នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS | កម្ពុជា និងថៃឯកភាពឈប់បាញ់គ្នា និងត្រលប់ទៅអនុវត្តបទឈប់បាញ់តាមរយៈការសម្របសម្រួលរបស់ប្រធានាធិបតីអាមេរិក
តម្លៃសេវាអ៊ីនធឺណិតនឹងទាបជាងមុន បន្ទាប់ពីកម្ពុជាតបណ្តាញប្រព័ន្ធអ៊ីនធឺណិតពីហុងកុង
វេទិកានយោបាយអាស៊ី-អឺរ៉ុប ស្នើឱ្យភាគីជម្លោះគោរពចំពោះកិច្ចព្រមព្រៀងសន្តិភាពនានា និង​ធម្មនុញ្ញ UN
ក្រសួងរៀងចំដែនដី នឹងបង្កើតសួនបន្ថែមក្នុងទីក្រុង ឆ្លើយតបនឹងកំណើនពលរដ្ឋក្នុងទីក្រុង

នយោបាយ​ និង ការអភិវឌ្ឍន៍

ករណីឆ្លងកូវីដ-១៩ នៅរាជធានីភ្នំពេញ មានការធ្លាក់ចុះច្រើនក្នុងរយៈពេលប៉ុន្មានថ្ងៃចុងក្រោយនេះ

2022/03/09 01:56:16 pm        885
Facebook Telegram Linkin
​ភ្នំពេញ៖ ករណីឆ្លងកូវីដ-១៩ សម្រាប់ភូមិសាស្រ្តរាជធានីភ្នំពេញ ក្នុងរយៈពេលប៉ុន្មានថ្ងៃចុងក្រោយនេះ គឺមានការធ្លាក់ចុះច្រើនគួរឱ្យកត់សម្គាល់។ នេះជាការបញ្ជាក់របស់លោក កើត ឆែ អភិបាលរងរាជធានីភ្នំពេញ។ ករណីឆ្លងកូវីដ-១៩ ទូទាំងប្រទេសកម្ពុជា ក្នុងរយៈពេលប៉ុន្មានថ្ងៃចុងក្រោយនេះ ស្ថិតក្នុងរង្វង់ជាង ៣០០នាក់ រៀងរាល់ថ្ងៃ។ នេះបើផ្អែកលើទិន្នន័យប្រចាំថ្ងៃ របស់ក្រសួងសុខាភិបាលជាលទ្ធផល​ចេញពីម៉ាស៊ីនPCR។ ទន្ទឹមការធ្លាក់ចុះករណីឆ្លងទូទាំងប្រទេសនេះ ករណីឆ្លងកូវីដ-១៩ ​នៅរាជធានីភ្នំពេញ ក៏មានការ​ធ្លាក់​ចុះច្រើនគួរឱ្យកត់សម្គាល់ផងដែរ។ ​នេះជាការបញ្ជាក់របស់ លោក កើត ឆែ អភិបាលរងរាជធានី​ភ្នំពេញ។ យ៉ាងណាម៉ិញលោកអភិបាលរង ពុំទាន់អាចបញ្ជាក់លម្អិតពីចំនួន​ភាគរយនៃការធ្លាក់ចុះ រឺចំនួនអ្នកជំងឺជាក់ស្ដែងដែលកំពុងសម្រាកព្យាបាលនៅមន្ទីរពេទ្យ រឺព្យាបាលតាមផ្ទះនោះទេ។ការធ្លាក់ចុះនៃករណីឆ្លងក្នុងភូមិសាស្រ្តរាជធានីភ្នំពេញនេះ លោកបញ្ជាក់ថាមកពីសព្វថ្ងៃ​ប្រជាពលរដ្ឋ​មានការយល់ដឹងច្រើនពីវីរុសបំប្លែងថ្មីអូមីក្រុង ​មានការប្រុងប្រយ័ត្នខ្ពស់ជាងមុន និងមានការកាត់បន្ថយការប្រមូលផ្ដុំក្នុងពិធីការ រឺពិធីផ្សេងៗមកត្រឹម ៧នាក់ក្នុងមួយតុ និងមានការតេស្តមុនការចូលរួមជាដើម៕ អត្ថបទ៖ គឹមហុក

