នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS | កម្ពុជា និងថៃឯកភាពឈប់បាញ់គ្នា និងត្រលប់ទៅអនុវត្តបទឈប់បាញ់តាមរយៈការសម្របសម្រួលរបស់ប្រធានាធិបតីអាមេរិក
តម្លៃសេវាអ៊ីនធឺណិតនឹងទាបជាងមុន បន្ទាប់ពីកម្ពុជាតបណ្តាញប្រព័ន្ធអ៊ីនធឺណិតពីហុងកុង
វេទិកានយោបាយអាស៊ី-អឺរ៉ុប ស្នើឱ្យភាគីជម្លោះគោរពចំពោះកិច្ចព្រមព្រៀងសន្តិភាពនានា និង​ធម្មនុញ្ញ UN
ក្រសួងរៀងចំដែនដី នឹងបង្កើតសួនបន្ថែមក្នុងទីក្រុង ឆ្លើយតបនឹងកំណើនពលរដ្ឋក្នុងទីក្រុង

នយោបាយ​ និង ការអភិវឌ្ឍន៍

សម្តេចតេជោ បន្តផ្តល់អំណោយរថយន្តដឹកវ៉ាក់សាំងដល់មន្ទីរសុខាភិបាលរាជធានី-ខេត្ត

2022/03/10 12:27:59 pm        400
Facebook Telegram Linkin
ភ្នំពេញ៖ មន្ទីរសុខាភិបាលរាជធានី-ខេត្ត ចំនួន១២ និងឃ្លាំងឱសថកណ្តាល នៃក្រសួងសុខាភិបាល នៅថ្ងៃនេះ ទទួលបានរថយន្តដឹកវ៉ាក់សាំងចំនួន២០គ្រឿង ដែលជាអំណោយរបស់សប្បុរជនខ្មែរ តាមរយៈសម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល ​និងជាប្រធានគណៈកម្មការ ចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងប្រកខណ្ឌទូទាំងប្រទេស នៅថ្ងៃទី១០ ខែមីនានេះ បន្តប្រគល់រថយន្តដឹកវ៉ាក់សាំងចំនួន២០គ្រឿង​ ដែលជាអំណោយរបស់សប្បុរជនខ្មែរ តាម​រយៈសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា ជូនមន្ទីរសុខាភិបាលរាជធានី-ខេត្ត ចំនួន១២ និងឃ្លាំងឱសថ កណ្តាល នៃក្រសួងសុខាភិបាល។លោកជំទាវវេជ្ជបណ្ឌិត ឱ វណ្ណឌីន បានឱ្យដឹងថា រថយន្តដឹកវ៉ាក់សាំង ដែលជាអំណោយរបស់ សប្បុរសជនខ្មែរ តាមរយៈសម្តេចតេជោ ហ៊ុន សែន ប្រគល់ជូនមន្ទីសុខាភិបាលរាជធានី-ខេត្ត និងឱសថកណ្តាលនៅពេលនេះ នឹងចូលរួមចំណែកយ៉ាងសំខាន់ក្នុងដំណើរការចាក់វ៉ាក់សាំងកូវីដ-១៩ ជូនប្រជាពលរដ្ឋនៅទូទាំងប្រទេស និងទុកប្រើប្រាស់ក្នុងវិស័យសុខាភិបាល។រាជធានី-ខេត្តចំនួន១២ ដែលទទួលបានរថយន្តដឹកវ៉ាក់សាំង រួមមាន មន្ទីរសុខាភិបាលរាជធានីភ្នំពេញ ​មន្ទីរសុខាភិបាលខេត្តបន្ទាយមានជ័យ ​ខេត្តបាត់ដំបង ខេត្តកំពង់ចាម ​ខេត្តកំពង់ស្ពឺ​ ខេត្តកំពង់ធំ ​ខេត្តកំពត ខេត្តកណ្តាល ខេត្តព្រៃវែង ខេត្តសៀមរាម ខេត្តតាកែវ និងខេត្តត្បូងឃ្មុំ។អំណោយរថយន្តដឹកវ៉ាក់សាំង ម៉ាក Ford មានការរៀបចំឡើងទៅតាមតម្រូវការរបស់វ៉ាក់សាំង មាន​កម្រិតត្រជាក់​ក្នុងសីតុណ្ហភាព -24អង្សាសេ​ និងមានលក្ខណៈពិសេសជាច្រើនទៀត។ គិតត្រឹមថ្ងៃទី១០ ខែមីនានេះ រថយន្តដឹកវ៉ាក់សាំងជាង ១០០គ្រឿងហើយ​ ដែលជាអំណោយរបស់ សប្បុរជនខ្មែរ ​តាមរយៈសម្តេចតេជោ ​ត្រូវបានប្រគល់ជូនមន្ទីរសុខាភិបាលរាជាធានី-ខេត្តទាំង២៥ ក្រសួងការពារជាតិ និងប្រទេសឡាវ៕អត្ថបទ៖ ទូច សោភ័ណ

ពលរដ្ឋរាជធានីភ្នំពេញ មកចាក់វ៉ាក់សាំងកូវីដ-១៩ ដូសជំរុញទី៣ បានចំនួនជាង១លាននាក់ និងដូសជំរុញទី៤ បានចំនួន៧២ម៉ឺននាក់

