BTV NEWS

BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់

សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់

ឯកឧត្តម ចាន់ ដារ៉ុង ដឹកនាំគណៈកម្មការអន្តរក្រសួងចុះពិនិត្យវាយតម្លៃបញ្ចប់សុពលភាពការងារថែទាំផ្លូវខួបចំនួន ៣កំណាត់ ក្នុងខេត្តពោធិ៍សាត់

BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យនូវកិច្ចប្រជុំវិសាមញ្ញ នៃគណៈកម្មាធិការព្រំដែនទូទៅកម្ពុជា-ថៃ

នយោបាយ និង ការអភិវឌ្ឍន៍

សម្ដេចធិបតី ហ៊ុន ម៉ាណែត លើកទឹកចិត្តតំណាងសហព័ន្ធសេដ្ឋកិច្ចតំបន់កាន់សៃជួយផ្សព្វផ្សាយពីសក្តានុពលកម្ពុជាដល់វិនិយោគិនជប៉ុន

នាព្រឹកថ្ងៃទី១៩ ខែធ្នូ ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជាបានអនុញ្ញាតឱ្យលោក អូបាយ៉ាស៊ី តាកេអុ (OBAYASHI TAKEO) ប្រធានផ្នែកទំនាក់ទំនងអន្តរជាតិ តំណាងសហព័ន្ធសេដ្ឋកិច្ចតំបន់កាន់សៃ និងជាប្រធានក្រុមហ៊ុន OBAYASHI CORPORATION ចូលជួបសម្តែងការគួរសម ក្នុងឱកាសនៃការចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន លើកទី៥០ ចាប់ពីថ្ងៃទី១៥-១៩ ខែធ្នូ ឆ្នាំ២០២៣ នៅទីក្រុងតូក្យូ ប្រទេសជប៉ុន ។ក្នុងឱកាសនៃជំនួបនេះលោក អូបាយ៉ាស៊ី តាកេអុ បានថ្លែងអំណរគុណចំពោះ សម្តេចធិបតី ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបលោក និងសហការីចូលជួបសម្តែងការគួរសម ព្រមទាំងបានជម្រាបអំពីសកម្មភាពអាជីវកម្មរបស់សហព័ន្ធសេដ្ឋកិច្ចតំបន់កាន់សៃ ជាពិសេសសកម្មភាពការងារមួយចំនួនដែលបានអនុវត្តនៅក្នុងប្រទេសកម្ពុជា តួយ៉ាងដូចជា ការជួលជុលស្ពានមិត្តភាពកម្ពុជា-ជប៉ុនជ្រោយចង្វារ ជាដើម។ ទន្ទឹមនេះលោកប្រធានបានជម្រាបផងដែរ អំពីបំណងពង្រីកវិនិយោគរបស់ខ្លួនក៏ដូចជាជំរុញទឹកចិត្តក្រុមហ៊ុនជប៉ុនដទៃឱ្យទៅវិនិយោគនៅប្រទេសកម្ពុជា។ លោកប្រធានក៏ជម្រាបជូន សម្តេចធិបតី ផងដែរ អំពីគម្រោងពិព័រណ៍សាកលនៅក្នុងសហព័ន្ធសេដ្ឋកិច្ចតំបន់កាន់សៃ នាឆ្នាំ២០២៤ ខាងមុខនេះ ជាមួយក្តីសង្ឃឹមថាកម្ពុជានឹងចូលរួមក្នុងព្រឹត្តិការណ៍ដ៏សំខាន់នេះ។ ជាការឆ្លើយតបសម្តេចធិបតី បានស្វាគមន៍ចំពោះជំនួបជាមួយលោក អូបាយ៉ាស៊ី តាកេអុ និងសហការី ព្រមទាំងបានសម្តែងនូវសេចក្តីសោមនស្សរីករាយចំពោះសហព័ន្ធសេដ្ឋកិច្ចតំបន់កាន់សៃ ដែលប្រមូលផ្តុំនូវក្រុមហ៊ុន ឬសហគ្រាសជាច្រើនក្នុងតំបន់កាន់សៃ មានបំណងបោះទុនវិនិយោគនៅកម្ពុជា ព្រមជាមួយនេះ សម្តេចបានលើកទឹកចិត្តឱ្យបន្តជួយផ្សព្វផ្សាយអំពីសក្តានុពលរបស់កម្ពុជាទៅដល់វិនិយោគិនជប៉ុន ដើម្បីទទួលបាននូវការចាប់អារម្មណ៍ និងឱកាសក្នុងការពង្រីកវិនិយោគរបស់ខ្លួននៅកម្ពុជា។ ក្នុងឱកាសនោះសម្តេចធិបតីបានជ្រាបជូនផងដែរថា ក្រសួងពាណិជ្ជកម្មកម្ពុជានឹងរៀបចំក្នុងការចូលរួមព្រឹត្តិការណ៍ពិព័រណ៍សាកលក្នុងសហព័ន្ធសេដ្ឋកិច្ចតំបន់កាន់សៃនាពេលខាងមុខនេះ។ លើសពីនេះសម្តេចនាយករដ្ឋមន្ត្រី បានគូសបញ្ជាក់ទៀតថា រាជរដ្ឋាភិបាលកម្ពុជាបាននិងកំពុងយកចិត្តទុកដាក់នៅក្នុងការធានានិរន្តរភាពនៃបរិយាកាសអំណោយផលសម្រាប់ធុរកិច្ច និងវិនិយោគតាមរយៈការដាក់ចេញនូវគោលនយោបាយ យន្តការអនុវត្ត និងក្របខ័ណ្ឌគតិយុត្តថ្មីៗ ព្រមជាមួយនឹងការអភិវឌ្ឍហេដ្ឋារចនាសម្ព័ន្ធតភ្ជាប់ និងឡូជីស្ទីកសំខាន់ៗ ដូចជា ផ្លូវលឿន ផ្លូវដែក និងកំពង់ផែ ជាដើម។ ទន្ទឹមនឹងនេះរាជរដ្ឋាភិបាល ក៏កំពុងពិនិត្យលទ្ធភាពក្នុងការបង្កើតសួនឧស្សាហកម្មកម្ពុជា-ជប៉ុន និងការកសាងផែនការមេក្នុងវិស័យឡូជីស្ទីក ដើម្បីប្រែក្លាយកំពង់ផែស្វយ័តក្រុងព្រះសីហនុទៅជាកំពង់ផែស្នូលដ៏សំខាន់មួយនៅក្នុងតំបន់។ បរិយាកាសទាំងនេះជាការជួយសម្រួល និងផ្តល់នូវការលើកទឹកចិត្តប្រកបដោយភាពអនុគ្រោះ និងភាពទាក់ទាញដល់វិនិយោគិនដែលមកវិនិយោគនៅក្នុងប្រទេសកម្ពុជា។សូមបញ្ជាក់ថា សហព័ន្ធសេដ្ឋកិច្ចតំបន់កាន់សៃ ប្រមូលផ្តុំនូវក្រុមហ៊ុន ឬសហគ្រាសខ្នាតយក្សដែលមានទីតាំងក្នុងតំបន់កាន់សៃ នៅភាគខាងលិចនៃប្រទេសជប៉ុន ក្នុងនោះរួមមានចំនួន ៧ ខេត្ត ដូចជា ខេត្តអូសាកា, ខេត្តក្យូតុ, ខេត្តហ្យូហ្កុ, ខេត្តណារ៉ា, ខេត្តស៊ីហ្កា, ខេត្តមិអិ និងខេត្តវ៉ាកាយ៉ាម៉ា ដោយក្រុមហ៊ុនយក្សទាំងអស់នោះ សុទ្ធសឹងមានឥទ្ធិពលដល់ការអភិវឌ្ឍសេដ្ឋកិច្ចរបស់ប្រទេសជប៉ុន៕

