នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យ​នូវ​កិច្ច​ប្រជុំ​​វិសាមញ្ញ នៃ​គណៈកម្មាធិកា​រ​ព្រំដែន​ទូទៅកម្ពុជា-ថៃ
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា

នយោបាយ​ និង ការអភិវឌ្ឍន៍

មនី្ទរពេទ្យបង្អែករាជធានីភ្នំពេញផ្តល់ការព្យាបាលជំងឺមាត់ ធ្មេញ ជូនពលរដ្ឋមិនគិតថ្លៃរយៈពេល ១៥ ថ្ងៃ

2024/01/08 02:29:59 pm        1307
Facebook Telegram Linkin
មន្ទីរពេទ្យបង្អែករាជធានីភ្នំពេញជាមន្ទីរពេទ្យមួយមានទីតាំងនៅកណ្តាលរាធានីភ្នំពេញ ផ្នែក​ព្យាបាល​ជំងឺ​មាត់ធ្មេញ មានទទួលព្យាបាលដោយមិនគិតថ្លៃសម្រាប់សេវា សម្អាតធ្មេញ ដកធ្មេញ និង​ប៉ះធ្មេញរយៈពេល ១៥ ថ្ងៃចាប់ពីថ្ងៃ ១ ដល់ថ្ងៃ១៥ ខែមករា ឆ្នាំ២០២៤។លោកទន្តបណ្ឌិត ធូ សំភី ប្រធានផ្នែកជំងឺមាត់ ធ្មេញ នៃមនី្ទរពេទ្យបង្អែករាជធានីភ្នំពេញប្រាប់ BTV ព័ត៌មាននាព្រឹកថ្ងៃទី៨ ខែមករា ឆ្នាំ២០២៤នេះថា សព្វថ្ងៃផ្នែកជំងឺមាត់ ធ្មេញ មាន​ផ្តល់​សេវា​កម្ម​ព្យាបាល​ជំងឺមាត់ធ្មេញ ដាក់ធ្មេញ ដកធ្មេញ និងពត់ធ្មេញ។ ប៉ុន្តែចាប់ពីថ្ងៃទី១ រហូតដល់​ថ្ងៃទី​១៥ ខែមករា មនី្ទរពេទ្យបានផ្តល់សេវាដកធ្មេញ លាងសម្អាតធ្មេញ និងប៉ះធ្មេញ ជូនដល់​ប្រជាពលរដ្ឋ​ដោយ​ឥតគិតថ្លៃក្នុងគោលបំណងលើកកម្ពស់សុខភាពមាត់ធ្មេញ ជូនបងប្អូន​ប្រជាពលរដ្ឋ​ក្មេង ចាស់ ប្រុស ស្រី មកពីបណ្តារាជធានី-ខេត្ត។ជាមួយគ្នានោះដែរបងប្អូនប្រជាពលរដ្ឋមកទទួលសេវាពិនិត្យ ព្យាបាលជំងឺសុខភាពមាត់ ធ្មេញ ពី​ក្រុម​គ្រូ​ពេទ្យ​ឯកទេស នៃមនី្ទរពេទ្យបង្អែករាជធានីភ្នំពេញ បង្ហាញពីកី្ត​សប្បាយ​រីក​រាយ​បាន​អញ្ជើញ​មក​ទទួលសេវាពិនិត្យ ព្យាបាលជំងឺមាត់ ធ្មេញ ពីក្រុមគ្រូពេទ្យ គឺលោកគ្រូពេទ្យ អ្នកគ្រូ​ពេទ្យ យកចិត្តទុកដាក់និងព្យាបាលជូនបានយ៉ាងល្អប្រសើរ។ ទន្ទឹម​នឹង​នោះ​ក៏​សូម​អរគុណ​ប្រមុខរា​ជរដ្ឋាភិបាលកម្ពុជា អាណតិ្តទី៧ ដែលបានយក​ចិត្ត​ទុក​ដាក់​លើ​សុខ​មាលភាព​របស់​ប្រជា​ពលរដ្ឋ ដោយ​មិន​ទុក​ឱ្យ​ប្រជាជន​ណា​ម្នាក់​ទទួល​រង​គ្រោះ​ដោយ​មិន​មាន​ការ​យក​ចិត្ត​ទុក​ដាក់​នោះ​ឡើយ​។ លោកវេជ្ជបណ្ឌិត នេត សុវិរៈ នាយកមន្ទីរពេទ្យបង្អែករាជធានីភ្នំពេញ បានលើកឡើងថា មនី្ទរ​ពេទ្យ​មាន​ផ្តល់សេវាពិនិត្យ ព្យាបាលជំងឺផ្សេងៗទៀតដូចជា: ផ្នែកសម្ភព និងរោគស្ត្រី, ផ្នែក​សល្យកម្ម និងប្រពោធនកម្ម, ផ្នែកជំងឺទូទៅ, ផ្នែកសង្គ្រោះបន្ទាន់, ផ្នែកពិគ្រោះជំងឺក្រៅ, ផ្នែក​ជំងឺភ្នែក, ផ្នែកផ្លូវចិត្ត, ផ្នែកជំងឺកុមារ, ផ្នែកសើរស្បែក, ផ្នែកត្រចៀក ច្រមុះ បំពង់ក, ផ្នែក​ព្យាបាល​ជំងឺ​មាត់ ធ្មេញ, ផ្នែកកាមរោគ, ផ្នែកឱសថ, ផ្នែកមន្ទីរពិសោធន៌ និងផ្នែកអេកូសាស្ត្រ និង​រូប​ភាព​វេជ្ជសាស្ត្រ៕ អត្ថបទ រដ្ឋា

បុស្បុករូបសំណាកព្រះគ្រូ គឹម ច្រែង និងសម្តេចតេជោ កាលនៅពីកុមារ ត្រូវបានសម្ពោធជាផ្លូវការនៅថ្ងៃនេះ