2022/03/10 12:20:33 pm        405
Facebook Telegram Linkin
ភ្នំពេញ៖ គិតមកដល់ព្រឹកថ្ងៃទី១០ ខែមីនា ឆ្នាំ២០២២នេះ មានបងប្អូនប្រជាពលរដ្ឋរស់នៅក្នុងរាជធានីភ្នំពេញ បានអញ្ជើញមកទទួលការចាក់វ៉ាក់សាំងបង្ការជំងឺកូវីដ-១៩ ដូសជំរុញទី៣ បានចំនួនជាង ១លាននាក់ និងដូសជំរុញទី៤ បានចំនួន៧២នាក់។ បើតាមការបញ្ជាក់របស់ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាល រាជធានីភ្នំពេញ ប្រាប់BTV ព័ត៌មាន នៅព្រឹកនេះថា ការចាក់វ៉ាក់សាំងបង្ការជំងឺកូវីដ១៩ ដូសជំរុញទី៣ ជូនយុវវ័យ បងប្អូនប្រជាពលរដ្ឋ អាយុចាប់ពី ១៨ឆ្នាំឡើង មកដល់ព្រឹកនេះ បានចំនួន ១លាន៣៧ម៉ឺននាក់ បើគិតជាភាគរយ បានចំនួន៩៧% រីឯដូសជំរុញទី៤ ចំពោះប្រជាពលរដ្ឋអាយុចាប់ពី ១៨ឆ្នាំឡើង បានចំនួន ៧២ម៉ឺននាក់ បើគិតជាភាគរយ បានចំនួន៥០%។ជាមួយគ្នានោះដែរលោក សុំ វ៉ាន់ថៃ ប្រធានរដ្ឋបាលនៃមនី្ទរពេទ្យបង្អែកពោធិ៍ចិនតុង បានឲ្យដឹងថា ដោយយោងទៅតាមគោលការណ៍ និងអនុសាសន៍របស់ប្រមុខថ្នាក់ដឹកនាំ គឺក្រុមការងារ​គ្រូពេទ្យ​ទាំងអស់ បានបំពេញការងារពីថ្ងៃច័ន្ទ រហូតដល់ថ្ងៃអាទិត្យ និងថ្ងៃបុណ្យទានផ្សេងៗ ចាក់វ៉ាក់សាំង​បង្ការជំងឺកូវីដ១៩ ​ជូនបងប្អូនប្រជាពលរដ្ឋមកពីគ្រប់តំបន់​ ដែលគ្រូពេទ្យរបស់យើងបានបំពេញ​ការងារ​នេះ មានរយៈពេលជាង ១ឆ្នាំមកហើយ។ទន្ទឹមនឹងនោះសម្រាប់ដំណើរការចាក់វ៉ាក់សាំងជូនបងប្អូនប្រជាពលរដ្ឋ ​ក្នុងថ្ងៃធម្មតាពីថ្ងៃច័ន្ទ រហូតដល់ថ្ងៃសុក្រ ​ទាបបំផុត​ ចាក់វ៉ាក់សាំងជូនបងប្អូនប្រជាពលរដ្ឋ ​បានចំនួនជាង៤០០នាក់ ។ ដោយឡែកថ្ងៃសៅរ៍ ​និងថ្ងៃអាទិត្យ ​ចាក់វ៉ាក់សាំងដូសទី១​ ដូសទី២​ ដូសជំរុញទី៣ និងដូស​ជំរុញទី៤នោះ មានចំនួនជាង ១៣០០នាក់ រហូតដល់ទៅជាង ១៤០០នាក់ ដែលពួកគាត់​បាន​អញ្ជើញ​មកទទួលការចាក់វ៉ាក់សាំងការពារជំងឺកូវីដ-១៩៕ អត្ថបទ ៖ រដ្ឋា

ការសាងសង់ស្ពានអាកាសចោមចៅ គ្រោងបញ្ចប់ជាស្ថាពរចុងខែមីនានេះ

2022/03/10 12:11:34 pm        877
Facebook Telegram Linkin
ភ្នំពេញ៖ ក្នុងពេលរាជធានីភ្នំពេញ កំពុងមានការអភិវឌ្ឍហេដ្ឋារចនាសម័្ពន្ធជាបន្តបន្ទាប់ ក្នុងនោះ ការសាងសង់ស្ពានអាកាសចោមចៅ គ្រោងបញ្ចប់ជាស្ថាពរនៅចុងខែមីនានេះ។ការសាងសង់ស្ពានអាកាស​ចោមចៅ​សម្រេចបានលទ្ធផលស្ទើរតែ ​១០០ភាគរយ ហើយ​គ្រោង​បញ្ចប់​ការសាងសង់​ជាស្ថាពរ​នៅចុងខែមីនានេះ ​និង​អនុញ្ញាត​ឲ្យ​ប្រជាពលរដ្ឋ​ប្រើប្រាស់​ជា​បណ្តោះអាសន្ន​ក្នុងឱកាស​ចូលឆ្នាំ​ប្រពៃណីជាតិខ្មែរខាងមុខ។ គិតត្រឹមថ្ងៃទី១០ ខែមីនា ឆ្នាំ២០២២នេះ ការ​សាង​សង់​ស្ពាន​អាកាស​ចោមចៅ​ជិត​បញ្ចប់​ទៅតាម​ផែនការ និ​ងកំពុងរួមចំណែក​យ៉ាងសំខាន់ដល់ប្រជាពលរដ្ឋជាអ្នកដំណើរទូទៅ ក៏ដូចជាបម្រើដល់​វិស័យ​ដឹកជញ្ជូន​ទៅតាមបណ្តាខេត្តជាប់តំបន់សមុទ្រ។ប្រជាពលរដ្ឋជាអ្នកធ្វើដំណើរឆ្លងកាត់ស្ពាន​អាកាស​ចោមចៅ បាន​សម្តែងក្តីរីករាយ​ចំពោះ​សមិទ្ធផល​ថ្មី​របស់រាជរដ្ឋាភិបាល​ ក្រោយពីការសាង​សង់ស្ពាន​អាកាសចោមចៅ ក្នុងក្របខណ្ឌរាជធានីភ្នំពេញ ដែលនេះបង្ហាញពីសន្ទុះអភិវឌ្ឍន៍​ស្ពានអាកាសធំៗច្រើន ​ដើម្បី​បញ្ចៀស​ការ​កកស្ទះចរាចរណ៍។ ស្ពានអាកាសចោមចៅ បានបើកឲ្យប្រើប្រាស់ជាបណ្តោះអាសន្ន រួមមាន ផ្លូវក្រោមដីចំនួន៣ខ្សែ៖ ខ្សែទី១ ផ្លូវក្រោមដីភ្ជាប់ចរាចរពីផ្លូវជាតិលេខ៤ ​មក​មហាវិថីសហព័ន្ធរុស្សី ដើម្បីសម្រួល​លំហូរ​ចរាចរណ៍មកពីផ្លូវជាតិលេខ៤, ខ្សែទី២ ផ្លូវក្រោមដីភ្ជាប់ពីផ្លូវជាតិលេខ៤ ឆ្ពោះទៅមហាវិថីចោមចៅ ជាផ្លូវឯកទិស និងខ្សែទី៣ ជាផ្លូវឯកទិសភ្ជាប់ចរាចរណ៍ពីផ្លូវជាតិលេខ៤ បត់ស្តាំឆ្ពោះទៅផ្លូវជាតិ​លេខ៣។ ដោយឡែក ចំពោះស្ពានអាកាសទី១ ជាស្ពានអាកាសមេ​តភ្ជាប់ចរាចរ​ពីមហាវិថីសហព័ន្ធរុស្ស៊ី ទៅ​ផ្លូវជាតិលេខ៣ មានប្រវែង ​សរុប ៤០៨ម៉ែត្រ និងស្ពានអាកាសទី២​ បំបែក​ចេញ​ពី​ស្ពានអាកាសមេ បត់ឆ្វេង​តភ្ជាប់ចរាចរ​ពី​មហាវិថីសហព័ន្ធរុស្ស៊ី ​ឆ្ពោះទៅ​មហាវិថីចោមចៅ ក្រុមការងារ​ការដ្ឋាន​បន្ត​ក្រាលកៅស៊ូ និង​គូស​គំនូស​ចរាចរណ៍។ស្ពានអាកាសចោមចៅជាគម្រោងរបស់រាជរដ្ឋាភិបាលកម្ពុជា​ តាមរយៈរដ្ឋបាលរាជធានីភ្នំពេញ ដែល​សាងសង់​ដោយក្រុមហ៊ុនវិនិយោគទុនអានិកជនកម្ពុជា​ (OCIC) ហើយប្រើប្រាស់​ការសាងសង់​រយៈពេល​៣០ខែ ​និងចំណាយថវិការសាងសង់ប្រមាណ ២២លានដុល្លា។មក​ទល់ពេលបច្ចុប្បន្ន ស្ពានអាកាសក្នុងរាជធានីភ្នំពេញ ដែលបានសាងសង់មានចំនួន៧ ​រួមមាន ស្ពានអាកាសក្បាលថ្នល់ ​ស្ពានអាកាសស្ទឹងមានជ័យ ស្ពានអាកាស៥មករា​ ស្ពានអាកាស៧មករា ស្ពានអាកាសស្តុបផ្សារដីហ៊ុយ ​ស្ពានអាកាសចោមចៅ និងស្ពានអាកាសឬស្សីកែវ ដែល​កំពុង​ដំណើរ​ការ​សាងសង់ ខណៈ រដ្ឋបាលរាជធានីភ្នំពេញ ក៏កំពុងសិក្សាគម្រោង​សាងសង់ស្ពាន​អាកាស​នៅ​ចំណុច​ស្តុបផ្សារស៊ិនជូរីផ្លាហ្សា តាមបណ្តោយមហាវិថីសហព័ន្ធរុស្ស៊ី៕អត្ថបទ សេក ឧត្តម

