BTV NEWS

ឯកឧត្តម ស៊ុន ចាន់ថុល អញ្ជើញបើកកម្មវិធីផ្សព្វផ្សាយនិងបណ្តុះបណ្តាលអំពី នីតិវិធីនៃការចុះបញ្ជីគម្រោងវិនិយោគតាមប្រព័ន្ធគ្រប់គ្រងគម្រោងវិនិយោគកម្ពុជា cdcIPM និងការប្រើប្រាស់ហត្ថលេខា និងត្រាអេឡិចត្រូនិក (e-Signature & e-Stamp)

រយៈពេល៧ខែ, កម្ពុជានាំចេញទំនិញទៅសហរដ្ឋអាមេរិក មានទឹកប្រាក់ជិត ៧ពាន់លានដុល្លារ

ក្នុងរយៈពេល ៧ខែ, CDC អនុម័តគម្រោងវិនិយោគបានចំនួន ៤៤០គម្រោង មានទុន ៦,៧ ប៊ីលានដុល្លារ

វិស័យកសិកម្មមានកំណើន ១,២% គាំទ្រដោយកំណើនផលដំណាំ និងធនធានជលផល

សេដ្ឋកិច្ច និង កសិកម្ម

សម្តេចតេជោ នឹងទាក់ទាញវិនិយោគិនអារ៉ាប់អេមីរ៉េតបន្ថែមមកវិនិយោគនៅកម្ពុជា

កំពង់ឆ្នាំង៖ សម្តេចតេជោ ហ៊ុន សែន នឹងមានជំនួបជាមួយរដ្ឋមន្រ្ដីពាណិជ្ជកម្មប្រទេសអារ៉ាប់អេមីរ៉េត ដែលសម្ដេចនឹងលើកឡើងពីការទាក់ទាញវិនិយោគបន្ថែមទៀតមកកាន់កម្ពុជាជាពិសេសលើវិស័យកសិកម្ម ហើយនេះក៏ជាឱកាសបង្កើតការងារបន្ថែមទៀតនៅកម្ពុជាផងដែរ។ក្នុងពិធីសំណេះសំណាលជាមួយកម្មករ កម្មការិនីសរុបជិត ២ម៉ឺននាក់ នៅស្រុកកំពង់ត្រឡាច ខេត្តកំពង់ឆ្នាំង នៅថ្ងៃទី៨ ខែមិថុនា សម្តេចតេជោ ហ៊ុន សែន មានប្រសាសន៍ថា នៅរសៀលថ្ងៃទី៨នេះ សម្តេចតេជោ នឹងមានការចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាត់អារ៉ាប់រួម។សូមបញ្ជាក់ថា កម្ពុជា-អេមីរ៉ាតអារ៉ាប់រួមប្រកាសបើកជាផ្លូវការអំពីការចាប់ផ្តើមដំណើរការចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ កាលពីថ្ងៃទី២៤តុលា ឆ្នាំ២០២២។ កិច្ចព្រមព្រៀងនេះ មានបញ្ចូលការចរចាលើការធ្វើសេរីភាវហូបនីយកម្មទំនិញ សេវាកម្ម ការជំរុញការវិនិយោគ និងការចរចាលើបញ្ញត្តិសំខាន់ៗ មួយចំនួនដូចជា ពាណិជ្ជកម្មតាមប្រព័ន្ធអេឡិចត្រូនិក របាំងបច្ចេកទេសពាណិជ្ជកម្ម អនាម័យនិងភូតគាមអនាម័យ កម្មសិទ្ធិបញ្ញាជាដើម៕ អត្ថបទ៖ វណ្ណៈ