2024/01/08 01:41:44 pm        312
Facebook Telegram Linkin
ក្រចេះ៖ ឯកឧត្តម ហ៊ុន ម៉ានី តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានអញ្ជើញក្នុង​ពិធី​សម្ពោធ​ដា​ក់​ឲ្យ​ប្រើប្រាស់​ជា​ផ្លូវ​ការ​បុស្បក​ រូប​សំណាក​ព្រះ​គ្រូធម្មាចារ្យ គឹម ច្រែង និងសម្តេចអគ្គមហាសេនាបតីតេជោ ហ៊ុន សែន កាលនៅ​ពីកុមារ នៅព្រឹកថ្ងៃទី៨ ខែមករា ឆ្នាំ២០២៤ ស្ថិតក្នុងឃុំបុសលាវ ស្រុកចិត្របុរី ខេត្តក្រចេះ។ នាឱកាសនោះ ឯកឧត្តម ហ៊ុន ម៉ានី មានប្រសាសន៍ថា ក្នុងនាមសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី សូមផ្តាំផ្ញើរការសួរសុខទុក្ខ ដល់លោកតា លោកយាយ អ៊ំ ពូ មីង ប្អូន​ៗ​យុវជន ពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក៏​ដូច​ជា​សម្តេចមហាបវរធិបតី ហ៊ុន ម៉ាណែត និងសូមចូល​រួម​អបអរ​សាទរ​ដល់​បង​ប្អូន​ប្រជា​ពលរដ្ឋ​ខេត្ត​ក្រចេះ ចំពោះសមិទ្ធផលថ្មី ដែលសម្ពោធថ្ងៃនេះ គឺបុស្បុករូបសំណាកព្រះគ្រូធម្មាចារ្យ គឹម ច្រែង និងសម្តេចតេជោ ហ៊ុន សែន កាលពីកុមារភាព ដែលមានអត្ថន័យដ៏ជ្រាលជ្រៅនេះ។ ឯកឧត្តម មានប្រសាសន៍ទៀតថា បុស្បុកនេះបានឆ្លុះបញ្ចាំងពីប្រវត្តិតស៊ូរបស់ សម្តេចតេជោ ហ៊ុន សែន ដែលជាកូនកសិករម្នាក់ នៅឃុំពាមកោះស្នា ស្រុកស្ទឹងត្រង់ ខេត្តកំពង់ចាម ហើយ​បា​ន​ពុះពារ​ខិតខំប្រឹងប្រែងរៀនសូត្រ ដោយបានបន្តការសិក្សានៅវត្តនាគវ័ន្ត រាជធានីភ្នំពេញ ហើយ​ក្នុង​ពេល​រស់នៅរាជធានីភ្នំពេញនេះហើយ ដែលសម្តេចតេជោ ហ៊ុន សែន បានស្នាក់អាស្រ័យ និង​ទទួល​ការមើលថែផ្គត់ផ្គង់ពីព្រះគ្រូធម្មាចារ្យ គឹម ច្រែង។ឯកឧត្តម ហ៊ុន ម៉ានី ថ្លែងថា បុស្បុកនេះមិនត្រឹមតែមានសម្រស់ស្រស់ស្អាត ពោរពេញ​ដោយ​ក្បាច់​រចនា​ខ្មែរ​យ៉ាងល្អ ប្រណិតតែប៉ុណ្ណោះទេ តែអ្វីដែលជាគុណតម្លៃលើសលប់ទៀតនោះ គឺអត្ថន័យ​ដ៏​ជ្រាល​ជ្រៅ ​នៃការកសាងបុស្បុក ទាំងរូបសំណាកចាស់ (ដែលក្នុងពេល​នេះ​មាន​សភាព​ចាស់​ទ្រុឌ​ទ្រោម) ហើយជំនួសដោយរូបសំណាកថ្មីដែលដាក់សម្ពោធពេលនេះ។ អត្ថន័យ​នៃ​ការ​កសាង​រូប​សម្តេច​តេជោ ហ៊ុន សែន ដែលជាកូនកសិករម្នាក់នៅឃុំពាមកោះស្នា ស្រុក ស្ទឹងត្រង់ ខេត្ត​កំពង់ចាម ហើយបានពុះពារខិតខំប្រឹងប្រែងរៀនសូត្រ ដោយបានបន្តការសិក្សា នៅវត្តនាគវ័ន្តែ រាជធានី​ភ្នំពេញ។ ក្នុងពេលរស់នៅរាជធានីភ្នំពេញ សម្តេចតេជោ ហ៊ុន សែន បានស្នាក់អាស្រ័យ និង​ទទួលការមើលថែ ផ្គត់ផ្គង់ពីព្រះគ្រូធម្មាចារ្យ គឹម ប្រែង។ រូប សំណាក ព្រះគ្រូធម្មាចារ្យ និង​សម្តេចតេជោ កាលនៅពីកុមារ ត្រូវបានសាងសង់ឡើង បន្ទាប់ពី ព្រះគ្រូធម្មាចារ្យ បាន​ទទួល​មរណភាព (ឆ្នាំ១៩៨៩) ដើម្បីទុកជាការរំលឹក និងចង ចាំអំពីប្រវត្តិរបស់សម្តេចតេជោ កាល​នៅ​ពី​កុមារ ដែលធ្លាប់រស់នៅជាមួយ ព្រះគ្រូធម្មា ចារ្យ។ ដោយរូបសំណាកពីមុនធ្វើពីបេតុង (សាង​សង់​រួច​រាល់ថ្ងៃទី ១៨ មីនា ឆ្នាំ២០០៣) មានសភាពចាស់ទ្រុឌទ្រោម ទើប សម្តេចតេជោ បាន​ណែនាំ​ឱ្យ​រៀបចំសាងសង់ឡើងជាថ្មី ដែលធ្វើឡើងពីស្ពាន់សុទ្ធ។ឯកឧត្តម ហ៊ុន ម៉ានី ថ្លែងបន្តថា សមិទ្ធផលដែលយើងកំពុងសម្ពោធនាពេលនេះ និ​ង​សមិទ្ធ​ផល​ដទៃ​ទៀត មិនអាចកើតឡើង បានឡើយ ប្រសិនបើគ្មានសន្តិភាព និងស្ថិរភាពនយោបាយ ដែល​កម្ពុជា​សម្រេច​បានដោយ លំបាក ក្រោមការថ្នាក់ដឹកនាំរបស់សម្តេចតេជោ ហ៊ុន សែន និងថ្នាក់​ដឹកនាំ​ដទៃទៀត។ លើមូលដ្ឋានគ្រឹះនៃសន្តិភាពនេះ និងក្រោមការដឹកនាំប្រកបដោយ គតិ​បណ្ឌិត​របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នឹងបន្តរីក ចម្រើន ដើម្បីប្រជាពលរដ្ឋគ្រប់រូបគ្រប់ជំនាន់ នឹងអាចបន្តទទួលបានប្រយោជន៍ពីសុខសន្តិភាព និង​សមិទ្ធផលនៃការអភិវឌ្ឍថ្មីៗជាបន្តបន្ទាប់ទៀត៕

សម្ដេចធិបតីទទួលយកការអញ្ជើញរបស់ប្រធានាធិបតីបារាំង និងប្តេជ្ញាចិត្តពិភាក្សា ពង្រឹងទំនាក់ទំនងទ្វេភាគី

