BTV NEWS

ជប៉ុនស្វែងយល់ពីទិដ្ឋភាពទូទៅនៃគោលនយោបាយរបស់កម្ពុជា លើការអភិវឌ្ឍសង្គម-សេដ្ឋកិច្ច

ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប

កម្ពុជាផ្សព្វផ្សាយជាផ្លូវការ របាយការណ៍វឌ្ឍនភាពនៃការអនុវត្តវិធានការកែទម្រង់មុតស្រួចជាកញ្ចប់

មកដល់ពេលនេះ កសិករចំនួនជាង ១៤០០គ្រួសារ ងាកមកចងក្រងគ្នា ដើម្បីក្លាយជាសហគមន៍កសិកម្មទំនើប

សេដ្ឋកិច្ច និង កសិកម្ម

រាជរដ្ឋាភិបាលសម្រេចបង្កើតសហព័ន្ធស្វាយចន្ទីកម្ពុជា ដើម្បីលើកកម្ពស់ការដាំដុះកែច្នៃ និងនាំចេញ

ភ្នំពេញ៖ អន្តរក្រសួងបានចាប់ផ្តើមប្រជុំអនុម័តសេចក្តីព្រាងចុងក្រោយ ដើម្បីបង្កើតរចនាសម្ព័ន្ធដឹកនាំ និងគ្រប់គ្រងដើម្បីជួយលើកកម្ពស់ផលិតផល ស្វាយចន្ទីនៅកម្ពុជា ខណៈផលិតផលនេះ គឺជាផលិតផលមានសក្តានុពលសម្រាប់សេដ្ឋកិច្ច។សន្និបាតកំណើតដំបូងនៃសហព័ន្ធស្វាយចន្ទីកម្ពុជា ត្រូវបានធ្វើឡើង នៅថ្ងៃទី១០ ខែតុលានេះដើម្បីពិភាក្សា និងអនុម័តសេចក្តីព្រាងចុងក្រោយនៃលក្ខន្តិកៈសហព័ន្ធស្វាយចន្ទីកម្ពុជាដែលត្រូវបានរៀបចំ និងកែលម្អដោយក្រុមការងារ បន្ទាប់ពីបានប្រមែប្រមូល និងបញ្ចូលធាតុចូលដែលទទួលបានពីសិក្ខាសាលាណែនាំ និងប្រឹក្សាយោបល់ថ្នាក់តំបន់ មានចំនួនពីរលើក ដែលបានធ្វើឡើងនៅក្នុងខែធ្នូ ឆ្នាំ២០២១ កន្លងមកនេះ។ ចំណែកទាក់ទងនឹងការបង្កើតរចនាសម្ព័ន្ធដឹកនាំ និងគ្រប់គ្រង គឺធ្វើឡើងតាមរយៈដំណើរការបោះឆ្នោតដោយសន្និបាត ដើម្បីពិភាក្សា និងអនុម័តលើផែនការការងារ របស់សហព័ន្ធស្វាយចន្ទីកម្ពុជា សម្រាប់ឆ្នាំខាងមុខ។ លទ្ធផលនៃសន្និបាតកំណើតដំបូងនេះ នឹងត្រូវបានចងក្រងជាឯកសារ និងរៀបចំជារបាយការណ៍ដែលជាឯកសារចាំបាច់សម្រាប់ការចុះបញ្ជី ជាផ្លូវការនៅទៅក្រសួងមហាផ្ទៃ។សន្និបាតកំណើតដំបូងនសហព័ន្ធស្វាយចន្ទីកម្ពុជា គឺមានការចូលរួមពីកសិករផលិតស្វាយចន្ទីប្រមាណពី ៤០-៥០នាក់ ដែលជាអ្នកដឹកនាំ ឬតំណាងមកពីសមាគមស្វាយចន្ទីកម្ពុជា សហគមន៍កសិកម្ម ឬក្រុមអ្នកផលិតស្វាយចន្ទីនៅក្នុងខេត្តទាំង ១០ ដែលផលិតស្វាយចន្ទីធំជាងគេនៅកម្ពុជា គឺខេត្តកំពង់ធំ ព្រះវិហារ សៀមរាប ស្ទឹងត្រែង រតនគិរី មណ្ឌលគិរី ក្រចេះ ឧត្តរមានជ័យ កំពង់ចាម និងត្បូងឃ្មុំ។ តំណាងក្រុមហ៊ុនឯកជន មកពីក្រុមហ៊ុនកែច្នៃ និងក្រុមហ៊ុនពាណិជ្ជកម្មស្វាយចន្ទី និងអ្នកផ្គត់ផ្គង់ធាតុចូលកសិកម្ម ប្រមាណពី២៥ ទៅ៣០នាក់ ដែលជាតួអង្គនៃខ្សែច្រវាក់តម្លៃស្វាយចន្ទីនឹងត្រូវបានអញ្ជើញឱ្យចូលរួមក្នុងអង្គសន្និបាតកំណើតដំបូងនេះ៕

