BTV NEWS

សម្តេចធិបតី ណែនាំឱ្យក្រសួងស្ថាប័នពាក់ព័ន្ធត្រៀមឆ្លើយតបជាមួយបាតុភូតធម្មជាតិ El Niño ដែលកម្ពុជាកំពុងទទួលរងឥទ្ធិពល

សម្ដេចធិបតីណែនាំអាជ្ញាធរពាក់ព័ន្ធគ្រប់លំដាប់ថ្នាក់ ត្រួតពិនិត្យ និងគ្រប់គ្រងឱ្យបានចំពោះទំនិញគេចពន្ធ និងខូចគុណភាព ហើយត្រូវសហការគ្នាចាត់វិធានការឱ្យបានច្បាស់លាស់

សម្ដេចធិបតីក្រើនរំឭកអាជ្ញាធរពាក់ព័ន្ធគ្រប់លំដាប់ថ្នាក់ត្រូវបន្តបង្ក្រាប Online Scams មិនត្រូវបន្ធូរដៃឡើយ

សម្ដេចតេជោ ហ៊ុន សែន អញ្ជើញជួបពិភាក្សាទ្វេភាគីជាមួយ ឯកឧត្តម លី ឈាង នាយករដ្ឋមន្ត្រីចិន

ព័ត៌មានសំខាន់ៗ

សម្តេចតេជោ ហ៊ុន សែន អំពាវនាវឱ្យអភិបាលរាជធានី-ខេត្ត ត្រៀមកន្លែង និងLED(ស្លាយ)បញ្ចាំងការប្រកួតបាល់ទាត់ឱ្យប្រជាពលរដ្ឋទស្សនា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី តាមរយៈតេឡេក្រាមផ្លូវការរបស់សម្តេច នៅថ្ងៃទី២៥ ខែមេសា ឆ្នាំ២០២៣នេះ បានអំពាវនាវដល់អភិបាលរាជធានី-ខេត្ត ឱ្យត្រៀមកន្លែង និងផ្តាំងLED(ស្លាយ) ដើម្បីផ្សាយបន្តផ្ទាល់ចេញពីការប្រកួតបាល់ទាត់ពីពហុកីឡដ្ឋាន និងត្រូវប្រកួតជាបន្តបន្ទាប់ក្នុងព្រឹត្តិការណ៍ស៊ីហ្គេម២០២៣ ឱ្យពលរដ្ឋទស្សនាកម្សាន្តសប្បាយ ។សម្តេចបញ្ជាក់ថា «ដោយហេតុថា កន្លែអង្គុយទស្សនាប្រកួតមានចំនួនកំណត់ ចាំបាច់ត្រូវត្រៀមកន្លែង និងស្លាយ បន្តផ្ទាល់ពីការប្រកួតនីមួយៗ ដើម្បីឱ្យប្រជាពលរដ្ឋបានទស្សនាទាំងអស់គ្នា»។សម្តេចតេជោ ហ៊ុន សែន ជំរុញឱ្យអភិបាលរាជធានី-ខេត្ត ត្រូវរៀបចំកន្លែងសមរម្យឱ្យប្រជាពលរដ្ឋបានទស្សនា និងត្រូវរៀបចំឱ្យបានឆាប់បំផុត និងរៀបសំសណ្តាប់ធ្នាប់ឱ្យបានល្អ៕

ពិធីព្រះអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ចាប់ផ្ដើមហើយជាមួយកំណត់ត្រាថ្មីពីស្ថានទូតកម្ពុជាប្រចាំប្រទេសឡាវ ឆ្ពោះទៅចេតិយវត្ត Pra That Laung

ភ្នំពេញ៖ ពិធីព្រះអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានចាប់ផ្ដើមហើយ នៅព្រឹកថ្ងៃទី២៥ ខែមេសានេះ ជាមួយកំណត់ត្រាថ្មី ក្នុងការដង្ហែលើចម្ងាយផ្លូវជិត ៦គីឡូម៉ែត្រ ដែលឆ្ងាយជាងបណ្ដាប្រទេសផ្សេងៗ និងមានអ្នកចូលរួមជាង ១,៥០០នាក់ ដែលចូលរួមដង្ហែផ្ទាល់ និងឈរអបអរសាទរតាមដងផ្លូវ ពីស្ថានទូតកម្ពុជាប្រចាំទីក្រុងវៀងច័ន្ទន៍ ឆ្ពោះទៅចេតិយវត្ត Pra That Laung ។ ពិធីដង្ហែនេះ ធ្វើឡើងក្រោមវត្តមានឯកឧត្តម ហោ សារុន រដ្ឋលេខាធិការក្រសួងទេសចរណ៍ និងជាបេសកជនពិសេស CAMSOC អមដោយលោកជំទាវ ថោង សុគន្ធារី ឯកអគ្គរាជទូតកម្ពុជាប្រចាំប្រទេសឡាវ និងមានការចូលរួមពីឯកឧត្តម Atsaphangthong Siphansone អភិបាលរដ្ឋធានីវៀងច័ន្ទន៍, ឯកឧត្តម Slunaxay Sounnalath រដ្ឋមន្ដ្រីការិយាល័យនាយករដ្ឋមន្ដ្រី និងជារដ្ឋមន្ដ្រីទីស្ដីការគណៈរដ្ឋមន្ដ្រីឡាវ រួមទាំងមន្ដ្រីជាន់ខ្ពស់ឡាវ និងឯកអគ្គរាជទូតបណ្ដាប្រទេសក្នុងតំបន់ប្រចាំទីក្រុងវៀងច័ន្ទន៍ជាច្រើនផងដែរ៕

សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត អញ្ជើញជាអធិបតីក្នុងពិធីបុណ្យបញ្ចុះខណ្ឌសីមាព្រះវិហារ ពុទ្ធាភិសេក និងឆ្លងសមិទ្ធផលនានាក្នុងវត្តព្រះបារមីវង្កតបុរី

