នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រដ្ឋមន្ត្រីក្រសួងកសិកម្ម ណែនាំប្រធានមន្ទីរកសិកម្មរាជធានីភ្នំពេញត្រូវមានសាមគ្គីភាពផ្ទៃក្នុង និងអនុវត្តភារៈកិច្ចប្រកបដោយប្រសិទ្ធិភាព
ឯកឧត្តម ឌិត ទីណា លើកទឹកចិត្តអង្គការតុកកែញញឹមកម្ពុជា​ឲ្យបន្តលើក​កម្ពស់​ការអប់រំ​ធនធាន​មនុស្ស​ក្នុង​វិស័យកសិកម្ម
ចិនធ្វើការស្វែងយល់ លើការកែទម្រង់គ្រប់គ្រងហិរញ្ញវត្ថុសាធារណៈ និងប្រព័ន្ធថវិការបស់កម្ពុជា
អ្នកនាំចេញសង្ឃឹមថា ការនាំចេញផលិតផលធ្វើដំណើរ និងស្បែកជើង​នឹង​កើនឡើងបន្ថែមទៀត​នៅឆ្នាំ២០២៥ ខាងមុខ

សេដ្ឋកិច្ច និង កសិកម្ម

ធនាគារជាតិកំពុងពង្រឹងក្របខ័ណ្ឌបទប្បញ្ញត្តិ ត្រួតពិនិត្យ ដើម្បីការប្រកួតប្រជែង​ក្នុងគ្រឹះស្ថានហិរញ្ញវត្ថុ

2024/10/11 03:25:42 pm        450
Facebook Telegram Linkin
ធនាគារជាតិនៃកម្ពុជា បាននិងកំពុងពង្រឹងក្របខ័ណ្ឌបទប្បញ្ញត្តិ និងត្រួតពិនិត្យធនាគារ ដើម្បី​ធានា​ឱ្យ​បាននូវការប្រកួតប្រជែង ដោយស្មើភាព សុចរិតភាព តម្លាភាព និងគិតគូរ​ដល់​អ្នក​ប្រើប្រាស់​សេវាហិរញ្ញវត្ថុ និងការរីកចម្រើនប្រព័ន្ធធនាគារ ប្រកបដោយចីរភាព និងការអភិវឌ្ឍ។ ឯកឧត្តម គិត សុវណ្ណារិទ្ធ អគ្គនាយកត្រួតពិនិត្យ ធនាគារជាតិនៃកម្ពុជា លើកឡើង​ក្នុង​សិក្ខា​សាលា​ផ្សព្វ​ផ្សាយស្តីពី “វិស័យមី ក្រូហិរញ្ញវត្ថុនៅកម្ពុជា” នៅខេត្តកែប ថ្ងៃទី១១ ខែតុលា ឆ្នាំ​២០២៤ នេះថា ជាច្រើនទស្សវត្សរ៍កន្លងទៅ វិស័យមីក្រូហិរញ្ញវត្ថុនៅកម្ពុជា បាន​បង្ហាញ​ពី​ការ​វិវត្ត​និង​រីក​ចម្រើនយ៉ាងខ្លាំង ហើយបាននិងកំពុងដើរតួនាទីយ៉ាងសំខាន់ ក្នុងការរួ​មចំណែក​អភិវឌ្ឍ​សេដ្ឋកិច្ច និងសង្គម កម្ពុជា ជំរុញកម្រិតបរិយាបន្នហិរញ្ញវត្ថុ កាត់បន្ថយ​វិសមភាព​ការ​ទទួល​បាន​សេវា​ហិរញ្ញវត្ថុ និងកាត់បន្ថយភាពក្រីក្ររបស់ប្រជាពលរដ្ឋ នៅតាមតំបន់មូលដ្ឋាន។ វិស័យនេះបានបន្តពង្រីកវិសាលភាពប្រតិបត្តិការរបស់ខ្លួន ប្រកបដោយនិរន្តរភាព និងទំនុកចិត្ត ព្រម​ទាំង​បាន បន្តអភិវឌ្ឍសេវាហិរញ្ញវត្ថុថ្មីៗ ដើម្បីបំពេញ​តម្រូវ​ការ​ហិរញ្ញ​វត្ថុ​ប្រកប​ដោយ​ប្រសិទ្ធ​ភាព មានកិច្ចការពារ និងបរិយាបន្ន ជាពិសេសសម្រាប់ ប្រជាពលរដ្ឋនៅតាមសហគមន៍ ដែល​ពុំ​មាន​ប្រតិបត្តិការធនាគារទៅដល់។ឯកឧត្តម បន្តថា ទោះបីយ៉ាងនេះក្តី វិស័យនេះក៏កំពុងទទួលរង​នូវ​ការ​ចោទ​ប្រកាន់​មិនមាន​មូល​ដ្ឋាន​ជាក់​លាក់ និងការព្រួយ បារម្ភពីអង្គការសង្គមស៊ីវិលមួយចំនួន ពាក់ព័ន្ធនឹងការ​បញ្ចេញ​ឥណទាន​ហួស​ពីតម្រូវការ ដែលជាកត្តាជំរុញឱ្យគ្រួសារក្រីក្រជាប់ បំណុល លើសលប់ ការអ​នុវ​ត្ត​សកម្មភាពប្រមូលបំណុល ដែលមានលក្ខណៈគំរាមកំហែង និងការបង្ខំឱ្យគ្រួសារក្រីក្រ កាត់​បន្ថយ​របបអាហារ ឬលក់ដីធ្លី ការធ្វើចំណាកស្រុកខុសច្បាប់ ការបោះបង់ការសិក្សា និងការជិះ​ជាន់​លើ​ពលកម្មកុមារជាដើម។ បញ្ហាចម្បងៗដែលជាដើម ហេតុនៃការចោទ​ប្រកាន់​ទាំង​នេះ​រួម​មាន​៖ ការផ្តល់កម្ចី និងសកម្មភាពបញ្ចាំខុសច្បាប់ ចំណេះដឹងផ្នែក ហិរញ្ញវត្ថុនៅមានកម្រិតទាប ការ​ឆកល្វែងក្នុងការអនុវត្តតាមច្បាប់ និងបទប្បញ្ញត្តិ កម្សោយនៃដំណើរការវាយតម្លៃ ក្នុងការ​ផ្តល់​ឥណទាន ការផ្តល់ឥណទានដោយផ្តោតតែលើទ្រព្យបញ្ចាំ ការគិតកម្រៃសេវា និងការ​ពិន័យ​ផ្សេង​ៗ​ក្នុង​កម្រិតខ្ពស់ជាដើម។ ជុំវិញបញ្ហានេះធនាគារជាតិនៃកម្ពុជា តែងតែយក ចិត្តទុកដាក់ ក្នុងការ​ដោះស្រា​យ​បញ្ហាប្រឈមនានា ដែលមានក្នុងប្រព័ន្ធ ធនាគារប្រកបដោយភាពទទួលខុសត្រូវ ។ ចំពោះវិស័យមីក្រូហិរញ្ញវិញ, លោកជំទាវ ឌិត នីតា ប្រធានក្រុម​ប្រឹក្សា​ភិបាល​សមាគម​មីក្រូហិរញ្ញ​វត្ថុ​កម្ពុជា លើកឡើងឱ្យដឹងថា វិស័យមីក្រូហិរញ្ញនៅកម្ពុជា នៅតែបន្តរក្សាបានកំណើន និង​ស្ថិរភាព តាមរយៈការផ្តល់សេវាកម្មប្រកបដោយបរិយាបន្ន ជាមួយស្មារតី ទទួលខុសត្រូវខ្ពស់ និង​កិច្ចការពារអតិថិជន ស្របតាមយុទ្ធសាស្រ្តជាតិស្តីពីបរិយាបន្នហិរញ្ញវត្ថុឆ្នាំ២០១៩-២០២៥។ គិត​ត្រឹម​ត្រីមាស ទីពីរក្នុងឆ្នាំ២០២៤ នេះ គ្រឹះស្ថានមីក្រូហិរញ្ញវត្ថុ បានផ្តល់ទុនជូនប្រជាជនកម្ពុជា ចំនួនប្រមាណ ១,៥៥លាននាក់ ក្នុងនោះ៥៤% ជាស្ត្រី និងមានសមតុល្យ​ឥណទានស​រុប​ប្រមាណ ៥,១ ពាន់លានដុល្លារអាមេរិក ព្រមទាំងអតិថិជនប្រាក់បញ្ញើសរុបចំនួនជាង ២ លាននាក់ និងមានប្រាក់បញ្ញើសរុបជាង ២,២ ពាន់លានដុល្លារអាមេរិក និងបណ្តាញ​ការិយាល័យ​ជាង ៩០០ កន្លែង ដែលមានបុគ្គលិកបម្រើសេវា កម្មសរុបប្រមាណជាង ២១ ពាន់នាក់ នៅ​ទូទាំង​២៥​រាជធានី-ខេត្ត នៃព្រះរាជាណាចក្រកម្ពុជា៕ អត្ថបទ៖ សុន រ៉ាឌី