កម្ពុជា ពិភាក្សាលើសេចក្តីព្រាងផែនការសកម្មភាពនៃការកសាងសហគមន៍វាសនារួមកម្ពុជា-ចិន

ភ្នំពេញ៖ ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី, រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការកម្ពុជា នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន នៅថ្ងៃទី៦ ខែមិថុនា ឆ្នាំ២០២៣នេះ បានដឹកនាំកិច្ចប្រជុំអន្តរក្រសួង ជាមួយក្រសួងស្ថាប័នពាក់ព័ន្ធចំនួន ៣០ ដើម្បីពិភាក្សាលើខ្លឹមសារនៃសេចក្តីព្រាងផែនការសកម្មភាពស្តីពីការកសាងសហគមន៍វាសនារួមកម្ពុជា-ចិន នៅក្នុងយុគសម័យថ្មី ឆ្នាំ២០២៤-២០២៨ រវាងរាជរដ្ឋាភិបាលកម្ពុជា និងរដ្ឋាភិបាលនៃសាធារ ណរដ្ឋប្រជាមានិតចិន។សេចក្តីព្រាងផែនការសកម្មភាពនេះ ត្រូវបានរៀបចំឡើងដើម្បីពង្រឹងការកសាងកិច្ចសហប្រតិបត្តិការនៃប្រទេសទាំងពីរ កម្ពុជា-ចិន ដែលជាមិត្តដែកថែប សម្រាប់រយៈពេល ៥ ឆ្នាំតទៅមុខទៀត ឱ្យកាន់តែទូលំទូលាយ, ស៊ីជម្រៅ, កាន់តែជិតស្និត, មានគុណភាពខ្ពស់, កម្រិតខ្ពស់ និងស្តង់ដារខ្ពស់ នៅក្នុងក្របខ័ណ្ឌនៃ កិច្ចសហប្រតិបត្តិការត្បូងពេជ្រ ដែលជាលទ្ធផលនៃជំនួបកំពូលនៅកប្រទេសចិន រវាងថ្នាក់ដឹកនាំនៃប្រទេសទាំងពីរគឺ សម្តេចតេជោ ហ៊ុន សែន នាយករដ្ឋមន្រ្តី និង ឯកឧត្តម Xi Jinping ប្រធានាធិបតីនៃសាធារណរដ្ឋប្រជាមានិតចិន កាលពីថ្ងៃទី១០ ខែកុម្ភៈ ឆ្នាំ២០២៣ កន្លងទៅ។ សេចក្តីព្រាងផែនការសកម្មភាពស្តីពីការកសាងសហគមន៍វាសនារួម កម្ពុជា-ចិន នៅក្នុងយុគសម័យថ្មី ដែលជាក្របខ័ណ្ឌ នៃកិច្ចសហប្រតិបត្តិការត្បូងពេជ្រ កម្ពុជា-ចិន ខាងលើនេះ គ្របដណ្តប់លើវិស័យអាទិភាពចំនួន ៦ រួមមាន៖ កិច្ចសហប្រតិបត្តិការនយោបាយ, គុណភាព និងសមត្ថភាពផលិតកម្ម, កសិកម្ម, ថាមពល, សន្តិសុខ និងការផ្លាស់ប្តូរប្រជាជន និងប្រជាជន។ សេចក្តីព្រាងផែនការសកម្មភាពនេះ នឹងត្រូវដាក់ជូនថ្នាក់ដឹកនាំនៃប្រទេសទាំងពីរ ពិនិត្យ និងសម្រេច នាពេលខាងមុខ។គួរបញ្ជាក់ដែរថា កាលពីខែ មេសា ឆ្នាំ២០២៣ កន្លងទៅនេះ ឯកឧត្តម Nong Rong ឧបការីរដ្ឋមន្ត្រីការបរទេស នៃសាធារណរដ្ឋប្រជាមានិតចិន ដែលទើបនឹងត្រូវបានតែងតាំងជាអគ្គលេខាធិការចិនថ្មី នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន បានដឹកនាំគណៈប្រតិភូចិនមកបំពេញទស្សនកិច្ចនៅប្រទេសកម្ពុជា និងបានជួបពិភាក្សា ជាមួយឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី, រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការកម្ពុជា នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ដើម្បីជំរុញការរៀបចំសេចក្តីព្រាងផែនការសកម្មភាពស្តីពីការកសាងសហគមន៍វាសនារួម កម្ពុជា-ចិន នៅក្នុងយុគសម័យថ្មីនេះ ឱ្យបានឆាប់ តាមដែលអាចធ្វើទៅបាន ដើម្បីជាឧត្តមប្រយោជន៍នៃប្រទេសទាំងពីរកម្ពុជា-ចិន៕អត្ថបទ៖ សុន រ៉ាឌី

រដ្ឋាករទឹកស្វយ័ត កំពុងតភ្ជាប់បណ្តាញទឹកទៅតំបន់កំពុងខ្វះខាត នៅរាជធានីភ្នំពេញ

ភ្នំពេញ៖ រដ្ឋាករទឹកស្វយ័តក្រុងភ្នំពេញ ចុះហត្ថលេខាលើកិច្ចសន្យាជាមួយក្រុមហ៊ុនក្រៅស្រុកមួយ សម្រាប់ការផ្គត់ផ្គង់បំពង់មេនាំទឹក និងបំពង់មេចែកចាយទឹក ក្នុងកញ្ចប់ថវិកាសរុបប្រមាណជា ៥០ លានអឺរ៉ូ នៃគម្រោងសាងសង់រោងចក្របាក់ខែងជំហានទី២ ដើម្បីយកមកតភ្ជាប់បណ្តាញទឹកស្អាតក្នុងរាជធានីភ្នំពេញ។ ឯកឧត្តម ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ លើកឡើងក្នុងពិធីចុះហត្ថលេខាលើកិច្ចសន្យាផ្គត់ផ្គង់បំពង់ដែក និងដំណភ្ជាប់ដែកចំនួនពីរកញ្ចាប់ នៃគម្រោងផ្គត់ផ្គង់ទឹកស្អាតបាក់ខែងជំហានទី២ រវាងរដ្ឋាករទឹកស្វយ័តក្រុងភ្នំពេញ និងក្រុមហ៊ុនផ្គត់ផ្គង់ សាំងហ្គោបេនប៉ាម នៅថ្ងៃទី ៦ ខែ មិថុនា ឆ្នាំ ២០២៣ នេះថា សម្រាប់គម្រោងនៃការតភ្ជាប់បំពង់មេទាំងពីរនេះ គឺជាការបន្តនៃការភ្ជាប់បំពង់បាក់ខែងជំហានទី១ ដើម្បីយកទឹកពីបាក់ខែងជំហានទី២ ទៅផ្គត់ផ្គង់នៅតំបន់បែកខាងលិច និងខាងត្បូងរាជធានីភ្នំពេញ ហើយមកដល់ពេលនេះ ចំពោះការដាក់បំពង់មេនាំទឹកនេះ រដ្ឋាករទឹកស្វយ័តក្រុងភ្នំពេញ បានចុះហត្ថលេខាជាមួយក្រុមហ៊ុនខាងលើរួមមាន ការផ្គត់ផ្គង់បំពង់មេនាំទឹក ប្រវែងប្រមាណ ២០គីឡូម៉ែត្រ មានមុខកាត់ពី ៨០០ ដល់ ១ ៦០០ មីលីម៉ែត្រ ក្នុងកញ្ចប់ថវិកា ៣៥ លានអឺរ៉ូ ។ ចំណែកបំពង់មេចែកចាយទឹក ប្រវែងប្រមាណ ៥០គីឡូម៉ែត្រ មានមុខកាត់ពី ៣០០ ទៅដល់ ៦០០ មីលីម៉ែត្រ ក្នុងកញ្ចប់ថវិកា ១៤ លានអឺរ៉ូ។ឯកឧត្តម បន្តឲ្យដឹងថា ចំពោះបំពង់មេទាំងពីរប្រភេទនេះ នឹងត្រូវនាំមកដល់រាជធានីភ្នំពេញក្នុងរង្វង់ ខែតុលា ឆ្នាំ ២០២៣ ខាងមុខនេះ ក្នុងនោះបន្ទាប់ពីបំពង់បាននាំមកដល់ រដ្ឋាករទឹកស្វយ័តក្រុងភ្នំពេញនឹងយកបំពង់ទាំងនោះ ទៅដំឡើងនៅតាមទំនុបកប់ស្រូវ រហូតដល់ផ្លូវជាតិលេខ ៤ ដោយនឹងត្រូវការពេលវេលាជាង ១ ឆ្នាំ ដើម្បីដាក់បំពង់នេះឲ្យអស់ សំដៅធានាពង្រីកបណ្តើរៗ ដើម្បីផ្គត់ផ្គង់ទឹកស្អាតដល់អតិថិជនដែលកំពុងខ្វះខាតទឹក។សូមបញ្ជាក់ថា គម្រោងសាងសង់រោងចក្រផលិតទឹកស្អាតបាក់ខែងជំហានទី២ មានសមត្ថភាពផលិតប្រមាណ ១៩៥ ពាន់ម៉ែត្រគីប ក្នុងមួយថ្ងៃ ដោយរោងចក្រនេះបានចាប់ផ្តើមសាងសង់កាលពីខែធ្នូ ឆ្នាំ ២០២២ ស្ថិតក្រោមហិរញ្ញប្បទានរបស់រាជរដ្ឋាភិបាលកម្ពុជា, របស់រដ្ឋាករទឹកស្វយ័តក្រុងភ្នំពេញ ជាមួយទីភ្នាក់ងារបារាំងសម្រាប់អភិវឌ្ឍន៍ (AFD) មកដល់ពេលនេះរោងចក្របាក់ខែងជំហានទី២ សម្រេចបានប្រមាណជា ៩០ ភាគរយហើយ នៃទំហំគម្រោងទាំងមូល ដោយគម្រោងនេះនឹងដាក់ឲ្យដំណើរនៅដើមឆ្នាំ ២០២៤ ខាងមុខ៕អត្ថបទ៖ សុន រ៉ាឌី

