BTV NEWS

ប្រតិបត្តិការការទូទាត់តាម QR Code នៅកម្ពុជា កំពុងពេញនិយមសម្រាប់អ្នកប្រើប្រាស់

ឯកឧត្តម ឌិត ទីណា លើកទឹកចិត្តសហគមន៍ និងក្រុមហ៊ុនបន្តស្មារតីសាមគ្គីភាព ដើម្បីទទួលផលចំណេញទាំងអស់គ្នាថែមទៀត

កម្ពុជា និងកូរ៉េ រួមគ្នាជំរុញការកាត់បន្ថយឧស្ម័នផ្ទះកញ្ចក់តាមរយៈការវិនិយោគមធ្យោបាយដឹកជញ្ជូន-អគ្គិសនី ឆ្ពោះទៅគោលដៅអព្យាក្រឹតកាបូនឆ្នាំ២០៥០

កសិករខេត្តកំពង់ធំជិតពីររយគ្រួសារទទួលផលចំណេញច្រើនក្រោយចងក្រងជាសហគមន៍កសិកម្មទំនើប

សេដ្ឋកិច្ច និង កសិកម្ម

ក្រសួងសេដ្ឋកិច្ច និង UPDIS ពិភាក្សាបន្ថែម លើការររៀបចំផែនការមេអភិវឌ្ឍន៍ខេត្តព្រះសីហនុ

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ និងវិទ្យាស្ថាន UPDIS របស់ប្រទេសចិន បន្តពិគ្រោះយោបល់ ពិនិត្យខ្លឹមសារនៃសេចក្តីព្រាងរបាយការណ៍ ដំណាក់កាលទី២ នៃការរៀបចំផែនការមេអភិវឌ្ឍន៍ខេត្ដព្រះសីហនុ ដើម្បីធានានូវផែនការមេ និងផែនការសកម្មភាពមានសង្គតិភាព ទៅ នឹងផែនការអភិវឌ្ឍថ្នាក់ជាតិ។ឯកឧត្ដម វង្សី វិស្សុត រដ្ឋមន្ដ្រីប្រតិភូអមនាយករដ្ឋមន្ដ្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ នៅថ្ងៃទី ១២ ខែ ធ្នូ ឆ្នាំ ២០២២ បានដឹកនាំកិច្ចប្រជុំពិគ្រោះយោបល់តាមប្រព័ន្ធវីដេអូ ជាមួយវិទ្យាស្ថាននគររូបនីយកម្ម និងឌីសាញសិនជិន (UPDIS) ដើម្បីពិនិត្យធ្វើបច្ចុប្បន្នភាព និងពិភាក្សាលើខ្លឹមសារសំខាន់ៗជាយុទ្ធសាស្រ្ត និងកំណត់ទិសដៅគោលនយោបាយអាទិភាព នៃសេចក្តីព្រាងរបាយការណ៍ផែនការមេ និងសេចក្តីព្រាងរបាយការណ៍ផ្នែកពាក់ព័ន្ធទាំង១២ នៅក្នុងដំណាក់កាលទី២ នៃការរៀបចំផែនការមេ ដើម្បីអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង តាមរយៈការប្រែក្លាយខេត្តព្រះសីហនុជាប៉ូលនៃការអភិវឌ្ឍថ្មីមួយ និងជាទីក្រុងឆ្លាតវៃ មានការប្រើប្រាស់បច្ចេកវិទ្យាទំនើប ព្រមទាំងជាមជ្ឍមណ្ឌលពាណិជ្ជកម្ម សេវាកម្ម និងឡូជីស្ទីកដ៏រស់រវើក ក្នុងតំបន់អាស៊ាន ដើម្បីភ្ជាប់ខេត្តព្រះសីហនុទៅនឹងខ្សែច្រវ៉ាក់ផលិតកម្ម និងការផ្គត់ផ្គង់ក្នុងតំបន់ និងពិភពលោក។គោលបំណងនៃកិច្ចប្រជុំពិគ្រោះយោបល់នេះ គឺដើម្បីពិនិត្យខ្លឹមសារនៃសេចក្តីព្រាងរបាយការណ៍ សម្រាប់ដំណាក់កាលទី២ នៃការរៀបចំផែនការមេ ដើម្បីអាចធានាបានថា ផែនការមេនិងផែនការសកម្មភាពមានសង្គតិភាពទៅនឹងផែនការអភិវឌ្ឍថ្នាក់ជាតិ មានប្រទាក់ក្រឡា និងគ្រប់ជ្រុងជ្រោយ ប្រកបដោយប្រសិទ្ធភាព, កំណត់បញ្ហាប្រឈម និងអាទិភាពគោលនយោបាយ លើទិសដៅអភិវឌ្ឍន៍សំខាន់ៗ ជាពិសេស វិស័យឧស្សាហកម្ម, វិស័យទេសចរណ៍, វិស័យហិរញ្ញវត្ថុ, ការកសាងហេរដ្ឋារចនាសម្ព័ន្ធគន្លឹះៗ និងការអភិវឌ្ឍធនធានមនុស្ស, និងសង្កត់ធ្ងន់លើការគ្រប់គ្រងការប្រើប្រាស់ដីធ្លី, ការរៀបចំក្របខណ្ឌស្ថាប័ន, និងយន្តការហិរញ្ញប្បទាន ដែលគាំទ្រ និងជំរុញការអនុវត្តផែនការមេនេះ ប្រកបដោយប្រសិទ្ធភាព ។នៅក្នុងកិច្ចប្រជុំនេះ ឯកឧត្ដម វង្សី វិស្សុត បានផ្តល់អនុសាសន៍ដល់ក្រុមការងារនៃវិទ្យាស្ថាន UPDIS ឲ្យធ្វើការគិតគូរបំពេញបន្ថែម លើចំណុចសំខាន់ៗមួយចំនួនដូចជា៖ ផែនការមេត្រូវដាក់ចេញនូវផែនការសកម្មភាពលម្អិតតាមដំណាក់កាល ដោយបញ្ជាក់ច្បាស់ពីប្រភេទឧស្សាហកម្ម, ហេដ្ឋារចនាសម្ព័ន្ធសាធារណៈសារវ័ន្តសម្រាប់ទីក្រុង ដែលត្រូវអភិវឌ្ឍន៍ក្នុងរយៈពេល០៥ឆ្នាំដំបូង និងឆ្នាំបន្តបន្ទាប់ទៀត, រៀបចំផែនទីបង្ហាញផ្លូវសម្រាប់អភិវឌ្ឍន៍វិស័យទេសចរណ៍ និងវិស័យឧស្សាហកម្មធុនស្រាល ដែលកំពុងដំណើរការនៅខេត្តព្រះសីហនុ, សិក្សានិងផ្តល់អនុសាសន៍សមស្រប និងទាន់ពេលវេលា លើការដោះស្រាយអាគារដែលមិនទាន់សាងសង់រួច ដើម្បីទាក់ទាញការវិនិយោគ បង្កើនចំណូលខេត្ត និងជួយជំរុញវិស័យសេដ្ឋកិច្ចសម្រាប់ខេត្តព្រះសីហនុទាំងមូល៕អត្ថបទ៖ សុន រ៉ាឌី

