BTV NEWS

សម្ដេចធិបតីណែនាំអាជ្ញាធរពាក់ព័ន្ធគ្រប់លំដាប់ថ្នាក់ ត្រួតពិនិត្យ និងគ្រប់គ្រងឱ្យបានចំពោះទំនិញគេចពន្ធ និងខូចគុណភាព ហើយត្រូវសហការគ្នាចាត់វិធានការឱ្យបានច្បាស់លាស់

សម្ដេចធិបតីក្រើនរំឭកអាជ្ញាធរពាក់ព័ន្ធគ្រប់លំដាប់ថ្នាក់ត្រូវបន្តបង្ក្រាប Online Scams មិនត្រូវបន្ធូរដៃឡើយ

សម្ដេចតេជោ ហ៊ុន សែន អញ្ជើញជួបពិភាក្សាទ្វេភាគីជាមួយ ឯកឧត្តម លី ឈាង នាយករដ្ឋមន្ត្រីចិន

សម្ដេចតេជោ ហ៊ុន សែន អញ្ជើញចូលក្រាបថ្វាយបង្គុំគាល់ព្រះករុណាព្រះមហាក្សត្រ និងសម្តេចព្រះមហាក្សត្រី

នយោបាយ និង ការអភិវឌ្ឍន៍

កម្ពុជា-ម៉ាឡេស៊ី មានសុទិដ្ឋិនិយមខ្លាំងលើការពង្រីកទំនាក់ទំនងទ្វេភាគីពិសេសលើវិស័យពាណិជ្ជកម្ម និងវិនិយោគ

