BTV NEWS

ក្រុមហ៊ុនអាកាសចរណ៍ អ៊ែរអេស៊ា ខេមបូឌា អបអរសាទរគម្រប់ខួប ៣ឆ្នាំ “Cheers to 3 Years” ជាមួយនឹងរង្វាន់មហាសាលសរុបជាង ១៦០,០០០ ដុល្លារ និង ការផ្តល់ជូន សំបុត្រយន្តហោះឥតគិតថ្លៃ ចំនួន ៣,៣៣៣ សំបុត្រ

ក្រុមហ៊ុន Unilever កម្ពុជា ទទួលស្វាគមន៍ ប្រេសិតពាណិជ្ជកម្មចក្រភពអង់គ្លេសធ្វើទស្សនកិច្ចនៅកម្ពុជា

រយៈពេល៥ឆ្នាំមកនេះ ចិនបានផ្តល់ហិរញ្ញប្បទាន រួមចំណែកដល់ការអភិវឌ្ឍលើវិស័យអាទិភាពជាច្រើន

ការនិយមពិសារកាហ្វេរបស់ពលរដ្ឋកម្ពុជា ជំរុញកំណើនហាងកាហ្វេ និងផលិតកម្មក្នុងស្រុក ខណៈតម្រូវការគ្រាប់កាហ្វេប្រមាណ ២ម៉ឺនតោនក្នុង១ឆ្នាំ

សេដ្ឋកិច្ច និង កសិកម្ម

អាកាសយានដ្ឋានអន្តរជាតិសៀមរាប នឹងទទួលការចុះចតយន្តហោះដឹកភ្ញៀវទេសចរដំបូង នៅថ្ងៃស្អែក

សៀមរាប៖ អាកាសយានដ្ឋានអន្តរជាតិសៀមរាប នឹងទទួលការចុះចតយន្តហោះដឹកភ្ញៀវទេសចរជើងដំបូងនៅថ្ងៃស្អែក បន្ទាប់ពីការអាក់ខានអស់រយៈពេលប្រមាណពីរឆ្នាំ ដោយសារវិបត្តិជំងឺកូវីដ-១៩។ នេះបើតាមការ បញ្ជាក់ឱ្យដឹងពីសំណាក់ឯកឧត្តម ប៊ុន រដ្ឋា នាយកអាកាសយានដ្ឋានអន្តរជាតិសៀមរាប។អគ្គកុងស៊ុល-ស្ថានកុងស៊ុលបរទេសប្រចាំខេត្តសៀមរាប អបអរដោយទំនុកចិត្តជាមួយនឹងការត្រៀម បើកទំព័រកំណត់ត្រាជាថ្មី នៃចំនួនភ្ញៀវទេសចរ ក្រោយពីរាជរដ្ឋាភិបាលកម្ពុជា បើកប្រទេសឡើងវិញ និង ទទួលទេសចរវ៉ាក់សាំងពេញលេញ។ឯកឧត្តម ប៊ុន រដ្ឋា នាយកអាកាសយានដ្ឋានអន្តរជាតិសៀមរាប បានឲ្យដឹងថា បន្ទាប់ពីរដ្ឋាភិបាលកម្ពុជា បានបើកប្រទេសឡើងវិញ និងប្រកាសទទួលភ្ញៀវទេសចរបរទេស ដែលបានចាក់វ៉ាក់សាំង ពេញលេញនោះ មានក្រុមហ៊ុនអាកាសចរណ៍ចំនួនពីរ បានប្រកាសចាប់ផ្តើមហោះហើរមកកាន់ខេត្តសៀមរាប ចាប់ពីថ្ងៃ១៧ ខែធ្នូ ឆ្នាំ២០២១នេះ ទី១ គឺក្រមហ៊ុនអាកាសចរណ៍សាំងហ្គាពួអែរឡាញ នឹងធ្វើការហោះហើរដឹកអ្នកដំណើរមកកាន់ខេត្តសៀមរាប និងពីខេត្តសៀមរាប ទៅសិង្ហបុរីវិញជារៀងរាល់ថ្ងៃ និងទី២ គឺក្រុមហ៊ុនអាកាសចរណ៍ ឡាយម៉ី អែរឡាញ (Lamei Airlines) នឹងធ្វើការហោះហើរពីភ្នំពេញមកសៀមរាប និងពីសៀមរាបទៅបាងកក ពីបាងកក មកសៀមរាបវិញ ដោយឆ្លងកាត់ភ្នំពេញ ក្នុងមួយសប្តាហ៍ពីរជើង។ឯកឧត្តម បានបង្ហាញឲ្យដឹងផងដែរនូវកិច្ចសហការរវាងប្រតិបត្តិករព្រលានយន្តហោះ ជាមួយ សមត្ថកិច្ច និងក្រុមជំនាញ ហើយអ្វីដែលជាការទទួលខុសត្រូវនោះ គឺការផ្សព្វផ្សាយជូនភ្ញៀវ អំពីនីតិវិធីប្រតិបត្តិស្តង់ដាSOP នៅពេលយន្តហោះត្រូវចុះចតដល់គោលដៅនោះ។ព្រឹកថ្ងៃទី១៦ ខែធ្នូ ឆ្នាំ២០២១ ខណៈពេលដែលគណៈប្រតិភូកុងស៊ុល នៃបណ្តាប្រទេសជាមិត្ត មួយចំនួនប្រចាំខេត្តសៀមរាប នៃព្រះរាជាណាចក្រកម្ពុជា កំពុងបំពេញទស្សនកិច្ចស្វែងយល់អំពីការរៀបចំអាកាសយានដ្ឋានអន្តរជាតិសៀមរាប ដើម្បីត្រៀមទទួលភ្ញៀវទេសចរវ៉ាក់សាំងពេញលេញនោះ គឺនៅមានគម្លាតមិនលើសពី២៤ម៉ោងនោះទេ ដែលអាកាសយានដ្ឋានអន្តរជាតិសៀមរាប នឹងត្រូវមានកំណត់ ត្រាជាថ្មី នៃការចុះចតជើងយន្តហោះដឹកអ្នកទេសចរមកពីប្រទេសសិង្ហបូរី។ គួរបញ្ជាក់ដែរថា ក្នុងដំណើរទស្សនកិច្ចនេះ រដ្ឋបាលខេត្តបានអញ្ជើញចូលរួម អគ្គកុងស៊ុលសា ធារណរដ្ឋសង្គមនិយមវៀតណាម អគ្គកុងស៊ុលសាធារណរដ្ឋកូរ៉េ ប្រធានការិយាល័យកុងស៊ុល នៃសាធារណរដ្ឋប្រជាមានិតចិន ការិយាល័យកុងស៊ុលជប៉ុន និងប្រធានស្ថានកុងស៊ុល នៃព្រះរាជាណាចក្រហូឡង់ប្រចាំខេត្តសៀមរាប។លោក ក្រុស សារ៉ាត់ ប្រធានមន្ទីរសុខាភិបាខេត្តសៀមរាប និងក្រុមការងារអនុវត្តនីតិប្រតិបត្តិស្តង់ដារ SOP បានបង្ហាញឲ្យដឹងដែរថា ការត្រួតពិនិត្យនឹងត្រូវបានធ្វើឡើងដោយហ្មត់ចត់បំផុត ទី១ ភ្ញៀវដែលត្រូវឆ្លងកាត់អាកាសយានដ្ឋាន ត្រូវតែមានប័ណ្ណចាក់វ៉ាក់សាំងពេញលេញ ទី២- ត្រូវមានប័ណ្ណបញ្ជាក់ថា បានធ្វើ PCR ៧២ម៉ោង មុនមកដល់គោលដៅ និងប័ណ្ណប្រកាសសុខភាព។ ភ្ញៀវទេសចរអន្តរជាតិ ដែលត្រូវឆ្លងកាត់អាកាសយានដ្ឋានអន្តរជាតិសៀមរាប ត្រូវតែទទួលការធ្វើ តេស្តរហ័សពីក្រុមការងារ បើអវិជ្ជមាន គឺអាចធ្វើដំណើរកំសាន្តបាន បើស្ថិតក្នុងករណីអវិជ្ជមាន ត្រូវទទួលការថែទាំនិងព្យាបាល តាមការជ្រើសរើសមន្ទីរព្យាបាលតាមការចង់បានរបស់ភ្ញៀវ តែបើលទ្ធផលវិជ្ជមាន ពុំមានអាការៈសម្គាល់ គឺត្រូវធ្វើចត្តាឡីស័កនៅក្នុងបន្ទប់ដាច់ដោយឡែក នៃសណ្ឋាគារស្នាក់នៅនោះតែម្តង៕

