នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី៖គិតត្រឹមខែមេសាឆ្នាំនេះយុវជនមកពីគ្រួសារក្រីក្រ និងងាយរងហានិភ័យចំនួន ២៧,១ម៉ឺននាក់ទទួលបានការបណ្ដុះបណ្ដាលជំនាញវិជ្ជាជីវៈ
សម្ដេ​ចតេជោ ហ៊ុន សែន៖«២០ មិថុនា ១៩៧៧ ជីវិតរបស់ខ្ញុំ និងភរិយាពេលនោះជួបជាមួយគ្រោះថ្នាក់ និងលំបាកវេទនាខ្លាំងណាស់»
សម្តេចតេជោ ហ៊ុន សែន ថ្លែងថា អាវក្រោះ និងសម្ភារយោធាម៉ាក DSS សុទ្ធតែមានគុណភាពហើយអាវការពារនេះនាយករដ្ឋមន្រ្តីបានសាករួចហើយ
សម្ដេចតេជោ ហ៊ុន សែន អញ្ជើញពិនិត្យមើលរោងចក្រ ផលិតសម្ភារៈយោធា DSS និងសំណេះសំណាលជាមួយកម្មករ កម្មការិនី

នយោបាយ​ និង ការអភិវឌ្ឍន៍

បឋម​សិក្សាព្រះនរោត្តម ​អាចបើកវិញចុងសប្ដាហ៍នេះ ​តែថ្នាក់រៀននៃសាលាខ្លះ ត្រូវបិទ​បណ្ដោះ​អាសន្ន

2022/01/24 12:13:22 pm        1717
Facebook Telegram Linkin
ភ្នំពេញ៖ ថ្នាក់រៀននៅតាមសាលាមួយចំនួន ក្នុងរាជធានីភ្នំពេញ ត្រូវបានបិទជាបណ្ដោះអាសន្ន ដោយសារពាក់ ព័ន្ធនឹងបញ្ហាជំងឺកូវីដ-១៩ ខណៈសាលាបឋមសិក្សាព្រះនរោត្តម ដែលមានសិស្សវិជ្ជមានប្រភេទអូមីក្រុង មានការធូរស្រាល ហើយគ្រោងនឹងបើកឲ្យសិស្សចូលរៀនឡើងវិញ នៅចុងសប្ដាហ៍នេះ ។លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ បានប្រាប់BTV នៅ ព្រឹកថ្ងៃទី២៤ ខែមករានេះថា គិតត្រឹមសប្ដាហ៍មុន នៅបឋមសិស្សព្រះនរោត្តម មានសិស្សឆ្លងកូវីដ-១៩ ចំនួន៧នាក់ ក្នុងនោះប្រភេទអូមីក្រុង ចំនួន៥នាក់ ហើយរហូតមកដល់ពេលនេះ ស្ថានភាពបានធូរស្រាល អស់ហើយ ។លោក បានបន្តថា សម្រាប់សាលាបឋមសិក្សាព្រះនរោត្តម បន្ទាប់ពីរកឃើញសិស្សវិជ្ជមាន ប្រភេទ អូមីក្រុង ត្រូវបានបិទបណ្ដោះអាសន្នទាំងស្រុង តែគ្រោងនឹងបើកដំណើរការនៅចុងសប្ដាហ៍នេះវិញ ក្រោយពីមានការធូរស្រាលឡើងវិញ ហើយនៅសាលាផ្សេងទៀត ពាក់ព័ន្ធនឹងកូវីដ-១៩ដែរនោះ គឺបិទតែថ្នាក់រៀន ប៉ុណ្ណោះ ។គិតត្រឹមថ្ងៃទី២៣ ខែមករានេះកម្ពុជា បានរកឃើញអ្នកវិជ្ជមានកូវីដ-១៩​ អូមីក្រុង ឆ្លងនៅក្នុង សហគមន៍​ជិត ២០០ករណីហើយ ប៉ុន្តែមិនទាន់មានករណីស្លាប់ដោយសារប្រភេទបំប្លែងថ្មីនេះទេ៕អត្ថបទ៖ បាន សុខរិទ្ធ

រាជរដ្ឋាភិបាលកម្ពុជា បន្តផ្ដល់ថវិកាសម្រាប់កម្មវិធីជំនួយសង្គមដល់គ្រួសារក្រីក្រអំឡុងកូវីដ១៩ ជុំទី៨

2022/01/24 12:04:30 pm        595
Facebook Telegram Linkin
ភ្នំពេញ៖ រាជរដ្ឋាភិបាលកម្ពុជាក្នុងឆ្នាំថ្មី២០២២នេះ គឺនៅតែបន្តឧបត្ថម្ភថវិកាជាប្រចាំខែ ជូនគ្រួសារក្រីក្រដែលមានបណ្ណសមធម៌ (បណ្ណក្រីក្រ) ទូទាំងប្រទេស ទោះស្ថានការណ៍កូវីដ-១៩ មានភាពធូរស្រាល និងមានការបើកប្រទេសឡើងវិញ លើគ្រប់វិស័យយ៉ាងណាក្ដី។ សម្រាប់ការចាប់ផ្ដើមឆ្នាំថ្មីនេះ គឺរាជរដ្ឋាភិបាលកម្ពុជា សម្រេចបន្តកម្មវិធីនេះ ក្នុងរយៈពេល៣ខែ គឺចាប់ពីខែមករា ដល់មីនា។រាជរដ្ឋាភិបាលកម្ពុជាក្នុងឆ្នាំថ្មី ២០២២នេះ បានសម្រេចបន្ត ការអនុវត្តកម្មវិធីឧបត្ថម្ភសាច់ប្រាក់​ជូន​គ្រួសារក្រីក្រ និងងាយរងគ្រោះក្នុងកំឡុងពេលប្រយុទ្ធប្រឆាំងកូវីដ-១៩​ សម្រាប់ជុំទី ៨ ដែលមាន​រយៈពេល៣ខែចាប់ពីខែមករា ដល់ខែមីនាឆ្នាំ២០២២។ ការសម្រេចបន្តនេះ គឺអនុញ្ញាតឱ្យគ្រួសារក្រីក្រ ដែលមានបណ្ណក្រីក្រ ទាំងប្រភេទក្រ ១ និងក្រ ២ អាចទៅបើកសាច់ប្រាក់នៅបញ្ជរវីង ដើម្បីយកមកផ្គត់ផ្គង់ជីវភាព ទៅតាមចំនួនខែដែល​បាន​កំណត់​ក្នុងជុំទី៨នេះ។សម្រាប់គ្រួសារក្រីក្រ ដែលបាននឹងកំពុងទទួលបានថវិកាជាប្រចាំខែ ពីរាជរដ្ឋាភិបាល លើកឡើងថា ថវិកានេះ គឺពិតជារួមចំណែកជួយសម្រួលជីវភាពគ្រួសារឱ្យមានភាពប្រសើរ។ ពួកគាត់​អាចយកមក​ប្រើប្រាស់​សម្រាប់ ​ការ​ចំណាយ​លើម្ហូបចំណី ​និងសម្រាប់ថ្នាំព្យាបាល​ជំងឺ​ប្រចាំ​កាយ។សម្រាប់​ការ​បន្តផ្ដល់ថវិកា​ជូនគ្រួសារក្រីក្រនេះ ​លោក លាស់ ​សុខលឹម ជាចៅសង្កាត់រងជើងឯក លើកឡើងថា ​សង្កាត់​មានគ្រួសារក្រីក្រជាង ២០០ គ្រួសារដែលបាននឹងកំពុងទទួល​បានថវិកា​ជា​រៀងរាល់​ខែ​ ពីរាជរដ្ឋាភិបាលកម្ពុជា។ លោក បន្តថា ក្នុងនាមជាមន្រ្តីមូលដ្ឋាន ​គឺលោកនិងក្រុមការងារ​ក៏នៅតែពិនិត្យមើលជីវភាព និង​ស្វាគមន៍​ចំពោះការដាក់ពាក្យស្នើសុំបណ្ណក្រីក្រថ្មីផងដែរ។ការឧបត្ថម្ភសាច់ប្រាក់ជូនគ្រួសារក្រីក្រ ក្នុងក្របខណ្ឌទូទាំងប្រទេស គិតត្រឹមជុំទី ៧ លើកទី ២ ដែលបានបិទបញ្ចប់​កាលពីថ្ងៃទី ២៤ ខែធ្នូ ឆ្នាំ២០២១ គឺមានគ្រួសារក្រីក្រទទួលផលសរុបចំនួន ៦៨៤ ៧៧១ គ្រួសារ។ ​បើគិតចាប់ពីការចាប់ ​ការអនុវត្តកម្មវិធីពីថ្ងៃទី ២៥ ខែមិថុនា​ ឆ្នាំ ២០២០ ដល់ថ្ងៃទី ២៤ខែ ធ្នូ ឆ្នាំ ២០២១​ គឺរាជរដ្ឋាភិបាលបានចំណាយថវិកាជាង ៥៣១ លានដុល្លារ៕អត្ថបទ៖ គឹមហុក