អូស្រ្តាលីផ្តល់ហិរញ្ញប្បទានឥតសំណង ៦៥ លានដុល្លារ ដើម្បីជំរុញកំណើនសេដ្ឋកិច្ចប្រកបដោយនិរន្តរភាព

ភ្នំពេញ៖ អូស្រ្តាលី បានផ្តល់ហិរញ្ញប្បទានឥតសំណងចំនួន ៦៥ លានដុល្លារអាមេរិក សម្រាប់ការអនុវត្តរយៈពេល ៥ឆ្នាំនៅកម្ពុជា លើការកំណត់ និងរិះរកដំណោះស្រាយ ដើម្បីសម្រេចបាននូវកំណើនសេដ្ឋកិច្ចប្រកបដោយនិរន្តរភាព, ភាពធន់ និងបរិយាប័ន្ន ។ឯកឧត្តម Pablo Kang ឯកអគ្គរាជទូតអូស្ត្រាលីប្រចាំកម្ពុជា លើកឡើងក្នុងជំនួបសម្តែងការគួរសមជាមួយ ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងពិធីចុះហត្ថលេខាលើកិច្ចសម្របសម្រួលបំពេញបន្ថែមសម្រាប់កម្មវិធីភាពជាដៃគូ កម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ នៅថ្ងៃទី ១២ ខែ ធ្នូ ឆ្នាំ ២០២២ នេះថា កម្មវិធី CAP RED ដែលបានហិរញ្ញប្បទានតាមរយៈមូលនិធិពីក្រសួងការបរទេស និងពាណិជ្ជកម្ម នៃរដ្ឋាភិបាលអូស្រ្តាលី តាមរយៈស្ថានទូតអូស្រ្តាលីប្រចាំនៅកម្ពុជា នូវហិរញ្ញប្បទានឥតសំណងចំនួនប្រមាណ ៨៧ លានដុល្លារអូស្រ្តាលី ត្រូវប្រមាណ ៦៥ លានដុល្លារអាមេរិក សម្រាប់រយៈពេល ៥ ឆ្នាំ គិតចាប់ពីខែមិថុនា ឆ្នាំ ២០២២ ដល់ខែមិថុនា ឆ្នាំ ២០២៧ ។ កម្មវិធី CAP RED នឹងមានការសហការអនុវត្តរួមគ្នារវាងវិស័យឯកជន និងរាជរដ្ឋាភិបាលកម្ពុជា លើការកំណត់ និងរិះរកដំណោះស្រាយ ដើម្បីសម្រេចបាននូវកំណើនសេដ្ឋកិច្ចប្រកបដោយនិរន្តរភាព, ភាពធន់ និងបរិយាប័ន្ន ដោយផ្តោតលើវិស័យគោលចំនួន ៤ គឺ៖ ហេដ្ឋារចនាសម្ព័ន្ធ, ពាណិជ្ជកម្ម និងវិនិយោគ, កសិកម្ម និងកសិឧស្សាហកម្ម និងយេនឌ័រ និងបរិយាប័ន្ន។ជាការឆ្លើយតបឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី បានថ្លែងអំណរគុណចំពោះរដ្ឋាភិបាលអូស្រ្តាលី ដែលតែងតែបានជួយគាំទ្រដល់រាជរដ្ឋាភិបាលកម្ពុជា ក្នុងការអភិវឌ្ឍលើវិស័យសេដ្ឋកិច្ច, សង្គម និងសុខមាលភាពប្រជាជន ព្រមទាំងបានចូលរួមគាំទ្រកម្ពុជា ក្នុងការទប់ស្កាត់ការរីករាលដាលនៃជំងឺកូវីដ-១៩ តាមរយៈការផ្តល់នូវជំនួយជាវ៉ាក់សាំង និងការចូលរួមការស្តារសេដ្ឋកិច្ចកម្ពុជាឡើងវិញ ក្នុងពេលអន្តរកាលនេះ ។ឯកឧត្តមអគ្គបណ្ឌិតសភាចារ្យ បន្តថា កិច្ចសម្របសម្រួលបំពេញបន្ថែមនេះ គឺជាឯកសារគោលសម្រាប់រៀបចំយន្តការជាក់ស្ដែង ដើម្បីឈានដល់ការអនុវត្តប្រកបដោយជោគជ័យ នូវកម្មវិធី CAP RED ដែលជាក្របខណ្ឌរួមនៃការផ្ដល់ហិរញ្ញប្បទានឥតសំណងរបស់ក្រសួងការបរទេស និងពាណិជ្ជកម្ម ចំពោះប្រជាជនកម្ពុជា៕អត្ថបទ៖ សុន រ៉ាឌី