2024/01/08 01:10:30 pm        216
Facebook Telegram Linkin
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នៅថ្ងៃទី៨ ខែមករា ឆ្នាំ ២០២៣នេះ បានចេញលិខិតទទួលយកការអញ្ជើញរបស់ ឯកឧត្តម អេម៉ានុយអែល ម៉ាក្រុង ប្រធានាធិបតី ​នៃសាធារណរដ្ឋបារាំង ដែលបាន​អញ្ជើញសម្តេច​ទៅបំពេញ​ទស្សន​កិច្ច​ផ្លូវ​ការ​នៅ​សាធារណរដ្ឋ​បារាំង​ចាប់ពីថ្ងៃទី១៨ ដល់ទី១៩ ខែមករា ឆ្នាំ២០២៤។ ខណៈប្រទេសបារាំង គឺជាប្រទេស​អឺរ៉ុបដំបូងគេដែលសម្តេចធិបតី នឹងអញ្ជើញបំពេញ​ទស្សនកិច្ចផ្លូវ​ការ​បន្ទាប់​ពី​បាន​ចូល​កាន់​តំណែងជានាយករដ្ឋមន្ត្រី កាលចុងខែសីហា ឆ្នាំ២០២៣។សម្ដេចធិបតីនាយករដ្ឋមន្រ្ដីបានថ្លែងថា៖«ខ្ញុំសូមសម្តែងនូវគារវកិច្ចដ៏ខ្ពង់ខ្ពស់ និង​សូម​ថ្លែង​អំណរ​គុណ​ឯកឧត្តមដែលបានអញ្ជើញខ្ញុំ ទៅបំពេញទស្សនកិច្ចផ្លូវការនៅសាធារណរដ្ឋបារាំង នៅថ្ងៃ​ទី​១៨-១៩ ខែមករា ខាងមុខនេះ។ នេះជាកិត្តិយសដ៏ធំធេង ហើយខ្ញុំសូមទទួលយកឱកាសនេះ ជាមួ​យ​នឹងការប្តេជ្ញាចិត្តដ៏ខ្លាំងក្លា ដើម្បីពិភាក្សា និងពង្រឹង​ទំនាក់​ទំនងទ្វេភាគី​របស់​យើង​ទាំងពី​រ»​។សម្ដេចធិបតីមានប្រសាសន៍ថា ព្រះរាជទស្សនកិច្ចរបស់ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅទីក្រុង​ប៉ារីសនា​ពេល​ថ្មី​ៗកន្លងទៅនេះ បានបង្ហាញពីការបោះជំហានដ៏សំខាន់មួយ ឆ្ពោះទៅ​រក​ការ​ពង្រឹង​ភាព​ជាដៃគូរ​វាងប្រជាជាតិយើងទាំងពីរ។ ក្នុងការបន្តនូវសន្ទុះនេះ ទស្សនកិច្ចរបស់​សម្ដេច​មាន​គោល​បំណង​ពង្រឹង​កិច្ចសហប្រតិបត្តិការឱ្យកាន់ត ស៊ីជម្រៅបន្ថែមទៀត លើវិស័យសំខាន់ៗ ដោយ​ផ្តោត​ជា​ពិសេស​លើបញ្ហាការប្រឈមផ្នែកបរិស្ថាន នាពេលបច្ចុប្បន្ន ជាពិសេស បញ្ហាអន្តរ​កាល​ថាមពល និងការប្រែប្រួលអាកាសធាតុ ព្រមទាំងការលើកស្ទួយ សន្តិភាពនៅលើពិភពលោក។ម៉្យាងទៀត ការពង្រឹងទំនាក់ទំនងសេដ្ឋកិច្ច ការចែករំលែកយុទ្ធសាស្ត្រអភិវឌ្ឍន៍ប្រកបដោយ ចីរភាព កិច្ចសហប្រតិបត្តិការលើវិស័យការពារជាតិ ការលើកតម្កើងបេតិកភណ្ឌវប្បធម៌ និង​ការ​លើក​ក​ម្ពស់ហ្វ្រង់កូហ្វូនី គឺជាសសរស្តម្ភនៃទំនាក់ទំនងទ្វេភាគីរបស់ប្រទេសទាំងពីរ​។ នេះបើតាម​ការ​បញ្ជាក់​របស់​សម្ដេចនាយករដ្ឋមន្រ្ដី។សម្ដេចធិបតីបន្តថា៖ «ខ្ញុំជឿជាក់ថា ការពិភាក្សារបស់យើងនឹង​រួមចំណែក​ឱ្យ​មាន​ការ​យល់​គ្នា​កាន់​តែ​ស៊ី​ជម្រៅ និងនាំ មកនូវគំនិតផ្តួចផ្តើមរួម ដែលនឹងផ្ដល់​អត្ថ​ប្រយោជន៍​ដល់​ប្រទេស​យើង​ទាំង​ពីរ​។ កម្ពុជាប្តេជ្ញាចិត្តនឹងបន្ត ចូលរួមក្នុងកិច្ចខិតខំប្រឹងប្រែងនេះ ដោយទទួល​ស្គាល់​នូវ​សារៈ​សំខាន់​នៃ​ភា​ព​ជាដៃគូរបស់យើង សម្រាប់ ប្រជាជនរបស់យើង និងសម្រាប់សហគមន៍អន្តរជាតិ។ ខ្ញុំ​រង់​ចាំ​ជួប និងពិភាក្សាប្រកបដោយផ្លែផ្កាជាមួយឯកឧត្តម។ សូម ឯកឧត្តមប្រធានាធិបតី មេត្តា​ទទួល​នូវ​ក្តីគោរព​ដ៏​ខ្ពង់ខ្ពស់ពីខ្ញុំ»។សូមជម្រាបថាតាមរយៈដំណើរទស្សនកិច្ចផ្លូវការរបស់សម្ដេចធិបតីទៅកាន់ប្រទេសបារាំង ជំនួប​ទ្វេភាគី​នា​ពេលខាងមុខរវាងសម្តេចធិបតី និងឯកឧត្តម ប្រធានាធិបតី ម៉ាក្រុង គឺឱកាស​ដ៏​ប្រសើរ​សម្រាប់​រដ្ឋាភិបាលនៃប្រទេសទាំងពីរ បញ្ជាក់ជាថ្មីនូវ​ការ​ប្តេជ្ញា​ចិត្ត​រួម​ក្នុង​ការ​លើក​កម្ពស់​ទំនាក់​ទំនង​ជាប្រពៃណីឱ្យឈានដល់កម្រិតថ្មី ពង្រឹងនិងពង្រីកកិច្ច​សហប្រតិបត្តិការ​ក្នុង​ក្របខ័ណ្ឌ​ទ្វេភាគី និង​ពហុភាគី ដែលផ្តល់ប្រយោជន៍ទៅវិញទៅមកសម្រាប់ប្រជាជាតិទាំងពីរ ព្រមទាំង​រួម​គ្នា​ដោះ​ស្រាយ​ការប្រឈមសកល និងរក្សាសណ្តាប់ធ្នាប់ពិភពលោកដែលផ្អែកលើច្បាប់៕