វិស័យអចលនទ្រព្យ រំពឹងមានកំណើនល្អឡើងវិញ នៅឆ្នាំ២០២២ខាងមុខ

ភ្នំពេញ៖ ស្របពេលដែលរាជរដ្ឋាភិបាលកម្ពុជា បានប្រកាសបើកប្រទេសឡើងវិញ ហើយការរាតត្បាតនៃជំងឺកូវីដ១៩ ក៏ឃើញមានការអន់ថយ វិស័យអចលនទ្រព្យត្រូវបានអ្នកជំនាញ រំពឹងទុកថា នឹងមានកំណើនឡើងវិញ នៅឆ្នាំ២០២២ខាងមុខនេះ ។លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា នៅព្រឹកថ្ងៃទី១៦ ធ្នូ ឆ្នាំ២០២១នេះ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវីថា សម្រាប់ឆ្នាំ២០២២ ត្រូវបានគេមើលឃើញថា ការបើកប្រទេសត្រូវបានបើកទូលាយឡើងវិញ ជំរុញការធ្វើដំណើរក្នុងស្រុកឡើងវិញ ជាពិសេសនៅរាជធានីភ្នំពេញតែម្តង ខណៈវិនិយោគបរទេស អាចធ្វើដំណើរត្រង់មកកម្ពុជា។លោកបន្ថែមថា បច្ចុប្បន្ន បើទោះជាការទិញលក់អចលនវត្ថុមានមានសកម្មយឺត ប៉ុន្តែតម្លៃមិនទាន់រងផលប៉ះពាល់ខ្លាំងទេ។ ក្នុងនោះ តម្លៃដីឡូតិ៍ និងលំនៅដ្ឋានតម្លៃទាប និងមធ្យម ក៏មិនមានការប្រែប្រួលខ្លាំងដែរ ដោយសារទីផ្សារនេះផ្ដោតលើប្រជាជនក្នុងស្រុកដែលកំពុងមានតម្រូវការខ្ពស់។ចំណែក លោក ឌិន សុមេធារិទ្ធ ស្ថាបនិកភូមិផ្កាត្រកួន បានឲ្យទូរទស្សន៍ព័ត៌មាន ប៊ីធីវី ដឹងដែរថា នៅឆ្នាំខាងមុខនេះ លោកគ្រោងពង្រីកនូវគម្រោងរបស់លោកចំនួន ៣បន្ថែមទៀត ដូចជានៅភូមិផ្កាត្រកួន, គម្រោងបុរីក្នុងខេត្តព្រៃវែង និងគម្រោងសួនឧស្សាហកម្មនៅក្រវ៉ាត់ក្រុង៣ ដើម្បីបំពេញតម្រូវតំរូវការ។លោក បានបញ្ជាក់ទៀតថា កត្តាដែលនាំឲ្យលោកហ៊ានសម្រេចចិត្តក្នុងការអនុវត្តផែនការដែលគ្រោងទុកនេះ ដោយសារលោកជឿ និងទុកចិត្តលើថ្នាក់ដឹកនាំ ជាពិសេសសម្តេចនាយករដ្ឋមន្រ្តីតេជោ ហ៊ុន សែន គោលនយោបាយសេដ្ឋកិច្ច, ការបរទេសនិងភាពនឹងធឹងជាដើម។ថ្លែងនៅក្នុងសន្និសីទសារព័ត៌មាន កាលពីថ្ងៃទី១៤ ខែធ្នូ ឯកឧត្តម ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើកឡើងថា វិស័យអចលនទ្រព្យ បានក្លាយជាវីស័យជំរុញកំណើនសេដ្ឋកិច្ចមួយ ក្នុងឆ្នាំ២០២១ ក្នុងចំណោមវិស័យជំរុញកំណើនផ្សេងទៀត មានដូចជា វិស័យកាត់ដេរ វិស័យមិនមែនកាត់ដេរ និងវិស័យកសិកម្ម ខណៈវិស័យសេវាកម្ម រំពឹងថា នឹងងើបឡើងវិញ៕អត្ថបទ៖ បូរ៉ាវី