សម្តេចមហាបរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំគណៈ ប្រតិភូជាន់ខ្ពស់រាជរដ្ឋាភិបាល ធ្វើមាតុភូមិនិវត្តន៍ នាវេលាយប់ ថ្ងៃទី២៧ ខែកុម្ភៈ ឆ្នាំ២០២៤ នេះ បន្ទាប់ពីបានបំពេញទស្សនកិច្ចផ្លូវការនៅប្រទេសម៉ាឡេស៊ីប្រកបដោយជោគជ័យនាថ្ងៃកាលពីថ្ងៃទី២៧ ខែកុម្ភៈ ឆ្នាំ២០២៤ម្សិលមិញនេះ តបតាមការអញ្ជើញរបស់ ឯកឧត្តម ដាតុ ស៊េរី អាន់វ៉ា ប៊ីន ស៊ីប្រាហ៊ីម នាយករដ្ឋមន្ត្រីនៃប្រទេសម៉ាឡេស៊ី។ ទស្សនកិច្ចនេះបានធ្វើឱ្យប្រទេសទាំងពីរមានសុទិដ្ឋិនិយមកាន់តែខ្ពស់ចំពោះការពង្រឹងទំនាក់ទំនងទ្វេភាគីឱ្យកាន់តែឈានឡើងបន្ថែមទៀត ដើម្បីនាំមកនូវផលប្រយោជន៍ដល់ប្រទេស និងប្រជាជនទាំងពីរ ក៏ដូចជាផលប្រយោជន៍សម្រាប់តំបន់ និងពិភពលោកទាំងមូល។ក្នុងក្របខ័ណ្ឌនយោបាយ និងការទូតសម្តេចធិបតី ត្រូវបានទទួលបដិសណ្ឋារកិច្ចយ៉ាង អធិកអធម ដោយឥស្សរជនជាន់ខ្ពស់ម៉ាឡេស៊ី អមដោយកងកិត្តិយសនៅអាកាសយានដ្ឋានអន្តរជាតិប្រទេសម៉ាឡេស៊ី មុននឹងទទួលការស្វាគមន៍ដោយ ឯកឧត្ដម ជាតុ ស៊េរី អាន់វ៉ា ប៊ីន ស៊ីប្រាហ៊ីម នៅការិយាល័យនាយករដ្ឋមន្ត្រី ដើម្បីដឹកនាំកិច្ចប្រជុំទ្វេភាគី។ ក្នុងកិច្ចប្រជុំនោះនាយករដ្ឋមន្ត្រីទាំងពីរ បានបង្ហាញការស្វាគមន៍ និងពេញចិត្តចំពោះការផ្លាស់ប្តូរទស្សនកិច្ចរវាងមេដឹកនាំប្រទេសទាំងពីរជាបន្តបន្ទាប់។ ក្នុងកិច្ចប្រជុំទ្វេភាគីនោះដែរ នាយករដ្ឋមន្ត្រីទាំងពីរ បានវាយតម្លៃខ្ពស់លើលទ្ធផលនៃកិច្ចសហប្រតិបត្តិការ ទ្វេភាគីកន្លងមក និងបានផ្លាស់ប្តូរយោបល់អំពីការពង្រឹង និងពង្រីកកិច្ចសហប្រតិបត្តិការលើវិស័យជាច្រើន រួមមាន វិស័យនយោបាយ ការពារជាតិ សន្តិសុខ ពាណិជ្ជកម្ម និងវិនិយោគ ទេសចរណ៍ ឧស្សាហកម្មអាហារហាឡាល់ ការងារ ទូរគមនាគមន៍ និងបច្ចេកវិទ្យាព័ត៌មាន បច្ចេកវិទ្យាឌីជីថល និងសន្តិសុខថាមពល។ ភាគីទាំងពីរក៏បាន ពិភាក្សាក្នុងការពិនិត្យលទ្ធភាពពង្រីកជើងហោះហើរផ្ទាល់ពីម៉ាឡេស៊ីទៅកាន់តំបន់ទេសចរណ៍សំខាន់ៗរបស់កម្ពុជា ដូចជាខេត្តសៀមរាបជាដើម។ ជាការកត់សម្គាល់នៅក្នុងវិស័យការពារជាតិភាគីទាំងពីរបានឯកភាពបន្តជំរុញនូវ កិច្ចសហប្រតិបត្តិការរួមមាន ការបណ្តុះបណ្តាលធនធានមនុស្ស ការកសាងសមត្ថភាព ការផ្លាស់ប្តូរព័ត៌មាន និងការធ្វើលំហាត់រួមគ្នាព្រមទាំងបានឯកភាពគាំទ្រការសម្របសម្រួល សម្រាប់គម្រោងខ្សែបញ្ជូនថាមពលក្រោមសមុទ្រ (ឡាវ-កម្ពុជា-សិង្ហបុរី) ឆ្លងកាត់បាតសមុទ្ររបស់ប្រទេសម៉ាឡេស៊ី និងបានឯកភាពពិនិត្យលទ្ធភាពរៀបចំកិច្ចប្រជុំគណៈកម្មការចម្រុះកិច្ចសហប្រតិបត្តិការទ្វេភាគី (JCBC) ដឹកនាំដោយរដ្ឋមន្ត្រីការបរទេសនៃប្រទេសទាំងពីរ។នាឱកាសដ៏វិសេសវិសាលនោះដែរ សម្តេចធិបតី បានអញ្ជើញដឹកនាំគណៈប្រតិភូជាន់ខ្ពស់រាជរដ្ឋាភិបាល ចូលក្រាបថ្វាយបង្គំគាល់ ព្រះចៅ ព្រះមហាក្សត្រទី១៧ នៃប្រទេសម៉ាឡេស៊ី ជាទីគោរពសក្ការៈដ៏ខ្ពង់ខ្ពស់ នៅព្រះបរមរាជវាំង និងបានចូលជួបសម្តែងការគួរសមជាមួយ ឯកឧត្ដម ប្រធានព្រឹទ្ធសភា និង ឯកឧត្ដម ប្រធានរដ្ឋសភាម៉ាឡេស៊ី។ក្នុងក្របខ័ណ្ឌសេដ្ឋកិច្ច ពាណិជ្ជកម្ម និងវិនិយោគ នាយករដ្ឋមន្ត្រីទាំងពីរ បានអញ្ជើញជា អធិបតីក្នុងពិធីចុះហត្ថលេខាលើអនុស្សរណៈយោគយល់រវាងធនាគារជាតិនៃកម្ពុជា និងធនាគារកណ្ដាលម៉ាឡេស៊ី។ អនុស្សរណៈនេះមានវិសាលភាពគ្របដណ្តប់លើទម្រង់ជាច្រើនក្នុងការតភ្ជាប់ប្រព័ន្ធទូទាត់នៃប្រទេសទាំងពីរ រាប់បញ្ចូលទាំងការទូទាត់ក្នុងស្រុករវាងប្រទេសទាំងពីរ ដើម្បីបើកលទ្ធភាពដល់ការទូទាត់ឆ្លងដែនតាម QR Code ក្នុងនោះរួមទាំងការផ្តល់ភាពងាយស្រួលដល់ប្រជាពលរដ្ឋម៉ាឡេស៊ីអាចទូទាត់ដោយស្ទែន QR Code នៅប្រទេសកម្ពុជា ហើយប្រជាពលរដ្ឋកម្ពុជាក៏អាចទូទាត់ដោយស្ទែន QR Code នៅប្រទេសម៉ាឡេស៊ីបានដូចគ្នា ដោយប្រើប្រាស់ រូបិយវត្ថុក្នុងស្រុកសម្រាប់ការទូទាត់។ អនុស្សរណៈនេះ ក៏នឹងជួយគាំទ្រដល់យន្តការនៃកិច្ចសហការត្រួតពិនិត្យការ ទូទាត់ឆ្លងដែនឱ្យកាន់តែមានប្រសិទ្ធភាពនិងសុវត្ថិភាពផងដែរ។ជាមួយវិស័យឯកជនវិញ សម្តេចធិបតី បានអញ្ជើញជាអធិបតីក្នុង វេទិកាធុរកិច្ចកម្ពុជា-ម៉ាឡេស៊ី ដែល រៀបចំឡើងដោយ សភាពាណិជ្ជកម្មកម្ពុជា សភាពាណិជ្ជកម្មម៉ាឡេស៊ីនៅកម្ពុជា និងសភាពាណិជ្ជកម្មនិងឧស្សាហកម្ម ជាតិម៉ាឡេស៊ី។ វេទិកានេះមានការអញ្ជើញចូលរួមពីក្រុមហ៊ុននៃប្រទេសទាំងពីរ និងតំណាងគឺសាប័នពាក់ព័ន្ធសរុប ជាង៤០០នាក់។ សម្តេចធិបតី ក៏បានអញ្ជើញធ្វើជាសាក្សីក្នុងពិធីចុះហត្ថលេខាលើអនុស្សរណៈយោគយល់គ្នារវាង សភា ពាណិជ្ជកម្មនិងឧស្សាហកម្មជាតិម៉ាឡេស៊ី និងសភាពាណិជ្ជកម្មម៉ាឡេស៊ីនៅកម្ពុជា ដើម្បីចូលរួមលើកកម្ពស់ទំនាក់ ទំនងពាណិជ្ជកម្ម សេដ្ឋកិច្ច និងជំរុញកាលានុវត្តភាពធុរកិច្ចរវាងប្រទេសទាំងពីរ។ ក្រៅពីនេះ សម្តេចធិបតី បាន ទទួលជួបប្រធាននិងជានាយកប្រតិបត្តិធនាគារ MAYBANK ដែលជាធនាគារបានចាប់ផ្តើមសកម្មភាពធុរកិច្ចនៅ កម្ពុជាតាំងពីឆ្នាំ១៩៩៣។សូមបញ្ជាក់ជូនថា នេះជាដំណើរទស្សនកិច្ចក្រៅប្រទេសលើកទី១១ របស់ សម្តេចធិបតី ក្នុងនាមជានាយករដ្ឋមន្ត្រី នៃព្រះរាជាណាចក្រកម្ពុជា។ ដំណើរទស្សនកិច្ចពេញមួយថ្ងៃរបស់ប្រមុខរាជរដ្ឋាភិបាលកម្ពុជា និងគណៈប្រតិភូជាន់ខ្ពស់នៅប្រទេសម៉ាឡេស៊ីនាពេលនេះ បានបង្ហាញពីការងារការទូតដ៏សកម្មក្លៀវក្លាមិនខ្លាចនឿយហត់របស់សម្តេចធិបតី ដើម្បីស្វែងរកឧត្តមប្រយោជន៍ជូនជាតិមាតុភូមិ និងប្រជាជន៕

