នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី បញ្ជាក់ជាថ្មីជំហររបស់កម្ពុជាបន្តដោះស្រាយបញ្ហាព្រំដែនគោក និងសមុទ្រជាមួយថៃ ដោយសន្ដិវិធី និងច្បាប់អន្តរជាតិ និងបដិសេធជជែករឿងបើកច្រកព្រំដែនគោក
សម្ដេចធិបតី៖គិតត្រឹមខែមេសាឆ្នាំនេះយុវជនមកពីគ្រួសារក្រីក្រ និងងាយរងហានិភ័យចំនួន ២៧,១ម៉ឺននាក់ទទួលបានការបណ្ដុះបណ្ដាលជំនាញវិជ្ជាជីវៈ
សម្ដេ​ចតេជោ ហ៊ុន សែន៖«២០ មិថុនា ១៩៧៧ ជីវិតរបស់ខ្ញុំ និងភរិយាពេលនោះជួបជាមួយគ្រោះថ្នាក់ និងលំបាកវេទនាខ្លាំងណាស់»
សម្តេចតេជោ ហ៊ុន សែន ថ្លែងថា អាវក្រោះ និងសម្ភារយោធាម៉ាក DSS សុទ្ធតែមានគុណភាពហើយអាវការពារនេះនាយករដ្ឋមន្រ្តីបានសាករួចហើយ

នយោបាយ​ និង ការអភិវឌ្ឍន៍

ឯកអគ្គរដ្ឋទូតឡាវថ្មីប្រចាំនៅកម្ពុជា បានមើលឃើញពីភាពរីកចំរើនរបស់កម្ពុជា បើទោះបីជាជួបវិបត្តិកូវីដក្តី

2021/12/20 12:49:45 pm        582
Facebook Telegram Linkin
ភ្នំពេញ៖ លោក អាំផៃ ឃីនដាវង្ស បានសម្តែងនូវការកោតសរសើរ និងវាយតម្លៃខ្ពស់ ចំពោះការរីកចម្រើនយ៉ាងឆាប់រហ័សរបស់ប្រទេសកម្ពុជា បើទោះបីជារយៈពេលចុងក្រោយនេះ កម្ពុជាជួបវិបត្តិនៃជំងឺកូវីដ-១៩ក្តី មិនតែប៉ុណ្ណោះប្រទេសកម្ពុជា ក៏បានផ្តល់ជំនួយជាវេជ្ជសាស្ត្រសម្រាប់ទប់ស្កាត់មេរោគកូវីដ១៩ ដល់ប្រទេសឡាវផងដែរ។ថ្លែងនៅក្នុងកិច្ចជំនួបជាមួយសម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជា ណាចក្រកម្ពុជា នាព្រឹកថ្ងៃទី២០ ខែធ្នូ ឆ្នាំ២០២១នេះ លោកឯកអគ្គរដ្ឋទូត បានគូសបញ្ជាក់ថា ទំនាក់ទំនង​ទ្វេភាគីនៃប្រទេសទាំងពីរ (កម្ពុជា-ឡាវ បានបង្ហាញឱ្យនូវទំនាក់ទំនង និង​កិច្ច​សហប្រតិបត្តិការ​យ៉ាង​ជិតស្និទ្ធ​ តាមរយៈកិច្ចប្រជុំរបស់ថ្នាក់ដឹកនាំតាមប្រព័ន្ធវីដេអូ។ ជា​ពិសេស​ការ​ផ្លាស់ប្តូរ​ដំណើរទស្សនកិច្ចរបស់ថ្នាក់ដឹកនាំនៃប្រទេសទាំងពីរ​ ដែលក្នុងនោះ​ឯកឧត្តមបណ្ឌិតផនខាំ វីផាវ៉ាន់ ​នាយករដ្ឋមន្រ្តី ​នៃសាធារណរដ្ឋប្រជាធិបតេយ្យប្រជាមានិតឡាវ បានដឹកនាំ​គណៈប្រតិភូមក​ធ្វើ​ទស្សនកិច្ច​ជាផ្លូវ​ការនៅ​ព្រះរាជាណាចក្រកម្ពុជា​ដោយទទួលបានលទ្ធផល​ដ៏​ត្រចះត្រចង់​ជាដើមនោះ។លោកទូតបានសម្តែងនូវការកោតសរសើរ និងវាយតម្លៃខ្ពស់ចំពោះការរីកចម្រើនយ៉ាងឆាប់រហ័ស​របស់ប្រទេសកម្ពុជាបើទោះបីជារយៈពេលចុងក្រោយនេះប្រទេសកម្ពុជា ជួបវិបត្តិនៃជំងឺកូវីដ-១៩ក៏ដោយ។ ក្នុងនោះផងដែរ ប្រទេសកម្ពុជាក៏ជាប្រទេសដែលសម្បូរបែបដោយសម្បត្តិវប្បធម៌ និង​បេតិកភណ្ឌ ជាពិសេសប្រាសាទអង្គរវត្ត និងប្រាសាទព្រះវិហារជាដើម។ថ្លែងនៅក្នុងកិច្ចជំនួបនោះដែរ សម្តេចវិបុលសេនាភក្តី សាយ ឈុំ បានលើកឡើងថា សម្តេចបាន​សម្តែង​នូវសេចក្តីរីករាយដែលបានឃើញថា ទំនាក់ទំនងមិត្តភាព សាមគ្គីភាព និងកិច្ច​សហប្រតិបត្តិការ​ដ៏ល្អរវាងប្រជាជន​ និងប្រទេសទាំងពីរ ​មានការរីកចម្រើនគ្រប់ស្ថានភាព និង​គ្រប់​កាលៈទេសៈ។ មុនពេលមានវិបត្តិជំងឺកូវីដ-១៩នេះ ថ្នាក់ដឹកនាំកំពូល ថ្នាក់ដឹកនាំជាន់ខ្ពស់ ថ្នាក់ដឹកនាំតាម​ក្រសួង​មន្ទីរ និងប្រជាជននៃប្រទេសទាំងពីរ ​តែងតែបានផ្លាស់ប្តូរដំណើរទស្សនកិច្ចគ្នាទៅវិញទៅមកជាបន្ត បន្ទាប់ ​ហើយប្រទេសទាំងពីរបានគាំទ្រគ្នាទៅវិញ​ទៅមកលើបញ្ហាជាច្រើន ក្នុងក្របខ័ណ្ឌកិច្ច​សហប្រតិបតិ្តការតំបន់ ​និងអន្តរជាតិផងដែរ៕អត្ថបទ៖ បាន ចក់