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅព្រឹកថ្ងៃទី២៤ ខែមេសា ឆ្នាំ២០២៣នេះ បានអញ្ជើញជាអធិបតីក្នុងពិធីបុណ្យបញ្ចុះខណ្ឌសីមាព្រះវិហារ ពុទ្ធាភិសេក និងឆ្លងសមិទ្ធផលនានាក្នុងវត្តព្រះបារមីវង្កតបុរី ស្ថិតនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ។សម្តេចបានរំលឹកពីការបំផ្លិចបំផ្លាញដល់ឫសគល់លើគ្រប់វិស័យ រាប់ទាំងវិស័យសាសនាផងដែរ នៅក្នុងរបបប្រល័យពូជសាសន៍ខ្មែរក្រហម ប៉ុន្តែទោះជាយ៉ាងណាគេមិនអាចលុបបំបាត់នូវជំនឿក្នុងចិត្តនៃសាសនាដែលគេគោរពបានឡើយ។សម្តេចក៏បានរំលឹកអំពីវត្តវង្កតបុរី ដែលប្រវត្តិគ្រាន់តែជាកន្លែងភៀសសឹកនាសម័យសង្គ្រាមចន្លោះឆ្នាំ១៩៧០ដល់១៩៧៥ និងបានរំលឹកពីការកកើតរីកចម្រើនឡើងវិញនៃទីអារាមនេះ ជាពិសេសប្រវត្តិទាក់ទងយ៉ាងជ្រាលជ្រៅជាមួយនឹងលោកឪពុក អ្នកម្តាយ របស់សម្តេច និងក្រុមគ្រួសារ ដែលបានចូលរួមកសាងនូវទីអារាមមួយនេះ មានការរីកចម្រើន ហើយសម្តេចក៏បានផ្តាំផ្ញើដល់ក្រុមគ្រួសារកូនចៅរបស់សម្តេច កុំបោះបង់ចោល ក៏ដូចជាការពារនូវទីអារាមនេះ និងគប្បីបន្តឧស្សាហ៍មកធ្វើបុណ្យទាននៅទីអារាមនេះ ព្រោះទីអារាមនេះជាទីកន្លែងចេតិយរបស់លោកឪពុក និងអ្នកម្តាយរបស់លោកនៅទីនេះ រួមទាំងសពបងថ្លៃស្រីរបស់សម្តេចក៏ធ្លាប់បានយកមកបូជានៅទីអារាមនេះផងដែរ ដូច្នេះទីអារាមនេះបានក្លាយទៅជាទីអារាមមួយសម្រាប់ត្រកូលហ៊ុន និងត្រកូលឌី។សម្តេចបានមានប្រសាសន៍ថា ឆ្នាំនេះគឺជាខួបលើកទី២៥ឆ្នាំ នៃមរណភាពនៃមាតារបស់សម្តេចហើយក៏ជាខួបលើកទី១០ឆ្នាំនៃមរណភាពនៃបិតារបស់សម្តេចនិងជាខួប១០០ឆ្នាំនៃថ្ងៃកំណើតរបស់លោក ឪពុករបស់សម្តេចដែរ ដូច្នេះកូនចៅនឹងធ្វើពិធីជួបជុំគ្នាតែម្តងនៅថ្ងៃទី១២ ខែកក្កដាខាងមុខ បើទោះបីពេលនោះយុទ្ធនាការបោះឆ្នោតកំពុងប្រព្រឹត្តិទៅ ក៏ប៉ុន្តែរឿងបោះឆ្នោតជារឿងមួយ តែគុណរបស់ឪពុកម្តាយមិនអាចបំភ្លេចបានទេ៕

