BTV NEWS

សម្ដេចធិបតីណែនាំអាជ្ញាធរពាក់ព័ន្ធគ្រប់លំដាប់ថ្នាក់ ត្រួតពិនិត្យ និងគ្រប់គ្រងឱ្យបានចំពោះទំនិញគេចពន្ធ និងខូចគុណភាព ហើយត្រូវសហការគ្នាចាត់វិធានការឱ្យបានច្បាស់លាស់

សម្ដេចធិបតីក្រើនរំឭកអាជ្ញាធរពាក់ព័ន្ធគ្រប់លំដាប់ថ្នាក់ត្រូវបន្តបង្ក្រាប Online Scams មិនត្រូវបន្ធូរដៃឡើយ

សម្ដេចតេជោ ហ៊ុន សែន អញ្ជើញជួបពិភាក្សាទ្វេភាគីជាមួយ ឯកឧត្តម លី ឈាង នាយករដ្ឋមន្ត្រីចិន

សម្ដេចតេជោ ហ៊ុន សែន អញ្ជើញចូលក្រាបថ្វាយបង្គុំគាល់ព្រះករុណាព្រះមហាក្សត្រ និងសម្តេចព្រះមហាក្សត្រី

នយោបាយ និង ការអភិវឌ្ឍន៍

ច្បាប់កែណ្ឌទ័ពរបស់អ៊ុយក្រែន ស្នើឲ្យបន្ថយអាយុកែណ្ឌ មក២៥ឆ្នាំ ពីអាយុ២៧ឆ្នាំ

ឯកសារនៃច្បាប់កែណ្ឌកងកម្លាំង ដែលបានបង្ហោះនៅលើគេហទំព័ររបស់សភាអ៊ុយក្រែន កាលពីល្ងាចថ្ងៃចន្ទ បានស្នើឱ្យបន្ថយអាយុអ្នកដែលអាចត្រូវបានកែណ្ឌសម្រាប់កាតព្វកិច្ចប្រយុទ្ធមកត្រឹមអាយុ២៥ឆ្នាំ ពី អាយុ២៧ឆ្នាំ។ ការផ្លាស់ប្តូរដែលបានស្នើ ធ្វើឡើង ខណៈការប្រយុទ្ធគ្នារយៈពេល ២២ ខែរបស់អ៊ុយក្រែនប្រឆាំងរុស្ស៊ី បានអូសបន្លាយពេល។ឯកសារកែណ្ឌ បានរៀបរាប់លម្អិត ពីពលរដ្ឋអ៊ុយក្រែនណាដែលនឹងត្រូវកំណត់ចុះឈ្មោះសម្រាប់ការចុះឈ្មោះយោធា និងបាននិយាយថា វានឹងអនុវត្តចំពោះអ្នកដែល មានអាយុពី២៥ឆ្នាំ។កំណត់សម្គាល់ដែលមានការពន្យល់ ត្រូវបានចុះហត្ថលេខាដោយរដ្ឋមន្ត្រីក្រសួងការពារជាតិ លោក Rustem Umerov ដែលបានសង្ខេបច្បាប់កែណ្ឌសំខាន់ៗ ដោយនិយាយថាពួកគេរួមបញ្ចូលទាំងការផ្លាស់ប្តូរអាយុទាហានពី ២៧ឆ្នាំ មកត្រឹម២៥ ឆ្នាំ។ប្រធានាធិបតី លោក Volodymyr Zelenskyy បាននិយាយទៅកាន់សន្និសីទសារព័ត៌មានថា យោធាបានស្នើកែណ្ឌកម្លាំងប្រជាជនអ៊ុយក្រែនបន្ថែមទៀតពី ៤៥០.០០០ នាក់ទៅ ៥០០.០០០នាក់ ប៉ុន្តែ វាជាបញ្ហា ដ៏រសើបខ្លាំង ដែលយោធា និងរដ្ឋាភិបាល នឹងពិភាក្សាមុននឹងសម្រេចថាតើត្រូវបញ្ជូនសំណើទៅសភាឬយ៉ាងណា។ចំនួនទាហានអ៊ុយក្រែន មិនត្រូវបានគេដឹងនោះទេ ប៉ុន្តែកន្លងមកត្រូវបានគេនិយាយថា ប្រទេសនេះមានមនុស្សប្រហែល ១ លាននាក់កាន់អាវុធ។ មន្ត្រីអាមេរិក ប៉ាន់ប្រមាណថា មនុស្សរាប់សែននាក់បានស្លាប់ និងរបួសចាប់តាំងពីរុស្ស៊ី បានឈ្លានពានអ៊ុយក្រែន។

យន្តហោះ ដែលឃាត់ទុកច្រើនថ្ងៃនៅបារាំងលើកការព្រួយបារម្ភពីការជួញដូរមនុស្ស បានមកចុះចតនៅឥណ្ឌា

