នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធាន​ក្រុមការងារ​ចុះមូលដ្ឋាន ប្រកាស​បញ្ចូលសមាជិកថ្មី​​គណបក្សប្រជាជនកម្ពុជាចំនួន ៦៩០០នាក់ ក្នុងស្រុកប្រាសាទបល្ល័ង្ក ខេត្តកំពង់ធំ
សម្ដេច​តេជោ៖ការពង្រឹងខឿនការពារជាតិមិនសំដៅតែនៅសមរភូមិមុខទេ ត្រូវយកចិត្តទុកដាក់ទំនុកបម្រុងអ្នកសមរភូមិក្រោយជាគ្រួសារយុទ្ធជនជួរមុខ និងអតីតយុទ្ធជន
ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី
ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ​ និង ការអភិវឌ្ឍន៍

ទំនុកចិត្តរបស់អ្នកប្រើប្រាស់នៅសហរដ្ឋអាមេរិក ធ្លាក់ចុះជាលើកទី២ ជាប់គ្នាក្នុងខែកញ្ញានេះ

2023/09/28 10:32:20 am        93
Facebook Telegram Linkin
អាមេរិក៖ អង្គការមិនស្វែងរកប្រាក់ចំណេញ Conference Board ដែលមានមូលដ្ឋាននៅទីក្រុងញូវយ៉កសហរដ្ឋអាមេរិក បានរាយការណ៍កាលពីថ្ងៃអង្គារថា សន្ទស្សន៍ទំនុកចិត្តអ្នកប្រើប្រាស់ បានធ្លាក់ចុះនៅក្នុងខែកញ្ញានេះ រយៈពេលពីរខែជាប់ៗគ្នា។ សន្ទស្សន៍ទំនុកចិត្តអ្នកប្រើប្រាស់របស់ Conference Board បានចុះបញ្ជី១០៣,០ នៅក្នុងខែកញ្ញាពី អំណានដែលបានកែប្រែ ឡើងដល់ ១០៨,៧ កាលពីមួយខែមុន។  យោងតាមទិន្នន័យនេះ សន្ទស្សន៍នេះគឺនៅកម្រិតទាបបំផុតទីពីររបស់ខ្លួននៅឆ្នាំនេះ ដោយបានធ្លាក់ចុះលើអំណាន១០២,៥ សម្រាប់ខែឧសភា។ទិន្នន័យបង្ហាញថាអ្នកប្រើប្រាស់នៅសហរដ្ឋអាមេរិក ព្រួយបារម្ភអំពីការកើនឡើងតម្លៃជាទូទៅ ជាពិសេសគ្រឿងទេស និងតម្លៃសាំង។ ទន្ទឹមនឹងនេះ អ្នកប្រើប្រាស់នៅសហរដ្ឋអាមេរិកក៏មានការព្រួយបារម្ភ ផងដែរ អំពីស្ថានភាពនយោបាយក្នុងស្រុក និងអត្រាការប្រាក់ខ្ពស់។អតិផរណា និងការដំឡើងការប្រាក់ ដែលនៅតែបន្ត នាំឲ្យមានការកើនឡើងតម្លៃនៃការរស់នៅ និងការសន្សំប្រាក់របស់ប្រជាពលរដ្ឋអាមេរិកមានការថយចុះ។ការស្ទង់មតិរបស់ធនាគារកណ្តាលអាមេរិកដែលបានចេញផ្សាយកាលពីថ្ងៃចន្ទបង្ហាញថាប្រហែល ៦៧%នៃអ្នកឆ្លើយតបនិយាយថាតម្លៃនៃការរស់នៅគឺលើសពីកំណើនប្រាក់ចំណូលរបស់ពួកគេ។ជាមួយគ្នានេះដែរ របាយការណ៍របស់សារព័ត៌មាន Bloomberg កាលពីថ្ងៃចន្ទបាននិយាយថា ៨០%នៃគ្រួសារអាមេរិក ឥឡូវនេះបានអស់ប្រាក់សន្សំបន្ថែម និងនៅសល់សាច់ប្រាក់តិច មិនដូចកាលពីមុនអំឡុងការរាតត្បាតវីរុស COVID-19 ។ ក្រុមអ្នកវិភាគបានព្រមានថាការសន្សំធ្លាក់ចុះអាចប៉ះពាល់ដល់ដំណើរការសេដ្ឋកិច្ចរបស់សហរដ្ឋអាមេរិក៕

