BTV NEWS

កម្ពុជា សម្ពោធដាក់ឱ្យប្រើប្រាស់យុទ្ធសាស្រ្តពង្រីក និងពិពិធកម្មទីផ្សានាំចេញអង្ករ ២០២៥-២០៣០

ក្រុមការងារអន្តរក្រសួង (ត្រី-វិស័យ) អញ្ជើញចុះជួបសហគមន៍មូលដ្ឋាន សម្រាប់អនុវត្តអន្តរាគមន៍អន្តរវិស័យកសិកម្ម-ទឹក-ជនបទ

ឯកឧត្តម ស៊ុន ចាន់ថុល អញ្ជើញបើកកម្មវិធីផ្សព្វផ្សាយនិងបណ្តុះបណ្តាលអំពី នីតិវិធីនៃការចុះបញ្ជីគម្រោងវិនិយោគតាមប្រព័ន្ធគ្រប់គ្រងគម្រោងវិនិយោគកម្ពុជា cdcIPM និងការប្រើប្រាស់ហត្ថលេខា និងត្រាអេឡិចត្រូនិក (e-Signature & e-Stamp)

រយៈពេល៧ខែ, កម្ពុជានាំចេញទំនិញទៅសហរដ្ឋអាមេរិក មានទឹកប្រាក់ជិត ៧ពាន់លានដុល្លារ

សេដ្ឋកិច្ច និង កសិកម្ម

ប្រធានាធិបតីបារាំងលោក Macron ចង់ឲ្យឧស្សាហកម្មប្រេងឥន្ធនៈលក់ក្នុងតម្លៃទីផ្សារ

ប្រធានាធិបតីបារាំងលោក Emmanuel Macron បាននិយាយកាលពីថ្ងៃអាទិត្យថា រដ្ឋាភិបាលរបស់លោកនឹងស្នើសុំឧស្សាហកម្មប្រេងឥន្ធនៈលក់ក្នុងតម្លៃលក់តាមទីផ្សារ ហើយនិងផ្តល់ជំនួយ១០០អឺរ៉ូដល់កម្មករក្រីក្របំផុត ដែលត្រូវបើកបរទៅធ្វើការ ដើម្បីកាត់បន្ថយផលប៉ះពាល់ដោយសារអតិផរណាលើគ្រួសារ ។ អំឡុងបទសម្ភាសន៍ជាមួយទូរទស្សន៍បារាំង TF1 និង France 2 លោក Macron បាននិយាយថា នៅសប្តាហ៍នេះនាយករដ្ឋមន្រ្តីនឹងជួបជុំគ្នាជាមួយអ្នកពាក់ព័ន្ធទាំងអស់នៅក្នុងវិស័យប្រេង ហើយពួកយើងនឹងស្នើសុំពួកគេឲ្យធ្វើបែបនេះ ក្នុងតម្លៃលក់ ។ កាលពីដំបូងឡើយរដ្ឋាភិបាលរបស់លោក Macron មានគម្រោងជំរុញអ្នកលក់រាយលក់ប្រេងក្នុងតម្លៃក្រោមទីផ្សារ តាមរយៈការដកចេញបំរាមបណ្តោះអាសន្នលើការធ្វើបែបនេះ ដែលឧស្សាហកម្មប្រេងឥន្ធនៈ បានច្រានចោលទាំងស្រុងថាពួកគេពុំអាចធ្វើបាននោះទេ ។ ដោយឡែក ពាក់ព័ន្ធនឹងតម្លៃទំនិញ លោក Macron និយាយថា រដ្ឋាភិបាលរបស់លោកចង់បានកិច្ចព្រមព្រៀងមួយដើម្បីសម្រាលបន្ទុក ដោយលោកបានចោទប្រកាន់ក្រុមហ៊ុនភាគច្រើននៅតែរក្សាតម្លៃខ្ពស់ បើទោះបីជាមានការធ្លាក់ចុះអតិផរណាក៏ដោយ ។ លោកថា សំណើរនឹងដាក់ជូនក្នុងសប្តាហ៍នេះ ៕