ខេត្តបាត់ដំបង ជំរុញការចុះបញ្ជីម៉ាកសមូហភាព ដូងខ្ទិះ ឆាប់ៗខាងមុខ

2022/03/09 07:55:49 am        1362
Facebook Telegram Linkin
បាត់ដំបង៖ ខេត្តបាត់ដំបង កំពុងពន្លឿននិតីវិធី​នៃការចុះបញ្ជីម៉ាកសមូហភាព ដូងខ្ទិះបាត់ដំបង ឱ្យបានឆាប់ៗខាងមុខ ដើម្បីឈានដល់ការប្រើប្រាស់ជាឧបករណ៍ទីផ្សាររួម និងអាចចូលរួមប្រកួតប្រជែងមុខម្ហូបកម្រិតជាតិ និងអន្ដរជាតិ។ក្នុងគោលដៅជំរុញដូងខ្ទិះបាត់ដំបង ឲ្យកាន់តែល្បីរន្ទឺ និងទាក់ទាញភ្ញៀវទេសចរណ៍កាន់​តែ​ច្រើន​ថែមទៀត ​ខេត្តបាត់ដំបង​ នឹងរៀបចំ​ឲ្យ​មាន​ការបោះឆ្នោតជ្រើសប្រធាន​សមាគមម្នាក់ ដើម្បី​គ្រប់គ្រង​ការ​ប្រើប្រាស់ម៉ាកសមូហភាព “ដូងខ្ទិះបាត់ដំបង” ក៏ដូចជាផលិតផលដទៃផ្សេងទៀត​នាពេល​អនាគត។លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបង នៅព្រឹកថ្ងៃទី៩ មីនា ឆ្នាំ២០២២នេះ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវីថា ​ក្រោយបើកសិក្ខាសាលា ​ស្តីពីដូងខ្ទិះបាត់ដំបង កាលពីខែកុម្ភៈកន្លងទៅ ​ខេត្តបានជ្រើសរើសតំណាងស្រុកចំនួន៣ ​រួមមាន​ ស្រុកឯកភ្នំ, ស្រុកសង្កែ និងស្រុកបាណន់​ ដែលមានដាំដូងខ្ទិះ ​ចំនួន ១៣នាក់រួចហើយ ដោយរងចាំខាក្រសួង​ចុះមក​បោះឆ្នោត​ជ្រើសប្រធានសមាគម។លោក បន្ថែមថា ក្រៅពីដូងខ្ទិះបាត់ដំបង ​ខេត្តក៏មានផលិតផលផ្សេងៗទៀត ដើម្បីត្រៀម​ចុះបញ្ជីជា​ម៉ាកសមូហភាព ​មានដូចជា​ អង្កថ្មគោល​ ធូរេនសំឡូត ​ម្រេចសំឡូត​ និងតាង៉ែនបាត់ដំបង...។លោកបន្តថា ​ដូងខ្ទិះ ជាដូងដែលគេដាំក្នុងភូមិ ​មិនមែនជាចំការទេ ​ដោយផ្ទះខ្លះមានចំនួនតែ ៣ ឬ១០ដើម និងរហូតដល់ ៣០ដើម ក៏មានដែរ។ រយៈពេលប្រមូលផល គឺពី ៤ទៅ៦ខែ ហើយក្នុង១ធ្លាយ មានតែ ២ ទៅ៣ផ្លែ។ រីឯតម្លៃលក់នៅតាមទីផ្សារចន្លោះ ២ម៉ឺន ៥ពាន់ ដល់ ៣ម៉ឺន ៥ពាន់រៀល ក្នុង១ផ្លែ។យោងតាមក្រសួងពាណិជ្ជកម្ម ការកំណត់យកផលិតផល “ដូងខ្ទិះបាត់ដំបង” ក្នុងខេត្តបាត់ដំបង ដើម្បីរៀបចំចុះបញ្ជីជាម៉ាកសមូហភាព ដោយសារដូងខ្ទិះ ជាដំណាំដែលមានប្រវត្តិ និងអាយុកាល​ដាំដុះក្នុងភូមិសាស្រ្តខេត្ត ​និងជាផលិតផលកម្រនិងលំបាកក្នុងការដាំដុះ ដោយត្រូវការដីដែលមាន​ជីវជាតិ​ខ្លាំង ទើបអាចដាំដុះ ​និងប្រមូលផលបានល្អ។សូមបញ្ជាក់ថា បច្ចុប្បន្នក្រសួងពាណិជ្ជកម្ម បានចុះបញ្ជីការពារម៉ាកសមូហភាពចំនួន ៣ធំៗគឺ៖ “គុយទាវភ្នំពេញ” ក្នុងរាជធានីភ្នំពេញ “អំបុកកំពង់ធំ” ក្នុងខេត្តកំពង់ធំ និង “អង្ករព្រះវិហារ” ក្នុងខេត្តព្រះវិហារ និងក្រសួងគ្រោងនឹងចុះបញ្ជីម៉ាកសមូហភាព ៤បន្ថែមទៀត រួមមាន៖ “ចម្លាក់ប្រាក់ស្ពាន់ខេត្តកណ្តាល” ក្នុងឃុំកំពង់លួង និងឃុំកោះចិន ខេត្តកណ្តាល “ក្រូចពោធិ៍សាត់” ក្នុងខេត្តពោធិ៍សាត់ និងខេត្តបាត់ដំបង “នំបញ្ចុកសៀមរាប” ក្នុងខេត្តសៀមរាប និង “ដូងខ្ទិះបាត់ដំបង” ក្នុងខេត្តបាត់ដំបង៕អត្ថបទ ឈិត បូរ៉ាវី

គ.ជ.ប រកឃើញភាពមិនប្រក្រតីក្នុងបញ្ជីឈ្មោះបេក្ខជនបក្សនយោបាយ ខណៈបញ្ជីបេក្ខជនបិទផ្សាយចំនួនបីថ្ងៃ

2022/03/09 01:05:13 pm        684
Facebook Telegram Linkin
ភ្នំពេញ៖ ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គជប) បានឲ្យដឹងថា ក្នុងពេលគណៈកម្មការឃុំ-សង្កាត់រៀបចំការបោះឆ្នោត បន្តពិនិត្យបញ្ជីបេក្ខជនរបស់គណបក្សនយោបាយ បានរកឃើញឈ្មោះបេក្ខជនមួយចំនួនមានភាពមិនប្រក្រតី។ក្នុងពេលគណៈកម្មការឃុំ-សង្កាត់រៀបចំការបោះឆ្នោត កំពុងដំណើរការពិនិត្យបញ្ជីបេក្ខជន របស់ គណបក្សនយោបាយ ក៏ដូចជាការបិទផ្សាយបញ្ជីឈ្មោះបេក្ខជន ឯកឧត្តម ហង្ស ពុទ្ធា អ្នកនាំពាក្យ គ.ជ.ប. ប្រាប់BTVថា ក្នុងចំណោមគណបក្សនយោបាយ ដែលបានចុះឈ្មោះបេក្ខជនរបស់ខ្លួន ចូលរួមប្រកួតប្រជែងក្នុងការបោះឆ្នោតក្រុមប្រឹក្សាឃុំ-សង្កាត់ អាណ្ណត្តិទី៥ ចំនួន១៧គណបក្ស គណៈកម្មការឃុំ-សង្កាត់ រៀបចំការបោះឆ្នោត បានរកឃើញភាពមិនប្រក្រតីទៅលើឈ្មោះបេក្ខជន​មួយ​ចំនួន ដែលសាម៉ីខ្លួននោះ​ បានបដិសេធអំពីបញ្ជី​ ដែលបានបិទផ្សាយតាមគណៈកម្មការឃុំ-សង្កាត់ រៀបចំការបោះឆ្នោត។ចំពោះដំណាក់កាល និងនីតិវិធីទាំងមូល ពាក់ព័ន្ធនឹងបញ្ជីឈ្មោះបេក្ខជនគណបក្សនយោបាយ ឯកឧត្តម ហង្ស ពុទ្ធា ​បានបញ្ជាក់ថា ​បញ្ជីបេក្ខជនរបស់គណបក្សនេះ មានសារ​សំខាន់​សម្រាប់​ប្រជាពលរដ្ឋ ដើម្បី​បាន​ជ្រាបអំពី​សមាសភាព​ ដែល​នឹងត្រូ​វ​ប្រកួតប្រជែង​ជាក្រុមប្រឹក្សាឃុំ-សង្កាត់។ក្រោយការពិនិត្យទៅលើបញ្ជីឈ្មោះបេក្ខជន​ របស់គណបក្សនយោបាយ ​រយៈពេលមួយសប្តាហ៍ នៅថ្ងៃទី៦-៨ ​ខែមេសា គ.ជ.ប នឹង​បិទផ្សាយបញ្ជីបេក្ខជនដំបូង​ នៅ​តាមគណៈកម្មការឃុំ-សង្កាត់ រៀបចំការបោះឆ្នោត ខណៈថ្ងៃទី២៤ ​ខែមេសា គ.ជ.ប ​នឹង​​បិទផ្សាយ​បញ្ជីបេក្ខជនផ្លូវការ។ការបោះឆ្នោតជ្រើសរើស​ក្រុមប្រឹក្សាឃុំ-សង្កាត់ នឹងប្រព្រឹត្តទៅនៅថ្ងៃទី០៥ ​ខែមិថុនា ឆ្នាំ២០២២ ហើយ​ប្រជាពលរដ្ឋមានឈ្មោះក្នុងបញ្ជីបោះឆ្នោតផ្លូវការចំនួនជិត ១០លាននាក់ ខណៈការិយាល័យ​ដំណើរ ការ​រៀបចំការបោះឆ្នោត​នាពេលខាងមុខ ​មានចំនួនជាង២ម៉ឺនការិយាល័យ​ នៃឃុំ-សង្កាត់នៅទូទាំងប្រទេស សរុបចំនួន១,៦៥២ឃុំ-សង្កាត់៕ អត្ថបទ៖ សេក ឧត្តម 