ពលករមកពីថៃ តាមច្រកខេត្តបន្ទាយមានជ័យ មានច្រើនរាល់ថ្ងៃ និងរកឃើញវិជ្ជមាន ២០ទៅ៣០នាក់

2022/03/10 11:59:56 am        641
Facebook Telegram Linkin
បន្ទាយមានជ័យ៖ នៅមុនបុណ្យចូលឆ្នាំប្រពៃណីជាតិខ្មែរ ពលករខ្មែរត្រឡប់មកពីប្រទេសថៃ ឆ្លងដែនតាមច្រកជាប់ ក្នុងបន្ទាយមានជ័យ មានចំនួនច្រើនរាល់ថ្ងៃ ហើយក្នុងចំណោមពលករទាំងនោះ ត្រូវបានរកឃើញមាន វិជ្ជមានកូវីដ-១៩ ប្រមាណពី២០ ទៅ៣០នាក់ ជាប្រភេទបំប្លែងថ្មី អូមីក្រុង ហើយបានបញ្ជូនទៅព្យាបាល នៅតាមមណ្ឌល ឬមន្ទីរពេទ្យ ដែលបានរៀបចំទុកជាស្រេច ។ឯកឧត្តម អ៊ុំ រាត្រី អភិបាលខេត្តបន្ទាយមានជ័យ នៅថ្ងៃទី១០ ខែមីនា នេះ បានឱ្យដឹងថា នារយៈពេលចុង​ក្រោយនេះ ពលករខ្មែរ មកពីប្រទេសថៃ ដែលឆ្លងតាមច្រកនានាជាប់​ខេត្តបន្ទាយមានជ័យ គឺមានចន្លោះពី៤០០ ទៅ៥០០នាក់ ហើយនៅថ្ងៃខ្លះ ក៏មានចំនួនលើសនោះផងដែរ។ឯកឧត្តម បានបន្តថា ពលករទាំងអស់ ដែលឆ្លងដែនមក ត្រូវបានអាជ្ញាធរ និងមន្ត្រីសុខាភិបាល​ពិនិត្យសុខភាព ​និងធ្វើតេស្ត​សំណាកគ្រប់គ្នា​ ដើម្បីរកមេរោគកូវីដ-១៩ រួមទាំងអ្នកមិនទាន់បាន​ចាក់វ៉ាក់សាំង ក៏ត្រូវបានជំរុញ និងណែនាំ​ពួក​គេឲ្យទៅចាក់ ​ឲ្យបានគ្រប់គ្នា ។ឯកឧត្តម អ៊ុំ រាត្រី បានបញ្ជាក់ថា ​សម្រាប់ពលករខ្មែរ ​ដែលឆ្លងដែនមកពីប្រទេសថៃ ​តាមចំនួន​នៃ ខេត្តបន្ទាយមានជ័យ ​ក្នុងនោះ​មានច្រក​បឹងត្រកួន ​ច្រកអូរបីជាន់ ​និងច្រកស្រុកម៉ាឡៃជាដើម៕ អត្ថបទ៖ បាន សុខរិទ្ធ

កិច្ចប្រជុំកំពូលអាស៊ាន-អាម៉េរិក បានលើកពេលដោយសារថ្នាក់ដឹកនាំដែលត្រូវចូលរួមជាប់រវល់

