នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធាន​ក្រុមការងារ​ចុះមូលដ្ឋាន ប្រកាស​បញ្ចូលសមាជិកថ្មី​​គណបក្សប្រជាជនកម្ពុជាចំនួន ៦៩០០នាក់ ក្នុងស្រុកប្រាសាទបល្ល័ង្ក ខេត្តកំពង់ធំ
សម្ដេច​តេជោ៖ការពង្រឹងខឿនការពារជាតិមិនសំដៅតែនៅសមរភូមិមុខទេ ត្រូវយកចិត្តទុកដាក់ទំនុកបម្រុងអ្នកសមរភូមិក្រោយជាគ្រួសារយុទ្ធជនជួរមុខ និងអតីតយុទ្ធជន
ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី
ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ​ និង ការអភិវឌ្ឍន៍

នាយករដ្ឋមន្ត្រីអ៊ីស្រាអែលប្តេជ្ញាផ្ទេរមូលនិធិសម្រាប់ពលរដ្ឋអារ៉ាប់

2023/08/10 02:37:29 pm        298
Facebook Telegram Linkin
អ៊ីស្រាអែល៖ នាយករដ្ឋមន្ត្រីអ៊ីស្រាអែល លោក បេចាមីន នេតានីយ៉ាហ៊ូ (Benjamin Netanyahu) បាននិយាយកាលពីថ្ងៃពុធថា មូលនិធិសាធារណៈសម្រាប់បណ្តាទីក្រុងអារ៉ាប់ នឹងត្រូវប្រើប្រាស់សម្រាប់គោលបំណងដែលបានកំណត់ក្នុងការបម្រើដល់ពលរដ្ឋអារ៉ាប់ បន្ទាប់ពីការវាយតម្លៃ និងការត្រួតពិនិត្យ មួយថ្ងៃបន្ទាប់ពីការប្រកាសរបស់រដ្ឋមន្ត្រីទទួលបន្ទុកទីស្តីគណៈរដ្ឋមន្ត្រី ដើម្បីបញ្ឈប់ពួកគេពីការរិះគន់។លោកនេតានីយ៉ាហ៊ូ ត្រូវបានគេដកស្រង់សម្តី ដោយនិយាយក្នុងសេចក្តីថ្លែងការណ៍ដែលចេញផ្សាយដោយការិយាល័យរបស់លោកថា៖«ពលរដ្ឋអារ៉ាប់របស់អ៊ីស្រាអែល សមនឹងទទួលបាននូវអ្វីដែលពលរដ្ឋទាំងអស់សមនឹងទទួលបាន ហើយខ្ញុំបានប្តេជ្ញាចិត្តចំពោះរឿងនេះ»។រដ្ឋមន្ត្រីក្រសួងហិរញ្ញវត្ថុអ៊ីស្រាអែល លោក បេហ្សាឡែល ស្មូទ្រិច( Bezalel Smotrich) បាននិយាយកាលពីថ្ងៃអង្គារថា លោកបានបង្កកមូលនិធិសម្រាប់បណ្តាក្រុងអារ៉ាប់ក្នុងប្រទេសអ៊ីស្រាអែល និងកម្មវិធីអប់រំឧត្តមសិក្សារបស់ប៉ាឡេស្ទីន នៅទីក្រុងហ្ស៊េរុយសាឡឹមខាងកើត ដោយផ្អែកលើមូលដ្ឋានដែលពួកគេអាចផ្តល់អត្ថប្រយោជន៍ធំធេងដល់ «អង្គការឧក្រិដ្ឋកម្ម» នៅក្នុងសហគមន៍អារ៉ាប់។ការសម្រេចចិត្តនេះពាក់ព័ន្ធនឹងទឹកប្រាក់ចំនួន ២០០លានសេកែល (ប្រហែល ៥៣,៨១លានដុល្លារអាមេរិក) ដែលនឹងមានក្នុងទម្រង់ជាអាហារូបករណ៍សម្រាប់អ្នកស្រុកប៉ាឡេស្ទីន ដែលមានចំណូលទាបនៅក្រុងហ្ស៊េរុយសាឡិម ខាងកើត ដើម្បីចុះឈ្មោះចូលរៀនថ្នាក់ត្រៀមនៅសាកលវិទ្យាល័យ Hebrew ក្នុងក្រុងហ្ស៊េរុយសាឡិម និងមហាវិទ្យាល័យពីរផ្សេងទៀតនៅក្នុងទីក្រុងនេះ៕