ភ្ញៀវទេសចរចូលមកលេងក្រុងព្រះសីហនុច្រើនកុះករ ដោយសារការបើកល្បឿនលឿនមិនគិតលុយ

ព្រះសីហនុ៖ ភ្ញៀវទេសចរច្រើនកុះករចូលមកលេងកម្សាន្ដក្រុងព្រះសីហនុ ធ្វើឱ្យមានការកកស្ទះចរាចរណ៍នៅតាមផ្លូវឆ្នេរ តែអាជីវករលក់ដូរនៅតាមតំបន់ឆ្នេរមានការសប្បាយចិត្តក្នុងការផ្ដល់សេវាកម្មទេសចរណ៍ (លក់ដូរចំណីអាហារ) នៅថ្ងៃឈប់សម្រាកចុងសប្តាហ៍ ថ្ងៃទី៨-៩ ខែតុលា ឆ្នាំ២០២២។អាជីវករលក់ដូរនៅឆ្នេរអូរឈើទាលក្រុងព្រះសីហនុ បានលើកឡើងថា ពួកគាត់សប្បាយរីករាយដែលឃើញភ្ញៀវទេសចរ មកលេងកម្សាន្ដច្រើនកុះករនៅចុងសប្ដាហ៍នេះ។ចំពោះតម្លៃសេវាកម្មហូបចុក គឺលក់ដូចថ្ងៃធម្មតាទៅតាមសៀវភៅបញ្ជីមុខម្ហូប ដែលបានកំណត់ចាប់ពី ៥ដុល្លារ រហូតជាង ១០ដុល្លារ ឬលើសពីនេះ ទៅតាមតម្រូវការរបស់ភ្ញៀវ។ កន្លងមក ពួកគាត់ បានទទួលការបណ្ដុះបណ្ដាលវគ្គខ្លីពីបដិសណ្ឋាកិច្ចល្អ និងការផ្ដល់គុណភាពសេវាកម្មជូនភ្ញៀវទេសចរ ដែលត្រូវបានរៀបចំ ឡើងដោយមន្ទីរទេសចរណ៍ខេត្ដព្រះសីហនុ ដូច្នេះពួកគាត់យល់ដឹងច្បាស់អំពីការរាក់ទាក់ភ្ញៀវ ឬការទទួលភ្ញៀវ ធ្វើយ៉ាងម៉េច ទាក់ទាញភ្ញៀវឱ្យមកលេងច្រើន។ ភ្ញៀវខ្លះ ពួកគាត់ មកមុជទឹកលេងលម្ហែនៅតាមឆ្នេរ ហូបចុកចំណីអាហារហើយ ក៏ត្រឡប់ទៅភ្នំពេញវិញ ព្រោះគេជិះតាមផ្លូវល្បឿនលឿន ដោយមិនបង់ប្រាក់ហើយផ្លូវល្អ។ពិតណាស់នៅសប្ដាហ៍នេះ មានភ្ញៀវទេសចរចូលមកលេងលម្ហែកម្សាន្ដច្រើនកុះករ ដោយសារផ្លូវល្បឿនលឿនបានបើកឱ្យ ពលរដ្ឋប្រើប្រាស់សាកល្បងមិនគិតលុយរយៈពេល១ខែ ដែលងាយស្រួលដល់ភ្ញៀវក្នុងការធ្វើដំណើរមកលេងកម្សាន្ដនៅ ខេត្ដព្រះសីហនុច្រើនបែបនេះ។ចំពោះទិន្នន័យទូរលេខចំនួនភ្ញៀវ ដែលបានចូលមកលេងកម្សាន្ដនៅខេត្ដព្រះសីហនុ ចំនួនប៉ុន្មាន មិនទាន់មាននៅឡើយ ដោយលោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុ បានប្រាប់ថា “មិនធ្វើការបូកសរុបចុងសប្ដាហ៍ទេ តែលោកធ្វើការបូកសរុបភ្ញៀវប្រចាំសប្ដាហ៍”។

ទេសចរអន្តរជាតិមកទស្សនាកម្ពុជា តាមកញ្ចប់ទេសចរណ៍កើនជាង៣០% ក្នុងរយៈពេល២ខែកន្លងមកនេះ

ភ្នំពេញ៖ ចាប់តាំងពីរាជរដ្ឋាភិបាលកម្ពុជា បានប្រកាសបើកប្រទេសបើកទេសចរណ៍ ហើយចុងក្រោយនេះកម្ពុជាដកចេញវិធានការប្រកាសសុខភាពលើអ្នកដំណើរអន្តរជាតិ និងបណ្ណវ៉ាក់សាំងកូវីដ១៩ ក្រសួងទេសចរណ៍សំគាល់ឃើញថា ចាប់ពីខែសីហាដល់ខែកញ្ញាកន្លងមកនេះ ទេសចរអន្តរជាតិមកទស្សនាកម្ពុជាតាមកញ្ចប់ទេសចរណ៍គឺមានការកើនឡើងល្អជាងបណ្តាខែមុនៗ។បើតាមលោក ឈុន មករា ប្រធាននាយកដ្ឋានទីភ្នាក់ទេសចរណ៍ ដឹកជញ្ជូន និងមគ្គុទ្ទេសក៍ទេសចរណ៍ បានថ្លែងនៅថ្ងៃទី៦ ខែកញ្ញាឆ្នាំ២០២២នេះថា នៅក្នុងកំណើនភ្ញៀវទេសចរអន្តរជាតិមកកម្ពុជា ក្នុងរយៈពេល៩ខែឆ្នាំ២០២២ មានប្រមាណជាង១លាន២សែននាក់នោះ សំគាល់ឃើញថា មានតែក្នុងរយៈពេល២ខែចុងក្រោយនេះពោលគឺខែសីហា និងខែកញ្ញានេះ ដែលកម្ពុជាបានទទួលភ្ញៀវទេសចរអន្តរជាតិបានមកទស្សនាកម្ពុជា តាមកញ្ចប់ទេសចរណ៍មានកំណើនល្អប្រសើរជាងបណ្តាខែមុនៗកន្លងមក ហើយយើងរំពឹងថា ក្នុងឆ្នាំ២០២២នេះ នឹងមានភ្ញៀវអន្តរជាតិមកទស្សនាកម្ពុជា តាមកញ្ចប់ទេសចរណ៍ប្រមាណ៤០% បើប្រៀបធៀបនឹងឆ្នាំ២០១៩ដែលឆ្នាំមិនទាន់មានកូវីដរាតត្បាត។បើតាមលោក រឿន ភូមិរ៉ា ប្រធានក្រុមហ៊ុនទេសចរណ៍ តាខ្មៅ ហូលីដេ បានថ្លែងថា សម្រាប់ក្រុមហ៊ុនការីទេសចរណ៍លោកក្នុងនៅក្នុងខែកញ្ញានេះ មានទេសចរអន្តរជាតិបានកក់ទិញដើរកញ្ចប់ទេសចរណ៍មានកំណើនប្រមាណ៣០%ធៀបឆ្នាំ២០១៩ ។លោកស្រី ឆាយ សៀវលីន ប្រធានសមាគមន៍ទីភ្នាក់ទេសចរណ៍កម្ពុជា CATA ថ្លែងថា ចាប់តាំងពីរាជរដ្ឋាភិបាលប្រកាសបើកប្រទេសមក ភ្ញៀវទេសចរអន្តរជាតិបានកក់ទិញកញ្ចប់ទេសចរណ៍មកទស្សនាកម្ពុជានៅក្នុងអំឡុងខែកញ្ញានេះមានចំនួនច្រើន ហើយចំនួននេះនឹងកើនជាបន្តបន្ទាប់ទៀតរហូតខែមេសាឆ្នាំ២០២៣។លោកស្រី ឆាយ សៀវលីន បន្តថា យ៉ាងណាក៏ដោយ ក្នុងចំណោមក្រុមហ៊ុនការីទេសចរណ៍ដែលបានព្យួរអាជីវកម្ម មកដល់ពេលនេះ មានក្រុមហ៊ុនការីទេសចរណ៍ប្រមាណជាង ២០០ក្រុមហ៊ុនបានបើកដំណើរការអាជីវកម្មឡើងវិញ ហើយគេកំពុងមានភាពមមាញឹកខ្លាំងក្នុងទំនាក់ទំនងភ្ញៀវអន្តរជាតិ និងរៀបចំកញ្ចប់ទេសចរណ៍តម្លៃសមរម្យជូនភ្ញៀវទេសចរអន្តរជាតិមកទស្សនាកម្ពុជា នៅក្នុងខែបន្តបន្ទាប់នេះទៀតផងដែរ៕អត្ថបទ ស៊ុម សុខជា