ចំណូលគយ និងរដ្ឋាករសម្រេចបានជាង ២ប៊ីលានដុល្លារ ក្នុងរយៈពេល១១ខែ

ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលសម្រាប់ថវិកាជាតិបានចំនួន ២ ០៦៥លានដុល្លារ រយៈពេល១១ខែ ឆ្នាំ២០២១នេះ ខណៈនិន្នាការចំណូលកើនឡើងវិញ ក្រោយបើកប្រទេសពេញលេញ។ឯកឧត្តម គុណ ញឹម អគ្គនាយកគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុប្រមូលចំណូល អាចសម្រេចបាន ៩៧ភាគរយនៃផែនការ ដែលស្មើនឹងទឹកប្រាក់ ២ ៣០០លានដុល្លារ ខណៈ ច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២១នេះ អគ្គនាយកដ្ឋានគយ និងរដ្ឋាករកម្ពុជា ត្រូវប្រមូលចំណូលឲ្យបានចំនួន ២ ៣៦៣លានដុល្លារ។ឯកឧត្តម គុណ ញឹម បានអះអាងពីនិន្នាការកើនឡើងវិញនៃចំណូលពន្ធគយ នៅចុងឆ្នាំ២០២១នេះ បន្ទាប់ពីរាជរដ្ឋាភិបាលបើកដំណើរការ សេដ្ឋកិច្ចឡើងវិញ ហើយតម្រូវការនាំចូលទំនិញក៏មានការកើនឡើងផងដែរ។រដ្ឋមន្ត្រីប្រតិភូសង្ឃឹមថា នៅខែធ្នូ ឆ្នាំ២០២១នេះ ចំណូលគយនឹងកើនឡើងខ្ពស់ ដោយសារហេតុផលសំខាន់ៗ៣ គឺទី១៖ ការប្រមូលចំណូលពន្ធ លើរថយន្តជ្រកក្រោមស្លាកលេខផ្សេង រំពឹងចូលមកបង់ពន្ធច្រើន ព្រោះដល់ឱសានវាទនៃការអនុគ្រោះពន្ធ១០ភាគរយ, ទី២ ដោយសារបើកសកម្មភាពសេដ្ឋកិច្ចឡើងវិញ ធ្វើឲ្យតម្រូវការទំនិញ នឹងមានសន្ទុះកើនឡើង ការនាំចូលក៏កើនឡើងផងដែរ និងទី៣ ក្នុងឱកាសចុងឆ្នាំ ពាណិជ្ជករតែងតែមានតម្រូវការនាំចូលច្រើន តាមរយៈកម្មវិធីក្រុមហ៊ុនលក់លាងឃ្លាំង ដែលធ្វើឲ្យទំនិញមានតម្លៃថោក ជាឱកាសរបស់ពាណិជ្ជកម្មខ្មែរ ប្រមូលទិញនិងនាំចូលមកកម្ពុជា។ដោយឡែកនៅរយៈពេល១១ ខែឆ្នាំ២០២១នេះ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានប្រមូលចំណូលបាន ២ ៥៦០.១២លានដុល្លារ កើនលើសផែនការ១៤ភាគរយ។សរុបចំណូលទាំងពន្ធគយ និងពន្ធដារ កម្ពុជាទទួលបានចំណូលពន្ធ ៤ ៦២៥លានដុល្លារ។សម្តេចតេជោ ហ៊ុន សែន ក្នុងឱកាសអញ្ជើញសម្ពោធ សណ្ឋាគារ «ហៃយ៉ាត់ រីជិនស៊ី ភ្នំពេញ កាលពីថ្ងៃទី ១៥ខែធ្នូ បានថ្លែងថា បន្ទាប់ពីបើកប្រទេសឡើងវិញ ប្រាក់ចំណូលពន្ធដារ និងពន្ធគយ បានងើបឡើងវិញ បន្ទាប់ពីធ្លាក់ចុះ ក្នុងរយៈពេលនៃវិបត្តិកូវីដ១៩។សម្តេច បានលើកឡើងថា មុនពេលវិបត្តិកូវី រាជរដ្ឋាភិបាល អាចប្រមូលចំណូលក្នុងមួយខែៗ បានក្នុងរង្វង់៥០០ លានដុល្លារ ទៅ៧០០លានដុល្លារ។ ចំណូលនេះបានធ្លាក់ចុះ បន្ទាប់ពីកូវីដ-១៩មកដល់ មកនៅលើ៤០០លានដុល្លារ ហើយបន្ដធ្លាក់ចុះ មកនៅក្រោយ៤០០លានដុល្លារ។ ប៉ុន្តែក្នុងពេលបច្ចុប្បន្ននេះ ចំណូលសារពើពន្ធនេះ បានងើបឡើងវិញ៕អត្ថបទ៖ ឈិត បូរ៉ាវី

គោលនយោបាយវិស័យកាត់ដេរ កាបូប និងស្បែកជើង នឹងធានានិរន្តភាពផលិតកម្ម និងទីផ្សារ

ភ្នំពេញ៖ វិស័យឯកជន គាំទ្រដល់ការបង្កើតយុទ្ធសាស្រ្ត ឬគោលនយោបាយរបស់រាជរដ្ឋាភិបាល សម្រាប់វិស័យកាត់ដេរ កាបូប និងស្បែកជើង ព្រោះគោលនយោបាយ វាគឺជាផែនទីបង្ហាញផ្លូវ ដើម្បីជម្រុញការអភិវឌ្ឍវិស័យទាំងនេះប្រកបដោយសក្តានុពល សម្រាប់ការផលិត និងបម្រើទីផ្សារនាំចេញ ។លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា GMAC លើកឡើងក្នុងកិច្ចសម្ភាសន៍ជាមួយភ្នាក់ អ្នកយកព័ត៌មាន ស្តីពីការបង្កើតយុទ្ធសាស្រ្តរបស់អភិវឌ្ឍន៍វិស័យកាត់ដេរ ស្បែកជើង និងកាបូបនៅកម្ពុជា នៅថ្ងៃទី១៦ ខែធ្នូ ឆ្នាំ២០២១ នេះថា ជុំវិញនិងការបង្កើតឲ្យមានគោលនយោបាយនេះ កន្លងមកវិស័យឯកជនក៏បានចូលរួមពិគ្រោះយោបល់ច្រើនលើកច្រើនសារផងដែរ ដោយក្នុងច្បាប់នោះ បានរៀបចំយ៉ាងច្បាស់លាស់ស្តីអំពីការបង្កើតធនធានមនុស្ស ការលើកកម្ពស់លក្ខខណ្ឌការងារ របស់កម្មករនិយោជិត និងលើកកម្ពស់ការវិនិយោគក្នុងស្រុក និងការផលិត ទៅរកផលិតផលដែលមានតម្លៃខ្ពស់ជាដើម។លោក កាំង ម៉ូនីកា បានថ្លែងនូវការគាំទ្រពេញទំហឹង ព្រោះយុទ្ធសាស្រ្ត ឬគោលនយោបាយ នេះ គឺមានសារៈសំខាន់ណាស់ និងចាត់ទុកជាផែនទីចង្អុលផ្លូវសម្រាប់ការដើរឆ្ពោះទៅរកភាពរីកចម្រើនក្នុងវិស័យឧស្សាហកម្ម ជាពិសេសការជម្រុញប្រកួតប្រជែងរបស់កម្ពុជា, ហើយបញ្ហានេះ លោកបានស្នើរសុំដល់រាជរដ្ឋាភិបាល ជម្រុញធ្វើយ៉ាងណាឲ្យគោលនយោបាយនេះ បានដាក់ចេញប្រើប្រាស់ជាផ្លូវការក្នុងពេលឆាប់ៗ ដើម្បីបម្រើក្នុងវិស័យឧស្សាហកម្មនៅកម្ពុជា។ចំណែកលោកឧកញ៉ា ណាង សុធី អនុប្រធានសហព័ន្ធនិយោជកកម្ពុជា លើកឡើងថា ការបង្កើតគោលនយោបាយនេះដែរ, លោកញ៉ាសង្ឃឹមថា ច្បាប់យុទ្ធសាស្រ្តថ្មីរបស់រាជរដ្ឋាភិបាល និង មានភាពប្រទាក់ក្រឡា និងគ្រប់ជ្រុងជ្រោយ ដើម្បីជួយលើកកម្ពស់ដល់វិស័យទាំងនេះ ឲ្យរក្សានូវស្ថិរភាពនៃការផលិត និងការនាំចេញផងដែរ។ពាក់ព័ន្ធការដាក់ចេញយុទ្ធសាស្រ្តនេះ,ឯកឧត្តមកបណ្ឌិត ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ថ្មីៗនេះ បានលើកឡើងថា ជុំវិញវិស័យកាត់ដេរ កាបូប និងស្បែកជើង វិស័យនេះបានអភិវឌ្ឍន៍នៅកម្ពុជា ដោយបានកើតឡើងជាច្រើនឆ្នាំមកហើយ ដោយមិនទាន់មានយុទ្ធសាស្ត្រ ឬក្របខណ្ឌគោលនយោបាយអ្វីឱ្យពិតប្រាកដមួយសម្រាប់ជម្រុញវិស័យទាំងនេះឡើយ។ បច្ចុប្បន្នរាជរដ្ឋាភិបាល កំពុងរៀបចំយុទ្ធសាស្ត្រអភិវឌ្ឍន៍វិស័យកាត់ដេរ កាបូប និងស្បែកជើង ហើយយុទ្ធសាស្ត្រនេះ នឹងដាក់ចេញក្នុងពេលឆាប់ៗនេះផងដែរ៕ អត្ថបទ៖ សុន រ៉ាឌី

