នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គិតត្រឹមខែកក្កដា កម្ពុជាមានរោងចក្រដំណើរការចំនួន ៣.៣៥៧ មានទុនវិនិយោគ ២៨ ប៊ីលានដុល្លារ
ប្រធានគណៈកម្មាធិការសេដ្ឋកិច្ច និងធុរកិច្ចឌីជីថល ជំរុញឱ្យវិស័យឯកជន​ចាប់យក​ឌីជីថល​បម្រើ​ក្នុងអាជីវកម្ម
រាជរដ្ឋាភិបាលទម្លាក់ការព្យាករសេដ្ឋកិច្ចនៅត្រឹម ៤,១% ក្រោមសម្មតិកម្ម និងសូចនាករ​ម៉ាក្រូសេដ្ឋកិច្ច​ឆមាសទី១
សមាគមធនាគារ​នៅកម្ពុជា និងសមាគមមីក្រូហិរញ្ញវត្ថុកម្ពុជា សេចក្តីថ្លែងការណ៍រួមស្តីពី វីដេអូ​ឯកសារ​ពាក់ព័ន្ធ​នឹងករណីអតិថិជនឥណទាន ដែលត្រូវបានផ្សព្វផ្សាយនាពេលថ្មីៗនេះ

សេដ្ឋកិច្ច និង កសិកម្ម

តម្រូវការជ្រូករស់ក្នុងឱកាសចូលឆ្នាំចិន បានហក់ឡើងខ្ពស់

2022/02/03 07:18:05 pm        469
Facebook Telegram Linkin
ភ្នំពេញ៖ ក្នុងរដូវបុណ្យចូលឆ្នាំថ្មីប្រពៃណីចិន រយៈពេលបីថ្ងៃក្នុងឆ្នាំនេះ តម្រូវការផ្គត់ផ្គង់ជ្រូករស់ បានហក់ឡើងដល់ ៩ពាន់ ទៅ ១ម៉ឺនក្បាលក្នុងមួយថ្ងៃ ហើយតម្រូវការនេះនឹងធ្លាក់មកធម្មតាមវិញ បន្ទាប់ពីបុណ្យចូលឆ្នាំចិនបានបញ្ចប់។លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា ​បានថ្លែងប្រាប់ភ្នាក់ងារអ្នកយកព័ត៌មាន BTV នៅថ្ងៃទី ០៣ ខែកុម្ភៈ ឆ្នាំ២០២២នេះថា ទាក់ទងនឹងការផ្គត់ផ្គង់​ជ្រូករស់ ក្រៅពីរដូវបុណ្យទាន នៅទូទាំងប្រទេសក្នុងពេលបច្ចប្បន្ន ​ក្នុងមួយថ្ងៃៗ​មានតម្រូវការប្រមាណក្នុងរង្វង់ប្រមាណជិត ៨ ពាន់ ទៅ ៨ពាន់ក្បាល ដោយបូកបញ្ចូលទាំងជ្រូកនាំចូលពីប្រទេសជិតខាងខ្លះៗផងដែរ ។ចំណែកនៅក្នុងឱកាសបុណ្យចូលឆ្នាំចិននេះ លោកបានបន្តឲ្យដឹងថា តម្រូវ​ការ​ផ្គត់ផ្គង់​ជ្រូករស់នៅតាមទីផ្សារ​ បានកើនឡើងក្នុង រង្វង់ប្រមាណជាង ៩ ពាន់ ទៅ ១ម៉ឺនក្បាល ក្នុងមួយថ្ងៃ ជាពិសេសនៅថ្ងៃចូលឆ្នាំចិនទី១, ក្នុងនោះចំពោះតម្លៃលក់ជ្រូករស់ នៅតាមទីផ្សារវិញ មិនខ្ពស់ជាង ១១.០០០ រៀល ក្នុងមួយគីឡូក្រាមនោះឡើយ, ដោយឡែកការលក់សាច់ជ្រូក មានតម្លៃចន្លោះពី ១៨.០០០ ទៅ ១៨.៥០០ រៀល​ ក្នុងមួយគីឡូ ។សូមបញ្ជាក់ថា៖ យោងតាមរបាយការណ៍អគ្គនាយកដ្ឋានសុខភាពសត្វ និងផលិតកម្មសត្វ ​នៅឆ្នាំ ២០២១ ​កន្លងទៅនេះ កម្ពុជាសម្រេច បានតម្លៃផលិតកម្មសត្វសរុបមានទំហំ ៥ ១០០ លាន​ដុល្លារ​អាមេរិក មានកំណើន ៦% ធៀបនឹងឆ្នាំ២០២០ ​ដែលទទួលបាន ៤​ ៨១៣ ​លានដុល្លារអាមេរិក, ក្នុងនោះ​ចំពោះតម្លៃផលិតកម្មជ្រូក ​មានទំហំប្រមាណជិត​ ៥៨០ ​លានដុល្លារអាមេរិក ​កើនឡើង ២០% និងតម្លៃ ​ផលិតផល​ផ្គត់ផ្គ​ង់​សាច់ជ្រូកក្នុងស្រុក ​មានចំនួនជាង ​៥៧៧ ​លានដុល្លារអាមេរិក បានកើនឡើង ៦%​ បើធៀបទៅឆ្នាំ ២០២០៕អត្ថបទ៖ សុន រ៉ាឌី

