BTV NEWS

ឯកឧត្តម ស៊ុន ចាន់ថុល អញ្ជើញបើកកម្មវិធីផ្សព្វផ្សាយនិងបណ្តុះបណ្តាលអំពី នីតិវិធីនៃការចុះបញ្ជីគម្រោងវិនិយោគតាមប្រព័ន្ធគ្រប់គ្រងគម្រោងវិនិយោគកម្ពុជា cdcIPM និងការប្រើប្រាស់ហត្ថលេខា និងត្រាអេឡិចត្រូនិក (e-Signature & e-Stamp)

រយៈពេល៧ខែ, កម្ពុជានាំចេញទំនិញទៅសហរដ្ឋអាមេរិក មានទឹកប្រាក់ជិត ៧ពាន់លានដុល្លារ

ក្នុងរយៈពេល ៧ខែ, CDC អនុម័តគម្រោងវិនិយោគបានចំនួន ៤៤០គម្រោង មានទុន ៦,៧ ប៊ីលានដុល្លារ

វិស័យកសិកម្មមានកំណើន ១,២% គាំទ្រដោយកំណើនផលដំណាំ និងធនធានជលផល

សេដ្ឋកិច្ច និង កសិកម្ម

កម្ពុជាទទួលបានចំណូលជាង១៦លានដុល្លារ ពីការលក់សំបុត្រឱ្យភ្ញៀវបរទេស ចូលកម្សាន្តនៅរមណីយដ្ឋានអង្គរ

សៀមរាប៖ គ្រឹះស្ថានអង្គរ រកបានចំណូលជាង ១៦ លានដុល្លារ ពីការលក់សំបុត្រឱ្យភ្ញៀវបរទេសចូលកម្សាន្តនៅរមណីយដ្ឋានអង្គរ តំបន់ប្រាសាទកោះកែរ និងសំបុត្រទូកនៅកំពង់ផែចុងឃ្នៀស ក្នុងរយៈពេល៥ខែដើមឆ្នាំ២០២៣។ សេចក្តីប្រកាសព័ត៌មាន របស់គ្រឹះស្ថានអង្គរ បានឱ្យដឹងថា ចាប់ពីខែមករា ដល់ខែឧសភា ឆ្នាំ២០២៣ ភ្ញៀវទេសចរបរទេសដែលទិញសំបុត្រចូលទស្សនារមណីយដ្ឋានអង្គរ មានចំនួនជាង ៣៤ម៉ឺននាក់ កើនឡើង ៦៥៣ ភាគរយបើធៀបនឹងរយៈពេលដូចគ្នាឆ្នាំ២០២២ ខណៈចំណូលដែលគ្រឹះស្ថានអង្គររកពីការលក់សំបុត្រ មានចំនួនជាង ១៦ លានដុល្លារ កើនឡើង ៧៦៥ ភាគរយ។ដោយឡែកក្នុងរយៈពេល ៥ ខែដើមឆ្នាំ២០២៣ នេះគ្រឹះស្ថានអង្គរ រកបានចំណូលពីការលក់សំបុត្រចូលទស្សនាប្រាសាទកោះកែរ ចំនួនជិត៩ម៉ឺនដុល្លារ និងការលក់សំបុត្រទូក ចំនួនជាង ២៦ម៉ឺនដុល្លារ។យោងតាមគ្រឹះស្ថានអង្គរ តម្លៃសំបុត្រចូលទស្សនារមណីយដ្ឋានអង្គរ ត្រូវបានចែកចេញជា ៣ប្រភេទ គឺសំបុត្រចូលទស្សនា ១ថ្ងៃមានតម្លៃ ៣៧ដុល្លារ, រយៈពេល ៣ថ្ងៃតម្លៃ ៦២ដុល្លារ និង ៧ថ្ងៃ មានតម្លៃ ៧២ដុល្លារ។ស្ថិតក្រោមអាណាព្យាបាលបច្ចេកទេសនៃក្រសួងទេសចរណ៍ និងស្ថិតក្រោមអាណាព្យាបាលហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ គ្រឹះស្ថានអង្គរ ប្រមូលចំណូលពីការលក់សំបុត្រចូលទស្សនាប្រាសាទបុរាណ ដល់ទេសចរបរទេស រួមមាន រមណីយដ្ឋានអង្គរ, ប្រាសាទកោះកែរ, និងសំបុត្រទូកនៅកំពង់ផែចុងឃ្នៀស។វិស័យទេសចរណ៍គឺជាសសរស្តម្ភមួយក្នុងចំណោមសសរស្ដម្ភទាំងបួនដែលជួយដល់សេដ្ឋកិច្ចកម្ពុជា។ ទិន្នន័យក្រសួងទេសចរណ៍ បានឱ្យដឹងថា ក្នុងឆ្នាំ២០២២ កម្ពុជាទទួលបានទេសចរអន្តរជាតិប្រមាណជិត ២,២៨លាននាក់ កើនឡើង ១ ០៥៩ភាគរយធៀបឆ្នាំ២០២១៕អត្ថបទ៖ ជា វណ្ណៈ

