នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជា-មីយ៉ាន់ម៉ា បន្តពង្រឹងកិច្ចសហប្រតិបត្តិការក្នុងក្របខ័ណ្ឌទ្វេភាគី តំបន់ និងពិភពលោក
កម្ពុជា ​និង​មីយ៉ាន់ម៉ា ​ពង្រឹង​ទំនាក់ទំនង​ ​ចុះ​ហត្ថលេខា​លើ​កិច្ច​ព្រម​ព្រៀង​សេដ្ឋកិច្ច កសិកម្ម វប្បធម៌
សម្តេចធិបតីនាយករដ្ឋមន្ត្រី ជួបពិភាក្សាការងារទ្វេភាគីជាមួយ ឯកឧត្តមប្រធានាធិបតីមីយ៉ាន់ម៉ា
គណៈប្រតិភូសភាពាណិជ្ជកម្មអាមេរិក-កម្ពុជា បង្ហាញចំណាប់អារម្មណ៍បណ្ដាក់ទុនវិនិយោគលើវិស័យសំខាន់ៗ នៅកម្ពុជា

នយោបាយ​ និង ការអភិវឌ្ឍន៍

សម្ដេចធិបតី៖ ការបើកសាខាសាកលវិទ្យាល័យអង់គ្លេសនៅកម្ពុជា បានរួមចំណែកលើកស្ទួយទំនាក់ទំនងប្រទេសទាំងពីរ

2024/08/08 06:03:10 pm        234
Facebook Telegram Linkin
ក្នុងឱកាសអញ្ជើញជាអធីបតីពិធីសម្ពោធដាក់ឱ្យដំណើរការបណ្តុះបណ្តាលរបស់សាកលវិទ្យាល័យដ៏ល្បីរបស់ចក្រភពអង់គ្លេស ដឹ ម៉ុងហ្វត (DE MONTFORT) នាព្រឹកថ្ងៃទី៨ ខែសីហា ឆ្នាំ២០២៤ នេះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ការបើកសាខាសាកលវិទ្យាល័យដ៏ល្បីរបស់ចក្រភពអង់គ្លេសនៅកម្ពុជា គឺបានរួមចំណែកលើកស្ទួយទំនាក់ទំនងរបស់ប្រទេសកម្ពុជា និងចក្រភពអង់គ្លេស។សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់ថា រាជរដ្ឋាភិបាលអាណត្តិទី៧ បានយកចិត្តទុកដាក់ខ្ពស់បំផុតចំពោះកត្តាមនុស្សនៅក្នុងការអភិវឌ្ឍប្រទេសជាតិឆ្ពោះទៅប្រទេសមានចំណូលកម្រិតខ្ពស់ស្របតាមចក្ខុវិស័យកម្ពុជាឆ្នាំ ២០៥០។ សម្ដេចបន្តថា ដើម្បីឈានទៅដល់គោលដៅនេះ រាជរដ្ឋាភិបាលកម្ពុជា តាំងពីអាណត្តិមុន រហូតមកដល់អាណត្តិទី៧នេះ បានចាត់ទុកគ្រឹះស្ថានសិក្សា និងឧត្តមសិក្សា វិស័យឯកជន គឺជាដៃគូយ៉ាងសំខាន់មិនអាចខ្វះបាន។ សម្ដេចធិបតីបន្តថា ស្ថាប័នគ្រឹះស្ថានឧត្តមសិក្សា ដ៏ល្បីរបស់ចក្រភពអង់គ្លេសដែលទើបបើកដំណើរការនៅកម្ពុជានេះ គឺមានតម្លៃបន្ថែមទាក់ទងទៅនឹងការចូលរួមចែករំលែកបទពិសោធន៍របស់អង់គ្លេស នៅក្នុងការកសាងសង្គម សេដ្ឋកិច្ច និងឧស្សាហកម្មជឿនលឿនដែលផ្អែកលើចំណេះដឹង និងជំនាញ។ក្នុងឱកាសនោះសម្ដេចធិបតី នាយករដ្ឋមន្រ្ដីបានបញ្ជាក់បន្ថែមថា ការវិនិយោគរបស់សាកលវិទ្យាល័យ ដឹ ម៉ុងហ្វត (DE MONTFORT) នៅកម្ពុជា ក៏ជាការផ្ដល់ផលប្រយោជន៍ទៅវិញទៅមកដែលមានសក្ដានុពលយូរអង្វែង រវាងកម្ពុជា និងអង់គ្លេស។ សម្ដេចធិបតី ក៏បានលើកទឹកចិត្តឱ្យសាកលវិទ្យាល័យនេះសហការឱ្យបានជិតស្និទ្ធជាមួយបណ្ដាញធុរកិច្ចរបស់ចក្រភពអង់គ្លេសដើម្បីជំរុញការផ្សារភ្ជាប់ជាមួយការអប់រំ និងទីផ្សារការងារ និងលើកទឹកចិត្តឱ្យសាកលវិទ្យាល័យសហការជាមួយស្ថាប័នពាក់ព័ន្ធរបស់កម្ពុជាដើម្បីទទួលបានការគាំទ្រផ្សេងៗពាក់ព័ន្ធនឹងការបណ្ដុះបណ្ដាលសហគ្រិនភាព ឈានទៅចូលរួមបង្កើតការងារជាក់ស្ដែងនៅកម្ពុជា៕ អត្ថបទ៖វ៉ន ដារ៉ា