និស្សិតសាកលវិទ្យាល័យកូរ៉េខាងត្បូង តវ៉ាផែនការបង្ហូរសំណល់ទឹកហ្វូគូស៊ីម៉ារបស់ជប៉ុន

2023/08/10 02:29:45 pm        310
Facebook Telegram Linkin
ជប៉ុន៖ និស្សិតសាកលវិទ្យាល័យកូរ៉េខាងត្បូងមួយក្រុម បានប្រមូលផ្តុំគ្នានៅទីក្រុងតូក្យូ កាលពីថ្ងៃពុធ ដើម្បីតវ៉ាចំពោះផែនការរបស់ប្រទេសជប៉ុនក្នុងការបង្ហូរទឹកសំណល់មានជាតិនុយក្លេអ៊ែរចេញពីរោងចក្រថាមពល ហ្វ៊ូគូស៊ីម៉ា ដែលរងការខូចខាតពីការរញ្ជួយដី ចូលទៅក្នុងសមុទ្រ។កាលពីរសៀលថ្ងៃពុធ និស្សិតចំនួន២៤នាក់បានប្រមូលផ្តុំគ្នានៅខាងក្រៅក្រសួងសេដ្ឋកិច្ច ពាណិជ្ជកម្ម និងឧស្សាហកម្មរបស់ប្រទេសជប៉ុន ដោយកាន់ស្លាកសញ្ញា និងបដា ខណៈកំពុងស្រែកពាក្យស្លោកដើម្បីរិះគន់ផែនការបង្ហូរទឹក ដែលជិតមកដល់នេះ។ពលរដ្ឋទីក្រុងតូក្យូ ប្រហែល២០នាក់ក៏បានចូលរួមការតវ៉ានេះផងដែរ ដើម្បីសម្តែងការគាំទ្ររបស់ពួកគេចំពោះនិស្សិតកូរ៉េខាងត្បូងមួយក្រុមនោះ។ ពួកគេបាននិយាយថា រដ្ឋាភិបាលជប៉ុន និងក្រុមហ៊ុនថាមពលអគ្គិសនីតូក្យូ បានជ្រើសយកការគណនាសេដ្ឋកិច្ចដោយមិនគិតពីសុវត្ថិភាពប្រជាជន ហើយកម្រិតសុវត្ថិភាពនៃផែនការបង្ហូរទឹកនេះមិនមានភាពជឿជាក់ច្បាស់លាស់នោះទេ។ស្របពេលមានការរិះគន់យ៉ាងទូលំទូលាយនៅក្នុងប្រទេស និងក្រៅប្រទេស រដ្ឋាភិបាលជប៉ុនបាននិងកំពុងជំរុញឱ្យមានការបង្ហូរទឹកសំណល់មានមេរោគនុយក្លេអ៊ែរនៅរដូវក្តៅនេះ ពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដៃអ៊ីឈី ដែលបានរងគ្រោះដោយការរញ្ជួយដីដ៏ធំ និងរលកយក្សស៊ូណាមិកាលពីខែមីនា ឆ្នាំ២០១១ ផងដែរ៕

អ្នកនេសាទប្រទេសប៉េរូជួបការលំបាក ខណៈបញ្ហាអាកាសធាតុជះឥទ្ធិពលដល់ការនេសាទ

2023/08/10 02:27:10 pm        780
Facebook Telegram Linkin
ប៉េរូ៖ ក្រុមអ្នកនេសាទនៅតាមបណ្តោយឆ្នេរសមុទ្រភាគខាងត្បូងនៃប្រទេសប៉េរូ កំពុងជួបផលលំបាកបន្ទាប់ពីបានឃើញផលនេសាទរបស់ពួកគេធ្លាក់ចុះយ៉ាងខ្លាំងក្នុងរយៈពេលប៉ុន្មានខែថ្មីៗនេះ ដោយសារផលប៉ះពាល់អាកាសធាតុ ដែលនាំមកដោយបាតុភូតអាកាសធាតុ អ៊ែលនីញ៉ូ។ ក្រោមលក្ខខណ្ឌអាកាសធាតុខុសពីធម្មតាក្នុងរយៈពេលបីខែកន្លងមកនេះ ផលនេសាទពីសមុទ្រនៅឆ្នេររបស់ប្រទេសនេះ បានធ្លាក់ចុះជាង ៣០ភាគរយបើធៀបនឹងរយៈពេលដូចគ្នាកាលពីឆ្នាំមុន។សីតុណ្ហភាពសមុទ្រក្តៅខ្លាំងជាងឆ្នាំមុនៗ ដែលបណ្តាលឱ្យត្រីធ្វើបម្លាស់ទីទៅកាន់ទឹកជ្រៅឆ្ងាយពីច្រាំង។ រលកសមុទ្រធំៗ និងថ្ម ជារឿយៗនាំឲ្យមានការផ្អាកប្រតិបត្តិការសមុទ្រ។ សីតុណ្ហភាពលើផ្ទៃទឹកសមុទ្រកាន់តែខ្ពស់ បានកាត់បន្ថយបរិមាណត្រីមួយចំនួន ដែលជាធម្មតារស់នៅក្នុងតំបន់នោះ និងនៅឆ្នេរសមុទ្រ ដើម្បីស្វែងរកលក្ខខណ្ឌសីតុណ្ហភាពល្អប្រសើរជាងមុន។នោះអាចមានន័យថា ការនេសាទត្រីរបស់ក្រុមហ៊ុននេសាទធំៗ ដែលមាននាវានេសាទធំៗមានការកើនឡើង ប៉ុន្តែអាចបង្កការគំរាមកំហែងដល់ជីវភាពរបស់អ្នកនេសាទខ្នាតតូច ដែលប្រកបមុខរបរដោយខ្លួនឯងនៅក្នុងភូមិឆ្នេរសមុទ្ររបស់ប្រទេសនេះ។ ជាលទ្ធផល គឺមានតែប្រជាជនប្រកបរបរនេសាទតូចតាចប៉ុណ្ណោះ ដែលទទួលរងឥទ្ធិពលពីបម្រែបម្រួលអាកាសធាតុ៕