សម្តេចតេជោ៖ កម្ពុជានឹងក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា មានសុទិដ្ឋិនិយមថា កម្ពុជា នឹងក្លាយជាប្រទេសចំណូលធម្យមកម្រិតខ្ពស់ នៅឆ្នាំ២០៣០ខាងមុខ តាមគោលដៅដែលបានដាក់ចេញ បើទោះបីប្រឈមនឹងភាពមិនច្បាស់លាស់នៃសេដ្ឋកិច្ចសកល បញ្ហាភូមិសាស្រ្តនយោបាយ នៃសង្គ្រាមរវាងអ៊ុយក្រែន និងរុស្ស៊ី និងវិបត្តិអាកាសធាតុក៏ដោយ។ពិធីប្រគល់សញ្ញាបត្រជូននិស្សិតបញ្ចប់ការ សិក្សា ពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ចសរុបជិត ៦ពាន់នាក់ នៅព្រឹកថ្ងៃទី៥ ខែមិថុនា សម្តេចតេជោ ហ៊ុន សែន មានប្រសាសន៍ថា កម្ពុជា កំពុងធ្វើដំណើរឆ្ពោះទៅចំណុចចាក់ចេញផុតពីប្រទេសអភិវឌ្ឍន៍តិចតួច ក្នុងឆ្នាំ២០២៧ និងកំពុងដើរឆ្ពោះជាប្រទេសមានចំណូលមធ្យមកម្រិតខ្ពស់ ។ សម្តេចតេជោ បន្តថា យោងតាមការព្យាករសេដ្ឋកិច្ច កម្ពុជា អាចសម្រេចបានគោលដៅ នៃប្រទេសមានចំណូលធម្យមកម្រិតខ្ពស់ បើទោះបីជាជំងឺរាតត្បាតជំងឺកូវីដ-១៩ និងវិបត្តិប្រែប្រួលអាកាសធាតុក៏ដោយ។សម្តេចតេជោ ហ៊ុន សែន មានប្រសាសន៍ថា៖ “បើទោះបីជាប្រឈមនឹងការប្រែប្រួលអាកាសធាតុ ជំងឺរាតត្បាត និងភាពមិនច្បាស់លាស់នៃភូមិសាស្រ្តនិយោបាយ ខ្ញុំមានជំនឿថា កម្ពុជានឹងចាកចេញពីឋានៈប្រទេសអភិវឌ្ឍន៍តិចតួច ក្នុងឆ្នាំ២០២៧ ហើយយើងនឹងដើរដល់គោលដៅជាប្រទេសមានប្រាក់ចំណូលមធ្យមកម្រិតខ្ពស់ នៅឆ្នាំ២០៣០ ដូចអ្វីដែលបានដាក់ចេញជាគោលដៅនៃការអភិវឌ្ឍប្រកបដោយចីរភាព ដោយសារកំណើនសេដ្ឋកិច្ចដែលយើងមានសព្វថ្ងៃនេះ ផ្តល់ឪកាសឱ្យយើងឈានដល់គោលដៅ”។សូមបញ្ជាក់ថា រាជរដ្ឋាភិបាលកម្ពុជា បានកំណត់ចក្ខុវិស័យក្នុងការប្រែក្លាយកម្ពុជាឲ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលកម្រិតខ្ពស់នៅឆ្នាំ២០៥០។ធនាគារពិភពលោក ចាត់ថ្នាក់កម្ពុជា ជាប្រទេសដែលមានចំណូលមធ្យមកម្រិតទាប ក្នុងឆ្នាំ២០១៦ បន្ទាប់ពីប្រទេសកម្ពុជា មានកំណើនសេដ្ឋកិច្ចរយ:ពេលពីរទសវត្ស ជាប្រទេសឈានមុខក្នុងការកាត់បន្ថយភាពក្រីក្រ។ បើតាមការចាត់ចំណាត់ថ្នាក់ដោយធនាគារពិភពលោកសម្រាប់ឆ្នាំ២០២២-២០២៣បានបង្ហាញថា ប្រទេសដែលមានប្រាក់មធ្យមកម្រិតទាប គឺត្រូវមានចំណូលជាតិដុលក្នុងពលរដ្ឋម្នាក់ៗ ចន្លោះពី ១ ០៨៦ ទៅ៤ ២៥៥ ដុល្លារអាមេរិកក្នុងមួយឆ្នាំ។ ចំណែក ប្រទេសចំណូលមធ្យមកម្រិតខ្ពស់ ត្រូវមានចំណូលជាតិដុលក្នុងពលរដ្ឋម្នាក់ៗចន្លោះពី ៤ ២៥៦ ទៅដល់១៣ ២០៥ ដុល្លារក្នុងមួយឆ្នាំ ខណៈប្រទេសចំណូលខ្ពស់ត្រូវមានលើពី ១៣ ២០៥ ដុល្លារឡើងទៅ៕អត្ថបទ៖ វណ្ណៈ

