នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រតិបត្តិការការទូទាត់តាម QR Code នៅកម្ពុជា កំពុងពេញនិយមសម្រាប់អ្នកប្រើប្រាស់
ឯកឧត្តម ឌិត ទីណា លើកទឹកចិត្តសហគមន៍ និងក្រុមហ៊ុន​បន្តស្មារតី​សាមគ្គីភាព ដើម្បី​ទទួល​ផល​ចំណេញ​ទាំងអស់គ្នាថែមទៀត
កម្ពុជា និងកូរ៉េ រួមគ្នាជំរុញការកាត់បន្ថយឧស្ម័ន​ផ្ទះកញ្ចក់​តាមរយៈ​ការ​វិនិយោគ​មធ្យោបាយ​ដឹកជញ្ជូន​-អគ្គិសនី ឆ្ពោះទៅគោលដៅអព្យាក្រឹតកាបូនឆ្នាំ២០៥០
កសិករខេត្តកំពង់ធំជិតពីររយគ្រួសារទទួលផលចំណេញច្រើនក្រោយចងក្រងជាសហគមន៍កសិកម្មទំនើប

សេដ្ឋកិច្ច និង កសិកម្ម

វិស័យឯកជន គាំទ្រកញ្ចប់ថវិការរាជរដ្ឋាភិបាលក្នុងការពន្លឿន និងពង្រីកអាជីវកម្ម

2022/02/15 01:16:00 pm        667
Facebook Telegram Linkin
ភ្នំពេញ៖ វិស័យឯកជន គាំទ្រដល់មូលនិធិសម្រាប់សហគ្រាសធុនតូច និងមធ្យមកម្ពុជារបស់រាជរដ្ឋាភិបាល ក្នុងកញ្ចប់ថវិការចំនួន ១០០ លានដុល្លារអាមេរិក ដែលជាចលករមួយយ៉ាងសំខាន់ ក្នុងការពន្លឿនដល់ SME និងវិស័យកសិកម្ម ដើម្បីពង្រីកខ្សែច្រវ៉ាក់អាជីវកម្ម សម្រាប់បម្រើទីផ្សារ និងការប្រកួតប្រជែង។លោកឧកញ៉ា ហង់ សុគន្ធ សម្ព័ន្ធសហគមន៍កសិកម្មកម្ពុជា បានលើកឡើង នៅថ្ងៃទី១៥ ខែកុម្ភៈ ឆ្នាំ២០២២នេះថា នៅ​ក្នុងស្ថានភាព នៃការរីករាលដាលជម្ងឺកូវីដ ១៩ នេះ រាជរដ្ឋាភិបាលបានយកចិត្តទុកដាក់យ៉ាងខ្លាំង ក្នុងនោះរាជ-រដ្ឋាភិបាលបានផ្តល់​ហិរញ្ញប្បទាន​ជា​បន្តបន្ទាប់ ដើម្បីជួយ​ជ្រោមជ្រែង​ដល់វិស័យកសិកម្ម ​ក៏ដូចជាសហគ្រាសធុនតូច​ និងមធ្យម ជាក់ស្តែង​នៅក្នុងឆ្នាំ ២០២១ កន្លងមកនេះ វិស័យកសិកម្មបានសម្រេចនូវកំណើនល្អប្រសើរ​ក្នុងរង្វង់​ប្រមាណ ១,៤% ។លោកឧកញ៉ា បានថ្លែងនូវការគាំទ្រពេញទំហឹង​ ក្រោមការគិតគូរដ៏ខ្ពង់ខ្ពស់​របស់រាជរដ្ឋាភិបាល លើ​កញ្ចប់ថវិការ​ចំនួន ១០០ លានដុល្លារ ដែលរាជរដ្ឋាភិបាល នឹងអាចជួយដល់វិស័យសហគ្រាស​ធុនតូច​ និងមធ្យម និងវិស័យ​កសិកម្ម បានពង្រីកខ្លួនក្នុងខ្សែសង្វាក់ផលិតកម្មបន្ថែមទៀត សម្រាប់​ការផ្គត់ផ្គង់ និងការប្រកួតប្រជែងនៅលើទីផ្សារ​។ស្រដៀងគ្នានេះ លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និង​មធ្យម​កម្ពុជា លើកឡើងថា ចំពោះគម្រោងផ្តល់ហិរញ្ញប្បទានជួយដល់វិស័យ SME និង​វិស័យកសិកម្ម វាជាការរួមចំណែកដ៏សំខាន់ក្នុងការលើកកម្ពស់សហគ្រាសដែលនៅរងនឹង វិបត្តិ​ជំងឺកូវីដ១៩ នេះ ​យងើបឡើងវិញ, ប៉ុន្តែមកដល់បច្ចុប្បន្នមានសហគ្រាសជាច្រើន បានជួបបញ្ហា​ប្រាក់​កម្ចីដែល​មាន​ការ​ប្រាក់ខ្ពស់​ ដែលមិនអាចធ្វើឲ្យពួកគាត់ទទួលកញ្ចប់ថវិការរបស់រាជរដ្ឋាភិ-បាល ដែលមាន​ការប្រាក់​ទាបនេះឡើយ។ លោកឧកញ៉ា ស្នើសុំដល់ក្រសួងស្ថានប័នពាក់ព័ន្ធ គួរតែជួយរៀបចំហិរញ្ញវត្ថុឡើងវិញ ដើម្បីឲ្យពួក​គាត់​មានលទ្ធភាពទទួលបានកញ្ចប់ថវិការយកទៅប្រើប្រាស់ ​សម្រាប់ការពង្រីកខ្លួនបន្ថែម។ជុំវិញការផ្តល់ហិរញ្ញប្បទានជំហានបន្តនេះ, ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញ បានថ្លែងថា ចំពោះការបន្ថែមមូលនិធិចំនួន ១០០ លានដុល្លារអាមេរិកនេះ ជាការ​ប្រើប្រាស់​មូលនិធិសម្រាប់ត្រៀមបម្រុង គំាំទ្រសកម្មភាពសេដ្ឋកិច្ចដូចជា សកម្មភាពសេដ្ឋកិច្ច​របស់សហគ្រាសធុនតូច និងមធ្យមដែលគ្រោងនៅក្នុងថវិកាឆ្នំា២០២១។ មូលនិធិដែលត្រូវបានបន្ថែមនឹងធ្វើការបែងចែកជាពីរមុខសញ្ញា ដោយផ្តល់ជូនធនាគារអភិវឌ្ឍន៍​ជនបទ និងកសិកម្ម ចំនួន ៥០ ​លានដុល្លារអាមេរិក និងធនាគារសហគ្រាសធុនតូច ​និងមធ្យមចំនួន ៥០ លានដុល្លារអាមេរិក ​ដើម្បីប្រើប្រាស់ក្នុងទិសដៅគំាំទ្រដល់សកម្មភាពរបស់ SME​​ ដែលកំពុង​មាន​តម្រូវការហិរញ្ញវត្ថុ ​ដល់ការគំាំទ្រទៅដល់វិស័យស្រូវអង្ករកម្ពុជា, ​ការចិញ្ចឹមសត្វ, ការដំាដុះ​បន្លែដំណាំ ​ក៏ដូចជាផ្តល់ការគំាំទ្រ​ទៅដល់យន្តការសហហិរញ្ញប្បទាន ចែក​រំលែកហានិភ័យ​ជាមួយ​គ្រឹះស្ថានធនាគារ ​និងហិរញ្ញវត្ថុ៕អត្ថបទ៖ សុន រ៉ាឌី