កម្ពុជានាំទំនិញទៅកាន់ប្រទេសជប៉ុន មានតម្លៃជាង ១ ៧៥០លានដុល្លារ ក្នុងឆ្នាំ២០២១

2022/02/02 11:12:16 pm        545
Facebook Telegram Linkin
ភ្នំពេញ៖​ កម្ពុជាបាននាំទំនិញចេញទៅកាន់ប្រទេសជប៉ុនមានតម្លៃ ១ ៧៥២លានដុល្លារក្នុងឆ្នាំ២០២១ កើនឡើង ៨,៤ភាគរយ ធៀបនឹងឆ្នាំ២០២០កន្លងទៅ ចំណែកការដោះដូរពាណិជ្ជកម្មទ្វេភាគីរវាងកម្ពុជាជប៉ុន បន្តកើនឡើង ខណៈប្រទេសទាំងពីរ គ្រោងនឹងបើកការចរចាលើលទ្ធភាពបង្កើតកិច្ចព្រមព្រៀងសេរីពាណិជ្ជកម្មទ្វេភាគី។ទិន្នន័យពីសមាគមពាណិជ្ជកម្មអន្តរជាតិជប៉ុន ហៅកាត់ថា JETRO បង្ហាញថា ការដោះពាណិជ្ជកម្ម​ទ្វេ​ភាគីរវាងកម្ពុជា ​និងជប៉ុន សម្រេចបានក្នុងទឹកប្រាក់សរុប ២ ៣៣២ លានដុល្លារ កើនឡើង​ ១០,៩ភាគរយ ធៀបនឹងឆ្នាំ២០២០។ ដោយឡែកការនាំចូលពីប្រទេសជប៉ុនមកកម្ពុជា ​ក្នុងអំឡុងដូចគ្នានេះ បានកើនឡើង ១៩,៧ភាគរយ ស្មើនឹង​៥៨០លានដុល្លារ។សំលៀកបំពាក់ គ្រឿង​បង្គុំ​អេឡិច​ត្រូនិក​ និង​ផលិតផល​កសិកម្ម​ ជា​ទំនិញ​សំខាន់ៗ​របស់​កម្ពុជា​ដែល​នាំ​ចេញ​ទៅ​ប្រទេស​ជប៉ុន ​ហើយ​នាំ​ចូល​មកវិញពីប្រទេសជប៉ុន នូវ​គ្រឿង​ម៉ាស៊ីន​ និង​ផលិតផល​បច្ចេកវិទ្យា​ខ្ពស់​។ក្រសួងពាណិជ្ជកម្មកម្ពុជា បានលើកឡើង កម្ពុជា កំពុងដាក់គោលដៅបង្កើតកិច្ចព្រមព្រៀង​ពាណិជ្ជកម្ម​សេរី​ទ្វេភាគី​ជា​មួយ​បណ្តាប្រទេស​ដៃគូពាណិជ្ជកម្មសំខាន់ ដែលក្នុងនោះក៏មាន​ប្រទេស​ជប៉ុនផងដែរ។ឧកញ៉ា លឹម ហេង អនុប្រធាន​សភាពាណិជ្ជកម្មកម្ពុជា ​បានមើលឃើញ​ពី​សក្តានុពលដែលកម្ពុជា អាច​បង្កើនការនាំចេញទៅកាន់ប្រទេសជប៉ុន ​និងទាក់ទាញវិនិយោគិនជប៉ុន​បន្ថែម​ចូល​មកកម្ពុជា នៅ​ក្រោមច្បាប់វិនិយោគថ្មី ​ជាពិសេស ​គឺ​កម្ពុជា ​មានអាត្រាចាក់វ៉ាក់សាំងបង្ការជំងឺកូវីដ១៩​ខ្ពស់​ក្នុងតំបន់ ​និង​នៅ​ជុំវិញពិភពលោក។ឧកញ៉ា លឹម ហេង លើកឡើងថា ​អ្វីដែលកម្ពុជា​បន្តជំរុញលើកទឹកចិត្ត ​គឺ​ច្បាប់វិនិយោគថ្មី វិនិយោគិន​ជប៉ុនស្វាគម៍ ​ជំរុញវិនិយោគមកកម្ពុជា​ ទាំងពីមុនកូវីដ​ ប៉ុន្តែបញ្ហាកូវីដ​ ធ្វើឱ្យ​មានការ​យឺតយ៉ាវ ការ​ហោះពីប្រទេសជប៉ុន​ មាន​ការ​ខកខាន​ច្រើនដែរ។​ ប៉ុន្តែសង្ឃឹមថា ក្រោយពីសម្តេច​នាយករដ្ឋមន្រ្តី​បើកសេដ្ឋកិច្ចឡើងវិញគ្រប់វិស័យនេះ ​នឹងជំរុញឱ្យវិនិយោគិនជប៉ុនទាំងតូចទាំងធំចូល​មក​កម្ពុជា​ដើម្បីរកឪកាសវិនិយោគ។ក្នុងជំនួបជាមួយសម្តេចតេជោ ហ៊ុន សែន នាយករដ្ឋមន្រ្តីកម្ពុជា កាលពីថ្ងៃទី ១ ខែកុម្ភៈ ឯកឧត្តម តាកាហាស៊ី ហ្វូមីអាគី (TAKAHASHI FUMIAKI) ប្រធានសមាគមជប៉ុន-កម្ពុជា​និង​ជាអតីត​ឯកអគ្គរាជទូតជប៉ុនប្រចាំកម្ពុជា នឹង​ដឹកនាំ​ប្រតិភូក្រុម​អ្នកវិនិយោគ​ធុន​កណ្តាល​មកកាន់​ព្រះរាជាណាចក្រ​កម្ពុជានាខែ ​មេសាខាងមុខ ​ដើម្បីស្វែងរកឪកាស​វិនិយោគនៅកម្ពុជា៕អត្ថបទ៖ វណ្ណៈ 

កំណើនសេដ្ឋកិច្ចកម្ពុជាឆ្នាំនេះ នឹងសម្រេចអត្រាកំណើនតាមការគ្រោងទុករបស់រាជរដ្ឋាភិបាល

2022/02/02 08:20:02 pm        754
Facebook Telegram Linkin
ភ្នំពេញ៖ អ្នកជំនាញសេដ្ឋកិច្ចលើកឡើងថា សេដ្ឋកិច្ចកម្ពុជាឆ្នាំ២០២២ នឹងងើបទៅទៅរកកំណើនសក្តានុពល ខណៈកម្ពុជាបានពង្រឹងក្បាលម៉ាស៊ីនអូសកំណើនសេដ្ឋកិច្ច ជាពិសេសការទប់ស្កាត់មានប្រសិទ្ធភាពនៃប្រភេទមេរោគថ្មី អូមីក្រុង ទាំងនេះនឹងធ្វើឲ្យកម្ពុជាសម្រេចកំណើនសេដ្ឋកិច្ចតាមការគ្រោងទុកក្នុងអត្រាប្រមាណ ៥,៦%។លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ថ្លែងលើកឡើងក្នុងកិច្ចសម្ភាសន៍ ជាមួយ ភ្នាក់ងារអ្នកយកព័ត៌មាន BTV នៅថ្ងៃទី២ ខែកុម្ភៈ ឆ្នាំ២០២២នេះថា បច្ចុប្បន្នរាជរដ្ឋាភិបាលបានកែសម្រួលជាច្រើន ជាពិសេសការសម្រួលដល់​ពាណិជ្ជកម្ម ការផ្តល់អត្ថប្រយោជន៍ដល់អ្នកវិនិយោគសម្រាប់វិស័យកម្មន្តសាល ការកសាង​ហេដ្ឋាន​រចនាសម្ព័ន្ធសម្រាប់វិស័យទេសចរ ​និងការបើកច្រក រវាងកម្ពុជា-ចិន ដែលជួយជម្រុញដល់វិស័យ​កសិកម្ម និងឧស្សាហកម្មនិងការបើកពាណិជ្ជកម្មកម្ពុជា-កូរ៉េជាដើម។សូមបញ្ជាក់ថា៖ កាលពីពេលថ្មីៗនេះ មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានពិភាក្សា​ជាមួយ​ដៃគូអភិវឌ្ឍន៍រួមមាន៖ ​មូលនិធិ រូបិយវត្ថុអន្តរជាតិ (IMF), ​ធនាគារអភិវឌ្ឍន៍អាស៊ី (ADB), ធនាគារពិភពលោក (World Bank) ​និងកម្មវិធីអភិវឌ្ឍន៍ ​សហប្រជាជាតិ (UNDP) លើស្ថានភាព និង​ទស្សនវិស័យសេដ្ឋកិច្ចសកល តំបន់ និងកម្ពុជា ​និង​ហានិភ័យ​ម៉ាក្រូសេដ្ឋកិច្ច ចម្បងៗ និង​ការ​ឆ្លើយតប​ជាគោលនយោបាយ។សម្រាប់សេដ្ឋកិច្ចកម្ពុជាឆ្នាំ២០២២ ​ត្រូវបានព្យាករថា ​នឹងបន្ត​និន្នាការ​កើនឡើង​ក្នុងរង្វង់ ៥,៦% និង​ឈានជាបណើ្តរៗ​ទៅរកកំណើនសក្តានុពលក្នុងរយៈពេលមធ្យម ​ដែលគាំទ្រដោយ កំណើន​ល្អ​ប្រសើរ នៃតម្រូវការសកល​ និងការកើនឡើងញសន្សឹមៗ ​នូវទំនុកចិត្តវិនិយោគ និងការរំពឹង​ទុក​នូវការ​អនុវត្ត ប្រកប​ដោយប្រសិទ្ធភាពនៃ ក្របខណ្ឌយុទ្ធសាស្រ្ត និងកម្មវិធីស្តារនិងជំរុញ​កំណើន​សេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី ឆ្នាំ ២០២១-២០២៣ ដែល​នឹងស្តារកំណើន​សេដ្ឋកិច្ចកម្ពុជា ឱ្យត្រឡប់ទៅរកកំណើន សក្តានុពល និងពង្រឹងភាព​ធន់នៃសង្គម-សេដ្ឋកិច្ច ដើម្បីឈានទៅ​សម្រេច​បាន​នូវ​ការ​អភិវឌ្ឍ​ប្រកប​ដោយចីរភាព និងបរិយាប័ន្ន៕ អត្ថបទ៖ សុន រ៉ាឌី