កម្ពុជា-អូស្ត្រាលីដាក់ឱ្យដំណើរការនូវភាពជាដៃគូថ្មីលើវិស័យកែច្នៃចំណីអាហារ

ភ្នំពេញ៖កម្ពុជា និងអូស្ត្រាលី បានប្រកាសដាក់ឱ្យដំណើរការនូវភាពជាដៃគូថ្មីមួយលើវិស័យកែច្នៃចំណីអាហារ ដើម្បីអភិវឌ្ឍន៍ផលិតផលថ្មី ទទួលបានស្តង់ដាសុវត្ថិភាពចំណីអាហារ និងពង្រីកទីផ្សារ ដែលមានគោលដៅគាំទ្រដល់ សហគ្រាសធុនតូច និងមធ្យមកម្ពុជា។សេចក្តីប្រកាសព័ត៌មាន លើកឡើងថា ភាពជាដៃគូនេះ ត្រូវបានដាក់ឱ្យដាក់អនុវត្ត ដោយលោក ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរ ជាមួយលោក ចាស្ទីន វ៉ាយអេត ឯកអគ្គរដ្ឋទូតអូស្រ្តាលីប្រចាំកម្ពុជា សម្រាប់ការអភិវឌ្ឍសេដ្ឋកិច្ចប្រកបដោយភាពធន់។គំនិតផ្តួចផ្តើមនេះ ក៏នឹងសហការជាមួយវិទ្យាស្ថានបច្ចេកវិទ្យាកម្ពុជា សាកលវិទ្យាល័យភូមិន្ទកសិកម្ម សាកលវិទ្យាល័យជាតិបាត់ដំបង និងវិទ្យាស្ថានបច្ចេកវិទ្យាកំពង់ស្ពឺ។ភាពជាដៃគូនេះ ផ្តោតលើ មូលនិធិកែច្នៃចំណីអាហារ គឺផ្ដល់ការគាំទ្រផ្នែកហិរញ្ញវត្ថុដល់សហគ្រាសធុនតូច និងមធ្យម ដើម្បីបង្កើតផលិតផលថ្មី ពង្រីកទីផ្សាររបស់ពួកគេ ឬបំពេញតាមស្ដង់ដាសុវត្ថិភាពចំណីអាហារ និង វិស័យសេវាកម្មកែច្នៃចំណីអាហារ គឺជួយដល់សហគ្រាសធុនតូច និងមធ្យមក្នុងការទទួល បានសេវាម្ហូបអាហារ និងបច្ចេកវិទ្យា ដូចជាការកែច្នៃចំណីអាហារ បច្ចេកវិទ្យា ព័ត៌មានទីផ្សារ ម៉ាកយីហោ និងការវេចខ្ចប់។ ភាពជាដៃគូនេះ ក៏នឹងគាំទ្រដល់កម្មវិធីថ្នាក់ជាតិស្តីពីការកែច្នៃកសិ-ចំណីអាហារ គឺការប្រមូលផ្ដុំសហគ្រាសធុនតូច និងមធ្យម អ្នកស្រាវជ្រាវ និងអ្នកពាក់ព័ន្ធផ្សេងទៀត ដើម្បីចែករំលែកចំណេះដឹង និងគំនិតអំពីការកែច្នៃចំណីអាហារ។ លោក ចាស្ទីន វ៉ាយអេត បានអះអាងថា អូស្ត្រាលី ប្តេជ្ញាគាំទ្រ ដល់ការអភិវឌ្ឍវិស័យកសិ-ចំណីអាហារឱ្យមានភាពរស់រវើក ដែលអាចរួមចំណែកទៅដល់ការរីកលូតលាស់នូវសេដ្ឋកិច្ចប្រកបដោយភាពធន់ បរិយាប័ន្ន និងនិរន្តរភាពនៅប្រទេសកម្ពុជា។ ជាមួយគ្នានេះ ឈៀង វណ្ណមុនិណ្ឌ បានលើកឡើងថា ការអភិវឌ្ឍវិស័យកសិ-ចំណីអាហារនេះ ស្របតាមចក្ខុវិស័យ និងបេសកកម្មរបស់សហគ្រិនខ្មែរ ក្នុងការពង្រីកសក្តានុពលទីផ្សារសម្រាប់សហគ្រាសធុនតូច និងមធ្យម ទាំងក្នុងស្រុក និងក្រៅស្រុក។ នាយកប្រតិបត្តិនៃសហគ្រិនខ្មែរ បញ្ជាក់ថា មូលនិធិខាងលើនេះ នឹងជួយលើកកម្ពស់សហគ្រាសធុនតូច និងមធ្យមនៅកម្ពុជា រួមទាំងផ្តល់ឱ្យពួកគេនូវធនធាន ដែលពួកគេត្រូវការដើម្បីទទួលបានជោគជ័យ៕អត្ថបទ៖ វណ្ណៈ

