នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យ​នូវ​កិច្ច​ប្រជុំ​​វិសាមញ្ញ នៃ​គណៈកម្មាធិកា​រ​ព្រំដែន​ទូទៅកម្ពុជា-ថៃ
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា

នយោបាយ​ និង ការអភិវឌ្ឍន៍

ឯកឧត្តម ហ៊ុន ម៉ាណែត៖ ប្រវត្តិសាស្រ្តបញ្ជាក់ថា មានតែគណបក្សប្រជាជនទេ ដែលមានលទ្ធភាពដឹកនាំប្រទេសឆ្ពោះទៅរកភាពរុងរឿង

2023/07/21 10:09:01 am        169
Facebook Telegram Linkin
ភ្នំពេញ៖ ឯកឧត្តម ហ៊ុន ម៉ាណែត បានថ្លែងថា ប្រវត្តិសាស្រ្តបានបញ្ជាក់ថា មានតែគណបក្ស​ប្រជាជន​កម្ពុជាទេ ​ដែលមានសមត្ថភាព និងលទ្ធភាពដឹកនាំប្រទេសបាន​ប្រកបដោយភាពរុងរឿង និងសុខសាន្តរបស់បងប្អូនប្រជាពលរដ្ឋខ្មែរ​ទាំងមូល​ ដូច្នេះបងប្អូន​ទាំង​អស់គប្បីបោះឆ្នោត​ជូន​គណបក្សប្រជាជនកម្ពុជា​ឱ្យដឹកនាំប្រទេសជាបន្តទៀត។ក្នុងឱកាសដឹកនាំនៃការជួបជុំសមាជិកសមាជិកា របស់គណបក្សប្រជាជនកម្ពុជា នាព្រឹកថ្ងៃទី២១ ខែកក្កដា ឆ្នាំ២០២៣នេះ នៅមជ្ឈមណ្ឌលកោះពេជ្យ ដើម្បីដង្ហែក្បួនបិទយុទ្ធនាការឃោសនា​បោះឆ្នោត​ជ្រើសតាំងតំណាងរាស្ត្រ ​នីតិកាលទី៧នេះ ឯកឧត្តម ហ៊ុន ម៉ាណែត ​បានលើកឡើងថា នៅក្នុងរយៈពេលជាង៤៤ឆ្នាំកន្លងមកនេះ គណបក្សប្រជាជនកម្ពុជា​បានរួមសុខរួមទុក្ខជាមួយ​ប្រជាជនកម្ពុជានៅគ្រប់កាលៈទេស បានដឹកនាំប្រទេសជាតិឆ្លងកាត់ការលំបាកគ្រប់បែបយ៉ាង​ទាំងអស់ តាំងពីតំណាក់កាលនៃថ្ងៃរំដោះជាតិខ្មែរឲ្យរួចផុតពីរបបប្រល័យពូជសាសន៍ប៉ុលពតមក។ តំណាក់កាលកសាងប្រទេសជាតិ និងការបង្រួបង្រួមជាតិ និងបានកសាងនូវសុខសន្តិភាព និងការអភិវឌ្ឍជាតិឲ្យមានការរីកចម្រើនដូចសព្វថ្ងៃនេះជាដើម។ឯកឧត្តម ហ៊ុន ម៉ាណែត បានបញ្ជាក់ថា «សច្ចធម៌នៃប្រវត្តិសាស្រ្តកម្ពុជានេះ បានបញ្ជាក់ថា មានតែ គណបក្សប្រជាជនកម្ពុជាតែមួយទេ​ ដែលមានសមត្ថភាព និងលទ្ធភាព​ក្នុងការដឹកនាំកម្ពុជាឆ្ពោះ​ទៅ​ត្រើយសុភមង្គលរបស់ប្រជាជនទូទាំងប្រទេស។ដូចនេះ​ការបោះឆ្នោតជូនដល់គណបក្ស​ប្រជាជន​កម្ពុជា គឺពិតជាបានបោះឆ្នោតជូនខ្លួនឯងយ៉ាងពិតប្រាកដ»។ជាមួយគ្នានោះដែរឯកឧត្តម ហ៊ុន ម៉ាណែត ក៏បានរំលឹកផងដែរថា ​រៀងរាល់​អាណត្តិ៥ឆ្នាំម្តង គណបក្សប្រជាជនកម្ពុជា តែងតែដាក់ចេញនូវគោលនយោបាយ​ និងយុទ្ធសាស្រ្តអភិវឌ្ឍន៍សង្គម សេដ្ឋកិច្ចដែលមានភាពប្រាកដនិយម ច្បាស់លាស់ ជាក់លាក់ ឆ្លើយតបទៅហ្នឹងស្ថានភាព និង​តម្រូវការជាក់ស្តែង របស់ប្រជាជនកម្ពុជា ​ដោយផ្តើមចេញពីយុទ្ធសាស្រ្តត្រីកោណ និង​យុទ្ធសាស្រ្ត​ចតុកោណ​ទាំងបួនតំណាក់កាល​ផងដែរ ខណៈយុទ្ធសាស្រ្តទាំងអស់​នេះរាជ​រដ្ឋាភិបាល​ដែលដឹកនាំ​ដោយគណបក្សប្រជាជនកម្ពុជា​ បានសម្រេចនូវលទ្ធផលយ៉ាងធំធេងរាប់​មិនអស់​សម្រាប់ជាតិ និង​ប្រជាជនខ្មែរទាំងមូលនោះ៕ អត្ថបទ៖ បាន ចក់