គណបក្សនយោបាយចំនួនបួនចូលរួមការបោះឆ្នោតជ្រើសរើសសមាជិកព្រឹទ្ធសភានាខែកុម្ភៈខាងមុខ

អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា គណបក្សនយោបាយចំនួនបួននឹងចូលរួមការបោះឆ្នោតជ្រើសរើសសមាជិកព្រឹទ្ធសភា នាខែកុម្ភៈ ឆ្នាំ ២០២៤ ខាងមុខ។ឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានប្រាប់ BTV នៅថ្ងៃទី១៩ ខែធ្នូ ឆ្នាំ២០២៣ថា ក្នុងដំណើរឆ្ពោះទៅរកការរៀបចំបោះឆ្នោតជ្រើសតាំងសមាជិកព្រឹទ្ធសភាដែលនៅសល់រយៈពេល២ខែទៀតប៉ុណ្ណោះ គ.ជ.ប បានកំពុងរៀបចំជ្រើសរើសមន្រ្តីរៀបចំការបោះឆ្នោតសមាជិកព្រឹទ្ធសភាតាមបណ្តារាជធានី-ខេត្ត។ ឯកឧត្តមបន្តថា គិតមកដល់ពេលនេះ គ.ជ.ប សម្រេចទទួលយកគណបក្សនយោបាយចំនួនបួន ដើម្បីចូលរួមប្រកួតប្រជែងការបោះឆ្នោតនាពេលខាងមុខ ក្នុងនោះរួមមាន គណបក្សប្រជាជនកម្ពុជា, គណបក្សឆន្ទះខ្មែរ, គណបក្សកម្លាំងជាតិ និងគណបក្សហ្វ៊ុនស៊ិនប៉ិច។ឯកឧត្តម ហង្ស ពុទ្ធា បានបញ្ជាក់ទៀតថា ចំពោះអង្គបោះឆ្នោតនឹងចូលរួមការបោះឆ្នោតជ្រើសតាំងសមាជិកព្រឹទ្ធសភា ជាសមាជិកក្រុមប្រឹក្សាឃុំ-សង្កាត់ ក្នុងមុខតំណែង និងតំណាងរាស្រ្តក្នុងនីតិកាលទី៧។ឯកឧត្តមបញ្ជាក់ថា បន្ទាប់ពីដំណាក់កាលចុះបញ្ជីគណបក្សនយោបាយ និងបេក្ខជនឈរឈ្មោះប្រកួតប្រជែង គ.ជ.ប នឹងឆ្ពោះទៅដំណាក់កាលឃោសនាបោះឆ្នោត ដែលនឹងប្រព្រឹត្តទៅពីថ្ងៃទី១០ ដល់ថ្ងៃទី២៣ ខែកុម្ភៈ ឆ្នាំ២០២៣ ខណៈការបោះឆ្នោតជ្រើសតាំងសមាជិកព្រឹទ្ធសភានឹងប្រព្រឹត្តទៅនាថ្ងៃទី២៥ ខែកុម្ភៈ ឆ្នាំ២០២៤៕ អត្ថបទ៖ សេក ឧត្តម

សម្ដេចធិបតី ហ៊ុន ម៉ាណែត បន្តជួបពិភាក្សាការងារជាមួយម្ចាស់ក្រុមហ៊ុន និងវិនិយោគិនជប៉ុនជាច្រើននាក់ព្រឹកនេះ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានាព្រឹកថ្ងៃទី១៩ ខែធ្នូ ឆ្នាំ២០២៣នេះ នៅទីក្រុង តូក្យូ ប្រទេសជប៉ុន បានអញ្ជើញចូលរួមសិក្ខាសាលាវិនិយោគកម្ពុជាឆ្នាំ២០២៣ ស្តីពីបរិយាកាសវិនិយោគ និងសក្តានុពលនៃការធើ្វធុរកិច្ចនៅកម្ពុជា និងបន្តជួបជាមួយបណ្ដាម្ចាស់ក្រុមហ៊ុន និងវិនិយោគិនជប៉ុនជាច្រើនរូប ដើម្បីពិភាក្សាការងារ និងផ្សព្វផ្សាយពីសក្តានុពលវិនិយោគនៅកម្ពុជាដល់បណ្តាវិនិយោគិនជប៉ុន។សម្ដេចធិបតីនាយករដ្ឋមន្រ្ដី បានអញ្ជើញចូលរួមសិក្ខាសាលាវិនិយោគកម្ពុជាឆ្នាំ ២០២៣ ស្តីពីបរិយាកាសវិនិយោគ និងសក្តានុពលនៃការធើ្វធុរកិច្ចនៅកម្ពុជា។ សិក្ខាសាលានេះ បានដើរ តួសំខាន់ក្នុងការជំរុញលំហូរពាណិជ្ជកម្ម និងវិនិយោគ, កិច្ចសហប្រតិបត្តិការធុរកិច្ច និងនវានុវត្តន៍, ការយោគយល់គ្នាទៅវិញទៅមក និងមិត្តភាពរវាងប្រទេសទាំងពីរកម្ពុជា-ជប៉ុន។ សិក្ខាសាលានេះមានវិនិយោគិនចូលរួមសរុបចំនួនប្រមាណជិត ៧០០ នាក់ ក្នុងនេះវិនិយោគិនជប៉ុនចូលរួមដោយផ្ទាល់ និងតាមអនទ្បាញមានចំនួនប្រមាណជាង ៦០០ នាក់ និងវិនិយោគិនកម្ពុជាចំនួនប្រមាណជាង៨០នាក់។ សិក្ខាសាលាវិនិយោគកម្ពុជាឆ្នាំ២០២៣ មានការសហការរៀបចំដោយសភាពាណិជ្ជកម្មកម្ពុជា អង្គការពាណិជ្ជកម្មក្រៅ ប្រទេសជប៉ុនក្រុមប្រឹក្សាអភិវឌ្ឍន៍កម្ពុជា និងធនាគារមិស៊ូហ៊ុ (Mizuho) ដោយមាន ការចូលរួមដោយលោក អ៊ីស៊ីហ្គូរ៉ូ ណូរីហ៊ីគូ (ISHIGURO Norihiko) ប្រធាន និងជានាយកប្រតិបត្តិអង្គការពាណិជ្ជកម្មក្រៅប្រទេសជប៉ុន ព្រមទាំងសមាជិកសភាពាណិជ្ជកម្មកម្ពុជា និងពាណិជ្ជករនៃប្រទេសជប៉ុនផងដែរ។ក្នុងឱកាសនេះដែរសម្តេចធិបតី ហ៊ុន ម៉ាណែត បានថ្លែងប្រាប់ដល់វិនិយោគិនជប៉ុនថា កម្ពុជាមានសក្តានុពលច្រើន រាជរដ្ឋាភិបាលបានរៀបចំ ហេដ្ឋារចនាសម្ព័ន្ធផ្លូវល្បឿនលឿន ព្រលានយន្តហោះ កំពង់ផែ តំបន់សេដ្ឋកិច្ចពិសេស និងបានបង្កលក្ខណៈងាយស្រួលសម្រាប់អ្នកវិនិយោគនៅកម្ពុជា។សម្តេចធិបតីបានលើកឡើងពីការយកចិត្តទុកដាក់ដល់វិស័យឯកជន ដែលរាជរដ្ឋាភិបាលបានចាត់ទុកវិស័យឯកជនជាដៃគូរជាមួយនឹងរាជរដ្ឋាភិបាល។ សម្តេចធិបតីបានថ្លែងថា រាជរដ្ឋាភិបាលក៏នឹងពង្រឹងកិច្ច សន្ទនាជាមួយវិស័យឯកជនឱ្យកាន់តែខ្លាំងឡើងតាមរយៈការរៀបចំ វេទិការាជរដ្ឋាភិបាល និងវិស័យឯកជនឱ្យបានទៀងទាត់ ដោយសម្តេចអញ្ជើញធ្វើជាអធិបតីដោយផ្ទាល់ផងដែរ។សម្តេចនាយករដ្ឋមន្ត្រីបានលើកទឹកចិត្តឱ្យអ្នកវិនិយោគ និងអ្នកធ្វើធុរកិច្ចជប៉ុនចូលមកសិក្សា និងវិនិយោគនៅកម្ពុជា។ សម្តេចធិបតី បានបញ្ជាក់ថា រាជរដ្ឋាភិបាលកម្ពុជានឹងផ្តល់ការគាំទ្រ និងកិច្ចសម្របសម្រួលគ្រប់រូបភាព ដើម្បីឱ្យធុរជន និងអ្នកវិនិយោគបរទេស អាចធ្វើធុរកិច្ច និងវិនិយោគនៅកម្ពុជាប្រកបដោយផ្លែផ្កា និងរីកចម្រើន។បន្ទាប់ពីបានចូលរួមសិក្ខាសាលាវិនិយោគកម្ពុជា ឆ្នាំ២០២៣ ស្តីពីបរិយាកាសវិនិយោគ និងសក្តានុពលនៃការធើ្វធុរកិច្ចនៅកម្ពុជា សម្ដេចធិបតីនាយករដ្ឋមន្ដ្រីបានបន្តអនុញ្ញាតឲ្យបណ្ដាម្ចាស់ក្រុមហ៊ុន និងវិនិយោគិនជប៉ុនជាច្រើនរូបចូលជួបសម្ដែងការគួរសម និងពិភាក្សាការងារ។ សូមជម្រាបថា ឆ្នាំ២០២៣ គឺជាខួបលើកទី ៧០ឆ្នាំ នៃទំនាក់ទំនង ការទូត រវាងកម្ពុជា និងជប៉ុន។ ប្រទេសទាំងពីរបានលើកកម្ពស់ទំនាក់ទំនងទ្វេភាគីទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ ដែលឆ្លុះបញ្ចាំងពីជម្រៅ និងវិសាលភាពនៃកិច្ចសហប្រតិបត្តិការ និងជំនឿទុកចិត្តគ្នាទៅវិញទៅមកដែលត្រូវបានកសាង អស់រយៈពេលជាច្រើនឆ្នាំមកនេះ។ ជប៉ុនគឺដៃគូពាណិជ្ជកម្ម និងវិនិយោគដ៏ធំជាងគេបង្អស់មួយរបស់កម្ពុជាហើយក៏ជាប្រទេសផ្តល់ជំនួយដ៏ធំជាងគេមួយផងដែរ ដែលបានចូលរួមចំណែកយ៉ាងសំខាន់ដល់ការអភិវឌ្ឍ សេដ្ឋកិច្ច សង្គម កម្ពុជា ចាប់តាំងពីការកសាងប្រទេសឡើងវិញដំបូង៕

