BTV NEWS

ប្រតិបត្តិការការទូទាត់តាម QR Code នៅកម្ពុជា កំពុងពេញនិយមសម្រាប់អ្នកប្រើប្រាស់

ឯកឧត្តម ឌិត ទីណា លើកទឹកចិត្តសហគមន៍ និងក្រុមហ៊ុនបន្តស្មារតីសាមគ្គីភាព ដើម្បីទទួលផលចំណេញទាំងអស់គ្នាថែមទៀត

កម្ពុជា និងកូរ៉េ រួមគ្នាជំរុញការកាត់បន្ថយឧស្ម័នផ្ទះកញ្ចក់តាមរយៈការវិនិយោគមធ្យោបាយដឹកជញ្ជូន-អគ្គិសនី ឆ្ពោះទៅគោលដៅអព្យាក្រឹតកាបូនឆ្នាំ២០៥០

កសិករខេត្តកំពង់ធំជិតពីររយគ្រួសារទទួលផលចំណេញច្រើនក្រោយចងក្រងជាសហគមន៍កសិកម្មទំនើប

សេដ្ឋកិច្ច និង កសិកម្ម

កម្ពុជា-កូរ៉េ នឹងចុះហត្ថលេខាលើឥណទានសម្បទាន ក្នុងទំហំទឹកប្រាក់ជាង ១៥០០លានដុល្លារ

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា នៅថ្ងៃទី៩ ខែធ្នូ ឆ្នាំ២០២២ស្អែកនេះ នឹងអញ្ជើញជាអធិបតីនៅក្នុងពិធីចុះហត្ថលេខាស្តីពីការ ផ្ដល់ឥណទានសម្បទាន នៃមូលនិធិសហប្រតិបត្តិការអភិវឌ្ឍសេដ្ឋកិច្ច សម្រាប់ឆ្នាំ២០២២-២០២៦ ដែលមានទំហំទឹកប្រាក់ចំនួន ១៥០០លានដុល្លារអាមេរិក ។យោងតាមសេចក្តីប្រកាសព័ត៌មាន របស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី៨ ខែធ្នូ ឆ្នាំ២០២២ បានឲ្យដឹងថា ការចុះហត្ថលេខានេះ នឹងធ្វើឡើងរវាងឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងឯកឧត្តម ប៉ាក ហឹងឃ្យង ឯកអគ្គរដ្ឋទូត នៃសាធារណរដ្ឋកូរ៉េ ប្រចាំនៅកម្ពុជា ។សេចក្តីប្រកាសព័ត៌មាន បានបន្តថា ក្នុងពេលជាមួយគ្នានោះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រី Minnie CHEY ប្រធានមូលនិធិ សម្រាប់កិច្ចសហប្រតិបត្តិការអភិវឌ្ឍសេដ្ឋកិច្ច នៃធនាគារនីហ័រណអាហ័រណកូរ៉េប្រចាំកម្ពុជា ក៏នឹងចុះហត្ថលេខាលើកិច្ចព្រមព្រៀងឥណទានសម្បទាន សម្រាប់គម្រោងចំនួន២ ។ប្រភពបានបន្ថែមថា សម្រាប់គម្រោងចំនួន២នោះ រួមមាន ទី១. គម្រោងពង្រឹងសមត្ថភាពប្រព័ន្ធបណ្ដាញបញ្ជូនអគ្គិនសីនៅខេត្តព្រះសីហនុ ដែលមានទឹកប្រាក់ចំនួន ៧០លានដុល្លារ និងទី២. គម្រោងសាងសង់ស្ពានមិត្តភាពកម្ពុជា-កូរ៉េ (ផ្សារចាស់-ជ្រោយចង្វារ-អរិយក្សត្រ) ដែលមានទឹកប្រាក់ចំនួន ២៤៥ ៩០៩ ០០០ដុល្លារអាមេរិក ។គួរបញ្ជាក់ថា ឥណទានសម្បទាន ដែលផ្ដល់ដោយរដ្ឋាភិបាលកូរ៉េនេះ នឹងចូលរួមចំណែកដ៏សំខាន់ ដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការពន្លឿនការអភិវឌ្ឍសេដ្ឋកិច្ច ព្រមទាំងពង្រឹងបន្ថែមទៀត នូវទំនាក់ទំនងល្អ ដែលមានស្រាប់រវាងប្រជាជាតិទាំងពីរ ៕ អត្ថបទ៖ បាន សុខរិទ្ធិ