ក្រសួងទេសចរណ៍អំពាវនាវអាជីវកម្មបន្ទប់ស្នាក់ កុំដំឡើងថ្លៃសេវាថ្ងៃប្រឡងបាក់ឌុប

2021/12/20 12:32:18 pm        664
Facebook Telegram Linkin
ភ្នំពេញ៖ ក្រសួងទេសចរណ៍ បានធ្វើការអំពាវនាវទៅបណ្តាម្ចាស់អាជីវកម្មទេសចរណ៍មានដូចជា សណ្ឋាគារ ផ្ទះសំណាក់ បន្ទប់ផ្ទះស្នាក់ និងបណ្តាអាហារដ្ឋាន ភោជនីយដ្ឋាននានា សូមកុំធ្វើការដំឡើងថ្លៃសេវា ហើយបើអាចសូមធ្វើការបញ្ចុះតម្លៃសេវា ដើម្បីជួយដល់បណ្តាសិស្សានុសិស្ស និងលោកគ្រូអ្នកគ្រូ ដែលនឹងអញ្ជើញទៅទទួលសេវាកម្ម នៅក្នុងឱកាសថ្ងៃប្រឡងសញ្ញាបត្រមធ្យមសិក្សាទុកតិយភូមិ នាថ្ងៃទី២៧ ខែធ្នូ ឆ្នាំ២០២១។បើតាមឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងប្រាប់​នៅថ្ងៃទី២០ខែធ្នូនេះថា នៅថ្ងៃប្រឡងសញ្ញាបត្រមធ្យមសិក្សាទុតិយភូមិនាថ្ងៃទី២៧ ខែធ្នូ ខាងមុខនេះ នៅទូទាំងប្រទេស នឹងមានលោកគ្រូអ្នកគ្រូ សិស្សានុសិស្សជាច្រើន ផ្លាស់ទីស្វែងរក​សេវា​បន្ទប់ស្នាក់ នៅតាមបណ្តាសណ្ឋាគារ ផ្ទះសំណាក់ ផ្ទះស្នាក់ និងស្វែងរកសេវា​ម្ហូបអាហារ​នានា​ដែលនៅជិតមណ្ឌលប្រឡងសញ្ញាបត្រមធ្យមសិក្សាទុតិយភូមិ។ឯកឧត្តម តុប សុភ័ក ក្នុងនាមក្រសួងទេសចរណ៍បានស្នើសូមម្ចាស់អាជីវកម្មទេសចរណ៍នានានោះ ធ្វើបន្តរក្សាប្រពៃណីល្អការចេះជួយគ្នា ​កុំឡើងថ្លៃសេវារបស់ខ្លួន ហើយបើអាចសូមធ្វើការបញ្ចុះតម្លៃ​សេវារបស់ខ្លួន ​ដើម្បីជម្រុញលើកកម្ពស់ ​ការប្រឡងកម្រិតថ្នាក់ជាតិ មានដំណើរការល្អប្រសើរ ខណៈការ​ប្រឡងសញ្ញាបត្រមធ្យមសិក្សាទុតិយភូមិ នៅក្នុងឆ្នាំកន្លងមក មានអាជីកម្មសណ្ឋាគារ ផ្ទះសំណាកនិងភោជនីយដ្ឋានមួយចំនួនធំបានសហការល្អ មិនឆ្លៀតឱកាស តំឡើងតំលៃសេវា ហើយបានបញ្ចុះតម្លៃសម្រាប់ជូនសិស្សប្រឡង និងលោកគ្រូអ្នកគ្រូនានាផងដែរ។នៅក្នុងសន្និសិទសារព័ត៌មានស្តីការការប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី ២០ខែធ្នូនេះដែរ ​ឯកឧត្តម បណ្ឌិតសភាចារ្យ ហង់ ជួនណារុន​ រដ្ឋមន្ត្រីក្រសួងអប់រំយុវជន និងកីឡា​ក៏បានថ្លែងអំពាវនាវទៅដល់បណ្តាសប្បុរសជន ​និងម្ចាស់អាជីកម្មបន្ទប់ស្នាក់ និងកន្លែងលក់ម្ហូប​អាហារ​ជាដើម ​សូមបង្កលក្ខណៈងាយស្រួល និងបង្កស្មារតីជួយគ្នាទៅវិញទៅមកដល់បណ្តា​សិស្សានុសិស្សនិង​ លោកគ្រូអ្នកគ្រូយើង ​ដែលចូលរួមប្រឡង ខណៈដែលពួកយើងទាំងអស់គ្នា​កំពុង​ជួបបញ្ហាវិបត្តិកូវីដ១៩នេះ។សូមបញ្ជាក់ តាមសារាចរស្តីពីការរៀបចំគ្រប់គ្រងចរន្តភ្ញៀវទេសចរ និងការពង្រឹងគុណភាព​ផលិតផល​ទេសចរណ៍នៅមុនថ្ងៃឆ្លងឆ្នាំសកល២០២១ ក្រសួងទេសចរណ៍បានណែនាំ​បណ្តា​មូលដ្ឋាន​អាជីវកម្មទេសចរណ៍ត្រូវរក្សាតម្លៃផលិតផលនិងសេវាអោយបានសមរម្យ ហើយរាល់តម្លៃ ស្នាក់នៅ ម្ហូបអាហារ ​និងសេវាផ្សេងៗទៀត ត្រូវសរសេរអោយបានច្បាស់នៅក្នុង​តារាងដើម្បី​ជម្រាប​ជូនភ្ញៀវដឹងជាមុន ចៀសវាងការកំណត់តម្លៃខ្ពស់ហួសហេតុ។ សម្រាប់បញ្ហានេះ បើតាម អ្នកនាំពាក្យក្រសួងទេសចរណ៍ ក៏បានថ្លែងដែរថា គ្រប់ភ្ញៀវអាចប្តឹង​ម្ចាស់​អាជីវកម្មទេសចរណ៍បាន ករណី អាជីវកម្មនោះ ដំឡើងថ្លៃសេវា ខុសពីអ្វីដែលបានកំណត់ក្នុង​តារាង​តម្លៃ និងខុសពីអ្វីដែលភាគីបានព្រមព្រៀងគ្នាជាមុន៕អត្ថបទ ស៊ុម សុខជា

