នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
មន្រ្ដីនាំពាក្យក្រសួងកសិកម្ម៖ មិនគួរមានការព្រួយបារម្ភណាមួយពីកង្វះ ឬការកើន​ឡើង​តម្លៃ​ស្បៀង​​ក្នុង​ស្រុក​ឡើយ ខណៈកម្ពុជាមានសមត្ថភាពគ្រប់គ្រាន់ធានាសន្តិសុខស្បៀង
ក្រសួងកសិកម្ម ចុះអនុស្សរណៈយោគយល់គ្នា​ជាមួយបណ្តាធនាគារដៃគូ ដើម្បី​ផ្តល់​កម្ចី​ក្នុង​អត្រា​ការ​ប្រាក់​ទាប​ដល់កសិករ
ឆមាសទី១ឆ្នាំនេះ ការដោះដូរពាណិជ្ជកម្មអន្តរជាតិ​របស់​កម្ពុជា​មាន​ទំហំ​ទឹក​ប្រាក់​ជាង​៣១​ពាន់​លាន​ដុល្លារ
ឯកឧត្តម ស៊ុន ចាន់ថុល អំពាវនាវដល់ម្ចាស់រោងចក្រសូមរក្សាភាពស្ងាត់ស្ងៀម និង​ជឿជាក់​លើរាជរដ្ឋាភិបាលដែលកំពុងខិតខំប្រឹងប្រែង

សេដ្ឋកិច្ច និង កសិកម្ម

ការទូតសេដ្ឋកិច្ចជំរុញផ្សព្វផ្សាយសក្តានុពល និងទាក់ទាញវិនិយោគបរទេស ភ្ញៀវទេសចរបរទេសមកកម្ពុជា

2022/06/28 01:09:01 pm        367
Facebook Telegram Linkin
ភ្នំពេញ៖ ការទូតសេដ្ឋកិច្ច គឺជាការលើកកម្ពស់កិត្យានុភាពកម្ពុជាលើឆាកអន្តរជាតិ និងការបង្កើន​ការយល់ដឹងទៅដល់បរទេសអំពីវប្បធម៌ល្អប្រភពប្រពៃ និងភាពសំបូរបែបរបស់កម្ពុជា ជាពិសេស​ផ្សព្វផ្សាយសំដៅការទាក់ទាញ វិនិយោគិនបរទេស និងភ្ញៀវទេសចរណ៍បរទេស​មកកម្ពុជា​ឲ្យកាន់​តែច្រើន។ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេស និងសហប្រតិបត្តិការអន្តរជាតិ លើកឡើងនៅក្នុងការបិទសិក្ខាសាលាពិគ្រោះយោបល់ថ្នាក់ជាតិ ស្តីពីការទូតសេដ្ឋកិច្ចក្នុង​គន្លង​ប្រក្រតីថ្មី នៅថ្ងៃទី២៧ ខែមិថុនា ឆ្នាំ២០២២នេះថា សេដ្ឋកិច្ចកម្ពុជា បន្តងើបឡើងដោយថាមវ័ន្ត ដោយសារ​សន្តិភាព ស្ថេរភាពនយោបាយ ម៉ាក្រូ សេដ្ឋកិច្ច និងភាពជោគជ័យក្នុងការប្រយុទ្ធ​ប្រឆាំង​ជម្ងឺកូវីដ-១៩ កត្តានេះ កម្ពុជាបានប្រែក្លាយវិបត្តិចំពោះមុខ​ឱ្យ​ទៅជាឱកាសកែទម្រង់ មូលដ្ឋាន​គ្រឹះនៃសេដ្ឋកិច្ចជាតិឲ្យកាន់តែរឹងមាំ។ បញ្ហាទាំងនេះមន្រ្តីការទូតគួរខិតខំចូលរួមផ្សព្វផ្សាយអំពីច្បាប់វិនិយោគថ្មី ជូនវិនិយោគិន​បរទេស​ឲ្យបានទូលំទូលាយ ក្រៅពីនេះគួរបន្តសម្របសម្រួល​ផ្គួរផ្គង​ និងតភ្ជាប់វិនិយោគិនក្នុងស្រុក និង​បរទេសតាមលទ្ធភាពដែលអាចធ្វើបាន ក្នុងនោះនៅតាមដ្ឋានតំណាងនៃកម្ពុជានៅបរទេសនីមួយៗ ត្រូវពង្រឹងការប្រឹក្សាយោបល់ ការផ្លាស់ប្តូរទំនាក់ទំនងដល់វិនិយោគិនដែលមាន​ចំណាប់អារម្មណ៍​មកវិនិយោគនៅកម្ពុជា និងជម្រុញការតាំងពិរព័ណខ្មែរនៅបរទេសជាដើម ។កត្តាទាំងអស់នេះ គឺជាចំណុច សំខាន់ដែលមន្រ្តីការទូតរបស់កម្ពុជាអាចផ្សព្វផ្សាយ សំដៅទាក់ទាញ​ភ្ញៀវទេសចរ​បរទេសមកកម្ពុជាឲ្យកាន់តែច្រើន។ជុំវិញការវិស័យទេសចរណ៍,លោក លូ ម៉េង ប្រធានសហព័ន្ធទេសចរកម្ពុជា លើកឡើងថា កម្ពុជា​គឺជាប្រទេស​ដែលមានសក្តានុពលលើវិស័យទេសចរ ដែលភ្ញៀវទេសចរណ៍ជាច្រើនបានស្គាល់​ពី​វប្បធម៌បុរាណ តំបន់ទេសចរណ៍ប្រវត្តិសាស្រ្ត ​និងតំបន់ឆ្នេរស្អាតរបស់កម្ពុជាជាដើម ហើយអ្វីដែល​ជា​ការចូលចំណែកកាន់តែសំខាន់ទៀតនោះ ​គឺវិស័យម្ហូបអាហារ, ជាក់ស្តែងរយៈពេល៥ឆ្នាំ​ចុង​ក្រោយនេះ ​ទេសចរណ៍បរទេសជាច្រើនបានស្គាល់ពីវិស័យម្ហូបអាហារនៅកម្ពុជាដូចជា សម្លរប្រហើរ សម្លរកកូរ អាម៉ុកត្រី ប្រហុកខ្ទិះជាដើម ដែលវិស័យនេះហើយ បានធ្វើឲ្យគេ​នឹកឃើញ​កម្ពុជា នឹងការចង់មកទស្សនាកម្សាន្តនៅកម្ពុជា ជាបន្តបន្ទាប់ឡើងវិញ។ជុំវិញបញ្ហានេះ, ឯកឧត្តម ប្រាក់ សុខុន ឧបនាយករដ្ឋមន្រ្តី បានស្នើរដល់មន្រ្តីការទូតកម្ពុជា ជាពិសេស​មន្រ្តីនៅតាមដ្ឋានតំណាងការទូត ​ត្រូវបន្តខិតខំប្រឹងប្រែងសហការជាមួយក្រសួង ស្ថាប័ន​ពាក់ព័ន្ធ និងវិស័យឯកជន ដើម្បីរួមគ្នាទាញយកផលប្រយោជន៍ជាអតិបរមា ​ពីកិច្ច ព្រមព្រៀង​ពាណិជ្ជកម្មសេរីទ្វេរភាគីដែលទើបចូលជាធរមាន ក៏ដូចជាកត្តាអំណោយផលផ្សេងៗរួមមាន ច្បាប់វិនិយោគថ្មី ក្នុងន័យជម្រុញ ​ការធ្វើសមាហរណកម្មសេដ្ឋកិច្ចកម្ពុជាទៅក្នុងតំបន់ និងពិភព​លោក តាមរយៈការពង្រឹងកិច្ចសហប្រតិបត្តិការទ្វេរភាគី និងពហុភាគី​ ឲ្យកាន់តែស៊ីជម្រៅ និង​ទូលំទូលាយ ដើម្បីធ្វើពិពិធកម្មប្រភពកំណើន ​ការពង្រីកសក្តានុពលសេដ្ឋកិច្ច និងទាញយក​អត្ថប្រយោជន៍ផ្សេងៗ៕អត្ថបទ៖ សុន រ៉ាឌី