កូរ៉េខាងត្បូង៖ ការបង្កើតអាវុធនុយក្លេអ៊ែរនឹងធ្វើឱ្យខូចទំនាក់ទំនងជាមួយសហរដ្ឋអាមេរិក

2024/08/08 05:25:14 pm        201
Facebook Telegram Linkin
រដ្ឋមន្ត្រីការពារជាតិកូរ៉េខាងត្បូង លោក ស៊ីន វ៉ុនស៊ីក (Shin Won-sik) បានប្រាប់សារព័ត៌មានរ៉យទ័រថា «កូរ៉េខាងត្បូង អាចនឹងធ្វើឱ្យប៉ះពាល់ដល់សម្ព័ន្ធភាពជាមួយសហរដ្ឋអាមេរិក និងបង្កការភ្ញាក់ផ្អើលទីផ្សារហិរញ្ញវត្ថុ ប្រសិនបើខ្លួនចាប់ផ្តើមបង្កើតសព្វាវុធនុយក្លេអ៊ែរ» ដោយច្រានចោលការអំពាវនាវក្នុងស្រុកជាថ្មីដែលថាឱ្យប្រទេសនេះមានឃ្លាំងអាវុធនុយក្លេអ៊ែរផ្ទាល់ខ្លួនដើម្បីរារាំងកូរ៉េខាងជើង។ខណៈប្រទេសជិតខាងកូរ៉េខាងជើង ខិតខំពង្រីកសមត្ថភាពនុយក្លេអ៊ែរ និងមីស៊ីលយ៉ាងឆាប់រហ័ស ក្រុមមន្ត្រីកូរ៉េខាងត្បូងកាន់តែច្រើន និងសមាជិកបក្សកាន់អំណាចអភិរក្សនិយម របស់លោកប្រធានាធិបតី យ៉ុន សុកយ៉ុល (Yoon Suk Yeol) បានអំពាវនាវក្នុងរយៈពេលប៉ុន្មានខែថ្មីៗនេះ ឱ្យអភិវឌ្ឍអាវុធនុយក្លេអ៊ែរ។ការរំពឹងទុកនៃអាណត្តិមួយទៀតសម្រាប់អតីតប្រធានាធិបតីអាមេរិក លោក Donald Trump ដែលបានត្អូញត្អែរអំពីការចំណាយនៃវត្តមានយោធារបស់អាមេរិកនៅកូរ៉េខាងត្បូង ហើយនិងបានចាប់ផ្តើមកិច្ចចរចាដែលមិនធ្លាប់មានពីមុនមកជាមួយកូរ៉េខាងជើង ក៏បានជំរុញឱ្យមានការជជែកពិភាក្សាបន្ថែមទៀតផងដែរលើបញ្ហាឃ្លាំងអាវុធនោះ។ប៉ុន្តែលោក Shin អតីតឧត្តមសេនីយយោធាផ្កាយបីដែលធ្លាប់ធ្វើជាតំណាងរាស្រ្តក្នុងបក្សរបស់លោក Yoon បាននិយាយថា ការមានឃ្លាំងអាវុធនុយក្លេអ៊ែរក្នុងស្រុកគឺប្រថុយនឹងការបំផ្លិចបំផ្លាញដល់ជំហរការទូត និងសេដ្ឋកិច្ចរបស់កូរ៉េខាងត្បូង។លោក Shin ទទួលស្គាល់ថាការជជែកវែកញែកក្នុងចំណោមអ្នកនយោបាយ និងអ្នកជំនាញខាងគោលនយោបាយការបរទេស គឺជាសញ្ញាមួយដែលថាប្រជាជនកូរ៉េខាងត្បូងជាច្រើននៅតែព្រួយបារម្ភអំពីការប្ដេជ្ញាបន្តទប់ស្កាត់របស់អាមេរិក។ លោកបន្ថែមថា៖ ប៉ុន្តែការជំរុញរបស់សម្ព័ន្ធមិត្តក្នុងការពង្រឹងការរារាំងនោះ គឺជាវិធី «ងាយស្រួល មានប្រសិទ្ធភាព និងសន្តិភាពបំផុត» ដើម្បីទប់ទល់នឹងការគំរាមកំហែងរបស់កូរ៉េខាងជើង៕

វត្តមានសាកលវិទ្យាល័យអង់គ្លេសនៅកម្ពុជាបញ្ជាក់ឲ្យឃើញថា អង់គ្លេសទទួលស្គាល់ស្ថិរភាពនយោបាយកម្ពុជា

