នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា
TOP STORY | សម្ដេចធិបតី៖ កងទ័ពថៃបានបើកការ​វាយប្រហារ​មក​លើ​ទីតាំង​ឈរ​ជើង​របស់​កង​ទ័ព​កម្ពុជា​ នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

នយោបាយ​ និង ការអភិវឌ្ឍន៍

ឯកឧត្តម លី ធុជ៖ សម្តេចធិបតី តែងតែផ្សព្វផ្សាយពីសក្តានុពលជាតិរាល់ជំនួប និងវេទិកានានាលើឆាកអន្តរជាតិ

2024/01/17 01:11:15 pm        273
Facebook Telegram Linkin
កំពង់ចាម៖ ប្រធានក្រុមការងាររាជរដ្ឋាភិបាលចុះមូលដ្ឋានស្រុកបាធាយ ខេត្តកំពង់ចាម បានថ្លែងថា សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តែងតែផ្សព្វផ្សាយអំពីឧត្តមប្រយោជន៍ និងសក្តានុពលរបស់ប្រទេសជាតិក្នុងរាល់ជំនួប និងវេទិកានានាលើឆាកអន្តរជាតិដើម្បីទាក់ទាញវិនិយោគិន និងស្វែងរកជំនួយគាំទ្រដល់ការអភិវឌ្ឍនៅកម្ពុជា។ការលើកឡើងរបស់ឯកឧត្តមបណ្ឌិត លី ធុជ ទេសរដ្ឋ មន្រ្តី អនុប្រធានទី១ អាជ្ញាធរមីន និង​ជាប្រធាន​ក្រុមការងាររាជ រដ្ឋាភិបាលចុះមូលដ្ឋានស្រុកបាធាយ ខេត្តកំពង់ចាម តាង នាម​ឯកឧត្តមសន្តិបណ្ឌិត នេត សាវឿន ប្រធានក្រុម ការងាររាជរដ្ឋាភិបាលចុះមូលដ្ឋានខេត្តកំពង់ចាម ក្នុងពិធីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានស្រុកបាធាយ និង​សំណេះសំណាលជាមួយមន្រ្តីរាជការ និងអាជ្ញាធរមូលដ្ឋាន នាព្រឹកថ្ងៃទី១៧ ខែមករា ឆ្នាំ២០២៤ នៅសាលាស្រុកបាធាយ ខេត្តកំពង់ចាម។ ឯកឧត្តម លី ធុជ បញ្ជាក់ថា បំណងប្រាថ្នារបស់ប្រជាពលរដ្ឋ ដើម្បីទទួលបាននូវជីវភាពមួយដែលល្អប្រសើរ គឺជាបេសកកម្មចម្បងរបស់សម្តេចធិបតី នាយករដ្ឋមន្រ្តី។ ដូច្នេះក្នុងនាមប្រធានក្រុមការងាររាជរដ្ឋាភិបាលចុះមូល ដ្ឋានស្រុកបាធាយ ខេត្តកំពង់ចាម ឯកឧត្តមបានណែនាំឱ្យសមាជិក សមាជិកា និងអាជ្ញាធរគ្រប់លំដាប់ ថ្នាក់ ត្រូវបន្តតាមដាន និងក្តាប់ឱ្យបាននូវការវិវត្តនានារបស់សង្គមជាតិ ស្ថានភាពនយោបាយ និងសមិទ្ធផលសម្រេចបានរបស់រាជរដ្ឋាភិបាល ដើម្បីធ្វើការផ្សព្វផ្សាយដល់សា ធារណជន ជាពិសេសក្តាប់ឱ្យបានបញ្ហាប្រឈម និងទុក្ខកង្វល់នានារបស់ប្រជាពលរដ្ឋ ដើម្បីធ្វើការពិនិត្យ និងដោះស្រាយឱ្យទាន់ពេលវេលា។ឯកឧត្តម លី ធុជ ក៏បានថ្លែងអំណរគុណចំពោះសមាជិកក្រុមការងាររាជរដ្ឋាភិបាល ដែល​បានស្ម័គ្រចិត្តចូលរួមក្នុងការផ្សារភ្ជាប់នូវទំនាក់ទំនងយ៉ាងល្អប្រសើរវាងរាជរដ្ឋាភិបាល និង​ប្រជាពលរដ្ឋ ដែលការកសាងទំនាក់ទំនងនេះ ត្រូវតែធ្វើឡើងជាប្រចាំឱ្យមានស្និទ្ធស្នាល និងស្អាតស្អំ។ សមាជិកក្រុមការងារទាំងអស់ ត្រូវបន្តសហការជាមួយអាជ្ញាធរមូលដ្ឋាន និងត្រូវចេះ​ជួយគ្នាទៅវិញទៅមកដោយត្រូវចាត់ទុកថារាល់បញ្ហាប្រឈម និងទុក្ខកង្វល់នានារបស់ប្រជាពលរដ្ឋ​ដែលទទួលបានហើយ ត្រូវតែមានដំណោះស្រាយដាច់ខាតសម្រាប់​បម្រើផលប្រយោជន៍​ដល់មូលដ្ឋាន៕ដោយ៖ ភារម្យ

ក្រុមហ៊ុនឈានមុខគេមួយក្នុងការវិនិយោគលើវិស័យធនាគារ មូលបត្រ និងគ្រប់គ្រងការវិនិយោគចង់ ពង្រីកឱកាសវិនិយោគនៅកម្ពុជា