កម្ពុជាចក្រភពអង់គ្លេស នឹងចុះអនុស្សារណដើម្បីជំរុញពាណិជ្ជកម្ម និងវិនិយោគ

ភ្នំពេញ៖ កម្ពុជា-ចក្រភពអង់គ្លេស គ្រោងនឹងចុះអនុស្សរណៈនៃការយោគយល់គ្នា (MoU) រវាងកម្ពុជា និងចក្រភពអង់គ្លេស ស្តីពីការបង្កើតវេទិកាពាណិជ្ជកម្ម និងវិនិយោគរួមគ្នា នាពេលខាងមុខ ដើម្បីជំរុញការដោះដូរទំនិញ និងកិច្ចសហប្រតិបត្តិការពាណិជ្ជកម្មទ្វេភាគី។លោក ថុល ណារ៉ា អគ្គនាយករងពាណិជ្ជកម្មអន្តរជាតិ កាលសប្តាហ៍កន្លងទៅ បានទទួលជួបប្រតិភូចក្រភពអង់គ្លេសដែលដឹកនាំដោយលោក ស្ទូវើត ក្លេតុន (Stewart Clayton) ប្រធានទទួលបន្ទុកផ្នែកពាណិជ្ជកម្មចក្រភពអង់គ្លេសប្រចាំកម្ពុជា ដើម្បីផ្លាស់ប្តូរកិច្ចពិភាក្សាលើវឌ្ឍនភាព និងកាលានុវត្តភាពនៃក្របខណ្ឌកិច្ចសហប្រតិបត្តិការពាណិជ្ជកម្មទ្វេភាគី ជាពិសេសកិច្ចសម្រួលពាណិជ្ជកម្មរវាងប្រទេសទាំងពីរ។ក្នុងជំនួបខាងលើនេះ ភាគីកម្ពុជាបានលើកឡើងពីសារៈសំខាន់នៃចំណងមិត្តភាព និងទំនាក់ទំនងពាណិជ្ជកម្មទ្វេភាគីរវាងប្រទេសទាំងពីរជាពិសេស ខណៈពេលដែលប្រទេសទាំងពីរគ្រោងនឹងប្រារព្ធខួបអនុស្សាវរីយ៍ទំនាក់ទំនងការទូតរយៈពេល៧០ឆ្នាំ នៅក្នុងឆ្នាំ២០២៣ខាងមុខនេះ។ កម្ពុជា បានថ្លែងអំណរគុណដល់រដ្ឋាភិបាលអង់គ្លេសសម្រាប់ការផ្តល់ប្រព័ន្ធអនុគ្រោះពាណិជ្ជកម្មដល់ក្រុមប្រទេសអភិវឌ្ឍន៍តិចតួច រួមមាន៖ កម្ពុជាផងដែរ ដែលបានរួមចំណែកដល់ការអភិវឌ្ឍសេដ្ឋកិច្ចកម្ពុជា និងបានស្នើសុំឱ្យមានការជួយគាំទ្រដល់កម្ពុជាបន្ថែមក្នុងខណៈពេលដែលប្រទេសកម្ពុជានឹងចាកចេញពីក្របខណ្ឌប្រទេសអភិវឌ្ឍន៍តិចតួចនាពេលខាងមុខ។ ដើម្បីចាប់យកកាលានុវត្តភាពនៃពាណិជ្ជកម្មទ្វេភាគីនាពេលអនាគត ជាពិសេសលើការជំរុញទំនាក់ទំនងកាន់តែជិតស្និទ្ធិរវាងវិស័យឯកជននៃប្រទេសទាំងពីរ កិច្ចប្រជុំក៏បានពិភាក្សានិងពិនិត្យលទ្ធភាពរៀបចំអនុស្សរណៈនៃការយោគយល់គ្នារវាងកម្ពុជានិងចក្រភពអង់គ្លេស ស្តីពីការបង្កើតវេទិកាពាណិជ្ជកម្ម និងវិនិយោគរួមគ្នានាពេលខាងមុខ ដែលអនុស្សរណៈនៃការយោគយល់នេះនឹងក្លាយជាឧបករណ៍សម្រាប់តភ្ជាប់ទំនាក់ទំនង វឌ្ឍនភាពកិច្ចសហប្រតិបត្តិការ និងចែករំលែកនូវកាលានុវត្តភាពនានារវាងដៃគូធុរកិច្ចនៃប្រទេសទាំងពីរ។សូមគូសបញ្ជាក់ថា ទំហំពាណិជ្ជកម្មសរុបរវាងកម្ពុជា-ចក្រភពអង់គ្លេស ក្នុងរយៈពេល១១ខែដំបូងនៃឆ្នាំ២០២២ សម្រេចបានប្រមាណ ៨៣៧.៦៦ លានដុល្លារអាមេរិក ជាមួយនឹងកំណើនប្រមាណជិត ៧% បើធៀបទៅនឹងរយៈពេលដូចគ្នាក្នុងឆ្នាំ២០២១៕អត្ថបទ៖ ជា វណ្ណៈ

តម្លៃសាំងធម្មតា ៤,១០០រៀល និងម៉ាស៊ូត ៤,៤៥០រៀល ក្នុង១លីត្រ គិតចាប់ពីថ្ងៃទី១១ ដល់ថ្ងៃទី២០ ខែធ្នូ

ភ្នំពេញ៖ ក្រសួងពាណិជ្ជកម្ម បានចេញសេចក្តីជូនដំណឹងស្តីពីថ្លៃលក់រាយប្រេងឥន្ធនៈនៅតាមស្ថានីយ ដោយកំណត់តម្លៃតម្លៃសាំងធម្មតា ៤,១០០រៀល និងម៉ាស៊ូត ៤,៤៥០រៀល ក្នុង១លីត្រ គិតចាប់ពីថ្ងៃទី១១ ដល់ថ្ងៃទី២០ ខែធ្នូ។យោងលើការព្រមព្រៀង លើរូបមន្តកំណត់តម្លៃជាមួយក្រុមហ៊ុនប្រេងឥន្ធនៈដែលប្រកបអាជីវកម្មនៅកម្ពុជា ដោយផ្អែកលើការប្រែប្រួលនៃតម្លៃប្រេងឥន្ធនៈលើទីផ្សារក្នុងតំបន់ និងអន្តរជាតិ, ថ្លៃលក់រាយប្រេងឥន្ធនៈពីថ្ងៃទី១១ ដល់២០ ខែធ្នូ ឆ្នាំ២០២២ នឹងត្រូវលក់ ៤.៣៦៨រៀល/លីត្រ សម្រាប់សាំងធម្មតា EA92 និង ៤.៧១៨រៀល/លីត្រ សម្រាប់ប្រេងម៉ាស៊ូត។ដើម្បីជួយសម្រួលដល់ជីវភាពរបស់ប្រជាជន និងដោយមានការចូលរួមចំណែក ពីក្រុមហ៊ុនចែកចាយប្រេងឥន្ធនៈនៅកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចបញ្ចុះតម្លៃលក់រាយប្រេងឥន្ធនៈនៅកម្ពុជា ចំនួន៦,៥សេនដុល្លារ/លីត្រ ។ ដូច្នេះថ្លៃលក់រាយប្រេងឥន្ធនៈសម្រាប់អនុវត្ត ចាប់ពីថ្ងៃទី១១ ដល់២០ ខែធ្នូ ឆ្នាំ២០២២ នឹងចុះមក៤.១០០រៀល/លីត្រ សម្រាប់ សាំងធម្មតា និង៤.៤៥០រៀល/លីត្រ សម្រាប់ប្រេងម៉ាស៊ូត ។សូមបញ្ជាក់ថា ក្រសួងពាណិជ្ជកម្មមិនមែនជាអ្នកកំណត់ថ្លៃលកំរាយប្រេងឥន្ធនៈនៅកម្ពុជាទេ គឺក្រសួងគ្រាន់តែស្រង់តម្លៃឡើង-ចុះ នៃប្រេងតាមទីផ្សារអន្តរជាតិ មកគណនាតាមប្រកាសដូចមានក្នុងឯកសារយោងខាងលើតែប៉ុណ្ណោះ ៕ អត្ថបទ៖ ឈិត បូរ៉ាវី