បុរីព្រីនស៍ ចាប់ផ្ដើមបើកលក់ផ្ទះដែលប្រើប្រាស់បច្ចេកវិទ្យាឆ្លាតវៃទំនើប មុនគេបង្អស់នៅកម្ពុជា

2022/06/25 01:22:18 pm        1008
Facebook Telegram Linkin
ភ្នំពេញ៖ បុរីព្រីនស៍វ័ន ត្រូពិកា ចាប់ផ្ដើមបើកលក់ហើយនូវគម្រោងផ្ទះជាច្រើនជំរើស ដែលប្រើប្រាស់បច្ចេកវិទ្យាឆ្លាតវៃទំបើបមុនគេបង្អស់នៅកម្ពុជា ។ថ្លែងនៅក្នុងឱកាសនៃពិធីសម្ពោធ បើកលក់ជាផ្លូវការនូវ បុរីព្រីនស៍វ័នត្រូពិកា នៅល្ងាចថ្ងៃទី២៤ ខែមិថុនា ឆ្នាំ២០២២ នៅស្នាក់ការកណ្តាល ក្រុមហ៊ុនព្រីនស៍ រៀល អ៊ីស្ទេតគ្រុបលោក Edward Lee នាយកប្រតិបត្តិក្រុមហ៊ុន ព្រីន៍រៀល អ៊ីស្ទេតគ្រុប បានឱ្យដឹងថា ក្រុមហ៊ុន រៀល អ៊ីស្ទេតគ្រុប បាន​ចាក់ឬសគល់នៅក្នុងទឹកដីនៃព្រះរាជាណាចក្រកម្ពុជា ក្រោយបានចូលរួម​អភិវឌ្ឍន៍​លើ​វិស័យជាច្រើន តាមរយៈការធ្វើអាជីវកម្ម ប្រកបដោយគុណភាពនានា និងតាមរយៈការចូលរួម​ក្នុងសកម្មភាពអភិវឌ្ឍន៍នានា ។បច្ចុប្បន្ន ក្រុមហ៊ុន រៀល អ៊ីស្ទេតគ្រុប មានអាជីវកម្មគ្របដណ្ដប់លើវិស័យនានា ដូចជា ផ្សារទំនើប លំនៅឋាន និងតំបន់ទេសចរណ៍ ជាដើម។លោក Edward Lee បានបន្តថា នេះគឺជាផ្នែកមួយនៃការផ្លាស់ប្តូររបត់ថ្មី​នៃការរស់នៅផ្ទះបុរីរបស់​អតិថិជន ដោយផ្ទះរបស់បុរី ព្រីនស៍វ័នត្រូពិកា មានបំពាក់ទៅដោយបច្ចេកវិទ្យាទំនើប ឆ្លាតវៃ គឺការបញ្ជាប្រព័ន្ធប្រើប្រាស់នៅក្នុងផ្ទះតាមរយៈ App នៅក្នុងទូរស័ព្ទដៃ ប្រព័ន្ធកាមេរ៉ាសុវត្តិភាព គ្រប់ច្រក ២៤ម៉ោង សួនច្បារ អាងហែលទឹក ផ្សារទំនើបជាមួយនិងសេវាកម្មផ្សេងៗជាច្រើនប្រភេទ ដើម្បី​ឱ្យអ្នករស់នៅប្រកបដោយភាពរីករាយ។ សំរាប់ជំរើសនៃការបង់ប្រាក់ត្រូវបានបែងចែកជា៣​ជំរើស ទី១.ការបង់ប្រាក់ទិញផ្តាច់ ទី២.ការបង់ប្រាក់ជាដំណាក់កាល និងទី៣.ការបង់រំលោះសុទ្ធ ជាមួយនិងកម្ចីពីធនាគារព្រីនស៍ និងមានការបញ្ចុះតម្លៃជូន២% នៃតម្លៃផ្ទះផងដែរ ។គូសបញ្ជាក់ថា ​បុរីព្រីនស៍វ័ន ត្រូពិកា មានទីតាំងតាមបណ្តោយមហាវិថី ហាន់ណូយ ស្ថិត​ក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ ។ បុរីព្រីនស៍វ័ន ត្រូពិកា មានផ្ទះជាច្រើនជំរើស​ដូចជា ផ្ទះអាជីវកម្ម លីងហាវស៍ វិឡាទោល វិឡាភ្លោះ និង ឃ្វីនវីឡា ដែលក្នុងផ្ទះនីមួយៗ បានភ្ជាប់នៅប្រព័ន្ធឆ្លាតវៃ ។ ក្រុមហ៊ុន ព្រីនស៍ រៀល អ៊ីស្ទេត គ្រុប រីកចម្រើននៅក្នុងប្រទេសកម្ពុជា ហើយក៏ជាសក្ខីភាពនៃការអភិវឌ្ឍ​យ៉ាង​ឆាប់រហ័ស​របស់ទីក្រុង​ នៃប្រទេសកម្ពុជាផងដែរ ៕អត្ថបទ ៖ ប្រាក់ វ៉ាន់ដា

កម្ពុជានាំចេញទំនិញជាច្រើនមុខរក្សាកំណើនខ្ពស់ នៅដើមឆ្នាំ២០២២នេះ

2022/06/24 01:33:04 pm        674
Facebook Telegram Linkin
ភ្នំពេញ៖ ទំនិញចំនួន១៩ ប្រភេទរបស់កម្ពុជា បាននាំចេញមានកំណើនខ្ពស់ ខណៈប្រភេទទំនិញមួយចំនួនតូចបានថមថយចុះ​បន្តិចបន្តួច​ ក្នុងត្រីមាសទី១ ឆ្នាំ២០២២។យោងតាមព្រឹត្តិបត្រស្ថិតិសេដ្ឋកិច្ច និងហិរញ្ញវត្ថុនៃក្រសួងសេដ្ឋកិច្ច និងហិរញ្ញ នៅក្នុងត្រីមាសទី ១ ឆ្នាំ ២០២២, ក្នុងនោះទាក់ ការនាំចេញទំនិញរបស់កម្ពុជា មានទំហំទឹកប្រាក់ប្រមាណជិត ៥ ០០០ លានដុល្លារអាមេរិក កើនឡើងជិត ២៩ ភាគរយ បើធៀបរយៈពេលដូចគ្នាទៅឆ្នាំ ២០២១ ទំនិញដែល​បាននាំចេញរួមមាន៖ ផលិតផលវាយនភណ្ឌ ផលិតផលមិនមែនកាត់ដេរ និងផលិតផលកសិកម្មជាដើម ក្នុងនោះមានប្រភេទំនិញជាច្រើន មានកំណើនកើនឡើងខ្ពស់ បើបៀបរយៈពេលពេលដូចគ្នាទៅឆ្នាំ២០២១។ជុំវិញការនាំចេញ,ឯកឧត្តម ប៉ែន សុវិជាតិ អ្នកនាំពាក្យ និងជាអនុរដ្ឋលេខាធិការក្រសួងពាណិជ្ជកម្ម ថ្លែងថា នៅក្នុងកំឡុងនៃការរីករាលដាលខ្លាំងនៃជំងឺកូវីដ១៩ ការធ្វើពាណិជ្ជកម្មអន្តរជាតិ កម្ពុជា​នៅតែ​បន្តនាំចេញជាធម្មតា ដោយសារកម្ពុជានៅទទួលបានការបញ្ជាទិញគឺគ្មានការប្រែប្រួល ដោយទីផ្សាររដែលធ្លាប់នាំចេញ ​បានបន្តធ្វើពាណិជ្ជកម្មជាធម្មតា ជាពិសេសបន្ទាប់ពីកម្ពុជា​បើក​សេដ្ឋកិច្ចឡើងវិញ​ ក្រោមការខិតខំប្រឹងប្រែងយកចិត្តទុកដាក់ជាទីបំផុត របស់ប្រមុខរាជរដ្ឋាភិបាល​កម្ពុជា បានធ្វើឲ្យកិច្ចសហប្រតិបត្តិការលើការធ្វើពាណិជ្ជកម្មអន្តរជាតិ កាន់តែមានភាពល្អប្រសើរ​ថែមទៀត។ចំណែកពាណិជ្ជកម្មនៃការនាំចូល,នៅក្នុងត្រីមាសទី១ ឆ្នាំ ២០២២ នេះដែរ ពាណិជ្ជកម្មនៃការនាំចូល មានទំហំទឹកប្រាក់ប្រមាណជាង ៧ ៤៤៥ លានដុល្លារអាមេរិក ថយចុះជិត ១ ភាគរយ បើធៀប​រយៈពេលដូចគ្នាឆ្នាំ ២០២១ ក្នុងនោះផលិតផលដែលមានកំណើនកើនឡើងរួមមាន៖ ថ្នាំពេទ្យ ១០ ភាគរយ, ស្ករស និងប៊ិចេងជាង ១០ ភាគរយ, ប្រេងឆា និងអាហារផ្សេងៗ ១៧ ភាគរយ, បរិក្ខារ​សំណង់ជាង ១៨ ភាគរយ, គ្រឿងអេឡិចត្រូនិចជាង ២៩ ភាគរយ, វាយនភណ្ឌ និង​សំលៀកបំពាក់​ជិត ២៥ ភាគរយ, ទោចក្រយានយន្តជាង ៧ ភាគរយ, បរិក្ខារត្រជាក់ជាង ១១ ភាគរយ, ប្រេងឥន្ធនៈ ៤៨ ភាគរយ, ជីកសិកម្ម ៨ ភាគរយ និងផ្សេងជាង ២០ ភាគរយ៕ អត្ថបទ៖ សុន រ៉ាឌី