2024/01/17 12:51:03 pm        275
Facebook Telegram Linkin
ស្វីស៖ នារសៀលថ្ងៃទី១៦ ខែមករា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យលោក Jared Cohen ប្រធានផ្នែកកិច្ចការសកល នៃក្រុមហ៊ុន Goldman Sachs ចូលជួបសម្ដែងការគួរសម និងពិភាក្សាការងារ ក្នុងឱកាសចូលរួមវេទិកាសេដ្ឋកិច្ចពិភពលោកឆ្នាំ២០២៤ នៅទីក្រុងដាវ៉ូស ប្រទេសស្វីស ។ក្នុងជំនួបនេះ លោក Jared Cohen បានថ្លែងអំណរគុណជូនចំពោះ សម្តេចធិបតី ដែលបានអនុញ្ញាតឱ្យរូបលោក ចូលជួបសម្តែងការគួរសម និងបានជម្រាបជូនអំពីសកម្មភាពអាជីវកម្មរបស់ក្រុមហ៊ុន Goldman Sachs Group, Inc. ដែលជាក្រុមហ៊ុនឈានមុខគេមួយ ក្នុងការវិនិយោគលើវិស័យធនាគារ មូលបត្រ និងគ្រប់គ្រងការវិនិយោគ ដោយបង្កើតឡើងក្នុងឆ្នាំ១៨៦៩ ក្នុងការផ្តល់សេវាកម្មហិរញ្ញវត្ថុដល់អតិថិជនគ្រប់មជ្ឈដ្ឋាន ជាអាទិ៍ សាជីវកម្ម ស្ថាប័នហិរញ្ញវត្ថុ រដ្ឋាភិបាល និងបុគ្គល ជាដើម ។ លោក Jared Cohen ក៏បានជម្រាបជូន សម្តេចធិបតី ផងដែរ អំពីគោលបំណងពង្រីកឱកាសវិនិយោគរបស់ខ្លួនមកកាន់ប្រទេសកម្ពុជា ព្រមទាំងបានបង្ហាញនូវភាពជឿជាក់ថា ក្រោមការដឹកនាំប្រកបដោយកិត្តិបណ្ឌិតរបស់សម្តេចធិបតីនាយករដ្ឋន្ត្រី កម្ពុជានឹងបន្តការអភិវឌ្ឍប្រកបដោយភាពជឿជាក់ ជាមួយនឹងស្ថិរភាពម៉ាក្រូសេដ្ឋកិច្ច និងសុខសន្តិភាពពេញលេញ ។ ជាការឆ្លើយតប សម្តេចធិបតី បានសម្តែងនូវក្តីរីករាយ និងស្វាគមន៍ចំពោះបំណងរបស់ក្រុមហ៊ុនក្នុងការបណ្តាក់ទុនវិនិយោគនៅកម្ពុជា ព្រមទាំងបានលើកទឹកចិត្តឱ្យក្រុមហ៊ុនសហការជាមួយគ្រប់ភាគីពាក់ព័ន្ធនៅកម្ពុជា ក្នុងការសិក្សានិងស្វែងយល់អំពីសក្តានុពលរបស់កម្ពុជា និងលទ្ធភាពក្នុងការវិនិយោគជាក់ស្តែង.សូមបញ្ជាក់ថា ក្រុមហ៊ុន Goldman Sachs Group, Inc. គឺជាក្រុមហ៊ុនឈានមុខគេ ក្នុងការវិនិយោគលើវិស័យធនាគារ មូលបត្រ និងគ្រប់គ្រងការវិនិយោគ ដែលត្រូវបានបង្កើតឡើងក្នុងឆ្នាំ១៨៦៩ ដោយផ្តល់សេវាកម្មហិរញ្ញវត្ថុដល់អតិថិជនដ៏ច្រើន និងចម្រុះ ដែលរួមមានសាជីវកម្ម ស្ថាប័នហិរញ្ញវត្ថុ រដ្ឋាភិបាល និងបុគ្គល៕

ប៉ាគីស្ថានថ្កោលទោសការវាយប្រហារដោយមីស៊ីលរបស់អ៊ីរ៉ង់មកលើទឹកដីខ្លួនថា ជាការរំលោភបំពានដោយគ្មានមូលហេតុ

2024/01/17 12:40:35 pm        278
Facebook Telegram Linkin
ប្រទេសប៉ាគីស្ថានកាលពីថ្ងៃអង្គារ បានថ្កោលទោសយ៉ាងខ្លាំងចំពោះការវាយប្រហារតាមអាកាសរបស់អ៊ីរ៉ង់នៅខាងក្នុងព្រំដែនរបស់ខ្លួន ដែលបានសម្លាប់កុមារពីរនាក់ ដោយហៅវាថាជា «ការរំលោភបំពានដែនអាកាសរបស់ខ្លួន» និងការព្រមានអំពីការសងសឹក។អ៊ីរ៉ង់បាននិយាយថា ខ្លួនបានប្រើ «មីស៊ីលរយៈចម្ងាយខ្លី និងការវាយប្រហារដោយយានដ្រូន ដើម្បីបំផ្លាញទីតាំងរឹងមាំពីររបស់ក្រុមសកម្មប្រយុទ្ធនិកាយស៊ុននី ចៃអាល់អាដល (Jaish al-Adl) ដែលត្រូវបានគេស្គាល់ថាជា ចៃអាល់ឌុល (Jaish al-Dhulm) នៅតំបន់ Kouh-Sabz (ភ្នំបៃតង)នៃខេត្តបាឡូជីស្ថាន (Balochistan) ភាគនិរតីនៃប្រទេសប៉ាគីស្ថាន នេះបើតាមទីភ្នាក់ងារព័ត៌មានTasnim ដែលគាំទ្រដោយរដ្ឋរបស់អ៊ីរ៉ង់។ ការវាយប្រហារនោះ កើតឡើងបន្ទាប់ពីអ៊ីរ៉ង់ បានបាញ់មីស៊ីលនៅប្រទេសអ៊ីរ៉ាក់ភាគខាងជើង និងស៊ីរីកាលពីថ្ងៃចន្ទ នៅក្នុងការកើនឡើងចុងក្រោយនៃអរិភាពនៅមជ្ឈិមបូព៌ា ជាកន្លែងដែលសង្រ្គាមដែលកំពុងបន្តរបស់អ៊ីស្រាអែលនៅតំបន់ហ្កាហ្សា ប្រឈមមុខនឹងជម្លោះក្នុងតំបន់កាន់តែធំឡើង។ក្រសួងការបរទេសប៉ាគីស្ថាន បាននិយាយថា ការវាយប្រហារលើទឹកដីរបស់ខ្លួនបានសម្លាប់ «កុមារស្លូតត្រង់ពីរនាក់ ខណៈដែលក្មេងស្រីបីនាក់ បានរងរបួស» ហើយបានព្រមានអ៊ីរ៉ង់អំពី «ផលវិបាកដ៏ធ្ងន់ធ្ងរ» ។ក្រសួងនេះ បានពិពណ៌នាអំពីការវាយប្រហារតាមអាកាសថាជា «ការរំលោភបំពានដែនអាកាសរបស់ខ្លួនដោយអ៊ីរ៉ង់ ...នៅខាងក្នុងទឹកដីប៉ាគីស្ថាន»។ក្រសួងការបរទេស បាននិយាយទៀតថា៖«វាកាន់តែព្រួយបារម្ភថា ទង្វើខុសច្បាប់នេះ បានកើតឡើង ទោះបីជាមានបណ្តាញទំនាក់ទំនងជាច្រើនរវាងប៉ាគីស្ថាន និងអ៊ីរ៉ង់ក៏ដោយ»។