នាយករដ្ឋមន្រ្ដីថៃ សេដ្ឋា ថាវីស៊ីន អញ្ជើញទស្សនកិច្ចផ្លូវការនៅកម្ពុជា

2023/09/28 10:31:37 am        95
Facebook Telegram Linkin
នាយករដ្ឋមន្រ្តីនៃព្រះរាជាណាចក្រថៃ ឯកឧត្តម សេដ្ឋា ថាវីស៊ីន នាវេលាម៉ោង ១០ និង៣០ នាទីព្រឹកថ្ងៃទី២៨ ខែកញ្ញា ឆ្នាំ២០២៣នេះ បានអញ្ជើញមកបំពេញទស្សនកិច្ចផ្លូវការលើកដំបូងនៅកម្ពុជា តបតាមការអញ្ជើញរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ក្នុងអំឡុងពេលទស្សនកិច្ចនៅកម្ពុជា ឯកឧត្តមនាយករដ្ឋមន្ត្រីថៃ នឹងអញ្ជើញដាក់កម្រងផ្កា គោរពវិញ្ញាណក្ខន្ធនៅវិមានឯករាជ្យ និងអញ្ជើញគោរពព្រះវិញ្ញាណក្ខន្ធ ព្រះករុណា ព្រះបាទ សម្តេចព្រះនរោត្តម សីហនុ ព្រះបរមរតនកោដ្ឋ អតីតព្រះមហាក្សត្រនៃព្រះរាជាណាចក្រកម្ពុជា នៅមណ្ឌបព្រះបរមរូប។នៅព្រឹកថ្ងៃទី២៨ ខែកញ្ញានេះដែរ នាយករដ្ឋមន្ត្រីទាំងពីរក៏មានជំនួបទ្វេភាគី ក្នុងគោលបំណងកំណត់ទិសដៅសកម្មភាព ដើម្បីធ្វើឱ្យកាន់តែស៊ីជម្រៅ និងពង្រីកបន្ថែមទៀតនូវកិច្ចសហប្រតិបត្តិការលើគ្រប់វិស័យ ដែលផ្តល់ផលប្រយោជន៍ទៅវិញទៅមក ក្នុងក្របខណ្ឌទ្វេភាគី និងពហុភាគី។ តាមរយៈជំនួបនេះ នាយករដ្ឋមន្រ្ដីនៃប្រទេសទាំងពីរ ក៏នឹងផ្លាស់ប្តូរទស្សនៈ ស្ដីពីបញ្ហាតំបន់ និងអន្តរជាតិ ដែលជាផលប្រយោជន៍ និងក្តីបារម្ភរួម។ បន្ថែមពីនេះថ្នាក់ដឹកនាំកំពូលទាំងពីរនឹងធ្វើការប្រគល់ទទួលនូវ «មជ្ឈមណ្ឌលសំចត និងស្តារនីតិសម្បទាសម្រាប់ជនរងគ្រោះដោយ អំពើជួញដូរមនុស្ស និងក្រុមជនងាយរងគ្រោះដទៃទៀត» ដែលមានទីតាំងស្ថិតនៅក្រុងប៉ោយប៉ែត ដែលជាគំនិតផ្តួចផ្តើមនៃកិច្ចសហប្រតិបត្តិការទ្វេភាគីផងដែរ។នាពេលរសៀល ឯកឧត្តម សេដ្ឋា វីស៊ីន ក៏អញ្ជើញចូលជួបសម្ដែងការគួរសមដាច់ដោយឡែកចំពោះ សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា, សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី និងជាប្រធានព្រឹទ្ធសភា, សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រផងដែរ។សូមជម្រាបថា ដំណើរទស្សនកិច្ចផ្លូវការលើកដំបូងរបស់ឯកឧត្ដមនាយករដ្ឋមន្ត្រី សេដ្ឋា ថាវីស៊ីន មកកាន់ កម្ពុជានេះ នឹងពង្រឹងបន្ថែមទៀតនូវចំណងមិត្តភាពជាប្រពៃណី និងលើកកម្ពស់កិច្ចសហប្រតិបត្តិការពហុវិស័យរវាងប្រទេសទាំងពីរ ស្របតាមស្មារតីនៃ «ការពង្រឹងភាពជាដៃគូដើម្បីសន្តិភាពនិង វិបុលភាព» ដែលផ្តល់ផលប្រយោជន៍ទៅវិញទៅមកសម្រាប់ប្រជាជននៃប្រទេសទាំងពីរ ព្រមទាំងរួមចំណែកដល់ការលើកកម្ពស់សន្តិភាព ស្ថិរភាព និងវិបុលភាព ក្នុងសហគមន៍អាស៊ាន និងអន្តរជាតិ៕