ទិន្នន័យតាមដានជើងហោះហើរ បានបង្ហាញនៅព្រឹកថ្ងៃអង្គារនេះថា យន្តហោះមួយគ្រឿង ដែលបានឃាត់ទុកនៅប្រទេសបារាំងអស់រយៈពេលជាច្រើនថ្ងៃ ជុំវិញការព្រួយបារម្ភពីអ្នកដំណើរជនជាតិឥណ្ឌាជិត៣០០នាក់ ជាផ្នែកនៃផែនការជួញដូរមនុស្ស បានមកចុះចតនៅទីក្រុងបុមបៃ ប្រទេសឥណ្ឌា។ដំបូងឡើយ យន្តហោះ Airbus A340 បានធ្វើដំណើរទៅកាន់ប្រទេសនីហ្គារ៉ាហ្គ័រ នៅពេលនោះ យន្តហោះត្រូវបានឃាត់ទុកកាលពីថ្ងៃព្រហស្បតិ៍សប្តាហ៍មុន នៅអាកាសយានដ្ឋាន Vatry ភាគខាងកើតទីក្រុងប៉ារីស ជាកន្លែងដែលយន្តហោះបានឈប់ដើម្បីចាក់ប្រេង។ យន្តហោះនេះ បានមកដល់ពីទីក្រុងឌូបៃ ហើយមានព័ត៌មានអនាមិកថា យន្តហោះកំពុងដឹកជនរងគ្រោះដែលអាចកើតមានពីការជួញដូរមនុស្ស។គេហទំព័រតាមដានអាកាសចរណ៍ Flightradar24 បានបង្ហាញថា ក្នុងចំណោមអ្នកដំណើរដំបូង ៣០៣នាក់ នៅក្នុងបញ្ជីអ្នកដំណើរ មានអ្នកដំណើរ២៧៦នាក់ នៅលើយន្តហោះដែលបានចេញដំណើរមុនម៉ោង៣ រសៀលកាលពីថ្ងៃច័ន្ទ។ យន្តហោះបានចុះចត នៅអាកាសយានដ្ឋានអន្តរជាតិទីក្រុងបុមបៃ បន្ទាប់ពីបានហោះហើរជិត៩ម៉ោង។ ក្នុងចំណោមអ្នកដំណើរដែលនៅខាងក្រោយ ជាមនុស្សពីរនាក់ត្រូវបាននគរបាលបារាំងសាកសួរជុំវិញការការជួញដូរមនុស្សដែលសង្ស័យ ប៉ុន្តែប្រភពពីតុលាការ បាននិយាយថានគរបាលបានដោះលែងពួកគេបន្ទាប់ពីដឹងថា អ្នកដំណើរទាំង ៣០៣នាក់ បានឡើងលើយន្តហោះតាមឆន្ទៈដោយសេរីរបស់ពួកគេ។ ប្រភពតុលាការបាននិយាយថា អាជ្ញាធរបារាំង កំពុងបន្តស៊ើបអង្កេតករណីបំពានច្បាប់អន្តោប្រវេសន៍ ប៉ុន្តែពុំមានការជួញដូរមនុស្សនោះទេ។ រដ្ឋបាលបាននិយាយថា មនុស្ស២៥នាក់ ផ្សេងទៀត បានស្វែងរកសិទ្ធិជ្រកកោននៅប្រទេសបារាំង ដែល៥នាក់ ក្នុងចំណោមពួកគេគឺជាអនីតិជន។ ពាក្យស្នើសុំរបស់ពួកគេ នឹងត្រូវបានដំណើរការនៅអាកាសយានដ្ឋាន Charles de Gaulle។

ជប៉ុន ត្រៀមបញ្ជូនមីស៊ីលប៉ាទ្រីយ៉ូត របស់កងកម្លាំងស្វ័យការពារទៅកាន់សហរដ្ឋអាមេរិក

រដ្ឋាភិបាលប្រទេសជប៉ុន មានផែនការផ្តល់ទៅឱ្យសហរដ្ឋអាមេរិកនូវមីស៊ីលស្ទាក់ចាប់ ប៉ាទ្រីយ៉ូត(Patriot) ជាកម្មសិទ្ធិរបស់កងកម្លាំងស្វ័យការពារប្រទេសជប៉ុន។រដ្ឋាភិបាល បានពិនិត្យឡើងវិញនូវគោលការណ៍ណែនាំរបស់ខ្លួន ស្តីពីការផ្ទេរឧបករណ៍ការពារជាតិ។ នេះបានធ្វើឱ្យប្រទេសជប៉ុន អាចនាំចេញយុទ្ធោបករណ៍ផលិតក្នុងស្រុក ក្រោមអាជ្ញាប័ណ្ណពីក្រុមហ៊ុនបរទេសទៅកាន់ប្រទេស ដែលអ្នកកាន់អាជ្ញាប័ណ្ណមានមូលដ្ឋាន។ប្រព័ន្ធដែលទីក្រុងតូក្យូ បានសម្រេចបញ្ជូនទៅកាន់សហរដ្ឋអាមេរិក កំពុងស្ថិតក្រោមច្បាប់ពិនិត្យឡើងវិញ មានប្រព័ន្ធ PAC-2 ដែលត្រូវបានប្រើជាចម្បងសម្រាប់ការស្ទាក់ចាប់យន្តហោះ និងមីស៊ីលស៊ីបគោលដៅ ព្រមទាំងប្រព័ន្ធ PAC-3 ដែលស្ទាក់ចាប់មីស៊ីលបាលីស្ទីក។ក្រសួងការពារជាតិជប៉ុន បាននិយាយថា ការសម្រេចនេះ បានធ្វើឡើងតាមសំណើរបស់សហរដ្ឋអាមេរិក ដែលឃ្លាំងស្តុកមីស៊ីលស្ទាក់ចាប់ បានថយចុះជាបន្តបន្ទាប់ ខណៈសហរដ្ឋអាមេរិក បានបញ្ជូនជំនួយយោធាទៅឲ្យប្រទេសអ៊ុយក្រែន។ទីក្រុងតូក្យូ មានផែនការបញ្ជូនប្រព័ន្ធស្ទាក់ចាប់មីស៊ីល PAC-2 ដែលបច្ចុប្បន្នគ្រប់គ្រងដោយកងកម្លាំងស្វ័យការពាររបស់ប្រទេស ទៅកាន់សហរដ្ឋអាមេរិក ដោយក្រុមមន្ត្រីនិយាយថា វានឹងត្រូវចំណាយពេលច្រើនឆ្នាំ សម្រាប់ក្រុមហ៊ុនផលិតរបស់ជប៉ុន ដើម្បីផលិតប្រព័ន្ធថ្មី និងនាំចេញពួកវា។មន្ត្រីក្រសួងការពារជាតិ បាននិយាយថា ពួកគេនឹងពិភាក្សាលម្អិតបន្ថែមទៀតអំពីផែនការជាមួយសមភាគីសហរដ្ឋអាមេរិកនៅឆ្នាំក្រោយ។ មន្ត្រីនិយាយបន្ថែមថា ឃ្លាំងផ្ទុកមីស៊ីលប៉ាទ្រីយ៉ូតផ្ទាល់ខ្លួនរបស់ជប៉ុន មិនគ្រប់គ្រាន់នោះទេ។