កម្ពុជា ផ្ដល់រថយន្តដឹកវ៉ាក់សាំង ១០គ្រឿងដល់ប្រទេសឡាវ

2022/03/09 12:53:26 pm        458
Facebook Telegram Linkin
ភ្នំពេញ៖ ក្នុងការចូលរួមប្រយុទ្ធប្រឆាំងជំងឺកូវីដ-១៩ ជាមួយប្រទេសឡាវ រាជរដ្ឋាភិបាលកម្ពុជា បានសម្រេចផ្ដល់រថយន្តដឹកវ៉ាក់សាំងចំនួន ១០គ្រឿង ដល់ប្រទេសនេះ ដែលពិធីប្រគល់នឹងធ្វើឡើងនៅចុងសប្ដាហ៍នេះ នៅច្រកទ្វារព្រំដែនអន្តរជាតិ ក្នុងខេត្តស្ទឹងត្រែង។យោងតាមប្រកាសព័ត៌មានរបស់ក្រសួងសុខាភិបាល នៅថ្ងៃទី៩ ខែមីនានេះ បានឲ្យដឹងថា ការ សម្រេច​ផ្ដល់រថយន្តដឹកវ៉ាក់សាំងរបស់រាជរដ្ឋាភិបាលកម្ពុជា ​ជូនដល់រដ្ឋាភិបាល និងប្រជាពលរដ្ឋ​ឡាវ​នេះ គឺជាការបង្ហាញនូវការយកចិត្តទុកដាក់ខ្ពស់បំផុត របស់សម្ដេចតេជោនាយករដ្ឋមន្ត្រី ចំពោះសុខភាព និងសុខុមាលភាពរបស់ប្រជាជនឡាវ ក្នុងនាម​ជាប្រទេសជិតខាង​ភូមិផងរបង​ជាមួយ ក៏ដូចជាការពង្រឹងនូវកិច្ច ​សហប្រតិបត្តិការទ្វេភាគី​ និងជាកាយវិការមនុស្សធម៌ ប្រកបដោយ​បេះដូង​ដ៏ល្អប្រពៃពិតប្រាកដ របស់សម្ដេចតេជោក្នុងន័យ “កម្ពុជា ជាប្រទេសតូចតាចតែ​មាន​បេះដូង​ធំទូលាយ” ។លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល ​តំណាងដ៏ខ្ពង់ខ្ពស់សម្ដេចតេជោ ហ៊ុន សែន ​នាយករដ្ឋមន្ត្រី នៃកម្ពុជា ​នឹងនាំយករថយន្តដឹកវ៉ាក់សាំង ​ទៅប្រគល់ជូនភាគីឡាវ នៅចំណុចច្រកទ្វារអន្តរជាតិត្រពាំងក្រៀល ​ក្នុងខេត្តស្ទឹងត្រែង ​ជាប់ព្រំដែនខេត្តចម្ប៉ាស័ក នៃប្រទេសឡាវ ។ប្រភព បានបន្ថែមថា កម្ពុជា ក៏តែងតែបាន និងកំពុងធ្វើដោយឈរលើស្មារតីមិត្តភាព​ សាមគ្គីភាព និង​កិច្ចសហប្រតិបត្តិការល្អ ប្រកបដោយការគិតគូរខ្ពស់ ​រួមគ្នាដោះស្រាយវិបត្តិ នៃការឆ្លង​រីករាល​ដាល ​ជំងឺកូវីដ-១៩ ​នៅក្នុងប្រទេស ​និងនៅក្នុងតំបន់ ​ហើយ​អំណោយ​មនុស្សធម៌ដ៏ថ្លៃថ្លា​របស់កម្ពុជា​នេះ នឹងរួមចំណែកបន្ថែមទៀតជូនប្រទេសឡាវ ​នៅក្នុងការឆ្លើយតបទៅនឹងវិបត្តិជំងឺកូវីដ-១៩ ជា​ពិសេសលើកិច្ចការ​ចាក់វ៉ាក់សាំងកូវីដ-១៩ ​ជូនដល់ប្រជាជនឡាវ ​ឲ្យកាន់តែមានភាពល្អប្រសើរឡើង​ជាលំដាប់។កន្លងមកកម្ពុជា បានផ្ដល់ឧបករណ៍សម្រាប់ប្រយុទ្ធប្រឆាំងជំងឺកូវីដ-១៩ ​ចំនួន២ដងរួចមកហើយ ក្នុងនោះមានផ្ដល់រថយន្ដដឹកវ៉ាក់សាំងចំនួន៣គ្រឿង ​បរិក្ខារវេជ្ជសាស្ត្រ ​វ៉ាក់សាំងកូវីដ-១៩ ហើយ​កាលពី ឆ្នាំ២០២១ សម្ដេចតេជោ បានផ្ដល់ថវិកាប្រមាណជាង១០លានដុល្លារ ដល់ប្រទេស​មួយនេះផងដែរ៕អត្ថបទ៖ បាន សុខរិទ្ធ

កុមារអាយុ៣ឆ្នាំរហូតដល់ក្រោម៥ឆ្នាំក្នុងរាជធានីភ្នំពេញ ជាង៣ម៉ឺននាក់​បានមកចាក់វ៉ាក់សាំង​បង្ការ​ជំងឺកូវីដ-១៩ ដូសមូលដ្ឋាន