អ្នកសង្កេតការណ៍អន្តរជាតិតាមបណ្ដាប្រទេសនានា អញ្ជើញមកដល់កម្ពុជាក្នុងថ្ងៃនេះ

2023/07/21 09:55:39 am        125
Facebook Telegram Linkin
ភ្នំពេញ៖ អ្នកសង្កេតការណ៍អន្តរជាតិមកពីតាមបណ្ដាប្រទេស និងស្ថានប័ននានា នៅថ្ងៃទី២១ ខែកក្កដា ឆ្នាំ២០២៣នេះ បានអញ្ជើញមកដល់ប្រទេសកម្ពុជា ដើម្បីចូលរួមសង្កេតការណ៍​ក្នុងព្រឹត្តិការណ៍​បោះឆ្នោតជ្រើសតាំងតំណាងរាស្រ្ត សម្រាប់នីតិកាលទី៧ ដែលនឹងប្រព្រឹត្តិទៅនាថ្ងៃទី ២៣ខែកក្កដា ឆ្នាំ ២០២៣ ខាងមុខនេះ។ឯកឧត្ដម ហង្ស ពុទ្ធា សមាជិក និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា ក្រុមអ្នកសង្កេតការណ៍អន្តរជាតិដែលអញ្ជើញមកដល់ប្រទេសកម្ពុជានាថ្ងៃនេះ បានចាប់​ផ្ដើមមកដល់ពីម៉ោងប្រមាណ ៩ព្រឹក រហូតដល់ម៉ោង ៧យប់ ក្នុងនោះ​អ្នកសង្កេតការណ៍​តំណាងមកពីប្រទេសប្រទេសថៃ ឥណ្ឌា ទីម័រ មីយ៉ាន់ម៉ា រុស្ស៊ី និងប្រទេសហ្វីលីពីន បានអញ្ជើញមកដល់នាព្រឹកនេះ។អ្នកសង្កេតការរបស់ប្រទេសថៃ ដែលទើបអញ្ជើញមកដល់ប្រទេសកម្ពុជា នាព្រឹកនេះ បានថ្លែងប្រាប់ BTV ថា ក្នុងនាមជាអ្នកសង្កេតការណ៍តំណាងប្រទេសថៃ លោក​មាន​សេចក្ដីសប្បាយរីករាយ​ដែល​បានចូលរួមធ្វើជាអ្នកសង្កេតការណ៍ក្នុងព្រឹក្តិការណ៍បោះឆ្នោតជ្រើសតាំងតំណាងរាស្រ្ដ​សម្រាប់​នីតិកាលទី៧ របស់ប្រទេសកម្ពុជានាពេលនេះ។បើតាមឯកឧត្ដម ហង្ស ពុទ្ធា ក្នុងឱកាសការបោះឆ្នោតជ្រើសតាំងតំណាងរាស្រ្ដ នីតិកាលទី៧ ឆ្នាំ២០២៣នៅកម្ពុជា ​នាថ្ងៃទី២៣ ខែកក្កដា ឆ្នាំ២០២៣នេះ ​មានអ្នកសង្កេតការណ៍ជាតិ និងអន្តរជាតិ​មកពីបណ្ដាប្រទេស ស្ថាប័ន អង្គការ សមាគមនានា ​ប្រមាណ​ ៩ ​ម៉ឺននាក់ ក្នុងនោះមានអ្នក​សង្កេតការណ៍​អន្តរជាតិជាង ៦០០ នាក់ដែលនឹងចូលរួម​សង្កេតការណ៍បោះឆ្នោត​នៅក្នុងប្រទេសកម្ពុជា៕អត្ថបទ៖ វ៉ន ដារ៉ា

រាជរដ្ឋាភិបាលអនុញ្ញាតឱ្យចេញប្លង់កម្មសិទ្ធិដីទំហំ៣៣៥ហិកតា ក្នុងភូមិភារកិច្ច សង្កាត់ប៉ាលហាល ជូនប្រជាពលរដ្ឋ