សម្តេចតេជោ៖ កម្ពុជានឹងចាកចេញពីឋានៈប្រទេសអភិវឌ្ឍន៍តិចតួចនាពេលខាងមុខ

កំពង់ស្ពឺ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា ការរីកចម្រើននៃសេដ្ឋកិច្ចកម្ពុជា នឹងធ្វើឲ្យកម្ពុជាអាចចាកចេញពីឋានៈប្រទេសអភិវឌ្ឍន៍តិចតួចនាពេលខាងមុខ។ ការចាកចេញពីឋានៈប្រទេសតិចតួចនេះ នឹងធ្វើឧ្យកម្ពុជា បាត់បង់ប្រព័ន្ធអនុគ្រោះពន្ធ ដូចជា EBA ជាដើម។ក្នុងពិធីសំណេះសំណាលជាមួយកម្មករកម្មការិនីនិយោជិតនៅខេត្តកំពង់ស្ពឺ កាលពីថ្ងៃទី៤ ខែមិថុនា សម្តេចតេជោ ហ៊ុន សែន មានប្រសាសន៍ថា កម្ពុជានឹងបាត់បង់ប្រព័ន្ធអនុគ្រោះព័ន្ធ EBA នៅសហគមន៍អឺរ៉ុបទាំងស្រុងនៅត្រឹមឆ្នាំ ២០២៦ ឬ ២០២៧។ ការបាត់បង់នេះគឺដោយសារកម្ពុជា មានការរីកចម្រើនផ្នែកសេដ្ឋកិច្ចចំណូលប្រជាពលរដ្ឋបានកើនឡើង។សម្តេចតេជោ ហ៊ុន សែន មានប្រសាសន៍ថា៖ "EBA នឹងបាត់នៅពេលណាមួយដែលប្រទេសរបស់យើងដល់កម្រិតអភិវឌ្ឍន៍។ បើបាត់ពីឥឡូវក្នុងចំនួន២០ភាគរយ វាគង់តែបាត់ ១០០ភាគរយនៅពេលខាងមុខជាមិនខាន អាចប៉ាន់ប្រមាណថាឆ្នាំ ២០២៦ ឬ ២០២៧ ព្រោះប្រទេសរបស់យើងមិនមែនជាប្រទេសអភិវឌ្ឍន៍តិចតួចទៀតទេ។ បន្តិចទៀត ប្រទេសកម្ពុជានឹងចេញផុតពីប្រទេសអភិវឌ្ឍន៍តិចតួច ដូច្នោះរកស៊ីត្រូវតែបង់ពន្ធឲ្យគ្នា ទៅវិញទៅមក"។សម្ដេចបញ្ជាក់ថា ទោះបីជាត្រូវបានដកប្រព័ន្ធអនុគ្រោះ EBA ពីកម្ពុជា ក៏ប៉ុន្តែការនាំចេញនៅតែមានកំណើន។ សម្តេចតេជោ បញ្ជាក់ថា ចិនបើកចំហទីផ្សារសម្រាប់ការស្វាគមន៍កម្ពុជា ក្នុងនោះបានទិញយកផលិតផលកសិកម្មកម្ពុជា១១មុខ រួមមាន៖ ចេក ស្វាយ ស្វាយចន្ទី ត្រីប្រាជាដើម។ ក្រៅពីនេះជប៉ុន និងកូរ៉េ និងបណ្ដាប្រទេសក្នុងតំបន់មួយចំនួនទៀត ក៏កំពុងបង្កើនការទិញផលិតផលកសិកម្មពីកម្ពុជាផងដែរ។ សូមបញ្ជាក់ថា ក្រុមការងារជំនាញរបស់អង្គការសហប្រជាជាតិបានវាយតម្លៃលើកទី១ លើប្រទេសកម្ពុជា លើការចាកចេញពីឋានៈប្រទេសអភិវឌ្ឍន៍តិចតួចកាលពីឆ្នាំ២០២១កន្លងទៅ ហើយការវាយតម្លៃលើកទីពីរ គ្រោងធ្វើឡើងនៅឆ្នាំ២០២៤ ខាងមុខ ៕អត្ថបទ៖ វណ្ណៈ

សម្តេចតេជោ៖ វិស័យកសិកម្ម ដើរតួនាទីសំខាន់ក្នុងការអភិវឌ្ឍសេដ្ឋកិច្ចកម្ពុជា

ភ្នំពេញ៖ សម្តេចតេជោ នាយករដ្ឋមន្ត្រី បានមានប្រសាសន៍ថា វិស័យកសិកម្ម នៅតែដើរតួនាទីសំខាន់ក្នុងការរួមចំណែកអភិវឌ្ឍន៍សេដ្ឋកិច្ចកម្ពុជាបើទោះបីជាវិស័យកសិកម្មនេះរួមចំណែកកាន់តែតូចនៃផលិតផលក្នុងស្រុកសរុបក៏ដោយ។ក្នុងពិធីសំណេះសំណាលជាមួយកម្មករកម្មការិនីនិយោជិតនៅខេត្តកំពង់ស្ពឺ នៅថ្ងៃទី៤ខែមិថុនា សម្តេចតេជោ ហ៊ុន សែន បានមានប្រសាសន៍ថា កម្ពុជាសល់ស្រូវជាងប្រាំមួយលានតោន និងអង្ករជាងបួនលានតោនសម្រាប់នាំចេញបន្ថែម ទៅលើនេះផលិតផលកសិកម្មសក្តានុពលផ្សេងទៀត របស់កម្ពុជាក៏មានកំពុងមានទីផ្សារទៅក្រៅប្រទេសក៏ដូចជាប្រទេសចិនជាដើម។សម្តេចតេជោ ហ៊ុន សែន មានប្រសាសន៍ថា៖ "វិស័យកសិកម្មរបស់យើង មានសមត្ថភាពផ្គត់ផ្គង់ទីផ្សារអន្តរជាតិនូវអង្ករ ក៏ដូចជាស្វាយចន្ទី កៅស៊ូ ជាដើម ហើយការបើកចំហទីផ្សារនៅប្រទេសចិន ជប៉ុន និងកូរ៉េខាងត្បូង គឺជាទីផ្សារសម្រាប់កសិផលកសិកម្មរបស់យើង"។ សូមបញ្ជាក់ថា បច្ចុប្បន្ន វិស័យកសិកម្ម រួមចំណែកដល់ផលិតផលក្នុងស្រុកសរុប ប្រមាណ២០ ភាគរយ ខណៈដែលវិស័យឧស្សាហកម្ម រួមចំណែក៣៨ ភាគរយនិងវិស័យសេវាកម្ម ២០ភាគរយ៕ អត្ថបទ៖ វណ្ណៈ

សម្ដេចតេជោ៖ រក្សាបានសន្តិភាព ជាកត្តាទាក់ទាញវិនិយោគបន្ថែម និងបង្កើតការងារធ្វើកាន់តែច្រើន

