក្សហ៊្វុនស៊ិនប៉ិចទទួលបាន៥អាសនៈ៕អត្ថបទ៖ទូច សោភ័ណ 

គណបក្សនយោបាយមួយចំនួន ប្រកាសគាំទ្រលទ្ធផលបោះឆ្នោតបណ្ដោះអាសន្ន

2023/07/25 11:45:50 am        246
Facebook Telegram Linkin
ភ្នំពេញ៖ បន្ទាប់ពីគណៈកម្មាធិការជាតិរៀចំការបោះឆ្នោត (គ.ជ.ប) បានប្រកាសលទ្ធផល​បណ្ដោះអាសន្ន ​នៃការបោះឆ្នោតជ្រើសតាំងតំណាងរាស្រ្ដ ​នីតិកាលទី៧ ឆ្នាំ២០២៣ កាលពីថ្ងៃទី ២៣ ខែកក្កដា ឆ្នាំ២០២៣ ​ដែលប្រជាពលរដ្ឋជាង ៨ លាន ២ សែននាក់​បានចេញទៅបោះឆ្នោត ក្នុងនោះ​គណបក្សប្រជាជនកម្ពុជា​ទទួលបាន ១២០ អាសនៈ ចំណែក​គណបក្ស​ហ៊្វុនស៊ិនប៉ិច​ទទួល​បាន ៥ អាសនៈនៅក្នុងរដ្ឋសភាបណ្ដាគណបក្សមួយចំនួន​បានប្រកាសគាំទ្រចំពោះលទ្ធផលនេះ។គណបក្សហ៊្វុនស៊ិនប៉ិច​ដែលទទួលបាន ៥ អាសនៈនៅក្នុងរដ្ឋសភានៃការបោះឆ្នោតជ្រើស​តាំង​តំណាងរាស្រ្តនីតិកាលទី៧ ឆ្នាំ២០២៣នេះ គឺទទួល​បាន​ការគាំទ្រ​ពី​ប្រជាពលរដ្ឋក្នុង​ខេត្ត​កណ្ដាល កំពង់ចាម ​កំពង់ធំ ​ព្រៃវែង​ និង​រាជធានីភ្នំពេញ។​ ខណៈដែលគណបក្សនេះ បានចាត់ទុក​លទ្ធផលនេះ​ជាការបោះឆ្នោតស្របតាមបែបលទ្ធិប្រជាធិបតេយ្យពេញលេញនៅកម្ពុជា។ លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច ​ថ្លែងប្រាប់ BTV ថា តាមរយៈលទ្ធផល​បឋមនេះ​គណបក្សហ៊្វុនស៊ិនប៉ិច ចាត់ទុកជាសមិទ្ធផលផ្លែផ្កាថ្មីមួយសម្រាប់បក្ស ក្រោមការដឹកនាំ​របស់ព្រះអង្គម្ចាស់ នរោត្តម ចក្រាវុធ ដែលបានយាងមក​ពី​ប្រទេសបារាំង មកបំពេញកិច្ចការ​នយោបាយជាង១ឆ្នាំ​ ជំនួសព្រះបិតា នរោត្តម រណឫទ្ធិ ដែលយាងសោយទិវង្គត កាលពីចុងឆ្នាំ២០២១។ចំណែកលោក គុជ លី ប្រធានគណបក្សខ្មែរតែមួយ ​បានលើកឡើងថា ក្នុងនាមលោកជាប្រធាន​គណបក្សបានគត់សម្គាល់​ឃើញថា​ ទាំងការឃោសនាបោះឆ្នោត និងការបោះឆ្នោតជ្រើសតាំង​តំណាងរាស្រ្ដនីនីតិកាលទី៧ ឆ្នាំ២០២៣ កាលពីថ្ងៃទី ២៣ ខែកក្កដា ឆ្នាំ ២០២៣ កន្លងទៅនេះ គឺធ្វើឡើងដោយគ្មានអំពើហិង្សាមួយកើតមានឡើងឡើយ ហើយដំណើរការបោះឆ្នោតអាច​ប្រព្រឹត្តិទៅ​បានដោយរលូន​ជាពិសេសការរៀបចំដោយ ​គ.ជ.ប គឺត្រឹមត្រូវ​ និងយុត្តិធម៌។សូមជម្រាបថា អត្រាខ្ពស់នៃអ្នកចូលរួមបោះឆ្នោតនៅកម្ពុជា ​សម្រាប់អាណត្តិទី៧ ឆ្នាំ២០២៣នេះ បានបង្ហាញពីប្រជាធិបតេយ្យដ៏​រស់រវើក ​ខណៈមានអ្នកបោះឆ្នោតជាង​ ៨,២ លាននាក់ បាន​ប្រើប្រាស់​សិទ្ធិ ស្របតាមរដ្ឋធម្មនុញ្ញ ក្នុងការជ្រើសរើសគណបក្សនយោបាយ និងអ្នកដឹកនាំ​នាពេលអនាគត ដែលពលរដ្ឋជឿថាអាចដឹកនាំប្រទេសជាតិបានប្រសើរបំផុត ​នៅលើមាគ៌ាសន្តិភាព ស្ថិរភាព និងការអភិវឌ្ឍសង្គម-សេដ្ឋកិច្ច៕អត្ថបទ៖ វ៉ន ដារ៉ា