រដ្ឋមន្រ្ដីសុខាភិបាល៖ សាកលវិទ្យាល័យវិទ្យាសាស្រ្តសុខាភិបាលបណ្តុះបណ្តាលនិស្សិតប្រកបដោយគុណភាព

ឯកឧត្តមសាស្រ្តាចារ្យ ឈាង រ៉ា រដ្ឋមន្រី្តក្រសួងសុខាភិបាល បានអះអាងថា សាកលវិទ្យាល័យវិទ្យាសាស្រ្តសុខាភិបាល ទទួលបានការទុកចិត្តពីនិសិ្សត អាណាព្យាបាល និងសាធារណជនលើការបណ្តុះបណ្តាលស្រាវជ្រាវ និងការបម្រើសេវាផ្សេងៗប្រកបដោយគុណភាព។ឯកឧត្តមសាស្រ្តាចារ្យ ឈាង រ៉ា បានថ្លែងបញ្ជាក់បែបនេះក្នុងឱកាសពិធីបើកបវេសនកាលឆ្នាំសិក្សា២០២៣-២០២៤ ទីតាំងទី២ នៃសាកលវិទ្យាល័យវិទ្យាសាស្ត្រសុខាភិបាល នាព្រឹកថ្ងៃទី១៩ ខែធ្នូ ឆ្នាំ២០២៣នេះ។ ឯកឧត្តមសាស្រ្តាចារ្យថ្លែងថា នៅក្នុងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល ក្នុងនោះបញ្ចកោណទី១ គឺផ្តោតសំខាន់ទៅលើការអភិវឌ្ឍមូលធនមនុស្សឲ្យមានគុណភាព និងសុខភាពល្អ។ ជាពិសេស គឺផ្តោតសំខាន់ទៅលើការអភិវឌ្ឍមូលធនមនុស្សឲ្យមានគុណភាព និងសុខភាពល្អ ដែលជាគន្លឹះសំខាន់បំផុតសម្រាប់ការជំរុញពិពិធកម្ម និងកំណើតសេដ្ឋកិច្ច ប្រកបដោយបរិយាប័ន្ន និងភាពធន។ បើតាមឯកឧត្តមសាស្រ្តាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការ នៃសាកលវិទ្យាល័យវិទ្យាសាស្រ្តសុខាភិបាល បានឲ្យដឹងថា សាកលវិទ្យាល័យវិទ្យាសាស្រ្តសុខាភិបាលនៅក្នុងឆ្នាំ២០២៣នេះ បាននិងកំពុងដំណើរការកម្មវិធីបណ្តុះបណ្តាលចំនួន ៤៧ កម្មវិធី ដោយមាន និស្សិតសរុបចំនួន ៧.៣៧០ នាក់ក្នុងនោះជានិស្សិតស្រីចំនួន ៤,៤០៩នាក់។ ឯកឧត្តមបញ្ជាក់ថា ក្នុងចំណោមនិស្សិតទាំងនោះ មាននិស្សិត ៦៨៦ នាក់បានទទួលអាហារូបករណ៍បង់ថ្លៃជំនួសដោយរាជរដ្ឋាភិបាលកម្ពុជា និងនិស្សិតថ្នាក់វេជ្ជបណ្ឌិតឯកទេសចំនួន ៨៦ នាក់ទទួលអាហារូបករណ៍ពីសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិបណ្ឌិត ប៊ុន រ៉ានី ហ៊ុនសែន។ ឯកឧត្តមបញ្ជាក់ថា សាកលវិទ្យាល័យបានបន្តពង្រឹងគុណភាពបណ្តុះបណ្តាល ដោយផ្តោតលើសមត្ថភាពស្នូល ជាគោល និងលើការងារស្រាវជ្រាវ សាកលវិទ្យាល័យ បានសហការជាមួយដៃគូរជាតិ និងអន្តរជាតិ អនុវត្តនូវគម្រោងសិក្សាស្រាវជ្រាវ ចំនួន ២៧ គម្រោងថែមទៀត៕ អត្ថបទ ៖ រដ្ឋា

ចិនជំរុញឱ្យចក្រភពអង់គ្លេសបញ្ឈប់ការញុះញង់ប្រឆាំងប្រទេសចិន និងជួយអ្នកបង្កអស្ថិរភាពនៅទីក្រុងហុងកុង

ស្ថានទូតចិនប្រចាំនៅចក្រភពអង់គ្លេស កាលពីថ្ងៃចន្ទ បានច្រានចោលការលើកឡើងរបស់អ្នកនយោបាយចក្រភពអង់គ្លេស ដែលទាក់ទងនឹងតំបន់រដ្ឋបាលពិសេសហុងកុង។ លោក David Cameron រដ្ឋមន្ត្រីការបរទេសអង់គ្លេសទទួលបន្ទុកកិច្ចការបរទេស និងអភិវឌ្ឍន៍ ថ្មីៗនេះបានចេញសេចក្តីថ្លែងការណ៍មួយ ដោយបន្តមួលបង្ខូចច្បាប់សន្តិសុខជាតិក្នុងទីក្រុងហុងកុង និងអំពាវនាវឱ្យអាជ្ញាធរហុងកុង បញ្ចប់ការកាត់ទោស និងដោះលែងមហាសេដ្ឋីប្រព័ន្ធផ្សព្វផ្សាយលោក ជីមីឡៃ (Jimmy Lai)។ ឆ្លើយតបទៅនឹងសំណួរចំពោះទង្វើរបស់លោក Cameron អ្នកនាំពាក្យស្ថានទូតមួយរូប បាននិយាយថា យើងប្រឆាំងយ៉ាងដាច់ខាត និងជំទាល់យ៉ាងដាច់អហង្ការចំពោះទង្វើដ៏គួរឱ្យរន្ធត់របស់អ្នកនយោបាយចក្រភពអង់គ្លេសចំពោះការគាំទ្រលើលោក Jimmy Lai។យោងតាមសេចក្តីប្រកាសព័ត៌មានដែលដកស្រង់សម្តីអ្នកនាំពាក្យ លោក ឡៃ គឺជាអ្នកប្រឆាំងចិនដ៏ល្បីល្បាញបំផុតមួយរូប ដែលចង់ធ្វើឱ្យហុងកុងជួបអស្ថិរភាព និងជ្រៀតជ្រែកដល់នីតិរដ្ឋនៅក្នុងទីក្រុងហុងកុង ។ ការចេញផ្សាយនៅលើគេហទំព័ររបស់ស្ថានទូតបាននិយាយថា មេគំនិត និងជាអ្នកញុះញង់ឱ្យមានកុបកម្មប្រឆាំងចិនដែលបានកើតឡើងនៅហុងកុង លោក ឡៃ បានឃុបឃិតគ្នាយ៉ាងម៉ឺងម៉ាត់ជាមួយកងកម្លាំងខាងក្រៅ ដើម្បីបង្កគ្រោះថ្នាក់ដល់សន្តិសុខជាតិ ទាមទារការគាំទ្រពីបរទេស និងទទួលខុសត្រូវចំពោះអំពើដ៏អាក្រក់ផ្សេងៗ៕