គយ និងរដ្ឋាករប្រមូលចំណូលបានជាង ២២៩៥ លានដុល្លារអាមេរិកឆ្នាំ២០២១

2022/02/11 02:12:46 pm        697
Facebook Telegram Linkin
ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជា ក្នុងឆ្នាំ២០២១ ប្រមូលចំណូលបានជាង ៩ ២៩៥ ប៊ីលានរៀល ត្រូវប្រមាណជាង ២ ២៩៥ លានដុល្លារអាមេរិក សម្រេចបាន ៩៧.១% នៃផែនការដែលកំណត់ដោយច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ ២០២១ ។ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លើកឡើងកិច្ចប្រជុំបូកសរុបលទ្ធផលការងារគយ និងរដ្ឋាករប្រចាំឆ្នាំ ២០២១ តាមប្រព័ន្ធវីដេអូ នៅថ្ងៃទី១០ ខែកុម្ភៈ ឆ្នាំ២០២២នេះថា នៅក្នុងឆ្នាំ២០២១កន្លងមកនេះ អគ្គនាយកដ្ឋានគយ និងរដ្ឋាករ ប្រមូលចំណូលបានជាង ៩ ២៩៥ ប៊ីលានរៀល ស្មើប្រមាណជាង ២ ២៩៥ដុល្លារអាមេរិក ថយចុះប្រមាណ ៥.១% ធៀបនឹងចំណូលប្រមូលបានក្នុងឆ្នាំ២០២០ ដោយ​សម្រេច​បានជាង ៩៧% នៃផែនការច្បាប់។ គិតតាមប្រភេទពន្ធ និងអាករ ឃើញថា អាករលើតម្លៃបន្ថែមមានចំនួនជាង ៣ ៥២២ ប៊ីលានរៀល, អាករពិសេស​មានចំនួន ៣ ៥១៣ ប៊ីលានរៀល, ពន្ធគយជាង ១ ៦៧១ ប៊ីលានរៀល អាករ​បន្ថែមលើផលិតផលប្រេងជាង ៤០៣ ប៊ីលានរៀល​ និងអាករ​នាំចេញនិងកម្រៃ ផ្សេងៗមាន​ចំនួន​ជាង ១៨៥ ប៊ីលានរៀល ។ ចំណែកក្រុមទំនិញវិញ ក្នុងនោះយានយន្ត និងគ្រឿងចក្រ មានចំនួនជិត ៤ ០០០ ប៊ីលានរៀល ត្រូវ ៤៣% នៃចំណូលសរុប, ទំនិញចម្រុះមានចំនួនជាង ២ ៥៧៩ ប៊ីលានរៀល ​ស្មើនឹង២៨%, ផលិតផល​តេលសិលាជាង ២ ១៥៧ ប៊ីលានរៀល ត្រូវជាង ២៣%, សម្ភារៈសំណង់​ និងកម្រៃផ្សេងៗ មាន​ចំនួនជាង ៥៦០ ប៊ីលានរៀល ត្រូវប្រមាណ ៦% នៃចំណូលសរុប។ដោយឡែក ការនាំចេញផលិតផលកាត់ដេរមានចំនួន ជាង ១១ ៣៨៩ លានដុល្លារអាមេរិក កើនឡើង​ប្រមាណ ១ ៥០៥ លានដុល្លារ, ការនាំចេញផលិតផលវិនិយោគ ​មិនមែនកាត់ដេរដូចជា៖ គ្រឿងបំណែក​អេឡិចត្រូនិក កង់ ផលិតផលពីឈើ​ ស្បែកសត្វកែច្នៃ ​ផលិតផលប្លាស្ទិច គ្រឿងបន្លាស់​រថយន្ត និងផលិតផលឧស្សាហកម្មផ្សេងៗទៀតមានចំនួនជាង​ ៤ ៥៤២ លានដុល្លារ កើនឡើង​ប្រមាណជាង ១ ៣៩២ លានដុល្លារ។ ចំណែកការនាំចេញកសិផលមានចំនួនជាង​ ២ ៨១៧ លានដុល្លារ ​កើនឡើង ៣៩% ក្នុងនោះការ​នាំចេញស្រូវមានតម្លៃជាង ៨២៦ លានដុល្លារ ​កើនឡើងជាង ៣៦០ ​លានដុល្លារ ត្រូវជាង​ ៧៧%, ការនាំចេញអង្ករ ​សម្រេចជាង ៤២៤ លានដុល្លារ ថយចុះ ១៦%, ​ការនាំចេញកៅស៊ូមានតម្លៃជាង ៣៩៩ លានដុល្លារ កើនឡើង ៤៦%, ​និងកសិផលផ្សេងទៀតមាន​តម្លៃជាង ៦៥៣ លានដុល្លារ កើនឡើង ៦៨%ផងដែរ៕ អត្ថបទ៖ សុន រ៉ាឌី