2022/03/10 11:49:14 am        377
Facebook Telegram Linkin
ភ្នំពេញ៖ អ្នកនាំពាក្យក្រសួងការបរទេសកម្ពុជា បានបញ្ជាក់ថា កិច្ចប្រជុំកំពូលអាស៊ាន-អាម៉េរិក ដែលគ្រោងរៀប ចំឡើងនៅចុងខែមីនានេះ ត្រូវបានលើកពេល ដោយសារថ្នាក់ដឹកនាំប្រជុំ ដែលត្រូវចូលរួម ជាប់រវល់ ។ឯកឧត្តម ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៃកម្ពុជា បានឱ្យ ដឹងថា បច្ចុប្បន្ន ឥណ្ឌូនេស៊ី ជាប្រទេសសម្របសម្រួលទំនាក់ទំនងដៃគូសន្ទនា រវាងអាស៊ាន និងសហរដ្ឋអាម៉េរិក ហើយកិច្ចប្រជុំកំពូលពិសេសអាស៊ាន-សហរដ្ឋអាម៉េរិក បានស្នើឡើងដោយសហរដ្ឋអាម៉េរិក ត្រូវបាន ឯកភាពដោយថ្នាក់ដឹកនាំកំពូលអាស៊ាន ។ ឯកឧត្តម បានបន្តថា កាលបរិច្ឆេទ ត្រូវបានស្នើឡើងសម្រាប់កិច្ចប្រជុំកំពូល ហើយឥណ្ឌូនេស៊ី បាន ខិតខំអស់ពីសមត្ថភាពក្នុងការសម្របសម្រួល ដើម្បីស្វែងរកកាលបរិច្ឆេទមួយ ដែលអាចទទួល​យកបាន ​ដោយថ្នាក់ដឹកនាំទាំងអស់ ​តែគួរឲ្យសោកស្តាយ កាលបរិច្ឆេទ ​ដែលបានស្នើឡើង គឺមិន​សមស្របសម្រាប់ ថ្នាក់ដឹកនាំ ដោយសារភាពជាប់រវល់ច្រើន របស់ថ្នាក់ដឹកនាំ ហេតុដូចនេះហើយ ភាគីទាំងសងខាង អាស៊ាន និងសហរដ្ឋអាម៉េរិក បានសម្រេចលើកពេលកិច្ចប្រជុំកំពូលនេះ និងបន្តធ្វើការដើម្បីស្វែងរកកាលបរិច្ឆេទ ដែលសមស្របសម្រាប់ភាគីទាំងសងខាង។អ្នកនាំពាក្យក្រសួងការបរទេសរូបនេះ បានបន្ថែមថា កម្ពុជា ក្នុងនាមជាប្រធានអាស៊ាន គឺប្រកាន់ ភាពបត់បែនទៅលើ​កាលបរិច្ឆេទ​ ដែលបានស្នើឡើង និងបានធ្វើការសម្របសម្រួលជាពិសេស​ទៅលើ របៀបវារៈនៅក្នុងប្រទេស ដើម្បីបំពេញកាតព្វរបស់ខ្លួនក្នុងតំបន់ ​និងអន្តរជាតិ តែដើម្បីភាព​សមស្រប និង លទ្ធភាពចូលរួមរបស់ថ្នាក់ដឹកនាំ កម្ពុជា បានឯកភាពជាមួយប្រទេសសមាជិក​អាស៊ាន ក្នុងការលើកពេល កិច្ចប្រជុំនេះ ។កិច្ចប្រជុំកំពូលពិសេសអាស៊ាន-អាម៉េរិក ដែលសហរដ្ឋអាមេរិកធ្វើជាម្ចាស់ផ្ទះ ​ត្រូវបានសេតវិមាន ប្រធានាធិបតីសហរដ្ឋអាមេរិក ប្រកាសថា ​នឹងរៀបចំឡើងនៅថ្ងៃទី២៨-២៩ ​ខែមីនា នេះ បន្ទាប់​ពីបាន លើកពេលជាង១ខែ ​ទោះជាយ៉ាងនេះក្តី ​មេដឹកនាំអាស៊ានមួយចំនួន មិនទាន់ឯកភាព​នឹងពេលវេលា ដែលប្រកាសដោយសហរដ្ឋអាម៉េរិក នៅឡើយទេ៕អត្ថបទ៖ បាន សុខរិទ្ធ រូបភាព៖ ឯកសារ

នគរបាលនារី បាននឹងកំពុងបម្រើការងាយ៉ាងមុតមាំការពារថែរក្សាសន្តិសុខសណ្តាប់ធ្នាប់សង្គម

2022/03/09 05:47:12 pm        723
Facebook Telegram Linkin
ភ្នំពេញ៖ កម្លាំងនគរបាលជានារីនៅខេត្តកោះកុង បាននឹងកំពុងបម្រើការងាររបស់ខ្លួនយ៉ាងមុតមាំ ចំពោះការការពារថែរក្សាសន្តិសុខសណ្តាប់ធ្នាប់ និងសុខាភិបាល ជូនថ្នាក់ដឹកនាំសំខាន់ៗ និងប្រជាពលរដ្ឋមិនចាញ់កងកម្លាំងនគរបាលជាបុរសៗឡើយ។ក្នុងឱកាសទិវាសិទ្ធិនារីអន្តរជាតិ ៨មីនា ឆ្នាំ២០២២នេះ លោកឧត្តមសេនីយ៍ទោ គង់ មនោ ស្នងការ​នគរបាល​ខេត្តកោះកុង ​លើកឡើងថា ​ពីមួយឆ្នាំទៅមួយឆ្នាំ អត្រាកងកម្លាំងជានារី ត្រូវបាន​ជ្រើសរើសឱ្យចូលបម្រើការងារចំនួន​គួរសម​ជាលំដាប់ ​ដើម្បី​ឆ្លើយ​តប​នឹង​តម្រូវការ ក៏ដូចជា​បំពេញ​បន្ថែម​នៃបេសកម្ម ​ការងារចំពោះមុខផងដែរ។លោកស្នងការ បានបញ្ជាក់ថា សព្វថ្ងៃនេះ ស្រ្តីវ័យក្មេងជាកងកម្លាំងនគរបាលនៅក្នុងខេត្តគឺបាន នឹង​កំពុងបម្រើការងាររបស់​ខ្លួន​យ៉ាង​មុតមាំ​ឥត​រុញរា​លើកិច្ចការពារថែរក្សានូវសន្តិសុខ ​សណ្តាប់ធ្នាប់​សាធារណៈ ​និងថ្នាក់ដឹកនាំសំខាន់ៗ​ផ្សេងទៀត ​មិនចាញ់​កងកម្លាំង​ជាបុរសនោះទេ។ រីឯស្រ្តីជានគរបាលវ័យចំណាស់ ក៏បានចូលរួមពង្រឹងនូវវិធានការសុខាភិបាលយ៉ាងខ្លាំងក្លា​ណាស់​ដែរ ​អំឡុងពេលរីករាលដាល ​ជំងឺកូវីដ-១៩ ដើម្បីកងកម្លាំងប្រដាប់អាវុធទាំងមូល​មាន​សុវត្ថិភាព​សុខភាពល្អ។បច្ចុប្បន្នស្នងការដ្ឋានខេត្តកោះកុង មានកម្លាំងនគរបាលជាស្រ្តីប្រមាណ៦៧នាក់ ​កំពុងបំពេញកិច្ច ការងារតាមការិយាល័យជំនាញរៀងៗខ្លួន ​ដោយមិនរាប់បញ្ចូលកងកម្លាំង​នគរបាលវរៈការពារ​ព្រំដែន​ទឹក ​ឬផែន​អន្តោប្រវេសន៍នោះទេ។បើតាមការឱ្យដឹងពីលោកស្រីឧត្តមសេនីយ៍ត្រី ពេជ្រ ស្រីពី​ ស្នងការរងនគរបាលខេត្ត រាជរដ្ឋាភិបាល ក្រសួងកិច្ចការនារី ​និងក្រុមប្រឹក្សាជាតិកម្ពុជាដើម្បីស្រ្តី ​គឺ​បាន​ប្រឹងប្រែង​ជំរុញ​លើកកម្ពស់សមភាព យេនឌ័រ ​ដើម្បីស្រ្តីបានទទួល​នូវកិច្ចការពារសិទ្ធិ ​និង​ផលប្រយោជន៍ ​តាមរយៈការកែប្រែ​ឥរិយាបថ​សង្គមឱ្យទទួលស្គាល់ ​ព្រមទាំងចាត់ទុកស្រ្តី ​ជាដៃគូដ៏សំខាន់ក្នុងការ​អភិវឌ្ឍគ្រួសារ​ សង្គម​និង​វិស័យកងកម្លាំងប្រដាប់អាវុធជាដើម៕ អត្ថបទ៖ ឈឹម មករា