ផ្លួវល្បឿនលឿនភ្នំពេញ-បាវិត នឹងជួយលើកកម្ពស់វិនិយោគ ពាណិជ្ជកម្ម ការដឹកជញ្ជូន និងទេសចរណ៍

ភ្នំពេញ៖ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន មានប្រសាសន៍ថា ផ្លួវល្បឿនលឿនភ្នំពេញ-បាវិត នឹងជួយលើកកម្ពស់ វិនិយោគ ពាណិជ្ជកម្ម ក្នុងតំបន់ស្រុកល្វាម ខេត្តកណ្តាល និងការដឹកជញ្ជូន និងទេសចរណ៍ រវាងកម្ពុជា និងវៀតណាម។ថ្លែងក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-បាវិត នៅថ្ងៃទី៧ ខែមិថុនា ឯកឧត្តម ស៊ុន ចាន់ថុល មានប្រសាសន៍ថា ផ្លូវល្បឿនលឿនភ្នំពេញ-បាវិត គឺជាខ្សែសេដ្ឋកិច្ច ដ៏មានសក្តានុពល របស់កម្ពុជា តភ្ជាប់ពីរាជធានីភ្នំពេញ ទៅក្រុងបាវិត។ឯកឧត្តម ស៊ុន ចាន់ថុល ថ្លែងថា៖ “ផ្លូវល្បឿនលឿននេះ នឹងជំរុញឲ្យមានកំណើនវិនិយោគ ពាណិជ្ជកម្ម និងទេសចរណ៍នៅរាជធានីភ្នំពេញ និងក្រុងថ្មី អរិយក្សត្រ នៃខេត្តកណ្តាល ខេត្តព្រៃវែង ខេត្តស្វាយរៀង និងក្រុងបាវិត ជាពិសេសសកម្មភាពពាណិជ្ជកម្ម ទេសចរណ៍ និងការដឹកជញ្ជូនឆ្លងកាត់ព្រំដែនជាលក្ខណៈទ្វេភាគី រវាងកម្ពុជា និងវៀតណាមបន្ថែមទៀត”។បន្ថែមលើនេះ ផ្លូវល្បឿនលឿននេះ ក៏នឹងក្លាយជាផ្នែកមួយយ៉ាងសំខាន់ក្នុងការបំពេញបន្ថែមលើផ្លូវហាយវ៉េលេខមួយ ដែលនឹងជួយសម្រួលបន្ថែមនូវការតភ្ជាប់ប្រទាក់ក្រឡានៃផ្ទៃក្នុងប្រទេស និងការតភ្ជាប់កម្ពុជា ទៅក្នុងក្របខណ្ឌតំបន់អាស៊ាន និងមហាអនុតំបន់មេគង្គ ឲ្យកាន់តែទូលំទូលាយដើម្បីពង្រឹងសក្តានុពេលនៃទីផ្សារ ការប្រកួតប្រជែង និងភាពទន់សេដ្ឋកិច្ច-សង្គម តាមរយៈធ្វើការធ្វើឲ្យកាន់តែស៊ីចង្វាក់គ្នា ។ឯកឧត្តម ស៊ុន ចាន់ថុល លើកឡើងទៀតថា ការតភ្ជាប់ហេដ្ឋារចនាសម្ព័ន្ធ ត្រូវបានចាត់ទុកជាក្បាលម៉ាស៊ីនជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋបានយ៉ាងឆាប់រហ័ស។កសាងដោយក្រុមហ៊ុន សាជីវកម្មស្ពាន និងថ្នល់ចិន ផ្លូវល្បឿនលឿនភ្នំពេញ-បាវិត មានប្រវែង ១៣៥គីឡូម៉ែត្រ ដោយថវិកាវិនិយោគសាងសង់ ប្រមាណ ១,៣៥ប៊ីលានដុល្លារ ក្រោមទម្រង់វិនិយោគសាងសង់-ប្រតិបត្តិការ-ផ្ទេរ(BOT) ដែលមានរយៈពេលប្រតិបត្តិការចំនួន ៥០ឆ្នាំ ដោយគ្រោងបញ្ចប់ការសាងសង់នៅឆ្នាំ២០២៧៕ អត្ថបទ៖ វណ្ណៈ