លោកជំទាវ ហ៊ុន ម៉ាណា អញ្ជើញប្រគល់ផ្ទះទេវតាចំនួន០១ខ្នង ជូនដល់ពលរដ្ឋក្រីក្រ និងសួរសុខទុក្ខដល់សិស្សពិការ គ ថ្លង់ និងប្រគេនទេយ្យវត្ថុដល់វត្តចំនួន០៦ក្នុងខេត្តកំពង់ចាម

2022/01/23 04:48:22 pm        818
Facebook Telegram Linkin
កំពង់ចាម៖ នៅព្រឹកថ្ងៃអាទិត្យទី២៣ ខែមករា ឆ្នាំ២០២២នេះ លោកជំទាវ ហ៊ុន ម៉ាណា អគ្គនាយិកា វិទ្យុ និងទូរទស្សន៍បាយ័ន និងជាប្រធានកម្មវិធីផ្ទះទេវតា បានដឹកនាំក្រុមការងារ អញ្ជើញចុះប្រគល់ផ្ទះទេវតាចំនួន០១ខ្នង មានទំហំ ៨គុណ១២ម៉ែត្រ ជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រគល់ជូនលោក អៀង សុភក្តិ អាយុ៣៣ឆ្នាំ និងប្រពន្ធឈ្មោះ ហៀង ហុង អាយុ៣១ឆ្នាំ រស់នៅភូមិថ្មពូន ឃុំថ្មពូន ស្រុកព្រៃឈរ ខេត្តកំពង់ចាម ។ លោកជាជនពិការជើងខាងស្តាំ និងដាច់អវយវៈខាងក្រោម និងមានកូនក្នុងបន្ទុកគ្រួសារចំនួន៣នាក់។លោកជំទាវ ហ៊ុន ម៉ាណា បាននាំយកនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាល សម្តេចទាំងពីរតែងគិត​គូរ​អំពីសុខទុក្ខដល់ពុកម៉ែ បងប្អូនគ្រប់ទីកន្លែង និង គ្រប់ពេលវេលា។បន្ថែមលើអំណោយផ្ទះខាងលើ លោកជំទាវ ក៏បានផ្តល់ជូនគ្រួសារនេះ នូវអំណោយសម្តេចតេជោ និងសម្តេចកិត្តិព្រឹទ្ធបណ្ឌិត បន្ថែមទៀតផងដែរ រួមមាន សម្ភារៈប្រើប្រាស់ក្នុងផ្ទះ គ្រឿងឧបភោគ-បរិភោគ ជាច្រើនមុខ និងថវិកាមួយចំនួនទៀត។ ជាមួយគ្នានេះ លោកជំទាវ និងក្រុមការងារ ក៏បានចែកអំណោយ ជូនដល់លោកយាយ លោកតា ដែលបានចូលរួមពិធីប្រគល់ផ្ទះទេវតានេះផងដែរ។ចប់ពិធីប្រគល់ផ្ទះទេវតា លោកជំទាវក៏បានអញ្ជើញមក សួរសុខទុក្ខ និងផ្ដល់អំណោយ​របស់​លោកជំទាវ និងឯកឧត្តម ឌី វិជ្ជា ផ្ទាល់ ជូនចំពោះ សិស្សពិការ គ ថ្លង់ នៃវិទ្យាល័យអប់រំ​ពិសេស​កំពង់ចាម (អតីតអង្គការគ្រួសារថ្មី) ខេត្តកំពង់ចាម ។លោកជំទាវ បានរៀបចំអាហារថ្ងៃត្រង់មួយពេលសម្រាប់សិស្សពិការ គ ថ្លង់ទាំងអស់ ព្រមទាំងចែក​នូវកាតាបម្នាក់១ និងមានសម្ភារៈសិក្សាមួយចំនួនផងដែរ។ នៅវិទ្យាល័យអប់រំពិសេសនេះ មានសិស្សពិការភ្នែក និង គ ថ្លង់ ចំនួន១៧៥នាក់ ស្រី៧៥នាក់ បុគ្គលិក៣៣នាក់។ ហើយ អំណោយដែលផ្ដល់ជូនមណ្ឌលកុមារកំព្រានេះរួមមាន៖១-អង្ករ៦បេ(៥០០Kg)២-ត្រីខ៣០យួរ(៣០០កំប៉ុង)៣-មីចំនួន៨កេសធំ (៤៨កេសតូច)៤-ទឹកដោះគោខាប់៣កេស(១៤៤កំប៉ុង)៥-ត្រីងៀត៧គីឡូ៦-សាច់ក្រក៧គីឡូ៧-សាច់ជ្រូកផាត់៧គីឡូ៨-ប៊ីចេង៥គីឡូ៩-ទឹកត្រី១០យួរ(៦០ដប)១៩-ទឹកស៊ីអ៊ីវ១០យួរ(៦០ដប)១១-ម៉ាស៣០ប្រអប់( ១៥០០ម៉ាស)១២-ថ្នាំវីតាមីនសេ(២០៨ទីប)១៣-សាប៊ូ ២០៨ដុំ១៤- កន្សែងជូនខ្លួន ១៧៥កន្សែង១៥- ច្រាស និងថ្នាំដុសធ្មេញ២០៨ឈុត ១៦- ទឹកសុទ្ធ អារុណា ៥០កេស ១៧- កាបូបសិក្សា១៧៥កាបូប ១៨- កញ្ចប់សម្រាប់សិស្សអាយុលើស១៨ឆ្នាំ ចំនួន៤៤នាក់១៩-ថវិកាក្នុងកញ្ចក់សិស្សអាយុលើស១៨ឆ្នាំក្នុងម្នាក់ ៥០ដុល្លារ ២០- ថវិការសម្រាប់សាលា ២លានរៀល។ បន្ទាប់មកនៅថ្ងៃដដែលនេះផងដែរ លោកជំទាវក៏បានអញ្ជើញទៅ ប្រគេនទេយ្យវត្ថុ ដែល​មានស្បៀងអាហារ គ្រឿងឧបភោគ-បរិភោគ និងសម្ភារៈប្រើប្រាស់ជាច្រើនមុខរបស់អ្នកឧកញ៉ា ព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី ប្រគេនដល់ដល់វត្តចំនួន៦ នៅក្នុងខេត្តកំពង់ចាមនេះ ដែលពិធីត្រូវបានធ្វើរួមគ្នានៅវត្ត សុវណ្ណ រង្សីស្ថិតក្នុងភូមិអង្គរបានទី៦ ឃុំអង្គរបាន ស្រុកកងមាស ខេត្តកំពង់ចាម ។ លោកជំទាវ បានមានប្រសាសន៍ថា ជា​និច្ចកាលសម្តេចទាំងទ្វេតែងតែ​គិតគូរ​អំពីទុក្ខលំបាក​របស់​ព្រះសង្ឃគ្រប់ព្រះអង្គតាមទីអារាមនានាក្នុងប្រទេសកម្ពុជា ហើយការនាំយក​ទេយ្យវត្ថុមកប្រគេន​ជូននៅពេលនេះ​ អាចជួយសម្រាលនូវការលំបាករបស់ព្រះសង្ឃគ្រប់អង្គបានមួយរយៈផងដែរ ជាពិសេស នៅក្នុងវិបត្តិកូវីដ១៩នេះ ។ ទេយ្យវត្ថុក្នុងមួយវត្តទទួលបាន៖០១-អង្ករ១តោន ០២-ត្រីខ ចំនួន១កេស មាន១០យួរ០៣-មីចំនួន៥កេសធំ(៣០កេសតូច)០៤- ត្រីងៀតចំនួន ១០ គីឡូ០៥- សាច់ក្រកចំនួន១០ គីឡូ០៦- សាច់ជ្រូផាត់ចំនួន១០ គីឡូ០៧- ទឹកដោះគោខាប់ ចំនួន២កេស ០៨- កាហ្វេ ចំនួន ៥កញ្ចប់ធំ ០៩- តែ ចំនួន ២គីឡូក្រាម១០- ស្ករសចំនួន១បេ ១១- អំបិលចំនួន១បេ១២- ប៊ីចេងចំនួន១បេ ១៣- ទឹកត្រីចំនួន៥យួ ១៤- ទឹកស៊ីអ៊ីវចំនួន៥យួរ ១៥- សាប៊ូដុំ ចំនួន ៣០ ដុំតូច១៦- ច្រាស និងថ្នាំដុសធ្មេញ ចំនួន១០០ឈុត១៧- វីតាមីនសេ ចំនួន ១០ ប្រអប់ ១៨- ប្រេងកូឡា ចំនួន ៥ ដុំ ១៩- ប្រេងខ្យល់ ចំនួន៥ដុំ ២០- ម៉ាស ចំនួន២០ប្រអប់ មាន១០០០ម៉ាស ២១- អាល់កុលសម្លាប់មេរោគ ចំនួន៤កាន ២២- ដបសំរាប់ដាក់អាល់កុល ចំនួន១០ ដប២៣- ស្លាដក់ចំនួន៤៩២៤- ថវិកា ចំនួន២លានរៀល៕

ឯកឧត្តមបណ្ឌិត ហ៊ុន ម៉ាណែត និងលោកជំទាវ ផ្តល់សម្ភារៈបរិក្ខារពេទ្យជូនរដ្ឋបាលខេត្តកោះកុង