កម្ពុជានិងក្រុមប្រឹក្សាត្រួតពិនិត្យគ្រឿងញៀនអន្តរជាតិ ផ្លាស់ប្តូរព័ត៌មានគ្នា ដើម្បីទប់ស្កាត់ គ្រឿងញៀន

2022/03/09 05:30:31 pm        699
Facebook Telegram Linkin
ភ្នំពេញ ៖ ដោយសារតែពិភពលោក នៅតែជួបបញ្ហាប្រឈមធំ ពីការលួចបង្វែរសារធាតុគីមីផ្សំ យកទៅសំយោគលួចលាក់ផលិតគ្រឿងញៀនខុសច្បាប់នោះ កម្ពុជានិងក្រុមប្រឹក្សាត្រួតពិនិត្យគ្រឿងញៀនអន្តរជាតិ (INCB) បានសហការគ្នារៀបចំ នូវវគ្គបណ្តុះបណ្តាល ស្ដីពីប្រព័ន្ធផ្លាស់ប្តូរព័ត៌មានរបស់ក្រុមប្រឹក្សាត្រួតពិនិត្យគ្រឿងញៀន អន្តរជាតិដល់មន្រ្តីអនុវត្តច្បាប់កម្ពុជា។ពិធីបើកវគ្គបណ្តុះបណ្តាលនេះ ប្រព្រឹត្តទៅនៅថ្ងៃទី៩ខែមីនា ឆ្នាំ២០២២ ក្រោមអធិបតីឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន និង​លោក ហ្វឺណង់ដូ រ៉ូម៉េរ៉ូ កុងត្រឺរ៉ាស (Fernando Romero Contreras) ជាអ្នក​សម្របសម្រួល​កម្មវិធី​គំនិត​ផ្ដួចផ្ដើម​ប្រតិបត្តិការរបស់កម្មវិធី​សកល​ស្ដីពីការហាមឃាត់សារធាតុគ្រោះថ្នាក់​ (GRIDS ) ដែលមាន​ការចូលរួមពីមន្រ្តីអនុវត្តច្បាប់ពាក់ព័ន្ធ។ថ្លែងក្នុងនាមឯកឧត្តមឧបនាយករដ្ឋមន្រ្តី កែ គឹមយ៉ាន ប្រធានអាជ្ញាធរជាតិ​ប្រយុទ្ធប្រឆាំង​គ្រឿងញៀន នាឱកាសនោះ ឯកឧត្តមនាយឧត្តមសេនីយ៍ មាស វិរិទ្ធ អគ្គលេខាធិការ បានថ្លែងថា យើងទាំងអស់គ្នាត្រូវមានវិធានការទប់ស្កាត់ និងគ្រប់គ្រងសារធាតុគីមីផ្សំអោយបានច្បាស់លាស់ និងមានប្រសិទ្ធភាពខ្ពស់ ដោយកម្លាំងសមត្ថកិច្ចកម្ពុជា​បង្រ្កាបបានករណី​លួច​កែច្នៃ​ផលិត​គ្រឿង​ញៀន​សំយោគទ្រង់ ទ្រាយតូច ​និងទ្រង់ទ្រាយធំ​ បង្ក្រាប​បានករណីផលិតកែច្នៃគ្រឿង​ញៀន​ខុសច្បាប់​ចំនួន៣ករណី ​នៅទីតាំងចំនួន៤ផ្សេងៗគ្នា រឹបអូសបានសារធាតុញៀនប្រមាណជាង ២តោន សារធាតុគីមីជាង២០០តោន ​និង​ឧបករណ៍​ផលិតគ្រឿងញៀន​មួយចំនួនធំ ដែល​មាន​ទីតាំង​ស្ថិតក្នុងភូមិសាស្រ្តរាជធានីភ្នំពេញ ខេត្តកំពង់ស្ពឺ និងខេត្តព្រះសីហនុ។សូមបញ្ជាក់ថា វគ្គបណ្តុះបណ្តាលនេះ ​មានរយៈពេល២ថ្ងៃគឺថ្ងៃទី៩-១០ ​ខែមីនាឆ្នាំ២០២២ ដើម្បី​លើក​កំពស់​សមត្ថភាពចំណេះ ​ដឹងមន្រ្តីចូលរួមមកពីបណ្តាក្រសួង-ស្ថាប័ន​អនុវត្តច្បាប់ពាក់ព័ន្ធ ដើម្បី​ស្វែងយល់អំពីយន្តការ​គ្រប់គ្រង​ត្រួត​ពិនិត្យ​សារធាតុគីមី​ផ្សំ​របស់​ក្រុម​ប្រឹក្សា​ត្រួត​ពិនិត្យ​គ្រឿងញៀន​អន្តរជាតិ (INCB) ក្នុងការ​លើក​កម្ពស់​ការផ្លាស់ប្តូរព័ត៌មានស្តីអំពីការ​ចរាចរ​សារធាតុ​គីមីផ្សំ​នៅក្នុងតំបន់ និងសកលលោក៕ អត្ថបទ៖ស៊ុម សុជា