ប្រតិភូសភាសហព័ន្ឋអាល្លឺម៉ង់កោតសរសើរចំពោះការអភិវឌ្ឍរីកចម្រើនរបស់ប្រទេសកម្ពុជា

2024/01/08 12:37:00 pm        63
Facebook Telegram Linkin
ឯកឧត្ដមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា តំណាង​ដ៏ខ្ពង់ខ្ពស់​សម្ដេច​មហា​រដ្ឋសភា​ធិកាធិបតី ឃួន សុដារី ប្រធានរដ្ឋសភា នៅព្រឹកថ្ងៃទី៨ ខែមករា ឆ្នាំ២០២៤ បាន​អនុញ្ញាត​ឱ្យ​គណៈប្រតិភូសភានៃសហព័ន្ធអាល្លឺម៉ង់ដឹកនាំដោយ ឯកឧត្តម Tino CHRUPALLA ប្រធាន​ក្រុមសភានៃគណបក្សAfD នៃសហព័ន្ធអាល្លឺម៉ង់ និងសហការី ចូលជួបធ្វើសវនាការ និងពិភាក្សាការងារ នៅវិមានរដ្ឋសភា។ឯកឧត្ដមកិត្តិសេដ្ឋាបណ្ឌិត ជាម យៀប មានប្រសាសន៍ថា កិច្ចជំនួបនាថ្ងៃនេះ គឺជា​សក្ខីភាព​បង្ហាញ​ឲ្យ​ឃើញកាន់តែច្បាស់ថែមទៀត អំពីសារៈសំខាន់នៃទំនាក់ទំនង និងកិច្ច​សហប្រតិបត្តិការ​របស់​ស្ថាប័ន​នីតិប្បញ្ញត្តិ នៃប្រទេសទាំងពីរ ដែលមិត្តអាល្លឺម៉ង់ ជាប្រទេសដែល​បាន​ជួយ​គាំទ្រ​លើ​ការ​អភិវឌ្ឍគ្រប់បែបយ៉ាងជាយូរអង្វែងមួយនៅកម្ពុជា ដល់ស្ថាប័ននីតិប្បញ្ញត្តិ និងរាជ​រដ្ឋាភិបាល​កម្ពុជា​។ តាមរយៈឯកឧត្តមប្រធានគណៈប្រតិភូ ឯកឧត្ដមកិត្តិសេដ្ឋាបណ្ឌិត បានថ្លែងអំ​ណរ​គុណ​ជូន​ដល់​សភា រដ្ឋាភិបាល និងប្រជាជនអាល្លឺម៉ង់ ដែលផ្តល់ជំនួយ​ជា​បន្ត​បន្ទាប់​សម្រាប់​ការ​អភិវឌ្ឍ​សង្គម​សេដ្ឋកិច្ច​នៅ​កម្ពុជា​ទាំងទ្វេភាគី និងជំនួយដល់អង្គការសង្គមស៊ីវិលនៅកម្ពុជា។ឯកឧត្ដម ក៏បានមានប្រសាសន៍ពីវឌ្ឍនភាព និងការរីកចម្រើនរបស់កម្ពុជាសព្វថៃ្ង ពិតជាមិន​អាច​កាត់​ផ្តាច់​បាន​ពីការរួមវិភាគទានដ៏ថ្លៃថ្លាពីបណ្តាប្រទេសជាមិត្តទាំងក្នុងតំបន់ និង​សកល​លោក​ក្នុង​នោះ​អាល្លឺម៉ង់ ជាប្រទេសមួយដែលបានផ្តល់ជំនួយយ៉ាងច្រើន និងលើច្រើនវិស័យ ដល់កម្ពុជា។ ឯកឧត្ដមកិត្តិសេដ្ឋាបណ្ឌិត ជាម យៀប បានមានប្រសាសន៍បន្តថា រដ្ឋសភាកម្ពុជា បាន​បង្កើត​ក្រុម​មិត្ត​ភាពសភា កម្ពុជា-អាល្លឺម៉ង់ នៅគ្រប់នីតិកាល នៃរដ្ឋសភាជាបន្តបន្ទាប់ ហើយ​កិច្ច​សហប្រតិបត្តិការនេះ បាននាំមកនូវទំនាក់ទំនងការទូតសភាទាំងពីរយ៉ាងល្អប្រពៃ។ ស្ថាប័ន​នីតិ​ប្បញ្ញត្តិ នៃប្រទេសទាំងពីរបានធ្វើការយ៉ាងសកម្មក្នុងការផ្លាស់ប្តូរបទពិសោធន៍ និង​ចំណេះ​ដឹង​កិច្ច​ការ​សភា​​ពីគ្នាទៅវិញទៅមក ហើយសភាកម្ពុជាបានសិក្សារៀនសូត្រជាច្រើន ពីសភា​អាល្លឺម៉ង់​តាមរយៈ ដំណើរទស្សនកិច្ច សិក្សា និងកម្មវិធីផ្សេងៗ។ ឯកឧត្តម Tino CHRUPALLA ប្រធានក្រុមសភានៃគណបក្ស AfD នៃសហព័ន្ធអាល្លឺម៉ង់ បាន​ថ្លែង​អំណរ​គុណ​ចំពោះការទទួលស្វាគមន៍ដ៏កក់ក្ដៅ និងសូមឯក​ភាព​ចំពោះ​ប្រសាសន៍​របស់​ឯកឧត្ដម​កិត្តិ​សេដ្ឋា​បណ្ឌិត ជាម យៀប ដែលបានលើកឡើងពីចំណងមិត្តភាព និងកិច្ច​សហប្រតិបត្តិការ​ដ៏​ល្អ​រវាង​ប្រទេសកម្ពុជា និងអាល្លឺម៉ង់។ ឯកឧត្តមប្រធានគណៈប្រតិភូសភានៃសហព័ន្ធអាល្លឺម៉ង់ បាន​កោត​សរសើរចំពោះការអភិវឌ្ឍរីកចម្រើនរបស់ប្រទេសកម្ពុជា និងថាកម្ពុជា​កំពុង​ធ្វើ​ដំណើរ​ដ៏​ល្អ​លើ​វិថី សន្តិភាព ស្ថេរភាព ដើម្បីការអភិវឌ្ឍប្រទេស។ឯកឧត្តម Tino CHRUPALLA បានមានប្រសាសន៍ថា ឯកឧត្តមក៏បានដឹងខ្លះៗហើយ តាមរយៈ​ឯកអគ្គ​រដ្ឋ​ទូតអាល្លឺម៉ង់ប្រចាំកម្ពុជាពីតម្រូវការមួយចំនួនរបស់កម្ពុជា ពិសេសលើ​ផ្នែក​ហេដ្ឋា​រចនា​សម្ព័ន្ធ​ ដោយឯ​កឧត្ដ​ម​នឹង​នាំ​យក​បញ្ហា​ទាំង​នេះ​ទៅ​ពិភាក្សា​គ្នា​នៅ​ក្នុង​គណៈ​កម្មការ​សភា​អាល្លឺម៉ង់ ដើម្បីធ្វើយ៉ាងណារកមធ្យោបាយអាចជួយចែករំលែកដល់កម្ពុជា ក៏ដូច​ជា​ចូល​រួម​ក្នុង​ការ​ជួយ​កសាងធនធានមនុស្សរបស់កម្ពុជា។ឆ្លៀតឱកាសនេះ ឯកឧត្តម Tino CHRUPALLA បាន​ថ្លែង​អំណរ​គុណ​ចំពោះ​សម្ដេច​ប្រធាន​រដ្ឋសភា​ដែល​បានអនុញ្ញាតឱ្យឯកឧត្ដម មានជំនួបសវនាការ​ជាមួយ​ឯកឧត្ដម​កិត្តិសេដ្ឋាបណ្ឌិត​អនុ​ប្រធាន​ទី១ រដ្ឋសភានាពេលនេះ ដោយឯកឧត្ដមបានរៀនសូត្រ និងយល់ដឹងច្រើនពីកម្ពុជា ហើយ​ឯក​ឧត្ដម​នឹងបន្ដស្វែងយល់បន្ថែមទៀត ជាមួយនឹងជំនួបសវនាការ ក៏ដូចជា​កម្ម​វិធី​ផ្សេង​ៗ​ទៀត​ដែល​បាន​គ្រោងទុកនៅក្នុងដំណើរទស្សនកិច្ចនេះដែរ៕