រដ្ឋមន្ត្រីទេសចរណ៍កម្ពុជា និងឥណ្ឌូនេស៊ី ប្តេជ្ញាជំរុញចលនាទេសចរណ៍ ខណៈស្ថានការកូវីដធូរស្រាល

2022/06/24 12:14:49 pm        302
Facebook Telegram Linkin
ភ្នំពេញ៖ ឯកឧត្តម Y.M. Sudirman Haseng អគ្គរដ្ឋទូតឥណ្ឌូនេស៊ីប្រចាំកម្ពុជា នៅព្រឹកថ្ងៃទី២៤ ខែមិថុនានេះ បានប្រគល់ឯកសារអនុស្សារណៈយោគយល់គ្នា​ពង្រីកកិច្ចសហប្រតិបត្តិការទេសចរណ៍កម្ពុជា និងឥណ្ឌូនេស៊ី ដើម្បីជម្រុញចលនាទេសចរណ៍ប្រទេសទាំងពីរ ក្រោយស្ថានការណ៍កូវីដ១៩ ធូរស្រាលវិញ។ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានថ្លែងការកោតសរសើរចំពោះប្រទេសឥណ្ឌូនេស៊ី ដែលបានខិតខំប្រឹងប្រែងដើរនាទីយ៉ាងសំខាន់ក្នុងឆាកអន្តរជាតិ ក្នុងបរិបទវិបត្តិកូវីដ ១៩ និងសង្គ្រាមរវាំងរុស្ស៊ី អ៊ុយក្រែនជាពិសេសការធ្វើជាម្ចាស់ផ្ទះរៀបចំកិច្ចប្រជុំ G20 ក្នុងឆ្នាំ២០២២ ព្រមទាំងធ្វើជាម្ចាស់ផ្ទះរៀបចំវេទិកាទេសចរណ៍អាស៊ាន២០២៣ (ATF-2023) និងកិច្ចប្រជុំកំពូលអាស៊ាន​២០២៣ផងដែរ ​ដែលការងារនេះ គឺជាចំណែកមួយដ៏ធំជម្រុញ​ចលនា​ទេសចរណ៍ពីបណ្តាប្រទេសលើពិភពលោក​ មកកាន់តំបន់អាស៊ាន។ឆ្នាំនេះ ជាខួបទី៦៣ នៃទំនាក់ទំនងការទូតរវាងកម្ពុជា-ឥណ្ឌូនេស៊ី ឯកឧត្តម ថោង ខុន ថ្លែង​អំណរគុណដល់ ស្ថានទូតឥណ្ឌូនេស៊ី ដែលបានសហការជាមួយក្រសួងទេសចរណ៍កម្ពុជា និង​ក្រសួងការបរទេស និងសហប្រតិបត្តិការអន្តរជាតិកម្ពុជា ក្នុងការរៀបចំកម្មវិធី Batik Kroma ដែលជា​ព្រឹត្តិការណ៍ជិះកង់នៅថ្ងៃទី៣០ ខែមិថុនា ឆ្នាំ២០២១នៅរមណីយដ្ឋានអង្គរវត្តក្នុងគោល​បំណង​នេះដើម្បីរក្សា និងធ្វើឲ្យទំនាក់ទំនងមិត្តភាពរវាងកម្ពុជា និងឥណ្ឌូនេស៊ីកាន់តែប្រសើរឡើងព្រម​ទាំង​បង្កើនការផ្សព្វផ្សាយទេសចរណ៍ ​និងវប្បធម៌រវាងប្រទេសទាំងពីរ។ជាការឆ្លើយតប ឯកឧត្តម Y.M. Sudirman Haseng អគ្គរដ្ឋទូតឥណ្ឌូនេស៊ីប្រចាំកម្ពុជា បាន​ថ្លែងការ​សន្យាថា​នឹងបង្កើនកិច្ចសហប្រតិបត្តិការពង្រឹងទំនាក់ទំនងសេដ្ឋកិច្ច ​ទេសចរណ៍​ ពាណិជ្ជកម្ម រវាង​ប្រទេសទាំងពីរ ពិសេសជម្រុញការអភិវឌ្ឍទេសចរណ៍ប្រទេសទាំងពីរឲ្យកាន់តែរឹងមាំ និងប្រសើរថែមទៀត។អនុវត្តតាមខ្លឹមសារ អនុស្សារណៈយោគយល់គ្នាMoU ក្នុងវិស័យទេសចរណ៍នេះ ស្ថានទូត​ឥណ្ឌូនេស៊ីបានរៀបចំសិក្ខាសាលាវគ្គបណ្តុះបណ្តាលមូលដ្ឋានស្ដីពីទេសចរណ៍ហាឡាល់ (Tourism Halal)​ សម្រាប់មន្ត្រីក្រសួងទេសចរណ៍កម្ពុជាផងដែរ ក្នុងគោលដៅទាក់ទាញទេសចរម៉ូស្លីម​នៅលើសាកលលោក ​ជាពិសេសប្រជាជនឥណ្ឌូនេស៊ី ​មកទស្សនានៅកម្ពុជាផងដែរ។សូមបញ្ជាក់ថា​ ឯកសារអនុស្សារណៈយោគយល់គ្នា លើកិច្ចសហប្រតិបត្តិការទេសចរណ៍ ត្រូវបានរដ្ឋមន្ត្រីទេសចរណ៍កម្ពុជា​ និងរដ្ឋមន្ត្រីឥណ្ឌូនេស៊ី បានចុះហត្ថលេខា តាមប្រព័ន្ធវីដេអូខនហ្វីរិន ​ក្នុងអំឡុងពេលកម្ពុជាធ្វើជាម្ចាស់ផ្ទះរៀបចំវេទិកាទេសចរណ៍អាស៊ាន ២០២២ ​ចាប់ថ្ងៃទី១៦-២២ ខែមករា ឆ្នាំ២០២២ នៅខេត្តព្រះសីហនុ៕ អត្ថបទ ស៊ុម សុខជា