World Bank ព្យាករកំណើនសេដ្ឋកិច្ចកម្ពុជាឆ្នាំ២០២២ ក្នុងរង្វង់៤,៨ភាគរយ

ភ្នំពេញ៖ ធនាគារពិភពលោក ( World Bank ) បានព្យាករកំណើនសេដ្ឋកិច្ចកម្ពុជា ក្នុងឆ្នាំ២០២២នេះ ក្នុងរង្វង់ ៤,៨ភាគរយ ដោយគាំទ្រដោយកំណើននៃការនាំចេញ ផលិតផលកាត់ដេរ ស្បែកជើង ផលិតផលធ្វើដំណើរ និងកង់ជាពិសេសកំណើនចំនួនទេសចរអន្តរជាតិចូលទស្សនានៅកម្ពុជា។ក្នុងរបាយការណ៍បច្ចុប្បន្នភាពសេដ្ឋកិច្ចកម្ពុជា ក្រោមចំណងជើងថា Navigating Global Economic Headwinds ចេញផ្សាយនៅថ្ងៃទី៧ ខែធ្នូនេះ ធនាគារពិភពលោក លើកឡើងថា ការព្យាករកំណើន GDP ពិតប្រាកដរបស់កម្ពុជា ក្នុងរង្វង់ ៤,៨ ភាគរយក្នុងឆ្នាំ ២០២២ ដោយផ្អែកលើការងើបឡើងវិញនៃសេដ្ឋកិច្ចដែលមានលក្ខណៈទូលំទូលាយជាងមុន។ធនាគារពិភពលោក បន្តលើកឡើងថា ការកើនឡើងនៃការនាំចេញ-ជាពិសេសសម្លៀកបំពាក់ ស្បែកជើងទំនិញធ្វើដំណើរ និងការផលិតកង់ ការងើបឡើងវិញនៃឧស្សាហកម្មទេសចរណ៍ និងការវិលត្រលប់មកវិញនៃលំហូរ វិនិយោគដោយផ្ទាល់បរទេស បានជួយទ្រទ្រង់ការងើបឡើងវិញនៃសេដ្ឋកិច្ចនៅឆ្នាំនេះ។ទោះបីជាសេដ្ឋកិច្ចត្រូវបានគេរំពឹងថា នឹងពង្រីកបន្ថែមទៀតនៅឆ្នាំក្រោយ ដែលត្រូវបានគាំទ្រដោយការស្ទុះងើបឡើងវិញនៃការប្រើប្រាស់ក្នុងស្រុក ខណៈដែលអត្រាការងារមានភាពប្រសើរឡើង និងអតិផរណាធ្លាក់ចុះ រួមជាមួយនឹងការចំណាយរបស់រាជរដ្ឋាភិបាលក្នុងអំឡុងពេលបោះឆ្នោត ការព្យាករកំណើនពិតប្រាកដសម្រាប់ឆ្នាំ២០២៣ ត្រូវបានបន្ទាបមកត្រឹម ៥,២ ភាគរយដោយសារតែ ទស្សនវិស័យសកលមិនសូវអំណោយផល។ក្នុងរយៈពេលខ្លី សមតុល្យសារពើពន្ធត្រូវបានព្យាករថា នឹងបន្តធ្វើឱ្យមានលក្ខណៈធម្មតាឡើងវិញ បន្ទាប់ពីកំណើនដ៏រឹងមាំ និងការគ្រប់គ្រងប្រាក់ចំណូលកាន់តែប្រសើរឡើង។របាយការណ៍ ដដែល លើកឡើងថា អតិផរណាត្រូវបានគេរំពឹងថា នឹងធ្លាក់ចុះដល់ ៤,២ ភាគរយ និង៣,៨ ភាគរយនៅឆ្នាំ២០២៣ និ២០២៤ រៀងគ្នា ខណៈភាពក្រីក្រត្រូវបានគេរំពឹងថានឹងធ្លាក់ចុះដោយសារតែការស្តារសេដ្ឋកិច្ចដែលបានព្យាករ និងអតិផរណាកម្រិតមធ្យម៕ អត្ថបទ៖ វណ្ណៈ

កម្ពុជា-កូរ៉េ ចុះអនុស្សរណៈយោគយល់គ្នា លើកិច្ចសហការ និងពង្រឹងវិស័យពន្ធដារ

ភ្នំពេញ៖ អគ្គនាយកដ្ឋានពន្ធដារ និងរដ្ឋបាលសារពើពន្ធនៃសាធារណរដ្ឋកូរ៉េ បានចុះអនុស្សរណៈយោគយល់គ្នា នៃកិច្ចសហប្រតិបត្តិការបន្ថែម លើការអនុវត្តកិច្ចព្រមព្រៀង, ពង្រឹងការផ្លាស់ប្តូរព័ត៌មាន, ការផ្តល់វគ្គបណ្តុះបណ្តាលសម្រាប់មន្ត្រីពន្ធដារ, ការរៀបចំសិក្ខាសាលាជួយឱ្យធុរជនកូរ៉េនៅកម្ពុជា, បង្កើនការយល់ដឹងអំពីកាតព្វកិច្ច និងអនុលោមភាពពន្ធ។ការចុះអនុស្សរណៈយោគយល់គ្នា ធ្វើឡើងនៅក្រោមវត្តមាន របស់ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ និងឯកឧត្តម KIM CHANGKI អគ្គនាយកនៃរដ្ឋបាលសារពើពន្ធនៃសាធារណរដ្ឋកូរ៉េ នៅថ្ងៃទី ៦ ខែ ធ្នូ ឆ្នាំ ២០២២។ការចុះអនុស្សរណៈយោគយល់គ្នា ផ្តោតទៅលើកត្តាសំខាន់ៗពាក់ព័ន្ធវិស័យពន្ធដាររួមមាន៖ កិច្ចសហប្រតិបត្តិការបន្ថែមលើការអនុវត្តកិច្ចព្រមព្រៀង (DTA), ពង្រឹងការផ្លាស់ប្តូរព័ត៌មាន (EoI), ការផ្តល់វគ្គបណ្តុះបណ្តាលសម្រាប់មន្ត្រីពន្ធដារ (GDT) ក្នុងគោលបំណងធ្វើឱ្យប្រសើរឡើង នូវការគ្រប់គ្រងប្រកបដោយប្រសិទ្ធភាព និងសមត្ថភាពនៃការគ្រប់គ្រងពន្ធដារ, ការរៀបចំសិក្ខាសាលាជាប្រចាំ ដោយអគ្គនាយកដ្ឋានពន្ធដារ ដើម្បីជួយឱ្យធុរជនកូរ៉េ ដែលប្រកបធុរកិច្ចនៅកម្ពុជា បង្កើនការយល់ដឹងអំពីកាតព្វកិច្ច និងអនុលោមភាពពន្ធ ដោយក្នុងនោះអគ្គនាយកដ្ឋានពន្ធដារ មានបំណងចង់សិក្សាពីបទពិសោធន៍របស់រដ្ឋបាលសារពើពន្ធនៃសាធារណរដ្ឋកូរ៉េ លើផ្នែកបច្ចេកវិទ្យាព័ត៌មានដូចជា Artificial Intelligence (AI) និង Big Data ជាដើម។ពាក់ព័ន្ធវិស័យពន្ធដារនេះ, កម្ពុជា និងសាធារណរដ្ឋកូរ៉េ បានចុះហត្ថលេខាលើកិច្ចព្រមព្រៀង DTA ដោយជោគជ័យលើចុះហត្ថលេខា ចាប់ផ្តើមពីថ្ងៃទី ២៥ ខែវិច្ឆិកា ឆ្នាំ២០១៩ ដល់ថ្ងៃទី ១ ខែ មករា ឆ្នាំ ២០២២ ។ កិច្ចព្រមព្រៀងទ្វេភាគីនោះ បាននាំមកនូវផលប្រយោជន៍យ៉ាងច្រើនដល់អ្នកជាប់ពន្ធ និងអ្នកវិនិយោគនៃប្រទេសទាំងពីរ បច្ចុប្បន្នក្រុមហ៊ុនកូរ៉េចំនួន ១៩ នៅក្នុងព្រះរាជាណាចក្រកម្ពុជា បានកំពុងទទួលបានអត្ថប្រយោជន៍ពី DTA ហើយលើសពីនេះទៀត មានក្រុមហ៊ុនកូរ៉េជាច្រើន បានបន្តស្នើសុំអត្ថប្រយោជន៍ពី DTA គិតត្រឹមខែ វិច្ឆិកា ឆ្នាំ២០២នេះ សរុបមានចំនួន ៣៦ សំណើរ៕អត្ថបទ៖ សុន រ៉ាឌី