ប្រជាជនអេក្វាឌ័រតវ៉ាទាំងកំហឹងនៅខាងក្រៅគ្លីនិក បន្ទាប់ពីបេក្ខជនប្រធានាធិបតីត្រូវបានសម្លាប់

2023/08/10 02:24:37 pm        333
Facebook Telegram Linkin
អេក្វាឌ័រ៖ ប្រជាជនអេក្វាឌ័រ បានតវ៉ាទាំងកំហឹងនៅខាងក្រៅគ្លីនិក ជាទីដែលបេក្ខជនប្រធានាធិបតីអេក្វាឌ័រ លោក Fernando Villavicencio បានស្លាប់កាលពីថ្ងៃពុធ (៩ សីហា) បន្ទាប់ពីត្រូវបានបាញ់ប្រហារនៅក្នុងការជួបជុំយុទ្ធនាការបោះឆ្នោតមួយក្នុងទីក្រុងគីតូ។ ប្រព័ន្ធផ្សព្វផ្សាយក្នុងស្រុកបានរាយការណ៍ថា ការបាញ់ប្រហារប្រហែល៣០គ្រាប់បានកើតឡើង ខណៈវីដេអូដែលបានបង្ហោះនៅលើប្រព័ន្ធផ្សព្វផ្សាយសង្គមបង្ហាញថា លោក Villavicencio ព្យាយាមចូលទៅក្នុងរថយន្តបន្ទាប់ពីព្រឹត្តិការណ៍នេះ នៅមុនពេលមានសំឡេងកាំភ្លើង និងសម្រែកកើតឡើង។ការិយាល័យអគ្គមេធាវីបាននិយាយថា ក្រោយមកមានជនសង្ស័យម្នាក់ក្នុងឧក្រិដ្ឋកម្មនោះបានស្លាប់ដោយសាររបួស នៅក្នុងការបាញ់ប្រហារ។ អំពើហិង្សានេះបានធ្វើឲ្យមនុស្ស៩នាក់ផ្សេងទៀតរងរបួស ដែលក្នុងនោះមានបេក្ខជនតំណាងរាស្រ្តម្នាក់ និងមន្ត្រីនគរបាលពីរនាក់។រដ្ឋាភិបាលរបស់លោកប្រធានាធិបតី Guillermo Lasso បានទម្លាក់កំហុសលើកំណើននៃអំពើហឹង្សានៅតាមដងផ្លូវ និងនៅក្នុងពន្ធនាគារ ពាក់ព័ន្ធនឹងជម្លោះផ្ទៃក្នុងរបស់ក្រុមឧក្រិដ្ឋជន ក្នុងការដណ្តើមគ្រប់គ្រងច្រករត់ពន្ធ ដែលប្រើប្រាស់ដោយក្រុមជួញដូរម៉ិកស៊ិក ក្រុមម៉ាហ្វីយ៉ា អាល់បានី និងក្រុមឧក្រិដ្ឋជនដទៃទៀតក្នុងការដឹកជញ្ចូនគ្រឿងញៀន។ លោកបាននិយាយថា លោកនឹងទទួលក្រុមមន្ត្រីសន្តិសុខជាន់ខ្ពស់នៅឯកិច្ចប្រជុំបន្ទាន់មួយ។លោក Villavicencio អតីតអ្នកសហជីព និងអ្នកកាសែត គឺជាអ្នករិះគន់ដោយឥតសំចៃមាត់អំពើពុករលួយ និងឧក្រិដ្ឋកម្មដែលមានអង្គការចាត់តាំង ហើយបានសន្យាថានឹងប្រយុទ្ធប្រឆាំងអំពើពុករលួយ ព្រមទាំងកាត់បន្ថយការគេចពន្ធផងដែរ ប្រសិនបើលោកជាប់ឆ្នោត៕