ខេត្តសៀមរាប ទទួលបានទេសចរជាង ១លាននាក់ ក្នុងរយៈពេល៥ខែឆ្នាំ២០២២

2022/06/24 10:20:34 am        480
Facebook Telegram Linkin
សៀមរាប៖ មន្ដ្រីទេសចរណ៍ បានឱ្យដឹងថា ក្នុងរយៈពេល០៥ខែឆ្នាំ២០២២នេះ ខេត្តសៀមរាប ទទួលបានភ្ញៀវទេសចរប្រមាណជាង ១លាននាក់ (១.០២៧.៧៧៩នាក់) ដែលចំនួននេះ កើនឡើង ៧៤៤,៨៧% បើប្រៀបធៀបរយៈពេលដូចគ្នាឆ្នាំ២០២១ មានចំនួនប្រមាណ ១២១.៦៤៩ នាក់ ។យោងតាមរបាយការណ៍លោក ង៉ូវ សេងកាក់ ប្រធានមន្ទីរទេសចរណ៍ខេត្ដសៀមរាប បានឱ្យដឹង​នៅ​ថ្ងៃទី២៤ ខែមិថុនាឆ្នាំ២០២២នេះថា ក្នុងរយៈពេល៥ខែ ចាប់ពីខែមករា ដល់ខែមិថុនា ឆ្នាំ២០២២នេះ មានអ្នកទេសចរជាតិ និងអន្ដរជាតិ ទៅទស្សនាកំសាន្ដនៅខេត្ដសៀមរាប​មានចំនួនប្រមាណ ១លាន២ម៉ឺន៧៧៧៩នាក់ ។ ក្នុងនោះភ្ញៀវទេសចរអន្តរជាតិ មានចំនួន ៤៥.៧៧៩ នាក់ កើន ៨៥៩,៩២% បើប្រៀបធៀបនឹងរយៈពេលដូចគ្នាឆ្នាំ២០២១ មានចំនួន៤.៧៧៤នាក់។ភ្ញៀវទេសចរជាតិមានចំនួនប្រមាណ៩៨ម៉ឺន២.០០០ នាក់ មានការកើនឡើងចំនួន ៧៤០,២១% បើប្រៀបធៀបនឹងរយៈពេលដូចគ្នាឆ្នាំ២០២១ មានចំនួនប្រមាណ ១១៦.៨៧៥ នាក់។របាយការណ៍ បន្ដថា ភ្ញៀវទេសចរគិតតាមលំដាប់ថ្នាក់សញ្ជាតិ តាមគ្រប់មធ្យោបាយ រួមមាន ជនជាតិចិន ជនជាតិបារាំងជនជាតិ ជនជាតិ អាមេរិ អាឡឺម៉ង់ ជនជាតិវៀតណាម ជនជាតិ សឹង្ហបុរី ជនជាតិអូស្ត្រាលី ជនជាតិឥណ្ឌា និងជនជាតិកូរ៉េ ។ដោយឡែករបាយការណ៍ នាយកដ្ឋានអភិវឌ្ឍន៍ទេសចរណ៍អង្គរ ​បានបង្ហាញថា លំហូរភ្ញៀវទេសចរ​ទៅទស្សនាក្នុងតំបន់អង្គរ មានភ្នាក់ងារទេសចរនៃអាជ្ញាធរជាតិអប្សរា បានជួយសង្រ្គោះបឋម ដល់ភ្ញៀវទេសចរ៤៩ករណី ក្នុងនោះមានគ្រោះថ្នាក់ រអិលជើង រឺជំពប់ជើងបណ្តាលឱ្យដួល ០៦ករណី គ្រោះថ្នាក់ចរាចរណ៍ ១៩ករណី។ខ្យល់គដួលសន្លប់១៣ករណី សត្វស្វាខាំ១១ករណី។ អាជ្ញាធរជាតិអប្សរាស្នើរដល់អ្នកទេសចរជាតិនិងអន្ដររជាតិអោយបើកបរបន្ថយល្បឿន បោះចោល​សំរាមអោយបានត្រឹមត្រូវ នៅក្នុងធុងសំរាម និងហាមទៅឈជិតស្វាជាដើម។បើតាមរបាយការណ៍មន្ទីរទេសចរណ៍ខេត្ដសៀមរាប បន្ថែមថា ជើងហោះហើរ ចូលខេត្ដសៀមរាប ក្នុងរយៈពេល០៥ខែឆ្នាំ២០២២មានចំនួន២៩២ជើង ដែលមានអ្នកដំណើរសរុបចំនួន ២៤.៥៥១ នាក់ ។ ដោយឡែកជើងហោះហើរលក្ខណៈអន្តរជាតិ មានក្រុមហ៊ុន Singapore Airline (សឹង្ហបុរី-សៀមរាប) មានចំនួន ១៥១ ជើង អ្នកដំណើរ ១៧.២០១ នាក់។ ក្រុមហ៊ុន Air Asia (កូឡាឡាំពួរ-សៀមរាប) មានចំនួន ១២ ជើង អ្នកដំណើរ ១.៥៤៥ នាក់។ ក្រុមហ៊ុន Thai Smile (បាងកក-សៀមរាប) មានចំនួន ១០ ជើង អ្នកដំណើរ ៩៤៧ នាក់។ក្រុមហ៊ុន China Eastern (គួនមីង-សៀមរាប) មានចំនួន ០២ ជើង អ្នកដំណើរ ១៧១ នាក់ ។ ក្រុមហ៊ុន Bangkok Air (បាងកក-សៀមរាប) មានចំនួន ០១ ជើង អ្នកដំណើរ ៦៣ នាក់។ ក្រុមហ៊ុន Air Iceland (GUM-REP) មានចំនួន ០១ ជើង អ្នកដំណើរ ៣៨ នាក់ ។ដោយឡែកការហោះហើរជាលក្ខណៈ Charter Flight មានចំនួន ២៩ ជើង អ្នកដំណើរ ១៨៥ នាក់។ជាមួយគ្នានោះ ការហោះហើរក្នុងស្រុក រួមមានក្រុមហ៊ុន Cambodia Angkor Air (ភ្នំពេញ-សៀមរាប) មានចំនួន ៨៤ ជើង អ្នកដំណើរ ៤.១៤៧ នាក់។ក្រុមហ៊ុន Cambodia Airway (ភ្នំពេញ-សៀមរាប) មានចំនួន ០២ ជើងអ្នកដំណើរ ២១៤ នាក់ ។សូមបញ្ជាក់ថា ក្រុមហ៊ុន Air Asia បានចាប់ផ្តើការហោះហើរ (កូឡាឡាំពួរ-សៀមរាប)​ កាលពីថ្ងៃទី ២៥ ខែមេសា ឆ្នាំ២០២២ រហូតដល់បច្ចុប្បន្ន ដោយធ្វើការហោះហើរ០២ ជើងក្នុងមួយសប្តាហ៍ (ពីថ្ងៃពុធ និងថ្ងៃអាទិត្យ) ។ និងពីបាងកក-សៀមរាប ចាប់ពីថ្ងៃទី ០២ ខែមិថុនា ឆ្នាំ២០២២ មានចំនួន ០៣ ជើងក្នុងមួយសប្តាហ៍ (ថ្ងៃ អង្គារព្រហស្បតិ៍ និងថ្ងៃសៅរ៍) ៕