កម្ពុជា-កាណាដា ឯកភាពគ្នាបង្កើតកិច្ចព្រមព្រៀងពាណិជ្ជកម្មសេរីទ្វេភាគី

2022/02/11 01:53:04 pm        559
Facebook Telegram Linkin
ភ្នំពេញ៖ រដ្ឋាភិបាលកម្ពុជា និងកាណាដា បានឯកភាពគ្នាពិនិត្យលទ្ធភាពលើការសិក្សាទៅលើលទ្ធភាពនៃការបង្កើតកិច្ច ព្រមព្រៀងពាណិជ្ជកម្មសេរីទ្វេភាគីកម្ពុជា-កាណាដា ព្រោះកិច្ចការនេះ ជាកិច្ចការស្របគ្នាជាមួយគោលនយោបាយពាណិជ្ជកម្មរបស់កាណាដា។ក្នុងជំនួបការងារ រវាងលោកជំទាវបណ្ឌិត សារ៉ាត ថាយ៍ឡ (Sarah Taylor) ឯកអគ្គរដ្ឋទូតកាណាដាប្រចាំកម្ពុជា ដើម្បីបង្កើនកិច្ចសហប្រតិបត្តិការរវាងប្រទេសទាំងពីរ ជំរុញការវិនិយោគ អភិវឌ្ឍវិស័យអប់រំ ព្រមទាំងការអភិវឌ្ឍន៍​គម្រោងជំនួយផ្សេងៗទៀត កាល​ពីព្រឹកថ្ងៃទី១០ កុម្ភៈ ឆ្នាំ២០២២កន្លងទៅនៅទីស្តីការក្រសួង ​ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម មានប្រសាសន៍ថា ​គិតត្រឹមឆ្នាំ២០២១ ពាណិជ្ជកម្មទ្វេភាគីរវាងប្រទេស​ទាំងពីរ មានការកើនឡើងគួរឱ្យកត់សម្គាល់ ដែលក្នុងនោះ កម្ពុជាបាននាំចេញទៅប្រទេសកាណាដា​ក្រោមកម្មវិធីពន្ធគយសេរី​ និងកូតាសេរី ​មានទំហំទឹកប្រាក់រហូតដល់ជាង ​៩៥០លានដុល្លាអាមេរិក។ ឯកឧត្តម បានស្នើប្រទេសកាណាដា លើការរៀបចំកិច្ចជំនួបពាណិជ្ជកម្ម រវាងវិនិយោគិនកាណាដា ដែលបាន វិនិយោគនៅប្រទេសថៃ និងទ្បាវ ជាមួយកម្ពុជា ដើម្បីទាញយកប្រយោជន៍ពីកិច្ចព្រម​ព្រៀង​ពាណិជ្ជកម្មសេរីទ្វេភាគី ​កម្ពុជា-ចិន, កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ និង​កិច្ចព្រមព្រៀង​ភាពជាដៃគូសេដ្ឋកិច្ច ​គ្រប់ជ្រុងជ្រោយតំបន់ ដែលកម្ពុជាទើបសម្រេចបាន​នាពេល​ថ្មីៗនេះ។ ឯកឧត្តមរដ្ឋមន្រ្តី បានលើកឡើងទៀតថា ​ពាក់ព័ន្ធជំនួយបច្ចេកទេសក្រោមគម្រោង Canadian Trade and Investments Framework ជាការអនុវត្តដ៏ល្អបំផុតនៃកិច្ចសហប្រតិបត្តិការជាមួយប្រទេសកាណាដា លើការជួយដល់ការធ្វើកំណែទម្រង់គោលនយោបាយទាក់ទង​នឹងការវិនិយោគ និងពាណិជ្ជកម្ម​ប្រកប​ដោយនិរន្តរភាព​ ព្រមទាំងគំនិតផ្តួចផ្តើមអភិវឌ្ឍន៍សេដ្ឋកិច្ច។ ជាការឆ្លើយតប ​លោកជំទាវឯកអគ្គរដ្ឋទូត បានសម្តែងនូវអំណរគុណយ៉ាងជ្រាលជ្រៅដល់​ឯកឧត្តមរដ្ឋមន្រ្តី ​និងបាន ​វាយតម្លៃខ្ពស់ចំពោះទំនាក់ទំនងល្អរបស់កម្ពុជាជាមួយកាណាដា និងកម្ពុជា​ជាមួយអាស៊ាន ​ព្រមទាំងបាន​ឆ្លើយតបថា នេះជាឆ្នាំពិសេសមួយ ដែលកម្ពុជា​ធ្វើ​ជាប្រធានាស៊ាន​ ត្រូវនឹងខួបលើកទី៤៥​ នៃទំនាក់ទំនងអាស៊ាន-កាណាដា។ ទាក់ទិន​សំណើរខាងលើនេះ​ លោកជំទាវបានសន្យាថា ​នឹងយកទៅពិភាក្សាជាមួយស្ថាប័នពាក់ព័ន្ធ និងជំរុញមន្រ្តី ​របស់ខ្លួនឱ្យធ្វើការជាមួយកម្ពុជាឱ្យកាន់តែជិតស្និតបន្ថែមទៀត​ សំដៅនាំយក និង​បង្កើតបានគម្រោងជាក់លាក់ ​ក្រោមកិច្ច​សហប្រតិបត្តិការក្របខណ្ឌ CTIF ព្រមទាំងដើម្បីធ្វើកា​លើក​សំណើ​ជំនួយបច្ចេកទេសពីគម្រោង CTIF របស់រដ្ឋាភិបាលកាណាដា៕អត្ថបទ៖ ឈិត បូរ៉ាវី

ចំនួនរោងចក្រឧស្សាហកម្មបង្កើតថ្មី បង្ហាញពីជំនឿទុកចិត្តរបស់វិនិយោគិនលើរាជរដ្ឋាភិបាលកម្ពុជា