2022/01/23 10:39:31 am        919
Facebook Telegram Linkin
កោះកុង៖ ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ផ្តល់សម្ភារៈបរិក្ខារពេទ្យជូនរដ្ឋបាលខេត្តកោះកុង ដើម្បីបម្រើដល់ជួយសង្រ្គោះអ្នកជំងឺនៅតាមមន្ទីរពេទ្យទូទាំងខេត្ត។រសៀលថ្ងៃទី២២ ខែមករា ឆ្នាំ២០២២ ឯកឧត្តម ហោ អូន តំណាងឯកឧត្តមបណ្ឌិត ហ៊ុន ម៉ាណែត និងលោកជំទាវ បាននាំយកសម្ភារៈបរិក្ខារពេទ្យរួមមាន៖ ទឹកថ្នា សម្លាប់មេរោគចំនួន ៩៦០លីត្រ ស្រោមដៃចំនួន ១ម៉ឺនគូរ អាវក្រណាត់សម្រាប់អ្នកជំងឺចំនួន ១ម៉ឺនអាវ ឈើច្រត់ជនពិការចំនួន៥គូរ ជើងរៀនដើរមានកង់ចំនួន ៥គ្រឿង ជើងរៀនដើរគ្មានកង់ចំនួន ២០គ្រឿង ដើម្បី​ទុកជូន​រដ្ឋបាល​ខេត្តកោះកុង។ឯកឧត្តម ហោ អូន មានប្រសាសន៍ថា ដោយមានការយកចិត្តទុក្ខដាក់ខ្ពស់ពីឯកឧត្តមបណ្ឌិត ហ៊ុន ម៉ាណែត និងលោកជំទាវ លើវិស័យសុខាភិបាលមានតម្រូវការចាំបាច់ ទើប​ឯកឧត្តម​ឧបត្ថម្ភ​ជា​សម្ភារៈវិស័យ​ទាំងនេះឡើង ក្នុងគោល​បំណង​សម្រួលដល់​ការ​ជួយ​សង្រ្គោះ​ព្យាបាល​អ្នកជំងឺ​នៅ​តាម​បណ្តាមន្ទីរពេទ្យនានា​ក្នុងខេត្តកោះកុង។បន្ទាប់ប្រគល់ និងទទួលរួចលោកជំទាវ មិថុនា ភូថង អភិបាលខេត្តកោះកុង ក៏​បាន​សម្តែងអំណ​អរគុណ​យ៉ាង​ជ្រាលជ្រៅ​ជូន​ចំពោះ​ឯកឧត្តម ហ៊ុន ម៉ាណែត ​និងលោកជំទាវ ដែល​បាន​គិតគូរ​ខ្ពស់​សេចក្តីខាងផ្នែកសង្រ្គោះព្យាបាលដល់អ្នកជំងឺនៅក្នុងខេត្ត។លោកជំទាវ ចាត់ទុកថា នេះ​សកម្មភាព​ដ៏​ប្រពៃ ​សម្រាប់​លើកកម្ពស់វិស័យសុខាភិបាល​បង្កើន​ទំនុក​ចិត្តពីអ្នកជំងឺ​ ក៏ដូចជា​ប្រជាពលរដ្ឋ​មក​ទទួល​សេវា​សាធារណៈទូទៅ។លោកជំទាវ នឹងរៀបចំបែងចែកគ្រឿង​សម្ភារៈ​សុខាភិបាល​ទាំងនេះ​ ប្រកប​ដោយ​តម្លាភាព តាម​តម្រូវ​ការខ្វះខាតជាក់ស្តែង៕អត្ថបទ៖ ឈឹម មករា

មន្រី្តជាន់ខ្ពស់ក្រសួងសុខាភិបាល ស្នើមិត្តចិន​ជួយ​បណ្តុះ​បណ្តាល​ធនធាន​មនុស្ស​លើ​ផ្នែកវះកាត់​បេះដូង​ និងសួត

2022/01/22 05:40:50 pm        997
Facebook Telegram Linkin
ភ្នំពេញ ៖ លោកជំទាវវេជ្ជបណ្ឌិត យក់ សម្បតិ្ត រដ្ឋលេខាធិការក្រសួងសុខាភិបាល បានស្នើមិត្តចិន បន្តជួយបំពេញបន្ថែមហេដ្ឋារចនាសម្ព័ន្ធ និងការបណ្តុះបណ្តាលធនធានមនុស្សលើផ្នែក វះកាត់បេះដូង និងសួត នៅមនី្ទរពេទ្យមិត្តភាពកម្ពុជា-ចិន ព្រះកុសុមៈ។ការថ្លែងរបស់លោកជំទាវវេជ្ជបណ្ឌិត យក់ សម្បិត្ត យ៉ាងដូច្នេះនាឱកាសដែលលោកជំទាវ តំណាងឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ជាមួយឯកឧត្តម