រដ្ឋមន្ត្រីការបរទេសឆេក៖ ប្រសិនបើអ៊ុយក្រែនបរាជ័យ យើងនឹងប្រឈមមុខជាមួយរុស្ស៊ី នៅតាមព្រំដែនរបស់យើង

រដ្ឋមន្ត្រីការបរទេសឆេក លោក Jan Lipavský បាននិយាយថា បញ្ហាប្រឈមចម្បងសម្រាប់ទីក្រុងប្រាក (Prague) គឺធ្វើឲ្យរុស្ស៊ីនៅឆ្ងាយពីព្រំដែនឆេកតាមដែលអាចធ្វើទៅបាន និងបន្តគាំទ្រអ៊ុយក្រែន។«ប្រសិនបើអ៊ុយក្រែនបរាជ័យ យើងនឹងប្រឈមមុខជាមួយរុស្ស៊ីកាន់តែកៀកបន្តិច ជាក់ស្តែងនៅតាមព្រំដែននៃសហភាពអឺរ៉ុប ជិតបំផុតជាមួយសាធារណរដ្ឋឆេក ហើយយើងមិនត្រូវអនុញ្ញាតឲ្យបញ្ហានេះ កើតឡើងទេ»។ដូចដែលលោកLipavský បាននិយាយហើយថា ជំនួយដល់អ៊ុយក្រែន ដូចជាយោធា មនុស្សធម៌ ហិរញ្ញវត្ថុ នយោបាយ ឬ ផ្នែកផ្លូវចិត្ត ក៏ផ្តល់អត្ថប្រយោជន៍ដល់សន្តិសុខអឺរ៉ុបផងដែរ។«យើងត្រូវតែចងចាំថា នៅអ៊ុយក្រែន យើងកំពុងរារាំងការពង្រីកចក្រពត្តិរបស់រុស្ស៊ី ដែលយើងកំពុងខិតខំប្រឹងប្រែងធ្វើការងារនេះ នៅតំបន់អឺរ៉ុបកណ្តាល និងបណ្តារដ្ឋបាល់ទិក។លោករដ្ឋមន្ត្រីការបរទេស បានចង្អុលបង្ហាញថា ភាពនឿយណាយពីសង្រ្គាមដែលជារឿយៗ ត្រូវបាននិយាយអំពីវាបង្ហាញខ្លួនឯងតាមរបៀបផ្សេងៗគ្នា ដូច្នេះលោកជឿថា វាមានសារៈសំខាន់ក្នុងការពន្យល់ដល់សាធារណជនអំពីតម្រូវការគាំទ្រប្រទេសអ៊ុយក្រែន។

ប្រទេសចិន នឹងបន្តកិច្ចខិតខំប្រឹងប្រែងបង្កើតសន្តិភាពនៅក្នុងតំបន់មជ្ឈិមបូព៌ា

អ្នកនាំពាក្យក្រសួងការបរទេសលោកស្រី ម៉ៅ នីង(Mao Ning) បាននិយាយកាលពីថ្ងៃចន្ទ ថា ប្រទេសចិននឹងបន្តធ្វើការជាមួយភាគីទាំងអស់ដើម្បីបង្កើនការសម្របសម្រួល និងជំរុញសកម្មភាពប្រកបដោយការទទួលខុសត្រូវ និងមានអត្ថន័យបន្ថែមទៀតនៅក្នុងក្រុមប្រឹក្សាសន្តិសុខអង្គការសហប្រជាជាតិឈានទៅរកការបញ្ចប់អរិភាពនៅតំបន់ហ្កាហ្សា ការអនុវត្តដំណោះស្រាយរដ្ឋពីរ និងសន្តិភាព និងស្ថិរភាពនៅមជ្ឈិមបូព៌ា។ លោកស្រីបានថ្លែងបែបនេះ ខណៈកំពុងធ្វើអត្ថាធិប្បាយលើសេចក្ដីសម្រេចលេខ២៧២០ ដែលត្រូវបានអនុម័តដោយក្រុមប្រឹក្សាសន្តិសុខអង្គការសហប្រជាជាតិ ដោយមានសំឡេងគាំទ្រ១៣ សំឡេង និងអនុបវាទចំនួន ២ កាលពីថ្ងៃសុក្រសប្តាហ៍មុន ដោយអំពាវនាវឱ្យមានចំណាត់ការបន្ទាន់ដើម្បីបង្កើនជំនួយមនុស្សធម៌ដល់តំបន់ហ្កាហ្សា និងបង្កើតលក្ខខណ្ឌសម្រាប់ការបញ្ឈប់អរិភាពប្រកបដោយនិរន្តរភាព។ លោកស្រី ម៉ៅ បាននិយាយថា ប្រទេសចិនបានបោះឆ្នោតគាំទ្រសេចក្ដីសម្រេចលេខ២៧២០ ជាសេចក្ដីសម្រេចទីពីរដែលត្រូវបានអនុម័តដោយក្រុមប្រឹក្សាសន្តិសុខចាប់តាំងពីការចាប់ផ្តើមផ្ទុះជម្លោះអ៊ីស្រាអែល-ប៉ាឡេស្ទីន នាពេលថ្មីៗនេះ។ ទោះយ៉ាងណាក៏ដោយ លោកស្រីបានកត់សម្គាល់ថា សេចក្ដីសម្រេចនេះមិនទាន់ស្របតាមការរំពឹងទុករបស់អន្តរជាតិទេ ហើយមានចន្លោះប្រហោងជាច្រើនទៀតដែលត្រូវបំពេញ។ លោកស្រីបាននិយាយថា ស្របពេលជម្លោះប៉ាឡេស្ទីន និងអ៊ីស្រាអែល បច្ចុប្បន្នបានសម្លាប់ និងរបួសជនស៊ីវិលរាប់ម៉ឺននាក់ ហើយស្ថានភាពមនុស្សធម៌នៅហ្កាហ្សាបន្តកាន់តែយ៉ាប់យ៉ឺនខ្លាំង ប្រទេសចិនបានជំរុញឱ្យសេចក្ដីសម្រេចនេះត្រូវបានអនុវត្តប្រកបដោយប្រសិទ្ធភាព ជំនួយមនុស្សធម៌ត្រូវបានពង្រីកបន្ថែម និងយន្តការត្រួតពិនិត្យមួយដែលត្រូវបានបង្កើតឡើងឱ្យបានឆាប់តាមដែលអាចធ្វើទៅបាន។លោកស្រីបាននិយាយថា ការសម្រេចឲ្យមានបទឈប់បាញ់នៅតែជាចំណុចអាទិភាពដាច់ខាត និងជាតម្រូវការមុនគេបំផុត ក្នុងចំណោមវិធានការផ្សេងទៀត៕