ADBអនុម័តជំនួយ ៦,៨លានដុល្លារ ដើម្បីជួយស្តារទេសចរណ៍ និងផលិតកម្មស្រូវនៅកម្ពុជា

2022/02/01 09:19:12 pm        549
Facebook Telegram Linkin
ភ្នំពេញ៖ ធនាគារអភិវឌ្ឍន៍អាស៊ី (ADB) បានអនុម័តកញ្ចប់ជំនួយចំនួន២ ដែលមានតម្លៃសរុប ៦.៨ លានដុល្លារ ដើម្បីជួយស្តារវិស័យទេសចរណ៍ និងផលិតកម្មស្រូវនៅកម្ពុជា ដែលរងការប៉ះពាល់ពីការរាលដាលនៃជំងឺកូវីដ-១៩។ ADB លើកឡើងក្នុងសេចក្តីប្រកាសព័ត៌មានចេញផ្សាយកាលពីថ្ងៃម្សិលមិញនេះថា កញ្ចប់ជំនួយ​ទីមួយមានតម្លៃ ៣.៧ លានដុល្លារ ត្រូវបានគេរំពឹងថា នឹងផ្តល់អត្ថប្រយោជន៍ដល់​ប្រជាសហគមន៍​ចំនួន ៤ ០០០នាក់ តាមរយៈគម្រោងស្តារសហគមន៍​ទេសចរណ៍ ​សម្រាប់ការងើបឡើងវិញ ពីកូវីដ-១៩។ គម្រោងនេះ គ្របដណ្តប់តំបន់ក្បែរប្រាសាទព្រះវិហារ ក្នុងខេត្តព្រះវិហារ និងប្រាសាទ ភ្នំដាក្នុងខេត្តតាកែវ។ សេចក្តីប្រកាសព័ត៌មានដដែល បញ្ជាក់ទៀតថា ថវិកាប្រមាណ ៣ លានដុល្លារនៃជំនួយនេះ ត្រូវបាន​ផ្តល់ដោយមូលនិធិជប៉ុន សម្រាប់ភាពរុងរឿង និងភាពធន់នៅអាស៊ី និងប៉ាស៊ីហ្វិក (the Japan Fund for Prosperous and Resilient Asia and the Pacific) ។ចំណែក​កញ្ចប់​ជំនួយ​មួយទៀត មានតម្លៃ ៣.៩ លានដុល្លារ ដែលការផ្តល់ហិរញ្ញប្បទានបន្ថែម សម្រាប់កម្មវិធីអភិវឌ្ឍន៍វិស័យពាណិជ្ជកម្មស្រូវ ដែលធន់នឹងអាកាសធាតុនៅក្នុងខេត្តបាត់ដំបង កំពង់ធំ និងព្រៃវែង។ កសិករខ្នាតតូច ចំនួន ២២ ០០០នាក់ ​ត្រូវបានរំពឹងថា នឹង​ទទួល​ប្រយោជន៍​ពី​គម្រោងនេះ។ បើតាម ADB ថវិកាប្រមាណ ៣.៨ លានដុល្លារ នៃជំនួយនេះ បានមកពីកម្មវិធីកសិកម្ម និង​សន្តិសុខ​ស្បៀងសកល ដែលជាមូលនិធិសកលមានគោលបំណងកាត់បន្ថយភាពអត់ឃ្លាន និង​កែ​លម្អអាហារូបត្ថម្ភ ​នៅក្នុងប្រទេសដែលមានចំណូលទាប។លោក Anthony Gill នាយកស្តីទីធនាគារអភិវឌ្ឍន៍អាស៊ី ប្រចាំប្រទេសកម្ពុជា ​លើកឡើងថា កញ្ចប់​ជំនួយទីមួយ នឹងជួយសហគមន៍កែលម្អហេដ្ឋារចនាសម្ព័ន្ធទេសចរណ៍ ​និងសេវាកម្ម ​អតិថិជន ដើម្បីទាក់ទាញភ្ញៀវទេសចរកាន់តែច្រើន ​និងជំរុញសេដ្ឋកិច្ចក្នុងតំបន់។ កញ្ចប់ជំនួយទីពីរ នឹងជួយកសិករដំណាំស្រូវនៅកម្ពុជា ​បង្កើនប្រាក់ចំណូល និងភាពធន់​នឹង​អាកាសធាតុ តាមរយៈការដោះស្រាយបញ្ហារំខានផ្នែកដឹកជញ្ជូន ​និងច្រវាក់ផ្គត់ផ្គង់ ដែលបណ្តាលមកពីជំងឺកូវីដ-១៩៕អត្ថបទ៖ វណ្ណៈ

អាជីវករមួយចំនួនបានឈប់សម្រាក ខ្លះចេញដើរកម្សាន្តតាមគោលដៅទេសចរណ៍ អំឡុងថ្ងៃចូលឆ្នាំចិននេះ

