BTV NEWS

រដ្ឋបាលខេត្តកំពតត្រៀមទុរេនទុំ ២តោន សម្រាប់ទទួលទេសចរចូលរួមព្រឹត្តិការណ៍ «មរតកផ្លែឈើ និងនំចំណីកំពត»

មន្ត្រីជំនាញ ស្នើដល់កសិករ សហគមន៍ និងអ្នកពាក់ព័ន្ធរួមគ្នាលើកកម្ពស់វិស័យកសិកម្មខេត្តកែប

អ្នកដាំទុរេនស្រុកចម្ការលើចង់ឲ្យអ្នកលក់ប្រកាន់ភាពស្មោះត្រង់លើអតិថិជន

កសិករនៅឃុំត្រពាំងរូង កំពុងទទួលបានការគាំទ្រពីអតិថិជនក្នុងស្រុកលើទិន្នផលទុរេន

សេដ្ឋកិច្ច និង កសិកម្ម

មៀនប៉ៃលិនរបស់កម្ពុជា នឹងនាំចេញទៅទីផ្សារប្រទេសចិនក្នុងពេលឆាប់ៗ

ភ្នំពេញ៖ មន្រ្តីជំនាញ រំពឹងថា មៀនប៉ៃលិនស្រស់របស់កម្ពុជា នឹងនាំចេញទៅទីផ្សារប្រទេសចិន ក្នុងពេលឆាប់ៗ ដ៏ខ្លីខាងមុខនេះ ខណៈក្រុមហ៊ុននាំចេញក្រុមហ៊ុនឆាយណា ជិនវ័រយាន អ៊ឹមផត អិចថត បានចុះកុងត្រាលើតម្លៃបញ្ជាទិញមៀន ជាមួយសហគមន៍មៀនប៉ៃលិនទាំង ៤ ខេត្ត រួមមាន៖ខេត្តប៉ៃលិន បាត់ដំបង បន្ទាយមានជ័យ និងពោធិ៍សាត់។ឯកឧត្តម ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកសិកម្ម ក្រសួងកសិកម្ម រុក្ខាប្រមាញ់ និងនេសាទ លើកឡើងនៅក្នុងសន្និសីទសារព័ត៌មាន នៅអង្គភាពអ្នកនាំពាក្យរាជរដ្ឋាភិបាល ស្ដីពី«សមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងកសិកម្ម រុក្ខាប្រមាញ់ និងនេសាទ» នៅថ្ងៃទី១៩ ខែកក្កដា ឆ្នាំ២០២២នេះថា ជុំវិញកសិកផលមៀនប៉ៃលិន អគ្គនាយករដ្ឋបាលគយចិន បានធ្វើការសន្និដ្ឋានហើយថា ផ្លែមៀនប៉ៃលិនរបស់កម្ពុជា មានគុណភាពល្អជាងគេ នៅក្នុងអាស៊ីអាគ្នេយ៍, ចំណែកពាក់ព័ន្ធទៅនឹងសមាសភាពចង្រៃ តាមការពិនិត្យអនាម័យ គឺមិនមានសមាសភាពចង្រៃលើមៀនប៉ៃលិនផងដែរ ក្នុងនោះសម្រាប់ការវាយតម្លៃនៅតាមចម្ការវិញ កម្ពុជាមានការដាំដុះល្អ រៀបជាជួរបានស្អាត និងអនុវត្តតាមស្តង់ដារបានត្រឹមត្រូវផងដែរ។ឯកឧត្តម លើកឡើងបន្តថា តាមរយៈនៃការវាយតម្លៃរបស់ក្រុមមន្រ្តីជំនាញចិនរួមជាមួយមន្រ្តីជំនាញរបស់កម្ពុជាខាងលើ និងការវាយតម្លៃដំណាក់កាលចុងក្រោយ គឺបានបង្ហាញនូវលទ្ធផលជាផ្លែផ្កា ដោយឯកឧត្តម រំពឹងថា ផ្លែមៀនស្រស់របស់កម្ពុជា នឹងអាចនាំចេញទៅកាន់ទីផ្សារចិនដ៏ឆាប់ៗខាងមុខនេះ។ចំណែកលោក ស្រេង ស្រៀង ប្រធានក្រុមប្រឹក្សាភិបាលសមាគមមៀនប៉ៃលិន ថ្លែងថា ប្រជាកសិករនៅក្រៅ និងក្នុងសហគមន៍ បានយកចិត្តទុកដាក់ខ្ពស់នៅលើការដាំដុះ ដែលបច្ចុប្បន្នកសិករទាំងនោះកំពុងអនុវត្តតាមការណែនាំរបស់ក្រសួងកសិកម្ម រុក្ខាប្រមាញ់ និងនេសាទ និងអង្គការដៃគូផ្សេងៗទៀត លើគម្រោងការដាំដុះកសិកម្មល្អ ឲ្យក្លាយជាដំណាំមានសក្តានុពលមួយទៀតរបស់កម្ពុជា ដើម្បីជម្រុញការនាំចេញផ្លែមៀនប៉ៃលិននេះប្រកបដោយសត្តានុពលខ្ពស់។ក្រសួងពាណិជ្ជកម្ម បានធ្វើពិធីចុះអនុស្សរណៈយោគយល់គ្នារវាង ក្រុមហ៊ុនស៊ី ភី ខេមបូឌា ចំកាត់ និងតំណាងសៃឡូនៅប៉ៃលិន ព្រមទាំងពិធីប្រកាសតម្លៃបញ្ជាទិញមៀនរវាងក្រុមហ៊ុនឆាយណា ជិនវ័រយាន អ៊ឹមផត អិចថត ជាមួយសហគមន៍មៀនប៉ៃលិន ទាំង ៤ ខេត្ត រួមមាន៖ ខេត្តប៉ៃលិន បាត់ដំបង បន្ទាយមានជ័យ និងពោធិ៍សាត់ កាលពីថ្ងៃទី១៩ ខែកក្កដា។ឯកឧត្តមរដ្ឋមន្រ្តី ប៉ាន សូរស័ក្តិ បញ្ជាក់ថា តាមរយៈពិធីចុះអនុស្សរណៈយោគយល់គ្នានេះ ក្រុមហ៊ុន ឆាយណា ជិនវ័រយាន អ៊ីមផតអិចផត បានចុះកិច្ចសន្យាទិញមៀនប៉ៃលិន ជាមួយសហគមន៍មៀនប៉ៃលិន នៅក្នុងតម្លៃជាក់លាក់ពីចាប់ពី ៣ ៣០០ ទៅ ៤ ៥០០រៀល/គក្រ គិតចាប់ពីខែកញ្ញា ឆ្នាំ២០២២ រហូតដល់ខែមិថុនា ឆ្នាំ២០២៣៕ អត្ថបទ៖ សុន រ៉ាឌី