ក្រសួងសេដ្ឋកិច្ច បើកវគ្គបណ្តុះបណ្តាលវិធីសាស្រ្តនៃការរៀបចំថវិកាសមិទ្ធកម្មសម្រាប់ឆ្នាំ២០២៣

2022/03/09 05:00:51 pm        847
Facebook Telegram Linkin
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បើកវគ្គបណ្តុះបណ្តាលនៃការរៀបចំថវិកាសមិទ្ធកម្ម ដើម្បីផ្តល់ចំណេះដឹងបន្ថែម អំពីគោលការណ៍ និងវិធីសាស្រ្តនៃការរៀបចំថវិកាសមិទ្ធកម្ម ដែលក្រសួង-ស្ថាប័ន នឹងត្រូវអនុវត្តសាកល្បងសម្រាប់ការរៀបចំថវិកាឆ្នាំ ២០២៣, ដើម្បីពង្រឹងការទទួលខុសត្រូវកាន់តែច្បាស់លាស់ជាងមុន ជាពិសេស លើប្រតិបត្តិការអនុវត្តចំណាយ ។ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការ​នៃក្រសួង​សេដ្ឋកិច្ច និង​ហិរញ្ញវត្ថុ ​លើកឡើងនៅក្នុងការបើក​វគ្គបណ្តុះ​បណ្តាល​គោលការណ៍​ណែនាំ​ ស្តីពីការ​រៀបចំ​ថវិកា​សមិទ្ធកម្ម ​តាមប្រព័ន្ធអនឡាញ (Zoom) ជូនដល់សិក្ខាកាម ជាគ្រូបង្គោល និង​មន្ត្រី​ជំនាញ​ថវិកា​មកពី​គ្រប់​ក្រសួង-ស្ថាប័ន ​នៅថ្ងៃទី០៩ខែមីនា ឆ្នាំ២០២២ នេះថា សម្រាប់ការ​អនុវត្ត​ថវិកា​ជំហានបន្ត វគ្គ​បណ្តុះ​បណ្តាលនេះ ​ក៏នឹងជួយបំពេញនូវចំណុចខ្វះខាតមួយចំនួន រួមទាំង​ធ្វើ​បច្ចុប្បន្នភាពចំណេះដឹង​ ជូនដល់​គ្រូបង្គោលជំនាញថវិកា ​នៅតាមក្រសួងស្ថាប័ន ពាក់ព័ន្ធនឹងការ​រៀបចំ​រចនាសម្ព័ន្ធកម្មវិធី, ការ​កំណត់​សូចនាករ, ការរៀបចំអង្គភាពថវិកា និងការវិភាជ​ថវិកា​ឱ្យចំ​កម្មវិធី និងគោលដៅអាទិភាពជាដើម ដើម្បី​បង្កើន​គុណភាពនៃការវិភាជថវិកា និងរៀបចំ​សូចនាករ​សមិទ្ធកម្មគន្លឹះ។ឯកឧត្តម​ គូសបញ្ជាក់ថា ថវិកាសមិទ្ធកម្ម មិនមែនជាការងារថ្មីសន្លាង និងមាន​ភាព​ខុស​គ្នា​ខ្លាំង​ជាមួយ​នឹង​ថវិកា កម្មវិធី​ដែលក្រសួង-ស្ថាប័ន​កំពុង​អនុវត្ត​នាពេល​បច្ចុប្បន្ននេះ​ នោះឡើយ, ថវិកា​សមិទ្ធកម្ម គឺជា​ការ​រៀបចំ​កញ្ចប់​ថវិកា មាន​ការផ្សារភ្ជាប់ជាមួយនឹងព័ត៌មានសមិទ្ធកម្មដែលគ្រោង​នឹង​សម្រេច ឬដែល​សម្រេច​បាន​កន្លងមក​ ដោយ​ក្រសួង-ស្ថាប័ន។ឯកឧត្តម វង្សី វិស្សុត ​បន្តលើកឡើងថា ​កន្លងមករាជរដ្ឋាភិបាល ​និងក្រសួងសេដ្ឋកិច្ច ​និងហិរញ្ញវត្ថុ បាន​ចេញ​នូវ អនុក្រឹត្យប្រកាស​ និង​លិខិតបទដ្ឋានគតិយុត្តផ្សេងៗ ​ក្នុងការជំរុញ​ការប្រគល់​សិទ្ធិ​អំណាច​ជូន​អង្គភាព​ថវិកា ​នៅ​តាមក្រសួង-ស្ថាប័នទាំងអស់ ​ដោយផ្អែកលើលក្ខខណ្ឌ​វិនិច្ឆ័យ​ច្បាស់លាស់ ​ដើម្បីពង្រឹង​ប្រសិទ្ធភាព​បន្ថែមក្នុងការរៀបចំ ​និងការគ្រប់គ្រងថវិកា ​ព្រមទាំងពង្រឹង​ការ​ទទួល​ខុស​ត្រូវ​កាន់​តែ​ច្បាស់​លាស់​ជាង​មុនលើប្រតិបត្តិការ ​អនុវត្ត​ចំណាយ​សំដៅ​ឈានទៅ​សម្រេច​លទ្ធផលការងារ ​ជាពិសេស​គោល​បំណង​គោល​នយោបាយរបស់ក្រសួង-ស្ថាប័ន។ ឯកឧត្តម បញ្ជាក់ថា ក្រសួងស្ថាប័នណាដែ​ល​បានរៀបចំ ​និង​គ្រប់​គ្រង​ថវិកាបានល្អ ក្រសួង​ស្ថាប័ននោះ នឹងទទួល​បាននូវការប្រគល់​សិទ្ធិអំណាច​កាន់​តែ​ច្រើន​ថែម​ទៀត​៕អត្ថបទ៖ សុន រ៉ាឌី

ស.ស.យ.ក ខេត្តស្វាយរៀង ប្រកាសបើកជាផ្លូវការនូវកម្មវិធី «វោហារសព្ទយុវជន» ដើម្បីអបអរទិវាអន្តរជាតិនារី ៨មីនា ឆ្នាំ២០២២ ខួបទី១១១