បេក្ខជនប្រព្រឹត្តខុសឆ្គងក្នុងការប្រឡងបាក់ឌុបនឹងត្រូវធ្លាក់ដោយស្វ័យប្រវត្តិ

2021/12/20 12:01:29 pm        595
Facebook Telegram Linkin
ភ្នំពេញ៖ គោលការណ៍ច្បាប់ តម្លាភាព យុត្តិធម៌ និងលទ្ធផលទទួលយកបាន នៅតែបន្តអនុវត្តសម្រាប់ការប្រឡង បាក់ឌុប សម័យប្រឡង ២៧ ធ្នូឆ្នាំ ២០២១ខាងមុខ។ ការប្រឡងនេះ គឺដាក់ចេញគោលការណ៍ច្បាប់ច្បាស់លាស់ ដោយកំណត់ថារាល់បេក្ខជនដែលប្រព្រឹត្តិខុសពេលប្រឡង គឺនឹងធ្លាក់ដោយស្វ័យប្រវត្តិ។ នេះជាការលើកឡើងរបស់ ឯកឧត្តម ហង់ ជួនណារ៉ុន រដ្ឋមន្រ្តីក្រសួង អប់រំ ក្នុងឱកាសសន្និសីទសារព័ត៌មាននាព្រឹកថ្ងៃទី ២០ ខែធ្នូ ឆ្នាំ ២០២១នេះ។ការប្រឡងសញ្ញាបត្រមធ្យមសិក្សាទុតិយភូមិ ហៅកាត់ថាការប្រឡងបាក់ឌុប នឹងធ្វើឡើងរយៈពេលពីរថ្ងៃ គឺថ្ងៃទី ២៧ -២៨ ខែធ្នូឆ្នាំ ២០២១។ ការប្រឡងឆ្នាំនេះ មានបេក្ខជនសរុបចំនួន ១១៤ ១៨៣ នាក់នឹងមានមណ្ឌលប្រឡងចំនួន ២០៤មណ្ឌល និងមាន ៤៦១៦ បន្ទប់ទូទាំងប្រទេស។ នេះជាការលើកឡើងរបស់ ឯកឧត្តម រដ្ឋមន្រ្តីក្រសួងអប់រំ នាឱកាសសន្និសីទសារព័ត៌មានពាក់ព័ន្ធនឹងការប្រឡងនាព្រឹកនេះ។ឯកឧត្តមរដ្ឋមន្រ្តីបន្តថា ស្តង់ដារវិញ្ញាសារសម្រាប់ការប្រឡងឆ្នាំនេះ គឺនៅតែរក្សាដដែល ដូចការ​ប្រឡង​ដែលពុំទាន់មានជំងឺកូវីដ-១៩។ វិញ្ញាសារពុំមានភាពបន្ធូរបន្ថយនោះទេ។ ឯកឧត្តមលើកឡើងដែរថា គោលការណ៍ដែលធ្លាប់អនុវត្តកន្លងមក គឺនៅតែរក្សាដូចដើមផងដែរ ដោយកំណត់ថា ​បេក្ខជនដែលប្រព្រឹត្តិខុសឆ្គងពេលប្រឡង ​គឺនឹងធ្លាក់ដោយស្វ័យប្រវត្តិ។ក្រៅពីការដាក់ពីន័យចំពោះបេក្ខជនប្រព្រឹត្តិល្មើស ក្រសួងអប់រំ ក៏មានការដាក់ពិន័យទៅលើ​មន្រ្តី​ដែល​បានប្រព្រឹត្តិខុសឆ្គងជុំវិញដំណើរការប្រឡងថ្នាក់ទី ១២ នេះផងដែរ។ កម្រិតទោសគឺអាស្រ័យទៅតាម ទំហំនៃកំហុសឆ្គង ដោយអាចឈានទៅដល់ ការបញ្ចប់តួនាទី ជាមន្រ្តីរាជការ។ការប្រឡងក្នុងបរិបទកូវីដ-១៩នេះ គឺតម្រូវឱ្យ បេក្ខជនប្រឡងទាំងអស់ត្រូវពាក់ម៉ាសការពារ​ជា​ចាំបាច់ និងតម្រូវឱ្យបេក្ខជនប្រឡងត្រូវតែ មកទទួលការវាស់កម្ដៅ និងទទួលស្ទីកឃ័រកម្ដៅធម្មតា នៅមណ្ឌលប្រឡង នៅថ្ងៃទី ២៦ ខែធ្នូ មុនការប្រឡងមួយថ្ងៃ។ ករណីបេក្ខជន មានបញ្ហាវាស់កម្ដៅ គឺតម្រូវឱ្យប្រឡងនៅបន្ទប់ដាច់ដោយឡែក ដែលមណ្ឌលនីមួយៗបានរៀបចំ។ បន្ទាប់ពីបញ្ចប់ដំណើរការសំណេរ ក្រសួងនឹងចាប់ផ្ដើមដំណើរការកំណែ ដំណើរការស្រង់ បូកពិន្ទុ​ដោយកំព្យូទ័រ និងឈានដល់ការប្រកាសលទ្ធផល នៅថ្ងៃទី ១៨ ខែមករា ឆ្នាំ ២០២២ ពេលរសៀល សម្រាប់រាជធានីភ្នំពេញ និងខេត្តកណ្ដាល។ ខេត្តដទៃទៀត នឹងប្រកាសលទ្ធផល ថ្ងៃទី ១៩ ខែមករា។ ពិន្ទុជាប់ដែលក្រសួងកំណត់សម្រាប់ការប្រឡង គឺ ២៣៧ ពិន្ទុ នៃពិន្ទុសរុប ៥០០៕អត្ថបទ៖ គឹមហុក  

សម្តេច ហេង សំរិន ព្រះរាជតំណាង​ព្រះមហាក្សត្រ​បើក​អនុសំវច្ឆរមហា​សន្និបាត​មន្រ្តី​សង្ឃ​ទូទាំងប្រទេស

2021/12/20 11:37:44 am        451
Facebook Telegram Linkin
ភ្នំពេញ៖ សម្តេចពញាចក្រី ហេង សំរិន ប្រធានរដ្ឋសភា នៅថ្ងៃទី២០ ខែធ្នូនេះ ព្រះរាជតំណាងដ៏ខ្ពង់ខ្ពស់ ព្រះមហាក្សត្រនៃព្រះរាជាណាចក្រកម្ពុជា បានអញ្ជើញចូលរួមក្នុងពិធីបើកអនុសំវច្ឆរមហាសន្និបាតមន្រ្តីសង្ឃទូទាំងប្រទេសលើកទី២៩។នៅថ្ងៃទី២០ ខែធ្នូ ឆ្នាំ២០២១នេះ សម្តេចពញាចក្រី ហេង សំរិន ប្រធានរដ្ឋសភា ព្រះរាជតំណាង​ដ៏ខ្ពង់ខ្ពស់ ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ​នៃព្រះរាជា​ណា​ចក្រ​កម្ពុជា បានអញ្ជើញក្នុងពិធីបើកអនុសំវច្ឆរមហាសន្និបាតមន្រ្តីសង្ឃទូទាំងប្រទេសលើកទី២៩ ដែល​មាន​សម្ដេចព្រះសង្ឃនាយក សម្ដេចព្រះសង្ឃនាយករង ​សម្ដេចព្រះរាជាគណៈ ព្រះមេគណ ព្រះអនុគណ ព្រះចៅអធិការគ្រប់ព្រះអង្គ ក្រសួងធម្មការនិងសាសន ​បានយាងនិមន្តចូលរួម បន្ទាប់ពីមានការខកខានមិនបានប្រារព្ធអស់រយៈពេលជាងមួយឆ្នាំកន្លងទៅ។សម្តេចប្រធានរដ្ឋសភា បានកោតសរសើរចំពោះក្រសួងធម្មការ និងសាសនា និងគណៈសង្ឃទាំងពីរ​គណៈព្រមទាំងភាគីពាក់ព័ន្ធទាំងអស់ ​ដែលបានសហការគ្នាយ៉ាងសកម្ម ក្នុងការទ្រទ្រង់ដល់​វិស័យ​ព្រះពុទ្ធ​សាសនា​ឱ្យមានការរីកចម្រើន ​ស្របទៅនឹងការវិវឌ្ឍរបស់សង្គមជាតិនៅគ្រប់កាលៈទេសៈ។ សម្តេចប្រធានរដ្ឋសភា ​បានមានប្រសាសន៍ថា​ ស្របទៅនឹងការរីកចម្រើន ក៏នៅមានបញ្ហាប្រឈម​មួយ​ចំនួន ដែលប៉ះពាល់ដោយបច្ចេកវិទ្យាទំនើប បណ្តាញសង្គម ដែលចាំបាច់អ្នកពាក់ព័ន្ធ​ទំាងអស់​ត្រូវយល់ឱ្យច្បាស់ ហើយចេះប្រើប្រាស់ឱ្យស្របតាមបរិការណ៍​នៃការរីកចម្រើន​ក្នុងវិស័យ​បច្ចេកវិទ្យា​មួយនេះ។ ជាមួយគ្នានោះ សម្តេចប្រធានរដ្ឋសភា ​បានបញ្ជាក់ថា បច្ចេកវិទ្យាក៏ជាផ្នែកដែលផ្តល់អត្ថប្រយោជន៍​ដល់វិស័យសាសនា និងសង្គមជាតិ។ក្នុងសុន្ទរកថា បើកអនុសំវច្ឆរមហាសន្និបាតមន្រ្តីសង្ឃទូទាំងប្រទេសឆ្នាំនេះ ​សម្តេចប្រធានរដ្ឋសភា បាន​សំណូមពរដល់ពុទ្ធសាសនិកជនទាំងអស់ត្រូវរួមគ្នា​ប្រតិបត្តិតាមព្រះពុទ្ធឱវាទ​របស់​ព្រះ​សម្មាសម្ពុទ្ធបរមគរូ ​តាមតួនាទី ​និងភារកិច្ចរបស់ខ្លួន ជាព្រះសង្ឃ ឬជា​គ្រហស្ថ ​ឧបាសក ​ឧបាសិកា ដើម្បីទ្រទ្រង់ថែរក្សាព្រះពុទ្ធសាសនាឱ្យបានរីកចម្រើន ​ដោយហេតុថា ព្រះពុទ្ធសាសនារីកចម្រើន ឬចុះអន់ថយ គឺអាស្រ័យលើពុទ្ធបរិស័ទទាំងអស់គ្នា។អនុសំវច្ឆរមហាសន្និបាតមន្រ្តីសង្ឃទូទាំងប្រទេស ​ជាវេទិកាជួបជុំដ៏សំខាន់មួយ ដើម្បីផ្តល់នូវ​កាលានុវត្តភាព​ក្នុងការពិគ្រោះ​ ពិភាក្សា និងស្វែងរកដំណោះស្រាយលើបញ្ហាបច្ចុប្បន្នភាព ដែលជាកត្តាចាំ​បាច់សម្រាប់អនុវត្តនាឆ្នាំបន្តបន្ទាប់ ​ខណៈដោយសារការរាតត្បាតជំងឺកូវីដ១៩ កាល​ពីឆ្នាំ២០២០​ អនុសំវច្ឆរមហាសន្និបាតមន្រ្តីសង្ឃទូទាំងប្រទេស ពុំបានរៀបចំកម្មវិធី​សន្និបាត​នោះឡើយ​​៕ អត្ថបទ៖ សេក ឧត្តម