អាមេរិកបង្កើនការបង្រ្កាបលើហាងឆេងរូបិយបណ្ណគ្រីបតូដោយដាក់បណ្ដឹងទល់នឹងក្រុម Coinbase និង Binance

អាមេរិក៖ និយតករមូលបត្រជាន់ខ្ពស់សហរដ្ឋអាមេរិក បានប្ដឹង platform ក្រុមហ៊ុនហាងឆេងរូបិយបណ្ណគ្រីបតូ Coinbase កាលពីថ្ងៃអង្គារ ទី៦ ឧសភា ជាបណ្ដឹងលើកទី២ ក្នុងពេល២ថ្ងៃទល់នឹងក្រុមហ៊ុនហាងឆេងប្ដូររូបិយបណ្ណគ្រីបតូដ៏ធំមួយក្នុងការបង្ក្រាបកាន់តែខ្លាំងលើឧស្សាហកម្មន៍នេះ និងក្រុមហ៊ុនមួយទៀត ដែលអាចធ្វើឲ្យប៉ះពាល់ដល់ទីផ្សារមួយដែល បានធ្វើប្រតិបត្តិការយ៉ាងទូលំទូលាយនៅក្រៅនិយតកម្ម។គណៈកម្មការមូលបត្រនិងអត្រាប្ដូរប្រាក់ហៅកាត់ថា (SEC) កាលពីថ្ងៃចន្ទ បានប្ដឹងក្រុមហ៊ុនអត្រាប្ដូររូបិយប័ណ្ណ គ្រីបតូ បាយនិន (Binance) ដែលជាហាងឆេងប្ដូររូបិយបណ្ណគ្រីបតូធំបំផុតលើពិភពលោក។ SEC បានចោទប្រកាន់ក្រុមហ៊ុន Binance និងអគ្គនាយករបស់ខ្លួន លោក Changpeng Zhao ពីបទប្រតិបត្តិការខុសច្បាប់នៃការបោកប្រាស់អតិថិជន និងការគេចវេះពីច្បាប់ ។ប្រសិនបើការប្តឹងផ្តល់ទទួលជោគជ័យ បណ្ដឹងទាំងនោះ នឹងអាចកែប្រែទីផ្សាររូបិយបណ្ណគ្រីបតូ ដោយបញ្ជាក់ថាយុត្តាធិការរបស់ SEC ជុំវិញ ឧស្សាហកម្ម ដែលរយៈពេលជាច្រើនឆ្នាំមកនេះ បានបង្ហាញថារូបិយបណ្ណទាំងនោះ មិនតំណាងឲ្យមូលបត្រទេ និងមិនគួរត្រូវបានកំណត់និយតកម្មដោយ SECដែរ។ លោក Kevin O'Brien ដែលជាដៃគូនៅក្រុមហ៊ុន Ford O'Brien Landy និងក្រុមហ៊ុន Ford O'Brien Landy និង ជាអតីតរដ្ឋអាជ្ញាសហព័ន្ធ បាននិយាយថា ករណីទាំងពីរគឺខុសគ្នា ប៉ុន្តែការត្រួតស៊ីគ្នា និង ចំណុចដែលដូចគ្នា គឺ យុទ្ធនាការដ៏ខ្លាំងក្លារបស់ SEC ដើម្បីនាំយករូបិយបណ្ណគ្រីបតូ ឲ្យស្ថិតនៅក្រោមយុត្តាធិការនៃច្បាប់មូលបត្រសហព័ន្ធ ដោយបន្ថែមថា SEC មិនធ្លាប់បានចាត់វិធានការលើក្រុមហ៊ុនរូបិបណ្ណគ្រីបតូសំខាន់ៗបែបនេះពីមុនមកទេ៕