ប្រទេសកោះស៊ីប៖ លីបង់ត្រូវការជំនួយរបស់ EU ដើម្បីដោះស្រាយវិបត្តិអន្តោប្រវេសន៍

2023/09/28 10:26:10 am        118
Facebook Telegram Linkin
កោះស៊ីប៖ រដ្ឋមន្ត្រីក្រសួងមហាផ្ទៃរបស់ខ្លួន បាននិយាយកាលពីថ្ងៃពុធថា ប្រទេសកោះស៊ីបដែលជាសមាជិកសហភាពអឺរ៉ុប ចង់ឲ្យទីក្រុងប្រ៊ុចសែលផ្តល់ជំនួយផ្នែកហិរញ្ញវត្ថុ និងបច្ចេកទេសដល់ប្រទេសលីបង់ ដើម្បីជួយប្រទេសនេះ ទប់ទល់នឹងលំហូរជនភៀសខ្លួនស៊ីរី និងរារាំងពួកគេមិនឲ្យទៅដល់កោះនេះ។ លោក កុនស្តែនទីណូស អ៊ីអូអានណូ (Constantinos Ioannou) ក៏បាននិយាយផងដែរថា រដ្ឋធានីនីកូសៀ (Nicosia) បានផ្តល់អំណោយដល់ទូកល្បឿនលឿន និងធ្វើការល្បាតរួមគ្នាជាមួយប្រទេសលីបង់ បន្ទាប់ពីការមកដល់តាម មុទ្រនាពេលថ្មីៗនេះ បានបង្ហាញថា ផ្លូវអ្នកជួញដូរបានផ្លាស់ប្តូរឆ្ងាយពីប្រទេសទួរគី និងឆ្ពោះទៅឆ្នេរសមុទ្រលីបង់។លោកអ៊ីអូអានណូ បានប្រាប់វិទ្យុរដ្ឋកោះស៊ីបថា៖«តាមការប៉ាន់ប្រមាណថា មានជនភៀសខ្លួនស៊ីរីប្រហែល ២.៥ លាននាក់ នៅក្នុងប្រទេសលីបង់ ដូច្នេះអ្នកអាចស្រមៃមើលទំហំនៃបញ្ហាដែលលីបង់កំពុងប្រឈមមុខ ជាមួយនឹងចំនួនប្រជាជនពី ៥-៦ លាននាក់ ហើយដែលមិនទាន់បានទទួលជំនួយបច្ចេកទេស ឬហិរញ្ញវត្ថុពីEUទេ។ លោកបានបន្ថែមថា៖ «នោះជាអ្វីដែលយើង កំពុងស្វែងរក។គំនិតផ្តួចផ្តើមចុងក្រោយបង្អស់ គឺជាគំនិតមួយក្នុងចំណោមគំនិតផ្តួចផ្តើមមួយចំនួន ដែលធ្វើឡើងដោយកោះមេឌីទែរ៉ាណេភាគខាងកើត ក្នុងរយៈពេលប៉ុន្មានខែថ្មីៗនេះ ដើម្បីទប់ស្កាត់ការកើនឡើងនៃការធ្វើ   ចំណាកស្រុក មិនទៀងទាត់ ដែលបានចាប់ផ្តើម នៅប្រហែលឆ្នាំ២០១៧៕

ការសម្រក់ទឹកភ្នែក និងការរំជួលចិត្ត ខណៈក្រុមជនអន្តោប្រវេសន៍ទៅដល់ទឹកដីអាមេរិក ក្រោយឆ្លងទន្លេព្រំដែន