ADB អនុម័តប្រាក់កម្ចី៥០លានដុល្លា ដើម្បីគាំទ្រដល់រាជរដ្ឋាភិបាលកម្ពុជា ក្នុងការធ្វើពិពិធកម្មសេដ្ឋកិច្ច

ភ្នំពេញ៖ នៅថ្ងៃទី៦ ខែធ្នូ ឆ្នាំ២០២២ ធនាគារអភិវឌ្ឍន៍អាស៊ី (ADB) បានអនុម័តប្រាក់កម្ចីផ្អែកលើគោលនយោបាយចំនួន៥០លានដុល្លារ សម្រាប់កម្មវិធីពាណិជ្ជកម្ម និងសមត្ថភាពប្រកួតប្រជែង ដើម្បីគាំទ្រដល់រាជរដ្ឋាភិបាលកម្ពុជា ក្នុងការធ្វើពិពិធកម្មសេដ្ឋកិច្ច និងជំរុញសមត្ថភាពប្រកួតប្រជែងជាសកលរបស់ប្រទេស។ កម្មវិធីនេះនឹងគាំទ្រដល់ការស្តារសេដ្ឋកិច្ចក្រោយកូវីដ១៩ របស់កម្ពុជាតាមរយៈការជួយ ដល់កំណែទម្រង់របស់រាជរដ្ឋាភិបាល ដើម្បីបង្កើនការវិនិយោគ និងបរិយាកាសធុរកិច្ច ជំរុញកំណើនសហគ្រាសខ្នាតតូចនិងមធ្យម (MSMEs) និងកែលម្អគោលនយោបាយពាណិជ្ជកម្ម និងកិច្ចសម្រួលពាណិជ្ជកម្ម។សេដ្ឋវិទូជាន់ខ្ពស់របស់ ADB លោក Sion L. Morton មានប្រសាសន៍ថា «ជំងឺរាតត្បាតកូវីដ១៩ បានជះឥទ្ធិពលយ៉ាងធ្ងន់ធ្ងរដល់វិស័យសំខាន់ៗនៃសេដ្ឋកិច្ចកម្ពុជា ដូចជាវិស័យកាត់ដេរ ផលិតស្បែកជើង និងវាយនភណ្ឌ ក៏ដូចជាវិស័យទេសចរណ៍ និងសំណង់។ កំណែទម្រង់ក្រោមកម្មវិធីនេះនឹងជួយដល់គោលដៅស្តារឡើងវិញក្រោយជំងឺរាតត្បាតរបស់កម្ពុជា ដោយត្រួសត្រាយផ្លូវសម្រាប់អាជីវកម្មរីកចម្រើន និងឈានទៅរកផ្នែកតម្លៃបន្ថែមកាន់តែខ្ពស់ និងសម្របខ្លួនទៅនឹងទិដ្ឋភាពពាណិជ្ជកម្មដែលកំពុងផ្លាស់ប្តូរ»។កម្មវិធីពាណិជ្ជកម្ម និងសមត្ថភាពប្រកួតប្រជែង នឹងជួយកែលម្អបរិយាកាសធុរកិច្ចទាំងមូលសម្រាប់ក្រុមហ៊ុនក្នុងស្រុក និងក្រុមហ៊ុនបរទេស។ ទាក់ទងនឹងអនុកម្មវិធីដំបូងនេះ រាជរដ្ឋាភិបាលបានអនុម័តច្បាប់វិនិយោគថ្មី ដើម្បីផ្តល់កិច្ចការពារផ្លូវច្បាប់សម្រាប់អ្នកវិនិយោគ រួមទាំងអ្នកវិនិយោគនៅក្នុងតំបន់សេដ្ឋកិច្ចពិសេស និងបានធ្វើឱ្យប្រសើរឡើងនូវផតថលអាជីវកម្មតាមអ៊ីនធឺណិត ដើម្បីអាចឱ្យការចេញអាជ្ញាប័ណ្ណអាជីវកម្មឌីជីថលឯកទេសបានទាន់ពេលវេលា។កម្មវិធីនេះគាំទ្រដល់ការអភិវឌ្ឍន៍ និងការធ្វើពិពិធកម្ម MSMEs ធ្វើអោយប្រសើរឡើងនូវលទ្ធភាពទទួលបានហិរញ្ញវត្ថុ និងការបង្កើតទីផ្សារថ្មីសម្រាប់ពួកគេ។ វារួមបញ្ចូលទាំងការសម្រួលនិយមន័យផ្លូវច្បាប់នៃសហគ្រាសធុនតូច និងមធ្យម និងដាក់ចេញកញ្ចប់ជំនួយដែលផ្តល់មូលនិធិដោយរាជរដ្ឋាភិបាលដើម្បីផ្តល់ជំនួយ និងជំនួយបច្ចេកទេសដល់សហគ្រាសធុនតូច និងមធ្យមនៅក្នុងឧស្សាហកម្មអាទិភាពដែលមានការចូលរួមពីស្ត្រីច្រើន។កម្មវិធីនេះក៏នឹងជួយកម្ពុជាធ្វើឱ្យប្រសើរឡើងនូវការអនុវត្តកិច្ចព្រមព្រៀងពាណិជ្ជកម្មក្នុងតំបន់ និងពង្រឹងការងារសម្របសម្រួលពាណិជ្ជកម្ម ដើម្បីផ្តល់ឱកាសកាន់តែច្រើនសម្រាប់ធុរកិច្ចកម្ពុជាក្នុងការនាំចេញទំនិញរបស់ពួកគាត់។ ទាក់ទងនឹងកំណែទម្រង់ ក្រោមអនុកម្មវិធីទី១នេះ រាជរដ្ឋាភិបាលបានបង្កើតគណៈកម្មាធិការជាតិកិច្ចសម្រួលពាណិជ្ជកម្ម និងអនុម័តផែនទីបង្ហាញផ្លូវថ្នាក់ជាតិស្តីពីការសម្រួលពាណិជ្ជកម្ម៕