ព្រះអង្គម្ចាស់នរោត្តម ចក្រាវុធ៖ បើចង់ឲ្យហ្វ៊ុនស៊ិនប៉ិចមានភាពល្អឡើងវិញ លុះត្រាបញ្ឈប់ការឈ្លោះគ្នា

2021/12/20 10:33:58 am        1140
Facebook Telegram Linkin
ភ្នំពេញ៖ ព្រះអង្គម្ចាស់នរោត្តម ចក្រាវុធ ព្រះប្រធានស្តីទីគណបក្សហ៊្វុនស៊ិនប៉ិច បានធ្វើការអំពាវនាវដល់សមាជិក សមាជិកា ព្រឹទ្ធាចារ្យគណបក្សទាំងអស់បញ្ឈប់ការលាបពណ៌ ច្រណែនឈ្នានីសគ្នាបន្តទៀត បើស្រលាញ់ និងមានឆន្ទៈពិតប្រាកដចំពោះគណបក្សហ៊្វុនស៊ិនប៉ិចមែននោះ។ នៅក្នុងពិធីចុះសំណេះ និងសួរសុខទុក្ខដល់សមាជិក-សមាជិកា គណបក្សនៅខេត្តកំពង់ធំ កាលពី ថ្ងៃទី១៩ ខែធ្នូ ម្សិលមិញ ព្រះអង្គម្ចាស់នរោត្តម ចក្រាវុធ បានមានបន្ទូលថា បើស្រលាញ់ហ្វ៊ុនស៊ិនប៉ិច និង ចង់ឲ្យគណបក្សដែលជាកេរ្តិ៍មរតករបស់សម្តេចតា សម្តេចតាទួត ព្រះបរមរតនកោដ្ឋ ឲ្យមានភាពល្អប្រសើ ឡើងវិញ នោះគប្បីបញ្ឈប់ការឈ្លោះគ្នា ញុះញង់ឲ្យមានការរើសអើងគ្នាទៅវិញទៅមក ខណៈវប្បធម៌បែប នេះបានកើតជាយូរណាស់មកហើយចំពោះគណបក្សមួយនេះ។ព្រះអង្គម្ចាស់បានមានបន្ទួលថា«តាំងពីដើមមកខ្ញុំតែងតែឃើញ និងឮចំពោះថ្នាក់លើរបស់គណបក្សយើងឈ្លោះគ្នាជាច្រើនលើកច្រើនសារមកហើយ ហើយខ្ញុំតែងតែឆ្ងល់មូលហេតុអ្វីបានឈ្លោះគ្នារហូត យ៉ាងដូច្នេះ។ តែបើយើងរួបរួមគ្នាគណបក្សយើងនឹងល្អឡើងវិញ ដូចអ្វីដែលគណបក្សនេះបានកើតដំបូងអញ្ចឹង»។នៅក្នុងពិធីសំណេះសំណាលនោះដែរ ព្រះអង្គម្ចាស់នរោត្តម ចក្រាវុធ ក៏មានការតាំងចិត្ត និងមានជំនឿជឿជាក់ក្នុងការ ដឹកនាំរបស់ព្រះអង្គចំពោះ គណបក្សហ្វ៊ុនស៊ិនប៉ិច ឲ្យមានភាពល្អប្រសើឡើងវិញផងដែរ ខណៈនាពេលបច្ចុប្បន្នគណបក្សនេះ ពុំមានសំឡេងនៅក្នុងរដ្ឋសភា ដូចពីអតីតកាលក៏ដោយនោះ។ ព្រះអង្គម្ចាស់ក៏ណែនាំដល់សហជីវិន សហជីវិនី របស់ព្រះអង្គឲ្យមានការខិតខំធ្វើការបំរើប្រជារាស្រ្ត និងប្រទេសជាតិបន្ថែមទៀត ក្នុងការរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេសជាតិ ឲ្យកាន់តែមានការរីកចំរើនបន្ថែមទៀតនោះ។សូមបញ្ជាក់ផងដែរថា នៅចំពោះមុខព្រះភ័ក្ររបស់ព្រះអង្គម្ចាស់ នរោត្តម ចក្រាវុធ ក្រុមការងារបោះឆ្នោត និងគណៈកម្មាធិការប្រតិបត្តិ នៃគណបក្សហ៊្វុនស៊ិនប៉ិចខេត្តកំពង់ធំ និងសមាជិកសមាជិកាគ្រប់ជាន់ថ្នាក់ទូទាំងខេត្ត បានប្តេជ្ញាគាំទ្រ ដង្ហែតាមការដឹកនាំ របស់ព្រះអង្គជាប្រធានគណបក្សហ៊្វុនស៊ិនប៉ិច ដើម្បីដឹកនាំបន្តពីព្រះបិតារបស់ព្រះអង្គ សម្តេចក្រុមព្រះ នរោត្តម រណឫទ្ធិ ឱ្យគង់វង្សជាអមតៈ ក្នុងការចូលរួមបោះឆ្នោតប្រកបដោយសក្កានុពល ជោគជ័យនាពេលអនាគតខាងមុខផងដែរ៕ អត្ថបទ៖ បាន ចក់