សមាគមកាបូប ស្បែកជើង និងអេឡិចត្រូនិចកម្ពុជា ស្នើសុំចូលជាសមាជិក ILO-BFC

ភ្នំពេញ៖ សមាគមកាបូប ស្បែកជើង និងអេឡិចត្រូនិចកម្ពុជា បានស្នើសុំឯកឧត្តមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីចូលជាសមាជិករបស់គណៈកម្មការគម្រោងរោងចក្រកាន់តែប្រសើរនៅកម្ពុជា ILO-BFC ដើម្បីឲ្យសមាគមមានឱកាសពង្រីកខ្លួនស្របតាមចក្ខុវិស័យរបស់សមាគម។ ក្នុងជំនួបការងារ រវាងឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីព្រឹកថ្ងៃទី៥ តុលា ឆ្នាំ២០២២កន្លងទៅ នៅទីស្តីការក្រសួង លោក Cheng Chin Chun ប្រធានសមាគមកាបូប ស្បែកជើង និងអេឡិចត្រូនិចកម្ពុជា បានលើកឡើងថា សមាគមរបស់លោក បានចុះបញ្ជីកាទទួលស្គាល់ដោយក្រសួងការងារ កាលពីខែសីហាកន្លងទៅ ក្នុងគោលបំណងរួមចំណែកធ្វើឲ្យមានសុខដុមរមនានៃទំនាក់ទំនងវិជ្ជាជីវៈ និងចូលរួមចំណែកជាមួយរដ្ឋាភិបាលកម្ពុជា ក្នុងការជំរុញសេដ្ឋកិច្ចឲ្យមានការរីកចម្រើន ទាក់ទាញអ្នកវិនិយោគឲ្យមកបណ្តាក់ទុននៅក្នុងប្រទេសកម្ពុជាឲ្យបានកាន់តែច្រើនបន្ថែមទៀត ដើម្បីផ្តល់ឱកាសការងារជូនដល់ពលរដ្ឋកម្ពុជា ព្រមទាំងចូលរួមគោរពច្បាប់ លក្ខខណ្ឌការងារឲ្យបានល្អប្រសើរ។ ឯកឧត្តមរដ្ឋមន្រ្តី បានអរគុណដល់សមាគមដែលបានធ្វើការវិនិយោគ បង្កើត រោងចក្រសហគ្រាសនៅក្នុងប្រទេសកម្ពុជា ផ្តល់ឱកាសការងារបានយ៉ាងច្រើនជូនដល់កម្មករនិយោជិត ក្នុងការចូលរួមចំណែកអភិវឌ្ឍន៍សេដ្ឋកិច្ចកម្ពុជាមានការរីកចម្រើនជាបន្តបន្ទាប់។ ពាក់ព័ន្ធនិងសំណើរភាគីសមាគម ឯកឧត្តមរដ្ឋមន្ត្រី លើកឡើងថា បើតាមការគោលការណ៍ណែនាំរួមរបស់ក្រសួងការងារ និងបណ្តុះបណ្តាលវិជ្ជាជីវៈ និងក្រសួងពាណិជ្ជកម្ម រាល់ប្រភេទរោងចក្រសហគ្រាស ផលិតផលស្បែកជើង និងកាបូប មានសិទ្ធិចូលក្នុងគម្រោងនេះបាន តែត្រូវចូលរួមបង់ភាគទានទ្រទ្រង់គម្រោង និងឆ្លងកាត់ការចុះត្រួតពិនិត្យវាយតម្លៃពីអធិការកិច្ចរបស់គម្រោងរោងចក្រកាន់តែប្រសើរនៅកម្ពុជា និងក្រុមអធិការកិច្ចរបស់ក្រសួង។ ចំណែកអត្ថប្រយោជន៍ដែលសមាជិករបស់គម្រោងទទួលបាន គឺមានការគាំទ្របញ្ជាទិញផលិតផលពីរោងចក្រ សហគ្រាសរបស់ខ្លួនពីអ្នកបញ្ជាទិញល្បីៗនៅក្រៅប្រទេស។ ឯកឧត្តម គូសបញ្ជាក់ថា អាទិភាពចំបងរបស់រាជរដ្ឋាភិបាលកម្ពុជា គឺរក្សាឲ្យបាននូវសន្តិភាព ស្ថេរភាពនយោបាយ ដែលជាគន្លឹះនៃការអភិវឌ្ឍសង្គមសេដ្ឋកិច្ចជាតិ។ សន្តិភាព និងការអភិវឌ្ឍ ជាបំណងប្រាថ្នារបស់មនុស្សគ្រប់ៗរូប បើគ្មានសន្តិភាព អស្ថេរភាពនយោបាយ នោះអ្នកវិនិយោគ គេក៏មិនហ៊ានចូលមកវិនិយោគនៅក្នុងប្រទេសដែលពោរពេញដោយសង្រ្គាមនោះដែរ៕ អត្ថបទ ៖ឈិត បូរ៉ាវី