2022/03/09 12:38:20 pm        785
Facebook Telegram Linkin
ភ្នំពេញ៖ កុមារអាយុ៣ឆ្នាំ រហូតដល់ក្រោម៥ឆ្នាំ ក្នុងមូលដ្ឋានរាជធានីភ្នំពេញ ចំនួនជាង ៣ម៉ឺននាក់ បានមកទទួលការចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន។បើតាមឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ប្រាប់BTV ព័ត៌មាន​នាព្រឹកថ្ងៃទី៩ខែមីនា ឆ្នាំ២០២២នេះថា យោងតាមទិន្នន័យសរុប ជុំវិញ​ដំណើរ​ការចាក់​វ៉ាក់សាំង​បង្ការជំងឺកូវីដ១៩​ ជូនដល់កុមារអាយុ៣ឆ្នាំ ​រហូតដល់ក្រោម៥ឆ្នាំ ​ចាប់​ផ្តើមយុទ្ធនាការ​ពីថ្ងៃទី២៣ ​ខែកុម្ភៈ ឆ្នាំ២០២២ រហូតដល់ល្ងាចថ្ងៃទី៨ ​ខែ​មីនា​ម្សិលមិញ​នេះ ក្នុងភូមិសាស្រ្ត​រាជធានី​ភ្នំពេញ ​មានកុមារចំនួន៣៧៣៧២នាក់ ក្នុងចំណោមកុមារ៧២៨៥៤នាក់ ​បើគិត​ជា​ភាគរយ​៥១,៣០% បានទទួលការចាក់វ៉ាក់សាំងបង្ការជំងឺកូវីដ១៩ ដូសមូលដ្ឋាន។ ឯកឧត្តមវេជ្ជបណ្ឌិត សូមអំពាវនាវដល់ប្រជាពលរដ្ឋទាំងអស់ ដែលមិនទាន់បានចាក់វ៉ាក់សាំង​បង្ការ​ជំងឺកូវីដ១៩ ដូសទី១ ដូសទី២ ដូសទី៣ និងដូសទី៤ សូម​អញ្ជើញ​មកទទួលការចាក់វ៉ាក់សាំង​បង្ការ​ជំងឺ១៩ ដែលមានចំនួន៤២ទីតាំង ​ក្នុងមូលដ្ឋានរាជធានីភ្នំពេញ គឺក្រុមការងារគ្រូពេទ្យរងចាំចាក់​វ៉ាក់សាំង​ជូន ​ដើម្បីចូលរួមទប់ស្កាត់ការចម្លងមេរោគកូវីដ១៩ ​និងបំប្លែងថ្មី ​ប្រភេទអូមីក្រុង និង​បន្តបន្ទាប់​ទៀត។ជាមួយគ្នានោះដែរ អាណាព្យាបាល បាននាំយកកូនៗអាយុ៣ឆ្នាំ រហូតដល់ក្រោម៥ឆ្នាំ មកចាក់​វ៉ាក់សាំង​ដូសមូលដ្ឋាន ​និងប្រជាពលរដ្ឋមកចាក់វ៉ាក់សាំងដូសទី២ ​ដូសទី៣​ និងដូសទី៤ នៅ​មណ្ឌលសុខភាពឃ្មួញ ​ខណ្ឌសែនសុខ រាជធានីភ្នំពេញ បានបង្ហាញពីការកី្តរំភើបរីករាយ និងគោរព​ដឹងគុណជាទីបំផុត ចំពោះប្រមុខរាជរដ្ឋាភិបាល ​ជាពិសេសសម្តេចតេជោ ​ហ៊ុន សែន នាយករដ្ឋមន្រី្ត​ ក្នុងកាលៈទេសៈដ៏លំបាកនេះ ​សម្ដេចបានខិតខំរកជំនួយវ៉ាក់សាំងកូវីដ១៩ និង​ទិញវ៉ាក់សាំងកូវីដ១៩ មកចាក់ជូនពួកគាត់ដោយឥតគិតថ្លៃ។ទន្ទឹមនឹងនោះប្រធានមនី្ទរសុខាភិបាលរាជធានីភ្នំពេញ ក៏បានអំពាវនាវដល់អាណាព្យាបាល​ដែល​បាន​យកកូនៗ​អាយុ៣ឆ្នាំ រហូតដល់ក្រោម៥ឆ្នាំ ​មកទទួលការចាក់វ៉ាក់សាំង​ដូសមូលដ្ឋាន​រួច​ហើយនោះ សូមនាំកូនៗមកចាក់វ៉ាក់សាំងដូសទី២ ចាប់ផ្តើមពីថ្ងៃទី២៨​ ខែមីនា ឆ្នាំ២០២២ រៀងរាល់​ម៉ោង៨:០០ព្រឹក ដល់ម៉ោង១៧:០០នាទីរសៀល ​ដែលគម្លាតរវាងដូសទី១ និងដូសទី២ មាន​រយៈពេល២៨ថ្ងៃ ​តាមរយៈការអញ្ជើញ ​និងទំនាក់ទំនងជាមួយអាជ្ញាធរមូលដ្ឋានផងដែរ៕ អត្ថបទ រដ្ឋា

សម្តេច ទៀ បាញ់ អញ្ជើញ​បើកការដ្ឋាន​កសាង​ស្ដូបអនុស្សាវរីយ៍​នយោបាយឈ្នះឈ្នះ ក្នុងស្រុកអន្លង់វែង

2022/03/09 11:48:33 am        146
Facebook Telegram Linkin
ភ្នំពេញ៖ ស្តូបអនុស្សាវរីយ៍នយោបាយ ឈ្នះ ឈ្នះ ត្រូវបានបញ្ចុះបឋមសិលាកសាង នៅព្រឹកថ្ងៃទី០៩ ខែមីនា នេះ នៅចំណុចភ្នំ២០០ ក្នុងភូមិសាស្ត្រស្រុកអន្លង់វែង ខេត្តឧត្តរមានជ័យ ដែលជាទីតាំងប្រវត្តិសាស្រ្ត បញ្ចប់សង្រ្គាមចុងក្រោយគេនៅកម្ពុជា ក្រោមអធិបតីភាពរបស់សម្ដេចពិជ័យសេនា ទៀ បាញ់ ។សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធានគណៈ កម្មាធិការសាងសង់ស្ដូបអនុស្សាវរីយ៍នយោបាយ ឈ្នះ ឈ្នះ ក្នុងពិធីបញ្ចុះបឋមសិលាកសាង​ស្ដូបអនុស្សាវរីយ៍នយោបាយ ឈ្នះ ឈ្នះ មានប្រសាសន៍ថា ការសាងសង់ស្តូប​អនុស្សាវរីយ៍​នយោបាយ ឈ្នះ ឈ្នះ នៅលើចំណុចទីតាំងភ្នំ២០០ ​ក្នុងភូមិសាស្ត្រស្រុកអន្លង់វែងនេះ ដោយ​សារ​តែជា​តំបន់ប្រវត្តិ សាស្រ្តមួយដ៏ក្តៅគគុក​កាលពីសម័យសង្រ្គាម ​ដែលបានបន្សល់ទុកនូវស្នាកស្នាម និងវត្ថុតាងផ្សេងៗពីសម័យរបបខ្មែរក្រហម។សម្តេចពិជ័យសេនា ទៀ បាញ់ បានបន្តថា ការសាងសង់ស្ដូប​អនុស្សាវរីយ៍​នយោបាយ ឈ្នះ ឈ្នះ នៅតំបន់នេះ ​គឺដើម្បីបញ្ជាក់ឲ្យឃើញកាន់តែច្បាស់ពីជំហរដ៏រឹងមាំ ​និង​បង្ហាញ​ពី​កក្តាសុខសន្តិភាព របស់ប្រទេសជាតិនាពេលបច្ចុប្បន្ននេះផងដែរ។សម្ដេចពិជ័សេនា បានបញ្ជាក់ថា ស្ដូបអនុស្សាវរីយ៍នយោបាយ ឈ្នះ ឈ្នះ នេះ វានឹងផ្ដល់​ជា​ប្រយោជន៍​ដល់​ពលរដ្ឋផងដែរ​លើវិស័យ​ទេសចរណ៍​ ព្រោះរំពឹងថា ​ស្ដូបនេះ នឹងអាចទាក់ទាញ​ការ​ចាប់​អារម្មណ៍ខ្លាំងពីទេសចរក្នុងស្រុក និងក្រៅស្រុក ពិសេសនោះ ​ពលរដ្ឋប្រទេសជិតខាង អាច​មកទស្សនា សិក្សាស្រាវជ្រាវពីរឿងរ៉ាវប្រវត្តិសាស្រ្តផ្សេងៗ ដែល​បាន​បន្សល់​ទុក​កាលពីសម័យ​របប​សង្រ្គាម​ក្នុងតំបន់នេះ៕អត្ថបទ៖ ឃិន សារិទ្ធ