កណ្តាល៖ សម្តេចតេជោនាយករដ្ឋមន្ត្រីកម្ពុជា បានលើកឡើងថា ការរក្សាបានសន្តិភាពជាកត្តាទាក់ទាញការវិនិយោគបន្ថែមចូលមកវិនិយោគនៅកម្ពុជានឹងបង្កើតការងារធ្វើកាន់តែច្រើនដល់បងប្អូនប្រជាពលរដ្ឋ។ក្នុងពិធីសំណេះសំណាលជាមួយកម្មករកម្មការិនីនៅសួនឧស្សាហកម្មខេត្តខេមតុន ខេត្តកណ្តាល នៅថ្ងៃទី៣ខែមិថុនា សម្តេចតេជោនាយករដ្ឋមន្ត្រីកម្ពុជា បានអំពាវនាវឲ្យបងប្អូនកម្មករ និយោជិតចូលរួមរក្សាសន្តិភាពដើម្បីមានការអភិវឌ្ឍទទួលបានការវិនិយោគបន្ថែមពីបរទេសបង្កើតការងារធ្វើក៏ដូចជាបង្កើនប្រាក់ចំណូលដល់បងបងប្អូនប្រជាពលរដ្ឋ។ សម្តេចតេជោ ហ៊ុន សែន មានប្រសាសន៍ថា៖ "បើសិនជាសន្តិភាពត្រូវបានធ្វើពង្រឹងល្អ លក្ខខណ្ឌវិនិយោគរបស់យើងកាន់តែប្រសើរ វិនិយោគមកកាន់ ភាគច្រើន និងមានការដោះស្រាយការងារធ្វើឲ្យពលរដ្ឋរបស់យើងតទៅទៀត"។ សូមបញ្ជាក់ថា ចំនួនរោងចក្រសងគ្រាសនៅកម្ពុជា បានកើនឡើងជាបន្តបន្ទាប់ ដោយទទួលបានការវិនិយោគបន្ថែមពីវិនិយោគក្នុងប្រទេស និងពីក្រៅប្រទេសជាបន្តបន្ទាប់។ បច្ចុប្បន្ន កម្មករ-និយោជិត រោងចក្រ សហគ្រាស ទទួលបានប្រាក់ខែយ៉ាងតិចជាង ២០០ដុល្លារអាមេរិក ក្នុងមួយខែ ដែលបានកើនឡើង ពីប្រមាណ ៤០ ដុល្លារ ក្នុងមួយខែ កាលពីឆ្នាំ ១៩៩៧។ ក្នុងរយៈពេល៤ខែដើមឆ្នាំ ២០២៣ កម្ពុជាទទួលបានចំនួនជាង៧ពាន់លានដុល្លារអាមេរិក លើការនាំចេញទំនិញទៅទីផ្សារអន្តរជាតិ ហើយផលិតផលកាត់ដេរសំលៀកបំពាក់ ស្បែកជើង និងផលិតផលធ្វើដំណើរ រួមចំណែកធំជាងគេ នៃការនាំចេញសរុបរបស់កម្ពុជា៕(ដោយ៖ វណ្ណៈ)

ផលិតផលជលផលធម្មជាតិរបស់កម្ពុជា ទទួលបានការអនុញ្ញាតនាំចេញទៅទីផ្សារប្រទេសចិន

ភ្នំពេញ៖ ផលិតផលជលផលធម្មជាតិ ចំនួន១២ប្រភេទ ទទួលបានការអនុញ្ញាតពីរដ្ឋបាលគយ នៃប្រទេសចិន និងអាចនាំចេញទៅទីផ្សារប្រទេសចិននាពេលខាងមុខ។យោងតាមសេចក្តីជូនដំណឹងរបស់ស្ថានទូតចិនប្រចាំនៅកម្ពុជា ចេញផ្សាយនៅថ្ងៃទី១ ខែមិថុនា ក្រុមហ៊ុននាំចេញផលិតផលជលផលធម្មជាតិដំបូងគេ នៅក្នុងប្រទេសកម្ពុជា បានបញ្ចប់ការត្រួតពិនិត្យ និងត្រូវបានអនុញ្ញាតដោយរដ្ឋបាលគយ ហើយក្រុមហ៊ុន បានចុះបញ្ជីដោយជោគជ័យ នៅក្នុងប្រព័ន្ធ "ព័ត៌មានចុះបញ្ជីក្រុមហ៊ុនផលិតអាហារនាំចូលពីបរទេស"។ ក្រុមហ៊ុនដែលទទួលបានការអនុញ្ញាត និងចុះបញ្ជីនាំចេញផលិតផលជលផលធម្មជាតិទៅកាន់ប្រទេសចិនគឺ៖ ក្រុមហ៊ុន KIM CHOU Co., Ltd. Import Export and International Transportation ដែលអាចនាំចេញផលិតផលជលផលធម្មជាតិសំខាន់ៗចំនួន១២ប្រភេទមានដូចជា បង្គា ត្រី អន្ទង់ និងខ្យងជាដើម។ គួររំឭកដែលថា នាខែវិច្ឆិកាឆ្នាំ២០២២ ចិននិងកម្ពុជាបានចុះហត្ថលេខារួមគ្នា លើពិធីសារស្តីពីលក្ខខណ្ឌ តម្រូវការត្រួតពិនិត្យ និងអនាម័យផលិតផលជលផលធម្មជាតិក្នុងការនាំចេញពីប្រទេសកម្ពុជាទៅកាន់ប្រទេសចិន ។ ផលិតផលជលផលធម្មជាតិបានក្លាយជាផលិតផលប្រភេទទី២ នៃវិស័យកសិកម្មនៅក្នុងប្រទេសកម្ពុជា ដែលត្រូវបានអនុញ្ញាតឱ្យនាំចេញទៅកាន់ប្រទេសចិន ក្នុងឆ្នាំ២០២៣នេះ៕ អត្ថបទ៖ វណ្ណៈ