2022/03/09 03:26:52 pm        874
Facebook Telegram Linkin
ស្វាយរៀង៖ ឯកឧត្តម ឌី វិជ្ជា ប្រធានសហភាពសហព័ន្ធយុវជនកម្ពុជា ខេត្តស្វាយរៀង នៅថ្ងៃម្សិលមិញនេះ បានប្រកាសបើកជាផ្លូវការ នូវកម្មវិធី «វោហារសព្ទយុវជន» ដែលផ្ដួចផ្ដើមបង្កើតឡើង ដោយសហភាពសហព័ន្ធយុវជនកម្ពុជា ខេត្តស្វាយរៀង ក្នុងគោលបំណង អបអរសាទរទិវាអន្តរជាតិនារី ៨មីនា ឆ្នាំ២០២២ ខួបទី១១១។កម្មវិធីនេះ បានប្រារព្ធឡើង ដោយមានការចូលរួម ពីសំណាក់ឯកឧត្តម លោក លោកស្រី អនុប្រធានស.ស.យ.ក ខេត្តស្វាយរៀង ប្រធានគណៈកម្មាធិការស.ស.យ.ក ស្រុក-ក្រុងទាំង៨ សមាសភាពគណៈកម្មការដាក់ពិន្ទុការប្រកួត ក្នុងកម្មវិធី «វោហារសព្ទយុវជន» ក៏ដូចជា​សមាជិក​សមាជិកាស.ស.យ.ក ខេត្តស្វាយរៀង ​ជាច្រើន តាមរយៈប្រព័ន្ធ Zoom ហើយក៏មានការផ្សាយ​បន្តផ្ទាល់ លើហ្វេសប៊ុកផេកផ្លូវការរបស់សហភាពសហព័ន្ធយុវជនកម្ពុជា ​ខេត្តស្វាយរៀងផងដែរ។ជាមួយគ្នានោះ ឯកឧត្តម ឌី វិជ្ជា បានមានប្រសាសន៍ថា​ ការបង្កើតកម្មវិធីនេះឡើង គឺដើម្បីផ្ដល់​ឱកាស​សម្រាប់យុវជនក្នុងខេត្តស្វាយរៀង ​បានបង្ហាញនូវសមត្ថភាព និង​ទេពកោសល្យ​ផ្នែកការ​និយាយជាសាធារណៈ ក៏ដូចជាការពង្រឹង​សមត្ថភាព​និយាយប្រកបដោយមូលដ្ឋាន​នៃចំណេះដឹង និង​ការ​បណ្ដុះផ្នត់​គំនិត​សុទិដ្ឋិនិយម​ចំពោះសង្គមជាតិ​ដល់យុវជនផងដែរ។ កម្មវិធី «វោហារសព្ទយុវជន» នេះ នឹងត្រូវធ្វើឡើង ​ក្រោមមូលបទ ​«សមភាពយេនឌ័រថ្ងៃនេះ ដើម្បី​ចីរភាពនា​ពេលអនាគត» ​ដែលអាចឱ្យយុវជន​បានចូលរួមសិក្សាឱ្យកាន់​តែស៊ីជម្រៅបន្ថែម ជុំវិញ​មូលបទនេះថែមទៀតផង។ឯកឧត្តម ឌី វិជ្ជា បញ្ជាក់បន្ថែមថា «ខ្ញុំសង្ឃឹម​ និងជឿជាក់យ៉ាងមុតមាំថា​ កម្មវិធីនេះ នឹង​ក្លាយ​ជា​វេទិកាមួយ ​សម្រាប់យុវជនក្នុងខេត្តស្វាយរៀង ​ក្នុងការបង្ហាញភាពក្លាហាន សមត្ថភាព និង​សក្តានុពលរបស់ខ្លួន ​ក្នុងនាម​ជាយុវជនបន្តវេន​របស់​ប្រទេសកម្ពុជាយើង»។គួររំឭកផងដែរថា ​លក្ខខណ្ឌនៃការចូលរួម ក្នុងកម្មវិធី​ «វោហារសព្ទយុវជន» គឺ៖- បេក្ខជនដាក់​ពាក្យ​ចូលរួមប្រកួត​ គឺជាសិស្ស-និស្សិត ​ដែលកំពុងសិក្សានៅក្នុងខេត្តស្វាយរៀង ហើយ​មាន​អាយុចាប់ពី ១៦ឆ្នាំ រហូតដល់ ២៥ឆ្នាំ។- បេក្ខជនដាក់ពាក្យប្រកួតត្រូវភ្ជាប់ជាមួយ​នូវប្រវត្តិរូបសង្ខេប រួមទាំងអត្ថបទ ដែលខ្លួនបានសរសេររួច អំពីប្រធានបទ៖ ការរួមចំណែករបស់ស្ត្រី នៅក្នុងសង្គមជាតិ។ចាប់ផ្តើមទទួលពាក្យចាប់ពីថ្ងៃទី៩ រហូតដល់ថ្ងៃទី១៧ ខែមីនា ឆ្នាំ២០២២ ហើយសម្រាប់ព័ត៌មានបន្ថែមអាចទាក់ទងមកកាន់ទូរសព្ទលេខ៖ 096 44 32 023/ 012 366 810។

រាជធានី-ខេត្តចំនួន១១ ទទួលបានវ៉ាក់សាំងប្រភេទPfizerរួចរាល់ សម្រាប់ចាក់ជូនក្រុមអាទិភាព