ការនាំចេញផលិតផលកសិកម្មនឹងបន្តកើនឡើងកាន់តែខ្លាំង គាំទ្រដល់កំណើនការនាំចេញ​ទំនិញកម្ពុជា

2024/10/11 03:02:33 pm        163
Facebook Telegram Linkin
កម្ពុជានាំចេញផលិតផលចេញពីវិស័យកសិកម្ម កំពុងមាននិន្នាការកើនឡើង ហើយវិស័យនេះនឹង​អាចមានសក្តានុពលកាន់តែ ខ្លាំងថែមទៀត ដែលនឹងជួយគាំទ្រដល់កំណើន នៃការនាំចេញ​ទំនិញ​សរុបក្នុងស្រុក។បណ្ឌិត តាន់ មុនីវណ្ណ អនុប្រធានសភាពាណិជ្ជកម្ពុជា និងជាអ្នកជំនាញផ្នែកកសិកម្ម លើកឡើង​ក្នុងកិច្ច​សម្ភាសន៍ជាមួយ BTV ស្តីពីការអភិវឌ្ឍ និងការនាំចេញកសិផលពីវិស័យកសិកម្មកម្ពុជា នេះថា ទាក់ទិនវិស័យកសិកម្ម ឃើញថា បន្ទាប់ពីការផ្ទុះជំងឺកូវីដ -១៩ និងការផ្ទុះនៃសង្គ្រាមរុស្សី-អ៊ុយក្រែន, វិស័យនេះបានប្រែរូបរាងជាច្រើន ទាំងនៅក្នុងការដាំដុះ និងខ្សែច្រវាក់ផ្គត់ផ្គង់ ព្រោះនៅ ពេលមានវិបត្តិ ប្រទេសនីមួយៗបានផ្តាច់ទំនាក់ទំនង ហើយបានខិតខំអភិវឌ្ឍន៍វិស័យកសិកម្ម ដើម្បីផ្គត់ផ្គង់ស្បៀងនៅក្នុងប្រទេស រៀងៗខ្លួន ខណៈដែលការដឹកជញ្ជូនក៏ឡើងថ្លៃ និងការផ្គត់ផ្គង់ក៏មានការដាច់ចង្វាក់ផលិតកម្មជាដើម។លោកបណ្ឌិត បន្តថា ស្របពេលជួបវិបត្តិនេះ វិស័យកសិកម្មនៅកម្ពុជា មានការធ្លាក់ចុះបន្តិចបន្ទួច តែមកដល់បច្ចុប្បន្នកំលាំង ផលិតរបស់យើងបានងើបឡើងវិញដ៏ដែល ក្នុងនោះអ្វីដែលប្រទេសកម្ពុជានាំចេញមានកំណើននេះ ព្រោះកម្ពុជាផលិតស្បៀងបាន ច្រើន ក្រោយពីតម្រូវផ្គត់ផ្គង់ក្នុងស្រុក។ បញ្ហានេះ លោកបណ្ឌិតរំពឹងថា កម្ពុជានឹងនាំចេញផលិតផលពីវិស័យកសិកម្មកាន់តែច្រើន ថែមទៀត ខណៈរាជរដ្ឋាភិបាលក្នុងអាណត្តិទី៧ ដែលដឹកនាំដោយ​សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី, សម្តេចបាន លើកទឹកចិត្តដល់វិស័យនេះយ៉ាងខ្លាំង។ទាក់ទងការទទួលបានឥណទានវិញ, ថ្មីៗនេះ លោកជំទាវ ឌិត នីតា ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា លើកឡើងឱ្យដឹងថា ក្នុងស្ថានភាពបច្ចុប្បន្ននេះ ចំពោះការផ្តល់ឥណទានរបស់គ្រឹះស្ថានមីក្រូហិរញ្ញវត្ថុ ឃើញថា ការផ្តល់ឥណទានទៅ លើវិស័យអចលនទ្រព្យ និងសំណង់, ការផ្តល់កម្ចីផ្ទាល់ខ្លួន, និងផ្នែកសណ្ឋាគារ និងភោជនីយដ្ឋានបានធ្លាក់ចុះ ចំពោះឥណទានមិន ដំណើរការលើស ៣០ថ្ងៃ ដោយមានទំហំធំ ខណៈដែលការផ្តល់ឥណទានទៅលើវិស័យកសិកម្ម មានឥណទានមិនដំណើរទាប ដែល បញ្ហានេះ បានបង្ហាញឱ្យឃើញនៃការរីកលូតលាស់នៅក្នុងវិស័យកសិកម្ម។សូមបញ្ជាក់ថា កម្ពុជាបាននាំចេញកសិផលទៅទីផ្សារក្រៅប្រទេស បើតាមរបាយការណ៍ អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានបង្ហាញរបាយការណ៍ នៅក្នុងឆមាសទី ១ ឆ្នាំ ២០២៤ កម្ពុជានាំចេញមានបរិមាណសរុបជាង ៦,១ លានតោន កើនឡើងប្រមាណជាង ៥៧% បើធៀបរយៈពេលដូចគ្នាឆ្នាំ ២០២៣ គិតជាទឹកប្រាក់មានទំហំទឹកប្រមាណជាង ២ ៨០០ លានដុល្លារអាមេរិក ដែលគាំទ្រកំណើននៃការនាំចេញរួមមាន៖ ស្រូវ អង្ករ ដំឡូងមីស្រស់ ម្សៅ ដំឡូង គ្រាប់ស្វាយចន្ទី ពោត ផ្លែមៀន ផ្លែស្វាយ និងម្រេច៕អត្ថបទ៖ សុន រ៉ាឌី

មន្រ្តីធនាគារជាតិធ្វើការចែករំលែកការអភិវឌ្ឍន៍ឌីជីថល និងនិន្នាការរីកចម្រើនថ្មី​ក្នុងវិស័យធនាគារ