2023/07/20 03:40:55 pm        229
Facebook Telegram Linkin
ព្រះវិហារ៖ នៅព្រឹកថ្ងៃទី២០ ខែកក្កដា ឆ្នាំ២០២៣ ឯកឧត្តម គីម រិទ្ធី អភិបាលនៃគណៈអភិបាល ខេត្តព្រះវិហារ បានអញ្ជើញជួបសំណេះសំណាល និងប្រកាសបើកយុទ្ធនាការចុះវាស់វែងកាត់ ឈ្វៀលដីធ្លី ស្ថិតនៅតំបន់កូនភ្នំ ភូមិភារកិច្ច សង្កាត់ប៉ាលហាល ក្រុងព្រះវិហារ ខេត្តព្រះវិហារ ជូនបងប្អូនប្រជាពលរដ្ឋដែលមានទំហំសរុប ៣៣៥ហិកតា ដែលចែកចេញជាប្រភេទក្បាលដី សម្រាប់ចែកជូនប្រជាពលរដ្ឋ និងក្បាលដីបម្រុងរបស់រដ្ឋ ដែលក្នុង នោះដីបម្រុងរបស់រដ្ឋមានទំហំ ៨៥ហិកតា។ ពិធីបានប្រព្រឹត្តទៅនៅក្នុងបរិវេណសាលា ក្រុងព្រះ វិហារ ដោយមានការចូលរួម ពីសំណាក់អភិបាលរងខេត្ត ថ្នាក់ដឹកនាំមន្ទីរអង្គភាពជុំវិញខេត្ត អាជ្ញាធរដែនដីគ្រប់លំដាប់ថ្នាក់ និងបងប្អូន ប្រជាពលរដ្ឋ ស្ថិតក្នុងក្រុងព្រះវិហារ ប្រមាណជិត ៣០០នាក់។នាឱកាសនោះ ឯកឧត្តម គីម រិទ្ធី បានឱ្យដឹងថា ដោយទទួលបាននូវការទទូចស្នើសុំពីសំណាក់​បងប្អូន​ប្រជាពលរដ្ឋដែលរស់នៅក្នុងតំបន់កូនភ្នំ ​ស្តីពីការស្នើ សុំអោយជួយ​វាស់វែង​ដើម្បី​ចេញប្លង់​កម្មសិទ្ធិទៅលើដីធ្លីងដែលស្ថិត ក្នុងតំបន់ខាងលើជូនដល់ ពួកគាត់។ក្រោយពីទទួលបាន​ការស្នើសុំ​របស់បងប្អូនប្រជាពលរដ្ឋ តាមរយៈឯកឧត្តមផ្ទាល់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ​ក៏បានសម្រេចអនុញ្ញាតអោយរដ្ឋបាលខេត្ត ព្រះវិហារ ចាត់ចែង​ក្រុមការងារ ដើម្បីវាស់វែងដីធ្លីដែលស្ថិតនៅក្នុងចំនុច​ តំបន់ខាងលើជូនដល់ បងប្អូនប្រជាពលរដ្ឋទៅតាមសំណូមពរ។ក្នុងឱកាសនោះផងដែរ ឯកឧត្តម ក៏បានចូលរួមអបអរសាទរ ​ជាមួយបងប្អូនប្រជាពលរដ្ឋ ដែល​ទទួលបានការយកចិត្តទុកដាក់គិតគូរពីសំណាក់ប្រមុខរាជរដ្ឋាភិបាល ដើម្បីវាស់វែង និងផ្តល់ជូន​នូវប្លង់កម្មសិទ្ធិដីធ្លីជូនដល់បងប្អូន។ជាមួយគ្នានេះផងដែរ ឯកឧត្តម ក៏បានស្នើអោយបងប្អូនត្រូវចុះកំណត់ព្រំដីរបស់បងប្អូនអោយ បានច្បាស់លាស់ ​ដើម្បីងាយស្រួលក្នុងការវាស់វែង ​និងត្រូវចេះអនុគ្រោះ អត់អោនរវាងគ្នានិងគ្នា ដែលមានព្រំដីជាប់គ្នា។នៅក្នុងឱកាសនោះបងប្អូនប្រជាពលរដ្ឋ បានបង្ហាញនូវការរីករាយសប្បាយ ចិត្តជា ខ្លាំង ដោយបានបង្ហាញនូវអារម្មណ៍រីករាយតាមរយៈ ការថ្លែងអំណរគុណ ​និងជូនពរជ័យសិរីមង្គល ដល់ថ្នាក់ដឹកនាំគ្រប់ជាន់ថ្នាក់ពិសេសសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ទទួលបាន​នូវសុខភាពល្អ និងជ័យជំនះគ្រប់ភារកិច្ច ​ជាពិសេសទទួលបានជ័យជំនះ ក្នុងការបោះឆ្នោត​ជ្រើសតាំងតំណាងរាស្ត្រនីតិកាលទី៧ ដែលនឹងប្រព្រឹត្តទៅនាថ្ងៃទី២៣ ខែកក្កដា ឆ្នាំ២០២៣ ខាងមុខនេះ៕ 