ឯកឧត្តម ប៉ោ ភក្ត្រ័ អញ្ជើញជួបសំណេះសំណាលជាមួយលោកគ្រូ អ្នកគ្រូ​និង​សិស្សានុសិស្សថ្នាក់​ទី១២ នៅវិទ្យាល័យ ហ៊ុន សែន ឈូក

2021/12/19 03:21:38 pm        835
Facebook Telegram Linkin
កំពត៖ នៅព្រឹកថ្ងៃទី១៩ ខែធ្នូឆ្នាំ២០២១ ឯកឧត្តមឧនាយឧត្តមសេនីយ៍ ប៉ោ ភក្ត្រ័ អគ្គលេខាធិការក្រសួងមហាផ្ទៃ អញ្ជើញជួបសំណេះសំណាលជាមួយ លោកគ្រូ អ្នកគ្រូ និងសិស្សានុសិស្សថ្នាក់ទី១២ ចំនួន ៥៥៨នាក់ នៅវិទ្យាល័យ ហ៊ុន សែន ឈូក ដែលត្រូវត្រៀមប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី២៧ ខែធ្នូ ឆ្នាំ២០២១ខាងមុខនេះ។ពិធីនេះ បានធ្វើឡើងនៅវិទ្យាល័យ ហ៊ុន សែន ឈូក ស្ថិតនៅក្នុងស្រុកឈូកខេត្តកំពត ដោយ​មានការអញ្ជើញចូលរួមផងដែរពីសំណាក់លោក ខៀវ រិទ្ធីភ័ណ្ឌ អភិបាល នៃគណៈអភិបាល​ស្រុកឈូក និងសហការី លោក លោកស្រី​ សមាជិកក្រុមប្រឹក្សាស្រុក ថ្នាក់ដឹកនាំមន្ទីរ​អង្គភាព​ជុំវិញស្រុកផងដែរ។ឯកឧត្តមនាយឧត្តមសេនីយ៍ ប៉ោ ភក្ត្រ័ បានបញ្ជាក់ថា បច្ចុប្បន្នពិភពលោកស្ថិតក្នុងបរិបទ រង​ការ​ញាំញី​ដោយឥទ្ធិពលជំងឺកូវីដ១៩។ ប៉ុន្តែក្នុងនោះកម្ពុជាយើង ​ពិសេសក្នុងខេត្តកំពត ក៏​បានធូរស្បើយ​ពី​ការឆ្លងរាលដាជំងឺកូវីដ១៩ផងដែល ។ ទោះបីយ៉ាងនេះក្ដី ឯកឧត្តម ក៏បានអំពាវនាវដល់អាជ្ញាធរមូលដ្ឋាន ប្រជាពលរដ្ឋ ពិសេស លោកគ្រូ អ្នកគ្រូ សិស្សានុសិស្ស ​និងអាណាព្យាបាលទាំងអស់ត្រូវតែបន្តបង្កើនការប្រុង ប្រយ័ត្ន ​ទាំងអស់គ្នា ដើម្បីបង្ការ ទប់ស្កាត់កុំឱ្យជំងឺកូវីដ១៩នេះ ឆ្លងចូលដល់ក្នុងសហគមន៍យើង ម្តងទៀត ។នាឱកាសនោះដែរ ឯកឧត្តម ក៏បានអំពាវនាវដល់សិស្សានុសិស្ស ឱ្យបង្កើនការចូលរួម​គោរពច្បាប់​ចរាចរណ៍ ពិសេស​បញ្ចៀស​ការ​ចរាចរ​និងប្រើប្រាស់​គ្រឿងញៀន​ឱ្យបាន ព្រោះបច្ចុប្បន្ន​បញ្ហា​គ្រឿង​ញៀន ​និងបញ្ហាគ្រោះថ្នាក់ចរាចរណ៍ ​នេះវាបានបំផ្លាញអាយុជីវិត ​និងទ្រព្យសម្បត្តិ ព្រមទាំង​ធន​ធាន​មនុស្សក្នុងសង្គមកម្ពុជាយើង ​ដែលរាជរដ្ឋាភិបាលបាន និងកំពុងយកចិត្ត​ទុក​ដាក់​យ៉ាង​ខ្លាំង​៕

ឯកឧត្តមបណ្ឌិត ម៉ឹង មករា តំណាងឯកឧត្ដមបណ្ឌិត ហ៊ុន ម៉ាណែត ចូលរួមក្នុងពិធីដាក់​បញ្ជូល​យុវជនថ្មី ២៨៥នាក់ គណបក្សប្រជាជន

2021/12/19 11:17:05 am        827
Facebook Telegram Linkin
កំពង់ចាម៖ ឯកឧត្តមបណ្ឌិត ម៉ឹង មករា ជាសមាជិកក្រុមការងារថ្នាក់ជាតិចុះមូលដ្ឋានខេត្តកំពង់ចាម និងជាប្រធានក្រុមការងារជនបង្គោល ចុះជួយស្រុកជើងព្រៃ ខេត្តកំពង់ចាម និងជាតំណាងឯកឧត្ដមបណ្ឌិត ហ៊ុន ម៉ាណែត អញ្ជើញចូលរួមពិធីដាក់បញ្ជូលយុវជនថ្មី និងប្រកាសទទួលស្គាល់រចនាសម្ព័ន្ធយុវជនគណបក្សប្រជាជនកម្ពុជាថ្នាក់ស្រុក និងឃុំ នៃស្រុកជើងព្រៃ ដែលមានអ្នកចូលរួមសរុបចំនួន ២៨៥នាក់ កាលពីថ្ងៃទី១៨ ខែធ្នូ ម្សិលមិញនេះ ។ក្នុងអង្គពិធីនោះក៏មានការចូលរួមពី លោកស្រី សុភ័ក្រ សមាជិកយុវជនគណបក្សថ្នាក់កណ្ដាល និងជាប្រធានយុវជនបក្សខេត្ត ក្រុមការងារបក្សខេត្តចំនួន ៦រូប ក្រុមការងារជនបង្គោល ចំនួន១១រូប អចិន្រ្តៃយ៍ស្រុកចំនួន ២១រូប ប្រធានបក្សឃុំចំនួន១០រូប ព្រមទាំងសមាជិកបក្សផ្សេងៗទៀត។ ថ្លែងក្នុងពិធីសំណេះសំណាលនេះដែរឯកឧត្តមបណ្ឌិត ម៉ឹង មករា បាន​ផ្តាំផ្ញើ​ការសួរសុខទុក្ខពី​ឯកឧត្តមបណ្ឌិត ហ៊ុន ម៉ាណែត ប្រធានយុវជនគណបក្សថ្នាក់កណ្តាល សូមឱ្យក្រុមការងារ​គ្រប់ថ្នាក់​ទាំងអស់ ​ត្រូវយកចិត្តទុកដាក់ពង្រឹងសាមគ្គីភាពផ្ទៃក្នុង បង្កើនកិច្ចសហប្រតិបត្តិការ​លើគ្រប់វិស័យ​ដើម្បី​បម្រើការងារ និងដោះស្រាយរាល់បញ្ហានានាជូនប្រជាពលរដ្ឋនៅមូលដ្ឋានឲ្យបានល្អប្រសើរ និង​មានប្រសិទ្ធភាព​ ព្រោះគណបក្សប្រជាជនកម្ពុជា​ ប្រសូត្រ​ឡើង​ពីប្រជាជន និង​ធ្វើ​ដើម្បី​ប្រជាជន។ ក្រោមការដឹកនាំរបស់ឯកឧត្ដមបណ្ឌិត ម៉ឹង មករា និងការចង្អុលបង្ហាញដោយផ្ទាល់ពី ឯកឧត្ដម​បណ្ឌិត ហ៊ុន ម៉ាណែត ក្រុមការងារបានរួមចំណែកយ៉ាងច្រើន ក្នុងការជួយដល់កិច្ចការមនុស្សធម៌​មាន​ដូចជា វិស័យសុខាភិបាល វិស័យអប់រំ វិស័យកសិកម្ម និងការកសាងហេដ្ឋារចនាសម្ព័ន្ធជូន​ប្រជា​ពលរដ្ឋ រួមមាន ការកសាងផ្លូវថ្នល់​ សាលារៀន មន្ទីរពេទ្យ វត្តអារាម ទំនប់ទឹកប្រលាយទឹក ស្រះទឹក ​ការដាំកូនឈើលម្អអមសងខាងផ្លូវ ​ព្រមទាំងហេដ្ឋារចនាសម្ព័ន្ធផ្សេងៗទៀត ដើម្បីរួម​ចំណែក​ជាមួយរាជរដ្ឋាភិបាលក្នុងការកាត់បន្ថយភាពក្រីក្ររបស់ប្រជាពលរដ្ឋនៅតាមជនបទ ពិសេសក្នុងវិបត្តិនៃជំងឺឆ្លង កូវីដ-១៩។ជាមួយគ្នានោះដែរឯកឧត្ដមបណ្ឌិត ម៉ឹង មករា ក៏បាននាំមកជាមួយនូវអំណោយដ៏ខ្ពង់ខ្ពស់ របស់​ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ្រ ចន្ទមុន្នី រួមមាន៖ ថវិកាជូនប្រធានបក្សស្រុក ចំនួន ៥,០០០,០០០រៀល, ថវិកាជូនប្រធានយុវជនស្រុក ចំនួន ៥,០០០,០០០រៀល និងថវិកាជូនយុវជនចំនួន ១៨៥នាក់ ក្នុងមួយនាក់ៗទទួលបាន មួក អាវយឺត ក្រមា រួមជា​មួយ​ថវិការ ៥០,០០០រៀល៕