អគ្គនាយកដ្ឋានពន្ធដារ គ្រោងរៀបចំយន្តការគ្រប់គ្រង និងប្រមូលចំណូលពន្ធលើវិស័យរ៉ែ ឱ្យមានតម្លាភាព

2022/06/23 04:37:17 pm        556
Facebook Telegram Linkin
ភ្នំពេញ៖ អគ្គនាយកដ្ឋានពន្ធដារ នឹងរៀបចំយន្តការគ្រប់គ្រងប្រមូលចំណូលពន្ធលើវិស័យរ៉ែឱ្យបានល្អប្រសើរ និងរៀបចំបង្កើត​ស្តង់ដារ​នៃការអនុវត្ត និងអនុលោមភាព សម្រាប់គម្រោងវិនិយោគលើធនធាន​រ៉ែផ្សេងៗទៀត បន្ទាប់ពីគណៈប្រតិភូចុះទស្សនកិច្ច​សិក្សាឈ្វេងយល់ ​អំពីស្ថានភាពជាក់ស្តែង របស់ក្រុមហ៊ុន រឺនេសង់ មីនើរ៉ល ដែលជាក្រុមហ៊ុន រុករកធនធានរ៉ែ។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានពន្ធដារ លើកឡើងក្នុងទស្សនកិច្ចសិក្សាឈ្វេងយល់ អំពីប្រតិបត្តិការរុករករ៉ែ ​នៅតំបន់អូខ្វាវ ខេត្តមណ្ឌលគីរី របស់ក្រុមហ៊ុន រឺនេសង់ មីនើរ៉ល ដើម្បីពិនិត្យមើលលើសក្តានុពលនការប្រមូល​ចំណូល​ពន្ធ​ពី​វិស័យរ៉ែ នៅថ្ងៃទី២១ ខែមិថុនា ឆ្នាំ២០២២ នេះថា សកម្មភាពវិនិយោគរបស់ក្រុមហ៊ុន រឺនេសង់ មីនើរ៉ល បានជំរុញការអភិវឌ្ឍប្រកបដោយការទទួលខុសត្រូវ ចំពោះសង្គម ​និងបរិស្ថាន, ការយក​ចិត្ត​ទុកដាក់​អនវុត្តស្របទៅតាមច្បាប់​ និងបទប្បញ្ញត្តិ​ជាធរមាន ​ជាពិសេសសហគ្រាសមានតម្លាភាព ក្នុងការបំពេញកាតព្វកិច្ចសារពើពន្ធ ​និងបង្ហាញអំពីអនុលោមភាពសារពើពន្ធខ្ពស់ ដែលជាគុណ​ប្រយោជន៍ នៃថវិកាជាតិ ទាំងទិដ្ឋភាពចំណូលសារពើពន្ធ ​ព្រមទាំងចំណូលមិនមែនសារពើពន្ធ។ ផ្អែកលើកម្រិតអនុលោមភាពសារពើពន្ធខ្ពស់នេះ អគ្គនាយកដ្ឋានពន្ធដារ នឹងពិនិត្យលទ្ធភាពផ្ដល់​ជូន​នូវ “វិញ្ញាបនបត្រអនុលោមភាពសារពើពន្ធ ប្រភេទមាស​ (GOLD Certificate)" បញ្ជាក់នូវកម្រិត​អនុលោមភាព​ខ្ពស់ ជូនក្រុមហ៊ុន រឺនេសង់ មីនើរ៉ល ។ឯកឧត្តម បន្តថា កន្លងមកអគ្គនាយកដ្ឋានពន្ធដារ ជួបប្រទះឧបសគ្គ ​និងបញ្ហាប្រឈមយ៉ាងខ្លាំង ចំពោះ​វិស័យធនធានរ៉ែ ​ដោយក្រុមហ៊ុនវិនិយោគលើវិស័យនេះ​មួយចំនួន ពុំបានផ្តល់កិច្ច​សហការ​ពេញលេញ ​ក្នុងការបំពេញកាតព្វកិច្ចសារពើពន្ធ ​និងមិនបានផ្ដល់នូវបញ្ចិកាគណនេយ្យ, របាយ​ការណ៍​ហិរញ្ញវត្ថុ, និងឯកសារពាក់ព័ន្ធ ប្រកាស​ និងការបង់ប្រាក់ពន្ធទាប ដែលពុំបាន​ឆ្លុះបញ្ចាំង​អំពីវិស័យមួយ ដែលកំពុងមានសក្តានុពល​ ព្រមទាំងពុំបានសហការ ឱ្យមន្ត្រីពន្ធដារ​ចុះមកដោយ​ផ្ទាល់ដូចក្រុមហ៊ុននេះឡើយ។ឯកឧត្តម គង់ វិបុល បញ្ជាក់ថា អគ្គនាយកដ្ឋានពន្ធដារ ចង់ឃើញក្រុមហ៊ុន និងសហគ្រាសដទៃផ្សេង ក្នុងវិស័យធនធានរ៉ែនេះ​ អនុវត្តប្រកបដោយ​ស្តង់ដារ និង​តម្លាភាព​ ប្រហាក់ប្រហែល ឬដូចទៅ​នឹង​ក្រុមហ៊ុន រឺនេសង់ មីនើរ៉ល ដែលអាចនិយាយបានថា ជាប្រតិបត្តិការការងារល្អប្រសើរ និង​ជាគំរូ​សម្រាប់ក្រុមហ៊ុន ​និងសហគ្រាសដទៃទៀតក្នុងវិស័យធនធានរ៉ែនេះ ​ដោយមានតម្លាភាព និង​កិច្ចសហប្រតិបត្តិការក្នុងការគ្រប់គ្រងប្រមូលចំណូលពន្ធ។ តាមរយៈការសិក្សាដកពិសោធន៍ពីទស្សនកិច្ចសិក្សានេះ ​អគ្គនាយកដ្ឋានពន្ធដារ នឹងរៀបចំ​យន្តការ​ក្នុងការគ្រប់គ្រងប្រមូលចំណូលពន្ធឱ្យបានល្អប្រសើរបន្ថែមទៀត​ ចំពោះវិស័យធនធានរ៉ែនេះ តាម​រយៈការបង្កើតស្តង់ដារនៃការអនុវត្ត ​និងអនុលោមភាពសម្រាប់ គម្រោងវិនិយោគផ្សេងទៀត​ក្នុង​វិស័យដូចគ្នានេះ ដែលជាវិស័យកំពុងមានសក្ដានុពល៕អត្ថបទ៖ សុន រ៉ាឌី