គយប្រមូលពន្ធបានជាង ៤លានដុល្លារ ពីរថយន្តជាងពីរពាន់គ្រឿង ក្នុងរយៈពេល១៨ថ្ងៃខែនេះ

ភ្នំពេញ៖ អគ្គនាយកដ្ឋានគយ បានប្រមូលពន្ធ និងអាករលើរថយន្តចង្កូតឆ្វេង និងចង្កូតស្ដាំគ្មានពន្ធមានស្រាប់ក្នុងប្រទេស ដែលនៅសេសសល់ដោយពុំតម្រូវឱ្យកែចង្កូត បានប្រមាណ ៤.៣៥លានដុល្លារ ពីរថយន្តអត់ពន្ធជាង ២ពាន់គ្រឿង ដោយគិតចាប់ពីថ្ងៃទី ១-១៨ កក្កដា។អគ្គនាយកដ្ឋានគយ និងរដ្ឋាករ បញ្ជាក់ថា ក្នុងចំណោមពីរថយន្តអត់ពន្ធជាង ២ពាន់គ្រឿងនេះ មានរថយន្តចង្កូតស្តាំសរុបចំនួន ២,០៦០គ្រឿងបានមកចុះបញ្ជី ក្នុងនោះរថយន្តបានបង់ពន្ធអាកររួចរាល់ មានចំនួន ១,០២៩គ្រឿង រីឯរថយន្តមិនទាន់បានបង់ពន្ធអាករ មានចំនួន ១,០៣១គ្រឿង។ ចំណែករថយន្តចង្កូតឆ្វេង ដែលត្រូវបានអនុញ្ញាតឱ្យចូលមកបំពេញកាតព្វកិច្ចពន្ធអាករ ដោយមិនរងពិន័យមានចំនួនត្រឹមតែ ១៥ គ្រឿងប៉ុណ្ណោះ។ក្នុងរយៈពេលជិត១០ខែមកនេះ អគ្គនាយកដ្ឋានគយ និងរដ្ឋាករកម្ពុជា ប្រមូលពន្ធអាករ បានប្រមាណជាង ៧៦លានដុល្លារ ពីម្ចាស់រថយន្តគ្មានពន្ធនាំចូលទាំងរថយន្តចង្កូតឆ្វេង និងចង្កូតស្តាំ ដែលជ្រកក្រោមផ្លាកលេខផ្សេងៗជាង ៩ពាន់គ្រឿង។ ជាមួយគ្នានេះ អគ្គនាយកដ្ឋានគយ និងរដ្ឋាករ បានប្រាប់ឱ្យម្ចាស់រថយន្តចង្កូតស្ដាំគ្មានពន្ធមានស្រាប់ក្នុងប្រទេសដែលនៅសេសសល់ទាំងអស់ ត្រូវរួសរាន់មកបង់ពន្ធ និងអាករ ឬស្នើសុំចុះបញ្ជីជារថយន្តចង្កូតស្ដាំគ្មានពន្ធមានស្រាប់ក្នុងប្រទេសឱ្យបានយ៉ាងយូរត្រឹមថ្ងៃទី៣១ ខែកក្កដា ឆ្នាំ២០២២, បើមិនដូច្នេះទេ មន្ត្រីគយ និងរដ្ឋាករ នឹងចុះបង្ក្រាបរឹបអូស ដោយអនុវត្តស្របតាមច្បាប់ និងបទប្បញ្ញត្តិជាធរមាន។អគ្គនាយកដ្ឋានគយ និងរដ្ឋាករកម្ពុជា លើកឡើងខាងលើនេះ គឺអនុលោមតាមប្រសាសន៍ និងការសម្រេចដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រី ស្ដីពីការអនុញ្ញាតឱ្យប្រមូលពន្ធ និងអាករលើរថយន្តចង្កូតស្ដាំគ្មានពន្ធមានស្រាប់ក្នុងប្រទេសដែលនៅសេសសល់ដោយពុំតម្រូវឱ្យកែចង្កូត និងការអនុញ្ញាតឱ្យបន្តប្រមូលពន្ធ និងអាករលើរថយន្តចង្កូតឆ្វេងគ្មានពន្ធមានស្រាប់ក្នុងប្រទេសដែលនៅសេសសល់ ហើយអគ្គនាយកដ្ឋានគយ និងរដ្ឋាករកម្ពុជា បានកំពុងចាត់ចែងអនុវត្តការងារយ៉ាងសកម្ម៕