2022/02/10 04:29:15 pm        389
Facebook Telegram Linkin
ភ្នំពេញ៖ ទោះបីរងផលប៉ះពាល់ដោយសារវិបត្តិកូវីដ១៩ កម្ពុជាមានរោងចក្រឧស្សាហកម្មបើកថ្មីចំនួន ១៦៣រោងចក្រ ក្នុងឆ្នាំ២០២១ ធ្វើឱ្យរោងចក្រឧស្សាហកម្មសរុបនៅទូទាំងប្រទេសមានចំនួន ១៨៧៩ រោងចក្រ។ វត្តមានរោងចក្រឧស្សហកម្មបើកថ្មីនេះ គឺបង្ហាញពីការជឿទុកចិត្តរបស់វិនិយោគិន លើការដឹកនាំរបស់រាជរដ្ឋាភិបាល សក្តានុពលវិនិយោគ ជាពិសេសការគ្រប់គ្រងស្ថានភាពកូវីដ១៩។យោងតាមរបាយការណ៍ពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឆ្នាំ២០២១ កម្ពុជាមានរោងចចក្រសរុប ១ ៨៧៩ រោងចក្រមានទុនវិនិយោគសរុបជាង ១៣.៨១១ លាន ដុល្លារអាមេរិក។ ដែលបង្កើតការងារបានជាង ៩៨ម៉ឺនកន្លែង។ក្នុងនោះរោងចក្រឧស្សហកម្មបើកថ្មី មានចំនួន ១៦៣ រោងចក្រ និង​រោងចក្រ​ដែលបាន​បិទទ្វារ​បណ្តោះ​អាសន្ន ​និងបិទទ្វារទាំងស្រុងមានចំនួន​ ១៤៨រោងចក្រ។ឯកឧត្តម ហេង សុខគង់ រដ្ឋលេខាធិការនៃក្រសួងឧស្សាហកម្ម ​វិទ្យាសាស្រ្ត ​បច្ចេកវិទ្យា និង​នវានុវត្តន៍ លើកឡើងថា វត្តមាន​រោងចក្របង្កើតថ្មីបង្ហាញពីការជឿទុកចិត្តរបស់​វិនិយោគិន​លើការ​ដឹកនាំរបស់រាជរដ្ឋាភិបាលកម្ពុជា ​ជាពិសេសការគ្រប់គ្រងស្ថានភាពកូវីដ១៩ បានល្អ បូករួម​ទាំង​ច្បាប់​វិនិយោគថ្មី​ដែលមានភាពទាក់ទាញវិនិយោគិន។ក្នុងឆ្នាំ២០២១ តម្លៃបរិមាណផលិតផលឧស្សាហកម្ម សរុបប្រមាណជា ៧ ៤៣៣ លានដុល្លារ​អាមេរិក ​ទាបជាងឆ្នាំមុន ប្រមាណ១៥%, ក្នុងនោះតម្លៃបរិមាណផលិត ​ផលបម្រើទីផ្សារក្នុងស្រុក មាន​ចំនួនជាង ១ ៩៧៧ លានដុល្លារអាមេរិក ​និងតម្លៃបរិមាណ​ ផលិតផលនាំចេញមានចំនួនជាង ៥ ៤៥៦ លានដុល្លារអាមេរិក៕ អត្ថបទ៖ វណ្ណៈ

កម្ពុជាមានស្តង់ដារចំនួន ៩៨៨ ដែលកំពុងប្រើប្រាស់លើប្រតិបត្តិការពាណិជ្ជកម្ម

2022/02/10 10:58:10 am        318
Facebook Telegram Linkin
ភ្នំពេញ៖ កម្ពុជាមានស្តង់ដារចំនួន ៩៨៨ ស្តង់ដារ ដែលស្តង់ដារទាំងនោះ បានកំពុងយកមកប្រើប្រាស់ដោយវិស័យឯកជន និងផ្នែកសារធារណៈ សំដៅចូលរួមធានានូវសុវត្ថិភាព សុខុមាលភាពសាធារណៈ និងចូលរួមពង្រឹងគុណភាពការធ្វើពាណិជ្ជកម្ម ជាពិសេសការប្រកួតប្រជែង ផលិតផលនៅលើទីផ្សារ។ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ លើកឡើង នៅក្នុងពិធីបើកសន្និបាតបូកសរុបលទ្ធផលការងារឆ្នាំ ២០២១ និងលើកទិសដៅអនុវត្តការងារឆ្នាំ ២០២២ របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នៅថ្ងៃទី ៧ ខែ កុម្ភៈ ឆ្នាំ២០២២នេះថា ស្តង់ដារកម្ពុជា បានចំនួន ៣៩ ស្តង់ដារ ដោយ​គ្របដណ្តប់​ទៅលើផ្នែកសំណង់ និងសម្ភារៈ សំណង់ ផ្នែកសារធាតុ និងផលិតផលគីមីផលិតផល​កៅស៊ូ ​ផលិតផលអគ្គិសនី ​និងអេឡិចត្រូនិច ផលិតផល​គ្រឿងសម្អាង ​ផលិតផលយានយន្ត និងស្តង់ដារ​មួយចំនួនទៀត ផ្នែកប្រព័ន្ធគ្រប់គ្រង និង ផ្នែកឌីជីថលជាដើម, ជារួមគិតមកដល់​ពេលនេះ កម្ពុជាមានស្តង់ដារសរុបចំនួន ៩៨៨ ស្តង់ដារហើយ ដែលស្តង់ដារទាំងនេះ បាននិង កំពុងយកមកប្រើប្រាស់ដោយវិស័យឯកជន និងផ្នែកសារធារណៈមួយចំនួន។ទាក់ទងការងារស្តង់ដារនេះ លោកឧកញ៉ា លឹម ហេង អនុប្រធានសភាពពាណិជ្ជកម្មកម្ពុជា លើកឡើងថា ការអនុវត្តស្តង់ដារគឺមានសារៈ សំខាន់ណាស់ និងជាមូលដ្ឋានគ្រឹះដើម្បីបញ្ជាក់ថា ផលិតផលនោះមានគុណភាព ​និងសុវត្ថិភាព, ប្រសិនមិនមានស្តង់ដារ​ យើងក៏មិនដឹងថា ផលិតផលទាំងនោះមានគុណភាពបែបណា ​ហើយការក្រកួតជែងផលិតផលមុខទំនិញ នឹង​អាចជួបបញ្ហា​នៅលើទីផ្សារផងដែរ។ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី បន្តថា ​ទោះបីកម្ពុជានៅប្រឈមនឹងជំងឺកូវីដ-១៩ ការ​ចេញ​វិញ្ញាបនបត្រ​ផលិតផល ​និង​វិញ្ញាបនបត្រ ​បញ្ជាក់អនាម័យជូនដល់វិស័យឯកជនសម្រេចបាន ៦២ វិញ្ញាបនបត្រ​ សំដៅចូលរួមធានានូវ​សុវត្ថិភាព​ និង​សុខុមាលភាព​សាធារណៈ ​និង ​សង្គម និង​ចូលរួមក្នុងការពង្រឹងការធ្វើពាណិជ្ជកម្ម ​ឬសេវាកម្មប្រកបដោយគុណភាព និងប្រសិទ្ធភាព និង​ជួយដល់វិស័យផលិតកម្មខ្នាតតូច ឱ្យមានលទ្ធភាពប្រកួតប្រជែងដាក់លក់ ​ផលិតផលរបស់ខ្លួននៅ​លើទីផ្សារក្នុងស្រុកបាន៕ អត្ថបទ៖ សុន រ៉ាឌី