ធនាគារជាតិព្យាករណ៍សេដ្ឋកិច្ចកម្ពុជា ក្នុងរង្វង់៥ភាគរយ ក្នុងឆ្នាំ២០២២នេះ

2022/06/23 01:03:04 pm        489
Facebook Telegram Linkin
ភ្នំពេញ៖ ធនាគារជាតិនៃកម្ពុជា បានព្យាករណ៍កំណើនសេដ្ឋកិច្ចកម្ពុជា ក្នុងកំណើន ៥ភាគរយ កើនឡើងពី ៣ភាគកាលពីឆ្នាំ២០២១កន្លងទៅ គាំទ្រយ៉ាងសំខាន់ដោយសកម្មភាពនាំចេញកសិកម្ម ការអនុវត្តកិច្ចព្រមព្រៀងតំបន់និងសេរីទ្វេភាគី។ធនាគារជាតិនៃកម្ពុជា លើកឡើងក្នុងរបាយការណ៍ស្ថិរភាពហិរញ្ញវត្ថុឆ្នាំ២០២១ ចេញផ្សាយកាល​ពីពេលថ្មីៗនេះ​ថា កំណើនផលិតផលក្នុងស្រុកសរុប (GDP) របស់ប្រទេសនៅឆ្នាំ ២០២២ នឹង​ត្រូវបាន​គាំទ្រ​ជាចម្បងដោយការនាំចេញកសិផល ​ការ​ដឹកជញ្ជូន ​ទូរគមនាគមន៍ និងការធ្វើឱ្យ​ប្រសើរឡើងនូវលំហូរវិនិយោគ ​និងការផ្ទេរប្រាក់ពីកម្មករនៅក្រៅប្រទេស​។របាយការណ៍ដដែល បន្តថា ទាក់ទងនឹងពាណិជ្ជកម្ម និងការវិនិយោគកម្ពុជា ត្រូវបានគេរំពឹងថា នឹង​ទទួលបានអត្ថប្រយោជន៍ពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) កិច្ចព្រមព្រៀងពាណិជ្ជកម្មសេរីទ្វេភាគី និងការដាក់ឱ្យប្រើប្រាស់ច្បាប់វិនិយោគថ្មី។ទោះយ៉ាងណា ធនាគារជាតិនៃកម្ពុជា ក៏បានបង្ហាញពីកត្តាមួយចំនួន ដែលអាចនឹងជះឥទ្ធិពល​ដល់​កំណើនសេដ្ឋកិច្ចកម្ពុជា។​របាយការណ៍ បានលើកឡើងពីលក្ខខណ្ឌមិនច្បាស់លាស់ដែលបង្កឡើងដោយជំងឺរាតត្បាត សង្គ្រាមរុស្ស៊ី-អ៊ុយក្រែន និងការដំឡើងអត្រាការប្រាក់នៅក្នុងប្រទេសអភិវឌ្ឍន៍ ជាការគំរាមកំហែង​ដល់សេដ្ឋកិច្ច។ទោះបីជាកម្ពុជាមានទំនាក់ទំនង​ម៉ាក្រូសេដ្ឋកិច្ចតិចតួចទៅនឹងតំបន់រុស្ស៊ី-អ៊ុយក្រែនក៏ដោយ ក៏​សង្រ្គាមដែលអូសបន្លាយ ​អាចបណ្តាលឱ្យមានការខូចខាតយ៉ាងធ្ងន់ធ្ងរ​ដល់សេដ្ឋកិច្ចពិភពលោក ជាពិសេសសហភាពអឺរ៉ុប​ ដែលជាគោលដៅនាំចេញដ៏សំខាន់​មួយរបស់កម្ពុជា។បន្ថែមពីលើនេះ ការធ្លាក់ចុះសេដ្ឋកិច្ចរបស់ប្រទេសចិន ដោយសារយុទ្ធសាស្ត្រទប់ស្កាត់នៃជំងឺកូវីដ-១៩ បាននាំឱ្យមានការបិទទ្វារ​ញឹកញាប់​ជាងមុន​ និងថមថយ​នៃវិស័យអចលនទ្រព្យ​របស់​ប្រទេសចិន ​ដែលអាចប៉ះពាល់ដល់ការងើបឡើងវិញ​នៃសេដ្ឋកិច្ចកម្ពុជា ដែលពឹងផ្អែកខ្លាំង​លើការ​វិនិយោគរបស់ចិន ​និងសម្ភារៈនាំចូលសម្រាប់ឧស្សាហកម្ម​ដែលផ្តោតលើការនាំចេញ​របស់​ព្រះរាជាណាចក្រកម្ពុជា។ធនាគារជាតិនៃកម្ពុជា ​ក៏បានលើកឡើងថា ទោះបីជាអត្រានៃការឆ្លងជំងឺកូវីដ១៩បំប្លែងថ្មី Omicron នៃ មានកម្រិតទាបនៅកម្ពុជាក៏ដោយ ​ការ​គំរាមកំហែង​នៃការលេចឡើងនៃជំងឺប្រភេទថ្មីនេះ​នៅតែ​មាននៅឡើយ។ ការបន្តរីករាលដាលនៃ ជំងឺកូវីដ១៩ Omicron នៅក្នុងតំបន់ ​ក៏បានជះឥទ្ធិពលដល់​សេដ្ឋកិច្ចកម្ពុជា​ផងដែរ តាមរយៈការធ្លាក់ចុះនៃការទូទាត់ប្រាក់ ​ទេសចរណ៍ ការវិនិយោគ និង​បណ្តាញនាំចេញ។សូមបញ្ជាក់ថា កំណើនសេដ្ឋកិច្ចកម្ពុជា បានងើបឡើងវិញ ក្នុងរង្វង់ ៣ភាគរយ ក្នុងឆ្នាំ២០២១ គាំទ្រខ្លាំង​សកម្មភាពសេដ្ឋកិច្ច និងសង្គម នៅត្រីមាសទីបួន ​បន្ទាប់ពីរាជរដ្ឋាភិបាល បាន​បើកប្រទេសពេញលេញឡើងវិញ៕អត្ថបទ៖ វណ្ណៈ

កម្ពុជាមាន SME ជាង ៤៣ ៦០០ មូលដ្ឋាន បាននិងកំពុងផលិត និងវេចខ្ចប់សម្រាប់ផ្គត់ផ្គង់ទីផ្សារ

2022/06/23 12:34:12 pm        476
Facebook Telegram Linkin
ភ្នំពេញ៖ គិតត្រឹមខែឧសភា ឆ្នាំ២០២២នេះ កម្ពុជាទទួលបានការវិនិយោគលើសហគ្រាសធុនតូច និងមធ្យម មានចំនួនសរុបជិត ៤៣ ៦០០ មូលដ្ឋាន ក្នុងនោះ មានសហគ្រាសបង្កើតថ្មី ចំនួន ៤៥១ មូលដ្ឋាន មានទុនវិនិយោគសរុបប្រមាណជាង ៧៤០ លានដុល្លារអាមេរិក បានកំពុងដំណើរការខ្សែ​ច្រវ៉ាក់​ផលិតកម្ម ក្នុងការផលិត និងវេចខ្ចប់។ឯកឧត្តម ហេង សុខគង់ អ្នកនាំពាក្យ និងជារដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងលើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTVថា រាជរដ្ឋាភិបាល ចាត់ទុកវិស័យសហគ្រាសធុនតូច និងមធ្យមជាឆ្អឹងខ្នងនៃសេដ្ឋកិច្ច ក្នុងនោះ​វិស័យនេះ​បានស្រូបយកសក្តានុពលក្នុងស្រុក​ ជាពិសេសលើវិស័យកសិកម្ម សម្រាប់ជាវត្ថុធាតុដើម​ក្នុងការវេចខ្ចប់ ខណៈដែលរាជរដ្ឋាភិបាល បានកំពុងបន្តអនុវត្តវិធានគោលនយោបាយជាច្រើន ដើម្បី​ទាញយកតម្លៃបន្ថែម​ ពីវិស័យកសិកម្ម។ឯកឧត្តម ថ្លែងឲ្យដឹងថា ជុំវិញការអភិវឌ្ឍសហគ្រាសលើផ្នែកកម្មន្តសាលនេះ កម្ពុជាទទួល​បាន​សហគ្រាសទើបតែបង្កើតថ្មី ​មានចំនួនប្រមាណ ​៤៥១ មូលដ្ឋាន គិតសរុបមកដល់ត្រឹមខែ ឧសភា ឆ្នាំ ២០២២ នេះ ធ្វើឱ្យចំនួនសហគ្រាសធុនតូច និងមធ្យម សរុបប្រមាណជិត ៤៣ ៦០០ មូលដ្ឋាន ដោយ​មានទុនវិនិយោគប្រមាណ៧៤០ លានដុល្លារអាមេរិក។ សហគ្រាសកម្មន្តសាលទាំងនេះ នឹងចូលរួមចំណែកក្នុងផ្គត់ផ្គង់តាមតម្រូវការទីផ្សារ នឹងការចូលរួមដល់កំណើននៃសេដ្ឋកិច្ចជាតិ។លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) លើកឡើងថា ​ទាក់ទងខ្សែច្រវ៉ាក់ផលិតនៅក្នុងសហគ្រាសធុនតូច និងមធ្យម ទោះបីនៅក្នុង​ការរីករាលដាលខ្លាំងនៃជំងឺកូវីដ ១៩ វិស័យនេះនៅតែដំណើរផលិត ​និងវេចខ្ចប់ជាធម្មតា និង​មកដល់បច្ចុប្បន្នការវេចខ្ចប់នេះ ​បានដំណើរការទៅដោយរលូន ​និងបានកើនឡើង ដើម្បីផ្គត់ផ្គង់​តម្រូវការទីផ្សារ ​សម្រាប់ហូបចុករបស់ ប្រជាជន។សូមបញ្ជាក់ថា ក្របខណ្ឌគោលនយោបាយហិរញ្ញវត្ថុសាធារណៈ ឆ្នាំ ២០២៣, ដើម្បីធានាការ​សម្រេច​បាននូវទស្សនវិស័យម៉ាក្រូសេដ្ឋកិច្ចរយៈពេលមធ្យម គោលនយោបាយ​អាទិភាព​របស់​រាជរដ្ឋាភិបាលដែលបានដាក់ចេញក្នុងយុទ្ធសាស្ត្រចតុកោណ-ដំណាក់កាលទី ៤និងផែនការ​យុទ្ធសាស្ត្រ​អភិវឌ្ឍន៍ជាតិឆ្នាំ ២០១៨-២០២៣, ​ក្របខណ្ឌគោលនយោបាយហិរញ្ញវត្ថុសាធារណៈឆ្នាំ ២០២៣ កំណត់យកអាទិភាពសំខាន់ៗជាច្រើន ក្នុងនោះសម្រាប់សហគ្រាសកម្មន្តសាល រាជរដ្ឋាភិបាល​នឹងបន្តគាំទ្រ ការអភិវឌ្ឍ​សហគ្រាសធុនតូច និងមធ្យម តាមរយៈការពង្រឹងការអនុវត្ត ច្បាប់ស្តីពីវិនិយោគនៃព្រះរាជាណាចក្រកម្ពុជា ការដាក់ចេញវិធានការលើកទឹកចិត្តជាក់លាក់ និងការកែលម្អបរិយាកាសធុរកិច្ច ៕អត្ថបទ៖ សុន រ៉ាឌី,