បេក្ខជនប្រធានាធិបតីឥណ្ឌូណេស៊ី ជជែកដេញដោលអំពីគោលនយោបាយការបរទេស និងការពារជាតិ

2024/01/08 12:31:09 pm        100
Facebook Telegram Linkin
បេក្ខជនប្រកួតប្រជែងតំណែងប្រធានាធិបតីឆ្នាំ ២០២៤ ចំនួនបីរូប បានប្រកាសពីការត្រៀមខ្លួនរបស់ពួកគេ សម្រាប់ការជជែកដេញដោលការបោះឆ្នោតលើកទី ៣ ស្តីពីភូមិសាស្ត្រនយោបាយ ទំនាក់ទំនងអន្តរជាតិ សកលភាវូបនីយកម្ម នយោបាយអន្តរជាតិ ការពារជាតិនិងសន្តិសុខ ក្នុងពេលទិដ្ឋភាពក្នុងតំបន់កាន់តែតានតឹងខ្លាំងឡើង និងសម្ពាធសម្រាប់ប្រទេសឥណ្ឌូនេស៊ី ក្នុងការដាក់ខ្លួនឯងឱ្យកាន់តែប្រសើរ សម្រាប់ជម្លោះដែលអាចកើតមាន។ ក្នុងចំណោមបញ្ហាផ្តោតការយកចិត្តទុកដាក់ខ្លាំង ត្រូវបានគេរំពឹងថានឹងត្រូវបានលើកឡើងក្នុងអំឡុងពេលជជែកដេញដោលនោះ គឺលំហូរចូលជនភៀសខ្លួនរ៉ូហ៊ីងយ៉ា នៅពេលថ្មីៗនេះ ទៅកាន់កោះស៊ូម៉ាត្រា ព្រមទាំងការធ្វើទំនើបកម្មយោធាឥណ្ឌូនេស៊ី។ អតីតអភិបាលក្រុងហ្សាកាតា លោក Anies Baswedan ឈរឈ្មោះជាប្រធានាធិបតី ដែលដៃគូអ្នកឈរឈ្មោះប្រជែងអនុប្រធានាធិបតីជាប្រធាគណបក្សព្រលឹងជាតិ(PKB) លោក Muhaimin Iskandar ហើយរដ្ឋមន្ត្រីការពារជាតិលោក Prabowo Subianto តំណែងប្រធានាធិបតី លោក Gibran Rakabuming Raka អភិបាលក្រុង Surakarta ក្នុងតំណែងអនុប្រធានាធិបតី ហើយអតីតអភិបាលខេត្តជ្វាភាគកណ្តាល លោក Ganjar Pranowo ឈរតំណែងប្រធានាធិបតី ហើយអ្នកឈរឈ្មោះតំណែងអនុប្រធានាធិបតី គឺលោក Mahfud MD ជារដ្ឋមន្ត្រីកិច្ចការសន្តិសុខ ច្បាប់ និងសម្របសម្រួលនយោបាយបានឡើងកាន់វេទិការបស់ពួកគេកាលពីយប់ថ្ងៃអាទិត្យ។នៅមុនការជជែកដេញដោល ក្រុមរបស់លោក Prabowo បានសរសើររយៈពេលបួនឆ្នាំរបស់លោក ជារដ្ឋមន្ត្រីការពារជាតិ ដែលបានផ្តល់ឱ្យលោកនូវការយល់ដឹងអំពីអាទិភាពការពារជាតិ និងសន្តិសុខ របស់ប្រទេស ខណៈរដ្ឋាភិបាលបន្តធ្វើទំនើបកម្មយោធា។លោក Rahayu Saraswati អ្នកនាំពាក្យក្រុមយុទ្ធនាការរបស់លោក Prabowo បាននិយាយថា លោកយល់ច្បាស់អំពីបញ្ហាបានយ៉ាងល្អ។ លោកយល់ពីប្រព័ន្ធសព្វាវុធចម្បងដែលប្រទេសឥណ្ឌូនេស៊ីពិតជាត្រូវការ និងទីកន្លែងដែលត្រូវទិញសព្វាវុធក្នុងតម្លៃសមរម្យ។

អាកាសយានដ្ឋាន Haneda ទីក្រុងតូក្យូ ត្រលប់មកធម្មតាវិញ បន្ទាប់ពីឧបទ្ទវហេតុយន្តហោះបុកគ្នា