សហគ្រាសអ៊ុយក្រែនជាង ៩០% ចាប់ផ្តើមប្រតិបត្តិការឡើងវិញ ទោះបីជាសង្រ្គាមកំពុងបន្តក៏ដោយ

នាយករដ្ឋមន្ត្រីអ៊ុយក្រែន លោក ដេនីស៍ ស្មីហាល (Denys Shmyhal) បាននិយាយកាលពីថ្ងៃចន្ទ (២៦ កុម្ភៈ) ថាសហគ្រាសអ៊ុយក្រែនជាង ៩០ ភាគរយបានដំណើរការឡើងវិញ បើទោះបីជាកំពុងមានជម្លោះជាមួយរុស្ស៊ីក៏ដោយ។លោក ស្មីហាល បាននិយាយនៅក្នុងវេទិកាធុរកិច្ចក្រោមប្រធានបទ «ផលិតនៅអ៊ុយក្រែន» នៅរដ្ឋធានីគីវ ថា «មកដល់ពេលនេះ សហគ្រាសអ៊ុយក្រែនជាង ៩០ ភាគរយបានបន្តការងារ ហើយកំពុងខិតទៅរកសមត្ថភាពសេវាកម្មមុនសង្រ្គាមរបស់ពួកគេ»។នាយករដ្ឋមន្ត្រីអ៊ុយក្រែនរូបនេះបានបន្ថែមថា វិស័យជាច្រើនដូចជាសំណង់ កសិកម្ម ពាណិជ្ជកម្មក្នុងស្រុក និងឧស្សាហកម្មកែច្នៃ បានមើលឃើញល្បឿននៃការងើបឡើងវិញលឿនបំផុត ហើយកត្តាចំបងដែលជួយរក្សាអាជីវកម្មអ៊ុយក្រែននៅស្របពេលមានជម្លោះគឺការសម្របខ្លួន ការគ្រប់គ្រងវិបត្តិ និងកម្មវិធីគាំទ្រពីរដ្ឋ។គិតត្រឹមខែតុលា ឆ្នាំ២០២៣ សហគ្រាសប្រហែល ៨៤០ ស្ថាប័ននៅអ៊ុយក្រែនត្រូវបានផ្លាស់ប្តូរទីតាំងទៅកាន់តំបន់ដែលមានសុវត្ថិភាពនៅក្នុងប្រទេស។ យោងតាមធនាគារកណ្តាលរបស់អ៊ុយក្រែនបានឱ្យដឹងថា ផលិតផលក្នុងស្រុកសរុបរបស់ខ្លួនបានកើនឡើង ៥ ភាគរយនៅឆ្នាំ២០២៣ បន្ទាប់ពីបានធ្លាក់ចុះ ២៩,២ ភាគរយកាលពីឆ្នាំ២០២២៕

សម្ដេចធិបតី ហ៊ុន ម៉ាណែត អនុញ្ញាតឲ្យនាយកគ្រប់គ្រងក្រុមប្រឹក្សាធុរកិច្ចអាមេរិក-អាស៊ាន រួមនឹងប្រតិភូបណ្ដាក្រុមហ៊ុនវិនិយោគ ១៧ ជួបពិភាក្សាការងារ