2024/10/11 02:48:22 pm        83
Facebook Telegram Linkin
មន្រ្តីជាន់ខ្ពស់ធនាគារជាតិនៃកម្ពុជា បានធ្វើការចែករំលែក និងបទពិសោធន៍ លើការ​អភិវឌ្ឍន៍​ឌីជីថល និងនិន្នាការរីកចម្រើនក្នុង វិស័យធនាគារនៅកម្ពុជា ខណៈបច្ចុប្បន្នវិស័យនេះ បាននិង​កំពុងបន្តចូលរួមលើកកម្ពស់បរិយាបន្នហិរញ្ញវត្ថុ និងស្ថិរភាពហិរញ្ញវត្ថុ។លោក អ៊ុក សារ៉ាត អគ្គនាយករងប្រតិបត្តិការ និងជាប្រធាននាយកដ្ឋានប្រព័ន្ធទូទាត់សងប្រាក់ នៃធនាគារជាតិនៃកម្ពុជា នៅ ក្នុងវេទិកាធនាគារឆ្នាំ ២០២៤ និងការតាំងពិព័រណ៍ការងារ ដែលរៀបចំខេមអេដ នៅថ្ងៃទី១០ ខែតុលា ឆ្នាំ២០២៤ បានលើកឡើងអំពី វិស័យធនាគារនៅកម្ពុជា ដែលបានបន្តរួមចំណែកបង្កើតភាពអំណោយផលដល់កំណើន តាមរយៈការអនុវត្តតួនាទីភារកិច្ច ក្នុងការរក្សា ស្ថិរភាពថ្លៃ ដែលគាំទ្រការវិនិយោគ និងប្រើប្រាស់ ការអភិវឌ្ឍប្រព័ន្ធទូទាត់ ដើម្បីសម្រួលនិងបង្កើនដល់ចរន្តសេដ្ឋកិច្ច និងការពង្រីក ប្រព័ន្ធធនាគារដ៏មានទំនុកចិត្តសម្រាប់វិនិយោគិន និងសាធារណជនផងដែរ។ចំណែកទាក់ទិននិងបច្ចេកវិទ្យាឌីជីថលវិញ, លោកក៏បានលើកឡើងអំពីការខិតខំយកចិត្តទុក របស់ធនាគារជាតិនៃកម្ពុជា លើ អភិវឌ្ឍនូវប្រព័ន្ធបច្ចេកវិទ្យាជីឌីថល ព្រោះនៅក្នុងយុគសម័យថ្មីនេះ បច្ចេកវិទ្យាកំពុងដើរយ៉ាងលឿន ដែលតម្រូវឱ្យយើងត្រូវដើរឱ្យទាន់ នៃសម័យរីកច្រើននេះផងដែរ, ជាក់ស្តែងធនាគារជាតិនៃកម្ពុជា យកចិត្តទុកដាក់យ៉ាងខ្លាំង ដោយបានអភិវឌ្ឍន៍នូវប្រព័ន្ធជាច្រើន ដូចជា ប្រព័ន្ធធនាគារអេឡិចត្រូនិក (OBS), ប្រព័ន្ធផាត់ទាត់ជាតិ (NCS) និងប្រព័ន្ធបាគងជាដើម ហើយថ្មីៗនេះធនាគារជាតិកម្ពុជា បានដាក់ឱ្យដំណើរ បាគងទេសចរ “Bakong Tourist App” ដើម្បីលើកកម្ពស់សេវាទូទាត់នៅកម្ពុជាឱ្យកាន់តែប្រសើរ។ចំណែក និស្សិតខេមអេដ និងនិស្សិតមកពីបណ្តាសកលវិទ្យាល័យនានា បានលើកឡើងថា ចំពោះការរៀបចំវេទិកាលើវិស័យ ធនាគារ និងការតាំងពិព័រណ៍ការងារនេះ សម្រាប់ពួកគាត់នៅក្នុងការសិក្សា ពិតជាមានសារៈសំខាន់ណាស់ ក្នុងការពង្រីកចំណេះដឹង និងការទទួលនូវបទពិសោធន៍ផ្សេងៗបន្ថែមក្រៅពីការសិក្សានៅក្នុងសាលា ជាពិសេសការទទួលនូវព័ត៌មានទាក់ទងការងារជាដើម ខណៈបច្ចុប្បន្នកម្ពុជាកំពុងមានការរីកចម្រើនលើវិស័យធនាគារ និងហិរញ្ញវត្ថុ និងការស្រូបយកការវិនិយោគជាបន្តបន្ទាប់ ដែលទាំង អស់នេះ នឹងមានត្រូវការការងារលើផ្នែកគណនេយ្យ សវនកម្ម និងជំនាញផ្សេងៗទៀតជាមិនខាន។ជុំវិញការរៀបចំព្រឹត្តិការណ៍ខាងលើនេះ, លោក ខេស៊ី បាណេត ក៏បានបញ្ជាក់អំពីគោលជំហរក្នុងការរៀបចំ គឺមានទិសដៅជំរុញឱ្យ និស្សិតទទួលបាននូវចំណេះដឹងថ្មីៗបន្ថែម ដែលបាននិងកំពុងអនុវត្តនៅតាមស្ថាប័នពាក់ព័ន្ធរបស់រាជរដ្ឋាភិបាល ក៏ដូចជានៅតាម បណ្តាក្រុមហ៊ុន-សហគ្រាសនានា សម្រាប់ជាធាតុចូល និងស្វែងយល់បន្ថែម ដើម្បីអភិវឌ្ឍន៍ខ្លួនឱ្យស្របតាមទីផ្សារការងារបច្ចុប្បន្ន៕ អត្ថបទ៖ សុន រ៉ាឌី 