2024/01/08 12:21:41 pm        110
Facebook Telegram Linkin
ក្រុមមន្ត្រីនិយាយថា ប្រតិបត្តិការជើងហោះហើរបានត្រឡប់មកធម្មតាវិញហើយនៅថ្ងៃចន្ទ ទី៨ ខែមករានេះ នៅអាកាសយានដ្ឋាន Haneda ទីក្រុងតូក្យូ រយៈពេល៦ថ្ងៃ បន្ទាប់ពីការបុកគ្នាដ៏មហន្តរាយ រវាងយន្តហោះក្រុមហ៊ុនអាកាសចរណ៍ និងយន្តហោះធុនតូចឆ្មាំល្បាតឆ្នេរ ដែលបានបណ្តាលឲ្យមនុស្ស ៥ នាក់ស្លាប់ ។អ្នកដំណើរ និងបុគ្គលិកយានិកទាំងអស់ចំនួន ៣៧៩នាក់ បានរត់ចេញពីយន្តហោះឆេះរបស់ក្រុមហ៊ុនអាកាសចរណ៍ Japan Airlines បន្ទាប់ពីយន្តហោះបុកគ្នាកាលពីថ្ងៃទី ២ ខែមករា ប៉ុន្តែមនុស្ស ៥ នាក់ក្នុងចំណោម ៦ នាក់នៅលើយន្តហោះឆ្មាំល្បាតឆ្នេរ បានស្លាប់។ផ្លូវយន្តហោះរត់នៅអាកាសយានដ្ឋាន Haneda ដែលផ្លូវរត់មួយក្នុងចំណោមបួន ជាកន្លែងដែលឧបទ្ទវហេតុ បានកើតឡើងត្រូវបានបិទចាប់តាំងពីពេលនោះមក បណ្តាឲ្យមានការលុបចោលជើងហោះហើរក្នុងស្រុករាប់រយជោះងនៅអាកាសយានដ្ឋានដ៏មមាញឹកបំផុតមួយរបស់ពិភពលោក។អ្នកនាំពាក្យអាកាសយានដ្ឋានទីក្រុងតូក្យូបានប្រាប់សារព័ត៌មាន AFP ថា «ផ្លូវរត់ C បានដំណើរការឡើងវិញ នៅថ្ងៃចន្ទនេះ» ដូច្នេះអាកាសយានដ្ឋានបានដំណើរការធម្មតាឡើងវិញហើយ។ កំណត់ត្រានៃការទំនាក់ទំនង ដែលចេញផ្សាយដោយក្រសួងដឹកជញ្ជូនកាលពីសប្តាហ៍មុន បានបង្ហាញថាយន្តហោះឆ្មាំល្បាតឆ្នេរ ត្រូវបានណែនាំឱ្យឈប់នៅមុខផ្លូវរត់ ហើយយន្តហោះក្រុមហ៊ុនអាកាសចរណ៍ JAL ត្រូវបានបញ្ជាក់ច្បាស់ដើម្បីចុះចត។យោងតាមការរាយការណ៍របស់ប្រព័ន្ធផ្សព្វផ្សាយបានឲ្យដឹងថា អាកាសយានិកឆ្មាំល្បាតឆ្នេរ ជាអ្នកនៅរស់រានមានជីវិតតែម្នាក់គត់ ជឿថាលោកមានការបញ្ជាក់ច្បាស់ដើម្បីធ្វើដំណើរចូលទៅកាន់ផ្លូវរត់ ដែលយន្តហោះរបស់លោកចុះប្រហែល ៤០ វិនាទី មុនពេលបុកគ្នា។

លោក Trump នៅរដ្ឋ Iowa ទាមទារឱ្យដោះលែងអ្នកជាប់ពន្ធនាគារដោយសារការវាយប្រហារនៅវិមាន Capitol ឆ្នាំ ២០២១

2024/01/08 12:12:13 pm        68
Facebook Telegram Linkin
លោក Donald Trump បាននិយាយសម្រាលពីតួនាទីរបស់លោកក្នុងការហ៊ុមព័ទ្ធវិមានកាពីតូល នៅសហរដ្ឋអាមេរិក ក្នុងថ្ងៃខួបលើកទី ៣ នៃការវាយប្រហារ ដោយលើកហេតុផលថាអ្នកដែលត្រូវបានកាត់ទោសពីបទសម្រុកចូលអគារនោះ គួរតែត្រូវបានដោះលែង។ថ្លែងនៅក្នុងព្រឹត្តិការណ៍យុទ្ធនាការមួយនៅទីក្រុងគ្លីនតុន (Clinton) រដ្ឋអាយអូវ៉ា(Iowa) ជាមួយនឹងការប្រកួតប្រជែងជ្រើសតាំងបេក្ខជនគណបក្សសាធារណៈរដ្ឋលើកដំបូងជាងមួយសប្តាហ៍ទៀត លោក Trump បានចាត់ទុកអ្នកទាំងឡាយដែលបានជាប់ពន្ធនាគារបន្ទាប់ពីថ្ងៃទី ៦ ខែមករា ឆ្នាំ ២០២១ ថាជាការវាយប្រហារចំណាប់ខ្មាំង និងបាននិយាយថា ពួកគេត្រូវបានរដ្ឋបាលលោក Biden ធ្វើបាប។លោក Trump និយាយថា «ពួកគេបានរងទុក្ខគ្រប់គ្រាន់ហើយ» ។ លោកហៅពួកគេថាជាចំណាប់ខ្មាំង។ អ្នកមួយចំនួនហៅពួកគេថាជាអ្នកទោស។ ថ្លែងទៅកាន់អ្នកគាំទ្រជាងមួយពាន់នាក់នៅក្នុងទីកន្លែងហាត់កីឡានៅសាលារៀនមួយកន្លែង លោក Trump បានអះអាងម្តងទៀតដោយគ្មានហេតុផលថា ការបោះឆ្នោតឆ្នាំ ២០២០ គឺជាការក្លែងបន្លំ ហើយចាត់ទុកខ្លួនលោកថាជាជនរងគ្រោះពីការធ្វើទុក្ខបុកម្នេញផ្នែកនយោបាយ។