បារាំងនឹងចាត់វិធានការប្រឆាំងនឹងអ្នកតាំងទីលំនៅអ៊ីស្រាអែលជ្រុលនិយម និងជំរុញឲ្យបន្ថយភាពតានតឹងនៅប្រទេសលីបង់

រដ្ឋមន្ត្រីការបរទេសរបស់ខ្លួន បាននិយាយកាលពីថ្ងៃចន្ទថា ប្រទេសបារាំង នឹងចាត់វិធានការទៅលើអ្នកតាំងទីលំនៅអ៊ីស្រាអែល ដែលបានវាយប្រហារជនជាតិប៉ាឡេស្ទីននៅតំបន់វេសបែង ដែលគ្រប់គ្រង ដោយអ៊ីស្រាអែល មួយថ្ងៃបន្ទាប់ពីបានជួបកសិករប៉ាឡេស្ទីន នៅទីក្រុងរ៉ាម៉ាឡា(Ramallah) ដែលត្រូវបានកំណត់គោលដៅ ក្នុងប៉ុន្មានសប្តាហ៍ថ្មីៗនេះ។តួលេខរបស់អង្គការសហប្រជាជាតិ បង្ហាញថា ការវាយប្រហាររបស់អ្នកតាំងទីលំនៅប្រចាំថ្ងៃ បានកើនឡើងទ្វេដង ចាប់តាំងពីការវាយប្រហារដ៏គួរឲ្យភ្ញាក់ផ្អើលរបស់ក្រុមហាម៉ាសលើអ៊ីស្រាអែល កាលពីថ្ងៃទី៧ ខែតុលា និងការវាយលុកជាបន្តបន្ទាប់ទៅលើតំបន់ហ្កាហ្សារបស់ប៉ាឡេស្ទីន។ ជនជាតិប៉ាឡេស្ទីនជាង ២០០ នាក់ត្រូវបានសម្លាប់ នៅក្នុងអំពើហិង្សាក្នុងឆ្នាំនេះ រួមទាំងការវាយប្រហារពីអ្នកតាំងទីលំនៅផងដែរ។លោកស្រី Catherine Colonna បានប្រាប់សន្និសីទសារព័ត៌មាន នៅទីក្រុងបេរូត ក្រោយពីដំណើរទស្សនកិច្ចរយៈពេលពីរថ្ងៃ នៅអ៊ីស្រាអែល ទីក្រុងរ៉ាម៉ាឡា និងប្រទេសលីបង់ថា៖«យើងនឹងមិនទទួលយកទង្វើទាំងនេះទេ។ ប្រទេសបារាំង នឹងមិនរង់ចាំទៀត។ យើងបានស្នើឲ្យអាជ្ញាធរអ៊ីស្រាអែល បញ្ចប់រឿងនេះ ហើយខ្លួននឹងចាត់វិធានការជាតិប្រឆាំងនឹងអ្នកតាំងទីលំនៅអ៊ីស្រាអែលជ្រុលនិយមមួយចំនួន។ សហភាពអឺរ៉ុប កំពុងសិក្សាពីលទ្ធភាពនៃការដាក់ទណ្ឌកម្មប្រឆាំងនឹងអ្នកតាំងទីលំនៅជ្វីហ្វ ដែលបង្កអំពើ ហិង្សា។លោកស្រី បាននិយាយថា៖ «ដីនេះ គឺដីរបស់ប្រជាជនជាតិប៉ាឡេស្ទីន ហើយនឹងក្លាយជាផ្នែកនៃរដ្ឋប៉ាឡេស្ទីន។

ចិននិងកូរ៉េខាងជើង បានបើកកិច្ចប្រជុំកម្រិតខ្ពស់ ស្របពេលមានការបាញ់មីស៊ីល

រដ្ឋមន្ត្រីការបរទេសចិនលោក វ៉ាង យី (Wang Yi) បានជួបពិភាក្សាជាមួយមន្ត្រីជាន់ខ្ពស់កូរ៉េខាងជើងនៅទីក្រុងប៉េកាំង កាលពីថ្ងៃច័ន្ទ (១៨ ធ្នូ) ស្របពេលដែលទីក្រុងព្យុងយ៉ាង បានបាញ់មីស៊ីលដែលមានសមត្ថភាពទៅដល់គ្រប់ទីកន្លែងក្នុងសហរដ្ឋអាមេរិក។ប្រទេសចិនតែងតែចាត់ទុកទំនាក់ទំនងរបស់ខ្លួនជាមួយកូរ៉េខាងជើងតាមទស្សនៈយុទ្ធសាស្ត្រ និងរយៈពេលវែង នេះបើយោងតាមក្រសួងការបរទេសបាននិយាយនៅក្នុងសេចក្តីថ្លែងការណ៍មួយដោយដកស្រង់ប្រសាសន៍របស់លោក វ៉ាង ក្នុងជំនួបជាមួយអនុរដ្ឋមន្ត្រីក្រសួងការបរទេសកូរ៉េខាងជើង លោក ផាក យ៉ុងហូ (Pak Myong Ho)។លោក វ៉ាង បានបន្ថែមថា ទីក្រុងប៉េកាំងមានឆន្ទៈក្នុងការពង្រឹងទំនាក់ទំនងទ្វេភាគី និងការសម្របសម្រួល ខណៈពេលដែលធ្វើឱ្យការផ្លាស់ប្តូរ និងកិច្ចសហប្រតិបត្តិការកាន់តែស៊ីជម្រៅ។ លោក វ៉ាង និងលោក ផាក បានផ្លាស់ប្តូរទស្សនៈលើបញ្ហានៃ «ក្តីបារម្ភរួម» ដែលក្រសួងមិនបានបកស្រាយលម្អិត។កូរ៉េខាងជើងជាសម្ព័ន្ធមិត្តផ្លូវការតែមួយគត់របស់ចិន។ ប្រទេសទាំងពីរត្រូវបានចងភ្ជាប់ដោយសន្ធិសញ្ញាដែលបានចុះហត្ថលេខានៅឆ្នាំ១៩៦១ ដើម្បីចាត់វិធានការចាំបាច់ទាំងអស់ រួមទាំងជំនួយផ្នែកយោធា ដើម្បីជួយគ្នាទៅវិញទៅមកក្នុងករណីមានការវាយប្រហារឬការប៉ុនប៉ងវាយប្រហារដោយប្រទេសទីបី៕

សម្ដេចធិបតី ហ៊ុន ម៉ាណែត គាំទ្រគំនិតផ្តួចផ្តើមរបស់ជប៉ុននៅក្នុងកិច្ចប្រជុំកំពូលរំលឹកខួបអនុស្សាវរីយ៍អាស៊ាន-ជប៉ុន