សហភាពអឺរ៉ុប ដាក់ទណ្ឌកម្មលើមេដឹកនាំក្រុមហាម៉ាស

2024/01/17 12:34:38 pm        237
Facebook Telegram Linkin
សហភាពអឺរ៉ុប(EU)បានដាក់ទណ្ឌកម្មលើមេដឹកនាំក្រុមហាម៉ាសលោក យ៉ាយ៉ា ស៊ីនវ៉ា (Yahya Sinwar) កាលពីថ្ងៃអង្គារសម្រាប់តួនាទីរបស់ខ្លួនក្នុងការរៀបចំផែនការសម្លាប់រង្គាលកាលពីថ្ងៃទី៧ ខែតុលា នៅអ៊ីស្រាអែល។សហភាពអឺរ៉ុប ក៏បានបន្ថែមលោកស៊ីនវ៉ាទៅក្នុងបញ្ជីភេរវកម្មរបស់EU ផងដែរ។ យោធាអ៊ីស្រាអែល បានប៉ុនប៉ងចាប់ខ្លួន ឬសម្លាប់លោកស៊ីនវ៉ា ចាប់តាំងពីការវាយប្រហារថ្ងៃទី៧ ខែតុលា ប៉ុន្តែរហូតមកទល់ពេលនេះ រកមិនឃើញជោគជ័យនៅឡើយ។សហភាពអឺរ៉ុប បានសរសេរនៅក្នុងសេចក្តីថ្លែងការណ៍មួយថា «[លោក យ៉ាយ៉ា ស៊ីនវ៉ា] ត្រូវបានគេបង្កកមូលនិធិ និងទ្រព្យសម្បត្តិហិរញ្ញវត្ថុផ្សេងទៀតនៅក្នុងរដ្ឋជាសមាជិកសហភាពអឺរ៉ុប។ វាក៏ត្រូវបានហាមឃាត់ផងដែរសម្រាប់ប្រតិបត្តិករសហភាពអឺរ៉ុប ក្នុងការបង្កើតមូលនិធិ និងធនធានសេដ្ឋកិច្ច ដែលមានសម្រាប់រូបលោក។របាយការណ៍ថ្មីៗ បានបញ្ជាក់ថា អ៊ីស្រាអែលស្គាល់ពីទីតាំងរបស់លោកស៊ីនវ៉ា ប៉ុន្តែមិនអាចវាយប្រហារលើរូបលោកបានទេ ដោយសារលោក ត្រូវបានឡោមព័ទ្ធខ្លួនជាមួយចំណាប់ថ្នូរអ៊ីស្រាអែល។ កងកម្លាំងការពារអ៊ីស្រាអែល (IDF) បានបដិសេធមិនធ្វើអត្ថាធិប្បាយលើរបាយការណ៍ដែលថា ខ្លួនដឹងពីទីតាំងរបស់មេដឹកនាំភេរវករនេះទេ។អ៊ីស្រាអែលជឿថា យ៉ាងហោចណាស់មានចំណាប់ថ្នូរជនជាតិអ៊ីស្រាអែល និងបរទេសចំនួន ១៣៣ នាក់ត្រូវបានឃុំខ្លួន នៅតំបន់ហ្កាហ្សា ទោះបីជាមិនទាន់ច្បាស់ថាតើពួកគេប៉ុន្មាននាក់ នៅរស់រានមានជីវិតក៏ដោយ។

លោក Blinken៖ បណ្ដាប្រទេសអារ៉ាប់មិនចង់កសាងហ្កាហ្សាឡើងវិញទេ ប្រសិនបើវានឹងត្រូវបំផ្លាញម្ដងទៀត