PATA និងក្រុមហ៊ុនទេសចរណ៍៥ប្រទេស ដើរព្យុះហយាត្រាឡើងភ្នំប្រាសាទព្រះវិហារ ផ្សព្វផ្សាយទេសចរណ៍

ព្រះវិហារ៖ ដោយមានការគាំទ្រពីក្រសួងទេសចរណ៍ ក្រសួងបរិស្ថាន និងក្រសួងវប្បធម៌ និងវិចិត្រសិល្បៈ និងអាជ្ញាធរមូលដ្ឋាន នៅថ្ងៃទី៤ ខែធ្នូ ចុងសប្តាហ៍កន្លងមកនេះ សមាគម PATA ប្រចាំនៅកម្ពុជា សមាគមទេសចរណ៍ប្រទេសថៃ និងក្រុមហ៊ុនទេសចរណ៍ចំនួន៥ប្រទេសទៀត បានរួមគ្នាធ្វើព្យុះហយាត្រាដើម្បីផ្សព្វផ្សាយបេតិកភណ្ឌជាលើកដំបូង ដើរថ្មើរជើងចម្ងាយផ្លូវ៧ គ.ម ឡើងភ្នំទៅកាន់ប្រាសាទព្រះវិហារ។បើតាមលោក ធួន ស៊ីណាន សមាគមទេសចរណ៍អាស៊ីប៉ាស៊ីភិច PATA ប្រចាំនៅកម្ពុជា ថ្លែងថា ការធ្វើព្យុះហយាត្រាក្នុងចំណោមអ្នកចូលរួមជាតិអន្តរជាតិប្រមាណជិត ៣០០នាក់ ដើរថ្មើរជើងឡើងភ្នំទៅកាន់ប្រាង្គប្រាសាទព្រះវិហារនេះ គឺធ្វើឡើងក្នុងគោលបំណងពង្រឹងកិច្ចទំនាក់ទំនងសមាគម និងក្រុមហ៊ុននានាក្នុងវិស័យទេសចរណ៍នៅកម្ពុជា និងមកពីថៃ មីយ៉ាន់ម៉ា ឥណ្ឌូនេស៊ី អេស្ប៉ាញ និងប្រទេសនានាទៀត ដើម្បីផ្សព្វផ្សាយគោលដៅទេសចរណ៍ខេត្តព្រះវិហារ និងការរៀបចំកញ្ចប់ទេសចរណ៍មកទស្សនាខេត្តព្រះវិហារឲ្យមានកំណើនឡើងវិញ។អ្នកចូលរួមដើរឡើងភ្នំប្រាសាទព្រះវិហារនៅក្នុងប្រទេសកម្ពុជា និងមកពីប្រទេសថៃ បានថ្លែងថា នៅក្រោយការរៀបចំព្រឹត្តិការណ៍ព្យុះហយាត្រា ដើម្បីបេតិកភណ្ឌនេះ គឺនឹងរួមគ្នា ខិតខំព្យាយាមផ្សព្វផ្សាយទេសចរជាតិអន្តរជាតិមកទស្សនាប្រាសាទព្រះវិហារ និងប្រាសាទបុរាណនានាទៀតនៅកម្ពុជា។ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ ថ្លែងថា នេះជាលើកដំបូងហើយ ដែលប្រាសាទព្រះវិហារ បានទទួលកម្មវិធីព្យុះហយាត្រា ដើរថ្មើរជើងឡើងទៅកាន់ប្រាសាទព្រះវិហារ ហើយតាមរយៈការព្រឹត្តិការណ៍នេះ នឹងទាញបាននូវអត្ថប្រយោជន៍ជាច្រើន ជាពិសេស ការផ្សព្វផ្សាយគោលដៅទេសចរណ៍ប្រាសាទព្រះវិហារមកទស្សនាកាន់តែច្រើន។លោក គង់ វិបុល ប្រធានមន្ទីរទេសចរណ៍ខេត្តព្រះវិហារ ថ្លែងថា ក្នុងរយៈពេល ១០ខែ ឆ្នាំ២០២២នេះ ខេត្តព្រះវិហារមានភ្ញៀវទេសចរក្នុងស្រុកទៅទស្សនាជិត ៣០ម៉ឺននាក់ ដោយភ្ញៀវអន្តរជាតិមកទស្សនាមានប្រមាណតែ ៦០០០នាក់ប៉ុណ្ណោះ៕អត្ថបទ ស៊ុម សុខជា