ក្រសួងកសិកម្ម អង្គការ UNIDO សហការលើកកម្ពស់គុណភាពផលិតផលជលផល ដើម្បីនាំចេញទៅអឺរ៉ុប

ភ្នំពេញ៖ ក្រសួងកសិកម្មរុក្ខាប្រមាញ់ និងនេសាទ និងអង្គការ UNIDO នឹងបន្តកិច្ចសហប្រតិបត្តិការ លើការលើកកម្ពស់ផលិតផលជលផល មានគុណភាព និងសុវត្ថិភាព របស់កម្ពុជា និងអាចនាំមកពីផ្សារអឺរ៉ុប នាពេលអនាគត។ឯកឧត្តម វេង សាខន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងលោក Ali Badarneh នាយកផ្នែកសុវត្ថិភាពចំណីអាហារ និងប្រព័ន្ធស្បៀងអាហារនៃអង្គការ UNIDO បានពិភាក្សាលើគម្រោងពង្រឹងគុណភាព និងសុវត្ថិភាពផលិតផលជលផលនេះ នៅក្នុងជំនួបមួយ កាលពីថ្ងៃទី៤ ខែតុលា នាទីក្រុងវីយ៉ែន ប្រទេសអូទ្រីស (Austria)។ ក្នុងជំនួបខាងលើនេះ ឯកឧត្តមរដ្ឋមន្ដ្រី បានវាយតម្លៃខ្ពស់ លើការអនុវត្តគម្រោងនានាគាំទ្រដោយ UNIDO។ឯកឧត្តមរដ្ឋមន្ដ្រី បានស្នើដល់អង្គការ UNIDO ពិនិត្យលទ្ធភាពជួយគាំទ្រ និងសហការលើការអភិវឌ្ឍអាជីវកម្មកសិកម្ម កសាងសមត្ថភាពលើផ្នែកសុវត្ថិភាពអាហារ ការគាំទ្រដល់ការកែលម្អហេដ្ឋារចនាសម្ព័ន្ធ គុណភាពសេវាមន្ទីរពិសោធន៍ និងវិញ្ញាបនប័ត្រគាំទ្រ។ជាការឆ្លើយតប លោក Ali Badarneh បានថ្លែងអំណរគុណ និងវាយតម្លៃខ្ពស់ចំពោះកិច្ចសហប្រតិបត្តិការដ៏ល្អប្រសើររវាងភាគីទាំងពីរ ឈានទៅសម្រេចបាននូវលទ្ធផលជាផ្លែផ្កាគួរជាទីមោទនៈ។ លោកបន្ថែមថា លក្ខណៈពិសេសនៃគម្រោង CAP FISH នេះគឺផ្តោតសំខាន់ទៅលើសុវត្ថិភាពនៃផលិតផលជលផល និងការគាំទ្រដល់ផ្នែកហិរញ្ញប្បទានដល់កសិករលើការកែច្នៃ វេចខ្ចប់ ប្រកបដោយគុណភាពនិងសុវត្ថិភាព។លោក បន្តថា អង្គការ UNIDO ពិតជារីករាយក្នុងការពង្រីកគម្រោងនេះថែមមួយកម្រឹតទៀត ដោយបានចាប់ផ្តើមជជែកការងារលម្អិតជាមួយគ្រប់ភាគីពាក់ព័ន្ធដូចជាសហភាពអឺរ៉ុប និងដៃគូអភិវឌ្ឍន៍ដទៃទៀតផងដែរ។ លោក Ali Badarneh សង្ឃឹមថា ផលិតផលជលផលប្រកបដោយគុណភាព និងសុវត្ថិភាពរបស់កម្ពុជានឹងអាចនាំមកពីផ្សារអឺរ៉ុបនាពេលអនាគត។ ចំពោះសំណើររបស់ឯកឧត្តមរដ្ឋមន្ត្រី អង្គការ UNIDO នឹងជជែកលម្អិតជាមួយមន្ត្រីជំនាញនៃរដ្ឋបាលជលផលក្នុងកិច្ចប្រជុំផ្នែកបច្ចេកទេសនារសៀលនេះ៕ អត្ថបទ៖ វណ្ណៈ

ខេត្តកំពង់ស្ពឺនឹងក្លាយជាតំបន់ទាក់ទាញអ្នកវិនិយោគ និងជាតំបន់ឧស្សាហកម្មដ៏ធំ

កំពង់ស្ពឺ៖ ខេត្តកំពង់ស្ពឺ នឹងកា្លយជាតំបន់ឧស្សាហកម្មធំមួយ និងអាចស្រូបយកសក្តានុពលវិនិយោគកាន់តែច្រើន ស្របពេលកម្ពុជាមានផ្លូវល្បឿនលឿន ជាពិសេសខេត្តមួយនេះ ជាចំណុចកណ្តាលរវាងរាជធានីភ្នំពេញ និងខេត្តព្រះសីហនុ ងាយដល់ការចរាចរណ៍ទំនិញចុះឡើង។ឯកឧត្តមបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ថ្លែងលើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន ស្របពេលកម្ពុជាមានផ្លូវល្បឿនលឿន ភ្នំពេញ-ព្រះសីហនុ ដែលជាផ្នែកមួយយ៉ាងសំខាន់ សម្រាប់សេវាដឹកជញ្ជូន កាន់តែលឿន និងមានទំនុកចិត្ត ក្នុងនោះចំពោះការវិនិយោគលើវិស័យឧស្សាហកម្ម វិនិយោគិននឹងអាចសម្លឹងមើល អំពីសក្តានុពលវិនិយោគរបស់ខ្លួននៅខេត្តកំពុងស្ពឺ ដោយសារខេត្តមួយនេះមានថ្លៃដីទាប អាចសង់រោងចក្របានច្រើន សម្រាប់ផលិតបម្រើទីផ្សារនាំចេញ ដែលរំពឹងថា នៅពេលខាងមុខ កម្ពុជានឹងទទួលបានរបាយនៃការវិនិយោគតាមតំបន់ផ្សេងៗកាន់ច្រើន ។ទាក់ទងការអភិឌ្ឍន៍នេះ, ឯកឧត្តម វ៉ី សំណាង អភិបាលនៃគណៈអភិបាលខេត្តកំពង់ស្ពឺ លើកឡើងថា អ្វីដែលកម្ពុជា កំពុងទទួលបាន ជាពិសេសអ្វីដែលខេត្តកំពង់ស្ពឺកំពុងមានបច្ចុប្បន្ន គឺបានកើតចេញពីសុខសន្តិភាព ក្នុងនោះមានសុខសន្តិភាពទើបមានការអភិវឌ្ឍលើគ្រប់វិស័យ ជាពិសេសការអភវិឌ្ឍហេដ្ឋារចនាសម្ព័ន្ធជាដើម។ ជាក់ស្តែងហេដ្ឋរចនាសម្ព័ន្ធនៅខេត្តកំពង់ស្ពឺ បានកំពុងគ្រប់ដណ្តប់កាន់តែល្អប្រសើរ គឺមានផ្លូវ មានទឹក មានភ្លើង នឹងស្របពេលផ្លូវល្បឿនលឿនបានកើតឡើងជាបន្តបន្ទាប់ទៀតនេះ វិនិយោគិនអាចសម្លឹងឃើញ អំពីឱកាសវិនិយោគនៅក្នុងខេត្តកំពង់ស្ពឺ។ឯកឧត្តម អភិបាល បានបញ្ជាក់ថា រដ្ឋបាលសាលាខេត្ត តែងតែចូលរួមផ្សព្វផ្សាយ ជាពិសេសចាប់តាំងពីរការបើកសម្ពោធសាងសង់ផ្លូវល្បឿនលឿន អំពីទីតាំង ភូមិសាស្រ្ត ធ្វើឲ្យអ្នករកស៊ីទទួលទានទទួលបានព័ត៌មានគ្រប់ជ្រុងជ្រោយ ដោយកន្លងមកនេះ ខេត្តកំពង់ស្ពឺទទួលបានឱកាសវិនិយោគជាបន្តបន្ទាប់៕អត្ថបទ៖ សុន រ៉ាឌី