ក្រសួងសេដ្ឋកិច្ច ចេញប្រកាសស្តីពីពន្ធប្រថាប់ត្រា សម្រាប់អនុវត្តលើវិស័យអចលនទ្រព្យ

2024/10/11 02:31:34 pm        148
Facebook Telegram Linkin
ក្រសួងសេដ្ឋកិច្ច និងហិរញ្ញវត្ថុ កំណត់នូវវិធាន និងនីតិវិធីនៃការគ្រប់គ្រងប្រមូលពន្ធប្រថាប់ត្រា លើការផ្ទេរកម្មសិទ្ធិអចលនទ្រព្យ ការដាក់ភាគហ៊ុនជាចលនទ្រព្យ ការផ្ទេរភាគហ៊ុនរបស់ក្រុមហ៊ុន កិច្ចសន្យាផ្គត់ផ្គង់ទំនិញ ឬសេវាដែលប្រើប្រាស់ថវិការដ្ឋជាដើម។ក្រសួងសេដ្ឋកិច្ច និងហិរញ្ញវត្ថុ ចេញប្រកាសស្តីពីពន្ធប្រថាប់ត្រា ដោយប្រកាសនេះ មានគោលបំណងកំណត់នូវវិធាន និង នីតិវិធីនៃការគ្រប់គ្រងប្រមូលពន្ធប្រថាប់ត្រា ដោយមានវិសាលភាពអនុវត្តទៅលើដូចជា៖ ការផ្ទេរកម្មសិទ្ធិ ឬសិទ្ធិកាន់កាប់ចលនទ្រព្យ និងអចលនទ្រព្យ ឬការដាក់ភាគហ៊ុនជាចលនទ្រព្យ និងអចលនទ្រព្យក្នុងក្រុមហ៊ុន, ការផ្ទេរចំណែកណាមួយ ឬទាំងស្រុងនៃភាគហ៊ុនរបស់ក្រុមហ៊ុន ឬផលប្រយោជន៍ប្រហាក់ប្រហែល, កិច្ចសន្យាផ្គត់ផ្គង់ទំនិញ ឬសេវាដែលប្រើប្រាស់ថវិការដ្ឋ, និង លិខិតមានលក្ខណៈ គតិយុត្ត រួមមានលិខិតស្តីពីការរំលាយក្រុមហ៊ុនបញ្ចូលគ្នា និងលិខិតស្តីពីការបិទក្រុមហ៊ុន។ពន្ធប្រថាប់ត្រាត្រូវកំណត់តាមអត្រាដូចជា៖ ៤ ភាគរយ នៃតម្លៃអចលនទ្រព្យ ចំពោះការផ្ទេរកម្មសិទ្ធិ ឬសិទ្ធិកាន់កាប់អចលន ទ្រព្យជាសំណង់ និងដី ឬការដាក់ភាគហ៊ុនជាអចលនទ្រព្យក្នុងក្រុមហ៊ុន ការផ្ទេរភាគហ៊ុន ឬផលប្រយោជន៍ប្រហាក់ប្រហែល របស់ ក្រុមហ៊ុនអចលនទ្រព្យ។ ៤ ភាគរយ នៃតម្លៃចលនទ្រព្យ ចំពោះការផ្ទេរកម្មសិទ្ធិ ឬសិទ្ធិកាន់កាប់ចលនទ្រព្យ ការដាក់ភាគហ៊ុនជា ចលនទ្រព្យក្នុងក្រុមហ៊ុន។ ០,១ ភាគរយ នៃតម្លៃភាគហ៊ុនចំពោះការផ្ទេរចំណែកណាមួយ ឬទាំងស្រុងនៃភាគហ៊ុនរបស់ក្រុមហ៊ុន។ ០,១ ភាគរយ នៃតម្លៃចុះកិច្ចសន្យាចំពោះកិច្ចសន្យាផ្គត់ផ្គង់ទំនិញ ឬសេវាដែលប្រើប្រាស់ថវិការដ្ឋ, និង ១ លានរៀល ចំពោះលិខិត មានលក្ខណៈគតិយុត្ត រួមមានលិខិតស្តីពីការរំលាយក្រុមហ៊ុនបញ្ចូលគ្នា និងលិខិតស្តីពីការបិទក្រុមហ៊ុន។ចំណែកមូលដ្ឋានគិតពន្ធប្រថាប់ត្រាត្រូវបានកំណត់រួមមាន តម្លៃចលនទ្រព្យ និងអចលនទ្រព្យត្រូវគិតតាមតម្លៃទីផ្សារ នាពេល ផ្ទេរកម្មសិទ្ធិ ឬសិទ្ធិកាន់កាប់ ក្នុងនោះក្រសួងសេដ្ឋកិច្ច និងហិរញ្ញវត្ថុ អាចកំណត់តម្លៃចលនទ្រព្យ និងអចលនទ្រព្យសម្រាប់ធ្វើជាមូល ដ្ឋានគិតពន្ធនេះ។ តម្លៃភាគហ៊ុនឬផលប្រយោជន៍ប្រហាក់ប្រហែល ត្រូវគិតតាមតម្លៃទីផ្សារនាពេលប្រតិបត្តិការផ្ទេរភាគហ៊ុន ឬផល- ប្រយោជន៍ប្រហាក់ប្រហែលនោះកើតឡើង។ តម្លៃចុះកិច្ចសន្យា ត្រូវគិតតាមតម្លៃក្នុងកិច្ចសន្យាផ្គត់ផ្គង់ទំនិញ ឬសេវាដែលប្រើប្រាស់ ថវិការដ្ឋ ដោយមិនរួមបញ្ចូលអាករលើតម្លៃបន្ថែម។ លិខិតមានលក្ខណៈគតិយុត្តត្រូវកំណត់ ១ លានរៀល ចំពោះលិខិតមានលក្ខណៈ គតិយុត្តនីមួយៗ។ជុំវិញពន្ធប្រថាប់នេះ គឺមានពន្ធប្រថាប់ត្រាត្រូវបានលើកលែងនិងអនុគ្រោះ ដែលការលើកលែង និងអនុគ្រោះនេះ មាននីតិវិធី ជាច្រើនដែលអនុវត្តនៅក្នុងប្រកាស។ ចំណែកពន្ធប្រថាប់ត្រាដែលត្រូវអនុវត្តវិញរួមមាន៖ អ្នកទទួលកម្មសិទ្ធិ ឬសិទ្ធិកាន់កាប់ចលន -ទ្រព្យ និងអចលនទ្រព្យ, អ្នកទទួលកម្មសិទ្ធិឬសិទ្ធិកាន់កាប់ភាគហ៊ុន, អ្នកទទួលបានកិច្ចសន្យាផ្គត់ផ្គង់ទំនិញ ឬសេវាដែលប្រើប្រាស់ ថវិការដ្ឋ, និងអ្នកទទួលសិទ្ធិលើលិខិតមានលក្ខណៈគតិយុត្ត។ ក្រៅពីនេះចំណែកអ្នកជាប់ដែលត្រូវមានកាតព្វកិច្ច ក៏មាននីតិវិធីជា ច្រើនដែលត្រូវអនុវត្តដូចមាននៅក្នុងប្រកាសនេះផងដែរ៕ អត្ថបទ៖ សុន រ៉ាឌី 

ត្រកូលស្មាតហ្វូនចុងក្រោយបំផុតរបស់ Xiaomi បង្ហាញវត្តមានជាផ្លូវការនៅទីផ្សារកម្ពុជា

2024/10/11 02:09:47 pm        156
Facebook Telegram Linkin
ក្រុមហ៊ុន ស៊ាវមី (Xiaomi) នៅថ្ងៃទី១០ តុលា ឆ្នាំ២០២៤នេះ បានបើកបង្ហាញ និង​ដាក់​លក់​ជា​ផ្លូវការ​ត្រកូលស្មាតហ្វូនចុងក្រោយបំផុតរបស់ខ្លួនគឺ Xiaomi 14T Series ដែលរចនា​ឡើង​សម្រាប់​អ្នក​ចូលចិត្តថតរូប ដែលស្វែងរកសមត្ថភាពថតរូបកម្រិតកំពូល។ ជាពិសេសនាំ​យក​បច្ចេក​វិទ្យា​នៃការថតរូបពេលយប់ជាមួយមុខងារ AI ដ៏មានឥទ្ធិពល។ក្នុងពិធីបើកបង្ហាញត្រកូលស្មាតហ្វូន ស៊ាវមី ១៤ធី សឺរីស (Xiaomi 14T Series) លោក ភីកឃ័រ កៅ (Peaker Gao) នាយកគ្រប់គ្រងប្រចំាប្រទេសកម្ពុជារបស់ក្រុមហ៊ុន XIAOMI បាន​មាន​ប្រសាសន៍​ថា រហូតមកដល់ពេលនេះ ក្រុមហ៊ុនតែងតែយកចិត្តទុកដាក់ ក្នុងការផលិត ផលិតផល​ដែល​មាន​គុណភាពល្អ និងតម្លៃសមរម្យជូនដល់អតិថិជន។ លោកបានបន្តថា ចំពោះ លក្ខណៈ​ពិសេស​របស់ស្មាតហ្វូនចុងក្រោយនេះ គឺប្រព័ន្ធកាមេរ៉ាថតរូបស្អាត និងច្បាស់ល្អ។ បន្ថែមពីនេះ Xiaomi មានការសហការជាមួយ Google ដល់កម្រិតខ្ពស់ ដែលក្លាយជាឧបករណ៍ Xiaomi ដំបូង​បង្អស់ក្នុងការផ្តល់ជូននូវមុខងារច្នៃប្រឌិតជាច្រើន ហើយអ្នកប្រើប្រាស់ អាចស្វែង​រក​ភ្លាមៗ​នូវ​អ្វីដែ​លចង់ឃើញនៅលើទូរស័ព្ទដោយមិនចាំបាច់ប្តូរកម្មវិធី។ ក្នុងបទបង្ហាញរបស់ លោក សម ប្រាថ្នា ប្រធានផ្នែកបណ្តុះបណ្តាលរបស់ក្រុមហ៊ុន Xiaomi បាន​បញ្ជាក់​ឲ្យ​ដឹងថា ការប្រើប្រាស់ AI កម្រិតខ្ពស់សម្រាប់ភាពងាយស្រួលប្រចាំថ្ងៃ Xiaomi 14T Series នាំមកនូវកម្រិតថ្មីនៃផលិតភាព និងភាពច្នៃប្រឌិតជាមួយនឹងសមត្ថភាព AI កម្រិតខ្ពស់ ឆ្លងកាត់​​ការ​ស្វែងរកសំឡេង អត្ថបទ រូបភាព និងវីដេអូពង្រឹងការងារប្រចាំថ្ងៃ ព្រមជាមួយនឹង​ការ​កែ​លម្អ​សម្រាប់ភាពងាយស្រួល។ កាន់តែអស្ចារ្យជាងនេះទៅទៀត ស្មាតហ្វូនថ្មីនេះ គឺមានអ្នក​បក​ប្រែ AI យកឈ្នះលើឧបសគ្គភាសា ដើម្បីបង្កើនទំនាក់ទំនងក្នុងអំឡុងពេលប្រជុំ និងការ​ហៅ​ទូរសព្ទ​។ AI Notes និង AI Recorder បង្កើនប្រសិទ្ធភាព​ជាមួយ​នឹង​ការ​ចម្លង​ការ​និយាយ​ទៅ​អត្ថបទ​ ការទទួលស្គាល់វាគ្មិនត្រឹមត្រូវ និងការសង្ខេបរហ័ស ខណៈពេលដែល​ការ​បក​ប្រែ​តាម​ពេល​វេលា​ជាក់ស្តែងធានានូវអន្តរកម្មពហុភាសាយ៉ាងរលូន។សូមជម្រាបជូនថា សាជីវកម្ម Xiaomi ត្រូវបានបង្កើតឡើងនៅក្នុងឆ្នាំ២០១០ គឺជា​ក្រុម​ហ៊ុន​ផលិត​គ្រឿង​អេឡិចត្រូនិក ប្រើប្រាស់ និងឆ្លាតវៃ ដែលមានស្មាតហ្វូន និងផ្នែករឹងឆ្លាតវៃ។ ទស្សនៈ​វិស័យរបស់ Xiaomi គឺការ "បង្កើតមិត្តជាមួយអ្នកប្រើប្រាស់ និងក្លាយ​ជា​ក្រុម​ហ៊ុន​ដ៏​ត្រជាក់​បំផុត​នៅ​ក្នុង​ចិត្ត​អ្នកប្រើប្រាស់" Xiaomi បន្តបន្តការបង្កើតអ្វី​ដែល​ថ្មី​ជាមួយ​នឹង​បទ​ពិសោធន៍​អ្នក​ប្រើ​ប្រាស់​ដែល​មានគុណភាពខ្ពស់ និងប្រសិទ្ធភាពប្រតិបត្តិការនានា៕ អត្ថបទ ឈិត បូរ៉ាវី 