រាជរដ្ឋាភិបាល រំពឹងខ្ពស់ លើការប្រមូលចំណូលពន្ធដារ ក្នុងឆ្នាំ ២០២៣

ភ្នំពេញ៖ នៅក្នុងឆ្នាំ ២០២៣ រាជរដ្ឋាភិបាល គ្រោងបង្កើនការប្រមូលចំណូលក្នុងវិស័យពន្ធដារ ខ្ពស់ជាងឆ្នាំ ២០២២ ដោយរំពឹងខ្ពស់ លើការប្រមូលចំណូលលើផ្នែកនេះ ស្របពេលអគ្គនាយកដ្ឋានមានការកែទម្រង់ល្អ និងការគ្រប់គ្រងដឹកនាំការប្រមូលចំណូលបានល្អ។ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ លើកឡើងនាចុងសប្តាហ៍ ក្នុងវិបស្សនាស្តីពីវឌ្ឍនភាពនៃប្រព័ន្ធគ្រប់គ្រងទិន្នន័យ សម្រាប់ផ្តល់សេវាតាមអនឡាញ (e-Tax Services) កន្លងមកថា នៅឆ្នាំក្រោយនេះ រាជរដ្ឋាភិបាលត្រូវការចំណាយថវិការខ្ពស់ ព្រោះនៅក្នុងឆ្នាំ ២០២៣ ជាឆ្នាំកម្ពុជាមានព្រិត្តិការណ៍ធំៗជាច្រើន ជាពិសេសការរៀបចំបោះឆ្នោត និងការរៀបចំព្រិត្តិការណ៍ស៊ីហ្គេម និងត្រូវការកញ្ចប់ថវិកាសម្រាប់គាំពារសង្គមជាដើម។នៅក្នុងឆ្នាំ ២០២៣ ខាងមុខ សម្រាប់វិស័យពន្ធដារ រាជរដ្ឋាភិបាលបានអនុម័ត តម្រូវឱ្យអគ្គនាយកដ្ឋានពន្ធដារ ប្រមូលចំណូលពន្ធផ្ទៃក្នុងក្នុងចំនួនប្រមាណជាង ១៤ ពាន់ប៊ីលានរៀល ត្រូវជាង ៣ ៥៧១ លានដុល្លារ កើនឡើងជាង ២៦ ភាគរយ ធៀបនឹងផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២ ដែលកំណត់ឱ្យពន្ធដារប្រមូលចំណូលក្នុងរង្វង់ជាង ១១ ពាន់ប៊ីលានរៀល ត្រូវជាង ២ ៨១៩ លានដុល្លារ។ជុំវិញការប្រមូលចំណូលនៅឆ្នាំ ២០២៣ នេះ នៅក្នុងសិក្ខាសាលាបូកសរុបលទ្ធផលប្រមូលចំណូលពន្ធប្រចាំខែ តុលា នាពេលកន្លងមក ឯកឧត្តម គង់ វិបុល បានបញ្ជាក់ពីការប្តេជ្ញាចិត្តថា បើទោះជាការកើនឡើងនៃផែនការប្រមូលចំណូលពន្ធក្នុងឆ្នាំ ២០២៣ ខ្ពស់ជាឆ្នាំ ២០២២ ប្រមាណជាង ៣ ០៤៦ ប៊ីលានរៀល ត្រូវជាង ៧៥២ លានដុល្លារ, ដែលជាចំនួនមួយកើនឡើងខ្ពស់ ហើយអាចនឹងនាំឱ្យការបំពេញបេសកកម្មរបស់អគ្គនាយកដ្ឋានពន្ធដារមានសភាពតានតឹងកាន់តែខ្លាំង តែទោះបីយ៉ាងណា អគ្គនាយកដ្ឋានពន្ធដារ នឹងព្យាយាមឱ្យអស់ពីលទ្ធភាព ដើម្បីបំពេញបេសកកម្មប្រមូលចំណូលពន្ធ អនុវត្តភារឲ្យបានល្អ ដើម្បីបន្តគាំទ្រ ចំពោះការអនុវត្តគោលនយោបាយនានារបស់រាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា៕អត្ថបទ៖ សុន រ៉ាឌី