តបតាមការអញ្ជើញរបស់ ឯកឧត្តម គីស៊ីដា ហ៊្វីមីអូ (Kishida Fumio) នាយករដ្ឋមន្ត្រីជប៉ុនសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញចូលរួមកិច្ចប្រជុំកំពូលរំលឹកខួបអនុស្សាវរីយ៍៥០ឆ្នាំនៃមិត្តភាព និងកិច្ចសហប្រតិបត្តិការអាស៊ាន-ជប៉ុន នៅថ្ងៃទី១៧ ខែធ្នូ ឆ្នាំ២០២៣នៅទីក្រុងតូក្យូ។ប្រមុខរដ្ឋ/រដ្ឋាភិបាលបានពិនិត្យឡើងវិញលើទំនាក់ទំនងអាស៊ាន-ជប៉ុនក្នុងរយៈពេល ៥០ ឆ្នាំកន្លងមកជាពិសេសក្នុងការអនុវត្តប្រកបដោយជោគជ័យនូវសេចក្តីប្រកាសចក្ខុវិស័យ និងផែនការអនុវត្តន៍នៃទំនាក់ទំនងដៃគូជាយុទ្ធសាស្ត្រដែលបានអនុម័តកាលពីឆ្នាំ២០១៣។កិច្ចប្រជុំកំពូលរំលឹកខួបអាស៊ាន-ជប៉ុនបានអនុម័តនូវឯកសារដ៏សំខាន់ចំនួន ២ ដែលជាឯកសារគោលតម្រង់ទិសនៃការពង្រីកកិច្ចសហប្រតិបត្តិការឱ្យកាន់តែរឹងមាំ និងទូលំទូលាយបន្ថែមទៀតក្នុងការបើកទំព័រថ្មីនៃទំនាក់ទំនងអាស៊ាន-ជប៉ុនសម្រាប់ការលើកតម្កើងសន្តិភាព ការរីកចម្រើនរួមគ្នា និងការអភិវឌ្ឍប្រកបដោយចីរភាពសម្រាប់រយៈពេល ១០ ឆ្នាំ ទៅមុខទៀតរួមមាន៖ ១)សេចក្តីប្រកាសចក្ខុវិស័យរួមស្តីពីមិត្តភាព និងកិច្ចសហប្រតិបត្តិការអាស៊ាន-ជប៉ុន៖ដៃគូដែលជឿទុកចិត្តគ្នា និង ២) ផែនការ អនុវត្តន៍នៃសេចក្តីប្រកាសចក្ខុវិស័យរួមនេះ។នៅក្នុងកិច្ចប្រជុំកំពូលរំលឹកខួបអាស៊ាន-ជប៉ុននេះសម្ដេចធិបតីបានវាយតម្លៃខ្ពស់ ចំពោះដំណើរដ៏វែងឆ្ងាយរបស់អាស៊ាន និងជប៉ុនដែលជាសក្ខីភាពបង្ហាញពីភាពរឹងមាំផ្អែកលើ «សាមគ្គីភាព ក្នុងភាពចម្រុះ និងបានគូសបញ្ជាក់ពីភាពចាំបាច់ក្នុងការរួមដៃគ្នាបង្ហាញនូវ «កម្លាំងនៃសន្តិភាព» ដែលប្រជាជាតិក្នុងតំបន់អាស៊ីប៉ាស៊ីហ្វិកត្រូវរួមគ្នាធ្វើដើម្បីធានាថាតំបន់នេះនឹងមិនក្លាយជាវេទិកាថ្មីមួយទៀតនៃជម្លោះប្រដាប់អាវុធ ឬសង្គ្រាមដោយតួអង្គតំណាងនោះឡើយ។សម្ដេចធិបតីបានកោតសរសើរយ៉ាងជ្រាលជ្រៅ ចំពោះការគាំទ្ររបស់ជប៉ុនក្នុងការអនុវត្តអាទិភាពទាំង៤ នៃទស្សនវិស័យអាស៊ានស្តីពីឥណ្ឌូប៉ាស៊ីហ្វិក (AOIP) រួមមានកិច្ចសហប្រតិបត្តិការលម្ហសមុទ្រការតភ្ជាប់ គោលដៅអភិវឌ្ឍន៍ដោយចីរភាព កិច្ចសហប្រតិបត្តិការសេដ្ឋកិច្ច និងកិច្ចសហប្រតិបត្តិការនៅក្នុងវិស័យ ផ្សេងទៀត និងត្រៀមខ្លួនជាស្រេចដើម្បីចូលរួមក្នុងការបង្កើនសហថាមពល និងប្រសិទ្ធភាពនៃកិច្ចសហប្រតិបត្តិការរវាងទស្សនវិស័យអាស៊ានស្តីពីឥណ្ឌូប៉ាស៊ីហ្វិក (AOIP) និងចក្ខុវិស័យថ្មីរបស់ជប៉ុនស្តីពីឥណ្ឌូប៉ាស៊ីហ្វិកសេរី និងបើកចំហ (FOIP)។ឆ្លៀតក្នុងឱកាសនោះសម្ដេចធិបតីក៏បានសម្តែងនូវកង្វល់ពីការបន្តបាញ់សាកល្បងមីស៊ីល អន្តរទ្វីបដោយសាធារណរដ្ឋប្រជាមានិតប្រជាធិបតេយ្យកូរ៉េ និងបានជំរុញឱ្យភាគីពាក់ព័ន្ធទាំងអស់ ចូលរួមក្នុងកិច្ចសន្ទនាដែលមានលក្ខណៈស្ថាបនា និងដោយសន្តិវិធីដើម្បីជំរុញការរំសាយអាវុធនុយក្លេអ៊ែរដោយពេញលេញ អាចផ្ទៀងផ្ទាត់បាន និងមិនអាចត្រឡប់ថយក្រោយសំដៅធានា សន្តិភាព និងស្ថិរភាពយូរអង្វែងនៅឧបទ្វីបកូរ៉េ។ សម្តេចធិបតីក៏បានអំពាវនាវឱ្យមានការដោះស្រាយឱ្យបានឆាប់រហ័សលើបញ្ហាចាប់ពង្រត់ជនជាតិជប៉ុនដើម្បីពួកគេអាចវិលត្រឡប់ទៅជួបជុំក្រុមគ្រួសារវិញ។សម្រាប់ការជំរុញភាពជាដៃគូចិត្ត និងចិត្តគ្រប់ជំនាន់ សម្តេចធិបតីបានស្នើឱ្យមានការយកចិត្តទុកដាក់បន្ថែមទៀតលើការអភិវឌ្ឍធនធានមនុស្ស ជាពិសេសតាមរយៈកម្មវិធីអប់រំ និងការបង្កើននូវការយល់ដឹងទូលំទូលាយរួមទាំងការគាំទ្រដល់វិស័យវប្បធម៌ សិល្បៈ និងកម្មវិធីផ្លាស់ប្តូរទំនាក់ទំនង យុវជនអាស៊ីបូព៌ា ដើម្បីពង្រឹងសមត្ថភាព