ប្រព័ន្ធធារាសាស្រ្តស្រែជ្រៃ (បាក់ខាំ) ក្នុងខេត្តមណ្ឌលគិរី ត្រូវបានបើកឲ្យប្រើប្រាស់ជាផ្លូវការ

2021/12/18 04:32:49 pm        1049
Facebook Telegram Linkin
មណ្ឌលគិរី៖ ប្រព័ន្ធធារាសាស្រ្តស្រែជ្រៃ (បាក់ខាំ) ក្នុងស្រុកកោះញែក ខេត្តមណ្ឌលគិរិ ត្រូវបានបើកឲ្យប្រើប្រាស់ជាផ្លូវការ ដើម្បីជាប្រយោជន៍ប្រជាពលរដ្ឋទូទៅ ពិសេស គឺសហគមន៍មូលដ្ឋាននោះតែម្ដង។លោក សៀ រ៉ា អនុប្រធានរដ្ឋបាលព្រៃឈើ ក្នុងពិធីសម្ពោធប្រព័ន្ធធារាសាស្ត្រ ស្រែជ្រៃ (បាក់ខាំ) កាលពីម្សិលមិញ បានឱ្យដឹងថា គម្រោងរបៀងអភិរក្សជីវៈចម្រុះ (BCCP) នៅកម្ពុជា ទទួល​បាន​ហិរញ្ញប្ប ទានឥតសំណងពីធនាគារអភិវឌ្ឍន៍អាស៊ី (ADB) ចំនួន១៩លានដុល្លារ សម្រាប់​ដំណើរ​ការអនុវត្តគម្រោង របៀងអភិរក្សជីវៈចម្រុះមហាអនុតំបន់មេគង្គ សម្រាប់ខេត្តមណ្ឌលគិរី និង​ខេត្តកោះកុង។ គោលបំណង គឺផ្តោតសំខាន់ ទី១. ជំរុញឲ្យមានប្រសិទ្ធភាព និងភាពស្របច្បាប់ដល់​សហគមន៍​មូលដ្ឋានការគ្រប់គ្រង ប្រើប្រាស់ធនធានព្រៃឈើ ​ការទទួលស្គាល់សហគមន៍ព្រៃឈើ និងព្រៃការ​ពារ​ធម្មជាតិ ទី២. ស្តារឡើងវិញ នូវព្រៃរេចរិល ធានាការដាំដុះប្រភេទឈើក្នុងស្រុក ការធ្វើ​កសិរុក្ខកម្ម ការកែឆ្នៃអនុផលព្រៃឈើ ទី៣. លើក កម្ពស់ជីវភាពសហគមន៍ ការផ្តល់ហេដ្ឋា​រចនា​សម្ព័ន្ធខ្នាតតូច និងខ្នាតមធ្យម និងទី៤ បង្កើតមុខរបរបន្ថែម ដល់គ្រួសារ ចូលរួមជាមួយ​សកម្មភាព​គម្រោង និងការទប់ទល់ទៅនឹងការបម្រែបម្រួលអាកាសធាតុ ក៏ដូច ជាការអភិវឌ្ឍសេដ្ឋកិច្ចសង្គម​នៅខេត្តមណ្ឌលគិរី។លោក ជាក់ ម៉េងហ៊ាង អភិបាលរងខេត្តមណ្ឌលគិរី បានបញ្ជាក់ថា គម្រោងរបៀងអភិរក្សជីវៈចម្រុះ មហាអនុតំបន់មេគង្គ នៅខេត្តមណ្ឌលគិរី បានចូលរួមចំណែកដល់ការគ្រប់គ្រងធនធានព្រៃឈើ ជំរុញការ ដាំស្តារព្រៃឈើឡើងវិញ នៅតំបន់ដីព្រៃរេចរិល តាមរយៈការដាំដុះ​បញ្ចូល​នូវប្រភេទ​ឈើព្រៃក្នុងស្រុក ការ ធ្វើកសិរុក្ខកម្ម បង្កើនជីវភាពសហគមន៍ និងបង្កើនប្រាក់ចំណូល​ដល់​សហគមន៍បណ្តុះបណ្តាលពង្រឹង សមត្ថភាព ថ្នាក់ក្រោមជាតិ និងសហគមន៍មូលដ្ឋាន។លោក បានបញ្ជាក់ថា គម្រោងប្រព័ន្ធធារាសាស្រ្ត (បាក់ខាំ) បានផ្តល់ផលដល់ប្រជាពលរដ្ឋ ចំនួន ៥១គ្រួសារ ដែល​អាច​ផ្គត់ផ្គង់​ទឹកស្រោចស្រពដីស្រែ ចំនួន១៧១ហិកតា។ ប្រជាសហគមន៍ ដែលទទួល ផលពីគម្រោង សរុប៥១គ្រួសារ ដែលអាចផ្គត់ផ្គង់​ទឹកស្រោចស្រព​ដីស្រែ ចំនួន១៧១ហិកតា។ គម្រោងនេះ បានដំណើរការសាងសង់កាលពីខែធ្នូ ឆ្នាំ២០១៩ និង​បញ្ចប់​ជាស្ថាពរកាលពីខែកញ្ញា ឆ្នាំ២០២០។លោកបានណែនាំដល់ប្រជាពលរដ្ឋទាំងអស់ ជាពិសេស សហគមន៍នៅតំបន់នេះ ​ត្រូវចូលរួមថែ រក្សា​ការពារទំនប់នេះ ឲ្យបានគង់វង្ស ទុកសម្រាប់ប្រើប្រាស់បង្កបង្កើនផលកសិកម្ម ​ការធ្វើចរាចរណ៍ លើក ​កម្ពស់ជីវភាពរស់នៅរបស់ប្រជាពលរដ្ឋ ​និង​បញ្ចៀស​ការ​ខ្វះខាត​ទឹកក្នុងការធ្វើកសិកម្ម និង​ឲ្យប្រជាពលរដ្ឋ ​អាចយកទៅប្រើប្រាស់ឲ្យបានល្អប្រសើរ៕អត្ថបទ៖ អ៊ិត ភីរុណ