អាជ្ញាធរតំបន់ព្រំដែនបញ្ជាក់ថា ការធ្វើស្រែងាយស្រួលទទួលផលច្រើន តែចំណេញតិច

កំពត៖ អាជ្ញាធរនៅតាមតំបន់ព្រំដែនកម្ពុជា-វៀតណាម បានឲ្យដឹងថា កសិកម្មជាវិស័យស្នូលមួយ ក្នុងការជួយលើកស្ទួយជីវភាពពលរដ្ឋ និងអភវិឌ្ឍន៍មូលដ្ឋាន។ ក្នុងនោះការបង្កបង្កើនផលស្រូវសំខាន់ជាងគេ ហើយបច្ចុប្បន្នស្រែងាយស្រួលធ្វើ និងទទួលបានផលច្រើនជាងមុន ១ហិកតា ៦តោន ប៉ុន្តែចំណេញតិច ព្រោះគ្មានទីផ្សារក្នុងស្រុក ហើយជី និងថ្នាំកសិកម្ម ឡើងថ្លៃរហូត។ មេឃុំព្រែកក្រើស លោក សេក ឈិន បានឲ្យដឹងថា ឃុំព្រែកក្រើសជាឃុំមួយផលិតស្រូវបានច្រើនជាងគេ ក្នុងស្រុកកំពង់ត្រាច ឃុំមានផ្ទៃដីស្រែ ចំនួន ១៦១៦ហិកតា ក្នុងនោះមានផ្ទៃដីធ្វើស្រែប្រាំង ៧៨៥ហិកតា។ លោក បានបញ្ជាក់ថា ការធ្វើស្រែបច្ចុប្បន្នប្រើកម្លាំងម៉ាស៊ីន ភ្ជួររាស់ សាប់ព្រោះ ច្រូតកាត់ បោកបែនមួយចប់ មិនពិបាកដូចមុនទេ ហើយក្នុងមួយឆ្នាំ ពលរដ្ឋខ្លះធ្វើបាន២ដង និងខ្លះ៣ដង ហើយទិន្នផលស្រូវ ១ហិកតា ៥ទៅ ៦តោន។ យ៉ាងណាក៏ដោយ លោកមេឃុំព្រែកក្រើស បានបញ្ជាក់អំពីផលវិបាកសម្រាប់កសិករធ្វើស្រែនៅតាមតំបន់ព្រំដែនថា ដោយសារតែយើងគ្មានទីផ្សារស្រូវក្នុងស្រុក ស្រូវទាំងអស់ត្រូវលក់ចេញទៅប្រទេសវៀតណាម ធ្វើឲ្យឈ្មួញវៀតណាម និងឈ្មួញកណ្តាល ទម្លាក់តម្លៃយើងពេលស្រូវប្រមូលផលបានច្រើន ម្យ៉ាងទៀតតម្លៃជី ឡើងថ្លៃរហូត។តាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទ ខេត្តកំពតមានផ្ទៃដីស្រែជាង ១៣ម៉ឺនហិកតា ដែលអាចប្រមូលផលបានរង្វង់ ៥០ម៉ឺនតោនក្នុងមួយឆ្នាំ។ ជាក់ស្តែងឆ្នាំ ២០២២នេះ ការប្រមូលផលស្រូវវស្សាបានជាង ២៨ម៉ឺនតោន លើផ្ទៃដីស្រែជាង ៨ម៉ឺនហិកតា ស្មើនឹង៦៤% នៃផ្ទៃដីបង្កបង្កើតផលសរុប៕អត្ថបទ៖ អន សារឹម

ទីផ្សារជ្រូករស់កំពុងងើបឡើងវិញ បន្ទាប់ពីការអន្តរាគមន៍នៃការនាំចេញរបស់ក្រសួងកសិកម្ម

ភ្នំពេញ៖ សមាគមអ្នកចិញ្ចឹមសត្វកម្ពុជា រំពឹងថា តម្លៃជ្រូករស់នឹងងើបឡើងវិញ នៅចុងឆ្នាំនេះ ឬដើមឆ្នាំក្រោយ ខណៈក្រសួងកសិកម្មរុក្ខាប្រមាញ់ និងនេសាទ បានអនុញ្ញាតជាគោលការណ៍ ឱ្យនាំចេញជ្រូករស់ទៅក្រៅប្រទេស។លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា លើកឡើង នៅថ្ងៃទី ៩ ខែ ធ្នូ ឆ្នាំ ២០២២ នេះថា នាពេលកន្លងមក ការផ្គត់ផ្គង់ជ្រូករស់លើទីផ្សារក្នុងស្រុក មានចំនួនច្រើន បានកកស្ទុះ និងស្របពេលមានការនាំចូលសាច់បង្កកមកពីប្រទេសជិតខាង ធ្វើឲ្យតម្លៃជ្រូករស់កាន់តែធ្លាក់ចុះ ដោយមានតម្លៃទាបជាង ៨០០០រៀល ក្នុងមួយគីឡូក្រាម។លោក បន្តថា បច្ចុប្បន្នដោយមានការអន្តរាគមន៍ពីក្រសួងកសិកម្ម រុក្ខាប្រមាញ់ និងនេសាទ សព្វថ្ងៃនេះ កម្ពុជាបានកំពុងធ្វើការនាំចេញជ្រូករស់ទៅប្រទេសវៀតណាម ក្នុងមួយថ្ងៃៗរាប់រយក្បាល ដែលជួយឱ្យតម្លៃជ្រូកក្នុងស្រុកងើបឡើងវិញ ។ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លើកឡើងថា បច្ចុប្បន្នក្រសួងសង្កេតឃើញថា ទីផ្សារជ្រូករស់នៅក្រៅប្រទេសមានតម្លៃខ្ពស់ ក្នុងនោះស្របពេលទីផ្សារចិញ្ចឹមជ្រូកនៅកម្ពុជាមានចំនួនច្រើន ជំរុញឲ្យមានការនាំចេញទៅកាន់ប្រទេសជិតខាង គឺដើម្បីបើកទីផ្សារនេះជួយដល់កសិករ មានទីផ្សារបន្ថែម ។ ឯកឧត្តម បន្តថា រាជរដ្ឋាភិបាលបានគិតគូរណាស់ និងបានជំរុញឲ្យមានការចុះកិច្ចព្រមព្រៀងពាណិជ្ជកម្មសេរីជាមួយប្រទេសចិន និងជាមួយកូរ៉េ ដែលនឹងចូលជាធរមានក្នុងពេលឆាប់ៗ គឺដើម្បីជំរុញដល់ការនាំចេញ ប៉ុន្តែកត្តាទាំងនោះ ត្រូវដោះស្រាយនូវរបាំងបច្ចេកទេស ពោលគឺទាមទារផលិតមានស្តង់ដារខ្ពស់ និងមានតម្លៃប្រកួតប្រជែង ទើបអាចឈានចូលទីផ្សារគេបាន។ក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗនេះ បានសម្រេចអនុញ្ញាតជាគោលការណ៍ឱ្យក្រុមហ៊ុនអង្គរ សុខសែនជ័យ ឯ.ក ប្រមូលទិញសត្វជ្រូករស់តាមបណ្តារាជធានី-ខេត្ត ក្នុងព្រះរាជាណាចក្រកម្ពុជា ចំនួន ២០ម៉ឺនក្បាល ដើម្បីនាំចេញទៅផ្គត់ផ្គង់ទីផ្សារប្រទេសវៀតណាម ថៃ និងប្រទេសចិន សម្រាប់រយៈពេល ៣ខែ ចាប់ពីថ្ងៃទី២១ ខែវិច្ឆិកា ឆ្នាំ២០២២ ដល់ថ្ងៃទី២០ខែកុម្ភៈ ឆ្នាំ២០២៣ ៕អត្ថបទ៖ សុន រ៉ាឌី