2022/02/01 07:57:45 pm        770
Facebook Telegram Linkin
ភ្នំពេញ៖ ថ្ងៃបុណ្យចូលឆ្នាំប្រពៃណីចិន-វៀតណាម បើទោះមិនបានកំណត់យកជាថ្ងៃឈប់សម្រាក តែគេសង្កេតឃើញថា បណ្តាផ្សារលក់ដូរទំនិញមួយចំនួននៅរាជធានីភ្នំពេញ បានបិទទ្វារ ហើយអាជីវករខ្លះលក់តែខាងក្រៅផ្សារ ហើយផ្សារខ្លះទៀតបានបើកដំណើរការធម្មតា ខណៈអាជីវករអ្នកលក់ដូរជាងពាក់កណ្តាល គឺបានបិទហាង បិទតូបឈប់សម្រាក និងមានចេញដើរកម្សាន្តទៅតាមគោលដៅទេសចរណ៍។បើតាមលោក សួន ផានិត អនុប្រធានផ្សារបឹងកេងកង បានថ្លែងប្រាប់BTV នៅថ្ងៃទី១ ខែកុម្ភៈនេះថា នៅថ្ងៃសែនចូលឆ្នាំចិនម្សិលមិញនេះ នៅពេលព្រឹកមានអាជីវករបានប្រមាណជាង៥០% បានមកបើកតូបលក់ដូរធម្មតា រហូតមកដល់ព្រឹកថ្ងៃទី១ ខែកុម្ភៈនេះ គឺមានអាជីវករលក់ដូរប្រមាណ ៨០% បានបិទតូបលក់ដូរទំនិញ ដើម្បីឈប់សម្រាកហើយខ្លះទៀត កំពុងបាន​ចេញដើរកម្សាន្ត​ទៅតាមរមណីយដ្ឋានទេសចរណ៍ និងគោលដៅទេសចរណ៍ជិតឆ្ងាយ ដើម្បីលំហែរកាយ បន្ទាប់ពីគេបានដំណើរការលក់ដូរឥតមានការឈប់សម្រាក​សៅរ៍-អាទិត្យ​ក្នុងរយៈពេល១ឆ្នាំរបស់គេកន្លងមក។លោកបន្តថា ជារួមសម្រាប់ការបើកផ្សារនៅក្នុងកម្រិតតិចតួចនេះ​ យើងក៏ឃើញថា មាន​ចំនួនពលរដ្ឋ​ប្រមាណតែ២០% ប៉ុណ្ណោះគឺបានអញ្ជើញមកផ្សារដើម្បីទិញរបស់របរ ហើយភាគច្រើនគឺមាននៅតែ​នៅ​ក្នុងពេលព្រឹក។នៅក្នុងថ្ងៃបុណ្យចូលឆ្នាំចិននេះ បើយើងក្រឡេកទៅមើលរមណីយដ្ឋានកៀនស្វាយ នៅជិត​ជាយរាជ​ធានី​ភ្នំពេញវិញ គេសង្កេតឃើញថា នៅថ្ងៃសែនម្សិលមិញមិន​មានមនុស្សចេញដើរកម្សាន្ត​នោះទេ ដោយសារគេជាប់រវល់សែន ប៉ុន្តែនៅថ្ងៃនេះចំនួនភ្ញៀវទេសចរមកអង្គុយកម្សាន្តតាមផ្ទះទឹក និងតាមកញ្ចុះ គឺមានចាប់ផ្តើមមានកំរើកបន្តិចឡើងវិញ ហើយគេរំពឹងថានៅថ្ងៃស្អែក ​និងខានស្អែក នឹង​មានភ្ញៀវមកទស្សនារមណីយដ្ឋានកៀនស្វាយកាន់តែច្រើនថែមទៀត។បើតាមឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងថា នៅក្នុង​ឱកាសបុណ្យចូលឆ្នាំចិនឆ្នាំនេះ ​យើងមិនរំពឹងថា តាមគោលដៅទេសចរណ៍នានា​គឺ​មានភ្ញៀវទេសចរ​ច្រើនទៅទស្សនានោះទេ ​ដោយសារឱកាសបុណ្យចូលឆ្នាំចិនឆ្នាំនេះ បាន​ប្រព្រឹត្តិទៅមិនចំនឹងថ្ងៃឈប់សម្រាកចុងសប្តាហ៍។ឯកឧត្តម តុប សុភ័ក បន្តថា ទោះយ៉ាងណាសម្រាប់អាជីវករអ្នកលក់ដូរកាត់សែចិន ដែលបានឈប់​សម្រាក​ពីការប្រកបរបររកស៊ី គឺភាគច្រើនគឺបានដាក់ផែនការចេញដើរកម្សាន្តច្រើន ប៉ុន្តែការដើរ​កម្សាន្តនោះ ភាគច្រើនគេមាននិន្នាការមិនទៅគោលដៅ​ទេសចរណ៍ណាដែលនៅឆ្ងាយពី​លំនៅដ្ឋាន​របស់គេ ​ខណៈដែលការឈប់សម្រាកថ្ងៃចុងសប្តាហ៍​គឺមានបន្ទប់ស្នាក់នៅតាមសណ្ឋាគារ ផ្ទះ​សំណាក់​បានកក់ទុកប្រមាណពី ៧០ទៅ៨០% ជាពិសេសគោលដៅទេសចរណ៍​ធំនៅ​តាម​បណ្តាខេត្ត ហើយភាគច្រើនគេមិនបន្តដើរកម្សាន្តនៅថ្ងៃបុណ្យចូលឆ្នាំចិនទៀតទេ៕អត្ថបទ៖ ស៊ុម សុខជា