សម្តេចធិបតី៖ គ្រប់គោលនយោបាយរបស់រាជរដ្ឋាភិបាល គឺដើម្បីបម្រើផលប្រយោជន៍ពលរដ្ឋ

2024/01/08 12:07:51 pm        196
Facebook Telegram Linkin
កោះកុង៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានមានប្រសាសន៍ថា គ្រប់គោលនយោបាយរបស់រាជរដ្ឋាភិបាលកម្ពុជា មានគោលបំណង់តែមួយគត់ គឺការបម្រើផលប្រយោជន៍ដល់ប្រជាពលរដ្ឋឱ្យកាន់តែមានជីវភាពល្អប្រសើរ សេដ្ឋកិច្ចជាតិមានរីកចម្រើន។សម្ដេចធិបតី នាយករដ្ឋមន្រ្ដីមានប្រសាសន៍បញ្ជាក់បែបនេះ ក្នុងឱកាសអញ្ជើញជាអធិបតីពិធីសម្ពោធដាក់ឱ្យប្រើប្រាស់ជាផ្លូវការស្ពានសម្តេចតេជោ ហ៊ុន សែន កោះយ៉ និងជួបសំណេះសំណាលជាមួយកម្មករនិយោជិតចំនួនជាង ១ម៉ឺននាក់ ក្នុងស្រុកមណ្ឌលសីមា ខេត្តកោះកុង នាព្រឹកថ្ងៃទី៨ ខែមករា ឆ្នាំ២០២៤នេះ។សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាថ្លែងអំណរគុណដល់ប្រជាពលរដ្ឋ នៅក្នុងខេត្តកោះកុង ដែលកាលពីអំឡុងពេលបោះឆ្នោត ដែលបានជឿជាក់ និងបានបោះឆ្នោតគាំទ្រគណបក្សប្រជាជនកម្ពុជាប្រមាណ ៨៥,៧៥ ភាគរយ ក្នុងចំណោមប្រជាពលរដ្ឋនៅទូទាំងខេត្ត។ ជាពិសេសប្រជាពលរដ្ឋនៅទូទាំងប្រទេសដែលបានបោះឆ្នោតគាំទ្រគណបក្សប្រជាជនកម្ពុជា។ សម្ដេចធិបតី ហ៊ុន ម៉ាណែត ​នាយករដ្ឋមន្ត្រីនៃកម្ពុជា ​បញ្ជាក់ថា ដើម្បីឆ្លើយតបចំពោះការគាំទ្ររបស់​ការគាំទ្ររបស់ប្រជាពលរដ្ឋយ៉ាងលើសលប់ចំពោះគណបក្សប្រជាជនកម្ពុជា រាជរដ្ឋាភិបាល​អាណត្តិទី៧នេះ ​បានប្ដេជ្ញាចិត្តបម្រើប្រជាពលរដ្ឋឱ្យបានល្អ ​និងឱ្យប្រជាពលរដ្ឋកាន់តែមានបាន។ សម្ដេចធិបតី ហ៊ុន ម៉ាណែត ​នាយករដ្ឋមន្ត្រីនៃកម្ពុជា​ ថ្លែងថា ​បើគ្មានសន្ដិភាព គឺមិនអាចឱ្យ​ប្រជាពលរដ្ឋរស់នៅប្រកបដោយសេចក្ដីសុខបានទេ។ សន្ដិភាពនេះ គឺកើតឡើងតាមរយៈនយោបាយឈ្នះ ឈ្នះ របស់សម្ដេចតេជោ ហ៊ុន សែន ដូច្នេះកាលពីថ្ងៃទី១ ខែមករា ឆ្នាំ២០២៤ ​រាជរដ្ឋាភិបាលបានចេញអនុក្រឹត្យយកថ្ងៃទី ២៩ ខែធ្នូ ជា «ទិវាសន្តិភាពនៅកម្ពុជា» ថ្ងៃឈប់សម្រាករយៈពេល១ថ្ងៃនៅទូទាំងប្រទេស៕

សម្ដេចធិបតីប្រកាសថា នឹងចុះត្រួតពិនិត្យស្ថានភាពតាមខេត្តដោយមិនឱ្យអាជ្ញាធរដឹងមុនឡើយ

2024/01/08 11:59:53 am        400
Facebook Telegram Linkin
កោះកុង៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសថា សម្ដេចនឹងចុះត្រួតពិនិត្យស្ថានភាពនៅតាមបណ្ដាខេត្ត ដោយមិនប្រាប់ដំណឹងឱ្យអាជ្ញាធរដឹងជាមុនឡើយ ដើម្បីត្រួតពិនិត្យជាក់ស្ដែងលើការគ្រប់គ្រង ដឹកនាំ និងការអនុវត្តការងារនានារបស់រដ្ឋបាលខេត្តនីមួយៗ។ សម្ដេចធិបតីនាយករដ្ឋមន្រ្ដីមានប្រសាសន៍បញ្ជាក់បែបនេះ ក្នុងឱកាសអញ្ជើញជាអធិបតីពិធីសម្ពោធដាក់ឱ្យប្រើប្រាស់ជាផ្លូវការស្ពានសម្តេចតេជោ ហ៊ុន សែន កោះយ៉ និងជួបសំណេះសំណាលជាមួយកម្មករនិយោជិតចំនួនជាង១ម៉ឺននាក់ ក្នុងស្រុកមណ្ឌលសីមា ខេត្តកោះកុង នាព្រឹកថ្ងៃទី៨ ខែមករា ឆ្នាំ២០២៤នេះ។សម្ដេចធិបតីថ្លែងថា កាលពីសម្ដេចនៅកាន់កិច្ចការងារកងទ័ព ការចុះពនិត្យជាក់ស្ដែងនៅតាម​មូលដ្ឋាន​ផ្ទាល់នេះ គឺបានអនុវត្តជាប់ជាប្រចាំ ដើម្បីត្រួតពិនិត្យលើគោលនយោបាយ និងផែនការ​ការងារដែលបានដាក់ចេញ ដូច្នេះក្នុងពេលសម្ដេចកាត់ដំណែងជានាយករដ្ឋមន្រ្ដី សម្ដេចក៏នៅតែបន្តចុះពិនិត្យជាក់ស្ដែងដែរ ដោយមិនស្ដាប់តែរបាយការណ៍ដែលបានដាក់មកជូន​សម្ដេចនោះទេ។សូមជម្រាបថា រាជរដ្ឋាភិបាលអាណត្តិទី៧ នៃរដ្ឋសភា ក្រោមការដឹកនាំដោយសម្ដេចធិបតី ហ៊ុន ម៉ាណែត ​នាយករដ្ឋមន្រ្ដីកម្ពុជា ​បានដាក់ចេញនូវយុទ្ធសាស្រ្ដបញ្ចកោណ និងគោល​នយោបាយ​អាទិភាព​ជាបន្តបន្ទាប់ដល់ក្រសួង ​ស្ថាប័ននានាសម្រាប់អនុវត្តដើម្បីជំរុញកំណើនសេដ្ឋកិច្ចដល់ជាតិ និងប្រជាជន៕ អត្ថបទ៖វ៉ន ដារ៉ា