បណ្តាសិប្បកម្មក្នុងស្រុក នឹងចូលរួមផ្សព្វផ្សាយផលិតផលក្នុងព្រឹត្តិការណ៍ប៉ារ៉ាហ្គេម

ភ្នំពេញ៖ សិប្បកម្មក្នុងស្រុក បានត្រៀមផលិត និងវេចខ្ចប់ផលិតផលចំណីអាហារជាច្រើន សម្រាប់ដាក់តាំងពិរព័ណ៍ និងលក់ផលិតផលរបស់ខ្លួន សម្រាប់ផ្គត់ផ្គង់ការហូបចុក ក៏ដូចជាផ្សព្វផ្សាយក្នុងព្រឹត្តិការណ៍កីឡាប៉ារ៉ាហ្គេម បន្ទាប់ពីព្រឹត្តិការណ៍ ស៊ីហ្គេមទី ៣២ ទទួលបានការគាំទ្រពីអតិថិជន។លោក ម៉ៅ ច័ន្ទ តារា ម្ចាស់សិប្បកម្មតារាហ្វូត ដែលផលិត និងវេចខ្ចប់ចំណីអាហារក្នុងស្រុក លើកឡើង នៅថ្ងៃទី១ ខែមិថុនា ឆ្នាំ ២០២៣នេះថា រាជរដ្ឋាភិបាលបានចាត់ទុក សហគ្រាសធុនតូច និងមធ្យមជាវិស័យឆ្អឹងខ្នងនៃសេដ្ឋកិច្ច។លោក បន្តថា ជាក់ស្តែងសិប្បកម្មតារាហ្វូត ដែលផលិត និងវេចខ្ចប់ចំណីអាហារ បានកំពុងចូលរួមចំណែកជាមួយរាជរដ្ឋាភិបាល ទោះបីការផលិតមិនទាន់មានទ្រង់ទ្រាយធំយ៉ាងណា ក៏ជាផ្នែកមួយចូលរួមចំណែកនៃការស្រូបយកវត្ថុធាតុដើមពីវិស័យកសិកម្ម និងការស្រូបយកកំលំាងពលកម្មខ្លះៗមកបម្រើការងារ ដើម្បីផលិតសម្រាប់ការផ្គត់ផ្គង់ និងចែកចាយនៅលើទីផ្សារ។ជាក់ស្តែងនៅក្នុងព្រឹត្តិការណ៍កីឡាស៊ីហ្គេម លើកទី៣២ កន្លងមកនេះ សិប្បកម្មរបស់លោក ទទួលបានការគាំទ្រពីភ្ញៀវជាតិ និងអន្តរជាតិ ដែលជាការលើកទឹកចិត្តដល់សិប្បកម្មរបស់លោក ដើម្បីត្រៀមវេចខ្ចប់ ក្នុងការចូលរួមតាំងពិរព័ណ៍ និងលក់ផលិតផលរបស់ខ្លួន សម្រាប់ផ្គត់ផ្គង់ការហូបចុក ក៏ដូចជាផ្សព្វផ្សាយក្នុងព្រឹត្តិការណ៍កីឡាប៉ារ៉ាហ្គេមនេះជាបន្ត។ជុំវិញការលក់ផលិតផលនេះ ឯកឧត្តមបណ្ឌិត សួង ណយ អគ្គលេខាធិការរងគណៈកម្មាធិការជាតិជំរុញចលនាភូមិ១ ផលិតផល១ បានថ្លែងថា នៅក្នុងព្រឹត្តិការណ៍ស៊ីហ្គេម កន្លងមកនេះ ម្ចាស់អាជីវកម្មមួយចំនួនបានលក់ផលិតផលដាច់កាក់កបគ្រាន់បើ នេះជាកំលាំងចិត្តដែលធ្វើឲ្យ ពួកគាត់បន្តលក់ផលិតផលរបស់ខ្លួននៅក្នុងព្រឹត្តិការណ៍កីឡាប៉ារ៉ាហ្គេមជាបន្តទៀត។នៅក្នុងព្រឹត្តិការណ៍ប៉ារ៉ាហ្គេមខាងមុខនេះ នឹងមានស្តង់លក់ផលិតផលចំនួន ១១ កន្លែង មកដាក់តាំងបង្ហាញ និងលក់ផលិតផលជូនភ្ញៀវទេសជាតិ និងអន្តរជាតិ ក្នុងគោលដៅសំខាន់គឺ ចង់ឲ្យភ្ញៀវទាំងអស់ បានស្គាល់ពីផលិតផលផលខ្មែរ ដែលវេចខ្ចប់ដោយកូនខ្មែរ ដើម្បីជំរុញពង្រីកទីផ្សារបន្ថែម និងជំរុញការនាំចេញ និងក៏ជាការលើកកម្ពស់ដល់សហគមន៍មូលដ្ឋាន បង្កើតការងារ និងការបង្កើតនូវផលិតផលឲ្យបានកាន់តែច្រើនថែមទៀត ៕អត្ថបទ៖ សុន រ៉ាឌី