ធនាគារពិភពលោកបង្ហាញគន្លឹះមួយចំនួនដល់កម្ពុជា ដើម្បីស្តារសេដ្ឋកិច្ចឡើងវិញ

2022/02/01 07:37:10 pm        493
Facebook Telegram Linkin
ភ្នំពេញ៖ ធនាគារពិភពលោក៖ កម្ពុជាអាចស្តារសេដ្ឋកិច្ចឱ្យមានកំណើនទៀងទាត់ឡើងវិញ បានតាមរយៈការបង្កើនផលិតភាពរបស់ក្រុមហ៊ុន និងពលករ, ពង្រីកពិពិធភាពក្នុងផ្នែកនាំចេញ និងចាត់វិធានការនានាឈានទៅជំរុញការវិនិយោគក្នុងស្រុកថែមទៀត។នៅក្នុងជំនួយស្មារតីមួយ ស្តីពីស្ថានភាពសេដ្ឋកិច្ចរបស់កម្ពុជា កាលពីថ្ងៃទី៣១ ខែមករា ឆ្នាំ២០២២កន្លងទៅ ធនាគារពិភពលោក បានលើកឡើងបន្តថា កម្ពុជាធ្លាប់សម្រេចបានកំណើន​សេដ្ឋកិច្ច​ក្នុងអត្រាជាមធ្យម ៧,៧ភាគរយក្នុងមួយឆ្នាំ ចាប់ពីឆ្នាំ១៩៩៥ ដល់ឆ្នាំ២០១៩ ប៉ុន្តែអត្រានេះ បានស្រុតចុះយ៉ាងគំហុកអស់ចំនួនជាង ១០ភាគរយ ធ្វើឱ្យទំហំសេដ្ឋកិច្ចរួមមាឌអស់ ឬដក ៣,១ភាគរយ ក្នុងឆ្នាំ២០២០ មុននឹងរើបឡើងវិញសន្សឹមៗរហូតបានកំណើន ២,២ភាគរយ​នា​ដំណាច់​ឆ្នាំកន្លងទៅ។ លោកស្រី ម៉ារីយ៉ាម សាលីម (Maryam Salim) ប្រធានគ្រប់គ្រង​នៃធនាគារពិភពលោកប្រចាំ​ប្រទេស​កម្ពុជា មានប្រសាសន៍ថា ការងាកទៅរកគន្លងផ្លូវឆ្ពោះទៅមានកំណើនដោយចរីភាពវិញ ចាំបាច់​ត្រូវការ​របៀប​វារៈកែទម្រង់ប្រកប​ដោយ​មហិច្ឆតា​មួយ ​ដែល​ផ្តោតការយកចិត្តទុកដាក់លើការបង្កើន​សមត្ថភាព​របស់ក្រុមហ៊ុន​ពលករ ​និង​ក្រុមគ្រួសារនៅកម្ពុជា,ពង្រឹង​បទប្បញ្ញត្តិ ដើម្បីឆ្លើយតប​ទៅ​នឹង​សកម្មភាពបំភ្លៃលើទីផ្សារ​ និងកែលម្អបរិយាកាសធ្វើធុរកិច្ច និងការវិនិយោគថែមទៀតទៅលើហេដ្ឋា​រចនាសម្ព័ន្ធដែលទ្រទ្រង់ដល់កំណើនប្រកបដោយគុណភាព។ លោកស្រីបន្តថា ចំណាត់ការគោលនយោបាយរយៈពេលខ្លី និងមធ្យមមួយចំនួន អាច​មាន​ប្រយោជន៍​ដល់​យុទ្ធសាស្ត្រាស្តារសេដ្ឋកិច្ច ដែលនឹងអនុញ្ញាត​ឱ្យកម្ពុជាអាចកសាងសេដ្ឋកិច្ច​បាន​មកវិញកាន់តែរឹងមាំថែមទៀត​នៅក្រោយសម័យ​មានវិបត្តិកូវីដ-១៩។ធនាគារពិភពលោក បានបញ្ជាក់ថា កម្ពុជាមានជម្រើសច្រើនសម្រាប់ដោះស្រាយ​បញ្ហាខ្វះពិពិធកម្ម​ក្នុងសេដ្ឋកិច្ច និងសម្រាប់កសាងឡើងវិញ ឱ្យកាន់តែប្រសើរជាងមុន។ ការវិនិយោគទៅលើធនធានមនុស្ស,ការធ្វើឱ្យការបែងចែកធនធានឱ្យកាន់ តែមានប្រសិទ្ធផល តាមរយៈការកែលម្អសមត្ថភាពស្ថាប័នទីផ្សារ និងការបង្កើនការគ្រប់គ្រងការវិនិយោគ​សាធារណៈទាំង​អស់នេះស្ថិតក្នុងចំណោមជម្រើសដែលអាចជួយជំរុញផលិតភាពក្នុងសេដ្ឋកិច្ច។ ការបង្កើនការរួមចំណែករបស់ខ្លួនទៅក្នុងខ្សែច្រវាក់តម្លៃសាកល, ការបង្កើតតម្លៃបន្ថែម​ក្នុង​វិស័យ​កសិកម្ម និងការពង្រីកភាព​ប្រកួតប្រជែង​នៅក្នុងវិស័យសេវាកម្ម ​ក៏នឹងអាចជួយធ្វើឱ្យ ការនាំចេញ​កាន់តែមានភាពសម្បូវបែបផងដែរ។ សូមបញ្ជាក់ថា ក្នុងប៉ុន្មានឆ្នាំកន្លងទៅថ្មីៗនេ ផលិតផលចំនួន ៥មុខ រួមមានវិស័យកាត់ដេរ, ស្បែកជើង, អង្ករ, ដំឡូងមី និងទេសចរណ៍ មានទំហំ ៨០ភាគរយ នៃទំហំនាំចេញសរុបរបស់កម្ពុជា ប៉ុន្តែនៅក្នុងនោះមានទីផ្សារធំតែ២ប៉ុណ្ណោះគឺសហភាពអឺរ៉ុប ​និងសហរដ្ឋអាមេរិក ​ដែលស្រូបយក ៦៩ភាគរយ នៃ​បរិមាណទំនិញនាំចេញទាំងនោះ៕អត្ថបទ៖ បូរ៉ាវី

អគ្គនាយកដ្ឋានពន្ធដារ ចាប់ផ្តើមត្រួតពិនិត្យការបង់ពន្ធលើមធ្យោបាយដឹកជញ្ជូន

2022/02/01 07:20:29 pm        874
Facebook Telegram Linkin
ភ្នំពេញ៖ ក្រុមការងារចម្រុះរាជធានី-ខេត្ត ដឹកនាំដោយមន្ត្រីពន្ធដារ ចាប់ផ្តើមចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំ ឆ្នាំ២០២១ នៅតាមគោលដៅមួយចំនួនលើកំណាត់ផ្លូវសំខាន់ៗ ចាប់ពីថ្ងៃទី០១ ខែកុម្ភៈ ឆ្នាំ២០២២ នេះតទៅ ។អគ្គនាកយដ្ឋានពន្ធដារ ប្រកាសជូនដំណឹងស្តីពីការចុះត្រួតពិនិត្យការប្រកាសបង់ពន្ធលើមធ្យោបាយ​ដឹកជញ្ជូន និងយានជំនិះគ្រប់ប្រភេទប្រចាំឆ្នាំ២០២១ នៃក្រុមការងារចម្រុះរាជធានី-ខេត្ត ដឹកនាំ​ដោយ​មន្ត្រីពន្ធដារ រួមសហការជាមួយ អាជ្ញាធរមានសមត្ថកិច្ចថ្នាក់ក្រោមជាតិ នឹងចុះត្រួតពិនិត្យ​ការប្រកាស​បង់ពន្ធ​លើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ២០២១ នៅ​តាមគោលដៅមួយចំនួនលើកំណាត់ផ្លូវសំខាន់ៗនៃរាជធានី-ខេត្ត ចាប់ពីថ្ងៃទី ០១ ខែកុម្ភៈ ឆ្នាំ២០២២ នេះតទៅ ។ក្នុងករណីម្ចាស់យានយន្តខកខានមិនបានប្រកាសបង់ពន្ធលើមធ្យោបាយដឹកជញ្ជូន និងយានជំនិះ​គ្រប់ប្រភេទ​ប្រចាំឆ្នាំ២០២១ កន្លងទៅ សូមរួសរាន់ទៅប្រកាសបង់ពន្ធ និងបង់ប្រាក់ពិន័យតាមច្បាប់​ជាធរមាននៅអគ្គនាយកដ្ឋានពន្ធដារ ឬនៅតាមសាខាពន្ធដារខេត្ត-ខណ្ឌ, នៅធនាគារកាណាឌីយ៉ា, ធនាគារអេស៊ីលីដា, ធនាគារវឌ្ឍនៈ, ធនាគារ កម្ពុជាសាធារណៈ, ធនាគារ ជេត្រាស់ រ៉ូយ៉ាល់, ធនាគារស្ថាបនា, ធនាគារប្រៃសណីយ៍កម្ពុជា, ធនាគារវឌ្ឍនៈអាស៊ីចំកាត់ (ABA)។អគ្គនាយកដ្ឋានពន្ធដារ បញ្ជាក់ថា អ្នកបង់ពន្ធក៏អាចបង់តាមរយៈកម្មវិធី “GDT Taxpayer App” ដែលអាចទាញយកចេញពី App Store ចំពោះ iOS ឬ Play Store និង Android សម្រាប់យានយន្តដែលធ្លាប់បានប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ កន្លងមក។ តាមរយៈសេចក្តីជូនដំណឹងនេះ អគ្គនាយកដ្ឋានពន្ធដារមានក្តីសង្ឃឹម និងជឿជាក់យ៉ាងមុតមាំថា ម្ចាស់យានយន្តទាំងអស់ នឹងយកចិត្តទុកដាក់គោរពកាតព្វកិច្ចសារពើពន្ធ និងរួសរាន់​ទៅប្រកាស​បង់ពន្ធបានគ្រប់ៗគ្នា និងបានទាន់ពេលវេលា ស្របតាម បទប្បញ្ញត្តិនៃច្បាប់ ដើម្បីចៀសវាង​នូវ​ក្រុមការងារចម្រុះ រួមសហការជាមួយអាជ្ញាធរមានសមត្ថកិច្ចថ្នាក់ក្រោមជាតិ ធ្វើការ ឃាត់យាន​យន្តតាមដងផ្លូវតម្រូវឱ្យបង់ប្រាក់ពន្ធ ​ដែលនាំឱ្យខកខានពេលវេលា ​និង​កកស្ទះ​ចរាចរណ៍​ធ្វើដំណើរ ដែលអាចកើតមាននូវបាតុភាពអសកម្មដោយប្រការណាមួយជាយថាហេតុ ៕អត្ថបទ៖ សុន រ៉ាឌី