គម្រោងអាកាសយានដ្ឋានអន្តរជាតិតេជោ លក់សញ្ញាបណ្ណ៣០លានដុល្លារ ដល់ធនាគារABA

កណ្ដាល៖ នៅថ្ងៃទី១៤ ខែធ្នូនេះ ធនាគារធនាគារវឌ្ឍនៈ អាស៊ី ចំកាត់ ABA បានចុះហត្ថលេខាព្រមព្រៀងវិនិយោគទិញសញ្ញាប័ណ្ណ មានបុគ្គលធានារបស់ក្រុមហ៊ុន CAIC មានទំហំទឹកប្រាក់ ៣០លានដុល្លារអាមេរិក ដើម្បីគាំទ្រគម្រោងសាងសង់អាកាសយាន្តដ្ឋានតេជោ នៅក្នុងភូមិសាស្ត្រខេត្តកណ្តាល។ការចុះហត្ថលេខានេះ បានធ្វើឡើងរវាង លោកឧកញ៉ា ឆារស៍ វ៉ាន់ អគ្គនាយករងនៃក្រុមហ៊ុន Cambodia Airport Investment (CAIC)និងលោក Askhat Azhikhanov នាយកប្រតិបត្តិនៃធនាគារ ABA ក្រោមវត្តមានអ្នកឧកញ៉ាកិត្តិបណ្ឌិត ពុង ឃាវសែ ប្រធានក្រុមប្រឹក្សាភិបាលនៃ ក្រុមហ៊ុន Overseas Cambodian Investment Corporation (OCIC)និង CAIC។តាមសេចក្តីប្រកាសព័ត៌មាន បានឲ្យដឹងថា ការវិនិយោគរបស់ធនាគារABA លើមូលបត្របំណុល របស់CAIC នៅក្នុងទំហំទឹកប្រាក់ ៣០លានដុល្លាអាមេរិចនេះ គឺមានការផ្តល់អត្រាការប្រាក់ (Coupon rate) 5.5% ក្នុងមួយឆ្នាំជាមួយនឹងរយះពេល ៣ឆ្នាំ ហើយត្រូវបានធានាដោយក្រុមហ៊ុន OCIC ។ តាមសេចក្តីប្រកាសព័ត៌មានដដែល បានឱ្យដឹងទៀតថា ទឹកប្រាក់វិនិយោគដែលទទួលបានពីសញ្ញាប័ណ្ណនេះ នឹងត្រូវយកទៅប្រើប្រាស់សម្រាប់ការសាងសង់ និងការអភិវឌ្ឍ គម្រោងសាងសង់អាកាសយាន្តដ្ឋានអន្តរជាតិតេជោ នៅខេត្តកណ្តាល ខណៈការសាងសង់អាកាសយាន្តដ្ឋានអន្តរជាតិតេជោថ្មីនេះ មកដល់បច្ចុប្បន្នបានដំណើរសាងសង់សម្រេចបាន ២៨% បានចំណាយអស់ទឹកប្រាក់សាងសរុប ៣៧៥លានដុល្លារអាមេរិច ដោយមិនរាប់បញ្ចូលថ្លៃដីដែលវិនិយោគរួចដោយ CAIC។សូមបញ្ជាក់ថា ក្រុមហ៊ុន OCIC គឺជាក្រុមហ៊ុនវិនិយោគក្នុងស្រុកមួយធំជាងគេក្នុងប្រទេសកម្ពុជា ដែលជំនាញនៅក្នុងការអភិវឌ្ឍលើវិស័យហេដ្ឋារចនាសម្ព័ន្ធ អចលនទ្រព្យ សំណង់ ការគ្រប់គ្រងអចលនទ្រព្យ ការអប់រំ វេជ្ជសាស្ត្រ ផ្សារទំនើប សណ្ឋាគារ រោងម៉ាស៊ីនកិនស្រូវ និងសង្វាក់ផលិតកម្មជាដើម ជាមួយនឹងគម្រោងសំខាន់ៗជាច្រើនដូចជា អាកាសយាន្តដ្ឋានអន្តរជាតិតេជោ ទីក្រុងកោះពេជ្រ កោះនរា ទីក្រុងរណបជ្រោយចង្វារ និង ទីក្រុងទំនើប Olympia ជាដើម។ដោយឡែកក្រុមហ៊ុន CAIC គឺជាក្រុមហ៊ុនបណ្តាក់ទុនរួមគ្នារវាងរាជរដ្ឋាភិបាលកម្ពុជា (RGC) ដែលតំណាងដោយរដ្ឋលេខាធិការដ្ឋានអាកាសចរស៊ីវិល និង ក្រុមហ៊ុនOCIC ។ រាជរដ្ឋាភិបាលកម្ពុជាបានផ្តល់សិទ្ធិឱ្យ ក្រុមហ៊ុនCAIC ក្នុងការកាន់កាប់ រចនា ប្លង់ សាងសង់ ធ្វើហិរញ្ញប្បទាន និងគ្រប់គ្រងប្រតិបត្តិការគម្រោង អាកាសយាន្តដ្ឋានអន្តរជាតិតេជោ។សម្រាប់ ធនាគារABA គឺជាស្ថាប័នហិរញ្ញវត្ថុឯកជនឈានមុខគេ ដែលត្រូវបានបង្កើតឡើងក្នុងឆ្នាំ១៩៩៦។ ABA គិតត្រឹមថ្ងៃ ៣០ ខែវិច្ឆិកា ឆ្នាំ២០២១ ទ្រព្យសម្បត្តិសរុបរបស់ធនាគារមានទំហំ ៧,៧ ពាន់លានដុល្លារអាមេរិក។ ជាមួយសាខាទាំងអស់ ៨០និងម៉ាស៊ីនសេវាធនាគារស្វ័យប្រវត្តិជាង ៧៨០គ្រឿងនៅទូទាំងប្រទេស ជាមួយប្រព័ន្ធធនាគារ online ដ៏ទំនើបបានជម្រុញឲ្យធនាគារ ABA អាចផ្តល់សេវាហិរញ្ញវត្ថុប្រកបដោយភាពងាយស្រួល ទំនើបទាន់សម័យ ដល់អតិថិជនយ៉ាងទូលំទូលាយ ៕អត្ថបទ៖ ស៊ុម សុខជា