ទំហំពាណិជ្ជកម្មរវាងកម្ពុជា-ថៃ រំពឹងកើនឡើងជាង ១០ពាន់លានដុល្លារ នៅឆ្នាំក្រោយ

ភ្នំពេញ៖ ប្រធានសមាគមពាណិជ្ជកម្មថៃនៅកម្ពុជា រំពឹងថា ការធ្វើពាណិជ្ជកម្មកម្ពុជា-ថៃ នៅឆ្នាំ២០២៣ នឹងមានទំហំកើនឡើងជាង ១០ពាន់លានដុល្លារ ខ្ពស់ជាងឆ្នាំ ២០២២ ក្នុងរង្វង់ប្រមាណពីរ ១០ ទៅ ១៥% ខណៈប្រតិបត្តិអាជីវកម្ម ពាណិជ្ជកម្មប្រទេសទាំងពីរ បានកំពុងងើបល្អប្រសើរឡើងវិញ។លោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃនៅកម្ពុជា លើកឡើងនៅក្នុងថ្ងៃពិធីប្រារព្ធថ្ងៃបុណ្យជាតិ នៃព្រះរាជាណាចក្រថៃ នៅចុងសប្តាហ៍នេះមកថា នៅក្នុងពិធីថ្ងៃបុណ្យជាតិនេះ ក្រៅពីការរំលឹកដល់ព្រះ វិញ្ញាណនៃការយាងសោយទីមង្គត ព្រះមហាក្សត្រ ព្រះចៅ ភូមិបុល អាឌុលយ៉ាដេត ក៏ជាពិធីជួបជុំក្រុមធុរកិច្ច អ្នកធ្វើអាជីវកម្មនៅក្នុងព្រះរាជាណាចក្រកម្ពុជា ដែលជាពេលវេលាមួយយ៉ាងល្អ ដើម្បីពិភាក្សា ពិគ្រោះយោបល់ រវាងគ្នាទៅវិញទៅមក និងការផ្លាស់ប្តូរបទពិសោធន៍ផ្សេងៗ ដើម្បីស្ថាបនាលើចំណុចខ្វះខាត ក្នុងគោលដៅជម្រុញលើការធ្វើពាណិជ្ជកម្មប្រកបដោយជោគជ័យ។លោកស្រី បន្តថា ជុំវិញការធ្វើការធ្វើពាណិជ្ជកម្មនេះ នៅមុនវិបត្តិនៃការរីករាលដាលជំងឺកូវីដ ១៩ ការធ្វើពាណិជ្ជកម្មនៃប្រទេសទាំងពីរ បានបន្តងើបឡើងយ៉ាងល្អ តែបន្ទាប់ពីស្ថានភាពនៃការទប់ស្កាត់ការរីករាលដាលជំងឺកូវីដ ១៩ ដែលរាជរដ្ឋាភិបាលកម្ពុជា បានទប់ស្កាត់យ៉ាងល្អប្រសើរ និងប្រកបដោយទំនុកចិត្តខ្ពស់ បច្ចុប្បន្នវិនិយោគិនថៃបានចូលមកកម្ពុជា ជាបន្តបន្ទាប់ ដើម្បីស្វែងរកទីផ្សារ និងពង្រីកអាជីវកម្មថ្មីៗបន្ថែម។ ចំណែកលំហូរទំនិញ ក៏បានកំពុងប្រតិបត្តិការជាធម្មតាឡើងវិញ។សូមបញ្ជាក់ថា នៅក្នុងរយៈពេល ១០ ខែ ឆ្នាំ ២០២២ នេះ បើតាមទិន្នន័យក្រសួងពាណិជ្ជកម្មថៃ ការធ្វើការធ្វើពាណិជ្ជកម្មកម្ពុជា-ថៃ មានទំហំសរុបជាង ៨ ៥០០ លានដុល្លាសហរដ្ឋអាមេរិក ក្នុងនោះកម្ពុជានាំចេញទៅប្រទេសថៃ មានទំហំជិត ១ ពាន់លានដុល្លារ និងថៃនាំចូលមកវិញ មានចំនួនជាង ៧ ពាន់លានដុល្លារ៕អត្ថបទ៖ សុន រ៉ាឌី

កម្ពុជាកំពុងជំរុញការនាំចេញស្វាយស្រស់ទៅប្រទេសកូរ៉េ

ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ និងភាគីពាក់ព័ន្ធ កំពុងបន្តនីតិវិធីលើការនាំចេញផ្លែស្វាយស្រស់ទៅកាន់ទីផ្សារប្រទេសកូរ៉េខាងត្បូង ខណៈកិច្ចព្រមព្រៀងពាណិជ្ជកម្មសេរីទ្វេភាគីរវាងប្រទេសទាំងពីរ បានចូលជាធរមាន។ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីសប្តាហ៍កន្លងទៅនេះ ក្នុងឱកាសអញ្ញើញចូលរួមក្នុងពិធីបើកសិក្ខាសាលា ការនាំចេញផលិតផលចំណីអាហារទៅកាន់ទីផ្សារក្រៅប្រទេស បានមានប្រសាសន៍ថា អស់រយៈពេលប្រមាណជិត ១០ឆ្នាំហើយ ដែលកម្ពុជាបានសម្រេចការចចារ សម្រាប់ការនាំផ្លែស្វាយចេញទៅកាន់កូរ៉េខាងត្បូង ប៉ុន្តែតាំងពីពេលនោះមក រហូតមកដល់ពេលនេះ ផ្លែស្វាយកម្ពុជានៅតែមិនទាន់សម្រេចបានជាលទ្ធផលក្នុងការនាំចេញ ដោយសារវិស័យឯកជន មិនទាន់អាចធ្វើទៅបានលើហេដ្ឋារចនាសម្ព័ន្ធឡចំហាយទឹកក្តៅដើម្បីរំងាប់ពងដង្កូវនៅក្នុងផ្លែស្វាយ។បើតាមអ្នកជំនាញនៃក្រសួងកសិកម្ម រុក្ខាប្រមាញ់ និងនេសាទ ដំណើរការដែលកម្ពុជានឹងអាចនាំផ្លែស្វាយស្រស់ចេញទៅកាន់ទីផ្សារកូរ៉េខាងត្បូងបាន តម្រូវឲ្យចម្ការស្វាយមានទីតាំងវេចខ្ចប់ ឃ្លាំងត្រជាក់ និងកន្លែងធ្វើប្រព្រឹត្តកម្មភូតគាមអនាម័យ។ មន្រ្តីជំនាញរូបនេះ បានឲ្យដឹងទៀតថា ប្រទេសកូរ៉េ ទទួលយកតែតាមរយៈការដាំដុះ ការថែទាំ ប្រមូលផល ការកម្ចាត់សមាសភាពចង្រៃ និងវេចខ្ចប់ឲ្យបានត្រឹមត្រូវ និងស្របតាមស្តង់ដារកំណត់។ យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា គិតក្នុងរយៈពេល ១០ខែ ឆ្នាំ២០២២នេះ ការនាំចេញផ្លែស្វាយស្រស់ពីកម្ពុជាទៅទីផ្សារក្រៅស្រុក សម្រេចបានចំនួនប្រមាណ ១៣,៨ម៉ឺនតោន មានការធ្លាក់ចុះជាង ៣១% ប្រៀបធៀបរយៈពេលដូចគ្នាឆ្នាំ២០២១។ ក្នុងនោះ មាននាំចេញទៅប្រទេសវៀតណាម ចិន ថៃ ជប៉ុន រុស្ស៉ី សហរដ្ឋអាម៉េរិក កាហ្សាក់ស្ថាន និងហុងកុង -ល-៕អត្ថបទ៖ ឈិត បូរ៉ាវី