អគ្គនាយកដ្ឋានពន្ធដារ ប្រមូលចំណូលពន្ធបានជិត ២ ០០០ លានដុល្លារអាមេរិក

ភ្នំពេញ៖ ក្នុងឆមាសទី១ ឆ្នាំ២០២២នេះ អគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទ សរុបបានចំនួនជិត ៨ ០០០ ប៊ីលានរៀល ត្រូវប្រមាណជិត ២ ០០០ លានដុល្លារអាមេរិក ស្មើជិត ៧០ ភាគរយ នៃផែនការប្រចាំឆ្នាំ។ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ បានបង្ហាញចំណូលពន្ធក្នុងកិច្ចប្រជុំបូកសរុបលទ្ធផលប្រមូលចំណូលខែមិថុនា និងប្រចាំឆមាសទី ១ ឆ្នាំ ២០២២ នៅថ្ងៃទី១៩ ខែកក្កដា ឆ្នាំ២០២២។ក្នុងកិច្ចប្រជុំ ឯកឧត្តម គង់ វិបុល លើកឡើងថា ក្រោមការខិតខំប្រឹងប្រែង និងយកចិត្តទុកដាក់ក្នុងការប្រមូលចំណូលពន្ធ របស់មន្រ្តីគ្រប់លំដាប់ថ្នាក់ និងការកែទម្រង់ប្រព័ន្ធគ្រប់គ្រងជាច្រើន របស់អគ្គនាយកដ្ឋានពន្ធដារ, ជាក់ស្តែងក្នុងការប្រមូលចំណូលពន្ធសម្រាប់ខែមិថុនា ឆ្នាំ២០២២ នេះ អគ្គនាយកដ្ឋានពន្ធដារ ប្រមូលចំណូលពន្ធបានប្រមាណជាង ៩៨៦ ប៊ីលានរៀល ត្រូវប្រមាណជិត ២៤៣ លានដុល្លារអាមេរិក ស្មើរប្រមាណ ១០៣ ភាគរយ នៃផែនការប្រចាំខែ និងស្មើ ៨,៦៤ ភាគរយនៃផែនការប្រចាំឆ្នាំ ២០២២។គិតក្នុងឆមាសទី១ ឆ្នាំ ២០២២ អគ្គនាយកដ្ឋានពន្ធដារប្រមូលចំណូលពន្ធបានជាង ៧ ៩៨០ ប៊ីលានរៀល ត្រូវប្រមាណជាង ១ ៩៧០ លានដុល្លារអាមេរិក ស្មើ ៦៩,៨៩ភាគរយ នៃផែនការប្រចាំឆ្នាំ ក្នុងនោះបើធៀបចំណូលនៃឆមាសទី១ ឆ្នាំ ២០២២ ក្នុងរយៈពេលដូចគ្នាក្នុងឆ្នាំ ២០២១ ចំណូលនេះកើនឡើងប្រមាណជាង ១ ៨៣៣ ប៊ីលានរៀល ត្រូវប្រមាណជាង ៤៥២ លានដុល្លារអាមេរិក ស្មើជិត ៣០ ភាគរយ៕ អត្ថបទ៖ វណ្ណៈ

កម្ពុជារកចំណូលបាន២៨០លានដុល្លារ លើការនាំចេញអង្ករ ទៅទីផ្សារអន្តរជាតិក្នុងឆមាសទី១

ភ្នំពេញ៖ កម្ពុជារកចំណូលបាន ២៧៩លានដុល្លារ លើការនាំចេញអង្ករមានចំនួន ៣២៧ ២០០តោន ក្នុងឆមាសទី១ ឆ្នាំ២០២២ កើនឡើង ១៦.៦៧ ភាគរយ ធៀបនឹងរយៈពេលដូចគ្នាកាលពីឆ្នាំមុន។ទិន្នន័យពីក្រសួងកសិកម្ម រុក្ខាប្រមាញ់ និងនេសាទបង្ហាញថា នុងរយៈពេល ៦ ខែដើមឆ្នាំ ២០២២ ការនាំចេញអង្ករមានចំនួន ៣២៧ ២០០ តោនកើនឡើង ១៦,៦៧ ភាគរយបើធៀបទៅនឹងឆមាសទី១ ឆ្នាំ ២០២១ ដែលមានចំនួន ២៨០ ៤៥០ តោន។អង្ករក្រអូបគ្រប់ប្រភេទមានចំនួន ២០៧ ២៧១តោន ស្មើនឹង ៦៣,៣៥% អង្ករសគ្រប់ប្រភេទមានចំនួន ១១៣ ៦១៧តោន ស្មើនឹង ៣៤,៧២% និងអង្ករចំហុយគ្រប់ប្រភេទមានចំនួន ៦ ៣១២តោន ស្មើនឹង ១,៩៣%។បរិមាណអង្ករបាននាំចេញទៅកាន់ទិសដៅសហភាពអឺរ៉ុបចំនួន ២៣ប្រទេស មានបរិមាណសរុបចំនួន ៩៨ ៦២៤តោន កើនឡើង ៤៦,៩០% ទិសដៅប្រទេសចិនមានបរិមាណសរុបចំនួន ១៦៨ ២៨០តោន កើនឡើង១៧,៤៤% ទិសដៅអាស៊ានចំនួន ៤ប្រទេស មានបរិមាណសរុបចំនួន ២៨ ៦៨០តោន កើនឡើង ៥,៦៩% និងទិសដៅដទៃទៀតចំនួន២៣ប្រទេស មានបរិមាណសរុប ៣១ ៦១៦តោន ថយចុះ២៦,២៨%។ក្នុងឆមាសទី១ឆ្នាំ២០២២ ការនាំចេញស្រូវមានចំនួន ១ ៧៣៣ ១៥៧តោន ទៅកាន់ប្រទេសវៀតណាម កើនឡើង ២,៣៨% បើធៀបនឹងរយៈពេលដូចគ្នានៅឆ្នាំ២០២១ ។ការនាំចេញស្រូវ-អង្ករ ពីកម្ពុជាទៅទីផ្សារអន្តរជាតិក្នុងឆមាសទី១ ឆ្នាំ ២០២២ មានទឹកប្រាក់ជាង ៦១៥ លានដុល្លារ កើនជិត ១០០ លានដុល្លារបើធៀបរយៈពេលដូចគ្នាឆ្នាំ ២០២១។ក្នុងឆ្នាំ ២០២១ កម្ពុជានាំចេញអង្ករទៅក្រៅប្រទេសចំនួន ៦១៧ ០៦៩ តោន ថយចុះ ១០,៦៧ ភាគរយបើធៀបនឹងឆ្នាំ ២០២០ ដែលមានបរិមាណ ៦៩០ ៨២៩ តោន៕ អត្ថបទ៖ វណ្ណៈ