2023/09/28 10:23:50 am        86
Facebook Telegram Linkin
អាមេរិក៖ ភាពរំជួលចិត្ត នៅខាងព្រំដែនទន្លេរបស់សហរដ្ឋអាមេរិក ជាមួយប្រទេសម៉ិកស៊ិក ខណៈក្រុមជនអន្តោប្រវេសន៍បានមកដល់ច្រាំងទន្លេ បន្ទាប់ពីឆ្លងទន្លេ រីយ៉ូ ក្រែន (Rio Grande) ស្ថិតនៅបណ្ដោយព្រំដែនរដ្ឋតិចសាស់ (Texas)។ក្រុមមន្ត្រីបាននិយាយថា ស្របពេលក្រុមជនអន្តោប្រវេសន៍ក្នុងចំនួនដ៏ច្រើន ប្រមាណ២ពាន់នាក់ ដែលមានបំណងឆ្លងចូលសហរដ្ឋអាមេរិក អង្គភាពល្បាតព្រំដែនត្រូវបានចូលរួមយ៉ាងសកម្មក្នុងការព្យាយាមគ្រប់គ្រងលំហូរចូលនេះ។ កាលពីសប្ដាហ៍មុន ក្រុមមន្ត្រីរដ្ឋ Texas បានចុះហត្ថលេខាលើសេចក្ដីប្រកាសអាសន្នមួយដើម្បីផ្ដល់សេវាបន្ថែមទៀត។ ការកើនឡើងដ៏ច្រើននៃជនអន្តោប្រវេសន៍នៅតាមបណ្ដាយព្រំដែនអាមេរិក ភាគខាងត្បូង បានក្លាយជាចំណុចរបត់ថ្មីមួយ បន្ទាប់ពីការធ្វើអន្តោប្រវេសន៍ខុសច្បាប់បានធ្លាក់ចុះក្នុងរយៈពេលប៉ុន្មានខែថ្មីៗនេះ ។ កំណើនជនអន្តោប្រវេសន៍នេះ អាចហុចឱកាសដល់គូប្រជែងរបស់លោកប្រធានាធិបតី Joe Biden ក្នុងការបោះឆ្នោតឆ្នាំ២០២៤ខាងមុខ។ យោងតាមក្រុមជនអន្តោប្រវេសន៍ដែលត្រូវបានសម្ភាសន៍ដោយសារព័ត៌មាន Reuters ក្រុមជនអន្តោប្រវេសន៍ និងអ្នកស្វែងរកសិទ្ធិជ្រកកោន កំពុងធ្វើដំណើរតាមយន្តហោះចូលទៅក្នុងប្រទេសនីហ្ការ៉ាហ្គ័រ ដើម្បីស្វែងរកផ្លូវវាងនៅតំបន់ ដារៀន ហ្គែប (Darien Gap) ជាតំបន់ព្រៃឈើដ៏គ្រោះថ្នាក់ភ្ជាប់ប្រទេសប៉ាណាម៉ា និងកូឡុំប៊ី ។ ជាធម្មតា មនុស្សជាច្រើនដែលព្យាយាមទៅដល់ទឹកដីសហរដ្ឋអាមេរិក បានជិះយន្តហោះចូលទៅក្នុងប្រទេសប្រេស៊ីល ឬ បណ្ដាប្រទេសអាមេរិកខាងត្បូងផ្សេងទៀត ប៉ុន្តែការរកឃើញផ្លូវវាងនេះ បានរីករាលដាលតាមរយៈពាក្យសម្ដីចេញពីមាត់មួយទៅមាត់មួយ៕

កម្ពុជានិងធនាគារពិភពលោក ជំរុញកិច្ចសហការគម្រោង“ជំនាញកម្ពុជាដើម្បីការងារប្រសើរ”ឱ្យជោគជ័យ

2023/09/28 10:22:29 am        94
Facebook Telegram Linkin
ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៧ ខែកញ្ញា ឆ្នាំ២០២៣នេះ បានជួបពិភាក្សាការងារជាមួយលោកស្រី ម៉ារីយ៉ាម ស្ហឺរមែន(Mariam Sherman) ​នាយកធនាគារពិភពលោកប្រចាំប្រទេសមីយ៉ានម៉ា កម្ពុជា និងសាធារណរដ្ឋប្រជាមានិត​ប្រជាធិបតេយ្យឡាវ នៅទីស្តីការក្រសួងការងារ ​និងបណ្តុះបណ្តាលវិជ្ជាជីវៈ។ ក្នុង​កិច្ចពិភាក្សាប្រកប​ដោយភាព​ស្និទ្ធស្នាល​នោះ ឯកឧត្តមរដ្ឋមន្ត្រី បានថ្លែងអំណរគុណដល់​ធនាគារ​ពិភព​លោក​ដែលបានជួយគាំទ្រ​ដល់កម្មវិធីបណ្តុះបណ្តាលបច្ចេកទេស​ក្នុងការលើកកម្ពស់​សមត្ថភាពជំនាញពលកម្មកម្ពុជាតាំងពីដើមកន្លងមក។ ទន្ទឹមនឹងនោះ ឯកឧត្តមរដ្ឋមន្ត្រី ​បានគូសបញ្ជាក់ថា ​ក្រសួងនឹងបន្តធ្វើការយ៉ាងជិតស្និទ្ធបំផុត​ជាមួយក្រុមការងារបច្ចេកទេសរបស់​ធនាគារពិភពលោក ​ដើម្បីបញ្ចប់គម្រោង “ជំនាញកម្ពុជាដើម្បី​ការងារប្រសើរ” (Cambodia Skills for Better Jobs) ឱ្យទាន់ពេលវេលាកំណត់ដើម្បី​ជាត្រី​វិស័យយ៉ាង​សំខាន់សម្រាប់​ពង្រឹងគុណភាពជំនាញ ​ដែលឆ្លើយតប ​នឹងតម្រូវការទីផ្សារការងារ និងការផ្តល់​ព័ត៌មាន រួមទាំងការតម្រង់ទិសវិជ្ជាជីវៈដើម្បីការងារប្រសើរ។គម្រោង “ជំនាញកម្ពុជាដើម្បីការងារប្រសើរ” គឺជាគម្រោងគន្លឹះដែលនឹងមានជានិយាមជាក់លាក់​សម្រាប់​កម្មវិធី​បណ្តុះបណ្តាលយុវជន ​១.៥លាននាក់មកពីគ្រួសារក្រ១ ក្រ២ និងគ្រួសារងាយ​រងគ្រោះ​ដែលជាកម្មវិធីបណ្តុះបណ្តាល​ថ្នាក់ជាតិរបស់រាជរដ្ឋាភិបាលអាណត្តិទី៧ ក្នុងគោលបំណង​ជួយ​ដល់ប្រជាពលរដ្ឋមកពីក្រុមគ្រួសារក្រីក្រ ​និងងាយរងគ្រោះដើម្បី​អាចទទួលបានជំនាញ​ជាក់​លាក់យ៉ាងឆាប់រហ័ស ហើយងាយទទួលបានឱកាសការងារក្នុងទីផ្សារកម្ពុជាដែលកំពុង​តម្រូវការ​ជំនាញបច្ចេកទេស​ដើម្បីបំពេញតម្រូវការសកម្មភាពសេដ្ឋកិច្ច។ក្នុងនោះលោកស្រី​ ម៉ារីយ៉ាម ស្ហឺរមែន(Mariam Sherman) នាយកធនាគារពិភពលោកប្រចាំ​ប្រទេស​មីយ៉ាន់ម៉ា កម្ពុជា និងឡាវ​ បានអះអាងថា ​ធនាគារពិភពលោក បានត្រៀមខ្លួន​រួចជាស្រេច​ដើម្បីជួយ​រដ្ឋាភិបាលកម្ពុជាក្នុងការពង្រឹងគុណភាព​ជំនាញដល់យុវជនកម្ពុជា ​ដែលឆ្លើយតប​នឹងតម្រូវការទីផ្សារការងារប្រកបដោយប្រសិទ្ធភាព៕