ការនាំចេញកសិផលខេត្តបន្ទាយមានជ័យ ទៅប្រទេសថៃ មានទឹកប្រាក់ជាង ១០០លានដុល្លារ

2022/02/09 06:40:31 am        432
Facebook Telegram Linkin
បន្ទាយមានជ័យ៖ យោងតាមរបាយការណ៍ការងារមន្ទីរពាណិជ្ជកម្ម ខេត្តបន្ទាយមានជ័យ គិតចាប់ពីឆមាសទី២ ឆ្នាំ២០១៩ រហូតត្រឹមឆ្នាំ២០២១ ការនាំចេញកសិផល តាមរយៈការផ្តល់វិញ្ញាបនបត្របញ្ជាក់ប្រភពដើមទំនិញ ពីមន្ទីរពាណិជ្ជកម្មខេត្ត ទៅកាន់ប្រទេសថៃ សម្រេចបានចំនួនជាង ៥ពាន់ច្បាប់ ស្មើនឹងទំហំទឹកប្រាក់សរុបជាង ១០៨លានដុល្លារអាម៉េរិក។លោក ប៊ុក ឡាយជី ប្រធានមន្ទីរពាណិជ្ជកម្មខេត្តបន្ទាយមានជ័យ នៅល្ងាចថ្ងៃទី៨ កុម្ភៈ​ឆ្នាំ២០២២នេះ មានប្រសាសន៍ប្រាប់ទូរទស្សនព័ត៌មាន ប៊ីធីវីថា គិតត្រឹមពាក់កណ្តាល​អាណត្តិ​ការងារ​របស់ក្រុមប្រឹក្សាខេត្តបន្ទាយមានជ័យ​ ពោលរយៈពេល ២ឆ្នាំកន្លះកន្លងមកនេះ ការនាំចេញ​អង្ករជិត ១ម៉ឺនតោន គិតជាទឹកប្រាក់សរុបចំនួនប្រមាណជាង ៥លានដុល្លារ។ក្រៅពីអង្ករ​ខេត្តបាននាំចេញកសិផលផ្សេងៗ តាមរយៈការផ្តល់វិញ្ញាបនបត្រ​បញ្ជាក់ប្រភព​ដើម​ទំនិញ​សម្រាប់នាំចេញមានចំនួនជាង​ ៥ពាន់ច្បាប់ ​ស្មើនឹងជាង​ ១លាន ២១ម៉ឺនតោន គិតជា​ទឹក​ប្រាក់ជាង ​១០២លានដុល្លារ។ក្នុងនោះ រួមមានផលិតផលដំឡូងមី, ពោតក្រហម, ម្រេច, ស្វាយកែវល្មៀត, ស្វាយចន្ទី, ម្ទេស, ទុរេន និងផលិតផលកសិកម្មមួយចំនួនទៀតដែលកសិករផលិតបាន ។ ឯកឧត្តម ខេង ស៊ុម ប្រធានក្រុមប្រឹក្សខេត្តបន្ទាយមានជ័យ កាលពីព្រឹកថ្ងៃទី៨ ខែកុម្ភៈកន្លងទៅ នៅក្នុង​សន្និសីទសារព័ត៌មានស្តីពីវឌ្ឍនភាពមូលដ្ឋានឃុំ ​សង្កាត់ និងទិសដៅការងារ​បន្ត​របស់​រដ្ឋបាលខេត្ត ​បានបញ្ជាក់ថា​ ខេត្តបន្ទាយមានជ័យ ​មានចំនួនគ្រួសារជិត ​២០ម៉ឺនគ្រួសារ មុខរបរ​សំខា​ន់​របស់ប្រជាពលរដ្ឋ​ ៨៥%ជាកសិករ ​១០%ជាអាជីវករ ​ពាណិជ្ជករ និង៥% ប្រកបរ​មុខ​របរផ្សេងៗ។ យោងតាមប្រភពទិន្នន័យឆ្នាំ២០១៧-២០២១ បានបង្ហាញថា ផលិតផលក្នុងស្រុកសរុបនៃសេដ្ឋកិច្ច​ខេត្ត​ទាំងមូល ​មានតម្លៃប្រមាណជាង ​៩៦០លានដុល្លារសហរដ្ឋអាមេរិក៕អត្ថបទ៖ បូរ៉ាវី

ពលរដ្ឋឃុំស្វាយយាខេត្តស្វាយរៀង ស្នើដល់មន្រ្តីបសុពេទ្យជួយ ខណៈជ្រូករបស់ពួកគេបានឈឺ និងងាប់