កម្ពុជា ស្នើចិនរៀបចំ និងពន្លឿននិតីវិធីលើការនាំចូលម្រេច កៅស៊ូ និងទុរេន ពីកម្ពុជា

ភ្នំពេញ៖ រាជរដ្ឋាភិបាលកម្ពុជា បានស្នើប្រទេសចិន ពន្លឿនការរៀបចំនិតីវិធី ក្នុងការនាំចូល កសិផលសក្តានុពល និងបន្តការគាំទ្រលើការនាំចូលអង្ករពីកម្ពុជា នៅក្រោមកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ។រដ្ឋាភិបាលកម្ពុជា បានស្នើសុំភាគីចិន ក្នុងជំនួបគណៈកម្មាធិការសម្របសម្រួលរដ្ឋាភិបាលកម្ពុជា-ចិន រវាងឯកឧត្តម ហោ ណាំហុង និងឯកឧត្តម វ៉ាង យី ទីប្រឹក្សា និងជារដ្ឋមន្រ្តីការបរទេសចិន ស្តីអំពីការអនុវត្តកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ កាលពីសប្តាហ៍កន្លងទៅ ។ក្នុងជំនួបពិភាក្សាតាមប្រព័ន្ធវីដេអូ កម្ពុជាបានស្នើសុំភាគីចិន ឱ្យមានលើកលែងពន្ធលើការនាំចូលអង្ករពីកម្ពុជា ដែលមានកូតា ៤០ម៉ឺនតោនបន្តទៀត ព្រមទាំងពន្លឿននីតិវិធីចុះហត្ថលេខា លើពិធីសារអនាម័យ និងភូតគាមអនាម័យលើផលិតផលផ្លែមៀន គ្រាប់ស្វាយចន្ទី និងសំបុកត្រចៀកកាំ។ជាពិសេសជំរុញឱ្យភាគីចិន រៀបចំពិធីសារ និងអនាម័យភូតគាមអនាម័យ លើផលិតផលកសិកម្មមួយចំនួនជាកញ្ចប់តែម្ដង ជាជាងធ្វើពិសារតែមួយមុខៗម្ដង។ កម្ពុជាបានស្នើសុំវិនិយោគិនមកបោះទុនក្នុងវិស័យអាទិភាពមួយចំនួនដូចជា ការចិញ្ចឹមសត្វ វារីវប្បកម្ម កៅស៊ូ សម្រាប់នាំចេញទៅប្រទេសចិន ។ គួរបញ្ជាក់ថា រាជរដ្ឋាភិបាលកម្ពុជា និងរដ្ឋាភិបាលចិន បានប្តេជ្ញាពង្រីកទំហំពាណិជ្ជកម្មសម្រេចឱ្យបាន ១៥ប៊ីលានដុល្លារ នៅឆ្នាំ២០២៥។ យោងតាមទិន្នន័យគ្រឹះភូតគាមអនាម័យជាតិរបស់ចិន ៣ខែ ដើមឆ្នាំ២០២២ កម្ពុជាបាននាំចេញទំនិញកសិផលសំខាន់ៗទៅប្រទេសចិនមានដូចជា អង្ករចំនួន ៨៨ ៦៤៧តោន ខណៈផ្លែចេកស្រស់មានចំនួន ៩៨ ៥៣០,២៦តោន។ ជាមួយគ្នានេះ ការនាំចេញផ្លែស្វាយស្រស់មានចំនួន ២២ ២៤៤,៦៨តោន និងគ្រាប់ស្វាយចន្ទីមានចំនួន ១៣៦,៩៦តោន។សូមជម្រាបថា ក្នុងរយៈពេល ៦ខែ ដើមឆ្នាំ២០២២ ទំហំពាណិជ្ជកម្មទ្វេភាគីរវាង កម្ពុជានិងចិន សម្រេចបានក្នុងរង្វង់ទឹកប្រាក់ជាង ៥.៩៨ ប៊ីលានដុល្លារ ។ ទំហំនេះ បានកើនឡើងក្នុងអត្រា ១៩.៧ ភាគរយ បើធៀបនឹងរយៈពេលដូចគ្នាក្នុងឆ្នាំ២០២១ ដែលមានទឹកប្រាក់ប្រមាណ ៥ប៊ីលានដុល្លារ៕ អត្ថបទ៖ វណ្ណ