ភាពជាប់គាំងនយោបាយចេះតែអូសបន្លាយរបស់ប្រទេសថៃ ធ្វើឲ្យប៉ះពាល់ដល់សេដ្ឋកិច្ច

2023/08/10 02:21:59 pm        311
Facebook Telegram Linkin
ថៃ៖ រយៈពេលជិត៣ខែបន្ទាប់ពីការបោះឆ្នោតសកលនៅថ្ងៃទី១៤ ខែឧសភា អនាគតនយោបាយមិនច្បាស់លាស់របស់ប្រទេសថៃ បានដាក់សម្ពាធលើសេដ្ឋកិច្ច ដែលទំនងជាពន្យារការចំណាយរបស់រដ្ឋាភិបាល ដែលជាគន្លឹះក្នុងការងើបឡើងរបស់ប្រទេសនេះក្រោយការរាតត្បាតនៃជំងឺឆ្លងកូវីដ១៩។វិស័យធុរកិច្ចបានលើកឡើងពីក្តីបារម្ភអំពីល្បឿនដ៏យឺតនៃការបង្កើតរដ្ឋាភិបាលថ្មី និងការជ្រើសរើសនាយករដ្ឋមន្ត្រី ដែលបង្កឱ្យមានក្តីបារម្ភថា ភាពជាប់គាំងនយោបាយអាចបង្អាក់ទំនុកចិត្តក្នុងចំណោមវិនិយោគិនបរទេស ខណៈដែលសេដ្ឋកិច្ចត្រូវការការវិនិយោគផ្ទាល់ពីបរទេសបន្ថែមទៀត។នាយកធនាគារពិភពលោកប្រចាំប្រទេសថៃ លោក Fabrizio Zarcone ហាក់ដូចជាយល់ស្របលើការលើកឡើងនោះ ដោយបាននិយាយនៅក្នុងសិក្ខាសាលាមួយកាលពីថ្ងៃអង្គារនៅទីក្រុងបាងកកថា បញ្ហានយោបាយដែលអូសបន្លាយនេះ ត្រូវបានគេរំពឹងថានឹងមានផលប៉ះពាល់អវិជ្ជមានដល់សេដ្ឋកិច្ច។នៅក្នុងឆមាសទីមួយនៃឆ្នាំ២០២៣នេះ ប្រទេសថៃបានទាក់ទាញការវិនិយោគផ្ទាល់ពីបរទេសចំនួន ៣៦៤ពាន់លានបាត (១០,៤ពាន់លានដុល្លារ) ពីគម្រោងចំនួន៨៩១គម្រោង នេះបើយោងតាមក្រុមប្រឹក្សាវិនិយោគ ជាទីភ្នាក់ងាររដ្ឋាភិបាលដែលមានភារកិច្ចទាក់ទាញអាជីវកម្មបរទេស។ តួលេខនោះនៅតែទាបជាងគោលដៅចំនួន៥០០ពាន់លានបាតសម្រាប់ឆ្នាំ២០២៣ទាំងមូល ជាពិសេសសម្រាប់ការវិនិយោគក្នុងបណ្ដាឧស្សាហកម្មដូចជាថ្នាំពេទ្យ គ្រឿងយន្ត និងរថយន្តអគ្គិសនីជាដើម៕

មន្ទីរទេសចរណ៍រាជធានីភ្នំពេញសហការជំរុញបុគ្គលបម្រើការក្រៅប្រព័ន្ធក្នុងវិស័យទេសចរណ៍ធ្វើបណ្ណសមធម៌