ឯកឧត្តម ស៊ុយ សែម ប្រកាសផ្អាកផ្ដល់អាជ្ញាប័ណ្ណរ៉ែថ្មសំណង់ នៅទូទាំងប្រទេស

ភ្នំពេញ៖ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានប្រកាសថា ចាប់ពីថ្ងៃទី២ ខែធ្នូ ឆ្នាំ២០២២នេះ ផ្អាកផ្ដល់អាជ្ញាប័ណ្ណ ការធ្វើអាជីវកម្មរ៉ែថ្មសំណង់ នៅទូទាំងប្រទេស ខណៈអាជីវកម្មមួយនេះ កំពុងប្រឈមនឹងបញ្ហាទីផ្សារ ។ក្នុងពិធីបើកសិក្ខាសាលាស្តីពី ការផ្សព្វផ្សាយលិខិតបទដ្ឋានគតិយុត្ត ពាក់ព័ន្ធនឹងការធ្វើប្រតិបត្តិការរ៉ែថ្មសំណង់ និងការប្រកាសស្តីអំពីការបង្កើតសមាគមអ្នកផលិតថ្មសំណង់កម្ពុជា នៅថ្ងៃទី២ ខែធ្នូ ឆ្នាំ២០២២ រដ្ឋមន្ត្រីក្រសួងរ៉ែ បានមានប្រសាសន៍ថា បច្ចុប្បន្ននេះ អាជីវកម្មថ្មសំណង់ កំពុងមានចំនួនលើសលុប ធ្វើឲ្យលើសតម្រូវការទីផ្សារ ដែលវាបានប៉ះពាល់ដល់អ្នកធ្វើអាជីវកម្មវិស័យនេះ ។ឯកឧត្តម បានបន្តថា ដូចនេះហើយ ដើម្បីសម្រួលដល់បញ្ហានេះ ក្រសួងរ៉ែ និងថាមពល សម្រេចផ្អាកការផ្ដល់អាជ្ញាប័ណ្ណការធ្វើអាជីវកម្មរ៉ែថ្មសំណង់បន្ថែមទៀតមួយរយៈសិន តែសម្រាប់លិខិតបែបបទស្នើសុំដាក់ដល់ក្រសួងហើយនោះ ត្រូវអនុញ្ញាតឲ្យចេញអាជ្ញាប័ណ្ណ ហើយលិខិតមិនទាន់ដល់ក្រសួង ត្រូវបានផ្អាក និងពេលមានតម្រូវការពេលណា នឹងប្រកាសអនុញ្ញាតឡើងវិញ ។ឯកឧត្តម ស៊ុយ សែម បន្ថែមថា នៅកម្ពុជាទោះបីជាសម្បូរទៅដោយភ្នំ ប៉ុន្តែមានតែខេត្តកំពង់ស្ពឺទេ ដែលមានថ្មភ្នំល្អ អាចយកមកធ្វើសំណង់បាន ខណៈខេត្តផ្សេងៗទៀតមានតិចតួចប៉ុណ្ណោះ ហើយរាល់អាជីវកម្មរ៉ែថ្មសំណង់ទាំងអស់ ត្រូវរៀបចំថ្មឲ្យមានគុណភាពល្អ ដើម្បីយកទៅប្រើប្រាស់ធ្វើសំណងផ្សេងៗបានយូរឆ្នាំ ព្រោះថា រាល់រ៉ែទាំងអស់ ដែលកាយយកមកហើយ មិនមានកកើតឡើងវិញនោះទេ ។ជាមួយគ្នានេះ រដ្ឋមន្ត្រីក្រសួងរ៉ែ បានប្រកាសទទួលស្គាល់សមាគមអ្នកផលិតថ្មសំណង់កម្ពុជា រួមទាំងបានអំពាវនាវ ដល់អ្នកធ្វើអាជីវកម្មរ៉ែថ្មសំណង់ ចូលរួមក្នុងសមាគមនេះទាំងអស់គ្នានៅទូទាំងប្រទេស ហើយកុំមានការបង្កើតសមាគមនៅតែខេត្តនីមួយៗទៀត ។លោកឧកញ៉ាវេជ្ជបណ្ឌិត តាន់ គឹមមេង ប្រធានសមាគមអ្នកផលិតថ្មសំណង់កម្ពុជា បានលើកឡើងថា ក្នុងរយៈពេលប៉ុន្មានឆ្នាំចុងក្រោយនេះ ជាពិសេសខេត្តជិតៗរាជធានីភ្នំពេញ បានប្រឈមមុខនូវបញ្ហាធំៗមួយចំនួន ដែលតម្រូវឲ្យអ្នកផលិតថ្មសំណង់មួយចំនួន ខាតមិនអាចឈរជើងដល់ការផ្អាក ឬឈប់សកម្មភាពផលិត ព្រោះមានការប្រកួតប្រជែងតម្លៃទីផ្សារខ្លាំងពេក ។លោក ឧកញ៉ា បញ្ជាក់ថា ពាក់ព័ន្ធនឹងបញ្ហានេះហើយ ទើបនាំឲ្យមានបង្កើតនូវសមាគមនេះឡើង ហើយសមាជិកសមាគមទាំងអស់ នឹងគោរពច្បាប់ បទដ្ឋានគតិយុត្ត ក្នុងការផលិត ឬយករ៉ែថ្មសំណង់ និងសាចរណែនាំរបស់ក្រសួងរ៉ែ និងថាមពល ៕ អត្ថបទ បាន សុខរិទ្ធិ