ត្រីប្រាកម្ពុជា នឹងអាចនាំចេញផ្លូវការទៅកាន់ទីផ្សារចិនក្នុងពេលឆាប់ៗ

ភ្នំពេញ៖ ត្រីប្រាកម្ពុជាគ្រោងនឹងនាំចេញទៅកាន់ទីផ្សារប្រទេសចិនក្នុងពេលឆាប់ៗ ខណៈបច្ចុប្បន្នឈ្មួញអ្នកនាំចេញកំពុងចុះសិក្សា និងជជែកបញ្ហាតម្លៃ ជាមួយម្ចាស់ផលិតកម្មវារីវប្បកម្ម ដើម្បីជម្រុញដល់ការនាំចេញនៅក្នុងកម្រិតសាកល្បង។លោក សុខ រ៉ាដែន ប្រធានសមាគមវារីវប្បករកម្ពុជា បានថ្លែងប្រាប់ភ្នាក់ងារអ្នកយកព័ត៌មាន BTV ស្តីពីផលិតកម្មវារីប្បកម្ម និងទីផ្សារនាំចេញត្រីប្រាកម្ពុជា នៅថ្ងៃទី ១៨ ខែកក្កដា ឆ្នាំ ២០២២ នេះថា ជុំវិញការចិញ្ចឹមត្រីប្រា កម្ពុជាមានទីផ្សារចិញ្ចឹមត្រីប្រាដ៏ធំមួយ ដែលពីមុនការចិញ្ចឹមត្រីប្រារបស់ប្រជាពលរដ្ឋ គឺសម្រាប់តែការចែកចាយទីផ្សារក្នុងស្រុក។ ការនាំចេញត្រីប្រានេះ កម្ពុជាអាចពង្រីកវារីប្បកម្មរបស់ខ្លួនកាន់តែធំ ដែលឈានទៅធ្វើការផ្គត់ផ្គង់បានរាប់ពាន់ រាប់ម៉ឺនតោនក្នុងមួយឆ្នាំៗ។លោក បន្តឲ្យដឹងថា បច្ចុប្បន្នចិនបានកំពុងចុះមកសិក្សា និងជជែកពិភាគ្សាគ្នា អំពីបញ្ហាតម្លៃ ដោយឲ្យតម្លៃត្រីប្រា ក្នុងមួយគីឡូ ចំនួន ៥ ៥០០រៀល ដែលតម្លៃនេះកំពុងជជែកពិភាក្សាគ្នាបន្ត ខណៈបច្ចុប្បន្នការចិញ្ចឹមមានតម្លៃថ្លៃដើមផលិតកម្មខ្ពស់ តែប្រសិនការបញ្ជាទិញមានចំនួនច្រើន និងមានកិច្ចសន្យាកក់ប្រាក់បានត្រឹមត្រូវ និងច្បាស់លាស់ តម្លៃនេះរំពឹងថា នឹងឈាននាំចេញត្រីប្រាជាលើកដំបូងផងដែរ។សូមបញ្ជាក់ថា៖ កាលពីថ្ងៃទី ៦ខែធ្នូ ២០២១ កន្លងមកនេះ ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា ថ្លែងលើកឡើងថា ជុំវិញទីផ្សារនាំចេញរបស់កម្ពុជា ប្រទេសចិនបានសម្រេចចិត្តធ្វើការសិក្សា និងវិភាគហានិភ័យលើផ្លែមៀន និងត្រីប្រារបស់កម្ពុជា ក្នុងនោះតាមកិច្ចប្រជុំវីដេអូពីចម្ងាយ គឺជាវិធានការសំខាន់មួយ ដើម្បីអនុវត្តតាមកិច្ចប្រជុំ រវាងថ្នាក់ដឹកនាំចិន និងសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា គឺក្រៅពីផ្លែមៀនដែលអាចនាំចេញទៅប្រទេសចិន ចំពោះត្រីប្រារបស់កម្ពុជាវិញ ក៏នឹងអាចនាំចេញទៅទីផ្សារប្រទេសចិនផងដែរ៕អត្ថបទ៖ សុន រ៉ាឌី