និស្សិតកសិកម្ម៥០នាក់ ចុះកម្មសិក្សាដោយផ្ទាល់ដើម្បីស្វែងយល់បន្ថែមបន្ទាប់ពីទ្រឹស្តី

2024/10/10 03:58:56 pm        504
Facebook Telegram Linkin
ភ្នំព៣ញ៖ ក្រោមការឧបត្ថម្ភគាំទ្ររបស់មជ្ឈមណ្ឌល KOPIA និស្សិតនៃសាកលវិទ្យាល័យ​ភូមិន្ទ​កសិកម្ម​ចំនួន ៥០នាក់ បានចុះទៅបំពេញកម្មសិក្សានៅសហគមន៍កសិកម្មចំនួន២ ស្ថិតនៅ​ស្រុក​ត្រាំកក់ ខេត្តតាកែវ និងស្រុកថ្មគោល ខេត្តបាត់ដំបង ដែលដឹកនាំដោយលោកបណ្ឌិត ជាង ហុង សាស្ត្រាចារ្យសាកលវិទ្យាល័យភូមិន្ទកសិកម្ម។តាមរយៈកម្មសិក្សានេះ និស្សិត​ទាំងអស់​ទទួល​បាន​បទ​ពិសោធន៍​យ៉ាង​ច្រើន​ពី​លោក​ប្រធាន​សហគមន៍​នីមួយៗក្នុងខេត្តទាំងពីរ ខាងលេី ព្រមទាំងធ្វើការពន្យល់ និងបកស្រាយចម្ងល់ សំណួរ-ចម្លើយ ដែលបានសាកសួរព័ត៌មានផ្សេងៗពីសំណាក់សិស្សនិស្សិត។ សិស្ស​និស្សិត នៃសាកលវិទ្យាល័យភូមិន្ទកសិកម្ម បានរៀបរាប់ថា កន្លងមកពួកគាត់ បានសិក្សា​ការ​ប្រើ​ប្រាស់ពូជ ការប្រើប្រាស់ដី និងការថែទាំ ពួកគាត់បាន​ទទួល​ត្រឹមតែ​ទ្រឹស្តី​នៅ​ក្នុង​សាលា​តែ​ប៉ុណ្ណោះ ប៉ុន្តែតាមរយៈកម្មសិក្សានៅក្នុងថ្ងៃនេះ គឺបានមើលផ្ទាល់ដល់កន្លែងដាំដុះ ដែល​ពិត​ជា​មាន​សារៈសំខាន់យ៉ាងច្រើន ឆ្លើយតបដល់ការសិក្សាជាក់ស្តែង។ក្នុងឱកាសអញ្ជើញចុះបំពេញការងារនេះ លោកបណ្ឌិត ជាង ហុង បានធ្វើការថ្លែងអំណរគុណ ដល់​មជ្ឈមណ្ឌល KOPIA ដែលបានជួយឧបត្ថម្ភគាំទ្រដល់សិស្សនិស្សិត មក​ធ្វើ​ការ​ទស្សន​កិច្ច​សិក្សា​ដល់​សហគមន៍កសិកម្ម និងផ្តល់ការអប់រំជាក់ស្តែង។ លោកបានបន្ថែមថា ការជួយគាំទ្រ​នេះ ពិតជាជួយដល់ដំណើរការសិក្សារបស់សិស្សនិស្សិតផងដែរ។លោកបណ្ឌិត Song Young-Ju ប្រធានមជ្ឈមណ្ឌល KOPIA ប្រចាំកម្ពុជា មានប្រសាសន៍ថា លោកគ្រោងនឹងបន្តផ្តល់ឱកាសក្នុងការគាំទ្របែបនេះបន្ថែមទៀតនៅថ្ងៃខាងមុខចំពោះសិស្សនិស្សិត ក្នុងការចុះកម្មសិក្សាផ្ទាល់ ដល់កន្លែងស្រាវជ្រាវដំណាំផ្សេងៗផងដែរ។កម្ម​វិធី​នេះ ពិតជាមានសារៈសំខាន់ណាស់ ក្នុងការបង្ហាញពីអនុវត្តន៍សកម្មភាព នៃការ​ចុះ​អនុស្ស​រណៈ​យោគ​យល់រវាងមជ្ឈមណ្ឌល KOPIA និងសាកលវិទ្យាល័យភូមិន្ទកសិកម្មថា ពិតជា​បាន​អនុវត្ត ហើយនឹងក្លាយជាជំនួយមួយដ៏ល្អក្នុងការបណ្តុះធនធានមនុស្ស ដើម្បីដឹក​នាំវិ​ស័យ​កសិកម្ម​របស់​កម្ពុជាឲ្យកាន់តែរីកចម្រើននាពេលអនាគត៕

CDC ដាក់ឱ្យប្រើប្រាស់សាកល្បងនៃប្រព័ន្ធគ្រប់គ្រង (cdcIPM) ដើម្បីសម្រួលដល់ការចុះបញ្ជី​វិនិយោគ