សេដ្ឋកិច្ចកម្ពុជារំពឹងថានឹងមានកំណើន ៧ភាគរយ នៅឆ្នាំ២០២៤

ភ្នំពេញ៖ យុទ្ធសាស្រ្តស្តារ និងជំរុញសេដ្ឋកិច្ចថ្មី ដែលមានភាពប្រទាក់ក្រឡា និងគ្រប់ជ្រុងជ្រោយរបស់រាជរដ្ឋាភិបាល នឹងធ្វើឲ្យកំណើនសេដ្ឋកិច្ច ត្រឡប់ទៅដូចដើមវិញ នៅត្រឹមឆ្នាំ ២០២៤ ។ឯកឧត្តមបណ្ឌិត ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងសន្និសីទសារព័ត៌មាន ស្តីពីយុទ្ធ សាស្រ្តស្តារ និងជម្រុញកំណើនសេដ្ឋកិច្ច តាមគន្លងប្រក្រតីថ្មី នៅថ្ងៃទី១៤ ខែធ្នូ ឆ្នាំ២០២១ ថា នាពេលកន្លងមកនេះ រាជរដ្ឋាភិបាលបានចាត់វិធានការចំនួន ១០ ជុំមកហើយ ដើម្បីជួយទប់លំនឹងសេដ្ឋកិច្ច ក្នុងនោះចាប់ពីឆ្នាំ ២០២២ តទៅ រាជរដ្ឋាភិបាលលែងអនុវត្តតាមវិធានការបង្វិលជុំទៀតហើយ ដោយកញ្ចប់ថវិកាទាំងអស់ត្រូវដាក់ចូលក្នុងយុទ្ធសាស្រ្តស្តារ និងជម្រុញកំណើនឡើងវិញ ដែលយុទ្ធសាស្រ្តនេះ គឺជាយុទ្ធសាស្រ្តមានលក្ខណៈប្រទាក់ក្រឡា និងគ្រប់ជ្រុងជ្រោយ។ឯកឧត្តម បន្តថា តាមរយៈនៃការដាក់ចេញនូវយុទ្ធសាស្រ្តនេះ គឺជាការជម្រុញដោះស្រាយលើគ្រប់វិស័យនូវរាល់បញ្ហាប្រឈមនីមួយៗ ជាពិសេសវិស័យដែលជាកំណើនសេដ្ឋកិច្ចធំៗ, ក្នុងនោះដើម្បីអនុវត្តយុទ្ធសាស្រ្តប្រកបដោយភាពជោគជ័យ រាជរដ្ឋាភិបាលនឹង ដាក់ចេញជាផែនការសកម្មភាពលម្អិតទៅលើក្រសួងស្ថាប័នពាក់ព័ន្ធ ដើម្បីជម្រុញឲ្យសម្រេចនូវកំណើនដូចដើមវិញ ក្នុងរង្វង់ប្រមាណ ៧ភាគរយ នៅត្រឹមឆ្នាំ ២០២៤ ខាងមុខ ។ឯកឧត្តម ផាន់ ផល្លា បន្តថា ជុំវិញផែនការស្តារ និងអភិវឌ្ឍន៍សម្រាប់គម្រោងឆ្នាំ២០២២, ក្រៅពីគម្រោងបោះផ្សាយលក់មូលបត្ររបស់រដ្ឋរាជរដ្ឋាភិបាលនឹងបន្តខ្ចីប្រាក់ពីដៃគូអភិវឌ្ឍន៍ ក្នុងកម្រិត ១ ៦០០ លាន SDR ដែលកើនឡើង ១០០ លាន SDR បើធៀបឆ្នាំ ២០២១ ដើម្បីយកថវិកានេះទៅអនុវត្តហេដ្ឋារចនាសម្ព័ន្ធសំខាន់ៗ ដែលជាផ្នែកមួយជួយរុញកំណើនសេដ្ឋកិច្ចបន្ថែម។ ពាក់ព័ន្ធបំណុលនេះ ឯកឧត្តម បញ្ជាក់ថា បើតាមការវាយតម្លៃពី IMF, ធនាគារពិភពលោក និងស្ថាប័នវាយតម្លៃធំៗផ្សេងទៀត មកដល់ពេលនេះបំណុល ដែលរាជរដ្ឋាភិបាលខ្ចី បើធៀបទៅនឹងប្រទេសផ្សេងៗ គឺកម្ពុជាស្ថិតនៅក្នុងកម្រិតទាបនៅឡើយ ៕អត្ថបទ៖ សុន រ៉ាឌី

ត្រីប្រហុកក្នុងភូមិសាស្ត្ររាជធានីភ្នំពេញឆ្នាំនេះទទួលផលច្រើន និងតម្លៃទាបជាងឆ្នាំមុន