ខេត្តកំពតប្រមូលផលនេសាទបានជាង ១ម៉ឺន២ពាន់តោន នៅក្នុងឆមាសទី១ ឆ្នាំ២០២២

ភ្នំពេញ៖ នាយខណ្ឌរដ្ឋបាលជលផលខេត្តកំពត បានបញ្ជាក់ថា សកម្មភាពការងារនេសាទ នៅតែមានដំណើរ ការល្អប្រជានេសាទ មានការយល់ដឹងច្រើនជាងមុន និងបានចូលរួមគោរពច្បាប់ត្រឹមត្រូវ មិនប្រើប្រាស់ ឧបករណ៍ហាមឃាត់នោះទេ សម្រាប់ឆមាសទី១ ឆ្នាំ២០២២នេះ ខេត្តកំពត ប្រមូលផលនេសាទបានជាង ១ម៉ឺន ២ពាន់តោន ។ នាយខណ្ឌរដ្ឋបាលជលផល លោក ស សុរិន បានឲ្យដឹងថា នៅក្នុងឆមាសទី១ ឆ្នាំនេះ រដ្ឋបាល ជលផលសម្រេចលទ្ធផលការងារជាច្រើន ក្នុងនោះ ផលនេសាទខេត្តកំពត ទាំងទឹកសាប និងសមុទ្រស្រស់ អនុវត្តបានចំនួនជាង ១២.១០៣តោន (ទឹកសាប ចំនួន២.៣០០តោន និងសមុទ្រ ចំនួន ៩.៨០៣ តោន) ។ ការធ្វើវារីវប្បកម្មសមុទ្រ បានចំនួន ៨៦០តោន និងផលវារីវប្បកម្មទឹកសាប បានចំនួន៦៧តោន ។ ផលនេសាទទាំងនោះ បាននាំចេញចំនួន ៣២៦តោន (កែច្នៃ ១៤៦តោន និងស្រស់ ១៨០តោន) ។ លោកនាយខណ្ឌរដ្ឋបាលជលផល បានបន្តថា ខេត្តកំពតមានស្ថានីយភ្ញាស់កូនត្រីមានសរុបចំនួន ១៥កន្លែង ផលិតកូនត្រីបានចំនួន ៥លានក្បាល។ ធនាគារក្តាមសេះ មាន០២កន្លែង (សហគមន៍នេសាទត្រពាំងរពៅ និងសហគមន៍នេសាទកែបថ្មី) ប្រមូលក្តាមពងដាក់ចូលធនាគារក្តាមបានចំនួន ៧៥គីឡូក្រាម ស្មើនិង ១.០៥១ក្តាម ។ លោក បានបញ្ជាក់ថា រដ្ឋបាលខេត្ត ក៏ដូចជាមន្ទីរជំនាញ បានយកចិត្តទុកដាក់ខ្ពស់ក្នុងថែរក្សាអភិរក្សធនធានធម្មជាតិសមុទ្រ និងបានបណ្តុះកូនកោងកាងបានចំនួន ២៩.៧០០ដើម និងបានដាំចំនួន ១៩.៦៨៦ដើម នៅតាមសហគមន៍នេសាទចំនួន៨ក្នុងខេត្ត។ខេត្តកំពតមានស្មៅសមុទ្រចំនួន ១១ប្រភេទលើផ្ទៃបាតសមុទ្រ ៨ ៤៣៥ហិកតា ផ្កាថ្ម ៩៥៣ហិកតា ព្រៃកោងកាង ១៩៦៦ហិកតា និងទីតាំងអភិរក្សមានចំនួន ១៣កន្លែង។ប្រជានេសាទ បានប្រាប់ឲ្យដឹងថា របរនេសាទគ្រប់គ្រាន់សម្រាប់ចិញ្ចឹមជីវភាពរស់នៅ និងបានសល់បន្តិចបន្តួច ប៉ុន្តែពិបាក ហត់នឿយ ហើយប្រឈមនឹងគ្រោះថ្នាក់ច្រើន។ តាមការបញ្ជាក់របស់ លោកនាយខណ្ឌរដ្ឋបាលជលផលថា ឆមានទី១នេះ ការបង្ក្រាបបទល្មើសអនុវត្តបានចំនួន ៤១ករណី ក្នុងនោះ រឹបអូស/បំផ្លាញចោលលបកន្ទុយកណ្តុរចំនួន ១៤ករណី , រឹបអូសនិងបំផ្លាញចោលឈឺបរុញដៃភ្ជាប់ឧបករណ៍ឆក់ ១៧ករណី, អប់រំណែនាំ ០៣ករណី និងករណីផ្សេងៗ ចំនួន៧ករណីទៀត៕ អត្ថបទ៖ អន សារឹម

បញ្ហាទីផ្សារ និងការចំណាយខ្ពស់លើថ្លៃដើមផលិតនៅតែជាកង្វល់របស់កសិករ

ស្វាយរៀង៖ បញ្ហាទីផ្សារ និងការចំណាយខ្ពស់លើថ្លៃដើមផលិត នៅតែជាកង្វល់របស់កសិករធ្វើស្រែចម្ការ ដែលពួកគេស្នើសុំឱ្យក្រសួង និងស្ថាប័នពាក់ព័ន្ធនានាជួយគិតគូរអំពីបញ្ហានេះឱ្យបានខ្លាំងក្លាផង។កសិករ នៅក្នុងខេត្តស្វាយរៀង បាននិយាយថា បច្ចុប្បន្ន អ្វីដែលពួកគេ កំពុងប្រឈមនោះ គឺតម្លៃកសិផល និងស្រូវអង្ករ មិនទៀតទាត់នៅលើទីផ្សារក្នុងស្រុក បណ្ដាលមកពីការទម្លាក់តម្លៃតាមចិត្ត ពីសំណាក់ឈ្មួញកណ្ដាល បញ្ហាតម្លៃដើមផលិត តម្លៃប្រេងឥន្ធនៈ ជី និងថ្នាំពុលកសិកម្ម មិនទៀងទាត់ ដែរ ធ្វើឱ្យពួកគេពិបាករកចំណេញ។ពាក់ព័ន្ធនឹងបញ្ហានេះ ប្រធានមន្ទីរពាណិជ្ជកម្មខេត្តស្វាយរៀង លោក មាគ ឆវណ្ណរុណ បាននិយាយថា កិច្ចការនេះ វាហួសពីសមត្ថភាពរបស់មន្ទីរ ។តាមរបាយការណ៍របស់មន្ទីរកសិកម្មខេត្តស្វាយរៀង ដែលBTV ទទួលបាន គិតត្រឹមថ្ងៃទី១១ ខែកក្កដា នេះ កសិករក្នុងខេត្តស្វាយរៀង បានធ្វើការប្រមូលផលស្រូវដើមរដូវ បានប្រមាណជាង ២០០ហិកតា ដោយទទួលបានទិន្នផលប្រមាណជាង ៧០០តោន។ ក្នុងនោះ កសិករ ក្នុងនិងក្រៅខេត្ត បាននាំស្រូវចម្រុះទៅកាន់ទីផ្សារវៀតណាម តាមច្រកទ្វារព្រំដែនអន្តរជាតិព្រៃវ័ល្ល ច្រកក្រសាំងជ្រំ ច្រកដូង ច្រកព្រៃតាអី និងច្រកទ្វេភាគី និងបុសមន ក្នុងមួយសប្តាហ៍ ប្រមាណជាង៥ពាន់តោន ដែលតម្លៃស្រូវក្នុង ១គីឡូក្រាម ចន្លោះ៩០០រៀល៕ អត្ថបទ៖ ភា សារិត