2024/01/17 12:31:30 pm        243
Facebook Telegram Linkin
រដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) បាននិយាយកាលពីថ្ងៃអង្គារ (១៦ មករា) ថាបណ្តាប្រទេសអារ៉ាប់មិនមានបំណងចង់ចូលរួមក្នុងការកសាងតំបន់ហ្កាហ្សា ឡើងវិញនោះទេ ប្រសិនបើតំបន់ហ៊ុមព័ទ្ធប៉ាឡេស្ទីនមួយនេះនឹងត្រូវបាន «បំផ្លាញ» បែបនេះម្តងទៀតក្នុងរយៈពេលពីរបីឆ្នាំខាងមុខ ហើយសង្កត់ធ្ងន់លើសារៈសំខាន់នៃរដ្ឋប៉ាឡេស្ទីនសម្រាប់ការតាំងទីលំនៅណាមួយក្នុងតំបន់។ថ្លែងទៅកាន់ស្ថានីយទូរទស្សន៍ CNBC ក្នុងបទសម្ភាសន៍មួយនៅទីក្រុងដេវ៉ូស ប្រទេសស្វីស លោក ប្លីងខិន បាននិយាយថាមាន «សមីការថ្មី» នៅមជ្ឈិមបូព៌ា ដែលបណ្ដាប្រទេសជិតខាងអារ៉ាប់ និងមូស្លីមរបស់អ៊ីស្រាអែល ត្រូវបានរៀបចំដើម្បីធ្វើសមាហរណកម្មអ៊ីស្រាអែលចូលទៅក្នុងតំបន់ ប៉ុន្តែពួកគេបានប្តេជ្ញាស្មើគ្នាចំពោះផ្លូវទៅកាន់រដ្ឋប៉ាឡេស្ទីន។លោកបាននិយាយថា ទាំងរដ្ឋអារ៉ាប់ និងទីក្រុងវ៉ាស៊ីនតោន ជឿជាក់ថា រហូតដល់បញ្ហានោះត្រូវបានដោះស្រាយ ទាំងអ៊ីស្រាអែល និងតំបន់ នឹងមិនមានសន្តិភាព ស្ថិរភាព និងសន្តិសុខឡើយ។លោក ប្លីងខិន ក្នុងដំណើរចុងក្រោយរបស់ខ្លួនទៅកាន់មជ្ឈិមបូព៌ាកាលពីមួយសប្តាហ៍មុន បាននាំមកយកកិច្ចព្រមព្រៀងដ៏លំបាកមួយទៅកាន់ប្រទេសអ៊ីស្រាអែល ដែលថាប្រទេសជិតខាងមូស្លីមភាគច្រើនរបស់ខ្លួននឹងជួយស្តារតំបន់ហ្កាហ្សាឡើងវិញបន្ទាប់ពីសង្គ្រាម និងបន្តសមាហរណកម្មសេដ្ឋកិច្ចជាមួយអ៊ីស្រាអែល ប៉ុន្តែលុះត្រាតែអ៊ីស្រាអែលមានការប្តេជ្ញាចិត្តថានឹងអនុញ្ញាតឱ្យបង្កើតរដ្ឋប៉ាឡេស្ទីនឯករាជ្យ៕

ប្រធានាធិបតីអ៊ុយក្រែនលោក Zelenskiy ជំរុញឱ្យលោកខាងលិចបន្តដាក់សម្ពាធលើរុស្ស៊ី

2024/01/17 12:25:05 pm        271
Facebook Telegram Linkin
ប្រធានាធិបតីអ៊ុយក្រែនលោក វ្ល៉ូឌីមី ហ៊្សេឡិនស្គី (Volodymyr Zelenskiy) កាលពីថ្ងៃអង្គារ (១៦ មករា) បានជំរុញឱ្យលោកខាងលិចបន្តរឹតបន្តឹងការដាក់សម្ពាធលើមេដឹកនាំវិមានក្រឹមឡាំងលោក វ្ល៉ាឌីមៀ ពូទីន និងបង្កើនការគាំទ្ររបស់ខ្លួនសម្រាប់ទីក្រុងគីវ ដើម្បីធានាថាទីក្រុងមូស្គូ មិនទទួលបានជោគជ័យក្នុងសង្គ្រាមរបស់ខ្លួន។ប្រធានាធិបតីអ៊ុយក្រែនរូបនេះបានប្រាប់វេទិកាសេដ្ឋកិច្ចពិភពលោកនៅទីក្រុងដេវ៉ូស (Davos) ក្នុងសុន្ទរកថាដ៏រំជួលចិត្តមួយថា ការស្ទាក់ស្ទើររបស់លោកខាងលិចក្នុងការគាំទ្ររបស់ខ្លួនសម្រាប់ទីក្រុងគីវ និងការភ័យខ្លាចនៃការកើនឡើងនៅក្នុងសង្គ្រាមជាមួយរុស្ស៊ី បានធ្វើឱ្យខាតបង់ពេលវេលា និងអាយុជីវិតមនុស្សជាច្រើន ហើយអាចអូសបន្លាយការប្រយុទ្ធគ្នារាប់ឆ្នាំទៀត។ជាមួយនឹងការគាំទ្រក្នុងសម័យសង្រ្គាមដ៏រឹងមាំរបស់លោកខាងលិចសម្រាប់ទីក្រុងគីវ ដែលឥឡូវនេះកំពុងជួបឧបសគ្គស្របពេលមានជម្លោះនយោបាយនៅទីក្រុងវ៉ាស៊ីនតោន និងទីក្រុងប្រ៊ុចសែល លោក ហ៊្សេឡិនស្គី បាននិយាយថា ប្រជាជនអឺរ៉ុបចាំបាច់ត្រូវយល់ថាផែនការរបស់លោកពូទីន មិនមែនត្រឹមតែសង្គ្រាមនៅអ៊ុយក្រែនទេ។រយៈពេលជិតពីរឆ្នាំបន្ទាប់ពីរុស្ស៊ីបានបើកការឈ្លានពានពេញលេញរបស់ខ្លួន លោក ហ៊្សេឡិនស្គី បាននិយាយថា លោកប្រឆាំងយ៉ាងខ្លាំងចំពោះការបង្កកជម្លោះនៅតាមខ្សែសមរភូមិបច្ចុប្បន្នរបស់ខ្លួន។ លោកបានបន្ថែមថា ការដាក់ទណ្ឌកម្មលើទីក្រុងមូស្គូ ចាំបាច់ត្រូវអនុវត្តឲ្យបានត្រឹមត្រូវ ហើយថាកង្វះទណ្ឌកម្មលើវិស័យនុយក្លេអ៊ែររបស់រុស្ស៊ី គឺជាការបង្ហាញពីភាពទន់ខ្សោយរបស់លោកខាងលិច៕