ក្រុមមន្រ្តីជំនាញអភិរក្សរកឃើញកូនផ្សោត១ក្បាល ទើបចាប់កំណើតនៅក្នុងទន្លេមេគង្គ ខេត្តក្រចេះ

2022/03/08 02:34:09 pm        978
Facebook Telegram Linkin
ក្រចេះ៖ ក្រុមមន្រ្តីជំនាញអភិរក្សនិយាយថា កូនផ្សោតមួយក្បាលថ្មីទៀត ត្រូវបានគេប្រទះឃើញកំពុងហែលក្នុងទឹកទន្លេ ក្នុងអន្លង់ តាមដងមេគង្គ ជាមួយមេផ្សោតមួយហ្វូងធំ។ ការប្រទះឃើញកូនផ្សោតថ្មីមួយក្បាលនេះ ក៏ត្រូវបានក្រុមមន្រ្តីអ្នកស្រាវជ្រាវ អះអាងថា គឺជាកូនផ្សោតទី១ ដែលបានចាប់កំណើតកើតដំបូងនៅដើមឆ្នាំ ២០២២នេះ។របាយការណ៍របស់អង្គការជាដៃគូរអភិរក្ស បានឲ្យដឹងថា នៅឆ្នាំ២០២១កន្លងទៅ យ៉ាងហោច​មាន​កូនផ្សោតទឹកសាប៦ក្បាល ត្រូវបានចាប់កំណើតជាមួយនិងមេរបស់វានៅទន្លេមេគង្គខេត្តក្រចេះ។ ហើយសម្រាប់ឆ្នាំ ២០២២ គឺទើបតែមានកូនផ្សោតមួយក្បាលកើតដំបូងគេ ដែលត្រូវបានក្រុមមន្រ្តី​ជំនាញ​ប្រទះឃើញ នៅព្រឹកថ្ងៃទី៧ ខែមិនានេះ ខណៈកូនផ្សោតតូចមួយនេះ កំពុងតែហែល​លេង​ក្នុងទឹកទន្លេជាមួយនិងហ្វូងផ្សោតតូចធំចំនួនជាង ៨ក្បាល​ នៅអន្លង់កោះផ្តៅ ក្នុងស្រុកសំបូរ ខេត្តក្រចេះ។នាយខណ្ឌរដ្ឋបាលជលផល និងជាប្រធានឆ្មាំអភិរក្សលោក​ ម៉ុក ពន្លក បានឲ្យដឹងថា តាម​ការ​ធ្វើជំរឿន សព្វថ្ងៃ សត្វផ្សោតញីឈ្មោលមានចំនួនជិត​ ៩០ក្បាល ​កំពុងតែរស់នៅតាមអន្លង់ នៅតាមដងទន្លេមេគង្គកម្ពុជា។លោកថា សម្រាប់ទន្លេមេគង្គខេត្តក្រចេះ មានអន្លង់ផ្សោតរស់នៅចំនួន៥កន្លែងធំៗ រួមមាន​អន្លង់ខ្សាច់ម្កាក់​ អន្លង់កន្ទុយកោះរងាវ អន្លង់កោផ្តៅ ​អន្លង់កោហដំបង​ និងអងន្លង់កាំពី។លោកនាយខណ្ឌបញ្ជាក់ថា អន្លង់ទាំង៥នេះ​ សព្វថ្ងៃមានសត្វផ្សោតញីឈ្មោល តូច​និង​ធំរស់​នៅចន្លោពី ​៥៥ ទៅ ៦២ក្បាល។ទន្ទឹមនិងស្ថានភាពនៃការបង្កកំណើតនៃពពួក​សត្វផ្សោតទឹក​សាបអ៊ីរ៉ាវាឌី ដែលកំពុងតែ​មាន​កំណើត​កើនឡើងពីមួយឆ្នាំទៅមួយឆ្នាំ ​លោក ម៉ុក ពន្លក ​បានអះអាងថា​ លទ្ធផល​នេះ គឺ​បាន​មកពីចូលរួម​អភិរក្ស​ពីក្រុមអាជ្ញាធរមានសមត្ថកិច្ចពាក់ព័ន្ធ​ក៏ដូចជាពលរដ្ឋ ដែលមិនសំដៅតែទៅ​លើ​ពពួក​សត្វ​ផ្សោតនោះទេ​ គឺសំដៅលើគ្រប់មច្ឆជាតិក្នុងដងទន្លមេគង្គ។ ដើម្បីធានាបានថា ​កូនផ្សោតនេះ ​បន្តរស់រានមានជីវិត ​និង​វិវត្តន៍​ទៅជា​ផ្សោត​ពេញវ័យ​នៅក្នុង​ចំនួន​សរុប រដ្ឋបាលជលផល សូមអំពាវនាវដល់សូមបងប្អូន​ប្រជានេសាទ​មេត្តាចូលរួមការពារ និង​បញ្ឈប់ជាបន្ទាន់នូវរាល់សកម្មភាពខុសច្បាប់​ ពិសេស​ការ​នេសាទ​ដោយប្រើឧបករណ៍មង និង​គ្រឿងឆក់ជាដើម៕ដោយ៖ សេង ម័រ