នាព្រឹកថ្ងៃទី២៨ ខែកុម្ភៈ ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឲ្យលោក Brian D. McFeeters អនុប្រធានជាន់ខ្ពស់ និងជានាយកគ្រប់គ្រងក្រុមប្រឹក្សាធុរកិច្ចអាមេរិក-អាស៊ាន រួមជាមួយគណៈប្រតិភូចូលរួមពីបណ្តាក្រុមហ៊ុនវិនិយោគរបស់សហអាមេរិកចំនួន ១៧ ចូលជួបសម្ដែងការគួរសម និងពិភាក្សាការងារ នៅវិមានសន្តិភាព។ ក្រុមហ៊ុនវិនិយោគទាំង១៧ រួមមាន៖១. ក្រុមហ៊ុន Abbott ប្រចាំកម្ពុជា ជាប្រភេទក្រុមហ៊ុនធ្វើអាជីវកម្មលើអាហារូប្ថម្ភ (Nutrition) ២. ក្រុមហ៊ុន ADM ដែលជាក្រុមហ៊ុនឈានមុខលើការផ្គត់ផ្គង់ផលិតផលអាហារ និងភេសជ្ជៈ ៣. ក្រុមហ៊ុន Chevron ដែលជាក្រុមហ៊ុនមេរបស់ក្រុមហ៊ុន Caltex ៤. ក្រុមហ៊ុន ConocoPhilips ដែលជាក្រុមហ៊ុនឈានមុខមួយលើពិភពលោក ក្នុងផ្នែករុករក និងផលិត ប្រេងឥន្ធនៈ និងឧស្ម័នធម្មជាតិ ៥. ក្រុមហ៊ុន Estée Lauder Companies ដែលជាក្រុមហ៊ុនផលិត ធ្វើទីផ្សារ និងចែកចាយផលិតផលគ្រឿងសម្អាង ៦. ក្រុមហ៊ុន FedEx Express គឺជាក្រុមហ៊ុនដែលផ្គត់ផ្គង់លើសេវាកម្មដឹកជញ្ជូន ពាណិជ្ជកម្មអេឡិចត្រូនិក (e-commerce) និងសេវាកម្មធុរកិច្ច៧. ក្រុមហ៊ុន Ford ដែលជាក្រុមហ៊ុនផលិត និងតម្លើងរថយន្តដ៏ល្បីល្បាញរបស់អាមេរិក ៨. ក្រុមហ៊ុន Jhpiego ដែលជាក្រុមហ៊ុនធ្វើអាជីវកម្មលើវិស័យសុខាភិបាល ៩. ក្រុមហ៊ុនធានារ៉ាប់រង Manulife ១០. ក្រុមហ៊ុន Mastercard ដែលជាក្រុមហ៊ុនផ្តល់សេវាទូទាត់ហិរញ្ញវត្ថុទូទាំងសកលលោក ១១. ក្រុមហ៊ុន Meta ដែលជាក្រុមហ៊ុនមេរបស់បណ្តាញសង្គម Facebook និង Instagram ១២. ក្រុមហ៊ុន Pfizer ប្រចាំប្រទេសថៃ និងឧបទ្វីបឥណ្ឌូចិន ។ Pfizer គឺជាក្រុមហ៊ុនផលិតឱសថ និងវ៉ាក់សាំងឈានមុខមួយរបស់អាមេរិក ១៣. ក្រុមហ៊ុន Philip Morris International ១៤. ក្រុមហ៊ុន RMA Group ដែលជាក្រុមហ៊ុនឈានមុខក្នុងការនាំចូល និងតំឡើងរថយន្ត, សម្ភារបរិក្ខារ, សេវាកម្ម និង franchises លើផ្នែកម្ហូបអាហារ ១៥. ក្រុមហ៊ុន Roche ដែលជាក្រុមហ៊ុនផ្តោតលើបរិវត្តកម្មបច្ចេកវិទ្យាលើវិស័យសុខាភិបាល ១៦. ក្រុមហ៊ុន Tilleke & Gibbins ដែលជាក្រុមហ៊ុនផ្តល់សេវាកម្មមេធាវី ១៧. ក្រុមហ៊ុន Visa ដែលជាក្រុមហ៊ុនផ្តល់សេវាទូទាត់ហិរញ្ញវត្ថុទូទាំងសកលលោក ៕

ភាគីជម្លោះហ្កាហ្សា ប្រុងប្រយ័ត្នលើកិច្ចចរចាបទឈប់បាញ់ បន្ទាប់ពីលោក Biden ថាកិច្ចព្រមព្រៀងជិតសម្រេច

អ៊ីស្រាអែល និងក្រុមហាម៉ាស ក៏ដូចជាអ្នកសម្រុះសម្រួលកាតា ទាំងអស់បានកត់សម្គាល់ពីការប្រុងប្រយ័ត្នកាលពីថ្ងៃអង្គារ (២៧ កុម្ភៈ) អំពីវឌ្ឍនភាពឆ្ពោះទៅរកបទឈប់បាញ់នៅហ្កាហ្សា បន្ទាប់ពីប្រធានាធិបតីសហរដ្ឋអាមេរិក លោក ចូ បៃដិន បាននិយាយថា លោកជឿថាបទឈប់បាញ់ អាចសម្រេចបានក្នុងរយៈពេលតិចជាងមួយសប្តាហ៍ ដើម្បីបញ្ឈប់សង្រ្គាមក្នុងពេលបុណ្យរ៉ាម៉ាដាន។ក្រុមហាម៉ាស កំពុងថ្លឹងថ្លែងលើសំណើមួយ ដែលយល់ព្រមដោយអ៊ីស្រាអែល ក្នុងកិច្ចពិភាក្សាជាមួយអ្នកសម្រុះសម្រួលក្នុងទីក្រុងប៉ារីស កាលពីសប្តាហ៍មុន សម្រាប់បទឈប់បាញ់រយៈពេល ៤០ ថ្ងៃ ដែលនឹងក្លាយជាបទឈប់បាញ់រយៈពេលយូរលើកដំបូងនៃសង្រ្គាមរយៈពេលប្រាំខែ ខណៈភាគីទាំងពីរបញ្ជូនគណៈប្រតិភូទៅកាតា ក្នុងសប្តាហ៍នេះដើម្បីសិក្សាព័ត៌មានលម្អិត។យោងតាមប្រភពជិតស្និទ្ធនឹងកិច្ចចរចាបទឈប់បាញ់នេះបានឱ្យដឹងថា សំណើទីក្រុងប៉ារីស នឹងមើលឃើញពួកសកម្មប្រយុទ្ធដោះលែងចំណាប់ថ្នូរមួយចំនួន ជាថ្នូរនឹងការដោះលែងអ្នកជាប់ឃុំប៉ាឡេស្ទីនរាប់រយនាក់នៅអ៊ីស្រាអែល កំណើនជំនួយមនុស្សធម៌សម្រាប់តំបន់ហ្កាហ្សា និងការដកខ្លួនរបស់ទាហានអ៊ីស្រាអែល ពីតំបន់ហ៊ុមព័ទ្ធដែលមានប្រជាជនយ៉ាងក្រាស់ក្រែលនេះ។ប៉ុន្តែសំណើនេះហាក់ដូចជាមិនបំពេញតម្រូវការចម្បងរបស់ក្រុមហាម៉ាស ដែលថាកិច្ចព្រមព្រៀងត្រូវរួមបញ្ចូលផ្លូវច្បាស់លាស់ឆ្ពោះទៅរកការបញ្ចប់ជាអចិន្ត្រៃយ៍នៃសង្គ្រាម និងការដកទ័ពរបស់អ៊ីស្រាអែល៕