2024/08/08 05:11:46 pm        264
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា វត្តមានរបស់សាកលវិទ្យាល័យDe Montfortរបស់អង់គ្លេសជាការបង្ហាញយ៉ាងច្បាស់ថា រដ្ឋាភិបាល និងប្រជាជនអង់គ្លេសទទួលស្គាល់អំពីស្ថិរភាពនយោបាយនៅកម្ពុជា និងជឿទុកចិត្តលើទីផ្សារកម្ពុជា។ ថ្លែងនៅក្នុងឱកាសអញ្ជើញចូលរួមជាអធិបតីភាពសម្ពោធដាក់ឲ្យប្រើប្រាស់ជាផ្លូវនៃសាកលវិទ្យាល័យ De Montfortរបស់អង់គ្លេស នាថ្ងៃទី៨ ខែសីហា ឆ្នាំ២០២៤នេះ សម្តេចធិបតី ហ៊ុន ម៉ាណែត លើកឡើងថា សម្តេចពិតជាមានសេចក្តីរំភើបចំពោះសាកលវិទ្យាល័យDe Montfort នៅលើទឹកដីកម្ពុជា ដោយសម្តេចមើល ឃើញថា វត្តមាននៃសាកលវិទ្យាល័យដ៏ល្បីល្បាញរបស់អង់គ្លេសនេះ គឺបានបង្ហាញថា គេទទួលស្គាល់លើគុណ ភាពអប់រំនៅកម្ពុជា, ការទទួលស្គាល់ស្ថិរភាពនយោបាយនៅកម្ពុជា ការរីកចម្រើនសេដ្ឋកិច្ចសក្តានុពល និងកំណើនតទៅអនាគតរបស់កម្ពុជាជាដើម។សម្តេចធិបតី ហ៊ុន ម៉ាណែត នាយករដ្ឋមន្រ្តី បានបន្ថែមទៀតថា វត្តមានសាកលវិទ្យាល័យDe Montfort នឹងក្លាយជា​កតលិករ​ជំរុញការប្រកួតប្រជែកវិស័យអប់រំកម្រិតឧត្តមសិក្សានៅកម្ពុជា និងជាការបង្កើនជម្រើស កាន់តែសម្បូរបែបដល់ទីផ្សារអប់រំដល់និស្សិតកម្ពុជា។ មួយវិញទៀតវត្តមានសាកលវិទ្យាល័យនេះនឹងផ្តល់តម្លៃ បន្ថែមដល់គ្រឹះស្ថានអប់រំឧត្តមសិក្សានៅកម្ពុជា ខណៈសាកលវិទ្យាល័យនេះត្រូវបានជ្រើសរើសជាមជ្ឈមណ្ឌល សាកលមួយរបស់អង្គការសហប្រជាជាតិនោះ៕ អត្ថបទ៖ បាន ចក់

សម្តេចធិបតី៖ ប្រទេសយើងមិនអាចក្លាយទៅជាប្រទេសអ្នកមានបានទេ ប្រសិនបើខ្វះនូវធនធានមនុស្ស

2024/08/08 04:52:34 pm        250
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ប្រទេសយើងមិនអាចក្លាយទៅជាអ្នកមាន បាននោះទេ ប្រសិនបើខ្វះនូវធនធានមនុស្ស ដូច្នេះហើយបានជារាជរដ្ឋាភិបាលអាណត្តិទី៧នេះ បានដាក់ចេញ យុទ្ធសាស្រ្តបញ្ចកោណ ដោយផ្តោតសំខាន់ក្នុងការលើកកម្ពស់វិសាលភាពចំពោះវិស័យអប់រំឲ្យកាន់តែខ្លាំងក្លា បន្ថែមទៀត។ថ្លែងនៅក្នុងឱកាសអញ្ជើញចូលរួមជាអធិបតីភាពសម្ពោធដាក់ឲ្យប្រើប្រាស់ជាផ្លូវនៃសាកលវិទ្យាល័យ De Montfortរបស់អង់គ្លេស នាថ្ងៃទី៨ ខែសីហា ឆ្នាំ២០២៤នេះ សម្តេចធិបតី ហ៊ុន ម៉ាណែត បានបញ្ជាក់ថា រាជរដ្ឋាភិបាលតាមរយៈក្រសួងអប់រំ យុវជន និងកីឡា បានដាក់ចេញយុទ្ធសាស្រ្តយ៉ាងច្បាស់លាស់ក្នុងការ លើកកម្ពស់វិស័យអប់រំនៅកម្ពុជាឲ្យកាន់តែល្អប្រសើរបន្ថែមទៀត ជាពិសេសគឺការបណ្តុះបណ្តាលប្រកបដោយ មូលធនមនុស្ស។ជាមួយគ្នានោះដែរសម្តេចធិបតី នាយករដ្ឋមន្រ្តី៖ ការអប់រំនូវធនធានមនុស្សគឺជាយុទ្ធសាស្រ្តវិនិយោគវែងឆ្ងាយ របស់រាជរដ្ឋាភិបាលកម្ពុជា ដើម្បីបង្កើតមូលដ្ឋានសង្គមសេដ្ឋកិច្ច និងឧស្សាហកម្ម ដែលផ្តោត លើជំនាញ និងចំណេះដឹង និងដើម្បីធានាថា កម្ពុជានឹងមិនធ្លាក់ចូលក្នុងអន្ទាក់នៃប្រភេទចំណូលមធ្យម នៅក្នុង ដំណើរការដ៏វែងឆ្ងាយរបស់កម្ពុជា ឈានឆ្ពោះទៅឋានៈជាប្រទេសចំណូលខ្ពស់ នៅក្នុងឆ្នាំ២០២៥៕អត្ថបទ៖ បាន ចក់