ឯកឧត្តម ប៉ាន សូរស័ក្តិ៖ គណបក្សប្រជាជនកម្ពុជា ផ្តើមចេញពីយកអាយុជីវិតធ្វើជាដើមទុន

2023/07/20 03:28:28 pm        75
Facebook Telegram Linkin
ភ្នំពេញ៖ បេក្ខជនតំណាងរាស្រ្តមណ្ឌលខេត្តកំពង់ចាម ឯកឧត្តម ប៉ាន សូរស័ក្តិ ប្រធានក្រុមការងារគណបក្សចុះមូលដ្ឋានស្រុកព្រៃឈរ និងស្រុកបាធាយ បានលើកឡើងថា សមិទ្ធផលនានា និងសុខសន្តិភាពសព្វថ្ងៃនេះ គឺទទួលបានពីការយកអាយុជីវិតធ្វើជាដើមទុន និងពលិកម្មដ៏ធំធេងរបស់សមាជិក សមាជិកាគណបក្សប្រជាជនកម្ពុជា។ការលើកឡើងខាងលើនេះរបស់ឯកឧត្តមបេក្ខជនតំណាងរាស្រ្ត ធ្វើឡើងក្នុងយុទ្ធនាការឃោសនាបោះឆ្នោត និងជួបសំណេះសំណាលជាមួយប្រជាពលរដ្ឋម្ចាស់ឆ្នោតប្រមាណជិត ៤០០នាក់ ក្នុងមូលដ្ឋានឃុំទំនប់ ស្រុកបាធាយ កាលពីព្រឹកថ្ងៃទី២០ ខែកក្កដានេះ នៅបរិវេណវត្តទំនប់ព្រះអង្គមានជ័យ។ ក្នុងឱកាសនោះ ឯកឧត្តម បានពាំនាំនូវការផ្ដាំផ្ញើការសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលសម្ដេចទាំងពីរតែងតែគិតគូរអំពីសុខទុក្ខរបស់បងប្អូន ប្រជាពលរដ្ឋទាំងអស់ ដោយមិនប្រកាន់បក្ខពួក ពណ៌សប្បុរ សាសនា ឬនិន្នាការនយោបាយអ្វីឡើយ។ក្នុងឱកាសនោះដែរ ឯកឧត្តមបេក្ខជនតំណាងរាស្រ្ត បានរំឮកនូវគុណបំណាច់របស់គណបក្សប្រជាជនកម្ពុជា ក្នុងការជួយសង្រ្គោះប្រជាជនចេញពីរបបប្រល័យពូជសាសន៍ ប៉ុល ពត, ជាពិសេសនយោបាយឈ្នះឈ្នះ ដែលធ្វើឱ្យប្រទេសកម្ពុជាមានលទ្ធិប្រជាធិបតេយ្យ សេរីពហុបក្ស ការបង្រួបបង្រួមជាតិ ផ្សះផ្សាជាតិ រហូតទទួលបានសុខសន្តិភាពពេញលេញ ក្រោមការដឹកនាំប្រកបដោយគតិបណ្ឌិតរបស់សម្តេចតេជោនាយករដ្ឋមន្រ្តី ព្រមទាំងទទួលបានសមិទ្ធផល និងភាពជោគជ័យជាច្រើន រួមមាន៖ ផ្លូវ ស្ពាន បណ្ដាញទឹកស្អាត អណ្ដូងទឹក ភ្លើងអគ្គិសនី រោងចក្រកសិដ្ឋាន សំណង់តូចធំ មណ្ឌលពាណិជ្ជកម្ម សាលារៀន មន្ទីរពេទ្យ វត្តអារាម។ល។, ជោគជ័យនៃការប្រយុទ្ធឈ្នះជំងឺកូវីដ-១៩, ជោគជ័យដ៏ត្រចះត្រចង់ក្នុងការធ្វើជាម្ចាស់ផ្ទះនៃកិច្ចប្រជុំកំពូលអាស៊ាន, ជោគជ័យក្នុងការរៀបចំកម្មវិធីអង្គរសង្ក្រាន, ជោគជ័យជាប្រវត្តិសាស្រ្ត ក្នុងការធ្វើជាម្ចាស់ផ្ទះនៃការរៀបចំព្រឹត្តិការណ៍ប្រកួតកីឡាស៊ីហ្គេមលើកទី៣២ ឆ្នាំ២០២៣ និងអាស៊ានប៉ារ៉ាហ្គេមលើកទី១២ ដែលទើបបិទបញ្ចប់កាលពីពេលថ្មីៗកន្លងទៅនេះ។ ឯកឧត្តមបន្ថែមថា សមិទ្ធផលទាំងនេះ សុទ្ធតែបានមកពីផ្លែផ្កានៃសន្តិភាព ដោយការយក​អាយុជីវិតធ្វើជា​ដើមទុន និងពលិកម្មដ៏ធំធេងរបស់សមាជិក ​សមាជិកាគណបក្សប្រជាជនកម្ពុជា។អាស្រ័យហេតុនេះ ​យើងទាំងអស់គ្នាដែលជាកូនចៅជំនាន់ក្រោយ នឹងចងចាំជានិច្ចនូវ​គុណូបការៈដ៏ថ្លៃថ្លានេះ និងប្តេជ្ញាចិត្តចូលរួមក្នុងការការពារសន្តិភាព​ឱ្យរឹងមាំស្ថិតស្ថេរគង់វង្សជានិច្ច តាមរយៈការទៅចូលរួមបោះឆ្នោតនៅថ្ងៃទី២៣ ​ខែកក្កដា ឆ្នាំ២០២៣ខាងមុខនេះឱ្យបានគ្រប់ៗគ្នា ហើយត្រូវបោះឆ្នោតជូនគណបក្សប្រជាជនកម្ពុជា ​ដែលមានលេខរៀងទី១៨ និងមានរូប​សញ្ញាទេវតា​បាចផ្កាជាសម្គាល់ ដើម្បីរក្សាសុខសន្តិភាព ការអភិវឌ្ឍ និងភាពរីកចម្រើនបន្តទៀត៕

ប្រទេសសិង្ហបុរីត្រូវបានរង្គោះរង្គើ ដោយសាររឿងអាស្រូវនយោបាយដ៏កម្រ

2023/07/20 03:14:43 pm        109
Facebook Telegram Linkin
ប្រទេសសិង្ហបុរីដែលត្រូវបានគេស្គាល់ដោយសារស្ថិរភាពនយោបាយរបស់ប្រទេសនេះ ត្រូវបានរង្គោះរង្គើដោយសាររឿងអាស្រូវនយោបាយដ៏កម្រមួយ។ កាលពីសប្តាហ៍មុន ទេសរដ្ឋមន្ត្រីមួយរូបត្រូវបានចាប់ខ្លួននៅក្នុងការស៊ើបអង្កេតអំពើពុករលួយ ដែលជាការចាប់ខ្លួនលើកដំបូងក្នុងរយៈពេល ៤ទសវត្សរ៍ដែលត្រូវបានជាប់ពាក់ព័ន្ធក្នុងការស៊ើបអង្កេតបែបនេះ។ហើយកាលពីថ្ងៃចន្ទ សមាជិកសភាពីររូប ដែលម្នាក់ក្នុងចំណោមពួកគេធ្លាប់មានឋានៈជានាយករដ្ឋមន្ត្រីដ៏មានសក្តានុពល បានលាលែងពីតំណែង បន្ទាប់ពីត្រូវបានគេបង្ហាញថា ពួកគេកំពុងមានទំនាក់ទំនងស្នេហាក្រៅឆាក។ បញ្ហានេះបានធ្វើឱ្យប្រជាជនដែលរស់នៅក្នុងរដ្ឋ-ទីក្រុងមួយនេះមានការភ្ញាក់ផ្អើលយ៉ាងខ្លាំង ដែលប្រទេសនេះធ្លាប់មានមោទនភាពចំពោះកេរ្តិ៍ឈ្មោះរបស់ខ្លួនសម្រាប់អភិបាលកិច្ចស្អាតស្អំ និងមានមេដឹកនាំដែលមានប្រាក់ខែខ្ពស់បំផុតនៅក្នុងពិភពលោក។ក្រុមអ្នកវិភាគនិយាយថា រឿងអាស្រូវដែលលាតត្រដាងទាំងនេះអាចរារាំងការគាំទ្រដល់គណបក្សសកម្មភាពប្រជាជន (PAP) ដែលកាន់អំណាចតាំងពីឆ្នាំ១៩៥៩មក និងទទួលបានសំឡេងភាគច្រើននៅក្នុងសភា។ ពួកគេក៏និយាយដែរថា បញ្ហានេះធ្វើឱ្យមានការសង្ស័យថា តើនៅពេលណាដែលលោកនាយករដ្ឋមន្ត្រី លី សៀនឡុង អាចប្រគល់តំណែងដឹកនាំឲ្យអ្នកផ្សេងបាន៕