មេបក្សប្រឆាំងប៉ូឡូញ អំពាវនាវឲ្យមានជំនួយយោធាឥតងាករេដល់អ៊ុយក្រែន

2023/09/28 10:21:29 am        154
Facebook Telegram Linkin
ប៉ូឡូញ៖ សារព័ត៌មាន BILD បានរាយការណ៍កាលពីថ្ងៃទី២៧ ខែកញ្ញាថា មេដឹកនាំបក្សប្រឆាំងប៉ូឡូញ និងជាអតីតនាយករដ្ឋមន្ត្រីលោក ដូណាល់ ថាស (Donald Tusk) បានអំពាវនាវឲ្យមានជំនួយផ្នែកយោធាឥតងាករេដល់អ៊ុយក្រែន មុនពេលការបោះឆ្នោតសភារបស់ប្រទេសប៉ូឡូញ នៅថ្ងៃទី១៥ ខែតុលា។លោកថាស បាននិយាយថា៖«ជ័យជម្នះរបស់អ៊ុយក្រែន គឺស្ថិតនៅក្នុងផលប្រយោជន៍ជាតិរបស់ប៉ូឡូញយ៉ាងប្រាកដ» ។ «នេះនឹងប៉ះពាល់ដល់ទាំងបញ្ហាសេដ្ឋកិច្ច និងបញ្ហាជនភៀសខ្លួន។ រដ្ឋប៉ូឡូញ មិនគួរចាកចេញពីទីតាំងរបស់ខ្លួនទេ ការគាំទ្រផ្នែកយោធាដល់អ៊ុយក្រែន មិនគួរត្រូវចោទជាបញ្ហាទេ។ការគាំទ្ររបស់ប៉ូឡូញ ត្រូវបានពិភាក្សា នាពេលថ្មីៗនេះ នៅពេលដែលលោកថាសជាគូប្រជែង នាយករដ្ឋមន្ត្រីដែលកំពុងកាន់អំណាច លោក ម៉ាទៀវស៍ ម៉ូរ៉ាវីអែកគី (Mateusz Morawiecki) បាននិយាយកាលពីថ្ងៃទី២០ ខែកញ្ញាថា ប្រទេសប៉ូឡូញ ចាំបាច់ត្រូវផ្តោតលើការពង្រឹងគ្រឿងយុទ្ធោបករណ៍របស់ខ្លួន ហើយ នឹងមិនផ្គត់ផ្គង់អាវុធដល់អ៊ុយក្រែនទៀតទេ។ក្រោយមក ក្រុមមន្ត្រីបានបញ្ជាក់ថា ប្រទេសប៉ូឡូញ នឹងបំពេញតាមកិច្ចព្រមព្រៀងដែលមានស្រាប់ទាំងអស់អំពីការផ្តល់អាវុធ៕

អ្នកក្រុងឡុងដ៍្រ របស់អង់គ្លេស តវ៉ាប្រឆាំងនឹងរដ្ឋាភិបាលជុំវិញបញ្ហាអណ្តូងប្រេងនៅសមុទ្រខាងជើង