ប្រសាសន៍សំខាន់ៗរបស់សម្តេចធិបតី ក្នុងឱកាសសម្ពោធបើកឲ្យដំណើរការជាផ្លូវការសាកលវិទ្យាល័យ ឌឹ ម៉ុនហ្វត កម្ពុជា

2024/08/08 03:36:23 pm        316
Facebook Telegram Linkin
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី៨ ខែសីហា ឆ្នាំ២០២៤ បានអញ្ជើញជាអធិបតីភាពដ៏ខ្ពង់ខ្ពស់ សម្ពោធបើកឲ្យដំណើរការជាផ្លូវការសាកលវិទ្យាល័យ ឌឹ ម៉ុនហ្វត កម្ពុជា ។ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្ដេចធិបតី ហ៊ុន ម៉ាណែត មានសេចក្ដីរីករាយដែលបានចូលរួមក្នុងពិធីសម្ពោធ បើកឱ្យដំណើរការជាផ្លូវការនូវ សាកលវិទ្យាល័យ ដឹ ម៉ុងហ្វត (DE MONTFORt) អាយុជាង១៥០ឆ្នាំ របស់ចក្រភពអង់គ្លេស បានបើកទ្វារបណ្តុះបណ្តាលនៅក្នុងប្រទេសកម្ពុជា។ នេះគឺជាសាកលវិទ្យាល័យដំបូងគេហើយរបស់ចក្រភពអង់គ្លេស ដែលបានបើកទ្វារបណ្តុះបណ្តាលនៅក្នុងប្រទេសកម្ពុជា។-សម្ដេចធិបតី ហ៊ុន ម៉ាណែត បញ្ជាក់ថា វត្តមានសាកលវិទ្យាល័យ ដឹ ម៉ុងហ្វត ក៏ជាការរួមចំណែកមួយដ៏សំខាន់លើវិថីអប់រំ និងការបណ្តុះបណ្តាលធនធានមនុស្សនៅកម្ពុជា ឱ្យក្លាយទៅមូលធនមនុស្សដ៏ពិតប្រាកដ។ វត្តមានសាកលវិទ្យាល័យ ដឹ ម៉ុងហ្វត បានរួមចំណែកបន្ថែមជម្រើសមួយកាន់តែប្រសើរ និងមានភាពងាយស្រួល សម្រាប់អ្នកសិក្សានៅកម្ពុជា ខណៈដែលបច្ចុប្បន្ននេះ មានប្រជាពលរដ្ឋកម្ពុជាជាច្រើន បានបញ្ជូនកូនចៅរបស់ពួកគេចេញទៅសិក្សានៅតាមបណ្តាប្រទេសនានា រួមមាននៅចក្រភពអង់គ្លេសផងដែរ។-សម្ដេចធិបតី ហ៊ុន ម៉ាណែត បញ្ជាក់ថា ការបើកសាកលវិទ្យាល័យបាន គឺជារឿងអស្ចារ្យម្យ៉ាង ប៉ុន្ដែការធ្វើឱ្យសាកលវិទ្យាល័យនោះអាចឈរជើងបានយូរអង្វែង មាននិរន្តរភាពទៅបានទើបជាការប្រសើរពិតប្រាកដ។-សម្ដេចធិបតី ហ៊ុន ម៉ាណែត បញ្ជាក់ឡើងវិញថា រាជរដ្ឋាភិបាលអាណត្តិទី៧ បានផ្ដោតការយកចិត្តទុកដាក់ខ្ពស់បំផុតលើការបណ្ដុះបណ្ដាលធនធានមនុស្ស។ សម្ដេចជឿជាក់ថា សាកលវិទ្យាល័យ ដឹ ម៉ុងហ្វត (DE MONTFORt) នឹងជួយកម្ពុជា ក្នុងការផលិតនូវធានធានមនុស្សដែលមានគុណភាព។-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅតែនិយាយអះអាងថា ប្រទេសនីមួយៗមិនអាចមានភាពរីកចម្រើនទៅមុខបានទេ ប្រសិនបើខ្វះនូវធនធានមនុស្ស និងខ្សោយនូវវិស័យអប់រំនោះ ដូច្នេះវត្តមានសាកលវិ ទ្យាល័យ DE MONTFORTគឺនឹងផ្តល់តម្លៃជាច្រើនដល់និស្សិតកម្ពុជា និងផ្តល់តម្លៃទៅវិញទៅមករវាងកម្ពុជា និងអង់ គ្លេសផងដែរ។-សម្ដេចធិបតី៖ លើកទឹកចិត្តឲ្យសាកលវិទ្យាល័យសហការជាមួយធុរកិច្ចអង់គ្លេស និងស្ថាប័នពាក់ព័ន្ធរបស់កម្ពុជា ដើម្បីទទួលបានការគាំទ្រនានាបណ្ដុះបណ្ដាលសហគ្រិនភាព ដើម្បីចូលរួមបង្កើតការងារដល់ប្រជាពលរដ្ឋកម្ពុជា ជាមួយនឹងគំនិតនវានុវត្តន៍របស់និស្សិតដែលទទួលបានពីសាកលវិទ្យាល័យ។-សម្ដេចធិបតី៖ សាកលវិទ្យាល័យ បានជ្រើសរើសកម្ពុជាទីមួយនៅអាស៊ានក្នុងការបើកការបណ្ដុះបណ្ដាល បញ្ជាក់ពីទំនុកទុកចិត្ត ទទួលស្គាល់ស្ថេរភាពនយោបាយកំណើនសេដ្ឋកិច្ចរបស់កម្ពុជា និងកំណើនការចាយវាយរបស់កម្ពុជាវត្តមានសាកលវិទ្យាល័យគឺបង្ហាញពីការផ្ដល់តម្លៃអប់រំនៅកម្ពុជា។