កម្ពុជាជំរុញវិនិយោគិនជប៉ុន លើគម្រោងអភិវឌ្ឍន៍ថាមពលកាបូនទាប និង​ហេដ្ឋា​រចនា​សម្ព័ន្ធ​ថាមពល

2022/01/28 09:16:09 pm        636
Facebook Telegram Linkin
ភ្នំពេញ៖ ក្រសួងរ៉ែ និងថាមពល ទាក់ទាញវិនិយោគិនជប៉ុន ពិចារណា លើគម្រោងវិនិយោគថាមពលស្អាត ឬថាមពលបច្ចេកកាបូនទាប និងគម្រោងវិនិយោគលើការកសាងហេដ្ឋារចនាសម្ព័ន្ធវិស័យថាមពលនៅកម្ពុជា។នេះជាការលើកឡើងរបស់ឯកឧត្តម ស៊ុយ សែម រដ្ឋមន្រ្តីក្រសួងរ៉ែនិងថាមពល ក្នុងជំនួបជាមួយនឹង ឯកឧត្តម មិកកាមិ ម៉ាសាហ៊ីរ៉ូ (Mikami Masahiro) ឯកអគ្គរាជទូតវិសាមញ្ញ និងពេញសមត្ថភាព​នៃ​ជប៉ុនប្រចាំនៅកម្ពុជាកាលពីថ្ងៃម្សិលមិញ។ក្នុងជំនួបខាងលើនេះ​ ឯកឧត្តម ស៊ុយ សែម បញ្ជាក់ពីជំហរនៃបង្កើនការប្រើប្រាស់ប្រភពថាមពល​កកើត​ឡើងវិញ​ និងប្រភពថាមពលផ្សេងទៀត ដែលមិនគ្រោះថ្នាក់ដល់បរិស្ថាន និងការមិនរៀប​ចំ​គម្រោងអភិវឌ្ឍរោងចក្រអគ្គិសនីប្រើធ្យូងថ្មថ្មីបន្ថែមទៀតទេ ក្រៅពីគម្រោងដែលបានសម្រេចរួច​ហើយ​តាំងពីឆ្នាំ២០១៩។បន្ថែមពីនេះ ឯកឧត្តមរដ្ឋមន្ត្រី ក៏បានលើកឡើងអំពីការវិនិយោគរបស់ក្រុមហ៊ុនថាមពលជប៉ុន​នៅ​កម្ពុជាផងដែរ គឺ​គម្រោង​វិនិយោគបន្ថែមម៉ាស៊ីន​ផលិត​អគ្គិសនី​ដើរដោយ​ធ្យូង​ថ្មអានុភាព 135MW ខេត្តព្រះសីហនុ​ និងការផ្តត់ផ្គង់នាឡិកាស្ទង់អគ្គិសនី ក៏ដូចជាគម្រោងបណ្តុះបណ្តាលបច្ចេកទេស​ដែល​ជា​ជំនួយ​ពីភាគីជប៉ុនផងដែរ។ឯកឧត្តមរដ្ឋមន្ត្រី បានស្នើសុំឱ្យឯកឧត្តមឯកអគ្គរាជទូត ជួយផ្សព្វផ្សាយនិងគៀងគរក្រុមហ៊ុន​វិនិយោគ​ជប៉ុន មកកម្ពុជាបន្ថែមទៀតលើគម្រោងអភិវឌ្ឍន៍រោងចក្រអគិ្គសនី និង​គម្រោង​ខ្សែ​បណ្តាញ​បញ្ជូន​អគិ្គសនី ​ក៏ដូចជាបន្តផ្តល់ជំនួយបច្ចេកទេស និងគម្រោងបណ្តុះបណ្តាលបន្ថែមទៀត​ជូនក្រសួង។ជាការឆ្លើយតប​ឯកឧត្តមឯកអគ្គរាជទូត ​មានប្រសាសន៍ថា ស្ថានទូតជប៉ុន មានបំណងស្វែងយល់​អំពី​គម្រោង​អន្តរកាលថាមពល ​និងអព្យាក្រឹត្យកាបូនកម្ពុជា ការបង្កើនការប្រើប្រាស់ប្រភពថាមពល​កកើតឡើងវិញ និងប្រភពថាមពលផ្សេងទៀត​ ដែលមិនគ្រោះថ្នាក់ដល់បរិស្ថាន ជាមួយ​នឹង​ការ​រៀបចំ​គោល​នយោបាយ និងការអភិវឌ្ឍគម្រោងស្តីពីប្រសិទ្ធភាពថាមពល៕ អត្ថបទ៖ វណ្ណៈ