2023/09/28 10:18:01 am        111
Facebook Telegram Linkin
អង់គ្លេស៖ ក្រុមអ្នកតវ៉ាក្នុងទីក្រុងឡុងដ៍្រ បានអំពាវនាវកុំឱ្យមានការជួញដូរប្រេង និងឧស្ម័នថ្មីក្រៅពីនៅនាយកដ្ឋានសន្តិសុខថាមពល ព្រមទាំងទាមទារឲ្យមានអត្រាបំភាយឧស្ម័នសុទ្ធស្មើសូន្យផងដែរ នៅក្នុងចក្រភពអង់គ្លេសកាលពីថ្ងៃពុធ (២៧ កញ្ញា) បន្ទាប់ពីរដ្ឋាភិបាលបានផ្តល់សញ្ញាយល់ព្រមចំពោះគម្រោងប្រេង និងឧស្ម័នថ្មីដ៏ធំបំផុតមួយ ក្នុងរយៈពេលជាច្រើនឆ្នាំ។ ក្រុមអ្នកតវ៉ាបានកាន់ផ្ទាំងបដា និងស្រែកពាក្យស្លោកនៅខាងក្រៅអគារ ខណៈនៅខាងក្នុង រដ្ឋមន្ត្រីសន្តិសុខថាមពល លោកស្រី Claire Coutinho បាននិយាយថា ទីតាំងបូមប្រេងថ្មីដែលមានឈ្មោះថា រ៉ូសប៊ែង (Rosebank) នឹងផ្តល់ឱ្យចក្រភពអង់គ្លេសនូវសន្តិសុខថាមពល។អណ្ដូងប្រេង រ៉ូសប៊ែង ដែលមានទំហំតូចមួយនៅក្នុងបរិបទពិភពលោក ត្រូវបានគេរំពឹងថា នឹងផលិតប្រេងបានរហូតដល់៣០០លានបារ៉ែល ក្នុងដំណាក់កាលផ្ដល់សេវាកម្មរបស់ខ្លួន។ គណបក្សពលកម្ម ដែលជាបក្សប្រឆាំងដ៏សំខាន់របស់អង់គ្លេស ដែលចង់ផ្តោតលើថាមពលស្អាតបាននិយាយថា ខ្លួននឹងគោរពអាជ្ញាប័ណ្ណណាមួយដែលបានផ្តល់មុនការបោះឆ្នោតបន្ទាប់ រួមទាំងសម្រាប់អណ្ដូងប្រេង រ៉ូសប៊ែង នេះផងដែរ៕

ប្រមុខUN ព្រមានថា អំពើហិង្សា ការចាប់រំលោភ និទណ្ឌភាព កាន់តែអាក្រក់ឡើងៗ នៅក្នុងប្រទេសហៃទី

2023/09/28 10:16:02 am        115
Facebook Telegram Linkin
ហៃទី៖ ប្រមុខអង្គការសហប្រជាជាតិ បានព្រមាននៅក្នុងរបាយការណ៍មួយកាលពីថ្ងៃពុធថា ប្រទេសហៃទីដែលញាំញីដោយក្រុមជនអន្ធពាលកំពុងធ្លាក់ចូលក្នុងការបង្ហូរឈាម និងភាពគ្មានច្បាប់ទម្លាប់ ដោយជំរុញឲ្យសហគមន៍អន្តរជាតិផ្តល់ជំនួយផ្នែកសន្តិសុខ និងហិរញ្ញវត្ថុដល់ប្រទេសការ៉ាអ៊ីបដែលកំពុងមានបញ្ហានេះ។ក្រុមជនអន្ធពាលដ៏ឃោរឃៅ កំពុងរឹតបន្តឹងការក្តាប់របស់ពួកគេលើប្រទេសហៃទី ដោយមានក្រុមបាញ់ស៊ីប បាញ់ដោយមិនរើសមុខពីលើដំបូលផ្ទះ ហើយមនុស្ស ត្រូវបានដុតទាំងរស់ ដែលជំរុញឲ្យក្រុមប្រជាការពារ ឆ្លើយតបដោយអំពើហិង្សាកាន់តែច្រើនឡើង។លោកអគ្គលេខាធិការUN លោក អង់តូនីញ៉ូ ហ្គុយតឺរេស ( Antonio Guterres) បាននិយាយនៅក្នុងរបាយការណ៍មួយ ដែលបានចេញផ្សាយកាលពីថ្ងៃពុធថា៖«អំពើហិង្សាទាក់ទងនឹងក្រុមជនអន្ធពាល បានបន្តកើនឡើងក្នុងកម្រិតខ្លាំង និងឃោរឃៅ ដោយក្រុមជនអន្ធពាលបានពង្រីកការគ្រប់គ្រងរបស់ពួកគេ នៅក្នុង និងក្រៅទីក្រុងព័រអូប្រាំង»។លោកបានបន្ថែមថា៖«អំពើហិង្សាផ្លូវភេទ រួមទាំងការរំលោភរួម បន្តត្រូវបានប្រើប្រាស់ដោយក្រុមជនអន្ធពាល ដើម្បីបំភិតបំភ័យប្រជាជន ដែលស្ថិតនៅក្រោមការគ្រប់គ្រងរបស់ក្រុមជនអន្ធពាលដែលជាគូប្រជែងរបស់ពួកគេ»។របាយការណ៍នេះ កើតឡើង នៅពេលដែលសមាជិកនៃក្រុមប្រឹក្សាសន្តិសុខUN ពិភាក្សាអំពីអាណត្តិនៃបេសកកម្មសន្តិសុខអន្តរជាតិ ដែលត្រូវបានស្នើសុំដោយអាជ្ញាធរហៃទី ដើម្បីគាំទ្រដល់កងកម្លាំងនគរបាល ដែលមានថវិកាមិនគ្រប់គ្រាន់ និងមានបុគ្គលិកតិច ដែលនឹងត្រូវដឹកនាំដោយប្រទេសកេនយ៉ា៕