ដីព្រៃលិចទឹកជាង ៤ម៉ឺនហិតាក្នុងខេត្តចំនួន៦ ជាប់តំបន់ទន្លេសាប ត្រូវពលរដ្ឋប្រគល់ជូនរដ្ឋវិញ

2021/12/18 04:24:12 pm        771
Facebook Telegram Linkin
ភ្នំពេញ៖ មកដល់ពេលនេះ ដីព្រៃលិចទឹកចំនួនជាង៤ម៉ឺនហិតា ក្នុងខេត្តចំនួន៦ ក្នុងតំបន់ទន្លេសាប ត្រូវបាន ពលរដ្ឋប្រគល់ជូនរដ្ឋវិញ ដើម្បីទុកជាសម្បត្តិរបស់រដ្ឋ។របាយការណ៍របស់ក្រសួងដែនដី នគរូបនីយកម្ម និងសំណង់ ដែលបានចេញផ្សាយកាលពីពេល ថ្មីៗនេះ បានបង្ហាញថា ប្រជាពលរដ្ឋប្រគល់ដីព្រៃលិចទឹកក្នុងតំបន់ទន្លេសាបជូនរដ្ឋវិញ ដោយគិតត្រឹមថ្ងៃ ទី១៧ ខែធ្នូនេះ មានជាង៤ម៉ឺនហិតា នៅក្នុងខេត្តចំនួន៦ រួមមានខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ។កន្លងទៅថ្មីៗនេះ រាជរដ្ឋាភិបាល បានបង្កើនគណៈកម្មការអន្តរក្រសួង ដឹកនាំដោយឯកឧត្តម ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចុះស្រាវជ្រាវ បង្ក្រាបបទល្មើសលួចទន្ទ្រានដីព្រៃលិចទឹក តំបន់៣ នៃខេត្តជាប់បឹងទន្លេសាប។ការបង្កើតគណៈកម្មាការនេះ ធ្វើឡើងបន្ទាប់ពីសម្តេចតេជោហ៊ុន សែន នាយករដ្ឋមន្រ្តី នៃកម្ពុជា បានចេញបទបញ្ជាយ៉ាងម៉ឺងម៉ាត់ ឱ្យក្រសួងស្ថាប័នពាក់ព័ន្ធ និងអភិបាលខេត្តជាប់បឹងទន្លេសាប ត្រូវធ្វើការ ទប់ស្កាត់ និងបង្រ្កាបជាបន្ទាន់ចំពោះការលួចកាប់ព្រៃលិចទឹកដើម្បីយកដី នៅក្នុងតំបន់បឹងទន្លេសាប ជាពិសេសនៅខេត្តកំពង់ឆ្នាំង។ ក្រៅពីនេះ សម្តេចតេជោ បានបញ្ជាទៅឧបនាយករដ្ឋមន្ត្រី ជា សុផារ៉ា ឱ្យ ដឹកនាំកិច្ចប្រជុំក្រសួង​ស្ថាប័ន​ពាក់ព័ន្ធនេះ ដើម្បីបែងចែកភារកិច្ច ក្នុងការចុះពិនិត្យ បង្ក្រាប និងរឹបអូសដី ដែលបានកាប់​ទន្ទ្រាននោះមកវិញ។បន្ទាប់ពីទទួលបានបញ្ជានេះ ក្រុមការងារ ដែលដឹកនាំដោយឯកឧត្តម ជា សុផារ៉ា បានដាក់ចេញ វិធានការជាបន្តបន្ទាប់ ព្រមទាំងរកឃើញអ្នកប្រព្រឹត្តបទមួយចំនួនផងដែរ៕អត្ថបទ៖ ទូច សោភ័ណ 

ជប៉ុននឹងផ្តល់ហិរញ្ញប្បទានឥតសំណង សម្រាប់ការពង្រីកប្រព័ន្ធផ្គត់ផ្គង់ទឹកស្អាតខេត្តស្វាយរៀង