ប្រភព៖ លោក ពូទីន ស្នើឱ្យអ៊ីរ៉ង់ បញ្ចៀសការស្លាប់ជនស៊ីវិលក្នុងការឆ្លើយតបលើអ៊ីស្រាអែល

2024/08/07 05:32:59 pm        279
Facebook Telegram Linkin
យោងតាមប្រភពជាន់ខ្ពស់ចំនួនពីររបស់អ៊ីរ៉ង់ បាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានស្នើឱ្យមេដឹកនាំកំពូលរបស់អ៊ីរ៉ង់ លោក អាយ៉ាតូឡា អាលី ខាមីណេ (Ayatollah Ali Khamenei) ឆ្លើយតបដោយប្រុងប្រយ័ត្នចំពោះការសម្លាប់មេដឹកនាំក្រុមហាម៉ាស ដែលសង្ស័យថាជាទង្វើរបស់អ៊ីស្រាអែល ដោយផ្តល់ដំបូន្មានប្រឆាំងនឹងការវាយប្រហារលើជនស៊ីវិល។ប្រភពទាំងនោះបានឱ្យដឹងថា សារនេះត្រូវបានផ្ញើកាលពីថ្ងៃចន្ទ ដោយលោក សើហ្គេ សយហ្គូ (Sergei Shoigu) ដែលជាសម្ព័ន្ធមិត្តជាន់ខ្ពស់របស់មេដឹកនាំវិមានក្រឹមឡាំងរូបនេះ ក្នុងកិច្ចប្រជុំជាមួយមន្ត្រីជាន់ខ្ពស់អ៊ីរ៉ង់ ខណៈសាធារណរដ្ឋអ៊ីស្លាមមួយនេះកំពុងថ្លឹងថ្លែងចំពោះការឆ្លើយតបរបស់ខ្លួនលើការធ្វើឃាត លោក អ៊ីស្មេល ហានីយេ (Ismail Haniyeh)។នៅទីក្រុងមូស្គូ និងវិមានក្រឹមឡាំង មិនបានឆ្លើយតបទៅនឹងសំណើសុំការអត្ថាធិប្បាយទេ។ ទីភ្នាក់ងារសារព័ត៌មានរដ្ឋ RIA បានរាយការណ៍កាលពីថ្ងៃអង្គារថា លោក Shoigu បានពិភាក្សាអំពីការសម្លាប់លោក Haniyeh ក្នុងដំណើរទស្សនកិច្ចរបស់ខ្លួននៅទីក្រុងតេអេរ៉ង់។ ប្រភពទាំងពីរដែលដឹងពីបញ្ហានេះមិនបានផ្តល់ព័ត៌មានលម្អិតបន្ថែមលើការពិភាក្សារបស់លោក Shoigu ទេ។ពួកគេបាននិយាយថា ដំណើរទស្សនកិច្ចរបស់លោក Shoigu គឺជាមួយក្នុងចំណោមផ្លូវជាច្រើនដែលទីក្រុងមូស្គូធ្លាប់បានប្រើដើម្បីបញ្ជូនសារនៃតម្រូវការសម្រាប់ការអត់ធ្មត់ទៅកាន់អ៊ីរ៉ង់ ដោយស្របពេលជាមួយគ្នានោះក៏បានថ្កោលទោសការសម្លាប់លោក Haniyeh ថាជា «ការធ្វើឃាតដ៏គ្រោះថ្នាក់បំផុត» ក្នុងគោលបំណងទប់ស្កាត់សង្រ្គាមមជ្ឈិមបូព៌ា៕

សម្តេចតេជោ ហ៊ុន សែន អនុញ្ញាតឱ្យតំណាងសាជីវកម្មហិរញ្ញវត្ថុអន្តរជាតិ (IFC)ប្រចាំកម្ពុជា ចូលជួបសម្ដែងការគួរសម