2024/10/10 01:20:05 pm        116
Facebook Telegram Linkin
ក្រុមប្រឹក្សាអភិវឌ្ឍន៍កម្ពុជា ដាក់ចេញឱ្យប្រើប្រាស់សាកល្បង នូវប្រព័ន្ធគ្រប់គ្រងគម្រោងវិនិយោគកម្ពុជា (cdcIPM) ដែលផ្ដល់ លទ្ធភាពជូនដល់វិនិយោគិន អាចស្នើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ (QIP) ពីគ្រប់ទីកន្លែង នៅតាមរយៈ ប្រព័ន្ធអនឡាញ។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី ១ក្រុមប្រឹក្សាអភិវឌ្ឍន៍កម្ពុជា លើកឡើងក្នុងសុន្ទរកគន្លឹះ ស្ដីអំពី កាលានុវត្តភាពវិនិយោគ និងផែនការអភិវឌ្ឍន៍ហេដ្ឋារចនាសម្ព័ន្ធរបស់កម្ពុជា នៅថ្ងៃទី ៩ ខែ តុលា ឆ្នាំ ២០២៤ នេះ, បានជម្រាបជូន អង្គពិធី អំពីភាពជោគជ័យនៃបេសកកម្មរបស់ក្រុមប្រឹក្សាអភិវឌ្ឍន៍កម្ពុជា ទៅសហរដ្ឋអាម៉េរិក និងកាណាដា ដែលដឹកនាំដោយ ឯកឧត្តមផ្ទាល់ និងមានការចូលរួមពីតំណាងក្រសួងស្ថាប័នពាក់ព័ន្ធ តំណាងសភាពាណិជ្ជកម្មអាម៉េរិកប្រចាំនៅកម្ពុជា វិស័យឯកជន ពីសមាគមឧកញ៉ាកម្ពុជា និងភាគីពាក់ព័ន្ធជាច្រើនទៀត ដើម្បីជំរុញ និងទាក់ទាញវិនិយោគិនពីសហរដ្ឋអាម៉េរិកមកកម្ពុជា។ចំណែកកាលានុវត្តភាពវិនិយោគវិញ, ឯកឧត្តមឧបនាយករដ្ឋមន្ត្រី បានថ្លែងនូវសុន្ទរកគន្លឹះ ស្ដីអំពីកាលានុវត្តភាពវិនិយោគ កិច្ចការងារសម្របសម្រួលវិនិយោគរបស់ក្រុមប្រឹក្សាអភិវឌ្ឍន៍កម្ពុជា និងបច្ចុប្បន្នភាព នៃផែនការអភិវឌ្ឍន៍ហេដ្ឋារចនាសម្ព័ន្ធ របស់ ប្រទេសកម្ពុជាជាដើម ក្នុងនោះក្រុមប្រឹក្សាអភិវឌ្ឍន៍កម្ពុជា ក៏បានដាក់ចេញឱ្យប្រើប្រាស់សាកល្បង នូវប្រព័ន្ធគ្រប់គ្រងគម្រោងវិនិយោគ កម្ពុជា (cdcIPM) ដែលផ្ដល់លទ្ធភាពជូនដល់វិនិយោគិន អាចស្នើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ (QIP) តាមរយៈប្រព័ន្ធអនឡាញ ដែលជាការផ្តល់ភាពងាយស្រួល និងក៏ជាការទាក់ទាញ់អ្នកវិនិយោគឱ្យមកបណ្តាក់ទុកនៅកម្ពុជាបន្ថែម។ជុំវិញបញ្ហានេះដែរ, លោក Paul Clements ប្រធានសភាពាណិជ្ជកម្មអន្តរជាតិកម្ពុជា (IBC) បានរំលេចឡើង នូវការមើល ឃើញអំពីភាពរីកចម្រើនរបស់ប្រទេសកម្ពុជា និងបានជម្រាបជូនអំពីការចូលរួមរបស់សភាពាណិជ្ជកម្មអន្តរជាតិនៃកម្ពុជា ជាមួយ រាជរដ្ឋាភិបាលកម្ពុជា ក្នុងកិច្ចសន្ទនាទៀងទាត់ នៅក្នុងវេទិការាជរដ្ឋាភិបាល-ផ្នែកឯកជន ដោយបានបង្ហាញជូនសមាសភាពវិស័យ ឯកជនថ្មី ដែលជាសមាជិក-សមាជិការបស់ IBC និងបង្ហាញជូនអំពីវឌ្ឍនភាពបច្ចុប្បន្ន របស់ក្រុមការងារសុវត្ថិភាពចរាចរណ៍ ក្រោម គំនិតផ្ដួចផ្ដើមរបស់ឯកឧត្តមឧបនាយករដ្ឋមន្ត្រីផងដែរ។ សូមបញ្ជាក់ថា នៅថ្ងៃដ៏ដែលនេះដែរ, ឯកឧត្តម ឧបនាយករដ្ឋមន្រ្តី ស៊ុន ចាន់ថុល ក៏បានទទួលជួបពិភាក្សាការងារជាមួយគណៈ ប្រតិភូក្រុមហ៊ុន ជេធីអ៊ិន ធឺណេសិនណល ខេមបូឌា (JTI Cambodia) ដឹកនាំដោយលោក Benjamin Cerletti អ្នកគ្រប់គ្រងទូទៅ របស់ក្រុមហ៊ុន, ក្នុងនោះ លោក ក៏បានជម្រាបជូនអំពីបច្ចុប្បន្នភាពរបស់ក្រុមហ៊ុន ក្នុងកិច្ចការងារវិនិយោគនៅកម្ពុជា ក្រោយទទួល បានការអនុញ្ញាតឱ្យចូលមកវិនិយោគនៅកម្ពុជា កាលពីឆ្នាំ ២០១៦ កន្លងទៅ ហើយបច្ចុប្បន្នក្រុមហ៊ុនមានបុគ្គលិកកំពុងបំពេញការងារ ប្រមាណ ៤៥០ នាក់, បន្ថែមពីនេះ ក្រុមហ៊ុនក៏បានបង្ហាញនូវសកម្មភាពចូលរួមជុំការងារអភិវឌ្ឍសង្គម និងសេដ្ឋកិច្ចកម្ពុជាផងដែរ៕ អត្ថបទ៖ សុន រ៉ាឌី

ធនាគារជាតិលើកទឹកចិត្តដល់គ្រឹះស្ថានហិរញ្ញវត្ថុ បើកគណនីសន្សំ និងផ្តល់សេវាហិរញ្ញវត្ថុដល់ MSMEs