វ៉ាង វិនធៀន ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំកម្ពុជា រួមជាមួយលោកសាស្រ្តាចារ្យ Huang Luqi ស្នងការរងរដ្ឋបាលជាតិ វេជ្ជសាស្រ្តបុរាណចិន និងជា​ប្រធានបណ្ឌិតសភាចិន នៃវិទ្យាសាស្រ្តវេជ្ជសាស្រ្តចិន បានអញ្ជើញចុះពិនិត្យមន្ទីរពេទ្យ​មិត្តភាព​កម្ពុជា-ចិន ព្រះកុសុមៈ ដើម្បីពិនិត្យលទ្ធភាពបង្កើតមណ្ឌលព្យាបាលជំងឺកូវីដ-១៩ ដោយប្រើ​វេជ្ជសាស្រ្តបុរាណចិន​ និងពង្រឹងសមត្ថភាពវិស័យវេជ្ជសាស្ត្របុរាណកម្ពុជា នៅថ្ងៃទី២២ ខែមករា ឆ្នាំ២០២២នេះ។លោកជំទាវ វេជ្ជបណ្ឌិត យក់ សម្បតិ្ត ក៏បានស្វាគមន៍ និងគាំទ្រយ៉ាងពេញទំហឹងនូវកិច្ច​សហប្រតិបត្តិការថ្មីនេះ ​ព្រមទាំងបានស្នើដល់ភាគីចិន តាមរយៈលោកឯកអគ្គរដ្ឋទូត ជួយបំពេញ​បន្ថែម​ហេដ្ឋារចនាសម្ព័ន្ធ និងការបណ្តុះបណ្តាលធនធានមនុស្សផ្នែកវះកាត់បេះដូង និងសួត នៅមន្ទីរពេទ្យនេះ។ជាការឆ្លើយតបឯកឧត្តម វ៉ាង វិនធៀន ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិនប្រចាំកម្ពុជា បានទទួលយកសំណើរបស់លោកជំទាវ យក់ សម្បតិ្ត រដ្ឋលេខាធិការ ដើម្បីជួយអភិវឌ្ឍវិស័យសុខាភិបាល នៅព្រះរាជាណាចក្រកម្ពុជា ជាពិសេស​គឺ​មន្ទីរពេទ្យមិត្តភាពកម្ពុជា-ចិន ព្រះកុសុមៈឱ្យឈានមុខគេក្នុងបច្ចេកវិទ្យាវេជ្ជសាស្ត្រ។ជាមួយគ្នានោះដែរ លោកជំទាវ រដ្ឋលេខាធិការក្រសួងសុខាភិបាល បានលើកឡើងពី ដំណើរ​ទស្សនកិច្ច​របស់រដ្ឋបាលជាតិវេជ្ជសាស្ត្របុរាណចិន មិនត្រឹមតែជួយពង្រឹងកិច្ច​សហប្រតិបត្តិការ​យ៉ាងជិតស្និទ្ធ រវាងប្រទេសទាំងពីរ ក្នុងការងារប្រយុទ្ធប្រឆាំងជំងឺកូវីដ-១៩ ប៉ុណ្ណោះទេ ប៉ុន្តែថែមទាំង​សិក្សាស្វែងយល់ពីគ្នាទៅវិញទៅមក លើវិស័យឱសថបុរាណ ដើម្បីជំរុញវឌ្ឍនភាព​វិស័យ​សុខាភិបាល​ នៃប្រទេសទាំងពីរ។ ទន្ទឹមនឹងនោះលោកសាស្រ្តាចារ្យ Huang Luqi បានសម្តែងនូវការកោតសរសើរចំពោះកិច្ច​សហប្រតិបត្តិការរវាងកម្ពុជា-ចិន លើវិស័យសុខាភិបាល ជាពិសេសអគារមន្ទីរពេទ្យដ៏ធំ​ស្គឹមស្គៃ ដែល​បំពាក់ដោយសម្ភារៈបរិក្ខារវេជ្ជសាស្រ្តដ៏ទំនើបដំបូងគេនៅកម្ពុជា។រដ្ឋបាលជាតិវេជ្ជសាស្ត្របុរាណចិន នឹងចុះហត្ថលេខាលើកិច្ចព្រមព្រៀង ជាមួយក្រសួង​សុខាភិបាល​កម្ពុជា ​ស្តីពីការបញ្ជូនក្រុម​វេជ្ជសាស្រ្តបុរាណចិនមកកាន់ប្រទេសកម្ពុជា ដើម្បីជួយ​ពង្រឹង​សមត្ថភាព​ការងារទប់ស្កាត់ជំងឺកូវីដ-១៩​ ដោយការរួម​បញ្ជូល​វេជ្ជសាស្រ្តបុរាណចិនផងដែរ៕ អត្ថបទ រដ្ឋា