មនុស្ស៤៣.០០០នាក់ ដែលត្រូវបានចោទប្រកាន់ពាក់ព័ន្ធនឹងក្រុមជនអន្ធពាលនៅតែមានសេរីភាពនៅអែលសាលវ៉ាឌ័រ

2023/09/28 10:13:48 am        142
Facebook Telegram Linkin
អែលសាលវ៉ាឌ័រ៖ យោងតាមឯកសារស៊ើបអង្កេតដែលគួឲ្យទុកចិត្ត មកពីនគរបាលស៊ីវិលជាតិប្រទេសអែលសាលវ៉ាឌ័រ បានឲ្យដឹងថា នគរបាលនៅក្នុងប្រទេសអែលសាលវ៉ាឌ័រ ជឿថាមនុស្សជិត៤៣.០០០នាក់ តាមដែលត្រូវបានចោទប្រកាន់ថាជាប់ពាក់ព័ន្ធជាមួយក្រុមជនអន្ធពាល មិនទាន់ត្រូវបានឃុំខ្លួននៅឡើយ។ ឯកសារដែលមាន១៩ទំព័រត្រូវបានរាយការណ៍ដំបូងដោយអង្គភាពឧក្រិដ្ឋកម្ម អ៊ីនសាយ ក្រែម(InSight Crime) និងទទួលបានដោយឯករាជ្យដោយសារព័ត៌មានរ៉យទ័រ ហើយភាពជឿជាក់ត្រូវបានបញ្ជាក់ដោយនគរបាលមានកាលបរិច្ឆេទថ្ងៃទី១ ខែកញ្ញា ឆ្នាំ២០២៣ និងមានចំណងជើងថា « រដ្ឋនៃជនអន្ធពាល ក្នុងបរិបទនៃរដ្ឋលើកលែង»។ ទោះជាយ៉ាងណា អង្គការសិទ្ធមនុស្សនិយាយថា របាយការណ៍នេះ បានលើកឡើងជាសំនួរជាច្រើន អំពីថាតើរដ្ឋាភិបាលមានផែនការរយៈពេលយូរប៉ុណ្ណាដើម្បីបង្ក្រាបលើជនអន្ធពាល បន្ទាប់ពីរយៈពេល១ឆ្នាំកន្លះនៃវិធានការលើកលែង ដែលត្រូវបានដាក់ដោយរដ្ឋាភិបាលរបស់ប្រធានាធិបតីលោក Nayib Bukele ។ រដ្ឋនៃការលើកលែង មានប្រជាប្រីយភាពខ្លាំងក្នុងចំណោមពលរដ្ឋអែលសាលវ៉ាឌ័រ ដែលត្រូវបានរួមរឹតជាច្រើនទសវត្សរ៍មកហើយដោយអំពើហិង្សារបស់ក្រុមជនអន្ធពាល ហើយអ្នកគាំទ្រការបង្ក្រាប ចង្អុលបង្ហាញចំពោះការធ្លាក់ចុះខ្លាំងក្នុងករណីឃាតកម្ម និងឧក្រិដ្ឋកម្ម ដូចជា ការគំរាមទាប្រាក់ និងការជួញដូរគ្រឿងញៀន។

គុយបា និងរុស្ស៊ី កំពុងធ្វើការរួមគ្នាលើករណីជួញដូរពលរដ្ឋគុយបាឲ្យទៅធ្វើជាទាហានរុស្ស៊ី