ស្ថានទូតឥណ្ឌាប្រចាំកម្ពុជាបង្កើតព្រឹត្តិការណ៍ រត់ដើម្បីសមភាព

ភ្នំពេញ៖ ស្ថានទូតឥណ្ឌាប្រចាំកម្ពុជា សហការជាមួយសមាគមក្នុងប្រទេសឥណ្ឌា ក៏ដូចជាសមាគមឥណ្ឌាក្នុងប្រទេសកម្ពុជា និងក្រុមអ្នករត់ រ៉ាន់វីតសាយ 'Run with SAI' បានរៀបចំកម្មវិធី រត់ដើម្បីសមភាព ដែលមានរយៈចម្ងាយ 5-KM នៅព្រឹកថ្ងៃទី ២៣ ខែមេសា ឆ្នាំ ២០២៣នេះ។ព្រឹត្តិការណ៍រត់ ចម្ងាយ ៥គីឡូម៉ែត្រនេះ រៀបចំឡើងពីព្រឹកព្រលឹម ដោយចាប់ផ្ដើមពីសួនច្បារវត្តបទុមរាជធានីភ្នំពេញ។ កម្មវិធីនេះមាន អ្នកចូលរួមរត់ប្រមាណ ១៥០នាក់ មកពីសមាជិក នៃសមាគឥណ្ឌាក្នុងប្រទេសកម្ពុជា ប្រជាពលរដ្ឋខ្មែរ និងជនបរទេសផ្សេងដទៃទៀតក៏បានចូលរួមផងដែរ។លោកជំទាវ ដេវ៉ាយ៉ានី ខូប្រូហ្កេដ Devayani Khobragade ឯកអគ្គរដ្ឋទូតឥណ្ឌាប្រចាំកម្ពុជា បានលើកឡើងថា ការរៀបចំអោយមានការរត់នេះ គឺដើម្បីរំលឹកខួបកំណើតរបស់លោកបណ្ឌិត ប៊ី អ អាមប៊េដកា B.R. Ambedkar ដែលជាប្រមុខស្ថាបត្យកររដ្ឋធម្មនុញ្ញនៃប្រទេសឥណ្ឌា និងជាមេដឹកនាំសិទ្ធិស៊ីវិល នៃប្រទេសឥណ្ឌា។លោកជំទាវបន្តថា កម្មវិធីរត់នេះ ក៏ដើម្បីអបអរដល់ជីវិតរស់នៅ និងការរួមចំណែករបស់លោកបណ្ឌិត ក្នុងការបណ្តុះនូវគុណតម្លៃនៃរដ្ឋធម្មនុញ្ញក្នុងចំណោមពលរដ្ឋឥណ្ឌា និងដើម្បីផ្សព្វផ្សាយ និងលើកកម្ពស់នូវសមភាព ភាតរភាព មនុស្សជាតិ សេរីភាព សេចក្តីថ្លៃថ្នូរ សេចក្ដីស្រឡាញ់។លោកជំទាវឯកអគ្គរដ្ឋទូត ក៏បានថ្លែងអំណរគុណដល់សមាជិក និងដៃគូសម្រាប់ភាពជោគជ័យនៃការដំណើរការ។ លោកជំទាវចាត់ទុកបណ្ឌិត B.R. Ambedkar ថាជាអ្នកកែទម្រង់សង្គមប្រកបដោយចក្ខុវិស័យ មេធាវី និងស្ថាបត្យករនៃរដ្ឋធម្មនុញ្ញរបស់ប្រទេសឥណ្ឌា ហើយបានលើកឡើងថា ការបង្រៀនរបស់គាត់ស្ដីពីសមភាព យុត្តិធម៌ និងនៅតែបន្តជំរុញ និង ដឹកនាំយើងឆ្ពោះទៅសង្គមមួយដែលមានភាពប្រសើរ។នៅក្នុងអំឡុងព្រឹត្តិការណ៍នោះក៏មានការតាំងពិព័រណ៌រូបថត ដែលបង្ហាញពីការរួមចំណែករបស់លោកបណ្ឌិត ប៊ី អ អាមប៊េដកា B.R.Ambedkar ដែលគាត់គឺជាប្រធានគណៈកម្មាធិការព្រាងច្បាប់រដ្ឋធម្មនុញ្ញឥណ្ឌាដំបូង និងរូបថតរបស់គាត់ជាមួយអ្នកដឹកនាំប្រវត្តិសាស្រ្តនានា៕ អត្ថបទ៖ គឹមហុក

សម្តេចតេជោ ហ៊ុន សែន អញ្ជើញជួបសំណេះសំណាល អបអរសាទរខួបលើកទី១៣៧ ទិវាពលកម្មអន្តរជាតិ១ឧសភា