2024/10/10 10:17:29 am        130
Facebook Telegram Linkin
ធនាគារជាតិនៃកម្ពុជា លើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុ សម្រួល​ក្នុង​ការ​បើក​គណនី​សន្សំ និងផ្តល់សេវាហិរញ្ញវត្ថុជូន សហគ្រាសធុនមីក្រូ តូច និងមធ្យម និងបុគ្គលស្វ័យនិយោជន៍ ដើម្បី​កំណត់នូវអត្តសញ្ញាណម្ចាស់អាជីវកម្ម និងការទទួលបានសេវាហិរញ្ញវត្ថុ សម្រាប់​ប្រតិបត្តិការ​អាជីវកម្ម​របស់ខ្លួន។ធនាគារជាតិនៃកម្ពុជា ចេញសារាចរណែនាំ ស្តីពីការលើកទឹកចិត្តឱ្យគ្រឹះស្ថានធនាគារ និង​ហិរញ្ញ​វត្ថុ សម្រួលក្នុងការបើកគណនី សន្សំ និងផ្តល់សេវាហិរញ្ញវត្ថុជូនសហគ្រាសធុនមីក្រូ តូច និង​មធ្យម និងបុគ្គលស្វ័យនិយោជន៍ ក្នុងគោលបំណងចូលរួមចំណែកអនុវត្តយុទ្ធ សាស្ត្រជាតិ ស្តីពី​ការ​អភិវឌ្ឍសេដ្ឋកិច្ចក្រៅប្រព័ន្ធឆ្នាំ ២០២៣-២០២៨ ព្រមទាំងជួយ​សម្រួល​ដល់​ប្រតិបត្តិការ​ទូទាត់​សង​ប្រាក់របស់សហគ្រាសធុនមីកូ តូច និងមធ្យម និងបុគ្គលស្វ័យនិយោជន៍ជាដើម។ជុំវិញការបើកគណនីសន្សំ និងផ្តល់សេវាហិរញ្ញវត្ថុនេះ, ធនាគារជាតិនៃកម្ពុជា បាន​ណែនាំ​ដល់​គ្រឹះ​ស្ថានធនាគារ និងហិរញ្ញវត្ថុ ទាំងអស់អនុវត្តដូចខាងក្រោមរួមមាន៖ បើកគណនីឱ្យ​សហគ្រាស​ធុនមីក្រូ និងបុគ្គលស្វ័យនិយោជន៍ ក្នុងរូបភាពជា “ឈ្មោះអាជីវកម្ម”, "ឈ្មោះ​សហ​គ្រាស​" ឬ "ឈ្មោះហាង” ក្នុងករណីសហគ្រាសធុនមីក្រូ និងបុគ្គលស្វ័យនិយោជន៍ បានបំពេញ​បែប​បទ​រដ្ឋបាលពេញលេញ ដើម្បីងាយស្រួលកំណត់អត្តសញ្ញាណ តាមរយៈ​ការ​ចុះ​បញ្ជី​នៅ​ច្រកចេញ​ចូលតែមួយ នៃរដ្ឋបាលថ្នាក់ក្រោមជាតិ ដែលគណនីនោះកំណត់ បាននូវអត្តសញ្ញាណ​ម្ចាស់​អាជីវកម្ម ជាឯកត្តជននោះដោយផ្ទាល់។ សម្រួលនិងលើកទឹកចិត្តឱ្យសហគ្រាសធុនមីក្រូ តូច និងមធ្យម និង បុគ្គលស្វ័យនិយោជន៍ ទទួលបាន​សេវា​ហិរញ្ញ​វត្ថុ​សម្រាប់​ប្រតិបត្តិការ​អាជីវកម្ម​របស់​ខ្លួន​។ទាក់ទិនបញ្ហានៃការបើកគណនីសន្សំ និងផ្តល់សេវាហិរញ្ញវត្ថុជូនសហគ្រាសធុនមីក្រូ តូច និង​មធ្យម​និងបុគ្គលស្វ័យនិយោជន៍នេះ ធនាគារជាតិនៃកម្ពុជា សូមឱ្យ​គ្រឹះ​ហិរញ្ញវត្ថុ​ដែល​ផ្តល់​សេវា​ទាំង​ឡាយ ត្រូវគោរពតាមច្បាប់ និងបទប្បញ្ញត្តិពាក់ព័ន្ធជាធរមាន៕ អត្ថបទ៖ សុន រ៉ាឌី

រាជរដ្ឋាភិបាលបន្តលើកទឹកចិត្តពន្ធដារ ដល់វិស័យអចលនទ្រព្យបន្ថែម

2024/10/10 10:03:57 am        125
Facebook Telegram Linkin
រាជរដ្ឋាភិបាលនិងបន្តលើកទឹកចិត្តពន្ធដារ ចំពោះវិស័យអចលនទ្រព្យ លើពន្ធ​ប្រថាប់​ត្រា​នៃ​ការ​ផ្ទេរ​កម្មសិទ្ធិ ឬសិទ្ធិកាន់កាប់ អចលនទ្រព្យ, ពន្ធលើចំណេញមូលធន, ពន្ធលើអចលនទ្រព្យ, និង​ពន្ធ​លើ​ដីធ្លីមិនបានប្រើប្រាស់ ដែលការលើកលែង ការអនុគ្រោះ និង ការព្យួរពន្ធ ដោយពុំមាន​អានុភាព​ប្រតិសកម្មចំពោះប្រាក់ពន្ធ រួមទាំងទណ្ឌកម្មរដ្ឋបាលផងដែរ។ក្រសួងសេដ្ឋកិច្ច និងហិរញ្ញវត្ថុ ចេញសេចក្តីជូនដំណឹង ស្តីពីការបន្ត និងបន្ថែមការ​លើក​ទឹក​ចិត្ត​ពន្ធដារ ចំពោះវិស័យអចលន ទ្រព្យដូចជា៖ ពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់​កាប់​អចលន​ទ្រព្យ គឺលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិ កាន់កាប់លំនៅឋាន​គ្រប់​ប្រភេទ ដែលមានលក្ខណៈជាបុរី តម្លៃក្រោមឬស្មើ ៧ ម៉ឺនដុល្លារអាមេរិក រហូតដល់ដំណាច់ឆ្នាំ ២០២៥។ អនុគ្រោះពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់លំនៅឋានគ្រប់ប្រភេទ ដែល​មានលក្ខណៈជាបុរី មានតម្លៃលើស ៧ ម៉ឺន ដុល្លារអាមេរិក ដោយអនុញ្ញាត​ឱ្យ​ដក​ទំហំ​ទឹក​ប្រាក់ ៧០ ម៉ឺនដុល្លារអាមេរិក ចេញពីមូលដ្ឋានគិតពន្ធប្រថាប់ត្រា សម្រាប់ការទិញលំនៅ ឋាន ក្នុងគម្រោងអភិវឌ្ឍន៍លំនៅឋានជាបុរី ដែលមានអាជ្ញាបណ្ណអាជីវកម្មអចលនវត្ថុ និងបាន​ចុះបញ្ជី​ត្រឹម​ត្រូវ រហូតដល់ដំណាច់ឆ្នាំ ២០២៥ ក្នុងនោះរាល់ការផ្ទេរកម្មសិទ្ធិ ដែលទទួល​បាន​ការ​លើក​លែង និងអនុគ្រោះពន្ធខាងលើនេះ ត្រូវបំពេញនូវលក្ខខណ្ឌតាមការ កំណត់របស់ក្រសួង។ចំណែកពន្ធលើចំណេញមូលធន និងពន្យារពេលការអនុវត្តពន្ធលើចំណេញមូលធន លើ​រូបវន្ត​បុគ្គល ចំពោះអចលនទ្រព្យ រហូតដល់ដំណាច់ឆ្នាំ២០២៥។ ក្នុងនោះទ្រព្យ ៥ ប្រភេទ​ទៀត​រួមមាន​៖ ភតិសន្យា, ទ្រព្យវិនិយោគ, កេរ្តិ៍ឈ្មោះអាជីវកម្ម, កម្មសិទ្ធិបញ្ញា និងរូបិយបណ្ណបរទេស ត្រូវអនុវត្តចាប់ពីឆ្នាំ ២០២៥ តទៅ។ដោយឡែកពន្ធលើអចលនទ្រព្យ៖ លើកលែងប្រាក់ពន្ធលើអចលនទ្រព្យ រួមទាំងទណ្ឌកម្មរដ្ឋបាល (ពន្ធបន្ថែម និងការប្រាក់) ក្នុងករណីអចលនទ្រព្យ ឬចំណែកណាមួយនៃអចលនទ្រព្យ ដែល​ជា​ប្រភេទ​ដីកសិកម្ម ដែលប្រជាពលរដ្ឋកំពុងបង្កបង្កើនផល និង សំណង់ដែលបម្រើផ្ទាល់ និងជា​អចិន្ត្រៃយ៍​ដល់​សកម្មភាពកសិកម្ម ដែលអចលនទ្រព្យមានភូមិសាស្ត្រស្ថិតនៅក្នុងរាជធានី និង​ក្រុង នៃខេត្តនានា ដោយពុំចាំបាច់ភ្ជាប់លិខិតអនុញ្ញាត ឬលិខិត​បញ្ជាក់​អំពី​ការ​ប្រើប្រាស់​ដីធ្លី​កសិកម្ម​ពី​ស្ថាប័នមានសមត្ថកិច្ចនោះឡើយ ឱ្យតែនៅលើឯកសារកាន់កាប់ដី (បណ្ណកម្ម​សិទ្ធិ​ឬ​លិខិត​ផ្ទេរសិទ្ធិ) បានបញ្ជាក់ថាជាប្រភេទដីកសិកម្ម។ ចំពោះអចលនទ្រព្យដូចនៅ ក្នុងតំបន់​ខាង​លើ​នេះដែ​រ ប៉ុន្តែមានចំណែកណាមួយ នៃដីធ្លីត្រូវបានយកមកសាងសង់ផ្ទះ អគារ ឬសំណង់​ផ្សេង​ៗ ដែលមិនបម្រើផ្ទាល់ និងជាអចិន្ត្រៃយ៍ដល់សកម្មភាពកសិកម្ម នឹងមិន​ត្រូវ​បាន​លើក​លែ​ង​ពន្ធ​នោះ​ទេ​។ក្រៅពីគោការណ៍ខាងលើនេះ, ក្រសួងសេដ្ឋកិច្ចនិងហិរញ្ញវត្ថុ ក៏បាន​កំណត់​លើ​អចលន​ទ្រព្យ​ផ្សេងៗ​ទៀតដូចជា អចលនទ្រព្យ ដែលមានឯកសារកាន់កាប់ដី, អចលនទ្រព្យដែលបានចុះបញ្ជី, អចលនទ្រព្យ (មានបណ្ណកម្មសិទ្ធិ ឬគ្មានបណ្ណកម្មសិទ្ធិ) គឺត្រូវអនុវត្ត តាមលក្ខខណ្ឌមួយចំនួន នៅក្នុងសេចក្តីជូនដំណឹងនេះដែរ។ ចំណែកពន្ធលើដីធ្លីមិនបានប្រើប្រាស់វិញ, ត្រូវបានព្យួរ​ការ​អនុវត្ត រហូតដល់ដំណាច់ឆ្នាំ ២០២៤ មានន័យថា កម្មសិទ្ធិករ ឬអ្នកកាន់កាប់ ឬអ្នក​ទទួល​ប្រយោជន៍​ចុង​ក្រោយ ពុំមានកាតព្វកិច្ចប្រកាសបង់ ពន្ធរហូតដល់ដំណាច់ឆ្នាំ ២០២៤ ។ ក្រសួងសេដ្ឋកិច្ច និងហិរញ្ញវត្ថុ នឹងចេញលិខិតបទដ្ឋានគតិយុត្ត ស្ដីពីពន្ធលើដីធ្លីមិនបានប្រើ ប្រាស់ ដោយបន្ធូរបន្ថយនូវលក្ខខណ្ឌលើកលែងពន្ធនេះ សម្រាប់ការអនុវត្តចាប់ពីឆ្នាំ២០២៥ តទៅ គឺជាប្រភេទដីដែលជាកម្មវត្ថុ បាន កំណត់នៅក្នុងសេចក្តីជូនដំណឹងនេះ៕ អត្ថបទ៖ សុន រ៉ាឌី