ក្រុមហ៊ុនជំនាញកសិកម្មឈានមុខនៅអាស៊ី ស្វែងរកឱកាសវិនិយោគលើដំណាំស្រូវ និងអំពៅ នៅកម្ពុជា

2024/01/17 12:12:26 pm        248
Facebook Telegram Linkin
នារសៀលថ្ងៃទី១៦ ខែមករា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃ​ព្រះរាជាណាចក្រកម្ពុជា បានអនុញ្ញាតឱ្យលោក Kuok Khoon Hong ប្រធាន​អគ្គនាយក​ក្រុមហ៊ុន ​Wilmar International Group ចូលជួបសម្តែងការគួរសម និងពិភាក្សាការងារ ក្នុង​ឱកាស​ចូល​រួមវេទិកាសេដ្ឋកិច្ចពិភពលោកឆ្នាំ២០២៤ នៅទីក្រុងដាវ៉ូស ប្រទេសស្វីស ។ក្នុងជំនួបនេះ លោកប្រធានអគ្គនាយក Kuok Khoon Hong បានថ្លែងអំណរគុណចំពោះ សម្តេច​ធិបតី ដែលបានអនុញ្ញាតឱ្យរូបលោក និងសហការី ចូល​ជួប​សម្តែង​ការ​គួរ​សម​នា​ឱកា​សនេះ និងបានជម្រាបជូន សម្តេចធិបតី អំពីគោលបំណងរបស់ក្រុមហ៊ុន ក្នុង​ការ​ស្វែង​រក​ឱកាស​វិនិយោគ​លើ​វិស័យកសិកម្មនៅកម្ពុជា ដោយផ្តោតលើដំណាំស្រូវ និងអំពៅ ក្នុងខ្សែ​ច្រវាក់​ផលិត​កម្ម​ទាំង​មូល រាប់ទាំងការដាំដុះ, ការប្រមូលផល, ការកែច្នៃ, ការវេចខ្ចប់ និងការ​នាំចេញ​ទៅ​កាន់​ទីផ្សារ​អន្តរជាតិ ។ជាការឆ្លើយតប សម្តេចធិបតី បានសម្តែងនូវក្តីរីករាយចំពោះជំនួបជាមួយលោក ប្រធាន​​អគ្គ​នាយក និងបានបង្ហាញ​នូវ​ការ​ស្វាគមន៍​ចំពោះ​បំណង​របស់​ក្រុមហ៊ុន​ក្នុង​ការ​បណ្តាក់​ទុន​វិនិយោគ​លើវិស័យកសិកម្មនៅកម្ពុជា ដែលជាវិស័យមួយប្រកបដោយសក្តានុពល និង​ជា​វិស័យ​អាទិភាព​របស់រាជរដ្ឋាភិបាល អាណត្តិទី៧ ដើម្បីលើក​កម្ពស់​ជីវភាព​រស់​នៅ​របស់​ប្រជាជន​កម្ពុជា​ឱ្យ​កាន់​តែ​ប្រសើរ​ឡើង។គួរបញ្ជាក់ថា ក្រុមហ៊ុន Wilmar International Group គឺជាក្រុមហ៊ុនដែលមានធុរកិច្ចចម្បង ក្នុង​វិស័យ​កសិកម្ម និងត្រូវបានបង្កើតឡើងក្នុងឆ្នាំ១៩៩១ នៅប្រទេសសិង្ហបុរី ។ សព្វថ្ងៃ ក្រុមហ៊ុន Wilmar International Group គឺជាក្រុមហ៊ុនឈានមុខគេមួយនៅអាស៊ី ហើយ​ក្រុម​ហ៊ុន​មាន​បច្ចេក​ទេសខ្ពស់ក្នុងវិស័យកសិកម្ម រាប់ចាប់ពីការដាំដុះ, ការកែច្នៃ, ការវេចខ្ចប់, ការផ្គត់ផ្គង់ និង​ការ​ចែក​ចាយ​យ៉ាងទូលំទូលាយ ហើយផលិតផលចម្បងរបស់ក្រុមហ៊ុន មានដូចជា៖ ប្រេងដូង ប្រេង​ធញ្ញជាតិ ម្សៅ និងស្ករ ជាដើម ៕

បច្ចុប្បន្នរាជរដ្ឋាភិបាលប្រគល់បណ្ណកម្មសិទ្ធិដីធ្លីដល់ពលរដ្ឋបានប្រមាណ ៥លានបណ្ណ និងបន្តចែក២លានបណ្ណទៀត