ភ្នំពេញ៖ នៅព្រឹកថ្ងៃអាទិត្យ ទី២៣ ខែមេសានេះ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជួបសំណេះសំណាល និងអបអរសាទរខួបអនុស្សាវរីយ៍ លើកទី១៣៧ នៃទិវាពលកម្មអន្តរជាតិ១ឧសភា ដែលពិធីនេះ មានការអញ្ជើញចូលរួមពីសមាគម សហជីព កម្មករ និយោជិត តំណាងមន្ត្រីរាជការ គ្រូ បង្រៀន និងតំណាងសមាគមសេដ្ឋកិច្ចក្រៅប្រព័ន្ធសរុបប្រមាណ ៣,៥០០នាក់ នៅសាលមហោស្រពកោះពេជ្រ រាជធានីភ្នំពេញ។សម្តេចបានវាយតំលៃខ្ពស់ចំពោះភាពរីកចម្រើន និងអភិវឌ្ឍន៍របស់ប្រទេសកម្ពុជាក្នុងរយៈពេលកន្លងមក និងបានថ្លែងដោយក្តីមោទនភាពចំពោះកត្តាសុខសន្តិភាពរបស់កម្ពុជា ដែលកត្តាសុខសន្តិភាពនេះហើយវាបានផ្តល់នូវផ្លែផ្កាជាច្រើន សម្រាប់ភាពរីកចម្រើនរបស់ប្រទេសជាតិយើង។ សម្តេចបានវាយតម្លៃខ្ពស់ចំពោះភាពជោគជ័យរបស់កម្ពុជាក្នុងការប្រយុទ្ធប្រឆាំង និងទប់ស្កាត់ជំងឺកូវីដ១៩ ដែលធ្វើអោយយើងបានបើកដំណើរការប្រទេសជាតិឡើងវិញ និងបានដំណើរការសកម្មភាពប្រទេសជាតិជាប្រក្រតីឡើងវិញតាមគន្លងថ្មី។ សម្តេចតេជោនាយករដ្ឋមន្ត្រី បានមានប្រសាសន៍ទៀតថា ការស្វែងរកប្រភពវ៉ាក់សាំងមកចាក់ជូនបងប្អូនប្រជាពលរដ្ឋយើង គឺជាភាពជោគជ័យដ៏ធំធេងក្នុងការប្រយុទ្ធប្រឆាំងជំងឺកូវីដ១៩ ជាមួយនឹងការ ចូលរួមសហការទប់ស្កាត់ពីបងប្អូនប្រជាពលរដ្ឋទាំងអស់គ្នា ទើបយើងទទួលបាននូវភាពជោគជ័យក្នុងការងារនេះ។ សម្ដេចតេជោ ក៏បានមានប្រសាសន៍ពីភាពជោគជ័យ នៃការដឹកនាំកិច្ចប្រជុំកំពូលអាស៊ីអឺរ៉ុប និងកិច្ចប្រជុំកំពូលអាស៊ាន ដែលកម្ពុជាយើងបានធ្វើជាម្ចាស់ផ្ទះកន្លងទៅថ្មីៗនេះ ដែលនោះជាមោទនភាពមួយ សម្រាប់កម្ពុជា ដែលកិច្ចប្រជុំនោះ គឺមានការចូលរួមពីមេដឹកនាំបណ្ដាប្រទេសមហាអំណាចធំៗច្រើនមកចូលរួមប្រជុំនៅទីក្រុងភ្នំពេញ តែបានប្រព្រឹត្តទៅដោយរលូន មិនមានបញ្ហាអ្វីរាំងស្ទះឡើយ។ សម្ដេចតេជោនៅតែបន្តអំពាវនាវឲ្យបងប្អូនប្រជាពលរដ្ឋចូលរួមថែរក្សាសុខសន្តិភាពឱ្យបានគង់វង្ស និងត្រូវខិតខំថែរក្សាស្ថេរភាពម៉ាក្រូសេដ្ឋកិច្ច ទប់ស្កាត់អតិផរណា។ គ្រប់ស្ថាប័នទាំងអស់ត្រូវចេះសន្សំសំចៃក្នុងការចំណាយផ្សេងៗ និងត្រូវចូលរួមលុបបំបាត់ការរកស៊ីគេចពន្ធ ព្រមទាំងត្រូវខិតខំរកចំណូល សម្រាប់ជាតិឲ្យបានច្រើន។ សម្តេចតេជោ បានអំពាវនាវអោយមានការចូលរួមការពារសន្តិសុខសណ្តាប់ធ្នាប់សង្គម បន្តការអនុវត្តគោលនយោបាយភូមិ-ឃុំ មានសុវត្ថិភាពអោយបានខ្ចាប់ខ្ជួនជានិច្ច ដូចជាទប់ស្កាត់ការជួញដូរ និងប្រើប្រាស់គ្រឿងញៀន ទប់ស្កាត់ល្បែងស៊ីសងគ្រប់ប្រភេទ និងរួមគ្នាទប់ស្កាត់បញ្ហាគ្រោះថ្នាក់ចរាចរណ៍ទាំងអស់គ្នា។ សម្ដេចតេជោនាយករដ្ឋមន្ត្រីក៏បានជំរុញឲ្យបន្តយកចិត្តទុកដាក់ដោះ ស្រាយជីវភាពប្រជាពលរដ្ឋដែលខ្សត់ខ្សោយ ជាពិសេសប្រជាពលរដ្ឋដែលងាយរងគ្រោះផ្សេងៗ ដូចជាពលរដ្ឋដែលរងគ្រោះ ក្នុងវិបត្តិកូវីដ១៩ជាដើម។ ត្រូវចូលរួមក្នុងការដោះស្រាយការងារជូនប្រជាពលរដ្ឋ ទាំងការងារសេដ្ឋកិច្ចក្នុងប្រព័ន្ធ និងក្រៅប្រព័ន្ធ គឺត្រូវបន្តយកចិត្តទុកដាក់ជាប់ជាប្រចាំ ជាពិសេសគោលនយោបាយគាំពារសង្គម ដូចជាការអនុវត្តគាំពារស្ត្រីមានផ្ទៃពោះរហូតដល់កូនអាយុ២ឆ្នាំ។ សម្តេចសង្កត់ធ្ងន់ថា ក្នុងនាមជាប្រធានគណបក្សប្រជាជនកម្ពុជា ដែលជាគណបក្សដឹកនាំប្រទេសជាតិ គឺសម្តេចមិនបណ្តោយអោយប្រជាពលរដ្ឋណាម្នាក់ស្លាប់ដោយអត់បាយ ហើយដោយយើងមិនបានដឹងនោះទេ គឺយើងត្រូវតែយកចិត្តទុកដាក់មើលឲ្យបានគ្រប់ជ្រុងជ្រោយចំពោះប្រជាពលរដ្ឋដែលជួបទុក្ខលំបាក។ សម្តេចតេជោ បានមានប្រសាសន៍ថា គិតត្រឹមថ្ងៃទី២៣ ខែមេសា នេះ គឺសល់តែ១២ថ្ងៃទៀតតែប៉ុណ្ណោះ យើងនឹងដល់ព្រឹត្តិការណ៍ ស៊ីហ្គេម និងអាស៊ានប៉ារីហ្គេម ដែលកម្ពុជាត្រូវធ្វើជាម្ចាស់ផ្ទះហើយ ដូច្នេះសម្តេចតេជោ សូមឱ្យរៀបចំព្រឹត្តិការណ៍នេះ អោយបានឲ្យបានល្អប្រសើរ និងរលូន ដើម្បីឱ្យភ្ញៀវអន្តរជាតិទាំងអស់ពេលដែលមកដល់កម្ពុជាម្ដងហើយ គេចង់មកម្ដងទៀតនៅពេលក្រោយ។សម្តេចតេជោមានប្រសាសន៍ទៀតថា បន្ទាប់ពីព្រឹត្តិការណ៍ស៊ីហ្គេមរួចហើយនោះ ព្រឹត្តិការណ៍ នៃការបោះឆ្នោតជាតិ នឹងត្រូវចូលមកដល់ ដូច្នេះសម្ដេចតេជោបាន អំពាវនាវ ធ្វើយ៉ាងណាឲ្យការបោះឆ្នោតជាតិនៅពេលខាងមុខនេះ បានប្រព្រឹត្តទៅដោយរលូន មិនមានការគាបសង្កត់ ដោយសេរី និងយុត្តិធម៌ ពោលគឺត្រូវស្ថិតក្នុងបរិយាកាសល្អបំផុត។សម្ដេចក៏បានជំរុញឲ្យអាជ្ញាធរមូលដ្ឋានខិតខំ ដោះស្រាយសេវាសាធារណៈជូនដល់ប្រជាពលរដ្ឋតាមមូលដ្ឋាន ឲ្យបានល្អប្រសើរ កុំឱ្យប្រជាពលរដ្ឋមានការថ្នាំងថ្នាក់ដោយប្រការអ្វីមួយ គឺត្រូវធ្វើឲ្យបានលឿន ប្រកបដោយប្រសិទ្ធភាពជូនពួកគាត់ ,ក្រសួងការងារនិងបណ្ដុះបណ្ដាលវិជ្ជាជីវៈ ខិតខំដោះស្រាយបញ្ហារបស់ពលករនៅក្រៅប្រទេសឲ្យបានល្អប្រសើរ ជាពិសេសការពារសិទ្ធិកម្មករកុំឲ្យមានការរំលោភបំពានផ្សេងៗ៕ អត្ថបទ៖ មុត សុទ្ធ