រាជរដ្ឋាភិបាលលើកលែងពន្ធលើអចលនទ្រព្យ ស្ថិតនៅក្រុងបង្កើតថ្មីក្នុងឆ្នាំនេះ

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ ចេញសេចក្តីប្រកាស ស្តីពីការលើកលែងពន្ធលើអចលនទ្រព្យ ក្នុងឆ្នាំ ២០២៣ នេះ ចំពោះអចលនទ្រព្យស្ថិតក្នុងក្រុងបង្កើតថ្មីចំនួន៤ គឺក្រុងឧដុង្គម៉ែជ័យ, ក្រុងអរិយក្សត្រ, ក្រុងសំពៅពូន, និងក្រុងបូកគោ។តាមប្រកាសរបស់ក្រសួងសេដ្ឋកិច្ច និងហិរញ្ញវត្ថុ ស្តីពីការលើកលែងពន្ធអចលនទ្រព្យ ចំពោះអចលនទ្រព្យស្ថិតក្នុងក្រុងឧដុង្គម៉ែជ័យ នៃខេត្តកំពង់ស្ពឺ, ក្រុងអរិយក្សត្រ ខេត្តកណ្តាល, ក្រុងសំពៅពូន ខេត្តបាត់ដំបង់ និងក្រុងបូកគោ នៃខេត្តកំពត គឺត្រូវបានលើកលែងពន្ធលើអចលនទ្រព្យរហូតដល់ដំណាច់ឆ្នាំ ២០២៣។ម្ចាស់អចលនទ្រព្យទាំងអស់ដែលស្ថិតក្នុងក្រុង ត្រូវមានកាតព្វកិច្ចចុះបញ្ជីអចលនទ្រព្យនៅសាខាពន្ធដារខេត្ត ដែលអចលនទ្រព្យស្ថិតនៅ ឬនៅនាយកដ្ឋានពន្ធចលនទ្រព្យ និងអចលនទ្រព្យនៃអគ្គនាយកដ្ឋានពន្ធដារ, ប៉ុន្តែពុំមានកាតព្វកិច្ចដាក់លិខិតប្រកាស និងបង់ពន្ធលើអចលនទ្រព្យរហូតដល់ដំណាច់ឆ្នាំ២០២៣។ក្នុងករណីអចលនទ្រព្យស្ថិតក្នុងក្រុងដូចមានកំណត់ក្នុងប្រការ១ នៃប្រកាសនេះ បានបង់ពន្ធលើអចលនទ្រព្យរួចហើយ ចំនួនប្រាក់ពន្ធដែលបានបង់រួចនោះ ត្រូវបានអនុញ្ញាតឱ្យធ្វើជាឥណទានយោង សម្រាប់យកទៅកាត់កងពន្ធលើអចលនទ្រព្យសម្រាប់ឆ្នាំបន្តបន្ទាប់។ ម្ចាស់អចលនទ្រព្យ ត្រូវស្នើសុំឥណទានពន្ធ លើអចលនទ្រព្យដែលបានបង់រួច នៅសាខាពន្ធដារខេត្ត ដែលអចលនទ្រព្យស្ថិតនៅ ឬនៅអគ្គនាយកដ្ឋានពន្ធដារ សម្រាប់យកទៅកាត់កងពន្ធលើអចលនទ្រព្យសម្រាប់ឆ្នាំជាប់ពន្ធបន្តបន្ទាប់ទៀត។ជុំវិញការលើកលែងពន្ធលើអចលនទ្រព្យនេះ បានបង្ហាញឲ្យឃើញពីការយកចិត្តទុកដាក់ និងគិតគូរដ៏ខ្ពង់ខ្ពស់របស់រាជរដ្ឋាភិបាល ចំពោះសុខទុក្ខ និងជីវភាពរស់នៅប្រចាំថ្ងៃរបស់ប្រជាពលរដ្ឋ ទោះបីជាកាតព្វកិច្ចក៏ដោយ៕អត្ថបទ៖ សុន រ៉ាឌី

ក្រសួងពាណិជ្ជកម្ម សហការជាមួយក្រុមហ៊ុន Alibaba បណ្តុះបណ្តាលជំនាញពាណិជ្ជកម្មតាមប្រព័ន្ធអេឡិចត្រូនិច

ភ្នំពេញ៖ ក្រុមហ៊ុនលក់តាមប្រព័ន្ធអនឡាញប្រទេសចិន Alibaba នឹងបើកថ្នាក់បណ្តុះបណ្តាលតាមប្រព័ន្ធអេឡិចត្រូនិចជួយសហគ្រិន និងម្ចាស់អាជីវកម្មប្រព័ន្ធអេឡិចត្រូនិចខ្មែរ ក្នុងការប្រើប្រាស់បច្ចេកវិទ្យាឌីជីថល ដើម្បីលើកកម្ពស់អាជីវកម្ម និងសេដ្ឋកិច្ចក្នុងតំបន់ឱ្យមានភាពវិជ្ជមានប្រសើរឡើង។ក្នុងសេចក្តីជូនដំណឹងចុះថ្ងៃទី៥ ខែមិថុនា ក្រសួងពាណិជ្ជកម្ម លើកឡើងថា ក្រុមហ៊ុនលក់តាមប្រព័ន្ធអនឡាញប្រទេសចិន Alibaba នឹងបើកថ្នាក់បណ្តុះបណ្តាលតាមប្រព័ន្ធអេឡិចត្រូនិច មួយឈ្មោះថា Alibaba Netpreneur Masterclass នៅថ្ងៃទី២៧ ខែកក្កដា ឆ្នាំ២០២៣ នៅក្រោមកិច្ចសហប្រតិបត្តិការរវាងក្រសួងពាណិជ្ជកម្ម និងក្រុមហ៊ុន Alibaba ។ក្រសួងបន្តថា វគ្គបណ្តុះបណ្តាលនេះ ធ្វើឡើងក្នុងគោលបំណងផ្ដល់ដល់សហគ្រិន និងម្ចាស់អាជីវកម្មប្រព័ន្ធអេឡិចត្រូនិចទាំងអស់ នូវបទពិសោធន៍ និងជំនាញថ្មីៗក្នុងការប្រើប្រាស់បច្ចេកវិទ្យាឌីជីថលដើម្បីលើកកម្ពស់អាជីវកម្ម និង សេដ្ឋកិច្ចក្នុងតំបន់ឱ្យមានភាពវិជ្ជមានប្រសើរឡើង។តាមរយៈថ្នាក់បណ្តុះបណ្តាលនេះ សហគ្រិន និងម្ចាស់អាជីវកម្មនឹងយល់ដឹងកាន់តែស៊ីជម្រៅអំពីសេដ្ឋកិច្ចឌីជីថល ស្វែងយល់ពីជំហានផ្សេងៗដើម្បីជម្រុញអាជីវកម្មអោយមានភាពយូរអង្វែងក្នុងសម័យឌីជីថល ទទួលបានវិញ្ញាបនបត្របញ្ជាក់ការសិក្សាក្រោយថ្នាក់បណ្ដុះបណ្ដាលចប់ ទទួលបានឱកាសចូលរួមថ្នាក់បណ្តុះបណ្តាលផ្ទាល់នៅទីស្នាក់ការកណ្តាលក្រុមហ៊ុនAlibaba ប្រទេសចិន សម្រាប់បុគ្គលឆ្នើម។ចំពោះកាលបរិច្ឆេទចូលរៀន នឹងចាប់ផ្តើមពី ថ្ងៃទី ២៧ ខែកក្កដា ឆ្នាំ២០២៣ ដល់ ថ្ងៃទី ២៤ ខែសីហា ឆ្នាំ២០២៣ ដែលមានរយៈពេលពី ៦ ទៅ ៨ ម៉ោងក្នុងមួយសប្តាហ៍ ហើយតម្រូវអោយរៀនជាភាសាអង់គ្លេស។ វគ្គបណ្តុះបណ្តាល ធ្វើឡើងស្របតាមកិច្ចសហប្រតិបត្តិការពីការបង្កើតក្រុមការងារចំពោះកិច្ចសិក្សាពីលទ្ធភាព និងសម្របសម្រួលការនាំចេញផលិតផលខ្មែរទៅកាន់ទីផ្សារអនឡាញបរទេសតាមរយៈថ្នាលបច្ចេកវិទ្យាក្រុមហ៊ុន Alibaba៕ អត្ថបទ៖ វណ្ណៈ