ក្រសួងសេដ្ឋកិច្ចផ្សព្វផ្សាយច្បាប់ ស្តីពីការគ្រប់គ្រងល្បែងពាណិជ្ជកម្ម និងលិខិតបទដ្ឋានគតិយុត្តិពាក់ព័ន្ធ

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បើកសិក្ខាសាលាមួយដើម្បីផ្តល់នូវពុទ្ធិ និងព័ត៌មានស៊ីជម្រៅគ្រប់ជ្រុងជ្រោយ អំពីច្បាប់ស្តីពីការគ្រប់គ្រងល្បែងពាណិជ្ជកម្ម និងលិខិតបទដ្ឋានគតិយុត្តពាក់ព័ន្ធ ដល់អាជ្ញាធរមានសមត្ថកិច្ចគ្រប់ជាន់ថ្នាក់ ដើម្បីជាមូលដ្ឋានគ្រឹះ ក្នុងការសហការអនុវត្តរវាង គ.ល.ក. និងអាជ្ញាធរសាធារណៈពាក់ព័ន្ធ លើការគ្រប់គ្រងវិស័យល្បែងពាណិជ្ជកម្មនេះប្រកបដោយប្រសិទ្ធភាព និងស្មារតីទទួលខុសត្រូវខ្ពស់ ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការគ្រប់គ្រងល្បែងពាណិជ្ជកម្មកម្ពុជា ថ្លែងក្នុងពិធីបើកសិក្ខាសាលាផ្សព្វផ្សាយច្បាប់ ស្តីពីការគ្រប់គ្រងល្បែងពាណិជ្ជកម្មជូនដល់អាជ្ញាធរសាធារណៈពាក់ព័ន្ធ នៅថ្ងៃទី ៤ខែតុលា ឆ្នាំ ២០២២នេះថា ជាទិដ្ឋភាពគតិយុត្តិ, ច្បាប់ស្តីពីការបង្ក្រាបល្បែងស៊ីសង នៅកម្ពុជាដែលត្រូវបានអនុម័ត និងដាក់ឱ្យប្រើប្រាស់នៅថ្ងៃទី ២៦ ខែមករា ឆ្នាំ ១៩៩៦ បានបើកផ្លូវជូនរាជរដ្ឋាភិបាល ក្នុងការផ្តល់ការអនុញ្ញាតឱ្យមានល្បែងពាណិជ្ជកម្មនៅក្នុងប្រទេសកម្ពុជា ។ នៅក្នុងការអនុវត្តជាក់ស្ដែងនាពេលកន្លងមក, មុនពេលដែលច្បាប់ស្តីពីការគ្រប់គ្រងល្បែងពាណិជ្ជកម្មចូលជាធរមាន, រាជរដ្ឋាភិបាលមានយន្តការគ្រប់គ្រងវិស័យនេះ ដោយផ្អែកលើលិខិតបទដ្ឋានគតិយុត្តិមួយចំនួនដូចជា៖ ច្បាប់ស្តីពីការបង្ក្រាបល្បែងស៊ីសង, សេចក្តីសម្រេច និងសារាចរណែនាំរបស់រាជរដ្ឋាភិបាល, ប្រកាសអន្តរក្រសួង និង សៀវភៅបន្ទុក ជាដើម ។ច្បាប់ស្តីពីការគ្រប់គ្រងល្បែងពាណិជ្ជកម្ម និងលិខិតបទដ្ឋានគតិយុត្តពាក់ព័ន្ធ បានអនុញ្ញាតឱ្យមានការគ្រប់គ្រងលើវិស័យកាស៊ីណូ និងល្បែងពាណិជ្ជកម្មដទៃទៀតយ៉ាងតឹងរ៉ឹង និងប្រកបដោយប្រសិទ្ធភាពខ្ពស់ ។ ជាមួយគ្នានេះដែរ, ដើម្បីធានាភាពរឹងមាំ, តម្លាភាព, សុចរិតភាព និងគណនេយ្យភាព របស់ប្រតិបត្តិការមណ្ឌលល្បែងពាណិជ្ជកម្ម, ច្បាប់នេះក៏បានកំណត់អំពីលក្ខណៈសម្បត្តិ របស់បុគ្គលជាកម្មសិទ្ធិករ ឬប្រតិបត្តិករ ដោយផ្តោតសំខាន់លើធនធានហិរញ្ញវត្ថុ, សមត្ថភាពធុរកិច្ច, គុណវុឌ្ឍរបស់អ្នកកាន់កាប់អាជ្ញាបណ្ណ, ការពង្រឹងសមត្ថភាពស្ថាប័ន,ការកំណត់អំពីប្រភេទអាជ្ញាបណ្ណ, ដែនកំណត់នៃការលេងល្បែង, ការកំណត់អំពីចំណូលកាតព្វកិច្ច, វិធានការនៃការផ្សះផ្សារ និងដោះស្រាយវិវាទ, និងការដាក់ទណ្ឌកម្មជាដើម ៕ អត្ថបទ៖ សុន រ៉ាឌី