រោងចក្រដំឡើងរថយន្តយីយោ Ford នឹងបើកដំណើរក្នុងខែមេសាខាងមុខ

2022/01/28 08:46:12 pm        37
Facebook Telegram Linkin
ភ្នំពេញ៖ រោងចក្រផ្គុំ និងដំឡើងរថយន្ត យីហោ Ford របស់ក្រុមហ៊ុន RMA Automotive (Cambodia) មានទីតាំងនៅខេត្តពោធិ៍សាត់ នឹងបើកដំណើរការ នៅក្នុងខែមេសា ខាងមុខនេះ ខណៈបច្ចុប្បន្នគម្រោងនៃការរៀបចំបានប្រព្រឹត្តទៅដោយរលូន ទៅតាមផែនការដែលបានគ្រោងទុក។លោក ងន សាំង អគ្គនាយកក្រុមហ៊ុន RMA AUTOMOTIVE (CAMBODIA) បានថ្លែងលើកឡើង​ក្នុង​កិច្ចសម្ភាសន៍ជាមួយភ្នាក់ងារអ្នកយកព័ត៌មាន នៅថ្ងៃទី ២៧ ខែមករា ឆ្នាំ២០២២នេះថា គិតមក​ដល់ពេលនេះ ក្រុមហ៊ុនបានសាងសង់សម្រេចបាន ៨០% រួចហើយ នៅក្នុងឃុំស្នាអន្សា ស្រុកក្រគរ ខេត្តពោធិ៍សាត់ ដោយបច្ចុប្បន្នគម្រោងនេះ បានកំពុងសាងសង់ និងរៀបចំឧបករណ៍នៃការផ្គុំ តម្លើង ដោយប្រព្រឹត្តទៅដោយរលូន តាមផែនការដែលបានគ្រោងទុក នឹងឈានទៅបើកដាក់ឲ្យដំណើរការ​ជាផ្លូវការ នៅក្នុងខែ មេសា ឆ្នាំ ២០២២ ខាងមុខនេះ។លោក ងន សាំង បន្តថា ជុំវិញកិច្ចដំណើរនេះ ចំពោះផ្នែកធនធានមនុស្ស គិតមកដល់ពេលនេះ​ក្រុមហ៊ុន​បាន​ជ្រើសរើស​បុគ្គិលជំនាញ, បុគ្គលិក​ និងកម្មករបម្រើការងារទូទៅ ដោយបាន​បណ្តុះ​បណ្តាល​ជំនាញជូនពួគគាត់ស្ទើរចប់ ១០០%។ ក្រុមហ៊ុន​នឹង​ដំឡើង​រថយន្តពីរម៉ូដែល នៅក្នុងផែនការដំឡើង​ចំនួន ៤ ៥០០ គ្រឿង ដើម្បីឆ្លើយតប​ទៅ​នឹងតម្រូវការប្រើប្រាស់ក្នុងស្រុក ។ លោក បានលើកឡើងបន្តថា ជុំវិញការផ្គុំ និងដំឡើង​រថយន្ត កម្ពុជានឹងទទួលបាន​អត្ថប្រយោជន៍​ជាច្រើនដូចជា៖ លំហូរនៃបច្ចេកវិទ្យាថ្មីៗចូលមកកម្ពុជាសម្រាប់បម្រើការងារទីផ្សារក្នុង ស្រុក ការស្រូបយកវិនិយោគិនថ្មីៗបន្ថែម។ ជាក់ស្តែងមកដល់ពេលនេះ មានក្រុមហ៊ុនផ្សេងៗជាច្រើន មកទំនាក់ទំនងក្នុងការបង្កើតរោងចក្រសម្រាប់ផ្គត់ផ្គង់សម្ភារៈផ្សេងៗ ទៅឲ្យក្រុមហ៊ុន FORD សម្រាប់ការផ្គុំ និងដំឡើង និងសម្រាប់ទីផ្សារនាំចេញរបស់ក្រុមហ៊ុនទាំង នោះផងដែរ។ សូមបញ្ជាក់ថា៖ ជុំវិញការប្រើប្រាស់យានយន្តនៅកម្ពុជា បើតាមរបាយការណ៍ក្រសួងសាធារណការ និងដឹកជញ្ជូនបង្ហាញឲ្យដឹងថាកំណើនរថយន្ត ​និងទោចក្រយានយន្ត ដែលចរាចរណ៍នៅ​តាមដងផ្លូវ​នាពេលបច្ចុប្បន្ន ធៀបនឹងឆ្នាំ១៩៩៨ ចំនួនរថយន្ត មានការកើនឡើងប្រមាណពី ៦,៥ ម៉ឺនគ្រឿង រហូតដល់ ៩២ ម៉ឺនគ្រឿង ចំណែកចំនួនទោចក្រយានយន្តវិញ កើនឡើងប្រមាណពី ២០ ម៉ឺនគ្រឿង រហូតដល់ ៥,២ លានគ្រឿង៕ អត្ថបទ៖ សុន រ៉ាឌី

ក្រុមហ៊ុនកសិកម្មនៅខេត្តក្រចេះ ត្រូវការកម្លាំងពលកម្ម២ម៉ឺននាក់ សម្រាប់​វេចខ្ចប់​ទំនិញ​នាំ​ចេញ​ទៅ​ចិន