វិស័យធានារ៉ាប់រងនៅកម្ពុជា រក្សាបានកំណើនវិជ្ជមានគួរឱ្យកត់សម្គាល់

ភ្នំពេញ៖ វិស័យធានារ៉ាប់រងនៅកម្ពុជាបានរក្សានូវកំណើនជាវិជ្ជមានរបស់ខ្លួនយ៉ាងប្រសើរ ខណៈដែលបុព្វលាភដុលសរុបមាន ប្រមាណជាង ៩៣ លានដុល្លារអាមេរិក ក្នុងត្រីមាសទី១ ឆ្នាំ២០២៣ កើនឡើង ៥,៧ភាគរយ ធៀបនឹងរយៈពេលដូចគ្នាកាលពីឆ្នាំ២០២២។ទិន្នន័យធានារ៉ាប់រងកម្ពុជាប្រចាំត្រីមាសទី១ ចេញផ្សាយកាលពីថ្ងៃទី២ ខែមិថុនា បង្ហាញថា បុព្វលាភធានារ៉ាប់រងទូទៅ មានចំនួនជាង ៤២លានដុល្លារ កើនឡើង ៦,៥ភាគរយ ធានារ៉ាប់រងអាយុជីវិត មានបុព្វលាភចំនួនជាង ៤៨លានដុល្លារ មានកំណើន៣,៨ភាគរយ និងបុព្វលាភធានារ៉ាប់រងខ្នាតតូចជាង ១,៨លានដុល្លារ កើនឡើង៤៥ភាគរយ។ចំណែកទីផ្សារនៃធានារ៉ាប់រងអាយុជីវិត មាន៥២,២៦ភាគរយ ខណៈធានារ៉ាប់រងទូទៅ មាន៤៥,៧៨ភាគរយ និងធានារ៉ាប់រងខ្នាតតូច ១,៨ភាគរយ ។បើតាមរបាយការណ៍ដដែល ទ្រព្យសកម្មសរុបនៃវិស័យធានារ៉ាប់រង គិតត្រឹមត្រីមាសទី១ ឆ្នាំ២០២៣នេះ មានចំនួន១ពាន់លានដុល្លារ ។ឯកឧត្តម ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា ធ្លាប់បានលើកឡើងថា វិស័យធានារ៉ាប់រងនៅព្រះរាជាណាចក្រកម្ពុជា មានការរីកចម្រើនគួរឲ្យកត់សម្គាល់ នៅក្នុងរយៈពេលប្រាំឆ្នាំចុងក្រោយនេះ។បច្ចុប្បន្ន មានគ្រឹះស្ថានធានារ៉ាប់រងសរុប៩៤ ក្នុងនោះមានក្រុមហ៊ុនធានារ៉ាប់រងទូទៅ១៨ ធានារ៉ាប់រងអាយុជីវិត១៤ ក្រុមហ៊ុនធានារ៉ាប់រងខ្នាតតូច៧ ក្រុមហ៊ុនធានារ៉ាប់រងបន្ត១ ក្រុមហ៊ុនជើងសាធានារ៉ាប់រង១៨ ក្រុមហ៊ុនភ្នាក់ងារធានារ៉ាប់រង៣៤ និងក្រុមហ៊ុនវាយតម្លៃហានិភ័យធានារ៉ាប់រង២ កំពុងធ្វើប្រតិបត្តិការអាជីវកម្មធានារ៉ាប់រងនៅក្នុងប្រទេសកម្ពុជា។អត្ថបទ៖ វណ្ណៈ

ក្រុមនិយតករសហរដ្ឋអាមេរិកប្ដឹង ក្រុមហ៊ុន Binance និងស្ថាបនិក ពីបទរំលោភច្បាប់ការពារវិនិយោគិន