កម្ពុជាកំពុងទាក់ទាញឧស្សាហកម្មធុនមធ្យម និងធុនធ្ងន់សម្រាប់ជំរុញកំណើនសេដ្ឋកិច្ច

ភ្នំពេញ៖ កម្ពុជាបានកំពុងផ្លាស់ប្តូររបត់វិស័យឧស្សាហកម្ម ទៅជាឧស្សាហកម្មដែលមានតម្លៃបន្ថែមខ្ពស់ និងឧស្សាហកម្មបៃតង ជាពិសេសការស្រូបយកឧស្សាហកម្មធុនមធ្យម និងធុនធ្ងន់ជាបណ្តើរៗ សម្រាប់បម្រើដល់វិស័យសេដ្ឋកិច្ចជាតិ។អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា លើកឡើងក្នុងកិច្ចសម្ភាសជាមួយភ្នាក់ងារអ្នកយកព័ត៌មាន BTV ស្តីពីការវិនិយោគ និងការផ្លាស់ប្តូរវិស័យឧស្សាហកម្មសម្រាប់កំណើនសេដ្ឋកិច្ចនេះថា សេដ្ឋកិច្ចកម្ពុជាបានរំពឹងលើកឧស្សាហកម្មកាត់ដេរ និងឧស្សាហកម្មកម្មាន្តសាលមិនមែនកាត់ដេរ តែមកដល់ពេលនេះ កម្ពុជាបានកំពុងផ្លាស់ប្តូរជាបណ្តើរៗ នៃការចាប់យកវិស័យឧស្សាហកម្មធុនមធ្យម និងធុនធ្ងន់ សម្រាប់ជំរុញកំណើនសេដ្ឋកិច្ច ជំនួសដល់វិស័យមួយចំនួនដែលមានកំណើនទាប។អ្នកឧកញ៉ា បន្តថា ជុំវិញការផ្លាស់ប្តូររបត់ទៅរកការរីកចម្រើននេះ កម្ពុជាបានកំពុងធ្វើពិពិធកម្មសេដ្ឋកិច្ច និងការប្រកួតប្រជែងជាបន្តបន្ទាប់ ជាក់ស្តែងមកដល់ពេលនេះ ឧស្សហកម្មធុនមធ្យម និងធុនធ្ងន់មួយចំនួន បានកំពុងដំណើរការមានដូចជា ឧស្សាហកម្មផ្គុំ និងដំឡើងរថយន្ត, រោងចក្រផលិតសំបកកង់រថយន្ត, រោងចក្រផលិតដែក, និងរោងចក្រផលិតគ្រឿងបរិក្ខាអគ្គិសនីជាដើម ហើយចាប់ពីពេលនេះតទៅ កម្ពុជានិងស្រូបយកឧស្សាហកម្មមធ្យម និងធុនធ្ងន់បានកាន់តែច្រើនថែមទៀត សម្រាប់បង្កើនមូលដ្ឋានគ្រឹះដល់សេដ្ឋកិច្ចជាតិឲ្យកាន់តែរឹងមាំ។ក្រុមប្រឹក្សាអភិវឌ្ឍន៍កម្ពុជា (CDC) ក្នុងមួយឆ្នាំៗ កម្ពុជាទទួលបានការចុះបញ្ជីលើគម្រោងវិនិយោគជាច្រើន ជាក់ស្តែងថ្មីនេះ, CDC ទទួលបានគម្រោងបង្កើតរោងចក្រផលិតដែកគ្រប់ប្រភេទ វិនិយោគស្ថិតនៅក្នុងតំបន់សេដ្ឋកិច្ចពិសេស កំពង់ផែក្រុងព្រះសីហនុ មានទុនវិនិយោគចំនួន ៤០លានដុល្លារអាម៉េរិក, រោងចក្រផលិតអំពូលភ្លើង, ខ្សែកាប, គ្រឿងបង្គុំ អេឡិកត្រូនិកធ្វើពីប្លាស្ទិក និងរោងចក្រផលិតសំបកកង់រថយន្តជាដើម។ ទាក់ទងឿស្សាហកម្មនេះធុនធ្ងន់នេះ, ហ៊ុន RMA (Cambodia) ថ្មីៗនេះ ក៏បានប្រកាសពីការផ្គុំ ដំឡើងរថយន្ត ទៅផលិតរថយន្តផងដែរ។សូមបញ្ជាក់ថា យុទ្ធសាស្រ្តបញ្ចាកោណដំណាក់កាលទី ១ របស់រាជរដ្ឋាភិបាលអាណត្តិទី ៧ នៃរដ្ឋសភា ក្នុងបញ្ចាកោណទី២ រាជរដ្ឋាភិបាលនិងជំរុញធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែង ព្រោះកិច្ចការនេះ សម្រាប់ជាមូលដ្ឋានគាំទ្រកំណើន ប្រកបដោយចីរភាព និងភាពធន់ក្នុងរយៈពេលវែង និងខ្លី តាមរយៈការពង្រីកមូលដ្ឋានផលិតកម្ម, បង្កើនតម្លៃបន្ថែម, ការតភ្ជាប់ច្រវាក់ផលិតកម្ម និងផ្គត់ផ្គង់សកល, ព្រមទាំងការទាក់ទាញ និងជំរុញការវិនិយោគលើឧស្សហកម្មថ្មីៗ ដែលកំពុងលេចធ្លោ៕អត្ថបទ៖ សុន រ៉ាឌី

តំណាងសហគ្រាសជាង១០០នាក់ ស្វែងយល់អំពីកាតព្វកិច្ចគណនេយ្យនិងសវនកម្ម

ភ្នំពេញ៖ និយ័តករគណនេយ្យ និងសវនកម្ម នៃអាជ្ញាធរសេវាមិនមែនធនាគារ បានធ្វើការផ្សព្វផ្សាយស្តីពី កាតព្វកិច្ចគណនេយ្យនិងសវនកម្ម និងបទប្បញ្ញតត្តិពាក់ព័ន្ធ ដល់សមាជិករបស់សមាគមផលិតផលធ្វើដំណើរ និងស្បែកនៅកម្ពុជា និងសមាជិករបស់សមាគមស្បែកជើងកម្ពុជា ដែលមានសិក្ខាកាមចូលរួមដោយផ្ទាល់ និងតាមប្រព័ន្ធអនឡាញសរុបចំនួនប្រមាណជាង ១៦០នាក់។នៅក្នុងពិធីបើកសិក្ខាសាលាផ្សព្វផ្សាយ កាលពីរសៀលថ្ងៃទី២១ កញ្ញា ឆ្នាំ២០២៣នេះ ឯកឧត្តម សេង តុលា អគ្គនាយករង នៃនិយ័តករគណនេយ្យ និងសវនកម្ម បានមានប្រសាសន៍ថា វិស័យគណនេយ្យនិងសវនកម្ម គឺជាវិស័យមួយដែលមានសារៈសំខាន់ក្នុងការទ្រទ្រង់ ការពារ គាំពារ និងលើកស្ទួយការវិនិយោគធុរកិច្ច តាមរយៈការកសាងហេដ្ឋារចនាសម្ព័ន្ធហិរញ្ញវត្ថុ និងប្រព័ន្ធគណនេយ្យមួយដែលរឹងមាំ និងអាចជឿទុកចិត្តបាន ដែលផ្តោតចេញពីការកសាងមូលដ្ឋានគ្រឹះសម្រាប់ការចុះបញ្ជីការគណនេយ្យ ការរៀបចំរបាយការណ៍ហិរញ្ញវត្ថុស្របតាមស្តង់ដារគណនេយ្យជាធរមាន និងការដាក់របាយការណ៍ហិរញ្ញវត្ថុឲ្យរងសវនកម្មឯករាជ្យតាមលក្ខខណ្ឌកំណត់ដោយច្បាប់។ លោកបានឲ្យដឹងទៀតថា ក្នុងរយៈពេល ៣ឆ្នាំក្រោយនេះ និយ័តករគណនេយ្យនិងសវនកម្ម បានចាត់វិធានការយ៉ាងម៉ឹងម៉ាត់ ដើម្បីពង្រឹងអនុលោមភាពនៃច្បាប់ ដោយផ្តើមចេញពីការអនុវត្តអនុលោមភាពគិត្តយុត្តិ និងពុំទាន់បានគិតទៅដល់អនុលោមភាពផ្នែកបច្ចេកទេសស៊ីជម្រៅនៅឡើយទេ។ លទ្ធផលបានបង្ហាញថា មានសមាជិកសមាគមស្បែកជើងមួយចំនួនបានចូលរួមអនុវត្តកាតព្វកិច្ចគណនេយ្យ និងសវនកម្ម និងមានសមាជិកសមាគមមួយចំនួនទៀត បានទទួលរងពិន័យរួចហើយដែរ។ទាក់ទិនសិក្ខាសាលានេះ លោកឧកញ៉ា លឹម តុង ប្រធានសមាគមផលិតផលធ្វើដំណើរ និងស្បែកនៅកម្ពុជា បានលើកឡើងរៀបចំឡើងក្នុងគោលបំណង ដើម្បីឲ្យសមាជិកសមាគមបានសិក្សាស្វែងយល់បន្ថែមអំពីខ្លឹមសារនៃបទប្បញត្តិ និងស្តង់ដារបច្ចេកទេសសម្រាប់ជាមូលដ្ឋានក្នុងការអនុវត្តកាតព្វកិច្ចគណនេយ្យនិងសវនកម្មជាធរមាន។សូមបញ្ជាក់ថា អនុលោមតាមច្បាប់ស្តីពីគណនេយ្យនិងសវនកម្ម កាតព្វកិច្ចជាសារវត្តមានចំនួន៣ ត្រូវបានបង្កើតឡើងសម្រាប់សហគ្រាស មានដូចជា៖ កាតព្វកិច្ចកាន់បញ្ជីគណនេយ្យ, កាតព្វកិច្ចរៀបចំរបាយការណ៍ហិរញ្ញវត្ថុស្របតាមស្តង់ដាជាធរមាន និងកាតព្វកិច្ចដាក់របាយការណ៍ហិរញ្ញវត្ថុឱ្យរងសវនកម្មឯករាជ្យ ស្របតាមលក្ខខណ្ឌកំណត់៕