សម្ដេចធិបតី ហ៊ុន ម៉ាណែត៖ ទិន្នន័យជំរឿនសេដ្ឋកិច្ច គឺជាផែនទី និងត្រីវិស័យសម្រាប់រដ្ឋាភិបាល

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា ទិន្នន័យជំរឿនសេដ្ឋកិច្ច គឺជាផែនទី និងត្រីវិស័យសម្រាប់រដ្ឋាភិបាល ក្នុងការរៀបចំក្របខណ្ឌគោលនអភិវឌ្ឍសេដ្ឋកិច្ចជាតិ។ បើគ្មានទន្នន័យច្បាស់លាស់ទេហាក់បីដូចជាស្ថិតនៅចំណុចមួយដែលវង្វេងវង្វាន់ មិនអាចឱ្យរាជរដ្ឋាភិបាលរៀបចំក្របខណ្ឌគោលនយោបាយ និងសេដ្ឋកិច្ចជាតិបានឡើយ។ សម្តេចធិបតី នាយករដ្ឋមន្ត្រីកម្ពុជា មានប្រសាសន៍ក្នុងឱកាសអញ្ជើញជាអធិបតី ក្នុងពិធីផ្សព្វផ្សាយរបាយការណ៍ថ្នាក់ជាតិស្តីពីលទ្ធផលចុងក្រោយ នៃជំរឿនសេដ្ឋកិច្ចនៅកម្ពុជាឆ្នាំ២០២២ នៅព្រឹកថ្ងៃទី២៦ ខែធ្នូ ឆ្នាំ២០២៣នេះថា ទិន្នន័យជំរឿនសេដ្ឋកិច្ចឆ្នាំ ២០២២ គឺធ្វើឡើងដើម្បីចងក្រងស្ថិតិមូលដ្ឋានគ្រឹះស្តីពីអង្គភាពសេដ្ឋកិច្ច និងបង្កើតបញ្ជីមេនៃអង្គភាពសេដ្ឋកិច្ចនៅក្នុងព្រះរាជាណាចក្រកម្ពុជា ដែលផ្ដល់នូវព័ត៌មានសំខាន់ៗស្តីពីស្ថានភាពនៃសកម្មភាព និងរចនាសម្ព័ន្ធសេដ្ឋកិច្ច សម្រាប់ការរៀបចំគោលនយោបាយ ផែនការ និងអ្នកពាក់ព័ន្ធដទៃទៀត។ សម្ដេចធិបតីមានប្រសាសន៍ថា ទិន្នន័យ និងស្ថិតិដែលទាញចេញពីទិន្នន័យមានគុណភាព និងដែលអាចជឿទុកចិត្តបាន គឺជាធាតុចូល និងភស្តុតាង ដែលអ្នកធ្វើគោលនយោបាយត្រូវការជាចាំបាច់ សម្រាប់ការរៀបចំគោលនយោបាយ, យុទ្ធសាស្ត្រ, និងផែនការអភិវឌ្ឍសង្គម-សេដ្ឋកិច្ចនានា ឱ្យចំគោលដៅ សម្រាប់រយៈពេលខ្លី, មធ្យម និងវែង។សម្តេចធិបតី បានមានប្រសាសន៍ថា លទ្ធផលជំរឿនសេដ្ឋកិច្ចឆ្នាំ ២០២២នេះ គឺជាព្រឹត្តិការណ៍ដ៏សំខាន់មួយក្នុងការប្រកាសដាក់ឱ្យប្រើប្រាស់ជាផ្លូវការនូវទិន្នន័យ និងព័ត៌មានអំពីអង្គភាពសេដ្ឋកិច្ច នៅព្រះរាជាណាចក្រកម្ពុជា ដែលនឹងត្រូវប្រើប្រាស់ជាធាតុចូលយ៉ាងសំខាន់ និង ច្បាស់លាស់ សម្រាប់ការរៀបចំគោលនយោបាយនានារបស់ជាតិ ឱ្យមានលក្ខណៈមុតស្រួច និងផ្អែកលើភស្តុតាងត្រឹមត្រូវដើម្បីឱ្យគោលនយោបាយ និងយុទ្ធសាស្ត្រនានារបស់ជាតិ ត្រូវបានអនុវត្តដោយជោគជ័យ និងចំគោលដៅ។ដោយហេតុថា ទិន្នន័យ និងស្ថិតិដើរតួនាទីសំខាន់នៅក្នុងគ្រប់ទិដ្ឋភាព សម្តេចធិបតី នាយករដ្ឋមន្ត្រី បានផ្តល់នូវអនុសាសន៍ ដល់ក្រសួងផែនការ ក៏ដូចជាក្រសួងស្ថាប័នពាក់ព័ន្ធ ត្រូវប្រែក្លាយទិន្នន័យជំរឿនសេដ្ឋកិច្ចនេះ ឱ្យទៅជាព័ត៌មានគ្រប់ជ្រុងជ្រោយ និងច្បាស់លាស់តាមបែបវិទ្យាសាស្ត្រ តាមរយៈការប្រើប្រាស់វិធីសាស្ត្រសមស្រប នៃវិទ្យាសាស្ត្រស្ថិតិ ដើម្បីជាធាតុចូលរឹងមាំសម្រាប់គ្រប់ក្រសួង-ស្ថាប័ន ប្រើប្រាស់ក្នុងការងាររៀងៗខ្លួន និងលើកទឹកចិត្តឱ្យផ្សព្វផ្សាយលទ្ធផលទាំងនេះ ឱ្យបានទូលំទូលាយដល់គ្រប់ ក្រសួង-ស្ថាប័នពាក់ព័ន្ធ៕អត្ថបទ៖ វ៉ន ដារ៉ា