ទំហំពាណិជ្ជកម្មទ្វេភាគីកម្ពុជា-អាមេរិកមានតម្លៃជាង ៤,៨ ពាន់លានដុល្លារក្នុងឆមាសទី១

ភ្នំពេញ៖ ទំហំពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិក បានកើនឡើងដល់ជិត ៥ប៊ីលានដុល្លារ ក្នុងឆមាសទី១ឆ្នាំនេះ ខណៈទីផ្សារអាមេរិក នៅតែបន្តជាអ្នកទិញទំនិញធំជាងគេរបស់កម្ពុជា។ពាណិជ្ជកម្មទ្វេភាគីរវាងកម្ពុជា-អាមេរិក ក្នុងឆមាសទី១ ឆ្នាំ ២០២២ មានតម្លៃសរុបជាង ៤,៨ ពាន់លានដុល្លារកើនឡើងជាង ៥១ ភាគរយ បើធៀបនឹងរយៈពេលដូចគ្នាឆ្នាំ ២០២១។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករ ដោយបញ្ជាក់ថា ការនាំទំនិញពីកម្ពុជាទៅអាមេរិកបានហក់ឡើងរហូតដល់ ៥៤ ភាគរយ។ ទិន្នន័យស្ថិតិជញ្ជីងពាណិជ្ជកម្មទំនិញជាមួយនឹងប្រទេសសំខាន់ៗរបស់អគ្គនាយកដ្ឋានគយ និងរដ្ឋាករកម្ពុជា បង្ហាញថា ចាប់ពីខែមករា-ខែមិថុនា ឆ្នាំ ២០២២ ការធ្វើពាណិជ្ជកម្មរវាងប្រទេសកម្ពុជា និងអាមេរិក មានតម្លៃសរុប ៤ ៨១៦ លានដុល្លារ កើនឡើង ៥១,៨ ភាគរយ បើធៀបរយៈពេលដូចគ្នាឆ្នាំ ២០២១។យោងតាមទិន្នន័យខាងលើ ការនាំចេញទំនិញពីកម្ពុជាទៅអាមេរិក មាន ៤ ៦៤៨ លានដុល្លារ កើន ៥៤ ភាគរយ ធៀបនឹងឆមាសទី១ ឆ្នាំមុន និងការនាំទំនិញពីអាមេរិកមកកម្ពុជា មានមានចំនួន ១៦៨,២២ លានដុល្លារ កើន ៨,៧ ភាគរយ ។ តាមរយៈតួលេខនេះ គឺជញ្ជីងពាណិជ្ជកម្មកម្ពុជាមានអតិរេក៤ ៤៨០ លានដុល្លារ។ទីផ្សារអាមេរិក ឈរនៅលើគេក្នុងនាមជាប្រទេសទិញទំនិញពីកម្ពុជាច្រើន ដោយមានចំណែកប្រមាណ ៤០,៨ ភាគរយ នៃការនាំចេញសរុបរបស់កម្ពុជា ។កាលពីឆ្នាំមុនពាណិជ្ជកម្មរវាងប្រទេសទាំង ២ មានតម្លៃ ៧ ៨២៦ លានដុល្លារ កើនឡើង ៤០,៤ ភាគរយ ធៀបនឹងឆ្នាំ ២០២០ ។អ្នកជំនាញ លើកឡើងថា ការកើនឡើងនៃការនាំចេញទំនិញរបស់កម្ពុជា ទៅកាន់ទីផ្សារសេដ្ឋកិច្ចធំបំផុតពិភពលោក នេះ គឺដោយសារទំនិញកម្ពុជា មានគុណភាពខ្ពស់ និងផលិត ផ្គត់ផ្គង់តាមតម្រូវការទាន់ពេលវេលា ជាពិសេស ក្នុងវិបត្តិកូវីដ១៩ កម្ពុជាបើកសកម្មភាពសង្គមសេដ្ឋកិច្ចឡើងវិញ និងឈានដល់បើកដំណើរការខ្សែច្រវ៉ាក់ផលិតកម្ម ផ្គត់ផ្គង់ការនាំចេញ ខណៈប្រទេសផលិតមួយចំនួនមិនអាចដំណើរការសង្វាក់ផលិតកម្មបាន ដោយសារបន្ត រងផលប៉ះពាល់កូវីដ១៩៕ អត្ថបទ៖ វណ្ណៈ