រដ្ឋមន្រ្តីក្រសួងផែនការចុះត្រួតពិនិត្យការធ្វើជំរឿនសេដ្ឋកិច្ចនៅខេត្តតាកែវ

2022/03/08 02:03:36 pm        758
Facebook Telegram Linkin
តាកែវ៖ ឯកឧត្តម ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ និងជាប្រធានគណៈកម្មាធិការជាតិជំរឿន សេដ្ឋកិច្ចនៅព្រះរាជាណាចក្រកម្ពុជា កាលពីម្សិលមិញ បានអញ្ជើញចុះត្រួតពិនិត្យការធ្វើជំរឿនសេដ្ឋកិច្ច នៅក្នុងក្រុងដូនកែវ ខេត្តតាកែវ។ឯកឧត្តម ឆាយ ថន បានមានប្រសាសន៍ថា ការធ្វើជំរឿនសេដ្ឋកិច្ច​មានសារសំខាន់បំផុត មិនអាច ខ្វះបានដើម្បីឆ្លើយតបសេចក្តីត្រូវការប្រើប្រាស់ទិន្នន័យ សម្រាប់ជាធាតុចូលដ៏សំខាន់ក្នុងការរៀបចំ​គោលនយោបាយអភិវឌ្ឍន៍សេដ្ឋកិច្ច បរិស្ថាន សង្គម វប្បធម៌ និង​សុខុមាលភាព​របស់ប្រជាជន​កម្ពុជាជាពិសេស ​សម្រាប់បំពេញនូវទិន្នន័យក្នុងការត្រួតពិនិត្យ និងវាយតម្លៃ​លើ​សូចនាករ គោលដៅ​និងចំណុចដៅនៃគោលដៅ​អភិវឌ្ឍន៍​ប្រកបដោយចីរភាពកម្ពុជាឆ្នាំ២០១៦-២០៣០ ។ឯកឧត្តម បានបន្តថា ​ការធ្វើជំរឿនសេដ្ឋកិច្ចនៅកម្ពុជាឆ្នាំ២០២២នេះ​ ជាការធ្វើជំរឿនលើកទី២ បន្ទាប់ពីបាន​ធ្វើជំរឿនសហគ្រាសនៅកម្ពុជាឆ្នាំ២០១១ ​និងអង្កេត​ចន្លោះជំរឿន​សហគ្រាស​នៅ​ឆ្នាំ២០១៤ ដែលពេលនោះ ​ការធ្វើជំរឿន ​និងអង្កេតសហគ្រាសនេះ​ ទទួលបានការគាំទ្រថវិកា និង​បច្ចេកទេសពីអង្គការJICA នៃរដ្ឋាភិបាលជប៉ុន ដោយមានការចូលរួមថវិកាបដិភាគ​ពីរាជរដ្ឋាភិបាល​កម្ពុជាផងដែរ ហើយការ ធ្វើជំរឿនសហគ្រាសនៅកម្ពុជាឆ្នាំ២០២២នេះ ត្រូវបានគាំទ្រផ្នែក​ហិរញ្ញវត្ថុ​ទាំង​ស្រុង​ពីរាជរដ្ឋាភិបាលកម្ពុជា។ឯកឧត្តម បានបញ្ជាក់ថា ការធ្វើប្រតិបត្តិការជំរឿននេះ​ មាន​វិសាលភាព​គ្របដណ្តប់​ទូទាំងប្រទេស លើ២៥រាជធានី-ខេត្ត ​ដែលចាប់ផ្តើមពីថ្ងៃទី០១​ ដល់ថ្ងៃទី៣១ ខែមីនា នេះ ដែលមានអង្គភាព​សេដ្ឋកិច្ច​សរុបចំនួនប្រមាណ៧៤ម៉ឺនអង្គភាព ដោយប្រើប្រាស់មន្ត្រីសរុបប្រមាណ​ជាង​ ៥,៨០០នាក់។ឯកឧត្តមទេសរដ្ឋមន្ត្រី ក្នុងនាមជាប្រធានគណៈកម្មាធិការជាតិជំរឿនសេដ្ឋកិច្ច​ នៅព្រះរាជាណា ចក្រកម្ពុជា​ឆ្នាំ២០២១ ​និងក្នុងនាមក្រសួងផែនការ ​ដែល​ជាស្ថាប័នអនុវត្តផ្ទាល់ការងារជំរឿន​សេដ្ឋកិច្ច ​នៅព្រះរាជាណាចក្រកម្ពុជាឆ្នាំ២០២២ ​បានអំពាវនាវដល់ម្ចាស់អង្គភាពសេដ្ឋកិច្ច មាន​ជាអាទិ៍ក្រុមហ៊ុនរោងចក្រ ទាំងនៅក្នុងទាំងនៅក្រៅតំបន់សេដ្ឋកិច្ចពិសេស ក៏ដូចជា​សមាគម​រោងចក្រ​កាត់ដេរនៅកម្ពុជា ​(GMAC) ​សហគ្រាសរដ្ឋ-ឯកជន សិប្បកម្ម អាជីវកម្ម លក់ដុំ លក់រាយ និងសេវាកម្មផ្សេងៗ​គ្រប់ប្រភេទ​ ទាំងអស់ ជួយគាំទ្រ ​សហការ​ និង​ផ្តល់ទិន្នន័យ​ ព័ត៌មាន តាមតារាង​សំណួរដល់​មន្រ្តីជំរឿនសេដ្ឋកិច្ចឱ្យ ​បានត្រឹមត្រូវគ្រប់គ្រាន់​ជាក់លាក់ ​និងទាន់ពេលវេលា។ ទិន្នន័យ ព័ត៌មាន ដែលទទួលបានពីការសម្ភាស ជំរឿន ​ត្រូវបានធានាការ​សម្ងាត់ និង​ប្រើប្រាស់​ក្នុងគោលដៅស្ថិតិតែប៉ុណ្ណោះ៕អត្ថបទ៖ គុជ វិភាគ

គ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចូលរួមយុទ្ធនាការចាក់វ៉ាក់សាំងកូវីដជូនពលរដ្ឋខេត្តស្ទឹងត្រែង