ជំរឿនសេដ្ឋកិច្ចឆ្នាំ២០២២ អង្គភាពសេដ្ឋកិច្ចមានជាង៧៥ម៉ឺន កើនឡើង ៤៩% បើធៀបជំរឿនឆ្នាំ២០១១

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា លទ្ធផលចុងក្រោយនៃជំរឿនសេដ្ឋកិច្ចនៅព្រះរាជាណាចក្រកម្ពុជាឆ្នាំ២០២២ បានបង្ហាញថា អង្គភាពសេដ្ឋកិច្ចសរុបទាំងអស់មានចំនួន ៧៥៣ ៦៧០ ដែលកើនឡើង ៤៩% បើធៀបនឹងជំរឿនជំរឿនសេដ្ឋកិច្ចឆ្នាំ២០១១ ដែលមានចំនួន ៥០៥ ១៣៤ អង្គភាពសេដ្ឋកិច្ច។ សម្តេចធិបតី នាយករដ្ឋមន្ត្រីកម្ពុជា មានប្រសាសន៍ ក្នុងឱកាសអញ្ជើញជាអធិបតី ក្នុងពិធីផ្សព្វផ្សាយរបាយការណ៍ថ្នាក់ជាតិស្តីពីលទ្ធផលចុងក្រោយ នៃជំរឿនសេដ្ឋកិច្ចនៅកម្ពុជាឆ្នាំ២០២២ នៅព្រឹកថ្ងៃទី២៦ ខែធ្នូ ឆ្នាំ២០២៣នេះថា ជំរឿនសេដ្ឋកិច្ចឆ្នាំ២០២២ ត្រូវបានធ្វើឡើងគោលបំណងចងក្រងស្ថិតិមូលដ្ឋានគ្រឹះស្តីពីអង្គភាពសេដ្ឋកិច្ច និងបង្កើតបញ្ជីមេនៃអង្គភាពសេដ្ឋកិច្ចនៅកម្ពុជា ដែលផ្តល់នូវព័ត៌មានសំខាន់ៗស្តីពីស្ថានភាពនៃសកម្មភាព និងរចនាសម្ព័ន្ធសេដ្ឋកិច្ច ដល់អ្នករៀបចំគោលនយោបាយ អ្នករៀបចំផែនការ អ្នកស្រាវជ្រាវ និងអ្នកពាក់ព័ន្ធដទៃទៀត។ បញ្ជីមេនៃអង្គភាពសេដ្ឋកិច្ចក៏ត្រូវបានប្រើប្រាស់ជាបញ្ជីគោលនៃជំរឿនសេដ្ឋកិច្ច និងធ្វើជាបញ្ជីសំណាកគំរូ សម្រាប់ជ្រើសរើសសំណាកគំរូនៃអង្កេតផ្សេងៗពាក់ព័ន្ធនឹងក្រុមហ៊ុន សហគ្រាសអាជីវកម្ម សិប្បកម្ម ពាណិជ្ជកម្ម និងសេវាកម្ម លើកលែងតែអង្គភាពសេដ្ឋកិច្ចក្នុងវិស័យកសិកម្ម។សម្ដេចធិបតី បញ្ជាក់ថា អង្គភាពសេដ្ឋកិច្ចទាំងអស់នៅឆ្នាំ២០២២ មាន ៥២,៥% នៅទីប្រជុំជន និង ៦៩,១% ជាអង្គភាពសេដ្ឋកិច្ចដែលមានភាពជាម្ចាស់តំណាងជាស្ត្រី។ អង្គភាពសេដ្ឋកិច្ចទាំងអស់ បានស្រូបយកកម្លាំងពលកម្មសរុបចំនួន ២,៩៨ លាននាក់ ក្នុងនោះស្ត្រី ចំនួន ១,៨៤ លាននាក់។ ជំរឿនសេដ្ឋកិច្ចឆ្នាំ២០២២ ដែលគ្របដណ្តប់អង្គភាពសេដ្ឋកិច្ចតែក្នុងពីរវិស័យគឺ វិស័យឧស្សាហកម្មមាន ៧% និងវិស័យសេវាកម្ម មាន ៩៣%។សូមជម្រាបថា ការធ្វើជំរឿនសេដ្ឋកិច្ចនៅព្រះរាជាណាចក្រកម្ពុជាឆ្នាំ២០២២ ត្រូវបានរាប់បញ្ចូលអង្គភាព សេដ្ឋកិច្ចមានជាអាទិ៍ អង្គភាពសេដ្ឋកិច្ចនៅតាមផ្សារ ក្រុមហ៊ុន សហគ្រាស រោងចក្រ សហគ្រាសរដ្ឋ គ្រឹះស្ថានហិរញ្ញវត្ថុ សិប្បកម្ម អាជីវកម្ម លក់ដុំ លក់រាយ លក់ដូរតាមអនទ្បាញ សាលារៀន សាកលវិទ្យាល័យ មណ្ឌលសុខភាព មន្ទីរពេទ្យ វត្តអារាម និងសេវាកម្មផ្សេងៗជាដើម៕អត្ថបទ៖ វ៉ន ដារ៉ា