អាមេរិក៖ ក្រុមហ៊ុនអត្រាប្ដូររូបិយបណ្ណគ្រីបតូ បាយនិន (Binance) និងអគ្គនាយករបស់ខ្លួន លោក Changpeng Zhao ត្រូវបានរងការប្ដឹងផ្ដល់ដោយក្រុមនិយតករសហរដ្ឋអាមេរិក កាលពីថ្ងៃចន្ទទី៥មិថុនា ពីបទប្រតិបត្តិការខុសច្បាប់នៃការបោកប្រាស់អតិថិជន និងការគេចវេះពីច្បាប់ ។ ការចោទប្រកាន់នានា បានដាក់សម្ពាធបន្ថែមទៀត លើក្រុមហ៊ុនអត្រាប្ដូរប្រាក់រូបិយបណ្ណគ្រីបតូ ធំបំផុតលើពិភពលោក និងបានធ្វើឲ្យអត្រាប្ដូររូបិយបណ្ណនិមិត្តប៊ីតខ័ញ (Bitcoin) ធ្លាក់ចុះដល់កម្រិតទាបបំផុតក្នុងពេលជិត៣ខែ។ ទីភ្នាក់ងារសារព័ត៌មាននាននា បានរាយការណ៍ថា ក្រុមហ៊ុន Binance ត្រូវបានចោទប្រកាន់ពីបទអនុញ្ញាតឲ្យពលរដ្ឋអាមេរិកជួញដូរ ទោះបីជា platform នេះ មិនត្រូវបានចុះបញ្ជី នៅក្នុងប្រទេសនេះ ជាហាងឆេងអត្រាប្ដូរមូលបត្រក៏ដោយ។ ករណីនេះ ក៏បានចោទក្រុមហ៊ុន Binance បានប្រើប្រាស់ខុសមូលនិធិរបស់អតិថិជនផងដែរ។ បណ្ដឹងស៊ីវិល មួយដែលបានរៀបរាប់ការចោទប្រកាន់ចំនួន១៣ករណី ជាប់ពាក់ព័ន្ធទៅនឹង platforms និង អង្គភាពវិនិយោគផ្សេងទៀត ត្រូវបានគ្រប់គ្រងដោយស្ថាបនិកក្រុមហ៊ុននេះ គឺលោក Changpeng Zhao ដែលត្រូវបានប្ដឹងដោយគណៈកម្មការមូលបត្រនិងអត្រាប្ដូរប្រាក់ហៅកាត់ថា (SEC)។ ដើមបណ្ដឹង SEC កំពុងត្រូវបានតាមដានយ៉ាងដិតដល់បន្ទាប់ពីការចោទប្រកាន់កាលពីខែមីនាដោយនិយតករអាមេរិកមួយផ្សេងទៀតគឺ គណៈកម្មការទទួលបន្ទុកកិច្ចសន្យាទិញលក់ភាគហ៊ុន និងការអត្រាប្តូរមូលបត្រ។ មហាសេដ្ឋី Zhao គឺជាស្ថាបនិករបស់ក្រុមហ៊ុន Binance ហើយក៏ជាមហាសេដ្ឋីដែលល្បីល្បាញបំផុតនៃឧស្សាហកម្មគ្រីបតូផងដែរ។ លោកត្រូវបានគេមើលឃើញថាជាគូប្រជែងដ៏ធំបំផុតរបស់មហាសេដ្ឋីគ្រីបតូដែលទើបក្ស័យធនជនជាតិអាមេរិក លោក Sam Bankman-Fried ៕