អូស្រ្តាលី រកឃើញបំណែកនាវាជប៉ុនដែលបានលិចក្នុងសម័យសង្រ្គាមលោកលើកទី ២

រដ្ឋមន្រ្តីក្រសួងការពារជាតិអូស្រ្តាលី លោក Richard Marles បាននិយាយកាលពីថ្ងៃសៅរ៍ថា បំណែកនាវាជំនួញ ជប៉ុន ដែលបានលិចអំឡុងសម័យសង្រ្គាមលោកលើកទី ២ ទៅជាមួយទាហានអូស្រ្តាលី ៨៦៤នាក់ ត្រូវបានរកឃើញនៅក្នុងសមុទ្រចិនខាងត្បូង ជាការបិទបញ្ចប់ជំពូកសោកនាដកម្មនៅក្នុងប្រវត្តិសាស្រ្តរបស់ប្រទេសមួយនេះ ។ នាវាមួយគ្រឿងនេះរងការវាយប្រហារដោយមីស៊ីលទឹករបស់នាវាមុជទឹកសហរដ្ឋអាមេរិក ពេលវាធ្វើដំណើរតាមផ្លូវចេញពីប្រទេសប៉ាពួ ញូវហ្គីណេ ទៅកាន់កោះហៃណានរបស់ប្រទេសចិន មុនពេលវាលិចនៅជិតតំបន់ឆ្នេរសមុទ្រហ្វីលីពីន កាលពីខែកក្កដា ឆ្នាំ ១៩៤២ និងជាឧបទ្ទេវហេតុមួយដែលត្រូវបានគេចាត់ទុកថាជាគ្រោះមហន្តរាយអំឡុងសម័យសង្រ្គាមដ៏អាក្រក់បំផុតរបស់អូស្រ្តាលី ។ មនុស្សជាង ១ពាន់នាក់ រួមទាំងឈ្លើយសឹក និងជនស៊ីវិលមកពីប្រទេសជាច្រើន ត្រូវបានគេគិតថា បានបាត់បង់ជីវិតរបស់ពួកគេនៅក្នុងសោកនាដកម្មមួយនេះ៕ អត្ថបទ៖ សារ៉ាត់

សម្តេចតេជោ៖ គោរមងារជាសម្ដេច មិនមែនចៃដន្យទេ

ភ្នំពេញ៖ ព្រឹកថ្ងៃទី២៣ ខែមេសា ឆ្នាំ២០២៣នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបង្ហាញការសាទរ ចំពោះសម្ដេចកិត្តិសង្គហបណ្ឌិត មែន សំអន ដែលត្រូវបានព្រះករុណា ព្រះមហាក្សត្រ ព្រះរាជាណាចក្រកម្ពុជាប្រោសព្រះរាជទាននូវគោរមងារជាសម្ដេចនោះ។សម្តេចតេជោបានថ្លែងថា ”មកដល់ពេលនេះស្ត្រីដែលទទួលគោរមងារជាសម្ដេច គឺមាន ៣ រូបរួចមកហើយ។ ទីមួយភរិយារបស់សម្តេច ។ ទីពីរ គឺភរិយារបស់សម្ដេចពញាចក្រី ហេង សំរិន និងទី បី គឺសម្ដេច ម៉ែន សំអន” ។សម្តេចតេជោបន្តថា ”នេះមិនមែនជាការចៃដន្យទេ ប៉ុន្តែជាការខិតខំដែលគោរមងារបែបនេះមាននៅក្នុងប្រទេសរាជានិយមតែប៉ុណ្ណោះ ហើយមិនមែនជាលទ្ធិទំយើស បុគ្គលទេ។ ប៉ុន្តែរឿងនេះវាមានតាំងពីដើមមក ងារជាឧកញ៉ា ជាអ្នកឧកញ៉ា ជាតេជោ ជាសម្ដេច គឺមានតាំងពីណាពីណីមក តែយើងបាត់បង់មួយរយៈដោយសារសង្រ្គាម ហើយការទទួលបានគោរមងារគឺមានគ្រប់លក្ខខណ្ឌអំពីការទទួលបាននូវគោរមងារនេះ ។សម្តេចតេជោ ហ៊ុន សែន ក្នុងឋានៈជាប្រមុខគណបក្សប្រជាជនកម្ពុជាបានថ្លែងក្នុងឱកាសអញ្ជើញជួបសំណេះសំណាល ជាមួយថ្នាក់ដឹកនាំសមាគម សហជីព កម្មករ និយោជិត និងតំណាង មន្ត្រីរាជការគ្រូបង្រៀន និងតំណាងសមាគមសេដ្ឋកិច្ចក្រៅប្រព័ន្ធសរុបប្រមាណ ៣,៥០០នាក់ ៕

សម្ដេចតេជោ ផ្តាំផ្ញើសមាគម សហជីពកម្មករ តំណាង មន្ត្រីរាជការ គ្រូបង្រៀន និងសមាគមសេដ្ឋកិច្ច ក្រៅប្រព័ន្ធបន្តគាំទ្របក្សប្រជាជនកម្ពុជា