ជើងហោះហើរកម្ពុជា-ចិន មានការកើនឡើង ខណៈរុញច្រានជើងហោះហើរកម្ពុជាកើនដល់៣៣ភាគរយ

ភ្នំពេញ៖ ក្រុមហ៊ុនអាកាសចរណ៍របស់ប្រទេសចិនជាង១០ក្រុមហ៊ុន ដែលបានដាក់ពាក្យស្នើបើកជើងហោះហើរត្រង់មកកម្ពុជា ចាប់តាំងពីដើមឆ្នាំ២០២២ មកដល់ពេលនេះ ក្រុមហ៊ុនអាកាសចរណ៍ចិនទាំងនោះ ចាប់ផ្តើមមានជើងហោះហើរពីចិនមកកម្ពុជាជាបណ្តើរៗហើយ និងបានរុញច្រានឱ្យចំនួនជើងហោះហើរកម្ពុជា ក្នុងរយៈពេល៩ខែមានកំណើនដល់៣៣% នៃជើងហោះហើរសរុបឆ្នាំ២០១៩។បើតាមឯកឧត្តម ជា អូន រដ្ឋលេខាធិការ និងជាអ្នកនាំពាក្យនៃលេខាធិការដ្ឋានអាកាសចរណ៍ស៊ីវិល ប្រាប់BTV នៅថ្ងៃទី៤ ខែតុលានេះថា ចាប់តាំងពីពាក់កណ្តាលខែកញ្ញាឆ្នាំ២០២២នេះ ក្រុមហ៊ុនអាកាសចរណ៍របស់ប្រទេសចិនមួយចំនួន បានបើកជើងហោះហើរត្រង់ទៅមកពីបណ្តាខេត្តចំនួន៨នៅប្រទេសចិន មកកាន់កម្ពុជា បានចំនួន៣០ជើងក្នុងមួយសប្តាហ៍ ហើយការមានជើងហោះហើរត្រង់កម្ពុជាចិននេះ បានធ្វើឡើងក្នុងខណៈរដ្ឋាភិបាលចិន កំពុងបន្ធូរបន្ថយលក្ខខ័ណ្ឌរឹត បន្តឹងគោលនយោបាយ Zero Covidនៅក្នុងប្រទេសចិន។ឯកឧត្តម ជា អូន ប៉ាន់ប្រមាណថា ក្នុងខែកញ្ញានេះ ចំនួនជើងហោះហើរសរុបមានកំណើនប្រមាណ ៣៣%នៃចំនួនជើងហោះហើរសរុប ១០ម៉ឺន៤៧៧០ជើងក្នុងឆ្នាំ២០១៩នោះ ក្នុងនោះ អ្នកដំណើរអន្តរជាតិមកកម្ពុជា នឹងមានកំណើន២៦%បន្ថែមទៀត ហើយក្រៅពីនេះជាចំនួនជើងហោះហើរយន្តហោះដឹកទំនិញ។អគ្គនាយកដ្ឋានអន្តោប្រវេសន៍ក្រសួងមហាផ្ទៃ នៅថ្ងៃស្អែកនេះ នឹងចេញផ្សាយតួលេខផ្លូវការនៃអ្នកដំណើរអន្តរជាតិមកកម្ពុជាសរុប ប៉ុន្តែបើតាមតួលេខដែលក្រសួងទេសចរណ៍ប្រមូលបានមកពីតាមបណ្តាច្រកទា្វរអន្តរជាតិផ្លូវអាកាស ផ្លូវគោក និងផ្លូវទឹក ចំនួន២៦ច្រកទ្វារអន្តរជាតិ បានឲ្យដឹងជាបណ្តោះអាសន្នថា ក្នុងរយៈពេល៩ ខែឆ្នាំ២០២២ ទូទាំងប្រទេសទទួលអ្នកដំណើរអន្តរជាតិ និងភ្ញៀវទេសចរអន្តរជាតិប្រមាណ ១លាន២សែន៥ម៉ឺននាក់ ក្នុងនោះអ្នកដំណើរអន្តរជាតិចូលកម្ពុជាតាមច្រកទ្វារអន្តរជាតិផ្លូវគោកមានចំនួនច្រើនជាងគេ៕ អត្ថបទ ស៊ុម សុខជា