2024/01/17 10:35:07 am        370
Facebook Telegram Linkin
ភ្នំពេញ៖ តាមរយៈបណ្ដាញ​តេឡេក្រាម​របស់​សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានឱ្យដឹងថា គិតមកដល់ពេលបច្ចុប្បន្ន រដ្ឋាភិបាល ដែលមានក្រសួងរៀបចំដែនដី នគរូបនីយកម្ម និងសំណង់ ជាសេនាធិការ បានប្រគល់បណ្ណកម្មសិទ្ធិដីធ្លីជូនប្រជាពលរដ្ឋបានប្រមាណ ៥ លាន​បណ្ណ​រួច​មកហើយ ចំណែកបណ្ណកម្មសិទ្ធិប្រមាណ ២ លានបណ្ណ​ទៀត​នឹ​ង​ត្រូវ​បន្ត​ចែក​ជូន​ប្រជា​ពលរដ្ឋ​ជា​បន្តបន្ទាប់នៅទូទាំងប្រទេស។ការ​បង្ហាញ​ទិន្នន័យនេះ ស្របពេលដែលក្រសួងរៀបចំដែនដី នគរូប​នីយ​កម្ម និងសំណង់ ចែកបណ្ណ័សម្គាល់ម្ចាស់អចលនៈវត្ថុ (ផ្ទះសំបែង) ចំនួន ២០០ ខ្នងជូន​ដល់​អតីត​យុទ្ធជន គ្រួសារយុទ្ធជនរបួសពិការ និងមរណៈ សម្រាប់ប្រើប្រាស់ស្របច្បាប់នៅភូមិជីកដី ឃុំ​អណ្តូងត្របែក ស្រុករមាសហែក ខេត្តស្វាយរៀង កាលពីថ្ងៃទី១៦ ខែមករា ឆ្នាំ២០២៤។ សូមបញ្ជាក់ថា បុរីជនបទ​នឹង​បន្ត​ពង្រីក​ទៅ​តាម​តំបន់​នានា​នៅ​តាម​បណ្តា​ខេត្ត​នៃ​ព្រះរាជាណាចក្រ​កម្ពុជា ជាក់ស្តែង នៅថ្ងៃទី១៦ មករា ២០២៤នេះ ប្រជាពលរដ្ឋ ជាពិសេស អតីត​យុទ្ធជនចំនួន ២០០ គ្រួសារ ក្នុងខេត្តស្វាយរៀង បានទទួល​នូវ​វិញ្ញា​បន​បត្រ​សម្គាល់​ម្ចាស់​អចលនវត្ថុ​។ ក្នុងនោះមាន គ្រួសារពលី ២៤ នាក់ ស្រី ២៣ នាក់។ គ្រួសារទទួលមរណៈភាព ៧នាក់ ស្រី ៧នាក់, គ្រួសារបាត់បង់ ៣នាក់, គ្រួសារពិការ ៧០នាក់ ស្រី ១នាក់, គ្រួសារនិវត្តជន ២៩នាក់ ស្រី ៣នាក់, គ្រួសារយោធា ២៥នាក់ ស្រី ១នាក់, គ្រួសារប៉ូលីស ៣៦នាក់, គ្រួសារ​កងរាជ​អាវុធហត្ថ ៦នាក់។ដីឡូត៍ដែល​រាជរដ្ឋាភិបាល​បាន​ប្រគល់​ជូន​សម្បទានិក​នា​ពេល​នេះ គឺជាទ្រព្យមួយដ៏មានតម្លៃក្នុងការកែច្នៃជីវភាពគ្រួសារឱ្យកាន់តែប្រសើរឡើង។ នេះ​គឺ​ជា​ការ​គិតគូរ​អំពីសេដ្ឋកិច្ចមូលដ្ឋាន និងផ្តល់មធ្យោបាយងាយស្រួលដល់ប្រជាពលរដ្ឋ អតីតយុទ្ធជន និង​គ្រួសារងាយរងគ្រោះ ដែលស្របតាមកម្មវិធីនយោបាយរបស់រាជរដ្ឋាភិបាល នីតិកាលទី៧ សម្រាប់​ការកសាង និងការការពារមាតុភូមិ ឆ្នាំ២០២៣-២០២៨ ដែលការចុះបញ្ជី និងផ្តល់បណ្ណ​កម្ម​សិទ្ធិ​ដល់​ប្រជាពលរដ្ឋ គឺជាកិច្ចការចម្បងដែលត្រូវបន្តអនុវត្តជាចាំបាច់។ «គិតមកដល់ពេលបច្ចុប្បន្ន រដ្ឋាភិបាល ដែលមានក្រសួងរៀបចំដែនដី នគរូបនីយកម្ម និងសំណង់ ជាសេនាធិការ បានប្រគល់បណ្ណកម្មសិ​ទ្ធិ​ដីធ្លី​ជូន​ប្រជា​ពលរដ្ឋ​បាន​ប្រមាណ ៥លានបណ្ណរួចមកហើយ ចំណែកបណ្ណកម្មសិទ្ធិប្រមាណ ២លានបណ្ណទៀត នឹងត្រូវ​បន្ត​ចែក​ជូនប្រជាពលរដ្ឋជាបន្តបន្ទាប់ នៅទូទាំងប្រទេសផងដែរ»។ នេះបើតាមការ​បញ្ជាក់នៅក្នុងតេឡេក្រាមរបស់សម្ដេច​ធិបតី។សូមបញ្ជាក់ថា រាជរដ្ឋាភិបាល នីតិកាលទី៧ បានដាក់ចេញនូវ «កម្មវិធីនយោបាយ សម្រាប់​ការ​កសាង និងការការពារមាតុភូមិ ឆ្នាំ២០២៣-២០២៨» ដោយនៅក្នុង​គោល​នយោបាយអ​ភិវឌ្ឍ​តាម​វិស័យ គឺបានផ្តោតសំខាន់លើការគ្រប់គ្រងដីធ្លី និងសំណង់ ដោយត្រូវ​បន្ត​អនុវត្តកា​រ​កែ​ទម្រង់​ឱ្យ​កាន់​តែ​សកម្ម និងស៊ីជម្រៅលើវិស័យដីធ្លី តាមរយៈការពង្រឹងការគ្រប់គ្រងដីធ្លី ដោយជំរុញ​បញ្ចប់​ការ​ចុះ​បញ្ជីដីលើកដំបូង, ជំរុញការចុះបញ្ជីដីសហគមន៍ជនជាតិដើមភាគតិច និងជំរុញ​ការ​ចុះ​បញ្ជី​បន្ត​ដី​គ្រប់ប្រភេទ ព្រមទាំងផ្តល់ប័ណ្ណ​កម្មសិទ្ធិ​ជូន​អ្នក​កាន់កាប់​ដែល​មាន​លក្ខណ​សម្បត្តិ​គ្រប់​គ្រាន់ តាមលក្ខខណ្ឌ។លើស​ពីនេះ រដ្ឋាភិបាលក៏បន្តអនុវត្តកម្មវិធីសម្បទានដីសង្គមកិច្ច ដើម្បីចែក​ដីជូន​ប្រជា​ពលរដ្ឋ​ស៊ីវិល​ក្រីក្រ ឬ ផ្ទះជូនដល់កងកម្លាំងកំពុងឈរជើងតាមព្រំដែន, អតីតកងកម្លាំងប្រដាប់អាវុធ, គ្រួសារ​ដែលក្រីក្រ ដែលខ្វះដីប្រើប្រាស់ ប្រកបដោយតម្លាភាព និងសមធម៌៕