2023/08/10 02:20:56 pm        344
Facebook Telegram Linkin
ភ្នំពេញ៖ ​ រដ្ឋបាលរាជធានីភ្នំពេញ ដែលមានមន្ទីរទេសចរណ៍ និងមន្ទីរផែនការ ជាសេនាធិការ នៅថ្ងៃទី១១ ខែសីហា ស្អែកនេះ នឹងសហការអនុវត្តយុទ្ធនាការសម្ភាសន៍ផ្តល់បណ្តសមធម៌ ជូនបុគ្គលបម្រើ នៅតាមមណ្ឌលសេវាកម្សាន្តទេសចរណ៍ ផ្នែកសេដ្ឋកិច្ចក្រៅប្រព័ន្ធ ដែលនៅតែមិនទាន់ទទួលបានបណ្ណសមធម៌ ហើយក្នុងយុទ្ធនាការសម្ភាសន៍ក៏អមដោយការស្ម័គ្រចិត្តធ្វើតេស្តរកមេរោគអេដស៍នេះ នឹងធ្វើឡើងនៅរមណីយដ្ឋានវត្តភ្នំ។បើតាមលោកស្រី ហង្ស ស័ក្តរ៉ូហ្សា អនុប្រធានមន្ទីរទេសចរណ៍រាជធានីភ្នំពេញ បានថ្លែងប្រាប់BTVនៅថ្ងៃទី១០ខែ សីហានេះ ថា នៅពេលនេះ មន្ទីរទេសចរណ៍រាជធានីភ្នំពេញ បានត្រៀមរួចរាល់ បង្កើនកិច្ចសហការជាមួយមន្ទីរផែនការនៃក្រសួងផែនការ ចុះក្រើនរំលឹក និងណែនាំឲ្យបុគ្គលបម្រើការងារសេដ្ឋកិច្ចក្រៅប្រព័ន្ធ ក្នុងវិស័យទេសចរណ៍ ដែលមិនទាន់ទទួលបានបណ្ណសមធម៌ ឬបណ្ណមូលនិធិសមធម៌សុខាភិបាល អញ្ជើញទៅផ្តល់ការសម្ភាសន៍ជាមន្ត្រីនៃក្រសួងផែនការ ដែលនឹងចាប់ផ្តើមអនុសាកល្បង២សង្កាត់មុនគេ នៅក្នុងខណ្ឌដូនពេញ នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ ដើម្បីទទួលបានបណ្ណសមធម៌ ដើម្បីទទួលបានការថែទាំ ការពិនិត្យ និងព្យាបាលជំងឺនៅតាមមូលដ្ឋានសុខាភិបាលឥតគិតថ្លៃ។លោកស្រី បន្តថា ការធ្វើបណ្ណមូលនីធិសមធម៌ ឬហៅ (ម.ស.ស ) ចេញដោយបេឡាជាតិសន្តិសុខសង្គម គឺមានរបៀបធ្វើខុសពីការធ្វើបណ្ណសមធម៌ដែលចេញដោយក្រសួងផែនការផ្តល់ជូនតែលើគ្រួសារក្រីក្រ ហើយបុគ្គលបម្រើការងារសេដ្ឋកិច្ចក្រៅប្រព័ន្ធ ក្នុងវិស័យទេសចរណ៍ គឺអាចមានជម្រើសពីរ ក្នុងការធ្វើបណ្ណទាំងនេះ ដើម្បីទទួលបានបណ្ណសមធម៌ ដើម្បីទទួលបានការថែទាំ ការពិនិត្យ និងព្យាបាលជំងឺនៅតាមមូលដ្ឋានសុខាភិបាលឥតគិតថ្លៃ។យ៉ាងណាក៏ដោយ តាមរបាយការណ៍របស់ឯកឧត្តម ហេង សុផាន់ណារិទ្ធ អ្នកនាំពាក្យបេឡាជាតិសន្តិសុខសង្គម បានឲ្យដឹងថា គិតត្រឹមថ្ងៃទី៩ ខែសីហា ឆ្នាំ២០២៣ បុគ្គលិកសេវាកម្សាន្តទេសចរណ៍ នៃសេដ្ឋកិច្ចក្រៅប្រព័ន្ធ ចំនួន2 693នាក់ក្នុងនោះ ស្រី1 306 នាក់ ទទួលបានបណ្ណមូលនិធិសមធម៌សុខាភិបាលរួចរាល់៕  អត្ថបទ ស៊ុម សុខជា

តម្រូវការឈាមកើនឡើងក្នុងរដូវជំងឺគ្រុនឈាម មន្ទីរពេទ្យគន្ធបុប្ផាអំពាវនាវឱ្យពលរដ្ឋជួយបរិច្ចាគ