2021/12/18 02:09:19 pm        698
Facebook Telegram Linkin
ភ្នំពេញ៖ ទីភ្នាក់ងារសហប្រតិបត្តិការជប៉ុន នឹងដាក់ជូនគម្រោងសិក្សា ការពង្រីកសមត្ថភាពប្រព័ន្ធផ្គត់ផ្គង់ទឹកស្អាតខេត្តស្វាយរៀង ទៅរដ្ឋាភិបាលរបស់ខ្លួនពិនិត្យ នឹងសម្រេច ក្នុងការផ្តល់ហិរញ្ញប្បទានឥតសំណង សម្រាប់ការអនុវត្តគម្រោងនេះ នៅក្នុងឆ្នាំ២០២២ ។លោក Yoichi Inoue ប្រធានក្រុមបេសកកម្មរបស់ទីភ្នាក់ងារ JICA តូក្យូ លើកឡើងនៅក្នុងជំនួប​ពិ​ភាក្សាការ​ងារជាមួយ​ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ​ទេសរដ្ឋមន្ត្រី រដ្ឋមន្ត្រីក្រសួង​ឧស្សា​ហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍​ថា ​ចំពោះ លទ្ធផលនៃការសិក្សា​របស់​គម្រោង​ពង្រីក​សមត្ថភាព ប្រព័ន្ធ​ផ្គត់ផ្គង់​ទឹកស្អាតខេត្តស្វាយរៀង​ គឺបាន​បញ្ចប់ជាស្ថាពរ ​ព្រមទាំងបាន ពិភាក្សា​ជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ អំពីលទ្ធផលនៃការសិក្សាចុងក្រោយ​ និងភារកិច្ចទទួលខុស ត្រូវរបស់ភាគីកម្ពុជា ក្នុងក្របខណ្ឌ​គម្រោងរួចរាល់ ក្នុងនោះតាមរបាយការណ៍នៃការសិក្សានេះ JICA នឹងដាក់ជូនទៅរដ្ឋាភិបាលជប៉ុន ពិនិត្យ និងសម្រេច ក្នុងការផ្តល់ហិរញ្ញប្បទានឥតសំណង ​សម្រាប់ការអនុវត្តគម្រោង នៅក្នុងឆ្នាំ២០២២ ខាងមុខនេះ។ចំពោះការធ្វើបច្ចុប្បន្នភាពផែនការឆ្នាំ២០២១-២០៣០ របស់រដ្ឋាករទឹកស្វយ័តក្រុងភ្នំពេញ លោកប្រធាន​ក្រុមបេសកកម្ម បានបន្តឲ្យដឹងថា បច្ចុប្បន្នការសិក្សាគឺបាន​បញ្ចប់សេចក្តីព្រាង​របាយ​ការណ៍​ហើយ ព្រមទាំងបានពិភាក្សាជាមួយជាមួយរដ្ឋាករទឹកស្វយ័ត​ ក្រុងភ្នំពេញរួចរាល់ផងដែរ, ក្នុងនោះសម្រាប់ជំហានបន្ទាប់ ​ទីប្រឹក្សាបច្ចេកទេស​ នឹងបញ្ចប់របាយការណ៍សិក្សាជាស្ថាបពរ រួចនឹងដាក់​ ជូនរដ្ឋាករទឹកស្វយ័តក្រុងភ្នំពេញ ពិនិត្យនិងផ្តល់យោបល់ចុងក្រោយ។ក្នុងជំនួបនេះ, ឯកឧត្តមកិត្តិសេដ្ឋាបណ្ឌិត ចម ប្រសិទ្ធ បានសម្តែងនូវក្តីរីករាយ ដែលបានឃើញ​នូវ​វឌ្ឍនភាព​របស់គម្រោងទាំង ២ ខាងលើ នៃគម្រោងពង្រីកសមត្ថភាពប្រព័ន្ធផ្គត់ផ្គង់​ទឹកស្អាត​ខេត្តស្វាយរៀង ​ដោយឯកឧត្តមបានបញ្ជាក់ជូនទីភ្នាក់ងារ ​JICA អំពីការ គាំទ្រចំពោះលទ្ធផល​នៃការ​សិក្សានេះ​ និងស្នើឱ្យមានការចុះហត្ថលេខាលើកំណត់ហេតុនៃកិច្ចពិភាក្សារវាងក្រសួង និងក្រុមបេសកកម្ម របស់ទីភ្នាក់ងារ JICA តូក្យូ។ ចំពោះលទ្ធផលនៃការសិក្សាវិញ ចាំបាច់ត្រូវធ្វើការកែសម្រួលថ្លៃលក់ទឹក​របស់រដ្ឋាករទឹក​ខេត្តស្វាយរៀង​ ដើម្បីធានានិរន្តភាពហិរញ្ញវត្ថុរបស់អង្គភាព ​នឹងស្នើឱ្យមានការកំណត់ថ្លៃលក់ទឹក ដោយបែងចែក​តាមប្រភេទអតិថិជន និងតាមកម្រិត ប្រើប្រាស់ និងត្រូវមានការឧបត្ថម្ភថ្លៃលក់​ទឹក​ដល់គ្រួសារក្រីក្រផងដែរ។ចំពោះការធ្វើបច្ចុប្បន្នភាពផែនការឆ្នាំ ២០២១-២០៣០ របស់រដ្ឋាករទឹកស្វយ័តក្រុងភ្នំពេញ ឯកឧត្តម បញ្ជាក់ថា នេះជាគឺ ការងារចាំបាច់ ព្រោះថា ផែនដីរដ្ឋបាលក្រុងភ្នំពេញមានការផ្លាស់ប្តូរជាច្រើន ហើយទីក្រុងក៏មានការរីកចម្រើនយ៉ាងលឿនផងដែរ។ ទន្ទឹមនឹងនេះ ឯកឧត្តមបានស្នើឱ្យទីភ្នាក់ងារ JICA សិក្សាអំពីលទ្ធភាពក្នុងការសាងសង់​រោង​ចក្រ​ប្រព្រឹត្តិកម្មសម្អាតទឹក ​នៅទីតាំងដី ​តំបន់បឹងតាមោករបស់អង្គភាព ព្រមទាំងប្រើប្រាស់​ប្រភពទឹក​ពី​បឹងតាមោក​ដោយផ្ទាល់តែម្តង៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ឯកឧត្តម គីម សុផារុន អញ្ជើញដឹកនាំប្រជុំបច្ចេកទេសនៃគណៈកម្មការការងារលើកទី៧ VECONAC តាមប្រព័ន្ធវីដេអូ
06/20/2026 06:06 PM
Facebook Telegram Linkin
បង្ក្រាបទីតាំងសង្ស័យលួចលាក់ប្រព្រឹត្តបទល្មើស Online Scams ៣ទីតាំង​ នៅ​ក្រុង​បាវិត ឃាត់ខ្លួជនបរទេស៣២នាក់
06/20/2026 06:06 PM
Facebook Telegram Linkin
មន្ត្រីជំនាញ៖ ឧក្រិដ្ឋជនប្រើប្រាស់ប្រព័ន្ធអនឡាញធ្វើជាឧបករណ៍ឆបោក លួចទិន្នន័យ បង្កវិនាសកម្មផ្នែកសេដ្ឋកិច្ច
06/20/2026 06:06 PM
Facebook Telegram Linkin
ប្រធានក្រុមការងារចុះមូលដ្ឋាន៖ គណបក្សប្រជាជនប្រកាន់ខ្ជាប់នូវឧត្តមគតិស្នេហាជាតិ និងការអភិវឌ្ឍ
06/20/2026 06:06 PM
Facebook Telegram Linkin
ទេសាភិបាលធនាគារជាតិ៖ រាជរដ្ឋាភិបាលបានផ្ដល់អាទិភាពខ្ពស់បំផុតដល់ការអភិវឌ្ឍធនធានមនុស្ស
06/20/2026 06:06 PM
Facebook Telegram Linkin
នាយឧត្តមសេនីយ៍ គន់ គីម អញ្ជើញជួបពិភាក្សាការងារជាមួយថ្នាក់ដឹកនាំ សមាគមធុរកិច្ចអតីតយុទ្ធជនវៀតណាម
06/20/2026 06:06 PM
Facebook Telegram Linkin
លោក Merz ៖ អ៊ុយក្រែនមិនអាចក្លាយជាសមាជិកសហភាពអឺរ៉ុបបានទេ ខណៈខ្លួនកំពុងស្ថិតក្នុង សង្គ្រាមបែបនេះ
06/20/2026 06:06 PM
Facebook Telegram Linkin
អ្នកការទូតបេឡារុស៖ លោក ហ្សេឡិនស្គី កំពុងព្យាយាមធ្វើឲ្យអឺរ៉ុបទាំងមូលធ្លាក់ចូលទៅក្នុងជម្លោះប្រដាប់អាវុធ
06/20/2026 05:06 PM
Facebook Telegram Linkin
លោក TRUMP និយាយថា ប្រតិបត្តិការដើម្បីផ្លាស់ប្តូរថ្នាក់ដឹកនាំគុយបា នៅតែអាចធ្វើទៅបាន
06/20/2026 05:06 PM
Facebook Telegram Linkin
មេដឹកនាំប្រឆាំងវ៉េណេស៊ុយអេឡា ធ្វើដំណើរទៅទស្សនកិច្ចសហរដ្ឋអាមេរិក បន្ទាប់ពីពិភាក្សាជាមួយរដ្ឋាភិបាលបណ្ដោះអាសន្ន
06/20/2026 03:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.