ក្រុមហ៊ុនចម្រាញ់រ៉ែមាស រឺនីសង់ បង់ពន្ធសួយសារ និងពន្ធអាករផ្សេងៗជាង ៣៥ លានដុល្លារ

ភ្នំពេញ៖ ក្រុមហ៊ុនរ៉ែមាសចម្រាញ់ រឺនីសង់ មីណ័ររ៉ល (Renaissance Minerals) មកពីប្រទេសអូស្ត្រាលី បានបង់ពន្ធសួយសារ និងអាករជូនរដ្ឋលើស ៣៥ លានដុល្លារអាមេរិក ក្នុងមួយឆ្នាំៗ និងផ្តល់ការងារប្រមាណ ៦០០ កន្លែងដល់ប្រជាជនកម្ពុជា ។ ឯកឧត្តម កែវ រតនៈ រដ្ឋមន្រ្ដីនៃក្រសួងរ៉ែ និងថាមពល នៅក្នុងជំនួបសម្ដែងការគួរសម និងពិភាក្សាការងារជាមួយ ឯកឧត្តម ឆើតគៀត អាត់ថាកន (Cherdkait Atthakor) ឯកអគ្គរាជទូតថៃប្រចាំនៅព្រះរាជាណាចក្រកម្ពុជា នៅថ្ងៃទី ១៩ ខែ កញ្ញា ឆ្នាំ ២០២៣ នេះ ក្រុមហ៊ុន រឺនីសង់ មីណ័ររ៉ល (Renaissance Minerals) ជាក្រុមហ៊ុនរបស់អូស្ត្រាលី ដែលទទួលបានអាជ្ញាបណ្ណរុករករ៉ែមាសពីក្រសួងរ៉ែ និងថាមពល, បច្ចុប្បន្នក្រុមហ៊ុនមួយនេះ កំពុងអនុវត្តទៅតាមគម្រោងផែនការ និងប្រព្រឹត្តទៅដោយលូន នៅក្នុងអាជីវកម្មរបស់ខ្លួន ។ជុំវិញសាវតានៃក្រុមហ៊ុមួយននេះ, ក្រុមហ៊ុន រឺនីសង់ មីណ័ររ៉ល Renaissance Minerals ទទួលបានអាជ្ញាបណ្ណរុករករ៉ែមាសពីក្រសួងរ៉ែ និងថាមពល ស្ថិតនៅក្នុងតំបន់អូរខ្វាវ ក្នុងស្រុកកែវសីមា ខេត្តមណ្ឌលគីរី និងជាក្រុមហ៊ុនទី១ ខ្នាតអន្ដរជាតិ ដែលបានចាប់ផ្ដើមបើកសម្ពោធដាក់ឲ្យដំណើរការជាផ្លូវការ លើប្រតិបត្តិការអាជីវកម្ម និងរោងចក្រចម្រាញ់រ៉ែមាស កាលពីថ្ងៃទី ២១ ខែ មិថុនា ឆ្នាំ២០២១ និងជាក្រុមហ៊ុនផលិតមាសជាលើកដំបូងនៅប្រទេសកម្ពុជាផងដែរ។សូមបញ្ជាក់ថា ជុំវិញការធ្វើអាជីវកម្មរ៉ែមាសនេះ បើតាមរបាយការណ៍របស់ក្រសួងរ៉ែ និងថាមពល គិតត្រឹមឆ្នាំ ២០២២ កម្ពុជាមានក្រុមហ៊ុនដែលកំពុងធ្វើអាជីវកម្មរ៉ែមាសទាំង ៤ រួមមាន៖ Renaissance Minerals មានទីតាំងធ្វើអាជីវកម្មនិងចម្រាញ់មាស ស្ថិតនៅតំបន់អូរខ្វាវ ឃុំចុងផ្លាស់ ស្រុកកែវសីមា ខេត្តមណ្ឌលគីរី, ក្រុមហ៊ុន Xinshan Industrial Cambodia តំបន់ភ្នំម្លុង ឃុំរមទម ស្រុករវៀង ខេត្តព្រះវិហារ, ក្រុមហ៊ុន Xing Yuan Kanng Yeak នៅតំបន់អូរខ្លិកខ្លក់ ស្រុកសំបូរ ខេត្តក្រចេះ, និងក្រុមហ៊ុន Delcom Kampuchea មានទីតាំងនៅតំបន់ភ្នំអន្លុង ស្រុករវៀង ខេត្តព្រះវិហារ៕អត្ថបទ៖ សុន រ៉ាឌី