ភ្នំពេញ៖ រយៈពេលប្រមាណ ៣ថ្ងៃមកនេះ ការនេសាទត្រីប្រហុកក្នុងភូមិសាស្រ្តរាជធានីភ្នំពេញ កំពុងទទួលបានទិន្នផលល្អប្រសើរ ធៀបទៅនឹងការនេសាទត្រីប្រហុកឆ្នាំមុន។ ចំណែកឯតម្លៃត្រីប្រហុក ក្នុងឆ្នាំនេះ ក៏ស្ថិតក្នុងតម្លៃថោកជាងឆ្នាំមុនផងដែរ។នេះជាការលើកឡើងរបស់លោក ងិន ឌី នាយខណ្ឌរដ្ឋបាលជលផលភ្នំពេញ ក្នុងឱកាសលោកចុះត្រួតពិនិត្យការប្រមូលត្រីប្រហុក ក្នុងភូមិសាស្រ្ត ច្រាំងចម្រេះ ខណ្ឌឬស្សីកែវ។ពាក់ព័ន្ធនឹងការនេសាទត្រីប្រហុកនេះ លោក ងិន ឌី នាយខណ្ឌរដ្ឋបាលជលផលភ្នំពេញ បានលើកឡើងក្នុងការចុះត្រួតពិនិត្យការប្រមូលផលត្រីប្រហុកថ្ងៃនេះថា ទិន្នផលត្រីប្រហុក ក្នុងភូមិសាស្រ្តរាជធានីភ្នំពេញ អាចមានចំនួនតិចជាងទិន្នផលត្រីប្រហុកនៅខេត្តកណ្ដាល ដែលនៅខាងលើ។យ៉ាងណាមិញលោកបញ្ជាក់ថា សម្រាប់ការប្រមូលត្រីប្រហុកនៅភូមិសាស្រ្តរាជធានីភ្នំពេញឆ្នាំនេះ គឺទទួលបានផលល្អប្រសើរជាងឆ្នាំមុន។ លោកថា ការនេសាទត្រីប្រហុក ក្នុងមួយគន្លងដៃ អាចប្រមូលបានផលប្រមាណ៤០០គីឡូ ក្នុងរយៈពេលមួយម៉ោង រីគន្លងខ្លះអាចទទួលបានផលលើសពីនេះទៅទៀត។ លោក បញ្ជាក់ដែរថា ទិន្នផលត្រីប្រហុកនេះ អាចបន្តត្រូវក្នុងរយៈពេលប៉ុន្មានថ្ងៃខាងមុខទៀត រួចទិន្នផលនឹងមានការធ្លាក់ចុះទៅវិញ។អ្នកស្រី ស្មាន ម៉ីសំ ជាអ្នកប្រមូលផលត្រីប្រហុកដើម្បីលក់តជូនប្រជាពលរដ្ឋនៅតំបន់ច្រាំងចម្រេះ បានលើកឡើងថា តម្លៃត្រីមានធូថ្លៃជាងឆ្នាំមុនច្រើន ហើយប៉ុន្មានថ្ងៃមកនេះ ក៏ពុំទាន់ឃើញមានប្រជាពលរដ្ឋសម្រុកមកទិញច្រើននោះទេ។ តម្លៃត្រីប្រហុកដែលលោកស្រីលក់ គឺមានតម្លៃប្រមាណ ២៥០០ ក្នុង១គីឡូ សម្រាប់ត្រីមិនទាន់ធ្វើ និងមានមានតម្លៃប្រមាណ ៥០០០ទៅ ៦០០០រៀលក្នុង១គីឡូ សម្រាប់ត្រីដែលធ្វើរួច។ចំពោះប្រជាពលរដ្ឋដែលបានមកទិញ ត្រីប្រហុកនៅថ្ងៃនេះ ក៏សប្បាយចិត្តពេលតម្លៃត្រីមានភាពធូរថ្លៃផងដែរ។ តាមការសាកសួរ ពួកគាត់ទិញត្រីប្រហុក សម្រាប់ការប្រើប្រាស់ក្នុងគ្រួសារ ចែកកូនចៅ ដោយទិញប្រមាណ ១០០គីឡូ សម្រាប់រយៈពេលមួយឆ្នាំនេះ។ផ្អែកតាមសេចក្ដីជូនដំណឹងរបស់ រដ្ឋបាលជលផល នៃក្រសួងកសិកម្ម រុក្ខប្រមាញ់ និងនេសាទ បានបញ្ជាក់ថា សម្រាប់ភូមិសាស្រ្តរាជធានីភ្នំពេញ និងខេត្តកណ្ដាលអាចនេសាទត្រីបានច្រើនចាប់ពីថ្ងៃទី ១២ ដល់ថ្ងៃទី ១៦ ខែធ្នូ បើសិនជាមេឃស្រឡះល្អ គ្មានភ្លៀងកក់ខែ ឬទទួលរងឥទ្ធិពលព្យុះ៕ អត្ថបទ៖ គឹមហុក