ក្រុមហ៊ុន Grab ប្តេជ្ញាធ្វើជាគំរូល្អ ក្នុងការគោរពច្បាប់ចរាចរណ៍ ការផ្តល់សុវត្ថិភាព និងផាសុកភាពដល់អតិថិជនរបស់ខ្លួន ជាប់ជាប្រចាំ

2024/01/17 07:33:24 am        347
Facebook Telegram Linkin
នារសៀលថ្ងៃទី១៦ ខែមករា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យលោក Anthony Tan នាយកប្រតិបត្តិ និងជាសហស្ថាបនិកក្រុមហ៊ុន Grab ចូលជួបសម្តែងការគួរសម និងពិភាក្សាការងារ ក្នុងឱកាសចូលរួមវេទិកាសេដ្ឋកិច្ចពិភពលោកឆ្នាំ២០២៤ នៅទីក្រុងដាវ៉ូស ប្រទេសស្វីស ។ក្នុងជំនួប លោក Anthony Tan បានថ្លែងអំណរគុណជូនចំពោះ សម្តេចធិបតី ដែលបានអនុញ្ញាតឱ្យរូបលោក និងសហការី ចូលជួបសម្តែងការគួរសម និងបានជម្រាបជូនអំពីសកម្មភាពអាជីវកម្មរបស់ក្រុមហ៊ុន Grab ដែលត្រូវបានបង្កើតឡើងក្នុងឆ្នាំ២០១២ ជាក្រុមហ៊ុនបច្ចេកវិទ្យាតាមប្រព័ន្ធទូរស័ព្ទឆ្លាត (Smart phone) ដែលផ្តល់សេវាកម្មដឹកជញ្ជូន និងការទូទាត់តាមប្រព័ន្ធឌីជីថល សម្រាប់អ្នកបើកបរ ដៃគូពាណិជ្ជករ និងអ្នកប្រើប្រាស់។ សព្វថ្ងៃ ក្រុមហ៊ុន Grab មានវត្តមានអាជីវកម្ម នៅក្នុងប្រទេសកម្ពុជា សិង្ហបុរី ម៉ាឡេស៊ី ហ្វីលីពីន ថៃ វៀតណាម និងតំបន់អាស៊ីអាគ្នេយ៍។ ជាការឆ្លើយតបសម្តេចធិបតី បានសម្តែងនូវក្តីរីករាយចំពោះជំនួបជាមួយ​លោកនាយក​ប្រតិបត្តិក្រុមហ៊ុន Grab និងបានអរគុណចំពោះការបណ្តាក់ទុនវិនិយោគនៅកម្ពុជា ក្នុងវិស័យដឹកជញ្ជូន ដែលគម្រូអាជីវកម្មរបស់ Grab បានចូលរួមចំណែកយ៉ាងសំខាន់ក្នុងទាក់ទាញ និងប្រមូលផ្តុំប្រតិបត្តិករក្រៅប្រព័ន្ធ ជាពិសេស ផ្នែកដឹកជញ្ជូន ឱ្យចូលមកក្នុងថ្នាលឌីជីថលរបស់ Grab ដែលកំពុងតែមានការអភិវឌ្ឍ និងទំនើបកម្មជាលំដាប់ ។ ក្នុងឱកាសនោះផងដែរ សម្តេចធិបតី បានគាំទ្រចំពោះការប្តេជ្ញារបស់ក្រុមហ៊ុន Grab ក្នុងការជំរុញ​អ្នកប្រកបអាជីវកម្មដោយប្រើថ្នាលឌីជីថល Grab ធ្វើជាគម្រូក្នុងការគោរពច្បាប់ចរាចរណ៍ ការផ្តល់​សុវត្ថិភាព និងផាសុកភាពដល់អតិថិជនរបស់ខ្លួន ជាប់ជាប្រចាំ ៕

សម្តេចធិបតីនាយករដ្ឋមន្រ្តី អនុញ្ញាតឱ្យថ្នាក់ដឹកនាំក្រុមហ៊ុន Shenzhen Power Solution ចូលជួបសម្តែងការគួរសម នៅប្រទេសស្វីស