មូលបត្ររដ្ឋ នឹងត្រូវដាក់ឱ្យជួញដូរនៅលើផ្សារមូលបត្រកម្ពុជានៅត្រឹមត្រីមាសទី៣

ភ្នំពេញ៖ ផ្សារមូលបត្រកម្ពុជា នឹងដាក់ឱ្យជួញដូរមូលបត្របំណុលរដ្ឋ នៅលើការជួញដូរប្រចាំថ្ងៃរបស់ខ្លួនចាប់ពីត្រីមាសទី៣ ឆ្នាំ២០២៣នេះតទៅ បន្ថែមជម្រើសកាន់តែច្រើនសម្រាប់វិនិយោគិនក្នុងការវិនិយោគលើកបណ្ណបំណុលរដ្ឋ ក្រៅពីការជួញដូរតាមរយៈធនាគារជាតិនៃកម្ពុជា។ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុក ជាអគ្គនាយកផ្សារមូលបត្រកម្ពុជា បានឱ្យដឹងនៅថ្ងៃទី១ ខែមិថុនានេះថា ផ្សារមូលបត្រកម្ពុជា បច្ចុបប្បន្ន កំពុងរៀបចំប្រព័ន្ធបន្ថែមដើម្បីឱ្យការជួញដូរលើមូលបត្ររដ្ឋ កាន់តែងាយស្រួល កាន់តែចំណាយតិច កាន់តែមានប្រសិទ្ធិភាព ដែលនឹងធ្វើឱ្យការវិនិយោគលើកមូលបត្ររបស់រដ្ឋ កាន់តែមានភាពទាក់ទាញ។ឯកឧត្តម ហុង សុហួរ ថ្លែងថា៖ “មុខងារថ្មីនេះ ផ្សារមូលបត្រកម្ពុជា រំពឹងថា នឹងអាចចាប់ផ្តើមអនុវត្តបាន នៅត្រីមាសទី៣ខាងមុខ”។បច្ចុប្បន្ន ការជួញដូរមូលបត្ររដ្ឋ គឺធ្វើឡើងតាមរយៈធនាគារជាតិនៃកម្ពុជា ដែលមានឈ្មោះថា National Bank of Cambodia Auction Platform។ វិនិយោគជាស្ថាប័នប៉ុណ្ណោះ ដូចជាគ្រឹះស្ថានមីក្រូហិរញ្ញវត្ថុ និងធនាគារ ជាអ្នកមានសិទ្ធិលើការិវនិយោគលើមូលបត្ររដ្ឋ។បើតាមអគ្គនាយកផ្សារមូលបត្រកម្ពុជា ក្នុងរយៈ ៤ខែដំបូងឆ្នាំ២០២៣នេះ ទំហំជួញដូរមូលបត្រជាមធ្យមប្រចាំថ្ងៃ វរង្វង់ ៣០ម៉ឺនដុល្លារក្នុងមួយថ្ងៃ បានថយចុះពី៥០ម៉ឺនដុល្លារ កាលពីឆ្នាំ២០២២ ដោយសារវិបត្តិសេដ្ឋកិច្ច និងហិរញ្ញវត្ថុ។ក្នុងរយៈពេលបួនខែឆ្នាំ២០២៣ ចំនួនបើកគណនីថ្មី ក្នុងរង្វង់ ១ ពាន់ នាក់ក្នុងមួយថ្ងៃ កើនឡើង ពីប្រមាណ ២០០នាក់ ក្នុងមួយថ្ងៃ កាលពីរយៈពេលដូចគ្នាកាលពីឆ្នាំមុន។បច្ចុប្បន្នមានក្រុមហ៊ុនសរុបចំនួន ១៨ លើទីផ្សារមូលបត្រកម្ពុជា ដែលក្រុមហ៊ុនចំនួនប្រាំបួនបានចុះបញ្ជីភាគហ៊ុន ខណៈដែលក្រុមហ៊ុន៩ផ្សេងទៀត បានចេញមូលបត្រសញ្ញាបណ្ណ។ ក្រុមហ៊ុនបានប្រមូលប្រាក់សរុបចំនួន ជាង៣០០ លានដុល្លារតាមរយៈការផ្តល់ជួញដូររបស់ពួកគេ៕ អត្ថបទ៖ វណ្ណៈ

សេចក្តីព្រាងច្បាប់អំពីកិច្ចព្រមព្រៀងពាណិជ្ជកម្មសេវាកម្មអាស៊ាន ទទួលសម្លេងគាំទ្រចំនួន៩៨

ភ្នំពេញ៖ សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេវាកម្មអាស៊ាន គិតត្រឹមថ្ងៃទី៣០ ខែឧសភា ឆ្នាំ២០២៣ ទទួលបានសំឡេងគំាទ្រជាឯកច្ឆន្ទ ៩៨ សំឡេង ក្នុងសម័យប្រជុំពេញអង្គរដ្ឋសភាលើកទី៩ នីតិកាលទី៦ ដែលដឹកនាំដោយសម្តេចអគ្គមហាពញាចក្រី ហេង សំរិន ប្រធានរដ្ឋសភា។នៅលើផេកផ្លូវការរបស់ក្រសួងពាណិជ្ជកម្ម ឯកឧត្តមរដ្ឋមន្រ្តី ប៉ាន សូរស័ក្តិ បានមានប្រសាសន៍ថា សេចក្តីព្រាងច្បាប់នេះ នឹងពង្រឹងការតភ្ជាប់សេដ្ឋកិច្ច និងផ្តល់កាលានុវត្តភាពកាន់តែប្រសើរឡើង សម្រាប់ការអភិវឌ្ឍសេដ្ឋកិច្ចនៅក្នុងសហគមន៍សេដ្ឋកិច្ចអាស៊ាន បង្កើនការធ្វើពាណិជ្ជកម្ម និងការវិនិយោគលើវិស័យពាណិជ្ជកម្មសេវាកម្ម ដោយបង្កើតទីផ្សារ និងសេដ្ឋកិច្ចកាន់តែទូលំទូលាយ តាមរយៈការកាត់បន្ថយការរឹតត្បិតចំពោះពាណិជ្ជកម្មសេវាកម្ម ជាពិសេសបង្កើនការចូលរួមរបស់សហគ្រាសធុន មីក្រូតូច និងមធ្យម ក្នុងសកម្មភាពពាណិជ្ជកម្មសេវាកម្ម ក៏ដូចជាការកាត់បន្ថយគម្លាតនៃការអភិវឌ្ឍរវាងប្រទេសសមាជិកអាស៊ាន ដើម្បីសម្រេចបាននូវសមភាព តុល្យភាព និងនិរន្តរភាពនៃការអភិវឌ្ឍសេដ្ឋកិច្ចសង្គម។ឯកឧត្តមរដ្ឋមន្រ្តី បានបន្តថា នៅពេលដែលសេចក្តីព្រាងច្បាប់នេះចូលជាធរមាន ក្រសួងពាណិជ្ជកម្ម នឹងយកច្បាប់នេះផ្សព្វផ្សាយឱ្យកាន់តែទូលំទូលាយដល់ភាគីពាក់ព័ន្ធទាំងអស់ ជាពិសេសវិស័យឯកជន ព្រមទាំងសហការយ៉ាងជិតស្និទ្ធជាមួយក្រសួងស្ថាប័ន-ពាក់ព័ន្ធ ដើម្បីអនុវត្តកិច្ចព្រមព្រៀងនេះឱ្យមានប្រសិទ្ធភាព ស្របតាមគោលនយោបាយដ៏ថ្លៃថ្លារបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំដ៏ឆ្នើម។តាមលោកជំទាវ និន សាផុន ប្រធានគណៈកម្មការទី៩ និងជាសមាជិកគណៈកម្មាធិការអចិន្រ្តៃយ៍នៃរដ្ឋសភា ក្នុងឱកាសធ្វើសេចក្តីរាយការណ៍លំអិតជូនសម័យប្រជុំពេញអង្គរដ្ឋសភាលើកទី៩ បានគូសបញ្ជាក់ថា សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេវាកម្មអាស៊ាន បានរៀបចំឡើងត្រឹមត្រូវស្របតាមបទប្បញ្ញត្តិនៃរដ្ឋធម្មនុញ្ញ ច្បាប់ បទដ្ឋានគតិយុត្តិពាក់ព័ន្ធនានា និងស្របតាមយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាល នីតិកាលទី៦ នៃរដ្ឋសភា ព្រមទាំងបានគោរពស្នើសុំអង្គប្រជុំដ៏ឧត្ដុង្គឧត្ដមអនុម័ត៕អត្ថបទ៖ ឈិត បូរ៉ាវី