និងភាពធន់របស់យុវជន។ សម្ដេចធិបតី ក៏បានលើកទឹកចិត្តភាគីជប៉ុនបន្តគាំទ្រគម្រោងបណ្ណសារដ្ឋានបេតិកភណ្ឌវប្បធម៌ឌីជីថលអាស៊ាន និងការអនុវត្តសេចក្ដីប្រកាសអាស៊ានស្ដីពីសមភាពយេនឌ័រ និងការអភិវឌ្ឍគ្រួសារ។ចំពោះភាពជាដៃគូសម្រាប់សហបង្កើតសេដ្ឋកិច្ចនិងសង្គមនាពេលអនាគត សម្តេចធិបតីបានសង្កត់ធ្ងន់លើការគាំទ្រប្រព័ន្ធពាណិជ្ជកម្មពហុភាគី ដែលសេរី បើកចំហ មានតម្លាភាព សមភាព និងផ្អែកលើវិធានច្បាប់ ព្រមទាំងបញ្ជាក់នូវភាពចាំបាច់ក្នុងការពង្រឹងការប្រើប្រាស់ក្របខ័ណ្ឌពាណិជ្ជកម្ម ពហុភាគីដឹកនាំដោយអាស៊ានដែលមានការចូលរួមយ៉ាងសកម្មពីដៃគូទាំងឡាយឱ្យអស់សក្តានុពល តួយ៉ាងដូចជា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងភាពជាដៃគូ សេដ្ឋកិច្ចគ្រប់ជ្រុងជ្រោយអាស៊ាន-ជប៉ុន (AJCEP)។សម្ដេចធិបតី ក៏បានសម្តែងការគាំទ្រដល់គំនិតផ្តួចផ្តើមសហបង្កើតឧស្សាហកម្មយានយន្តជំនាន់ថ្មីអាស៊ាន-ជប៉ុន (ASEAN-Japan Next Generation Automotive Industry Co-Creation Initiative) និងគម្រោងរបស់ ឯកឧត្តមនាយករដ្ឋមន្ត្រីជប៉ុន ក្នុងការកៀរគរមូលនិធិ ៣៥ ពាន់លានដុល្លារអាមេរិក សម្រាប់រយៈពេល៥ឆ្នាំ តាមរយៈភាពជាដៃគូរវាងរដ្ឋនិងឯកជន ក្នុងតំបន់អាស៊ាន ដោយផ្តោតលើវិស័យសំខាន់ៗមួយចំនួន ដូចជាការតភ្ជាប់ អន្តរកាលបៃតង ការប្រែប្រួលអាកាសធាតុ និងសហគ្រាសធុនមីក្រូ តូច និងមធ្យមជាដើម។ ការគាំទ្រគំនិតផ្តួចផ្តើមទាំងអស់នេះនឹងរួមចំណែកដល់ការអនុវត្តន៍កម្មវិធីនយោបាយអាទិភាពរបស់រាជរដ្ឋាភិបាលកម្ពុជាផងដែរ ជាពិសេសការលើកកម្ពស់ជីវភាពរបស់ប្រជាពលរដ្ឋតាមរយៈការនាំមកនូវកាលានុវត្តភាពថ្មីៗ និងការបង្កើតឱកាសការងារ។នៅក្នុងឱកាសនោះនាយករដ្ឋមន្ត្រីជប៉ុនក៏បានប្រកាសផងដែរនូវសកម្មភាពថ្មីក្រោមកម្មវិធី «ភាពជាដៃគូដើម្បីកសាងអនាគត» ដែលមានទឹកប្រាក់ចំនួន ៤០ ពាន់លានយ៉េន ស្នើនឹងប្រមាណ៧ ២៨១,៤៤ លានដុល្លារ សម្រាប់រយៈពេល ១០ ឆ្នាំខាងមុខ និងគម្រោងដែលមានទឹកប្រាក់មុនចំនួន ១៥ ពាន់លានយ៉េន (ប្រមាណ ១០៥,៥៤ លានដុល្លារ) សម្រាប់កិច្ចការស្រាវជ្រាវ អន្តរជាតិ និងការផ្លាស់ប្តូរការបណ្តុះបណ្តាលមូលធនមនុស្ស។ជាការឆ្លើយតបសម្តេចធិបតី បានគាំទ្រគំនិតផ្តួចផ្តើមទាំងពីរនេះ និងបានបង្ហាញពីការត្រៀមខ្លួនជាស្រេចរបស់កម្ពុជា ដើម្បីចូលរួមចំណែក ក្នុងការអនុវត្តឱ្យបានពេញលេញ និងប្រកបដោយប្រសិទ្ធភាពខ្ពស់។សម្រាប់វិស័យថាមពល កម្ពុជាបានបញ្ជាក់ពីជំហរឹងមាំជាមួយនឹងសហគមន៍បំភាយឧស្ម័នសូន្យអាស៊ី (Asia Zero Emission Community) ក្នុងការជំរុញអន្តរកាលថាមពលស្អាត និងសមធម៌ ដើម្បីឆ្ពោះទៅរកសង្គមអព្យាក្រឹតកាបូន និងការបំភាយឧស្ម័នសូន្យនៅអាស៊ី។ មូលដ្ឋានគ្រឹះនៃអន្តរកាលថាមពលរបស់កម្ពុជា គឺស្របគ្នាជាមួយនឹងសកម្មភាពរួមដែលជាចក្ខុវិស័យនៃសហគមន៍បំភាយឧស្ម័នសូន្យអាស៊ី កម្ពុជាជឿជាក់លើកិច្ចសហការរួមគ្នាដើម្បីកាត់បន្ថយការបំភាយឧស្ម័នផ្ទះកញ្ចក់ និងយល់ស្របអំពីវិធីសាស្ត្រដែលផ្អែកទៅតាមស្ថានភាពតំបន់ និងសង្គមរបស់ប្រទេសនីមួយៗ។ក្នុងនោះយុទ្ធសាស្ត្រ អព្យាក្រឹតកាបូនរបស់កម្ពុជាឈរលើសសរស្ដម្ភចំនួន ៣ រួមមាន៖ ការបង្កើន សមាមាត្រនៃថាមពលកកើតឡើងវិញ ការលើកកម្ពស់ប្រសិទ្ធភាពថាមពល និងការពង្រីកអគ្គិសនី ភាវូបនីយកម្ម។ ស្របពេលកម្ពុជាកំពុងធ្វើការកែលម្អ កម្ពុជាមានការតាំងចិត្តខ្ពស់ មានចក្ខុវិស័យ ច្បាស់លាស់ ដើម្បីសម្រេចឱ្យបានអនាគតថាមពលមួយប្រកបដោយចីរភាព វិបុលភាព និងស្អាតសម្រាប់ប្រទេសជាតិរបស់យើង និងតំបន់៕