ការនាំចេញស្រូវទៅវៀតណាម តាមច្រកទ្វេភាគីតន់ហន់ខេត្តកំពត ធ្លាក់ចុះច្រើន

កំពត៖ មន្ត្រីប្រចាំការនៅច្រកទ្វារទ្វេភាគីតន់ហន់ ខេត្តកំពត បានបញ្ជាក់ថា ចាប់តាំងពីមានការផ្ទុះឡើង នៃជំងឺកូវីដ១៩មក ការនាំចេញស្រូវទៅប្រទេសវៀតណាម តាមច្រកតន់ហន់ បានធ្លាក់ចុះជាលំដាប់។ តាមរបាយការណ៍របស់មន្ទីរកសិកម្ម រយៈពេល១១ខែឆ្នាំ២០២២នេះ ស្រូវនាំចេញប្រមាណ ៤ម៉ឺនតោនប៉ុណ្ណោះ ខណៈដែលនៅឆ្នាំ២០២១ ការនាំស្រូវចេញមានចំនួនជាង ១០ម៉ឺនតោន។ នាយប៉ុស្តិ៍នគរបាលច្រកទ្វារទ្វេភាគីតន់ហន់ លោក វរសេនីយ៍ទោ នាក់ សុវណ្ណគិរី ជំនួសមុខឲ្យប្រធានច្រកទ្វារ បានប្រាប់ថា ចាប់ទាំងពីមានការផ្ទុះឡើង នៃជំងឺកូវីដ១៩ សកម្មភាពដោះដូរទំនិញតាមច្រកទ្វារទ្វេភាគីតន់ហន់ មានភាពស្ងប់ស្ងាត់ ពិសេសការនាំចេញស្រូវមានការថមថយច្រើន។ កាលពីមុនកូវីដ១៩ផ្ទុះឡើង រដូវកាលប្រមូលផលនេះ នៅច្រកមានរថយន្តដឹកស្រូវតម្រង់កន្ទុយគ្នា ដើម្បីនាំស្រូវចេញទៅវៀតណាម ប៉ុន្តែឥឡូវស្ងប់ស្ងាត់ ក្នុងមួយថ្ងៃមានរថយន្តដឹកស្រូវចេញជាង ១០គ្រឿងប៉ុណ្ណោះ ។ ប្រធានមន្ទីរកសិកម្ម រុក្ខាប្រមាញ់ និងនេសាទ លោក ចាន់ រិទ្ធ បានប្រាប់ឲ្យដឹងដែរថា តម្លៃស្រូវឆ្នាំនេះថេរល្អ ស្រូវអ៊ីអ៊ែ តម្លៃ៨៧០រៀលក្នុងមួយគីឡូក្រាម ស្រូវធ្ងន់ តម្លៃ១២០០រៀល ក្នុងមួយគីឡូក្រាម ហើយតម្លៃនេះមិនទាបជាងរាល់ឆ្នាំទេ ប៉ុន្តែការនាំចេញស្រូវទៅវៀតណាមតាមច្រកតន់ហន់ធ្លាក់ចុះ។ តាមរបាយការណ៍របស់មន្ទីរ រយៈពេល១១ខែឆ្នាំ២០២២នេះ ការនាំចេញស្រូវទៅវៀតណាម តាមច្រកតន់ហន់បាន ប្រមាណ៤ម៉ឺនតោនប៉ុណ្ណោះ ខណៈដែលឆ្នាំ២០២១ ការនាំចេញស្រូវបានជាង ១០ម៉ឺនតោន។ ឈ្មួញទិញលក់ស្រូវ បានប្រាប់ឲ្យដឹងថា តម្លៃស្រូវមិនសូវប្រែប្រួលនោះទេ ជាធម្មតាតម្លៃស្រូវស្ថិតនៅចន្លោះពី៨០០រៀល ទៅ១២៥០រៀលក្នុងមួយគីឡូក្រាម ទៅតាមប្រភេទស្រូវ។ ការធ្លាក់ចុះនៃការនាំចេញស្រូវទៅវៀតណាម តាមច្រកទ្វារទ្វេភាគីតន់ហន់នេះ បើតាមមន្ត្រីជំនាញបានបញ្ជាក់ថា ដោយសារច្រកនេះ ពិបាកទម្លាក់ស្រូវចុះទូកខាងវៀតណាម ទាមទារឲ្យឈ្មួញត្រូវមានកម្លាំងកម្មករខ្លួនឯង ហើយកន្លងមកឈ្មួញ និងពលរដ្ឋជាច្រើនបានស្នើសុំ ឲ្យរដ្ឋបាលខេត្តជួយសម្របសម្រួលភាគីវៀតណាម ដើម្បីបើកច្រកព្រៃទន្លេ ដែលទីនោះងាយស្រួល និងសំបូរកម្លាំងកម្មករ។ យ៉ាងណាក៏ដោយ ច្រកទ្វារទ្វេភាគីតន់ហន់ នៅតែដើរតួនាទីយ៉ាងសំខាន់ ក្នុងការជួយសម្រួលដល់ជីវភាពរស់នៅរបស់ប្រជាពលរដ្ឋទាំងសង់ ឲ្យប្រសើរឡើង តាមរយៈការដោះដូរទំនិញគ្នា៕អត្ថបទ៖ អន សារឹម

ការចរចាកិច្ចព្រមព្រៀងភាពជាដៃគូសេដ្ឋកិច្ច កម្ពុជា-អេមីរ៉ាតអារ៉ាប់រួមជុំទី២ នឹងធ្វើឡើងនៅខែធ្នូនេះ