2024/01/17 07:28:07 am        272
Facebook Telegram Linkin
នារសៀលថ្ងៃទី១៦ ខែមករា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យលោកស្រី Xia Li ស្ថាបនិក និងជាអគ្គនាយិកាក្រុមហ៊ុន Shenzhen Power Solution ចូលជួបសម្តែងការគួរសម និងពិភាក្សាការងារ ក្នុងឱកាសចូលរួមវេទិកាសេដ្ឋកិច្ចពិភពលោកឆ្នាំ២០២៤ នៅទីក្រុងដាវ៉ូស ប្រទេសស្វីស ។ក្នុងជំនួបនេះ លោកស្រី Xia Li បានថ្លែងអំណរគុណជូនចំពោះ សម្តេចធិបតី ដែលបានអនុញ្ញាតឱ្យរូបលោកស្រី និងសហការី ចូលជួបសម្តែងការគួរសម និងបានជម្រាបជូន សម្តេចធិបតី អំពីផលិតផលរបស់ក្រុមហ៊ុន ដែលអាចជួយដល់ការកាត់បន្ថយការចំណាយ និងលើកកម្ពស់ជីវភាពរបស់ប្រជាជននៅតាមតំបន់ជនបទ តាមរយៈការផលិតឧបករណ៍អគ្គិសនី​ច្រើនប្រភេទដើរដោយថាមពលព្រះអាទិត្យ ដែលមានតម្លៃសមរម្យ និងមានផលប្រយោជន៍ច្រើនសម្រាប់ផាសុកភាព និងតម្រូវការប្រើប្រាស់ក្នុងជីវភាពប្រចាំថ្ងៃ។ជាការឆ្លើយតប សម្តេចធិបតី បានសម្តែងនូវក្តីរីករាយចំពោះជំនួបជាមួយលោកស្រីស្ថាបនិក និង អគ្គនាយិកាក្រុមហ៊ុន និងបានបង្ហាញនូវការស្វាគមន៍ចំពោះបំណងរបស់ក្រុមហ៊ុន​ក្នុងការបណ្តាក់ទុនវិនិយោគនៅកម្ពុជា ជាពិសេស ការផលិតឧបករណ៍អគ្គិសនីដើរដោយថាមពលព្រះអាទិត្យ ព្រមទាំងបានលើកទឹកចិត្តឱ្យមានការចាប់ដៃគូសហការជាមួយក្រុមហ៊ុនក្នុងស្រុករបស់កម្ពុជា ដែលចាប់អារម្មណ៍លើគម្រូអាជីវកម្មប្រភេទថ្មីនេះ ។គួរបញ្ជាក់ថា ក្រុមហ៊ុន Shenzhen Power Solution គឺជាក្រុមហ៊ុនអភិវឌ្ឍន៍និងផលិតឧបករណ៍អគ្គិសនី ដើរដោយថាមពលព្រះអាទិត្យ ដែលមានតម្លៃសមរម្យលំដាប់ពិភពលោក និងមានមូលដ្ឋាននៅទីក្រុងស៊ិនជិន ប្រទេសចិន ៕

បណ្ដាញសង្គម

ព័ត៌មានថ្មីៗ

​អគ្គមេបញ្ជាការកងទ័ពម៉ាឡេស៊ី នឹងបង្កើតក្រុមសង្កេតការណ៍ដែលមានអនុព័ន្ធយោធាម៉ាឡេស៊ី ជាប្រធាន ដើម្បីចេញសង្កេតការណ៍នៅថ្ងៃស្អែកនេះ
07/29/2025 09:07 PM
Facebook Telegram Linkin
មេដឹកនាំកំពូលអ៊ីរ៉ង់ ចោទប្រកាន់លោកខាងលិចថា ប្រើប្រាស់ការទាមទារនុយក្លេអ៊ែរជាពាក្យដោះសារការប្រឈមដាក់គ្នា
07/29/2025 09:07 PM
Facebook Telegram Linkin
ឯកឧត្តម ឌិត ទីណា បន្តសួរសុខទុក្ខពលរដ្ឋភៀសខ្លួន ខណៈបទឈប់បាញ់ចូលជាធរមាន
07/29/2025 09:07 PM
Facebook Telegram Linkin
សមាគមនាវាយុវជនអាស៊ីអាគ្នេយ៍កម្ពុជា រៀបចំ «យុទ្ធនាការគាំពារសុខភាពផ្លូវចិត្តសម្រាប់ជនភៀសសឹក» នៅតាមបណ្ដោយព្រំដែន
07/29/2025 09:07 PM
Facebook Telegram Linkin
ក្រោយការព្រមានពីទុរ្ភិក្ស ជនប៉ាឡេស្ទីននិយាយថា ពួកគេរស់ដូចជាមនុស្សស្លាប់អស់រយៈពេល ៥ខែមកហើយ
07/29/2025 08:07 PM
Facebook Telegram Linkin
ជនប៉ាឡេស្ទីននៅទីក្រុងហ្កាហ្សា រៀបចំពិធីបុណ្យសពសម្រាប់មនុស្សដែលត្រូវបានសម្លាប់តាមច្រកអាកាសអ៊ីស្រាអែល
07/29/2025 08:07 PM
Facebook Telegram Linkin
លោកជំទាវ ហ៊ុន ម៉ាណា ចាត់តំណាងនាំយកអំណោយជូនជនភៀសសឹកចំនួន ៥០០០គ្រួសារ ក្នុងខេត្តឧត្តរមានជ័យ
07/29/2025 08:07 PM
Facebook Telegram Linkin
ប្រជាជនប៉ាឡេស្ទីនយ៉ាងតិច ៦០.០០០នាក់ ត្រូវបានសម្លាប់ ខណៈការវាយលុករបស់អ៊ីស្រាអែលនៅបន្តមាន នៅហ្កាហ្សា
07/29/2025 08:07 PM
Facebook Telegram Linkin
ជនភៀសខ្លួនស៊ូដង់ សម្រុកចេញពីអេហ្ស៊ីបទៅប្រទេស ក្រោយកងទ័ពកាន់កាប់ទីក្រុង Khartoum វិញ
07/29/2025 08:07 PM
Facebook Telegram Linkin
អ្នកជំនាញ៖ តំបន់ឆ្នេរឈីលីអាចនឹងបាត់បង់ ពេលដែលសំណឹកកាន់តែកើនឡើងខ្លាំង
07/29/2025 07:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.