វិនិយោគិនម៉ាឡេស៊ី ស្វែងយល់សក្តានុពលសេដ្ឋកិច្ច ពាណិជ្ជកម្ម និងវិនិយោគនៅកម្ពុជា

2022/06/22 12:58:10 pm        519
Facebook Telegram Linkin
ភ្នំពេញ៖ ក្រុមវិនិយោគិនចំនួន ១៦រូប មកពីប្រទេសម៉ាឡេស៊ី ក្នុងវិស័យផ្សេងៗគ្នា បានជួបពិភាក្សាការងារជាមួយវិនិយោគិននៅកម្ពុជា ដើម្បីស្វែងយល់អំពីសក្តានុពលសេដ្ឋកិច្ច ពាណិជ្ជកម្ម និងការវិនិយោគនៅប្រទេសកម្ពុជា បន្ទាប់ពីស្ថានភាពនៃវិបត្តិកូវីដ១៩ បានធូរស្រាលច្រើនឡើងវិញ។លោក ហោ សេរីវឌ្ឍន៍ ប្រធានសមាគមវិនិយោគិននវានុវត្តន៍ និងអភិវឌ្ឍន៍ (IDI) និងជាប្រធាន​ក្រុមប្រឹក្សាភិបាល នៃក្រុមហ៊ុន ID Capital PLC (IDC) ​មានប្រសាសន៍ប្រាប់បណ្តាញ​អ្នកសារព័ត៌មាន កាល​ពីរសៀលថ្ងៃទី២១ មិថុនា ឆ្នាំ២០២២កន្លងទៅថា ​នេះជាលើកទី១ ​ដែលភាគីទាំងពីរបានជួបគ្នា ដើម្បីស្វែងយល់ពីគ្នា មុននឹងឈាន​ដល់​ការចាប់ដៃគូគ្នាក្នុងការវិនិយោគនាពេល​អនាគត​លើ​គ្រប់វិស័យ ​ក្នុងនោះរួមមាន​ សុខាភិបាល ​បដិសណ្ឋារកិច្ច ​អចលនទ្រព្យ ម្ហូបអាហារ និងវិស័យសំខាន់ៗ​ផ្សេងៗទៀត។លោក សេរីវឌ្ឍន៍ បានឲ្យដឹងទៀតថា នេះគឺជាចាប់ផ្តើមក្នុងការសិក្សាស្វែងយល់ រវាងវិនិយោគិន​ម៉ាឡេស៊ី និងវិនិយោគិនកម្ពុជា ​ដើម្បីឈានទៅដល់ឱកាសការវិនិយោគ។ ​បន្ទាប់ពីនេះ ​ភាគីទាំងពីរ នឹងត្រៀម​ជួបគ្នាបន្តទៀត ​ដែលនឹងវិនិយោគលើវិស័យណាមួយជាមួយគ្នា ។នេះជាការផ្សារភ្ជាប់សមាជិកនៅកម្ពុជា និងម៉ាឡេស៊ី ដែលអាចក្លាយជាដៃគូជាមួយគ្នាដើម្បីធ្វើការ​វិនិយោគ​រួមគ្នា​លើ​គម្រោងនានា។តាមរយៈបទបង្ហាញនានារបស់ក្រុមវិនិយោគិនកម្ពុជា ​បានបញ្ជាក់យ៉ាង​លម្អិតជូនដល់ភាគីម៉ាឡេស៊ី អំពីការស្វាគមន៍ ​និងបើកទូលាយ​ទទួលរាល់ការវិនិយោគទាំងអស់ ហើយកម្ពុជា​ក៏មានធនធាន​គ្រប់គ្រាន់​ និងមានលក្ខណៈអំណោយផល ​ទាំងភូមិសាស្រ្ត ​ស្ថេរភាពនយោបាយ និងសន្តិសុខ​សង្គម ដែលជាកត្តាចម្បង ​ធានាបាននូវសុវត្ថិភាពក្នុងការងារវិនិយោគ និងគ្មានហានិភ័យណា​មួយកើតឡើងចំពោះអ្នកវិនិយោគទុននៅកម្ពុជាទាំងពេលបច្ចុប្បន្ន ​និងទៅថ្ងៃអនាគត។សូមបញ្ជាក់ថា ​សមាគមវិនិយោគិននវានុវត្តន៍ និងអភិវឌ្ឍន៍​ បានបង្កើតឡើងក្នុងឆ្នាំ២០២០ ក្នុង​បេសកម្មចង់ក្លាយ​ជាកន្លែងប្រមូលផ្តុំ ​ការវិនិយោគ អ្នកវិនិយោគិន ដើម្បីចូលរួមជាមួយ​រាជរដ្ឋា​ភិបាល ក៏ដូចជាវិស័យឯកជនផ្សេងៗទៀត​ ដើម្បីវិនិយោគហើយជួយ​អភិវឌ្ឍន៍ប្រទេសជាតិ​ឲ្យ​កាន់រីកចម្រើនថែមទៀត៕អត្ថបទ៖ ឈិត បូរ៉ាវី

ប្រភិភូកម្ពុជាជាង ៣០ក្រុមហ៊ុន អញ្ជើញចូលរួមប្រជុំនៃគម្រោងតភ្ជាប់ផ្លូវរថភ្លើង​ល្បឿនលឿន​ក្នុងអាស៊ាន