អគ្គនាយកដ្ឋានពន្ធដារ ប្រមូលចំណូលពន្ធជាង ២៥៦០លានដុល្លារ ក្នុងរយៈពេល១១ខែ

ភ្នំពេញ៖ អគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទ តាមប្រព័ន្ធគ្រប់គ្រងទិន្នន័យអនឡាញ បានចំនួនជាង ១០ ពាន់ប៊ីលានរៀល ត្រូវប្រមាណជាង ២ ៥៦០ លានដុល្លារអាមេរិក ស្មើនឹង ១១៤,១៣% នៃផែនការច្បាប់ ។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានពន្ធដារ លើកឡើងនៅក្នុង កិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែវិច្ឆិកា និងសម្រាប់រយៈពេល១១ខែ ឆ្នាំ២០២១នេះថា ការអនុវត្តប្រមូលចំណូលពន្ធសម្រាប់រយៈពេល ១១ខែ ឆ្នាំ២០២១ ចំណូលពន្ធអាករគ្រប់ប្រភេទ ដែលអគ្គនាយកដ្ឋានពន្ធដារប្រមូលបាន (តាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ) មាន ចំនួនជាង ១០ ៣៦៨ប៊ីលានរៀល ត្រូវជាង ២ ៥៦០លានដុល្លារអាមេរិក ស្មើនឹង ១១៤,១៣% នៃផែនការច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ២០២១ ។ចំពោះលទ្ធផលនៃការគ្រប់គ្រងប្រមូលចំណូលពន្ធ នៅក្នុងខែ វិច្ឆិកា ឆ្នាំ២០២១ ចំណូលពន្ធ-អាករគ្រប់ប្រភេទ ដែលអគ្គនាយក ដ្ឋានពន្ធដារប្រមូលបាន តាមប្រព័ន្ធគ្រប់គ្រងទិន្នន័យចំណូល អនឡាញរបស់អគ្គនាយកដ្ឋានពន្ធដារ) មានចំនួនជាង ៩៩០ប៊ីលានរៀល ត្រូវប្រមាណជាង ២៤៤ លានដុល្លារអាមេរិក ស្មើនឹងជិត ១១% នៃផែនការច្បាប់ហិរញ្ញវត្ថុសម្រាប់ ការគ្រប់គ្រងឆ្នាំ២០២១ ប្រៀបធៀបនឹងចំណូលពន្ធអាករ ប្រចាំខែវិច្ឆិកាទៅនឹងឆ្នាំ២០២០ ឃើញថា ការប្រមូលពន្ធបាន កើនឡើងជាង ៤៩ប៊ីលានរៀល ស្មើរជាង ១២លានដុល្លារអាមេរិក ត្រូវប្រមាណ ៥,២៤%។ ឯកឧត្តម គង់ វិបុល បញ្ជាក់ថា លទ្ធផលប្រមូលចំណូលពន្ធ កើនឡើង ក្នុងខែវិច្ឆិកា និងឈានទៅសម្រេចលើសផែនការឆ្នាំ២០២១ រហូតដល់ ១៤,១៣% ក្នុងរយៈពេលត្រឹមតែ១១ខែ ឆ្នាំ២០២១ នេះ បានកើតចេញពីការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី ជាពិសេសការគ្រប់គ្រងស្ថានការណ៍នៃជំងឺកូវីដ-១៩ បានពេញលេញ និងមានប្រសិទ្ធភាពខ្ពស់ តាមរយៈចាត់វិធានការជា យុទ្ធសាស្រ្ត ក្នុងការចាក់វ៉ាក់សាំងជូនប្រជាពលរដ្ឋកម្ពុជាប្រកបដោយស្មារតីបុរេសកម្ម និងទាន់ពេលវេលា ដែលអាចកសាង ភាពធន់របស់សហគមន៍ទៅនឹងជំងឺរាតត្បាតនេះ ហើយឈានទៅបើក ប្រទេសជាតិឱ្យដំណើរការសេដ្ឋកិច្ចឡើងវិញ ក្រៅពីគោលការណ៍ខាងលើ អគ្គនាយកដ្ឋាន បានរៀបចំអភិវឌ្ឍ និងដាក់ឱ្យប្រើប្រាស់នូវប្រព័ន្ធបច្ចេកវិទ្យាព័ត៌មាន តាំងពីមុន ការរីករាលដាលនៃជំងឺកូវីដ-១៩ ការគ្រប់គ្រងប្រមូលចំណូល ពន្ធតាមប្រព័ន្ធបច្ចេកវិទ្យាព័ត៌មាន ដែលបានដាក់ឱ្យអនុវត្ត និងប្រព័ន្ធទទួលលិខិត ប្រកាសពន្ធពាក្យស្នើសុំលិខិតរដ្ឋបាល និងឯកសារនានា តាមរយៈប្រព័ន្ធបញ្ជូនឯកសារអេឡិចត្រូនិក ព្រមទាំងការស្នើសុំវិញ្ញាបនបត្រ/លិខិត អនុញ្ញាតនានា តាមប្រព័ន្ធអនឡាញសាធារណៈជនទូទៅ អាចប្រើប្រាស់ GDT Taxpayer App ដែលអាចបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ និងពន្ធអចលនទ្រព្យ តាមរយៈទូរស័ព្ទដៃដោយចំណេញពេលវេលាងាយស្រួលនិងចៀសផុតពីហានីភ័យនៃការឆ្លងជំងឺរាតត្បាតកូវីដ-១៩ កម្មវិធីលើទូរស័ព្ទដៃ របស់អគ្គនាយកដ្ឋានពន្ធដារផ្តល់ លទ្ធភាពជូនអ្នកជាប់ពន្ធទទួលបានភាពងាយស្រួល និងចំណេញពេលវេលាក្នុងការបង់ពន្ធបានពីគ្រប់ទីកន្លែង ៕អត្ថបទ៖ សុន រ៉ាឌី

ចំណូលកំពង់ផែស្វយ័តភ្នំពេញ សម្រេចបានជាង ៣០លានដុល្លារ ក្នុងរយៈពេល១១ខែ

ភ្នំពេញ៖ ប្រាក់ចំណូលរបស់កំពង់ផែស្វយ័តភ្នំពេញ ដែលជាក្រុមហ៊ុនចុះបញ្ជីនៅផ្សារមូលបត្រកម្ពុជា (CSX) ក្នុងរយៈពេល ១១ខែឆ្នាំ២០២១ មានប្រមាណជាង ៣០លានដុល្លារ កើនឡើងប្រហែល ១៤ភាគរយបើធៀបនឹងរយៈពេលដូចគ្នាឆ្នាំ២០២០។ទិន្នន័យរបស់កំពង់ផែស្វយ័តភ្នំពេញ ចុះកាលបរិច្ឆេទថ្ងៃទី៩ ខែធ្នូ ឆ្នាំ២០២១ បានបង្ហាញថា ចាប់ពីខែមករា ដល់ខែ វិច្ឆិកា ឆ្នាំ២០២១ ចំណូលដែល ក.ស.ភ រកបានមានចំនួនសរុប ៣០,៣៩ លានដុល្លារ កើនឡើង ១៤ភាគរយបើធៀបនឹងរយៈពេលដូចគ្នាឆ្នាំ២០២០។យោងតាមកំពង់ផែស្វយ័តភ្នំពេញ ក្នុងចំណោមចំណូលទាំងនោះរួមមាន ចំណូលពីប្រតិបត្តិការផែ(Port Operation) មានចំនួន ២៤,៣៧លានដុល្លារ កើន ១៦ភាគរយ ធៀបរយៈពេលដូចគ្នាឆ្នាំ២០២០, ចំណូលពីអាជ្ញាធរផែ ៣,២៣លានដុល្លារ ធ្លាក់ចុះ ៣ភាគរយ, ចំណូលពីសេវាកម្មផ្សេងៗ ៣០ម៉ឺនដុល្លារ កើន ៨៩ភាគរយ និងចំណូលផ្សេងៗ ២,៤៧លានដុល្លារ កើន ១២ភាគរយ។ដោយឡែកសម្រាប់ខែ វិច្ឆិកា ចំណូលសរុបដែល កំពង់ផែស្វយ័តភ្នំពេញ ទទួលបានមានចំនួន ២,៧៦លានដុល្លារ កើនឡើង ១៩ភាគរយពីចំនួន ២,៣៣លានដុល្លារក្នុងខែវិច្ឆិកា ឆ្នាំ២០២០។ ក្នុងនោះចំណូលពីប្រតិបត្តិការផែ មានចំនួន ២,២៩លានដុល្លារ កើន ២៤ភាគរយ។ប្រាក់ចំណូលប្រចាំឆ្នាំ២០២០ របស់ ក.ស.ភ (មិនទាន់ធ្វើសវនកម្ម) មានចំនួន ២៩,៤៨ លានដុល្លារ ធ្លាក់ចុះ ៦ ភាគរយបើធៀបនឹង ៣១,៣១ លានដុល្លារ (ធ្វើសវនកម្មរួច) កាលពីឆ្នាំ ២០១៩៕អត្ថបទ៖ វណ្ណៈ