សម្តេចធិបតី បានប្រកាសយកឆ្នាំ២០២៤នេះ ជំរុញការវិនិយោគនៅខេត្តព្រះសីហនុជាថ្មី

2024/01/08 11:54:38 am        342
Facebook Telegram Linkin
កោះកុង៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសយកឆ្នាំ២០២៤នេះ ជាឆ្នាំជំរុញការវិនិយោគនៅខេត្តព្រះសីហនុជាថ្មី ជាពិសេសដើម្បីជំរុញការដោះស្រាយ បញ្ហាអគារជាប់គាំងនៅក្នុងខេត្តព្រះសីហនុ។ សម្ដេចធិបតីនាយករដ្ឋមន្រ្ដីមានប្រសាសន៍បញ្ជាក់បែបនេះ ក្នុងឱកាសអញ្ជើញជាអធិបតីពិធីសម្ពោធដាក់ឱ្យប្រើប្រាស់ជាផ្លូវការស្ពានសម្តេចតេជោ ហ៊ុន សែន កោះយ៉ និងជួបសំណេះសំណាលជាមួយកម្មករនិយោជិតចំនួនជាង ១ ម៉ឺននាក់ ក្នុងស្រុកមណ្ឌលសីមា ខេត្តកោះកុង នាព្រឹកថ្ងៃទី៨ ខែមករា ឆ្នាំ២០២៤នេះ។សម្ដេចធិបតីថ្លែងថា នៅថ្ងៃទី ២៥ ខែមករា ឆ្នាំ ២០២៤ខាងមុខនេះ សម្ដេចនឹងអញ្ជើញប្រកាសដាក់ចេញនូវកម្មវិធីនយោបាយជំរុញការវិនិយោគ និងដោះស្រាយបញ្ហាអគារជាប់គាំងនៅក្នុងខេត្តព្រះសីហនុ។សម្ដេចនាយករដ្ឋមន្ត្រី បានឲ្យដឹងថា កាលពីខែវិច្ឆិកា ឆ្នាំ ២០២៣ សម្ដេចបានដាក់ចេញនូវផែនការជំរុញទេសចរណ៍ខេត្តសៀមរាប។ ដូច្នេះនៅថ្ងៃ ២៥ ខែមករា ឆ្នាំ ២០២៤នេះ សម្ដេចបានកំណត់យកជាឆ្នាំដែលត្រូវជំរុញការវិនិយោគនៅខេត្តព្រះសីហនុ ដើម្បីដោះស្រាយបញ្ហាជាប់គាំងមួយចំនួន ជាពិសេសបញ្ហា សំណង់មួយចំនួនដែលជាប់គាំង។សូមជម្រាបថា គិតត្រឹមឆ្នាំ ២០២៣ កន្លងទៅនេះនៅខេត្តព្រះសីហនុ មានសំណង់អគារប្រមាណ ១ ០០០ កន្លែងកំពុងជាប់គាំងការសាងសង់។ បញ្ហានេះក្រសួង-ស្ថាប័នពាក់ព័ន្ធ និងអាជ្ញាធរបាន និងកំពុងខិតខំដោះស្រាយជាបន្តបន្ទាប់ ដើម្បីស្វែងរកវិនិយោគមកវិនិយោគឡើងវិញ នាពេលឆាប់ៗខាងមុខ៕ អត្ថបទ៖ វ៉ន ដារ៉ា

បណ្ដាញសង្គម

ព័ត៌មានថ្មីៗ

ក្រសួងការងារ ព្រមានចាត់វិធានការម៉ឺងម៉ាត់បំផុត ចំពោះបុគ្គលណាទារប្រាក់ពីពលរដ្ឋជាថ្នូរនឹងការទទួលបានការងារ
08/07/2025 09:08 PM
Facebook Telegram Linkin
កោះ Solomon Islands មិនអញ្ជើញអាមេរិក ចិន និងកោះតៃវ៉ាន់ ចូលរួមកិច្ចប្រជុំនយោបាយរបស់ប៉ាស៊ីហ្វិក
08/07/2025 08:08 PM
Facebook Telegram Linkin
ការិយាល័យនៃក្រុមហ៊ុនអាកាសចរណ៍អ៊ីស្រាអែល El Al នៅក្រុងប៉ារីស ត្រូវបានបំផ្លាញទ្រព្យសម្បត្តិ
08/07/2025 08:08 PM
Facebook Telegram Linkin
សម្ដេចធិបតី៖ស្របតាមសំណូមពរពលរដ្ឋខ្មែរគាំទ្របេក្ខភាពឯកឧត្តម Donald Trump សម្រាប់ពានរង្វាន់ណូបែលសន្តិភាព រាជរដ្ឋាភិបាលផ្ញើលិខិតជាផ្លូវការទៅគណៈកម្មការពានរង្វាន់ណូបែលសន្តិភាព
08/07/2025 08:08 PM
Facebook Telegram Linkin
សារព័ត៌មាន Ifax៖ លោក Putin នឹងទៅបំពេញទស្សនកិច្ច នៅឥណ្ឌា នាចុងឆ្នាំ២០២៥
08/07/2025 07:08 PM
Facebook Telegram Linkin
អាល្លឺម៉ង់នឹងពង្រីកការគ្រប់គ្រងព្រំដែន ពាក់ព័ន្ធនឹងវិធានការបង្ក្រាបជនអន្តោប្រវេសន៍
08/07/2025 07:08 PM
Facebook Telegram Linkin
សេចក្ដីរាយការណ៍៖ អគ្គិភ័យនៅរោងចក្រចម្រាញ់ប្រេង Afipsky របស់រុស្ស៊ី ត្រូវបានពន្លត់ ក្រោយត្រូវយានដ្រូនវាយប្រហារ
08/07/2025 06:08 PM
Facebook Telegram Linkin
ប្រព័ន្ធផ្សព្វផ្សាយរដ្ឋ៖ បុរសដែលត្រូវបានអ៊ីរ៉ង់ប្រហារជីវិតពីបទចារកម្ម គឺជាអ្នកវិទ្យាសាស្ត្រនុយក្លេអ៊ែរ
08/07/2025 06:08 PM
Facebook Telegram Linkin
មន្ត្រីជាន់ខ្ពស់ EU៖ ការសម្លាប់ នៅហ្កាហ្សា មើលទៅដូចអំពើប្រល័យពូជសាសន៍ខ្លាំងណាស់
08/07/2025 06:08 PM
Facebook Telegram Linkin
នាយករដ្ឋមន្ត្រីស៊ូដង់ ទៅបំពេញទស្សនកិច្ចអេហ្ស៊ីប ជាលើកដំបូង ចាប់តាំងពីឡើងកាន់តំណែង
08/07/2025 06:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.