នាយករដ្ឋមន្រ្តីជប៉ុន សន្យាបន្តធ្វើការងារជាមួយសម្តេចធិបតី ដើម្បីស្វែងរកផលប្រយោជន៍សម្រាប់ប្រជាជនទាំងពីរឲ្យកាន់តែប្រសើរ

នៅចំពោះមុខសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ឯកឧត្តម គីស៊ីដា ហ្វឹមីអូ (KISHIDA Fumio) នាយករដ្ឋមន្រ្តីជប៉ុន បានសន្យាថា នឹងបន្តធ្វើកិច្ចការងារជាមួយសម្តេចធិបតីបន្ថែមទៀត ដើម្បី ធ្វើយ៉ាងណាស្វែងរកផលប្រយោជន៍រួមសម្រាប់ប្រជាជន និងប្រទេសទាំងពីរឲ្យកាន់តែរីកច្រើនបន្ថែមទៀត។នៅក្នុងកិច្ចជំនួបទ្វេភាគីជាមួយសម្តេចធិបតី ហ៊ុន ម៉ាណែត ក្នុងឱកាសដែលសម្តេចអញ្ជើញ ចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន លើកទី៥០ ចាប់ពីថ្ងៃទី១៥-១៩ ខែធ្នូ ឆ្នាំ២០២៣ នៅទីក្រុងតូក្យូ ប្រទេសជប៉ុន ឯកឧត្តមនាយករដ្ឋមន្រ្តីជប៉ុន បានលើកឡើងថា ឯកឧត្តមសូមថ្លែងអំណរគុណប្រទេសកម្ពុជាចំពោះចំណងមិត្តភាពជិតស្និទ្ធ និងកិច្ចសហប្រតិបត្តិការប្រកបដោយផ្លែផ្កា ក្នុងរយៈកាលកន្លងមក ព្រមទាំងបានបញ្ជាក់ថា ឯកឧត្តម «នឹងបន្តធ្វើការជាមួយ សម្តេចធិបតី បន្ថែមទៀត សំដៅធ្វើយ៉ាងណាសម្រេចឱ្យបាននូវជោគជ័យថ្មីៗ ជាផលប្រយោជន៍រួមសម្រាប់ប្រទេស និងប្រជាជនទាំងពីរកម្ពុជា-ជប៉ុន» ។ឯកឧត្តម គីស៊ីដា ហ្វឹមីអូ ក៏បានសម្តែងនូវកិច្ចស្វាគមន៍ចំពោះវត្តមានរបស់ សម្តេចធិបតី ហ៊ុន ម៉ាណែត និងគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា នៅប្រទេសជប៉ុន ក្នុងឱកាសនៃការចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន លើកទី៥០ និងកិច្ចប្រជុំប្រមុខថ្នាក់ដឹកនាំនៃប្រទេសសមាជិកសហគមន៍បំភាយឧស្ម័នកម្រិតសូន្យអាស៊ី (The Asia Zero Emission Community Leaders Meeting-AZEC) ព្រមទាំងបានសម្តែងនូវការអរគុណចំពោះប្រទេសកម្ពុជា ដែលបានផ្តល់នូវកិច្ចសហប្រតិបត្តិការយ៉ាងជិតស្និទ្ធិលើគ្រប់វិស័យ ហើយដែលចុងក្រោយនេះ គឺកិច្ចសហការរួមក្នុងការជួយបណ្ដុះបណ្ដាលដល់អ្នកជំនាញដោះមីនរបស់អ៊ុយក្រែនផងដែរ។ថ្លែងនៅក្នុងកិច្ចជំនួបទ្វេភាគីនោះដែរ សម្តេចធិបតី ហ៊ុន ម៉ាណែត ក៏បានសម្តែងនូវការអបអរសាទរចំពោះជោគជ័យរបស់ប្រទេសជប៉ុន នៅក្នុងការធ្វើជាម្ចាស់ផ្ទះរៀបចំកិច្ចប្រជុំកំពូលទាំងពីរ និងបានបង្ហាញនូវការគាំទ្រចំពោះគំនិតផ្តួចផ្តើមរបស់ប្រទេសជប៉ុនពាក់ព័ន្ធនឹង AZEC ក៏ដូចជាគំនិតផ្តួចផ្តើមចំនួន ៣ ផ្សេងទៀត រួមមាន៖ (i) “ដៃគូចិត្ត នឹងចិត្តគ្រប់ជំនាន់/Heart-to-Heart Partners across Generations”; (ii) “ដៃគូសម្រាប់សហបង្កើតសេដ្ឋកិច្ច និងសង្គម/Partners for Co-creation of Economy and Society” និង (iii) “ដៃគូសម្រាប់សន្តិភាព និងស្ថិរភាព/Partners for Peace and Stability” ។បន្ថែមពីលើនេះ ដើម្បីចូលរួមអបអរសាទរខួប៧០ឆ្នាំ នៃចំណងការទូតកម្ពុជា-ជប៉ុន, និងជាឆ្នាំនៃការដំឡើងកម្រិតនៃទំនាក់ទំនងរវាងប្រទេសទាំងពីរ ទៅជាដៃគូយុទ្ធសាស្រ្តគ្រប់ជ្រុងជ្រោយ សម្តេចធិបតីនាយករដ្ឋមន្ត្រី ក៏បានលើកឡើងនូវទិសដៅកិច្ចសហប្រតិបត្តិការមួយចំនួន សំដៅពង្រឹងបន្ថែមទៀតនូវទំនាក់ទំនងរវាងប្រទេសទាំងពីរនៅក្នុងវិស័យការពារជាតិ និងសន្តិសុខ,ពាណិជ្ជកម្ម និងវិនិយោគ, ហេដ្ឋារចនាសម្ព័ន្ធតភ្ជាប់ និងការបើកឡើងវិញនូវជើងហោះហើរត្រង់រវាងកម្ពុជា និងជប៉ុន ជាដើម។សូមបញ្ជាក់ថា នៅក្នុងកិច្ចជំនួបទ្វេភាគីនោះ សម្តេចធិបតី និងនាយករដ្ឋមន្រ្តីជប៉ុន ក៏បានចូលរួមជាអធិបតី ក្នុងពិធីផ្លាស់ប្តូរឯកសារកិច្ចសហប្រតិបត្តិការចំនួន៧ផងដែរដោយក្នុងនោះ១-គម្រោងអភិវឌ្ឍន៍មជ្ឈមណ្ឌលផ្ទុកទិន្នន័យជាតិឆ្ពោះទៅរកការលើកកម្ពស់រដ្ឋាភិបាលអេឡិចត្រូនិក; ២-គម្រោងអភិវឌ្ឍន៍ប្រព័ន្ធគ្រប់គ្រងការផ្គត់ផ្គង់ទឹកស្អាតបែបឌីជីថលក្នុងតំបន់ទីប្រជុំជន; ៣-គម្រោងស្នើសុំនាវាសម្រាប់វាស់ស្ទង់ជលធារសាស្ត្រ សម្រាប់ផលិតផែនទីនាវាចរណ៍អេឡិចត្រូនិក; ៤-កំណត់ហេតុរួមរវាងក្រសួងប្រៃសណីយ៍ និងទូរគមនាគមន៍ និងក្រសួងកិច្ចការផ្ទៃក្នុង និងគមនាគមន៍ជប៉ុន ស្ដីពីកិច្ចសហប្រតិបត្តិការសម្រាប់ការអភិវឌ្ឍន៍សេដ្ឋកិច្ច និងសង្គមឌីជីថលក្នុងប្រទេសកម្ពុជា; ៥-អនុស្សរណៈនៃកិច្ចសហប្រតិបត្តិការរវាងធនាគារជាតិកម្ពុជា និងក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន ស្តីពី កិច្ចសហប្រតិបត្តិការនៃការទូទាត់ឆ្លងដែនតាមរយៈQR Code; ៦-អនុស្សរណៈនៃការយោគយល់គ្នារវាងក្រសួងរ៉ែ និងថាមពល ជាមួយក្រុមហ៊ុន Minebea Mitsumi និងក្រុមហ៊ុន SchneiTec ស្តីពីកិច្ចសហប្រតិបត្តិការលើគម្រោងថាមពលព្រះអាទិត្យ (សូឡា) និង ៧-អនុស្សរណៈនៃការយោគយល់គ្នារវាងក្រសួងរ៉ែ និងថាមពល ជាមួយនឹង ក្រុមហ៊ុន erex Co. Ltd និងក្រុមហ៊ុន SPHP (Cambodia) ស្ដីពីកិច្ចសហប្រតិបត្តិការលើ គម្រោងថាមពលជីវមាសជាដើម៕អត្ថបទ៖ បាន ចក់

ឯកឧត្តម ចាយ បូរិន អញ្ជើញសួរសុខទុក្ខ និងនាំយកវត្ថុអនុស្សាវរីយ៍របស់សម្តេចធិបតី ហ៊ុន ម៉ាណែត ជូនលោកជំទាវបណ្ឌិតសភាចារ្យ ខ្លូត ធីតា