2024/08/07 04:31:38 pm        182
Facebook Telegram Linkin
នៅព្រឹកថ្ងៃទី៧ ខែសីហា ឆ្នាំ២០២ ៤ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា អនុញ្ញាតឱ្យ លោក អាសាដ យ៉ាកុប (Asad Yaqub) តំណាងសាជីវកម្មហិរញ្ញវត្ថុអន្តរជាតិ (IFC) ប្រចាំព្រះរាជាណាចក្រកម្ពុជានៃធនាគារពិភពលោក ចូលជួបសម្ដែងការគួរសម នៅវិមានព្រឹទ្ធសភា រាជធានីភ្នំពេញ។

នគរបាលបំផ្លាញមន្ទីរពិសោធន៍កែច្នៃគ្រឿងញៀន នៅភាគខាងលិចអាហ្វហ្កានីស្ថាន

2024/08/06 09:13:51 pm        582
Facebook Telegram Linkin
មន្ត្រីម្នាក់ បាននិយាយកាលពីថ្ងៃចន្ទថា នគរបាលប្រឆាំងគ្រឿងញៀន បានរកឃើញ និងបំផ្លាញមន្ទីរពិសោធន៍កែច្នៃគ្រឿងញៀនមួយ នៅក្នុងខេត្ត Nimroz ភាគខាងលិចប្រទេសអាហ្វហ្គានីស្ថាន។ លោក Mawlawi Samiullah Samim ប្រធាននគរបាលប្រឆាំងគ្រឿងញៀនស្រុក បាននិយាយថា ដោយផ្អែកលើព័ត៌មានដែលទទួលបាន នគរបាលបានចាប់ផ្តើមប្រតិបត្តិការ នៅក្នុងស្រុក Dilaram នៃខេត្តកាលពីថ្ងៃអាទិត្យ។ ក្រៅពីការបំផ្លាញមន្ទីរពិសោធន៍គ្រឿងញៀន នគរបាលក៏បានរកឃើញ និងដុតបំផ្លាញសម្ភារមួយចំនួនធំ ដែលប្រើប្រាស់ក្នុងការផលិតហេរ៉ូអ៊ីនផងដែរ។មន្ត្រីដដែលបាននិយាយថា គ្មានអ្នកជួញដូរគ្រឿងញៀន ត្រូវបានចាប់ខ្លួននៅកន្លែងប្រតិបត្តិការនោះទេ ដោយបន្ថែមថា កិច្ចខិតខំប្រឹងប្រែង កំពុងបន្តដើម្បីចាប់ខ្លួនអ្នកដែលពាក់ព័ន្ធក្នុងការជួញដូរគ្រឿងញៀន។ក្នុងរយៈពេលប៉ុន្មានខែកន្លងមកនេះ នគរបាល បានបំផ្លាញកសិដ្ឋានអាភៀនរាប់រយកន្លែង នៅទូទាំងប្រទេសអាហ្វហ្គានីស្ថាន ដែលជាប្រទេសមួយដែលស្គាល់ថា បានដាំដុះអាភៀនយ៉ាងទូលំទូលាយ។រដ្ឋាភិបាលចាំផ្ទះអាហ្វហ្គានីស្ថាន បានហាមឃាត់ការដាំដុះអាភៀន ការកែច្នៃគ្រឿងញៀន និងការជួញដូរគ្រឿងញៀន នៅក្នុងខែមេសា ឆ្នាំ ២០២២។

ប្រធានអាជ្ញាធរប៉ាឡេស្ទីន ត្រូវគេរំពឹងថា នឹងធ្វើទស្សនកិច្ចនៅរុស្ស៊ី ដើម្បីពិភាក្សាពីវិបត្តិក្នុងតំបន់