2023/08/10 02:08:10 pm        402
Facebook Telegram Linkin
ភ្នំពេញ៖ ខណៈតម្រូវការឈាមកំពុងកើនឡើងក្នុងរដូវកាលជំងឺគ្រុនឈាម មន្ទីរពេទ្យគន្ធបុប្ផា បានអំពាវនាវដល់ប្រជាពលរដ្ឋឱ្យចូលរួមបរិច្ចាគឈាម ​ដើម្បីជួយសង្គ្រោះកុមារពីជំងឺគ្រុនឈាម ។មានប្រសាសន៍ប្រាប់BTV នៅថ្ងៃទី១០ខែសីហានេះ ​លោកវេជ្ជបណ្ឌិតឯកទេសកុមារ តឹត លីវណ្ណារ៉ា អនុប្រធានមន្ទីរពេទ្យគន្ធបុប្ផាភ្នំពេញ ​បានឱ្យដឹងថា ចាប់ពីខែឧសភាឆ្នាំនេះ រហូតមកដល់បច្ចុប្បន្ន តំរូវការឈាមកើនឡើងខ្លាំង ​ដែលជាមធ្យមមន្ទីរពេទ្យត្រូវប្រើអស់ ៩០ប្លោកក្នុងមួយថ្ងៃ។ការកើនឡើងនេះ ដោយសារមានការកើនឡើងច្រើននូវជំងឺគ្រុនឈាមធ្ងន់ៗ ដែលករណីខ្លះ​ត្រូវការ​បញ្ចូលឈាម និងប្លាស្មារពី១០ទៅ១៥ប្លោក។ក្រៅពីនេះ ក៏​មានករណីវៈកាត់ទូទៅ វៈកាត់បេះដូង ជំងឺមហារីកឈាម ​សម្រាលកូនដោយវៈកាត់ ​និងស្រ្តីឆ្លងទន្លេ​មាន​បញ្ហា​ធ្លាក់​ឈាម​ធ្ងន់ធ្ងរ និង​ករណីគ្រោះថ្នាក់ចរាចរណ៍ធ្ញន់ៗជាដើម។លោកវេជ្ជបណ្ឌិតបន្តថា ដោយសារតម្រូវការឈាមមានការកើនឡើងខ្លាំង​ក្នុងការប្រើប្រាស់ជួយ​សង្គ្រោះ​អាយុជីវិតកុមារ ​និងស្រ្តីមានផ្ទៃពោះដែលត្រូវការឈាម ​ជាមធ្យម៨០ទៅ៩០ប្លោកក្នុង​មួយថ្ងៃ ​ហើយចំនួនអ្នកបរិច្ចាគឈាមមានការថយចុះ ដែលធ្វើអោយស្តុកឈាមក្នុង​មន្ទីពេទ្យ​គន្ធបុប្ផាមានការថយចុះ ​ដូច្នេះខ្ញុំសូមធ្វើការអំពាវនាវដល់ប្រជាពលរដ្ឋទាំងអស់​ ជាពិសេសយុវជន ចូលរួម​បរិច្ចាគឈាមឱ្យមន្ទីរពេទ្យគន្ធបុប្ផា​ ដើម្បីឱ្យមន្ទីរពេទ្យមានស្តុកឈាមគ្រប់គ្រាន់ ដើម្បីជួយសង្គ្រោះអ្នកជំងឺ។ពលរដ្ឋបានឡើងដែរថា​ ការចូលរួមបរិច្ចាគឈាមនៅពេលនេះ គឺដើម្បីជួយសង្គ្រោះអាយុជីវិត​អ្នកជំងឺ​ត្រូវការឈាមជាចំបាច់ ​ហើយបន្ទាប់ពី​បរិច្ចាគឈាម​រួច​សុខភាព​ធម្មតា​មិនបង្កផលបះពាល់​អ្វីនោះទេ។ ជាមួយគ្នានេះ ​អ្នកមើលថែអ្នកជំងឺនៅមន្ទីរពេទ្យគន្ធបុប្ផា បានថ្លែងអំណរ​គុណ​ដល់មន្ទីពេទ្យ ​ដែលបានយកចិត្តទុកមើលថែ ​និងព្យាលបាល​ ក្នុងពេល​សាច់ញាតិ​សម្រាកនៅ​មន្ទីពេទ្យផងដែរ។ក្នុងរយៈពេល៦ខែ ឆ្នាំ២០២៣នេះ ​កម្ពុជាមានអ្នកឆ្លងជំងឺគ្រុនឈាមប្រមាណជាង ​៤៦០០ករណី ក្នុងនោះ​ស្លាប់ករណីកើនឡើងជិត២ដង​ បើប្រៀបធៀបទៅនឹងរយៈពេល​៦ខែដូចគ្នា កាល​ពីឆ្នាំ​២០២២។ រាជធានីខេត្តដែលមានករណីជំងឺគ្រុនឈាម​កើតច្រើននោះរួមមាន៖ ​រាជធានី​ភ្នំពេញ កណ្តាល ​កំពង់ស្ពឺ ពោធិ៍សាត់ ត្បូងឃ្មុំ កំពង់ឆ្នាំង សៀមរាប ​បន្ទាយមានជ័យ ​និងខេត្តតាកែវ។ នេះបើតាមរបាយការណ៍របស់ក្រសួងសុខាភិបាល៕ អត្ថបទ៖ទូច សោភ័ណ

Assad បានទម្លាក់កំហុសលើអំពើភេរវនិយមដែលនាំឲ្យមានការបំផ្លិចបំផ្លាញនៅប្រទេសស៊ីរី

2023/08/10 01:47:23 pm        78
Facebook Telegram Linkin
ស៊ីរី៖ ប្រធានាធិបតីស៊ីរី លោក បាសា អាល់ អាសាដ (Bashar al-Assad) បាននិយាយកាលពីល្ងាចថ្ងៃពុធថា អំពើភេរវនិយម បានបង្កឲ្យមានការបំផ្លិចបំផ្លាញ នៅក្នុងប្រទេសស៊ីរី ដោយនិយាយថា អ្នកដែលគាំទ្រភេរវនិយម គួរតែទទួលខុសត្រូវ។ថ្លែងទៅកាន់សារព័ត៌មាន Sky News Arabia ក្នុងបទសម្ភាសន៍មួយ លោកអាសាដ បានសង្កត់ធ្ងន់លើវិសាលភាពនៃការបំផ្លិចបំផ្លាញដែលបង្កឡើងដោយអំពើភេរវកម្មនៅក្នុងប្រទេសស៊ីរី ដោយបញ្ជាក់ថា គ្មានរដ្ឋណាមួយ មានចេតនាបំផ្លាញទឹកដីកំណើតរបស់ខ្លួនទេ។ លោកបានច្រានចោលទស្សនៈដែលថាកិច្ចប្រឹងប្រែងប្រឆាំងអំពើភេរវកម្ម អាចបំផ្លាញប្រទេសនេះ។យោងតាមលោកអាសាដ ប្រសិនបើប្រទេសស៊ីរី បានធ្វើតាមការទាមទាររបស់ប្រទេសមួយចំនួន សង្គ្រាមនេះ អាចត្រូវបានរារាំង។ ទោះជាយ៉ាងណា ការធ្វើដូច្នេះ នឹងធ្វើឲ្យមហន្តរាយដល់សិទ្ធិ និងផលប្រយោជន៍របស់ប្រជាជនស៊ីរី។ទាក់ទងនឹងទំនាក់ទំនងរបស់ស៊ីរីជាមួយបណ្តាប្រទេសជាមិត្ត លោកបាននិយាយថា ការគាំទ្ររបស់ពួកគេ គឺចាំបាច់ ប៉ុន្តែបានសង្កត់ធ្ងន់ថា ភាពធន់ពិតប្រាកដ គឺស្ថិតនៅជាមួយប្រជាជនស៊ីរី៕