កម្ពុជានាំចេញកៅស៊ូ មានទឹកប្រាក់សរុបជាង ២០០លានដុល្លារ ក្នុងឆមាសទី១

ភ្នំពេញ៖ កម្ពុជាទទួលបានចំណូលប្រមាណ ២១៥លានដុល្លារ លើការនាំចេញកៅស៊ូស្ងួត ប្រមាណ ១៣.៥ម៉ឺនតោន ក្នុងឆមាសទី១ ឆ្នាំ២០២១នេះ កើនឡើង ៣ភាគរយធៀបនឹងរយៈពេលដូចគ្នាកាលពីឆ្នាំមុន។របាយការណ៍របស់អគ្គនាយកដ្ឋានកៅស៊ូ បានឱ្យដឹងថា ប្រទេសកម្ពុជាបាននាំចេញកៅស៊ូស្ងួតចំនួន ១៣៥ ១៣៧ តោននៅក្នុងឆមាសទីមួយនៃឆ្នាំ ២០២២ កើនឡើង ៣ភាគរយធៀបនឹងរយៈពេលដូចគ្នាកាលពីឆ្នាំមុន។របាយការណ៍ បានឲ្យដឹងថា កម្ពុជា រកប្រាក់ចំណូលបាន ២១៥,៨ លានដុល្លារអាមេរិក ពីការនាំចេញទំនិញក្នុងអំឡុងខែមករា ដល់ខែមិថុនាឆ្នាំនេះ ធ្លាក់ចុះ ២,៩ ភាគរយពី ២២២,៤ លានដុល្លារ កាលពីឆ្នាំមុន។អគ្គនាយកនៃអគ្គនាយកដ្ឋានកៅស៊ូ បានបញ្ជាក់នៅក្នុងរបាយការណ៍ថា កៅស៊ូស្ងួតមួយតោនជាមធ្យមមានតម្លៃ ១ ៥៩៧ ដុល្លារអាមេរិកក្នុងរយៈពេលប្រាំមួយខែដំបូងនៃឆ្នាំ២០២២ ប្រហែល៩១ ដុល្លារទាបជាងតម្លៃក្នុងរយៈពេលដូចគ្នាកាលពីឆ្នាំមុន ។កម្ពុជា នាំចេញទំនិញកៅស៊ូភាគច្រើនទៅកាន់ប្រទេសម៉ាឡេស៊ី វៀតណាម សិង្ហបុរី និងចិន។របាយការណ៍ បានបន្តថា មកដល់ពេលនេះកម្ពុជាបានដាំដើមកៅស៊ូលើផ្ទៃដីសរុបចំនួន ៤០៤ ០៤៤ ហិកតា ដែលក្នុងនោះផ្ទៃដីចៀរជ័រកៅស៊ូ មានចំនួន ៣១០.១៩៣ ហិកតា ឬ ៧៧ ភាគរយ ៕អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

អេស្ប៉ាញរកឃើញមនុស្សស្លាប់ខ្ពស់បំផុតពាក់ព័ន្ធនឹងកម្តៅក្នុងខែឧសភា ចាប់តាំងពីឆ្នាំ ២០១៥

អគ្គិភ័យ និងការខូចខាត បានកើតមាននៅអាកាសយានដ្ឋានគូវែត ក្រោយការវាយប្រហាររបស់អ៊ីរ៉ង់

ឥណ្ឌាអនុម័តមូលនិធិជាង ១ពាន់លានដុល្លារ ដើម្បីជួយក្រុមហ៊ុនអាកាសចរណ៍ ស្របពេលប្រេងយន្តហោះឡើងថ្លៃ

ក្រុមអ្នកតាំងលំនៅនិគមន៍អ៊ីស្រាអែលវាយប្រហាររថយន្តដឹកគ្រួសារប៉ាឡេស្ទីននៅតំបន់វ៉េសប៊ែង

ឈីលីកម្ទេចបណ្តាញលាងលុយកខ្វក់ដែលមានការជាប់ពាក់ព័ន្ធនឹងក្រុមឧក្រិដ្ឋជន Tren de Aragua

អរិភាពនៅតំបន់ឈូងសមុទ្រឡើងកម្តៅជាថ្មី ខណៈកិច្ចប្រជុំសន្តិភាពអាមេរិក-អ៊ីរ៉ង់ជាប់គាំង

កូដកម្មជុំវិញកំណែទម្រង់ការងារ ធ្វើឲ្យប៉ះពាល់ដល់រថភ្លើង ជើងហោះហើរ និងសាលារៀននៅព័រទុយហ្គាល់

ចិនច្រានចោលអំណះអំណាងការងារដោយបង្ខំ ជាការឆ្លើយតបនឹងសំណើពន្ធអាមេរិក

វិមានក្រឹមឡាំង៖ រុស្ស៊ីនឹងបន្តវាយប្រហារអ៊ុយក្រែនជាប្រព័ន្ធ ក្រោយការវាយប្រហារដ្រូននៅទីក្រុង St Petersburg

អ្នកវិទ្យាសាស្រ្តព្រមានថា បាតុភូតអែល នីញ៉ូ អាចនឹងវាយប្រហារតំបន់ភាគខាងត្បូងប្រេស៊ីលក្នុងឆ្នាំនេះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877