ប្រទេសចិន ជំរុញឱ្យរដ្ឋនុយក្លេអ៊ែរធំៗចរចាលើសន្ធិសញ្ញា «មិនប្រើប្រាស់មុន»

នាយកដ្ឋានគ្រប់គ្រងអាវុធរបស់ក្រសួងការបរទេសចិនបាននិយាយថា បណ្ដារដ្ឋដែលមានឃ្លាំងអាវុធនុយក្លេអ៊ែរធំជាងគេគួរតែចរចាលើសន្ធិសញ្ញាស្តីពី «ការមិនប្រើប្រាស់អាវុធនុយក្លេអ៊ែរមុន» ប្រឆាំងនឹងគ្នាទៅវិញទៅមក ឬធ្វើសេចក្តីថ្លែងការណ៍នយោបាយទាក់ទងនឹងបញ្ហានេះ។ទីភ្នាក់ងារព័ត៌មានចិនស៊ិនហួ (Xinhua) បាននិយាយនៅថ្ងៃពុធ (២៨ កុម្ភៈ) នេះថាអគ្គនាយកនៃនាយកដ្ឋាន លោក ស៊ុន សាវប៉ូ (Sun Xiaobo) បានអំពាវនាវឱ្យបណ្ដារដ្ឋនុយក្លេអ៊ែរ បំពេញ «ទំនួលខុសត្រូវជាពិសេស និងជាអាទិភាព» របស់ពួកគេ លើការរំសាយអាវុធនុយក្លេអ៊ែរ យោងតាមសន្និសីទអង្គការសហប្រជាជាតិស្តីពីការរំសាយអាវុធ ដែលស្វះស្វែងរកការទប់ស្កាត់សង្គ្រាមនុយក្លេអ៊ែរ។ក្នុងអំឡុងពេលកិច្ចប្រជុំប្រចាំសប្តាហ៍របស់វេទិកាសន្និសីទនេះនៅទីក្រុងហ្សឺណែវ កាលពីថ្ងៃចន្ទ លោក ស៊ុន បាននិយាយថា ស្ថាប័នគួរតែកំណត់ផែនទីបង្ហាញផ្លូវ ឬកាលវិភាគលើច្បាប់អន្តរជាតិដែលនឹងការពាររដ្ឋដែលមិនមានអាវុធនុយក្លេអ៊ែរ ពីការគំរាមកំហែងនៃអាវុធនុយក្លេអ៊ែរ។បច្ចុប្បន្ន ចិន និងឥណ្ឌា គឺជាមហាអំណាចនុយក្លេអ៊ែរតែពីរគត់ ដែលរក្សាជាផ្លូវការនូវគោលនយោបាយមិនប្រើប្រាស់នុយក្លេអ៊ែរមុន ខណៈរុស្ស៊ី និងសហរដ្ឋអាមេរិក មានឃ្លាំងអាវុធនុយក្លេអ៊ែរដ៏ធំបំផុតក្នុងពិភពលោក៕

លោកស្រី ហាលី ព្រមានថាលោក Trumpនឹងជ្រើសរើសយកលោក Putin ចោលសម្ព័ន្ធមិត្តអាមេរិក

ខណៈកំពុងថ្លែងនៅឯការប្រមូលផ្ដុំមួយក្នុងរដ្ឋ ខូឡូរ៉ាដូ (Colorado) កាលពីថ្ងៃអង្គារទី២៧ខែកុម្ភៈ បេក្ខជនប្រធានាធិបតីមកពីគណបក្សសាធារណរដ្ឋលោកស្រី នីគីហាលី(Nikki Haley)បានរម្លឹកដល់ក្រុមអ្នកគាំទ្ររបស់លោកស្រីពីការអត្ថាធិប្បាយថ្មីៗពីសំណាក់លោក Donald Trump ជំរុញឲ្យប្រធានាធិបតីរុស្ស៊ី Vladimir Putin ឈ្លានពានសម្ព័ន្ធមិត្តសហរដ្ឋអាមេរិក។អតីតអភិបាលរដ្ឋសោត ខារ៉ូឡាយណា (South Carolina)វ័យ៥២ឆ្នាំរូបនេះ បានថ្លែងទៅកាន់ក្រុមអ្នកគាំទ្រនៅក្នុងទីក្រុង សេនធិននៀល (Centennial) មុនការបោះឆ្នោតបឋមរបស់រដ្ឋនេះ នៅថ្ងៃទី៥ខែ មីនា ។ លោកស្រីហាលី បាននិយាយថាលោក Trump នឹងមិនអាចយកឈ្នះក្នុងការបោះឆ្នោតសកលបានទេ ហើយថាប្រធានាធិបតីបន្ទាប់របស់សហរដ្ឋអាមេរិក នឹងជាស្ត្រី នោះគឺនឹងជារូបលោកស្រី ឬ លោកស្រី កាម៉ាឡាហារីស( Kamala Harris)។លោកស្រីហាលី គឺជាបេក្ខភាពមកពីគណបក្សសាធារណរដ្ឋតែម្នាក់គត់កំពុងបន្តការប្រកួតប្រជែងយ៉ាងស្វិតស្វាញទល់នឹងលោក Donald Trump ដើម្បីដណ្ដើមយកការតែងតាំងជាបេក្ខជនប្រធានាធិបតី ទៅប្រជែងជាមួយលោកប្រធានាធិបតី Joe Bidenមកពីគណបក្សប្រជាធិបតេយ្យនៅក្នុងការបោះឆ្នោតសកលនៅខែវិច្ឆិកាឆ្នាំ២០២៤នេះ។ គួររម្លឹកថា កាលពីថ្ងៃទី១០ខែកុម្ភៈ លោក Donald Trump ធ្លាប់បាននិយាយថា លោកនឹងជំរុញឲ្យរុស្ស៊ីវាយប្រហារសមាជិកណាតូណាមួយ ដែលមិនបង់លុយគ្រប់ឲ្យសម្ព័ន្ធយោធាលោកខាងលិច។ លោកបន្តថាសហរដ្ឋអាមេរិក នឹងមិនជួយប្រទេសណាដែលមិនបង់លុយឲ្យណាតូនោះទេ ដែលនាំឲ្យមានក្ដីបារម្ភនិងការឆ្លើយតបជាបន្តបន្ទាប់ពីបណ្ដារដ្ឋជាសមាជិកសម្ព័ន្ធនេះ៕