ថវិកាជិត៩០០លានដុល្លារ ត្រូវបាន​ប្រមូល​និង​ចំណាយ​សម្រាប់​ការ​ឆ្លើយ​តប​មេរោគអេដស៍ និង​ជំងឺអេដស៍ រយៈពេលបី​ទសវត្សរ៍​កន្លងទៅនេះ

2022/01/22 01:50:45 pm        717
Facebook Telegram Linkin
ភ្នំពេញ៖ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធ នឹងជំងឺអេដស៍ បញ្ជាក់ថា ថវិកាជិត ៩០០លានដុល្លារ ត្រូវបានប្រមូល និងចំណាយសម្រាប់ការឆ្លើយតបមេរោគអេដស៍ និងជំងឺអេដស៍ រយៈពេលបីទសវត្សរ៍កន្លងទៅនេះ។ការថ្លែងរបស់ឯកឧត្តម ទេសរដ្ឋមន្រី្ត អៀង មូលី យ៉ាងដូច្នេះនាឱកាសបិទសិក្ខាសាលាពិគ្រោះ​យោបល់​ស្តីពីការពិនិត្យឡើងវិញពាក់​កណ្តាល​អាណត្តិ​ផែនការយុទ្ធសាស្រ្តជាតិទូលំទូលាយ និង​ពហុវិស័យឆ្លើយតបនឹងមេរោគអេដស៍ ​និងជំងឺអេដស៍ លើកទី៥ (២០១៩-២០២៣) ​នៅល្ងាចថ្ងៃទី២១ ខែមករាឆ្នាំ២០២២ ​នៅសណ្ឋាគារកាំបូឌីយ៉ាណា ​និងតាមបណ្តាញវីដេអូ ក៏បានការចូលរួមពី​សំណាក់វេជ្ជបណ្ឌិត ឃិន ចូ នាយកបណ្តោះអាសន្ន ​UNAIDS ប្រចាំកម្ពុជា ឯកឧត្តម លោកជំទាវ លោក និងអ្នកស្រី តំណាងក្រសួង ស្ថាប័នរាជរដ្ឋាភិបាល ដៃគូអភិវឌ្ឍន៍ និងអង្គការសង្គមស៊ីវិល ប្រឹក្សា​បច្ចេកទេស​ និងអ្នកជំនាញការជាតិ ​និងអន្តរជាតិ ​អ្នកតំណាងប្រជាជនគន្លឹះ។ឯកឧត្តមទេសរដ្ឋមន្រី្ត អៀង មូលី បានឲ្យដឹងទៀតថា ​កាលពីសាមសិបឆ្នាំមុន ករណីផ្ទុកមេរោគ​អេដស៍​ដំបូងត្រូវបានរាយការណ៍នៅក្នុងប្រទេសកម្ពុជា។ កាលពី២០ឆ្នាំមុន អាជ្ញាធរជាតិប្រយុទ្ធ​នឹង​ជំងឺ​អេដស៍​ត្រូវបានបង្កើតឡើង​ដើម្បីដឹកនាំការឆ្លើយតបទូលំទូលាយ និងពហុវិស័យចំពោះ​មេរោគ​អេដស៍ ​និងជំងឺអេដស៍។ ហើយថវិកាជិត៩០០លានដុល្លារ ត្រូវបានប្រមូល​និង​ចំណាយ​សម្រាប់​ការ​ឆ្លើយ​តបរយៈពេលបីទសវត្សរ៍កន្លងទៅនេះ។ ឥឡូវនេះ យើងឈានមកដល់​ពាក់ក​ណ្តាល​អាណត្តិនៃផែនការយុទ្ធសាស្រ្តជាតិទូលំទូលាយ និង​ពហុវិស័យឆ្លើយតប នឹងមេរោគអេដស៍ និងជំងឺអេដស៍ លើកទី៥ផងដែរ។ ថ្ងៃនេះយើង​បាន​ធ្វើ​បច្ចុប្បន្នភាពអំពីស្ថានភាព ​និង​ការឆ្លើយតប​នឹងមេរោគអេដស៍ និងអំពី​សមិទ្ធផល​នៃគោលបំណង​ចំនួនបួន ​នៃផែនការយុទ្ធសាស្រ្តជាតិទូលំទូលាយ ​និងពហុវិស័យឆ្លើយតប​នឹងមេរោគអេដស៍ និងជំងឺអេដស៍ លើកទី៥ដែរ។ឯកឧត្តម ទេសរដ្ឋមន្រី្ត បានសង្កត់ធ្ងន់ថា នៅពេលដែលយើងឈានចូលដល់ដំណាក់កាលចុង​ក្រោយ​នៃការប្រយុទ្ធដ៏យូរអង្វែងរបស់យើងប្រឆាំងនឹងមេរោគអេដស៍ ​និងជំងឺអេដស៍​ ឯកឧត្តម សូមរំឭកឡើងវិញនូវតម្រូវការក្នុងការអនុវត្តតាមការណែនាំរបស់សម្ដេចតេជោ​ ហ៊ុន សែន នាយករដ្ឋមន្ត្រីនៃកម្ពុជា ​ដែលអំពាវនាវជនរួមជាតិទាំងអស់ឱ្យចូលរួមជាមួយរាជរដ្ឋាភិបាលកម្ពុជា ជា​ចរន្តជាតិមួយ ដើម្បីបញ្ចប់ជំងឺអេដស៍នៅឆ្នាំ២០២៥។ជាចុងក្រោយឯកឧត្តម ទេសរដ្ឋមន្រី្ត អៀង មូលី បានសូមបញ្ជាក់សារជាថ្មីថា មានសារៈសំខាន់​ណាស់​សម្រាប់​ក្រុមការងារយុទ្ធសាស្ត្រនីមួយៗ នៃផែនការយុទ្ធសាស្រ្តជាតិ​ទូលំទូលាយ និង​ពហុវិស័យឆ្លើយតប​នឹង​មេរោគអេដស៍ ​និងជំងឺអេដស៍ លើកទី៥ក្នុងការអនុម័តសកម្មភាពផ្លាស់ប្តូរ​ក្នុងវិស័យសុខាភិបាល ​និងវិស័យមិនមែនសុខភាព ដើម្បីគាំទ្រចលនាជាតិពីថ្នាក់កណ្តាល​ដល់​មូលដ្ឋាន កែលម្អភាពជាអ្នកដឹកនាំ លើកកម្ពស់ភាពជាដៃគូជាមួយភាគីពាក់ព័ន្ធ និង​បង្កើន​ការវិនិយោគក្នុងស្រុក ​ដើម្បីគ្រប់គ្រងការឆ្លើយតប៕