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងការកោតសរសើរ និងអំណរគុណយ៉ាងជ្រាលជ្រៅដល់ថ្នាក់ដឹកនាំសមាគម សហជីព កម្មករនិយោជិត តំណាង មន្ត្រីរាជការ គ្រូបង្រៀន និងតំណាងសមាគមសេដ្ឋកិច្ច ក្រៅប្រព័ន្ធដែលបានជឿជាក់ចំពោះគណបក្សប្រជាជនកម្ពុជា ហើយតែងតែផ្តល់នូវការគាំទ្រ និងទំនុកចិត្តឱ្យបក្សដឹកនាំប្រទេសជាតិមានការរីកចម្រើន។សម្តេចតេជោ ប្រមុខរាជរដ្ឋាភិបាលកម្ពុជា និងជាប្រធានគណបក្សប្រជាជនកម្ពុជាបានថ្លែងបែបនេះក្នុងឱកាសអញ្ជើញជាអធីបតីក្នុងពិធីសំណេះសំណាលជាមួយថ្នាក់ដឹកនាំ សមាគម សហជីព កម្មករ និយោជិត និងតំណាងមន្ត្រីរាជការ គ្រូបង្រៀន និងតំណាងសមាគមសេដ្ឋកិច្ចក្រៅប្រព័ន្ធសរុបប្រមាណ ៣,៥០០នាក់ នៅសាលមហោស្រពកោះពេជ្រ រាជធានីភ្នំពេញ ដើម្បីអបអរខួបអនុស្សាវរីយ៍ លើកទី១៣៧ ទិវាពលកម្មអន្តរជាតិ ១ ឧសភា ឆ្នាំ២០២៣ ក្រោមប្រធានបទ «សន្តិភាព ស្ថិរភាព មុខរបរ និងការងារ»។សម្តេចតេជោ បានសម្តែងនូវក្តីរីករាយដែលបានជួបសំណេះសំណាល និងសួរសុខទុក្ខថ្នាក់ដឹកនាំសមាគម សហជីព កម្មករនិយោជិត និងតំណាងមន្ត្រីរាជការ គ្រូបង្រៀន និងតំណាងសមាគមសេដ្ឋកិច្ច ក្រៅប្រព័ន្ធហើយសម្តេចក៏បានអរគុណថ្នាក់ដឹកនាំ សមាគម សហជីព កម្មករនិយោជិត និងតំណាងមន្ត្រីរាជការ គ្រូបង្រៀន និងតំណាងសមាគមសេដ្ឋកិច្ច ក្រៅប្រព័ន្ធទាំងអស់ ដែលបានជឿជាក់ ចំពោះគណបក្សប្រជាជនកម្ពុជា ដែលតែងផ្តល់ការគាំទ្រ និងទំនុកចិត្តឱ្យបក្សដឹកនាំប្រទេសជាតិ រហូតមានការអភិវឌ្ឍរីកចម្រើនលើគ្រប់វិស័យដូចសព្វថ្ងៃ។បើតាមឯកឧត្តមបណ្ឌិត អ៉ិត សំហេង សមាជិកគណៈកម្មាធិការកណ្តាលគណបក្សប្រជាជនកម្ពុជា ប្រធានគណៈចលនាសហជីព និងជាប្រធានគណៈកម្មាធិការដឹកនាំការងារកសាងគណបក្ស កសាងអង្គការសហជីព និងចលនា កម្មករនិយោជិត តាមរោងចក្រ សហគ្រាស គ្រឹះស្ថាន បានលើកបង្ហាញ នូវរបាយការណ៍មួយចំនួនពាក់ព័ន្ធនឹងការងារកសាងសមាជិកបក្សនៅតាមអង្គកាសហជីព កម្មករ និយោជិត តាមរោងចក្រ សហគ្រាស និងគ្រឹះស្ថានការងារនានា។ឯកឧត្តម បណ្ឌិត អ៉ិត សំហេង បានបន្តថា សមាជិកគណៈបក្សប្រជាជនកម្ពុជា នៅតាមអង្គការសហជីព កម្មករ និយោជិត តាមរោងចក្រ សហគ្រាស និងគ្រឹះ ស្ថានការងារនានា ត្រូវបានកសាង និងពង្រីកជាបន្តបន្ទាប់ ជាមួយការគាំទ្រយ៉ាងខ្លាំងក្លាលើការដឹកនាំរបស់សម្តេចតេជោ ហ៊ុន សែន ជាប្រមុខ៕ អត្ថបទ៖ មុត សុទ្ធ