កម្ពុជាចុះហត្ថលេខា នាំផ្លែដូងស្រស់ទៅចិន ខណៈកម្ពុជា មានផ្ទៃដីដាំដុះដំណាំដូងប្រមាណ១ម៉ឺន៧ពាន់ហិកតា

ភ្នំពេញ៖ ពិធីសារស្ដីពីលក្ខខណ្ឌតម្រូវភូតគាមអនាម័យសម្រាប់ការនាំចេញផ្លែដូងស្រស់ពីកម្ពុជា ទៅកាន់ប្រទេសចិន ត្រូវបានចុះហត្ថលេខាដោយក្រសួងកសិកម្មរុក្ខាប្រមាញ់ និងនេសាទ ជាមួយអគ្គរដ្ឋបាលគយយចិន កាលពីថ្ងៃទី១៥ កញ្ញា កន្លងទៅ។ នេះបើតាមលោកជំទាវ អ៊ឹម រចនា អ្នកនាំពាក្យក្រសួងកសិកម្ម។ លោកជំទាវបន្តថា នៅពេលសម្រេចបានពិធីសារនេះហើយ កម្ពុជាត្រូវធ្វើការជាមួយប្រជាកសិករធ្វើយ៉ាងណាឱ្យពួកគាត់ដាំដុះផ្លែដូង ស្របទៅតាមស្តង់ដាអនាម័យ និងភូតគាមអនាម័យ កំណត់ដោយរដ្ឋបាលគយចិន។លោកជំទាវថ្លែងថា ទន្ទឹមគ្នានេះដែរ អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានចាប់ផ្ដើមជូនដំណឹងដល់ម្ចាស់ចម្ការដូង សហគមន៍កសិកម្មដូងក្រអូប និងម្ចាស់កែច្នៃ និងវេចខ្ចប់ផ្លែដូងស្រស់ ដែលមានបំណងផលិតនិងកែច្នៃវេចខ្ចប់ផ្លែដូងស្រស់ទៅកាន់ទីផ្សារប្រទេសចិន សូមរួសរាន់ដាក់ពាក្យស្នើសុំចុះបញ្ជីចម្ការ និងរោងចក្រកែច្នៃនិងវេចខ្ចប់ផ្លែដូងស្រស់សម្រាប់នាំចេញទៅកាន់ប្រទេសចិន។លោកជំទាវ បញ្ជាក់ថា អគ្គនាយកដ្ឋានកសិកម្ម នឹងចាត់មន្ដ្រីជំនាញចុះវាយតម្លៃស្របតាមនីតិវិធីបច្ចេកទេសដូចមានចែងនៅក្នុងពិធីសារ មុននឹងបញ្ជូនបញ្ជីឈ្មោះចម្ការ និងរោងចក្រកែច្នៃវេចខ្ចប់ផ្លែដូងស្រស់ទៅកាន់ភាគីចិន នៅដើមខែធ្នូ ឆ្នាំ២០២៣ខាងមុខ ដើម្បីភាគីចិនពិនិត្យ និងវាយតម្លៃបញ្ចប់ មុននឹងឈានដល់ការនាំចេញជាផ្លូវការ។សូមបញ្ជាក់ដែរថា គិតត្រឹមឆ្នាំ២០២២ នៅប្រទេសកម្ពុជាសព្វថ្ងៃ មានផ្ទៃដីដាំដុះដំណាំដូងចំនួន ១ម៉ឺន៧ពាន់ហិកតា ក្នុងនោះ ផ្ទៃដីប្រមូលផលមានចំនួន ១ម៉ឺន៤ពាន់ហិកតា។ ចំណែកទិន្នផលសរុបនៅក្នុងឆ្នាំ២០២២ នៅទូទាំងប្រទេស មានចំនួនសរុប ២៤ម៉ឺន៨ពាន់តោន៕

រាជរដ្ឋាភិបាលដោះស្រាយកង្វល់វិស័យឯកជនសំដៅលើកកម្ពស់ការធ្វើធុរកិច្ច និងប្រកួតប្រជែងស្មើភាពគ្នា