សម្តេចធិបតី ហ៊ុន ម៉ាណែត៖ ទិន្នន័យជួយឲ្យយើងធ្វើការសម្រេចចិត្តបានត្រឹមត្រូវ និងគ្រប់ជ្រុងជ្រោយ

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ការកំណត់ទិន្នន័យគឺមានសារសំខាន់បំផុត ខណៈទិន្នន័យនេះនឹងជួយឲ្យយើងធ្វើការសម្រេចចិត្តបានត្រឹមត្រូវ និងគ្រប់ជ្រុងជ្រោយ ដូច្នេះត្រូវតែ កំណត់ទិន្នន័យនេះឲ្យបានច្បាស់លាស់ ដើម្បីដាក់គោលដៅជាក់លាក់សម្រាប់អនាគត។ក្នុងឱកាសអញ្ជើញជាអធិបតីភាព ក្នុងពិធីផ្សព្វផ្សាយរបាយការណ៍ថ្នាក់ជាតិ ស្តីពីលទ្ធផលចុង ក្រោយ នៃជំរឿនសេដ្ឋកិច្ចនៅកម្ពុជាឆ្នាំ២០២២ នៅថ្ងៃទី២៦ ខែធ្នូ ឆ្នាំ២០២៣នេះ នៅសណ្ឋាគារសុខាភ្នំពេញ សម្តេចធិបតី ហ៊ុន ម៉ាណែត បានបញ្ជាក់ថា គ្រប់ភាគីពាក់ព័ន្ធទាំងអស់ ត្រូវយកចិត្តទុកដាក់ខ្ពស់ចំពោះការកំណត់ទិន្នន័យ ពីព្រោះថាប្រភពទិន្នន័យជាផែនទីត្រីវិស័យក្នុងការសម្រេចចិត្តគ្រប់លក្ខណៈជ្រុងជ្រោយ ដោយមិនប្រថុយប្រថាននោះឡើយ ជាក់ស្តែងដូចជាក្រុមហ៊ុនជាច្រើននៅលើពិភពលោក បានវិនិយោគទៅលើប្រព័ន្ធទិន្នន័យដោយការសម្រេចចិត្តច្បាស់លាស់ ការព្យាករសេណារីយ៉ូពីអនាគតត្រឹមត្រូវ។សម្តេចធិបតី នាយករដ្ឋមន្រ្តី ក៏បានពន្យល់ផងដែរថា ប្រភពទិន្នន័យមានសារសំខាន់ណាស់ ដោយវាបានកំណត់ឲ្យយើងដឹងពីភូមិសាស្រ្តទាំងនៅលើដី និងភូមិសាស្រ្តនយោបាយ សេដ្ឋកិច្ច ធុរកិច្ច ជាពិសេសស្ថានភាពនៅជុំវិញខ្លួនយើងតែម្តង៕អត្ថបទ៖ បាន ចក់

ប្រសាសន៍សំខាន់ៗរបស់សម្តេចធិបតី ក្នុងពិធីផ្សព្វផ្សាយរបាយការណ៍ថ្នាក់ជាតិ ស្តីពីលទ្ធផលចុងក្រោយនៃជំរឿនសេដ្ឋកិច្ចនៅកម្ពុជាឆ្នាំ២០២២