រដ្ឋមន្ត្រីក្រសួងរតនាគារអាមេរិក លោកស្រី Yellen ជួបជាមួយទេសាភិបាលធនាគាររដ្ឋវៀតណាម លោកស្រី Hong

2023/07/20 02:08:40 pm        123
Facebook Telegram Linkin
អាមេរិក៖ រដ្ឋមន្ត្រីក្រសួងរតនាគារអាមេរិក លោកស្រី Janet Yellen បានជួបជាមួយទេសាភិបាលធនាគាររដ្ឋវៀតណាម លោកស្រី Nguyen Thi Hong ( ង្វៀន ធី ហុង) នៅទីក្រុងហាណូយ នៅថ្ងៃព្រហស្បតិ៍ (ទី២០ ខែកក្កដា) ដែលជាការចាប់ផ្តើមដំណើរទស្សនកិច្ចរយៈពេល ២ថ្ងៃរបស់លោកស្រីមកកាន់ប្រទេសអាស៊ីអាគ្នេយ៍មួយនេះ។ខណៈពេលដែលទស្សនកិច្ច នៅទីក្រុងហាណូយ លោកស្រី Yellen នឹងពិភាក្សាអំពីវិធីជួយដល់ការផ្លាស់ប្តូររបស់ប្រទេសទៅកាន់ថាមពលស្អាត ដែលត្រូវបានផ្តល់ហិរញ្ញប្បទានដោយមូលនិធិ ១៥ពាន់លានដុល្លារពីក្រុមប្រទេសអ្នកមានទាំង៧ (G7)។ លោកស្រីរដ្ឋមន្ត្រីក៏ត្រូវបានគេរំពឹងដែរថា នឹងពិភាក្សាអំពីការអនុវត្តរបស់ប្រទេសវៀតណាមក្នុងការរក្សាតម្លៃរូបិយប័ណ្ណដុងឲ្យទាប អំឡុងពេលជួបជាមួយមេដឹកនាំកំពូលរបស់ប្រទេសនេះ។ដំណើរទស្សនកិច្ចរបស់លោកស្រី Yellen ទៅកាន់ទីក្រុងហាណូយនេះ កើតឡើងនៅពេលដែលពាណិជ្ជកម្ម រវាងប្រទេសវៀតណាម និងសហរដ្ឋអាមេរិក បានធ្លាក់ចុះយ៉ាងខ្លាំង នៅឆមាសទី១នៃឆ្នាំនេះ។ យោងតាមទិន្នន័យគយរបស់រដ្ឋាភិបាល បានឲ្យដឹងថា ការនាំចេញរបស់វៀតណាមទៅអាមេរិក ដែលជាទីផ្សារនាំចេញដ៏ធំបំផុតរបស់ខ្លួន បានធ្លាក់ចុះ ២២ភាគរយ ក្នុងចន្លោះពេលពីខែមករា ដល់ខែមិថុនា ដោយធ្លាក់មកត្រឹម ៤៤,៤ពាន់លានដុល្លារ។ ការនាំចេញសំខាន់ៗរបស់វៀតណាមទៅកាន់សហរដ្ឋអាមេរិក រួមមាន ទូរស័ព្ទស្មាតហ្វូន សម្លៀកបំពាក់ និងស្បែកជើង។សូមបញ្ជាក់ដែរថា ដំណើររបស់លោកស្រី Yellen គឺជាផ្នែកនៃការផ្លាស់ប្តូរទស្សនកិច្ចថ្នាក់ដឹកនាំជាន់ខ្ពស់ជាបន្តបន្ទាប់ រវាងប្រទេសទាំង២ ដែលឆ្នាំនេះ គឺជាប្រារព្ធខួបលើកទី១០ នៃភាពជាដៃគ្រប់ជ្រុងជ្រោយផ្លូវការដែលមានស្រាប់៕