ឯកឧត្តម ហ៊ុន ម៉ានី គាំទ្រស្មារតីនៃសន្និបាតលើកទី៤៣ បន្តជ្រើសរើសម្តេចតេជោ ហ៊ុន សែន ជា​បេក្ខភាព​នាយករដ្ឋមន្រ្តី

2022/01/22 01:23:25 pm        870
Facebook Telegram Linkin
ព្រះសីហនុ ៖ ឯកឧត្តម ហ៊ុន ម៉ានី អគ្គលេខាធិការ នៃអគ្គលេខាធិការដ្ឋានគណៈចលនាមហាជន បានគាំទ្រយ៉ាងពេញទំហឹងនូវស្មារតី នៃសន្និបាតគណៈកម្មាធិការកណ្តាល គណបក្សប្រជាជនកម្ពុជាលើកទី៤៣ ដែលសម្រេចបន្តជ្រើសរើសម្តេចអគ្គមហាសេនាបតីតេជោ ហ៊ុន សែន ជាបេក្ខភាពនាយករដ្ឋមន្រ្តី និងឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្រ្តីទៅថ្ងៃអនាគត។ការសម្តែងការគាំទ្ររបស់ឯកឧត្តម ហ៊ុន ម៉ានី បែបនេះ នាឱកាសជួបសំណេះសំណាល​ជាមួយ​គណៈអចិន្ត្រៃយ៍នៃគណៈកម្មាធិការគណបក្សប្រជាជនកម្ពុជា ខេត្តព្រះសីហនុ ថ្នាក់ដឹកនាំ សមាជិក សមាជិកា នៃគណៈកម្មាធិការគណបក្សក្រុង ស្រុក ឃុំ សង្កាត់ នៃខេត្តព្រះសីហនុ ​នាព្រឹកថ្ងៃទី២២ ខែមករា ឆ្នាំ២០២២នេះ។ឯកឧត្តម ហ៊ុន ម៉ានី បានលើកឡើងទៀតថា ​ក្រៅពីការបង្ហាញពីប្រជាធិបតេយ្យផ្ទៃក្នុងរបស់បក្ស ស្មារតីដែលបានដាក់ចេញនេះ ជា​ការបង្ហាញឲ្យឃើញផងដែរ​ពីផែនការច្បាស់លាស់​របស់​គណបក្សយើង ក្នុងការធានាបាននូវនិរន្តរភាពសង្គម ចៀសផុតពីវិបត្តិនៃការដឹកនាំនាថ្ងៃអនាគត។ ឆ្លៀតក្នុងឱកាសនោះដែរឯកឧត្តម ហ៊ុន ម៉ានី ក៏បានស្នើឲ្យថ្នាក់ដឹកនាំ​តាមបណ្តា​រចនា​សម្ព័ន្ធ​បក្សទាំងអស់ បន្តជឿជាក់លើការដឹកនាំរបស់ថ្នាក់ដឹកនាំគណបក្សយើង ពង្រឹង និងពង្រីកនូវសាមគ្គី និងការឯកភាពផ្ទៃក្នុងបក្ស និងចូលរួមឲ្យកាន់តែសកម្មដូចភ្លៀង​រលឹម​ជាមួយ​មហាជន តាម​រយៈការស្វែងយល់​ពីបញ្ហានានា​ ដែលពួកគាត់កំពុងជួបប្រទះ ​និងចូលរួមដោះស្រាយ។ ជាងនេះទៅទៀត ថ្នាក់ដឹកនាំតាមបណ្តារចនាសម្ព័ន្ធបក្សនៅក្នុងខេត្ត ត្រូវបន្តក្តាប់ឲ្យជាប់នូវគោល​នយោបាយដែលបានដាក់ចេញ ដើម្បីធានាបាននូវភាពឈ្នះ ព្រោះថា ជ័យជំនះរបស់បក្សយើង​គឺស្ថិតនៅ​តាមមូលដ្ឋាន។ ឯកឧត្តម ក៏​សូមវាយតម្លៃខ្ពស់ចំពោះសមិទ្ធផលនានា​ដែលគណៈកម្មាធិការបក្ស​គ្រប់ជាន់ថ្នាក់របស់​ខេត្ត សម្រេចបាននាពេលថ្មីៗនេះ ជាពិសេសគឺការចូលរួមជាមួយរាជរដ្ឋាភិបាលក្នុង​ការ​ទប់ស្កាត់​ការឆ្លងរីករាលដាលជំងឺកូវីដ-១៩៕អត្ថបទ រដ្ឋា 

ចិន​នឹង​ជួយ​ពង្រឹង​សមត្ថភាព​មន្ត្រី​សុខាភិបាលកម្ពុជា ក្នុងការប្រើប្រាស់វេជ្ជសាស្រ្តបុរាណចិន​ព្យាបាលជំងឺកូវីដ-១៩