កងកម្លាំងការពារសណ្ដាប់ធ្នាប់ ក្នុងព្រឹត្តិការណ៍ស៊ីហ្គេម បានត្រៀមលក្ខណៈរួចរាល់

ភ្នំពេញ៖ ឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការនគរបាលជាតិ បានថ្លែងថា កងកម្លាំងការពារសណ្ដាប់ធ្នាប់ នៅក្នុងព្រឹត្តិការណ៍ស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ដែលកម្ពុជាធ្វើជាម្ចាស់ផ្ទះ បានត្រៀមលក្ខណៈរួចរាល់ និងស្នើពលរដ្ឋចូលរួមសហការឲ្យបានគ្រប់គ្នា ដើម្បីប្រព្រឹត្តិទៅដោយរលូន និងជោគជ័យ ។បន្ទាប់ពីកិច្ចប្រជុំពង្រឹងកិច្ចសហប្រតិបត្តិការ ផ្លាស់ប្ដូរបទពិសោធន៍ ក្នុងការធានាសន្តិសុខ សម្រាប់ព្រឹត្តិការណ៍អន្តរជាតិ រវាងនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម លឿង តាមក្វាង អនុរដ្ឋមន្រ្តីក្រសួងនគរបាលវៀតណាម កាលពីសៀលថ្ងៃទី២២ ខែមេសា ឆ្នាំ២០២៣ ឧត្តមសេនីយ៍ឯក ឆាយ គឹមខឿន លើកឡើងថា កិច្ចការរៀបចំផែនការការពារសុវត្ថិភាព សន្តិសុខ សណ្តាប់ធ្នាប់ ក្នុងព្រឹត្តិការណ៍ទាំងពីរនេះ ឯកឧត្តមអគ្គស្នងការ បានចង្អុលដឹកនាំ និងផ្សព្វផ្សាយរួចហើយ ទៅកាន់អង្គភាពជំនាញនីមួយៗ និងចាត់ចែងគ្រប់ជ្រុងជ្រោយ ទាំងសណ្តាប់ធ្នាប់សាធារណៈ ការមកដល់របស់គណៈប្រតិភូ តម្រាយផ្លូវ កន្លែងការស្នាក់នៅ ជាពិសេសទីកន្លែងប្រកួត រួមទាំងការបង្ការហេតុការណ៍កើតឡើងជាយថាហេតុជាដើម។អ្នកនាំពាក្យ បានបន្តថា ដើម្បីឲ្យកិច្ចការពារគ្រប់ជ្រុងជ្រោយទៅបាន ចាំបាច់ណាស់ត្រូវមានបទពិសោធន៍ ព្រោះជាព្រឹត្តិការណ៍ដំបូងបំផុតក្នុងរយៈពេល ៦៤ឆ្នាំ ដែលកម្ពុជាខកខានធ្វើជាម្ចាស់ផ្ទះ និងចាត់ទុកថាជាព្រឹត្តិការណ៍ប្រវត្តិសាស្រ្តលើកដំបូងបំផុត ហើយទោះជាមានការជឿជាក់លើសមត្ថភាពប៉ុណ្ណាក៏ដោយ ក៏ត្រូវទាមទាររកបទពិសោធន៍ ពីប្រទេសជិតខាង ។ឧត្តមសេនីយ៍ឯក ឆាយ គឹមខឿន បានបន្ថែមថា សម្រាប់កិច្ចប្រជុំនេះ គឺអនុវត្តទៅតាមផែនការកិច្ចសហប្រតិបត្តិការ រវាងក្រសួងមហាផ្ទៃកម្ពុជា និងក្រសួងនគរបាលវៀតណាម ក្នុងការគាំទ្រគ្នាទៅវិញទៅមក លើការផ្លាស់ប្តូរបទពិសោធន៍ ពាក់ព័ន្ធទៅនឹងកិច្ចការពារសន្តិសុខ សណ្តាប់ធ្នាប់ សម្រាប់ព្រឹត្តិការណ៍ធំៗ ជាពិសេសខ្នាតតំបន់ និងអន្តរជាតិ ។ឯកឧត្តម បានបញ្ជាក់ថា កន្លងមកឯកឧត្តមអគ្គស្នងការ បានដឹកនាំ និងទំនាក់ទំនងសហប្រតិបត្តិការ ជាមួយបណ្តាប្រទេសជាច្រើន ដើម្បីផ្តល់បទពិសោធន៍ ពិសេសទទួលបានជោគជ័យក្នុងការការពារនូវកិច្ចប្រជុំកំពូលអាស៊ាន លើកទី៤០-៤១ និងកិច្ចប្រជុំកំពូលពាក់ព័ន្ធ ជោគជ័យនេះ ក៏មានចំណែកមួយពីកិច្ចសហប្រតិបត្តិការ ក្នុងការពង្រឹងបទពិសោធន៍ជាមួយដៃគូសហប្រតិបត្តិការ៕ អត្ថបទ៖ បាន សុខរិទ្ធ

ព្រះសង្ឃជាង ១០០អង្គនិមន្ត ធ្វើសីមាកម្មក្នុងពិធីបុណ្យបញ្ចុះខណ្ឌសីមា វត្តព្រះបារមីវង្គតបុរី