ភ្នំពេញ៖ឯកឧត្ដម ប៉ាន សូរស័ក្ដិ រដ្ឋមន្រ្តីក្រសួងពាណិជ្ជកម្មកម្ពុជា បានដឹកនាំក្រុមការងារចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម (CAM-UAE CEPA) ចូលរួមកិច្ចប្រជុំចង្អៀតអន្តរក្រសួង តាមប្រព័ន្ធវីដេអូ ដើម្បីគោរពរាយការណ៍ជូន អំពីលទ្ធផលនៃការចរចាកិច្ចព្រមព្រៀង និងស្នើសុំគោលការណ៍សម្រាប់ការចរចាជុំបន្ត។ក្រសួងពាណិជ្ជកម្ម បានឲ្យដឹងថា កិច្ចប្រជុំចង្អៀតអន្តរក្រសួងនេះ បានប្រព្រឹត្តទៅ កាលពីរសៀលថ្ងៃទី៧ ធ្នូ ឆ្នាំ២០២២ក្រោមអធិបតីភាព ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុ។ប្រភពដដែល បានបន្តថា ក្រោយពីបានស្តាប់ការរាយការណ៍របស់ ឯកឧត្តម ប៉ាន សូរស័ក្តិ ជូនឯកឧត្តមអគ្គបណ្ឌិតសភាចារ្យ និងអង្គប្រជុំ អំពីប្រវត្តិសាវតា និងវឌ្ឍនភាពនៃការចរចាកិច្ចព្រមព្រៀងនេះ អង្គប្រជុំក៏បានពិភាក្សាលើសំណូមពរ និងបញ្ហានានារបស់ក្រុមការងារចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម និងបានទទួលអនុសាសន៍ណែនាំនិងសេចក្តីសម្រេច ពីឯកឧត្តមអគ្គបណ្ឌិតសភាចារ្យ លើចំណុចមួយចំនួនពាក់ព័ន្ធនឹងការចរចាលើអត្ថបទកិច្ចព្រមព្រៀង និងការបើកច្រកទីផ្សារពាណិជ្ជកម្មទំនិញ ពាណិជ្ជកម្មសេវា និងពាណិជ្ជកម្មតាមប្រព័ន្ធឌីជីថល សំដៅត្រៀមការចរចាជុំទី២ ដែលគ្រោងប្រព្រឹត្តិទៅ ចាប់ពីថ្ងៃទី១៩ ដល់២១ ខែធ្នូនេះ នៅកម្ពុជា។តាមឯកឧត្តមរដ្ឋមន្រ្តីក្រសួងពាណិជ្ជកម្ម បានបញ្ជាក់ថា សារៈសំខាន់ក្នុងការបន្តធ្វើសមាហរណកម្ម និងសហប្រតិបត្តិការសេដ្ឋកិច្ចរបស់កម្ពុជាទៅក្នុងតំបន់ និងសកលលោក ស្របតាមយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលកម្ពុជា ក្នុងគោលបំណងបន្តធ្វើពិពិធកម្មទីផ្សារនាំចេញសម្រាប់ផលិតផលកម្ពុជាឱ្យកាន់តែសំបូរបែប និងប្រសើរជាងមុន និងជាពិសេសចូលរួមចំណែកក្នុងការស្តារសេដ្ឋកិច្ចឡើងវិញក្រោយវិបត្តិជំងឺកូវីដ១៩ និងបង្កើតឱកាសការងារកាន់តែច្រើនជូនប្រជាពលរដ្ឋ៕អត្ថបទ៖ ឈិត បូរ៉ាវី