2022/01/21 02:03:53 pm        785
Facebook Telegram Linkin
ភ្នំពេញ៖ ដំណើរអញ្ជើញមកបំពេញទស្សនកិច្ចនៅកម្ពុជារបស់ឯកឧត្តមសាស្រ្តាចារ្យ Huang Luqi ស្នងការរងរដ្ឋបាលជាតិវេជ្ជសាស្រ្តបុរាណចិន និងជាប្រធានបណ្ឌិតសភាចិន នៃវិទ្យាស្ថានវេជ្ជសាស្រ្តចិន ក្នុងគោលបំណងរឹតចំណងសាមគ្គីភាពរវាងប្រទេសទាំងពីរ ជាពិសេសលើវិស័យវេជ្ជសាស្រ្តបុរាណ។នៅថ្ងៃនេះលោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការក្រសួងសុខាភិបាល រួមជាមួយឯកឧត្តម វ៉ាង វិនធៀន ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា បានអញ្ជើញទៅស្វាគមន៍ និងបដិសណ្ឋារកិច្ចគណៈប្រតិភូជាន់ខ្ពស់សាធារណរដ្ឋប្រជាមានិតចិន ដឹកនាំដោយឯកឧត្តម សាស្រ្តាចារ្យ Huang Luqi ស្នងការរងរដ្ឋបាលជាតិវេជ្ជសាស្រ្តបុរាណចិន និងជាប្រធានបណ្ឌិតសភាចិន នៃវិទ្យាស្ថានវេជ្ជសាស្រ្តចិន ដែលអញ្ជើញមកបំពេញទស្សនកិច្ចជាផ្លូវការនៅព្រះរាជាណាចក្រកម្ពុជាពីថ្ងៃទី២១ ដល់ថ្ងៃទី២៦ ខែមករា ឆ្នាំ២០២២។ក្នុងដំណើរទស្សនកិច្ចនេះគណៈប្រតិភូ នឹងជួបពិភាក្សាជាមួយឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល និងចុះហត្ថលេខាលើកិច្ចព្រមព្រៀងស្តីពីការបញ្ជូន​ក្រុម​វេជ្ជសាស្រ្ត​បុរាណចិន ព្យាបាលជំងឺកូវីដ-១៩ ​មកកម្ពុជា រយៈពេលមួយឆ្នាំ ដើម្បីជួយពង្រឹងសមត្ថភាព​មន្រី្ត​សុខាភិបាលកម្ពុជា ក្នុងការប្រើប្រាស់វេជ្ជសាស្រ្តបុរាណចិន​ សម្រាប់ព្យាបាលជំងឺកូវីដ-១៩៕

សម្តេចតេជោ៖ រដ្ឋមន្ត្រីការបរទេសម៉ាឡេស៊ី «ជាអ្នកការទូតព្រហើន មិនយល់ពីសិល្បៈការទូត»

2022/01/21 01:48:24 pm        3592
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងជាប្រធានអាស៊ាន បានបញ្ចេញប្រតិកម្មខ្លាំងៗ ចំពោះរដ្ឋមន្ត្រីការបរទេសម៉ាឡេស៊ី ដែលហ៊ានវាយប្រហារចំពោះដំណើរទស្សនកិច្ចរបស់សម្តេចទៅកាន់ប្រទេសមីយ៉ាន់ម៉ា។ សម្តេចតេជោ បានហៅរដ្ឋមន្ត្រីការបរទេសម៉ាឡេស៊ីថា ជាអ្នកការទូតមិនយល់ពីសិល្បៈការទូត ហើយព្រហើនហ៊ានប្រើសម្តីវាយប្រហារលើប្រធានអាស៊ាន។នៅព្រឹកថ្ងៃទី២១ ខែមករានេះ សម្ដេចតេជោ ហ៊ុន សែន បានមានជំនួបពិភាក្សាការងារតាមទូរ ស័ព្ទជាមួយលោក ចូកូ វីដូដូ ប្រធានាធិបតីឥណ្ឌូនេស៊ី ដែលតាមរយៈជំនួបនេះ សម្ដេចតេជោ បានថ្លែងលើកឡើងថា «ថ្វីត្បិតរដ្ឋមន្ត្រីការបរទេសម៉ាឡេស៊ី ធ្លាប់ធ្វើការងារក្នុង​ក្របខណ្ឌ​គណបក្ស​ប្រឆាំង នាពេលកន្លងទៅក៏ដោយ ប៉ុន្តែមិនគួរណាក្នុងនាមជារដ្ឋមន្ត្រីការបរទេស និងជាអ្នកការ​ទូតមួយរូប បែរជាប្រើពាក្យសំដីព្រហើនជាមួយប្រធានអាស៊ាន ក៏ដូចជាប្រមុខរដ្ឋាភិបាលអាស៊ាន ដែលពុំមានប្រើប្រាស់ភាសាការទូតសោះឡើយ»។ នេះបើតាមការឱ្យដឹងរបស់ឯកឧត្ដម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី។ប្រតិកម្មរបស់សម្តេចតេជោ ហ៊ុន សែន បានកើតមានឡើង​បន្ទាប់ពីរដ្ឋមន្ត្រីការបរទេសម៉ាឡេស៊ី លោក Saifuddin Abdullah ​បានផ្តល់បទសម្ភាសន៍ជាមួយព័ត៌មាន​ Aljazeera ដោយបានវាយ​ប្រហារទៅលើដំណើរទស្សនកិច្ចរបស់ម្តេចតេជោ​ ទៅកាន់ប្រទេសមីយ៉ាន់ម៉ា នាពេលកន្លងទៅនេះ។សម្តេចតេជោ បានបញ្ជាក់ថា ទស្សនកិច្ចទៅប្រទេសមីយ៉ាន់ម៉ា កាលពីថ្ងៃទី៧-៨ ខែមករា គឺដើម្បី​ដាំដើម​ឈើ មិនមែនទៅកាប់ឈើទេ។ ហើយការដាំដើមឈើនេះ​ មិនមែនដាំមួយថ្ងៃហើយ រំពឹងថាបានផ្លែផ្កាភ្លាមនោះទេត្រូវទាមទារពេលវេលា។ ដំណោះស្រាយនយោបាយ​ដែលមាន​លក្ខណៈយូរអង្វែង គឺទាមទារពេលវេលា និងធ្វើការឱ្យបានគ្រប់ជ្រុងជ្រោយ» ៕អត្ថបទ៖ មុត សុទ្ធ

អតីតប្រមុខការទូតកម្ពុជា៖ ជនរិះគន់ទស្សនកិច្ចសម្តេចនៅមីយ៉ាន់ម៉ា មិនអានកិច្ចព្រមព្រៀង៥ ចំណុច