ប្រទេសចិនបញ្ជូននាវា និងយន្តហោះចម្បាំងជាច្រើនគ្រឿងទៅកាន់កោះតៃវ៉ាន់ ក្នុងការបង្ហាញកម្លាំងថ្មី

2023/08/10 12:38:25 pm        110
Facebook Telegram Linkin
ចិន៖ ក្រសួងការពារជាតិតៃវ៉ាន់ បាននិយាយនៅថ្ងៃព្រហស្បតិ៍នេះថា ប្រទេសចិន បានបញ្ជូននាវារបស់កងទ័ពជើងទឹក និងយន្តហោះចម្បាំងមួយក្រុមធំ ទៅកាន់កោះតៃវ៉ាន់ ដោយបន្តដាក់សម្ពាធយោធារបស់ខ្លួននៅលើកោះនេះ។ប្រទេសចិន បានអះអាងថាកោះតៃវ៉ាន់ស្វ័យគ្រប់គ្រងមួយនេះ ជាទឹកដីរបស់ខ្លួន ហើយបានបញ្ជូនយន្តហោះជាទៀងទាត់ទៅកាន់កោះនេះ ដើម្បីជាប្រតិកម្មតបរាល់សកម្មភាពនយោបាយរបស់កោះនេះ។ កាលពីឆ្នាំមុន ខ្លួន ក៏បានបញ្ជូននាវារបស់កងទ័ពជើងទឹក ក៏ដូចជាយានដ្រូន ដើម្បីឆ្វែលមើលជុំវិញដែនទឹកនៅជិតកោះនេះ។ក្រសួងការពារជាតិតៃវ៉ាន់ បានឲ្យដឹងថា កងទ័ពរំដោះប្រជាជនចិន បានបញ្ជូនយន្តហោះចម្បាំងចំនួន ៣៣គ្រឿង និងនាវាកងទ័ពជើងទឹកចំនួន៦ នៅចន្លោះម៉ោង ៦ព្រឹកថ្ងៃពុធ ដល់ម៉ោង ៦ព្រឹក ថ្ងៃព្រហស្បតិ៍នេះ។ យន្តហោះចម្បាំង J-10 និង J-16 បានហោះឆ្លងកាត់ខ្សែបន្ទាត់មេដ្យាន និងទៅភាគនិរតីនៃកោះតៃវ៉ាន់។ក្រសួងនេះ បាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធថា យោធារបស់កោះតៃវ៉ាន់ បានតាមដាននាវាចំនួន៥គ្រឿង នៅពេលពួកគេ បានធ្វើដំណើរក្នុងការសម្របសម្រួលជាមួយនឹងការហោះហើររបស់យន្តហោះចម្បាំង៕

អ្នកការទូត៖ ប្រទេសប៉ូឡូញចាប់ផ្តើមការត្រៀមលក្ខណៈផ្នែកយោធាជុំថ្មី ក្រោមលេសសិប្បនិម្មិត