កម្ពុជាចម្រាញ់មាសសរុបបានជិត ៥តោនហើយ គិតមកដល់ចុងខែវិច្ឆិកានេះ

ភ្នំពេញ៖ ក្រុមហ៊ុនកំពុងធ្វើអាជីកម្មរ៉ែមាស នៅព្រះរាជាណាចក្រកម្ពុជា មានចំនួន ៤ ចម្រាញ់មាសសរុបបានជិត ៥តោនហើយ គិតមកដល់ចុងខែ វិច្ឆិកា ឆ្នាំ ២០២២ នេះ នៅក្នុងប្រតិបត្តិការរុករក និងការចម្រាញ់រ៉ែមាសរបស់ខ្លួន។ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល លើកឡើងនៅក្នុង ពិធីសំណេះសំណាលជាមួយនិវត្តជន នៃក្រសួងរ៉ែនិងថាមពល នៅថ្ងៃទី ៣០ ខែវិច្ឆិកា ឆ្នាំ២០២២ នេះថា ជុំវិញការធ្វើអាជីវកម្មរ៉ែមាសនេះ ក្នុងរយៈពេល ២ ទៅ ៣ឆ្នាំ ចុងក្រោយនេះ ក្រុមហ៊ុនដែលទទួលបានអាជ្ញាប័ណ្ណពីក្រសួងបានឈានទៅធ្វើអាជីវកម្មជាបណ្តើរៗ នៅតាមតំបន់ទីតាំងផ្សេងៗគ្នា ជាលក្ខណៈឧស្សាហកម្មខ្នាតតូចផង និងជាឧស្សាហកម្មខ្នាតធំផង។ទាក់ទងអាជីវកម្មរ៉ែមាសនេះ គិតមកដល់ចុងខែវិច្ឆិកា ឆ្នាំ ២០២២ ក្រុមហ៊ុនចំនួន ៤ ដែលកំពុងប្រតិបត្តិធ្វើអាជីវកម្មចម្រាញ់មាស សរុបបានជិត ៥ តោនមាសរួចហើយ ក្នុងនោះក្រុមហ៊ុន Xing Yuan Kanng Yeak ចម្រាញ់មាសបានចំនួន ២២ គីឡូក្រាម, ក្រុមហ៊ុន Xinshan Industrial Cambodia បាន ៤៥ គីឡូក្រាម, ក្រុមហ៊ុន Delcom Kampuchea ចំនួន ១៦០ គីឡូក្រាម ដោយក្រុមហ៊ុនទំាងបីនេះចម្រាញ់ចេញជាមាសទឹក១០ ។ ចំណែកក្រុមហ៊ុន Renaissance Minerals Investment ដែលជាក្រុមហ៊ុនឧស្សាហកម្មខ្នាតធំ ចម្រាញ់មាសទឹក ៩ បានចំនួនប្រមាណ ៤ ៥៩៨ គីឡូក្រាមផងដែរ។សូមបញ្ជាក់ថា៖ ក្រុមហ៊ុនដែលកំពុងធ្វើអាជីវកម្មរ៉ែមាសទាំង៤ ខាងលើ ក្នុងនោះ Renaissance Minerals Investment មានទីតាំងធ្វើអាជីវកម្ម និងចម្រាញ់មាស ស្ថិតនៅតំបន់អូរខ្វាវ ឃុំចុងផ្លាស់ ស្រុកកែវសីមា ខេត្តមណ្ឌលគីរី, ក្រុមហ៊ុន Xinshan Industrial Cambodia តំបន់ភ្នំម្លុង ឃុំរមទម ស្រុករវៀង ខេត្តព្រះវិហារ, ក្រុមហ៊ុន Xing Yuan Kanng Yeak នៅតំបន់អូរខ្លិកខ្លក់ ស្រុកសំបូរ ខេត្តក្រចេះ, និងក្រុមហ៊ុន Delcom Kampuchea មានទីតាំងនៅតំបន់ភ្នំអន្លុង ស្រុករវៀង ខេត្តព្រះវិហារ៕អត្ថបទ៖ សុន រ៉ាឌី