សម្តេចតេជោ ហ៊ុន សែន៖ ចំណូលពន្ធដារ មានស្ថិរភាព ក្នុងរយៈពេល៩ខែ

ភ្នំពេញ៖ សម្តេចតេជោ ហ៊ុន សែន បានបញ្ជាក់ថា បច្ចុប្បន្ននេះ ចំណូលពន្ធផ្ទៃក្នុងរបស់កម្ពុជា យ៉ាងហោចណាស់ប្រមូលបាន ២០០លានដុល្លារសហរដ្ឋអាមេរិកក្នុងមួយខែ ដែលរយៈពេល៩ខែមកនេះ ការប្រមូលពន្ធសម្រេចបានជាង ៩៥ភាគរយ ស្មើនឹងជាង ៣ពាន់លានដុល្លារអាមេរិក។ថ្លែងក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដា ថ្នាក់បរិញ្ញាបត្ររង ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៅថ្ងៃទី៣ ខែតុលា សម្តេចជោ ហ៊ុន សែន នាយករដ្ឋមន្រ្តីកម្ពុជា ចំណូលពន្ធផ្ទៃក្នុងប្រមូលដោយអគ្គនាយកដ្ឋានពន្ធដារ ជាមធ្យម ២៥០លានដុល្លារ ក្នុងមួយខែ ក្នុងរយៈពេល៩ខែឆ្នាំនេះ។សម្តេចតេជោ ហ៊ុន សែន នាយករដ្ឋមន្រ្តីកម្ពុជា មានប្រសាសន៍ថា វិស័យឯកជន គឺជាក្បាលម៉ាស៊ីននៃកំណើនសេដ្ឋកិច្ច ដោយផ្តល់ការងារដល់ប្រជាពលរដ្ឋ សិស្សនិសិត្សបញ្ចប់ការសិក្សា និងចំណូលពន្ធចូលថវិកាជាតិ ដែលត្រូវបានប្រើសម្រាប់ការកសាងហេដ្ឋារចនាសម្ព័ន្ធនានា។សម្តេចតេជោ ហ៊ុន សែន បានបញ្ជាក់ថា កម្ពុជាបានប្រឹងប្រែងទប់នឹងវិបត្តិនានា ដែលបណ្តាលមកពីបញ្ហាសកល ក្នុងនោះមានការគិតគូរលើការចំណាយរបស់រដ្ឋ ខណៈដែលប្រទេសមួយចំនួនបានរងនូវវិបត្តិនេះយ៉ាងធ្ងន់ធ្ងរជាទីបំផុត។ទន្ទឹមនឹងនេះ សម្តេចតេជោ ហ៊ុន សែន បានប្រកាសពីចេតនារបស់រាជរដ្ឋាភិបាល ក្នុងការប្រឹងប្រែងធ្វើឱ្យវិស័យឯកជនបានរីកចម្រើន ដែលជាចំណែកមួយដ៏ធំ នៃការបង់ពន្ធចូលរដ្ឋ ខុសពីទស្សនៈនយោបាយ និងចេតនារបស់បុគ្គលខ្លះ ដែលចង់ឱ្យវិស័យឯកជនធ្លាក់ចុះ ឬអន់ថយ៕ អត្ថបទ៖ វណ្ណៈ

លោក ហ៊ុន ម៉ាណែត អញ្ជើញសម្ពោធរោងចក្រផលិតស្រោមដៃពេទ្យនៅក្រុងបាវិត

ស្វាយរៀង៖ លោកបណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តី នៅព្រឹកថ្ងៃទី៣០ ខែកញ្ញានេះ អញ្ជើញសម្ពោធរោងចក្រ RMKH Glove (Cambodia) Co. Ltd. ដែលជារោងចក្រផលិតស្រោមដៃពេទ្យ នៅក្រុងបាវិតខេត្តស្វាយរៀង ។នៅក្នុងពិធីសម្ពោធនោះ លោក ហ៊ុន ម៉ាណែត បានលើកឡើងថា លោកសូមវាយតម្លៃខ្ពស់ចំពោះការសម្រេចចិត្តបណ្តាក់ទុនយ៉ាងមោះមុតពីសំណាក់ក្រុមហ៊ុន Medtecs Manhattan Group ជាពិសេស ក្នុងការសាងសង់រោងចក្រផលិតស្រោមដៃពេទ្យបែបទំនើបខ្នាតធំនៅក្នុងទីក្រុងបាវិត ដោយចាប់ផ្តើមនៅក្នុងឆ្នាំ២០២១ គឺអំឡុងពេលដែលប្រទេសកម្ពុជាកំពុងទទួលរងនូវការឆ្លងរាលដាលនៃជំងឺកូវីដ-១៩ ក្នុងទ្រង់ទ្រាយធំ និងមិនទាន់បានងើបចេញពីវិបត្តិនៃជំងឺនេះនៅឡើយ។លោកបន្តថា ទង្វើនេះគឺជាសក្ខីភាពឆ្លុះបញ្ចាំងឱ្យឃើញថាក្រុមហ៊ុន ពិតជាមានការជឿជាក់ និងការប្តេជ្ញាចិត្តខ្ពស់ក្នុងការរួមសុខរួមទុក្ខជាមួយរាជរដ្ឋាភិបាល និងប្រជាជនកម្ពុជា។មួយវិញទៀត ការបណ្តាក់ទុននេះ ក៏ជាការចូលរួមចំណែកយ៉ាងសំខាន់របស់ក្រុមហ៊ុននៅក្នុងការអភិវឌ្ឍសង្គម-សេដ្ឋកិច្ចកម្ពុជា ជាពិសេសនៅក្នុងការជំរុញកំណើនសេដ្ឋកិច្ចឡើងវិញក្រោយពីវិបត្តិនៃជំងឺកូវីដ-១៩។លោក ហ៊ុន ម៉ាណែត បានលើកឡើងទៀតថា ទីក្រុងបាវិត ជាមជ្ឈមណ្ឌលផលិតកម្ម ដែលបានស្រូបយកកម្លាំងពលកម្មដ៏ច្រើនសន្ធឹកសន្ធាប់ និងគ្រប់ផ្នែកគ្រប់វិស័យ ហើយក៏អាចត្រូវបានចាត់ទុកជានិមិត្តរូបនៃការអភិវឌ្ឍរីកចម្រើននៅក្នុងប្រទេសកម្ពុជាផងដែរ ខណៈក្រុងបាវិតនេះមានតំបន់សេដ្ឋកិច្ចពិសេសជាច្រើន ដោយក្នុងនេះមានរោងចក្រសរុបចំនួន១៧៨ និងបានផ្តល់ការងារជូនដល់ប្រជាពលរដ្ឋប្រមាណជាង៩ម៉ឺននាក់ ដែលពិតជាខុសស្រឡះពីការភ័ន្តច្រឡំមួយចំនួនដែលយល់ថា ទីក្រុងបាវិតជាទីក្រុងនៃសេវាកម្មកាស៊ីណូ។ជាមួយគ្នានោះដែរលោកបណ្ឌិត ហ៊ុន ម៉ាណែត បានលើកឡើងផងដែរថាក្នុងរយៈពេលប្រមាណជាងពីរទសវត្សរ៍ចុងក្រោយនេះ កម្ពុជាបានក្លាយជាគោលដៅសំខាន់មួយនៃការវិនិយោគផ្ទាល់ពីបរទេស (FDI)ដែលជាកត្តានាំឱ្យកម្ពុជាស្ថិតក្នុងចំណោមប្រទេសដែលមានកំណើនសេដ្ឋកិច្ចលឿនជាងគេនៅក្នុងសកលលោក ជាមួយនឹងអត្រាកំណើនជាមធ្យមប្រមាណជាង ៧% ក្នុងមួយឆ្នាំ។ អត្រាកំណើនដ៏ខ្ពស់នេះ បានធ្វើឱ្យកម្ពុជាផ្លាស់ប្តូរឋានៈពីប្រទេសចំណូលទាប ទៅជាប្រទេសចំណូលមធ្យមកម្រិតទាបចាប់តាំងពីឆ្នាំ២០១៥ និងបានជួយឱ្យប្រជាជនកម្ពុជាបានងើបចេញពីភាពក្រីក្រ ដោយអត្រាភាពក្រីក្រនៅកម្ពុជាបានធ្លាក់ចុះពីប្រមាណ ៥៣% ក្នុងឆ្នាំ២០០៤ មកត្រឹម ១៧,៨ % ប៉ុណ្ណោះក្នុងឆ្នាំ២០២០។ ជោគជ័យដ៏ត្រចះត្រចង់នេះ គឺមិនមែនបានមកដោយចៃដន្យនោះទេ ប៉ុន្តែជាលទ្ធផលនៃកិច្ចខិតខំប្រឹងប្រែង និងការសម្រេចចិត្តដ៏ត្រឹមត្រូវជាពិសេសការដាក់ចេញនូវគោលនយោបាយឈ្នះ-ឈ្នះ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយចក្ខុវិស័យវែងឆ្ងាយ និងភាពប្រាកដនិយម របស់ សម្តេចតេជោ នាយករដ្ឋមន្ត្រីដែលបានបញ្ចប់សង្គ្រាមស៊ីវិល និងសម្រេចបាននូវសន្តិភាពពេញលេញនៅទូទាំងផ្ទៃប្រទេស។ លោក បន្ថែមទៀតថា សម្រាប់ពេលបច្ចុប្បន្ន និងបន្តទៅមុខ រាជរដ្ឋាភិបាល បាននិងកំពុងបង្កើនកិច្ចខិតខំប្រឹងប្រែងបង្កើតលក្ខខណ្ឌអំណោយផលបន្ថែមទៀតសម្រាប់ការនាំចេញ និងការទាក់ទាញការវិនិយោគផ្ទាល់ពីបរទេស ជាពិសេសមកកាន់តំបន់សេដ្ឋកិច្ចពិសេស ដោយដាក់ចេញនូវវិធានការសំខាន់ៗមួយចំនួនរួមមាន៖ ការអនុម័តច្បាប់វិនិយោគថ្មីសំដៅលើកកម្ពស់ការប្រកួតប្រជែង និងលើកទឹកចិត្តដល់វិនិយោគិនឱ្យបណ្តាក់ទុន និងធ្វើប្រតិបត្តិការអាជីវកម្មនៅកម្ពុជា តាមរយៈការផ្តល់នូវការលើកទឹកចិត្តជាច្រើនជាពិសេសការអនុគ្រោះផ្នែកសារពើពន្ធ និងការពង្រឹងភាពធន់នៃសេដ្ឋកិច្ចជាតិតាមរយៈការបង្កើនសមត្ថភាព និងជំនាញបច្ចេកទេសវិជ្ជាជីវៈរបស់កម្លាំងពលកម្ម ក៏ដូចជាសហគ្រាសក្នុងស្រុក ដើម្បីឱ្យក្លាយជាសសរទ្រូង និងមូលដ្ឋានគ្រឹះដ៏រឹងមាំនៃការអភិវឌ្ឍសង្គម-សេដ្ឋកិច្ច ហើយកិច្ចការទាំងនេះ ពិតជាត្រូវការជាចាំបាច់នូវការចូលរួមរបស់តំបន់សេដ្ឋកិច្ចពិសេស, ក្រុមហ៊ុនជាតិ និងអន្តរជាតិ រួមទាំងបងប្អូនកម្មករ-និយោជិត ដែលសុទ្ធសឹងជាដៃគូដ៏សំខាន់បម្រើឱ្យគោលដៅនេះ៕អត្ថបទ៖ បាន ចក់