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅព្រឹកថ្ងៃទី២៦ ខែធ្នូ ឆ្នាំ២០២៣ បានអញ្ជើញជាអធិបតីភាព ក្នុងពិធីផ្សព្វផ្សាយរបាយការណ៍ថ្នាក់ជាតិស្តីពីលទ្ធផលចុងក្រោយនៃជំរឿនសេដ្ឋកិច្ចនៅកម្ពុជាឆ្នាំ២០២២ ដែលពិធីនេះធ្វើឡើង នៅសណ្ឋាគារសុខាភ្នំពេញ។ *ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍ថា បើគ្មានទិន្នន័យ វាហាក់បីដូចជាស្ថិតនៅចំណុចមួយដែលវង្វេងវង្វាន់។ សូម្បីតែគេលើកកូនស្រីគេឱ្យយើងក៏គេត្រូវដឹងអំពីទិន្នន័យច្បាស់លាស់ពីកូនប្រុសនោះដែរ។ ដូច្នេះទិន្នន័យនេះសំខាន់ណាស់សម្រាប់ការកំណត់ទិសដៅស្ថានភាព និងទិសដៅគោលនយោបាយសម្រាប់ពេលអនាគត។-សម្ដេចធិបតី ហ៊ុន ម៉ាណែត មានប្រសាសន៍ថា រាជរដ្ឋាភិបាល ការកសាងក្របខណ្ឌគោលនយោបាយ ដើម្បីឱ្យមានលក្ខណៈបុរេសកម្ម និងការតាមតានត្រួតពិនិត្យ ការវាយតម្លៃ ការអនុវត្តគោលនយោបាយ ការដាក់ចេញនូវគោលនយោបាយ គឺទាមទារឱ្យមានការតាមដាន វាយតម្លៃ ត្រួតពិនិត្យឱ្យទាន់ពេលវេលា គឺផ្អែកទៅលើទិន្នន័យនេះហើយ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍ថា ស្ថានភាពជំរឿនសេដ្ឋកិច្ចឆ្នាំ ២០២២ គឺមានការកើនឡើងប្រមាណជាង ៥០ ភាគរយ។-សម្ដេចធិបតី មានប្រសាសន៍ថា ការធ្វើជំរឿនសេដ្ឋកិច្ចឆ្នាំ ២០២២ គឺជាមូលដ្ឋានសំខាន់ណាស់ សម្រាប់ប្រទេសកម្ពុជាដើរទៅមុខរយៈពេល១០ឆ្នាំទៀត។ ក្របខណ្ឌគោលនយោបាយ គឺផ្អែកទៅលើបច្ចុប្បន្នភាពជាក់ស្ដែងនៅលើដី។ នេះហើយជាការផ្អែកទៅលើទិន្នន័យជាក់ស្ដែង និងក្របខណ្ឌគោលនយោបាយជាក់លាក់។-សម្ដេចធិបតី ហ៊ុន ម៉ាណែត បញ្ជាក់ថា ដោយទិន្នន័យ ស្ថិតិបានដើរតួនាទីសំខាន់ សម្ដេចបានផ្ដល់អនុសាសន៍ដល់ក្រសួងផែនការ ត្រូវបន្តលើកកម្ពស់ជំរឿនសេដ្ឋកិច្ច និងការអង្កេតសំខាន់ៗលើជំរឿនសេដ្ឋកិច្ច និងការងារអភិវឌ្ឍន៍សង្គម សេដ្ឋកិច្ចរបស់កម្ពុជា។-សម្ដេចធិបតី នាយករដ្ឋមន្រ្ដីនៃកម្ពុជា ណែនាំដល់ក្រសួងផែនការត្រូវពិនិត្យឱ្យបានត្រឹមត្រូវលើការប្រមូលទិន្នន័យរបស់ខ្លួន ពីព្រោះទិន្នន័យនោះ គឺជាត្រីវិស័យក្នុងការរៀបចំក្របខណ្ឌគោលនយោបាយជាតិ។-សម្ដេចធិបតី ហ៊ុន ម៉ាណែត ណែនាំដល់ក្រសួងផែនការ ក៏ដូចជាក្រសួងស្ថាប័នផ្សេងទៀត ត្រូវពង្រឹងសមត្ថភាពធនធានមនុស្ស និងរចនាសម្ព័ន្ធរបស់ខ្លួន ពីព្រោះការធ្វើវិភាជន៍ឡើងវិញ នូវធនធានមនុស្សដែលមានជំនាញបច្ចេកទេស គឺបានជួយបង្កើននូវប្រសិទ្ធភាពការងារនៅក្នុងស្ថាប័នរបស់ខ្លួន និងអាចអនុវត្តក្របខណ្ឌគោលនយោបាយឱ្យបានជោគជ័យ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានបញ្ជាក់ថា សម្ដេចតែងតែបានណែនាំ និងដាក់ចេញនូវគោលនយោបាយចំពោះការជ្រើសរើសមន្រ្ដី គឺត្រូវធ្វើឱ្យមានសុក្រឹតភាព ជ្រើសរើសឱ្យស្របទៅនឹងទំនើបកម្មនៃបច្ចុប្បន្នភាព និងការជ្រើសរើសដោយមានការលើកទឹកចិត្ត។-សម្ដេចធិបតី ហ៊ុន ម៉ាណែត មានប្រសាសន៍ថា ការវិនិយោគទៅលើធនធានមនុស្ស គឺជាកិច្ចការសំខាន់ទាំងការវិនិយោគទៅលើការសិក្សាតាំងពីកុមារភាព និងការវិនិយោគនៅតាមក្រសួង ស្ថាប័ននានា។-សម្ដេចធិបតី ហ៊ុន ម៉ាណែត ណែនាំដល់ក្រសួង ស្ថាប័នត្រូវយកចិត្តទុកដាក់ទៅលើការកសាងសមត្ថភាពមន្រ្ដី ជាពិសេសមន្រ្ដីដែលទទួលកិច្ចការងារបច្ចេកទេសសំខាន់ៗ នៅតាមក្រសួង ស្ថាប័នរបស់ខ្លួន។-សម្ដេចធិបតី ហ៊ុន ម៉ាណែត បញ្ជាក់ថា ការប្រើប្រាស់ទិន្នន័យមានសារសំខាន់ណាស់។ សម្ដេច បានណែនាំដល់គ្រប់ក្រសួង ស្ថាប័ន ត្រូវបណ្ដុះបណ្ដាលមន្រ្ដីលើការប្រើប្រាស់ទិន្នន័យ ដែលបានដាក់ចេញនេះឱ្យបានត្រឹមត្រូវ។

សម្ដេចធិបតី ហ៊ុន ម៉ាណែត អញ្ជើញចូលរួមកិច្ចប្រជុំកំពូលនៃកិច្ចសហប្រតិបត្តិការមេគង្គ-ឡានឆាងលើកទី៤