ភ្នំពេញ៖ កិច្ចប្រជុំការងារក្រុម “ឃ” ផ្នែកនីតិកម្ម ពន្ធដារ និងអភិបាលកិច្ច បានដោះស្រាយសំណូមពរ និងធ្វើការបំភ្លឺចំពោះកង្វល់ដែលវិស័យឯកជនជួបប្រទះ និងការស្វែងរកដំណោះស្រាយសមស្រប យុត្តិធម៌ សំដៅលើកកម្ពស់បរិយាកាសវិនិយោគ និងធុរកិច្ចដែលមានការប្រកួតប្រជែងស្មើភាពគ្នា ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាសហប្រធានក្រុមការងារផ្នែកនីតិកម្ម ពន្ធដារ និងអភិបាលកិច្ច “ក្រុម ឃ” (តំណាងរាជរដ្ឋាភិបាល) និងលោក អានូដ ដាក (Arnaud Darc) សហប្រធាន “ក្រុម ឃ” (ខាងផ្នែកឯកជន) នៅថ្ងៃទី ១៨ ខែកញ្ញា នេះបានដឹកនាំកិច្ចប្រជុំ “ក្រុម ឃ” ក្នុងគោលបំណងពិនិត្យ និងពិភាក្សាលើបញ្ហាប្រឈម និងស្តាប់សំណូមពរ ដើម្បីដាក់ចេញវិធានការបន្តដោះស្រាយឱ្យបានសមស្របជូនវិស័យឯកជន វិនិយោគិន និងធុរជននៅក្នុងប្រទេសកម្ពុជា ។ ជុំវិញកិច្ចប្រជុំនេះដែរ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្រ្តី បានអនុញ្ញាតឱ្យមានការពិភាក្សាដោយបើកចំហរ រវាងភាគីវិស័យឯកជន និងរាជរដ្ឋាភិបាល លើបញ្ហាប្រឈម កង្វល់ និងសំណូមពររបស់វិស័យឯកជន, ហើយកិច្ចប្រជុំនេះដែរ ក៏បានពិភាក្សាលើរបៀបវារៈមួយចំនួនរួមមាន៖ ការអនុវត្តពន្ធអាករលើតម្លៃបន្ថែមលើផលិតផលបារីនាំចូល, ពាណិជ្ជកម្មខុសច្បាប់, សិទ្ធិផ្តាច់មុខ និងការនាំចូលរថយន្តម៉ូដែលចុងក្រោយស្ថិតក្រោមសិទ្ធិផ្តាច់មុខ, ការធ្វើបច្ចុប្បន្នភាពព័ត៌មានរបស់អ្នកជាប់ពន្ធតូច ឬសហគ្រាសដែលប្តូរទ្រង់ទ្រាយពីរបបម៉ៅការ, និងការបញ្ចូលភាគហ៊ុននិកបន្ថែមរបស់អ្នកជាប់ពន្ធតូច ឬសហគ្រាសដែលប្តូរទ្រង់ទ្រាយពីរបបម៉ៅការ និងសហគ្រាសឯកបុគ្គល ។ កិច្ចប្រជុំក៏បានពិភាក្សាលើការស្នើសុំរៀបចំ “សៀវភៅ ស” ដែលជាការចងក្រងនូវកំណត់ហេតុបូកសរុប និងការសម្រេចរបស់អង្គប្រជុំមុនៗផងដែរ ។ជាលទ្ធផល, អង្គប្រជុំបានដោះស្រាយសំណូមពរ និងធ្វើការបំភ្លឺចំពោះកង្វល់ដែលវិស័យឯកជនបានលើកឡើង និងបានស្នើឲ្យក្រ សួង-ស្ថាប័នពាក់ព័ន្ធ រៀបចំដាក់ចេញនូវវិធានការយន្តការសមស្រប សម្រាប់ដោះស្រាយតាមសមត្ថកិច្ច និងភារកិច្ចរៀងខ្លួនៗ ដើម្បីស្វែងរកដំណោះស្រាយសមស្រប យុត្តិធម៌ សំដៅលើកកម្ពស់បរិយាកាសវិនិយោគ និងធុរកិច្ចដែលមានការប្រកួតប្រជែងស្មើភាពគ្នា តម្លាភាព ព្រមទាំងរក្សាបាននូវការអនុវត្តច្បាប់ និងបទប្បញ្ញាត្តិ ដែលមានជាធរមាន៕អត្ថបទ៖ សុន រ៉ាឌី

សម្ដេចធិបតី ហ៊ុន ម៉ាណែត ជំរុញឱ្យក្រសួងពាក់ព័ន្ធគិតគូរលើការនាំចេញផលិតផលកសិកម្ម

តាកែវ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ណែនាំដល់ក្រសួងសេដ្ឋកិច្ច និងហិរញ្ញវត្ថុ និងក្រសួងសិកម្មរុក្ខាប្រមាញ់ និងនេសាទ រួមនឹងភាគីពាក់ព័ន្ធត្រូវគិតគូរអំពីក្របខណ្ឌ ក្នុងការជំរុញការនាំចេញផលិតផលកសិកម្មរបស់កម្ពុជាទៅកាន់ទីផ្សារក្រៅប្រទេស ខណៈបច្ចុប្បន្នកម្ពុជាកំពុងមានទីផ្សារនាំចេញច្រើនទៅកាន់ប្រទេសនានា ប៉ុន្ដែអ្វីដែលត្រូវពង្រឹងបន្ថែមគឺផលិផលសម្រាប់នាំចេញ។សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងបញ្ជាក់បែបនេះ ក្នុងឱកាសអញ្ជើញចុះជួបសំណេះសំណាលជាមួយកម្មករ និយោជិត តាមរោងចក្រ សហគ្រាសជិត ២ ម៉ឺននាក់ មកពីរោងចក្រ សហគ្រាសចំនួន ១៨ ដែលមានមូលដ្ឋាននៅក្នុងស្រុកបាទី ខេត្តតាកែវ នាព្រឹកថ្ងៃទី១៩ ខែកញ្ញានេះ។សម្ដេចធិបតី បានផ្ដល់គោលការណ៍ទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុរួចហើយ ក្នុងការគិតគូរអំពីក្របខណ្ឌការជំរុញការនាំចេញផលិតផលកសិកម្មរបស់កម្ពុជាទៅកាន់ទីផ្សារអន្តរជាតិនានានេះ។ ក្នុងនោះ សម្ដេចនាយករដ្ឋមន្រ្ដីបានដាក់ទិសដៅឱ្យធ្វើការសាកល្បងដំបូងលើផលលិផលស្រូវអង្កររបស់កម្ពុជា។សម្ដេចធិបតី ហ៊ុន ម៉ាណែត ក៏បានដាក់ចេញនូវគោលការណ៍ឱ្យមានការប្រជុំជាបន្ទាន់រវាងក្រសួង-ស្ថាប័នពាក់ព័ន្ធជាមួយនឹងវិស័យឯកជនត្រូវសហការគ្នារកវិធីសាស្រ្ដឱ្យមានប្រសិទ្ធភាព ជាសំឡេងមួយ ជាយុទ្ធសាស្រ្ដមួយជាផែនការសកម្មភាពមួយលើការនាំចេញផលិតផលកសិកម្មរបស់កម្ពុជានេះ៕អត្ថបទ៖ វ៉ន ដារ៉ា