វ៉េណេហ្ស៊ុយអេឡា ស្នើអាមេរិក ឲ្យធ្វើបត្យាប័នអតីតប្រមុខចារកម្មយោធា

2023/07/20 02:05:37 pm        128
Facebook Telegram Linkin
វេណេហ្ស៊ុយអេឡា៖ កាលពីថ្ងៃពុធ (១៩ កក្កដា) រដ្ឋសភានៃប្រទេសវេណេហ្ស៊ុយអេឡា បានស្នើឱ្យសហរដ្ឋអាមេរិក ធ្វើបត្យាប័នអតីតប្រមុខចារកម្មលោក Hugo Carvajal ទៅកាន់ប្រទេសវេណេហ្ស៊ុយអេឡា ដើម្បីឲ្យលោកអាចប្រឈមមុខនឹងការចោទប្រកាន់នានារួមទាំងមូលហេតុ និងការផ្តល់ហិរញ្ញប្បទានភេរវកម្មផងដែរ។លោក Carvajal អតីតប្រមុខចារកម្មយោធារបស់ប្រទេសវេណេហ្ស៊ុយអេឡា បានទៅដល់សហរដ្ឋអាមេរិកកាលពីថ្ងៃពុធ ដើម្បីប្រឈមមុខនឹងការចោទប្រកាន់ពីបទជួញដូរគ្រឿងញៀន បន្ទាប់ពីត្រូវបានធ្វើបត្យាប័នពីប្រទេសអេស្ប៉ាញ។ មេធាវីរបស់លោកឈ្មោះ Zachary Margulis-Ohnuma បាននិយាយថា លោក Carvajal ត្រូវបានគេរំពឹងថានឹងបង្ហាញខ្លួនជាលើកដំបូងនៅក្នុងតុលាការសហព័ន្ធប្រចាំតំបន់ Manhattan នៅព្រឹកថ្ងៃព្រហស្បតិ៍ (២០ កក្កដា)នេះ។លោក Carvajal មានរហស្សនាមថា 'El Pollo' ដែលត្រូវបានចាត់ទុកជាជាភ្នែក និងត្រចៀករបស់អតីតប្រធានាធិបតីវេណេហ្ស៊ុយអេឡា លោក Hugo Chavez ក្នុងជួរយោធារបស់វេណេហ្ស៊ុយអេឡាជាងមួយទសវត្សរ៍ ត្រូវបានចាប់ខ្លួនជាលើកដំបូងនៅក្នុងប្រទេសអេស្ប៉ាញកាលពីឆ្នាំ២០១៩ ប៉ុន្តែបានទៅលាក់ខ្លួនបន្ទាប់ពីតុលាការបានអនុម័តការធ្វើបត្យាប័នរបស់លោក។ លោក Carvajal ត្រូវបានចាប់ខ្លួនម្តងទៀតកាលពីខែកញ្ញា ឆ្នាំ២០២១ នៅទីក្រុងម៉ាឌ្រីដ ប្រទេសអេស្ប៉ាញ៕

កម្មវិធីផ្ញើសាររបស់បណ្ដាញសង្គម WhatsApp ជួបការរំខានជាខ្លាំង

2023/07/20 02:00:09 pm        82
Facebook Telegram Linkin
ក្រុមហ៊ុន Meta Platforms បាននិយាយថា ខ្លួនកំពុងធ្វើការដើម្បីដោះស្រាយបញ្ហាការតភ្ជាប់របស់កម្មវិធីបណ្ដាញសង្គម WhatsApp បន្ទាប់ពីអ្នកប្រើប្រាស់រាប់ពាន់នាក់ទូទាំងពិភពលោកបានរាយការណ៍ពីបញ្ហាក្នុងការចូលប្រើកម្មវិធីផ្ញើសារនេះកាលពីថ្ងៃពុធ (១៩ កក្កដា) នេះបើយោងតាមគេហទំព័រតាមដានការដាច់បណ្ដាញឈ្មោះថា Downdetector.com ។មានមនុស្សដែលជួបប្រទះបញ្ហានេះជាង ២៦.០០០នាក់នៅក្នុងសហរដ្ឋអាមេរិកបានរាយការណ៍កំហុសបច្ចេកទេសជាមួយនឹងសេវាផ្ញើសារនេះបើយោងតាមគេហទំព័រ Downdetector ដែលតាមដានការដាច់បណ្ដាញដោយការប្រមូលផ្តុំរបាយការណ៍ស្ថានភាពពីប្រភពមួយចំនួនរួមទាំងកំហុសដែលបានបញ្ជូនដោយអ្នកប្រើប្រាស់នៅលើវេទិការបស់ខ្លួនផងដែរ។ទន្ទឹមនឹងនេះ អ្នកប្រើប្រាស់ជាង ១៧៧.០០០នាក់បានរាយការណ៍ពីបញ្ហាបែបនេះជាមួយកម្មវិធី WhatsApp នៅក្នុងចក្រភពអង់គ្លេស ហើយមនុស្សជិត ១៥.០០០នាក់បាននិយាយថា ពួកគេប្រឈមមុខនឹងបញ្ហាបច្ចេកទេសនៅពេលប្រើប្រាស់កម្មវិធីផ្ញើសារនេះនៅក្នុងប្រទេសឥណ្ឌា៕

ការស្ទង់មតិបង្ហាញថា ក្រុមហ៊ុនជប៉ុន ពិបាក ឬមិនអាចបំពេញតំណែងប្រតិបត្តិសម្រាប់បុគ្គលិកស្រី