2022/02/08 04:46:07 pm        385
Facebook Telegram Linkin
ស្វាយរៀង៖ ប្រជាពលរដ្ឋ ជាអ្នកចិញ្ចឹមជ្រូក នៅក្នុងឃុំស្វាយយា ស្រុកស្វាយជ្រំ ខេត្តស្វាយរៀង បានអំពាវនាវដល់ មន្ត្រីបសុពេទ្យ ឱ្យជួយចុះធ្វើការផ្សព្វផ្សាយពីវិធីបង្ការ និង​បញ្ចៀស​ជំងឺ ខណៈដែល​ជ្រូកនៅក្នុងភូមិរបស់ពួកគេបានឈឺ និងងាប់ជាបន្តបន្ទាប់គួរឲ្យព្រួយបារម្ភ។ប្រជាពលរដ្ឋ បានឱ្យដឹងថា នៅក្នុងភូមិចំនួន២ របស់ឃុំស្វាយយា ​មានជ្រូកឈឺ និងងាប់ បើទោះ ជាក្រុមពេទ្យសត្វភូមិ ​បានសហការជាមួយនឹងម្ចាស់ធ្វើការព្យាបាលយ៉ាងណាក៏ដោយ បង្ក​ឲ្យខាតបង់​ថវិកា គ្រួសារយ៉ាងច្រើន ​និងមានអ្នកខ្លះបាន​ធ្វើការលះ​បង់បញ្ឈប់​ការ​ចិញ្ចឹមជ្រូក បន្ទាប់​ពីពួកគេបានធ្វើការព្យាបាលហើយមិនជា។ប្រជាពលរដ្ឋ បានអំពាវនាវដល់ក្រុមបសុពេទ្យខេត្ត ចុះជួយធ្វើការផ្សព្វផ្សាយពីវិធីបង្ការជំងឺ​ ជ្រូក ដើម្បី​ឲ្យពួកគេមានលំនឹង និងបន្តចិញ្ចឹមទៅថ្ងៃខាងមុខ ពីព្រោះបច្ចុប្បន្ន ពួកគេអស់លទ្ធភាព​ក្នុងការព្យាបាលជំងឺជ្រូកនេះហើយ ។ទាក់ទងបញ្ហានេះ លោក ប៉ែន ចន្ធី ប្រធានការិយាល័យផលលិតកម្មបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទ បានបញ្ជាក់ថា ការងារនេះក្រុមលោកនឹងចុះទៅធ្វើការផ្សព្វផ្សាយ​ជូន​ដល់ពលរដ្ឋ ក្រោយពីក្រុមការងាររបស់លោក បានចុះធ្វើការស្រាវជ្រាវនៅតាមគ្រួសារ ក្នុងភូមិ ដែលមានបញ្ហាជំងឺជ្រូករួច៕អត្ថបទ៖ ភា សារិត

ផលិតផលក្នុងវិស័យឧស្សាហកម្ម មានតម្លៃសរុប ៧ ៤៣៣ លានដុល្លារអាមេរិក ក្នុងឆ្នាំ២០២១

2022/02/08 02:48:15 pm        792
Facebook Telegram Linkin
ភ្នំពេញ៖ តម្លៃផលិតផលវិស័យឧស្សាហកម្ម មានសរុបប្រមាណជា ៧ ៤៣៣ លានដុល្លារអាមេរិក ក្នុងនោះតម្លៃផលិតផលបម្រើទីផ្សារក្នុងស្រុក មានជាង ១ ៩៧៧ លានដុល្លារអាមេរិក និងតម្លៃបរិមាណផលិតផលនាំចេញមានចំនួនជាង ៥ ៤៥៦ លានដុល្លារអាមេរិក។ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ លើក ឡើងនៅក្នុងក្នុងពិធីបើកសន្និបាតបូកសរុបលទ្ធផលការងារឆ្នាំ ២០២១ និងលើកទិសដៅអនុវត្តការងារឆ្នាំ ២០២២ របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នៅថ្ងៃទី៧ ខែកុម្ភៈនេះថា ក្រសួងបាន បន្តផ្តោតការយកចិត្ត​ទុកដាក់​លើ​ការចូលរួមអនុវត្តផែនការសកម្មភាព ​គោលនយោបាយ​អភិវឌ្ឍន៍​វិស័យ​ឧស្សាហកម្ម ឆ្នាំ២០១៥-២០២៥​ តាមដំណាក់កាល ​និងពេលវេលានីមួយៗ ក្នុងចង្កោមការងាររបស់ខ្លួនប្រកបដោយផ្លែផ្កា ទោះបីឆ្លងកាត់រលកនៃផលប៉ះពាល់ពីជំងឺកូវីដ-១៩ក៏ដោយ។ វិស័យឧស្សាហកម្មបានរួមចំណែកដល់ការអភិវឌ្ឍ ការទ្រទ្រង់និងលើកកម្ពស់កំណើនសេដ្ឋកិច្ចជាតិ ប្រកប​ដោយចីរភាព និងបរិយាប័ន្ន ការបង្កើតការងារ ​ការបង្កើនតម្លៃបន្ថែមក្នុងសេដ្ឋកិច្ច និងការ​បង្កើនប្រាក់​ចំណូល​សមរម្យជូនប្រជាជនកម្ពុជា។ ជាក់ស្តែងក្នុងឆ្នាំ ២០២១ កម្ពុជា​មានរោងចក្រធុនធំកំពុងដំណើរការ ​មានចំនួន ១​​ ៨៧៩ រោងចក្រ មាន​ទុនវិនិយោគសរុបជាង ​១៣ ៨១១ ​លានដុល្លារអាមេរិក ​មានការកើនឡើងជាង ២៥៦ លាន​ដុល្លារ​អាមេរិក ស្មើជិត ២% ​ដោយបានផ្តល់ឱកាសការងារចំនួន ៩៨ ម៉ឺនកន្លែង។ដោយមានតម្លៃផលិតផលសរុបប្រមាណជា ៧ ៤៣៣ លានដុល្លារអាមេរិក ​ទាបជាងឆ្នាំមុន ប្រមាណ ១៥%, ក្នុងនោះតម្លៃបរិមាណផលិត ផលបម្រើទីផ្សារក្នុងស្រុក។ឯកឧត្តមកិត្តិសេដ្ឋាបណ្ឌិត ​បញ្ជាក់ថា ​ជុំវិញការរក្សាបានចំនួនរោងចក្រខាងលើ គឺបានកើតចេញ​សុខ​សន្តិភាព រួមជាមួយការ ​កំណែទម្រង់បរិយាកាសវិនិយោគ ​និង​ធុរកិច្ចជា​បន្តបន្ទាប់របស់រាជ​រដ្ឋា​ភិបាលកម្ពុជា បានផ្តល់ទំនុកចិត្តនិងបរិស្ថានសមស្របដល់វិនិយោគិន ធុរជន ក្នុងនិងក្រៅប្រទេស ឱ្យបន្តបណ្តាក់ទុនវិនិយោគនៅកម្ពុជាជាបន្តបន្ទាប់។ក្នុងឆ្នាំ ២០២១ នេះ មានរោងចក្រថ្មី កើតឡើងចំនួន ១៦៣ រោងចក្រ ខណៈដែលមាន​រោងចក្រ​បិទទ្វារ​ចំនួន ១៤៨ ។ ​មានន័យថា ​ទោះបីស្ថិតក្នុង ​កាលៈទេសៈលំបាក​ បណ្តាលមកពីជំងឺកូវីដ-១៩ ក៏ដោយ ​ក៏នៅមានតួលេខកំណើនវិជ្ជមាន រវាងចំនួនរោងចក្របើកថ្មី ​និងចំនួនបិទទ្វារ៕ អត្ថបទ៖ សុន រ៉ាឌី