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី២៥ ខែធ្នូ ឆ្នាំ ២០២៣នេះ បាន អញ្ជើញចូលរួមកិច្ចប្រជុំកំពូលនៃកិច្ចសហប្រតិបត្តិការមេគង្គ-ឡានឆាងលើកទី៤ តាមប្រព័ន្ធវីដេអូ តបតាមការអញ្ជើញរបស់សហប្រធាននៃកិច្ចប្រជុំ គឺនាយឧត្តមសេនីយ៍ មីន អោងឡាំង ប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាព មីយ៉ាន់ម៉ា និងឯកឧត្តម លី ឈាង នាយករដ្ឋមន្ត្រីនៃសាធារណរដ្ឋប្រជាមានិតចិន។គោលដៅចំបង និងមូលដ្ឋានគ្រឹះនៃទស្សនាទានការអភិវឌ្ឍរបស់កិច្ចប្រជុំកំពូល នៃកិច្ចសហប្រតិបត្តិការមេគង្គ-ឡានឆាង គឺដើម្បីទី១ សម្រេចបានការអភិវឌ្ឍសេដ្ឋកិច្ច និងសង្គមនៃបណ្តាប្រទេសអនុតំបន់ លើកកម្ពស់សុខុមាលភាពរបស់ប្រជាជន បង្រួមគម្លាតនៃការអភិវឌ្ឍ និងការកសាងសហគមន៍នៃអនាគតរួមសន្តិភាព និងវិបុលភាព។ទី២ តាមរយៈការធ្វើសមាហរណកម្មជាមួយគំនិតផ្តួចផ្តើមខ្សែក្រវាត់ និងផ្លូវរបស់ប្រទេសចិន ចក្ខុវិស័យសហគមន៍អាស៊ានឆ្នាំ ២០២៥ ផែនការមេស្តីពីការតភ្ជាប់អាស៊ានឆ្នាំ ២០២៥ និងកិច្ចសហប្រតិបត្តិការអនុតំបន់មេគង្គផ្សេងទៀត និងយន្តការជំរុញការអនុវត្តរបៀបវារៈឆ្នាំ២០៣០ របស់អង្គការសហប្រជាជាតិសម្រាប់និរន្តរភាព ការអភិវឌ្ឍ។សូមជម្រាបថា កិច្ចប្រជុំកំពូលនៃកិច្ចសហប្រតិបត្តិការមេគង្គ-ឡានឆាង លើកទី៤ ធ្វើឡើងក្រោមមូលបទ «ចូលរួមកសាងសហគមន៍វាសនារួមគ្នា និងទំនើបកម្មក្នុងចំណោម ប្រទេសមេគង្គ-ឡានឆាង» ថ្នាក់ដឹកនាំនៃកិច្ចសហប្រតិបត្តិការមេគង្គ-ឡានឆាងដោយបានពិនិត្យឡើងវិញនូវវឌ្ឍនភាពដែលសម្រេចបានក្រោមកិច្ចសហប្រតិបត្តិការនេះ។ កិច្ចប្រជុំនេះ ក៏បានកំណត់ទិសដៅអនាគតសម្រាប់ការពង្រីកវិស័យនៃកិច្ចសហប្រតិបត្តិការ និងជំរុញបន្ថែមនូវទំនុកចិត្តទៅវិញទៅមក ក៏ដូចជាពង្រឹងភាពជាដៃគូក្នុងចំណោមបណ្តាប្រទេសមេគង្គ-ឡានឆាងដើម្បីរួមចំណែកដល់ការអភិវឌ្ឍសេដ្ឋកិច្ច-សង្គម និងលើកកម្ពស់សុខុមាលភាពរបស់ប្រជាជននៅក្នុងអនុតំបន់មេគង្គ-ឡានឆាង។កិច្ចប្រជុំនេះ ឯកសារចំនួនបីគ្រោងអនុម័តក្នុងអំឡុងពេលនៃកិច្ចប្រជុំ រួមមាន៖ ទី១ សេចក្តីថ្លែងការណ៍ទីក្រុង ណៃពិដោ ទី២ ផែនការសកម្មភាពប្រាំឆ្នាំស្ដីពីកិច្ចសហប្រតិបត្តិការមេគង្គ-ឡានឆាង (២០២៣- ២០២៧) និង ទី៣ គំនិតផ្តួចផ្តើមរួមស្ដីពីការអភិវឌ្ឍច្រករបៀងនវានុវត្តន៍នៃកិច្ចសហប្រតិបត្តិការមេគង្គ-ឡានឆាង។

បណ្ដាញសង្គម

ព័ត៌មានថ្មីៗ

ប្រធានគណៈប្រចាំការនៃគណៈអចិន្ត្រៃយ៍យុវជនគណបក្សប្រជាជនកម្ពុជាថ្នាក់កណ្ដាល និងលេខាទី១ នៃគណៈកម្មាធិការមជ្ឈិមសម្ព័ន្ធយុវជនកុម្មុយនីស្តចិនចុះអនុស្សរណៈស្ដីពីកិច្ចសហប្រតិបត្តិការជាមួយគ្នា

កសិដ្ឋានចិញ្ចឹមសត្វគោ និងជ្រូកនៅប្រទេសបែលហ្ស៊ិក កំពុងជួបការលំបាក ដោយសាររលកកម្តៅ

នយោបាយឈ្នះ-ឈ្នះនាំឱ្យកម្ពុជាសម្រេចបានសន្តិភាព និងការអភិវឌ្ឍដូចសព្វថ្ងៃ

អ៊ីរ៉ង់៖ ការឆ្លងកាត់ច្រកសមុទ្រ Hormuz មិនត្រូវបានធានាទេ បើគ្មានការសម្របសម្រួលជាមួយទីក្រុងតេអេរ៉ង់

ប្រធានាធិបតីជិតឡើងកាន់អំណាចកូឡុំប៊ី ចេញឱសានវាទដល់ក្រុមឧក្រិដ្ឋកម្មប្រដាប់អាវុធ

មន្ត្រីជាន់ខ្ពស់៖ លីបង់ទាមទារឲ្យអ៊ីស្រាអែលដកទ័ពទាំងស្រុង ក្នុងកិច្ចព្រមព្រៀងណាមួយ នៅទីក្រុងវ៉ាស៊ីនតោន

កម្ពុជា ប្តេជ្ញាធ្វើការងារជិតស្និទ្ធជាមួយចិន ដើម្បីពង្រីកបន្ថែមទាំងវិសាលភាព និងភាពស៊ីជម្រៅនៃទំនាក់ទំនងទ្វេភាគី

រញ្ជួយដីកម្រិត ៦,៥រ៉ិចទ័រ វាយប្រហារកោះ នៅភាគខាងត្បូងនៃប្រទេសហ្វីលីពីន

UN ជំរុញឲ្យមានសេចក្តីថ្លៃថ្នូរសម្រាប់ជនអន្តោប្រវេសន៍ ក្រោយតុលាការអាមេរិកសម្រេចលើជនអន្តោប្រវេសន៍ហៃទី និងស៊ីរី

អ៊ីស្រាអែលទម្លាក់ខិត្តប័ណ្ណ នៅទីក្រុងរបស់លីបង់ ដោយបញ្ជាឲ្យប្រជាជនចាកចេញ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