2022/03/08 01:28:49 pm        423
Facebook Telegram Linkin
ស្ទឹងត្រែង៖ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចូលរួមយុទ្ធនាការចាក់វ៉ាក់សាំងបង្ការជំងឺកូវីដ ដូសទី១ ដូសទី២ ដូសទី៣ និងដូសទី៤ ជូនប្រជាពលរដ្ឋខេត្តស្ទឹងត្រែង។នាឱកាសដែលក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចូលរួមចាក់ វ៉ាក់សាំងបង្ការជំងឺ​កូវីដ១៩ និង​ពិនិត្យ​ព្យាបាលជំងឺ ជូនប្រជាពលរដ្ឋក្នុងខេត្តស្ទឹងត្រែង ក្រោមវត្តមានឯកឧត្តម ឡូយ សុផាត ប្រធានគណៈកម្មការ​ទី៣ នៃរដ្ឋសភា និងជាអ្នកតំណាងរាស្ត្រមណ្ឌលខេត្តស្ទឹងត្រែង ឯកឧត្តម ឈាង ឡាក់ ប្រធានក្រុមប្រឹក្សា ខេត្ត, ឯកឧត្តម ស៊ី សួន អភិបាលរងតំណាងឯកឧត្តម ស្វាយ សំអ៊ាង អភិបាលខេត្តស្ទឹងត្រែង។ឯកឧត្តម លេង ផាលី រដ្ឋលេខាធិការក្រសួងផែនការ និងជាប្រធានប្រតិបត្តិក្រុមការងារ​គ្រូពេទ្យ​ស្ម័គ្រ​ចិត្ត​ឯកឧត្តម ហ៊ុន ម៉ានី បានថ្លែងថា ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន១.២៥៨នាក់ បាន​ចុះ​បេសកកម្ម​តាម​​ការ​ឧទ្ទេសនាម​របស់គណៈកម្មកាចំពោះកិច្ចចាក់វ៉ាក់សាំង​បង្ការជំងឺកូវីដ-១៩ គិត​តាំង​ពី​ចាប់​ផ្តើម​ចាក់​វ៉ាក់​សាំង​​ដំបូង​ពីខែមីនា ឆ្នាំ២០២១ មកដល់​បច្ចុប្បន្នជូន​ប្រជាពលរដ្ឋតាមមូលដ្ឋាននានា ក្នុង១២រាជធានី-ខេត្ត ​ដោយ​ចាក់វ៉ាក់សាំងបានចំនួន ៣,៦០១,៣១៤ដូស ​ដោយឥតគិតថវិកា បេសកកម្មឡើយ។នៅក្នុងឱកាសនោះដែរប្រជាពលរដ្ឋរស់នៅក្នុងខេត្តស្ទឹងត្រែង ទាំងអស់ មកទទួលការ​ចាក់វ៉ាក់​សាំងបង្ការ ជំងឺ​កូវីដ-១៩​ និង​ពិនិត្យព្យាបាលជំងឺពីក្រុមការងារគ្រូពេទ្យស្ម័គ្រចិត្តឯកឧត្តម​ ហ៊ុន ម៉ានី បានសំដែងក្តី​សប្បាយរីក​រាយ​យ៉ាង​ខ្លាំង និងសូមថ្លែងអំណរគុណយ៉ាងជ្រាលជ្រៅ​ចំពោះ​សម្ដេច​តេជោ ហ៊ុន សែន ​នាយករដ្ឋមន្រី្ត ​ក្នុង​កាលៈទេសៈ​ដ៏លំបាកនេះ ​សម្ដេចបានស្វះស្វែងរក​ជំនួយ​វ៉ាក់សាំង និង​ទិញវ៉ាក់សាំង ​មក​ចាក់​ជូន​ពួក​គាត់​ដោយ​ឥត​គិត​ថ្លៃ។ជាមួយគ្នានោះដែរ ឯកឧត្តមវេជ្ជបណ្ឌិត អ៊ុង សូវៀត ប្រធាន​មនី្ទរសុខាភិបាលខេត្ត ​និង​ជាអនុប្រធាន​ប្រតិបត្តិ​ទទួល​បន្ទុក​ប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ​ហ៊ុន ម៉ានី ​ខេត្តស្ទឹងត្រែង បាន​លើកឡើងថា បច្ចុប្បន្ន​ក្នុង​ខេត្តស្ទឹងត្រែង ​មានកន្លែងចាក់វ៉ាក់សាំងបង្ការជំងឺកូវីដ១៩ ជូន​ប្រជាពលរដ្ឋចំនួន ៩ទីតាំង ​ជាពិសេស​ក្រុម​ការងារ​គ្រូពេទ្យ​ចល័តចំនួន ​៦ក្រុម ចុះទៅដល់​មូលដ្ឋានភូមិ ឃុំ ស្រុក របស់ប្រជាពលរដ្ឋរស់នៅដាច់ស្រយាល ដែល​មិនអាចធ្វើដំណើរ​មកទទួលចាក់វ៉ាក់សាំងបាន គឺក្រុមគ្រូពេទ្យចុះទៅចាក់វ៉ាក់សាំងជូនដល់ខ្នងផ្ទះតែម្តង។ដោយឡែកពាក់ព័ន្ធបញ្ហាកូវីដវិញ ឯកឧត្តម ប្រធានមនី្ទរសុខាភិបាលខេត្តបញ្ជាក់ថា ក្នុងខេត្តស្ទឹងត្រែង​បាន​រក​ឃើញ​មេរោគកូវីដ១៩ ដំបូង គឺនៅថ្ងៃទី១ ខែឧសភា ឆ្នាំ២០២០ ដែល​រហូតមកដល់​បច្ចុប្បន្ននេះ មាន​អ្នក​វិជ្ជមាន​កូវីដ១៩​ ចំនួនជាង១.៨០០នាក់ ​ដែលបានរកឃើញ និងអ្នកជាសៈស្បើយ​ចំនួនជាង ១.៧០០នាក់ និង​ករណី​ស្លាប់​មាន​ចំនួនរហូតទៅ ៣០នាក់ មកដល់ពេលនេះ។ ទន្ទឹមនឹងនោះ​ មានថ្ងៃខ្លះយើងបានរកឃើញអ្នកវិជ្ជមាន​កូវីដ​១៩ ចំនួន៣ករណី​ ថ្ងៃខ្លះចំនួន៥ករណី ហើយ​ករណីទាំងនោះបាន​យក​សំណាក​ទៅវិភាគនៅមនី្ទរពិសោធន៍ តាមរយៈ ​ម៉ាស៊ីនធំ PCR លទ្ធផល​បានបញ្ជាក់ថា ជាប្រភេទមេរោគកូវីដ១៩ បំប្លែងថ្មី អូមីក្រុង​ មកដល់ថ្ងៃនេះ​ មាន​ចំនួន ៧ករណី។ ក្នុងនោះខេត្តស្ទឹងត្រែង មានមណ្ឌលព្យាបាលកូវីដ១៩ កម្រិតស្រាល ​និងធ្ងន់ចំនួន ១កន្លែង ហើយ​យើងមានក្រុមឆ្លើយតប បន្ទាប់ របស់មនី្ទរសុខាភិបាល ដែលយើង​កំពុងតែ​អនុវត្តន៍​ជា​ប្រចាំ​នៅ​ក្នុង​ការ​ផ្សព្វផ្សាយ និងស្រាវជ្រាវផងដែរ៕អត្ថបទ រដ្ឋា