ចិនកំពុងជួយជ្រោមជ្រែងលើផ្នែកសណ្ឋាគារ និងការស្រូបយកសក្តានុពលទេសចរណ៍ដល់កម្ពុជា

សៀមរាប៖ ក្រុមហ៊ុនអាកាសចរក្រៅស្រុកមួយ បានចុះអនុស្សរណៈនៃការយោគយល់គ្នា ជាមួយសមាគមសណ្ឋាគារកម្ពុជា លើកិច្ចសហប្រតិបត្តិការទៅវិញទៅមកលើវិស័យសណ្ឋាគារ ដើម្បីលើកកម្ពស់នៃកិច្ចដំណើរការអាជីវកម្មឲ្យកាន់តែប្រសើរ និងក៏ជាការចូលរួមជាមួយរាជរដ្ឋាភិបាល ក្នុងការស្រូបយកភ្ញៀវទេសបរទេសបន្ថែម។លោក ឌិន សុមេធារិទ្ធ ប្រធានសមាគមសណ្ឋាគារកម្ពុជា លើកឡើងនៅក្នុងពិធីចុះហត្ថលេខាលើអនុស្សរណៈនៃការយោគយល់គ្នា រវាងក្រុមហ៊ុនអាកាសចរឡានម៉ី និងសមាគមសណ្ឋាគារកម្ពុជា និងកិច្ចសហប្រតិបត្តិការជាមួយក្រុមហ៊ុន ឡានតុន ក្លជ័ (Lanton Cloud) នៅថ្ងៃទី២ ខែមិថុនា ឆ្នាំ២០២៣នេះថា ជុំវិញវិស័យសណ្ឋាគារ ខណៈក្នុងវិបត្តិជំងឺកូវីដ ១៩ កន្លងមកនេះ សណ្ឋាគារនៅកម្ពុជាបានផ្អាកអាជីវកម្មស្ទើរតែទាំងស្រុង ក្នុងនោះបន្ទាប់ពីស្ថានភាពល្អប្រសើរ វិស័យសណ្ឋាគារនៅកម្ពុជាក៏បានដំណើរការឡើងវិញជាហូរហែរ ដើម្បីបដិសណ្ឋាកិច្ចសម្រាប់ភ្ញៀវជាតិ និងអន្តរជាតិ ស្របពេលវិស័យទេសចរណ៍បានកំពុងកម្រើកឡើងវិញជាបណ្តើរៗផងដែរ។លោក បន្តថា ស្របពេលរាជរដ្ឋាភិបាលបានកំពុងយកចិត្តទុកដាក់អំពីវិស័យទេសចរណ៍ ជាពិសេសក្រោយពីវិបត្តិជំងឺកូវីដ ១៩ នេះ ក្នុងនោះចំពោះកិច្ចសហប្រតិបត្តិការរវាងក្រុមហ៊ុនអាកាសចរឡានម៉ី និងសមាគមសណ្ឋភារកម្ពុជា ពិតជាមានសារៈសំខាន់ណាស់ នៃការចូលរួមស្តារឡើងវិញលើផ្នែកសណ្ឋាគារឡើងវិញ និងឲ្យមានទីផ្សារកាន់តែប្រសើរ នេះជាផ្នែកមួយនៃការចូលរួមលើកកម្ពស់វិស័យសណ្ឋា គារនៅកម្ពុជា ជាពិសេសការចូលរួមចំណែកជាមួយរាជរដ្ឋាភិបាល ក្នុងការស្រូបយកភ្ញៀវទេសចរណ៍បរទេសឲ្យបានកាន់តែច្រើន និងក៏ជាការចូលរួមលើកកម្ពស់ដល់សិប្បកម្ម និងសហគ្រាសដែលផលិត និងវេចខ្ចប់បម្រើឲ្យវិស័យទេសចរណ៍ បើកដំណើរអាជីវកម្មឡើងវិញផងដែរ។សូមបញ្ជាក់ថា ការអនុស្សរណៈនៃការយោគយល់នេះ ភាគីទាំងពីរ ផ្អែកលើវេទិកាពាណិជ្ជកម្មអេឡិចត្រូនិក ឡានតុន ក្លាដ៏ (Lanton Cloud) និងលើកកម្ពស់កិច្ចសហប្រតិបត្តិការទៅវិញទៅមក ក្នុងវិស័យសណ្ឋាគារ ទេសចរណ៍ និងខ្សែសង្វាក់ផ្គត់ផ្គង់របស់កម្ពុជា ក្នុងនោះ សមាគមសណ្ឋាគារកម្ពុជា នឹងជួយជ្រោមជ្រែងលើការរៀបចំសន្និសីទផ្សព្វផ្សាយ បង្កើនអត្រាប្រើប្រាស់របស់អតិថិជន និងការគាំទ្រដើម្បីបង្កើតខ្សែសង្វាក់ផ្គត់ផ្គង់សណ្ឋាគារប្រកបដោយប្រសិទ្ធភាព ភាពពេញលេញ ការសន្សំសំចៃនិងភាពប្រកួតប្រជែង។ លើសពីនេះទៅទៀត Lanton Cloud នឹងបើកដំណើរការផ្នែកកក់សណ្ឋាគារនៅលើ APP របស់ខ្លួន ដែលមានឈ្មោះថា Lanton Cloud APP ដើម្បីបន្តធ្វើឱ្យប្រសើរឡើងនូវគុណភាពសេវាកម្ម បង្កើនការឆ្នៃប្រឌិតថ្មីផ្នែកទីផ្សារ និងវិស័យសណ្ឋាគារ ហើយផ្ដល់ឱ្យអតិថិជននូវបទពិសោធន៍ប្រកប ដោយផាសុកភាព ជាមួយនឹងសេវាកម្ម និងផលិតផលដែលមានភាពប្រសើរជាងមុន៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ឯកឧត្ដមរដ្ឋមន្ត្រី ជា វ៉ាន់ដេត អញ្ជើញជាចូលរួមកម្មវិធីជាមួយវិស័យឯកជននិងទីភ្នាក់ងារជំនាញនៃប្រទេសម៉ាឡេស៊ី

បុរសប៉ាឡេស្ទីនជម្លៀសខ្លួនពិបាកស្វែងរកស្បៀងអាហារសម្រាប់ក្រុមគ្រួសាររបស់លោកនៅតំបន់ហ្កាហ្សា

លោក Trump៖ អ៊ុយក្រែន គឺជាអ្នកសម្រេចដោយផ្ទាល់ ជុំវិញការដោះដូរដែនដី

អេស្ប៉ាញទទួលបានយន្តហោះទម្លាក់ទឹក Canadair ចំនួន ២គ្រឿងពីបារាំង ដើម្បីជួយពន្លត់ភ្លើងឆេះព្រៃ

នគរបាល៖ មនុស្ស ២នាក់ រងរបួសនៅក្នុងហេតុការណ៍បាញ់ប្រហារ ក្បែរវិហារឥស្លាម នៅស៊ុយអែត

ជនប៉ាឡេស្ទីននាំគ្នាប្រញាញចំណីអាហារនៅផ្ទះបាយស៊ុបនៅទីក្រុងហ្កាហ្សា ខណៈវិបត្តិអត់ឃ្លាននៅតែបន្ត

ក្នុងជំនួបរវាងឯកឧត្តម Wang Yi រដ្ឋមន្រ្ដីការបរទេសកម្ពុជា និងថៃ, ភាគីទាំងបីសម្រេចបានកុងសុងស៊ីសចំនួន៥ចំណុច

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់មន្ត្រីចុះសួរសុខទុក្ខ និងផ្តល់អំណោយមនុស្សធម៌ជូនក្រុមគ្រួសាររបស់វីរៈយុទ្ធជន ៦រូប រស់នៅខេត្តសៀមរាប ដែលត្រូវបានចាប់ខ្លួនក្រោយមានបទឈប់បាញ់

រដ្ឋមន្ត្រីអ៊ីស្រាអែលស្តាំនិយមជ្រុលបង្កឲ្យមានការភ្ញាក់ផ្អើល ដោយទៅសួរសុខទុក្ខមេដឹកនាំប៉ាឡេស្ទីន នៅពន្ធនាគារ

លោក Prabowo៖ ថវិកាឆ្នាំ២០២៦ របស់ឥណ្ឌូនេស៊ី ត្រូវបានរៀបចំឡើង ដើម្បីធ្វើឲ្យប្រទេសរឹងមាំ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877