ទីផ្សារនាំចេញផ្លែមៀនកម្ពុជាមានស្ថិរភាពល្អទាំងតម្លៃ និងកំណើននៃការនាំចេញ

ភ្នំពេញ៖ អ្នកនាំចេញផ្លែមៀនស្រស់ រំពឹងថា ការនាំចេញផ្លែមៀនរបស់កម្ពុជាទៅកាន់ទីផ្សារចិន និងអាចជួយដល់ស្ថិរភាពតម្លៃ, ការរក្សាកំណើននៃការនាំចេញ,ការលើកទឹកចិត្តដល់កសិករអ្នកដាំដុះ និងការលើកកម្ពស់ផលិតភាពភាពនៃការនាំចេញកសិផលរបស់កម្ពុជាផងដែរ។លោកស្រី ច្រាន់ ប៉ុន្នី អគ្គនាយិការក្រុមហ៊ុន Season Fresh ដែលនាំចេញផ្លែមៀនស្រស់របស់កម្ពុជា ទៅកាន់ទីផ្សារចិន លើកឡើងក្នុងកិច្ចសម្ភាសន៍ជាមួយសារព័ត៌មានស្តីពីការដាំដុះ និងការនាំចេញផ្លែមៀនស្រស់របស់កម្ពុជាថា ទីផ្សាររបស់កម្ពុជាពីមុន ភាគច្រើននាំចេញទៅកាន់ទីផ្សារប្រទេសថៃ ហើយក្នុងនោះថៃ និងធ្វើការនាំចេញទៅកាន់ប្រទេសទី៣ជាបន្តទៀត ដែលការនំាចេញរបៀបនេះ ធ្វើឲ្យកសិករច្រើនជួបបញ្ហាទីផ្សារ លើការលក់កសិផលរបស់ពួកគាត់។លោកស្រី បន្តថា បន្ទាប់ពីកម្ពុជាបានសិទ្ធនាំចេញទៅកាន់ប្រទេសចិនផ្ទាល់ តាមរយៈនៃកិច្ចព្រមព្រៀងពាណិជ្ជកម្មសេរីកម្ពុជា-ចិន ឃើញថា កំណើននៃការនាំចេញផ្លែមៀនរបស់កម្ពុជាបានហក់ឡើងគួឲ្យកត់សម្គាល់ ដោយតាមរយៈនៃទីផ្សារនាំចេញនេះ និងអាចជួយដល់ស្ថិរភាពតម្លៃ, លើកទឹកចិត្តដល់កសិករដាំដុះ និងការលើកកម្ពស់ផលិតភាពភាពនៃការនាំចេញកសិផលរបស់កម្ពុជា ខណៈដែលប្រជាជនចិនៅភាគច្រើននិយមទទួលទានផ្លែមៀន។ពាក់ព័ន្ធការនាំចេញផ្លៃមៀននេះដែរ, ឧកញ៉ាបណ្ឌិត ឈិន កេន អ្នកសម្របសម្រួលទីផ្សារនាំចេញ និងជាតំណាង Alibaba នៅកម្ពុជា លើកឡើងថា តាមរយៈនៃកិច្ចព្រមព្រៀងពាណិជ្ជកម្មសេរីកម្ពុជា-ចិន បានធ្វើឲ្យទំនិញរបស់កម្ពុជា ជាពិសេសការនាំចេញកសិផលរបស់កម្ពុជា បានហូរចូលទៅកាន់ទីផ្សារចិនជាបន្តបន្ទាប់ ជាក់ស្តែងការនាំចេញផ្លែមៀនស្រស់នេះជាដើម ខណៈបច្ចុប្បន្នកសិផលទាំងនេះ ត្រូវបានឈ្មួញកណ្តាល និងប្រជាជនចិនគាំទ្រយ៉ាងខ្លាំង។របាយការណ៍របស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានបង្ហាញឲ្យដឹងថា នៅក្នុងរយៈពេល ៨ខែ ឆ្នាំ ២០២៣ នេះ កម្ពុជាបាននាំចេញកសិផលមានបរិមាណសរុបជាង ៥ លានតោន មានទំហំទឹកប្រាក់ប្រមាណជិត ៣ ពាន់លានដុល្លារអាមេរិក ក្នុងនោះសម្រាប់ការនាំចេញផ្លែមៀនស្រស់របស់កម្ពុជាទៅកាន់ទីផ្សារចិន មានចំនួនជាង ៨ ពាន់តោន កើនឡើងប្រមាណជិត ៤ ពាន់ភាគរយ នេះជាកំណើនមួយមិនធ្លាប់មានពីមុនមក៕អត្ថបទ៖ សុន រ៉ាឌី