សម្ដេចតេជោ៖ ក្រុមហ៊ុន TOYOTA នឹងដំឡើងរោងចក្រនៅក្នុងតំបន់សេដ្ឋកិច្ចពិសេសភ្នំពេញ

ភ្នំពេញ៖ សម្ដេចតេជោ ហ៊ុន សែន បញ្ជាក់ឲ្យដឹងថា ក្នុងពេលខាងមុខនេះ កម្ពុជានឹងទទួលបានរោងចក្រផ្គុំ និងដំឡើងរថយន្តរបស់ក្រុមហ៊ុន តូយូតា ថ្មីមួយទៀត នៅក្នុងតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ ដែលកត្តាទាំងនេះ គឺបានកើតចេញពីកត្តានៃសន្តិភាព។សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍លើកឡើងនៅក្នុងពិធីអបអរសាទរខួប១១ឆ្នាំ នៃប្រតិបត្តិការរបស់ក្រុមហ៊ុនមីនេបៀ Minebea(Cambodia) នៅថ្ងៃទី ១ ខែធ្នូ ឆ្នាំ២០២២ នេះថា ពាក់ព័ន្ធបញ្ហាហេដ្ឋារចនាសម្ព័ន្ធ, បញ្ហាធនធានមនុស្ស និងទាក់ទងបញ្ហាតម្លៃអគ្គិសនី រាជរដ្ឋាភិបាលបានដោះស្រាយរួចហើយ ប៉ុន្តែរឿងដែលធំជាងគេ គឺត្រូវតែថែរក្សាសន្តិភាពឲ្យបាន ទើបកម្ពុជាអាចរក្សាបណ្តាក្រុមហ៊ុនដែលកំពុងមានស្រេច និងការទាក់ទាញក្រុមហ៊ុនថ្មីៗមកវិនិយោគនៅកម្ពុជាបន្ថែម ។ទាក់ទងការដំឡើងរថយន្តនេះ, សម្ដេចតេជោ ហ៊ុន សែន បន្តឲ្យដឹងថា នៅពេលជួបសន្ទនារវាងសម្ដេច និងនាយករដ្ឋមន្រ្តីជប៉ុន គឺឯកឧត្តម ហ៊្វូមីអូ គីស៊ីដា នៅទីក្រុងតូក្យូ ក្នុងពេលសម្តេចអញ្ជើញបុណ្យសព អតីតនាយករដ្ឋមន្រ្តី ឯកឧត្តម ហ្ស៊ិនស៊ូ អាបេ ក្នុងនោះឯកឧត្តម ហ៊្វូមីអូ គីស៊ីដា ស្នើឲ្យកម្ពុជាគាំទ្រនៃគម្រោងបង្កើតផ្គុំ និងដំឡើងរថយន្ត ។ សម្ដេចតេជោ បន្ថែមថា ដូច្នេះនៅមិនឆ្ងាយពីរោងចក្រ Minebea(Cambodia) គឺនឹងមានរោងចក្រផ្គុំ និងដំឡើងរថយន្ត តូយ៉ូតា ថ្មីមួយទៀតកើតនៅក្នុងតំបន់នេះ ។សម្តេចតេជោ នាយករដ្ឋមន្ត្រី បានបញ្ជាក់ថា ជុំវិញការផ្គុំ និងដំឡើងរថយន្តនេះ កម្ពុជាទទួលបានក្រុមហ៊ុនមួយចំនួនរួចហើយដូចជា ក្រុមហ៊ុនផ្គុំ និងដំឡើងរថយន្ត Hyudai នៅខេត្តកុងកោះ ក្រុមហ៊ុន RMA Cambodia ផ្គុំ និងដំឡើងរថយន្ត FORD នៅខេត្តពោធិ៍សាត់, គម្រោងដំឡើងរថយន្ត ISUZU របស់ក្រុមហ៊ុន K (CAMBODIA) CO., LTD នៅខេត្តកំពង់ស្ពឺ និងក្នុងពេលខាងមុខនេះ កម្ពុជានឹងមានរោងចក្រផ្គុំ និងដំឡើងរថយន្តថ្មីមួយរបស់ក្រុមហ៊ុន តូយូតា ដែលកត្តាទាំងអស់នេះ កម្ពុជាមិនត្រឹមពង្រីកក្រុមហ៊ុនដែលមានស្រាប់នៅទីនេះទេ គឺកម្ពុជាទាក់ទាញបានក្រុមថ្មីៗជាច្រើនទៀត ឲ្យមកបណ្តាក់ទុនជាបន្តបន្ទាប់៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

TOP STORY | ឯកឧត្តម ហេង រតនា៖ ចោរសៀមចិញ្ចឹមចិត្ត បើអញលួចប្លន់ប្រាសាទព្រះវិហារមិនបានទេ គឺត្រូវបំផ្លាញ និងកម្ទេចចោលតែម្តង!

TOP STORY | ក្រសួងការពារជាតិកម្ពុជា ប្រកាសច្រានចោល និងថ្កោលទោសយ៉ាងដាច់អហង្ការ ចំពោះការចោទប្រកាន់មិនពិត និងមានចរិតព្យាបាទពីសំណាក់ថៃ

TOP STORY | អ្នកនាំពាក្យសម្ដេចតេជោ៖ ថ្ងៃទី៣នៃសត្រូវឈ្លានពាន តេជោសែន បន្តផ្តល់ប្រឹក្សាយុទ្ធសាស្រ្តយោធាដល់សម្តេចធិបតី និងបណ្តាមេទ័ពដើម្បីវាយខ្មាំងដោយភាពហានក្លា

ឯកឧត្តម ឌិត ទីណា បន្តសួរសុខទុក្ខប្រជាពលរដ្ឋជម្លៀសពីតំបន់ព្រំដែនអូរបីជាន់

ក្រុមយុវជននាំគ្នារៀបចំចម្អិនម្ហូបជូនជនភៀសសឹក ដែលគេចពីតំបន់សមរភូមិវាយប្រហាររបស់កងទ័ពថៃ ក្នុងខេត្តឧត្តរមានជ័យ

សិក្ខាកាមវគ្គអប់រំនយោបាយកម្រិត១វគ្គជំនាន់៨១របស់គណបក្សប្រជាជនកម្ពុជានាំយកអំណោយចែកជូននគរបាលការពារបេតិកភណ្ឌប្រាសាទព្រះវិហារ

ប្រធាន IAEA ត្រូវលើកទឹកចិត្តដោយការសម្រេចចិត្តរបស់អ៊ីរ៉ង់ ឲ្យមកទស្សនកិច្ចប្រទេសនេះ នៅប៉ុន្មាន សប្តាហ៍ខាងមុខ

មនុស្សយ៉ាងតិច ៨នាក់ បានស្លាប់ និង ១៣នាក់ បានរងរបួស នៅក្នុងការវាយប្រហារ «ភេរវកម្ម» នៅភាគអាគ្នេយ៍អ៊ីរ៉ង់

ខ្មែរជួយខ្មែរ៖ ក្រសួងកសិកម្ម បន្តនាំយកបន្លែចំនួន ៣តោនបន្ថែមទៀតជូនប្រជាពលរដ្ឋនៅជំរុំភៀសសឹកខេត្តឧត្ដរមានជ័យ

ប្រជាជនប៉ាឡេស្ទីនដែលបានភៀសខ្លួន ប្រឈមនឹងការបំភិតបំភ័យ និងការវាយប្រហារជាថ្មី នៅពេលទៅទទួលជំនួយ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877