រាជរដ្ឋាភិបាល កំណត់យកអាករលើតម្លៃបន្ថែម ១០ភាគរយ ចំពោះប្រតិបត្តិករធ្វើអាជីវកម្មក្រៅប្រទេស

ភ្នំពេញ៖ រាជរដ្ឋាភិបាលកំណត់យកអាករលើតម្លៃបន្ថែម តាមអត្រា ១០% ពីអនិវាសនជន (ប្រតិបត្តិករក្រៅប្រទេស) ដែលធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូចនិច សម្រាប់ការផ្គត់ផ្គង់សេវាដល់ និវាសនជន (ដែលជាអតិថិជន) នៅក្នុងព្រះរាជជាណាចក្រកម្ពុជា។អគ្គនាយកដ្ឋានពន្ធដារចេញសេចក្តីណែនាំ ស្តីពីការអនុវត្តអាករលើតម្លៃបន្ថែម ចំពោះប្រតិបត្តិការពាណិជ្ជកម្មតាមប្រព័ន្ធ អេឡិចត្រូចនិច ដែលផ្គត់ផ្គង់ទំនិញឌីជីថល ឬសេវាឌីជីថល ឬរាល់សកម្មភាពពាណិជ្ជកម្មតាមប្រព័ន្ធអេឡិចត្រូនិក ដោយអ្នកជាប់ពន្ធ អនិវាសជន ពីក្រៅព្រះរាជាណាចក្រកម្ពុជា ដល់និវាសនជនក្នុងស្រុក រាជរដ្ឋាភិបាលនឹងត្រូវកំណត់យកអាករលើតម្លៃបន្ថែម។ ចំពោះការផ្គត់ផ្គង់ទំនិញឌីជីថល ឬសេវាឌីជីថល ឬរាល់សកម្មភាពពាណិជ្ជកម្មតាមប្រព័ន្ធអេឡិចត្រូនិក ពីក្រៅព្រះរាជាណាចក្រកម្ពុជា មកក្នុងព្រះរាជាណាចក្រកម្ពុជា អ្នកជាប់ពន្ធអនិវាសនជន (ប្រតិបត្តិករក្រៅប្រទេស) ដល់អតិថិជននៅក្នុងព្រះរាជាណាចក្រកម្ពុជា ត្រូវមានកាតព្វកិច្ចប្រមូលអាករលើតម្លៃបន្ថែមតាមអត្រា ១០% ពីបុគ្គលនិវាសនជន ដែលមិនបានចុះបញ្ជី តាមរបបស្វ័យប្រកាស និងត្រូវដាក់លិខិតប្រកាសអាករលើតម្លៃបន្ថែមប្រចាំខែ ព្រមទាំងបំពេញព័ត៌មានលម្អិត និងបង់អាករលើតម្លៃបន្ថែមជូនអគ្គនាយកដ្ឋានពន្ធដារ។ជុំវិញអាករតម្លៃបន្លែម លោកឧកញ៉ា ឈិន កេន ប្រធានសមាគមបច្ចេកវិទ្យាឌីជីថលនៃកម្ពុជាថា វិស័យបច្ចកវិទ្យាបានកំពុងរីកចម្រើននៅក្នុងពិភពលោក ដែលនិន្នាការនេះកម្ពុជាកំពុងតែក្តោបយកការប្រើប្រាស់បច្ចេកវិទ្យា ក្នុងការទំនាក់ទំនង ជាពិសេសសម្រាប់បម្រើការធ្វើអាជីវកម្ម។ ស្របតាមបរិបថរីកចម្រើននេះ វាគឺជាឱកាសកម្ពុជា ដើម្បីប្រមូល ចំណូលអាករលើតម្លៃបន្ថែម ទោះបីការប្រមូលចំណូលប្រភេទនេះតិច ឬច្រើនក្តី រាជរដ្ឋាភិបាលអាចសន្សំ ដើម្បីពូនជ្រុំជាទុនសម្រាប់ការអភិវឌ្ឍប្រទេស។បន្ថែមពីលើនេះ លោកឧកញ៉ា បានស្នើសុំដល់ស្ថាប័នអនុវត្ត ពន្យាពេលនៃការចុះបញ្ជីបន្ត ដើម្បីទុកឱកាស ដល់ក្រុមហ៊ុនមានលទ្ធភាពចុះបញ្ជី ខណៈក្រុមហ៊ុនមួយចំនួននៅតែមានផលវិបាក ក្នុងស្ថានភាពនៃវិបត្តិជម្ងឺកូវីស ១៩នេះ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

លោក Trump បញ្ជាក់ថា ការទម្លាក់គ្រាប់បែក នឹងមានភ្លាមៗ បើលោកមិនពេញចិត្តកិច្ចព្រមព្រៀងជាមួយអ៊ីរ៉ង់

រុស្ស៊ីអះអាងថា ការជ្រៀតជ្រែករបស់លោកខាងលិច បានរំខានកិច្ចព្រមព្រៀងអ៊ីស្តង់ប៊ុលឆ្នាំ២០២២ ស្តីពីអ៊ុយក្រែន

លីទុយអានី និងអាមេរិកចុះហត្ថលេខាលើកិច្ចព្រមព្រៀង ដើម្បីពង្រីកកិច្ចសហប្រតិបត្តិការយានដ្រូន

ក្រុមហ៊ុន Tesla បើកមជ្ឈមណ្ឌលពិសោធន៍ថ្មីនៅទីក្រុង Hyderabad ប្រទេសឥណ្ឌា

លោក Modi ព្រមានអំពី «កង្វះទំនុកចិត្ត» មុនពេលមានជំនួបទ្វេភាគីជាមួយលោក Trump

ក្រុមមន្រ្តីរដ្ឋ Texas ចេញការឃ្លាំមើលព្យុះត្រូពិក និងព្រមានពីទឹកជំនន់នៅតាមទីក្រុងតំបន់ឆ្នេរ

នាយករដ្ឋមន្ត្រីអង់គ្លេស៖ ការបាញ់ព្រមានរបស់នាវាចម្បាំងរុស្ស៊ី គឺ «មិនប្រុងប្រយ័ត្ន» មិនមែន «គំរាម» ទេ

ហុងគ្រីបើកការស៊ើបអង្កេតលើការរឹបអូសសាច់ប្រាក់ និងមាសរបស់អ៊ុយក្រែន

នាយករដ្ឋមន្ត្រីកាណាដាជំរុញឲ្យធ្វើពិពិធកម្មថាមពលសកល ក្រោយមានវិបត្តិច្រកសមុទ្រ Hormuz

ក្រុមថែរក្សាសន្តិភាព UNIFIL រាយការណ៍ពីការធ្លាក់ចុះអំពើហិង្សានៅតំបន់ភាគខាងត្បូងប្រទេសលីបង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877