ភ្នំពេញ៖ ប្រតិភូយុវជនផ្នែកឃោសនាអប់រំ នៃយុវជនគណបក្សថ្នាក់កណ្តាល ដឹកនាំដោយឯកឧត្តម ចាយ បូរិន សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានផ្នែកឃោសនាអប់រំ នៃយុវជនគណបក្សថ្នាក់កណ្តាល បានអញ្ជើញសួរសុខទុក្ខ និងនាំយកវត្ថុអនុស្សាវរីយ៍របស់សម្តេចធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្រ្តៃយ៍កាកបាទក្រហមកម្ពុជា ជូនលោកជំទាវបណ្ឌិតសភាចារ្យ ខ្លូត ធីតា ទីប្រឹក្សាផ្ទាល់សម្តេចធិបតី ហ៊ុន ម៉ាណែត នាព្រឹកថ្ងៃទី១៧ ខែធ្នូ ឆ្នាំ២០២៣ ដល់គេហដ្ឋាន ស្ថិតនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ។ឯកឧត្តម ចាយ បូរិន បានពាំនាំនូវការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រធានគណបក្ស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេច ឯកឧត្តម លោកជំទាវ ដែលជាថ្នាក់ដឹកនាំគណបក្សគ្រប់លំដាប់ថ្នាក់ ជាពិសេសសម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនលោកជំទាវបណ្ឌិតសភាចារ្យ ខ្លូត ធីតា និងក្រុមគ្រួសារ ។លោកជំទាវបណ្ឌិតសភាចារ្យ និងក្រុមគ្រួសារ ពិតជាមានការពេញចិត្តយ៉ាងខ្លាំងចំពោះសកម្មភាពចុះសួរសុខទុក្ខរបស់ក្រុមការងារយុវជនគណបក្សថ្នាក់កណ្ដាល ក្រោមការដឹកនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត ដែលបានដឹកនាំបន្តពីសម្តេចតេជោហ៊ុន សែន ហើយតែងតែយកចិត្តទុកដាក់ពីសុខទុក្ខ ជីវភាពរស់នៅ ផ្តល់ភាពកក់ក្តៅ និងក្តីសង្ឃឹមដល់ចាស់ព្រឹទ្ធាចារ្យទំាងអស់ដែលមានគុណបំណាច់ចំពោះគណបក្ស និងប្រទេសជាតិ។ លោកជំទាវបណ្ឌិតសភាចារ្យ ក៏បានបញ្ជាក់ពីការគាំទ្រ និងមានសង្ឃឹមយ៉ាងមុតមាំចំពោះរាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត ដែលបានដាក់ចេញ និងកំណត់នូវចក្ខុវិស័យ ផែនការយុទ្ធសាស្រ្តច្បាស់លាស់ ជាពិសេសយុទ្ធសាស្ត្របញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព សំដៅកសាងមូលដ្ឋានគ្រឹះឆ្ពោះទៅសម្រេចបានចក្ខុវិស័យកម្ពុជា ឆ្នាំ២០៥០ ទាំងវិស័យអាណាចក្រ និងពុទ្ធចក្រ។ លោកជំទាវបណ្ឌិតសភាចារ្យ ខ្លូត ធីតា ក៏បានផ្តល់ទស្សនទានជូនយុវជនគណបក្សដូចខាងក្រោម ៖១-ត្រូវផ្តោតសំខាន់លើការថែរក្សាសុខភាព ទាំងសុខភាពផ្លូវកាយ និងសុខភាពផ្លូវចិត្ត ២-សេពគប់មនុស្សឱ្យច្រើន ប៉ុន្តែត្រូវជ្រើសរើសយកតែមិត្តល្អ៣-ត្រូវយកចិត្តទុកដាក់ចំពោះសាសនាទាំងអស់ និងត្រូវសិក្សាពីគុណតម្លៃរបស់សាសនានីមួយៗ លោកជំទាវក៏បានរំលឹកពីប្រវត្តិ និងអនុស្សាវរីយ៍ជាច្រើនដែលលោកជំទាវធ្លាប់បានចូលរួម និងឆ្លងកាត់ ដើម្បីជាបទពិសោធន៍ចែកជូនដល់យុវជនជំនាន់ក្រោយ។ លោកជំទាវ ជាអ្នកសិក្សាស្រាវជ្រាវ និងបង្រៀនជំនាញទស្សនវិជ្ជាព្រះពុទ្ធសាសនា ព្រមទាំងបទពិសោធន៍ការងារយ៉ាងច្រើនដូចជា៖ ធ្លាប់បានបម្រើការងារជាសាស្ត្រាចារ្យបង្រៀនប្រវត្ដិវិទ្យា ភូមិវិទ្យា នៅសាលាគរុវិជ្ជាជាន់ខ្ពស់ សិក្សាថ្នាក់បណ្ឌិត ផ្នែកទស្សនវិជ្ជាប្រៀបធៀបសាសនាតួនាទីព្រះពុទ្ធសាសនានៅកម្ពុជា ឆ្លុះបញ្ចាំងតាមរយៈពាហិរសាសនា ជាព្រឹទ្ធនារីរង និងជាសាស្ត្រាចារ្យទស្សនវិជ្ជានៅសាកលវិទ្យាល័យភូមិន្ទភ្នំពេញមណ្ឌលទី១, ទី២ ពុទ្ធិកមហាសាកលវិទ្យាល័យព្រះសីហនុរាជ សាកលវិទ្យាល័យវិទ្យាសាស្រ្តសុខាភិបាល សាកលវិទ្យាល័យភូមិន្ទកសិកម្ម អង្គការក្រៅរដ្ឋាភិបាលចម្រើនស្ត្រី ជាអនុប្រធានវិទ្យាស្ថានមនុស្សសាស្ត្រ និងវិទ្យាសាស្ត្រសង្គម នៃរាជបណ្ឌិត្យសភាកម្ពុជា ជាប្រធានក្រុមបណ្ឌិតសភាចារ្យ ជាអនុប្រធានក្រុមប្រឹក្សាជាតិភាសាខ្មែរ ជាប្រធានរាជបណ្ឌិត្យសភាកម្ពុជា ជាទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន និងជាឧត្តមទីប្រឹក្សា នៃក្រុមប្រឹក្សាជាតិភាសាខ្មែរ ជាទីប្រឹក្សាផ្ទាល់សម្តេចមហាបវរធិបតី ហ៊ុន ម៉ាណែត។ឯកឧត្តម ចាយ បូរិន និងក្រុមការងារក៏បានសម្តែងនូវការកោតសសើរ និងដឹងគុណចំពោះវីរភាពលះបង់គ្រប់បែបយ៉ាងចូលរួមបម្រើ និងកសាងជាតិ មាតុភូមិរបស់លោកជំទាវ ជាមួយគ្នានោះឯកឧត្តម ក៏បានប្រគល់ជូនវត្ថុអនុស្សារីយ៍ និងថវិកាដែលជាអំណោយដ៏ថ្លៃថ្លារបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនដល់លោកជំទាវបណ្ឌិតសភាចារ្យ ខ្លូត ធីតា និងសូមបួងសួងដល់គុណបុណ្យព្រះរតនត្រ័យ វត្ថុសិទ្ធិស័ក្ដិក្នុងលោកសូមតាមជួយបីបាច់ថែរក្សាលោកជំទាវបណ្ឌិតសភាចារ្យ និងក្រុមគ្រួសារមានសុខភាពល្អ កម្លាំងមាំមួន និងមានជន្មាយុយឺនយូរ៕អត្ថបទ រដ្ឋា

បណ្ដាញសង្គម

ព័ត៌មានថ្មីៗ

សម្តេចតេជោ ហ៊ុន សែន អញ្ជើញចូលរួមអបអរសាទរខួបលើកទី៨០ឆ្នាំ ទិវាឯករាជ្យរបស់វៀតណាម

បេឡារុស៖ របៀបបំពាក់ប្រព័ន្ធមីស៊ីលជាមួយនឹងក្បាលគ្រាប់នុយក្លេអ៊ែរ កំពុងត្រូវបានស្វែងយល់

រដ្ឋមន្ត្រីការបរទេស៖ ចិនសម្លឹងដល់កិច្ចសហប្រតិបត្តិការផ្នែកកសិកម្ម និងជីករ៉ែ ជាមួយប៉ាគីស្ថាន

រដ្ឋាភិបាល៖ អង្គការណាតូនឹងបង្កើតមូលដ្ឋានភស្តុភារ នៅស៊ុយអែត

ការថែទាំផ្លូវមានសារៈសំខាន់ណាស់ ដើម្បីលើកកម្ពស់ជីវភាពរស់នៅរបស់ប្រជាជននៅជនបទ

រុស្ស៊ីធ្វើសមយុទ្ធបាញ់មីស៊ីល នៅសមុទ្រជប៉ុន

ផ្នែកខ្លះរបស់រុស្ស៊ី ប្រឈមនឹងកង្វះប្រេងសាំង បន្ទាប់ពីអ៊ុយក្រែនវាយប្រហាររោងចក្រចម្រាញ់ប្រេង

សរទរដូវជិតមកដល់ ប៉ុន្តែកូរ៉េខាងត្បូង នៅតែស្ថិតក្នុងអាកាសធាតុក្តៅហួតហែង

អតីតពលការិនីត្រឡប់មកពីប្រទេសថៃ បីនាក់បងប្អូន ទទួលបានការងារធ្វើភ្លាមៗ នៅក្នុងខេត្តស្វាយរៀង ដោយម្នាក់ៗទទួលបានប្រាក់ឈ្នួលប្រចាំខែជិត ៥០០ដុល្លាអាមេរិក

ឯកឧត្តម ឃឹម ហ្វីណង់៖ទោះបីជាថ្លៃស្រូវបច្ចុប្បន្ននៅតែបន្តជាបញ្ហាប្រឈមតែការចូលរួមប្រមូលទិញស្រូវពីរោងម៉ាស៊ីនដៃគូពិតជាបានជួយកាត់បន្ថយយ៉ាងច្រើនដល់ការកកស្ទះនៅតាមទីវាល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