បណ្ដាញសង្គម

ព័ត៌មានថ្មីៗ

កម្ពុជាស្នើឱ្យអាស៊ានត្រួតពិនិត្យលើការចោទប្រកាន់ច្រំដែលរបស់ថៃថាកម្ពុជាបំពាទបទឈប់បាញ់
08/02/2025 08:08 PM
Facebook Telegram Linkin
ក្រសួងការងារ បើកយុទ្ធនា​ការជា​ទ្រង់ទ្រា​យធំ​ជំហានទី២ ដើម្បីនាំឱកា​សការងា​រជូនពលក​រខ្មែរដែ​លទើប​ត្រឡប់​ពីថៃ
08/02/2025 07:08 PM
Facebook Telegram Linkin
ឯកឧត្តម ទេសរដ្ឋមន្ត្រី គន់ គីម នាំយកថវិការបស់សម្តេចធិបតី ហ៊ុន ម៉ាណែត ប្រគល់​ជូន​វីរភាព​កងទ័ព​ពលី ចំនួន៤រូប នៅខេត្តឧត្តរមានជ័យ
08/02/2025 07:08 PM
Facebook Telegram Linkin
គណៈប្រតិភូជាន់ខ្ពស់សភាកម្ពុជា អញ្ជើញនិវត្តន៍មកដល់មាតុ​ប្រទេស​វិញ​ដោយ​សុវត្ថិភាព និង​ជោគជ័យ ក្រោយបញ្ចប់បេសកកម្មការទូតសភា នៅទីក្រុងហ្សឺណែវ ប្រទេសស្វីស
08/02/2025 06:08 PM
Facebook Telegram Linkin
សេចក្ដីរាយការណ៍៖ ឥណ្ឌានឹងបន្តទិញប្រេងពីរុស្ស៊ី ទោះមានការគំរាមកំហែងពីលោក Trump
08/02/2025 05:08 PM
Facebook Telegram Linkin
អាមេនី និងសហរដ្ឋអាមេរិក នឹងធ្វើសមយុទ្ធយោធារួមគ្នា ពីថ្ងៃទី ១២ ដល់ទី២០ ខែសីហា
08/02/2025 05:08 PM
Facebook Telegram Linkin
មនុស្សយ៉ាងតិច ៦នាក់ស្លាប់ ខណៈព្យុះត្រូពិក Wipha បង្កឲ្យមានទឹកជំនន់ នៅថៃ
08/02/2025 05:08 PM
Facebook Telegram Linkin
ចិនចោទអាមេរិកថា បានឆ្លៀតយកចន្លោះប្រហោងរបស់ Microsoft ដើម្បីវាយប្រហារតាមប្រព័ន្ធអ៊ីនធឺណិត
08/02/2025 05:08 PM
Facebook Telegram Linkin
នាយឧត្តមសេនីយ៍ វង្ស ពិសេន អញ្ជើញចុះសួរសុខទុក្ខយុទ្ធជនរបួស កំពុង​សម្រាក​ព្យាបាល​នៅ​មន្ទីរ​ពេទ្យព្រះកេតុមាលា
08/02/2025 04:08 PM
Facebook Telegram Linkin
ឯកឧត្តម ហ៊ុន ម៉ានី​ បញ្ជាក់ពីនិតិវិធីនៃការតាក់តែងវិញ្ញាសា និងផ្តាំផ្ញើដល់បេក្ខជនឱ្យ​ផ្តោតអារម្មណ៍ យកចិត្តទុកដាក់ និងខិតខំប្រឹងប្រែងមកលើការប្រឡងប្រជែង ដោយបញ្ចេញ​ឱ្យអស់ពីសមត្ថភាព
08/02/2025 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.