2023/09/28 10:11:30 am        127
Facebook Telegram Linkin
រុស្ស៊ី៖ ឯកអគ្គរដ្ឋទូតរុស្ស៊ីប្រចាំប្រទេសគុយបា បានប្រាប់អ្នកសារព័ត៌មានកាលពីថ្ងៃពុធ (២៧ កញ្ញា) ថា ប្រទេសគុយបា និងរុស្ស៊ី កំពុងធ្វើការរួមគ្នាលើករណីដែលពលរដ្ឋគុយបាត្រូវបានជ្រើសរើសឱ្យចូលប្រយុទ្ធក្នុងយោធារុស្ស៊ី។នៅដើមខែនេះ រដ្ឋាភិបាលគុយបាបាននិយាយថា បុរសវ័យក្មេងជនជាតិគុយបាជាច្រើន បានចុះឈ្មោះក្នុងជួរយោធារបស់វិមានក្រឹមឡាំងក្នុងរយៈពេលប៉ុន្មានខែថ្មីៗនេះ ក្នុងនាមជាទាហានស៊ីឈ្នួល និងជាជនរងគ្រោះក្នុងគម្រោងការជួញដូរមនុស្ស ដែលត្រូវបានចោទប្រកាន់ ស្របពេលសង្គ្រាមកំពុងបន្តនៅអ៊ុយក្រែន។ឯកអគ្គរដ្ឋទូតរុស្ស៊ី លោក Víctor Koronelli បាននិយាយនៅក្នុងការអត្ថាធិប្បាយជាសាធារណៈលើកដំបូងលើបញ្ហានេះថា ភាគីរុស្ស៊ី និងគុយបា កំពុងទាក់ទងគ្នាក្នុងរឿងនេះ។ ការអត្ថាធិប្បាយរបស់លោក Koronelli កាលពីថ្ងៃពុធ បានកើតឡើងក្នុងពិធីមួយ ដែលបង្ហាញពីការបរិច្ចាគប្រេងបន្លែចំនួន៦៥០តោន មានតម្លៃ៣លានដុល្លារ ដែលជាអំណោយមួយក្នុងចំណោមអំណោយជាបន្តបន្ទាប់ រាប់ចាប់ពីស្រូវសាលី រហូតដល់ការផ្គត់ផ្គង់ផ្នែកវេជ្ជសាស្រ្ត ដែលបានផ្តល់ដល់ប្រទេសគុយបានាពេលថ្មីៗនេះ ដោយសម្ព័ន្ធមិត្តរុស្ស៊ីរបស់ខ្លួន៕

បណ្ដាញសង្គម

ព័ត៌មានថ្មីៗ

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា
06/01/2026 08:06 PM
Facebook Telegram Linkin
ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ
06/01/2026 08:06 PM
Facebook Telegram Linkin
កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី
06/01/2026 08:06 PM
Facebook Telegram Linkin
EU ជំរុញឲ្យ​អ៊ីស្រាអែលឈប់​បង្កើន​ភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត
06/01/2026 08:06 PM
Facebook Telegram Linkin
មន្ត្រី៖ ក្រុម​ហាម៉ាសនឹងធ្វើកិច្ចពិភាក្សា​ជាមួយអន្តរការី​តំបន់​ហ្កាហ្សា នៅអេហ្ស៊ីប
06/01/2026 08:06 PM
Facebook Telegram Linkin
កម្អែហូរចេញពីមាត់ភ្នំភ្លើង Kilauea របស់រដ្ឋហាវ៉ៃ ខណៈការកម្រើកត្រូវបានគេរំពឹងថានឹងកើនឡើង
06/01/2026 07:06 PM
Facebook Telegram Linkin
កិច្ចព្រមព្រៀងពាណិជ្ជកម្មឥណ្ឌា-អាមេរិក ឆ្លុះបញ្ចាំងពីការផ្លាស់ប្តូរពន្ធរបស់ទីក្រុងវ៉ាស៊ីនតោន
06/01/2026 07:06 PM
Facebook Telegram Linkin
អ៊ីស្រាអែល៖ «គ្មានភាពស្ងប់ស្ងាត់ នៅទីក្រុងបេរូត» ទេ បើ​ក្រុមហេសបូឡាមិន​បញ្ឈប់ការវាយប្រហារ
06/01/2026 07:06 PM
Facebook Telegram Linkin
វិមានក្រឹមឡាំង៖ អាជ្ញាធរកំពុងធ្វើការដោះស្រាយបញ្ហាបែងចែកប្រេងនៅតំបន់គ្រីមៀ
06/01/2026 07:06 PM
Facebook Telegram Linkin
ពលរដ្ឋជម្លៀសខ្លួនចេញពីតំបន់ជាយក្រុងភាគខាងត្បូងទីក្រុងបេរូត ក្រោយលោក Netanyahu បញ្ជាឲ្យវាយប្រហារក្រុមហេសបូឡា
06/01/2026 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.