ភ្នំពេញ៖ នៅព្រឹកថ្ងៃទី២៣ខែមេសានេះ ព្រះសង្ឃ១៦៨អង្គបាននិមន្តធ្វើសីមាកម្ម ក្នុងពិធីបុណ្យបញ្ចុះខណ្ឌសីមា ពុទ្ធាភិសេក និងឆ្លងសមិទ្ធផលនានា ជាកេរមតករបស់អ្នកឧកញ៉ា មហាភកី្តសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក ក្នុងវត្តព្រះបារមីវង្គតបុរី ស្ថិតនៅក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ ការធ្វើសីមាកម្មនេះ ធ្វើឡើងក្រោមព្រះអធិបតីភាពសម្តេចព្រះពុទ្ធជ័យមុនីឃឹម សនព្រះប្រធានលេខាធិការដ្ឋានគណៈសង្ឃនាយក និងជាព្រះមេគណរាជធានីភ្នំពេញ។បើតាមព្រះសាក្យវង្សបណ្ឌិត ស៊ីម សារ៉ាន ព្រះចៅអធិការវត្តព្រះបារមីវង្គតបុរី ហៅវត្តទួលក្រសាំង មានសង្ឃដីការប្រាប់BTVថា សីមាកម្មធ្វើឡើងក្នុងគោលបំណងឱ្យព្រះសង្ឃមានការព្រមព្រៀងគ្នា ជាប្រយោជន៍ដល់ព្រះសង្ឃធ្វើសង្ឃកម្មផ្សេងៗជាច្រើន។ លើសពីនេះ ព្រះចៅអធិការ សូមចម្រើនពរ សម្តេច ទ្រង់ ឯកឧត្តម លោកជំទាវ ញាតិញោមពុទ្ធបរិស័ទ ទាំងអស់ អញ្ជើញមកចូលរួមធ្វើបុណ្យបញ្ចុះខណ្ឌសីមា នៅក្នុងវត្តឲ្យបានច្រើន ដើម្បីទទួលយកផល្លាអានិសង្ឃរៀងៗខ្លួន និងសូមឧទិ្ទសបុណ្យកុសលនេះ ទៅដល់បុព្វការីជនរៀងៗខ្លួន។ ម្យ៉ាងវិញទៀតមហាកុសលដែលកើតឡើងតាមរយៈពិធីបុណ្យ ក្នុងនាមព្រះសង្ឃ គណៈកម្មការ អាចារ្យ ជាពិសេសក្នុងនាមព្រះចៅអធិការវត្ត សូមលើកជាមហាកុសល និងឧទ្ទិសកុសលជូនចំពោះវិញ្ញាណក្ខន្ធដល់អ្នកឧកញ៉ា មហាភកី្តសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក សូមឲ្យលោកទាំងទ្វេរមកអនុមោទនាបុណ្យកុសលក្នុងឱកាសពេលនេះ ហើយបានទៅកើតទេវលោកសួគ៌គ្រប់ៗជាតិ កុំបីអាក់ខានឡើយ។ គួរបញ្ជាក់ដែរថា ពិធីបុណ្យបញ្ចុះខណ្ឌសីមា ពុទ្ធាភិសេក និងឆ្លងសមិទ្ធផលនានា ជាកេរមតករបស់អ្នកឧកញ៉ា មហាភកី្តសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក ស្ថិតក្នុងវត្តព្រះបារមីវង្គតបុរី ផ្តួចផ្តើមរៀបចំដោយក្រុមគ្រួសារសម្តេចតេជោហ៊ុន សែន ព្រះសង្ឃ គណៈកម្មការ អាចារ្យ និងរដ្ឋបាលរាជធានីភ្នំពេញ ដែលមានរយៈពេល៣យប់៤ថ្ងៃ ពោលចាប់ពីថ្ងៃទី២១ដល់ថ្ងៃទី២៤ ខែមេសា ឆ្នាំ២០២៣។នៅថ្ងៃទី២៤ ខែមេសាស្អែកនេះ ជាថ្ងៃកាត់ឫសសីមា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត នឹងអញ្ជើញអុជទៀនធូបគោរពបូជាជូនដួងវិញ្ញាណក្ខន្ធ អ្នកឧកញ៉ាមហាភក្តីសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក នៅមហាចេតិយ។ បន្តមកសម្ដេចតេជោ និងសម្ដេចកិត្តិព្រឹទ្ធបណ្ឌិត នឹងអញ្ជើញជាអធិបតីក្នុងអង្គពិធីសំណេះសំណាល, កាត់ខ្សែបូ និងកាត់ឫសសីមា វេររណ្តាប់កាន់អង្គប្រគេនព្រះសង្ឃ និងដារឆ្លងជាកិច្ចបង្ហើយបុណ្យ។ អត្ថបទ៖ទូច សោភ័ណ

បណ្ដាញសង្គម

ព័ត៌មានថ្មីៗ

អឺរ៉ុប ស្ថិតក្នុងការព្រមានខ្ពស់ ខណៈរលកកម្ដៅខ្លាំង នឹងរំកិលទៅទិសខាងកើត និងខាងត្បូង

សហរដ្ឋអាមេរិក វាយប្រហារលើអ៊ីរ៉ង់ក្នុងការឆ្លើយតបទៅនឹងការវាយប្រហារលើនាវាដឹកទំនិញ

ប្រទេសវ៉េណេស៊ុយអេឡា ជួបប្រទះរញ្ជួយដីថ្មីមួយកម្រិត ៤.៩ រ៉ិចទ័រ ប៉ុន្មានថ្ងៃបន្ទាប់ពីការរញ្ជួយដីធំៗ២លើក

ចំនួនអ្នកស្លាប់កើនឡើងដល់ជាង៩0០នាក់ក្នុងរញ្ជួយដីនៅវ៉េណេស៊ុយអេឡា ខណៈគ្រួសារជាច្រើនអន្ទះសាររង់ចាំព័ត៌មាន

ប្រធានគណៈប្រចាំការនៃគណៈអចិន្ត្រៃយ៍យុវជនគណបក្សប្រជាជនកម្ពុជាថ្នាក់កណ្ដាល និងលេខាទី១ នៃគណៈកម្មាធិការមជ្ឈិមសម្ព័ន្ធយុវជនកុម្មុយនីស្តចិនចុះអនុស្សរណៈស្ដីពីកិច្ចសហប្រតិបត្តិការជាមួយគ្នា

កសិដ្ឋានចិញ្ចឹមសត្វគោ និងជ្រូកនៅប្រទេសបែលហ្ស៊ិក កំពុងជួបការលំបាក ដោយសាររលកកម្តៅ

នយោបាយឈ្នះ-ឈ្នះនាំឱ្យកម្ពុជាសម្រេចបានសន្តិភាព និងការអភិវឌ្ឍដូចសព្វថ្ងៃ

អ៊ីរ៉ង់៖ ការឆ្លងកាត់ច្រកសមុទ្រ Hormuz មិនត្រូវបានធានាទេ បើគ្មានការសម្របសម្រួលជាមួយទីក្រុងតេអេរ៉ង់

ប្រធានាធិបតីជិតឡើងកាន់អំណាចកូឡុំប៊ី ចេញឱសានវាទដល់ក្រុមឧក្រិដ្ឋកម្មប្រដាប់អាវុធ

មន្ត្រីជាន់ខ្ពស់៖ លីបង់ទាមទារឲ្យអ៊ីស្រាអែលដកទ័ពទាំងស្រុង ក្នុងកិច្ចព្រមព្រៀងណាមួយ នៅទីក្រុងវ៉ាស៊ីនតោន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877