2023/07/20 01:25:30 pm        83
Facebook Telegram Linkin
ជប៉ុន៖ ការស្ទង់មតិមួយរបស់ទីភ្នាក់ងារព័ត៌មានរ៉យទ័រ បានបង្ហាញថា ចំនួនភាគច្រើនដ៏លើសលប់នៃក្រុមហ៊ុនជប៉ុន គិតថា ពួកគេពិបាក ឬមិនអាចតែម្តង ដើម្បីបំពេញតំណែងប្រតិបត្តិការចំនួន ៣០ភាគរយសម្រាប់បុគ្គលិកស្រី នៅឆ្នាំ ២០៣០ខាងមុខនេះ ។  លទ្ធផលខាងលើ បញ្ជាក់ពីការលំបាកដែលប្រទេសមហាអំណាចសេដ្ឋកិច្ចទី ៣របស់ពិភពលោកមួយនេះ ប្រឈម ដើម្បីបិទគំលាតយេនឌ័រ ។   កាលពីខែមិថុនាកន្លងទៅ នាយករដ្ឋមន្រ្តីជប៉ុន លោក Fumio Kishida បានកំណត់គោលដៅឲ្យមានតំណែងប្រតិបត្តិយ៉ាងហោច ៣០ភាគរយសម្រាប់បុគ្គលិកស្រីនៅតាមក្រុមហ៊ុនឈានមុខគេ ក្នុងឆ្នាំ ២០៣០ខាងមុខនេះ ។  ការផ្តួចផ្តើមគំនិតចុងក្រោយឲ្យលើកកម្ពស់ការចូលរួមផ្នែកគ្រប់គ្រងរបស់បុគ្គលិកស្រីនេះ ត្រូវបានប្រកាសឡើង ដើម្បីបង្កើនតួនាទីស្រ្តី ពី ២,២ភាគរយ គិតត្រឹមខែកក្កដា ឆ្នាំ ២០២២ ។  យោងតាមការស្ទង់មិត បានបង្ហាញថា ៦០ភាគរយនៃក្រុមអ្នកគ្រប់គ្រងសាជីវកម្ម និយាយថា វានឹងពិបាកក្នុងការឈានដល់គោលដៅដែលបានកំណត់ ហើយចំនួន ២៩ភាគរយ និយាយថា វាគ្មានលទ្ធភាពតែម្តង ។  លទ្ធផលនេះដែរ បានឆ្លុះបញ្ចាំងពីសន្ទុះនៅក្នុងប្រទេសជប៉ុនឆ្ពោះទៅរកការបង្កើនតួនាទីរបស់ស្រ្តីនៅក្នុងកម្លាំងការងារ ដើម្បីកែលម្អភាពចម្រុះ និងជំរុញកំណើនសេដ្ឋកិច្ច ។  នៅក្នុងឆ្នាំនេះដែរ ជប៉ុនឈរនៅចំណាត់ថ្នាក់លេខរៀងទី ១២៥នៅក្នុងចំណោម ១៤៦ប្រទេសក្នុងរបាយការណ៍វេទិកាសេដ្ឋកិច្ចពិភពលោកប្រចាំឆ្នាំ ដែលវាស់ពីកម្រិតសមភាពយេនឌ័រ ពោលគឺធ្លាក់ចុះពីចំណាត់ថ្នាក់លេខរៀងទី ១១៦កាលពីឆ្នាំមុន ហើយពួកគេស្ថិតនៅចំណាត់ថ្នាក់ក្រោមប្រទេសចិន អារ៉ាប៊ីសាអូឌីត និងទួរគី ៕

រុស្ស៊ីព្រមានពីការដឹកជញ្ជូនឆ្លងកាត់សមុទ្រខ្មៅ ខណៈអ៊ុយក្រែនចាត់ទុកការវាយប្រហារលើកំពង់ផែថាជារឿងអាក្រក់បំផុត

2023/07/20 01:22:35 pm        71
Facebook Telegram Linkin
 រុស្ស៊ី៖ រុស្ស៊ី បានព្រមានថា ចាប់ពីថ្ងៃព្រហស្បតិ៍ ទី ២០នេះ តទៅ រាល់នាវាដែលធ្វើដំណើរទៅកាន់កំពង់ផែសមុទ្រខ្មៅរបស់អ៊ុយក្រែន នឹងត្រូវចាត់ទុកថាជានាវាដឹកគ្រឿងយុទ្ធោបករណ៍ ស្របពេលដែលទីក្រុងគីវ បានចោទប្រកាន់ទីក្រុងម៉ូស្គូ ថាបានបើកការវាយប្រហារទាំងយប់ដ៏អាក្រក់បំផុតដែលបានបំផ្លិចបំផ្លាញហេដ្ឋារចនាសម្ព័ន្ធនាំចេញគ្រាប់ធុញ្ញជាតិ ។  ក្រសួងការពារជាតិរុស្ស៊ី និយាយថា នាវាដោតទង់ជាតិរដ្ឋ ធ្វើដំណើរទៅកាន់កំពង់ផែអ៊ុយក្រែន នឹងត្រូវចាត់ទុកថាជាភាគីជម្លោះឈរខាងអ៊ុយក្រែន ប៉ុន្តែពួកគេពុំបាននិយាយពីវិធានការបែបណាដែលពួកគេនឹងធ្វើនោះទេ ។ ពួកគេនិយាយថា រុស្ស៊ីបានប្រកាសផងដែរថា តំបន់ភាគអាគ្នេយ៍ និងភាគពាយ័ព្យនៃដែនទឹកអន្តរជាតិសមុទ្រខ្មៅ គឺគ្មានសុវត្ថិភាពបណ្តោះអាសន្នសម្រាប់ការធ្វើនាវាចរណ៍ ។  គួរឲ្យដឹងថា រុស្ស៊ី បានវាយប្រហារទៅលើតំបន់ Odesaនៅយប់ទី ២ជាប់ៗគ្នា ក្រោយកាលពីថ្ងៃចន្ទ ពួកគេលែងចូលរួមជាមួយកិច្ចព្រមព្រៀងរយៈពេល ១ឆ្នាំ ដែលអនុញ្ញាតឲ្យមានផ្លូវសុវត្ថិភាពសម្រាប់គ្រាប់ធុញ្ញជាតិអ៊ុយក្រែន ឆ្លងកាត់សមុទ្រខ្មៅ គឺជាការសម្រេចចិត្តមួយបង្ខំឲ្យអង្គការសហប្រជាជាតិ(UN)ព្រមានពីហានិភ័យបង្កើតឲ្យមានភាពអត់ឃ្លាននៅជុំវិញពិភពលោក ។  មូលនិធិរូបិយវត្ថុអន្តរជាតិ(IMF)បាននិយាយកាលពីថ្ងៃពុធថា ការដកខ្លួនរបស់រុស្ស៊ីពីកិច្ចព្រមព្រៀងគ្រាប់ធុញ្ញជាតិ នឹងគំរាមកំហែងបង្កើនអសន្តិសុខស្បៀងសកល ហើយនិងអាចធ្វើឲ្យតម្លៃស្បៀងអាហារកើនឡើងខ្ពស់ ជាពិសេសនៅតាមបណ្តាប្រទេសក្រីក្រ ។  អ៊ុយក្រែន ដែលចង់ព្យាយាមបន្តការដឹកជញ្ជូនតាមសមុទ្រខ្មៅ ដែលចាំបាច់ចំពោះការផ្គត់ផ្គង់ស្បៀងសកលនោះ និយាយកាលពីថ្ងៃពុធថា ពួកគេបានបង្កើតផ្លូវដឹកជញ្ជូនបណ្តោះអាសន្ន ឆ្លងកាត់តាមប្រទេសរ៉ូម៉ានី ។  ប្រធានាធិបតីអ៊ុយក្រែន លោក Volodymyr Zelenskyy និយាយនៅលើបណ្តាញព័ត៌មានសង្គម Telegramថា ក្រុមភេរវកររុស្ស៊ី ពិតជាមានគោលដៅដោយចេតនាលើហេដ្ឋារចនាសម្ព័ន្ធគ្រាប់ធុញ្ញជាតិ ។ រាល់មីស៊ីលរបស់រុស្ស៊ី គឺជាការវាយប្រហារមិនត្រឹមតែអ៊ុយក្រែនប៉ុណ្ណោះទេ ប៉ុន្តែអ្នករាល់គ្នានៅលើពិភពលោក ដែលចង់មានជីវិតធម្មតា និងសុវត្ថិភាព ។  ការិយាល័យអគ្គរដ្ឋអាជ្ញាអ៊ុយក្រែន និយាយថា ជនស៊ីវិល ១០នាក់ដែលរួមទាំងក្មេងប្រុសអាយុ ៩ឆ្នាំម្នាក់ដែរនោះ បានរងរបួស ។ ចំណតគ្រាប់ធុញ្ញជាតិ បានរងការខូចខាត ក៏ដូចជាទីតាំងឧស្សាហកម្ម ឃ្លាំងស្តុកទំនិញ ផ្សារទំនើប អគារស្នាក់នៅរបស់អ្នកស្រុក អគាររដ្ឋបាល ហើយនិងរថយន្តផងដែរ ៕