កសិផល​ជា​ច្រើន​របស់​កម្ពុជា ​កាន់​តែ​មាន​សក្ដានុពល​ក្នុង​ការ​នំា​ចេញ​ទៅ​ទីផ្សារ​ប្រទេស​ចិន

2022/02/07 03:22:09 pm        957
Facebook Telegram Linkin
ភ្នំពេញ៖ ប្រមុខរាជរដ្ឋាភិបាលកម្ពុជា នៅព្រឹកថ្ងៃទី៧ ខែកុម្ភៈ ឆ្នាំ២០២២នេះ បានថ្លែងថា ប្រទេសចិន បានបើកចំហរទីផ្សារកាន់តែធំទៅៗ សម្រាប់ការនាំចេញកសិផលពីកម្ពុជា ទៅកាន់ប្រទេសចិន។ក្នុងពិធីសម្ពោធបើកឲ្យប្រើប្រាស់ជាផ្លូវការកំណាត់ផ្លូវជាតិលេខ៧ ប្រវែងជាង ៩៣គីឡូម៉ែត្រ ពីខ្លាស្ទុះទៅរមាត ខេត្តក្រចេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងឲ្យ​ដឹង​ទៀត​ថា ឯកឧត្តម វ៉ាង វិនធាន (Wang Wentian) ឯកអគ្គរដ្ឋទូតចិនប្រចាំកម្ពុជា ​បានបញ្ជាក់ថា បញ្ហាការត្រួតពិនិត្យចត្តាឡីស័កទៅលើផលិតផលមៀនប៉ៃលិន និងត្រីប្រាតាមអនឡាញ បានធ្វើឡើងរួចរាល់ហើយ។សម្តេចតេជោ បន្តថា ត្រីប្រា និងមៀន ឬហៅតាង៉ែន ឬមៀនប៉ៃលិន នឹងត្រូវនាំចូលទៅប្រទេសចិន ទីផ្សារចិនកាន់តែបើកចំហរទៅៗ សម្រាប់ទទួលយកផលិតផលរបស់ខ្មែរ ​ខណៈដែលផលិតស្វាយ និងចេក បាននាំចេញទៅហើយ អញ្ចឹងចេក និងស្វាយ នៅខេត្តក្រចេះ ក៏អាចដាំបាន​សម្រាប់​ការ​នាំចេញបានក្រៅពីការ​ផ្គត់ផ្គង​ក្នុងស្រុក។ទាក់ទងនឹងកានាំចេញផ្លែមៀនប៉ៃលិន និងត្រីប្រា ទៅកាន់ប្រទេសចិន​ អាជ្ញាធរពាក់ព័ន្ធប្រទេសចិន បាន​ពិនិត្យតាមចម្ការ ​និងកសិដ្ឋានចិញ្ចឹមត្រី ​តាមអនឡាញ ​ដោយមានការគាំទ្រដោយ មន្រ្តី​ស្ថានទូត​ចិនប្រចាំនៅកម្ពុជា ​និង​មន្រ្តីក្រសួងកសិកម្មរុក្ខាប្រមាញ់ ​និងនេសាទ។ក្រៅពីផលិតផលខាងលើនេះ ​កម្ពុជា ក៏​កំពុងរៀបចំកសិផល​សក្តានុពល​ផ្សេងទៀត​ មានដូចជា ទុរេន ​សំបុកត្រចៀកាំជាដើម​ ដើម្បីដាក់ស្នើសុំការត្រួត​ពិនិត្យបច្ចេកទេស និង​លក្ខណ​តម្រូវ​ដើម្បី​នាំ​ចេញ​ទៅ​កាន់ប្រទេសចិន៕អត្ថបទ៖ បូរ៉ាវី