2022/03/09 02:02:54 pm        627
Facebook Telegram Linkin
ភ្នំពេញ៖ គិតត្រឹមថ្ងៃទី៨ ខែមីនា នេះ គណៈកម្មការចំពោះកិច្ចចាក់វ៉ាក់សាំងបង្កាជំងឺកូវីដ-១៩ ក្នុងក្របខណ្ឌ ទូទាំងប្រទេស បានបញ្ជូនវ៉ាក់សាំងប្រភេទPfizer ទៅដល់រាជធានី-ខេត្ត ចំនួន១១ សម្រាប់ចាក់ជូនក្រុម អាទិភាពជួរមុខ។លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការ ចំពោះកិច្ចចាក់វ៉ាក់សាំងបង្ការជំងឺកូវីដ-១៩ក្នុងក្របខណ្ឌទូទាំងប្រទេស នៅថ្ងៃនេះ បាន​ប្រាប់BTV​ឱ្យដឹងថា គិតត្រឹមថ្ងៃម្សិលមិញ ​រាជធានី-ខេត្ត ចំនួន១១ហើយ ដែលទទួលបានវ៉ាក់សាំង​ប្រភេទPfizer សម្រាប់ ចាក់ជូនក្រុមអាទិភាពជួរមុខ រួមមាន ខេត្តបាត់ដំបង កំពង់ឆ្នាំង កំពង់ធំ កណ្ដាល ពោធិ៍សាត់ សៀមរាប ព្រះសីហនុ ស្ទឹងត្រែង ស្វាយរៀង ប៉ៃលិន និងខេត្តកំពង់ស្ពឺ។សម្រាប់ខេត្ត៩ផ្សេងទៀត​ អាចនឹងទទួលបានក្នុងសប្តាហ៍នេះ ​ជាបន្តបន្ទាប់ ក្រោយពេលរៀបចំ ប្រព័ន្ធត្រជាក់ ​និងតេស្តឱ្យដំណើរការស្រួលបួលសិន។ ខេត្តទាំង៩នោះ រួមមាន ខេត្តកំពង់ចាម ឧត្តរមានជ័យ បន្ទាយមានជ័យ កំពត រតនគិរី ក្រចេះ កោះកុង ត្បូងឃ្មុំ និងខេត្តមណ្ឌលគិរី។ រីឯខេត្តនៅសេស​ សល់៤ទៀត អាចធ្វើជាបន្តបន្ទាប់ទៀត ក្រោយ​ពីប្រព័ន្ធ​ត្រជាក់​ដំណើរការបានត្រឹមត្រូវ ​តាមបច្ចេកទេស។ក្រោយរាជធានី-ខេត្តទាំងនោះ ទទួលបានវ៉ាក់សាំងប្រភេទPfizerរួចរាល់ហើយ ​ការចាក់វ៉ាក់សាំង កូវីដ-១៩ជូនក្រុមអាទិភាព​ នឹងចាប់ផ្តើមអនុវត្ត ​ដោយអាស្រ័យទៅលើការរៀបចំរបស់អាជ្ញាធរខេត្ត។ការចាក់វ៉ាក់សាំងជូនប្រជាពលរដ្ឋ គឺជាយុទ្ធសាស្រ្តចំម្បងមួយ ដែលរាជរដ្ឋាភិ បាលកម្ពុជាបាន ដាក់ចេញ ដើម្បីប្រយុទ្ធប្រឆាំងនឹងការរាតត្បានៃជំងឺកូវីដ-១៩។ បច្ចុប្បន្ន កម្ពុជារកវ៉ាក់សាំងកូវីដ-១៩ បាន ជាង៤៣លានដូស ​រាប់​បញ្ជូល​ទាំង​ការ​បញ្ជាទិញពីប្រទេសចិន ​ជំនួយ​តាមរយៈយន្តការកូវ៉ាក់ និងបណ្តាប្រទេសផ្សេងៗ មួយចំនួនទៀត ​សម្រាប់​ប្រើប្រាស់​ក្នុង​យុទ្ធនាការ​ចាក់វ៉ាក់​សាំង​បង្ការ​ជំងឺកូវីដ-១៩ ​ជូនពលរដ្ឋ ​អាយុពី៣ឆ្នាំឡើង​ ចាប់ពីដូសទី១ ដល់ដូសទី៤៕អត្ថបទ៖ ទូច សោភ័ណ

បណ្ដាញសង្គម

ព័ត៌មានថ្មីៗ

អភិបាលខេត្តពោធិ៍សាត់ ចុះជួបគ្រួសារវីរកងទ័ពជួរមុខ និងពិនិត្យវឌ្ឍនភាព វាយតម្លៃគម្រោងមូលនិធិឃុំ ក្នុងស្រុកក្រគរ
12/16/2025 09:12 PM
Facebook Telegram Linkin
ក្តីស្រមៃពឹងផ្អែកស្រូវសាលីរបស់ប្រជាកសិករអ៊ីរ៉ាក់ត្រូវបានបំផ្លាញដោយសារវិបត្តិទឹក
12/16/2025 08:12 PM
Facebook Telegram Linkin
ពលរដ្ឋលីបង់ស្វាគមន៍រដូវកាលបុណ្យណូអែលជាមួយក្តីសង្ឃឹមថា ព្រះជាម្ចាស់នឹងជួយទប់ស្កាត់សង្រ្គាម
12/16/2025 08:12 PM
Facebook Telegram Linkin
តើយានដ្រូនបានផ្លាស់ប្តូរសង្រ្គាមបែបណាខ្លះនៅក្នុងឆ្នាំ ២០២៥?
12/16/2025 08:12 PM
Facebook Telegram Linkin
ផ្សែងអ័ព្ទយ៉ាងក្រាស់នៅប៉ាគីស្ថាន បង្ខំឲ្យបិទផ្លូវហាយវ៉េសំខាន់ៗជាច្រើនខ្សែនៅខេត្ត Punjab
12/16/2025 08:12 PM
Facebook Telegram Linkin
ចិនបញ្ជាក់ឡើងវិញពីតម្រូវការឲ្យនាយករដ្ឋមន្រ្តីជប៉ុនកែសម្រួលសេចក្តីអត្ថាធិប្បាយលើបញ្ហាកោះតៃវ៉ាន់
12/16/2025 08:12 PM
Facebook Telegram Linkin
ក្រុមហ៊ុនធានារ៉ាប់រង Swiss Re ៖ គ្រោះមហន្តរាយធម្មជាតិធ្វើឲ្យប៉ះពាល់សេដ្ឋកិច្ចសកល ២២០ពាន់លានដុល្លារ ក្នុងឆ្នាំ ២០២៥
12/16/2025 08:12 PM
Facebook Telegram Linkin
មន្ត្រីក្រសួងកសិកម្ម ដឹកនាំក្រុមការងារ​ ពិនិត្យការបំពាក់ឧបករណ៍ប្រព័ន្ធតាមដាននាវា នៅខេត្តព្រះសីហនុ
12/16/2025 08:12 PM
Facebook Telegram Linkin
រដ្ឋបាលរាជធានី នឹងបញ្ចៀសចរាចរណ៍យានយន្តគ្រប់ប្រភេទ នៅតីរវិថីព្រះស៊ីសុវត្ថិ ជាបណ្ដោះអាសន្ន
12/16/2025 08:12 PM
Facebook Telegram Linkin
សមាជិកកម្លាំងសន្តិសុខ ៣នាក់ នៅអ៊ីរ៉ង់ ត្រូវបានសម្លាប់ អំឡុងការប្រយុទ្ធគ្នា
12/16/2025 08:12 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.