រាជរដ្ឋាភិបាលបន្ត និងបន្ថែមការលើកទឹកចិត្តពន្ធដារ​ ចំពោះវិស័យអចលនទ្រព្យ ដើម្បីកាត់បន្ថយបន្ទុកចំណាយរបស់ក្រុមហ៊ុនអភិវឌ្ឍន៍លំនៅស្ថាន និងប្រជាពលរដ្ឋ

2024/10/09 04:18:26 pm        457
Facebook Telegram Linkin
ភ្នំពេញ៖​ ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី៩ តុលា ឆ្នាំ២០២៤នេះ បានចេញ​សេចក្តី​ជូន​ដំណឹងថ្មីមួយ ស្តីពីការបន្ត និងបន្ថែមការលើកទឹកពន្ធដារ ចំពោះវិស័យអចលនទ្រព្យ ស្រប​តាម​ការ​សម្រេចរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ការបន្ត និងបន្ថែមការលើកទឹកចិត្តពន្ធដារ​ ចំពោះវិស័យអចលនទ្រព្យ ដើម្បីកាត់បន្ថយ​បន្ទុក​ចំណាយរបស់ក្រុមហ៊ុនអភិវឌ្ឍន៍លំនៅស្ថាន និងប្រជាពលរដ្ឋ។

បណ្ដាញសង្គម

ព័ត៌មានថ្មីៗ

កម្មវិធីពានរង្វាន់សហគ្រិនខ្មែរឆ្នាំ២០២៤ ឆ្លុះបញ្ចាំងឧត្តមភាពសហគ្រិនភាពនៅកម្ពុជា
11/26/2024 10:11 PM
Facebook Telegram Linkin
មហាសេដ្ឋិនីដែលជាប់ទោសប្រហារជីវិត នៅវៀតណាម អង្វរតុលាការសុំរស់រាន
11/26/2024 09:11 PM
Facebook Telegram Linkin
បុរស ៣នាក់ ស្លាប់ ក្រោយបើករថយន្តផុតស្ពានមិនទាន់សាងសង់ហើយ នៅឥណ្ឌា ដោយសារ Google Maps បង្ហាញផ្លូវខុស
11/26/2024 09:11 PM
Facebook Telegram Linkin
ពលរដ្ឋហ្កាហ្សា និយាយពីការលំបាក ស្របពេលជួបកង្វះខាតស្បៀងអាហារ និងអាកាសធាតុត្រជាក់ខ្លាំង
11/26/2024 09:11 PM
Facebook Telegram Linkin
ពលរដ្ឋអ៊ីស្រាអែលជម្លៀសខ្លួនព្រួយបារម្ភថាបទឈប់បាញ់ជាមួយក្រុមហេសបូឡា នឹងមិននាំសន្តិសុខយូរអង្វែងនោះទេ
11/26/2024 09:11 PM
Facebook Telegram Linkin
ក្រិកអំពាវនាវឲ្យបង្កើនតួនាទីការពារជាតិ នៅ EU និងកិច្ចសហប្រតិបត្តិការជាមួយអង្គការណាតូ
11/26/2024 09:11 PM
Facebook Telegram Linkin
កម្ពុជាប្តេជ្ញាកាត់បន្ថយឧស្ម័នផ្ទះកញ្ចក់ឲ្យដល់ចំណុច ០% នៅឆ្នាំ២០៥០
11/26/2024 09:11 PM
Facebook Telegram Linkin
កម្ពុជា​-កូរ៉េ ឯកភាពរួមគ្នាទប់ស្កាត់បទល្មើស និងបណ្តុះបណ្តាលសមត្ថភាពមន្រ្តី
11/26/2024 08:11 PM
Facebook Telegram Linkin
ប្រទេសតាជីគីស្ថានប្រកាសថានឹងបង្កើតតំណាងស្ថានទូតជាផ្លូវការរបស់ខ្លួននៅក្នុងព្រះរាជាណាចក្រកម្ពុជានៅឆ្នាំ២០២៥ ខាងមុខនេះ
11/26/2024 08:11 PM
Facebook Telegram Linkin
ប្រធានសិទ្ធិមនុស្ស UN បង្ហាញក្តីកង្វល់ខ្លាំងចំពោះការឡើងកម្តៅជម្លោះនៅក្នុងប្រទេសលីបង់
11/26/2024 07:11 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.