រាជរដ្ឋាភិបាលគ្រោងបង្កើនចំណូលជាតិ ឲ្យបានជាង៣២ ពាន់ប៊ីលានរៀល ក្នុងឆ្នាំនេះ

2022/02/07 02:55:00 pm        533
Facebook Telegram Linkin
ភ្នំពេញ៖ គម្រោងថវិកាឆ្នាំ ២០២២ រាជរដ្ឋាភិបាលបង្កើនចំណូលសរុបថវិកាជាតិ ពីចំណូលសារពើពន្ធគ្រោងជាង ២០ ពាន់ប៊ីលានរៀល, ចំណូលមិនមែនសារពើពន្ធជិត ២ ពាន់ប៊ីលានរៀល និងចំណូលមូលធន ប្រមាណជាង ៨ ពាន់ប៊ីលានរៀល។ក្រសួងសេដ្ឋកិច្ច និងហិរញ្ញវត្ថុ បង្ហាញរបាយបារណ៍សង្ខេប នៃក្របខណ្ឌថវិកាឆ្នាំ ២០២២ សម្រាប់គម្រោងចំណូលរបស់ជាតិ រាជរដ្ឋាភិបាលបានបង្កើនចំណូលសរុបថវិកាជាតិ មាន​ទំហំ​ប្រមាណជាង ៣២ ៦៧៦ប៊ីលានរៀល ស្មើប្រមាណជិត ១៩% នៃផ.ស.ស កើនឡើងប្រមាណជាង ១៧%។សម្រាប់ចំណូលសារពើពន្ធត្រូវសម្រេចឲ្យបានជាង ២០ ២០០ ប៊ីលានរៀល ត្រូវប្រមាណ ជាង ១៦% នៃ ផ.ស.ស គឺបានកើនឡើងជាង ១៥%, ក្នុងនោះចំណូលគយ និងរដ្ឋាករ គ្រោងជាង ១០ ៤០០ ប៊ីលានរៀល ត្រូវជាង ៨% នៃ ផ.ស.ស កើនឡើងជាង ៩% ចំណូលពន្ធដារគ្រោង​ប្រមាណ​ជាង ៩ ៨០០ ប៊ីលានរៀល ត្រូវជិត ៨% នៃ ផ.ស.ស និងបាន កើនឡើងជាង ២២% បើធៀបនឹង​ច្បាប់​ថវិកាឆ្នាំ ២០២១ ។ ចំណែកចំណូលមិនមែនសារពើរពន្ធ ត្រូវបានគ្រោងប្រមាណជាង ១ ៩០០ ប៊ីលានរៀល ត្រូវជាង ១% នៃ ផ.ស.ស ថយចុះជាង ១១% បើធៀបនឹងច្បាប់ថវិកាឆ្នាំ ២០២១ ។ដោយឡែកចំណូលមូលធនវិញ រាជរដ្ឋាភិបាលគ្រោងប្រមូលក្នុងរង្វង់ប្រមាណជាង ៨ ៣០០ ប៊ីលានរៀល ត្រូវជិត ៧% នៃ ផ.ស.ស មានកំណើនជាង ២៨% បើធៀបនឹងច្បាប់ថវិកាឆ្នាំ ២០២១។ ចំណែកចំណូលមូលធនក្រៅប្រទេស គ្រោងជាង ៧ ០០០ ប៊ីលានរៀល ត្រូវជាង ៩% នៃផ.ស.ស មានកំណើន១២% បើធៀបនឹងច្បាប់ថវិកាឆ្នាំ២០២១ ។ទាក់ទងចំណូលថវិកា​ជាតិ, លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច​នៃ​រាជបណ្ឌិត្យ​សភា​កម្ពុជា លើកឡើងថា តាមការគ្រោងទុកក្នុងច្បាប់ថវិកាឆ្នាំ ២០២២ នេះ ខណៈដែលនៅឆ្នាំ ២០២១ រាជរដ្ឋាភិបាលប្រមូលចំណូលល្អប្រសើរ ​និងស្របពេលរាជរដ្ឋា ភិបាលបានទប់ស្កាត់​ការរីក​រាលដាល​នៃជម្ងឺកូវីដ ១៩ (អូមីក្រុង) មិនមានផលប៉ះពាល់ខ្លាំងនោះ ​ដូច្នេះគោលដៅនៃការអភិវឌ្ឍ ប្រទេស នឹងអាចឈានទៅដល់ការសម្រេចគោលដៅ។សូមបញ្ជាក់ថា៖ សម្រាប់ឆ្នាំ ២០២២ សេដ្ឋកិច្ចកម្ពុជាត្រូវបានព្យាករថា នឹងសម្រេចបាន​កំណើន​ក្នុងអត្រា ៤,៨% ដោយសារការរំពឹងទុកកំណើនល្អប្រសើរនៃអនុវិស័យកាត់ដេរ និងកម្មន្តសាល​មិនមែនកាត់ដេរ ​ខណៈដែលអនុវិស័យសំណង់ត្រូវបានរំពឹងថា នៅបន្តសម្រេចបានកំណើនទាប៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

TOP STORY | សម្ដេចធិបតី ហ៊ុន ម៉ាណែត ថ្លែងអំណរគុណចំពោះលោក ដូណាល់ ត្រាំ ដែលបានផ្តួចផ្តើមសម្របសម្រួល បទឈប់បាញ់ភ្លាមៗ រវាងកម្ពុជា និងថៃ ដោយគ្មានលក្ខខណ្ឌ ដើម្បីការពារអាយុជីវិតរបស់ទាហាន និងជនស៊ីវិលជាច្រើននាក់
07/27/2025 05:07 AM
Facebook Telegram Linkin
ឯកឧត្តម គីម វីរៈ ដឹកនាំក្រុមការងារចុះពិនិត្យ និងនាំស្បៀងមួយចំនួនចែកជូនពលរដ្ឋភៀសសឹក ក្នុងខេត្តព្រះវិហារ
07/27/2025 12:07 AM
Facebook Telegram Linkin
TOP STORY | ឯកឧត្តម ហេង រតនា៖ ចោរសៀមចិញ្ចឹមចិត្ត បើអញលួចប្លន់ប្រាសាទព្រះវិហារមិនបានទេ គឺត្រូវបំផ្លាញ និងកម្ទេចចោលតែម្តង!
07/26/2025 11:07 PM
Facebook Telegram Linkin
TOP STORY | ក្រសួងការពារជាតិកម្ពុជា ប្រកាសច្រានចោល និងថ្កោលទោសយ៉ាងដាច់អហង្ការ ចំពោះការចោទប្រកាន់មិនពិត និងមានចរិតព្យាបាទពីសំណាក់ថៃ
07/26/2025 09:07 PM
Facebook Telegram Linkin
TOP STORY | អ្នកនាំពាក្យសម្ដេចតេជោ៖ ថ្ងៃទី៣នៃសត្រូវឈ្លានពាន តេជោសែន បន្តផ្តល់ប្រឹក្សាយុទ្ធសាស្រ្តយោធាដល់សម្តេចធិបតី និងបណ្តាមេទ័ពដើម្បីវាយខ្មាំងដោយភាពហានក្លា
07/26/2025 08:07 PM
Facebook Telegram Linkin
ឯកឧត្តម ឌិត ទីណា បន្តសួរសុខទុក្ខប្រជាពលរដ្ឋជម្លៀសពីតំបន់ព្រំដែនអូរបីជាន់
07/26/2025 06:07 PM
Facebook Telegram Linkin
ក្រុមយុវជននាំគ្នារៀបចំចម្អិនម្ហូបជូនជនភៀសសឹក ដែលគេចពីតំបន់សមរភូមិវាយប្រហាររបស់កងទ័ពថៃ ក្នុងខេត្តឧត្តរមានជ័យ
07/26/2025 06:07 PM
Facebook Telegram Linkin
សិក្ខាកាមវគ្គអប់រំនយោបាយកម្រិត១វគ្គជំនាន់៨១របស់គណបក្សប្រជាជនកម្ពុជានាំយកអំណោយចែកជូននគរបាលការពារបេតិកភណ្ឌប្រាសាទព្រះវិហារ
07/26/2025 05:07 PM
Facebook Telegram Linkin
ប្រធាន IAEA ត្រូវលើកទឹកចិត្តដោយការសម្រេចចិត្តរបស់អ៊ីរ៉ង់ ឲ្យមកទស្សនកិច្ចប្រទេសនេះ នៅប៉ុន្មាន សប្តាហ៍ខាងមុខ
07/26/2025 05:07 PM
Facebook Telegram Linkin
មនុស្សយ៉ាងតិច ៨នាក់ បានស្លាប់ និង ១៣នាក់ បានរងរបួស នៅក្នុងការវាយប្រហារ «ភេរវកម្ម» នៅភាគអាគ្នេយ៍អ៊ីរ៉ង់
07/26/2025 05:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.