បណ្ដាញសង្គម

ព័ត៌មានថ្មីៗ

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

ការអនុវត្តវិធានការគន្លឹះក្នុងវិស័យអប់រំ (គ.វ.អ.) នៅសាលាបឋមសិក្សា ត្រពាំងអារ័ក្ស ស្រុកកំពង់ស្វាយ ខេត្តកំពង់ធំ

អ្នកជំនាញ UN ជំរុញឲ្យក្រុមតាលីបង់ដោះលែងប្តីប្រពន្ធសញ្ជាតិអង់គ្លេសវ័យចំណាស់ជាប់ឃុំនៅអាហ្វហ្គានីស្ថាន

អ៊ីរ៉ង់បន្ទោសអឺរ៉ុបថា បានធ្វើឲ្យដួលរលំនៃកិច្ចព្រមព្រៀងនុយក្លេអ៊ែរ មុនការចរចាថ្មី

កសិករកំពង់ធំជាង១០០គ្រួសារ ទទួលផលចំណេញច្រើនជាងមុន ក្រោយស្ម័គ្រចិត្តចងក្រងជាសហគមន៍កសិកម្មទំនើប

ទាហានប៉ារ៉ាប៉ាគីស្ថាន ៨នាក់ និងសមាជិកក្រុមប្រយុទ្ធ ៤នាក់ ត្រូវបានសម្លាប់ អំឡុងការប៉ះទង្គិចគ្នា នៅភាគពាយព្យ

វិមានក្រឹមឡាំងមិនច្រានចោលពីលទ្ធភាពមានកិច្ចប្រជុំ Putin-Trump នៅទីក្រុងប៉េកាំង ក្នុងខែកញ្ញា

វិមានក្រឹមឡាំងទទួលស្គាល់ភាពតានតឹងក្នុងទំនាក់ទំនងជាមួយអាស៊ែបៃហ្សង់ តែសង្ឃឹមថា នឹងប្រសើរឡើងវិញ

រដ្ឋទូតឥណ្ឌូនេស៊ី ត្រៀមផ្តល់ការគាំទ្រ និងកិច្ចសហការជាមួយកម្ពុជាដើម្បីប្រយុទ្ធប្រឆាំងការឆបោកតាមបច្ចេកវិទ្យា

អភិបាលខេត្តប៉ៃលិនពិនិត្យទីតាំងសាងសង់ខ្លោងទ្វារនៅច្រកទ្វារព្រំដែនអន្តរជាតិព្រំ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877