តម្លៃស្រូវ-អង្ករហក់ឡើងខ្ពស់ ផ្តល់ក្តីសង្ឃឹមដល់កសិករថៃ ដែលជាប់បំណុល និងជួបគ្រោះរាំងស្ងួត

ស្របពេលដែលការផ្គត់ផ្គង់ស្រូវ-អង្ករ កាន់តែលំបាកខ្លាំង បន្ទាប់ពីបំរាមនាំចេញស្រូវ-អង្កររបស់ប្រទេសឥណ្ឌា ក្រុមកសិករនៅក្នុងប្រទេសថៃ នាំគ្នាប្រញាប់ប្រញាល់បង្កើនការផលិតស្រូវរបស់ខ្លួន ដើម្បីយកគុណសម្បត្តិពីតម្លៃស្រូវ-អង្ករហក់ឡើងខ្ពស់នៅលើទីផ្សារសកលោក ។ ធ្វើការយ៉ាងប្រញាប់ប្រញាល់ទាំងថ្ងៃក្តៅអំឡុងខែសីហា ក្រុមប្រជាកសិករនៅខេត្តឆៃណាត ដែលមានចម្ងាយប្រហែល ២០០គ.មភាគខាងជើងទីក្រុងបាងកក បានភ្ជួររាស់ដីស្រែដែលប្រមូលផលរួចកាលពីឆ្នាំមុន ដើម្បីរៀបចំធ្វើស្រែថ្មី ។ តាមធម្មតា មានការធ្វើស្រែ ២រដូវក្នុង១ឆ្នាំ ហើយនៅពាក់កណ្តាលឆ្នាំ ប្រជាកសិករពុំបានស្ទូងស្រូវនោះទេ ដើម្បីរក្សាទឹក ។ ទោះបីជាយ៉ាងណាក៏ដោយ នៅឆ្នាំនេះ អ្នកស្រី Sripai Kaeo-eam អាចធ្វើស្រែលើកទី ៣បាន ដើម្បីបង្កើនផលិតផលផ្លូវ ។ អ្នកស្រី Sripai ដែលជាកសិកររស់នៅខេត្តភាគកណ្តាលឆៃណាត និយាយថា បច្ចុប្បន្នខ្ញុំសង្ឃឹមថានឹងលក់ស្រូវបានតម្លៃពី ១ម៉ឺនបាតទៅ ២ម៉ឺនបាតក្នុង១តោន ។ អ្នកស្រីបន្តថា នោះហើយគឺជាហេតុផលដែលពួកយើងប្រញាប់ប្រញាល់ស្ទូងស្រូវបែបនេះ ។ ពួកយើងជាកសិករ ចេះជួយគ្នាទៅវិញទៅមក ពេលដែលពួកយើងមមាញឹកខ្លាំង ។ សន្ទស្សន៍តម្លៃស្រូវ-អង្ករអង្គការកសិកម្ម និងស្បៀងអាហារ ឃើញកើនឡើង ៩,៨ភាគរយក្នុងខែសីហា ឆ្នាំ ២០២៣ ធ្វើឲ្យប្រជាកសិករប្រញាប់ប្រញាល់ធ្វើស្រែនៅក្នុងប្រទេសថៃ ដែលជាប្រទេសនាំចេញស្រូវ-អង្ករធំជាងគេបំផុតលំដាប់ទី ២របស់ពិភពលោក ៕

បណ្ដាញសង្គម

ព័ត៌មានថ្មីៗ

ដាណឺម៉ាក បញ្ជាក់ថា ខ្លួនមិនច្រានចោលលទ្ធភាពនៃការទទួលស្គាល់ភាពជារដ្ឋរបស់ប៉ាឡេស្ទីនឡើយ

ប្រធានាធិបតីងហ្វាំងឡង់ រំពឹងថា លោក Trump នឹងអស់ការអត់ធ្មត់ជាមួយរុស្ស៊ី

អ៊ីរ៉ង់ប្តេជ្ញាចាត់វិធានការតបតវិញ បន្ទាប់ពីអូស្ត្រាលីបណ្តេញបេសកជន

គ្រោះទុរ្ភិក្សត្រូវបានប្រកាសនៅទីក្រុងហ្កាហ្សា ខណៈភាពអត់ឃ្លានកើតមានឡើង

កសិករប៉ាគីស្ថានជាប់បំណុល និងប្រឈមវិបត្តិទឹកជំនន់បង្កឡើងដោយបម្រែបម្រួលអាកាសធាតុ

អេស្ប៉ាញប្រកាសតំបន់អាសន្នដែលរងការឆាបឆេះដោយសារភ្លើងឆេះព្រៃ

UN៖ មនុស្សម្នាក់ក្នុងចំណោម ៤នាក់ ជួបកង្វះទឹកផឹកស្អាតសុវត្ថិភាពនៅទូទាំងពិភពលោក

ជនប៉ាឡេស្ទីនប៉ះទង្គិចជាមួយកងទ័ពអ៊ីស្រាអែល អំឡុងការវាយឆ្មក់ទីក្រុង Ramallah តំបន់វ៉េសប៊ែង

ឯកឧត្តមឧបនាយករដ្ឋមន្ត្រី ហ៊ុន ម៉ានី ផ្តល់អនុសាសន៍ ចំនួន៤ ជូនដល់សិក្ខាសាលាឌីជីថលូបនីយកម្មក្នុងរដ្ឋបាលសាធារណៈ

យុទ្ធនាការថ្ងៃទី៩ ដើម្បីជំរុញការផ្តល់ឱកាសការងារជូនដល់ពលករខ្មែរទើបត្រឡប់មកពីប្រទេសថៃ ក្រុមការងារក្រសួងការងារបានចុះទៅដល់រោងចក្រ សហគ្រាសចំនួន ១៤៣៥

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877