ការអនុវត្តច្បាប់ស្ដីពីការគ្រប់គ្រងពាណិជ្ជកម្មច្បាស់លាស់ នឹងផ្តល់ផលប្រយោជន៍ដល់សេដ្ឋកិច្ច-សង្គម

ភ្នំពេញ៖ ការអនុវត្តច្បាប់ស្ដីពីការគ្រប់គ្រងពាណិជ្ជកម្ម ប្រកបដោយប្រសិទ្ធភាព នឹងរឹតបន្តឹងការគ្រប់គ្រងវិស័យល្បែងពាណិជ្ជកម្ម មានភាពរឹងមាំ និងច្បាស់លាស់ វានឹងផ្តល់ផលប្រយោជន៍ជាអតិបរមា ដល់សេដ្ឋកិច្ចជាតិ ជាពិសេសការបង្កើតការងារ លើកកម្ពស់ការអភិវឌ្ឍ វិស័យទេសចរណ៍ និងបញ្ហាសន្តិសុខសង្គមជាដើម។អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី, រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការគ្រប់គ្រងល្បែងពាណិជ្ជកម្មកម្ពុជា លើកឡើងក្នុងពិធីបើកសិក្ខាសាលាផ្សព្វផ្សាយច្បាប់ស្តីពីការគ្រប់គ្រងល្បែងពាណិជ្ជកម្ម និងលិខិតបទដ្ឋានគតិយុត្តពាក់ព័ន្ធ ជូនអាជា្ញធរសាធារណៈមានសមត្ថកិច្ច នៅរាជធានីភ្នំពេញ និងខេត្តកណ្តាល នៅថ្ងៃទី៣១ ខែឧសភា ឆ្នាំ ២០២៣នេះថា ជាមួយនឹងការរីកចម្រើននៃសកម្មភាពសង្គម-សេដ្ឋកិច្ច, រាជរដ្ឋាភិបាលបានពិនិត្យឃើញនូវភាពចាំបាច់ ក្នុងការរៀបចំនូវបញ្ញត្តិកម្ម លើវិស័យល្បែងពាណិជ្ជកម្ម ក្នុងគោលបំណងធានានូវប្រសិទ្ធភាព នៃការគ្រប់គ្រងមណ្ឌលល្បែងពាណិជ្ជកម្មសមាហរ័ណ និងល្បែងពាណិជ្ជកម្ម ដើម្បីរួមចំណែកជំរុញកំណើនសេដ្ឋកិច្ច, លើកកម្ពស់វិស័យទេសចរណ៍, បង្កើតការងារ, កៀរគរចំណូល, រក្សាសុវត្ថិភាព និងសន្តិសុខសង្គម តាមរយៈការកំណត់នូវដែនសមត្ថកិច្ច, វិធាន និងនីតិវិធីសម្រាប់គ្រប់គ្រងមណ្ឌលល្បែងពាណិជ្ជកម្មសមាហរ័ណ និងល្បែងពាណិជ្ជកម្មជាដើម។ឯកឧត្តមឧបនាយករដ្ឋមន្ត្រី បន្តថា នៅក្នុងដំណើរការរៀបចំច្បាប់ស្តីពីការគ្រប់គ្រងល្បែងពាណិជ្ជកម្ម, រាជរដ្ឋាភិបាលក៏បានគិតគូរផងដែរ អំពីយន្តការសម្រាប់ចូលរួមដោះស្រាយបញ្ហា ពាក់ព័ន្ធនឹងការប្រឆាំងការសម្អាតប្រាក់ និងហិរញ្ញប្បទានភេរវកម្ម ។ ក្នុងស្មារតីនេះ, រាជរដ្ឋាភិបាលបានរៀបចំនូវយន្តការសហប្រតិបត្តិការជាមួយដៃគូពាក់ព័ន្ធ, ទាំងទ្វេភាគី និងពហុភាគី, ដើម្បីគ្រប់គ្រង និងដោះស្រាយកង្វល់នានា ពាក់ព័ន្ធនឹងវិស័យកាស៊ីណូ និងល្បែងពាណិជ្ជកម្មផ្សេងៗ ។ ចំណែក ឯកឧត្តម សៀង សេន អគ្គលេខាធិការរងនៃគណៈកម្មការគ្រប់គ្រងល្បែងពាណិជ្ជកម្មកម្ពុជា លើកឡើងឲ្យដឹងថា ច្បាប់ស្ដីពីការគ្រប់គ្រងពាណិជ្ជកម្ម ដែលបានផ្សព្វផ្សាយនៅថ្ងៃនេះ មានវិសាលភាពគ្រប់ដណ្តប់ទូទាំងព្រះរាជាណាចក្រកម្ពុជា ដោយគ្របដណ្តប់ល្បែងពាណិជ្ជកម្មដែលច្បាប់បានអនុញ្ញាត ជាក់ស្តែងមកដល់ពេលនេះ ក្រុមហ៊ុន/កាស៊ីណូ ដែលបានដាក់ស្នើរសុំ និងផ្តល់អាជ្ញាប័ណ្ណមានចំនួន ១៧៨ ក្រុមហ៊ុន មកដល់បច្ចុប្បន្នក្រុមហ៊ុន/កាស៊ីណូ មានចំនួន ៨៨ បានកំពុងដំណើរការ។សូមបញ្ជាក់ថា ច្បាប់ស្តីពីការគ្រប់គ្រងល្បែងពាណិជ្ជកម្ម ត្រូវបានរដ្ឋសភាអនុម័ត កាលពីថ្ងៃទី ៥ ខែ តុលា ឆ្នាំ២០២០ និងត្រវបានប្រកាសឱ្យប្រើជាផ្លូវការ តាមរយៈព្រះរាជក្រមលេខ នស/រកម/១១២០/០៣១ ចុះថ្ងៃទី ១៤ ខែ វិច្ឆិកា ឆ្នាំ ២០២០ ។ ចំណែកពាក់ព័ន្ធច្បាប់នេះឡើងគឺដើម្បីឆ្លើយតបនឹងស្ថានភាពបច្ចុប្បន្ន នៃការកើនឡើងនូវល្បែងស៊ីសងខុសច្បាប់ និងដើម្បីលើកទឹកចិត្តវិស័យល្បែងពាណិជ្ជកម្មស្របច្បាប់, ដោយរាជរដ្ឋាភិបាលបានបង្កើតក្រុមការងារបង្ក្រាបការលេងល្បែងស៊ីសងខុសច្បាប់គ្រប់ប្រភេទ តាមរយៈសេចក្តីសម្រេច លេខ ៦២ សសរ ចុះថ្ងៃទី១៦ ខែកញ្ញា ឆ្នាំ ២០២២ ដែលដឹកនាំដោយក្រសួងមហាផ្ទៃ និងមានការចូលរួមពីគណៈកម្មការគ្រប់គ្រងល្បែងពាណិជ្ជកម្មកម្ពុជា ផងដែរ៕អត្ថបទ៖ សុន រ៉ាឌី,