បណ្ដាញសង្គម

ព័ត៌មានថ្មីៗ

សេចក្តីថ្លែងការណ៍របស់កងទ័ព៖ អ៊ីស្រាអែលបានវាយប្រហារទីតាំងផលិតអាវុធរបស់ក្រុមហាម៉ាស
08/07/2025 03:08 PM
Facebook Telegram Linkin
ភ្នំពេញក្រោន និងអង្គការស្មារតីនៃអ្នកកីឡា ចាប់ដៃគ្នាបញ្ជ្រាបការអព់រំពីគ្រាប់មីន និងគ្រប់មិនទាន់ផ្ទុះ
08/07/2025 03:08 PM
Facebook Telegram Linkin
បឹងកេត ក្លាយជាក្លិបទី៣ ដែលផ្អាកកិច្ចសន្យាជាមួយក្រុមហ៊ុនផ្គត់ផ្គង់សម្លៀកបំពាក់ថៃ
08/07/2025 03:08 PM
Facebook Telegram Linkin
អេស្ប៉ាញសម្រេចចិត្តមិនទិញយន្តហោះចម្បាំង F-35 ផលិតដោយសហរដ្ឋអាមេរិក
08/07/2025 03:08 PM
Facebook Telegram Linkin
អ្នកសម្របសម្រួលស្តីទី UN ប្រចាំកម្ពុជា ឃើញជាក់ស្តែងពីស្ថានភាពលំបាកដែលសហគមន៍ជនភៀសសឹកកម្ពុជាបាននឹងកំពុងជួបប្រទះ និងត្រូវការជំនួយមនុស្សធម៌ជាបន្ទាន់
08/07/2025 02:08 PM
Facebook Telegram Linkin
អង្គការ KSrelief ពង្រីកជំនួយមនុស្សធម៌ នៅប្រទេសយេម៉ែន ស៊ូដង់ និងប៉ាគីស្ថាន
08/07/2025 02:08 PM
Facebook Telegram Linkin
Cambodia and Thailand Agree to Implement Comprehensive Ceasefire and Establish Mechanisms Aiming to Sustain Border Stability
08/07/2025 02:08 PM
Facebook Telegram Linkin
រដ្ឋមន្ត្រីអេហ្ស៊ីប ហៅការឆ្លើយតបរបស់លោកខាងលិចចំពោះការឈឺចាប់នៅហ្កាហ្សាថា គួរឲ្យអាម៉ាស់ណាស់
08/07/2025 02:08 PM
Facebook Telegram Linkin
ក្រុមហេសបូឡា៖ ការសម្រេចចិត្តរបស់គណៈរដ្ឋមន្ត្រីលីបង់ ក្នុងរឹតបន្តឹងការគ្រប់គ្រងអាវុធ គឺជា«អំពើបាបដ៏ធ្ងន់ធ្ងរ»
08/07/2025 02:08 PM
Facebook Telegram Linkin
សមាជិកសភាប្រាប់សារព័ត៌មាន Arab Newsថា សហរដ្ឋអាមេរិក គួរតែទទួលស្គាល់រដ្ឋប៉ាឡេស្ទីន
08/07/2025 02:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.