2022/01/27 08:20:55 pm        517
Facebook Telegram Linkin
ក្រចេះ៖ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីកន្លងទៅនេះ បានដឹកនាំគណៈប្រតិភូ អញ្ជើញចុះទស្សនកិច្ចពីដំណើរការខ្សែច្រវ៉ាក់ប្រមូលផល និងវេចខ្ចប់នាំចេញ, ចុះសួរសុខទុក្ខកម្មករ និងជំរុញការអនុវត្តគោលនយោបាយជាតិស្តីពីមុខរបរ និងការងារ នៅក្រុមហ៊ុន ថាហ្រ្គីកូ (THAGRICO) នៅខេត្តក្រចេះ។ក្រសួងការងារ និងបណ្តុះបណ្តាលវិជ្ជាជីវៈ កាលពីរាត្រីទី២៦ មករា ឆ្នាំ២០២២កន្លងទៅ បានឲ្យដឹងថា ក្រុមហ៊ុន ថាហ្រ្គីកូ ជាក្រុមហ៊ុនកសិកម្មដ៏ធំមួយវិនិយោគដោយជនជាតិវៀតណាម មានទីតាំងស្ថិតនៅស្រុកស្នួល ខេត្តក្រចេះ ហើយបច្ចុប្បន្ននេះ ក្រុមហ៊ុនកំពុងប្រឈមនឹងកង្វះខាត​កម្លាំងពលកម្មចំនួនប្រមាណ ២ម៉ឺននាក់ ដើម្បីដំណើរការអាជីវកម្មផលិតកម្ម និងការវេចខ្ចប់​ផលិតផល​នាំចេញទៅលក់នៅប្រទេសចិន។តាមការលើកឡើងរបស់តំណាងក្រុមហ៊ុន បានឲ្យដឹងថា ក្រុមហ៊ុនចាប់ផ្ដើមដំណើរការនៅ​ក្នុង​ឆ្នាំ២០១៩។ ផលិតផលកសិកម្មរបស់ក្រុមហ៊ុន រួមមាន៖ ចេក ស្វាយ ខ្នុរ។ ផលិតផលទាំងនេះត្រូវ​បាននាំចេញទៅកាន់ទីផ្សារប្រទេសចិនជាចម្បង។ នៅឆ្នាំ២០២១ ក្រុមហ៊ុន​បាននាំចេញផ្លែឈើ​គ្រប់ប្រភេទចំនួន២០ម៉ឺន ៨ពាន់តោន និងនាំចេញចំនួន ១ម៉ឺនកុងតឺន័រ។ចំពោះប្រាក់ចំណូលរបស់កម្មករវិញទទួលបានចាប់ពី ២៤០ ដល់ ៣០០ដុល្លារ ក្នុងមួយខែ។ជាការឆ្លើយតបសំណើរខាងលើនេះ ឯកឧត្តមបណ្ឌិត អ៊ិត សំហេង បានផ្តល់ណែនាំដល់មន្ទីរការងារ​ខេត្តក្រចេះ ​និងមន្ទីរការងារមួយចំនួនទៀតនៅក្បែរគ្នា ជួយផ្សព្វផ្សាយជ្រើសរើសកម្លាំង​ពលកម្មឲ្យបានគ្រប់តាមតម្រូវការ ក្នុងន័យនេះ ឯកឧត្តមរដ្ឋមន្ត្រី បានស្នើទៅខាងក្រុមហ៊ុនវិញ សូមជួយបណ្តុះបណ្តាល​សមត្ថភាពបន្ថែមដល់កម្មករ ​តាមរយៈធ្វើការបណ្តើរនិងរៀនបណ្តើរ។ មួយវិញទៀតសម្រាប់កម្លាំងពលកម្មជំនាញបរទេស ដែលមានកូតាលើសពី ១០ភាគរយ ក្រុមហ៊ុន​ត្រូវដាក់​សំណើសុំមកក្រសួង ​ដោយបញ្ជាក់ឱ្យបានលម្អិតនូវជំនាញ ឯកទេស វិជ្ជាជីវៈជនបរទេស ដែលមានតម្រូវការ និងមូលហេតុដែលបណ្ដាលឱ្យមាន​តម្រូវ​ការ​ប្រើប្រាស់​ហត្ថពលកម្មបរទេស​លើចំនួន ១០%នេះ។ ទន្ទឹមនេះ ឯកឧត្តម បានឲ្យក្រុមហ៊ុន​អនុវត្តទៅតាម​លក្ខខណ្ឌ​ការងារ ​និងច្បាប់ស្តីពីការងារ​របស់កម្ពុជា​ឲ្យបានល្អប្រសើរ​ ដើម្បីកាត់បន្ថយបាននូវជម្លោះការងារ ឈានទៅរក​សុខដុមនីយកម្ម​ទំនាក់ទំនង​វិជ្ជាជីវៈរវាងកម្មករ និងក្រុមហ៊ុន។ នៅក្នុងឱកាសនេះ ឯកឧត្តមរដ្ឋមន្រ្តីបានវាយតម្លៃខ្ពស់ចំពោះការវិនិយោគរបស់​ក្រុមហ៊ុនមួយនេះ​នៅក្នុងប្រទេសកម្ពុជា ​ជាពិសេសក្នុងតំបន់អភិវឌ្ឍន៍ត្រីកោណ (កម្ពុជា វៀតណាម ឡាវ) ដែលកាល​ពីអតីតកាល ​តំបន់នេះជាតំបន់សង្រ្គាមបង្ហូរឈាមមួយ លុះមកដល់បច្ចុប្បន្ននេះបានប្រែក្លាយ​ជា​តំបន់សន្តិភាព ដែលបានផ្តល់កម្លាំងពលកម្មដល់ប្រជាជននៅក្នុងខេត្តឲ្យមានការងារធ្វើ និង​អាចដោះស្រាយ​នូវជីវភាពបានប្រសើរមួយកម្រិត៕អត្ថបទ៖ ឈិត បូរ៉ាវី 

បណ្ដាញសង្គម

ព័ត៌មានថ្មីៗ

នគរបាលនឹងចាប់អនុវត្តវិធានការច្បាប់ជាថ្មីលើរថយន្តធុនធំ និងការដឹកសំពីងសំពោង នៅដើមសប្តាហ៍ក្រោយ
08/15/2026 03:08 PM
Facebook Telegram Linkin
ពលរដ្ឋជប៉ុនអះអាងថា ព្យុះភ្លៀងជាប់កំណត់ត្រាលែងជារឿងធម្មតាទៀតហើយ
08/15/2026 03:08 PM
Facebook Telegram Linkin
ក្រុមភ្នាក់ងារពន្លត់អគ្គិភ័យ ធ្វើការពេញមួយយប់ ដើម្បីទប់ស្កាត់ភ្លើងឆេះព្រៃនៅទីក្រុង Comoប្រទេសអ៊ីតាលី
08/15/2026 03:08 PM
Facebook Telegram Linkin
តុលាការកំពូលកម្ពុជា វៀតណាម ឡាវ ប្តេជ្ញាពង្រឹងសន្តិសុខតាមព្រំដែន និងទប់ស្កាត់បង្ក្រាប Online Scams
08/15/2026 03:08 PM
Facebook Telegram Linkin
ប្រធានតុលាការកំពូលវៀតណាមវាយតម្លៃខ្ពស់ចំពោះការបង្កើតច្បាប់យ៉ាងខ្លាំងក្លារបស់កម្ពុជា ប្រយុទ្ធប្រឆាំងបទល្មើសឧក្រិដ្ឋកម្មឆ្លងព្រំដែន
08/15/2026 02:08 PM
Facebook Telegram Linkin
ទឹកទន្លេ Danube ស្រកទាបជាប់កំណត់ត្រា ធ្វើឲ្យឃើញបាតទន្លេ និងនាវាជាប់កឿង
08/15/2026 02:08 PM
Facebook Telegram Linkin
ចំនួនអ្នកស្លាប់កើនឡើងដោយភ្លៀងធ្លាក់ខ្លាំងនៅខេត្ត Chiba ប្រទេសជប៉ុន ខណៈបណ្តាលឱ្យលំនៅឋានច្រើនខ្នងលិចទឹក
08/15/2026 02:08 PM
Facebook Telegram Linkin
រដ្ឋលេខាធិការក្រសួងពាណិជ្ជកម្ម លើកទឹកចិត្តវិស័យឯកជនបង្កើនផលិតភាព និងមានភាពអនុលោម ដើម្បីការប្រកួតប្រជែង
08/15/2026 02:08 PM
Facebook Telegram Linkin
លីបង់ ជំរុញឱ្យមានកាលបរិច្ឆេទសម្រាប់ការដកទ័ពរបស់អ៊ីស្រាអែល ខណៈក្រុមហេសបូឡា រិះគន់កិច្ចព្រមព្រៀង
08/15/2026 02:08 PM
Facebook Telegram Linkin
WHO ៖ ការវាយប្រហារប្រហែល ៤លើក លើប្រព័ន្ធថែទាំសុខភាពក្នុង ១ថ្ងៃនៅតំបន់ជម្លោះ អំឡុងឆ្នាំ ២០២៦
08/15/2026 01:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.