លោក Biden និងមេដឹកនាំសភា ជួបប្រជុំគ្នា ខណៈការបិទរដ្ឋាភិបាល ខិតជិតមកដល់

ដោយមានការបិទរដ្ឋាភិបាលដោយផ្នែកនៅប៉ុន្មានថ្ងៃខាងមុខ រហូតមកដល់ពេលនេះ មានការវិវឌ្ឍតិចតួចពីសភាសហរដ្ឋអាមេរិកលើសេចក្តីស្នើច្បាប់ចំណាយ។ ភាពវឹកវរផ្នែកនយោបាយ នៅតែមាននៅខាងមុខ ខណៈសមាជិកសភា ពុំយល់ស្របលើការផ្តល់មូលនិធិ និងជំនួយ ដល់សម្ព័ន្ធមិត្តរបស់សហរដ្ឋអាមេរិក។ មេដឹកនាំព្រឹទ្ធសភាដែលមានសំឡេងភាគច្រើន លោក Chuck Schumer បាននិយាយថា លោក សង្ឃឹមថានៅប៉ុន្មានថ្ងៃខាងមុខនេះ សមាជិកសភាគណបក្សសាធារណរដ្ឋ ដែលមានការគិតហ្មត់ចត់ អាចធ្វើការជាមួយគណបក្សប្រជាធិបតេយ្យ ដើម្បីស្វែងរកផ្លូវចេញពីការគំរាមបិទរដ្ឋាភិបាល។ សេចក្តីស្នើច្បាប់ចំណាយនេះ ត្រូវបានរៀបចំឡើងដោយក្រុមអ្នកប្រកាន់តឹងអភិរក្សនិយម ជាអ្នកដែលបានបង្កើតការប្រឆាំងផ្ទាល់ខ្លួន ក្នុងជួរគណបក្សសាធារណរដ្ឋ។ ពួកគេចង់ឃើញការកាត់បន្ថយការចំណាយ និងជំហរគោលនយោបាយ ដែលបានដាក់បញ្ចូលទៅក្នុងរបៀបថាតើត្រូវចំណាយប្រាក់ដុល្លារដោយរបៀបណា និងការនាំឲ្យរដ្ឋាភិបាលឈានទៅដល់មាត់ជ្រោះនៃការបិទរដ្ឋាភិបាល ឬការបិទដោយផ្នែក ដែលបានកើតឡើងបីដងក្នុងរយៈពេលប្រាំមួយខែកន្លងទៅនេះ។ បច្ចុប្បន្ននេះ សមាជិកមួយចំនួន កំពុងគំរាម បណ្តេញ លោក Mike Johnson ចេញពីតំណែងប្រធានសភា ប្រសិនបើលោកអនុញ្ញាតឱ្យបោះឆ្នោតលើ សេចក្តីស្នើច្បាប់ជំនួយបរទេស ៩៥ ពាន់លានដុល្លារ ដែលបានអនុម័តដោយព្រឹទ្ធសភា និងមានការគាំទ្រពីគណបក្សទាំងពីរលើសលប់។ រហូតមកដល់ពេលនេះ លោក Johnson បានទប់ទល់ទៅនឹងការដាក់ច្បាប់ផ្តល់ជំនួយសម្រាប់ការបោះឆ្នោតនៅក្នុងសភា។ នោះហើយជាមូលហេតុ ដែលសេតវិមានបង្កើនការវាយប្រហារផ្ទាល់ខ្លួនលើលោក Johnson សម្រាប់ការទប់ស្កាត់សេចក្តីស្នើច្បាប់ ដែលប្រធានាធិបតី លោក Joe Biden គាំទ្រ។ កាលពីថ្ងៃអង្គារ លោក Biden បានជួបជាមួយសមាជិកជាន់ខ្ពស់គណបក្សប្រជាធិបតេយ្យ និងគណបក្សសាធារណរដ្ឋ នៅក្នុងសភា ដើម្បីពិភាក្សាអំពីជំនួយដល់ប្រទេសអ៊ុយក្រែន អ៊ីស្រាអែល និងការបិទរដ្ឋាភិបាល ដែលកំពុងខិតចូលជិតមកដល់។ ការបិទរដ្ឋាភិបាល នឹងធ្វើឱ្យប៉ះពាល់ដល់សេដ្ឋកិច្ចយ៉ាងខ្លាំង ហើយលោក គិតថាយើងទាំងអស់គ្នាយល់ស្របទៅនឹងរឿងនេះ ហើយយើងត្រូវការដំណោះស្រាយរវាងគណបក្សបក្សទាំងពីរ។

សម្ព័ន្ធមិត្តណាតូ ច្រានចោលគំនិតរបស់ប្រធានាធិបតីបារាំង ក្នុងការបញ្ជូនកងទ័ពទៅអ៊ុយក្រែន