2022/06/21 04:54:08 pm        547
Facebook Telegram Linkin
ភ្នំពេញ៖ ប្រតិភូកម្ពុជានៅក្នុងវិស័យឡូជីស្ទិកប្រមាណជាង ៣០ ក្រុមហ៊ុន នឹងអញ្ជើញចូលរួមប្រជុំនៅប្រទេសឡាវ លើគម្រោងពិភាក្សា នៃការតភ្ជាប់ផ្លូវរថភ្លើងល្បឿនលឿនរួមមាន៖ ប្រទេសចិន វៀតណាម ឡាវ ថៃ និងកម្ពុជា ដើម្បីសម្រួលដល់ការដឹកជញ្ជូន ក្នុងប្រទេសជាប់តំបន់ទន្លេមេគង្គ។លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា ថ្លែងប្រាប់ភ្នាក់ងារអ្នកយកព័ត៌មាន BTV ឱ្យដឹងថា នៅថ្ងៃទី២១ ខែមិថុនា ឆ្នាំ២០២២នេះ ប្រតិភូក្នុងវិស័យឡូជីស្ទិកនៃវិស័យឯកជននៅកម្ពុជា មានជាង ៣០ ក្រុមហ៊ុន ដែលដឹកនាំដោយលោកឧកញ៉ាផ្ទាល់ បានអញ្ជើញទៅចូលប្រជុំនៅ​ប្រទេស​ឡាវ ដោយក្នុងកិច្ចប្រជុំនោះ មានការចូលរួមពីប្រតិភូប្រាទេសវៀតណាម ថៃ និងប្រទេសឡាវ ខ្លួនឯងដោយផ្ទាល់ ដើម្បីប្រជុំពិភាក្សា នៃគម្រោងការតភ្ជាប់ផ្លូវរថភ្លើងល្បឿនលឿន (ប្រទេសជាប់តំបន់ទន្លេមេគង្គ) រវាងប្រទេសចិន វៀតណាម ឡាវ ថៃ និងកម្ពុជា។លោកឧកញ៉ា បន្តឲ្យថា ជុំវិញការប្រជុំពិភាក្សានៃគម្រោងតភ្ជាប់ផ្លូវរថភ្លើងឆ្លងកាត់អាស៊ាននេះ ពិតជា​មានសារៈសំខាន់ណាស់ ប្រសិនការ​អនុវត្តប្រព្រឹត្តិទៅដោយរលូន ​វានឹងផ្តល់ផលប្រយោជន៍ នឹង​សម្រួលដល់ការដឹកជញ្ជូន ​ជាពិសេសការដឹកជញ្ជូនទំនិញឆ្លងកាត់ពីកម្ពុជាទៅកាន់ប្រទេសចិន, ខណៈបច្ចុប្បន្នការដឹកជញ្ជូនតាមផ្លូវទឹករវាងកម្ពុជា-ចិន បានប្រើប្រាស់រយៈពេលយូរ ចន្លោះពី ១០ ថ្ងៃ ទៅ១៥ថ្ងៃ ។ ចំណែកជុំវិញការដឹកជញ្ជូនតាមផ្លូវរថភ្លើងនេះ​ បើយើងគិតរយៈពេលនៃការដឹកជញ្ជូន ពីគុណមិញ​ប្រទេសចិន ​មកដលប្រទេសឡាវ​ គឺប្រើប្រាស់រយៈពេលត្រឹម ៧២ ម៉ោងប៉ុណ្ណោះ ​ដែលបញ្ហានេះ យើងត្រូវពិភាក្សាឲ្យបានច្បាស់លាស់សម្រាប់ការតភ្ជាប់ ​ជាពិសេសតម្លៃនៃការដឹកជញ្ជូនតែម្តង។សូមបញ្ជាក់ថា ជុំវិញវិស័យដឹកជញ្ជូន, បច្ចុប្បន្នផលប៉ះពាល់បានកើតឡើង គឺការរឹតត្បិត​នៃការ​ទប់ស្កាត់នៃការរីករាលដាលជម្ងឺកូវីដ១៩, ការឡើងថ្លៃប្រេង​ ដោយសារសង្គ្រាមនៅរុស្សី-អ៊ុយក្រែន​ជាដើម ដែលការងារនេះបានជះឥទ្ធិពលដល់ការឡើងថ្លៃនៃសេវាដឹកជញ្ជូន ក្នុងនោះចំពោះថ្លៃ​សេវាដឹកជញ្ជូនតាមកប៉ាល់វិញ បានប្រែប្រួលយ៉ាងខ្លាំងផងដែរ ខណៈតម្លៃនៃការដឹកជញ្ជូនពីមុន ថ្លៃមួយកុងតេន័រ ចន្លាះពី ២ ៥០០ ទៅ ៣ ០០០ ដុល្លារអាមេរិក ​បច្ចុប្បន្នបានហក់ជាង ៨ ០០០ ដុល្លារក្នុងមួយទូរ ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ក្រសួងការងារបន្តផ្សព្វផ្សាយឱកាសការងារជូនពលរដ្ឋ និងពលករក្នុងខេត្តចំនួន១១បន្ថែមទៀត ខណៈមួយសប្តាហ៍កន្លងមក ពលករជាង១,៣ ម៉ឺននាក់ទទួលបានការងារធ្វើ
07/15/2025 12:07 PM
Facebook Telegram Linkin
មនុស្ស៤៦នាក់ស្លាប់ និង៣៧នាក់រងរបួសក្នុងការវាយប្រហារដោយទាហានប៉ារ៉ានៅស៊ូដង់ខាងលិច
07/15/2025 12:07 PM
Facebook Telegram Linkin
ប្រទេសម៉ិកស៊ិក ប្តេជ្ញាស្វែងរកការផ្អាកពន្ធរបស់សហរដ្ឋអាមេរិកលើផលិតផលប៉េងប៉ោះ
07/15/2025 12:07 PM
Facebook Telegram Linkin
កងកម្លាំងការពារអ៊ីស្រាអែល ទទួលស្គាល់ «កំហុស» ក្នុងការវាយប្រហារសម្លាប់កុមារនៅចំណុចចែកចាយទឹក
07/15/2025 12:07 PM
Facebook Telegram Linkin
ប្រមុខការទូតកម្ពុជា៖ ទំនាក់ទំនងកម្ពុជា-បារាំងពឹងផ្អែកលើទំនុកចិត្តគ្នា និងស្មោះស្ម័គ្រ​គ្នា​ទៅ​វិញ​ទៅ​មក
07/15/2025 12:07 PM
Facebook Telegram Linkin
ក្រុមសកម្មជន៖ ការវាយឆ្មក់របស់កងកម្លាំង RSF របស់ស៊ូដង់ បានសម្លាប់មនុស្សជិត ៣០០នាក់
07/15/2025 12:07 PM
Facebook Telegram Linkin
រលកកម្តៅក្នុងប្រទេសអេស្ប៉ាញបណ្តាលឱ្យមនុស្ស១.១៨០នាក់ស្លាប់ក្នុងរយៈពេល២ខែកន្លងទៅនេះ
07/15/2025 12:07 PM
Facebook Telegram Linkin
រដ្ឋាភិបាលអ៊ីស្រាអែល និងយោធាប៉ះទង្គិចគ្នា ជុំវិញជំរំដែលស្នើឡើងសម្រាប់ដាក់អ្នកស្រុកហ្កាហ្សា
07/15/2025 12:07 PM
Facebook Telegram Linkin
UN ប៉ាន់ប្រមាណថា កុមារ ១៤លាននាក់ទូទាំងពិភពលោក មិនបានចាក់វ៉ាក់សាំងទាល់តែសោះនៅឆ្នាំ២០២៤
07/15/2025 12:07 PM
Facebook Telegram Linkin
ផ្សែងចំហេះព្រៃនៅកាណាដា បង្កជាការព្រមានពីគុណភាពខ្យល់នៅទីក្រុងតូរ៉ុនតូ និងសហរដ្ឋអាមេរិក
07/15/2025 12:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.