2022/01/21 01:39:01 pm        1032
Facebook Telegram Linkin
ភ្នំពេញ៖ អតីតរដ្ឋមន្រ្តីការបរទេសកម្ពុជា ឯកឧត្តមឧបនាយករដ្ឋមន្រ្តី ហោ ណាំហុង បានប្រតិកម្មចំពោះអ្នកវាយប្រហារដំណើរទស្សនកិច្ចរបស់សម្តេចតេជោនៅមីយ៉ាន់ម៉ា កាលពីថ្ងៃទី ៧ និង៨ ខែមករា កន្លងទៅថា មិនបានអានលើកិច្ចព្រមព្រៀងទាំង៥ ចំណុច ដែលសម្រេចដោយមេដឹកនាំអាស៊ានទាំង ១០ នោះឡើយ។ក្នុងបទសម្ភាសពិសេសជាមួយទូរទស្សន៍ BTV អតីតអ្នកការទូតដ៏ឆ្នើមរបស់កម្ពុជា ឯកឧត្តម ឧបនាយករដ្ឋមន្ត្រី ហោ ណាំហុង បានចាត់ទុក អ្នកដែលវាយប្រហារ ដោយក្នុងនោះ មានអ្នកនយោបាយអាស៊ានផងនោះ ចំពោះដំណើរទស្សនកិច្ចរបស់សម្តេចតេជោនៅមីយ៉ាន់ម៉ា ថា ជាអ្នកមិនបានអាន និងមិនបានយល់ពីខ្លឹមសារនៃកិច្ចព្រម​ព្រៀងឯកច្ឆ័ន្ទ ​ទាំង៥ចំណុច ដែល​សម្រេច​ដោយកិច្ចប្រជុំពិសេសរបស់អាស៊ាន កាលពីខែមេសា ឆ្នាំ២០២១ ​នៅប្រទេសឥណ្ឌូនេស៊ី ហើយពេលនោះការសម្រេចនេះ ​មានការចូលរួមពីលោក អោង មីង ឡាំង ផងដែរ។ឯកឧត្តមឧបនាយករដ្ឋមន្រ្តី ហោ ណាំហុង បន្ថែមថា គោលការណ៍ទាំង៥ចំណុច ដែលបាន​ព្រម​ព្រៀង​គ្នា​នោះ លើបញ្ហាមីយ៉ាន់ម៉ានោះ ទី១ ត្រូវបញ្ឈប់ជាបន្ទាន់នូវអំពើហិង្សា ហើយគ្រប់ភាគី​ត្រូវបង្កើនការអត់ធ្មត់, ទី២ ចាប់ផ្ដើមការសន្ទនាប្រកបដោយស្ថាបនា ក្នុងចំណោមភាគីពាក់ព័ន្ធ ដើម្បីស្វែងរកដំណោះស្រាយដោយសន្តិវិធី, ទី៣ ប្រេសិតពិសេសរបស់ប្រធានអាស៊ាន នឹងសម្រួល​ដល់​ការ​សម្រុះសម្រួល នៃដំណើរការរៀបចំកិច្ចសន្ទនា ​ដោយមានជំនួយពីអគ្គលេខាធិការអាស៊ាន, ទី៤ អាស៊ានត្រូវផ្តល់ជំនួយមនុស្សធម៌​ និងទី៥ គឺប្រេសិតពិសេស និងគណៈប្រតិភូនឹងធ្វើទស្សនកិច្ច​នៅ​ប្រទេសមីយ៉ាន់ម៉ា ដើម្បីជួបជាមួយភាគីពាក់ព័ន្ធទាំងអស់។ជាការកត់សម្គាល់​ ប្រតិកម្មរបស់អតីតអ្នកការទូតកម្ពុជា បានធ្វើឡើងប​ន្ទាប់ពីរដ្ឋមន្ត្រីការបរទេស​ម៉ាឡេស៊ី ​បានវាយប្រហារទៅលើដំណើរទស្សនិច្ចរបស់សម្តេចនៅមីយ៉ាន់ម៉ា ​កាលពីថ្ងៃទី ៧ និង ៨ ខែមករា ឆ្នាំ ២០២២ កន្លងទៅ។ ​ដំណើរទស្សនកិច្ចទៅមីយ៉ាន់ម៉ា គឺដើម្បីចូលរួមចំណែក​បន្ធូរបន្ថយ​ស្ថានភាព​អំពើហិង្សានៅក្នុងប្រទេសនេះ៕ អត្ថបទ៖ ជា​ ធីរិទ្ធ

បណ្ដាញសង្គម

ព័ត៌មានថ្មីៗ

កូរ៉េខាងត្បូង នឹងផ្លាស់ប្តូរខ្សែបន្ទាត់ដែលត្រូវបានរឹតត្បិតជនស៊ីវិលនៅតាមព្រំដែនជាមួយកូរ៉េខាងជើង
06/17/2026 05:06 PM
Facebook Telegram Linkin
ឯកឧត្តម គន់ គីម អញ្ជើញដឹកនាំគណៈប្រតិភូចូលរួមមហាសន្និបាត តំណាងទូទាំងប្រទេសសមាគមអតីតយុទ្ធជនវៀតណាមលើកទី៨
06/17/2026 05:06 PM
Facebook Telegram Linkin
មេដឹកនាំ G7 សន្យាបង្កើនកិច្ចប្រឹងប្រែង ដើម្បីដោះស្រាយភាពងាយរងគ្រោះ ដោយសារបំណុលសកល
06/17/2026 05:06 PM
Facebook Telegram Linkin
សិស្សវិទ្យាស្ថាន PPI របស់ក្រសួងការងារ ​បង្កើតរ៉ូបូត ចងដែ​កដោយ​ស្វ័យប្រវត្តិ និងបាននាំយកស្នាដៃមក​តាំងបង្ហាញ​នៅក្នុង​កម្មវិធី​ទិវា​អប់រំ TVET Day លើកទី៩
06/17/2026 04:06 PM
Facebook Telegram Linkin
រដ្ឋមន្ត្រីក្រសួងការពារជាតិ៖ វត្តមានយោធាអាមេរិកកំពុងកើនឡើងនៅក្នុងប្រទេសអូស្ត្រាលី
06/17/2026 04:06 PM
Facebook Telegram Linkin
មេដឹកនាំ G7 ប្រឹង​ប្រែង​ដោះស្រាយបញ្ហា​ពឹងផ្អែកលើប្រទេសចិន សម្រាប់រ៉ែសំខាន់ៗ
06/17/2026 04:06 PM
Facebook Telegram Linkin
ក្រសួងការបរទេស៖ រុស្ស៊ីមិនពឹងផ្អែកលើតួនាទីសម្របសម្រួលរបស់UN ក្នុងបញ្ហាអ៊ុយក្រែនទេ
06/17/2026 04:06 PM
Facebook Telegram Linkin
អូម៉ង់ និងអ៊ីរ៉ង់ បញ្ជាក់ជាថ្មីអំពីការប្តេជ្ញាចិត្តក្នុងការធានាការធ្វើនាវាចរណ៍ដោយសេរីនៅច្រកសមុទ្រ ហ័រមូស
06/17/2026 04:06 PM
Facebook Telegram Linkin
អង់គ្លេសគូសបញ្ជាក់ពីជំនួយចំនួន ១៩០លានដុល្លារសម្រាប់យេម៉ែន និងគាំទ្រកិច្ចព្រមព្រៀងដោះលែងអ្នកជាប់ឃុំ
06/17/2026 04:06 PM
Facebook Telegram Linkin
ពានបាល់ទាត់នារី Svay Rieng Cup សប្ដាហ៍ទី៤ ក្រុម CRS Sport ធ្វើការងារធ្ងន់ជាងគេ
06/17/2026 04:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.