បណ្ដាញសង្គម

ព័ត៌មានថ្មីៗ

ឯកឧត្ដមរដ្ឋមន្ត្រី ជា វ៉ាន់ដេត អញ្ជើញជាចូលរួមកម្មវិធីជាមួយវិស័យឯកជននិងទីភ្នាក់ងារជំនាញនៃប្រទេសម៉ាឡេស៊ី

បុរសប៉ាឡេស្ទីនជម្លៀសខ្លួនពិបាកស្វែងរកស្បៀងអាហារសម្រាប់ក្រុមគ្រួសាររបស់លោកនៅតំបន់ហ្កាហ្សា

លោក Trump៖ អ៊ុយក្រែន គឺជាអ្នកសម្រេចដោយផ្ទាល់ ជុំវិញការដោះដូរដែនដី

អេស្ប៉ាញទទួលបានយន្តហោះទម្លាក់ទឹក Canadair ចំនួន ២គ្រឿងពីបារាំង ដើម្បីជួយពន្លត់ភ្លើងឆេះព្រៃ

នគរបាល៖ មនុស្ស ២នាក់ រងរបួសនៅក្នុងហេតុការណ៍បាញ់ប្រហារ ក្បែរវិហារឥស្លាម នៅស៊ុយអែត

ជនប៉ាឡេស្ទីននាំគ្នាប្រញាញចំណីអាហារនៅផ្ទះបាយស៊ុបនៅទីក្រុងហ្កាហ្សា ខណៈវិបត្តិអត់ឃ្លាននៅតែបន្ត

ក្នុងជំនួបរវាងឯកឧត្តម Wang Yi រដ្ឋមន្រ្ដីការបរទេសកម្ពុជា និងថៃ, ភាគីទាំងបីសម្រេចបានកុងសុងស៊ីសចំនួន៥ចំណុច

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់មន្ត្រីចុះសួរសុខទុក្ខ និងផ្តល់អំណោយមនុស្សធម៌ជូនក្រុមគ្រួសាររបស់វីរៈយុទ្ធជន ៦រូប រស់នៅខេត្តសៀមរាប ដែលត្រូវបានចាប់ខ្លួនក្រោយមានបទឈប់បាញ់

រដ្ឋមន្ត្រីអ៊ីស្រាអែលស្តាំនិយមជ្រុលបង្កឲ្យមានការភ្ញាក់ផ្អើល ដោយទៅសួរសុខទុក្ខមេដឹកនាំប៉ាឡេស្ទីន នៅពន្ធនាគារ

លោក Prabowo៖ ថវិកាឆ្នាំ២០២៦ របស់ឥណ្ឌូនេស៊ី ត្រូវបានរៀបចំឡើង ដើម្បីធ្វើឲ្យប្រទេសរឹងមាំ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877