ស្រ្តីឆ្នើមៗដែលមានឥទ្ធិពលក្នុងការចូលរួមធ្វើគោលនយោបាយថ្នាក់ជាតិ

2022/03/08 01:11:06 pm        640
Facebook Telegram Linkin
ភ្នំពេញ៖ ស្របពេលថ្ងៃនេះ ជាទិវាសិទ្ធិនារីអន្តរជាតិលើកទី១១១ មានថ្នាក់ដឹកជាស្រ្តីឆ្នើមជាច្រើន បានចូលរួមការធ្វើគោលនយោបាយថ្នាក់ជាតិ ដើម្បីឲ្យស្រ្តីគ្រប់រូបរួមចំណែកក្នុងការអភិវឌ្ឍជាតិ។ ក្នុងឱកាសអបអរសាទរទិវាសិទ្ធិនារីអន្តរជាតិ៨មីនា ខួបលើកទី១១១ ក្រោមប្រធានបទ «សមភាពយេនឌ័រថ្ងៃនេះ ដើម្បីចីរភាពនាពេលអនាគត» រាជរដ្ឋាភិបាលតាមរយៈថ្នាក់ដឹកនាំ​សំខាន់ៗ​ជាស្រ្តី ​បានជំរុញដល់ស្រ្តីគ្រប់រូបឲ្យចូលរួមការអភិវឌ្ឍជាតិ ជាពិសេសការចូលរួមធ្វើ​គោល​នយោបាយថ្នាក់ជាតិ។ ស្រ្តីឆ្នើមៗរបស់កម្ពុជា ​ដែល​លេចធ្លោ​និង​មាន​ឥទ្ធិពល​ក្នុងការធ្វើសេចក្តីសម្រេច​ចិត្តទាក់ទង​នឹង​គោល​នយោបាយ​ជាតិធំៗ​ មានដូចជា ​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាក​បាទ​ក្រហម​កម្ពុជា​និងជាស្រ្តីទី១របស់កម្ពុជា, លោកជំទាវ​កិត្តិសង្គហបណ្ឌិត​ ម៉ែន សំអន ឧបនាយក​រដ្ឋមន្រ្តី ​រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា ​និងអធិការកិច្ច និង​លោកជំទាវ​កិត្តិសង្គហបណ្ឌិត ឃួន សុដារី ​អនុប្រធានទី២​ រដ្ឋសភាកម្ពុជាជាដើម។ ឥស្សរជនជាស្រ្តីទាំងនេះ ​បានក្លាយ​ជាថ្នាក់ដឹកនាំ​គំរូ​សម្រាប់​ស្រ្តីក្នុងការជំរុញ​គោល​នយោបាយ​គាំទ្រ​សេមភាព​យេនឌ័រ។លោកជំទាវ ហ៊ុន ដានី រដ្ឋលេខាធិការក្រសួងទេសចរណ៍ ប្រាប់BTV News ថា រាជរដ្ឋាភិបាលកម្ពុជា​ក្រោមការ​ដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តី បានដាក់ចេញនូវយុទ្ធសាស្ត្រ​ចតុកោណ​ ពាក់ព័ន្ធនឹងគោលនយោបាយសមភាពយេនឌ័រ ​ដោយបានផ្តល់​នូវតម្លៃនិង​សារៈសំខាន់​នៃការចូលរួមរបស់ស្រ្តីនៅគ្រប់ដំណើរការ​នៃការអភិវឌ្ឍរបស់ជាតិ។ លោកជំទាវ បន្តថា ក្នុងនាមលោកជំទាវជាស្រ្តីមួយរូប​ដែលបម្រើក្នុងវិស័យរដ្ឋ​បានមើលឃើញ​ពី​ការ​យកចិត្តទុកដាក់ ​និងការលើកទឹកពីរាជរដ្ឋាភិបាលចំពោះស្រ្តីទូទៅ។ ជាមួយគ្នានេះ ស្រ្តីជាមន្រ្តីជាន់ខ្ពស់មួយរូបទៀតគឺ លោកជំទាវ យក់ សម្បត្តិ រដ្ឋលេខាធិការក្រសួង​សុខាភិបាល ​បានលើកទឹកចិត្តដល់ស្រ្តីត្រូវមានឧត្តមគតិផ្ទាល់ខ្លួន ដើម្បីចូលរួមធ្វើកិច្ចការណា​ដែល​បុរសធ្វើបាននោះស្រ្តីក៏ធ្វើបានដូចគ្នា។មកទល់ពេលបច្ចុប្បន្ន រាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តី​នៃកម្ពុជា បានចេញនូវយុទ្ធសាស្ត្រចតុកោណ «ដើម្បីកំណើនការងារសមធម៌ និង​ប្រសិទ្ធភាព​នៅ​កម្ពុជា» និងគោលនយោបាយសមភាពយេនឌ័រ ដោយបានផ្តល់នូវតម្លៃនិងសារៈសំខាន់នៃការ​ចូល​រួម​របស់ស្រ្តីនៅគ្រប់ដំណើរការនៃការអភិវឌ្ឍ ​និងបានចាត់ទុកថា ​«ស្ត្រី ​គឺជាឆ្អឹងខ្នងនៃសេដ្ឋកិច្ច និង​សង្គមជាតិ»៕អត្ថបទ៖ សេក ឧត្តម

បណ្ដាញសង្គម

ព័ត៌មានថ្មីៗ

ប្រេងឡើងថ្លៃទៀតហើយ ក្រោយមានរបាយការណ៍អំពីទណ្ឌកម្មថ្មីរបស់សហរដ្ឋអាមេរិក លើរុស្ស៊ី
12/18/2025 12:12 PM
Facebook Telegram Linkin
អតិផរណានៅចក្រភពអង់គ្លេសធ្លាក់ចុះជាងការរំពឹងទុកដល់៣,២% ក្នុងខែធ្នូ២០២៥នេះ
12/18/2025 12:12 PM
Facebook Telegram Linkin
កម្ពុជាទទួលស្គាល់ចំពោះការរួមចំណែករបស់គម្រោងបោសសម្អាតមីន ដើម្បីលទ្ធផល ក្នុងរយៈពេល៥ឆ្នាំចុងក្រោយ សម្រាប់កម្ពុជា ក្នុងការកាត់បន្ថយគ្រោះថ្នាក់ ជំរុញឱ្យមានការអភិវឌ្ឍ និងលើកកម្ពស់សេដ្ឋកិច្ចសង្គម
12/18/2025 12:12 PM
Facebook Telegram Linkin
ប្រមុខUN ជំរុញឱ្យមានភាពអត់ធ្មត់ខ្ពស់នៅយេម៉ែនបន្ទាប់ពីការរុលទៅមុខរបស់ក្រុមផ្តាច់ខ្លួន
12/18/2025 12:12 PM
Facebook Telegram Linkin
លោកZelenskyy ប្រាប់អឺរ៉ុបថា ប្រើប្រាស់ទ្រព្យសកម្មដែលត្រូវបានបង្កក ដើម្បីបញ្ចប់ការស្រេកឃ្លានសង្គ្រាមរបស់រុស្ស៊ី
12/18/2025 12:12 PM
Facebook Telegram Linkin
លោក Netanyahu៖ អ៊ីស្រាអែល អនុម័តកិច្ចព្រមព្រៀងឧស្ម័នធម្មជាតិជាមួយអេហ្ស៊ីប
12/18/2025 12:12 PM
Facebook Telegram Linkin
មេដឹកនាំអឺរ៉ុបនិងតំបន់បាល់កង់ខាងលិច ជួបប្រជុំក្នុងទីក្រុងព្រុចសែល ដើម្បីពិភាក្សាអំពីការពង្រីកខ្លួន
12/18/2025 12:12 PM
Facebook Telegram Linkin
ប្រទេសចិន បញ្ជាក់ជាថ្មីនូវការជំទាស់លើទំនាក់ទំនងយោធាអាមេរិក ជាមួយតំបន់តៃវ៉ាន់
12/18/2025 12:12 PM
Facebook Telegram Linkin
អ្នកគាំទ្ររដ្ឋាភិបាលហុងឌុយរ៉ាស តវ៉ាប្រឆាំងការជ្រៀតជ្រែកពីបរទេស ខណៈការរាប់សន្លឹកឆ្នោតអូសបន្លាយពេល
12/18/2025 12:12 PM
Facebook Telegram Linkin
ប្រេស៊ីល គំរាមដើរចេញ បើមានការពន្យារពេលបន្ថែមទៀតកិច្ចព្រមព្រៀងពាណិជ្ជកម្មអឺរ៉ុប-ទីផ្សាររួមអាមេរិកឡាទីន
12/18/2025 11:12 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.