2023/08/10 12:34:45 pm        105
Facebook Telegram Linkin
រុស្ស៊ី៖ អនុរដ្ឋមន្ត្រីការបរទេសរុស្ស៊ី លោក មីកហេល ហ្គាលុហ្ស៊ីន (Mikhail Galuzin) បានថ្លែងប្រាប់សារព័ត៌មាន TASS នៅថ្ងៃព្រហស្បតិ៍នេះថា ប្រទេសប៉ូឡូញ បានចាប់ផ្តើមការត្រៀមលក្ខណៈផ្នែកយោធាជុំថ្មី ដោយផ្អែកលើលេសក្លែងក្លាយ។ លោកបានថ្លែងនៅក្នុងបទសម្ភាសន៍មួយជាមួយសារព័ត៌មានTASSថា៖ ការដាក់ពង្រាយកងកម្លាំងទាហានស៊ីឈ្នួលWagner របស់ PMC [ក្រុមហ៊ុនយោធាឯកជន] នៅក្នុងសាធារណៈរដ្ឋបងប្អូនរបស់យើង គឺគ្មានអ្វីក្រៅពីលេសសិប្បនិម្មិតមួយផ្សេងទៀតសម្រាប់ទីក្រុងវ៉ាសូវី ( Warsaw) ដើម្បីចាប់ផ្តើមការត្រៀមលក្ខណៈផ្នែកយោធាជុំថ្មីនោះទេ។យោងតាមលោកហ្គាលុហ្ស៊ីន ផែនការរបស់ប៉ូឡូញ ដើម្បីពង្រឹងព្រំដែនជាមួយបេឡារុស បន្ទាប់ពីការដាក់ពង្រាយកងកម្លាំង Wagnerរបស់PMC នៅក្នុងសាធារណរដ្ឋនេះ គឺពិតជាគំរាមកំហែងដល់សន្តិសុខរបស់រដ្ឋសហភាពនេះ។អ្នកការទូតរូបនេះ បានកត់សម្គាល់ថា៖«វាមិនងាយស្រួលទេក្នុងការពិចារណាការសម្រេចចិត្តបែបនេះ ក្រៅពីគោលនយោបាយយូរអង្វែងនៃការកសាងវឌ្ឍនភាពយោធាដ៏មានសក្ដានុពលរបស់អង្គការណាតូនៅតាមបរិវេណនៃព្រំដែនភាគខាងលិចនៃរដ្ឋសហភាពនេះ និងយោធូបនីកម្មជាក់ស្តែងរបស់ប្រទេសប៉ូឡូញ រួមជាមួយនឹងគោលនយោបាយបង្កហេតុរបស់ខ្លួនទាក់ទងនឹងប្រទេសរុស្ស៊ី និងបេឡារុស»៕

បណ្ដាញសង្គម

ព័ត៌មានថ្មីៗ

ក្រសួងរតនាគារអាមេរិកចេញទណ្ឌកម្មថ្មីលើអ៊ីរ៉ង់ ដោយ​ផ្តោតលើការដោះដូរ​រូបិយប័ណ្ណគ្រីបតូ
06/03/2026 03:06 PM
Facebook Telegram Linkin
អាមេរិកសម្លឺង​ដល់​ការ​បើក​ច្រកសមុទ្រ Hormuz ដោយ​ទម្រង់ស្ងាត់ៗ ​​សម្រាប់​គម្រោង Project Freedom
06/03/2026 03:06 PM
Facebook Telegram Linkin
ក្រុមប្រដាប់អាវុធអ៊ីរ៉ាក់ចំនួន ២ ប្រកាសពីការកំណត់អាវុធឲ្យស្ថិតនៅក្រោមការគ្រប់គ្រងរបស់រដ្ឋ
06/03/2026 03:06 PM
Facebook Telegram Linkin
ឥណ្ឌាដករូបសំណាក Messi ចេញនៅទីក្រុង Kolkata ដោយសារបារម្ភពីបញ្ហាសុវត្ថិភាព
06/03/2026 03:06 PM
Facebook Telegram Linkin
បើក Soccer League នឹងរំលេចទស្សនីយភាពជាច្រើន ពិសេសការច្រៀងចម្រៀងជាតិ ដើម្បីលើកទឹកចិត្តវីរកងទ័ព និងជនភៀសសឹក
06/03/2026 02:06 PM
Facebook Telegram Linkin
សមាជិកសភា៖ អ៊ីរ៉ង់ចង់ធ្វើជាតូបនីយកម្មច្រកសមុទ្រហ័រមូស
06/03/2026 02:06 PM
Facebook Telegram Linkin
មេដឹកនាំសហគមន៍លីបង់នឹងដាក់ពាក្យប្តឹងប្រឆាំងការគាំទ្ររបស់អាមេរិកចំពោះសង្គ្រាមរបស់អ៊ីស្រាអែលនៅលីបង់
06/03/2026 02:06 PM
Facebook Telegram Linkin
អ្នកជំនាញ៖ អ៊ីរ៉ង់មានតួនាទីសំខាន់នៅក្នុងដំណើរការរំសាយអាវុធរបស់ក្រុមហេសបូឡា
06/03/2026 02:06 PM
Facebook Telegram Linkin
FIFA បើកដំណើរការមជ្ឈមណ្ឌលផ្សព្វផ្សាយអន្តរជាតិសម្រាប់ World Cup នៅក្រុង Dallas
06/03/2026 02:06 PM
Facebook Telegram Linkin
ក្រុមហ៊ុនអឺរ៉ុបជាច្រើនទទួលស្គាល់ថា មានការលំបាកក្នុងការផលិតអាវុធល្បឿនលឿនជាងសំឡេង
06/03/2026 02:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.