2024/08/06 09:02:07 pm        339
Facebook Telegram Linkin
ប្រធានាធិបតីប៉ាឡេស្ទីន លោក ម៉ាឃ្មូដ អាបាស (Mahmoud Abbas) បានប្រាប់ទីភ្នាក់ងារសារព័ត៌មានរដ្ឋរបស់រុស្ស៊ី RIA នៅមុនទស្សនកិច្ចដែលរំពឹងទុកទៅកាន់ទីក្រុងមូស្គូ ថា ការសម្លាប់មេដឹកនាំក្រុមហាម៉ាស លោក អ៊ីស្មេល ហានីយេ (Ismail Haniyeh) មានបំណងអូសបន្លាយជម្លោះតំបន់ហ្កាហ្សា ដោយបន្ថែមថាលោកនឹងពិភាក្សាអំពីវិបត្តិក្នុងតំបន់ជាមួយលោកប្រធានាធិបតី វ្ល៉ាឌីមៀ ពូទីន (Vladimir Putin) នៅទីក្រុងមូស្គូ។RIA ដកស្រង់ប្រភពការទូតមួយដោយនិយាយថា លោក Abbas នឹងទៅបំពេញទស្សនកិច្ចដែលរំពឹងទុកជាយូរមកហើយនៅទីក្រុងមូស្គូ នៅថ្ងៃទី ១២-១៤ ខែសីហា ខាងមុខនេះ។ នៅក្នុងបទសម្ភាសន៍មួយដែលត្រូវបានចេញផ្សាយដោយទីភ្នាក់ងារសារព័ត៌មានរដ្ឋ RIA នៅថ្ងៃអង្គារ (០៦ សីហា) នេះ លោក Abbas និយាយថា លោកចាត់ទុកការធ្វើឃាតលោក Haniyeh ថាជាទង្វើដ៏កំសាក និងជាដំណើរដ៏គ្រោះថ្នាក់នៅក្នុងនយោបាយអ៊ីស្រាអែល។លោក Abbas ក៏បានប្រាប់ RIA ថាតំបន់ហ្កាហ្សាស្រ្ទីប ត្រូវតែផ្ទេរទៅក្រោមការគ្រប់គ្រងរបស់អាជ្ញាធរប៉ាឡេស្ទីនដោយស្របច្បាប់។ លោកបានបន្តថា៖ «យើងប្រឆាំងដាច់ខាតចំពោះផែនការរបស់អ៊ីស្រាអែលដែលផ្តល់នូវដំណោះស្រាយបណ្តោះអាសន្នមួយចំនួន»។លោក Haniyeh ដែលជាមេដឹកនាំនយោបាយនៃក្រុមហាម៉ាស ត្រូវបានគេធ្វើឃាតនៅក្នុងរដ្ឋធានីតេអេរ៉ង់ របស់អ៊ីរ៉ង់ កាលពីសប្តាហ៍មុន ក្នុងការវាយប្រហារដែលទាក់ទាញការគំរាមកំហែងសងសឹកលើអ៊ីស្រាអែល និងជំរុញឱ្យមានការបារម្ភថាជម្លោះហ្កាហ្សា កំពុងក្លាយជាសង្រ្គាមមជ្ឈិមបូព៌ាកាន់តែទូលំទូលាយ៕

សម្តេចធិបតី៖ ការជំរុញការកសាងព្រែកជីកហ្វូណន ឱ្យខាងតែបាននឹងបញ្ចប់ក្ដីមន្ទិលសង្ស័យរបស់ពលរដ្ឋ

2024/08/06 07:08:06 pm        192
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងបញ្ជាក់ថា ការកសាងព្រែកជីក ហ្វូណនតេជោ គឺនឹងធ្វើឱ្យជនរួមជាតិទាំងអស់ ទាំងក្រុមប្រឆាំង និងមិនប្រឆាំង អស់មន្ទិលសង្ស័យ និងអស់កង្វល់ ក្រោយគម្រោងនេះសាងសង់រួចជាស្ថាពរហើយនោះ ហើយរាជរដ្ឋាភិបាល នឹងខិតខំជំរុញ គម្រោងនេះឱ្យចេញជារូបរាង ដើម្បីឧត្តមប្រយោជន៍រួមរបស់ជាតិ និងប្រជាជនខ្មែរទាំងមូលនោះ។ក្នុងឱកាសអញ្ជើញជាអធិបតីភាពក្នុងពិធីប្រគល់សញ្ញាបត្រ ជូននិស្សិតសាកលវិទ្យាល័យពុទ្ធិ សាស្ត្រ នាព្រឹកថ្ងៃទី០៦ ខែសីហានេះ សម្តេចធិបតីនាយករដ្ឋមន្រ្តី បានលើកឡើងថា មានក្រុមអ្នកវិភាគ មួយក្តាប់តូច នៅតែរិះគន់ចំពោះគម្រោងព្រែកជីកហ្វូណនតេជោ បើទោះបីជាគម្រោងនេះបានសម្ពោធ បើកការដ្ឋានសាងសង់ជាផ្លូវការហើយនោះ ។ក្រុមអ្នកវិភាគខ្លះ បាននិយាយថា គម្រោងព្រែកជីកនេះ សាងសង់មានភាពបត់បែនច្រើន មិនធ្វើត្រង់ ដោយសារតែពុករលួយ និងខ្លះទៀតនៅតែនិយាយច្រំដែលៗថា ការសាងសង់នូវគម្រោងនេះ នឹងបាត់បង់នូវអធិបតេយ្យជាតិជាដើម ។ សម្តេចធិបតី បានបញ្ជាក់ថា មូលហេតុដែលគម្រោងព្រែកជីកហ្វូណនតេជោត្រូវធ្វើបត់បែន មិនធ្វើ ត្រង់ ឬជីកត្រង់នោះ គឺដើម្បីបញ្ចៀសផលប៉ះពាល់ដល់បរិស្ថានធម្មជាតិ និងប៉ះពាល់ដល់គេហដ្ឋានប្រជា ពលរដ្ឋជាដើម ខណៈគម្រោងនេះជីកកន្លែងថ្មី មានត្រឹមតែប៉ុន្មានគីឡូប៉ុណ្ណោះ ។យ៉ាងណាក៏ដោយ សម្តេចធិបតី ហ៊ុន ម៉ាណែត នាយករដ្ឋមន្រ្តី បានប្រកាសថ្លែងអំណរគុណដល់ជនរួមជាតិទាំងអស់ទាំងក្នុង និងក្រៅប្រទេស ដែលបានគាំទ្រនូវគម្រោងព្រែកជីកហ្វូណនតេជោ ដោយគ្រប់ស្ថាប័នរដ្ឋ ឯកជន និងតាមសាលារៀន វត្តអារាមទាំងអស់ ដែលបានវាយជួង ទូងស្គរ និងរគាំងដើម្បីជាការរួមចំណែកជាមួយរាជរដ្ឋាភិបាលចំពោះគម្រោងដ៏ប្រវត្តិសាស្រ្តមួយនេះ។ សម្តេចនៅតែនិយាយអះអាងថា គម្រោង ព្រែកជីកហ្វូណនតេជោនឹងផ្តល់អត្ថប្រយោជន៍​ដ៏​មហាសាលដល់សង្គម និងសេដ្ឋកិច្ចជាតិកម្ពុជា ដូចជាការពង្រីកការតភ្ជាប់ប្រព័ន្ធដឹកជញ្ជូន ពហុធម្យោបាយ ចំណេចចម្ងាយផ្លូវ ​ពេលវេលា និងថ្លៃដឹកជញ្ជូនប្រកបដោយ ភាពប្រកួតប្រជែង​ត្រង់ទៅសមុទ្រ បង្កើនវិសាលភាពប្រព័ន្ធស្រោចស្រព និងរំដោះទឹកជំនន់ ជួយពង្រីកនិង បង្កើនផលិតភាពនៃការដាំដុះនៅភាគនារតី ទទួលបានផលពីនេសាទ​ និងពីវារីវប្បកម្ម ព្រមទាំងជំរុញវិស័យ ទេសចរណ៍ និងវិនិយោគ ជាពិសេសការបង្កើតតំបន់សេដ្ឋកិច្ចពិសេស តំបន់ឧស្សាហកម្ម និងការកែច្នៃនាំចេញ ជាដើម៕អត្ថបទបាន ចក់