ប្រទេសជាសមាជិកសម្ព័ន្ធយោធាណាតូ មួយចំនួន រួមទាំងសហរដ្ឋអាមេរិក អាល្លឺម៉ង់ និងចក្រភពអង់គ្លេស បានច្រានចោលការបញ្ជូនកងទ័ពទៅកាន់ប្រទេសអ៊ុយក្រែន បន្ទាប់ពីលោកប្រធានាធិបតីបារាំង Emmanuel Macron បាននិយាយថា លោកមិនច្រានចោលក្នុងការបញ្ជូនកងទ័ពនោះទេ។ លោក Macron បាននិយាយថា ពុំមានការស្របមតិគ្នាជាឯកច្ឆ័នលើការបញ្ជូនកងទ័ពលោកខាងលិចទៅអ៊ុយក្រែនទេ។កងទ័ពរុស្ស៊ី ទើបតែដណ្ដើមបានទីក្រុងមួយថ្មីៗនេះនៅក្នុងប្រទេសអ៊ុយក្រែន ហើយទីក្រុងគីវ បានពន្លឿនការអំពាវនាវសុំអាវុធបន្ថែមទៀតពីសម្ព័ន្ធមិត្តលោកខាងលិច។ លោក Macron បានប្រាប់សន្និសីទសារព័ត៌មានកាលពីល្ងាចថ្ងៃចន្ទ ថា យើងមិនគួរច្រានចោលថា អាចមានភាពចាំបាច់សម្រាប់សន្តិសុខដែលត្រូវពិចារណាលើការបញ្ជូនកងទ័ពនោះទេ។ប៉ុន្តែលោកបញ្ជាក់ឲ្យច្បាស់ថា ប្រទេសបារាំងនៅតែរក្សាជំហរបស់ខ្លួន ជាភាពមិនច្បាស់លាស់ជាយុទ្ធសាស្ត្រដែលលោកនៅតែត្រៀម។ អត្ថាធិប្បាយរបស់លោក Macron នាំឲ្យមានការឆ្លើយតបពីសហភាពអឺរ៉ុប និងប្រទេសជាសមាជិករបស់សម្ព័ន្ធយោធាណាតូ។ លោកប្រធានាធិបតី Biden បានបញ្ជាក់ច្បាស់ថា សហរដ្ឋអាមេរិក នឹងមិនបញ្ជូនទាហានទៅប្រយុទ្ធនៅក្នុងប្រទេសអ៊ុយក្រែនឡើយ។ អធិការបតីអាល្លឺម៉ង់ លោកអូឡាហ្វ សូល(Olaf Scholz) និយាយថា ប្រទេសលោកពុំមានការកែប្រែជំហរទេ ដែលបានព្រមព្រៀងគ្នារួចមកហើយថា ប្រទេសសមាជិកសហភាពអឺរ៉ុប ឬរដ្ឋជាសមាជិកណាតូ នឹងមិនបញ្ជូនកងទ័ពទៅអ៊ុយក្រែនជាដាច់ខាត។ អ្នកនាំពាក្យនាយករដ្ឋមន្ត្រីអង់គ្លេសលោក រីស៊ី ស៊ូណាក់(Rishi Sunak) បាននិយាយថា ប្រទេសនេះគ្មានផែនការបញ្ជូនកងទ័ពទ្រង់ទ្រាយធំទៅអ៊ុយក្រែនលើសពីចំនួនកងទ័ពដែលកំពុងហ្វឹកហាត់កងកម្លាំងអ៊ុយក្រែននោះទេ៕

ចិន អះអាងអធិបតេយ្យភាពលើដែនទឹកសមុទ្រចិនខាងត្បូង បន្ទាប់ពីរូបភាពផ្កាយរណបបង្ហាញរបាំងបណ្ដែតទឹកថ្មី

ក្រសួងការបរទេសចិន កាលពីថ្ងៃចន្ទ (២៦ កុម្ភៈ) បានអះអាងសារជាថ្មីអំពីអធិបតេយ្យភាពរបស់ប្រទេសចិន លើតំបន់ថ្មប៉ប្រះទឹក ស្កាបូរ៉ូ ស្ហូល (Scarborough Shoal) ក្នុងសមុទ្រចិនខាងត្បូងដែលមានជម្លោះ បន្ទាប់ពីរូបភាពពីផ្កាយរណបបង្ហាញពីរបាំងបណ្តែតថ្មីឆ្លងកាត់ច្រកចូលរបស់ដែនទឹកនេះ។រូបភាពមួយក្នុងចំណោមរូបភាពដែលថតដោយផ្កាយរណបរបស់ក្រុមហ៊ុន ម៉ាកហ៊្សា តិចណូឡូជីស៍ (Maxar Technologies) កាលពីថ្ងៃទី២២ ខែកុម្ភៈ និងត្រូវបានមើលឃើញដោយសារព័ត៌មានរ៉យទ័រ បានបង្ហាញរបាំងបិទច្រកចូលច្រាំងសមុទ្រ ជាទីដែលឆ្មាំល្បាតឆ្នេរចិនកាលពីសប្តាហ៍មុនបានអះអាងថាបានបណ្តេញនាវាហ្វីលីពីន ដែល «រំលោភបំពានដោយខុសច្បាប់» ចូលទៅក្នុងដែនទឹករបស់ទីក្រុងប៉េកាំង។ថ្លែងនៅក្នុងសន្និសីទសារព័ត៌មាន អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) បាននិយាយថា ដែនទឹក ហ័ងយាន តាវ (Huangyan Dao) ដែលជាឈ្មោះរបស់ប្រទេសចិនសម្រាប់តំបន់ថ្មប៉ប្រះទឹកនេះ គឺជា «ទឹកដីបន្តជំនាន់របស់ប្រទេសចិន»។ហ្វីលីពីន ដែលកាលពីសប្តាហ៍មុនបានបញ្ជូននាវាមួយគ្រឿងរបស់ការិយាល័យធនធាននេសាទ និងជលផល (BFAR) ដើម្បីល្បាតតាមមាត់សមុទ្រ និងដឹកជញ្ជូនឥន្ធនៈទៅកាន់អ្នកនេសាទហ្វីលីពីននៅក្នុងតំបន់នោះ បាននិយាយថា ការអះអាងរបស់ចិនគឺ «មិនត្រឹមត្រូវទេ» ហើយថាសកម្មភាពរបស់ទីក្រុងម៉ានីល នៅទីនោះគឺស្របច្បាប់៕