ADBផ្តល់ហិរញ្ញប្បទានដល់កម្ពុជា លើគម្រោងជំរុញវិស័យជលផលសមុទ្រ

ភ្នំពេញ៖ ធនាគារអភិវឌ្ឍន៍អាស៊ី(ADB) បានអនុម័តកញ្ចប់ហិរញ្ញប្បទាន ៧៣លានដុល្លារ ដើម្បីបង្កើនភាពធន់នឹងអាកាសធាតុ និងនិរន្តរភាពនៃជលផល តំបន់ឆ្នេរ និងសមុទ្រក្នុងប្រទេសកម្ពុជា។គម្រោងជលផលតំបន់ឆ្នេរ និងសមុទ្រប្រកបដោយនិរន្តរភាព នឹងត្រូវបានផ្តល់ហិរញ្ញប្បទានជា ប្រាក់កម្ចីចំនួន ៤១ លានដុល្លារពី ADB ជំនួយឥតសំណងចំនួន ២២ លានដុល្លារពីមូលនិធិអភិវឌ្ឍន៍អាស៊ីរបស់ ADB និងប្រាក់កម្ចីចំនួន ១០ លានដុល្លារពីមូលនិធិហេដ្ឋារចនាសម្ព័ន្ធអាស៊ាន ក្រោមកញ្ចប់ជំនួយ ASEAN Catalytic Green Finance Facility (ACGF) ។ ទីភ្នាក់ងារបារាំងដើម្បីអភិវឌ្ឍន៍ (Agence Française de Développement) ក៏នឹងផ្តល់ជាសហហិរញ្ញប្បទានប្រមាណ ២០លានដុល្លារ ដែលនឹងត្រូវគ្រប់គ្រងដោយ ADB ផងដែរ។លោក Alvin Lopez អ្នកឯកទេសជាន់ខ្ពស់ផ្នែកធនធានធម្មជាតិ និងកសិកម្មរបស់ ADB ប្រចាំតំបន់ អាស៊ីអាគ្នេយ៍មានប្រសាសន៍ថា «គម្រោងនេះ គឺជាការវិនិយោគដ៏សំខាន់លើកដំបូងរបស់ ADB លើ វិស័យជលផលសមុទ្រ ហើយក៏ជាជំហានដ៏សំខាន់មួយនៃផែនការសកម្មភាពសម្រាប់មហាសមុទ្រប្រកបដោយផាសុខភាព និងសេដ្ឋកិច្ចពណ៌ខៀវប្រកបដោយនិរន្តរភាព។ អនុវិស័យជលផលគឺជាធាតុផ្សំដ៏សំខាន់នៃសេដ្ឋកិច្ចរបស់ប្រទេសកម្ពុជា ដែលស្មើនឹង ៨% ទៅ ១០% នៃផលទុនជាតិសរុបរបស់ប្រទេស។ ជលផលសមុទ្រមាន ១៣% នៃអនុវិស័យ ជលផលប៉ុន្តែការនេសាទលើសកម្រិត និងហានិភ័យអាកាសធាតុ និងគ្រោះមហន្តរាយបាននាំឱ្យមានការថយចុះយ៉ាងខ្លាំង នៃបរិមាណត្រី ដែលបានជះឥទ្ធិពលដល់សហគមន៍ និងអាជីវកម្មនៅតាមឆ្នេរសមុទ្រ ហើយបណ្តាលឱ្យតម្លៃត្រីកើនឡើង។ គម្រោងនេះនឹងពង្រឹងវិស័យជលផលសមុទ្រក្នុងខេត្តជាប់មាត់ សមុទ្រ ចំនួនបួនរបស់កម្ពុជាគឺ កំពត កែប កោះកុង និង ព្រះសីហនុ ឈានចេញពីការធ្លាក់ចុះយ៉ាងគំហុកនៃ វិស័យជលផល លើកកម្ពស់ការចិញ្ចឹមត្រីសមុទ្រដោយនិរន្តរភាព និងលើកកម្ពស់ទីតាំងប្រមូលទុកផល នេសាទ ដើម្បីកែលម្អសុវត្ថិភាពអាហារសមុទ្រ។ មានការរំពឹងថា នៅក្រោមគម្រោងនេះជលផលក្បែរឆ្នេរ សមុទ្រប្រហែល ៤០% នឹងត្រូវបានបង្កើតឡើងវិញទៅជាសហគ្រាសប្រកបដោយផលិតភាព និង និរន្តរភាព។ គម្រោងនេះ នឹងជំរុញការអភិវឌ្ឍវិស័យឯកជនដោយបើកឱ្យសហគមន៍ឆ្នេរ និងអាជីវកម្មខ្នាតតូច ធ្វើពិពិធកម្មជីវភាពរស់នៅរបស់ពួកគាត់ ទទួលយកកាអនុវត្តប្រកបដោយនិរន្តរភាព និងរីកចម្រើនទៅជា សហគ្រាសរស់រវើក។ វាក៏នឹងគាំទ្រដល់ការពង្រឹងសេដ្ឋកិច្ចរបស់ស្ត្រី តាមរយៈការបង្កើនការចូលរួមរបស់ ស្ត្រីនៅក្នុងសហគ្រាសខ្នាតតូច និងមធ្យម។ ជាទូទៅគម្រោងនេះ នឹងផ្តល់អត្ថប្រយោជន៍ដល់ អង្គការ សហគមន៍នេសាទចំនួន ២៥ និងសមាជិកនៃតំបន់ការពារសហគមន៍ចំនួន ១៥ ដែលមានចំនួនជិត ២0.000គ្រួសារ ក៏ដូចជាសហគមន៍ឆ្នេរសមុទ្រទាំងមូលដែលមានប្រជាជនប្រហែល ២00,000 នាក់៕ អត្ថបទ៖ ដាវណ្ណ

បណ្ដាញសង្គម

ព័ត៌មានថ្មីៗ

អភិបាលខេត្តព្រះវិហារ៖ ត្រឹមថ្ងៃទី២៦ ខែកក្កដានេះមានពលរដ្ឋ ១១,៥៥៨ គ្រួសារនៃស្រុកជាំក្សាន្ត បានជម្លៀសចេញពីតំបន់គ្រោះថ្នាក់មកទីតាំងមានសុវត្ថិភាព

អាជ្ញាធរមីន អំពាវនាវដល់សហគមន៍អន្តរជាតិឈរជាមួយកម្ពុជា ថ្កោលទោសទង្វើអមនុស្សធម៌របស់ថៃឈ្លានពានកម្ពុជា ដោយប្រើប្រាស់គ្រាប់បែកចង្កោម

ទាហានឈ្លានពានថៃ បានទម្លាក់គ្រាប់លើផ្លូវចូលប្រាសាទព្រះវិហារ និងទីតាំងផ្សេងទៀតយ៉ាងសម្បើម

TOP STORY | សម្តេចធិបតី៖ ភាគីថៃបានឯកភាពសំណើរបស់ប្រធានាធិបតីដូណាត្រាំ ស្តីពីការឈប់បាញ់គ្នាជាមួយកម្ពុជា

TOP STORY | សម្ដេចធិបតី ហ៊ុន ម៉ាណែត ថ្លែងអំណរគុណចំពោះលោក ដូណាល់ ត្រាំ ដែលបានផ្តួចផ្តើមសម្របសម្រួល បទឈប់បាញ់ភ្លាមៗ រវាងកម្ពុជា និងថៃ ដោយគ្មានលក្ខខណ្ឌ ដើម្បីការពារអាយុជីវិតរបស់ទាហាន និងជនស៊ីវិលជាច្រើននាក់

ឯកឧត្តម គីម វីរៈ ដឹកនាំក្រុមការងារចុះពិនិត្យ និងនាំស្បៀងមួយចំនួនចែកជូនពលរដ្ឋភៀសសឹក ក្នុងខេត្តព្រះវិហារ

TOP STORY | ឯកឧត្តម ហេង រតនា៖ ចោរសៀមចិញ្ចឹមចិត្ត បើអញលួចប្លន់ប្រាសាទព្រះវិហារមិនបានទេ គឺត្រូវបំផ្លាញ និងកម្ទេចចោលតែម្តង!

TOP STORY | ក្រសួងការពារជាតិកម្ពុជា ប្រកាសច្រានចោល និងថ្កោលទោសយ៉ាងដាច់អហង្ការ ចំពោះការចោទប្រកាន់មិនពិត និងមានចរិតព្យាបាទពីសំណាក់ថៃ

TOP STORY | អ្នកនាំពាក្យសម្ដេចតេជោ៖ ថ្ងៃទី៣នៃសត្រូវឈ្លានពាន តេជោសែន បន្តផ្តល់ប្រឹក្សាយុទ្ធសាស្រ្តយោធាដល់សម្តេចធិបតី និងបណ្តាមេទ័ពដើម្បីវាយខ្មាំងដោយភាពហានក្លា

ឯកឧត្តម ឌិត ទីណា បន្តសួរសុខទុក្ខប្រជាពលរដ្ឋជម្លៀសពីតំបន់ព្រំដែនអូរបីជាន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877