បណ្ដាញសង្គម

ព័ត៌មានថ្មីៗ

មន្ដ្រីទេសចរណ៍ រំពឹងព្រឹត្តិការណ៍ជិះកង់ទស្សនាសមរាត្រីក្នុងតំបន់អង្គរ នឹងបន្សល់ផលិតផល និងការចងចាំដ៏ល្អសម្រាប់ភ្ញៀវជាតិ-អន្ដរជាតិ
09/15/2026 12:09 PM
Facebook Telegram Linkin
ពិធីចុះហត្ថលេខាលើសំណើសុំកែសម្រួលព្រំប្រទល់រដ្ឋបាលរវាងរដ្ឋបាលខេត្តព្រះវិហារ និងរដ្ឋបាលខេត្តសៀមរាប
09/15/2026 12:09 PM
Facebook Telegram Linkin
ក្រុមហ៊ូទី អបអរការដណ្តើមបានដែនដីភាគខាងលិចប្រទេសយេម៉ែន ក្រោយប្រតិបត្តិការវាយលុកទ្រង់ទ្រាយធំ
09/15/2026 12:09 PM
Facebook Telegram Linkin
អង្គការWHO នឹងកាត់ការផ្គត់ផ្គង់ប្រេងម៉ាស៊ូតដល់មន្ទីរពេទ្យ និងមណ្ឌលសុខភាពជាង២០កន្លែងនៅហ្កាហ្សា
09/15/2026 12:09 PM
Facebook Telegram Linkin
រដ្ឋមន្ត្រីអ៊ីរ៉ង់ ប្រាប់ប្រធានសភាលីបង់ថា ការសម្របសម្រួលមានសារៈសំខាន់ក្នុងការប្រឆាំងការឈ្លានពានរបស់អ៊ីស្រាអែល
09/15/2026 12:09 PM
Facebook Telegram Linkin
ក្រសួងកសិកម្ម ជំរុញការអនុវត្ត «ប្រព័ន្ធបញ្ជរតែមួយជាតិ» ដើម្បីបង្កើនប្រសិទ្ធភាព ចំណេញពេលវេលា និងថវិកា
09/15/2026 11:09 AM
Facebook Telegram Linkin
កម្មករកាត់ដេរជឿជាក់ថា ការដំឡើងប្រាក់ឈ្នួលអប្បបរមានឹងអាចបន្តកើនឡើងថែមទៀតសម្រាប់ឆ្នាំ២០២៧
09/15/2026 11:09 AM
Facebook Telegram Linkin
លោក Trump និយាយថា អ៊ុយក្រែន និងរុស្ស៊ី បានព្រមព្រៀងមិនវាយប្រហារលើគោលដៅថាមពល
09/15/2026 11:09 AM
Facebook Telegram Linkin
លោក Trump បដិសេធការព្រួយបារម្ភអំពីសុវត្ថិភាព AI ដោយអះអាងថា អាមេរិកមានយន្តការគ្រប់គ្រងវិស័យនេះរួចហើយ
09/15/2026 11:09 AM
Facebook Telegram Linkin
នាយករដ្ឋមន្ត្រីដាណឺម៉ាក និយាយថាមានសុទិដ្ឋិនិយមចំពោះកិច្ចពិភាក្សាអំពីដែនដី Greenland ជាមួយ អាមេរិក
09/15/2026 11:09 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.