សហរដ្ឋអាមេរិក និងថៃ ចាប់ផ្តើមសមយុទ្ធយោធាប្រចាំឆ្នាំដ៏ធំបំផុតនៅអាស៊ីអាគ្នេយ៍

សមយុទ្ធយោធាពហុជាតិប្រចាំឆ្នាំដ៏ធំ និងយូរបំផុតរបស់អាស៊ីអាគ្នេយ៍បានចាប់ផ្តើមជាផ្លូវការនៅថ្ងៃអង្គារ (២៧ កុម្ភៈ) នេះនៅភាគខាងកើតប្រទេសថៃ។ សមយុទ្ធ ខូប្រា ហ្គូល (Cobra Gold) នៅឆ្នាំនេះនឹងមើលឃើញកងទ័ពជាង ៩.០០០ នាក់មកពីប្រទេសចំនួន ៣០ ចូលរួមក្នុងសមយុទ្ធដែលនឹងមានរយៈពេលរហូតដល់ថ្ងៃទី០៨ ខែមីនា នេះបើយោងតាមសេចក្តីប្រកាសព័ត៌មានផ្លូវការមួយ។ឯកអគ្គរដ្ឋទូតសហរដ្ឋអាមេរិកប្រចាំប្រទេសថៃ លោក រ៉ូប៊ឺត ហ្គូដេក (ROBERT GODEC) បាននិយាយថា៖ «ជាមួយនឹងសកម្មភាពជាច្រើនរាប់ចាប់ពីការចុះចតលើសមុទ្រ ដល់ការហ្វឹកហ្វឺនសមយុទ្ធបាញ់គ្រាប់ពិតប្រដាប់អាវុធ ចាប់ពីសមាហរណកម្មតាមអ៊ីនធឺណិត និងលំហពេញលេញ ដល់ការផ្តល់ជំនួយមនុស្សធម៌ សមយុទ្ធ ខូប្រា ហ្គូល នៅឆ្នាំនេះនឹងពង្រឹងសមត្ថភាពរបស់យើងក្នុងការឆ្លើយតបវិបត្តិពហុជាតិនាពេលអនាគតចំពោះបញ្ហាប្រឈមថ្មី។ក្រសួងការពារជាតិរបស់ប្រទេសចិនបាននិយាយថា ឆ្នាំនេះក៏នឹងមើលឃើញមានការចូលរួមដោយគណៈប្រតិភូយោធាចិននៅក្នុងផ្នែកសមយុទ្ធជំនួយមនុស្សធម៌នេះផងដែរ។ សមយុទ្ធ ខូប្រា ហ្គូល ដែលត្រូវបានបើកដំណើរការក្នុងឆ្នាំ១៩៨២ គឺជាព្រឹត្តិការណ៍ល្បែងសង្គ្រាមដែលបម្រើជាវេទិកាដ៏សំខាន់សម្រាប់សហរដ្ឋអាមេរិក ក្នុងការពង្រឹងសម្ព័ន្ធភាពនៅក្នុងតំបន់អាស៊ី៕

បណ្ដាញសង្គម

ព័ត៌មានថ្មីៗ

ប្រធានគណៈប្រចាំការនៃគណៈអចិន្ត្រៃយ៍យុវជនគណបក្សប្រជាជនកម្ពុជាថ្នាក់កណ្ដាល និងលេខាទី១ នៃគណៈកម្មាធិការមជ្ឈិមសម្ព័ន្ធយុវជនកុម្មុយនីស្តចិនចុះអនុស្សរណៈស្ដីពីកិច្ចសហប្រតិបត្តិការជាមួយគ្នា

កសិដ្ឋានចិញ្ចឹមសត្វគោ និងជ្រូកនៅប្រទេសបែលហ្ស៊ិក កំពុងជួបការលំបាក ដោយសាររលកកម្តៅ

នយោបាយឈ្នះ-ឈ្នះនាំឱ្យកម្ពុជាសម្រេចបានសន្តិភាព និងការអភិវឌ្ឍដូចសព្វថ្ងៃ

អ៊ីរ៉ង់៖ ការឆ្លងកាត់ច្រកសមុទ្រ Hormuz មិនត្រូវបានធានាទេ បើគ្មានការសម្របសម្រួលជាមួយទីក្រុងតេអេរ៉ង់

ប្រធានាធិបតីជិតឡើងកាន់អំណាចកូឡុំប៊ី ចេញឱសានវាទដល់ក្រុមឧក្រិដ្ឋកម្មប្រដាប់អាវុធ

មន្ត្រីជាន់ខ្ពស់៖ លីបង់ទាមទារឲ្យអ៊ីស្រាអែលដកទ័ពទាំងស្រុង ក្នុងកិច្ចព្រមព្រៀងណាមួយ នៅទីក្រុងវ៉ាស៊ីនតោន

កម្ពុជា ប្តេជ្ញាធ្វើការងារជិតស្និទ្ធជាមួយចិន ដើម្បីពង្រីកបន្ថែមទាំងវិសាលភាព និងភាពស៊ីជម្រៅនៃទំនាក់ទំនងទ្វេភាគី

រញ្ជួយដីកម្រិត ៦,៥រ៉ិចទ័រ វាយប្រហារកោះ នៅភាគខាងត្បូងនៃប្រទេសហ្វីលីពីន

UN ជំរុញឲ្យមានសេចក្តីថ្លៃថ្នូរសម្រាប់ជនអន្តោប្រវេសន៍ ក្រោយតុលាការអាមេរិកសម្រេចលើជនអន្តោប្រវេសន៍ហៃទី និងស៊ីរី

អ៊ីស្រាអែលទម្លាក់ខិត្តប័ណ្ណ នៅទីក្រុងរបស់លីបង់ ដោយបញ្ជាឲ្យប្រជាជនចាកចេញ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